ཕྱིར་བཟློག་འཁོར་ལོ་འབར་བའི་སྒྲུབ་ཐབས།
༄༅། །ཕྱིར་བཟློག་འཁོར་ལོ་འབར་བའི་སྒྲུབ་ཐབས་བཞུགས་སོ། །
རྒྱ་གར་སྐད་དུ།། །ཙཀྲ་ཛྭ་ལ་ནོ་བི་ཀ་ནཱ་མ། བོད་སྐད་དུ། འཁོར་ལོ་འབར་བ་ཞེས་བྱ་བའི་སྒྲུབ་ཐབས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་ཅིག་ན། བཅོམ་ལྡན་འདས་རྡོ་རྗེའི་གདན་ལ་བཞུགས་ཏེ། བདུད་བཏུལ་བའི་ཚེ། རིག་འཛིན་དང་བྱང་ཆུབ་སེམས་དཔའ་རྣམས་ཀྱིས་འདི་སྐད་ཅེས་ཞུས་སོ། །བཅོམ་ལྡན་འདས་བདག་ཅག་རིག་འཛིན་བསྒྲུབ་པར་བྱེད་པ་ལ་བར་དུ་གཅོད་པའི་དགྲ་བགེགས་མང་ན་འདི་ལ་ཐབས་ཇི་ལྟ་བགྱི། ཞེས་ཞུས་སོ། །བཅོམ་ལྡན་འདས་ཀྱིས་བཀའ་སྩལ་པ། འཁོར་ལོ་འབར་བ་ཞེས་བྱ་བའི་སྔགས་དང་སྒྲུབ་ཐབས་ཡོད་ཀྱིས། འདི་ལོངས་ཤིག །ཆོངས་ཤིག །ཀློག་ཅིག །ཡིད་ལ་གྱིས་ཤིག །སྔགས་འདི་བཟླས་པ་ཙམ་གྱིས་བགེགས་ཐམས་ཅད་ལས་རྒྱལ་བར་འགྱུར་རོ། །བགེགས་ཐམས་ཅད་ལས་རྒྱལ་ཞིང་ཉམས་ང་བ་མེད་པར་འགྱུར་རོ། །སྔགས་ནི་འདིའོ། །ཨོཾ་དྷུ་རུ་དྷུ་རུ་ཙཀྲ༔ ཛ་ཡ་ཛ་ཡ་ཙཀྲ༔ ཧ་ན་ཧ་ན་ཙཀྲ༔ བྷུ་རུ་བྷུ་རུ་ཙཀྲ༔ བྷྲ་མ་ར་བྷྲ་མ་ར་ཙཀྲ༔ བྷེ་དུ་མ་ནི་ཙཀྲ༔ ཛྭ་ལ་ཛྭ་ལ་ཙཀྲ༔ སཾ་བྷ་ཝེ་ག་ན་ན་ཡ་ས་ར་ཙཀྲ༔ སཱ་ལ་ཡ་སཱ་ལ་ཡ་ཙཀྲ༔ ནཱ་ག་ཤ་ཡ་ནཱ་ག་ཤ་ཡ་ཙཀྲ༔ བཾ་བཾ་ཙཀྲ་ཧཱུྃ་ཧཱུྃ་ཕཊ་ཕཊ༔ ས་མནྟ་ག་ར་ཙཀྲ༔ ཏིཔྟ་ཙཀྲ་ཧཱུྃ་ཕཊ༔ རང་ཉིད་ཤཱཀ་ཐུབ་སྐུར་གྱུར་ཕྱག་མཐིལ་ན། །ཉི་ཟླ་གསལ་བའི་བར་དུ་ཀེག་ངན་དང་། །སྲི་སོགས་གནོད་བྱེད་གདོན་བགེགས་མ་ལུས་པ། །ཕྱེ་མར་བཏགས་ནས་རྗེས་ཤུལ་མེད་པར་གྱུར། །ན་མོ་རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། སངས་རྒྱས་ཀྱི་བཀའ་བདེན༴ ཆོས་ཀྱི་བཀའ་བདེན་པ་དང་། དགེའདུན་གྱི་བཀའ་བདེན༴ བླ་མ་རྡོ་རྗེ་འཛིན་པའི་བཀའ་བདེན༴ མཉམ་མེད་ཤཱཀྱའི་རྒྱལ་པོའི་ལྷ་ཚོགས་རྣམས་ཀྱི་བཀའ་བདེན་པ་དང་། གསང་སྔགས་དང་རིག་སྔགས་དང་གཟུངས་སྔགས་རྣམ་པར་དག་པའི་བདེན་པ་དང་། རིག་འཛིན་སྔགས་འཆང་བདག་གི་བདེན་པ་དང་། ཆོས་ཉིད་ངོ་བོ་ཀ་ནས་དག་ཅིང་ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང་། །བདེན་པ་ཆེན་པོའི་མཐུ་དང་ནུས་པ་ལ་བརྟེན་ནས། །བདག་ཅག་དཔོན་སློབ་ཡོན་མཆོད་འཁོར་དང་བཅས་པའི་ལོ་ཀེག །ཟླཀེག །ཞག་ཀེག །ཟ་ཀེག །ཆེ་སྲི། ཆུང་སྲི། དར་སྲི། དུར་སྲི། ནད་སྲི། གོད་སྲི། ཕུང་སྲི་ཐམས་ཅད་གནོད་བྱེད་དགྲ་དང་བགེགས་ཀྱི་སྟེང་དུ་བཟློག་བཟློག །བྷྱོ་བྷྱོ་མཱ་ར་ཡ་རྦད་རྦད། །སྔགས་འདི་བཟླས་པ་ཙམ་གྱིས་སྲི་ཅན་དྲག་པོ་སྔངས་ཤིང་། །ཤི་ཁ་བྱེ་བ་སྲི་ལས་ཐར་བར་འགྱུར་རོ། །དེ་སྐད་ཅེས་བཀའ་སྩལ་བ་དང་། །རིག་འཛིན་དང་བྱང་ཆུབ་སེམས་པའི་ཚོགས་ཡི་རང་སྟེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཁོར་ལོ་འབར་བཞེས་བྱ་བའི་གཟུངས་རྫོགས་སོ།། ༈ རྫོགས་པའི་བྱང་ཆུབ་སྒྲུབ་པ་ལ། །ཕྱི་དང་ནང་གི་འཚེ་བ་ཡིས། །བར་དུ་གཅོད་པའི་གདོན་བགེགས་ཀུན། །ཉེ་བར་ཞུ་བར་མཛད་དུ་གསོལ། །ས་མ་ཡ། རྒྱ་རྒྱ་རྒྱ། ཞེས་སྤྲུལ་སྐུ་བཟང་པོ་གྲགས་པས་རྒྱང་ཡོན་བོ་ནས་གཏེར་ནས་བཏོན་ཏེ་རིག་འཛིན་རྒོད་ལྡེམ་ལ་གནང་བའོ། །སྲུང་འཁོར་གྱི་ངག་འདོན་འདི་རྣམས་ཀུན་མཁྱེན་ལྔ་པས་མཛད་པའོ། དགེའོ། དགེའོ། དགེའོ། བཀྲ་ཤིས་ཤོག །།