མངོན་རྟོགས་ལྗོན་ཤིང་གི་ཡི་གེ་དག་བཅོས་དང་མཆན།
གང་ཟག་གི་རྒྱུད་ལ་སྐྱེ་བའི་རིམ་པའི་མངོན་པར་རྟོགས་པ།
༄༅། །མི་འཕྲོག་པའི་མཁྱེན་རབ་དང་ཐུགས་རྗེ་ལྡན་པ་སྡེ་གཞུང་སྤྲུལ་སྐུ་རིན་པོ་ཆེ་འཇམ་དབྱངས་ཀུན་དགའ་བསྟན་པའི་རྒྱལ་མཚན་དཔལ་བཟང་པོའི་བཀའ་འབུམ་ལས་མངོན་རྟོགས་ལྗོན་ཤིང་གི་ཡི་གེ་དག་བཅོས་དང་མཆན་བཞུགས་སོ། །རྗེ་བཙུན་བླ་མ་རྣམས་ལ་གུས་པས་ཕྱག་འཚལ་ལོ། །རྡོ་རྗེ་འཆང་དབང་གསུང་གི་རིན་ཆེན་གཏེར། །དྲི་མེད་རྒྱུད་དོན་འབྱེད་པར་བྱེད་པའི་ངག །རྟོག་གེའི་དུག་ཆུས་མ་སྦགས་དེ་ཉིད་དོན། །མཚུངས་མེད་བླ་མའི་གསུང་རབ་རྟག་ཏུ་རྒྱལ། །ཤེས་རབ་སྤྲོས་པ་དང་བྲལ་བ་ཐབས་ཐུགས་རྗེ་ཆེན་པོ་ཟུང་དུ་འཇུག་པའི་བདག་ཉིད་ཅན། །ཟུང་འཇུག་དེ་ཡང་ལྷན་ཅིག་སྐྱེས་པ་བདེ་བ་ཆེན་པོའི་ངོ་བོར་གཟིགས་པ། །རྡོ་རྗེ་འཆང་དཀྱིལ་འཁོར་གྱི་གཙོ་དང་དབྱེར་མ་མཆིས་པའི་བླ་མ་ཆེན་པོ་ལ། །འདི་འང་བརྗོད་བྱ་དང་མཐུན་པའི་མཆོད་བརྗོད་དོ། །སྤྱི་བོར་ཐལ་སྦྱར་བཏུད་བྱས་ནས། །རྡོ་རྗེ་ལྟ་བུའི་རྒྱུད་དོན་གྱི། །མངོན་པར་རྟོགས་པ་གསལ་བྱེད་འདི། །མན་ངག་བྲལ་བའི་སྐྱེ་བོ་ལ། །བརྩེ་བས་གསལ་པོར་བྲི་བར་བྱ། །ཡང་དག་པར་རྫོགས་པའི་སངས་རྒྱས་རྗེ་བཙུན་རྡོ་རྗེ་བདག་མེད་མ་ལས་བདེ་བར་གཤེགས་པའི་བཀའ་རབ་འབྱམས་ཀྱི་གསུང་གི་བདུད་རྩི་དུག་ཆུ་དང་བྲལ་བ་གསན་པའི་སྙིམ་པས་ངོམས་པར་གསོལ་བས། སངས་རྒྱས་ཀྱི་གསུང་ལ་ཐུགས་ཀྱི་སྣང་བ་ཐོབ་པའི་སློབ་དཔོན་ཆོས་སྐྱོང་མི་འཕྲོག་པའི་མཁྱེན་རབ་དང་ཐུགས་རྗེར་ལྡན་པའི་དངོས་གྲུབ་ཀྱི་མཆོག་བརྙེས་ནས་རྣལ་འབྱོར་གྱི་དབང་ཕྱུག་བིཪྺ་པ་ཞེས་བྱ་བར་ཡོངས་སུ་གྲགས་སོ། །སློབ་དཔོན་ཆེན་པོ་དེའི་ཡང་དག་པའི་གདམས་ངག་ལུང་དང་བཅས་པ་སློབ་དཔོན་ཀཧྣ་པ་ཞེས་བྱ་བ་ལས་བརྒྱུད་དེ་འོངས་པ་དང་ལྡན་པའི་པཎྜི་ཏ་ག་ཡ་དྷ་ར་དང་། དཔལ་བིཪྺ་པའི་སློབ་མར་ཡང་གྲགས་མོད་ཀྱི་སྤྲུལ་པའི་སྐུ་ཡེ་ཤེས་ཀྱི་མཁའ་འགྲོ་མ་ལས་དངོས་སུ་གསན་ཞིང་མཆོག་གི་དངོས་གྲུབ་བརྙེས་པའི་སློབ་དཔོན་དཔལ་ཌོམྦི་ཧེ་རུ་ཀའི་གདམས་པ་དང་ལུང་ཕྱིན་ཅི་མ་ལོག་པར་བརྒྱུད་པ་དང་ལྡན་པའི་དགེ་སློང་དཔའ་བོ་རྡོ་རྗེ་ཞེས་བྱའོ། །དེ་ལྟར་མཁས་པ་གཉིས་ཀྱི་གསུང་གི་བདུད་རྩི་བབས་པ་རྗེ་བཙུན་འབྲོག་མི་ཤཱཀྱ་ཡེ་ཤེས་ལས་བརྒྱུད་པའི་ཧེ་བཛྲ་རྩ་བ་དང་། བཤད་པའི་རྒྱུད་གསུམ་གཅིག་ཏུ་བསྲེས་པའི་མངོན་པར་རྟོགས་པའི་ཡི་གེ་བླ་མ་གོང་མ་རྣམས་ཀྱིས་མཛད་པ་མི་གསལ་བ་གསལ་བར་མཛད་པའི་ཕྱིར་བདག་གི་བླ་མས་རྒྱུད་ཀྱི་ལུང་རྣམས་གསུངས་པ་བཞིན་ཕྱོགས་གཅིག་ཏུ་བསྡེབས་ཏེ་ཅུང་ཟད་གསལ་བར་མཛད་དོ། །དེ་ཡང་གསལ་བར་བྱ་བའི་ཕྱིར་སློབ་དཔོན་གྱི་ཞལ་སྔ་ནས་ཀྱང་བྲིས་ཤིག་ཅེས་གསུངས་ཤིང་། རྒྱུད་ཀྱི་དོན་ཤེས་པར་འདོད་པའི་སློབ་མས་ཀྱང་གསོལ་བ་བཏབ་པས་ན་འདི་བྲི་བ་ལ་སྐྱོན་མེད་དོ། །དེ་ཡང་ཧ་ཅང་རྒྱས་པ་དང་བསྡུས་པས་འཇིགས་པས་བླ་མ་རྣམས་ཀྱིས་གསུངས་པ་བཞིན་བྲི་བར་བྱའོ། །དེ་ལ་གང་ཟག་གི་རྒྱུད་ལ་སྐྱེ་བའི་རིམ་པའི་མངོན་པར་རྟོགས་པ་ནི་གསུམ་སྟེ། རྒྱུའི་རྒྱུད་སྔོན་དུ་འགྲོ་བའི་རྟེན་གྱི་གང་ཟག་དང་། དེས་ཉམས་སུ་བླང་བའི་ཐབས་ཀྱི་རྒྱུད་དང་། དེ་ཉམས་སུ་བླངས་པ་ལས་བྱུང་བ་འབྲས་བུའི་རྒྱུད་དོ། །དེ་ཡང་འདུས་པའི་རྒྱུད་ཕྱི་མ་ལས། རྒྱུད་ནི་རྒྱུན་ཞེས་བྱ་བ་སྟེ། །རྒྱུད་དེ་རྣམ་པ་གསུམ་དུ་འགྱུར། །གཞི་དང་དེ་ཡི་རང་བཞིན་དང་། །མི་འཕྲོག་པ་ཡིས་རབ་ཕྱེ་བའོ། །རང་བཞིན་རྣམ་པ་རྒྱུ་ཡིན་ཏེ། །གཞི་ནི་ཐབས་ཞེས་བྱ་བར་བརྗོད། །དེ་བཞིན་མི་འཕྲོག་འབྲས་བུ་སྟེ། །གསུམ་གྱིས་རྒྱུད་ཀྱི་དོན་བསྡུས་པའོ། །ཞེས་གསུངས་པས་སོ། །དེ་ལ་ཐོག་མར་རྒྱུའི་རྒྱུད་སྔོན་དུ་འགྲོ་བ་རྟེན་གྱི་གང་ཟག་ནི་སློབ་དཔོན་གརྦྷ་རི་པས་རྒྱུད་ལ་འཇུག་པ་ཞེས་བྱ་བ་ལས། རྒྱུ་རིགས་སྤང་བྱ་རྐྱེན་ལ་ལྟོས། །གང་ཟག་རྣམ་པ་བཞིར་ནི་བཤད། །ཅེས་པ་ལ་བརྟེན་ནས། གང་ཟག་ནི་བཞི་སྟེ། རྒྱུ་ལ་ལྟོས་པ་དང་། རིགས་ལ་ལྟོས་པ་དང་། སྤང་བྱ་ལ་ལྟོས་པ་དང་། རྐྱེན་ལ་ལྟོས་པའི་གང་ཟག་གོ། དེ་དག་ཀྱང་གསུམ་དུ་འདུ་སྟེ། དང་པོ་ནི་སྤྱིར་འབྲས་བུ་འགྲུབ་པའི་རྒྱུ་དང་ལྡན་པ་དང་། གཉིས་པ་དང་། གསུམ་པ་ནི་རྐྱེན་ཐ་དད་པ་ལ་ཞུགས་ན་འགྲུབ་ཉེ་བ་དང་། བཞི་པ་ནི་དེ་དག་གི་གནས་སྐབས་ཀྱི་ཆོས་ལ་དགོངས་ཏེ་གསུངས་པའོ། །དེ་ལ་དང་པོ་ལ་བཞི། སེམས་ཅན་རྣམས་སངས་རྒྱས་ཀྱི་སྙིང་པོ་ཅན་དུ་བསྟན་པ་དང་། རྒྱུ་གང་གིས་གང་དུ་འཁོར་བ་དང་། རྐྱེན་གང་གིས་ཇི་སྲིད་ཅིག་ཏུ་འཁོར་བ་དང་། སེམས་སྦྱངས་ན་གྲོལ་བར་འགྱུར་བའི་ཚུལ་ལོ། །དང་པོ་ནི། རིགས་ཀྱི་སྤྱི་ཉེ་བར་གཟུང་ནས་རིགས་དྲུག་གིས་བསྡུས་པའི་སེམས་ཅན་ཐམས་ཅད་ཀྱང་རྒྱུད་འདིར་འཇུག་པའི་སྐལ་བ་དང་ལྡན་པ་སངས་རྒྱས་ཀྱི་སྙིང་པོ་ཅན་གྱི་རྟེན་གྱི་གང་ཟག་ཡིན་ཏེ། རྩ་རྒྱུད་ཕྱི་མའི་བཞི་པ་ལས། རང་བཞིན་ལྷུན་གྲུབ་ཀྱི་སངས་རྒྱས་མ་ཡིན་སེམས་ཅན་ནི། །གཅིག་ཀྱང་ཡོད་པ་མ་ཡིན་ཏེ། །དམྱལ་བ་ཡི་དགས་བྱོལ་སོང་དང་། །ལྷ་དང་ལྷ་མིན་མི་རྣམས་དང་། །བཤང་བའི་སྲིན་བུ་ལ་སོགས་པ། །ལྷ་དང་ལྷ་མ་ཡིན་གྱིས་ང་། །གཉུག་མ་བདེ་བ་ཆེན་པོའི་ཡེ་ཤེས་དག་པ་ཉིད་གང་ཕྱིར་མི་ཤེས་པ་དེའི་ཕྱིར་འཁོར་བར་འཁྱམས་སོ། །རྟག་ཏུ་རང་བཞིན་གྱི་བདེ་བའི་ཡེ་ཤེས་ཅན་ན།ོ། འཇག་ིརྟན་ེཁམས་ན་གང་ིདུ་ཡང་། །སངས་རྒྱས་གཞན་དུ་རྙད་ེམི་འགྱུར། །སེམས་ནི་རྫོགས་པའི་སངས་རྒྱས་ཉིད། །སངས་རྒྱས་གཞན་དུ་བསྟན་པ་མེད། །ཅེས་གསུངས་སོ། །དེ་ལྟར་སེམས་ཅན་ཐམས་ཅད་སངས་རྒྱས་ཀྱི་སྙིང་པོ་ཅན་ཡིན་ན། མདོ་སྡེ་རྒྱན་ལས། རིགས་ཆད་པའི་གང་ཟག་གསུངས་པ་དང་མི་འགལ་ལམ་ཞེ་ན། མི་འགལ་ཏེ། དེ་ནི་སེམས་ཙམ་པའི་དབང་དུ་བྱས་ནས་དྲང་བའི་དོན་གྱི་བཤད་པ་ཡིན་གྱི། འདིར་ནི་རིགས་ཆད་པ་མི་སྲིད་དེ། རྒྱུད་བླ་མ་ལས་ཀྱང་། རྫོགས་པའི་སངས་རྒྱས་ཀྱི་ཆོས་སྐུ་ནི་འཕྲོ་ཞིང་འབྱུང་བའི་ཕྱིར་དང་། །སེམས་ཅན་དང་སངས་རྒྱས་ཀྱི་ཆོས་ཉིད་དེ་བཞིན་ཉིད་དབྱེར་མེདཔའི་ཕྱིར་དང་། །སངས་རྒྱས་འབྱུང་རུང་གི་རིགས་ཡོད་པའི་ཕྱིར་ན་སེམས་ཅན་རྣམས། །རྟག་ཏུ་སངས་རྒྱས་སྙིང་པོ་ཅན། །ཞེས་གསུངས་སོ། །དེ་ལྟར་རང་བཞིན་གྱིས་སངས་རྒྱས་ཡིན་ན་འབད་པ་མེད་པར་གྲོལ་བར་འགྱུར་རོ་སྙམ་ན། དེ་ལྟར་རང་བཞིན་གྱིས་དག་ཀྱང་གློ་བུར་གྱི་དྲི་མས་བསྒྲིབས་པའི་ཕྱིར་འཁོར་བ་ཉིད་ཡིན་ནོ། །གཉིས་པ་རྒྱུ་གང་གིས་གང་དུ་འཁོར་བ་ནི། མ་རིག་པའི་རྩ་བ་ལས་བྱུང་སྟེ། རྟེན་འབྲེལ་བཅུ་གཉིས་ཉོན་མོངས་པ་གསུམ་གྱིས་བསྡུས་ནས་སྐྱེ་བ་ཡིན་ཏེ། རྩ་རྒྱུད་ཕྱི་མའི་བཞི་པ་ལས། བྱིས་པ་མི་ཤེས་པས་བསྒྲིབས་པས། །འདི་ཡི་འགྲོ་བ་རང་བཞིན་གྱིས་སངས་རྒྱས་ཡིན་པར་མི་ཤེས་པ། །འགྲོ་བ་དྲུག་གི་སྲིད་པའི་མཐར། །གང་ཞིག་རྨོངས་པ་འཁོར་ར་འགྱུར། །ཞེས་གསུངས་ཏེ་ཞིབ་ཏུ་བླ་མས་བཤད་པར་བྱའོ། །གསུམ་པ་རྐྱེན་གང་གིས་ཇི་སྲིད་ཅིག་ཏུ་འཁོར་བ་ནི། སཾ་པུ་ཊའི་དང་པོའི་དང་པོ་ལས། ཇི་སྲིད་ལུས་ཕུང་པོ་ལྔ་ལ་ངར་འཛིན་གྱིས་རྣམ་པར་གནས་པ། །དེ་ཡིས་མི་དགེ་བའི་ལས་དང་ལས་དེས་དགེ་བའི་ལས་ཀྱང་གསོག་ཟེར་བ་མིན་འགྱུར་པས། །དགེ་དང་མི་དགེ་གང་ཅུང་ཟད། །བྱས་པའི་ལས་ནི་ཐམས་ཅད་བྱེད། །ཅེས་གསུངས་ཏེ། ཇི་སྲིད་དུ་ངར་འཛིན་པ་དང་ང་ཡིར་འཛིན་པ་མཚན་མར་བཅས་པ་ཡོད་པ་དེ་སྲིད་དུ་དངོས་པོ་ལ་མངོན་པར་ཞེན་པ་སྐྱེ་ལ། དེ་ལ་བརྟེན་ཏེ་ཚུལ་བཞིན་མ་ཡིན་པ་ཡིད་ལ་བྱེད་པ་སྐྱེ་སྟེ། དེ་དག་ནི་ཉོན་མོངས་པའི་ཀུན་ནས་ཉོན་མོངས་པ་སྟེ་མ་རིག་པ་ཡིན་ལ། དེ་ལ་བརྟེན་ཏེ་ལས་ཀྱི་ཀུན་ནས་ཉོན་མོངས་པ་སྐྱེ་ཞིང་། དེ་ལས་སྐྱེ་བའི་ཀུན་ནས་ཉོན་མོངས་པ་སྟེ། རྟེན་འབྲེལ་བཅུ་གཉིས་ཉོན་མོངས་པ་གསུམ་གྱིས་བསྡུས་པས་འཁོར་བར་འཁྱམ་ཞེས་བྱ་བའི་དོན་ནོ། །འཁོར་བར་འཁྱམ་པའི་ཚུལ་རྒྱས་པར་གཞན་དུ་ཤེས་པར་བྱའོ། །བཞི་པ་སེམས་སྦྱངས་ན་གྲོལ་བར་འགྱུར་བ་ནི། དེ་ལྟར་སེམས་རང་བཞིན་གྱིས་དག་ཀྱང་གློ་བུར་གྱི་དྲི་མས་འཁོར་བར་གྱུར་པས་ན། འདི་ལ་བྱེད་པ་པོ་གཞན་མེད་ཅིང་སེམས་ཉིད་རྟོགས་པ་དང་མ་རྟོགས་པའི་དབྱེ་བས་འཁོར་བ་དང་མྱ་ངན་ལས་འདས་པར་འགྱུར་བས་སེམས་འདི་ལེགས་པར་སྦྱང་བར་བྱ་བ་བསྟན་པ་ནི། གུར་ལེའུ་དང་པོ་ལས། སེམས་ཀྱི་རྡོ་རྗེ་སྟོང་ཉིད་ལས་བྱུང་བས། །སེམས་ཅན་མཚན་ཉིད་སྣ་ཚོགས་རང་བཞིན་ཅན། །སེམས་ནི་རང་བཞིན་དག་ཀྱང་རང་གི་རྣམ་རྟོག་གིས། །སྐྱེ་བོ་རྣམས་དྲི་མས་ནག་པོར་བྱས། །དེ་ཕྱིར་ཀུན་ཏུ་རབ་འབད་པས། །སེམས་ཀྱི་རྡོ་རྗེའི་དྲི་མ་སྦྱང་བར་བྱའོ། །སེམས་དག་པ་ནི་ཟག་མེད་ཀྱི་བདེ་བ་ཡིན་ནོ། །ཉོན་མོངས་དུག་ནི་ཐམས་ཅད་འཕྲོག་སྟེ་འཇོམས་སོ། །ཅེས་གསུངས་སོ། །དོ་ཧ་ལས་ཀྱང་། སེམས་ཉིད་དེ་ཀུན་གཞི་གཅིག་པུ་ཀུན་གྱི་ས་བོན་ཏེ། །ཀུན་གཞི་གང་ལ་ཐབས་ཀྱིས་ཟིན་མ་ཟིན་ལས་སྲིད་དང་མྱ་ངན་འདས་འཕྲོ་བ། །འདོད་པའི་འབྲས་བུ་ཐམས་ཅད་སྟེར་བྱེད་པའི། །ཡིད་བཞིན་ནོར་འདྲའི་སེམས་ལ་ཕྱག་འཚལ་ལོ། །ཞེས་སོ། །སེམས་དེ་ཡང་ཐོག་མ་དང་། ཐ་མ་དང་། རྟག་པ་དང་། ཆད་པ་ལས་ཡོངས་སུ་གྲོལ་བས་ནམ་མཁའ་ལྟ་བུ་སྟེ། རྡོ་རྗེ་གུར་ལས། ཇི་སྲིད་ནམ་མཁའ་མི་འཇིག་པ། །ནམ་མཁའ་ཇི་བཞིན་དེ་བཞིན་དུ་སེམས་ཀྱི་ཆོས་ཉིད་ཀྱང་མི་འཇིག་གོ། ཞེས་གསུངས་སོ། །དེ་དག་ནི་རྒྱུ་ལ་ལྟོས་པའི་རྟེན་གྱི་གང་ཟག་ཅེས་བྱ་བ་རྒྱུད་འདིར་འཇུག་ཏུ་རུང་བའི་སྐལ་བ་དང་ལྡན་པའི་གང་ཟག་སྟེ། འདི་ནི་རྒྱུའི་རྒྱུད་ཅེས་བྱའོ། །རིགས་ལ་ལྟོས་པ་དང་། སྤང་བྱ་ལ་ལྟོས་པའི་གང་ཟག་འདི་གཉིས་ནི་རྐྱེན་ཐ་དད་ལ་ཞུགས་ན་གྲུབ་ཉེ་བའི་གང་ཟག་ཅེས་བྱ་བ་ཡིན་ཏེ། གང་ཟག་གི་ཁམས་དང་བག་ལ་ཉལ་དང་རྗེས་སུ་མཐུན་པའི་ཕྱིར་བཅོམ་ལྡན་འདས་ཀྱིས་ལམ་སྣ་ཚོགས་སུ་གསུངས་པ་ཡིན་ནོ། །དེ་ལ་དང་པོ་རིགས་ལ་ལྟོས་པ་ལ་ཡང་རྩ་རྒྱུད་ཕྱི་མའི་བཅུ་གཅིག་པ་ལས། གང་གི་སྲིན་ལག་རྩ་བ་ལ། །རྡོ་རྗེ་རྩེ་དགུ་པར་བྱུང་བ། །མི་བསྐྱོད་པ་ཡི་རིགས་མཆོག་ཉིད། །ཅེས་བྱ་བ་ལ་སོགས་པ་དང་། གཉིས་པ་ནི། རྣལ་འབྱོར་པ་གང་ནག་པོ་ཆེ། །དེ་ཡི་ལྷ་ནི་མི་བསྐྱོད་པ། །ཞེས་བྱ་བ་ལ་སོགས་པ་རྒྱས་པར་ཤེས་པར་བྱའོ། །སྤང་བྱ་ལ་ལྟོས་པ་ནི། གུར་ལེའུ་དང་པོ་ལས། འདོད་ཆགས་ཞེ་སྡང་གཏི་མུག་དང་། །ང་རྒྱལ་སེར་སྣའི་སྐྱེ་བོ་རྣམས། །བསྡུ་ཕྱིར་རང་གི་འཁོར་ལོ་ལ། །རྡོ་རྗེའི་གཟུགས་ནི་དུ་མ་འཛིན། །ཅེས་གསུངས་ཏེ། གང་ཞེ་སྡང་ཤས་ཆེ་བ་ནི་མི་བསྐྱོད་པའི་རིགས་ཡིན་ནོ་ཞེས་བྱ་བ་ལ་སོགས་པ་རྒྱས་པར་ཤེས་པར་བྱའོ། །རྐྱེན་ལ་ལྟོས་པའི་གང་ཟག་ནི་གོང་དུ་བསྟན་པའི་གང་ཟག་གསུམ་པོ་དེའི་གནས་སྐབས་ཀྱི་ཆོས་ཀྱི་མིང་བཏགས་པ་ཡིན་ཏེ། རྩ་རྒྱུད་ཕྱི་མའི་གཉིས་པ་ལས། མཚམས་མེད་ལྔ་ནི་བྱེད་པ་དང་། །སྲོག་ཆགས་གསོད་ལ་དགའ་བ་དང་། །གཞན་ཡང་སྐྱེ་བ་དམན་གང་དང་། །རྨོངས་དང་མ་རུངས་པའི་ལས་ཉེ་བའི་མཚམས་མེད་ལྔ་སོགས་བྱེད་པ་དང་། །༼གཟུག༷ས་ང༷ན་ཡ༷ན་ལ༷ག་མ༷་ཚ༷ང་བ༷༽། །དེ་རྣམས་ཀྱིས་ཀྱང་འགྲུབ་པར་འགྱུར། །ཞེས་བྱ་བ་ལ་སོགས་པ་གསུངས་སོ། །རྒྱུའི་རྒྱུད་སྔོན་དུ་འགྲོ་བ་རྟེན་གྱི་གང་ཟག་གི་དབྱེ་བ་དང་བཅས་པ་བསྟན་ཟིན་ཏོ། །ཐབས་ཀྱི་རྒྱུད་ལ་གཉིས། སྐལ་བ་མེད་པ་རིམ་གྱིས་འཇུག་པ་དང་། སྐལ་པ་དང་ལྡན་པ་འདི་ཉིད་ལ་ཅིག་ཆར་དུ་འཇུག་པའོ། །དང་པོ་ནི། རྩ་རྒྱུད་ཕྱི་མའི་གཉིས་པ་ལས། དགེ་བ་བཅུ་ལ་གོམས་པ་དང་། །བླ་མ་ལ་གུས་དབང་པོ་དུལ། །ང་རྒྱལ་ཁྲོ་ལས་རྣམ་པར་གྲོལ། །དེས་ནི་རེ་ཞིག་ངེས་འགྲུབ་འགྱུར། །ཞེས་གསུངས་སོ། །གཉིས་པའང་། སཾ་པུ་ཊའི་བཅུ་པའི་དང་པོ་ལས། ཐོག་མར་སྨིན་པར་བྱེད་པ་ལ་གདན་གསུམ་ཚང་བའི་དཀྱིལ་འཁོར་ཆེན་པོ་ཡི་དེ་ལ་རིགས་མང་ཡང་། །སྙིང་ག་ཡི་ནི་སྟེ་ཐུགས་ཀྱི་རིགས་ཀྱི་དཀྱིལ་འཁོར་མཆོག་ཏུ་བསྔགས་ཏེ་སེམས་དབང་དུ་གྱུར་ན་གཞན་ཞར་ལ་འགྲུབ་པའི་ཕྱིར་རོ། །དཀྱིལ་འཁོར་དེ་ཉིད་དུ། །རང་གི་དབང་དང་སོགས་པ་དམ་ཚིག་དང་སྡོམ་པོ་བཟུང་བ་རྒྱས་པར་བྱས་པ་ཡིས། །རྡོ་རྗེ་སློབ་དཔོན་འགྲུབ་པར་འགྱུར། །ཞེས་གསུངས་པ་ཡིན་ནོ། །དེ་དག་ཀྱང་ཞིབ་ཏུ་བརྗོད་ན། དང་པོ་རིམ་གྱིས་འཇུག་པ་ལ་ཡང་གཉིས། ཐུན་མོང་གི་ཐེག་པ་ལ་རིམ་གྱིས་བསླབ་པ་དང་། ཐུན་མོང་མ་ཡིན་པའི་ཐེག་པ་ལ་རིམ་པས་བསླབ་པའོ། །དང་པོ་ལ་གཉིས། སྤྱོད་པ་རིམ་པ་ཅན་ལ་བསླབ་པ་དང་། ལྟ་བ་རིམ་པ་ཅན་ལ་བསླབ་པའོ། །དེ་དག་ཀྱང་རིམ་པས་ཇི་ལྟར་འཇུག་ཅེ་ན། རྩ་རྒྱུད་ཕྱི་མའི་བརྒྱད་པ་ལས། སྐལ་མེད་སེམས་ཅན་གདུལ་དཀའ་བ། །གང་གིས་འདུལ་བར་འགྱུར་བ་ལགས། །བཅོམ་ལྡན་འདས་ཀྱིས་བཀའ་སྩལ་པ། །དང་པོ་གསོ་སྦྱོང་སྦྱིན་པར་བྱ། །དེ་རྗེས་བསླབ་པའི་གནས་བཅུ་ཉིད། །དེ་ལ་བྱེ་བྲག་སྨྲ་བ་བསྟན། །མདོ་སྡེ་པ་ཡང་དེ་བཞིན་ནོ། །དེ་ལ་རྣལ་འབྱོར་སྤྱོད་པ་ཉིད། །དེ་ཡི་རྗེས་སུ་དབུ་མ་བསྟན། །སྔགས་ཀྱི་རིམ་པ་ཀུན་ཤེས་ནས། །དེ་རྗེས་ཀྱེ་ཡི་རྡོ་རྗེ་བརྩམ། །སློབ་མས་གུས་པར་བླངས་ནས་ནི། །འགྲུབ་འགྱུར་འདི་ལ་ཐེ་ཚོམ་མེད། །ཅེས་གསུངས་སོ། །དེ་དག་གིས་ནི་འདི་སྐད་བསྟན་པ་ཡིན་ཏེ། བློ་གྲོས་རྒྱ་ཆུང་བའི་རྟེན་གྱི་གང་ཟག་ཐོག་མ་ཉིད་ནས་རྡོ་རྗེ་ཐེག་པ་ཐོས་པས་འཇིགས་པར་འགྱུར་བ་རྣམས་རིམ་གྱིས་བློ་སྦྱང་བར་བྱའོ། །དེའང་ལྟ་བ་དང་། སྤྱོད་པ་རིམ་གྱིས་བསླབ་པའི་སྤྱོད་པ་རིམ་པ་ཅན་ལ་བཞི་ལས་ཕྱེ་བའི་བཅུར་འགྱུར་ཏེ། སྐྱབས་སུ་འགྲོ་བ་དང་། དུས་ཚིགས་ཀྱི་གསོ་སྦྱོང་དང་། སོ་སོར་ཐར་པ་གཏན་ཁྲིམས་བདུན་དང་། དུས་ནམ་སྐྱེ་ངེས་པ་མེད་པའི་སེམས་བསྐྱེད་པའོ། །དེ་ལ་དགེ་བའི་བཤེས་གཉེན་གྱིས་གང་ཟག་བློ་དམན་པ་བཀྲི་བར་འདོད་པས། ཐོག་མར་ཚེ་འདིའི་སྤྱོད་ཡུལ་མི་རྟག་པར་བསྟན་པས་སྐྱོ་བ་བསྐྱེད་ནས་ཚེ་འདིའི་མངོན་པར་ཞེན་པ་དོར་ཏེ། ལྷ་མི་ཙམ་འདོད་པར་གྱུར་པའི་བློ་སྐྱེས་པ་དང་། གསོ་སྦྱོང་སྦྱིན་པར་བྱ་སྟེ། གསོ་སྦྱོང་འདིའང་དང་པོར་སྐྱབས་སུ་འགྲོ་བ་སྔོན་དུ་སོང་བ་ལས་སྐྱེའི། གཞན་ལ་ནི་མ་ཡིན་ཏེ། མཛོད་ལས། གཞན་ལ་བསྙེན་གནས་ཡོད་མོད་ཀྱི། །སྐྱབས་སུ་མ་སོང་བ་ལ་མེད། །ཅེས་བྱ་བ་དང་། སྐྱབས་གསུམ་བདུན་ཅུ་པ་ལས་ཀྱང་། གསུམ་ལ་སྐྱབས་འགྲོའི་དགེ་བསྙེན་ནི། །དེ་ནི་གཏན་ཁྲིམས་བདུན་དུས་ཁྲིམས་གཅིག་སྟེ་སྡོམ་བརྒྱད་རྩ་བ་ཡིན། །ཞེས་གསུངས་སོ། །སྐྱབས་སུ་འགྲོ་བ་ལ་བདུན། རྒྱུ་གང་གིས་སྐྱབས་སུ་འགྲོ་བ་དང་། ཡུལ་གང་ལ་སྐྱབས་སུ་འགྲོ་བ་དང་། ཚུལ་ཇི་ལྟར་སྐྱབས་སུ་འགྲོ་བ་དང་། དེའི་ཕན་ཡོན་དང་། བསླབ་བྱ་དང་། སྒྲའི་དོན་དང་། དབྱེ་བ་དང་། ཁྱད་པར་གཞག་པ་བསྟན་པའོ། །དེ་ལ་དང་པོ་རྒྱུ་ནི་རང་འཇིགས་པ་དང་ཡུལ་ལ་དད་པ་སྟེ། གཉིས་ཀྱི་སྒོ་ནས་སྐྱབས་སུ་འགྲོ་སྟེ། ཇི་སྐད་དུ། མདོ་ལས། འཇིགས་པས་ཉེན་པའི་མི་རྣམས་ནི། །ཕལ་ཆེར་རི་དང་ནགས་ཚལ་དང་། །ལྗོན་ཤིང་སོགས་ལ་སྐྱབས་འགྲོ་སྟེ། །སྐྱབས་དེ་མཆོག་གྱུར་མ་ཡིན་ལ། །སྐྱབས་དེ་ལ་ནི་བརྟེན་ནས་ཀྱང་། །སྡུག་བསྔལ་ཀུན་ལས་མི་གྲོལ་བས། །གང་ཚེ་གང་ཞིག་སངས་རྒྱས་དང་། །ཆོས་དང་དགེ་འདུན་ལ་སྐྱབས་སོང་། །སྐྱབས་དེ་ལ་ནི་བརྟེན་ནས་ཀྱང་། །སྡུག་བསྔལ་ཀུན་ལས་གྲོལ་ར་འགྱུར། །ཞེས་གསུངས་ཏེ། སྡུག་བསྔལ་གྱིས་འཇིགས་པ་འདིའང་ཚེ་འདིའི་སྡུག་བསྔལ་དང་། ངན་སོང་གི་སྡུག་བསྔལ་དང་། འཁོར་བའི་སྡུག་བསྔལ་གྱིས་འཇིགས་པ་རྣམས་སྐྱབས་སུ་འགྲོ་ཞེས་བྱ་བའི་དོན་ཏོ། །ཡང་རྒྱུ་གཉིས་པ་ཡུལ་ལ་དད་པ་ཐོབ་ནས་སྐྱབས་སུ་འགྲོ་ཡི། དད་པ་མེད་ན་མ་ཡིན་ཏེ། མདོ་ལས། དད་པ་མེད་པའི་མི་རྣམས་ལ། །དཀར་པོའི་ཆོས་རྣམས་མི་སྐྱེ་སྟེ། །ས་བོན་མེ་ཡིས་ཚིག་པ་ལ། །མྱུ་གུ་སྔོན་པོ་ཇི་བཞིན་ནོ། །ཞེས་གསུངས་པ་ལྟ་བུའོ། །དད་པ་འདིའང་ཡུལ་གྱི་ཡོན་ཏན་ཅི་རིགས་པ་ཐོས་པ་ལ་བརྟེན་ནས་སྐྱེ་སྟེ། ལྷ་ལས་ཕུལ་དུ་བྱུང་བར་བསྟོད་པ་ལས། སྙིང་ནས་དད་དམ་ཇི་ལྟར་དགའ་བ་དང་། །ཐེ་ཚོམ་གྱིས་སམ་གཞན་གྱི་ངོར་ཡང་རུང་། །གང་ཞིག་ཐུབ་དབང་ཟླ་བ་དེར་ཕྱག་བྱེད། །དེས་ནི་ལྷ་ཡི་བདེ་བ་ཕུན་ཚོགས་ཐོབ། །ཅེས་གསུངས་པ་ལྟ་བུ་སྟེ། དེ་ལ་མི་བརྟན་པའི་དད་པ་ནི། འཇིགས་པས་ཉེན་པ་རྣམས་ཀྱིས་ཡུལ་འདི་ནི་མཆོག་ཏུ་གྱུར་པ་སྐྱོབ་པའོ་ཞེས་ཐོས་པས། གཞན་གྱི་ངོ་དང་ཐེ་ཚོམ་སྐྱེས་པ་ལ་སོགས་པའི་སྒོ་ནས་སྐྱབས་སུ་འགྲོ་བ་ནི་མི་བརྟན་པའི་སྐྱབས་འགྲོ་ཞེས་བྱའོ། །དཀོན་མཆོག་གསུམ་གྱི་ཡོན་ཏན་ཅི་རིགས་པ་ཐོས་ནས་དེ་ལ་དད་པ་ཐོབ་པ་ནི་བརྟན་པའི་དད་པ་ཡིན་ཏེ། མདོ་ལས། སངས་རྒྱས་ལ་ཐོས་ནས་དད་པ་ཐོབ་པ་དང་། ཆོས་ལ་ཐོས་ས་དད་པ་ཐོབ་པ་དང་། དགེ་འདུན་ལ་ཐོས་ནས་དད་པ་ཐོབ་པ་ནི་ཆེས་མང་ངོ་། །ཞེས་གསུངས་པ་ལྟ་བུའོ། །དེ་ལ་བརྟེན་ཏེ་སྐྱེས་པ་ནི་བརྟན་པའི་སྐྱབས་སུ་འགྲོ་བའོ། །གཉིས་པ་སྐྱབས་སུ་འགྲོ་བའི་ཡུལ་ཤེས་པ་འདིའང་རྒྱས་པར་ཤེས་པ་ལ་ཚད་མེད་དེ། མདོར་བསྡུ་ན་སྐྱོན་གྱི་རྣམ་པ་འགའ་མེད་ཅིང་། ཡོན་ཏན་གྱི་རྣམ་པ་མཐའ་དག་དང་ལྡན་པའི་གང་ཟག་ཟླ་མེད་པ་ནི་སངས་རྒྱས་ཡིན་ལ། དེས་ཐུགས་སུ་ཆུད་པའི་ལམ་སྡུག་བསྔལ་སེལ་བའི་ཐབས་ནི་ཆོས་ཡིན་ལ། དེའི་བཀའ་བཞིན་དུ་རྗེས་སུ་སྒྲུབ་པའི་གྲོགས་ནི་དགེ་འདུན་ཞེས་བྱ་བ་འདི་ཙམ་ཞིག་ཤེས་པ་ལ་བརྟེན་ཏེ་སྐྱབས་སུ་འགྲོ་བ་སྐྱེའོ། །དེ་སྐད་དུ་མཛོད་ལས། གང་ཞིག་གསུམ་ལ་སྐྱབས་འགྲོ་དེ། །སངས་རྒྱས་སུ་བྱེད་པའི་ཆོས་ཟད་མི་སྐྱེ་ཤེས་འཁོར་དང་བཅས་པ་དགེ་འདུན་བྱེད་པའི་ཆོས། །མི་སློབ་པ་དང་སློབ་མི་སློབ་གཉིས་ཀའི་རྒྱུད་ལ་ཡོད་པའི་ལམ་བདེན་དང་། །ཆོས་མྱ་ངན་ལས་འདས་པ་སོ་སོར་བརྟགས་འགོག་ལ་སྐྱབས་སུ་འགྲོ། །ཞེས་གསུངས་པ་ལྟ་བུའོ། །གསུམ་པ་སྐྱབས་སུ་འགྲོ་བའི་ཚུལ་ནི། དེ་ལྟར་འཇིགས་པ་དང་། དད་པ་ཐོབ་པ་དེས་སྤྱིར་དཀོན་མཆོག་གསུམ་ལ་མགོན་དང་སྐྱབས་སུ་འཛིན་པ་ཡིན་ཏེ། དེའང་སངས་རྒྱས་ལ་སྟོན་པ། ཆོས་ལ་ལམ། དགེ་འདུན་ལ་གྲོགས་སུ་འཛིན་པ་ཡིན་ནོ། །བཞི་པ་དེ་ལྟར་སྐྱབས་སུ་སོང་བའི་ཕན་ཡོན་ནི་ལྔ་སྟེ། སྡོམ་པ་ཐམས་ཅད་སྐྱེ་བའི་རྒྱུ་ཡིན་པ་དང་། བསྲུང་བ་ཆེན་པོར་འགྱུར་བ་དང་། ལོག་པར་མོས་པའི་ལས་ཀྱི་སྒྲིབ་པ་སྲབ་པ་དང་། དམ་པ་དམ་པ་ཞེས་བྱ་བའི་གྲངས་སུ་བགྲང་བ་དང་། བསྟན་པ་ལ་དགའ་བའི་ལྷ་རྣམས་ཀྱིས་བསྲུང་བའོ། །དང་པོ་ནི། སྐྱབས་གསུམ་བདུན་ཅུ་པ་ལས། གསུམ་ལ་སྐྱབས་འགྲོའི་དགེ་བསྙེན་ནི། །དེ་ནི་སྡོམ་བརྒྱད་རྩ་བ་ཡིན། །ཞེས་གསུངས་སོ། །གཞན་ནི་ཤེས་པར་ཟད་དོ། །ལྔ་པ་བསླབ་བྱ་ནི་གཉིས་ཏེ། ཐུན་མོང་གི་བསླབ་བྱ་དང་། སོ་སོའི་བསླབ་བྱའོ། །ཐུན་མོང་གི་བསླབ་བྱ་ནི། སྐྱེས་བུ་དམ་པ་དང་འགྲོགས་པ་དང་། དམ་པའི་ཆོས་ཉན་པ་དང་། ཚུལ་བཞིན་དུ་ཡིད་ལ་བྱ་བ་དང་། ཆོས་དང་རྗེས་སུ་མཐུན་པས་ཆོས་བསྒྲུབ་པ་ཞེས་བྱ་བ་བཞིའོ། །ཡང་བཞི་སྟེ། དབང་པོ་མི་རྒོད་པར་བྱ་བ་དང་། སེམས་ཅན་ལ་སྙིང་བརྩེ་བར་བྱ་བ་དང་། དུས་དུས་སུ་དཀོན་མཆོག་མཆོད་པ་ལ་བརྩོན་པར་བྱ་བ་དང་། སྡོམ་པ་ཅི་ནུས་པ་ཡང་དག་པར་བླང་བར་བྱ་བའོ། །སོ་སོའི་བསླབ་བྱ་ནི། འཕགས་པ་མྱ་ངན་ལས་འདས་པ་ཆེན་པོའི་མདོ་ལས་གསུངས་པ། གང་ཞིག་སངས་རྒྱས་སྐྱབས་འགྲོ་བ། །དེ་ནི་ཡང་དག་དགེ་བསྙེན་ཏེ། །ནམ་དུའང་ལྷ་ནི་གཞན་དག་ལ། །སྐྱབས་སུ་སོང་བ་མ་ཡིན་ནོ། །དམ་པའི་ཆོས་ལ་སྐྱབས་ཚོལ་ན། །འཚེ་ཞིང་གསོད་པའི་སེམས་དང་བྲལ། །དགེ་འདུན་ལ་ཡང་སྐྱབས་སོང་བས། །མུ་སྟེགས་ཅན་ལ་ཕྱག་མི་བྱ། །ཞེས་གསུངས་པ་ལྟ་བུའོ། །གཞན་བླ་མ་རྣམས་ཀྱི་གསུང་གི་མན་ངག་གིས་ཀྱང་སྦྱར་བར་ཤེས་པར་བྱའོ། །དྲུག་པ་སྒྲའི་དོན་ནི། ཚེ་འདིའི་འཇིགས་པ་དང་། ཕ་རོལ་གྱི་ངན་སོང་གི་འཇིགས་པ་དང་། འཁོར་བའི་འཇིགས་པ་རྣམས་ལས་སྐྱོབ་པས་ན་སྐྱབས་ཡིན་ལ། དེར་འགྲོ་བས་ནི་སྐྱབས་སུ་འགྲོ་བ་སྟེ། དཔེར་ན་ཆར་གྱི་འཇིགས་པས་བྲག་སྐྱིབས་སུ་འགྲོ་བ་ལྟ་བུ་སྟེ། ཇི་སྐད་དུ། མདོ་སྡེ་རྒྱན་ལས། འཚེ་བ་འོན་ལོང་སོགས་དག་ནི་ཐམས་ཅད་དང་། །འཇིག་ཚོགས་ལ་ལྟ་བ་ཅན་འཁོར་བ་དང་། མ་ངེས་པའི་རིགས་ཅན་རྣམས་ཐེག་པ་དམན་པ་དང་། །མུ་སྟེགས་ཅན་ཐབས་མ་ཡིན་པར་ཞུགས་པ་དང་ངན་སོང་དུ་ལྟུང་བ་རྣམས་དེ་དག་ལས། །སྐྱོབ་ཕྱིར་སྐྱབས་ཀྱི་དམ་པ་ཡིན། །ཞེས་གསུངས་པ་ལྟ་བུའོ། །བདུན་པ་དབྱེ་བ་དང་ཁྱད་པར་གཞག་པ་ནི། རྒྱུ་དང་འབྲས་བུར་དབྱེ་བ་དང་། །ཐུན་མོང་དང་ཐུན་མོང་མ་ཡིན་པར་དབྱེ་བའོ། །དང་པོ་ལ་རྒྱུའི་སྐྱབས་འགྲོ་ནི། སྟོན་པ་དང་། ལམ་དང་། གྲོགས་སུ་འཛིན་པ་ཡིན་ལ། འབྲས་བུའི་སྐྱབས་སུ་འགྲོ་བ་ནི། དེའི་གནས་ཐོབ་པར་འདོད་པའོ། །ཐུན་མོང་དང་ཐུན་མོང་མ་ཡིན་པའི་དབྱེ་བ་ནི། གང་ཟག་གི་དབང་དུ་བྱས་པའི་དབྱེ་བ་ཡིན་ཏེ། འཇིག་རྟེན་པའི་གང་ཟག་གམ། ཉན་ཐོས་སམ། རང་སངས་རྒྱས་ཀྱི་གང་ཟག་གི་སྐྱབས་སུ་འགྲོ་བ་ནི་ཐུན་མོང་གི་སྐྱབས་སུ་འགྲོ་བ་ཡིན་ལ། ཐེག་པ་ཆེན་པོའི་གང་ཟག་གི་སྐྱབས་སུ་འགྲོ་བ་ནི་ཐུན་མོང་མ་ཡིན་པའི་སྐྱབས་སུ་འགྲོ་བའོ། །འདི་གཉིས་ལ་ཁྱད་པར་ཅི་ཡོད་ཅེ་ན། འབྲས་བུའི་སྐྱབས་གནས་ཀྱི་ཁྱད་པར་དང་། རྒྱུའི་ཁྱད་པར་དང་། དུས་ཀྱི་ཁྱད་པར་དང་། ཆེད་དུ་བྱ་བའི་ཁྱད་པར་རོ། །དང་པོ་ནི་རྒྱུའི་སྐྱབས་འགྲོའི་གནས་ལ་ཁྱད་པར་མེད་དེ། ཐམས་ཅད་ཀྱང་དཀོན་མཆོག་གསུམ་ལ་སྐྱབས་སུ་འགྲོའོ། །འབྲས་བུའི་སྐྱབས་གནས་ནི་ཉན་ཐོས་དགེ་འདུན་ལ་སྐྱབས་སུ་འགྲོ་སྟེ། དགྲ་བཅོམ་པ་ཐོབ་པར་འདོད་པས་སོ། །རང་སངས་རྒྱས་ཆོས་ལ་སྐྱབས་སུ་འགྲོ་སྟེ། རྟེན་འབྲེལ་རྟོགས་པར་འདོད་པས་སོ། །ཐེག་པ་ཆེན་པོ་པ་སངས་རྒྱས་ལ་སྐྱབས་སུ་འགྲོ་སྟེ། རང་དང་གཞན་གྱི་དོན་མཐའ་དག་ཆུབ་པ་སངས་རྒྱས་ལས་མེད་ལ་དེ་ཐོབ་པར་འདོད་པའི་ཕྱིར་ཏེ། རྒྱུད་བླ་མ་ལས། ལུང་གི་ཆོས་སྤང་ཕྱིར་ལམ་བདེན་བསླུ་བའི་ཆོས་ཅན་ཕྱིར། །འགོག་བདེན་གྱི་ངོ་བོ་མེད་དགག་ཡིན་པའི་ཕྱིར་དགེ་འདུན་རང་ཉིད་འཇིགས་དང་བཅས་པའི་ཕྱིར། །ཆོས་རྣམ་གཉིས་དེ་༼ད༷ང་༽འཕགས་པའི་ཚོགས། །གཏན་གྱི་སྐྱབས་མཆོག་མ་ཡིན་ཏེ། །དམ་པའི་དོན་དུ་འགྲོ་བ་ཡི། །སྐྱབས་ནི་སངས་རྒྱས་ཉག་གཅིག་ཉིད། །ཐུབ་པ་ཆོས་ཀྱི་སྐུ་ཅན་ཕྱིར། །ཚོགས་ཀྱང་དེ་ཡི་མཐར་ཐུག་ཕྱིར། །ཞེས་གསུངས་པ་ལྟ་བུའོ། །རྒྱུའི་ཁྱད་པར་ནི། ཐུན་མོང་གི་རྒྱུ་ནི་དད་པ་ཡིན་པར་སྔར་བསྟན་ལ། ཐུན་མོང་མ་ཡིན་པའི་རྒྱུ་ནི་སྙིང་རྗེའོ། །དུས་ཀྱི་ཁྱད་པར་ནི། ཐུན་མོང་བ་ཇི་སྲིད་འཚོའི་བར་ཡིན་ལ། ཐུན་མོང་མ་ཡིན་པ་བྱང་ཆུབ་ཐོབ་ཀྱི་བར་ཡིན་ནོ། །ཆེད་དུ་བྱ་བ་ནི་ཐུན་མོང་བ་རང་འཇིགས་པ་ལས་སྒྲོལ་བའི་ཕྱིར་ཡིན་ལ། ཐུན་མོང་མ་ཡིན་པ་གཞན་བསྐྱབ་པའི་ཕྱིར་ཡིན་ནོ། །འདིར་ཐུན་མོང་བའི་སྐྱབས་སུ་འགྲོ་བའི་སྐབས་ཡིན་ཀྱང་དེའི་ཞར་ལ་རབ་ཏུ་ཕྱེ་བ་བསྟན་པས་ཁྱད་པར་གཞག་པ་བྱས་པ་ཡིན་ནོ། །དེ་ལྟར་སྐྱབས་སུ་འགྲོ་བ་སྐྱེས་པ་དེ་ལ་གསོ་སྦྱོང་སྦྱིན་པར་བྱའོ། །
དེ་ཉམས་སུ་བླང་བའི་ཐབས་ཀྱི་རྒྱུད།
གསོ་སྦྱོང་ལ་བཞི། མིང་གི་དོན་དང་། བསླབ་བྱ་དང་། ཆོ་ག་དང་། དགོས་པའོ། །དེ་ལ་མིང་གི་དོན་ནི་དགེ་བའི་ས་བོན་གསོ་ཞིང་སྡིག་པ་སྦྱོང་བས་ན་གསོ་སྦྱོང་ཡིན་ལ། འཕགས་པ་རྣམས་ལ་ཉེ་བར་བསྙེན་པས་ན་བསྙེན་གནས་ཞེས་ཀྱང་བྱ་བ་ཡིན་ནོ། །དེ་སྐད་དུ། གང་ཕྱིར་དགེ་བ་མ་ལུས་གསོ་བ་དང་། །རྙེད་པའི་སྡིག་པ་འདིར་ནི་དག་བྱེད་པ། །དེས་ན་གསོ་དང་སྡིག་པ་དག་བྱེད་པས། །དེ་བཞིན་གཤེགས་པས་གསོ་སྦྱོང་ཞེས་སུ་གསུངས། །ཞེས་གསོ་སྦྱོང་གི་ཆོ་ག་ལས་གསུངས་པ་ལྟ་བུའོ། །གཉིས་པ་བསླབ་བྱ་ནི། གསུམ་ལས་ཕྱེ་བའི་བརྒྱད་དེ། མཛོད་ལས། ཚུལ་ཁྲིམས་ཡན་ལག་བག་ཡོད་པའི། །ཡན་ལག་བརྟུལ་ཞུགས་ཡན་ལག་སྟེ། །བཞི་གཅིག་གསུམ་རིམ་གོ་རིམ་བཞིན། །ཞེས་བཤད་པ་ལྟ་བུ་སྟེ། སྲོག་གཅོད་པ་དང་། མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། བརྫུན་དུ་སྨྲ་བ་དང་བཞི་སྤོང་བ་ནི་ཚུལ་ཁྲིམས་ཀྱི་ཡན་ལག་བཞི་ཡིན་ལ། ཆང་སྤོང་བ་ནི་བག་ཡོད་པའི་ཡན་ལག་སྟེ་གཅིག་གོ། ཁྲི་སྟན་མཐོན་པོ་དང་། མལ་སྟན་ཆེན་པོ་ནི་མལ་སྟན་སྤོང་བ་དང་འབྲེལ་བའི་བརྟུལ་ཞུགས། དུས་མ་ཡིན་པའི་ཁ་ཟས་སྤོང་བ་ནི་ཁ་ཟས་དང་འབྲེལ་བའི་བརྟུལ་ཞུགས། གླུ་གར་དང་རོལ་མོ་དང་རྒྱན་བྱུག་པ་ཁ་དོག་འཆང་བ་ལ་སོགས་པ་སྤོང་བ་ནི་སྒེག་པ་སྤོང་བའི་བརྟུལ་ཞུགས་སོ། །དེ་ལྟར་གསུམ་ནི་བརྟུལ་ཞུགས་ཀྱི་ཡན་ལག་གསུམ་སྟེ་དེ་ལྟར་ན་ཡན་ལག་བརྒྱད་དོ། །གསུམ་པ་ཆོ་ག་ནི་གཞན་དུ་ཤེས་པར་བྱའོ། །དེ་ལྟ་བུའི་གསོ་སྦྱོང་ལ་དགོས་པ་ནི་གང་ཟག་གི་རིགས་ཀྱིས་དབྱེ་བ་ཡིན་ཏེ། ཐེག་པ་ཆེན་པོའི་གང་ཟག་གིས་ནི་སེམས་ཅན་གྱི་དོན་གྱི་དགོས་པ་ཡོད་དེ། སེམས་ཅན་ཐམས་ཅད་ལ་གནས་སྐབས་སུ་ཕན་པར་བྱ་བའི་ཕྱིར་དང་། མཐར་ཐུག་གྲོལ་བར་བྱ་བའི་ཕྱིར་གསོ་སྦྱོང་ངེས་པར་བྱ་སྟེ། ཞེས་བཤད་པ་ལྟ་བུའོ། །ཉན་ཐོས་དང་རང་རྒྱལ་གྱི་གང་ཟག་རྣམས་ཀྱིས་ནི་བྱང་ཆུབ་རྣམ་པར་གྲོལ་བའི་ཡན་ལག་ཏུ་འགྱུར་བ་སྟེ། བྱང་ཆུབ་ཀྱི་ཡན་ལག་ནི་ཚུལ་ཁྲིམས་ཞེས་བཤད་པ་ལྟ་བུའོ། །དེ་ལས་གཞན་པ་ལས་དང་པོ་པའི་འང་ཆེས་དང་པོ་པ་རྣམས་ཀྱིས་ནི་འཇིགས་སྐྱོབ་ཀྱི་ཚུལ་ཁྲིམས་དང་ལེགས་སྨོན་གྱི་ཚུལ་ཁྲིམས་སྐྱེ་བས་དེའི་དབང་དུ་བྱས་ཏེ། འཕགས་པ་ཀླུ་སྒྲུབ་ཀྱིས། གསོ་སྦྱོང་འདོད་སྤྱོད་ལྷ་ལུས་ཡིད་འོང་བ། །སྐྱེས་པ་བུད་མེད་དག་ལ་རྩོལ་བར་བགྱིད། །ཅེས་བཤེས་པའི་སྤྲིང་ཡིག་ལས་གསུངས་པ་ལྟ་བུའོ། །རིམ་གྱིས་སྦྱོང་བའི་སྐབས་འདིར་གང་ཟག་ཐ་མ་གཟུང་བར་བྱའོ། །དེ་ལྟར་གསོ་སྦྱོང་ལ་གནས་པ་ཉིན་ཞག་གི་མཐའི་ཚུལ་ཁྲིམས་བསྲུང་ནུས་པ་དེ་ལ། དེ་རྗེས་བསླབ་པའི་གནས་བཅུ་སྦྱིན། །ཞེས་གསུངས་པས་འདི་ལ་བསླབ་པར་བྱའོ། །དེ་ལ་སོ་སོར་ཐར་པའི་སྡོམ་པ་འདིའང་སོ་སོར་ཕྱེ་ན་དྲུག་སྟེ། གང་ཟག་དང་། བསམ་པ་དང་། རབ་ཏུ་དབྱེ་བ་དང་། མ་ཐོབ་པ་ཐོབ་པར་བྱེད་པའི་ཚུལ་དང་། ཐོབ་པ་གཏོང་བའི་རྒྱུ་དང་། ཐོབ་ནས་བསྲུང་བའི་ཚུལ་ལོ། །དང་པོ་གང་ཟག་ནི་གླིང་གསུམ་དུ་སྐྱེས་པའི་སྐྱེས་པ་དང་བུད་མེད་དོ། །གཉིས་པ་ནི། དེ་ལྟ་བུའི་ཚུལ་ཁྲིམས་འདིའང་གང་ཟག་གི་བསམ་པའི་བྱེ་བྲག་གིས་རྣམ་པ་བཞིར་འགྱུར་ཏེ། ཚེ་འདིའི་འཚེ་བ་དང་། རྒྱལ་པོའི་འཇིགས་པ་དང་། ཕྱི་མའི་ངན་སོང་གི་འཇིགས་པའི་སྒོ་ནས་ཚུལ་ཁྲིམས་བསྲུང་བ་རྣམས་ནི། འཇིགས་སྐྱོབ་ཀྱི་ཚུལ་ཁྲིམས་ཞེས་བྱའོ། །ཚེ་འདིའི་བདེ་བ་དང་ཕྱི་མའི་མཐོ་རིས་ཀྱི་བདེ་བ་དོན་དུ་གཉེར་བའི་སྒོ་ནས་ཚུལ་ཁྲིམས་བསྲུང་བ་རྣམས་ནི་ལེགས་སྨོན་གྱི་ཚུལ་ཁྲིམས་ཞེས་བྱའོ། །འཁོར་བའི་རྒྱ་མཚོ་ལས་ཐར་པ་དོན་དུ་གཉེར་བའི་སྒོ་ནས་བསྲུང་རྣམས་ནི་བྱང་ཆུབ་ཀྱི་ཡན་ལག་གི་ཚུལ་ཁྲིམས་ཞེས་ཀྱང་བྱ། ངེས་པར་འབྱུང་བའི་ཚུལ་ཁྲིམས་ཞེས་ཀྱང་བྱ། སོ་སོར་ཐར་པའི་སྡོམ་པ་ཞེས་ཀྱང་བྱའོ། །བདེན་པ་མཐོང་བ་རྣམས་ལ་ནི་ཟག་པ་མེད་པ-འི་ཚུལ་ཁྲིམས་ཞེས་བྱ་བ་ཡིན་ནོ། །-སྤྱི་དོན་གསུམ་པ་རབ་ཏུ་དབྱེ་བ་ལ་གཉིས། སོ་སོར་ཐར་པ་རིགས་བདུན་དང་། དེ་བསླབ་པའི་གནས་བཅུར་བསྡུ་བའོ། །དང་པོ་བསྡུ་ན་རྫས་བཞི་སྟེ། དགེ་བསྙེན་ཕ་མ་གཉིས། དགེ་ཚུལ་ཕ་མ་གཉིས་དང་། བར་སློབ་མ་དང་། དགེ་སློང་ཕ་མ་གཉིས་སོ། །དང་པོ་ལ་གཉིས། དགེ་བསྙེན་གྱི་བསླབ་པའི་རྣམ་གྲངས་དང་། དེ་ལ་འགལ་བ་སྤང་བའོ། །དང་པོ་ལ་དྲུག །སྐྱབས་གསུམ་འཛིན་པ་དང་། སྣ་གཅིག་སྤྱོད་པ་དང་། སྣ་འགའ་སྤྱོད་པ་དང་། ཕལ་ཆེར་སྤྱོད་པ་དང་། ཡོངས་སུ་རྫོགས་པ་དང་། ཚངས་པར་སྤྱོད་པའི་དགེ་བསྙེན་ནོ། །དང་པོ་སྐྱབས་གསུམ་འཛིན་པའི་གང་ཟག་འདིའང་ནུས་ན་དང་པོ་ནས་བསླབ་པའི་གནས་བཅུ་ཉིད་ལ་བསླབ་ཀྱང་མི་ནུས་ན་སྲོག་གཅོད་པ་སྤོང་བ་ལ་སོགས་པ་གང་རུང་ཅིག་ལ་སློབ་ན་སྣ་གཅིག་སྤྱོད་པའི་དགེ་བསྙེན། གཉིས་ལ་སློབ་ན་སྣ་འགའ་སྤྱོད་པ། གསུམ་ལ་སློབ་ན་ཕལ་ཆེར་སྤྱོད་པ་སྟེ། དེ་བཞི་༼གསུམ༷་༽ནི་ཡང་དག་པ་མ་ཡིན་ནོ། །རྩ་བ་བཞི་ཆང་དང་ལྔ་སྤོང་བ་ལ་སློབ་ན་ཡོངས་སུ་རྫོགས་པའི་དགེ་བསྙེན་ནོ། །དེའི་སྟེང་དུ་མི་ཚངས་པར་སྤྱོད་པ་བསྲུང་ན་ཚངས་པར་སྤྱོད་པའི་དགེ་བསྙེན་ཞེས་བྱའོ། །དགེ་བསྙེན་འདིས་ནི་མི་དགེ་བ་བཅུ་ཀ་སྤོང་བ་ལ་བསླབ་པར་བྱ་སྟེ། མདོ་ལས། དགེ་བསྙེན་སྟོན་པ་གཞན་ལ་མི་བརྟེན་པ་ཆོས་དགེ་བ་བཅུ་སྤྱོད་པ་ཞེས་གསུངས་པས་སོ། །གཉིས་པ་དེ་ལ་འགལ་བ་སྤང་བ་ནི། དེ་ལྟར་ན་བསླབ་བྱ་ལྔ་དང་བཅུ་མི་འགལ་ལམ་ཞེ་ན། མི་འགལ་ཏེ། ཇི་སྐད་དུ། ཡན་ལག་ལྔ་ཡི་ཆོ་ག་ཡིས། །གཞུག་པ་རུ་ནི་འདོད་པས་སོ། །ཞེས་གསུངས་པས། བཅུ་སྨོས་ན་ནི་མང་བས་འཇིགས་ལ། ལྔ་སྨོས་པས་འཇུག་པར་འགྱུར་རོ། །དེ་ལ་ལྔ་བསྲུངས་པས་བཅུ་ཤུགས་ཀྱིས་བསྲུང་བ་ཡིན་ནོ། །དེ་དག་རྒྱས་པར་མདོ་བསྟན་བཅོས་ཀུན་ནས་གསུངས་སོ། །དགེ་བསྙེན་གྱི་བསླབ་པ་འདི་ཡན་ཆད་ལ་ཞིབ་དུ་སློབ་པར་འདོད་པས་དགེ་བསྙེན་གྱི་སྡོམ་པ་བརྒྱད་པ་ལས་སྟོན་པས་དེ་ལ་བསླབ་པར་བྱའོ། །དེའི་རྗེས་ལ་དགེ་ཚུལ་གྱི་སྡོམ་པ་ལ་སློབ་པར་འདོད་ན་འདིའང་བསླབ་པའི་གནས་བཅུ་ཞེས་བྱ་བ་འདི་ཉིད་ཀྱིས་ཤེས་ཏེ། གང་ཞིག་གཞན་གྱི་སྲོག་གཅོད་ནོར་འཕྲོག་དང་། །མི་ཚངས་སྤྱོད་བརྫུན་བཅོས་པའི་ཆང་ལ་སོགས། །གར་སོགས་ཕྲེང་སོགས་མལ་ཆེ་མཐོ་བ་དང་། །དུས་མིན་ཁ་ཟས་གསེར་དངུལ་ལྡོག་བྱེད་པའི། །ཡན་ལག་བཅུ་ནི་དགེ་ཚུལ་སྡོམ་པ་ཡིན། །ཞེས་ཀཱ་རི་ཀ་སུམ་བརྒྱ་པ་ལས་གསུངས་པ་ལྟ་བུའོ། །དེའི་སྟེང་དུའང་ནུས་ན་དགེ་སློང་གི་སྡོམ་པའི་བར་དུའང་བླང་བར་བྱའོ། །གཉིས་པ་དེ་བསླབ་པའི་གནས་བཅུར་བསྡུ་བ་ཡང་། དགེ་སློང་གི་ཁྲིམས་ཉིས་བརྒྱ་ལྔ་བཅུ་རྩ་གསུམ་པོ་ཡང་ལ་ལ་ལུས་ཀྱི་ལས་གསུམ་གྱི་ཁོངས་སུ་འདུ། དེ་བཞིན་དུ་ལ་ལ་ངག་གི་ལས་བཞི། ལ་ལ་ཡིད་ཀྱི་ལས་གསུམ་སྟེ། མདོར་ན་བསླབ་པའི་གནས་བཅུར་མ་འདུས་པ་མེད་དོ། །དེ་དག་ཇི་ལྟར་འདུ་ཚུལ་ཡང་རྒྱས་པར་བཤད་པར་བྱའོ། །སྤྱི་དོན་བཞི་པ་མ་ཐོབ་པ་ཐོབ་པར་བྱེད་པ་ནི་གཞན་དུ་ཤེས་པར་བྱའོ། །ལྔ་པ་གཏོང་བའི་རྒྱུ་ནི། །མཛོད་ལས། བསླབ་པ་ཕུལ་དང་ཤི་འཕོས་དང་། །མཚན་གཉིས་དག་ནི་བྱུང་བ་དང་། །རྩ་བ་ཆད་དང་མཚན་འདས་པ། །སོ་སོར་ཐར་པའི་འདུལ་བ་གཏོང་། །ཞེས་བྱ་བ་གཞན་ནི་ཤེས་པར་ཟད་ལ། རྩ་བ་ཆད་པ་ནི་ལོག་ལྟ་སྐྱེས་པ་ཡིན་ལ། མཚན་མོ་འདས་པ་ནི་བསྙེན་གནས་ཀྱི་སྡོམ་པ་ནམ་ལངས་པ་དང་གཏོང་བའོ། །དེའི་སྟེང་དུ། ཉན་ཐོས་སྡེ་པ་ལ་ལ་དག །ཁ་ཅིག་ལྟུང་བ་བྱུང་བ་ལས། །གཞན་དག་དམ་ཆོས་ནུབ་པ་ལས། །ཁ་ཆེ་རྣམས་ནི་བྱུང་བ་ན། །བུ་ལོན་ནོར་བཞིན་གཉིས་སུ་འདོད། །ཅེས་འབྱུང་ངོ་། །དྲུག་པ་ཐོབ་པ་བསྲུང་བའི་ཚུལ་ལ་གཉིས། མི་ཉམས་པར་བསྲུང་བ་དང་། ཉམས་པ་ཕྱིར་བཅོས་པའོ། །འདི་དག་རྒྱས་པར་གཞན་དུ་ཤེས་པར་བྱའོ། །བཞི་པ་དུས་ནམ་སྐྱེ་ངེས་པ་མེད་པའི་སེམས་བསྐྱེད་པ་ནི་སྤྱོད་པ་ཡིན་པས་སྐབས་འདིར་འབྱུང་མོད་ཀྱང་ཁ་ཅིག་དབང་བསྐུར་གྱི་སྟ་གོན་གྱི་དུས་ལ་སེམས་བསྐྱེད་མི་བྱེད་པའི་གང་ཟག་ཀྱང་ཡོད་པས། རེ་ཞིག་གཟུང་བདེ་བའི་ཕྱིར་འོག་ཏུ་བརྗོད་པར་བྱའོ། །སྤྱོད་པ་རིམ་པ་ཅན་ལ་བསླབ་པ་བསྟན་ཟིན་ཏོ། །དེ་ལྟར་གོང་དུ་བསྟན་པའི་ཚུལ་གྱིས་སྤྱོད་པ་རིམ་ཅན་དུ་བསླབ་པ་ཚུལ་ཁྲིམས་ལ་ཅི་རིགས་པར་བསླབས་ནས། དེའི་འོག་ཏུ་ཐོས་པ་བྱའོ། །དེ་ལྟར་མཛོད་ལས། ཚུལ་གནས་ཐོས་དང་བསམ་ལྡན་པས། །བསྒོམ་པ་ལ་ནི་རབ་ཏུ་སྦྱར། །ཞེས་གསུངས་པ་ལྟ་བུའོ། །དེའི་འོག་ཏུ་ཐོས་པ་བྱས་པ་ལ་དགོས་པ་ཅི་ཡོད་ཅེ་ན། གོང་དུ་བསླབ་པའི་ཚུལ་ཁྲིམས་ཉིད་ཀྱང་ངེས་པར་འབྱུང་བ་མ་སྐྱེས་པ་རྣམས་ངེས་པར་འབྱུང་བར་སྒྱུར་བར་བྱེད། སྐྱེས་པ་རྣམས་ཀྱིའང་རབ་ཏུ་དབྱེ་བ་ལ་སོགས་པའི་བྱེ་བྲག་ཐམས་ཅད་ཤེས་པར་བྱེད། མྱ་ངན་ལས་འདས་པ་སྐྱེ་བའི་རྒྱུའི་གཙོ་བོ་ནི་ཚུལ་བཞིན་དུ་ཡིད་ལ་བྱེད་པ་ཡིན་ལ། དེའི་རྒྱུ་ནི་ཐོས་པ་ཡིན་ཏེ། མདོ་ལས། ཐོས་པས་མཁས་ནས་བླང་དོར་གྱི། །བྱེ་བྲག་རྣམ་པར་ཤེས་པ་དང་། །ཐོས་པས་ཚུལ་ཁྲིམས་ཀྱི་བསླབ་པ་ཐོབ་ནས་སྡིག་པ་ལས་ལྡོག་པར་འགྱུར་བ་དང་། །ཐོས་པས་སེམས་ཀྱི་བསླབ་པ་ཐོབ་ནས་དོན་མ་ཡིན་པའི་འདོད་པ་པ་སྤོང་བ་དང་། །ཐོས་པས་ཤེས་རབ་ཀྱི་བསླབ་པ་ཐོབ་ནས་ཟག་པ་ཟད་ནས་མྱ་ངན་འདས་པ་ཐོབ། །ཅེས་གསུངས་པ་ལྟ་བུའོ། །ཐོས་པ་འདིའང་བློ་གྲོས་ཆུང་བ་རྣམས་ལ་ལྟ་བ་རྣམས་རིམ་གྱིས་བསླབ་པར་བྱ་བ་ཡིན་པས་དེ་ལ་བཞི། བྱེ་བྲག་ཏུ་སྨྲ་བ་དང་། མདོ་སྡེ་པ་དང་། རྣལ་འབྱོར་སྤྱོད་པའི་སེམས་ཙམ་པ་དང་། དབུ་མ་པའོ། །དེ་ཡང་དང་པོ་བསྟན་པར་བྱ་སྟེ། རྒྱུད་ལས། དེ་ལ་བྱེ་བྲག་སྨྲ་བ་བསྟན། །ཞེས་གསུངས་སོ། །དེ་ལ་བྱེ་བྲག་སྨྲ་བ་ཞེས་བྱ་བ་ནི་ཤེས་བྱ་གཞི་ལྔ་པོ་ཐམས་ཅད་རྫས་སུ་ཡོད་དེ། བྱེ་བྲག་ཏུ་སོ་སོར་ཕྱེ་ནས་སྨྲ་བའི་ཕྱིར་བྱེ་བྲག་ཏུ་སྨྲ་བའོ། །དེ་སྟོན་པའི་བསྟན་བཅོས་བྱེ་བྲག་ཏུ་བཤད་པ་ཉིད་ལ་གཙོར་བྱེད་པ་སྟེ། ཁོ་ན་རེ། བཀའ་རྣམས་ནི་གདུལ་བྱའི་ངོར་གསུངས་པས་དྲང་བའི་དོན་མང་བ་ཡིན་ལ། བསྟན་བཅོས་འདི་ནི་བཅོམ་ལྡན་འདས་ཀྱིས་ངེས་པའི་དོན་གསུངས་པ་རྣམས་ཕྱོགས་གཅིག་ཏུ་འཕགས་པ་དགྲ་བཅོམ་པ་རྣམས་ཀྱིས་བྱས་པ་ཡིན་ནོ་ལོ། །དེས་ན་འདིར་གཙོར་བྱེད་པས་བྱེ་བྲག་སྨྲ་བའོ། །དེའི་ལུགས་ཀྱིས་ཆོས་ཐམས་ཅད་བསྡུ་ན་གསུམ། ཤེས་བྱའི་གནས་དང་། ཟག་པ་དང་བཅས་པ་དང་། ཟག་པ་མེད་པའོ། །དེའང་དབྱེ་ན་བརྒྱད་ལས། དང་པོ་ཤེས་བྱའི་གནས་ཀྱིས་གཉིས་བསྟན་ཏེ། ཁམས་བསྟན་པ་དང་། དབང་པོ་བསྟན་པའོ། །ཟག་པ་དང་བཅས་པས་འཇིག་རྟེན་དང་། ལས་དང་། ཕྲ་རྒྱས་གསུམ་མོ། །ཟག་པ་མེད་པས་ལམ་དང་། གང་ཟག་དང་། ཤེས་པ་དང་། ཏིང་ངེ་འཛིན་གྱི་ཁྱད་པར་དང་གསུམ་དུ་སློབ་དཔོན་དབྱིག་གཉེན་གྱིས་ཕྱེའོ། །དེ་ལ་དང་པོ་ཤེས་བྱའི་གནས་བརྗོད་ན་གཉིས་ཏེ། རྒྱས་པར་དབྱེ་བ་དང་། བསྡུས་ཏེ་བསྟན་པའོ། །དང་པོ་ལ་གཉིས། རྒྱས་པར་དབྱེ་བའི་ཚུལ་དང་། དེ་བསྡུ་བའི་ཚུལ་ལོ། །དང་པོ་ནི། བཅོམ་ལྡན་འདས་ཀྱིས་མདོ་ལས་རིལ་པོ་ལ་བདག་ཏུ་འཛིན་པའི་གཉེན་པོར་ཕུང་པོ་ལྔ་གསུངས་སོ། །གཟུགས་ལ་བདག་ཏུ་འཛིན་པའི་གཉེན་པོར་སྐྱེ་མཆེད་བཅུ་གཉིས་གསུངས་སོ། །གཟུགས་དང་སེམས་གཉིས་ཀ་ལ་བདག་ཏུ་འཛིན་པའི་གཉེན་པོར་ཁམས་བཅོ་བརྒྱད་གསུངས་སོ། །ཡང་འཁོར་བའི་རྒྱ་མཚོ་ལས་མྱ་ངན་ལས་འདས་པའི་སྐམ་སར་ཐོན་པར་བྱ་བའི་ཕྱིར་བདེན་པ་རྣམ་པ་བཞིའི་ཆོས་ཀྱང་གསུངས་སོ། །གཉིས་པ་བསྡུ་བའི་ཚུལ་ལ་གཉིས་ཏེ། ཟག་པ་དང་བཅས་པའི་ཆོས་དང་། ཟག་པ་མེད་པའི་ཆོས་ཞེས་བྱ་བ་གཉིས་སམ། ཡང་འདུས་བྱས་ཀྱི་ཆོས་དང་། འདུས་མ་བྱས་ཀྱི་ཆོས་ཞེས་བྱ་བ་གཉིས་སོ། །དེ་ལ་དང་པོ་ཟག་པ་ཞེས་བྱ་བ་ནི། ཉོན་མོངས་པ་ཡིན་ལ། དེ་གང་དུ་རྒྱས་པར་འགྱུར་བ་ནི་ཟག་པ་དང་བཅས་པ་སྟེ། དེའང་ལམ་གྱི་བདེན་པ་མ་གཏོགས་པ་ནི་༼པའི༷་༽འདུས་བྱས་རྣམས་ཏེ། སྡུག་བསྔལ་དང་། ཀུན་འབྱུང་དང་། ཕུང་པོ་ལྔ་དང་། སྐྱེ་མཆེད་བཅུ་གཉིས་༼གཅི༷ག་༽དང་། ཁམས་བཅུ་བདུན་དང་། ཆོས་ཀྱི་སྐྱེ་མཆེད་དང་། ཆོས་ཀྱི་ཁམས་ཀྱི་ཕྱོགས་རེ་ནི་ཟག་བཅས་སོ། །ཟག་པ་མེད་པ་ནི་ཉོན་མོངས་པ་ཉེ་བར་ཞི་བ་དང་རྒྱས་པར་མི་འགྱུར་བ་སྟེ་ལམ་གྱི་བདེན་པ་དང་། ཆོས་ཀྱི་སྐྱེ་མཆེད་དང་། ཁམས་ཀྱི་ཕྱོགས་གཅིག་སྟེ། ནམ་མཁའ་དང་སོ་སོར་བརྟགས་པས་འགོག་པ་དང་། བརྟགས་མིན་གྱི་འགོགས་པ་དང་ཁམས་གསུམ་དང་སྐྱེ་མཆེད་ཀྱི་དབྱེ་བས། དྲུག་ནི་ཟག་པ་མེད་པའོ། །དེའང་སོ་སོར་བརྟགས་པ་ནི་གཉེན་པོའི་སྟོབས་ཀྱིས་བཅོམ་པས་འགོག་པའོ། །སོ་སོར་བརྟགས་པ་མ་ཡིན་པས་འགོག་པ་ནི་རྐྱེན་མ་ཚང་བས་འགོག་པའོ། །གཉིས་པ་ནི་ཡང་ཆོས་ཀྱི་བསྡུ་བས་ནི་ནམ་མཁའ་དང་འགོག་པ་གཉིས་མ་གཏོགས་པའི་ཆོས་ཐམས་ཅད་ནི་འདུས་བྱས་ཞེས་བྱ་སྟེ། རྒྱུ་དང་རྐྱེན་ལས་བྱས་པའི་དངོས་པོ་ཡིན་པའི་ཕྱིར་རོ། །གསུམ་པོ་ནི་བྱས་པའི་དངོས་པོ་མ་ཡིན་པའི་ཕྱིར་འདུས་མ་བྱས་ཞེས་བྱའོ། །དེ་དག་རབ་ཏུ་དབྱེ་བའི་དབང་དུ་བྱས་ན་གཟུགས་ཀྱི་ཕུང་པོ་ལ་སོགས་པ་འདི་རྣམས་ཀྱི་མཚན་ཉིད་དང་༼ད༷བྱེ་བ༷་༽རྣམ་པར་གཞག་པ་དང་། འདི་དག་ཁམས་གང་ལ་གང་ལྡན་པ་དང་། ཐོགས་བཅས་དང་ཐོགས་མེད་དང་། དམིགས་བཅས་དང་དམིགས་མེད་ལ་སོགས་པའི་རབ་ཏུ་དབྱེ་བ་དང་། དབང་པོ་ཉི་ཤུ་རྩ་གཉིས་ཀྱི་རྣམ་པར་གཞག་པ་དང་། ཤེས་བྱའི་གཞི་ལྔ་གཏན་ལ་དབབ་པ་དང་། རྒྱུ་དྲུག་དང་། འབྲས་བུ་ལྔ་དང་། རྐྱེན་བཞིའི་མཚན་ཉིད་དང་གང་དང་གང་གིས་ཡིན་པ་ལ་སོགས་པའི་དབྱེ་བ་མཐའ་ཡས་པ་ནི་འདིར་སུས་སྨྲ་བར་ནུས་ཀྱིས་གཞན་ཉིད་དུ་བཙལ་བར་བྱའོ། །གཉིས་པ་བསྡུས་ཏེ་བསྟན་ན་ཤེས་བྱའི་གཞི་ལྔ་སྟེ། དེའང་ཆོས་མངོན་པ་མཛོད་ལས། ཆོས་འདི་དག་ཐམས་ཅད་ནི་གཟུགས་དང་སེམས་དང་སེམས་ལས་བྱུང་བ་དང་། སེམས་དང་ལྡན་པ་མ་ཡིན་པའི་འདུ་བྱེད་དང་། འདུས་མ་བྱས་དང་ལྔར་འགྱུར་རོ། །དེ་ལ་འདུས་མ་བྱས་ལ་ནི་སྐྱེ་བ་མེད་པའོ། །གཞན་དག་ནི་སྐྱེ་བའོ་ཞེས་འབྱུང་ངོ་། །དེ་ལྟ་བུའི་ཤེས་བྱའི་གཞི་ལྔ་པོ་འདི་དག་ཐམས་ཅད་ནི་རྫས་སུ་ཡོད་པ་ཡིན་ལ། རྫས་སུ་མེད་པ་ཡིན་ན་སྐུར་པ་བཏབ་པར་འགྱུར་རོ་སྙམ་དུ་སེམས་སོ། །དེ་ལ་རྫས་ཞེས་བྱ་བ་ནི་དེ་ལྟ་བུའི་རིགས་སུ་གྱུར་པའི་ངོ་བོར་གྲུབ་པ་ཡིན་ནོ། །དེ་ལ་ཤེས་བྱ་ཟུགས་ཀྱི་གཞི་ནི་རྫས་ཤིན་ཏུ་ཉུང་བ་ལ་དྲུག་ཡོད་དེ། དཔེར་ན་གཟུགས་ཀྱི་ཁམས་ལ་དྲི་དང་རོ་མེད་པར་བཤད་པས་འབྱུང་བ་བཞི་དང་། རེག་པ་དང་། ཁ་དོག་གོ། གཟུགས་ཁམས་ཀྱི་ལུས་དབང་ལྡན་ལ་རྫས་བདུན་དང་། དབང་པོ་གཞན་ལ་རྫས་བརྒྱད་དོ། །འདོད་ན་དབང་པོ་མེད་པ་དང་། །སྒྲ་མེད་ཕྲ་རབ་རྡུལ་རྫས་བརྒྱད། །ཅེས་བྱ་སྟེ། དྲི་དང་རོ་ཡོད་པས་བརྒྱད་དོ། །ལུས་དབང་ལྡན་ལ་རྫས་དགུའོ། །དབང་པོ་གཞན་ལྡན་རྫས་བཅུར་འདོད། །ཅེས་སོ། །སྒྲ་དང་ལྡན་པར་སྐྱེ་ན་རྫས་བཅུ་གཅིག་དང་ལྡན་པར་སྐྱེའོ། །དེ་ལྟར་ན་གཟུགས་ཀྱི་གཞི་ཐམས་ཅད་རྫས་སུ་ཡོད་པའོ། །སེམས་ཀྱི་གཞི་ནི་རྣམ་པར་ཤེས་པའི་ཚོགས་དྲུག་གོ། སེམས་ལས་བྱུང་བའི་གཞི་ནི་སེམས་བྱུང་ལྔ་བཅུ་རྩ་གཅིག་གོ། དེའང་སེམས་དང་སེམས་བྱུང་དེས་ལྷན་ཅིག་ཅེས་འདོད་དེ། འདི་གཉིས་ནི་ལྷན་ཅིག་ཏུ་སྐྱེའོ། །དེའང་རྟེན་མཚུངས་པ་དང་། དམིགས་པ་མཚུངས་པ་དང་། རྣམ་པ་མཚུངས་པ་དང་། དུས་མཚུངས་པ་དང་། རྫས་མཚུངས་པས་སོ། །དེས་ན་སེམས་དང་སེམས་བྱུང་གི་ཁྱད་པར་ཤིན་ཏུ་གཞག་པར་དཀའ་བས་སོ་སོའི་མཚན་ཉིད་བཤད་པ་འདི་ཙམ་ལ་ལྟོས་པ་ལས་མ་བཤད་དོ། །མི་ལྡན་པའི་འདུ་བྱེད་ཀྱི་གཞི་ནི་ཤིན་ཏུ་རྩོད་པ་མང་བར་འགྱུར་བའི་གནས་ཡིན་མོད་ཀྱང་བྱེ་བྲག་ཏུ་སྨྲ་བ་རྣམས་ན་རེ། ཆོས་རྣམས་ནི་རྟོག་གེའི་སྤྱོད་ཡུལ་མ་ཡིན་པས་ལྡན་པ་མ་ཡིན་པའི་འདུ་བྱེད་ཀྱང་རྫས་སུ་ཡོད་པ་ཁོ་ན་ཡིན་ཏེ། འདི་ནི་ཁོ་བོ་ཅག་གི་གྲུབ་པའི་མཐའ་ཡིན་ནོ་ཞེས་མཛོད་ལས་བཤད་དོ། །དེ་ལྟ་བུའི་ཤེས་བྱའི་གཞི་བཞི་ནི་རྒྱུ་དང་རྐྱེན་རྣམས་ལས་སྐྱེ་བ་ཡིན་ནོ། །འདུས་མ་བྱས་ལ་ནི་སྐྱེ་བ་མེད་དོ། །འོ་ན་བསྟན་བཅོས་ལས་འབྲས་བུའི་ཆོས་ནི་འདུས་བྱས་ཐམས་ཅད་དང་། སོ་སོར་བརྟགས་༼པ༷འི་༽འགོག་པའོ་ཞེས་བཤད་དོ་ཞེ་ན། དེ་ནི་ལམ་བསྒོམ་པའི་རྒྱུས་སོ་སོར་བརྟགས་པའི་འགོག་པ་ཐོབ་པ་དེ་ལ་བསམས་ནས་དེ་སྐད་སྨྲས་ཏེ། ཐོབ་པ་ནི་མི་ལྡན་པའི་འདུ་བྱེད་ཡིན་ལ། བྲལ་བ་ནི་འགོག་པ་ཡིན་པས་དེ་གཉིས་ཐ་དད་དོ། །བྲལ་བ་དང་། སོ་སོར་བརྟགས་པས་འགོག་པ་དང་། རྟག་པ་དང་། དགེ་བ་ཞེས་བྱ་བའི་རྫས་ཞིག་ཡོད་པ་དེ་འཕགས་པ་རྣམས་ཀྱིས་རིག་བྱ་ཡིན་ནོ། །ཞེས་དེ་ཙམ་ཞིག་བརྗོད་པར་ནུས་སོ། །དེ་བཞིན་དུ་སོ་སོར་མ་བརྟགས་པའི་འགོག་པ་ཞེས་བྱ་བ་དེའང་འདུས་བྱས་རྣམས་ཀྱིས་མི་སྐྱེ་བ་དེའང་སྔ་ན་ཡོད་པ་མ་ཡིན་ལ། དེའི་རྐྱེན་མ་ཚང་བས་སྐྱེ་བ་མེད་པར་གྱུར་པ་ནི་དེ་ལྟ་བུར་ཡོད་པའོ། །ནམ་མཁའ་འང་མི་སྒྲིབ་པར་གཟུགས་ཀྱི་གོ་འབྱེད་པར་བྱེད་པའོ། །དེ་ལྟར་ན་འདུས་མ་བྱས་ཀྱང་རྫས་སུ་ཡོད་པར་འདོད་དོ། །དེ་ལྟར་གནས་གཉིས་ཀྱིས་ཆོས་སྤྱི་དང་རང་གི་མཚན་ཉིད་བསྟན་ཏེ་ཤེས་པར་བྱས་ནས་དེའི་འོག་ཏུ་གནས་གསུམ་གྱི་ཟག་པ་དང་བཅས་པ་སྟོན་ཏེ། དེ་ལ་གང་དུ་ཀུན་ནས་ཉོན་མོངས་པ་དང་། གང་དག་ལ་ཀུན་ནས་ཉོན་མོངས་པ་སྡུག་བསྔལ་གྱི་བདེན་པ་དེ་ཤེས་པར་བྱ་བའི་ཕྱིར་གནས་གསུམ་པ་སྣོད་བཅུད་འཇིག་རྟེན་གྱི་གནས་ལུགས་ཤེས་པར་བྱ་བ་དེ་ལ་སློབ་བོ། །དེའི་རྗེས་ལ་དེ་དེར་སྐྱེ་བའི་རྒྱུ་གང་གིས་ཀུན་ནས་ཉོན་མོངས་པར་འགྱུར་བ་དེ་ཤེས་པར་བྱ་བའི་ཕྱིར་གནས་བཞི་པ་ལས་ཀྱི་རྣམ་པར་གཞག་པ་ལ་སློབ་བོ། །དེ་ནས་ལས་དེ་སྐྱེ་བར་འགྱུར་བ་ནི་ཉོན་མོངས་པའི་དབང་གིས་ཡིན་པས། ཉོན་མོངས་པའི་བྱེ་བྲག་གནས་ལྔ་པ་ཕྲ་རྒྱས་ཀྱི་དབྱེ་བ་ཤེས་པ་ལ་སློབ་བོ། །དེ་ལྟར་ན་ལས་བསྟན་པ་དང་ཕྲ་རྒྱས་བསྟན་པ་དེས་ཀུན་འབྱུང་གི་བདེན་པ་ཤེས་པར་འགྱུར་བ་ཡིན་ནོ། །དེ་ལྟར་ཟག་པ་དང་བཅས་པའི་ཆོས་ཤེས་ནས། དེའི་འོག་ཏུ་གནས་གསུམ་གྱིས་ཟག་པ་མེད་པའི་ཆོས་ཤེས་པར་བྱ་བ་ལ་སློབ་བོ། །དེའང་། བདེན་པ་མཐོང་དང་བསྒོམས་པ་ལས། །ཉོན་མོངས་སྤངས་པ་ཞེས་བཤད་དོ་༼པ༷༽། །ཞེས་འབྱུང་ངོ་། །འདི་ལ་གནས་དྲུག་པ་ལ་གསུམ་དང་། བདུན་པ་དང་བརྒྱད་པ་ལ་རེ་རེའོ། །དེ་ལ་ལྔ་སྟེ། བདེན་པའི་དབྱེ་བ་བསྟན་པ་དང་། དེའི་མངོན་པར་རྟོགས་པ་སྐྱེ་བའི་ཚུལ་དང་། དེའི་གང་ཟག་གི་དབྱེ་བ་དང་། གང་ཟག་རྣམས་ཀྱི་ཤེས་པའི་དབྱེ་བ་དང་། ཏིང་ངེ་འཛིན་གྱི་ཁྱད་པར་བསྟན་པ་དང་ལྔའོ། །དེ་ལ་དང་པོ་བདེན་པའི་དབྱེ་བ་ནི། བདེན་པ་བཞིར་དབྱེ་བ་དང་། གཉིས་སུ་དབྱེ་བའོ། །དེ་ལ་དང་པོ་ནི་སྡུག་བསྔལ་གྱི་བདེན་པ་དང་། ཀུན་འབྱུང་གི་བདེན་པ་དང་། འགོག་པའི་བདེན་པ་དང་། ལམ་གྱི་བདེན་པའོ། །དེ་ལྟ་བུའི་བདེན་པ་བཞི་པོ་ཉིད་ཀྱང་སོ་སོར་བཞི་བཞི་སྟེ། རྣམ་པ་བཅུ་དྲུག་དང་ལྡན་ཏེ། དེ་ལ་སྡུག་བསྔལ་གྱི་བདེན་པ་ནི་སེམས་ཅན་གྱི་སྐྱེ་བ་དང་། དེའི་གནས་སུ་བཅས་པ་འདི་རྣམས་ཡིན་ཏེ། སྡུག་བསྔལ་ཉིད་རྣམ་པ་གསུམ་མམ་སྐྱེ་རྒ་ན་འཆི་བཞི་བྲལ་འཕྲད་འགྱུར་དང་རེ་མེད་བཞི་སྟེ་བརྒྱད་ཀྱིས་སྡུག་བསྔལ་བས་ཁུར་ལྟ་བུར་གྱུར་པའི་ཕྱིར་སྡུག་བསྔལ་བའོ། །གཏན་དུ་བ་མ་ཡིན་པའི་ཕྱིར་མི་རྟག་པའོ། །ནང་གི་སྐྱེས་བུ་དང་བྲལ་བའི་ཕྱིར་སྟོང་པའོ། །འདོད་དགུར་བྱེད་པ་མེད་པའི་ཕྱིར་བདག་མེད་པའོ། །དེ་ལྟར་སྡུག་བསྔལ་གྱི་བདེན་པ་ལ་རྣམ་པ་བཞིའི་ཚུལ་གྱིས་བདེན་པའོ། །དེ་ལ་ཀུན་འབྱུང་གི་བདེན་པ་ནི་དེར་སྐྱེ་བར་བྱེད་པའི་རྒྱུ་ལས་དང་ཉོན་མོངས་པ་སྟེ། དེའང་བཞི་སྟེ། འོང་བའི་ཚུལ་གྱིས་ན་རྒྱུའོ། །འབྲས་བུ་མ་འོངས་པ་ན་འབྱུང་བས་ན་ཀུན་འབྱུང་བའོ། །འཕེལ་བར་བྱེད་པས་ན་རབ་ཏུ་སྐྱེ་བའོ། །སོ་སོར་འབྲང་བའི་དོན་གྱིས་ན་རྐྱེན་གྱི་རྣམ་པའོ། །དེ་ལྟར་ཀུན་འབྱུང་གི་བདེན་པའང་རྣམ་པ་བཞིར་བདེན་པའོ། །དེ་ལ་འགོག་པའི་བདེན་པ་ནི་གང་ཞིག་སྡུག་བསྔལ་རྒྱུ་དང་བཅས་པ་འགགས་པར་གྱུར་པའོ། །དེའང་བཞི་སྟེ། རྒྱུ་དང་འབྲས་བུའི་འབྲེལ་བ་ཞིག་པའི་ཕྱིར་འགོག་པའོ། །འདུས་བྱས་ཀྱི་མཚན་ཉིད་གསུམ་དང་བྲལ་བའི་ཕྱིར་ཞི་བའོ། །དགེ་བའི་ཕྱིར་གྱ་ནོམ་པའོ། །ཡིད་བརྟན་པའི་མཆོག་ཡིན་པའི་ཕྱིར་ངེས་པར་འབྱུང་བ་སྟེ། དེ་ལྟར་འགོག་པའི་བདེན་པའང་བཞིར་བདེན་པའོ། །དེ་ལ་ལམ་གྱི་བདེན་པ་ནི་གང་གིས་འགོག་པ་ཐོབ་པར་བྱེད་པའི་ལམ་གང་གིས་བདེན་པ་བཞི་ཤེས་པ་སྟེ། སྡུག་བསྔལ་ལ་སྡུག་བསྔལ་དུ་ཤེས། ཀུན་འབྱུང་བ་ལ་སྤང་བྱར་ཤེས། འགོག་པ་མངོན་དུ་བྱ་བར་ཤེས། ལམ་བསྟེན་པར་ཤེས་པའོ། །ཡང་ན་ཚོགས་ལམ། སྦྱོར་ལམ། མཐོང་ལམ། བསྒོམ་ལམ། མཐར་ཕྱིན་པའི་ལམ་སྟེ་ལྔའོ། །དེ་དག་ཀྱང་རྣམ་པ་བཞིར་བདེན་ཏེ། ལམ་ངན་པའི་གཉེན་པོར་གྱུར་པས་ན་ལམ་མོ། །རིགས་པ་མ་ཡིན་པའི་གཉེན་པོའི་ཕྱིར་རིགས་པའོ། །མྱ་ངན་ལས་འདས་པའི་གྲོང་དང་མི་འགལ་བས་ན་སྒྲུབ་པའོ། །སྲིད་པ་ཐམས་ཅད་ཀྱི་གཉེན་པོ་ཡིན་པའི་ཕྱིར་ན་ངེས་པར་འབྱིན་པ་སྟེ། དེ་ལྟར་བཞིར་བདེན་པའོ། །གཉིས་པ་བདེན་པ་གཉིས་སུ་དབྱེ་བ་ནི། ཀུན་རྫོབ་ཀྱི་བདེན་པ་དང་། དོན་དམ་པའི་བདེན་པའོ། །དེ་ལ་བདེན་པ་གཉིས་ཀྱི་ཁྱད་པར་ནི། མཛོད་ལས། གང་ལ་བཅོམ་དང་བློ་ཡིས་གཞན། །བསལ་ན་དེ་བློ་མི་འདོར་༼འཇུག༷་༽པ། །བུམ་ཆུ་བཞིན་དུ་ཀུན་རྫོབ་ཏུ། །ཡོད་དེ་དོན་དམ་ཡོད་གཞན་ནོ། །ཞེས་གསུངས་ཏེ། དེ་ལ་རེ་ཞིག་གི་བློ་འཇུག་ཀྱང་ཕྱི་ནས་དེའི་བློ་མི་སྐྱེ་བ་ནི་ཀུན་རྫོབ་ཏུ་ཡོད་པ་ཡིན་ལ། དེ་བློ་ནམ་ཡང་མི་འདོར་བ་ནི་དོན་དམ་དུ་ཡོད་པའོ། །དེ་ལ་ཀུན་རྫོབ་ཏུ་ཡོད་པ་ནི་གཉིས་ཏེ། བཅོམ་ན་དེ་བློ་འདོར་བ་ནི་དཔེར་ན་བུམ་པ་ལྟ་བུ་སྟེ། བཅག་ན་བུམ་པའི་བློ་མི་སྐྱེ་བའོ། །ཤེས་རབ་ཀྱིས་བརྟགས་ན་དེ་བློ་འདོར་བ་ནི་དཔེར་ན་ཆུ་ལྟ་བུ་སྟེ། རོ་དང་དྲི་ལ་སོགས་པ་གུད་དུ་ཕྱེ་ན་ཆུ་ཉིད་མི་རྙེད་པ་ལྟ་བུའོ། །དེས་ན་ཀུན་རྫོབ་ཏུ་ཡོད་པ་ནི་ཐ་སྙད་ཙམ་དུ་ཡོད་པའོ། །དེས་ན་ཀུན་རྫོབ་ཀྱི་དབང་གིས་བུམ་པ་ཡོད་ཆུ་ཡོད་ཅེས་བྱ་བ་ལ་སོགས་པའང་བདེན་པ་ཁོ་ནར་སྨྲས་པ་ཡིན་ནོ། །དེ་ལ་དོན་དམ་པར་ཡོད་པ་ནི་ནམ་ཡང་བློ་མི་འདོར་བའོ། །དེ་ནི་དཔེར་ན་གཟུགས་ལྟ་བུ་སྟེ་རགས་པ་ཡིན་ཡང་རུང་། ཕྲ་མོ་རྡུལ་ཕྲ་རབ་ཏུ་བཅོམ་ཡང་རུང་ངོ་། །དེ་བཞིན་དུ་ཚོར་བ་ལ་སོགས་པའང་ཡིན་ཏེ། སྔར་བསྟན་པའི་ཤེས་བྱའི་གཞི་ལྔ་པོ་དེ་ཙམ་ཞིག་ཡིན་པར་བསམ་མོ། །ཡང་སློབ་དཔོན་ཁ་ཅིག་འཇིག་རྟེན་ལས་འདས་པའི་ཤེས་རབ་བམ། དེའི་རྗེས་ཐོབ་ལ་འཛིན་པ་དང་བྲལ་བ་ནི་དོན་དམ་པའི་བདེན་པ་ཡིན་ལ། གཞན་གྱིས་འཛིན་པ་ནི་ཀུན་རྫོབ་བོ་ཞེས་འདོད་དོ། །གཉིས་པ་དེ་ལྟ་བུའི་བདེན་པ་དེ་དག་ལ་འཇུག་པ་དེའི་མངོན་པར་རྟོགས་པ་སྐྱེ་བའི་གོ་རིམ་ཇི་ལྟར་སྐྱེ་སྙམ་ན། མཛོད་ལས། ཚུལ་གནས་ཐོས་དང་བསམ་ལྡན་པས། །བསྒོམ་པ་ལ་ནི་རབ་ཏུ་སྦྱོར། །ཞེས་གསུངས་པས། གང་ཟག་འཇུག་པའི་གོ་རིམ་བཞི་སྟེ། དང་པོ་ཁོ་ནར་ཚུལ་ཁྲིམས་ལ་གནས་པ་ལ་རབ་ཏུ་སྦྱོར་རོ། །གཉིས་པ་དེའི་འོག་ཏུ་གསུང་རབ་ཀྱི་དོན་ཐོས་པར་བྱེད་པས་ཐོས་པ་ལ་སྦྱོར་རོ། །གསུམ་པ་ཐོས་པ་དེ་བསམ་པས་ཕྱིན་ཅི་མ་ལོག་པར་སེམས་པར་བྱེད་དོ། །བཞི་པ་བསམས་ནས་ཏིང་ངེ་འཛིན་བསྒོམ་པ་ལ་རབ་ཏུ་སྦྱོར་བར་བྱེད་དོ། །དེ་ལ་ཐོས་པ་ལས་བྱུང་བའི་ཤེས་རབ་ནི་ལུང་གི་དོན་ངེས་པ་ལས་སྐྱེས་པའི་ཤེས་རབ་ཡིན་ལ། བསམ་བྱུང་ནི་དེ་ཉིད་ལ་རིགས་པའི་སྒོ་ནས་ངེས་པར་བརྟགས་པ་ལས་སྐྱེས་པ་ཡིན་ལ། བསྒོམས་བྱུང་ནི་ཏིང་ངེ་འཛིན་ལས་སྐྱེས་པ་ཡིན་ནོ། །དེ་ལ་ཐོས་བསམ་གཉིས་ནི་ཞི་གནས་དང་ལྷག་མཐོང་གི་རྒྱུ་ཚོགས་པ་ཡིན་པས། དེ་སྔོན་དུ་སོང་ནས་ཞི་གནས་བསྒྲུབ་པ་དང་། ལྷག་མཐོང་བསྐྱེད་པའོ། །དང་པོ་ནི་བསྒོམ་པ་ལ་འཇུག་པ་ན། འདུ་འཛི་དང་མི་དགེ་བའི་རྣམ་པར་རྟོག་པ་ལ་སོགས་པ་ཐག་བསྲིངས་ནས་བསྒོམ་མོ། །དེའང་འདོད་ཆགས་ཤས་ཆེ་ན་མི་སྡུག་པ་ནས་དང་པོ་བསྒོམས་ལ། རྣམ་པར་རྟོག་པ་ཤས་ཆེ་ན་བགྲང་བ་དང་རྗེས་སུ་རྟོག་པ་རླུང་ནས་དང་པོར་བསྒོམ་པ་ཡིན་ཏེ། མཛོད་ལས། དེ་ལ་འཇུག་པ་མི་སྡུག་དང་། །དབུགས་དབྱུང་རྔུབ་པ་དྲན་པ་ཡིས། །འདོད་ཆགས་རྣམ་རྟོག་ལྷགས་རྣམས་ལ། །ཞེས་གསུངས་པས་སོ། །དེ་ལྟར་རྣམ་པ་གཉིས་ཀྱིས་ཞི་གནས་གྲུབ་ནས། དེ་ནས་ལྷག་མཐོང་བསྐྱེད་པར་བྱ་བའི་ཕྱིར་ལམ་ལྔ་ལ་འཇུག་སྟེ། དྲན་པ་ཉེ་བར་གཞག་པ་བཞིས་ཚོགས་ཀྱི་ལམ་དང་། སྦྱོར་ལམ་ནི་ཡང་དག་པར་སྤོང་བ་བཞིས་དྲོད། རྫུ་འཕྲུལ་གྱི་རྐང་པ་བཞིས་རྩེ་མོ། དབང་པོ་ལྔས་བཟོད་པ། སྟོབས་ལྔས་འཇིག་རྟེན་ཆོས་མཆོག་གོ། མཐོང་ལམ་འཕགས་པའི་ལམ་ཡན་ལག་བརྒྱད། བསྒོམ་ལམ་བྱང་ཆུབ་ཀྱི་ལམ་ཡན་ལག་བདུན་ནོ། །དེ་ལ་དང་པོ་དྲན་པ་ཉེ་བར་གཞག་པ་བཞི་བསྒོམ་པ་ཡིན་ནོ། །དེ་ལྟར་དྲན་པ་ཉེ་བར་གཞག་པ་བསྒོམས་པའི་སྟོབས་ཀྱིས་བདེན་པ་བཅུ་དྲུག་པོ་རྣམས་ལ་ཞི་གནས་དང་ལྷག་མཐོང་ཟུང་འབྲེལ་གྱི་སྣང་བ་ཅུང་ཟད་སྐྱེས་པས་བརྩོན་འགྲུས་ཁྱད་པར་ཅན་ཐོབ་སྟེ། དེ་ནི་དགེ་བའི་རྩ་བ་དྲོ་བར་གྱུར་པ་ཞེས་བྱའོ། །དེའི་ཚེ་ཡང་དག་པར་སྤོང་བ་བཞི་ཕྱེའོ། །དེ་ལྟར་དྲོད་གོམས་པས་སྔར་གྱི་བདེན་པ་ལ་དམིགས་པའི་ཟུང་འབྲེལ་དེ་འཕེལ་བ་ལས་མཆོག་ཏུ་རྟོགས་པ་འབྱུང་བས་ན་རྩེ་མོའོ། །དེས་ཏིང་ངེ་འཛིན་གྲུབ་པས་ན་རྫུ་འཕྲུལ་གྱི་རྐང་པའོ། །རྩེ་མོ་ཐོབ་པ་ནི་དགེ་བའི་རྩ་བ་རྒྱུན་མི་འཆད་པར་འགྱུར་བའོ། །དེ་ནས་བདེན་པ་རྣམས་ཀྱི་ཆོས་ཉིད་ཀྱི་ཆ་ཤས་མཐོང་བ་དེ་ལ་བཟོད་པས་ན་བཟོད་པའོ། །དེའི་ཚེ་དབང་པོ་ལྔ་རབ་ཏུ་ཕྱེའོ། །བཟོད་་ཐོབ་པ་ནི་ངན་སོང་དུ་མི་འགྲོའོ། །དེ་ནས་ཏིང་ངེ་འཛིན་དེས་དེ་མ་ཐག་ཏུ་བདེན་པ་མཐོང་བ་འདྲེན་པར་བྱེད་པས་ཆོས་ཀྱི་མཆོག་གོ། དེའི་ཚེ་སྟོབས་ལྔ་རབ་ཏུ་ཕྱེའོ། །འཇིག་རྟེན་པའི་ཆོས་ཀྱི་མཆོག་གི་མཇུག་ཐོགས་སུ་ཟག་པ་མེད་པའི་ལམ་བདེན་པ་མཐོང་བའི་མཐོང་ལམ་སྐྱེའོ། །དེ་ལྟར་ངེས་འབྱེད་ཆ་མཐུན་བཞི་ནི་སྦྱོར་བའི་ལམ་ཞེས་བྱའོ། །དེ་ནས་མཐོང་བའི་ལམ་ནི་བདེན་པ་བཞི་ལ་ཆོས་ཤེས་པའི་བཟོད་པ་དང་། ཆོས་ཤེས་པ་དང་། རྗེས་སུ་ཤེས་པའི་བཟོད་པ་དང་། རྗེས་སུ་ཤེས་པ་ཞེས་བྱ་བ་བཞི་བཞིར་ཕྱེ་བས་བཅུ་དྲུག་སྐྱེ་སྟེ། དེའང་ཞིབ་ཏུ་སྦྱར་ན་སྡུག་བསྔལ་ལ་ཆོས་ཤེས་༼པའི༷་བཟོ༷ད་༽པ་དང་། སྡུག་བསྔལ་ལ་ཆོས་ཤེས་པ་དང་། སྡུག་བསྔལ་ལ་རྗེས་སུ་ཤེས་པའི་བཟོད་པ་དང་། སྡུག་བསྔལ་ལ་རྗེས་སུ་ཤེས་པའོ། །དེ་བཞིན་དུ་ཀུན་འབྱུང་དང་། འགོག་པ་དང་། ལམ་ལ་ཡང་བཞི་བཞིར་དབྱེའོ། །༼འདོ༷ད་པ༷འི་ཁ༷མས་ཀྱི༷་སྡུག༷་བསྔ༷ལ་གྱི༷་ཆོ༷ས་ཉི༷ད་ཤེ༷ས་པ༷་ནི༷་ཆོ༷ས་ཤེ༷ས་པ༷འི་བཟོ༷ད་པ༷་ཡི༷ན་ལ༷། དེ༷་ཉི༷ད་ཡི༷ད་ལ༷་ངེ༷ས་པ༷ར་འཛི༷ན་པ༷་ནི༷་ཆོ༷ས་ཤེ༷ས་པ༷འོ། །དེ༷་བཞི༷ན་དུ༷་ཁམ༷ས་གོ༷ང་མ༷་གཉི༷ས་ཀྱི༷འང་དེ༷་བཞི༷ན་དུ༷་ཤེ༷ས་པ༷་ནི༷་རྗེ༷ས་སུ༷་ཤེ༷ས་པ༷འི་བཟོ༷ད་པ༷་ད༷ང་། རྗེ༷ས་སུ༷་ཤེ༷ས་པ༷་ཞེ༷ས་བྱ༷འོ། །དེ༷་ལྟ༷ར་བདེ༷ན་པ༷་བཞི༷་ལ༷་བ༷ཅུ་དྲུག༷་ཏུ༷་ཕྱེ༷་བ༷ས་བཅོ༷་ལྔ༷་ནི༷་མཐོ༷ང་ལ༷མ། བ༷ཅུ་དྲུག༷་པ༷་དངོ༷ས་ནི༷་དེ༷་ལ༷ས་གོ༷ང་དུ༷་བསྐྱེ༷ད༷་དུ༷་མེ༷ད་པ༷ས་བསྒོ༷མ་ལ༷མ་དུ༷་འདོ༷ད་དོ༷༽། །འདི་སྒོ་རུམ་དཔེ་ཁང་གི་དཔེ་རྙིང་གློ་བོ་མཁན་ཆེན་གྱིས་རྙེད་པ་ལྟར་བཅོས་པ་ཡིན་ནོ། །ལམ་གྱི་བཅུ་དྲུག་པ་ནི་བསྒོམ་ལམ་བྱང་ཆུབ་ཀྱི་ཡན་ལག་བདུན་པོ་ཡིན་ནོ། །དེ་ལ་དང་པོ་ཁོ་ནར་འདོད་པ་ན་སྤྱོད་པའི་སྡུག་བསྔལ་གྱི་ཆོས་ཉིད་མཐོང་བའི་ཟག་མེད་ཀྱི་ཤེས་པ་དེས་མཐོང་སྤང་གི་ཉོན་མོངས་པ་སྤོང་བས་བཟོད་པ། དེས་རྣམ་པར་གྲོལ་བ་མངོན་དུ་བྱས་པས་ཆོས་ཤེས་པ། དེ་ལྟར་གཉིས་པོ་དེ་འཕགས་པའི་ཆོས་ཀྱི་རྒྱུར་ཤེས་པས་ལྷག་རྣམས་ཀྱང་དེ་ལྟར་ཤེས་པ་ནི་རྗེས་སུ་ཤེས་པའི་བཟོད་པ། དེ་ངེས་པར་འཛིན་པ་ནི་རྗེས་སུ་ཤེས་པའོ། །དེ་ལྟར་སྐད་ཅིག་བཅུ་དྲུག་ཡིན་ཡང་བཅོ་ལྔ་པོ་བདེན་པ་མཐོང་བས་མཐོང་བའི་ལམ་མོ། །བཅུ་དྲུག་པ་ལ་སྔ་མ་ལས་ལྷག་མ་བལྟར་མེད་པས་བསྒོམ་ལམ་དུ་འདོད་དོ། །དེའི་ཚེ་ཡང་དག་པའི་ལྟ་བ་རྟོགས་པས་༼ལ༷་སོ༷གས་པ༷་༽འཕགས་པའི་ལམ་ཡན་ལག་བརྒྱད་རྟོགས་པས་ཕྱེ་བའོ། །དེ་ནས་བསྒོམ་པའི་ལམ་སྟེ་མཐོང་བའི་ལམ་དེ་ཉིད་འཇིག་རྟེན་པའི་བསམ་གཏན་དང་། འཇིག་རྟེན་ལས་འདས་པའི་བསམ་གཏན་གྱིས་གོམས་པར་བྱེད་པས་བསྒོམ་པའི་ལམ་སྟེ། དེའི་ཚེ་བྱང་ཆུབ་ཀྱི་ཡན་ལག་བདུན་སྐྱེའོ། །དེ་ཕན་ཆད་ནི་མཐར་ཕྱིན་པའི་ལམ་ཞེས་བྱ་བའི་ངས་སུ་འགྲོའོ། །གསུམ་པ་དེ་ལྟ་བུའི་གང་ཟག་ཇི་ལྟ་བུ་ཞེ་ན། གང་ཟག་ནི་སྤྱིར་རིགས་ཅན་གསུམ་སྟེ། ཉན་ཐོས་ཀྱི་རིགས་ཅན་དང་། རང་སངས་རྒྱས་ཀྱི་རིགས་ཅན་དང་། བྱང་ཆུབ་སེམས་དཔའ་སངས་རྒྱས་ཀྱི་རིགས་ཅན་ནོ། །དེ་ལྟར་གསུམ་པོ་དེ་དང་པོ་ཉིད་ནས་ལམ་སོ་སོ་ལ་འཇུག་པའང་ཡོད་ལ། རང་སངས་ས་དང་། སངས་རྒྱས་ཉིད་ནི་རྩེ་མོ་ཐོབ་ཐོབ་ཉན་ཐོས་ཀྱི་ལམ་གྱིས་བགྲོད་ནས། དེ་ནས་སངས་རྒྱས་གཉིས་ཀྱི་ལམ་དུ་སྒྱུར་བར་བྱེད་པའང་ཡོད་དོ། །བཟོད་པ་ཐོབ་ནས་བསྒྱུར་མི་སྲིད་དེ། བཟོད་པ་ཐོབ་ནས་ངན་སོང་དུ་མི་འགྲོ་ལ། བྱང་ཆུབ་སེམས་དཔའ་སེམས་ཅན་གྱི་དོན་དུའང་འགྲོ་དགོས་པའི་ཕྱིར་རོ། །སངས་རྒྱས་གཉིས་ཀྱི་གང་ཟག་ནི་ཚོགས་རྫོགས་ནས་ཚོགས་ལམ་མམ། རང་རྒྱལ་གྱི་རིགས་ཅན་འགའ་ཞིག་དྲོད་རྩེ་མོ་ལ་གནས་ཏེ། ཚོགས་གཉིས་དང་བསམ་གཏན་ལ་སོགས་པ་ཐམས་ཅད་ལ་སློབ་པ་ཡིན་ཏེ། དེ་ལ་ཐར་པའི་ཆ་མཐུན་ལ་གནས་པ་ཞེས་བྱའོ། །དེའང་བྱང་ཆུབ་སེམས་དཔའ་བསྐལ་པ་གྲངས་མེད་གསུམ། རང་སངས་རྒྱས་བསྐལ་པ་བརྒྱར་གནས་སོ། །དེ་ནས་སྟན་གཅིག་ལ་ལམ་ངེས་འབྱེད་ཆ་མཐུན་ནས་བཟུང་སྟེ། བྱང་ཆུབ་ཀྱི་བར་དུ་བསམ་གཏན་བཞི་པ་ཁོ་ན་ལ་བརྟེན་ཏེ་སྐྱེད་པར་བྱེད་དོ། །དེ་ཅིའི་ཕྱིར་ཞེ་ན། དབང་པོ་ཤིན་ཏུ་རྣོ་བའི་ཕྱིར་རོ། །དེ་སྐད་དུ། སྟོན་དང་བསེ་རུ་བྱང་ཆུབ་པར། །བསམ་གཏན་མཐའ་སྟན་གཅིག་ལ་ཀུན། །དེ་ཡི་གོང་དུ་ཐར་ཆ་མཐུན། །ཞེས་བཤད་དོ། །ཉན་ཐོས་ཀྱི་གང་ཟག་ལ་གཉིས། སོ་སོ་སྐྱེ་བོའི་གནས་སྐབས་དང་། འཕགས་པའི་གནས་སྐབས་སོ། །དང་པོ་ནི་གཉིས། མཐོང་ལམ་མ་སྐྱེས་ཀྱི་བར་དུ་དད་པས་རྗེས་སུ་འབྲང་བ་དང་། ཆོས་ཀྱི་རྗེས་སུ་འབྲང་བ་གཉིས་སོ། །གཉིས་པ་འཕགས་པའི་གནས་སྐབས་ལ་བཞི། རྒྱུན་དུ་གས་པ་དང་། ལན་ཅིག་ཕྱིར་འོང་བ་དང་། ཕྱིར་མི་འོང་བ་དང་། དགྲ་བཅོམ་པའོ། །དེ་དག་རེ་རེ་ལ་ཡང་འབྲས་བུ་ལ་ཞུགས་པ་དང་། འབྲས་བུ་ཐོབ་པ་སྟེ་བརྒྱད་དུ་འགྱུར་རོ། །དང་པོ་རྒྱུན་དུ་ཞུགས་པའི་འབྲས་བུ་ལ་གཉིས། དེ་མ་ཐག་དགྲ་བཅོམ་པ་ཐོབ་པ་ནི་རྒྱུན་ཞུགས་ཅིག་ཆར་བའོ། །རྒྱུན་ཞུགས་རིམ་གྱིས་པ་ནི་ནན་ཏར་འགོར་ན་ལན་བདུན་པའོ། །གཉིས་པ་ནི་དེ་འདོད་ཁམས་ཀྱི་བསྒོམ་སྤང་གི་ཉོན་མོངས་པ་ལྔ་༼དྲུག༷་༽ཟད་པར་གྱུར་པས་མིར་ལན་ཅིག་ཕྱིར་འོང་ན་ཕྱིར་འོང་བའོ། །གསུམ་པ་འདོད་པའི་ཁམས་ཀྱི་བསྒོམ་སྤང་གི་ཉོན་མོངས་པའི་རྒྱུ་ཟད་པ་ནི་ཕྱིར་མི་འོང་བ་སྟེ་འདོད་ཁམས་སུ་མི་སྐྱེ་བའོ། །དེ་དག་གི་དབྱེ་བ་ནི་མཐའ་ཡས་པ་ཞིག་གནས་པ་ལས་བརྗོད་པར་ག་ལ་ནུས། བཞི་པ་ནི་སྲིད་པའི་རྩེ་མོའི་ཉོན་མོངས་པ་ཆུང་ངུའི་ཆུང་ངུ་མ་གཏོགས་པའི་བར་གྱི་ཉོན་མོངས་པ་ཐམས་ཅད་ཟད་པ་ནི་དགྲ་བཅོམ་པ་ལ་ཞུགས་པ་སྟེ། དེའི་ཏིང་ངེ་འཛིན་ནི་རྡོ་རྗེ་ལྟ་བུའོ། །དེས་ཟད་པ་ཤེས་པ་དང་མི་སྐྱེ་བ་ཤེས་ན་དགྲ་བཅོམ་པ་ཐོབ་པའོ། །དེ་ཡན་ཆད་ནི་འབྲས་བུ་ཐོབ་པ་ལ་སློབ་པ་ཡིན་ལ། དེ་ནས་ནི་མི་སློབ་པ་ཞེས་བྱའོ། །དགྲ་བཅོམ་པ་ཉིད་ལ་བྱེ་བྲག་མི་མཐུན་པ་དྲུག་ཡོད་དོ། །ཡོངས་སུ་ཉམས་པའི་ཆོས་ཅན་དང་། འཆི་བར་སེམས་པའི་ཆོས་ཅན་དང་། རྗེས་སུ་བསྲུང་བའི་ཆོས་ཅན་དང་། གནས་པ་ལས་མི་བསྐྱོད་པའི་ཆོས་ཅན་དང་། རྟོགས་པའི་སྐལ་བ་ཅན་དང་། མི་གཡོ་བའི་ཆོས་ཅན་ནོ། །དེ་དག་ཀྱང་གོ་རིམ་བཞིན་དུ་ཕྱི་མ་ཕྱི་མ་མཆོག་ཡིན་པར་མངོན་ནོ། །རང་སངས་རྒྱས་དང་། སངས་རྒྱས་གཉིས་ཀྱང་མི་གཡོ་བའི་ཆོས་ཅན་གྱི་བྱེ་བྲག་ཡིན་ནོ། །བཞི་པ་དེ་ལྟ་བུའི་གང་ཟག་རྣམས་ཀྱི་ཤེས་པའི་དབྱེ་བ་ནི། ཤེས་པ་ཐམས་ཅད་བསྡུ་ན་གསུམ་དུ་དབྱེ་བ་དང་། དེ་བཅུར་དབྱེ་བ་དང་། དེ་དག་གང་ཟག་གང་ལ་ལྡན་པའོ། །དང་པོ་ལ་གསུམ་ཡིན་ཏེ། ཀུན་རྫོབ་ཤེས་པ་དང་། ཆོས་ཤེས་པ་དང་། རྗེས་སུ་ཤེས་པའོ། །གཉིས་པ་ནི། དེ་ལས་ཤེས་པ་དབྱེ་ན་བཅུ་ཐམ་པ་ཡིན་ཏེ། ཆོས་ཤེས་པ་དང་། རྗེས་སུ་ཤེས་པ་དང་། ཀུན་རྫོབ་ཤེས་པ་དང་། ཕ་རོལ་གྱི་སེམས་ཤེས་པ་དང་། སྡུག་བསྔལ་ཤེས་པ་དང་། ན་འབྱུང་བ་ཤེས་པ་དང་། འགོག་པ་ཤེས་པ་དང་། ལམ་ཤེས་པ་དང་། ཟད་པ་ཤེས་པ་དང་། མི་སྐྱེ་བ་ཤེས་པའོ། །དེ་ལ་ཀུན་རྫོབ་ཤེས་པ་ནི་བུམ་པ་དང་། སྣམ་བུ་དང་། ཆུ་ཞེས་བྱ་བ་ལ་སོགས་པ་ཤེས་པ་སྟེ། འདུས་བྱས་དང་འདུས་མ་བྱས་ཀྱི་ཆོས་མཐའ་དག་ལ་འཇུག་པ་ཡིན་ནོ། །ཆོས་ཤེས་པ་ཞེས་བྱ་བ་ནི་འདོད་པ་ན་སྤྱོད་པའི་སྡུག་བསྔལ་ལ་སོགས་པའི་བདེན་པ་བཞི་ཤེས་པ་ཡིན་ནོ། །རྗེས་སུ་ཤེས་པ་ཞེས་བྱ་བ་ནི་གཟུགས་དང་གཟུགས་མེད་པ་ན་སྤྱོད་པའི་བདེན་པ་བཞི་ཤེས་པ་ཡིན་ནོ། །ཕ་རོལ་གྱི་སེམས་ཤེས་པ་ནི་སེམས་ཅན་ཕ་རོལ་གྱི་སེམས་འདི་ནི་འདོད་ཆགས་དང་བཅས་པའོ། །ཞེས་བྱ་བ་ལ་སོགས་པ་ཕ་རོལ་གྱི་སེམས་གང་ཡིན་པ་དེའི་རྣམ་པ་འཛིན་པ་ཡིན་ནོ། །སྡུག་བསྔལ་ཤེས་པ་ལ་སོགས་པ་ནི་ཟག་པ་མེད་པ་སྟེ། བདེན་པ་བཞི་ལ་བཅུ་དྲུག་ཏུ་ཕྱེ་བ་ཉིད་ལ་འཇུག་པ་ཡིན་ནོ། །འདི་ནི་སྡུག་བསྔལ་འཕགས་པའི་བདེན་པའོ་ཞེས་བྱ་བ་ལ་སོགས་པར་ཤེས་པ་ལ་སོགས་པ་བཞི་ཡིན་ལ། བདག་གི་སྡུག་བསྔལ་ཤེས་སོ། །ཀུན་འབྱུང་སྤངས་སོ། །འགོག་པ་མངོན་དུ་བྱས་སོ། །ལམ་བསྟེན་ནོ་ཞེས་བྱ་བར་ཤེས་པ་ནི་ཟད་པ་ཤེས་པ་ཡིན་ལ། བདག་གིས་སྡུག་བསྔལ་ཡོངས་སུ་ཤེས་སོ། །ཤེས་པར་བྱར་མེད་དོ་ཞེས་བྱ་བ་ལ་སོགས་པ་ནི་མི་སྐྱེ་བ་ཤེས་པ་ཡིན་ནོ། །འདི་དག་ཕན་ཚུན་གང་དང་གང་འབྲེལ་བ་ནི་ཆོས་ཤེས་རྗེས་ཤེས་མ་གཏོགས་པ་དགུ་དང་། རྗེས་ཤེས་ཆོས་ཤེས་མ་གཏོགས་པ་དགུ་དང་། འགོག་པ་ཤེས་པ་གཞན་དང་མི་འབྲེལ་བ་སོགས་དགོས་པ་ཆུང་བས་འདིར་མི་བརྗོད་དོ། །གསུམ་པ་ཤེས་པ་དེ་དག་གང་ཟག་གང་ལ་ལྡན་ཞེ་ན། བཞི་སྟེ། སོ་སོ་སྐྱེ་བོ་ཤེས་པ་གཅིག་གམ་གཉིས་དང་ལྡན་པ་སྟེ། མཐོང་བསྒོམ་པ་བདུན་ནམ་བརྒྱད་དང་ལྡན་པ་དང་། དགྲ་བཅོམ་པ་བཅུ་ཀ་དང་ལྡན་པ་དང་། སངས་རྒྱས་ཐུན་མོང་དང་ཐུན་མོང་མ་ཡིན་པའི་ཡོན་ཏན་དང་ལྡན་པའོ། །དང་པོ་ནི་སོ་སོ་སྐྱེ་བོ་ངེས་འབྱེད་ཆ་མཐུན་མན་ཆད་ལ་ནི་ཀུན་རྫོབ་ཤེས་པ་གཅིག་པུ་དང་ལྡན་ནོ། །གལ་ཏེ་སོ་སོ་སྐྱེ་བོ་འདོད་ཆགས་དང་བྲལ་བ་ཞིག་ཡིན་ན་ཕ་རོལ་གྱི་སེམས་ཤེས་པ་དང་ཡང་ལྡན་ནོ། །མཐོང་བའི་ལམ་ནས་ཆོས་ཤེས་༼ལ༷་སོ༷གས་༽པ་དང་ལྡན་ཏེ། དེའང་སྐད་ཅིག་དང་པོ་ལ་སྡུག་བསྔལ་༼ཀུན༷་རྫོ༷བ་ཤེ༷ས་པ༷་ད༷ང་ལྡ༷ན་ནོ༷། །སྐ༷ད་ཅི༷ག་གཉི༷ས་པ༷་ལ༷་སྡུག༷་བསྔ༷ལ་ཤེ༷ས་པ༷་ད༷ང་། ༽ཆོས་ཤེས་པ་དང་། ཀུན་རྫོབ་ཤེས་པ་དང་ལྡན་ནོ། །དེ་བཞིན་དུ་རེ་རེ་བསྣན་པས་བདུན་དུ་འགྱུར་ལ་འདོད་ཆགས་དང་བྲལ་བ་ཞིག་ཡིན་ན་ཕ་རོལ་གྱི་སེམས་ཤེས་པ་དང་ལྡན་པས་བརྒྱད་དུ་འགྱུར་རོ། །བསྒོམ་པའི་ལམ་ནི་དེ་ཉིད་གོམས་པར་བྱ་བ་ལས་གཞན་བསྣན་དུ་མེད་དོ། །དགྲ་བཅོམ་པ་མི་གཡོ་བའི་ཆོས་ཅན་གྱིས་ནི་ཟད་པ་ཤེས་པ་དང་མི་སྐྱེ་བ་ཤེས་པ་ཐོབ་པས་ཤེས་པ་བཅུ་དང་ལྡན་ནོ། །དེ་ལྟ་བུའི་ཤེས་པ་བཅུ་དང་ལྡན་པ་ཐོབ་པས་ཡོན་ཏན་གྱི་ཁྱད་པར་དུ་མ་ཐོབ་སྟེ། ཤེས་པ་བཅུ་པོ་ཉིད་ལས་མ་འདས་སོ། །དེ་ལ་སངས་རྒྱས་ཀྱིས་ནི་ཡོན་ཏན་ཐུན་མོང་མ་ཡིན་པ་དང་ཐུན་མོང་བ་གཉིས་ཐོབ་སྟེ། དེ་ལ་ཡོན་ཏན་ཐུན་མོང་མ་ཡིན་པ་ནི་གསུམ་སྟེ། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་དང་། མཉམ་པ་དང་མི་མཉམ་པའི་ཆ་བཤད་པ་དང་། ཕུན་སུམ་ཚོགས་པ་གསུམ་བཤད་པའོ། །དང་པོ་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ཐོབ་སྟེ། སྟོབས་བཅུ་དང་། མི་འཇིགས་པ་བཞི་དང་། དྲན་པ་ཉེ་བར་གཞག་པ་གསུམ་དང་། ཐུགས་རྗེ་ཆེན་པོའོ། །གཉིས་པ་ནི། གཞན་ཡང་སངས་རྒྱས་ཐམས་ཅད་ཀྱི་མཉམ་པ་དང་མི་མཉམ་པའི་ཡོན་ཏན་གྱི་ཆ་བཤད་པ་ལ། སངས་རྒྱས་ཐམས་ཅད་ཚོགས་དང་ནི། །ཆོས་སྐུ་འགྲོ་བའི་དོན་སྤྱོད་པས། །མཉམ་པ་ཉིད་དེ་སྐུ་ཚེ་དང་། །རིགས་དང་སྐུ་བོང་ཚད་ཀྱིས་མིན། །ཞེས་བཤད་དོ། །གསུམ་པ་ནི། དེ་ལ་སངས་རྒྱས་ཐམས་ཅད་ནི་རྒྱུ་ཕུན་སུམ་ཚོགས་པ་དང་། འབྲས་བུ་ཕུན་སུམ་ཚོགས་པ་དང་། ཕན་འདོགས་པ་ཕུན་སུམ་ཚོགས་པའོ། །དེ་ལ་རྒྱུ་ཕུན་སུམ་ཚོགས་པ་ནི་བསོད་ནམས་དང་ཡེ་ཤེས་ཀྱི་ཚོགས་ཐམས་ཅད་ལ་བར་ཆད་མེད་པར་ཡུན་རིང་དུ་གུས་པར་བྱས་ཏེ་གོམས་པའོ། །འབྲས་བུ་ཕུན་སུམ་ཚོགས་པ་ལ་བཞི་སྟེ། ཡེ་ཤེས་ཕུན་སུམ་ཚོགས་པ་དང་། སྤངས་པ་ཕུན་སུམ་ཚོགས་པ་དང་། མཐུ་ཕུན་སུམ་ཚོགས་པ་དང་། ཟུགས་ཀྱི་སྐུ་ཕུན་སུམ་ཚོགས་པའོ། །ཕན་འདོགས་པ་ཕུན་སུམ་ཚོགས་པ་ནི་ངན་སོང་གསུམ་དང་འཁོར་བའི་སྡུག་བསྔལ་ལས་གཏན་དུ་ཐར་བར་མཛད་པའམ། ཡང་ན་ཐེག་པ་གསུམ་དང་བདེ་འགྲོ་ལ་འགོད་པར་མཛད་པ་སྟེ་བཞིའོ། །འདི་དག་ནི་མདོར་བསྡུས་པའི་སངས་རྒྱས་ཀྱི་ཡོན་ཏན་མ་འདྲེས་པ་སྟེ། གཞན་དབྱེ་བ་མཐའ་ཡས་པ་ནི་སུ་ཞིག་གིས་བརྗོད་པར་ག་ལ་ནུས་ཏེ་མཐའ་ཡས་པ་མངའ་བས་སོ། །གཉིས་པ་ཐུན་མོང་བ་ལ་གཉིས་ཏེ། ཡོན་ཏན་གཞན་ཉན་ཐོས་དང་ཐུན་མོང་བ་དང་། འཇིག་རྟེན་པ་དང་ཐུན་མོང་བའོ། །དང་པོ་ལ་བཞི། ཉོན་མོངས་པ་མེད་པ་དང་། སྨོན་གནས་ཤེས་པ་དང་། སོ་སོ་ཡང་དག་པར་རིག་པ་དང་། མངོན་ཤེས་དྲུག་གི་ཟག་པ་ཟད་པའི་མངོན་པར་ཤེས་པའོ། །འཇིག་རྟེན་པ་དང་ཐུན་མོང་བ་ནི། མངོན་པར་ཤེས་པ་ལྔ་དང་། བསམ་གཏན་དང་། གཟུགས་མེད་པ་དང་། ཚད་མེད་པ་དང་། རྣམ་པར་ཐར་པ་དང་། ཟིལ་གྱིས་གནོན་པའི་སྐྱེ་མཆེད་དང་། ཟད་པར་གྱི་སྐྱེ་མཆེད་ལ་སོགས་པའོ། །མངོན་པར་ཤེས་པའང་དབྱེ་ན་དྲུག་སྟེ། རྫུ་འཕྲུལ་གྱི་མངོན་པར་ཤེས་པ་དང་། ལྷའི་མིག་དང་། རྣ་བའི་མངོན་པར་ཤེས་པ་དང་། སྔོན་གྱི་གནས་རྗེས་སུ་དྲན་པའི་མངོན་པར་ཤེས་པ་དང་། གཞན་གྱི་སེམས་ཀྱི་རྣམ་གྲངས་ཤེས་པའི་མངོན་པར་ཤེས་པ་དང་། འཆི་འཕོ་བ་དང་སྐྱེ་བ་ཤེས་ཀྱི་མངོན་པར་ཤེས་པ་དང་། ལྔ་ནི་འཇིག་རྟེན་པ་དང་ཐུན་མོང་བ་ཡིན་ལ། དྲུག་པ་ཟག་པ་ཟད་པའི་མངོན་པར་ཤེས་པ་ནི་ཁྱད་པར་བའོ། །དེ་ལྟ་བུའི་ཡོན་ཏན་གྱི་རབ་ཏུ་དབྱེ་བ་དང་། མཚན་ཉིད་དང་། སྟོབས་སོགས་དེ་དག་ཤེས་པ་གང་དང་གང་གིས་བསྡུས་པ་གནས་དང་གནས་མིན་མཁྱེན་པ་ཤེས་པ་བཅུ་དང་། ལས་དང་ལས་ཀྱི་རྣམ་སྨིན་མཁྱེན་པ་ཟག་མེད་ལ་རྣམ་སྨིན་མི་འདོད་པས་འགོག་ལམ་ཤེས་པ་གཉིས་བོར་བའི་བརྒྱད་ཀྱིས་བསྡུས་པ་ལ་སོགས་པ་ནི་གཞན་མངོན་པ་མཛོད་དུ་ཤེས་པར་བྱ་སྟེ། འདིར་ནི་སྤྱིའི་རྣམ་པ་ཙམ་ཞིག་བསྟན་ཏོ། །སྤྱི་དོན་ལྔ་པ་ཏིང་ངེ་འཛིན་གྱི་ཁྱད་པར་ནི་ཡོན་ཏན་གྱི་ཁྱད་པར་དེ་དག་ཀྱང་སྙོམས་པར་འཇུག་པ་ལས་ཐོབ་པ་ཡིན་པས་དེའི་དབྱེ་བ་ཅུང་ཟད་བཤད་ན་བཞི། མིང་གི་དོན་དང་། རྫས་སུ་དབྱེ་བ་དང་། དེས་འཇིག་རྟེན་དང་འཇིག་རྟེན་ལས་འདས་པའི་གྲུབ་ཚུལ་དང་། དེ་ལ་བརྟེན་ནས་རིགས་ཅན་གསུམ་གྲོལ་བའི་ཚུལ་ལོ། །དེ་ལ་དང་པོ་ནི་དགེ་བའི་སེམས་རྩེ་གཅིག་པ་ནི་ཏིང་ངེ་འཛིན་ཞེས་བྱ་བ་ཡིན་ལ། ཏིང་ངེ་འཛིན་དེ་ཉིད་ཡན་ལག་དང་ལྡན་ཞིང་ཞི་གནས་དང་། ལྷག་མཐོང་ཟུང་དུ་འབྲེལ་བ་ནི་བསམ་གཏན་ནམ་སྙོམས་པར་འཇུག་པ་ཞེས་བྱའོ། །དེའང་ལས་ཀྱི་དབང་གིས་ཟུགས་ཁམས་དང་། གཟུགས་མེད་དུ་སྐྱེས་པ་རྣམས་ནི་དེར་སྐྱེས་པས་ན་བསམ་གཏན་ཞེས་བྱ་བ་ཉིད་ཡིན་ལ། རྣལ་འབྱོར་པ་རྣམས་དེ་ལྟ་བུ་ལ་འཇུག་པ་རྣམས་ནི་ཡོན་ཏན་ཐམས་ཅད་ཀྱི་རྟེན་དུ་གྱུར་པའི་ཕྱིར་སྙོམས་པར་འཇུག་པ་ཞེས་བྱའོ། །གཉིས་པ་དེའང་རྫས་སུ་དབྱེ་ན་བསམ་གཏན་བཞི་དང་། གཟུགས་མེད་སྐྱེ་མཆེད་མུ་བཞིའོ། །གསུམ་པ་ནི་འདི་དག་ཟག་པ་དང་བཅས་པས་བསྒོམས་ན་འཇིག་རྟེན་པའི་བསམ་གཏན་ནོ། །ཟག་མེད་དེ་ལམ་གྱི་བདེན་པ་དང་ལྡན་པས་བསྒོམས་ན་འཇིག་རྟེན་ལས་འདས་པའི་སྙོམས་པར་འཇུག་གོ། བཞི་པ་ནི་འདི་དག་ཀྱང་ཅི་རིགས་པར་དྲོ་བར་གྱུར་པ་ནས་བརྩམས་ཏེ་དགྲ་བཅོམ་པ་མི་གཡོ་བར་གྱུར་པའི་ཆོས་ཅན་གྱི་བར་ལ་རིམ་གྱིས་ཁྱད་པར་དུ་འཕགས་པའི་ཚུལ་གྱིས་ཡོད་དོ། །དེ་ལ་དགྲ་བཅོམ་པ་མི་གཡོ་བའི་ཆོས་ཅན་ནི་བསམ་གཏན་བཞི་པ་ལ་བརྟེན་ཏེ་དེ་ཡང་རྣམ་པར་ཐར་པའི་སྒོ་གསུམ་གྱི་ཏིང་ངེ་འཛིན་འཐོབ་སྟེ། མྱ་ངན་ལས་འདས་པ་ནི་ཡུལ་ལྔ་འདུས་བྱས་ཀྱི་མཚན་ཉིད་བཞི་ཕོ་མོའི་མཚན་མ་གཉིས་གཅིག་ཏུ་བགྲངས་བས་མཚན་མ་བཅུ་དང་བྲལ་བའི་ཕྱིར་མཚན་མ་མེད་པ། བདག་མེད་པ་དང་། སྟོང་པ་ཉིད་མཚུངས་པར་ལྡན་པས་སྟོང་པ་ཉིད། ལམ་ཡང་གཟིངས་ལྟ་བུར་འབོར་བའི་ཕྱིར་སྨོན་པ་མེད་པ་ཞེས་བྱ་སྟེ། ཏིང་ངེ་འཛིན་འདི་ཐོབ་པ་ནི་མྱ་ངན་ལས་འདས་པ་ཞེས་བྱའོ། །དེ་ཡང་། མར་མེ་ཤི་བར་གྱུར་པ་ལྟར། །དེ་ཡི་སེམས་ཀྱི་རྣམ་པར་ཐར། །ཞེས་སོ། །ཡང་བཅོམ་ལྡན་འདས་འདིས་ནི་རྡོ་རྗེའི་གདན་དུ་ཉོན་མོངས་པ་དང་ལྷའི་བུའི་བདུད་བཏུལ་ལ། ཡངས་པ་ཅན་དུ་སླར་སྐུ་ཚེ་བྱིན་གྱིས་བརླབ་པའི་ཕྱིར་འཆི་བདག་གི་བདུད་བཏུལ་ལ། རྩྭ་མཆོག་གི་གྲོང་ཁྱེར་དུ་ཕུང་པོ་ལྷག་མ་མེད་པའི་དབྱིངས་སུ་ཡོངས་སུ་མྱ་ངན་ལས་འདས་པ་ཆེན་པོ་ཉེ་བར་བསྟན་པར་མཛད་པའི་ཕྱིར་ཕུང་པོའི་བདུད་བཏུལ་བ་ཡིན་ནོ་ཞེས་ཟེར་རོ། །དེ་ལྟར་ན་དེ་དག་གིས་ནི་ཁ་ཆེ་བྱེ་བྲག་ཏུ་སྨྲ་བའི་ལུགས་ཀྱིས་གྲུབ་པའི་མཐའ་མདོ་ཙམ་བརྗོད་པ་ཡིན་པས་དེ་ལྟར་བསྟན་ཏོ། །འདི་རྒྱས་པར་ཤེས་པར་འདོད་ན་ཆོས་མངོན་པ་མཛོད་ལེགས་པར་བསླབ་པར་བྱའོ། །དེ་ལྟར་བྱེ་བྲག་ཏུ་སྨྲ་བ་ལེགས་པར་བསྟན་ནས། མདོ་སྡེ་པ་ཡང་དེ་བཞིན་ནོ་ཞེས་གསུངས་པས་དེ་ལ་བསླབ་པར་བྱའོ། །དེའང་མདོ་སྡེ་ཉིད་ལ་ཚད་མར་འཛིན་པས་ན་མདོ་སྡེ་པ་ཞེས་བྱ་སྟེ། འདིའི་ལུགས་ཀྱང་ཕལ་ཆེར་བྱེ་བྲག་ཏུ་སྨྲ་བ་དང་མཐུན་མོད་ཀྱི། འོན་ཀྱང་དེ་ལས་ཁྱད་པར་ཅུང་ཟད་ཅིག་བརྗོད་པར་བྱའོ། །དེ་ལ་གཉིས། བྱེ་བྲག་ཏུ་སྨྲ་བ་སུན་དབྱུང་བ་དང་། རང་གི་གྲུབ་མཐའ་བརྗོད་པའོ། །དང་པོ་ནི་བྱེ་བྲག་ཏུ་སྨྲ་བས་ལོག་པར་བཏགས་པ་མང་དུ་ཡོད་ཀྱང་མདོར་བསྡུས་པ་ཙམ་བརྗོད་ན་གཉིས་ཏེ། མདོ་བས་བསྟན་བཅོས་བྱེ་བྲག་ཏུ་བཤད་པ་ལ་ཚད་མར་བྱེད་པ་དང་། ཤེས་བྱའི་གཞི་ལྔ་ཀ་རྫས་སུ་ཡོད་པར་འདོད་པའོ། །དེ་ལ་དང་པོ་མི་འཐད་དེ། སློབ་དཔོན་དབྱིག་གཉེན་གྱིས། བསྟན་བཅོས་དང་འགལ་བ་ནི་བླའི་མདོ་དང་འགལ་བ་ནི་དེ་ལྟ་མ་ཡིན་ནོ་ཞེས་གསུངས་པས་སོ། །དེ་ལྟ་མ་ཡིན་ཏེ། དོ་ལས་གདུལ་བྱ་ལ་དགོངས་ཏེ་གསུངས་པ་མང་ངོ་སྙམ་ན། ཁྱོད་རང་གི་གཞུང་ལས། སྤྱོད་པ་རྣམས་ཀྱི་གཉེན་པོར་ནི། །ཆོས་ཀྱི་ཕུང་པོ་མཐུན་པར་གསུངས། །ཞེས་བཤད་པ་མ་ཡིན་ནམ། དེས་ན་ཆོས་ཐམས་ཅད་གདུལ་བྱའི་ངོར་གསུངས་པས་ན་ཐམས་ཅད་ལེགས་པར་གསུངས་པ་ཁོ་ནའོ། །གཉིས་པ་ཤེས་བྱའི་གཞི་ལྔ་རྫས་སུ་འདོད་པ་ལས། དེ་ལ་རྫས་ཞེས་བྱ་བ་ནི་ཅི་ཞིག །དེ་དེའི་ཐ་སྙད་ཀྱིས་བརྗོད་དུ་རུང་བའི་ངོ་བོ་ཙམ་ལ་བྱའམ། རང་གི་མཚན་ཉིད་ཀྱི་དངོས་པོར་ཡོད་པ་ལ་བརྗོད་ཅེས་དྲི་བར་བྱའོ། །དེ་ལ་དང་པོ་ཡིན་ནོ་ཞེ་ན། འོ་ན་ཐམས་ཅད་རྫས་སུ་ཡོད་པར་འགྱུར་བས་བཏགས་པའི་ཡོད་པ་གཞན་མི་སྲིད་པར་འགྱུར་རོ། །གལ་ཏེ་གཉིས་པ་ཡིན་ནོ་ཞེ་ན། རང་གི་མཚན་ཉིད་ཀྱི་དངོས་པོར་ཡོད་པ་དེ་ནི་གཟུགས་ཀྱི་གཞི་དང་། སེམས་ཀྱི་གཞི་དང་། སེམས་ལས་བྱུང་བའི་གཞི་ནི་རྫས་སུ་ཡོད་པ་བདེན་ན་མི་ལྡན་པའི་འདུ་བྱེད་དང་འདུས་མ་བྱས་རྫས་སུ་ཡོད་པར་ག་ལ་འགྱུར། དེ་ལ་མི་ལྡན་པའི་འདུ་བྱེད་ཐོབ་པ་ལ་སོགས་པའང་གཟུགས་དང་སེམས་དང་སེམས་ལས་བྱུང་བའི་གནས་སྐབས་ཀྱི་ཆོས་ཉིད་ལ་བཏགས་པ་ཡིན་ཏེ། དེ་མ་ཡིན་ན་དེ་ལྟར་ཡོད་པའི་རང་བཞིན་སྟོན་ཅིག །དེ་ནི་མངོན་སུམ་དང་རྗེས་སུ་དཔག་པ་གང་གིས་ཀྱང་བསྟན་པར་མི་ནུས་པའི་ཕྱིར་ཡོད་པ་མ་ཡིན་ནོ། །ཡང་སྐྱེ་བ་ལ་སོགས་པ་རྫས་སུ་ཡོད་པའི་ཕྱིར་དུས་གསུམ་ཀྱང་རྫས་སུ་ཡོད་པར་ཐལ་ལོ། །དེ་འདོད་ན་འདས་པ་དང་། མ་འོངས་པ་དང་༼པ༷འ༷ང་༽ད་ལྟར་དུ་ཡོད་པའི་ཕྱིར་འདས་པ་དང་མ་འོངས་པ་མ་ཡིན་པར་འགྱུར་རོ། །ཡང་འདུས་མ་བྱས་རྫས་སུ་ཡོད་པས་མྱ་ངན་ལས་འདས་པའང་རྫས་སུ་ཡོད་པར་ཐལ་ལོ། མདོར་༼འདོ༷ད་༽ན། མར་མེ་ཤི་བ་ཇི་བཞིན་དུ། །དེ་ཡི་སེམས་ཀྱི་རྣམ་པར་ཐར། །ཞེས་གསུངས་པ་དང་འགལ་བར་འགྱུར་རོ། །དེ་ལྟར་བྱེ་བྲག་ཏུ་སྨྲ་བ་སུན་ཕྱུང་ནས། མདོ་སྡེ་པས་རང་གི་གྲུབ་པའི་མཐའ་འཇོག་པ་ལ་གསུམ་སྟེ། མདོའི་རབ་ཏུ་དབྱེ་བ་དང་། མདོའི་དོན་རྣམ་པར་གཏན་ལ་དབབ་པ་དང་། མདོའི་ཚིག་བཤད་པའི་ཚུལ་བསྟན་པའོ། །དེ་ལ་དང་པོ་ནི་གསུང་རབ་ཡན་ལག་བཅུ་གཉིས་དང་། སྡེ་སྣོད་གསུམ་མོ། །དེ་ཡང་བརྗོད་བྱའི་ཁྱད་པར་ནས་སྡེ་སྣོད་གསུམ་དུ་འགྱུར་ལ། རྗོད་བྱེད་ཀྱི་ཁྱད་པར་ནས་གསུང་རབ་ཡན་ལག་བཅུ་གཉིས་སུ་འགྱུར་བས་ན་ངོ་བོ་སྡེ་སྣོད་གསུམ་དུ་བསྡུ་ལ། དེ་དག་ཀྱང་ཐེག་པ་ཆེ་ཆུང་གཉིས་སུ་འབྱེད་དེ། དེའང་མདོའི་སྡེ་དང་། དབྱངས་ཀྱིས་བསྙད་པའི་སྡེ་དང་། ལུང་དུ་བསྟན་པའི་སྡེ་དང་། ཚིགས་སུ་བཅད་པའི་སྡེ་དང་། ཆེད་དུ་བརྗོད་པའི་སྡེ་སྟེ་ལྔ་ནི་ཉན་ཐོས་ཀྱི་མདོ་སྡེ་ཡིན་ནོ། །གླེང་གཞིའི་སྡེ་དང་། རྟོགས་པ་བརྗོད་པའི་སྡེ་དང་། དེ་ལྟ་བུ་བྱུང་བའི་སྡེ་ནི་ཉན་ཐོས་ཀྱི་འདུལ་བ་ཡིན་ནོ། །སྐྱེས་པ་རབས་ཀྱི་སྡེ་ནི་བྱང་ཆུབ་སེམས་དཔའི་འདུལ་བ་ཡིན་ལ། ཤིན་ཏུ་རྒྱས་པའི་སྡེ་དང་། རྨད་དུ་བྱུང་བའི་ཆོས་ཀྱི་སྡེ་ནི་བྱང་ཆུབ་སེམས་དཔའི་མདོ་སྡེའི་སྡེ་སྣོད་ཡིན་ནོ། །གཏན་ལ་ཕབ་པར་བསྟན་པའི་སྡེ་ནི་གཉིས་ཀའི་ཆོས་མངོན་པའི་སྡེ་སྣོད་དོ། །རང་སངས་རྒྱས་ནི་ཉན་ཐོས་ཀྱི་སྡེ་སྣོད་ལ་དམིགས་པ་ཡིན་ནོ། །མདོ་སྡེ་ཚིག་ལྷུག་དོན་མང་སྟོན། དབྱངས་བསྙན་དབུས་མཐར་ཚིགས་བཅད་གསུངས། །ལུང་སྟོན་འདས་དང་འབྱུང་བ་སྟོན། །ཚིགས་བཅད་རྐང་མཉམ་སྦྱར་ནས་གསུངས། །ཆེད་བརྗོད་མ་ཞུས་ཡི་རང་གསུངས། །གླེང་གཞི་བསླབ་པ་བཅས་པ་བརྗོད། །རྟོགས་བརྗོད་དོན་གསལ་དཔེར་བཅས་གསུངས། །དེ་ལྟ་བུ་བྱུང་སྔོན་བྱུང་བརྗོད། །སྐྱེས་རབས་སྔོན་གྱི་མཛད་པ་སྟོན། །ཤིན་རྒྱས་ཟབ་རྒྱས་ཐེག་པ་སྟོན། །རྨད་བྱུང་འཕགས་པའི་ངོ་མཚར་གཏམ། །གཏན་ཕབ་མཚན་ཉིད་སྟོན་པའོ། །ཞེས་དཀོན་མཆོག་ལྷུན་གྲུབ་ཀྱིས་གོང་མའི་དགོངས་རྒྱན་ལས་གསུངས་སོ། །མཚན་ཉིད་འདི་དག་ལ་དཔྱད་ན་མདོ་རེ་ལ་མཚན་ཉིད་དུ་མ་ཚང་བ་ཡོད་དམ་སྙམ། གཉིས་པ་དེ་ལྟ་བུའི་མདོའི་དོན་གཏན་ལ་འབེབས་པ་ན། ཆོས་རྣམས་ཀྱི་ཇི་སྙེད་ཡོད་པ་གཏན་ལ་དབབ་པ་དང་། ཇི་ལྟ་བ་བཞིན་དུ་ཡོད་པ་གཏན་ལ་དབབ་པའོ། །དང་པོ་ནི་ཕུང་པོ་དང་ཁམས་དང་སྐྱེ་མཆེད་ཀྱི་རྣམ་པར་གཞག་པ་མས་སོ། །གཉིས་པ་ཇི་ལྟ་བ་བཞིན་དུ་ཡོད་པ་ནི། འཕགས་པའི་བདེན་པ་བཞི་དང་། སྟོང་པ་ཉིད་བཅུ་དྲུག་དང་། དེ་བཞིན་ཉིད་གསུམ་དང་། བཀའ་རྟགས་ཀྱི་ཕྱག་རྒྱ་བཞི་དང་། རྣམ་པར་ཐར་པའི་སྒོ་གསུམ་གཏན་ལ་འབེབས་པའོ། །དེ་ལྟ་བུའི་དོན་དེ་དག་ཀྱང་བརྗོད་པའི་ཚུལ་བསམ་གྱིས་མི་ཁྱབ་པས་སློབ་དཔོན་རྣམས་ཀྱིས་ནི་སྣ་ཚོགས་ནས་བསྟན་ཀྱང་། འདིར་སློབ་དཔོན་དབྱིག་གཉེན་གྱིས་བྱེ་བྲག་ཏུ་སྨྲ་བ་དང་བསྟུན་ནས། དེ་ལས་ཁྱད་པར་དུ་འཕགས་པའི་ཚུལ་དུ་བསྟན་པས་དེ་བཞིན་དུ་བྱས་ན། དེ་ལ་ཤེས་བྱའི་གཞི་ལྔ་ལས་གཟུགས་ཀྱི་གཞི་ནི་ཕྱི་རོལ་ན་འབྱུང་བ་བཞིའི་རྡུལ་ཕྲ་རབ་དང་། དེ་ལས་རྫས་སུ་གྱུར་པ་རྫས་སུ་གནས་ཀྱང་། མདོ་ལས། ཀྱེ་རྒྱལ་བའི་སྲས་དག་ཁམས་གསུམ་པོ་འདི་དག་ནི་སེམས་ཙམ་མོ། །ཞེས་གསུངས་པས། ཇི་ལྟར་སྣང་ཚད་ཤེས་པ་ཉིད་ཡིན་ལ། དེ་ལྟར་སྣང་བའི་རྒྱུ་ཕྱི་རོལ་གྱི་དོན་གྱིས་བསྐྱེད་པར་འདོད་དོ། །དེས་ན་མྱོང་བའི་ཡུལ་ནི་བདག་ཉིད་གསལ་བ་ཡིན་ལ། དམིགས་པའི་ཡུལ་ནི་མྱོང་བ་དང་འདྲ་བ་ཕྱི་རོལ་གྱི་དོན་ཡིན་ཏེ། ཚད་མ་རྣམ་འགྲེལ་གྱི་མདོ་སྡེ་པའི་སྐབས་ལས། བདག་ཉིད་གསལ་བར་མྱོང་བ་ཡིན། །འདྲ་བར་སྣང་བ་དམིགས་པ་ཡིན། །དེས་ན་ཤེས་པ་ཐམས་ཅད་ཀྱི། །དམིགས་མྱོང་བདག་ཉིད་ཐ་དད་གནས། །ཞེས་སོ། །སེམས་དང་སེམས་ལས་བྱུང་བའི་གཞི་ནི་རང་གསལ་བ་སྐད་ཅིག་མའི་རྫས་སུ་གྲུབ་པར་འདོད་དོ། །མི་ལྡན་པའི་འདུ་བྱེད་ཀྱི་གཞི་ནི་དེ་གསུམ་གྱི་གནས་སྐབས་ཀྱི་ཆོས་ལ་བཏགས་པ་ཡིན་གྱི། དངོས་པོ་ཐ་དད་ཀྱི་རྫས་སུ་གྲུབ་པ་མེད་དོ། །འདུས་མ་བྱས་ཀྱི་གཞི་ནི་དངོས་པོ་མེད་པ་ཉིད་ལ་བཏགས་པ་ཙམ་དུ་འདོད་དོ། །དེས་ན་མྱ་ངན་ལས་འདས་པའང་དངོས་པོ་མེད་པར་འདོད་དོ། །ལམ་དང་གང་ཟག་གི་ཁྱད་པར་ལ་ཉན་ཐོས་དང་རང་སངས་རྒྱས་ཀྱི་ནི་བྱེ་བྲག་ཏུ་སྨྲ་བ་དང་ཕལ་ཆེར་འདྲ་ལ། ཁྱད་པར་དུ་བྱང་ཆུབ་སེམས་དཔའི་ལམ་ལ་ས་བཅུའི་༼བཅུས༷་༽མདོ་ལས་གསུངས་པར་འདོད་དོ། །བྱང་ཆུབ་སེམས་དཔའི་འབྲས་བུ་ཡང་དག་པར་རྫོགས་པའི་སངས་རྒྱས་ལ་ཁྱད་པར་སྐུ་གསུམ་མམ། མི་གནས་པའི་མྱ་ངན་ལས་འདས་པ་ཞེས་བྱ་བ་ཕུང་པོ་ལྷག་མ་མེད་པར་མྱ་ངན་ལས་འདས་ཀྱང་སེམས་ཅན་གྱི་དོན་རྒྱུན་མི་འཆད་པར་མདོ་ལས་གསུངས་པས་དེ་ལྟར་འདོད་དོ། །གཞན་ཁྱད་པར་ཕྲ་མོ་མང་དུ་ཡོད་དེ་གཞན་དུ་ཤེས་པར་བྱའོ། །གསུམ་པ་མདོའི་ཚིག་འཆད་པའི་ཚུལ་ནི། སློབ་དཔོན་དབྱིག་གཉེན་གྱིས། མདོ་དོན་སྨྲ་བ་དག་གིས་ནི། །དགོས་པ་བསྡུས་པའི་དོན་བཅས་དང་། །ཚིག་དོན་བཅས་དང་མཚམས་སྦྱོར་བཅས། །བརྒལ་ལན་བཅས་ཏེ་བསྙད་པར་བྱ། །ཞེས་རྣམ་བཤད་རིགས་པ་ལས་གསུངས་པ་ལྟ་བུའོ། །སློབ་དཔོན་ཐོགས་མེད་ཀྱིས་ནི། རྣམ་པར་བཤད་པའི་སྒོ་བཅུ་བཞི་ལ་སོགས་པ་གསུངས་སོ། །མདོ་སྡེ་པའི་གྲུབ་པའི་མཐའ་རྒྱས་པར་ཤེས་པར་འདོད་ན་མཛོད་ཀྱི་འགྲེལ་པར་ཤེས་པར་བྱའོ། །ཆོས་མངོན་པ་ཀུན་ལས་བཏུས་པ་ཞེས་བྱ་བ་འདིའང་མདོ་སྡེ་པའི་གྲུབ་པའི་མཐའ་ཉིད་ཡིན་ནོ། །ཇི་ལྟར་ཡིན་ཞེ་ན། འདི་ནས་བཤད་པ་དང་། མཛོད་འགྲེལ་དུ་མདོ་སྡེ་པར་བཏགས་པའི་གྲུབ་མཐའ་ཁྱད་པར་མེད་པར་སྣང་བའི་ཕྱིར་དང་། ད་ལྟའི་འཆད་པ་པོ་རྣམས་ཀྱང་ཐེག་པ་ཐུན་མོང་གི་སྡོམ་ཞེས་བྱ་བ་ཡིན་ཞེས་ཟེར་བ་དང་། སེམས་ཙམ་པ་ཕྱི་རོལ་གྱི་དོན་ཁས་བླངས་ཞེས་བྱ་བ་ཡིན་ནོ་ཞེས་ཟེར་བའི་ཕྱིར་ཏེ། སེམས་ཙམ་ཡིན་ན་ཕྱི་རོལ་གྱི་དོན་ཁས་བླངས་པ་འགལ་བའི་ཕྱིར་རོ། །ཡང་གཞུང་དེར་རྣམ་པར་རིག་པ་ཙམ་དུ་བསྟན་པའང་འགལ་ཡང་༼འག༷ལ་བ༷་༽མེད་དེ་མདོ་སྡེ་པས་ཕྱི་དོན་འདོད་ཀྱང་ཤེས་པ་ལ་སྣང་བའི་རྣམ་པ་སེམས་སུ་འདོད་པའི་ཕྱིར་རོ། །མདོ་སྡེ་པ་འདི་ཐེག་པ་ཆེན་པོའི་གྲུབ་མཐའ་ཡིན་ནམ། ཉན་ཐོས་ཀྱི་གྲུབ་མཐའ་ཡིན་ཞེ་ན། འདི་ནི་གྲུབ་པའི་མཐའ་འཛིན་པའི་ཉན་ཐོས་ཀྱི་གཞུང་ཡིན་ཏེ། སློབ་དཔོན་བྷ་ཝ་པས་རྟོག་གེ་འབར་བ་ལས། ཐམས་ཅད་ཡོད་པར་སྨྲ་བ་དེ་ནི་རྣམ་པ་གཉིས་ཏེ། བྱེ་བྲག་ཏུ་སྨྲ་བ་དང་། མདོ་སྡེ་པ་སྨྲ་བ་ཞེས་བྱའོ་ཞེས་གསུངས་སོ། །གལ་ཏེ་མདོ་སྡེ་པས་བྱང་ཆུབ་སེམས་དཔའི་ས་བཅུ་ལ་སོགས་པའང་གསུངས། ཤིན་ཏུ་རྒྱས་པའི་སྡེ་སྣོད་ཀྱང་གསུངས་པས། ཐེག་པ་ཆེན་པོར་མི་འགྱུར་རམ་ཞེ་ན། ༼མི༷་༽འགྱུར་ཏེ་ཁོ་རང་གི་ལུགས་ཀྱི་ཐེག་པ་ཆེན་པོ་ཡིན་གྱི། སེམས་ཙམ་ཡན་ཆད་ལ་གྲགས་པའི་ཐེག་པ་ཆེན་པོ་ནི་མ་ཡིན་ནོ། །དེས་ན་ཁོའི་ལུགས་ལ་གྲགས་པའི་ཤིན་ཏུ་རྒྱས་པ་ལས། ཐེག་པ་ཆེན་པོ་ཤིན་ཏུ་རྒྱས་པ་གཞན་འབྱུང་བས། དེ་བཀར་བསྒྲུབ་དགོས་པ་ཡིན་གྱི་དེ་ལྟ་མ་ཡིན་ན་ཐེག་པ་ཆེན་པོ་བཀར་བསྒྲུབ་མི་དགོས་པར་འགྱུར་རོ། །དེས་ན་བྱེ་བྲག་ཏུ་བཤད་པ་ལས་ཚད་མར་མི་བྱེད་པའི་ཉན་ཐོས་ཐམས་ཅད་མདོ་སྡེ་པ་ཡིན་ནོ་ཞེས་སེམས་སོ། །གལ་ཏེ་སློབ་དཔོན་ཤཱནྟི་པའམ། མེ་ཏྲཱི་པ་ལ་སོགས་པས་མདོ་སྡེ་པ་ཐེག་པ་ཆེན་པོ་ཡིན་ནོ་ཞེས་བཤད་པ་དང་འགལ་ལོ་ཞེ་ན། དེ་ལྟར་དུའང་ད་ལྟ་བོད་ནའང་ཀུན་ལས་བཏུས་པ་ལ་སོགས་པ་ཐེག་ཆེན་དུའང་གྲགས་མོད་ཀྱི། དེ་ནི་ཐེག་པ་ཆེན་པོ་ལ་ཉེ་སྟེ་མདོ་སྡེ་ལ་ཚད་མར་བྱེད་པ་ཙམ་ལ་དགོངས་པའམ། ཉན་ཐོས་གྲུབ་མཐའ་འཛིན་པ་ཉིད་ཀྱི་ཐེག་པ་ཆེན་པོ་ལ་མོས་པ་རྣམས་མདོ་ལ་ཚད་མར་བྱེད་པ་འདི་ཙམ་ལ་དགོངས་པ་ཡིན་ནོ། །དེ་ལྟར་མདོ་སྡེ་པའི་གྲུབ་པའི་མཐའ་ལེགས་པར་ཤེས་ནས། དེ་ནས་རྣལ་འབྱོར་སྤྱོད་པ་ཉིད། །ཅེས་གསུངས་པས། དེའི་རྗེས་ལ་རྣལ་འབྱོར་སྤྱོད་པ་སེམས་ཙམ་པ་བསྟན་པར་བྱའོ། །དེ་ལ་གསུམ་སྟེ། ཐེག་པ་ཆེན་པོ་སངས་རྒྱས་ཀྱི་བཀར་བསྒྲུབ་པ་དང་། ཉན་ཐོས་ཀྱི་འདོད་པ་དགག་པ་དང་། ང་གི་འདོད་པ་བརྗོད་པའོ། །དང་པོ་ནི། མདོ་སྡེ་པ་རྣམས་ན་རེ། ཐེག་པ་ཆེན་པོ་ཤིན་ཏུ་རྒྱས་པའམ། རྨད་དུ་བྱུང་བའི་སྡེ་ནི་ཁོ་བོ་ཅག་གི་འདི་ཙམ་དུ་ཟད་ཀྱི་གཞན་ཤེས་རབ་ཀྱི་ཕ་རོལ་ཏུ་ཕྱིན་པ་དང་། ཕལ་བོ་ཆེ་ལ་སོགས་པ་བཀའ་མ་ཡིན་པར་སྨྲའོ། །དེ་ཡང་དག་པ་མ་ཡིན་ཏེ། དེ་སྐད་དུ་མདོ་སྡེ་རྒྱན་ལས། སྔར་ལུང་མ་བསྟན་ལྷན་ཅིག་བྱུང་། །ཐེག་ཆེན་གྱི་ཟབ་རྒྱས་རྟོག་གེའི་སྤྱོད་ཡུལ་མ་ཡིན་པ་དང་སངས་རྒྱས་གཞན་གྱིས་གསུངས་ཀྱང་བཀར་གྲུབ་པ་དང་། །ཐེག་ཆེན་ཞིག་ཡོད་ན་འདི་ཡིན་ཕྱིར་དང་མེད་ན་ཉན་ཐོས་ཀྱི་བཀའ་འང་མེད་པའི་ཕྱིར་དང་། ཡོད་ན་གཉིས་ཀ་ཡོད། མེད་ན་གཉིས་ཀ་མེད་པས་ཡོད་མེད་མཚུངས་པའི་ཕྱིར་དང་། །ཐེག་ཆེན་ཉོན་མོངས་ཀྱི་གཉེན་པོ་ཡིན་པ་དང་ནི་སྒྲ་གཞན་ཕྱིར། །ཞེས་སུངས་ཏེ། ཁོ་བོ་ཅག་འདོད་པའི་ཐེག་པ་ཆེན་པོ་འདི་བཀའ་མ་ཡིན་ན་སངས་རྒྱས་ཀྱིས་ཆོས་ལོག་པ་འདི་ལྟ་བུ་འབྱུང་ཞེས་ལུང་སྟོན་པར་རིགས་པ་ལ་ལུང་མ་བསྟན་པའི་ཕྱིར་དང་ཐེག་པ་ཆེ་ཆུང་གཉིས་ཀ་ལྷན་ཅིག་ཏུ་འབྱུང་བའི་ཕྱིར་དང་། འདིར་བསྟན་པའི་ཟབ་པ་དང་རྒྱ་ཆེ་བ་འདི་རྟོག་གེ་པའི་སྤྱོད་ཡུལ་མ་ཡིན་པའི་ཕྱིར་ཁྱེད་རང་གི་མདོ་དང་དོན་ཁྱད་པར་མེད་པས། ཡོད་ན་གཉིས་ཀ་ཡོད་པའི་ཕྱིར་དང་། ཐེག་པ་ཆེན་པོ་སྒྲ་སྣ་ཚོགས་ཀྱིས་གསུངས་པས། ཁྱེད་ཀྱིས་རྟོགས་དཀའ་བའི་ཕྱིར་སངས་རྒྱས་ཀྱི་བཀར་གྲུབ་བོ། །གཉིས་པ་ཉན་ཐོས་ཀྱི་འདོད་པ་དགག་པ་ནི། མདོ་སྡེ་པས་ཤེས་བྱའི་གཞི་ལྔ་ལས་གཟུགས་ཀྱི་གཞི་ཕྱི་རོལ་གྱི་དོན་རྡུལ་ཕྲ་རབ་ཏུ་གྲུབ་བོ་ཞེས་ཟེར་རོ། །དེ་ཡང་དག་པ་མ་ཡིན་ཏེ། ཁྱེད་རང་གི་ལུགས་ཀྱིས། སྒྲ་མེད་ཕྲ་རབ་རྡུལ་རྫས་བརྒྱད། །ཅེས་འདོད་པས་ན། རྫས་བརྒྱད་མེད་པས་༼པའི༷་༽རྡུལ་མེད་ལ། རྫས་བརྒྱད་སོ་སོ་ནས་གྲུབ་པ་མེད་པའི་ཕྱིར་རྡུལ་ཉིད་ཀྱང་མེད་པར་ཐལ་བའི་ཕྱིར་རོ། །འོ་ན་ཕྱི་རོལ་གྱི་དོན་མངོན་སུམ་དུ་ཡོད་པ་དང་འགལ་ལོ་སྙམ་ན་དེ་ཡང་དག་པ་མ་ཡིན་ཏེ། བག་ཆགས་ཀྱིས་ནི་དཀྲུགས་པའི་སེམས། །དོན་དུ་སྣང་བ་རབ་ཏུ་འབྱུང་། །དོན་ཡོད་མ་ཡིན་སེམས་ཉིད་དེ། །ཕྱི་རོལ་དོན་མཐོང་ལོག་པ་ཡིན། །ཞེས་ལང་ཀར་གཤེགས་པ་ལས་གསུངས་སོ། །མི་ལྡན་པའི་འདུ་བྱེད་ནི་ཕལ་ཆེར་འདྲ་ལ། འདུས་མ་བྱས་ཀྱང་མེད་པ་ཁོ་ནར་མི་འདོད་དེ། མདོ་ལས། ངོ་བོ་ཉིད་མི་སྐྱེ་མི་འགག་ཀུན་ནས་ཉོན་མོངས་པ་མ་ཡིན། རྣམ་པར་བྱང་བ་ཡང་མ་ཡིན་ཞེས་གསུངས་པའི་ཕྱིར་རོ། །དེས་ན་སེམས་དང་སེམས་ལས་བྱུང་བའི་གཞི་ནི་རྫས་སུ་ཡོད་པ་སྟེ། འདི་ལ་དགོངས་ནས་དེ་བཞིན་ཉིད་གསུམ་ལ་སོགས་པའི་ཆོས་ཐམས་ཅད་གསུངས་པས་འདི་ནི་ཡང་དག་པའི་དོན་ཞེས་འདོད་དོ། །གསུམ་པ་རང་གི་འདོད་པ་བརྗོད་པ་ནི། དེ་ལ་ལ་འབྱོར་སྤྱོད་པ་བས་ཐེག་པ་ཆེན་པོའི་ལམ་མཐའ་དག་བསྡུ་ན། གཞི་བཅུར་བསྡུས་པར་འདོད་དེ། ཤེས་བྱའི་གནས་དང་མཚན་ཉིད་དེར་འཇུག་དང་། །དེ་ཡི་རྒྱུ་འབྲས་དེ་རབ་དབྱེ་བ་དང་། །བསླབ་པ་སུམ་དང་དེ་འབྲས་སྤངས་པ་དང་། །ཡེ་ཤེས་ཐེག་པ་མཆོག་གྱུར་ཁྱད་པར་འཕགས། །ཞེས་ཆོས་མངོན་པའི་མདོ་ལས་གསུངས་པ་ལྟ་བུའོ། །དེ་ལ་དང་པོར་ཤེས་བྱའི་གནས་ཀུན་གཞིའི་རྣམ་པར་ཤེས་པ་སྟོན་ཏེ། ཆོས་ཐམས་ཅད་ཀྱི་རྒྱུ་རྟེན་ཅིང་འབྲེལ་བར་འབྱུང་བ་ལ་མཁས་པར་བྱ་བའི་ཕྱིར་རོ། །དེ་ཉིད་ལ་སྒྲོ་འདོགས་པ་དང་སྐུར་པ་འདེབས་པའི་མཐའ་བསལ་བར་བྱ་བའི་ཕྱིར་དེའི་མཚན་ཉིད་ངོ་བོ་ཉིད་རྣམ་པ་གསུམ་ཤེས་པར་བྱའོ། །དེ་ལྟར་དེ་བཞིན་ཉིད་ཤེས་པས་རྣམ་པར་རིག་པ་ཙམ་དུ་འཇུག་པ་དང་། དེའི་རྒྱུ་འབྲས་ཕ་རོལ་ཏུ་ཕྱིན་པ་དྲུག་གི་སྤྱོད་པ་དང་། དེ་བྱང་ཆུབ་སེམས་དཔའི་ས་བཅུར་དབྱེ་བ་དང་། ལྷག་པའི་ཚུལ་ཁྲིམས་དང་། སེམས་དང་། ཤེས་རབ་ཀྱི་བསླབ་པ་གསུམ་ལ་སྤྱོད་པའི་ཚུལ་དང་། དེ་ལྟར་རྟེན་པའི་འབྲས་བུ་སྤངས་པ་ཕུན་སུམ་ཚོགས་པ་དང་། ཡེ་ཤེས་ཕུན་སུམ་ཚོགས་པ་སྟེ་དེ་ལྟར་བཅུར་སྟོན་ཏོ། །དེ་ལ་དང་པོ་ཀུན་གཞི་གཏན་ལ་དབབ་པ་ལ་བཞི། ཀུན་གཞི་ཡོད་པའི་རྒྱུ་མཚན་དང་། ཀུན་གཞིའི་མཚན་ཉིད་དང་། དེ་ལྡོག་པའི་དུས་དང་། དབང་ཕྱུག་ལ་སོགས་པ་དང་མི་འདྲ་བའི་ཁྱད་པར་རོ། །དེ་ལ་དང་པོ་ཀུན་གཞིའི་རྣམ་པར་ཤེས་པ་ཡོད་པར་ཅིས་ཤེས། དེ་ཉན་ཐོས་ཀྱི་ལུང་ལས་མ་གསུངས་པ་ཅི་ཞེ་ན། མདོ་དགོངས་པ་ངེས་པར་འགྲེལ་པ་ལས། ལུས་ལེན་པ་དང་བླངས་ཟིན་འདོར་བར་བྱེད་པས་ལེན་པའི་རྣམ་པར་ཤེས་པ་འཇིག་རྟེན་གྱི་མཁས་པས་དཔག་དཀའ་བས་ཟབ་ཅིང་ཉན་ཐོས་ཀྱིས་བརྟག་དཀའ་བས་ཕྲ། །ཕུང་སྐྱེ་ཁམས་གསུམ་གྱི་ས་བོན་ཐམས་ཅད་ཆུ་ཡི་ཀླུང་རྒྱུན་མི་ཆད་པ་བཞིན་དུ་ཀུན་གཞི་སྐད་ཅིག་མར་འབབ། །འདི་འཁོར་བ་ཇི་སྲིད་བར་གནས་པས་བདག་ཏུ་རྟོག་པར་གྱུར་ན་མི་རུང་ཞེས། །འདི་ནི་བྱིས་པ་ཉན་ཐོས་རྣམས་ལ་ངས་མ་བསྟན། །ཞེས་སོ། །གཉིས་པ་མཚན་ཉིད་ནི། །ཡང་དེ་ཀུན་གཞི་ཡིན་ཏེ། ཆོས་མངོན་པའི་མདོ་ལས། ཐོག་མ་མེད་པའི་དུས་ཀྱི་དབྱིངས་ཏེ་རྒྱུ་དེ་ཉིད་ནི། །ཆོས་རྣམས་ཀུན་ཀྱི་ནི་གནས་སམ་རྟེན་ཡིན་ཏེ། །དེ་ཡོད་པས་ན་འཁོར་བའི་འགྲོ་ཀུན་དང་། །དེ་ལོག་པས་མྱ་ངན་འདས་པ་འཐོབ་པར་འགྱུར། །ཞེས་གསུངས་སོ། །དེ་ལ་ཀུན་གཞིའི་རྣམ་པར་ཤེས་པ་ཞེས་བྱ་བ་འདི་ཀུན་ནས་ཉོན་མོངས་པའི་ཆོས་ཐམས་ཅད་ཀྱི་བག་ཆགས་ལ་བརྟེན་ནས། ས་བོན་ཡོངས་སུ་འཛིན་པ་དང་ལྡན་པས་ཀུན་ནས་ཉོན་མོངས་པའི་ཆོས་ཐམས་ཅད་སྐྱེ་བའི་རྒྱུར་གྱུར་པའོ། །དེ་ནི་དབང་པོ་གཟུགས་ཅན་ཐམས་ཅད་ཀྱི་རྒྱུ་ཡང་ཡིན་ལ། དེ་ཡིད་དང་འཇུག་པའི་རྣམ་པར་ཤེས་པ་ཐམས་ཅད་ཀྱང་དེ་ལས་འབྱུང་བས་རྒྱུ་ཡིན་ནོ། །དེ་ཆོས་ཐམས་ཅད་ཀྱི་བག་ཆགས་ལ་བརྟེན་ཏེ་བྱུང་བས་འབྲས་བུ་ཡང་ཡིན་ནོ། །དེ་ལྟ་བུ་འདི་ནི་རྟེན་ཅིང་འབྲེལ་བར་འབྱུང་བ་ཞེས་བྱ་སྟེ། རྟེན་ཅིང་འབྲེལ་པར་འབྱུང་བའི་ངོ་བོ་ཉིད་རྣམ་པར་འབྱེད་པ་ནི་ཀུན་གཞིའི་རྣམ་པར་ཤེས་པ་ཡིན་ལ། དེ་ལ་སྡུག་པ་དང་མི་སྡུག་པར་རྣམ་པར་འབྱེད་པ་ནི་རྟེན་ཅིང་འབྲེལ་བར་འབྱུང་བ་ཡན་ལག་བཅུ་གཉིས་པོ་ཡིན་ནོ། །ཀུན་གཞི་དེ་ཐམས་ཅད་དུ་འགྱུར་བས་མ་བསྒྲིབས་པའང་ཡིན་ལ། དགེ་བ་དང་མི་དགེ་བ་གང་དུའང་གྲུབ་པ་མ་ཡིན་པས་ལུང་དུ་མ་བསྟན་པའང་ཡིན་ནོ། །གསུམ་པ་ནི། འཁོར་བ་གནས་ཀྱི་བར་དུ་ནི་འཇུག་ལ། དགྲ་བཅོམ་པ་ཐོབ་ན་ལྡོག་སྟེ། དེ་སྐད་དུ། དེ་ལ་ཀུན་གཞིའི་རྣམ་ཤེས་ནི། །རྣམ་སྨིན་ས་བོན་ཐམས་ཅད་པ། །ཞེས་བྱ་བ་དང་། དེ་ནི་རྒྱུན་འབབ་ཆུ་བོ་བཞིན། །དགྲ་བཅོམ་ཉིད་ན་དེ་ལྡོག་གོ། ཞེས་བཤད་པ་ལྟ་བུའོ། །ཡང་སངས་རྒྱས་པ་ན་གནས་གྱུར་པའི་ཚུལ་གྱིས་ལྡོག་སྟེ། ཇི་སྐད་དུ། ཀུན་གཞིའི་རྣམ་ཤེས་གང་ཡིན་པ། །དེ་ནི་མེ་ལོང་ཡེ་ཤེས་གྱུར། །ཞེས་གསུངས་སོ། །བཞི་པ་ནི། དེ་ལྟ་བུའི་ཀུན་གཞིའི་རྣམ་པར་ཤེས་པ་རྟེན་ཅིང་འབྲེལ་བར་འབྱུང་བ་དེ་མ་རྟོགས་པ་རྣམས་རང་བཞིན་གྱི་རྒྱུ་དང་། དབང་ཕྱུག་གི་རྒྱུ་དང་། སྔོན་བྱས་པའི་ལས་ཀྱི་རྒྱུ་ལས་བྱུང་བ་ལ་སོགས་པར་རྟོག་གོ། གལ་ཏེ་དེ་ལྟ་བུ་རྣམས་དང་། ཀུན་གཞིའི་རྣམ་པར་ཤེས་པ་ཇི་ལྟར་མི་འདྲ་སྙམ་ན། དབང་ཕྱུག་ལ་སོགས་པ་ནི་ཐམས་ཅད་ཀྱི་བྱེད་པ་པོ་གཅིག་པུར་འདོད་ལ། ཀུན་གཞི་འི༼ནི༷་༽སེམས་ཅན་སོ་སོ་རེ་རེ་ལ་ཡོད་ལ། དེའང་སྐད་ཅིག་མ་དུ་མ་ཉིད་དུ་འདོད་པ་དང་། བདག་རྟག་པ་ཉིད་དུ་འདོད་པ་དང་། ཀུན་གཞི་ནི་རྟེན་ཅིང་འབྲེལ་བར་འབྱུང་བ་སྐད་ཅིག་མའི་རང་བཞིན་དུ་འདོད་པས་ཁྱད་པར་དུ་འཕགས་པ་ཡིན་ནོ། །ཤེས་བྱའི་གནས་ཀུན་གཞིའི་རྣམ་པར་ཤེས་པའོ། །གཉིས་པ་དེའི་མཚན་ཉིད་ནི་རྣམ་པ་གསུམ་སྟེ། གཞན་གྱི་དབང་དང་། ཀུན་བརྟགས་པ་དང་། ཡོངས་སུ་གྲུབ་པའོ། །དེ་དག་བཤད་པ་ལ་གསུམ། མཚན་ཉིད་དང་། མིང་དོན་དང་། རབ་ཏུ་དབྱེ་བའོ། །དེ་ལ་དང་པོ་གཞན་གྱི་དབང་ནི་ཀུན་གཞིའི་རྣམ་པར་ཤེས་པ་ལས་བྱུང་བ་ཡང་དག་པ་མ་ཡིན་པའི་ཀུན་ཏུ་རྟོག་པ་ཞེས་བྱ་བ་སྟེ། རྣམ་པར་རིག་པ་ཉིད་ཡུལ་ཉེ་བར་སྤྱད་པའི་རྣམ་པར་རིག་པ་ཞེས་བྱ་བ་ལ་སོགས་པ་ཕུང་པོ་དང་ཁམས་དང་སྐྱེ་མཆེད་དུ་སྣང་བ་གཟུང་ཆའི་རྣམ་པ་དང་། འཛིན་ཆའི་རྣམ་པར་སྣང་བ་གང་ཡིན་པའོ། །གཉིས་པ་དེ་ལ་ཀུན་བརྟགས་པ་ཞེས་བྱ་བ་ནི་དོན་མེད་ཀྱང་རྣམ་པར་རིག་པ་ཙམ་དེ་ཉིད་དོན་དུ་སྣང་བ་གང་ཡིན་པའོ། །དེ་ལ་ཡོངས་སུ་གྲུབ་པ་ཞེས་བྱ་བ་ནི་གཞན་དབང་དེ་ཉིད་ལ་དོན་གྱི་རྣམ་པ་བསྟན་དུ་མེད་པའོ། །གལ་ཏེ་དོན་མེད་ན་རྣམ་པར་རིག་པ་གཟུང་འཛིན་དུ་སྣང་བ་ཅིའི་ཕྱིར་ཞེ་ན། དཔེར་ན་རྨི་ལམ་ལྟ་བུའོ། །འདི་ལས་སེམས་ཙམ་པ་ཉིད་གྲུབ་མཐའ་ཐ་དད་པ་དུ་མར་འགྱུར་ཏེ། སེམས་ཙམ་རྣམ་མེད་པ་ཞེས་བྱ་བ་ནི་ཡུལ་དུ་སྣང་བ་འདི་དག་ནི་མེད་བཞིན་དུ་སྣང་བ་སྟེ། རྣམ་པ་བརྫུན་པའོ། །དེས་ན་སངས་རྒྱས་པའི་ཚེ་ནའང་རྣམ་པ་ཐམས་ཅད་དང་བྲལ་བའི་རང་རིག་པ་འབའ་ཞིག་འདོད་དོ་ཞེས་ཟེར་རོ། །ཁ་ཅིག་བློ་རྣམ་པ་དང་བཅས་པ་ཞེས་བྱ་བ་སྟེ། རྣམ་པ་འདི་ཐམས་ཅད་ནི་བདེན་པ་ཉིད་ཡིན་ཏེ་བློ་ཉིད་དེར་སྣང་བའི་ཕྱིར་རོ། །དེས་ན་སངས་རྒྱས་ཙམ་ནའང་རྣམ་པ་འདི་དག་གནས་གྱུར་ཏེ་དག་པའི་སྣང་བར་འགྱུར་རོ་ཞེས་ཟེར་རོ། །དེ་ཉིད་ལའང་དབྱེ་བ་མང་སྟེ། ཡུལ་ནི་གཟུང་ཆར་སྣང་བའི་རྣམ་རིག་སྟེ་ཕྱེད་ཡིན་ལ། ཡུལ་ཅན་ནི་འཛིན་ཆར་སྣང་བའི་རྣམ་རིག་སྟེ་ཕྱེད་ཡིན་པས་སྒོ་ང་བཀས་པ་ལྟ་བུའོ་ཞེས་ཟེར་རོ། །སློབ་དཔོན་ཤཱཀྱ་བློ་ནི་རྣམ་པ་དུ་མ་ཉིད་ཀྱང་རྣམ་པར་རིག་པ་དུ་མ་ཉིད་ཡིན་ལ། དེ་འཛིན་པའང་རྣམ་པར་རིག་པ་དུ་མ་ཉིད་ཡིན་པས། སྐད་ཅིག་གཅིག་ལ་ཤེས་པ་དུ་མ་འཇུག་པའོ་ཞེས་ཟེར་རོ། །ཁ་ཅིག་ནི་ཡུལ་ཡང་རྣམ་པ་དྲུག་གི་རིག་པ་ཡིན་ལ། ཡུལ་ཅན་ཡང་རྣམ་པར་ཤེས་པའི་ཚོགས་དྲུག་གི་རྣམ་པར་རིག་པ་ཡིན་ནོ་ཞེས་ཟེར་རོ། །ཁ་ཅིག་ནི་རྣམ་པ་བསམ་གྱིས་མི་ཁྱབ་པ་སྣ་ཚོགས་སུ་སྣང་ཡང་བདེན་པ་ཤེས་པ་གཅིག་གི་ངོ་བོར་བདེན་ཏེ། དེ་ནི་འདི་ལྟ་སྟེ། ཡིད་ཀྱི་རྣམ་པར་ཤེས་པའོ། །དེ་སྒོ་ཐ་དད་ནས་འཇུག་པས་བློ་ཐ་དད་ལྟ་བུར་གྱུར་པའོ། །དེའང་སྐྱེ་མཆེད་བཅུ་གཉིས་བསྟན་པའི་མདོ་ལས། རྣམ་པར་ཤེས་པའི་ཚོགས་དྲུག་བསྟན་པ་ནི་ཡིད་ཀྱི་སྐྱེ་མཆེད་དོ་ཞེས་གསུངས་པ་ལྟ་བུའོ། །ཞེས་བྱང་ཆུབ་སེམས་དཔའ་གཅིག་པུར་སྨྲ་བ་ཟེར་རོ། །དེ་ལྟར་གྲུབ་མཐའ་ཐ་དད་པ་དུ་མར་གྱུར་པ་དེ་ཐམས་ཅད་ཕྱི་རོལ་གྱི་དོན་མི་འདོད་དོ། །དེའི་རིགས་པ་ནི། ཡི་དྭགས་དུད་འགྲོ་མི་མས་དང་། །ལྷ་རྣམས་སོ་སོ་རིགས་རིགས་སུའོ། །དངོས་གཅིག་ཡིད་ནི་ཐ་དད་ཕྱིར། །དོན་མ་གྲུབ་པར་བསྟན་པ་ཡིན། །ཞེས་བྱ་བ་ལ་སོགས་པས་ཤེས་སོ། །གཉིས་པ་མིང་དོན་ནི། དེ་ལ་ཅིའི་ཕྱིར་གཞན་གྱི་དབང་ཞེས་བྱ་ཞེ་ན། རང་གི་བག་ཆགས་ཀྱི་ས་བོན་ལས་སྐྱེས་ཤིང་བསྐྱེད་ནས་ཀྱང་སྐད་ཅིག་ལས་མི་སྡོད་ཅིང་ཕྱི་མ་བསྐྱེད་དེ། དེས་ན་སྔ་མས་དབང་བསྒྱུར་བས་ན་གཞན་གྱི་དབང་ཞེས་བྱའོ། །དེ་ལ་ཅིའི་ཕྱིར་ཀུན་བརྟགས་པ་ཞེས་བྱ་ཞེ་ན། ཡིད་ཀྱི་རྣམ་པར་ཤེས་པ་ཀུན་ཏུ་རྟོག་པ་དེས་བདག་དང་བདག་གི་དང་མིང་དང་རྒྱུ་མཚན་ལ་སོགས་པ་ཕྱིན་ཅི་ལོག་དཔག་ཏུ་མེད་པར་བརྟགས་པས་ན་ཀུན་བརྟགས་པ་ཞེས་བྱའོ། །དེ་ལ་ཡོངས་སུ་གྲུབ་པ་ཞེས་ཇི་ལྟར་བྱ་ཞེ་ན། དེ་ལས་གཞན་དུ་གྲུབ་པ་མེད་པའི་ཕྱིར་དང་། རྣམ་པར་དག་པའི་དམིགས་པའམ། དགེ་བ་ཐམས་ཅད་ཀྱི་མཆོག་ཡིན་པས་ན་ཡོངས་སུ་གྲུབ་པའོ། །གསུམ་པ་དེ་རབ་ཏུ་དབྱེ་བ་ནི། དེ་ལ་གཞན་དབང་ལ་དབྱེ་ན་གཉིས་ཏེ། བག་ཆགས་ཀྱི་ས་བོན་གཞན་གྱི་དབང་སྟེ། མ་དག་པའི་གཞན་དབང་དང་། སོ་སྐྱེའི་ཚེ་ཀུན་ཉོན་གྱི་ངོ་བོ་དང་འཕགས་པའི་ཚེ་རྣམ་བྱང་གི་ངོ་བོར་འགྱུར་བས་ཀུན་ནས་ཉོན་མོངས་པ་དང་། རྣམ་བྱང་གི་ངོ་བོ་མ་གྲུབ་པའི་གཞན་དབང་སྟེ། འདི་གཞན་དབང་སྤྱིའི་མཚན་ཉིད་ཡིན་པས་དག་པའི་གཞན་དབང་ཡང་བཟུང་ངོ་། །ཀུན་བརྟགས་ལ་དབྱེ་ན་མཐའ་ཡས་པ་སྟེ། བསྡུ་ན་གཉིས་ཏེ། ངོ་བོ་ཀུན་ཏུ་རྟོག་པ་དང་། ཁྱད་པར་ཀུན་ཏུ་རྟོག་པའོ། །དེ་ལ་ལྔ་སྟེ། མིང་ལ་བརྟེན་ཏེ་དོན་དུ་རྟོག་པ། དོན་ལ་བརྟེན་ཏེ་མིང་དུ་རྟོག་པ། མིང་ལ་བརྟེན་ཏེ་མིང་དུ་རྟོག་པ། དོན་ལ་བརྟེན་ཏེ་དོན་ལ་རྟོག་པ། གཉིས་ཀ་ལ་བརྟེན་ཏེ་གཉིས་ཀ་རུ་རྟོག་པའོ། །ཡོངས་སུ་གྲུབ་པ་ལ་གཉིས་ཏེ། གཉིས་སུ་དབྱེ་བ་དང་། བཞིར་དབྱེ་བའོ། །དང་པོ་གཉིས་ནི། རང་བཞིན་ཡོངས་སུ་གྲུབ་པ་གནས་ལུགས་དང་། རྣམ་པར་དག་པའི་ཡོངས་སུ་གྲུབ་པ་དེ་ཐོབ་པའི་ཐབས་ཕྱིན་ཅི་མ་ལོག་པའོ། །དེས་ན་མདོ་ལས་མེད་པའི་རྣམ་གྲངས་བསྟན་པ་རྣམས་ཀྱིས་ཀུན་བརྟགས་བསྟན་པའོ། །སྒྱུ་མ་དང་། རྨི་ལམ་དང་། སྨིག་རྒྱུ་ལ་སོགས་པ་བསྟན་པས་གཞན་དབང་བསྟན་ཏོ། །གཉིས་པ་ནི། ཡོངས་སུ་གྲུབ་པ་ནི་རྣམ་པ་བཞིར་བཤད་དེ། རང་བཞིན་གྱིས་རྣམ་བྱང་དང་། དྲི་མ་མེད་པས་རྣམ་བྱང་དང་། དེ་ཐོབ་པའི་ལམ་རྣམ་བྱང་དང་། དམིགས་པའི་རྣམ་བྱང་ངོ་། །དང་པོ་ནི་སྟོང་པ་ཉིད་དང་དེ་བཞིན་ཉིད་ལ་སོགས་པ་བསྟན་པའོ། །གཉིས་པ་ནི་སྒྲིབ་པ་དང་བྲལ་བའི་ཚུལ་བཤད་པ་རྣམས་སོ། །གསུམ་པ་ནི་བྱང་ཆུབ་ཀྱི་ཕྱོགས་དང་ཕ་རོལ་ཏུ་ཕྱིན་པ་ལ་སོགས་པ་བསྟན་པའོ། །བཞི་པ་ནི་ཀུན་བརྟགས་ཀྱང་མ་ཡིན། གཞན་དབང་ཡང་མ་ཡིན་པ་ནི་དམིགས་ཡུལ་གསུང་རབ་ཀྱི་ཆོས་རྣམས་སོ་ཞེས་བསྟན་པའོ། །དེ་ལྟར་མཚན་ཉིད་གསུམ་བསྟན་པ་འདིས་སྒྲོ་འདོགས་དང་སྐུར་འདེབས་ཀྱི་མཐའ་ལས་གྲོལ་བར་བྱེད་དེ། དགོངས་པ་ངེས་པར་འགྲེལ་པ་ལས། ཆོས་རྣམས་ངོ་བོ་ཉིད་མེད་ཆོས་རྣམས་མ་སྐྱེས་དང་། །ཆོས་རྣམས་མ་འགགས་ཆོས་རྣམས་ཐམས་ཅད་གདོད་ནས་ཞི། །ཆོས་རྣམས་ཐམས་ཅད་རང་བཞིན་མྱ་ངན་འདས་པར་ནི། །དགོས་པ་མེད་པར་མཁས་པ་སུ་ཞིག་སྨྲ་བར་བྱེད། ཀུན་བརྟགས་མིང་ཏུ་བཏགས་པ་ཙམ་ཡིན་ཞིང་རང་གི་མཚན་ཉིད་དུ་མ་གྲུབ་པས་མཚན་ཉིད་ངོ་བོ་ཉིད་མེད་པ་དང་གཞན་དབང་རྐྱེན་ལས་བྱུང་ཞིང་སྒྱུ་མ་ལྟ་བུ་ལས་རང་གི་བདག་ཉིད་ཀྱིས་མེད་པས་སྐྱེ་བ་ངོ་བོ་མེད་་དང་། །ཡོངས་གྲུབ་ཆོས་ཐམས་ཅད་ངོ་བོ་མེད་པས་རབ་ཏུ་ཕྱེ་བ་ཡིན་པས་དོན་དམ་ངོ་བོ་ཉིད་མེད་དོ་ཞེས་ངས་ཤད་དོ། །མཁས་པ་གང་ཞིག་དགོངས་པ་འདི་དག་ཤེས་པ་འདི། །རབ་ཏུ་ཉམས་པར་གྱུར་པའི་ལམ་དུ་དེ་མི་འ-གྲོ། །ཞེས་གསུངས་པས། དེ་ལྟར་དངོས་པོའི་གནས་ལུགས་ཤེས་པར་བྱའོ། །-སྤྱི་དོན་གསུམ་པ་དེ་ལྟ་བུའི་རྣམ་པར་རིག་པ་ལ་འཇུག་པ་ནི། དེའི་དོན་རྟོགས་པ་ལ་འཇུག་པའོ། །འདི་ལ་བཞི་སྟེ། གང་ཟག་གང་འཇུག །རྒྱུ་གང་གིས་འཇུག །ཚུལ་ཇི་ལྟར་འཇུག །དུས་སམ་གནས་སྐབས་གང་དུ་འཇུག་པའོ། །དང་པོ་ནི་བྱང་ཆུབ་སེམས་དཔའ་སྟེ། ཐེག་པ་ཆེན་པོ་པ་ཚོགས་གཉིས་བསགས་པ་ཅན་ནོ། །གཉིས་པ་རྒྱུ་ནི་གསུམ། མ་ཞུམ་པ་གསུམ་དང་། སྤངས་པ་བཞི་དང་། ཞི་གནས་ལྷག་མཐོང་ལ་གུས་པས་འཇུག་པའོ། །དང་པོ་ནི་དགེ་བའི་རྩ་བ་སྟོབས་བསྐྱེད་པ་སེམས་ཅན་ཐམས་ཅད་སངས་རྒྱས་ཐོབ་པར་བྱ་བའི་སེམས་དང་། ཕ་རོལ་ཏུ་ཕྱིན་པ་ལ་འཇུག་པའི་སེམས་དང་། བདག་གིས་གང་ལའང་ཐོགས་པ་མེད་དོ་ཞེས་མ་ཞུམ་པའི་སེམས་གསུམ་མོ། །གཉིས་པའང་ཉན་ཐོས་དང་རང་རྒྱལ་ཡིད་ལ་བྱེད་པ་སྤངས་པ་དང་། ཐེག་པ་ཆེན་པོ་ལ་སོམ་ཉི་སྤངས་པ་དང་། ཆོས་ལ་ཕྱོགས་འཛིན་སྤངས་པ་དང་། རྣམ་པར་རྟོག་པ་སྤངས་པ་སྟེ་སྤངས་པ་བཞི་དང་། གསུམ་པ་ཞི་གནས་དང་ལྷག་མཐོང་ལ་གུས་པས་འཇུག་པའོ། །གསུམ་པ་ཚུལ་ཇི་ལྟར་འཇུག་ན་གསུམ། ཀུན་བརྟགས་ལ་དང་། གཞན་དབང་ལ་དང་། ཡོངས་གྲུབ་ལ་འཇུག་པའོ། །དང་པོ་ནི་ཐོས་པའི་བག་ཆགས་ཀྱི་སྒོ་ནས་བུམ་པ་ལྟ་བུ་མིང་ཚོལ་བ་དང་། ལྟོ་ལྡིར་སོགས་ཀྱོ་དངོས་པོ་ཚོལ་བ་དང་། དེའི་ངོ་བོ་ཉིད་ཡོད་མེད་ཚོལ་བ་དང་། དེའི་བྱེ་བྲག་ཏུ་བཏགས་པ་བཙལ་བའི་སྒོ་ནས་དེ་དག་མི་དམིགས་པར་ཤེས་པའོ། །དེ་ལ་དེ་ཐམས་ཅད་ཡིད་ཀྱིས་བརྗོད་པའི་མཚན་ཉིད་དུ་རྟོག་པས་ཀུན་བརྟགས་ལ་འཇུག་པའོ། །གཉིས་པ་ནི་རྣམ་པར་རིག་པ་ཙམ་ལ་འཇུག་པས་གཞན་དབང་ལ་ཞུགས་པའོ། །གསུམ་པ་ནི་རྣམ་རིག་ཙམ་གྱི་འདུ་ཤེས་ཀྱང་བཟློག་ནས་འཇུག་པས་ཡོངས་གྲུབ་ལ་འཇུག་པ་སྟེ། ཆོས་ཀྱི་དབྱིངས་ལ་མངོན་སུམ་གྱིས་གནས་པ་ཞེས་བྱའོ། །བཞི་པ་དུས་སམ་གནས་སྐབས་གང་དུ་འཇུག་པ་ནི་ལམ་ལྔ་ལ་འཇུག་པ་སྟེ། དེའང་བསྡུ་ན་བཞི་སྟེ། མོས་པ་སྤྱོད་པའི་ས་དང་། མཐོང་བའི་ལམ་དང་། བསྒོམ་པའི་ལམ་དང་། མཐར་ཕྱིན་པའི་ལམ་མོ། །དང་པོ་ལ་གཉིས། ཚོགས་ལམ་དང་། སྦྱོར་ལམ་མོ། །དང་པོ་ལ་ཆེ་འབྲིང་གསུམ་མོ། །སྦྱོར་ལམ་ལ་བཞི་སྟེ། སེམས་སྣང་བ་ཐོབ་པའི་ཚེ་དྲོད་དང་། སྣང་བ་མཆེད་པའི་ཚེ་རྩེ་མོ་དང་། དོན་གྱི་ཕྱོགས་གཅིག་ལ་ཞུགས་པའི་ཏིང་ངེ་འཛིན་གྱིས་བཟོད་པ་དང་། རྣམ་རིག་གི་འདུ་ཤེས་འཇིག་པའི་ཏིང་ངེ་འཛིན་གྱིས་ཆོས་མཆོག་སྟེ་ངེས་འབྱེད་ཆ་བཞིའོ། །དེ་ནས་མཐོང་ལམ་དུ་འཇུག་གོ། དེ་ས་བཅུའི་རིམ་པས་སྦྱོང་བ་ནི་བསྒོམ་པའི་ལམ་ལ་འཇུག་པའོ། །དེ་ནས་མཐར་ཕྱིན་པའི་ལམ་ལ་འཇུག་གོ། །སྤྱི་དོན་བཞི་པ་དེའི་རྒྱུ་འབྲས་ནི། དེ་ལྟར་འཇུག་པའི་ཚེ་ཕ་རོལ་ཏུ་ཕྱིན་པ་དྲུག་གི་སྤྱོད་པའི་སྒོ་ནས་འཇུག་གོ། དེ་ལ་གསུམ་སྟེ། ཕ་རོལ་ཏུ་ཕྱིན་པ་དྲུག་ཏུ་གྲངས་ངེས་པ་དང་། གོ་རིམ་ངེས་པ་དང་། སོ་སོའི་མཚན་ཉིད་དོ། །དང་པོ་ནི་ཐོག་མར་ལོངས་སྤྱོད་དང་ཁྱིམ་ལ་ཆགས་པས་འཁོར་བ་ལས་མི་འཕགས་པས་དེའི་གཉེན་པོར་སྦྱིན་པ་དང་ཚུལ་ཁྲིམས་སོ། །འཕགས་ནས་ལྡོག་པའི་རྒྱུ་སེམས་ཅན་ལོག་པར་བསྒྲུབས་པས་སུན་པ་དང་། ཡུན་རིང་པོར་དགེ་བ་ལ་སྦྱོར་བས་སྐྱོ་བ་སྟེ། དེའི་གཉེན་པོར་བཟོད་པ་དང་བརྩོན་འགྲུས་སོ། །མི་ལྡོག་པ་དེ་ཆུད་ཟ་བའི་རྒྱུ་ནི་རྣམ་པར་གཡེང་བ་དང་། འཆལ་བའི་ཤེས་རབ་སྟེ། དེའི་གཉེན་པོར་བསམ་གཏན་དང་ཤེས་རབ་བོ། །གཉིས་པ་གོ་རིམ་ངེས་པའི་རྒྱུ་ནི། རྒྱུ་དང་འབྲས་བུར་ངེས་པའོ། །གསུམ་པ་དེ་དག་གི་སོ་སོའི་མཚན་ཉིད་ནི། ལོངས་སྤྱོད་ལ་མ་ཆགས་པ་དང་། ཚུལ་ཁྲིམས་ལ་ལྟུང་བ་མེད་པ་དང་། སྡུག་བསྔལ་ལ་འཁྲུག་པ་མེད་པ་དང་། བསྒོམ་པ་ལ་ལེ་ལོ་མེད་པ་དང་། རྣམ་པར་གཡེང་བ་མེད་དེ་རྩེ་གཅིག་པ་དང་། ཆོས་རབ་ཏུ་འབྱེད་པའོ། །འདི་དག་ཀྱང་ཆོས་དུ་དང་ལྡན་པ་བྱངཆུབ་ཀྱི་སེམས་ལ་བརྟེན་པས་རྟེན་དམ་པ། དངོས་པོ་ཀུན་གྱི་ལ་འཇུག་པས་དངོས་པོ་དམ་པ། གཞན་གྱི་ཆེད་དུ་འཇུག་པས་ཆེད་དུ་བྱ་བ་དམ་པ། འཁོར་གསུམ་མི་རྟོགས་པས་ཟིན་པས་ཐབས་མཁས་དམ་པ། བྱངཆུབ་ཆེན་པོར་བསྔོ་བས་བསྔོ་བ་དམ་པ། སྒྲིབ་གཉིས་བྱང་བས་རྣམ་དག་དམ་པ་སྟེ་དམ་པ་དྲུག་དང་ལྡན་པ་དང་། རང་གཞན་གཉིས་ཀ་ཚེ་རབས་རྟག་ཏུ་སྦྱིན་སོགས་ལ་འཇུག་པ་ཀུན་ཏུ་སྦྱོར་བ་བསྒོམ་པ། དད་པ་དང་འདོད་པ་གཉིས་ཀྱིས་སྦྱིན་སོགས་དོན་དུ་གཉེར་བ་མོས་པ་བསྒོམ་པ། དགེ་བའི་རོ་མྱོང་བ་དང་རྗེས་སུ་ཡི་རང་བ་ཡིད་ལ་བྱེད་པ་བསྒོམ་པ་རྣམ་པར་མི་རྟོག་པའི་ཡེ་ཤེས་ཀྱིས་ཟིན་པ་ཐབས་ལ་མཁས་པ་བསྒོམ་པ། སངས་རྒྱས་རྣམས་ཀྱིས་ཕར་ཕྱིན་དྲུག་ཡོངས་སུ་རྫོགས་ནས་གདུལ་བྱ་སྐལ་བ་བཞིན་གཞན་དོན་མཛད་པ་ལྟར་བསྒོམ་པ་ནི་བྱ་བ་གྲུབ་པ་བསྒོམ་པ་སྟེ་བསྒོམ་པའི་ཚུལ་དང་། སྦྱིན་པ་ལ་དབྱེ་ན། ཟང་ཟིང། མི་འཇིགས། ཆོས་ཀྱི་སྦྱིན་པ་གསུམ། ཚུལ་ཁྲིམས་ལ། ཉེ་སྤྱོད་སྡོམ་པ་། དགེ་བ་ཆོས་སྡུད། སེམས་ཅན་དོན་བྱེད་གསུམ། བཟོད་པ་ལ། གནོད་བྱེད་ལ་ཇི་མི་སྙམ་པ། སྡུག་བསྔལ་དང་ལེན། ཆོས་ལ་ངེས་སེམས་གསུམ། བརྩོན་འགྲུས་ལ། གོ་ཆའི་དང་། སྦྱོར་བའི་དང་། ཆོག་མི་ཤེས་པའི་བརྩོན་འགྲུས་གསུམ། བསམ་བསྟན་ལ། མཐོང་ཆོས་བདེར་གནས། ཡོན་ཏན་ཁྱད་པར་ཅན་སྒྲུབ་པ། སེམས་ཅན་གྱི་བྱ་བ་བསྒྲུབ་པ། ཤེས་རབ་ལ། སྦྱོར་བ་དང་། དངོས་གཞི་དང་། རྗེས་ལས་ཐོབ་པའི་ཤེས་རབ་གསུམ་སྟེ་དབྱེ་བ་དང་། དེ་ལྟ་བུའི་ཕ་རོལ་ཏུ་ཕྱིན་པ་དྲུག་གིས་དགེ་བའི་ཆོས་ཐམས་ཅད་བསྡུས་པ་ཡིན་ཏེ། སྦྱིན་སོགས་དེ་དག་གི་མཚན་ཉིད་བསྡུས་ཤིང་། དད་སོགས་དེ་དག་དང་མཐུན་པས་བསྡུས་ལ། སྟོབས་སོགས་དེ་དག་གི་འབྲས་བུས་བསྡུས་པ་བསྡུ་བ་ལ་སོགས་པ་མཐའ་ཡས་པ་ཤེས་པར་བྱ་འདི་དག་གོང་མའི་དགོངས་རྒྱན་ལས་བྲིས་པའོ། །སྤྱི་དོན་ལྔ་པ་རབ་ཏུ་དབྱེ་བ་ནི། དེ་ལྟར་ཕ་རོལ་ཏུ་ཕྱིན་པ་དྲུག་པོ་དེས་རྣམ་པར་རིག་པ་ལ་འཇུག་པ་དེའང་ས་བཅུར་རབ་ཏུ་དབྱེ་བར་བྱ་སྟེ། རབ་ཏུ་དགའ་བ་ལ་སོགས་པ་བཅུའོ། །དེ་ལ་གསུམ། ཕ་རོལ་ཏུ་ཕྱིན་པ་བཅུས་ས་བགྲོད་པའི་ཚུལ་དང་། ས་རྣམས་ཐོབ་ཚུལ་དང་། དུས་ཇི་སྲིད་ཅིག་གིས་བགྲོད་ཚུལ་ལོ། །དང་པོ་ནི་ས་འདི་དག་ལའང་རྣམ་པར་རིག་པ་ཙམ་ལ་འཇུག་པའི་ཚུལ་ནི་ས་དང་པོའི་རྗེས་ཐོབ་ཏུ་ཆོས་དབྱིངས་ཀུན་ཏུ་འགྲོ་བ་རྟོགས་པའི་དོན་དུ་ཆོས་དབྱིངས་བསྒོམ་པ་སོགས་བཅུ་དང་། བྱང་ཆུབ་ལ་ཉེ་བ་དང་སེམས་ཅན་གྱི་དོན་གྲུབ་པར་མཐོང་ནས་དགའ་བ་སྐྱེས་པ་ལས་ས་དང་པོ་རབ་ཏུ་དགའ་བ་ཞེས་པ་ལྟ་བུ་སོགས་ངེས་པའི་ཚིག་དང་། བསྒོམ་ཚུལ་རྣམ་པ་ལྔ་ནི། ས་དང་པོར་ལྷག་མ་རྣམས་ཀྱི་རྟོགས་བྱའི་ཆོས་དབྱིངས་ཀྱང་བསྒོམ་པས་འདྲེས་མངོན་རྟོགས་ལྗོན་ཤིང་གི་ཡི་གེ་དག་བཅོས་དང་མཆན་བུ། པར་བསྒོམ་པ། ཀེང་རུས་སོགས་ཀྱི་མཚན་མ་མི་བསྒོམ་པས་མཚན་མ་མེད་པར་བསྒོམ་པ། འབད་རྩོལ་དང་བྲལ་བས་ལྷུན་གྱིས་གྲུབ་པར་བསྒོམ་པ། མཆོག་དང་མཆོག་མ་ཡིན་པ་གཉིས་སུ་མི་འཛིན་པས་མཆོག་ཏུ་འབར་བར་བསྒོམ་པ། ས་དང་པོར་བསྒོམ་པ་ཙམ་གྱིས་ཆོག་པར་མི་འཛིན་པས་ཆོག་པར་མི་འཛིན་པ་བསྒོམ་པའི་ཚུལ་གྱིས་ཁྱད་པར་འཇོག་གོ་འདི་དག་དགོངས་རྒྱན་ལས་བྲིས། ཡང་ས་འདི་རྣམས་ལ་ཕ་རོལ་ཏུ་ཕྱིན་པ་བཅུ་ཐོབ་པར་འགྱུར་ཏེ། དྲུག་ནི་ས་དྲུག་ལའོ། །ཤེས་རབ་ཀྱི་ཕ་རོལ་ཏུ་ཕྱིན་པའི་རྗེས་ཀྱི་ཡེ་ཤེས་བཞི་ནི་ས་བཞི་ལ་རེ་རེ་སྟེ། དེ་ལ་དགེ་བའི་རྩ་བ་ཐམས་ཅད་ཐུན་མོང་དུ་བྱས་ཏེ་བྱང་ཆུབ་ཆེན་པོར་བསྔོ་བ་ནི་ཐབས་སོ། །སྨོན་ལམ་སྣ་ཚོགས་འདེབས་ཤིང་འགྲུབ་པར་བྱེད་པ་ནི་སྨོན་ལམ་མོ། །སོ་སོར་རྟོག་པ་དང་བསྒོམ་པའི་སྟོབས་ཀྱིས་ཕ་རོལ་ཏུ་ཕྱིན་པ་རྒྱུན་མི་གཅོད་པ་ནི་སྟོབས་སོ། །དྲུག་པོ་ཉིད་ཀྱི་ཡེ་ཤེས་ལོངས་སྤྱོད་པ་དང་། སེམས་ཅན་སྨིན་པར་བྱེད་པ་ནི་ཡེ་ཤེས་སོ། །གཉིས་པ་ས་འདི་དག་ནི་ཐོབ་པ་བཞི་སྟེ། དང་པོ་ལ་མོས་པས་ཐོབ་པའོ། །ཆོས་སྤྱོད་བཅུ་ལ་གནས་པ་ནི་སྤྱོད་པས་ཐོབ་པའོ། །ཆོས་ཀྱི་དབྱིངས་རྟོགས་པ་ནི་ས་དང་པོ་མཐོང་ལམ་སྟེ་རྟོགས་པས་ཐོབ་པའོ། །བསྒོམ་པའི་མཐར་འགྲོ་བ་ནི་གྲུབ་པས་ཐོབ་པའོ། །གསུམ་པ་ས་འདི་དག་དུས་ཇི་སྲིད་ཅིག་གིས་རྫོགས་ཤེ་ན། གང་ཟག་གཞན་ནི་ངེས་པ་མེད་ལ། ལྔ་ནི་བསྐལ་པ་གྲངས་མེད་པ་གསུམ་གྱིས་མཐར་ཕྱིན་ཏེ། མོས་པས་སྤྱོད་པ་ནི་བསྐལ་པ་གྲངས་མེད་པ་དང་པོའོ། །ལྷག་པའི་བསམ་པ་ལ་སྤྱོད་པ་ས་དང་པོ་དང་། མཚན་མ་ལ་སྤྱོད་པ་ས་དྲུག་པ་མན་ཆད་དང་། མཚན་མ་མེད་པ་སྟེ་ས་བདུན་པ་ནི་གྲངས་མེད་གཉིས་པས་སོ། །མངོན་པར་འདུ་བྱེད་པ་མེད་པས་སྤྱོད་པ་སྟེ། ས་བཅུ་པའི་བར་ནི་གྲངས་མེད་གསུམ་པས་སོ། །དེ་སྐད་དུ། བཟང་པོ་དང་རྟག་ཏུ་བཤེས་གཉེན་དང་འཕྲད་པའི་སྨོན་པའི་སྟོབས་ཅན་དང་། །གྲོགས་ངན་གྱི་མི་ལྡོག་པས་སེམས་འདི་ཕྱི་ཀུན་ཏུ་དགེ་ཆོས་འཕེལ་ཞིང་མི་ཉམས་པ་དང་ཡོན་ཏན་གྱི་ཆོག་མི་ཤེས་པར་བརྟན་ཁྱད་ར་དུ་འགྲོ་བ་ཡི་ཆོས་བཞི་པོ་ཐོབ་ནས། །བྱང་ཆུབ་སེམས་དཔའ་གྲངས་མེད་གསུམ། །ཀུན་གྱི་རྩེ་མོ་༼ཏུ་རྩོ༷མ་པར་༷༽མཛད་ཅེས་བརྗོད། །ཅེས་གསུངས་སོ། །སྤྱི་དོན་དྲུག་པ་དེ་ལྟ་བུའི་ཕ་རོལ་ཏུ་ཕྱིན་པ་དྲུག་པོའང་བསླབ་པ་གསུམ་དུ་འདུས་ཤིང་མཐར་ཕྱིན་པར་འགྱུར་རོ། །དེའང་བསླབ་པའི་ཚུལ་ཁྲིམས་ནི་བྱང་ཆུབ་སེམས་དཔའི་བསླབ་པ་ཚད་མེད་ཀྱང་བསྡུ་ན་སྡོམ་པའི་ཚུལ་ཁྲིམས་དང་། དགེ་བ་ཆོས་སྡུད་དང་། སེམས་ཅན་དོན་བྱེད་ཀྱི་ཚུལ་ཁྲིམས་རྣམས་ལ་ཐེག་པ་དམན་པ་བས་ཁྱད་པར་དུ་གྱུར་པར་སྤྱོད་པའོ། །ལྷག་པའི་སེམས་ཀྱི་བསླབ་པ་ནི། ཕ་རོལ་ཏུ་ཕྱིན་པ་བསྒོམ་པ་དང་། སེམས་ཅན་སྨིན་པར་བྱ་བ་དང་། སངས་རྒྱས་ཀྱི་ཆོས་ཐམས་ཅད་བསྒྲུབ་པའི་ཕྱིར་བྱང་ཆུབ་སེམས་དཔའི་ཏིང་ངེ་འཛིན་དཔའ་བར་འགྲོ་བ་ལ་སོགས་པ་ལ་སྤྱོད་པའོ། །ལྷག་པའི་ཤེས་རབ་ཀྱི་བསླབ་པ་ནི། མཚན་མ་དང་རྣམ་པར་རྟོག་པ་ཐམས་ཅད་སྤངས་ཏེ། རྣམ་པར་རྟོག་པ་མེད་པར་ལྷུན་གྱིས་གྲུབ་པ་དང་། རྗེས་སྒྱུ་མ་ལྟ་བུར་སྤྱོད་པ་སྟེ་ཤེས་རབ་ཀྱི་ཕ་རོལ་ཏུ་ཕྱིན་པ་ཉིད་དོ། །---སྤྱི་དོན་བདུན་པ་དེ་ལྟར་བསྟན་པའི་ཚུལ་གྱིས་ལམ་གོམས་པར་བྱས་པས་འབྲས་བུ་སྤངས་ན་སུམ་ཚོགས་པ་ནི་ཉོན་མོངས་པ་དང་ཤེས་བྱའི་སྒྲིབ་པ་སྤངས་པ་སྟེ། མི་གནས་པའི་མྱ་ངན་ལས་འདས་པ་ཞེས་བྱའོ། །དེ་ལ་མི་གནས་པའི་མྱ་ངན་ལས་འདས་པ་ནི་ཐོས་པའི་བག་ཆགས་བསྒོམ་པའི་སྒོ་ནས་ཉོན་མོངས་པ་ཐམས་ཅད་རིམ་གྱིས་ཕྲི་བས་ཉོན་མོངས་པ་ཐམས་ཅད་སྤངས་པས་མ་དག་པའི་གཞན་དབང་གི་མཚན་མ་ཐམས་ཅད་འགགས་པས་འཁོར་བ་ལ་མི་གནས་ལ། གཉིས་པ་ཤེས་བྱའི་སྒྲིབ་པ་སྤངས་པས་རྣམ་པར་བྱང་བ་ཤིན་ཏུ་རྣམ་པར་དག་པའི་དེ་ཁོ་ན་ཉིད་དུ་སྣང་བ་ཡང་དག་པའི་གཞན་དབང་དུ་གནས་གྱུར་པ་མ་འགགས་པས་མྱ་ངན་ལས་འདས་པའི་མཐའ་མནན་པ་སྟེ། སྙིང་རྗེས་སེམས་ཅན་གྱི་དོན་ལ་གནས་པའི་ཕྱིར་རོ། །དེ་སྐད་དུ། འཁོར་བར་ཐབས་སྣ་ཚོགས་ཀྱིས་གདུལ་བྱའི་དོན་མཛད་པ་དེ་ཡི་ཕྱིར་ན་འཁོར་བ་ནི། །སྟོང་པ་༼གཏོ༷ང་བ༷་༽མ་ཡིན་ཀུན་ནས་ཉོན་མོངས་པའི་ཆར་གཏོགས་པ་ཐམས་ཅད་ལོག་པས་མི་སྟོང་༼གཏོ༷ང་༽བ་ཡང་མིན། །རྒྱུ་མཚན་གཉིས་པོ་དེའི་ཕྱིར་རིམ་བཞིན་མྱ་ངན་འདས་པ་ཡང་། །ཐོབ་པ་མ་ཡིན་མི་ཐོབ་མིན། །ཞེས་ཐེག་པ་ཆེན་པོ་བསྡུས་པ་ལས་བཤད་པའི་ཕྱིར་རོ། །--སྤྱི་དོན་བརྒྱད་པ་སངས་རྒྱས་ཀྱི་ཡེ་ཤེས་ཕུན་སུམ་ཚོགས་པ་ནི་གསུམ། སྐུ་གསུམ་དུ་དབྱེ་བ་དང་། དེ་ཉིད་ཡན་ལག་ལྔ་རུ་དབྱེ་བ་དང་། དེ་ཉིད་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ལ་སོགས་པ་ཡོན་ཏན་ཚད་མེད་པར་དབྱེ་བའོ། །དང་པོ་ནི་སངས་རྒྱས་ཀྱི་སྐུ་གསུམ་ཐོབ་པ་སྟེ། དེ་ལ་ངོ་བོ་ཉིད་ཀྱི་སྐུ་ནི་སྤྲོས་པ་དང་བྲལ་བ་རང་གི་དབྱིངས་བརྙེས་པས་ཆོས་ཐམས་ཅད་ལ་དབང་བསྒྱུར་བའོ། །ལོངས་སྤྱོད་རྫོགས་པའི་སྐུ་ནི་ཆོས་སྐུ་ལ་བརྟེན་ཏེ་ཞིང་ཡོངས་སུ་དག་པ་ལ་སོགས་པ་མཛད་དེ། ཐེག་པ་ཆེན་པོས་བྱང་ཆུབ་སེམས་དཔའ་རྣམས་སྨིན་པར་མཛད་པའོ། །སྤྲུལ་པའི་སྐུ་ནི་མཛད་ཅུ་གཉིས་ལ་སོགས་པས་ཕལ་ཆེར་ཉན་ཐོས་ལ་སོགས་པ་སྨིན་པར་མཛད་པའོ། །སྐུ་གསུམ་པོ་ཉིད་ཀྱི་ངོ་བོའམ་མཚན་ཉིད་ཁོ་ན་ལ་ཆོས་ཀྱི་སྐུ་ཞེས་བྱའོ། །དེའང་དུས་ནམ་བརྙེས་ན་ཚོགས་གཉིས་མ་ལུས་པ་ཡོངས་སུ་རྫོགས་པས་རྡོ་རྗེ་ལྟ་བུའི་ཏིང་ངེ་འཛིན་གྱིས་སྒྲིབ་པ་ཐམས་ཅད་བཤིག་སྟེ་མངོན་པར་བྱང་ཆུབ་པའོ། །གཉིས་པ་ནི་དེ་ལ་སངས་རྒྱས་ཀྱི་སའི་མཚན་ཉིད་བསམ་གྱིས་མི་ཁྱབ་པ་ཞིག་གསུངས་ཀྱང་། ཐེག་པ་ཆེན་པོ་བསྡུས་པའི་དབང་དུ་བྱས་ན་དེའང་མཚན་ཉིད་ལྔ་དང་ལྡན་པ་སྟེ། གནས་གྱུར་པ་དཀར་པོའི་ཆོས་ཀྱི་གཞི་ཡིན་པ། གཉིས་སུ་མེད་པ། རྟག་པ། བསམ་གྱིས་མི་ཁྱབ་པའི་མཚན་ཉིད་དོ། །དང་པོ་ནི་ཀུན་གཞིའི་རྣམ་པར་ཤེས་པ་གནས་གྱུར་ནས་ཆོས་ཀྱི་སྐུ་ཐོབ་པ་སྟེ། དེའང་གཟུགས་ཀྱི་ཕུང་པོ་གནས་གྱུར་པས་ཞིང་དང་། དབྱངས་དང་། མཚན་དཔེ་ལ་སོགས་པ་ཐོབ་ལ། ཚོར་བའི་ཕུང་པོ་གནས་གྱུར་པས་ཟག་པ་མེད་པའི་བདེ་བ་དང་ལྡན་ལ། འདུ་ཤེས་གནས་གྱུར་པས་མིང་དང་ཚིག་ལ་སོགས་པ་སྣ་ཚོགས་བསྟན་པ་ལ་དབང་འབྱོར་བ་དང་། འདུ་བྱེད་གནས་གྱུར་པས་སྤྲུལ་པ་དང་འཁོར་བསྡུ་བ་ལ་སོགས་པ་ལ་དབང་འབྱོར་ལ། རྣམ་པར་ཤེས་པ་གནས་གྱུར་པས་ཡེ་ཤེས་བཞི་ལ་དབང་འབྱོར་བ་ཐོབ་པའོ། །གཞན་ཡང་དབང་འབྱོར་བ་དུ་མ་གསུངས་སོ། །གཉིས་པ་དཀར་པོའི་ཆོས་ཀྱི་གཞི་ཡིན་པའི་མཚན་ཉིད་ནི་ཕ་རོལ་ཏུ་ཕྱིན་པ་དྲུག་རྫོགས་པས་དབང་བཅུ་ཐོབ་པ་ལ་སོགས་པའོ། །གསུམ་པ་གཉིས་སུ་མེད་པའི་མཚན་ཉིད་ནི་ཡོད་པ་དང་མེད་པ་ལ་སོགས་པ་མཐའ་ཐམས་ཅད་དང་བྲལ་བའོ། །བཞི་པ་རྟག་པའི་མཚན་ཉིད་ནི། དེ་བཞིན་ཉིད་ལ་འགྱུར་བ་མེད་པའི་ཕྱིར་དང་། སྨོན་ལམ་ཟད་མི་ཤེས་པའི་ཕྱིར་དང་། མཛད་པ་ཡོངས་སུ་མ་རྫོགས་པའི་ཕྱིར་རོ། །ལྔ་པ་བསམ་གྱིས་མི་ཁྱབ་པ་ནི། དེ་བཞིན་ཉིད་དེ་སོ་སོ་རང་གིས་རིག་པར་བྱ་བ། དཔེ་ཐམས་ཅད་དང་བྲལ་བ། རྟོག་གེའི་སྤྱོད་ཡུལ་མ་ཡིན་པའི་ཕྱིར་རོ། །གསུམ་པ་ནི་གཞན་ཡང་སངས་རྒྱས་ཀྱི་ཡོན་ཏན་སྟོབས་བཅུ་དང་མི་འཇིགས་པ་བཞི་ལ་སོགས་པ་ཚད་མེད་པའི་ཡོན་ཏན་ཐམས་ཅད་དང་ལྡན་པ་ཡང་དག་པར་བརྙེས་པ་ནི་ཡེ་ཤེས་ཕུན་སུམ་ཚོགས་པ་ཞེས་བྱའོ། །དེ་ལྟར་ན་དེ་དག་གིས་རྣལ་འབྱོར་སྤྱོད་པའི་ལུགས་མདོར་བསྡུས་པ་ཙམ་ཞིག་བསྟན་པ་ཡིན་གྱིས། རྒྱས་པར་ཤེས་པར་འདོད་པས་ཐེག་པ་ཆེན་པོ་བསྡུས་པ་དང་། མདོ་སྡེ་རྒྱན་ལ་སོགས་པར་ཤེས་པར་བྱའོ། །དེ་ལྟར་རྣལ་འབྱོར་སྤྱོད་པའི་ལུགས་ལེགས་པར་ལོབས་པ་དེ་ལ། དེའི་རྗེས་སུ་དབུ་མ་བསྟན། །ཞེས་གསུངས་སོ། །དེ་ལ་དབུ་མ་པ་ཞེས་བྱ་བ་འདི་ལ་སྤྱོད་པ་དང་། ས་དང་ལམ་གྱི་རིམ་པ་ལ་སོགས་པ་ཐམས་ཅད་སེམས་ཙམ་པ་དང་ཁྱད་པར་མེད་པ་ཡིན་མོད་ཀྱང་། དེ་ཁོ་ན་ཉིད་ཀྱི་དོན་ལ་རྣལ་འབྱོར་སྤྱོད་པ་བས་བཏགས་པ་དེ་སུན་ཕྱུང་སྟེ་ཁྱད་པར་རྣམ་པར་འཇོག་པ་ཡིན་ནོ། །དེ་ལ་གཉིས། རྣལ་འབྱོར་སྤྱོད་པ་བ་སུན་དབྱུང་བ་དང་། རང་གི་འདོད་པ་བརྗོད་པའོ། །དང་པོ་ནི་དེ་ལ་དབུ་མ་ཞེས་བྱ་བ་ནི། རྣལ་འབྱོར་སྤྱོད་པ་བ་རྣམས་ཀྱང་དབུ་མར་ཡང་འདོད། སངས་རྒྱས་ཀྱི་ཡེ་ཤེས་སྤྲོས་པ་ཐམས་ཅད་དང་བྲལ་བར་ཡང་འདོད་པ་ཡིན་མོད་ཀྱང་། ཁྱེད་རང་གི་འདོད་པ་ནང་འགལ་བས་དེ་ལྟར་འདོད་པ་ཉིད་མི་འགྲུབ་བོ་ཞེས་སུན་ཕྱུང་སྟེ་རྣམ་པར་འཇོག་གོ། དེ་ལ་སེམས་ཙམ་པ་དག །ཡོད་པས་མེད་པ་ཡོད་པས་ན། །འདི་ནི་དབུ་མའི་ལམ་ཡིན་ནོ། །ཞེས་གཞན་གྱི་དབང་ནི་ཡོད་ལ། ཀུན་བརྟགས་པ་ནི་མེད་ལ། དེས་ན་ཀུན་བརྟགས་ཀྱིས་སྟོང་པའི་གཞན་གྱི་དབང་དུ་གྲུབ་པ་དེ་ནི་ཡོངས་སུ་གྲུབ་པ་སྟེ་ཡོད་པ་དེས་ན་དབུ་མའོ་ཞེས་འདོད་པ་ལ། འདི་འདྲི་སྟེ་ཁྱེད་ཀྱི་གཞན་གྱི་དབང་ཞེས་བྱ་བ་དེ་ཅི་དོན་དམ་པར་ཡོད་དམ་ཀུན་རྫོབ་ཏུ་ཡོད། ཀུན་རྫོབ་ཏུ་ཡོད་པ་ནི་ཀུན་བརྟགས་པ་ཉིད་ཡིན་པས་དེ་ལ་གཅིག་ནི་མེད་ལ་གཅིག་ནི་ཡོད་པ་ཞེས་ཅིའི་ཕྱིར་བྱ། གལ་ཏེ་དོན་དམ་པར་ཡོད་དོ་ཞེ་ན། འོ་ན་ཡོད་པའི་མཐར་ལྟུང་བའི་ཕྱིར་དབུ་མ་པའི་ལམ་མ་ཡིན་པར་འགྱུར་རོ། །འོ་ན་ཁྱེད་དོན་དམ་དུ་མེད་པར་འདོད་པའི་ཕྱིར་ཁྱེད་ཀྱང་མེད་པའི་མཐར་ལྟུང་བར་འགྱུར་རོ་ཞེ་ན། ཁོ་བོ་ཅག་དོན་དམ་པར་ཡོད་པར་མ་གྲུབ་པའི་ཕྱིར་མེད་པར་ནི་མི་འདོད་དོ། །འོ་ན་ཁྱེད་གང་དུ་འདོད་ཅེ་ན། ཁོ་བོ་ཅག་ཀུན་རྫོབ་ཏུ་ཇི་ལྟར་གནས་པ་དེ་ལྟར་འདོད་དེ་ཀུན་རྫོབ་ཏུ་ཆད་པའི་མཐའ་ལས་གྲོལ་ལ། དོན་དམ་པར་གང་དུ་ཡང་འདོད་པ་མེད་པས་མཐའ་ཐམས་ཅད་ལས་གྲོལ་བས་དབུ་མ་ཞེས་བྱའོ། །ཡང་ཁྱེད་ཡོངས་སུ་གྲུབ་པས་སྤྲོས་པ་དང་བྲལ་བ་དེ་ལྟར་གཞན་གྱི་དབང་ལས་གྲུབ་པ་ཡོད་པ་ཞེས་བྱ་བ་ཡིན་ན། བྱེ་བྲག་ཏུ་སྨྲ་བའི་མྱ་ངན་ལས་འདས་པ་སྟོང་པ་ཉིད་ཅེས་བྱ་བ་རྫས་སུ་གྲུབ་པར་འདོད་པ་དང་ཁྱད་པར་མེད་པར་འགྱུར་རོ། །ཡང་གཞན་གྱི་དབང་དོན་དམ་པར་ཡོད་པ་ཡིན་ན་ཁྱེད་རང་། རྣམ་པར་རིག་པ་ཙམ་དུ་ཡང་། །གང་ཚེ་མི་འཛིན་དེ་ཡི་ཚེ། །ཞེས་འདོད་པ་མ་ཡིན་ནམ། །ཡོད་ན་ཇི་ལྟར་མི་འཛིན། །ཡང་སྐད་ཅིག་མ་ཙམ་དུ་དོན་དམ་པར་གྲུབ་པར་འདོད་ན་དེ་ལ་སྐྱེ་བ་ལ་སོགས་པ་ཆ་གསུམ་མེད་པར་འགྱུར་རོ། །དེ་འདོད་ན་སྔ་ཕྱིའི་བར་ན་མི་གནས་པར་ཐལ་བའི་སྐྱོན་ཡོད་དོ། །ཡང་ཁྱེད་རང་གནས་གྱུར་པ་ཞེས་བྱ་བ་འདོད་ན་དོན་དམ་པར་གནས་གྱུར་རམ་ཀུན་རྫོབ་ཏུ་ཡོད་པར་གནས་གྱུར། དོན་དམ་པར་གྱུར་ན་འགྱུར་བའི་ཕྱིར་དོན་དམ་པ་མ་ཡིན་པར་འགྱུར་ལ། དོན་དམ་པ་ཡིན་པའི་ཕྱིར་འགྱུར་བ་མི་འཐད་པར་ཐལ་ཏེ། གལ་ཏེ་ངོ་བོ་ཉིད་ཡོད་ན། །ཇི་ལྟ་བུར་ན་གཞན་དུ་འགྱུར། །ཞེས་གསུངས་སོ། །གལ་ཏེ་ཀུན་རྫོབ་ཏུ་འགྱུར་རོ་ཞེ་ན། འོ་ན་བདག་དང་རི་བོང་གི་རྭ་ལ་སོགས་པའང་གནས་འགྱུར་བར་ཐལ་ལོ། །དེ་ནི་འཇིག་རྟེན་ནའང་མེད་དོ་སྙམ་ན། འོ་ན་ཁྱེད་འཇིག་རྟེན་ན་ཡོངས་སུ་གྲགས་པ་རྣམས་ལ་གནོད་པ་མ་སྐྱེལ་ཅིག །གལ་ཏེ་གཞན་གྱི་དབང་དེ་ནི་དོན་དམ་པའང་མ་ཡིན་ལ། ཀུན་རྫོབ་ཀྱང་མ་ཡིན་ནོ་སྙམ་ན། དེས་ནི་དེ་ཁོ་ན་ཉིད་མ་ཤེས་ཏེ། སངས་རྒྱས་རྣམས་ཀྱིས་ཆོས་བསྟན་པ། །བདེན་པ་གཉིས་ལ་ཡང་དག་བརྟེན། །འཇིག་རྟེན་ཀུན་རྫོབ་བདེན་པ་དང་། །དམ་པའི་དོན་གྱི་བདེན་པའོ། །གང་དག་བདེན་པ་འདི་གཉིས་ཀྱི། །རྣམ་དབྱེ་རྣམ་པར་མི་ཤེས་པ། །དེ་དག་སངས་རྒྱས་བསྟན་པ་ནི། །ཟབ་མོའི་དེ་ཉིད་རྣམ་ཤེས་མིན། །ཞེས་རྩ་བའི་ཤེས་རབ་ལས་གསུངས་སོ། །གཉིས་པ་རང་གི་འདོད་པ་བརྗོད་ན། ཀུན་རྫོབ་ཀྱི་བདེན་པ་དང་། དོན་དམ་པའི་བདེན་པའོ། །དང་པོ་ལ་ལྔ། འཇིག་རྟེན་གྲགས་སྡེ་པ་དང་། བྱེ་བྲག་སྨྲ་བ་དང་། ཚུལ་མཚུངས་པ་དང་། སྒྱུ་མ་པ་དང་། མདོ་སྡེ་སྤྱོད་པ་དང་། རྣལ་འབྱོར་སྤྱོད་པའི་དབུ་མ་པའོ། །བདེན་པ་གཉིས་པོ་དེའི་དོན་མདོར་ཅུང་ཟད་ཅིག་བརྗོད་ན། དེ་ལ་སོ་སོ་སྐྱེ་བོའི་བློ་ནས་བརྩམས་ཏེ། རྣམ་པ་ཐམས་ཅད་མཁྱེན་པའི་ཡེ་ཤེས་ཀྱི་བར་ཐམས་ཅད་ནི་ཀུན་རྫོབ་སྒྱུ་མ་ལྟ་བུ་ཡིན་ལ་དེ་དག་ལ་དེ་ཁོ་ན་ཉིད་བདེན་པར་སུ་ཞིག་འཛིན་ཏེ། བཅོམ་ལྡན་འདས་ཀྱིས་ཆོས་གང་ཞིག །བསླུ་བ་དེ་ནི་བརྫུན་ཞེས་གསུངས། །འདུས་བྱས་ཐམས་ཅད་བསླུ་བའི་ཆོས། །དེས་ན་དེ་ཆོས་བརྫུན་པ་ཡིན། །ཞེས་གསུངས་སོ། །དོན་དམ་པ་ནི་མྱ་ངན་ལས་འདས་པ་སྟེ། མྱ་ངན་ལས་འདས་པ་བདེན་གཅིག་པུ་ཞེས་གསུངས་སོ། །འོ་ན་མྱ་ངན་ལས་འདས་པ་དེ་དངོས་པོ་མེད་ན་མདོ་སྡེ་པ་འདོད་པའི་མྱ་ངན་ལས་འདས་པ་དང་ཁྱད་པར་མེད་པར་ཐལ་ལ། དངོས་པོར་འདོད་ན་བྱེ་བྲག་ཏུ་སྨྲ་བའམ། ཡང་ན་སེམས་ཙམ་པ་ཉིད་དུ་འགྱུར་རོ་ཞེ་ན། མྱ་ངན་འདས་པ་དངོས་མེད་པའང་། །མིན་ན་དེ་དངོས་ག་ལ་ཡོད། །དངོས་དང་དངོས་མེད་ཡོངས་ཤེས་པ། །ཟད་པ་མྱ་ངན་འདའ་ཞེས་བྱ། །ཞེས་གསུངས་ན། བློའི་ཡུལ་ཐམས་ཅད་ལས་གྲོལ་བ་དེ་སུས་ཤེས་ཤིང་བརྗོད་པར་འགྱུར། འོ་ན་གལ་ཏེ་མདོ་ལས་རྣམ་པར་རིག་པ་ཙམ་ཡང་གསུངས། མཚན་ཉིད་གསུམ་ཡང་གསུངས་ན་འདི་ཇི་ལྟར་བྱ། མངོན་པར་བྱང་ཆུབ་པའི་ཚེ་མྱ་ངན་ལས་འདས་པར་གྱུར་ན་ཉན་ཐོས་དང་ཁྱད་པར་མེད་ལ། མྱ་ངན་ལས་མ་འདས་ན་ཀུན་རྫོབ་ཏུ་འགྱུར་བའམ། རྣམ་པར་རིག་པ་ཙམ་དུའང་འགྱུར་བ་འདི་ཇི་ལྟར་རིགས་ཤེ་ན། ཀུན་གཞི་ལ་སོགས་པ་རྣམ་པར་རིག་པ་ཙམ་དུ་གསུངས་པ་དེ་དག་ཀུན་རྫོབ་ཏུ་ཡིན་པ་ཙམ་ལ་འདོགས་པ་ཡིན་ལ། མྱ་ངན་ལས་འདས་པའི་དབྱིངས་ནི་དེ་ལྟ་བུ་ཡིན་མོད་ཀྱི། ཡང་དག་པར་རྫོགས་པའི་སངས་རྒྱས་ཐུགས་མཚན་མ་དང་རྣམ་པར་རྟོག་པ་ཐམས་ཅད་ཞི་བར་མཛད་པའང་འཁོར་བའི་མཐའ་མནན་ཞིང་ཐུགས་རྗེ་ཆེན་པོའི་རྒྱུ་མཐུན་པ་ལས་བྱུང་བའི་ཡེ་ཤེས་སྒྱུ་མ་ལྟ་བུའི་ཀུན་རྫོབ་མངའ་བས་མྱ་ངན་ལས་འདས་པའི་མཐའ་མནན་ཏེ། འཁོར་བ་མྱ་ངན་འདས་པ་ལ། །བདག་ཉིད་ཆེ་དེ་མི་གནས་པས། །དེས་ན་སངས་རྒྱས་རྣམས་ཀྱིས་ནི། །མི་གནས་མྱ་ངན་འདས་འདིར་བཤད། །ཅེས་སློབ་དཔོན་ཀླུ་སྒྲུབ་ཀྱིས་གསུངས་པ་ལྟ་བུའོ་ཞེས་རྣལ་འབྱོར་སྤྱོད་པའི་དབུ་མ་པ་རྣམས་འདོད་དོ། །དབུ་མ་པ་ཁ་ཅིག་ནི་ཀུན་གཞིའི་རྣམ་པར་ཤེས་པ་ཞེས་བྱ་བ་ལ་སོགས་པ་ནི་གང་ཟག་དབང་པོ་གདུལ་དཀའ་བ་གཞུག་པར་དགོངས་ཏེ་གསུངས་པས། གང་ཟག་གི་བདག་དང་ཁྱད་པར་མེད་ལ། མྱ་ངན་ལས་འདས་པ་དམིགས་པ་ཐམས་ཅད་དང་བྲལ་བ་ཡིན་ལ། དེ་ཉན་ཐོས་དང་རང་སངས་རྒྱས་ལ་མི་སྲིད་དེ། དེ་དག་དངོས་པོ་དང་དངོས་པོ་མེད་པར་ཆོས་ཀྱི་བདག་ལ་དམིགས་པའི་ཕྱིར་རོ། །འདི་སྔ་རབས་པའི་ཐལ་འགྱུར་ལྟ་བུ་ལ་གསུངས་པ་འདྲ་ན། དེའི་ལུགས་ལ་ཉན་རང་ལ་ཆོས་ཀྱི་བདག་མེད་རྟོགས་པ་མེད་པར་མི་འདོད་པས་ཚིག་འདི་རྣམས་ཡིག་སྐྱོན་ཡིན་ནམ་སྙམ་སྟེ་དཔྱད་པར་བྱའོ། །འོ་ན་སེམས་ཅན་གྱི་དོན་ཇི་ལྟར་འབྱུང་ཞེ་ན། སྨོན་ལམ་གྱི་དབང་གིས་ཏེ། ཡིད་བཞིན་ནོར་བུ་དཔག་བསམ་ཤིང་། །ཇི་ལྟར་རེ་བ་ཡོངས་སྐོང་བ། །དེ་བཞིན་གདུལ་བྱའི་སྨོན་ལམ་གྱི། །དབང་གིས་རྒྱལ་བའི་སྐུར་སྣང་ངོ་། །ཞེས་གསུངས་པ་ལྟ་བུའོ། །དེས་དམིགས་པ་ཐམས་ཅད་དང་བྲལ་བས་ཆོས་ཀྱི་སྐུ་ནི་མྱ་ངན་ལས་འདས་པ་ཡིན་པས་འཁོར་བའི་མཐའ་མནན་ལ། ལོངས་སྤྱོད་རྫོགས་པའི་སྐུ་བསོད་ནམས་བརྒྱའི་མཚན་ཅན་བྱང་ཆུབ་སེམས་དཔའི་ཆོས་ཀྱི་ལོངས་སྤྱོད་པའི་གཞི་དང་། སྤྲུལ་པའི་སྐུ་ནི་སྙིང་རྗེ་ཆེན་པོའི་སྨོན་ལམ་གྱིས་འབྱུང་བ་རྒྱུན་མི་འཆད་པས་མྱ་ངན་ལས་འདས་པའི་མཐའ་མནན་པ་ཡིན་ནོ་ཞེས་ཁ་ཅིག་འདོད་དོ། །ཡང་ཁ་ཅིག་དབུ་མ་པས་དེ་ལྟར་བཤད་པས་དེ་དག་ཀྱང་སྟོང་པ་ཞེས་བྱ་བ་མི་འདོད་དོ་ཞེས་བྱས་ཀྱང་དོན་གྱིས་སྟོང་པར་སོང་ལ། སེམས་ཙམ་པས་སེམས་ཉིད་ཙམ་ཡང་མི་འདོད་བྱས་ཀྱང་དོན་གྱིས་འདོད་པར་སོང་བས་དོན་ནི་སུས་ཀྱང་བརྗོད་པར་མི་ནུས་ན་དེ་དང་དེ་ལས་བརྗོད་ཐབས་མ་བྱུང་བས་ཕྱི་རོལ་དུ་ཞེན་པ་དང་། སྟོང་པར་ཞེན་པ་བསལ་བའི་ཕྱིར་སེམས་ཙམ་དུ་སྟོན་པའི་མདོ་གསུངས་ལ། དངོས་པོར་འཛིན་པ་སྤྱི་དང་སེམས་སུ་འཛིན་པ་བསལ་བའི་ཕྱིར་དབུ་མའི་མདོ་རྣམས་གསུངས་པས་ཐེག་པ་ཆེན་པོའི་མདོ་ལས་ཁྱད་པར་འགའ་ཙམ་མེད་དོ་ཞེས་བྱ་ར་འདོད་དོ། །གང་ལྟར་ཡང་རུང་སྟེ་དེ་ཁོ་ན་ཉིད་ལ་འདོད་པ་མི་མཐུན་གྱི་བྱང་ཆུབ་སེམས་དང་ཕ་རོལ་ཏུ་ཕྱིན་པའི་སྤྱོད་པ་ལ་ཁྱད་པར་མི་འདོད་པས་དབུ་མ་རྩ་བ་ལས་ཀྱང་དེ་མ་གསུངས་སོ། །དབུ་མ་ལ་མོས་པ་རྣམས་ལ་སྤྱོད་པ་དང་བཅས་པར་སྦྱར་བ་ནི་གཏམ་བྱ་རིན་ཆེན་ཕྲེང་བ་དང་། སྤྱོད་པ་ལ་འཇུག་པ་དང་། དབུ་མ་ལ་འཇུག་པ་ལ་སོགས་པ་ཡིན་པས་དེ་དོན་དུ་གཉེར་བས་དེ་དག་ལ་བསླབ་པར་བྱའོ། །དེ་ལྟར་དང་པོར་ཉན་ཐོས་དང་ཐུན་མོང་བའི་ལམ་ལ་སྤྱོད་པའི་རིམ་པ་ཅན་དང་ལྟ་བ་རིམ་ཅན་དུ་བསླབས་ནས་ཐེག་པ་ཆེན་པོ་ལ་སྦྱར་རོ། །ཐེག་པ་ཆེན་པོ་ལ་འཇུག་པའི་གོ་རིམ་ངེས་
ེད་དེ་སྔོན་ལ་སེམས་བསྐྱེད་ནས་བརྩམས་ཏེ་སྤྱོད་པ་རིམ་པ་བཞིན་བསླབ་སྟེ། དེ་ཁོ་ན་སློབ་པ་ཡང་ཡོད་དེ་སྤྱོད་པ་ལ་འཇུག་པ་ལྟ་བུའོ། །དང་པོར་དེ་ཁོ་ན་བསླབས་ནས། དེ་ནས་སེམས་བསྐྱེད་ནས་རིམ་གྱིས་འཇུག་པའང་ཡོད་དེ། ཐེག་པ་ཆེན་པོ་བསྡུས་པ་ལྟ་བུའོ། །དེ་བས་ན་འཇུག་པ་ལ་ངེས་པ་མེད་དེ། སེམས་བསྐྱེད་པའི་རྒྱུ་ལྔ་བཤད་པ་ལྟ་བུའོ། །མངོན་པར་རྟོགས་པ་སྐྱེ་བ་ནི། རིམ་གྱིས་སྐྱེ་སྟེ་སའི་གོ་རིམ་ངེས་པ་གོང་དུ་བཤད་ཟིན་ཏོ། །དེ་བས་ན་ཐེག་པ་ཆེན་པོ་ཐུན་མོང་བའི་ལྟ་བ་དང་། སྤྱོད་པ་རིམ་ཅན་དུ་བསླབ་པའི་གང་ཟག་དེས། སྔགས་ཀྱི་རིམ་པ་ཀུན་ཤེས་ནས། །ཞེས་སྦྱར་ཏེ། དེའང་ཐོག་མར་བྱ་བའི་རྒྱུད་ནས་བརྩམས་ཏེ་གསང་སྔགས་ལ་རིམ་གྱིས་གཞུག་པར་བྱའོ། །དེ་ལ་དང་པོ་བྱང་ཆུབ་ཀྱི་མཆོག་ཏུ་སེམས་བསྐྱེད་པ་དང་། ཚུལ་ཁྲིམས་ཀྱི་སྤྱོད་པ་དང་། དེ་ཁོ་ན་ཉིད་དང་། ས་དང་ལམ་གྱི་རིམ་པ་འབྲས་བུ་གྲུབ་པ་དང་བཅས་པ་ནི་ཐེག་པ་ཆེན་པོ་ཐུན་མོང་བ་ཉིད་ལས་ཁྱད་པར་མི་འདོད་དོ། །འོན་ཀྱང་འདིར་ཁྱད་པར་ནི་བྱང་ཆུབ་སེམས་དཔའི་སྤྱོད་པ་སྤྱད་པ་དེ་ཉིད་ཕ་རོལ་ཏུ་ཕྱིན་པ་བས་མོས་པས་སྤྱོད་པའི་སར་མོས་པའི་སྒོ་ནས་སྤྱིའི་རྣམ་པ་དང་། ལུས་ངག་གིས་ཅི་ནུས་ཀྱིས་སྤྱོད་པར་འདོད་ལ། དེས་ན་བསྐལ་པ་གྲངས་མེད་པར་ལམ་ལ་ཡུན་རིང་དུ་འགོར་རོ། །གསང་སྔགས་ཀྱིས་ནི་གསང་སྔགས་ཀྱི་སྒོ་ནས་སྤྱོད་པ་སྤྱད་པས་དངོས་གྲུབ་རྣམས་མྱུར་དུ་འགྲུབ་པས་བདག་དང་གཞན་གྱི་དོན་ཐམས་ཅད་ཐོགས་པ་མེད་པར་འགྲུབ་པར་བྱེད་པས། ཚོགས་ཐམས་ཅད་ཀྱང་མྱུར་དུ་རྫོགས་པས་སྐྱེ་བ་འདིར་གྲུབ་པ་ཐོབ་པར་བྱེད་དོ། །གསང་སྔགས་ཀྱི་ལམ་འདི་ལའང་རིམ་གྱིས་སློབ་སྟེ། དང་པོ་བྱ་བའི་རྒྱུད་དང་། སྤྱོད་པའི་རྒྱུད་དང་། རྣལ་འབྱོར་གྱི་རྒྱུད་དང་། རྣལ་འབྱོར་ཆེན་པོའི་རྒྱུད་ལ་བསླབ་པའོ། །དེ་ལ་དང་པོར་ཕྱིའི་བྱ་བ་ལ་གཙོར་གྱུར་པ་བྱ་བའི་རྒྱུད་སློབ་བོ། །འདི་ལ་གཉིས། སྨིན་པར་བྱེད་པ་དང་། གྲོལ་བར་བྱེད་པའོ། །དང་པོ་ལ་བཞི། བསྙེན་པ་དང་། ས་ཆོག་དང་། སྟ་གོན་དང་། དངོས་གཞིའོ། །གྲོལ་བར་བྱེད་པ་ལའང་གཉིས། ཐུན་མོང་གི་དངོས་གྲུབ་བསྒྲུབ་པ་དང་། མཆོག་གི་དངོས་གྲུབ་བསྒྲུབ་པའོ། །དེ་དག་ཅུང་ཟད་ཙམ་ཞིབ་ཏུ་བརྗོད་ན། དེའང་དང་པོར་དཀྱིལ་འཁོར་དུ་འཇུག་པ་དང་། དབང་བསྐུར་བར་བྱེད་དོ། །དེ་ནས་སྐྱབས་སེམས་ཀྱི་སྡོམ་པ་བསྲུང་བ་སོགས་དམ་ཚིག་དང་ཁྲུས་དང་གཙང་སྦྲ་སོགས་སྦྱོར་བའི་སྤྱོད་པ་ལ་སློབ་པ་སོགས་རིག་སྔགས་ཀྱི་འདུལ་བ་ཀུན་ཏུ་སྤྱོད་པ་སློབ་བོ། །དེ་ནས་མདུན་དུ་རས་རིས་ལ་སོགས་པའི་རྟེན་ལ་ལྷ་སྤྱན་དྲང་བ་དང་། ལྷའི་སྙིང་གར་ཟླ་བའི་དབུས་སུ་ས་བོན་དང་མཐའ་སྐོར་དུ་བཟླ་྄བྱའི་སྔགས་བཀོད་ནས་རྡོ་རྗེའི་བཟླས་པ་དང་ཤུབ་བུར་བཟླས་པར་བྱ་བ་བཟླས་བརྗོད་ཀྱི་ཆོ་ག་ཕྱོགས་འབྱུང་ལ་གཏོར་མ་འབུལ་བ། སཱཙྪ་གདབ་པ། མདོ་བཀླག་པ། སྦྱིན་སྲེག་སོགས་གྲོགས་དང་བཅས་པ་སློབ་བོ། །དེ་ནས་དེས་མཐུན་རྐྱེན་རྣམས་ཚང་བར་བྱས་ནས། དེ་བཞིན་གཤེགས་པའི་རིགས་ཀྱིས་ཞི་བ། པདྨའི་རིགས་ཀྱིས་རྒྱས་པ། རྡོ་རྗེའི་རིགས་ཀྱི་དྲག་པོ་སྒྲུབ་པ་ཐུན་མོང་གི་དངོས་གྲུབ་དང་། དེ་ཁོ་ན་ཉིད་སྟོང་ཉིད་ཀྱི་ངང་ནས་རང་གི་ལྷའི་གསང་སྔགས་དྲིལ་བུའི་སྒྲ་བཞིན་དུ་རྒྱུན་མི་འཆད་པ་འབྱུང་བ་ལ་བདེན་ཞེན་མེད་པར་མཉམ་པར་བཞག་ནས་བསྒོམ་པ་སོགས་མཆོག་གི་དངོས་གྲུབ་བསྒྲུབ་པ་དངོས་གྲུབ་བསྒྲུབ་པའི་ཆོ་ག་ཡན་ལག་དང་བཅས་པ་སློབ་སྟེ། འདི་ནི་རྒྱས་པར་འཕགས་པ་ལེགས་པར་གྲུབ་པར་བྱེད་པ་དང་། དཔུང་པ་བཟང་པོ་ལས་འབྱུང་བ་དེ་ལ་སོགས་པ་རྣམས་ལ་བསླབ་པར་བྱའོ། །དེའི་རྗེས་ལ་ཕྱི་ལུས་ངག་གི་བྱ་བ་དང་། ནང་ཏིང་ངེ་འཛིན་གཉིས་ལ་མཉམ་པར་སྤྱོད་པས་སྤྱོད་པའི་རྒྱུད་བསླབ་སྟེ། འདིའང་ཕལ་ཆེར་བྱ་བའི་རྒྱུད་དང་འདྲ་མོད་ཀྱི་ཁྱད་པར་ཅུང་ཟད་ཙམ་བརྗོད་ན། དང་པོར་དཀྱིལ་འཁོར་དུ་འཇུག་ཅིང་དབང་བསྐུར་བ་ལ་འཇུག་གོ། དེ་ནས་གསང་སྔགས་ཀྱི་སྤྱོད་པ་ལ་གཙང་སྦྲ་ལ་སོགས་པ་མེད་ཀྱང་དངོས་གྲུབ་འགྲུབ་པས། དེ་ལྟ་བུའི་སྤྱོད་པ་ལ་སློབ་བོ། །དེ་ནས་དཀྱིལ་འཁོར་དགོད་པ་དང་། བདག་ལྷར་བསྐྱེད་པ་དང་། མདུན་དུ་རས་རིས་ལ་སོགས་པའང་ལྷར་བསྐྱེད་པ་དང་། དེ་ལ་ཡེ་ཤེས་པ་སྤྱན་དྲང་བ་དང་། མཆོད་པ་དང་། བཟླས་བརྗོད་ལ་སོགས་པ་དང་། དེ་ནས་ཡང་ཕྱིའི་དངོས་གྲུབ་བསྒྲུབ་པའི་ཐབས་རལ་གྲིའི་སྒྲུབ་པ་སོགས་དང་། ནང་གི་འབྱུང་བཞིའི་དཀྱིལ་འཁོར་བསྒོམ་པས་མངོན་ཤེས་གྲུབ་པ་སོགས་དངོས་གྲུབ་ཀྱི་ཐབས་དང་། ལྷ་སྐུ་ཞལ་ཕྱག་གི་རྣམ་པར་སྣང་བ་ལ་སོ་སོར་རྟོག་པའི་ཤེས་རབ་ཀྱིས་བརྟགས་ནས་ལྷ་སྐུའི་དངོས་པོ་དང་བྲལ་བ་སྣང་བ་མེད་པ་མངོན་དུ་བྱས་ནས་ཡིད་བཟླས་བྱ་བ། དེ་ཁོ་ན་ཉིད་དངོས་པོའི་གནས་ལུགས་དང་། ཧ་ཅང་དཔྱད་དྲག་ནས་སེམས་གཡེངས་ན་ལྷ་སྐུ་ལ་སེམས་གཏད་པ་དང་། གནས་པ་ཤས་ཆེ་ན་དཔྱད་སྒོམ་བྱ་བ་དེ་དང་རྗེས་སུ་འབྲེལ་བའི་བསམ་གཏན་གྱི་བྱ་བ་དང་། གཞན་རྗེས་སུ་འཛིན་པའི་ཐབས་ཀྱི་ཁྱད་པར་ལ་སོགས་པ་རྣམས་ལ་སློབ་སྟེ། འདི་ནི་རྣམ་པར་སྣང་མཛད་མངོན་པར་བྱང་ཆུབ་པའི་རྒྱུད་ལ་སོགས་པ་ལ་འབྱུང་བས་དེ་བསླབ་པར་བྱའོ། །དེའི་རྗེས་ལ་རྣལ་འབྱོར་གྱི་རྒྱུད་ཅེས་བྱ་བ་ཏིང་ངེ་འཛིན་གཙོ་བོར་གྱུར་པའི་རྒྱུད་ལ་གཞུག་པར་བྱའོ། །འདིར་འཇུག་པ་ལ་གང་ཟག་རིགས་གཉིས་ཏེ། སློབ་མའི་གང་ཟག་དང་། སློབ་དཔོན་དུ་གྱུར་པའི་གང་ཟག་གོ། སློབ་མ་ནི་གོང་དུ་བསྟན་པའི་ཚུལ་གྱིས་རྒྱུད་སྦྱང་བ་མ་བྱས་པ་རྣམས་སམ། སྦྱང་བ་བྱས་ཀྱང་ཐེག་པ་ཆེན་པོ་ལ་བློའི་སྤོབས་པ་ཞན་པས་གཞན་གྱི་དོན་ལ་ད་ལྟ་ནས་འཇུག་པར་མི་ནུས་པ་གང་ཡིན་པའོ། །སློབ་དཔོན་གྱི་གང་ཟག་ནི་སྙིང་རྗེ་དང་ཤེས་རབ་རྩལ་ཆེ་བས་གཞན་གྱི་དོན་གྱི་ཁུར་ད་ལྟ་ཉིད་ནས་ཁྱེར་བའོ། །དེ་ལ་སློབ་མ་རྣམས་ལ་ནི་དཀྱིལ་འཁོར་དུ་འཇུག་པ་སྟེ་རིག་པའི་དབང་ཙམ་སྟེར་ལ། དེའང་སྦྱང་བ་མ་བྱས་པས་ནི་དམ་ཚིག་འཛིན་མི་ནུས་པས་དམ་ཚིག་མི་སྦྱིན་ཞིང་། ཡི་དམ་གྱི་བསྒོམ་བཟླས་ཙམ་སྦྱིན་པར་བྱའོ། །སྦྱང་པ་བྱས་པ་ནི་དེ་དང་འབྲེལ་བའི་དམ་ཚིག་ཀྱང་བསྲུང་ནུས་པས་དམ་ཚིག་སྦྱིན་པ་དང་། དངོས་གྲུབ་ཀྱི་ཡེ་ཤེས་གང་འདོད་པ་ལ་བསླབ་པར་བྱའོ། །སློབ་དཔོན་དུ་གྱུར་པའི་གང་ཟག་ཡིན་ན། རྡོ་རྗེ་སློབ་དཔོན་དུ་དབང་བསྐུར་བའང་བྱ། །དེ་ནས་དེ་དང་རྗེས་སུ་འབྲེལ་པའི་དམ་ཚིག་བསླབ་པ་དང་། དཀྱིལ་འཁོར་དང་ལྷའི་དེ་ཁོ་ན་ཉིད་ལ་སོགས་ཏེ་དེ་ཁོ་ན་ཉིད་བཅུ་བསླབ་པ་དང་། སློབ་མ་གཞུག་པ་ལ་སོགས་པ་སློབ་དཔོན་གྱི་ལས་ཐམས་ཅད་དང་། བསམ་གཏན། བཟླས་བརྗོད། སྦྱིན་སྲེག་གསུམ་གྱིས་ཐུན་མོང་གི་དངོས་གྲུབ་མངོན་རྟོགས་ལྗོན་ཤིང་གི་ཡི་གེ་དག་བཅོས་དང་མཆན་བུ། བསྒྲ྄ུབ་པ། དེ་ནས་མཆོག་བསྒྲུབ་པ། དངོས་གྲུབ་ཀྱི་ཡེ་ཤེས་དང་། རྒྱ་བཞིས་རྒྱས་གདབ་པ་ལ་བརྟེན་ནས་མཆོག་བསྒྲུབ་པ་ཕྱག་རྒྱའི་ཡེ་ཤེས་དང་། རྩ་བའི་རྒྱུད་ཀྱི་བསྒྲུབ་པ་མཆོག་ཐུན་གཉིས་ཀ་དང་། རྒྱུད་ཕྱི་མ་མཆོག་ཁོ་ན་དང་། ཕྱི་མའི་ཕྱི་མ་ལ་ཐུན་མོངཁོ་ན་སོགས་པ་བསྒྲུབ་པའི་ཚུལ་ཐམས་ཅད་ལ་བསླབ་པར་བྱའོ། །འདི་ནི་འཕགས་པ་དེ་ཁོ་ན་ཉིད་འདུས་པ་དང་། རྡོ་རྗེ་རྩེ་མོ་ལ་སོགས་པ་ལ་འབྱུང་བས་དེར་འཇུག་པར་བྱའོ། །དེ་ལྟར་རྣལ་འབྱོར་གྱི་རྒྱུད་ལ་ལོབས་པས་ཐབས་ཀྱི་རྒྱུད་དཔལ་གསང་བ་འདུས་པ་ལ་བསླབ་བོ། །འདིའང་དབང་བསྐུར་བ་ནས་བརྩམས་ཏེ། རིམ་པ་གཉིས་གྲོགས་དང་བཅས་པའི་བར་ཡིན་ནོ། །དེ་ནས་ཤེས་རབ་ཀྱི་རྒྱུད་སངས་རྒྱས་མཉམ་སྦྱོར་ལ་སོགས་པ་ལ་བསླབ་སྟེ་བསླབ་པའི་ཚུལ་དེ་བཞིན་ནོ། །དེའི་རྗེས་སུ་ཐབས་ཤེས་རབ་གཉིས་སུ་མེད་པའི་རྒྱུད་སློབ་པས་ན། དེ་རྗེས་ཀྱེ་ཡི་རྡོ་རྗེ་བརྩམས། །ཞེས་གསུངས་ཏེ། འོག་ནས་འབྱུང་བའི་ཆོ་གས་སློབ་མའི་རྒྱུད་སྨིན་པར་བྱ་ཞེས་བྱ་བའི་དོན་ཡིན་ནོ། །བླ་ན་མེད་པའི་རྒྱུད་འདི་གསུམ་གྱི་ཁྱད་པར་ནི་གཞན་དུ་བཤད་ཟིན་ཏོ། །དེ་ལྟར་ན་དེ་དག་གིས་དབང་པོ་གདུལ་དཀའ་བ་ལམ་ལ་རིམ་གྱིས་འཇུག་པའི་མངོན་པར་རྟོགས་པ་མདོ་ཙམ་ཞིག་བསྟན་པ་ཡིན་གྱིས། ལེགས་པར་རྒྱས་པར་ཤེས་པར་འདོད་པས་གཞན་དུ་བཙལ་བར་བྱའོ། །ད་ནི་ཐེག་པ་ཆེན་པོ་གསང་སྔགས་བླ་ན་མེད་པའི་སྐལ་བ་དང་ལྡན་པ་ཅིག་ཆར་དུ་འཇུག་པའི་མངོན་པར་རྟོགས་པ་བརྗོད་དོ། །དེ་ལ་གཉིས། སྨིན་པར་བྱེད་པ་དབང་གི་ལམ་དང་། གྲོལ་བར་བྱེད་པའི་ལམ་རིམ་པ་གཉིས་འཁོར་དང་བཅས་པ་སྟེ། རྡོ་རྗེ་རྩེ་མོ་ལས། སྨིན་པ་དང་ནི་གྲོལ་བའི་ལམ། །སངས་རྒྱས་བྱང་ཆུབ་བསྟན་པའི་མཆོག །ཅེས་གསུངས་སོ། །དེ་ལ་དང་པོ་སྨིན་པར་བྱེད་པ་བརྗོད་ན། དང་པོ་ནས་རྒྱུད་འདིར་ཅིག་ཆར་དུ་འཇུག་ཏུ་རུང་ངམ་ཞེ་ན་རུང་ངོ་། །དེ་ལྟར་ཕྱི་མའི་ལེའུ་བཞི་པ་ལས། གདོལ་པ་སྨྱིག་མ་མཁན་ལ་སོགས། །གསོད་དོན་དོན་དུ་སེམས་པ་པོ། །དེ་རྣམས་ཀྱེ་རྡོ་རྗེ་ཤེས་ནས། །འགྲུབ་འགྱུར་འདི་ལ་ཐེ་ཚོམ་མེད། །ཅེས་གསུངས་ཏེ། དེ་ལྟར་འཕགས་པ་དེ་ཁོ་ན་ཉིད་བསྡུས་པ་ལས་ཀྱང་གསུངས་པ། བཅོམ་ལྡན་འདས་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོར་འཇུག་པ་ལ་སྣོད་དུ་གྱུར་པ་དང་མ་གྱུར་པ་བརྟག་མི་འཚལ་ལོ། །དེ་ཅིའི་སླད་དུ་ཞེ་ན། དཀྱིལ་འཁོར་ཆེན་པོ་མཐོང་བ་ཙམ་གྱིས་སྡིག་པ་འདག་པའི་ཕྱིར་རོ་ཞེས་བྱ་བ་ལ་སོགས་པ་རྒྱས་པར་གསུངས་པ་ལྟ་བུའོ། །དེ་ལྟར་ཅིག་ཆར་དུ་འཇུག་པ་ཞེས་བྱ་བ་ཡིན་མོད་ཀྱང་བླ་མ་གོང་མ་རྣམས་ཀྱི་ཕྱག་ལེན་གྱི་བརྒྱུད་པས་ཐེག་པ་ཆེན་པོ་ཐུན་མོང་མ་ཡིན་པའི་སྐྱབས་འགྲོ་དང་སེམས་བསྐྱེད་པ་ཙམ་སྔོན་དུ་བཏང་ནས་དཀྱིལ་འཁོར་དུ་གཞུག་པ་མཛད་དོ། །དེ་ལྟར་སཾ་པུ་ཊའི་གཉིས་པའི་དང་པོ་ལས། སྐྱབས་སུ་འགྲོ་བའི་སོ་ཐར་དང་སེམས་བསྐྱེད་ཀྱི་སྡོམ་པའི་རིམ་པ་ཡིས། །ཤིན་ཏུ་ལེགས་པར་སྦྱངས་ནས་ནི། །དེ་ནས་སྔགས་སྡོམ་དང་རྒྱུད་སྡེ་ལ་བསླབ་པ་སོགས་ཀྱི་རིམ་པ་ཡི་སློབ་མའི་རྒྱུད་སྦྱངས་ནས། །གསང་བའི་དེ་ཁོ་ན་ཉིད་བསྒྲགས། །ཞེས་གསུངས་པས་སོ། །ཐུན་མོང་མ་ཡིན་པའི་སྐྱབས་སུ་འགྲོ་བ་དང་། སེམས་བསྐྱེད་པའི་ཆོ་ག་ཇི་ལྟར་བྱ་བ་དང་། ཆོ་ག་དང་རྗེས་སུ་འབྲེལ་བའི་བསླབ་བྱའི་དོན་བཤད་པའོ། །དང་པོ་ནི། རྟེན་དང་མཆོད་པ་བཤམ་པ་སྔོན་དུ་བཏང་ལ། སློབ་དཔོན་གྱིས་བྱང་ཆུབ་ཀྱི་སེམས་སྐྱེ་བར་བྱེད་པའི་རྒྱུ། གྲོགས་དགེ་བའི་བཤེས་གཉེན་གྱི་སྟོབས་རྒྱུ་རིགས་ཀྱི་སྟོབས་དགེ་བའི་རྩ་བ་རིགས་སད་པའི་སྟོབས། །ཐོས་པའི་སྟོབས་དགེ་བ་ཡང་ཡང་གོམས་པ་ལས་སྐྱེ། །ཞེས་མདོ་སྡེ་རྒྱན་ལས་གསུངས་པའི་ལྔ་པོ་བཤད་དོ། །དེ་རྣམས་ཀྱི་ནང་ནས་ཀྱང་འཁོར་བའི་རྒྱ་མཚོ་ལ་འཇིགས་པ༷་ད༷ང་མྱ་ངན་ལས་འདས་པའི་གནས་འདོད་པ་དང་། བདག་བས་གཞན་གཅེས་པའི་སྙིང་རྗེ་གསུམ་པོ་མེད་པར་བྱང་ཆུབ་ཀྱི་སེམས་མི་སྐྱེ་བས་འདི་གསུམ་པོ་བཤད་པར་བྱའོ། །དེ་ལ་དང་པོ་གཉིས་ནི་དཔལ་སཾ་པུ་ཊའི་བརྟག་པ་དང་པོའི་རབ་བྱེད་དང་པོ་ལས། འཁོར་བའི་རྒྱ་མཚོ་འཇིགས་པ་ལས། །བརྒལ་ཏེ་ཐར་པའི་སྐམ་སར་འགྲོ་བའི་སེམས་ཀྱིས་ནི། །འཁོར་བའི་དབུས་སུ་བྱིང་བའི་ལུས་ཅན་ལ། །རྒལ་བར་མཚོན་པ་སྟེ་བགྲོད་བྱེད་ཀྱི་ལམ་གསུངས་པའོ། །ཞེས་པ་དང་། སྙིང་རྗེའང་། སེམས་ཅན་ཀུན་གྱི་དོན་གྱི་ཕྱིར། །རྟག་ཏུ་སྙིང་རྗེ་བཏུང་བར་བྱ། །ཞེས་ཧེ་བཛྲའི་དྲུག་པ་ལས་གསུངས་སོ། །འདི་དག་གིས་ནི་དོན་རྒྱས་པར་བཤད་པར་བྱའོ། །དེ་ནས་མཆོད་པ་འབུལ་བ་སྔོན་དུ་བཏང་ལ། གུར་གྱི་ལེའུ་བཅུ་གཉིས་པ་ལས་གསུངས་པ། དཀོན་མཆོག་གསུམ་ལ་སྐྱབས་སུ་མཆི། །ཞེས་བྱ་བ་ལ་སོགས་པའི་ཚིགས་སུ་བཅད་པ་ལན་གསུམ་དུ་བརྗོད་དོ། །གཉིས་པ་དེ་ལྟ་བུའི་སྐྱབས་འགྲོ་སེམས་བསྐྱེད་ཀྱི་བསླབ་བྱ་དེའང་རྒྱུད་འདི་དག་ཉིད་ལས་གསུངས་ཏེ། སངས་རྒྱས་ལ་སྐྱབས་སུ་སོང་བས་འཇིག་རྟེན་པ་ལ་སྐྱབས་སུ་མི་འགྲོ་སྟེ། ཚངས་པ་དབང་པོ་ཉེ་དབང་དྲག །གཤིན་རྗེ་དང་ནི་ནོར་བདག་ཉིད། །བདེན་བྲལ་དང་ནི་ཐག་ཟངས་རིས། །གཽ་རཱི་ལ་སོགས་པ་ཡི་གདན། །ཞེས་བྱའོ། །ཆོས་ལ་སྐྱབས་སུ་སོང་བས་སེམས་ཅན་ལ་འཚེ་བ་མི་བྱ་སྟེ། སེམས་ཅན་གནོད་པ་ཙམ་གྱིས་ནི། །ཕྱག་རྒྱའི་དངོས་གྲུབ་རྙེད་མི་འགྱུར། །ཞེས་བཅུ་གཅིག་པ་ལས་སོ། །དགེ་འདུན་ལ་སྐྱབས་སུ་སོང་བས་མུ་སྟེགས་ཅན་དང་མི་འགྲོགས་ཏེ། གདུག་ལ་བྱམས་པར་མི་བྱ་ཞིང་། །ཞེས་གུར་ལེའུ་བཅོ་ལྔ་པ་ལས་སོ། །སེམས་བསྐྱེད་པའི་བསླབ་བྱའང་སྨོན་པའི་སེམས་ནམ་ཡང་འབྲལ་བར་མི་བྱ་སྟེ། སངས་རྒྱས་ཐམས་ཅད་ཀྱིས་བརྟེན་པའི་ཕྱིར་རོ། །དེ་ལྟར་སཾ་པུ་ཊའི་གསུམ་པའི་བཞི་པ་ལས། ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པའི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །ཞེས་པ་དང་། འཇུག་པའི་སེམས་བསྐྱེད་ཀྱི་བསླབ་བྱའང་དེ་ཉིད་ལས། ཚུལ་ཁྲིམས་ཀྱི་ནི་བསླབ་པ་དང་། །དགེ་བའི་ཆོས་ནི་སྡུད་པ་དང་། །སེམས་ཅན་དོན་བྱེད་ཚུལ་ཁྲིམས་གསུམ། །སོ་སོར་བརྟན་པོར་གཟུང་བར་བགྱི། །ཞེས་གསུངས་སོ། །དེ་ནས་དཀྱིལ་འཁོར་ཆེན་པོར་དབང་བསྐུར་བ་ལ་གཉིས་ཏེ། སློབ་མ་རྗེས་སུ་གཟུང་བའི་ཆོ་ག་དང་། དེ་སྨིན་པར་བྱ་བ་དབང་བསྐུར་བའི་མངོན་རྟོགས་སོ། །དང་པོ་ནི་རྒྱུད་འདི་དག་ལས་གསལ་པོ་ཙམ་མ་གསུངས་ཀྱང་། སློབ་མས་གསོལ་བ་བཏབ་པ་ནི། སཾ་པུ་ཊའི་གཉིས་པའི་དང་པོ་ལས། སློབ་མས་པུས་མོའི་ལྷ་ང་ནི། །ས་ལ་དད་པས་བཙུགས་ནས་ནི། །ཐལ་མོ་སྦྱར་ནས་བསྟོད་པ་ཡིས། །སྟོན་པ་ལ་ནི་ཞུ་བར་བྱ། །ཞེས་གསུངས་སོ། །གཉིས་པ་དེ་ནས་དབང་བསྐུར་བ་འདོད་པས་མངོན་པར་རྟོགས་པ་བདུན་ཏེ། བསྙེན་པ་དང་། སའི་ཆོ་ག་དང་། སྟ་གོན་དང་། བྲི་ཞིང་རྒྱན་དགྲམ་པ་དང་། བསྒྲུབ་ཅིང་མཆོད་པ་དང་། འཇུག་ཅིང་དབང་བསྐུར་བ་དང་། མཇུག་གི་བྱ་བའོ། །ཡང་ན་བྲི་བ་མན་ཆད་ལ་དཀྱིལ་འཁོར་ཞག་གི་ནུབ་མོ་ཞེས་བྱ་བར་བྱས་ནས་བཞི་རུ་ཡང་མཛད་དོ། །དེ་ལ་བསྙེན་པ་ལ་གསུམ། རབ་མཚན་མའི་བསྙེན་པ། འབྲིང་དུས་ཀྱི་བསྙེན་པ། ཐ་མ་གྲངས་ཀྱི་བསྙེན་པ་སྟེ། དང་པོ་གཉིས་ཀྱི་ལུང་ནི། ཧེ་བཛྲའི་ལེའུ་བཅུ་པ་ལས། དང་པོ་སྤྲིན་གསེབ་ཀྱི་ཟླ་བ་དང་འདྲ་བར་ཆོས་ཉིད་མི་གསལ་པའི་ཚུལ་གྱིས་མཐོང་བ་ཉིད། །ཅེས་བྱ་བ་ལ་འཛིན་ཡང་། དངོས་གྲུབ་ཀྱི་མཚན་མ་ཡིན་གྱི་བསྙེན་པའི་མཚན་མ་ནི་མ་ཡིན་ནོ། །གཉིས་པའི་ལུང་ཡང་། དང་པོའི་བཅུ་གཅིག་པ་ལས། ཟླ་དྲུག་གོམས་པའི་སྦྱོར་བ་ཡིས། །འགྲུབ་འགྱུར་འདི་ལ་ཐེ་ཚོམ་མེད། །ཅེས་བྱ་བ་ལ་འཛིན་ཡང་། དེ་ལྟ་སྟངས་ཀྱི་མཚན་མ་ཡིན་གྱི་བསྙེན་པའི་མཚན་མ་མ་ཡིན་ནོ། །གྲངས་ཀྱི་བསྙེན་པ་གསུམ་ནི། རྩ་རྒྱུད་དང་པོའི་བཅུ་པ་ལས། འཁོར་ལོའི་བདག་པོའི་བཟླས་པ་འབུམ། །དཀྱིལ་འཁོར་ཅན་གྱི་དེ་བཞིན་ཁྲི། །ཞེས་གསུངས་སོ། །དེ་ནས་སའི་ཆོ་ག་ལ་ལྔ་སྟེ། བརྟག་པ་དང་། བསླང་བ་དང་། སྦྱང་བ་དང་། གཟུང་བ་དང་། བསྲུང་བའོ། །བརྟག་པ་ནི། དང་པོའི་བཅུ་པ་ལས། ཚལ་དང་སྐྱེ་བོ་མེད་གནས་དང་། །ཞེས་བྱ་བ་ལ་སོགས་པ་ཚིགས་སུ་བཅད་པ་གཅིག་གསུངས་སོ། །བསླང་བ་ལ་གཉིས་ལས། མངོན་པ་ལས་བསླང་བ་ནི་ཤུགས་ལས་ཤེས་ལ། མི་མངོན་པ་ལས་བསླང་བ་ནི། རྩ་རྒྱུད་དང་པོའི་བཅུ་པ་ལས། གོང་གི་ཨ་སོགས་སྔགས་ཀྱིས་ནི། །དེ་ལ་གཏོར་མ་རྣམ་པར་སྦྱིན། །ཞེས་པ་དང་། ཕྱི་མའི་ལེའུ་དང་པོ་ལས། མ་མ་རིན་ཆེན་སྣ་ཚོགས་འཛིན། །ཞེས་བྱ་བ་ལ་སོགས་པ་ཚིགས་སུ་བཅད་པ་གཅིག་གསུངས་སོ། །སྦྱང་བ་ལ་གཉིས་ལས། ལས་དང་བྱ་བས་སྐྱོན་སྦྱང་བ་ནི། །དཀྱིལ་འཁོར་ཁྲུ་གསུམ་བྱས་ནས་ནི། །ཞེས་བྱ་བ་ལ་སོགས་པས་བསྟན་ལ། ཏིང་ངེ་འཛིན་གྱིས་བགེགས་སྦྱང་བ་ནི། དང་པོར་ལྷ་ཡི་བདག་ཉིད་ཀྱིིས། །རྣལ་འབྱོར་པས་ནི་ནོར་འཛིན་སྦྱང་། །ཞེས་པ་དང་། གོང་དུ་གསུངས་པའི་སྔགས་རཀྵ་སོགས་ཀྱིས་ནི། །མཁས་པས་འཛིན་མ་རྣམ་པར་སྦྱང་། །ཞེས་བྱ་བས་བསྟན་ཏོ། །གཟུང་བ་ལ་གཉིས་ལས། བློས་གཟུང་བ་ནི་དོན་གྱིས་ཤེས་ལ། སྟང་སྟབས་ཀྱི་བཀོད་པས་གཟུང་བ་ནི། གུར་ལེའུ་བཅུ་བཞི་པ་དང་། སཾ་པུ་ཊའི་བདུན་པ་དངོས་ལས་ཤེས་པར་བྱའོ། །བསྲུང་བ་ནི། རྩ་རྒྱུད་དང་པོའི་བཅུ་པ་ལས། ཇི་ལྟར་ལེའུ་གསུམ་པར་སྲུང་འཁོར་གྱི་བསམ་གཏན་གསུངས་མངོན་རྟོགས་ལྗོན་ཤིང་གི་ཡི་གེ་དག་བཅོས་དང་མཆན་བུ། པ་དེ་བཞིན་འདིར་ཡང་། །བསྲུང་བའི་འཁོར་ལོ་ཇི་ལྟར་བསྲུང་༼གསུང༷ས་༽པ་བསྒོམས་པ་ཉིད་དོ། །ཅེས་བྱ་བས་རྒྱས་པར་རིག་པར་བྱའོ། །ཕྱོགས་ཀུན་ཏུ་འཇུག་པ་རྡོ་རྗེ་སློབ་དཔོན་གྱི་ཆས་གོས་ནི། དང་པོའི་བཅུ་པ་ལས། ཁྲུས་དང་གཙང་སྦྲ་དྲི་ཞིམ་ལུས། །སྣ་ཚོགས་རྒྱན་གྱིས་རྣམ་པར་བརྒྱན། །ཞེས་བྱ་བས་བསྟན་ཏོ། །སྟ་གོན་ལ་ཆོས་བཞི་ལས། དང་པོ་སའི་ལྷ་མོ་སྟ་གོན་དུ་གནས་པ་ནི་མི་མངོན་པ་ལས་བསླང་བ་དང་མཐུན་ནོ། །ལྷ་སྟ་གོན་དུ་གནས་པ་ནི་རྩ་རྒྱུད་རྣམས་ན་ནི་མེད་དེ། སཾ་པུ་ཊའི་རྒྱུད་ཕྱི་མ་ལས། དཀྱིལ་འཁོར་སྟ་གོན་ལ་གནས་པ་བྱས་ལ་ཞེས་བྱ་བ་ནས་སྦྱིན་སྲེག་བྱས་ནས་གཏོར་མ་སྦྱིན་པའི་བར་བྱའོ་ཞེས་གསུངས་སོ། །བུམ་པ་སྟ་གོན་ནི། བུམ་པ་བརྒྱད་ལ་སོགས་པར་ལྡན། །ཞེས་བྱ་བ་ལ་སོགས་པ་རྐང་པ་ལྔ་དང་། སཾ་པུ་ཊའི་རྒྱུད་ཕྱི་མ་ལས་ཀྱང་། རེ་ཞིག་རྩ་བའི་བུམ་པ་ལ་སོགས་པ་ལྷག་པར་གནས་པ་བྱས་ནས་ཞེས་བྱ་བ་ལ་སོགས་པ་གསུངས་སོ། །སློབ་མ་ལྷག་པར་གནས་པ་ནི་རྩ་བའི་རྒྱུད་འདི་ན་ནི་མི་སྣང་གི། སཾ་པུ་ཊའི་རྒྱུད་ཕྱི་མ་ལས། སློབ་མ་ལྷག་པར་གནས་པར་བྱའོ་ཞེས་བྱ་བ་ལ་སོགས་པ་གསུངས་སོ། །བྲི་ཞིང་རྒྱན་དགྲམ་པ་ལ་བཞི། ཐིག་གིས་བྲི་བ་དང་། ཚོན་གྱིས་བྲི་བ་དང་། མཚན་མ་དགོད་པ་དང་། རྒྱན་དགྲམ་པའོ། དང་པོ་ནི། དང་པོའི་བཅུ་པ་ལས། རང་གིས་འདོད་པའི་ལྷའི་ཏིང་ངེ་འཛིན་མཉམ་པར་བཞག་པའི་རྣལ་འབྱོར་པས། །སར་པ་ལེགས་པར་བཀལ་བ་དང་། །ཤིན་ཏུ་ཚད་མ་མཛེས་པ་ཡི། །སྲད་བུས་ཤེས་རབ་ཅན་གྱིས་གདབ། །ཅེས་གསུངས་སོ། །ཚོན་གྱིས་བྲི་བ་ནི། རྡུལ་ཚོན་དམ་པའི་ཚོན་དང་ནི། །ཞེས་བྱ་བ་ལ་སོགས་པ་དང་། མཚན་མ་དགོད་པ་ནི། ཤར་དུ་གྲི་གུག་རྣམ་པར་བྲི། །ཞེས་བྱ་བ་ལ་སོགས་པ་རྒྱུད་གསུམ་ཀ་ལས་ཚོན་གྱིས་བྲི་ཞིང་མཚན་མ་དགོད་པ་རྒྱས་པར་གསུངས་སོ། །རྒྱན་དགྲམ་པ་ནི། སཾ་པུ་ཊའི་གཉིས་པའི་དང་པོ་ལས། འདོད་ཡོན་ལྔ་ཡིས་གང་བ་དང་། །བླ་རེ་བྲེས་པས་ཉེ་བར་འབར། །ཞེས་བྱ་བ་ལ་སོགས་པ་གསུངས་སོ། །བསྒྲུབ་ཅིང་མཆོད་པ་ལ། དཀྱིལ་འཁོར་བསྒྲུབ་པ་ནི། དང་པོའི་བཅུ་པ་ལས། དེར་ནི་རིགས་ལྔ་ལས་བྱུང་བའི། །རིག་མ་བཟང་མོ་རྣམ་པར་གཞུག །ཅེས་སོ། །མཆོད་པ་ནི། ཕྱི་མའི་དང་པོ་ལས། མཆོད་པ་སྣ་ཚོགས་ཧཱུྃ་ནི་རྫོགས་པར་བསྐྱེད་པ་དང་། །མེ་ཏོག་ལ་སོགས་འབུལ་བ་ཉིད། །ཅེས་བྱ་བ་ལ་སོགས་པ་གསུངས་ལ། བཤད་པའི་རྒྱུད་གཉིས་པ་༼ཀ༷་༽ལས་ཀྱང་རྒྱས་པར་གསུངས་སོ། །འཇུག་ཅིང་དབང་བསྐུར་བ་ལ་གཉིས་ཏེ། སློབ་དཔོན་འཇུག་ཅིང་དབང་བླང་བ་དང་། སློབ་མ་འཇུག་ཅིང་དབང་བསྐུར་བའོ། །དང་པོ་ནི། རྩ་རྒྱུད་དང་པོའི་བཅུ་པ་ལས། རྡོ་རྗེ་སེམས་དཔའི་སྙེམས་ཏེ་ང་རྒྱལ་དང་པར་བྱས་ནས། །རྐང་པ་གཡས་པ་བརྐྱང་པའི་སྟངས་སྟབས་བྱས་ཏེ། །རྡོར་སེམས་ནི་ཇི་ལྟ་བུ་ཞེ་ན་ཕྱག་གཉིས་པའི་ཀྱེ་རྡོ་རྗེ་སྦྱོར་བས། །སློབ་དཔོན་དཀྱིལ་འཁོར་འཇུག་པ་ཉིད། །ཅེས་བྱ་བ་དང་། སཾ་པུ་ཊའི་གཉིས་པའི་དང་པོ་ལས་ཀྱང་། གང་གི་ཚེ་སྔགས་ཀྱི་ལམ་ནི་རྗེས་བཙལ་བ་སྟེ་སྔགས་ཀྱི་སྒོར་འཇུག་པས། །གང་ཚེ་དབང་གི་ཆོ་ག་ལ་མཁས་པས་གཞན་ལ་དབང་བསྐུར་བ་ན་དང་པོར་རང་གིས་དབང་ལེན་དགོས་པས་བླང་བའི་ཡུལ་ནི། །སངས་རྒྱས་ཀུན་གྱི་སྟེ་གདན་གསུམ་ཚང་བའི་ལྷ་ཚོགས་མངོན་སུམ་དུའམ། །དཀྱིལ་འཁོར་གྱི་ལྷ་ཚོགས་ཀྱི་རྣམ་པར་དཀྱིལ་འཁོར་གྱི་དབུས་སུ་བདེ་བར་གཤེགས་ནས་ཏེ་བཞུགས་པར་མོས་ནས་སུ། །དབང་ཞུ་མཁན་འཇིག་རྟེན་ཁམས་ནི་མཐའ་ཡས་སུ་ུགནས་པའི་སེམས་ཅན་རྣམས་ཀྱིས་དབངཐོབ་པར་མོས་པ་དང་། །རང་གི་རྒྱུད་བྱིན་གྱིས་བརླབ་པའི་གནས་ཐོབ་ནས། །དམ་ཚིག་ཉམས་པས་འཇིགས་པ་ལས་སྐྱོབ་པ་ཡི་ཆེད་དུ། །སློབ་དཔོན་བློ་དང་ལྡན་པས་སློབ་མ་ལ་དབང་བསྐུར་བ་དེ་བཞིན་དུ་རང་གི་ཀྱང་བླང་ངོ་། །ཞེས་གསུངས་པས་སོ། །གཉིས་པ་སློབ་མའི་བྱ་བ་ལ་འཇུག་པ་དང་། དབང་བསྐུར་བ་གཉིས། འཇུག་པ་ལ་ཕྱི་འཇུག་དང་ནང་འཇུག་གཉིས་ཏེ། དེའང་རྩ་རྒྱུད་ཕྱི་མའི་ལྔ་པ་ལས། གོས་ཀྱིས་མིག་ནི་བཀབ་ནས་སུ། །དེར་ནི་སློབ་མ་འཇུག་པ་ཉིད། །ཅེས་བྱ་བ་དང་། དེ་ཉིད་ལས། མང་དུ་རབ་ཏུ་བརྗོད་པས་ཅི། །ཇི་ལྟར་དེ་ཉིད་བསྡུས་པ་ཡིས། །དཀྱིལ་འཁོར་ཆོ་ག་དེ་བཞིན་བྱ། །ཞེས་གསུངས་པ་ལས་ཤེས་སོ། །དབང་བསྐུར་བ་ལ་གཉིས། ཐུན་མོང་གི་དབང་བསྐུར་བ་དང་། ཐུན་མོང་མ་ཡིན་པའི་དབང་བཞི་བསྐུར་བའོ། །དང་པོ་ནི་དབང་དྲུག་སྟེ། ཆུ། ཅོད་པན། རྡོ་རྗེ། དྲིལ་བུ། མིང་། ཐུན་མོང་གི་བརྟུལ་ཞུགས་རྣམས་སོ། །ཐུན་མོང་མ་ཡིན་པའི་དབང་ནི་བཞི་སྟེ། བུམ་དབང་དང་། གསང་དབང་དང་། ཤེས་རབ་ཡེ་ཤེས་དང་། བཞི་པའོ། །དེ་ལྟར་ཐུན་མོང་དང་ཐུན་མོང་མ་ཡིན་པའི་དབང་གཉིས་སུ་འོང་བ་ཡང་གུར་ལེའུ་བཅོ་ལྔ་པ་ལས། ཆུ་ཡི་དབང་གིས་དང་པོ་སྟེ། །ཅོད་པན་དབང་ནི་གཉིས་པའོ། །རྡོ་རྗེའི་དབང་གིས་གསུམ་པ་སྟེ། །རང་གི་བདག་པོ་སྟེ་དྲིལ་བུའི་དབང་བཞི་པ་ཉིད། །མིང་གི་དབང་བསྐུར་ལྔ་པ་སྟེ། །དྲུག་པ་རྫོགས་པའི་སངས་རྒྱས་ཉིད། །བུམ་པའི་དབང་ནི་བདུན་པ་སྟེ། །གསང་བའི་དབང་ནི་བརྒྱད་པའོ། །ཤེས་རབ་ཡེ་ཤེས་དགུ་པ་སྟེ། །དེ་ཁོ་ན་ཉིད་རྡོ་རྗེ་ལྟར་མི་ཕྱེད་པའི་དོན་སྟོན་པའི་སྦྱོར་བ་ཡིས་དབང་བཞི་པ། །ཆོས་བཤད་པ་སོགས་རྗེས་གནང་ཀུན་གྱི་དེ་ཉིད་བརྟུལ་ཞུགས་བརྗོད་པ་དང་གསང་དབང་གི་མཐའ་རྟེན། །སྟོན་པ་རང་གི་ལུང་བསྟན་ཏེ། །དེ་འདིར་དབང་གི་ཆོ་གའོ། །ཞེས་བདུན་པ་ལ་བུམ་པའི་དབང་བསྐུར་འབྱུང་ལ། གུར་ལེའུ་བདུན་པ་ལས། ཐུན་མོང་མ་ཡིན་པའི་དབང་གསལ་བར་བྱ་བའི་ཕྱིར། བུམ་པའི་དབང་ནི་དང་པོ་སྟེ། །གཉིས་པ་ལ་ནི་གསང་བའི་དབང་། །གསུམ་པ་ཤེས་རབ་ཡེ་ཤེས་ཏེ། །ཤེར་དབང་གི་དུས་སུ་མྱོང་བའི་ངོ་བོ་ཇི་ལྟར་ལུས་ལྟ་བུ་དེ་ཉིད་ཀྱིས་ནི་བཞི་པའི་ཡེ་ཤེས་དེ་བཞིན་གཤེགས། པའི་ཆོས་སྐུ་དང་འདྲ་བ་ལ་མཚོན་ནོ། །ཞེས་གསུངས་སོ། །དེ་ལ་ཐུན་མོང་གི་དབང་དྲུག་ནི་གུར་ལེའུ་བཞི་པ་ལས་གསལ་ལ། ཐུན་མོང་མ་ཡིན་པའི་དབང་རྣམས་ནི་གཙོ་བོར་རྩ་བའི་རྒྱུད་ལས་གསལ་ཏེ། དེ་ཡང་ཕྱི་མའི་ལེའུ་གསུམ་པ་ལས་གསལ་བར་འབྱུང་ངོ་། །དེ་ལ་ཅིའི་ཕྱིར་བུམ་པའི་དབང་ཞེས་བྱ་ཞེ་ན། གནས་སྐབས་ཐམས་ཅད་དུ་བུམ་པའི་བྱ་བ་ལ་འཇུག་པའི་ཕྱིར་ཐུན་མོང་གི་དབང་རྣམས་ཀྱང་བུམ་པའི་དབང་གི་ཁོངས་སུ་བསྡུས་པས་བུམ་པའི་དབང་ནི་ཆུ་ལ་སོགས་པ་བདུན་ནོ། །རྫས་གསང་བའི་ཕྱིར་གསང་བའི་དབང་སྟེ། དེ་ལ་གསུམ་ལས་ཕྱེ་བའི་ལྔ་སྟེ། རྗེ་བཙུན་ཡབ་ལས་ཐོབ་པ་དང་། ཡུམ་ལས་ཐོབ་པ་དང་། གྲོལ་བའི་སྟོབས་ལས་ཐོབ་པའོ། །དེ་ལ་གསུམ། རྣམ་རྟོག་གི་རིམ་པས་དུང་དང་ཉ་ཕྱིས་སུ་མངོན་དུ་བྱས་ལ་སྦྱིན་པ་དང་། ཞོ་དང་ཆང་ལ་སྦྱར་ཏེ་སྦྱིན་པ་དང་། མགྲིན་པར་ཉིན་པར་གྱི་ཐིག་ལེ་བྱ་བའོ། །ཤེས་རབ་ཕྱག་རྒྱ་གཏད་ཅིང་ཡེ་ཤེས་དགའ་བ་བཞི་སྐྱེས་པས་ཤེས་རབ་ཡེ་ཤེས་ཏེ། ཤེས་རབ་ནི་དངོས་དང་ཡེ་ཤེས་ཀྱི་ཕྱག་རྒྱ་གཏད་པ་ཡིན་ལ། ཡེ་ཤེས་དགའ་བ་བཞིའི་ཉམས་སུ་མྱོང་བ་ནི་འོག་ཏུ་དཀྱིལ་འཁོར་འཁོར་ལོའི་སྐབས་སུ་ཞིབ་ཏུ་བཤད་པར་བྱའོ། །དབང་བཞི་པ་ལ་ལྔ་སྟེ། ཚིག་གི་དང་། དོན་གྱི་དང་། ལམ་དུ་བྱེད་པ་དང་། བཞི་པ་རྟེན་ཅན་དང་། འབྲས་བུ་མངོན་དུ་བྱེད་པའི་བཞི་པའོ། །དབང་དེ་དག་གི་མཐའ་རྟེན་ནི་ནུབ་གཅིག་ལ་དབང་བཞི་རྫོགས་པར་བསྐུར་ན་བུམ་དབང་གི་མཐའ་རྟེན་རྗེས་གནང་ནི་གསུམ་སྟེ། ལྷ་མཆོད་པ་དང་། སེམས་ཅན་གྱི་དོན་བྱ་བ་དང་། ཆོས་བཤད་པའི་རྗེས་སུ་གནང་བ་སྟེ། གསུམ་ཀའང་རྩ་རྒྱུད་ཕྱི་མའི་བཅུ་གཉིས་པ་ལས། སློབ་མའི་ཚོགས་རྣམས་བསྡུ་བར་གྱིས། །ཞེས་པས་ཀྱང་ཟིན་ལ། སཾ་པུ་ཊའི་གཉིས་པའི་དང་པོ་ལས་ཀྱང་། སངས་རྒྱས་གྲོང་ཁྱེར་མཆོག་སྔོན་དུ། །དེ་ནས་དེ་ལ་གནང་བ་སྦྱིན། །ཞེས་བྱ་བ་ལ་སོགས་པ་དང་། རྒྱུད་ཕྱི་མ་ལས་ཀྱང་གསལ་བར་གསུངས་སོ། །གསང་དབང་གི་མཐའ་རྟེན་ལུང་བསྟན་ནི། གུར་ལེའུ་གསུམ་པ་དང་། བཞི་པ་ལས་གསུངས་སོ། །ཤེས་རབ་ཡེ་ཤེས་ཀྱི་མཐའ་རྟེན་ནི། དབུགས་དབྱུང་བ་དང་། དབང་བཞི་པའི་མཐའ་རྟེན་གཟེངས་བསྟོད་ནི། གུར་ལེའུ་བཞི་པ་དང་། བཅོ་ལྔ་པ་ལས་རྟོགས་པར་བྱའོ། །ནུབ་གཅིག་ལ་དབང་རྫོགས་པར་མི་བསྐུར་ན་རྡོ་རྗེ་སློབ་མའི་རིགས་ལ་ནི་མཐའ་རྟེན་གང་ལ་མི་དགོས་ལ། རྡོ་རྗེ་སློབ་དཔོན་གྱི་རིགས་ལ་མཐའ་རྟེན་བཞི་ཀ་བུམ་དབང་གི་རྗེས་ལ་བྱའོ་ཞེས་གསུངས་སོ། །མཇུག་གི་བྱ་བ་ལ་ལྔ། བླ་མ་ལ་ཡོན་དབུལ་བ་དང་། དཀྱིལ་འཁོར་མཆོད་པ་དང་། བཟོད་པར་གསོལ་ཏེ་གཤེགས་སུ་གསོལ་བ་དང་། ལས་ཀྱི་རྗེས་བསྡུ་བ་དང་། དགའ་སྟོན་བྱ་བ་སྟེ། རྒྱུད་ཀྱི་ལུང་དང་ཡང་སོ་སོར་སྦྱར་ལ་ཤེས་པར་བྱའོ། །དེ་ལྟར་ཆོ་ག་རྒྱུད་གསུམ་དུ་མི་གསལ་བ་རྣམས་ཇི་ལྟར་དེ་ཉིད་བསྡུས་པ་ལས། དཀྱིལ་འཁོར་ཆོ་ག་དེ་བཞིན་བྱ། །ཞེས་བཤད་པས་དེ་ཉིད་བསྡུས་པ་དང་། གསང་བ་སྤྱི་རྒྱུད་ལས་རྟོགས་པར་བྱའོ། །ལག་ཏུ་བླང་བ་ཞིབ་ཏུ་ནི་སློབ་དཔོན་དཔའ་བོ་རྡོ་རྗེའི་རྗེས་སུ་འབྲངས་པས་བཟང་པོ་ཡོངས་བཟུང་དང་། རིན་ཆེན་འབར་བ་ལས་རྟོགས་པར་བྱ་ཞིང་། བླ་མ་ག་ཡ་དྷ་རའི་རྗེས་སུ་འབྲངས་པས། རྒྱུད་དང་མན་ངག་གི་སྟོང་ཐུན་དབང་གི་ཆུ་བོར་ཤེས་པར་བྱའོ། །དེ་ལྟར་རྟེན་གྱི་གང་ཟག་དེ་དག་ཀྱང་རྒྱུ་ལ་ལྟོས་པ་ནི་རྒྱུའི་རྒྱུད་ཡིན་ལ། རིགས་ལ་ལྟོས་པ་དང་། སྤང་བྱ་ལ་ལྟོས་པ་དང་། རྐྱེན་ལ་ལྟོས་པའི་དང་པོ་རྒྱུད་སྦྱང་བ་མ་བྱས་པ་རིང་ཞིག་ནས་འགྲུབ་པ་གསུམ་ནི་ལམ་ལ་འཇུག་ཏུ་རུང་བའི་གང་ཟག་ཡིན་ལ། རྐྱེན་ལ་སྟོས་པའི་གཉིས་པ་སྦྱང་བ་བྱས་པ་འགྲུབ་པར་ངེས་པའང་གཉིས་ཀྱི་དང་པོ་ཕ་རོལ་ཏུ་ཕྱིན་པས་རྒྱུད་སྦྱང་བ་བྱས་པ་ནི་རྡོ་རྗེ་ཐེག་པ་ལ་འཇུག་ཏུ་རུང་བའི་གང་ཟག་ཡིན་ལ། གཉིས་པ་དབང་གིས་རྒྱུད་སྨིན་པར་བྱས་པ་ནི་ཞུགས་ཟིན་པའི་གང་ཟག་ཡིན་ནོ་དེའང་ལམ་གྱི་གཙོ་བོར་རིམ་པ་གཉིས་ཡིན་པའི་དབང་དུ་བྱས་ནས། ལམ་ཉམས་སུ་ལེན་པའི་རྟེན་གྱི་གང་ཟག་ཅེས་བཏགས་པ་ཡིན་གྱི། ལམ་ལ་སྨིན་གྲོལ་གཉིས་སུ་བྱེད་པའི་དབང་དུ་བྱས་ན་དབང་ལམ་ཡིན་ཞིང་། གང་ཟག་མཆོག་རྒྱལ་པོ་ཨིནྡྲ་བྷཱུ་ཏི་ལྟ་བུ་ནི་དབང་བཞི་པའི་དུས་ཉིད་ན་གྲོལ་བར་གྱུར་པ་རྣམས་ཀྱི་དབང་དུ་བྱས་ན་འབྲས་བུར་ཡང་འགྱུར་མོད་ཀྱི། འདིར་གང་ཟག་འབྲིང་དང་ཐ་མའི་དབང་དུ་བྱས་ནས། ལམ་གྱི་དངོས་གཞི་རིམ་པ་གཉིས་ཡིན་ལ། དེ་ཉམས་སུ་ལེན་པ་ལ་དབང་སྔོན་དུ་འགྲོ་དགོས་པས། དབང་བསྐུར་རྟེན་གྱི་གང་ཟག་གི་ཁོངས་སུ་བསྡུས་པ་ཡིན་ནོ། །དབང་འདི་དག་རིམ་ཅན་དུ་བསྐུར་བ་དང་། ཅིག་ཅར་དུ་བསྐུར་བའི་དབྱེ་བ་ནི་འོག་ནས་བཤད་པར་བྱའོ། །དེ་ལྟར་དེ་དག་ཀྱང་ལེའུ་དང་རབ་ཏུ་བྱེད་པ་གང་དང་གང་ནས་འབྱུང་ན། ཧེ་བཛྲའི་དང་པོའི་བཅུ་པ། ཕྱི་མའི་གསུམ་པ། ལྔ་པ་བཅུ་གཉིས་པ་རྣམས་དང་། གུར་ལེའུ་གཉིས་པ། གསུམ་པ། ལྔ་པ། བདུན་པ། བརྒྱད་པ། དགུ་པ། བཅུ་བཞི་པ། བཅོ་ལྔ་པ་རྣམས་དང་། སཾ་པུ་ཊའི་༼གཉི༷ས་པ༷འི་ད༷ང་པོ༷་ད༷ང་༽གསུམ་པ་དངོས་དང་། རྒྱུད་ཕྱི་མ་རྣམས་ལས་འབྱུང་ངོ་། །རྟེན་གྱི་གང་ཟག་སྨིན་པར་བྱེད་པའི་དབང་དང་བཅས་པ་བཤད་ཟིན་ཏོ། །དེས་ཉམས་སུ་བླང་བའི་གྲོལ་བར་བྱེད་པ་ཐབས་ཀྱི་རྒྱུད་ནི་མདོར་བསྡུ་ན་རིམ་པ་གཉིས་སུ་འདུས་པ་ཡིན་ཏེ། རྩ་བའི་རྒྱུད་ལེའུ་༼བརྟ༷ག་པ༷་༽དང་པོའི་ལེའུ་བརྒྱད་པ་ལས། བསྐྱེད་པའི་རིམ་པ་ཉིད་དང་ནི། །རྫོགས་པ་ཡི་ཡང་རིམ་པ་ཉིད། །རིམ་གཉིས་མཉམ་པར་གནས་ནས་ནི། །རྡོ་རྗེ་ཅན་གྱི་ཆོས་འཆད་དོ། །ཞེས་གསུངས་ལ། དཔལ་གསང་བ་འདུས་པའི་རྒྱུད་ཕྱི་མ་ལས་ཀྱང་། སངས་རྒྱས་རྣམས་ཀྱི་ཆོས་བསྟན་པ། །རིམ་པ་གཉིས་ལ་ཡང་དག་བརྟེན། །བསྐྱེད་པའི་རིམ་པ་ཉིད་དང་ནི། །དེ་བཞིན་རྫོགས་པའི་རིམ་ཉིད་དོ། །ཞེས་གསུངས་སོ། །དེ་ལྟ་བུའི་རིམ་པ་གཉིས་པོ་འདིའང་ལམ་གྱི་དངོས་གཞི་རིམ་པ་གཉིས་ཀྱི་དོན་བསྒོམ་པ་དངོས་དང་། དེའི་ཡན་ལག་ཏུ་གྱུར་པའི་མངོན་པར་རྟོགས་པ་ཞེས་བྱ་བ་གཉིས་སུ་འགྱུར་རོ། །གཉིས་པོ་འདིའང་བླ་མ་གོང་མ་རྣམས་ཀྱི་གསུང་གིས་མངོན་པར་རྟོགས་པ་གསུམ་ལས་བཅུ་གཅིག་ཏུ་དབྱེ་སྟེ། གཙོ་བོ་ཕྱག་རྒྱ་ཆེན་པོ་མཆོག་གི་དངོས་གྲུབ་བསྒྲུབ་པའི་མངོན་པར་རྟོགས་པ་ལྔ་དང་། འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་མཐའ་དག་བསྒྲུབ་པའི་མངོན་པར་རྟོགས་པ་ལྔ་དང་། གཉིས་ཀ་ལ་དགོས་པའི་དམ་ཚིག་དང་སྡོམ་པའོ། །དང་པོ་ལྔ་ནི། ཐོག་མར་འོག་ནས་འབྱུང་བའི་ལམ་ཐམས་ཅད་དེ་དང་དེའི་རྣམ་པར་སྣང་ཡང་རང་གི་ངོ་བོའམ་གོ་ཡུལ་དུ་སེམས་ཉིད་ལྷན་ཅིག་སྐྱེས་པའི་ཡེ་ཤེས་སུ་ཤེས་པར་བྱ་བའི་ཕྱིར་དང་པོར་རྟོགས་པའི་ལྟ་བ་དང་། དེ་ནས་རྫོགས་པའི་རིམ་པའི་རྟེན་ཡིན་པས་བསྐྱེད་པའི་རིམ་པ་བསྒོམ་པ་དང་། དེའི་རྗེས་ལ་བསྐྱེད་པའི་རིམ་པའི་ལྷ་ཡེ་ཤེས་སུ་རྟོགས་པར་བྱ་བའི་ཕྱིར་རྫོགས་པའི་རིམ་པ་དང་། དེ་ལྟར་རིམ་པ་གཉིས་ལ་གནས་ནས་དྲོད་ཐོབ་པས་རང་གི་སེམས་ཀྱི་བརྟན་གཡོ་བརྟག་པ་ལ་སོགས་པ་དོན་གྱི་ཕྱིར་སྤྱོད་པ་དང་། སྤྱོད་པ་ལ་གནས་པ་དེས་མཆོག་གི་དངོས་གྲུབ་ཀྱི་ཉེ་བའི་རྒྱུ་ཨཱ་ལི་ཀཱ་ལིའི་བདག་ཉིད་ཀྱི་བྱང་ཆུབ་ཀྱི་སེམས་བསྒོམ་པའོ། །དངོས་གྲུབ་མཐའ་དག་གི་མངོན་པར་རྟོགས་པ་ལྔ་ནི། དེ་བཞིན་གཤེགས་པ་ཐམས་ཅད་ཀྱི་ཐུགས་ཀྱི་སྙིང་པོ་ནས་བསྐུལ་བའི་ཕྱིར་སྔགས་ཀྱི་བཟླས་པ་དང་། བར་ཆད་ཞི་བ་ལ་སོགས་པའི་ཕྱིར་གཏོར་མ་དང་། སྐུ་གཟུགས་ལ་སོགས་པ་བྱིན་གྱིས་བརླབ་པའི་ཕྱིར་རབ་གནས་དང་། ལས་མཐའ་དག་བསྒྲུབ་པའི་ཕྱིར་སྦྱིན་སྲེག་དང་། དམན་པ་ལ་མོས་པའི་རྟེན་གྱི་གང་ཟག་གཟུང་བའི་ཕྱིར་ལས་ཀྱི་ཚོགས་རབ་འབྱམས་བསྟན་པའོ། །སྤྱི་དོན་གསུམ་པ་གཉིས་ཀ་ལ་དགོས་པ་གྲོགས་དམ་ཚིག་དང་སྡོམ་པ་རྐྱང་པས་ཀྱང་འགྲུབ་པར་བསྟན་པའི་ཕྱིར་དམ་ཚིག་དང་སྡོམ་པ་ལ་གཉིས། བཟའ་བའི་དམ་ཚིག་དང་། བསྲུང་བའི་དམ་ཚིག་གོ། དེ་ལྟར་མངོན་པར་རྟོགས་པ་བཅུ་གཅིག་པོ་འདི་ལས་བཅུ་བཞིར་དབྱེ་ན་གཙོ་བོའི་མངོན་པར་རྟོགས་པ་ནི་རིམ་པ་གཉིས་ཡིན་ལ་ལྷག་མ་དགུ་ནི་ཡན་ལག་གོ། དེའང་ལྟ་བ་དང་། སྤྱོད་པ་དང་། ཉེ་རྒྱུ་དང་། དམ་ཚིག་ལ་གསུམ་དུ་ཕྱེ་སྟེ། ལས་དང་པོ་པའི་དམ་ཚིག་དང་། བརྟན་པ་ཐོབ་པའི་དམ་ཚིག་དང་། བརྟན་པ་ཆེར་ཐོབ་པའི་དམ་ཚིག་སྟེ། གསུམ་ལས་ཕྱི་མ་གཉིས་ཏེ། ལྔ་ནི་རྫོགས་པའི་རིམ་པའི་ཡན་ལག་ཡིན་ལ། གཞན་བཟླས་པ་ལ་སོགས་པ་དྲུག་ནི་བསྐྱེད་པའི་རིམ་པའི་ཡན་ལག་ཡིན་ནོ། །ཡང་ལས་ཀྱི་ཚོགས་ལའང་ཕྱི་ནང་གཉིས་ལས། ནང་གི་ལས་ཀྱི་ཚོགས་ཀྱང་རྫོགས་རིམ་གྱི་ལམ་གྱི་ཡན་ལག་ཏུ་བསྡུ་བས་གཉིས་ཀ་ཡན་ལག་དྲུག་དྲུག་དང་ལྡན་པའོ། །དེ་ལྟ་བུའི་མངོན་པར་རྟོགས་པ་འདི་དག་བསླབ་པའི་གོ་རིམ་དང་གང་ཟག་དང་གཉིས། དང་པོ་ནི་བཅུ་གཅིག་དང་། གཉིས་པ་བསླབ་པའི་ཚུལ་ནི་གང་ཟག་གི་རིགས་ཀྱིས་རབ་ཏུ་དབྱེ་སྟེ། དབང་རིམ་པ་ཅན་དང་ཅིག་ཆར་བའི་དབྱེ་བ་དང་། སློབ་དཔོན་དང་སློབ་མའི་དབྱེ་བ་དང་། སློབ་དཔོན་ལ་ནང་དང་ཕྱིའི་དབྱེ་བས་བསླབ་བྱ་ཐ་དད་དུ་འགྱུར་བས་འདི་འོག་ཏུ་བཤད་པར་བྱའོ། །འདིར་རེ་ཞིག་ལམ་གྱི་གོ་རིམ་བརྗོད་ན་དབང་ཡོངས་སུ་རྫོགས་པའི་གང་ཟག་སློབ་དཔོན་དུ་གྱུར་པ་ཟུང་དུ་འཇུག་པའི་རྣལ་འབྱོར་པའི་དབང་དུ་བྱས་ཏེ། དབང་གི་རྗེས་ཉིད་ལ་དབང་དང་རྗེས་སུ་འབྲེལ་བར་རྟོགས་པའི་ལྟ་བ་སྟོན་པས། གང་ཟག་རབ་ཀྱི་མངོན་པར་རྟོགས་པའི་དབང་དུ་བྱས་ནས་བླ་མ་གོང་མས་གསུངས་པས་དེའི་ལུགས་སུ་བརྗོད་པར་བྱའོ། །འདི་ལ་གཉིས་ཏེ། ཐོག་མར་ལྟ་བ་བསྟན་པའི་དགོས་པ་དང་། ལྟ་བ་བསྟན་པའི་ཚུལ་ལོ། །དང་པོ་ནི་ལྟ་བ་རྟོགས་པ་འདི་ཡོད་ན་འོག་ནས་འབྱུང་བའི་ལམ་ཐམས་ཅད་རྣམ་པར་གྲོལ་བའི་ལམ་དུ་འགྱུར་བའི་ཕྱིར་ཡིན་ཏེ། དཔལ་སཾ་པུ་ཊ་ལས། དང་པོ་རྟོགས་པའི་ལྟ་བ་སྟོང་ཉིད་བསམས་ཏེ་བསྒོམ་ནས་ནི། །ལུས་ཅན་རྣམས་ཀྱི་མཚན་འཛིན་གྱི་དྲི་མ་བཀྲུ། །ཞེས་སོ། །འཕགས་པ་སྡུད་པ་ལས་ཀྱང་། སྦྱིན་པ་སྦྱིན་པའི་སྔོན་དུ་འགྲོ་བ་སྟེ་སྔོན་དུ་སྟོང་ཉིད་རྟོགས་པའི་ཤེས་རབ་དགོས་པ་སྟེ། །ཚུལ་ཁྲིམས་བཟོད་པ་བརྩོན་འགྲུས་བསམ་གཏན་དེ་བཞིན་ནོ། །དགེ་པའི་ཆོས་རྣམས་ཆུད་མི་གསན་པའི་ཕྱིར་དུ་ཤེས་རབ་ཀྱིས་ཡོངས་སུ་འཛིན་པ་ཡིན། །འདི་ནི་ཆོས་རྣམས་ཐམས་ཅད་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་གཅིག་སྟོན་པར་བྱེད། །ཅེས་གསུངས་པ་ལྟ་བུའོ། །གཉིས་པ་ལྟ་བ་དེ་བསྟན་པའི་ཚུལ་ནི། ཤེས་རབ་དེའང་རྣམ་པར་མི་རྟོག་པ་ཡིན་ལ། མི་རྟོག་པ་དེའང་ཕ་རོལ་ཕྱིན་པ་ལྟར་ཚིག་ཙམ་གྱིས་བསྟན་པར་མི་ནུས་པས། དབང་གི་ཡེ་ཤེས་ཐོབ་པའི་རྗེས་ལ་བསྟན་པའི་ཕྱིར། ཕྱི་ནས་དེ་ཉིད་ཡང་དག་བཤད། །ཅེས་བྱ་བ་ལ་སོགས་པ་གསུངས་སོ། །འདི་ལ་ལྔ་སྟེ། དབང་གི་ཡེ་ཤེས་བསྟན་པས་དེ་ཁོ་ན་ཉིད་ཀྱི་དོན་ལ་ངོ་སྤྲད་པ་དངོས་དང་། ཡེ་ཤེས་དེ་ལ་གང་ཟག་གི་བདག་ཏུ་ལོག་པར་རྟོག་པར་འགྱུར་བས་གང་ཟག་གི་བདག་མེད་བསྟན་པ་དང་། ཡུལ་ཅན་གྱི་ཡེ་ཤེས་ལ་སྒྲོ་འདོགས་བཅད་པའི་ཕྱིར་ཡུལ་ཤེས་བྱ་སྤྱིའི་གནས་ལུགས་གཏན་ལ་དབབ་པ་དང་། དེ་ལྟ་བུའི་དེ་ཁོ་ན་ཉིད་དེ་གསུང་རབ་ཐམས་ཅད་ཀྱི་རྟོགས་བྱར་བསྟན་པ་དང་། ལྟ་བ་དེ་རྟོགས་བྱེད་ཁྱད་པར་དུ་འཕགས་པ་གསང་སྔགས་ཀྱི་ཐབས་ཟབ་མོས་རྟོགས་པར་བྱ་བར་བསྟན་པའོ། །དང་པོ་ལ་གསུམ་སྟེ། སྤྱིར་ཡེ་ཤེས་དེ་འཁོར་བ་དང་མྱ་ངན་ལས་འདས་པ་ལ་ཁྱད་པར་རམ་དབྱེ་བ་མེད་པར་བསྟན་པ་དང་། དབྱེར་མེད་ཀྱི་ཡེ་ཤེས་ཉིད་ཇི་ལྟ་བུ་ཞིག་ཏུ་རྟོགས་པར་བསྟན་པ་དང་། ཡེ་ཤེས་དེ་ཆོས་ཐམས་ཅད་ཀྱི་བདག་ཉིད་དམ་ཁྱབ་པའམ་རྒྱུར་བསྟན་པའོ། །དང་པོ་ནི་ཧེ་བཛྲའི་བརྟག་པ་དང་པོའི་ལེའུ་བཅུ་པ་ལས། དབང་གི་ཕྱི་ནས་དབང་གི་ཡེ་ཤེས་དེ་ཉིད་ཡང་དག་བཤད། །རྣམ་པར་དག་པའི་ཡེ་ཤེས་ཀྱི་གཟུགས་ཅན་ཏེ་རང་བཞིན་གྱི་མྱང་འདས་དང་། །འཁོར་བའི་རང་བཞིན་རྣམ་པར་རྟོག་པ་གཉིས། །སྤྲོས་བྲལ་གྱི་ངང་དུ་རོ་གཅིག་པས་ཁྱད་པར་ཅུང་ཟད་ཡོད་མ་ཡིན། །ཞེས་གསུངས་ཏེ། ཕྱི་ནས་ཞེས་བྱ་བ་ནི་དབང་གི་ཉམས་མྱོང་སྐྱེས་པའི་རྗེས་ལ་འབྲེལ་པར་ཞེས་བྱ་བའི་དོན་ཏོ། །རྣམ་དག་ཡེ་ཤེས་ཞེས་བྱ་བ་ནི་ཡང་དག་པར་རྫོགས་པའི་སངས་རྒྱས་ཞེས་བྱ་བ་ཞིག་ཐ་དད་དུ་གྲུབ་པའམ། ལོགས་ནས་བཙལ་དུ་ཡོད་པ་ཞིག་མ་ཡིན་ཏེ། ཆོས་ཐམས་ཅད་མཉམ་པ་ཉིད་ལ་དབྱེ་བ་མེད་ཅེས་བྱ་བའི་དོན་ཏོ། །གཉིས་པ་དབྱེར་མེད་ཀྱི་ཡེ་ཤེས་ཉིད་ཇི་ལྟ་བུ་ཞིག་ཡིན་ཞིང་། དེ་རྣལ་འབྱོར་པས་ཇི་ལྟར་མྱོང་ཞིང་རྟོག་སྙམ་ན། ཧེ་བཛྲའི་ལེའུ་བཅུ་པ་ལས་གསུངས་པ། དབང་གི་ཡེ་ཤེས་ཀྱི་ངོ་བོ་ནི་རང་གིས་རིག་ཅིང་མྱོང་བའི་བདེ་ཆེན་ཡེ་ཤེས་ཉིད་དུ་འགྱུར། །སྤྲོས་པ་དང་བྲལ་བས་རང་དང་གཞན་དུ་ཡང་དག་པར་ཞེན་ཅིང་རིག་པ་སྤངས། །མཐའ་དབུས་དང་བྲལ་བས་མཁའ་མཉམ་ཉོན་མོངས་དང་རྣམ་རྟོག་བྲལ་བས་རྡུལ་བྲལ་ཆོས་ཉིད་ཡིན་པས་ངོ་བོ་སྟོང་པ་ཉིད། །དངོས་འཁོར་བ་དང་དངོས་མེད་མྱང་འདས་གཉིས་སུ་མེད་པའི་བདག་ཉིད་མཆོག །ཐབས་སྐྱེས་པ་དང་ཤེས་རབ་བུད་མེད་ཤིན་ཏུ་འདྲེས་པ་སྟེ་ཟུང་དུ་འཇུག་པ་ལས་བྱུང་བའི་ཡེ་ཤེས་སོ། །ཞེས་གསུངས་སོ། །དེ་ལ་རང་རིག་ཡེ་ཤེས་ཞེས་བྱ་བ་ནི་དྲན་པ་མེད་པའི་ཡེ་ཤེས་སུ་འདོད་པ་དགག་པའི་ཕྱིར་དང་། སོ་སོ་རང་གིས་རིག་པའི་ཆོས་ཉིད་ཡིན་ཞིང་གཞན་གྱིས་རྟོགས་པར་བྱ་བ་མ་ཡིན་པའི་ཕྱིར་རོ། །འོན་ཏེ་རང་རིག་པ་ཞེས་བྱ་བ་གཅིག་ཏུ་གྲུབ་བམ་ཞེ་ན། དེ་སྤྲོས་པ་དང་བྲལ་བར་བསྟན་པའི་ཕྱིར་རང་གཞན་ཡང་དག་རིག་པ་སྤངས་ཏེ། དེ་གཉིས་ཕན་ཚུན་ལྟོས་པའི་ཕྱིར་དང་། དམིགས་པར་བྱ་བའི་ཡུལ་འགའའང་མ་གྲུབ་པའི་ཕྱིར་རོ། །དེ་ཉིད་ཀྱི་དཔེ་ནི་མཁའ་མཉམ་ཞེས་སྨྲོས་ཏེ། སློབ་དཔོན་ཀླུ་སྒྲུབ་ཀྱིས། དམིགས་པ་མེད་པའི་སེམས་སུ་ནི། །གནས་པ་ནམ་མཁའི་མཚན་ཉིད་ཡིན། །ནམ་མཁའ་བསྒོམ་པ་དེ་ཉིད་ནི། །སྟོང་ཉིད་བསྒོམ་པར་བཞེད་པ་ཡིན། །ཞེས་གསུངས་པ་ལྟ་བུའོ། །དེ་བས་ན་རྡུལ་བྲལ་སྟོང་པ་ཉིད་དོ། །གལ་ཏེ་ཡང་ན་སེམས་རང་རིག་པར་འགྱུར་ལ། ཡང་ན་དྲན་པ་མེད་པའམ་རྣམ་པ་མེད་པའི་ཡེ་ཤེས་སུ་འགྱུར་བ་མ་ཡིན་ནམ་ཞེ་ན། དངོས་དང་དངོས་མེད་བདག་ཉིད་མཆོག །ཐབས་དང་ཤེས་རབ་ཤིན་ཏུ་འདྲེས་ཏེ་ཟུང་དུ་འབྲེལ་བ་ཡིན་ཞེས་བྱའོ། །འདིའི་དཔེ་ནི་སྒྱུ་མ་ལྟ་བུ་ལ་སོགས་པ་ཟུང་འཇུག་གམ་གཉིས་མེད་ཡིན་ཏེ། སློབ་དཔོན་ཀོ་ཏ་ལི་པས། དཔེ་ནི་ཆོས་རྣམས་ཐམས་ཅད་ལ། །བཞག་པ་ཉིད་དུ་དེ་མི་ནུས། །དམིགས་ཡུལ་གཟུགས་སྒྲ་སོགས་ཡིད་ཀྱི་རྣམ་ཤེས་ཀྱི་ཡུལ་ཏུ་གྱུར་པ། །དཔེ་ཡི་དངོས་པོ་རྣམ་པར་སྤངས་ཞེས་པ་ཡིན་ནོ། །ཞེས་བཤད་དོ། །གསུམ་པ་ཡེ་ཤེས་དེ་ཆོས་ཐམས་ཅད་ཀྱི་བདག་ཉིད་དམ་རྒྱུར་བསྟན་པ་ནི། དེ་ཉིད་སྲོག་ཆགས་རྣམས་ཀྱི་སྲོག་གམ་འཚོ་བ་ཡིན་ཏེ་སེམས་ཀྱི་བདག་ཉིད་ཡིན་པས་སོ། །སྐྱེ་མེད་ལས་མི་འགྱུར་བའི་ཡེ་ཤེས་དེ་ཉིད་ཡི་གེ་དམ་པ་ཉིད་དེ་ཨཀྵ་འགྱུར་བ་མེད་ལ་འཇུག་པས་སོ། །། དེ་ཉིད་འགྲོ་བའི་རང་བཞིན་ཡིན་པས་བདག་ཉིད་དེ། །དེའི་ཕྱིར་དེ་ཉིད་ནི་ཆོས་ཐམས་ཅད་ལ་ཁྱབ་པ་པོ། །སེམས་ཅན་ཐམས་ཅད་ཀྱི་རང་བཞིན་ཡིན་པས་ལུས་ལ་རྣམ་པར་གནས། །དངོས་པོ་འཁོར་བ་དང་དངོས་མེད་མྱང་འདས་ཀྱང་ཡེ་ཤེས་དེ་ལས་བྱུང་། །གཞན་རྣམས་དབང་པོ་དྲུག་དང་གང་རྣམས་སྣོད་དང་དེ་རྣམས་བཅུད་དང་། །རྣམ་པར་ཤེས་པ་ཚོགས་དྲུག་ཀུན་གྱི་ཚུལ་ལམ་རང་བཞིན་ཏེ་གནས་ལུགས་སོ། །ཞེས་གསུངས་ཏེ། འདི་དག་རྣལ་འབྱོར་པའི་ཉམས་ལ་ནི་དེ་ལྟར་བརྗོད་པ་བཞིན་མྱོང་ཞིང་སྐྱེ་ལ། སློབ་དཔོན་གྱིས་ཀྱང་དེ་ལྟར་བཤད་པར་བྱ-་-སྟེ། དེ་ལྟ་བུ་ཡིན་པར་སྒྲོ་འདོགས་བཅད་པ་ནི་འོག་ཏུ་ཤེས་པར་བྱའོ། །སྤྱི་དོན་གཉིས་པ་གང་ཟག་གི་བདག་དགག་པ་དང་། གང་ཟག་གི་བདག་མེད་པ་བསྟན་པ་ནི་དེ་ལྟ་བུའི་ཡེ་ཤེས་དེ་སློབ་མས་མྱོང་ཞིང་སློབ་དཔོན་གྱིས་བཤད་པ་དེའི་ཚེ། སློབ་མའི་རྗེས་སྤྱོད་ཀྱི་ཉམས་ལ། འོ་ན་བདག་གིས་ཉམས་སུ་མྱོང་བ་འདི་ཉིད་ཆོས་ཐམས་ཅད་ཀྱི་མྱོང་བ་པོའམ་བྱེད་པ་པོ་འབའ་ཞིག་ཡིན་པར་འདུག་གོ་ཞེས་གང་ཟག་གི་བདག་ཏུ་ལོག་པར་རྟོག་པ་སྐྱེ་བར་འགྱུར་རོ། །དེ་བསལ་བར་བྱ་བའི་ཕྱིར་གང་ཟག་གི་བདག་མེད་བསྟན་པ་ནི། ཤེས་རིག་གི་སྐྱེས་བུ་འདོད་པ་གྲངས་ཅན་པ་དང་སྔོན་རབས་པ་དང་དབང་ཕྱུག་བྱེད་པར་འདོད་པ་དབང་ཕྱུག་པ་དང་། །བདག་རྟག་པར་འདོད་པ་བྱེ་བྲག་པ་དང་གསོ་བ་དང་སེམས་ཅན་རྣམ་གྲངས་ཡིན་ལ་ཤིང་སོགས་གསོ་བ་དང་སེམས་ཅན་དུ་འདོད་པ་གཅེར་བུ་པ་དང་། །དུས་རྒྱུར་སྨྲ་བ་དང་གང་ཟག་རྒྱུར་སྨྲ་བ་ཉིད་དེ་དེ་ཉིད་གཉིས་ཆད་ལྟ་བ་དང་ནི་སྟེ་རྟོག་གེ་སྡེ་ལྔའི་འདོད་པ་ལྷན་སྐྱེས་ལ་ལོག་པར་རྟོག་པ་ལས་བྱུང་བ་ཡིན་ནོ། །དེས་ན་མ་འཁྲུལ་བའི་གནས་ལུགས་དངོས་ནི། དངོས་པོ་ཀུན་གྱི་རང་བཞིན་ལྷན་སྐྱེས་ཀྱི་ཡེ་ཤེས་འདི་ཉིད་ནི། །དོན་དམ་པར་སྤྲོས་པ་དང་བྲལ་ཞིང་ཀུན་རྫོབ་ཏུ་སྣ་ཚོགས་སུ་སྣང་བས་སྒྱུ་མའི་གཟུགས་སམ་རང་བཞིན་ཅན་ཉིད་དུ་འདོད། །ཅེས་གསུངས་སོ། །དེ་ལ་གཉིས། གང་ཟག་གི་བདག་ཉིད་དངོས་དང་། དེ་དགག་པའོ། །དང་པོ་ལ་ལྔ། གྲངས་ཅན་པ་དང་། རིག་བྱེད་པ་དང་། བྱེ་བྲག་པ་དང་། གཅེར་བུ་པ་དང་། ཆད་པར་ལྟ་བའོ། །དང་པོ་ནི་དེ་ལ་སྐྱེས་བུ་སྟེ། གྲངས་ཅན་པས་བཏགས་པའི་བདག་རྟག་པ་གཅིག་པུ་ཡུལ་ལ་སྤྱོད་པར་འདོད་པའོ། །དེའང་སྒྱུ་མའི་གཟུགས་ཅན་ཉིད་དུ་འདོད་དེ། ཡེ་ཤེས་དེ་རྣམ་པར་ཤེས་པ་ཀུན་གྱི་ཚུལ་དུ་སྣང་བས་མ་བརྟགས་པའི་བློ་ལ་དེ་ལྟ་བུ་སྣང་བས་དེ་དག་གིས་ལོག་པར་བརྟགས་ཀྱང་རང་གི་ངོ་བོ་ལ་མཁའ་མཉམ་རྡུལ་བྲལ་སྟོང་པ་ཉིད་ཡིན་པའི་ཕྱིར་དེ་ལྟར་མ་གྲུབ་པས་ན་སྣང་ལ་རང་བཞིན་མེད་པ་སྒྱུ་མ་ལྟ་བུའོ། །དེ་བཞིན་དུ་སྔོན་རབས་ནི་སྤྱོད་པ་པ་དང་རིག་བྱེད་ཀྱི་མཐའ་གསང་བར་སྨྲ་བའི་ཡིན་ཏེ། རྙིང་པ་རྒྱུར་སྨྲ་བ་ཞེས་བྱ་བ་སྒྲའི་ཚངས་པ་རྟག་ཏུ་གྲུབ་པར་འདོད་པའོ། །དེ་ཉིད་ཡི་གེ་དམ་པ་ནི་མི་འགྱུར་བ་ཡིན་པས། །དེ་ལ་ལོག་པར་རྟོག་པས་དེ་ལྟར་བརྟགས་པར་སྣང་ཡང་། རང་གཞན་ཡང་དག་རིག་པ་སྤངས་པའི་ཕྱིར་དེ་ལྟར་སྣང་བ་སྟོང་པ་སྒྱུ་མ་ལྟ་བུའོ། །དེ་བཞིན་དུ་བདག་ནི་བྱེ་བྲག་པས་བདག་བེམ་པོར་འདོད་པ་སྟེ། རང་རིག་ཡེ་ཤེས་ཡིན་པའི་ཕྱིར། །དེ་ཡང་སྒྱུ་མ་ལྟ་བུའོ། །གསོ་བ་དང་སེམས་ཅན་ནི་གཅེར་བུ་པ་རྣམས་ཀྱི་སྟེ། ཡེ་ཤེས་དེ་ཉིད་སེམས་ཅན་རྣམས་ཀྱི་སྲོག་ཏུ་སྣང་བས་དེ་ལྟར་ལོག་པར་རྟོག་ཀྱང་རྡུལ་བྲལ་སྟོང་པ་ཉིད་ཡིན་པས་དེ་ལྟར་སྣང་བ་སྟོང་པ་སྒྱུ་མ་ལྟ་བུའོ། །དེ་བཞིན་དུ་ཁ་ཅིག་དུས་རྒྱུར་སྨྲ་བ་དང་། ཁ་ཅིག་གང་ཟག་རྒྱུར་སྨྲ་བ་དེ་དག་ཀྱང་ཡེ་ཤེས་དེ་དང་དེའི་རྣམ་པར་སྣང་བས་དེ་ལ་ལོག་པར་རྟོག་པ་ཡིན་གྱི། རང་གི་ངོ་བོ་མཁའ་མཉམ་རྡུལ་བྲལ་སྟོང་པ་ཉིད་ཡིན་པས་སྒྱུ་མའི་གཟུགས་ཅན་ཡིན་ཏེ། དཔེར་ན་དམུས་ལོང་བརྒྱས་གླང་པོ་ཆེ་འཇུས་པ་ལྟ་བུའོ་ཞེས་མདོ་ལས་བཤད་པ་དང་འདྲའོ། །སྤྱི་དོན་གསུམ་པ་ཡུལ་ཅན་གྱི་ཡེ་ཤེས་ལ་སྒྲོ་འདོགས་གཅད་པའི་ཕྱིར་ཡུལ་ཤེས་བྱ་སྤྱིའི་གནས་ལུགས་གཏན་ལ་དབབ་པ་སྟོན་ཏེ། དེ་ལ་ཡུལ་ཤེས་བྱ་སྤྱིའི་གནས་ལུགས་གཏན་ལ་མ་ཕབ་ན་རང་གིས་ཉམས་སུ་མྱོང་བའི་ཡེ་ཤེས་དེ་ཉིད་ལོག་པར་གོལ་བར་འགྱུར་རོ། །དེས་ན་གོལ་ས་གཅད་པའི་ཕྱིར་གནས་ལུགས་གཏན་ལ་དབབ་པ་ལ་གཉིས་ཏེ། བདེན་པ་གཉིས་ཀྱི་རྣམ་པར་གཞག་པ་སྤྱིར་བསྟན་པ་དང་། དེའི་ངོ་བོ་གཏན་ལ་དབབ་པའི་སྒོ་ནས་མཐའ་བྲལ་གྱི་ལྟ་བ་རྒྱས་པར་བཤད་པའོ། །དང་པོ་ནི་ཧེ་བཛྲའི་ཕྱི་མའི་ལེའུ་བཞི་པ་ལས། འཁོར་བའི་ཆོས་སྤངས་ནས་གཞན་དུ་ནི། །མྱ་ངན་འདས་པ་རྟོགས་མི་འགྱུར་ཏེ་འཁོར་བ་མ་གྲུབ་པ་མྱང་འདས་ཡིན་པས་སོ། །འཁོར་བ་གཟུགས་དང་སྒྲ་ལ་སོགས་པ་ཡུལ་དྲུག །འཁོར་བ་ཚོར་བ་ལ་སོགས་པ་ཕུང་པོ་ལྔ། །འཁོར་བ་མིག་སོགས་དབང་པོ་རྣམས་ཉིད་དེ། །འཁོར་བ་ཞེ་སྡང་ལ་སོགས་པ་ཉོན་མོངས་པ་རྣམས་སོ། །ཆོས་ཅན་འདི་རྣམས་ཀྱི་ཆོས་ཉིད་དོན་དམ་ནི་མྱ་ངན་འདས། །རྨོངས་པ་སྟེ་ངོ་མི་ཤེས་པའི་ཕྱིར་འཁོར་བའི་གཟུགས་ཅན་ཉིད་དང་། །རྨོངས་པ་མེད་པ་རང་ངོ་ཤེས་ན་འཁོར་བ་དག་པ་ནི། །འཁོར་བ་མྱ་ངན་འདས་པར་འགྱུར། །དོན་དམ་པ་བྱང་ཆུབ་སེམས་ནི་མྱ་ངན་ལས་འདས་པ་ཡིན་པས། །ཀུན་རྫོབ་ཀྱི་བདེན་པ་དང་དོན་དམ་གྱི་བདེན་པའི་ཚུལ་ཅན་གཉིས་ཀྱི་མིང་དོན་ནོ། །ཞེས་གསུངས་སོ། །དེ་ལ་ཀུན་རྫོབ་དོན་དམ་ཚུལ་ཅན་ནོ་ཞེས་བྱ་བ་འདི་གཉིས་ནི་བདེན་པ་གཉིས་ཞེས་བྱ་བ་སྟེ། སངས་རྒྱས་ཀྱི་ཆོས་བསྟན་པའི་སྙིང་པོ་སྟེ། མདོ་ལས། འཇིག་རྟེན་མཁྱེན་པས་གཞན་ལ་མ་གསན་པར། །བདེན་པ་འདི་གཉིས་ཉིད་ཀྱིས་བསྟན་པ་མཛད། །གང་ཞིག་ཀུན་རྫོབ་དེ་བཞིན་དོན་དམ་སྟེ། །བདེན་པ་གསུམ་པ་འགའ་ཡང་མ་མཆིས་སོ། །ཞེས་གསུངས་སོ། །སློབ་དཔོན་ཀླུ་སྒྲུབ་ལ་སོགས་པས་ཀྱང་དོན་འདི་ཉིད་རྒྱ་ཆེར་བསྟན་པ་མཛད་དོ། །དེ་ལ་གསུམ་སྟེ། མཚན་ཉིད་དང་། མཚན་གཞི་དང་། མཚན་གཞི་ངེས་པར་བྱེད་པའི་ཚད་མའོ། །དང་པོ་ནི། ཀུན་རྫོབ་དོན་དམ་ཚུལ་ཅན་ནོ། །ཞེས་བྱ་བ་ལ། སྤྱིར་ཀུན་རྫོབ་ཅེས་བྱ་བ་དང་། ཀུན་རྫོབ་ཀྱི་བདེན་པ་ཞེས་བྱ་བ་གཉིས་དང་། དོན་དམ་པ་དང་དོན་དམ་པའི་བདེན་པ་ཞེས་བྱ་བ་གཉིས་སོ། །དེ་ལ་ཀུན་རྫོབ་ཅེས་བྱ་བ་ནི་སཾ་བྲྀ་ཏ་སྟེ། ཡང་དག་པ་ལ་སྒྲིབ་པས་ན་ཀུན་རྫོབ་བོ། །དེ་ནི་མ་བརྟགས་པའི་བློའམ་རྨོངས་པའི་བློ་སྟེ། དེ་ལྟར་ཡང་། གཏི་མུག་རང་བཞིན་སྒྲིབ་ཕྱིར་ཀུན་རྫོབ་སྟེ། །ཞེས་སོ། །བློ་དེའི་ངོར་བདེན་པར་བརྟགས་པ་ནི་ཀུན་རྫོབ་ཀྱི་བདེན་པ་ཡིན་ལ། བདེན་པར་མ་བརྟགས་ན་བློ་དེའི་སྣང་ངོ་ཙམ་ཡང་ཀུན་རྫོབ་ཅེས་བྱ་བ་ཙམ་ཡིན་ནོ། །དོན་དམ་པ་ཞེས་བྱ་བ་ནི་དམ་པ་རྣམས་ཀྱི་དོན་དུ་གཉེར་བས་ན་དོན་དམ་པ་སྟེ། ཕྱིན་ཅི་མ་ལོག་པའམ་མི་བསླུ་བ་ཡིན་ལ། དེའི་ངོར་བདེན་པ་ནི་དོན་དམ་པའི་བདེན་པའོ། །དེ་ལྟར་ཡང་། བསླུ་བ་མེད་པས་རིགས་པ་ནི། །དོན་དམ་ཡིན་ཏེ་ཞེས་གསུངས་པ་དང་། འདིར་ཡང་རྨོངས་མེད་ཅེས་པས་ན་བདེན་པ་གཉིས་ཀྱི་མཚན་ཉིད་ནི་ཐམས་ཅད་མཐུན་ཏེ། ཆོས་མངོན་པ་ལས། གང་ལ་ཐོ་བས་བཅོམ་དང་བློ་ཡི་༼ཡིས༷་༽རྡུལ་སོགས་ཆོས་གཞན། །བསལ་ན་དེ་བློ་མི་འདོར་༼འཇུ༷ག་༽པ། །རིམ་པ་བཞིན་བུམ་པ་དང་ཆུ་བཞིན་དུ་ཀུན་རྫོབ་ཏུ། །ཡོད་དེ་དོན་དམ་དུ་ཡོད་པ་དང་བཅོམ་པ་དང་བསལ་ཡང་དེའི་བློ་མི་འདོར་བ་གཞན་རྡུལ་ཕྲན་སོགས་ཡིན་ནོ། །ཞེས་པ་འདིའང་དེ་ཉིད་ཡིན་ནོ། །དེས་ན་མཚན་གཞི་མི་མཐུན་གྱི། མཚན་ཉིད་ཐམས་ཅད་མཐུན་ནོ། །གཉིས་པ་མཚན་གཞི་ནི་ཆོས་ཅན་འཁོར་བ་ནི་ཀུན་རྫོབ་ཀྱི་བདེན་པ་ཡིན་ཏེ། བློ་སྒྲིབ་པ་དང་བཅས་པའི་ཡུལ་ཡིན་པའི་ཕྱིར་རོ། །ཆོས་ཉིད་མྱ་ངན་ལས་འདས་པ་ནི་དོན་དམ་པའི་བདེན་པ་སྟེ། བློ་ཕྱིན་ཅི་མ་ལོག་པའི་ཡུལ་ཡིན་པའི་ཕྱིར་རོ། །འདི་ལའང་ཡུལ་བདེན་པ་གཉིས་ཤེས་པ་ལ་ཡུལ་ཅན་གྱི་བློ་ཤེས་དགོས་པས་ཡུལ་ཅན་བློའི་རྣམ་གཞག་དང་། བློ་དེ་ལ་ལྟོས་ནས་བདེན་པ་གཉིས་སུ་གཞག་པའི་ཚུལ་ལོ། །དང་པོ་ནི་སྤྱིར་བློ་ཐམས་ཅད་ལ་བསྡུ་ན་བློ་ཀུན་རྫོབ་པ་དང་། བློ་དོན་དམ་པ་ཞེས་བྱ་བ་གཉིས་ཡིན་པས་ན། བློ་གཉིས་པོ་དེ་གང་ཟག་གང་གི་རྒྱུད་ལ་ལྡན་ཞེ་ན། འདི་ལ་བཞི། ཉན་ཐོས་ཀྱི་འདོད་ཚུལ་དང་། རྣལ་འབྱོར་སྤྱོད་པའི་འདོད་ཚུལ་དང་། རྒྱུན་ཆད་རབ་ཏུ་མི་གནས་པའི་འདོད་ཚུལ་དང་། ཟུང་འཇུག་རབ་ཏུ་མི་གནས་པའི་འདོད་ཚུལ་ལོ། །དང་པོ་ནི་དེ་ལ་ཉན་ཐོས་སྡེ་པ་དག་སོ་སོ་སྐྱེ་བོ་ནི་ཀུན་རྫོབ་ཀྱི་བློ་འབའ་ཞིག་ཡིན་ལ། འཕགས་པ་རྣམས་ནི་བློ་གཉིས་ཀ་དང་ལྡན་ལ། མྱ་ངན་ལས་འདས་པ་ཕུང་པོ་ལྷག་མ་མེད་པར་གྱུར་པའི་ཚེ་བློ་མེད་དོ་ཞེས་ཟེར་རོ། །དེ་དག་ཀྱང་ཡུལ་དོན་དམ་པའི་བདེན་པ་ལྟར་འདོད་པ་དང་། མྱ་ངན་ལས་འདས་པ་བློ་མེད་ཀྱི་དངོས་མེད་དུ་གྲུབ་པ་ལ་སོགས་པ་གྲུབ་མཐའ་འགལ་བ་དུ་མ་ཁས་ལེན་པ་ནི་གོང་དུ་སུན་ཕྱུང་ཟིན་ཏོ། །ཡང་རྣལ་འབྱོར་སྤྱོད་པ་པ་དག་ཀུན་བརྟགས་ཀྱི་བློ་ནི་ཀུན་རྫོབ་ཡིན་ལ། གཞན་དབང་དང་ཡོངས་གྲུབ་དོན་དམ་པ་ཡིན་པས་སོ་སོ་སྐྱེ་བོའི་བློ་ནི་གཉིས་ཀ་དང་ལྡན་ལ། འཕགས་པ་གསུམ་ལ་ཀུན་རྫོབ་ཀྱི་བདེན་པ་མེད་པའི་ཀུན་རྫོབ་ཙམ་ཡོད་པས། དེའང་གཉིས་ཀ་དང་ལྡན་ལ་སངས་རྒྱས་ཀུན་བརྟགས་དང་བྲལ་བས་དོན་དམ་འབའ་ཞིག་ཡིན་ནོ། །ཞེས་ཟེར་ཏེ། དེ་གཞན་དབང་གི་༼ནི༷་༽དོན་དམ་དུ་མི་རུང་བ་ལ་སོགས་པའི་སྐྱོན་དུ་མ་གོང་དུ་བརྗོད་ཟིན་ཏོ། །དབུ་མ་ཐལ་འགྱུར་བ་དག་ནི་སོ་སོ་སྐྱེ་བོའི་བློ་ཐམས་ཅད་ནི་ཀུན་རྫོབ་འབའ་ཞིག་ཡིན་ལ། འཕགས་པ་གསུམ་གྱི་མཉམ་གཞག་ནི་དོན་དམ་པ་ཡིན། རྗེས་སྤྱོད་ཀུན་རྫོབ་ཀྱི་བློ་ཡིན་ནོ། །སངས་རྒྱས་ནི་དུས་རྟག་ཏུ་མཉམ་པར་གཞག་པ་ཡིན་པས་དོན་དམ་པ་འབའ་ཞིག་གོ་ཞེས་ཟེར་རོ། །དེའང་ཡང་དག་པ་མ་ཡིན་ཏེ། སངས་རྒྱས་རྣམས་ནི་མི་གནས་པའི་མྱ་ངན་ལས་འདས་པ་ལ་བཞུགས་པ་མ་ཡིན་པར་ཐལ་བར་འགྱུར་བའི་སྐྱོན་ཡོད་དོ། །ཡང་སློབ་དཔོན་ཟླ་གྲགས་ཉིད་ཀྱིས་ཀྱང་། རིགས་པ་དྲུག་ཅུ་པའི་འགྲེལ་པ་ལས། བདེན་པ་གཉིས་སུ་འཇོག་པ་ནི། འཇིག་རྟེན་པའི་བློ་ལ་ལྟོས་ཏེ་འཇོག་གོ་ཞེས་དམ་བཅས་པ་འགལ་བར་འགྱུར་བའི་སྐྱོན་ཡོད་དོ། །ཡང་དབུ་མ་རང་རྒྱུད་པ་དག་སོ་སོའི་སྐྱེ་བོའི་དུས་ནས་ཆོས་ཅན་ཤེས་པའི་བློ་ཐམས་ཅད་ཀུན་རྫོབ་ཀྱི་བློ་ཡིན་ལ། ཆོས་ཉིད་ཤེས་པ་དེའང་ཀུན་རྫོབ་ཡིན་མོད་ཀྱང་རིགས་པས་སྐྱེ་མེད་དུ་ཤེས་པ་དེ་ཆོས་ཉིད། སྐྱེ་མེད་དུ་ཤེས་པའི་སངས་རྒྱས་ཀྱི་ཐུགས་དང་ཆ་འདྲ་བས་མཐུན་པའི་དོན་དམ་ཞེས་བྱའོ། །འཕགས་པ་གསུམ་གྱི་ཤེས་པ་ནི་མཉམ་གཞག་དོན་དམ་ཡིན་ལ། རྗེས་སྤྱོད་ཀུན་རྫོབ་ཡིན་ནོ། །སངས་རྒྱས་ཀྱི་ཐུགས་རྣམ་པར་མི་རྟོག་པ་ནི་དོན་དམ་པ་ཡིན་ལ། དག་པ་འཇིག་རྟེན་པའི་ཡེ་ཤེས་ནི་ཡེ་ཤེས་ལ་དམིགས་ནས་རྣམ་གྲངས་ཀྱི་ཀུན་རྫོབ་ཡིན་ནོ། །དེས་ན་མི་གནས་པའི་མྱ་ངན་ལས་འདས་པའང་ཡིན་ལ། ཡེ་ཤེས་རེས་འཇོག་ཏུ་མི་བཏུབ་པས་དོན་དམ་སྟེ། རྟག་ཏུ་མཉམ་པར་གཞག་པའང་ཡིན་ཏེ། འདི་ལའང་མཐུན་པའི་དོན་དམ་པ་དེ་ལ་དོན་དམ་པ་ཉིད་དུ་གོལ་བར་མི་བྱའོ། །གཉིས་པ་བློ་དེ་ལ་ལྟོས་ནས་ཡུལ་བདེན་པ་གཉིས་སུ་གཞག་པ་ལ་གསུམ་སྟེ། བློ་ངོ་གཉིས་ལ་ལྟོས་ནས་ཡུལ་བདེན་པ་གཉིས་སུ་དབྱེ་བ་དང་། གཉིས་པོ་དེའི་གཅིག་པ་དང་ཐ་དད་པ་བསམ་པ་དང་། གྲངས་ངེས་པ་གཞག་པའོ། །དང་པོ་ལ་གསུམ། དབྱེ་བའི་གཞི་དང་། དབྱེ་བའི་དོན་དང་། དེ་ལ་རྩོད་པ་སྤང་བའོ། །དང་པོ་ནི། ཧེ་བཛྲ་ལས། འདི་ཉིད་འཁོར་བ་ཞེས་བྱ་སྟེ། །འདི་ཉིད་མྱ་ངན་འདས་པ་ཉིད། །འཁོར་བ་སྤངས་ནས་གཞན་དུ་ནི། །མྱ་ངན་འདས་པ་རྟོགས་མི་འགྱུར། །ཞེས་གསུངས་པས། དབྱེ་བའི་གཞི་འཇིག་རྟེན་པའི་བློ་ཉིད་དེ། འདི་ཉིད་ཅེས་འབྱུང་བའི་ཕྱིར་རོ། །ཟླ་བ་གྲགས་པས་ཀྱང་། བདེན་པ་གཉིས་སུ་འཇོག་པ་ནི་འཇིག་རྟེན་པའི་བློ་ལ་ལྟོས་ཏེ་འཇོག་གོ་ཞེས་བཤད་དོ། །འོ་ན། དོན་དམ་བློ་ཡི་སྤྱོད་ཡུལ་མིན། །ཞེས་པ་དང་འགལ་ལོ་ཞེ་ན་མི་འགལ་ཏེ། བློ་དེ་ཉིད་ལ་ཀུན་རྫོབ་སྒྲུབ་ལ་དོན་དམ་འགེགས་པའི་ཚུལ་གྱིས་དབྱེ་གཞིར་བྱེད་པའི་ཚུལ་ལོ། །གཉིས་པ་དབྱེ་བའི་དོན་ནི། ཀྱེའི་རྡོ་རྗེ་ལས། རྨོངས་ཕྱིར་འཁོར་བའི་གཟུགས་ཅན་ཉིད། །རྨོངས་མེད་འཁོར་བ་དག་པས་ན། །འཁོར་བ་མྱ་ངན་འདས་པར་འགྱུར། །བྱང་ཆུབ་སེམས་ནི་མྱ་ངན་འདས། །ཀུན་རྫོབ་དོན་དམ་ཚུལ་ཅན་ནོ། །ཞེས་གསུངས་སོ། །དེ་ལ་རྨོངས་པ་ནི་བློ་ཀུན་རྫོབ་པ་སྟེ། མ་དཔྱད་པའི་བློའམ་སྒྲིབ་པ་དང་བཅས་པའི་བློའོ། །དེའི་ཡུལ་དུ་བདེན་པས་ཀུན་རྫོབ་ཀྱི་བདེན་པ་སྟེ། འཁོར་བའི་གཟུགས་ཅན་ཞེས་བྱ་བ་ནི་ཀུན་རྫོབ་ཀྱི་བདེན་པའི་མིང་གི་རྣམ་གྲངས་སོ། །དེ་སྐད་དུ། དབུ་མ་ལ་འཇུག་པ་ལས། གཏི་མུག་རང་བཞིན་ཏེ་སྟོང་ཉིད་མཐོང་བ་ལ་སྒྲིབ་པའི་ཕྱིར་ཀུན་རྫོབ་སྟེ། །གཏི་མུག་དེས་གང་ཞིག་བཅོས་མ་རྟེན་ཅིང་འབྲེལ་བར་འབྱུང་ཡིན་པ་ལ་ངོ་ཤེས་པར་བྱིས་པ་ལ་བདེན་པར་སྣང་དེ་ནི། །ཀུན་རྫོབ་བདེན་ཞེས་ཐུབ་པས་༼པ༽་དེ༷་༼དེས་༽གསུངས་ཏེ་གསུངས་པའི་ཕྱིར་རོ། །བདེན་པར་མི་འཛིན་པར་བཅོས་མར་གྱུར་པའི་བདེན་པ་༼དངོ༷ས་རྣ༷མས་༽ཀུན་རྫོབ་ཙམ་ཏུ༼འོ་༷༽གསུངས་ཏེ། །སོ་སྐྱེ་རྣམས་ལ་གཟུགས་བརྙན་སོགས་སྣང་བ་དང་། འཕགས་པའི་རྗེས་ཐོབ་ཀྱི་སྣང་བ་ལ་བདེན་པར་མི་འཛིན་པས་སོ། །ཞེས་སོ། །དེ་ལ་ཀུན་རྫོབ་ཀྱི་བདེན་པ་དེ་ཉིད་གང་ཡིན་སྙམ་ན། འཁོར་བ་གཟུགས་དང་སྒྲ་ལ་སོགས། །འཁོར་བ་ཚོར་བ་ལ་སོགས་པ། །འཁོར་བ་དབང་པོ་རྣམས་ཉིད་དེ། །འཁོར་བ་ཞེ་སྡང་ལ་སོགས་པ། །ཞེས་བྱ་སྟེ། མདོར་ན་ཆོས་ཅན་མས་སོ། །དེ་ལ་དོན་དམ་པའི་བདེན་པ་ནི། རྨོངས་མེད་ཅེས་བྱ་སྟེ་བློ་ཕྱིན་ཅི་མ་ལོག་པའོ། །དེའི་ཡུལ་བདེན་པ་ནི་འཁོར་བ་དག་པ་སྟེ། མྱ་ངན་ལས་འདས་པ་ཞེས་བྱ་བའི་དོན་ཏོ། །མྱ་ངན་ལས་འདས་པ་ནི་དོན་དམ་པའི་མིང་གི་རྣམ་གྲངས་སོ། །དེ་ལ་མྱ་ངན་ལས་འདས་པ་དེ་ཉིད་གང་ཡིན་སྙམ་ན། འདི་རྣམས་ཆོས་ནི་མྱ་ངན་འདས། །ཞེས་སོ། །དེའི་ཆོས་ཉིད་དེ་ཇི་ལྟ་བུ་སྙམ་ན། གང་དུའང་གྲུབ་པ་མེད་པ་དེ་ཡིན་ཏེ། དབུ་མ་ལས། མ་སྐྱེས་པ་དང་མ་འགགས་པར། །ཆོས་ཉིད་མྱ་ངན་འདས་དང་མཚུངས། །ཞེས་པ་དང་། གང་ལ་བརྟེན་ནས་གང་བྱུང་བ། །དེ་ནི་རེ་ཞིག་དེ་ཉིད་མིན། །ཞེས་སོ། །གསུམ་པ་དེ་ལ་རྩོད་པ་སྤང་བ་ནི། དེ་ལྟ་བུའི་ཆོས་ཉིད་དེ་བློ་དོན་དམ་པའི་ཡུལ་དུ་བདེན་པས་དོན་དམ་གྱི་བདེན་པ་ཞེས་བྱ་ན། བློ་དོན་དམ་པ་ཞེས་བྱ་བ་དེ་གོང་དུ་མང་དུ་བཤད་ན། སོ་སོ་སྐྱེ་བོའི་བློ་དོན་དམ་པ་ཡིན་ནམ་འཕགས་པའི་བློ་དོན་དམ་པ་ཡིན་ནས་དེའི་ཡུལ་དུ་བདེན་པ་ཡིན་ནམ་ཡང་ན་བློའི་ཡུལ་གང་ཡང་མ་ཡིན། དེ་ལ་སོ་སོའི་སྐྱེ་བོའི་བློ་དོན་དམ་པ་ཡིན་ན་འཇིག་རྟེན་པའི་བློས་ཡོད་པའམ་མེད་པའམ་གཉིས་གའམ་གཉིས་ག་མ་ཡིན་པ་ཅིག་ལས་འཛིན་མི་ཤེས་པས་དེ་དག་དོན་དམ་པའི་བདེན་པར་ཡང་མི་འགྱུར་ལ། གལ་ཏེ་འཇིག་རྟེན་ཚད་མ་ཉིད་ཡིན་ན། །འཇིག་རྟེན་དེ་ཉིད་མཐོང་ཡིན་འཕགས་གཞན་གྱིས། །ཅི་དགོས་འཕགས་པའི་ལམ་གྱིས་ཅི་བྱར་ཡོད། །བླུན་པོ་ཚད་མར་གྱུར་པ་ག་ལ་ཡོད། །ཅེས་མདོ་ལས་༼ད༷བུ་མ༷་ལ༷་འཇུག༷་པ༷་ལ༷ས་༽བཤད་པ་དང་ཡང་འགལ་ལོ། །ཡང་འཕགས་པ་རྣམས་ཀྱི་ཐུགས་ཀྱི་ཡུལ་དོན་དམ་པའི་བདེན་པ་ཡིན་ན་ནི་མདོ་ལས། ལྷའི་བུ་དོན་དམ་པའི་བདེན་པ་ནི་རྣམ་པ་ཐམས་ཅད་ཀྱི་མཆོག་དང་ལྡན་པ་ཐམས་ཅད་མཁྱེན་པ་ཉིད་ཀྱི་ཡེ་ཤེས་ཀྱི་ཡུལ་ལས་འདས་པ་ཡིན་ཏེ། ཇི་ལྟར་དོན་དམ་པའི་བདེན་པའོ་ཞེས་བརྗོད་པ་ལྟར་ནི་མ་ཡིན་ནོ། །ཞེས་གསུངས་པ་དང་འགལ་ལོ། །ཡང་དོན་དམ་པའི་བདེན་པ་དེ་བློ་གང་གིའང་ཡུལ་མ་ཡིན་ནོ་ཞེ་ན། འོ་ན་དེ་སྨོས་པ་དོན་མེད་པར་ཡང་འགྱུར་ལ། འཕགས་པ་ཀླུ་སྒྲུབ་ཀྱིས་ཀྱང་། མྱ་ངན་འདས་པ་བདེན་གཅིག་པུ། །དེ་ཚེ་ལྷག་མ་ཕུང་སོགས་ལོག་པའམ་རྫུན་པ་ཞེས། །རྒྱལ་བ་རྣམས་ཀྱིས་གང་གསུངས་པ། །མཁས་པ་ཅི་ཕྱིར་འདོད་མི་བྱེད། །ཅེས་གསུངས་པ་དང་འགལ་ལོ་ཞེ་ན། དེ་ནི་མ་ཡིན་ཏེ། སོ་སོ་སྐྱེ་བོའི་བློས་བརྟགས་པའི་སྟོང་པ་ཉིད་དང་སྐྱེ་མེད་ལ་སོགས་པ་དེ་དོན་དམ་པའི་བདེན་པ་མ་ཡིན་ཏེ། གལ་ཏེ་མི་སྟོང་ཅུང་ཟད་ཡོད། །སྟོང་པའང་ཅུང་ཟད་ཡོད་པར་འགྱུར། །མི་སྟོང་ཅུང་ཟད་མེད་པས་ན། །སྟོང་པའང་ཡོད་པར་ག་ལ་འགྱུར། །ཞེས་གསུངས་སོ། །དེའང་འོན་ཀྱང་དོན་དམ་པ་སྐྱེ་བའི་རྒྱུ་ཡིན་པས། རྣམ་གྲངས་ཀྱི་དོན་དམ་པའོ། །དེ་ལ་འཕགས་པ་རྣམས་ཀྱི་ཐུགས་ནི་དོན་དམ་པ་ཡིན་ལ། དེའི་ཡུལ་སྐྱེ་བ་དང་འགག་པ་མེད་པ་སྤྲོས་པ་དང་བྲལ་བ་ནི་དོན་དམ་པའི་བདེན་པའོ། །འོ་ན་མདོ་ལས། དོན་དམ་པའི་བདེན་པ་ནི་རྣམ་པ་ཐམས་ཅད་མཁྱེན་པའི་ཡེ་ཤེས་ཀྱི་ཡུལ་ལས་འདས་པའོ་ཞེས་གསུངས་སོ་ཞེ་ན། བདེན་མོད། ཡུལ་དང་ཡུལ་ཅན་གྱི་ཚུལ་གྱིས་ཤེས་པ་མ་ཡིན་ཏེ། སློབ་དཔོན་ཟླ་གྲགས་ཀྱིས། གང་ཚེ་ཆོས་ཉིད་སྐྱེ་མེད་ཡིན་ཞིང་བློའང་སྐྱེ་བ་དང་བྲལ་བ། །དེ་ཚེ་སྐྱེས་མེད་དའེ་རྣམ་ིཔ་བསྟན་ེཔ་ལས་རྣལ་འབྱར་ོཔའ་བླ་ད་ཡ་ིེོིདེ་ཉིད་རྟོགས་པ་ལྟ་བུ་སྟེ། །དཔེར་ན་ཇི་ལྟར་སེམས་ནི་གང་གི་རྣམ་པ་ཅན་དུ་གྱུར་པས་དེ་ཡི་ཡུལ། །དེ་ཡོངས་ཤེས་པ་དེ་བཞིན་ཐ་སྙད་བརྟེན་ནས་ཤེས་པ་ཡིན། །ཞེས་གསུངས་ཏེ། གང་དུའང་མ་གྲུབ་པ་དེ་ཉིད་ལ་རྟོགས་ཞེས་བྱའོ། །དེ་ལྟ་བུ་དེ་ཉིད་ལ་མྱ་ངན་ལས་འདས་པ་ཞེས་བྱའོ། །ཆོས་ཉིད་འདུས་མ་བྱས་ཞེས་བྱའོ། །དེ་ཉིད་ལ་འཕགས་པ་ཉན་ཐོས་དག་མྱ་ངན་ལས་འདས་པ་ཞེས་བྱ་བ་ཞིག་གྲུབ་པར་འདོད་དོ། །དེ་ལྟར་དུ་ད་ལྟ་བོད་ཀྱི་དབུ་མ་པ་ཕལ་ཆེར་ཡང་འདོད་དོ། །ཡང་དག་པ་མ་ཡིན་ཏེ་སྔར་ཡང་སུན་ཕྱུང་ལ། སྟོང་མིན་སྟོང་པ་མིན་པའང་མིན། །ཞེས་བྱ་བའི་སྐབས་སུ་དགག་པར་བྱའོ། །འོ་ན་ད་ལྟ་སྐྱེ་མེད་ལ་སོགས་པ་དེ་ལྟ་བུ་ཤེས་པའི་བློ་དེ་གང་ཡིན་ཞེ་ན། དེ་ནི་ཡང་དག་པ་མ་མཐོང་བའི་བློ་སྟེ། ཡང་དག་མ་མཐོང་འཇིག་རྟེན་དང་། །མྱ་ངན་འདས་པར་རློམ་སེམས་ཏེ། །ཞེས་གསུངས་ཏེ་སོ་སོ་སྐྱེ་བོའི་བློ་དེའི་ཡུལ་དོན་དམ་པའི་བདེན་པར་བརྟགས་པ་དེ་དོན་དམ་པའི་བདེན་པ་ཉིད་མ་ཡིན་ཏེ། ཀུན་རྫོབ་ཀྱི་བདེན་པ་ལ་ལྟོས་ཏེ་བཞག་པས་སྒྱུ་མ་ལྟ་བུ་ཀུན་རྫོབ་ཉིད་ཡིན་པར་མདོ་ལས། རབ་འབྱོར་མྱ་ངན་ལས་འདས་པའང་རྨི་ལམ་ལྟ་བུ་སྒྱུ་མ་ལྟ་བུའོ་ཞེས་གསུངས་སོ། །འོ་ན་གལ་ཏེ་དོན་དམ་གྱི་བདེན་པ་བློའི་སྤྱོད་ཡུལ་མ་ཡིན་ན། མདོ་ལས། དགེ་སློང་འདི་ལྟ་སྟེ། མི་བསླུ་བའི་ཆོས་ཅན་མྱ་ངན་ལས་འདས་པ་འདི་ནི་བདེན་པའི་མཆོག་གཅིག་པུའོ་ཞེས་གསུངས་པ་འདི་ཇི་ལྟར་དྲང་ཞེ་ན། དེ་བཞིན་གཤེགས་པའི་རྣམ་པར་མི་རྟོག་པ་བརྙེས་པ་ན་དེ་ལ་འཁོར་བ་མེད་པའི་ཕྱིར་བདེན་པ་གཅིག་པུ་ཞེས་བྱ་ལ། འཁོར་བ་མེད་པས་མྱ་ངན་ལས་འདས་པ་ཉིད་ཀྱང་མ་གྲུབ་པས་ན། འཕགས་པ་ཀླུ་སྒྲུབ་ཀྱིས་ཀྱང་། འཁོར་བ་སྤངས་པར་གྱུར་པ་ཡིས། །མྱ་ངན་འདས་ཁྱོད་མི་བཞེད་ཀྱི། །འཁོར་བ་མི་དམིགས་པ་ཡིས་ནི། །ཞི་ཉིད་མགོན་པོ་ཁྱོད་ཀྱིས་བསྟན། །ཞེས་གསུངས་པ་དང་། རིགས་པ་དྲུག་ཅུ་པ་ལས་ཀྱང་། ཡང་དག་མཐོང་བ་འཇིག་རྟེན་དང་། །མྱ་ངན་འདས་པར་རློམ་སེམས་མེད། །ཅེས་གསུངས་སོ། །ཡང་། དངོས་དང་དངོས་མེད་ཡོངས་ཤེས་ནས། །ཟད་པ་མྱ་ངན་འདས་ཞེས་བྱ། །ཞེས་གསུངས་པས་ན། དེ་ལྟ་བུ་དེ་ལ་གང་གིའང་གནོད་པ་མེད་པས་དེས་ན་དོན་དམ་པར་བདེན་པ་སྟེ་གཅིག་པུའོ། །ཡང་ད་ལྟ་དེ་ལྟ་བུ་ཤེས་པ་དེ་ཉིད་དོན་དམ་སྐྱེ་བའི་རྒྱུ་ཡིན་པས། རྣམ་གྲངས་ཀྱི་དོན་དམ་པའི་བདེན་པ་ཞེས་བྱ་སྟེ། དེ་ལྟར་མི་བསླུ་བས་ན་དོན་དམ་པའི་བདེན་པ་ཞེས་བཏགས་ཏེ་བཞག་གོ། གཉིས་པ་བདེན་པ་གཉིས་པོ་དེའི་གཅིག་པ་དང་ཐ་དད་པ་བསམ་པ་ནི། གལ་ཏེ་བློ་ཀུན་རྫོབ་པའི་ཡུལ་ནི་ལོགས་ཤིག་ཡིན་ལ། བློ་དོན་དམ་པའི་ཡུལ་ནི་ལོགས་ཤིག་ཡིན་ཏེ། དངོས་པོ་ཐ་དད་པ་ཡིན་ནམ། འོན་ཏེ་དེ་གཉིས་གཅིག་པའི་ཐ་དད་གཏན་མེད་ཡིན་ནམ། གཅིག་པ་བཀག་པའི་ཐ་དད་ཡིན་ནམ། ལྡོག་པས་ཕྱེ་བའི་ཐ་དད་ཡིན་སྙམ་ན། དང་པོ་དངོས་པོ་ཐ་དད་མ་ཡིན་ཏེ། དགོངས་པ་ངེས་པར་འགྲེལ་པ་ལས། ཐ་དད་ལས་གསུངས་པའི་སྐྱོན་བཞི་ནི། ཆོས་ཅན་དང་ཆོས་ཉིད་མ་ཡིན་པར་ཐལ་བ་དང་། ཀུན་རྫོབ་ཡང་དག་པར་མ་གྲུབ་པ་ཙམ་དོན་དམ་པ་མ་ཡིན་པར་ཐལ་བ་དང་། དོན་དམ་བསྒོམས་པས་དམིགས་པའི་མཚན་མ་ཟིལ་གྱིས་མི་ནོན་པར་ཐལ་བ་དང་། ཀུན་ནས་ཉོན་མོངས་པ་དང་རྣམ་པར་བྱང་བ་དུས་གཅིག་པར་ཐལ་བའོ། །གཉིས་པ་གཅིག་པའི་ཕྱོགས་ཐ་དད་གཏན་མེད་ལ་བཞི། ཀུན་རྫོབ་ཞིན་དོན་དམ་སྒྲིབ་པའི་དམིགས་པར་ཐལ་བ་དང་། ཀུན་རྫོབ་ལྟར་དོན་དམ་མཐོང་ཐོས་ལས་བཙལ་དུ་ཡོད་པར་ཐལ་༼བ༷་ད༷ང་༽། ཀུན་རྫོབ་མཐོང་བ་ན་དོན་དམ་མཐོང་བར་ཐལ་བ་དང་། དོན་དམ་ལྟར་ཀུན་རྫོབ་ལ་དབྱེ་བ་མེད་པར་ཐལ་བའོ། །འོག་མ་གཅིག་པ་བཀག་པའི་ཐ་དད་དང་ལྡོག་པ་ཐ་དད་གཉིས་པོ་སྐྱོན་དེ་དག་མི་འཇུག་སྟེ། དེའང་རྒྱུད་ལས། འཁོར་བ་སྤངས་ནས་གཞན་དུ་ནི། །མྱ་ངན་འདས་པ་རྟོགས་མི་འགྱུར། །ཞེས་གསུངས་ཏེ། ཡུལ་གཅིག་ཉིད་ལ་བློ་མི་༼བློའི༷་༽འཇུག་པས་ཐ་དད་དོ། །དེའི་དཔེ་དབུ་མ་འཇུག་པ་ལས། རབ་རིབ་མཐུ་ཡིས་སྐྲ་ཤད་ལ་སོགས་པའི། །ངོ་བོ་ལོག་པ་གང་ཞིག་རྣམ་བརྟགས་པ། །དེ་ཉིད་བདག་ཉིད་གང་གི་༼དུ༷་༽མིག་དག་པས། །མཐོང་དེ་དེ་ཉིད་དེ་བཞིན་འདིར་ཤེས་གྱིས། །ཞེས་སོ། །གསུམ་པ་བདེན་པ་གཉིས་ཀྱི་གྲངས་ངེས་པ་ནི། སྤྱིར་མི་རྟག་སོགས་བདེན་པ་བཅུ་དྲུག་ཀྱང་གསུངས། རང་སྤྱིའི་མཚན་ཉིད་ཀྱི་བདེན་པ་དང་། རྣམ་པར་དབྱེ་བའི་བདེན་པ་ལ་ཕུང་ཁམས་སྐྱེ་མཆེད་ཕྱེ་སྟེ་རྟོགས་པའི་བདེན་པ། ལུས་སེམས་ལ་གནོད་པ་དངོས་པོའི་བདེན་པ། ཉིང་མཚམས་ལ་རབ་ཏུ་སྐྱེ་བའི་བདེན་པ། ཟད་པ་དང་མི་སྐྱེ་བ་ཤེས་པའི་བདེན་པ། ལམ་ཤེས་ལ་འཇུག་པའི་བདེན་པ་བྱང་སེམས་ཀྱི་བྱ་བ་བསྒྲུབ་པ་ནས་སངས་རྒྱས་མངོན་རྟོགས་ལྗོན་ཤིང་གི་ཡི་གེ་དག་བཅོས་དང་མཆན་བུ། ཡེ་ཤེས་འབྱུང་བའི་བར་གྱི་བདེན་པ་སོགས་པ་བརྒྱད་ཀྱང་གསུངས། བདེན་པ་བཞིའང་གསུངས། བདེན་པ་གཉིས་ཀྱང་གསུངས། བདེན་པ་གཅིག་ཀྱང་གསུངས་༼ན༷༽། གཉིས་པ་ཁོ་ནར་གྲངས་ཇི་ལྟར་ངེས་སྙམ་ན། ཧེ་བཛྲ་ལས། རྨོངས་ཕྱིར་འཁོར་བའི་གཟུགས་ཅན་ཉིད། །རྨོངས་མེད་འཁོར་བ་དག་པ་སྟེ། །འཁོར་བ་མྱ་ངན་འདས་པར་འགྱུར། །ཀུན་རྫོབ་དོན་དམ་ཚུལ་ཅན་ནོ། །ཞེས་གསུངས་པས་ན་བློ་ལ་རྨོངས་མ་རྨོངས་གཉིས་སུ་ངེས་ལ། དེའི་ཡུལ་ལ་དཔྱད་བཟོད་མི་བཟོད་གཉིས་སུ་ངེས་པས་བདེན་པ་གཉིས་སུ་གྲངས་ངེས་སོ། །ཡང་ན་བློ་ཕྱིན་ཅི་ལོག་མ་ལོག་དངོས་འགལ་ཡིན་པས་དེའི་ཡུལ་ཡང་གཉིས་སུ་ངེས་སོ། །སྤྱི་དོན་གསུམ་པ་མཚན་གཞི་ངེས་པར་བྱེད་པའི་ཚད་མ་ནི་ད་ལྟ་ཐ་སྙད་པའི་བློས་གང་དང་གང་ལ་རིགས་པས་བརྟགས་ན་དེ་འཇིག །མ་བརྟགས་ན་དེར་བདེན་པ་ནི་ཀུན་རྫོབ་ཀྱི་བདེན་པའི་མཚན་གཞི་ཡིན་ལ། ནམ་ཡང་གནོད་པ་མེད་པའི་ངོ་བོར་གྲུབ་པ་ནི་དོན་དམ་པའི་བདེན་པའི་མཚན་གཞིའོ། །དེའི་རིགས་པ་ནི་འོག་ནས་འཆད་པ་རྣམས་ཡིན་ནོ། །དེ་ལྟ་བུའི་བདེན་པ་གཉིས་མདོར་བསྟན་ནས། དེའི་ངོ་བོ་ཤེས་པར་བྱེད་པའི་རིགས་པ་བསྟན་པའི་སྒོ་ནས་མཐའ་བྲལ་གྱི་ལྟ་བ་གཏན་ལ་དབབ་པ་རྒྱས་པར་བཤད་པ་ལ་གསུམ་སྟེ། ཐམས་ཅད་ཡོད་པར་བསྟན་པ་དེ་ཀུན་རྫོབ་ཀྱི་བདེན་པར་གཏན་ལ་ཕབ་པས་དངོས་པོར་སྨྲ་བ་དང་ཚུལ་མཚུངས་ཤིང་ཁྱད་པར་དུ་འཕགས་པར་བསྟན་པ་དང་། ཐམས་ཅད་མེད་པར་བསྟན་པ་དེ་ཤེས་རབ་ཀྱི་བློ་ཡུལ་དུ་བསྟན་པས་ཐེག་པ་ཆེན་པོ་སྤྱི་དང་མཚུངས་ཤིང་ཁྱད་པར་དུ་འཕགས་པར་བསྟན་པ་དང་། དེས་ན་གཉིས་མེད་ཀྱི་བློས་མཐའ་བྲལ་དུ་གཏན་ལ་ཕབ་ལ་ཟུང་འཇུག་ཉམས་སུ་བླང་བ་བསྟན་པའོ། །དང་པོ་ལ་གཉིས། ཕུང་པོ་དང་ཁམས་དང་སྐྱེ་མཆེད་དུ་བཤད་པས། ཉན་ཐོས་སྡེ་པ་དང་མཚུངས་ཤིང་མུ་སྟེགས་བྱེད་ལས་ཁྱད་པར་དུ་འཕགས་པ་དང་། ཡུལ་སྣང་ལ་རང་བཞིན་མེད་པ་དང་། སྣང་བ་སེམས་སུ་བསྟན་པས། སེམས་ཙམ་པ་དང་ཚུལ་མཚུངས་ཤིང་། ཉན་ཐོས་ལས་ཁྱད་པར་དུ་འཕགས་པར་བསྟན་པའོ། །དང་པོ་ནི། བརྟག་པ་ཕྱི་མའི་ལེའུ་གསུམ་པ་ལས། ཕྱིའི་ཡུལ་དང་ནང་གི་ཡུལ་ཅན་དག་གིས་ནི། །སྐྱེ་མཆེད་བཅུ་གཉིས་དག་ཏུ་འགྱུར། །ཕུང་པོ་ལྔ་ནི་གཟུགས་ལ་སོགས་པ་ནས། །མཐར་ནི་རྣམ་ཤེས་ཀྱི་ཕུང་པོའི་སྙིང་རྗེ་ཆེ་ཞེས་པ་བོད་པའོ། །དབང་པོའི་ཁམས་དྲུག་དང་ནི་ཕྱི་ཡུལ་གྱི་ཁམས་དྲུག་ཉིད་དང་། །དབང་པོའི་རྣམ་པར་ཤེས་པའི་ཁམས་དྲུག་ཉིད། །རྣལ་འབྱོར་པ་༼མ༷་༽རྣམས་གོ་བྱའི་ཕྱིར། །ཁམས་ནི་བཅོ་བརྒྱད་དག་ཏུ་བཤད། །ཅེས་གསུངས་སོ། །དེ་ལྟ་བུའི་ཕུང་པོ་དང་ཁམས་དང་སྐྱེ་མཆེད་བཤད་པ་ནི་འཕགས་པ་ཉན་ཐོས་རྣམས་དང་མཚུངས་ལ། ཡང་དེས་མུ་སྟེགས་བྱེད་ལས་ཁྱད་པར་དུ་འཕགས་ཏེ། མུ་སྟེགས་བྱེད་ཀྱི་ལྟ་བ་ཐམས་ཅད་ནི་བདག་རྟག་པ་དང་གཅིག་པུར་འཛིན་པ་ལས་གྱུར་པ་ཡིན་ཏེ། སློབ་དཔོན་ཐོགས་མེད་ཀྱིས་ཀྱང་གསུངས་པ། མུ་སྟེགས་བྱེད་ཀྱི་ལྟ་བ་གང་ཇི་སྙེད་ཅིག་ཡོད་པ་དེ་དག་ཐམས་ཅད་ནི་བདག་ཏུ་འཛིན་པ་ལས་བྱུང་བ་ཡིན་ནོ་ཞེས་གསུངས་སོ། །དེ་དག་གི་གཉེན་པོར་བཅོམ་ལྡན་འདས་ཀྱིས་ཕུང་པོ་ཁམས་དང་སྐྱེ་མཆེད་གསུངས་ཏེ། དེ་ཡང་རིལ་པོ་ལ་བདག་ཏུ་འཛིན་པའི་གཉེན་པོར་ཕུང་པོ་ལྔ་བཤད་པས། དུ་མ་ལ་གཅིག་ཏུ་སྒྲོ་བཏགས་པ་ལས་གཅིག་མེད་པར་བསྟན་ཏོ། །གཟུགས་ལ་བདག་ཏུ་འཛིན་པའི་གཉེན་པོར་སྐྱེ་མཆེད་བཅུ་གཉིས་བཤད་པས། རྣམ་པར་ཤེས་པ་སྐྱེ་བ་ཉིད་དུ་གྲུབ་པས་རྟག་པ་ཉིད་སུན་ཕྱུང་ངོ་། །གཟུགས་དང་སེམས་གཉིས་ལ་བདག་ཏུ་འཛིན་པའི་གཉེན་པོར་ཁམས་བཅོ་བརྒྱད་ཤེས་པས་རིགས་ཐམས་ཅད་ཁམས་སུ་གྲུབ་པས། ཕྱི༼སྤྱི༷༷་༽ཉིད་མེད་པར་བསྟན་ཏོ། །དེ་ལྟར་ན་ཡུལ་ཤེས་བྱ་ཕུང་པོ་དང་ཁམས་དང་སྐྱེ་མཆེད་ལ་སོགས་པ་༼ལ༷ས་༽གུད་ན་མེད་པས། བདག་འགའ་ཡང་མེད་པར་གྲུབ་པས་ཁྱད་པར་དུ་འཕགས་པར་འགྲུབ་བོ། །སྤྱི་དོན་གཉིས་པ་འོ་ན་ཕུང་པོ་དང་ཁམས་དང་སྐྱེ་མཆེད་ཅེས་བྱ་བ་རྡུལ་ཕྲན་དང་སྐད་ཅིག་མ་དོན་དམ་དུ་བདེན་པར་ཡོད་དམ་ཞེ་ན། དེ་ནི་མ་ཡིན་ཏེ། ཡུལ་སྣང་ལ་རང་བཞིན་མེད་པ་དང་། སྣང་བ་སེམས་སུ་གཏན་ལ་དབབ་པས་སེམས་ཙམ་དང་མཚུངས་ཤིང་ཉན་ཐོས་ལས་ཁྱད་པར་འཕགས་པར་བསྟན་པ་ནི། རྩ་རྒྱུད་ཕྱི་མའི་ལེའུ་གསུམ་པ་ལས། རང་བཞིན་གདོད་ནས་མ་སྐྱེས་པ་ཡིན་པས། །བདེན་པ་མིན་ཞིང་སྣང་ཙམ་མ་འགགས་པས་རྫུན་པ་མིན་པ་དེ་བཞིན་དུ། །ཐམས་ཅད་ཆུ་ཡི་ཟླ་བ་ལྟར་དུ། །འདོད་པས་རྣལ་འབྱོར་མས་ཤེས་པར་གྱིས། །ཞེས་གསུངས་ཏེ། སྣང་ཚོད་དུ་གྲུབ་པས་བརྫུན་པ་མིན་ཀྱང་། དེ་ཐམས་ཅད་ཀྱང་རྡུལ་ཕྲ་རབ་གཅིག་ལ་རྡུལ་དྲུག་འདུས་པའི་རིགས་པ་དང་། སྐད་ཅིག་མ་འམ་༼དེ༷་༽སྐད་ཅིག་མར་ཆ་ཕྱེ་བའི་རིགས་པས་བརྟགས་ན་རྡུལ་དང་སྐད་ཅིག་མ་མི་རྙེད་པས་ན་བདེན་པ་མིན་ཞེས་བྱ་བའི་དོན་ཏོ། །འོ་ན་དེ་དག་ཇི་ལྟ་བུ་ཞེ་ན། སློབ་དཔོན་འཕགས་པས། བྱང་ཆུབ་ཀྱི་སེམས་ཀྱི་འགྲེལ་པ་ལས་གསུངས་པ། གཟུགས་ནི་ཉམ་ཆུང་བས་དབུ་བ་རྡོས་པ་འདྲ། །ཚོར་བ་བདེ་བ་ཆུང་བས་ཆུ་ཡི་ཆུ་བུར་བཞིན། །འདུ་ཤེས་མི་བརྟན་པས་སྨིག་རྒྱུ་དང་མཚུངས་ཤིང་། །འདུ་བྱེད་སྙིང་པོ་མེད་པས་ཆུ་ཤིང་དང་འདྲ་ལ། །རྣམ་ཤེས་བདག་མེད་པས་སྒྱུ་མ་ལྟ་བུ་ཞེས། །ཕུང་པོ་བསྟན་པ་དེ་ལྟ་བུ། །བྱང་ཆུབ་སེམས་དཔའ་རྣམས་ལ་བཤད། །ཅེས་གསུངས་སོ། །དེ་ལྟར་རང་བཞིན་གྱིས་དག་ན་སྣང་གྲགས་ཀྱི་ཆོས་འདི་རྣམས་གང་ལས་བྱུང་སྙམ་ན། སྣང་གྲགས་ཀྱི་ཆོས་ཐམས་ཅད་སེམས་སུ་གཏན་ལ་དབབ་པ་སྟོན་ཏེ། མདོ་ལས་ཀྱང་འདི་སྐད་དུ། ཀྱེ་རྒྱལ་བའི་སྲས་དག་ཁམས་གསུམ་པོ་འདི་དག་ནི་སེམས་ཙམ་མོ་ཞེས་གསུངས་ལ། དེ་ཉིད་རྡོ་རྗེ་གུར་གྱི་ལེའུ་དྲུག་པ་ལས་ཀྱང་། ལུང་འདི་ཀུན་གཞིའི་རྣམ་ཤེས་སྟོན་བྱེད་ཡིན་པས་དེའི་འབྲུ་སྣོན་ནི། རིན་ཆེན་སེམས་ཀུན་གཞི་གསལ་ཙམ་འདི་ལས་ཕྱིར་གྱུར་པའི། །སངས་རྒྱས་མེད་ཅིང་གང་ཟག་མེད། །རྣམ་པར་ཤེས་པའི་གནས་དབང་པོ་དོན་རྣམ་༼རྣ༷མས་༽ཡུལ་ཏེ་སེམས་ལས། །ཕྱི་རོལ་གྱུར་པ་ཅུང་ཟད་མེད། །དེ་ལྟ་བུའི་ཀུན་གཞི་དེ་ནི་ཆོས་རྣམས་ཀྱི་དབྱིངས་ཏེ་རྒྱུ་ཡིན་ལ་དེའི་ཐ་སྙད་ཀྱི་གནས་ལུགས་ནི་མཆོག་ཏུ་ཞི་བ་རང་རིག་གསལ་ཙམ། །འདི་ནི་རིན་ཆེན་སེམས་ཀུན་གཞི་ཞེས་སུ་བརྗོད་ད།ོ། ད་ེལམ་དུ་བྱས་ན་འདོད་དོན་འབྲས་བུ་དངོས་གྲུབ་ཐམས་ཅད་རབ་ཏུ་སྟར་ེབ། །ཀུན་གཞི་དེ་བདེན་པ་ཡིན་ནམ་ཞེ་ན། སེམས་དེ་ནི་དེ་ཁོ་ན་ཉིད་ཀྱི་མཚན་ཉིད་ཅན་རང་བཞིན་ཀྱིས་སྐྱེ་བ་མེད་ཅིང་དག་སྟེ་སྟོང་པ་ཡིན་ནོ། །འདི་རྗེ་བཙུན་གྱི་ཀུན་གཞི་ཡིག་ཆུང་ལྟར་འཆད་ཤེས་དགོས་སོ། །ཅེས་གསུངས་སོ། །
ཆོས་ཐམས་ཅད་སེམས་སུ་བསྡུ་བ།
དེ་ལྟར་ཚིགས་སུ་བཅད་པ་དེ་དག་གི་དོན་ནི་བཞིས་ཤེས་པར་བྱ་སྟེ། ཆོས་ཐམས་ཅད་སེམས་སུ་བསྡུ་བ། སེམས་ཀྱི་ཡོན་ཏན་དུ་བསྟན་པ་དང་། སེམས་ཀྱི་མཚན་ཉིད་བསྟན་པ་དང་། སེམས་ཀྱི་ནུས་པའི་མཐུ་བསྟན་པ་དང་། སེམས་ཀྱི་རང་བཞིན་བསྟན་པའོ། །དང་པོ་ནི། ཕྱི་རོལ་གྱུར་པ་ཅུང་ཟད་མེད། །ཅེས་པ་ཡན་ཆད་ཚིགས་སུ་བཅད་པ་གཅིག་སྟེ། སེམས་ཉིད་རང་བཞིན་གྱིས་འོད་གསལ་བ་གཅིག་ལས་མེད་ཀྱང་། ཐོག་མ་མེད་པའི་བག་ཆགས་ཀྱིས་ཀུན་ཏུ་དཀྲིས་པའི་དབང་གིས་སྣང་གྲགས་ཀྱི་ཆོས་ཐ་དད་དུ་མར་སྣང་སྟེ། དཔེར་ན་ཉི་མའི་དཀྱིལ་འཁོར་གཅིག་ལས་མེད་ཀྱང་ཡུལ་ཐ་དད་པར་སྣང་བ་ཐ་དད་པར་འཆར་བའམ། དམུས་ལོང་བརྒྱས་གླང་པོ་ཆེ་ལ་བྱུགས་པ་ལྟ་བུ་སྟེ། དེ་ཡང་ལང་ཀར་གཤེགས་པ་ལས་གསུངས་པ། བག་ཆགས་ཀྱིས་ནི་དཀྲུགས་པའི་སེམས། །དོན་དུ་སྣང་བ་རབ་ཏུ་འབྱུང་། །དོན་ཡོད་མ་ཡིན་སེམས་ཉིད་དེ། །ཕྱི་རོལ་དོན་མཐོང་ལོག་པ་ཡིན། །ཞེས་གསུངས་སོ། །གཉིས་པ་སེམས་ཀྱི་མཚན་ཉིད་ནི། ཆོས་ཀྱི་དབྱིངས་ནི་མཆོག་ཏུ་ཞི། །ཞེས་པས་བསྟན་ཏེ། ཆོས་ཀྱི་དབྱིངས་ནི་དྷརྨ་དྷཱ་ཏུ་སྟེ། དྷཱ་ཏུ་ནི་རྒྱུའམ་དབྱིངས་སམ་ཁམས་ལས་འདིར་རྒྱུ་སྟེ་འཁོར་འདས་ཀྱི་ཆོས་ཐམས་ཅད་ཀྱི་རྒྱུ་བྱེད་པས་ན་དབྱིངས་ཏེ་ཀུན་གཞིའི་རྣམ་པར་ཤེས་པའོ། །དེ་སྐད་དུ། ཐོག་མ་མེད་པའི་དུས་ཀྱི་དབྱིངས། །ཆོས་རྣམས་ཀུན་གྱི་གནས་ཡིན་ཏེ། །དེ་ཡོད་པས་ན་འགྲོ་ཀུན་དང་། །མྱ་ངན་འདས་པའང་འབྱུང་བ་ཡིན། །ཞེས་གསུངས་སོ། །དེ་ཉིད་མཆོག་ཏུ་ཞི་སྟེ། གཟུང་བྱ་ངོ་བོ་མེད་པས་དེ་ལ་ལྟོས་པའི་འཛིན་པ་མི་འགྲུབ་སྟེ། སློབ་དཔོན་དབྱིག་གཉེན་གྱིས། གཟུང་བ་མེད་པས་དེར་འཛིན་མེད། །ཅེས་གསུངས་སོ། །དེས་ན་རང་གསལ་བ་ཙམ་ཞེས་བྱ་བའི་དོན་ཏོ། །གསུམ་པ་སེམས་ཀྱི་ནུས་པའི་མཐུ་ནི། འདི་ནི་རིན་ཆེན་སེམས་སུ་བརྗོད། །འདོད་དོན་འབྲས་བུ་རབ་སྟེར་བ། །ཞེས་གསུངས་པ་སྟེ། དཔེར་ན་ཡིད་བཞིན་གྱི་ནོར་བུ་རིན་པོ་ཆེ་ལས་གང་འདོད་པའི་འབྲས་བུ་འབྱུང་བ་དང་འདྲ་བར་རང་གི་སེམས་ཉིད་ལ་ཐབས་ཀྱི་རྐྱེན་གྱིས་བསྐུལ་བས་དམན་པ་དང་འབྲིང་དང་མཆོག་གི་དངོས་གྲུབ་ཀྱི་འབྲས་བུ་ཐམས་ཅད་འབྱུང་བ་ཡིན་ནོ། །བཞི་པ་སེམས་ཀྱི་རང་བཞིན་བསྟན་པ་ནི། སེམས་ཉིད་དེ་ཉིད་རང་བཞིན་དག །ཅེས་པ་སྟེ། དེ་ལ་རང་བཞིན་ཞེས་པ་དང་། རང་བྱུང་ཞེས་པ་ནི་མིང་གི་རྣམ་གྲངས་ཏེ་རང་བཞིན་གྱིས་སྐྱེ་བ་མེད་པ་ཉིད་ཡིན་པས། གཞན་གྱི་དབང་ངམ་རྟེན་ཅིང་འབྲེལ་བར་འབྱུང་བ་ཉིད་ཡིན་ནོ་ཞེས་བྱ་བའི་དོན་ཏོ། །
ཤེས་རབ་དོན་དམ་གྱི་བསམ་པས་གཞལ་ན་ཐམས་ཅད་མེད་པ་ཉིད་དུ་བསྟན་པ།
སྤྱི་དོན་གཉིས་པ་ཤེས་རབ་དོན་དམ་གྱི་བསམ་པས་གཞལ་ན་ཐམས་ཅད་མེད་པ་ཉིད་དུ་བསྟན་པ་ལ་གཉིས། ཡུལ་མ་གྲུབ་པས་ཡུལ་ཅན་གྱི་ཤེས་པའང་མ་གྲུབ་པས་ན་སེམས་ཙམ་ལས་ཁྱད་པར་དུ་འཕགས་པ་དང་། ཀུན་རྫོབ་སྒྱུ་མ་ལྟ་བུ་ཡིན་ཡང་དོན་དམ་པར་འདིའོ་ཞེས་བྱ་བའི་གནས་ལུགས་མི་འདོད་པས། དབུ་མ་ངོ་བོ་ཉིད་མེད་པ་༼འག༷འ་ཞི༷ག་༽ལས་ཁྱད་པར་དུ་འཕགས་པར་བསྟན་པའོ། །འདིའི་དོན་ནི་ངོ་བོ་ཉིད་མེད་པར་སྨྲ་བ་ཞེས་པ་དབུ་མ་སྤྱིའི་མཚན་ཉིད་ཡིན་པས་སྔ་རབས་པའི་ཐལ་འགྱུར་བ་འགའ་ཞིག་ལྟ་བུ་དོན་དམ་པར་མེད་དགག་ཁོ་ན་འདོད་པ་ལ་གོ་དགོས་ཀྱི། དཔལ་ལྡན་ཟླ་བའི་གསུང་རྣམས་རང་ལུགས་ཚད་མའི་རྒྱབ་རྟེན་དུ་རྗེ་བཙུན་ཉིད་ཀྱིས་འདྲེན་པར་མཛད་པས་དེ་འདྲ་ལ་གོ་མི་རུང་ཞེས་རབ་འབྱམས་པ་ཀུན་དགའ་ཡེ་ཤེས་གསུངས་སོ། །དང་པོ་ནི། བརྟག་པ་དང་པོའི་ལེའུ་ལྔ་པ་ལས་གསུངས་པ། ངོ་བོས་གཟུགས་མེད་མཐོང་བ་པོ། །སྒྲ་མེད་ཐོས་པ་པོ་ཡང་མེད། །དྲི་མེད་སྣོམ་པ་པོ་ཡང་མེད། །རོ་མེད་མྱོང་བ་པོ་ཡང་མེད། །རེག་མེད་རེག་པ་པོ་ཡང་མེད། །སེམས་མེད་སེམས་ལས་བྱུང་བའང་མེད། །ཅེས་པ་འདིས་བདེན་པ་གཉིས་ཆར་སྟོན་པ་རྗེ་བཙུན་གསུངས། ཅེས་གསུངས་ཏེ། རང་གི་བློ་ལ་སྣང་བ་ཐམས་ཅད་ནི་བརྟགས་པ་སྟེ་ངོ་བོས་མེད་ཅེས་པའི་དོན་ཏོ། །དེ་ལ་གཟུགས་ནི་དཀར་པོ་ལ་སོགས་པ་སྟེ་མིག་གི་ཡུལ་དུ་གྱུར་པ་གཟུགས་ཀྱི་སྐྱེ་མཆེད་དོ། །དེ་ལ་རང་བཞིན་མེད་ཅེས་སྦྱར་བར་བྱའོ། །དེ་ལ་རང་བཞིན་ནམ་ངོ་བོའམ་རང་བྱུང་དུ་མེད་པའོ། །ཇི་ལྟར་མེད་ཅེ་ན། གློ་བུར་གྱི་རྐྱེན་ལ་རག་ལས་པའི་ཕྱིར་དང་། འགག་པ་སླར་མི་སྐྱེ་བའི་ཕྱིར་དང་། སྐད་ཅིག་མ་ཙམ་ཡིན་པའི་ཕྱིར་དང་། བྱིས་པས་ཀུན་ཏུ་བརྟགས་པའི་བདག་དང་གཙང་བ་དང་། བདེ་བ་དང་རྟག་པ་མ་གྲུབ་པའི་ཕྱིར་ངོ་བོས་མེད་དོ། །དེ་ལྟར་མདོ་སྡེ་རྒྱན་ལས། རྐྱེན་ལས་བྱུང་བ་རང་གི་ངོ་བོ་མེད་པ་དང་འགགས་པ་སླར་མི་སྐྱེ་བས་རང་གི་བདག་ཉིད་དུའང་། །མེད་པའི་ཕྱིར་དང་སྐད་ཅིག་མ་ཡིན་པས་རང་གི་ངོ་བོ་ལ། །མི་གནས་པའི་ཕྱིར་དང་བྱིས་པས་འཛིན་པ་བཞིན་ཏེ། །མེད་ཕྱིར་དངོས་པོ་ཐམས་ཅད་ངོ་བོ་ཉིད་མེད་འདོད། །ཅེས་གསུངས་སོ། །འབུམ་ལས་ཀྱང་། གཟུགས་ལ་རང་བཞིན་མེད་དེ། གང་ལ་རང་བཞིན་མེད་པ་ནི་བརྗོད་དུ་མེད་པའོ་ཞེས་བྱ་བ་ལ་སོགས་པ་དང་། གཟུགས་རྟག་ཅིང་བརྟན་ལ་ཐེར་ཟུག་མི་འགྱུར་བའི་ཆོས་ཅན་ཞིག་ཡིན་ན་ཐེག་པ་ཆེན་པོ་འདིས་ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་ཟིལ་གྱིས་མནན་ཅིང་འབྱུང་བར་མི་འགྱུར་ཏེ། གཟུགས་མི་རྟག་ཅིང་མི་བརྟན་ལ་ཐེར་ཟུག་མ་ཡིན་པའི་ཕྱིར་ཐེག་པ་ཆེན་པོ་འདིས་ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་ཟིལ་གྱིས་མནན་ཅིང་འབྱུང་བ་ཡིན་ནོ་ཞེས་བྱ་བ་ལ་སོགས་པ་གསུངས་སོ། །དེས་ན་རྟོག་པས་བརྟགས་ཤིང་གྲགས་པ་ཙམ་དུ་ཟད་ཅིང་རྟེན་འབྲེལ་ཙམ་སྟེ། དབུ་མ་ལས། རྒྱུ་དང་རྐྱེན་ལས་བྱུང་བ་ཡི། །རང་བཞིན་བྱས་པ་ཅན་དུ་འགྱུར། །ངོ་བོ་ཉིད་ནི་བཅོས་མིན་དང་། །གཞན་ལ་ལྟོས་པ་མེད་པ་ཡིན། །ཞེས་པ་དང་། རྟེན་ཅིང་འབྲེལ་འབྱུང་གང་ཡིན་པ། །དེ་ནི་སྟོང་པ་ཉིད་དུ་བཤད། །ཅེས་གསུངས་སོ། །དེས་ན་ཡུལ་མེད་པས་ཡུལ་ཅན་མི་འབྱུང་སྟེ། མཐོང་བ་པོ་མེད་ཅེས་བྱ་བ་མིག་གི་སྐྱེ་མཆེད་མེད་དོ་ཞེས་བྱ་བའི་དོན་ཏོ། །དེ་ལྟར་གཟུགས་ཀྱི་ཕུང་པོས་བསྡུས་པ་སྐྱེ་མཆེད་བཅུ་དང་ཁམས་བཅུ་ངོ་བོས་མེད་པ་ནི། རེག་པ་པོའང་མེད་ཅེས་པ་ཡན་ཆད་ཀྱིས་བསྟན་ཏོ། །སེམས་མེད་ཅེས་པ་ནི་རྣམ་པར་ཤེས་པའི་ཕུང་པོས་བསྡུས་པ་རྣམ་པར་ཤེས་པའི་ཁམས་དྲུག་དང་ཡིད་ཀྱི་སྐྱེ་མཆེད་དེ་༼ཉོ༷ན་ཡི༷ད་ད༷ང་༽ཀུན་གཞིའི་རྣམ་པར་ཤེས་པའི༼པ༷་འདི༷་༽སེམས་ཀྱིས་བསྡུས་པའི་ཕྱིར་སེམས་ཏེ་དེ་མེད་དོ། །སེམས་ལས་བྱུང་བ་ངོ་བོ་མེད། །ཅེས་ཆོས་ཀྱི་ཁམས་དང་ཆོས་ཀྱི་སྐྱེ་མཆེད་དང་། ཚོར་བ་དང་འདུ་ཤེས་དང་འདུ་བྱེད་ཀྱི་ཕུང་པོའོ། །དེས་ན་རིག་བྱ་རིག་པ་ལ་ལྟོས་ལ། རིག་པའང་རིག་བྱ་ལ་ལྟོས་པས། གཅིག་ཁེགས་པས་གཅིག་འགགས་པས་ན་རང་རིག་པ་ཞེས་བྱ་བ་མེད་པས་སེམས་ཙམ་ལས་ཁྱད་པར་དུ་འཕགས་ཞེས་བྱ་བའི་དོན་ཏོ། །གཉིས་པ་ཀུན་རྫོབ་སྒྱུ་མ་ལྟ་བུ་ཡིན་ཡང་དོན་དམ་དུ་གནས་ལུགས་སུ་མི་འདོད་པས། ངོ་བོ་ཉིད་མེད་པ་ལས་ཁྱད་པར་དུ་འཕགས་པར་བསྟན་པ་ལས། དང་པོར་ཀུན་རྫོབ་སྒྱུ་མ་ལྟ་བུར་བསྟན་པ་ནི། སཾ་པུ་ཊའི་བརྟག་པ་གཉིས་པའི་གཉིས་པ་ལས། དྲི་ཟའི་གྲོང་ཁྱེར་ལྟ་བུ་དང་། །སྒྱུ་མ་སྨིག་རྒྱུ་འདྲ་བ་དང་། །འཕྲོག་པ་ཟླ་བ་སྟེ་རྒྱལ་པོ་སེང་གེ་ཟླ་བའི་གྲོང་ཁྱེར་མཚོ་ནང་དུ་ཤར་བའི་གཟུགས་བརྙན་དང་མཚུངས་པ་དང་། །རྨི་ལམ་རྩེ་བ་ལྟ་བུར་བལྟ། །སྒྱུ་མ་ཇི་བཞིན་ཐམས་ཅད་དུ། །བལྟ་བྱ་ཉིད་དང་རིག་པར་བྱ། །ཞེས་འབྱུང་བས་ན་ཀུན་རྫོབ་ཏུ་ཆོས་ཐམས་ཅད་སྒྱུ་མ་ལ་སོགས་པ་བདག་བྱིན་གྱིས་རླབས་པ་ལས། སྒྱུ་མ་༡སྨིག་རྒྱུ་༢དྲི་ཟ་ཡི། །གྲོང་ཁྱེར་༣དང་ནི་དབང་པོའི་གཞུ༤། །མེ་ལོང་གི་ནི་གཟུགས་བརྙན་དང་༥། །ཆུ་ཟླ་དང་༦ནི་བྲག་ཅ་དང་༧། །རྨི་ལམ་༨མི་ཡོར་༩སྤྲིན་༡༠དང་གློག༡༡། ཆུ་ཡི་ཆུ་བུར་༡༢ཞེས་བྱ་བ། །སྒྱུ་མའི་དཔེ་ནི་བཅུ་དང་གཉིས། །ཞེས་པ་ལྟར་དཔེ་བཅུ་གཉིས་ཀྱིས་གཏན་ལ་དབབ་པའོ། །འོ་ན་སྒྱུ་མ་ལྟ་བུ་ལ་སོགས་པ་ཀུན་རྫོབ་ཡིན་ན། དོན་དམ་པར་གནས་ལུགས་གང་ཡིན་སྙམ་ན། སཾ་པུ་ཊ་ལས། འགྲོ་བ་ཀུན་གྱི་གནས་པ་སྟེ་གནས་ལུགས་ནི། །དངོས་པོ་གང་ལའང་དཔྱད་ན་རྙེད་པར་མི་འགྱུར་ཏེ། །ཐབས་ཤེས་ཀྱི་སྦྱོར་བ་འདུས་པ་སྟེ་ཟུང་འཇུག་གི་ཡེ་ཤེས་ཀྱི་ངོ་བོ་ནི་བསམ་གྱིས་མི་ཁྱབ་བོ། །ཅེས་གསུངས་ཏེ། བསམ་པའི་ཡུལ་ལས་འདས་པ་སྟེ། དོན་དམ་པར་ན་འདི་ལྟ་བུ་ཞིག་གོ་ཞེས་བརྗོད་དུ་མི་བཏུབ་བོ། །དེ་ལ་ངོ་བོ་ཉིད་མེད་པར་སྨྲ་བ་དག་ཆོས་ཐམས་ཅད་ཀྱི་རང་བཞིན་ནི་སྟོང་པ་ཉིད་ཡིན་ནོ་ཞེས་བྱ་བ་ལ་སོགས་པར་འཛིན་པ་དེ་དག་སུན་དབྱུང་བ་སྟེ། འོག་ཏུ་རྒྱས་པར་བརྗོད་པར་བྱའོ། །
གཉིས་མེད་ཀྱི་བློས་མཐའ་བྲལ་དུ་གཏན་ལ་ཕབ་ནས་ཟུང་འཇུག་ཏུ་ཉམས་སུ་བླང་བར་བསྟན་པ།
སྤྱི་དོན་གསུམ་པ་གཉིས་མེད་ཀྱི་བློས་མཐའ་བྲལ་དུ་གཏན་ལ་ཕབ་ནས་ཟུང་འཇུག་ཏུ་ཉམས་སུ་བླང་བར་བསྟན་པ་ལ་གསུམ། སྟོང་པ་ལ་སོགས་པ་བཞི་ཀ་མཐའ་ཡིན་པས་དེ་སྤང་བར་བསྟན་པ་དང་། མཐའ་བྲལ་གྱི་དབུ་མ་ཞེས་བྱ་བར་འཛིན་པ་དེ་ཡང་མཐའ་ཡིན་པ་དང་། དེ་ལྟར་མཐའ་དང་བྲལ་ཡང་ཟུང་འཇུག་གི་ཚུལ་གྱིས་ཉམས་སུ་བླང་བར་བསྟན་པའོ། །དེ་ལ་དང་པོ་ནི། སཾ་པུ་ཊའི་གཉིས་པའི་གཉིས་པ་ལས། སྟོང་པ་བསྒོམ་པར་མི་བྱ་སྟེ། །སྟོང་མིན་བསྒོམ་པར་མི་བྱའོ། །སྟོང་པ་མི་སྤང་སྟེ་སྟོང་པར་ཞེན་པའི་རྣལ་འབྱོར་པས། །སྟོང་མིན་ཡོངས་སུ་མི་སྤང་ངོ་སྤོང་མི་ནུས་སོ། །སྟོང་དང་སྟོང་མིན་བཟུང་བ་ལས། །སྒྲོ་སྐུར་གྱི་རྟོག་པ་ཉུང་མིན་སྐྱེ་བར་འགྱུར། །སྟོང་མི་སྟོང་གཉིས་ཀ་ཡིན་ནམ་སྙམ་དུ་ཡོངས་སུ་སྤངས་ན་དེའང་འཛིན་པའི་ཀུན་རྟོག་སྟེ། །དེ་ཕྱིར་ཕྱོགས་གཉིས་པོ་གང་དུའང་འཛིན་པ་འདི་དག་སྤང་། །ཞེས་གསུངས་སོ། །དེ་ལ་དེ་དག་གིས་ནི་འདི་སྐད་སྟོན་པར་འགྱུར་ཏེ། སྟོང་པ་ཉི་ཚེ་བའམ་དེ་བཞིན་ཉིད་དུ་འཛིན་པའི་རྣམ་པ་དེ་སྤང་ངོ་། །འོ་ན་མི་སྟོང་པ་དང་དངོས་པོའི་བདག་གམ་ལྷའི་རྣམ་པ་ལ་སོགས་པར་བསྒོམ་མམ་སྙམ་ན། སྟོང་མིན་དུའང་བསྒོམ་པར་མི་བྱའོ། །དེ་ལྟར་མི་བསྒོམ་པའི་འཐད་པ་ནི། སྤྱིར་ཡུལ་ཤེས་བྱ་དང་ཡུལ་ཅན་གྱི་ཤེས་པ་གཉིས་ཡིན་པ་ལས། ཡུལ་དོན་དམ་གྱི་གནས་ལུགས་གྲུབ་པ་མེད་པས། དེས་ན་ཡུལ་ཅན་གྱི་འཛིན་པའམ་བསྒོམ་པ་མི་འཐད་དོ། །འདི་ལ་གཉིས། གནས་ལུགས་མེད་པ་དང་། དེ་ལ་རྩོད་པ་སྤང་བའོ། །དང་པོ་ལ་བཞི་སྟེ། གནས་ལུགས་ངེས་པར་འདོད་ན་གནོད་པ་ཡོད་པ་དང་། ངེས་པ་བློ་ཡུལ་དུ་མི་རུང་བ་དང་། བློ་ལ་མ་ལྟོས་པའི་ཡུལ་མི་རུང་བ་དང་། མཐར་བཟུང་ན་སྲིད་པའི་རྩ་བར་འགྱུར་བའོ། །དང་པོ་ནི་སྟོང་པའམ་མི་སྟོང་པ་དངོས་པོའི་གནས་ལུགས་མ་ཡིན་ལ། མ་ཡིན་པར་བསྒོམས་ན་མ་རིག་པར་འགྱུར་བའི་ཕྱིར་རོ། །དེ་ཇི་ལྟར་གནས་ལུགས་མ་ཡིན་ཞེ་ན། འདི་ལྟར་མི་སྟོང་པ་གནས་ལུགས་སུ་བྱས་ན་གཅིག་དང་དུ་བྲལ་ལ་སོགས་པས་གཞིག་ན་དེ་མི་འགྲུབ་པའི་ཕྱིར་རོ། །ཡང་སྟོང་པ་གནས་ལུགས་སུ་བྱས་ན་མི་འཐད་དེ། སྐྱེ་བ་དང་བཅས་པ་མཐོང་བའི་ཕྱིར་རོ། །དེ་སྐད་དུ། འཕགས་པས་ཀྱང་དབུ་མ་ལས། འབྲས་བུ་སྐྱེ་བ་རྒྱུ་དང་བཅས་པར་མཐོང་བས། །འགག་པ་སྟེ་མེད་པ་འདི་ནི་འཐད་མ་ཡིན། །དངོས་པོ་འགག་པའང་རྒྱུ་དང་བཅས་མཐོང་བས། །སྐྱེ་བ་ཡོད་པར་རིགས་པ་མ་ཡིན་ནོ། །ཞེས་པ་དང་། གང་ཕྱིར་རྟེན་འབྱུང་མ་ཡིན་པའི། །ཆོས་འགའ་ཡོད་པ་མ་ཡིན་པ། །དེ་ཕྱིར་སྟོང་པ་མ་ཡིན་པའི། །ཆོས་འགའ་ཡོད་པ་མ་ཡིན་ནོ། །ཞེས་གསུངས་སོ། །གཉིས་པ་ངེས་པ་བློ་ཡུལ་དུ་མི་རུང་བ་ནི། །དེས་ན་སྟོང་པ་ནི་མི་སྟོང་པ་ལ་ལྟོས་ལ་མི་སྟོང་པ་སྟོང་པ་ལ་ལྟོས་པས། སྟོང་པ་གནས་ལུགས་ཡིན་ན་མི་སྟོང་པ་ཡང་ཡིན་ལ། མི་སྟོང་པ་གནས་ལུགས་ཡིན་ན་སྟོང་པ་ཡང་ཡིན་ན། རྣལ་འབྱོར་པས་སྟོང་པ་མ་སྤངས་ན་སྟོང་མིན་ཡང་མི་སྤང་ངོ་ཞེས་གོང་དུ་གསུངས་སོ། །དབུ་མ་ལས་ཀྱང་། གལ་ཏེ་མི་སྟོང་ཅུང་ཟད་ཡོད། །སྟོང་པ་ཅུང་ཟད་ཡོད་པར་འགྱུར། །མི་སྟོང་ཅུང་ཟད་མེད་པས་ན། །སྟོང་པའང་ཡོད་པར་ག་ལ་འགྱུར། །ཞེས་གསུངས་སོ། །གསུམ་པ་བློ་ལ་མ་ལྟོས་པའི་ཡུལ་དགག་པ་ནི། འདི་སྐད་དུ། སྟོང་ཉིད་བློས་ཡུལ་དུ་བྱས་ན་ཁྱོད་ཀྱི་སྨྲས་པ་བདེན་པར་ལྟོས་པར་འགྱུར་ཏེ། སྟོང་ཉིད་ཅེས་བྱ་བར་བློ་ལ་མ་ལྟོས་པར་ངོ་བོས་གྲུབ་པ་ཅིག་ཡོད་དེ། དཔེར་ན་རི་བོང་གི་མགོ་ལ་རྭ་མེད་ཅེས་བློས་ཤེས་པར་བྱེད་པ་དེ་རྭ་ལ་ལྟོས་ཀྱང་རི་བོང་གི་མགོ་ལ་རྭ་མེད་པ་ནི་ངོ་བོས་གནས་སོ་ཞེས་སྨྲ་ན། དེ་ནི་མ་ཡིན་ཏེ། བློས་ཡུལ་དུ་མ་བྱས་པའི་རི་བོང་གི་མགོ་ལ་རྭ་མེད་པའོ་ཞེས་སུས་ཀྱང་ཡང་དག་པར་མཐོང་བའམ་དམིགས་པ་མེད་དེ། ཡུལ་དུས་གང་དུའང་བློས་ཡུལ་དུ་མ་བྱས་པའི་ཤེས་བྱ་ཞེས་བྱ་བ་མེད་དོ། །གལ་ཏེ་བློས་ཡུལ་དུ་མ་བྱས་པའི་སྟོང་པ་ཞེས་བྱ་བ་འདོད་ན། མུ་སྟེགས་བྱེད་ཀྱི་བསམ་གྱིས་མི་ཁྱབ་པའི་བདག་ཀྱང་དགག་པར་མི་ནུས་པར་འགྱུར་རོ། །དེས་ན་མ་ལྟོས་པའི་ཆོས་འགའ་ཡང་མེད་ལ། ལྟོས་པའི་ཕྱིར་གནས་ལུགས་འདིའོ་ཞེས་གྲུབ་པ་མེད་དོ། །གཞན་ཡང་སྟོང་པར་ལྟ་བ་འདི་ལྟ་བ་རྣམས་ཀྱི་ནང་ན་ཡང་དམན་ཏེ། སྨན་མ་ཞུ་བ་དུག་ཏུ་སོང་བ་ལྟ་བུ་སྟེ། དབུ་མ་ལས། གང་དག་སྟོང་པ་ཉིད་ལྟ་བ། །དེ་དག་བསྒྲུབ་ཏུ་མེད་པར་གསུངས། །ཞེས་གསུངས་སོ། །གཞན་ཡང་གནས་ལུགས་འདོད་ན་ལྟ་བར་འགྱུར་ལ། ལྟ་བར་གྱུར་ན་རྣམ་པར་རྟོག་པ་སྣ་ཚོགས་སྐྱེ་ཞིང་དེས་འཁོར་བར་འདྲེན་པར་བྱེད་དོ། །དེས་ན་དབུ་མ་ལས། གང་གིས་ཐུགས་བརྩེ་ཉེར་བཟུང་ནས། །ལྟ་བ་ཐམས་ཅད་སྤངས་པའི་ཕྱིར། །དམ་པའི་ཆོས་འདི་བསྟན་མཛད་པ། །གཽ་ཏམ་དེ་ལ་ཕྱག་འཚལ་ལོ། །ཞེས་གསུངས་སོ། །དེའི་ཕྱིར། སྟོང་དང་སྟོང་མིན་བཟུང་བ་ལས། །རྟོག་པ་ཉུང་མིན་སྐྱེ་བར་འགྱུར། །ཞེས་གསུངས་ཏེ། སྟོང་པར་བཟུང་ན་ནི་ཆད་པའི་མཐའ་དང་། མི་སྟོང་ན་ནི་རྟག་པར་འགྱུར་བས་ན་འཛིན་པ་ཐམས་ཅད་སྤང་བར་བྱའོ། །དོན་བཞི་པ་འཛིན་པ་མ་སྤངས་ན་སྲིད་པའི་རྩ་བར་འགྱུར་བ་ནི། ཇི་སྲིད་དུ་འཛིན་ན་སྲིད་པར་སྐྱེ་སྟེ། ཇི་སྲིད་ཕུང་པོར་བདེན་འཛིན་ཡོད་པ། །དེ་སྲིད་དེ་ལ་ངར་འཛིན་འབྱུང་བ་ཡོད་ཅིང་། །ང་རུ་འཛིན་ན་ཡང་དེས་ལས་བསགས་ཏེ། །དེ་ལས་ཡང་ནི་སྐྱེ་བ་ཡིན་ནོ། །ཞེས་དབུ་མ་ལས་གསུངས་སོ། །དེའི་ཕྱིར་སྟོང་པ་དང་མི་སྟོང་པ་སྤངས་ན། གཉིས་ཀ་དང་གཉིས་ཀ་མ་ཡིན་པར་བཟུང་བར་མི་ནུས་ཏེ་འགལ་བའི་ཕྱིར་རོ། །དེས་ན་མཐའ་བཞི་སྤངས་པའོ། །གཉིས་པ་དེ་ལ་རྩོད་པ་སྤང་བ་ལ་གསུམ། རང་གི་ཚིག་དང་འགལ་བ་དང་། ཐ་མལ་པར་འགྱུར་བ་དང་། ལུང་དང་འགལ་བའོ། །དང་པོ་ནི་དེ་ལྟར་ཁྱེད་ལ་ལྟ་བ་མེད་ཅིང་དངོས་པོའི་གནས་ལུགས་མེད་ན། གནས་ལུགས་རྟོགས་ཞེས་བྱ་བའམ། མ་རིག་པ་སྤངས་ཏེ་རིག་པ་སྐྱེ་ཞེས་ཁྱོད་ཉིད་མི་འདོད་དམ་ཞེ་ན། འདི་ལྟར་གནས་ལུགས་མེད་པ་ལ་མེད་པ་ཉིད་དུ་སྒྲོ་འདོགས་བཅད་པ་དེ་ཙམ་ལ་རྟོགས་ཞེས་ཐ་སྙད་ཙམ་དུ་གདགས་སོ། །དེ་ཉིད་གནས་ལུགས་མ་ཡིན་ནམ་ཞེ་ན། མ་ཡིན་ཏེ་དཔེར་ན་བདག་ལ་ནོར་མེད་དོ་ཞེས་བརྗོད་ན། མེད་པའི་ནོར་སྟོན་ཅིག་ཅེས་སུ་ཞིག་སྨྲ། དེ་བཞིན་དུ་གནས་ལུགས་མེད་དོ་ཞེས་བརྗོད་ན་དེ་ཉིད་གནས་ལུགས་སུ་ཇི་ལྟར་འཛིན་ཏེ་བཟུང་བ་མེད་དོ། །གཉིས་པ་ནི་ཁྱོད་ལྟ་བ་མི་འདོད་ན་སྐྱེ་བོ་ཕལ་པ་དང་འདྲའོ་སྙམ་ན། མི་འདྲ་སྟེ་སྐྱེ་བོ་ཕལ་པ་ནི་གཟུགས་ལ་སོགས་པ་སྣ་ཚོགས་ཉིད་དུ་འཛིན་ཞིང་། དེའང་བདེན་པར་འཛིན་ན་ཁོ་བོ་ཅག་ནི་དམིགས་པ་གང་ལ་ཡང་མི་འཛིན་ཅིང་མི་འདོད་དེ། ཇི་སྐད་དུ། བྱིས་པ་རྣམས་ནི་གཟུགས་ལ་ཆགས། །བར་པ་མུ་སྟེགས་རབ་རྣམས་ནི་གཟུགས་སོགས་ལ་ཆགས་བྲལ་བར་འགྱུར། །མཁས་པ་ཐེག་པ་གསུམ་གྱི་འཕགས་པ་རྣམས་ཀྱིས་གཟུགས་ཀྱི་ནི། །དེ་ཉིད་ཤེས་༼ནས༷་༽ཡང་དག་གྲོལ། །ཞེས་གསུངས་པ་བཞིན་ནོ། །གསུམ་པ་ནི། འོ་ན་བདེ་བར་གཤེགས་པས་མདོ་རྒྱུད་དག་ལས་སྟོང་པ་དང་བདག་མེད་པ་ལ་སོགས་པ་དུ་མ་གསུངས་ལ། སློབ་དཔོན་རྣམས་ཀྱིས་ཀྱང་བསྟན་བཅོས་རྣམས་ལས་སྟོང་པ་ལ་སོགས་པ་བསྟན་ནོ་སྙམ་ན། དེ་དག་ནི་ལྟ་བ་སྤང་བའི་སྟོང་པ་ཉིད་དེ། དབུ་མ་ལས། རྒྱལ་བ་རྣམས་ཀྱིས་སྟོང་པ་ཉིད། །ལྟ་ཀུན་ངེས་པར་འབྱིན་པར་གསུངས། །ཞེས་བྱ་བ་དང་། ཡང་གསུངས་པ། མུ་སྟེགས་ཆད་ལྟ་བ་རྣམས་གདུལ་བའི་ཕྱིར་བདག་གོ་ཞེས་ཀྱང་བཏགས་གྱུར་ཅིང་། །བདག་འཛིན་ཅན་འདུལ་བའི་ཕྱིར་བདག་མེད་ཅེས་ཀྱང་བཏགས་པར་འགྱུར་༼གྱུ༷ར༽། །བློ་མཆོག་ཏུ་གྱུར་པ་རྣམས་ལ་སངས་རྒྱས་རྣམས་ཀྱིས་བདག་དང་ནི། །བདག་མེད་འགའ་མེད་ཅེས་ཀྱང་བསྟན། །ཞེས་གསུངས་ཏེ། གདུལ་བྱའི་བློའི་རིམ་པས་སྒོ་སྣ་ཚོགས་ཀྱི་སྒོ་ནས་དྲང་བ་དང་ངེས་པའི་དོན་དུ་བསྟན་ཏོ། །དེས་ན་མདོ་ལས། དོན་ལ་རྟོན་པར་བྱའི་ཚིག་འབྲུ་ལ་རྟོན་པར་མི་བྱའོ་ཞེས་གསུངས་སོ། །སློབ་དཔོན་རྣམས་ཀྱིས་གསུངས་པ་དེའང་བདེན་པ་བཀག་པ་དེ་ཙམ་ཞིག་དམིགས་པའི་ཡུལ་དུ་བྱས་པ་ན། དགག་བྱ་མ་དམིགས་པས་བཀག་པའང་མི་དམིགས་པ་སྐྱེ་བར་འགྱུར་བས། དེ་ཙམ་གྱི་ཆ་འདྲ་བ་ལས་བརྟེན་ཏེ་རྣམ་གྲངས་ཀྱི་དོན་དམ་མམ། ཕྱིན་ཅི་མ་ལོག་པའི་ཡོངས་སུ་གྲུབ་པ་ཞེས་བཏགས་ཀྱི། དོན་དུ་ན་དེ་ཉིད་ཀུན་རྫོབ་ཡིན་པས་སློབ་དཔོན་ཁ་ཅིག་རྣལ་འབྱོར་པའི་ཀུན་རྫོབ་ཅེས་གསུང་ངོ་། །དེ་བས་ན་བློ་སྣང་གི་བྲལ་བའི་ཆ་དེ་ལ་དོན་དམ་རྣལ་མར་མ་རྟོན་ཅིག །དེས་ན་བློའི་ཡུལ་ནི་རྣམ་གྲངས་ཡིན་ལ་དེ་ལས་གྲོལ་བས་ན་རྣམ་གྲངས་མ་ཡིན་པ་དོན་དམ་ཞེས་གདགས་ཏེ། བློའི་ཡུལ་རྣམས་ཀུན་རྫོབ་ཡིན་པས། དེ་ལས་འདས་པ་ཙམ་གྱི་ཆ་བསྟུན་པའི་མིང་ངོ་། །དེས་ན་སློབ་དཔོན་རྣམས་ཀྱིས་རྣམ་གྲངས་མ་ཡིན་པ་ལ་སྒྲུབ་བྱེད་མ་གསུངས་པས་རྣམ་གྲངས་མ་ཡིན་ནོ་ཞེས་བྱ་བ་ཞིག་ཡོད་དོ་སྙམ་དུ་གཟུང་བར་༼མི༷་༽བགྱིའོ། །སྤྱི་དོན་གསུམ་པ་མཐའ་བྲལ་གྱི་དབུ་མ་ཞེས་བྱ་བ་ཞིག་ཀྱང་མ་ཡིན་པར་བསྟན་པ་ནི། སཾ་པུ་ཊའི་དང་པོའི་གསུམ་པ་ལས། གནས་ལུགས་སྟོང་པ་མིན་ཞིང་སྟོང་པ་མིན་པའང་མིན་ལ། །དབུ་མར་ཏེ་གཉིས་ཡིན་དང་གཉིས་མིན་དུ་དམིགས་ཏེ་གྲུབ་པར་མི་འགྱུར་རོ། །ཞེས་གསུངས་ཏེ། དེ་དག་གི་དོན་ནི་ཞིབ་ཏུ་སྔར་བརྗོད་པ་དང་འདྲ་ལ། ཅུང་ཟད་ཕྱེ་ན་འདི་ཡིན་ཏེ། རྟོག་མཁན་གྱི་བསམ་པས་བཙལ་ན་མི་སྟོང་པའི་ཆོས་མེད་ལ་རིག་པས་ལེགས་པར་བརྟགས་ན་སྟོང་པ་མ་གྲུབ་ཅིང་། དེ་གཉིས་ཀྱི་དབུས་ན་གཉིས་ཀའམ་གཉིས་ཀ་མ་ཡིན་པ་ཞེས་བྱ་བ་ཞིག་མི་འགྲུབ་སྟེ། དེ་གཉིས་རེ་རེར་མ་གྲུབ་ན་ཚོགས་པའང་མི་འགྲུབ་ལ། དེ་གཉིས་ལས་མ་གཏོགས་པའི་ཆོས་འགའ་ཡང་མེད་པའི་ཕྱིར་རོ། །དེས་ན་ཇི་ལྟ་ཇི་ལྟར་བློས་བཟུང་བ་དེ་དེ་ལྟ་དེ་ལྟར་མཐར་འགྱུར་ལ། མཐའ་བྲལ་གྱི་དབུ་མར་བཟུང་བ་དེའང་མཐར་འགྱུར་རོ། །འོ་ན་རྣལ་འབྱོར་པས་ཇི་ལྟར་ཉམས་སུ་བླང་སྙམ་ན། སྤྱི་དོན་གསུམ་པ་དེ་ལྟར་མཐའ་དང་བྲལ་ཡང་ཟུང་འཇུག་གི་ཚུལ་གྱིས་ཉམས་སུ་བླང་བ་ལ་གསུམ། ཟུང་འཇུག་གི་རང་བཞིན་དང་། དོན་དམ་དུ་བསམ་དུ་མེད་པར་བསྟན་པ་དང་། ཀུན་རྫོབ་ཏུ་བསྒོམ་པའི་ཚུལ་བསྟན་པའོ། །དང་པོ་ནི། བརྟག་པ་གཉིས་པའི་གཉིས་པ་དེ་ཉིད་ལས། ཤེས་རབ་ཀྱི་ཕ་རོལ་ཕྱིན་པ་དང་ལྷན་ཅིག་སྦྱོར་བའི། །ཐབས་ནི་སྙིང་རྗེའི་བདག་ཉིད་དོ། །དེས་ན་མཛེས་པ་སྟེ་དམིགས་པ་མེད་པའི་སྙིང་རྗེ་ཐབས། །དེ་སྤྲོས་པ་ཐམས་ཅད་དང་བྲལ་བའི་ཤེས་རབ་ཕ་རོལ་ཕྱིན་པའི་ངོ་བོར་གསལ་བ། །ཞེས་གསུངས་ཏེ། དེའི་དོན་ཡང་འདི་ཡིན་ཏེ། ཤེས་རབ་ཀྱིས་རྣམ་པར་ཕྱེ་བས་གང་ལྟར་ཡང་མ་གྲུབ་པར་ཤེས་ཀྱང་ཐབས་སྙིང་རྗེ་ཆེན་པོས་སྣང་བ་མི་འགག་པར་འགྱུར་རོ། །དེས་ན་སྤྲོས་པ་དང་བྲལ་ཞིང་དམིགས་པ་མེད་བཞིན་དུ་སྙིང་རྗེ་ཆེན་པོས་གཞན་དོན་མཛད་པ་འདི་ནི་མཛེས་པས་ཏེ། དེ་ལྟར་ཡང་། གཞན་གྱི་སྡུག་བསྔལ་གྱིས་བྲེད་རྣམས། །བསམ་གཏན་བདེ་བ་བོར་ནས་ཀྱང་། །མནར་མེད་པར་ཡང་འཇུག་པར་བྱེད། །འདི་ནི་ངོ་མཚར་འདི་བསྔགས་འོས། །ཞེས་གསུངས་པ་དང་། རྡོ་རྗེ་གུར་ལས་ཀྱང་། སྟོང་ཉིད་སྙིང་རྗེ་ཐ་དད་མེད། །གང་དུ་སེམས་ནི་རྣམ་བསྒོམ་པ། །དེ་ནི་སངས་རྒྱས་ཆོས་དང་ནི། །དགེ་འདུན་གྱི་ཡང་བསྟན་པའོ། །ཞེས་གསུངས་སོ། །དེས་ན་ཧེ་བཛྲ་ཞེས་བྱ་བའང་འདི་ཉིད་ཡིན་ཏེ། རྩ་བའི་རྒྱུད་ལས་ཀྱང་། ཧེ་ནི་སྙིང་རྗེ་ཆེན་པོ་ཉིད། །བཛྲའང་ཤེས་རབ་བརྗོད་པར་བྱ། །ཞེས་བྱ་བ་དང་། རྒྱུད་ཐམས་ཅད་ཀྱི་བརྗོད་བྱའང་དེ་ཉིད་ཡིན་པས་ན། ཐབས་དང་ཤེས་རབ་བདག་ཉིད་རྒྱུད། །དེ་ནི་ང་ཡིས་བཤད་ཀྱིས་ཉོན། །ཞེས་གསུངས་ལ། དེ་ལ་སོགས་པ་ཟུང་འཇུག་གི་ལུང་མང་པོ་གསུངས་ཏེ་རང་ཉིད་ཀྱིས་སྤྲོ་བར་བྱའོ། །གཉིས་པ་དེ་ལྟ་བུ་དེ་བསམ་མམ་སྙམ་ན། དོན་དམ་དུ་བསམ་པར་བྱ་བ་ལས་འདས་ཏེ། སཾ་པུ་ཊ་ལས་རྣམ་པར་རྟོག་པས་བཏགས་པ་ཙམ་ལས་མེད་པའི་ཆོས་རྣམས་ལ། །དངོས་པོ་མེད་ཅིང་བསྒོམ་པའང་མེད། །ཅེས་གསུངས་ཏེ། རང་གི་ངོ་བོ་འདི་ལྟར་གྲུབ་བོ་ཞེས་བྱ་བའི་ཚུལ་གྱིས་བསྒོམས་ན་རྟོག་པར་འགྱུར་ལ། རྟོག་པས་བསམ་པ་ནི་དེ་ཁོ་ན་ཉིད་མ་ཡིན་པས་བསམ་དུ་མེད་དོ་ཞེས་བྱ་བའི་དོན་ཏོ། །གསུམ་པ་ཀུན་རྫོབ་ཏུ་བསྒོམ་པའི་ཚུལ་ནི། དེ་ལྟར་གནས་ལུགས་ནི་བསྒོམ་དུ་མེད་ལ་གནས་ལུགས་མ་བསྒོམས་ན་མི་གྲོལ་བས་ཇི་ལྟར་བསམ་སྙམ་ན། ཀུན་རྫོབ་ཙམ་དུ་ཡོད་པར་བསྟན་པ་ནི། །རྣམ་པར་རྟོག་པས་བཏགས་པ་ཙམ་ལས་མེད་པའི་ཆོས་ཉིད་དེར་ལྷག་པར་མོས་པ་སྐྱེད་ལའང་། །ཐབས་ཀྱི་རྟོག་པ་ཀུན་གྱིས་བརྟག་པར་བྱ། །ཞེས་གསུངས་ཏེ། རྣམ་པར་རྟོག་པ་ཉིད་ཀྱིས་དཔྱད་པས་རིམ་གྱིས་རྟོག་མེད་སྐྱེ་བའི་རྒྱུར་འགྱུར་ཏེ། མདོ་སྡེ་རྒྱན་ལས། སེམས་ཙམ་དུ་དམིགས་པ་ལ་ནི་བརྟེན་ནས་སུ། །སེམས་ཀྱང་མི་དམིགས་པ་ནི་རབ་ཏུ་སྐྱེས། །སེམས་མི་དམིགས་པ་ལ་བརྟེན་ནས་སུ། །མཚན་མ་ཐམས་ཅད་མི་དམིགས་པ་ནི་རབ་ཏུ་སྐྱེས། །ཞེས་གསུངས་ལ། སློབ་དཔོན་ཏོག་ཙེ་པས་བསམ་གྱིས་མི་ཁྱབ་པ་ལས་ཀྱང་། བསྒོམ་པའི་སྐབས་སུ་མིག་གི་རྣམ་ཤེས་དམིགས་རྟེན་མི་འགྱུར་བ་དང་། ལུས་མི་གཡོ་བ། མིག་མངོན་རྟོགས་ལྗོན་ཤིང་གི་ཡི་གེ་དག་བཅོས་དང་མཆན་བུ། མི་འཛུམ་པ། ཡིད་འཛིན་པ་མེད་པའི་ཡན་ལག་བཞི་ལྡན་དུ་བྱས་ནས་བསླབས་ནས་དེས་རྟོགས་པ་ཡི། །གཉིས་མེད་ཡེ་ཤེས་ངོ་མཚར་ཆེ། །ཞེས་བྱ་བ་ལ་སོགས་པ་དང་། གཟུང་འཛིན་གཉིས་པོའི་སྣང་བ་དག་ལ་ནི་སྐྱེ་འགག་གནས་གསུམ་གྱིས་སྟོང་པར་རྣམ་པར་དཔྱད་ནས་བསྒོམས་ན། །གཉིས་མེད་ཡེ་ཤེས་འཆར་བར་འགྱུར། །ཞེས་བྱ་བ་ལ་སོགས་པ་གསུངས་སོ། །ཐབས་གང་གིས་ཇི་ལྟར་རྟོག་མེད་སྐྱེ་སྙམ་ན། རྩ་བའི་རྒྱུད་ལས། གང་ཕྱིར་མཚན་མར་འཛིན་པའི་ཡིད་ཀྱིས་མི་བསྒོམ་པར། །དེ་དང་བྲལ་བའི་ཚུལ་གྱིས་འགྲོ་བ་དང་ཆོས་ཐམས་ཅད་བསྒོམ་པར་བྱ། །ཐམས་ཅད་ཀྱི་ཆོས་སམ་རང་བཞིན་ནི་ཡོངས་སུ་ཤེས་ནས། །མཚན་མ་གང་དུའང་བསྒོམ་དུ་མེད་པར་ཤེས་ན་བསྒོམ་པ་ཉིད་ཡིན་ནོ། །ཅེས་བྱ་བ་དང་། སཾ་པུ་ཊའི་གཉིས་པའི་གཉིས་པ་ལས་ཀྱང་། །གནས་ལུགས་ལ་འདིའོ་ཞེས་རྣམ་པ་མེད་ཅིང་འཁོར་བ་མ་གྲུབ་པས་དེར་འཁྱམས་པའི་དོགས་པ་མེད། །མྱང་འདས་འདོད་པ་མེད་ཅིང་རྒྱུ་རྣམ་རྟོག་མེད་པས་འབྲས་བུ་སྡིག་པ་དང་བྲལ་བ། །ཐོག་མར་སྐྱེ་བ་དང་ཐ་མ་འགགས་པ་དང་དབུས་སུ་གནས་པ་མེད་པའི་རྟོག་པ་ལས་གྲོལ། །ནམ་མཁའ་ལྟ་བུར་མཁས་པས་བསྒོམ། །ཞེས་བྱ་བ་ལ་སོགས་པ་གསུངས་ཏེ། དེ་དག་ཀྱང་འོག་དམིགས་མེད་བསམ་མི་ཁྱབ་ཀྱི་སྟེང་དུ་ཞིབ་ཏུ་རྟོགས་པར་འགྱུར་རོ། །དེ་ལྟར་མཐའ་བྲལ་གྱི་ལྟ་བ་རྒྱས་པར་བསྟན་ཟིན་ཏོ། །སྤྱི་དོན་གསུམ་པ་ཤེས་བྱ་སྤྱིའི་གནས་ལུགས་མ་ལུས་པའང་བསྟན་ཟིན་ཏོ། །ད་ནི་སྤྱི་དོན་བཞི་པ་དེ་ལྟ་བུའི་གནས་ལུགས་དེ་ཉིད་རྒྱུད་སྡེ་དང་མདོ་སྡེ་ཐམས་ཅད་ཀྱི་རྟོགས་བྱའི་དོན་འདི་ཉིད་ལས་མེད་པ་ཉིད་ཡིན་པར་བསྟན་པ་སྟོན་ཏེ། དེའང་འདི་སྐད་དུ། ཤེས་བྱའི་ནས་ལུགས་དེ་མ་ཡིན་པ་དུ་མ་ཉིད་བསྟན་ཏོ་སྙམ་ན་དངོས་པོ་དང་དངོས་པོ་མེད་པར་སྨྲ་བ་དག་ནི་དམན་པ་ཉིད་ཡིན་པར་སྔར་སུན་ཕྱུང་ཟིན་ལ། ཐེག་པ་མཆོག་གི་བཞེད་པ་ཐམས་ཅད་ནི་འདི་ཡིན་ཏེ། དེའང་སཾ་པུ་ུཊའི་བརྟག་པ་གཉིས་པའི་རབ་ཏུ་བྱེད་པ་གཉིས་པ་ལས། འདི་ནི་གཉིས་སུ་མེད་པར་བརྗོད། །འདི་ནི་བྱང་ཆུབ་སེམས་མཆོག་ཉིད། །རྡོ་རྗེ་རྡོ་རྗེ་སེམས་དཔའ་དཔལ། །རྫོགས་པའི་སངས་རྒྱས་བྱང་ཆུབ་ཉིད། །འདི་ནི་ཤེས་རབ་ཕ་རོལ་ཕྱིན། །ཕ་རོལ་ཕྱིན་པ་ཀུན་གྱི་དངོས། །མཉམ་ཉིད་བསམ་བྱ་ཉིད་དུ་གསུངས། །སངས་རྒྱས་ཀུན་མཆོག་བསྒོམ་པ་ཉིད། །ཅེས་བྱ་བ་ཚིགས་སུ་བཅད་པ་གཉིས་ཀྱིས་མིང་གི་རྣམ་གྲངས་བཅུ་ུབཞིའི་སྒོ་ནས་དེ་ཁོ་ན་ཉིད་ཀྱི་དོན་ཐམས་ཅད་འདི་དག་ཡིན་པར་སྟོན་ཏེ། དེ་ལ་ཐབས་དང་ཤེས་རབ་ཀྱི་བསྒོམ་པ་འདི་ནི་སོ་སོར་མི་བསྒོམ་པས་ན་གཉིས་སུ་མེད་པ་ཞེས་བྱ་སྟེ། འབུམ་ལས་ཀྱང་། གཉིས་སུ་མེད་དེ་གཉིས་སུ་བྱར་མེད་སོ་སོ་མ་ཡིན་ཐ་མི་དད་དོ་ཞེས་བྱ་བ་དང་། བསམ་མི་ཁྱབ་པ་ལས་ཀྱང་། རྟག་ཆད་སོགས་ཀྱི་དོགས་པ་ཀུན་ལས་རྣམ་པར་གྲོལ་ཞིང་འཁོར་འདས་སོགས་གཉིས་གཉིས་སུ་དབྱེ་བ་མེད་ཅིང་གང་དུའང་མ་གྲུབ་པས་མཆོག་ཏུ་ཞི་བ། །སྤྲོས་པ་མེད་པས་མཁའ་མཉམ་མཐར་འཛིན་ཀྱི་རྣམ་རྟོག་ལས་གྲོལ་བ། །འདི་ནི་གཉིས་སུ་མེད་པར་བརྗོད། །ཅེས་གསུངས་སོ། །གཉིས་མེད་དང་ཟུང་འཇུག་ཀྱང་མིང་གི་རྣམ་གྲངས་ཏེ། རིམ་པ་ལྔ་པ་ལས། དེ་ལྟར་ཏིང་ངེ་འཛིན་གང་ལ་གནས་པའི་རྣལ་འབྱོར་པ་ནི། །ཟུང་འཇུག་རིམ་པ་གནས་པ་སྟེ། །ཏིང་འཛིན་དེ་ཉིད་གཉིས་མེད་ཡེ་ཤེས་ཏེ། །སྲིད་ཞིར་མི་གནས་པས་མི་གནས་མྱ་ངན་འདས་པ་ཡིན། །ཞེས་སུངས་སོ། །དེས་ན་ཟུང་འཇུག་ཅེས་བྱ་སྟེ། དེ་ཉིད་ལས། ཀུན་རྫོབ་དང་ནི་དོན་དམ་པ་དག །ཀུན་རྫོབ་ཏུ་འཁོར་འདས་ཀྱི་བྱེ་བྲག་སོ་སོའི་ཐ་དད་པའི་ཆར་ནི་གནས་པ་ཡིན་ཡང་དོན་དམ་པར་བྱེ་བྲག་མེད་པར་ཤེས་གྱུར་ནས། །ཏིང་ངེ་འཛིན་གང་དུ་ཡང་དག་པར་འདྲེས་པར་གྱུར་པ་དེ་ནས། །ཟུང་དུ་འཇུག་པར་དེས་བཤད་དོ། །ཞེས་གསུངས་སོ། །དེ་ཉིད་ལ་མིང་གཞན་བྱང་ཆུབ་ཀྱི་སེམས་ཞེས་བྱ་སྟེ། འདུས་པའི་རྒྱུད་ཕྱི་མ་ལས། ཐོག་མར་སྐྱེ་བ་དང་ཐ་མར་འགག་པ་དེས་མཚོན་ནས་གནས་པ་མེད་ཅིང་རྣམ་རྟོག་བྲལ་བའི་ཞི་བའི། །དངོས་པོ་ཟད་པས་རྟག་མཐའ་དང་དངོས་མེད་ཟད་པས་ཆད་མཐའ་ལས་གྲོལ་བ་དེས་ན་ཟད་པ་ཐམས་ཅད་ལ་ཁྱབ་པའི་ཕྱིར་གཙོ་བོ། །སྟོང་ཉིད་སྙིང་རྗེ་དབྱེར་མི་ཕྱེད་པས། །དེ་ཉིད་ནི་བྱང་ཆུབ་སེམས་ཞེས་བྱ་བ་ཡིན། །ཞེས་གསུངས་ལ། འཕགས་པས་ཀྱང་། སངས་རྒྱས་རྣམས་ཀྱི་བྱང་ཆུབ་སེམས། །དེའང་མུ་སྟེགས་པས་བཏགས་པའི་བདག་དང་ཉན་ཐོས་ཀྱིས་བཏགས་པའི་ཕུང་པོ་དང་སེམས་ཙམ་པས་བཏགས་པའི་རྣམ་རིག་གི། རྟོག་པ་རྣམས་ཀྱིས་མ་བསྒྲིབས་ཤིང་། །རྟག་ཏུ་སྤྲོས་བྲལ་སྟོང་ཉིད་ཀྱི་མཚན་ཉིད་དུ་བཞེད་དོ། །ཅེས་གསུངས་སོ། །དེ་ཉིད་ལ་རྡོ་རྗེ་ཞེས་བྱ་སྟེ། རྡོ་རྗེ་རྩེ་མོ་ལས། རྟོག་པས་མི་ཕྱེད་པས་སྲ་ཞིང་སངས་རྒྱས་ཐམས་ཅད་ཐུགས་མཉམ་པ་ཉིད་དུ་འདྲེས་པའི་ངོ་བོ་ཡིན་པས་སྙིང་པོ་བརྫུན་པ་མེད་པས་ཁོང་སྟོང་མེད་པ། །རྣམ་རྟོག་མངོན་རྟོགས་ལྗོན་ཤིང་གི་ཡི་གེ་དག་བཅོས་དང་མཆན་བུ། གི་གྲིས་གཅད་པ་དང་ཡེ་ཤེས་ཀྱི་རྡོ་རྗེས་ཀྱང་གཞིག་པར་བྱ་བ་མིན། །སྐྱེ་བའི་སྡུག་བསྔལ་གྱིས་བསྲེག་པར་བྱར་མེད་འཆི་བའི་སྡུག་བསྔལ་གྱིས་གཞིག་པར་བྱར་མེད་པར། །སྟོང་ཉིད་རྡོ་རྗེར་བརྗོད་པར་བྱ། །ཞེས་གསུངས་སོ། །དེ་ཉིད་ལ་རྡོ་རྗེ་སེམས་དཔའ་ཞེས་བརྗོད་དེ། རྡོ་རྗེ་རྩེ་མོ་ཉིད་ནས་གསུངས་པ། དེ་བཞིན་དུ་སྐུ་གསུང་ཐུགས་རྣམ་པར་གཞག་པ་བྱང་ཆུབ་མཆོག་གི་ཡེ་ཤེས་གང་ཡིན་པ། །དེ་ནི་རྡོ་རྗེ་ངེས་པར་བརྗོད། །ཡེ་ཤེས་དེ་ཆོས་དབྱིངས་རྡོ་རྗེ་ལས་བྱུང་བ། །དེ་ནི་རྡོ་རྗེ་སེམས་དཔའ་ཡིན་པར་བརྗོད། །ཅེས་གསུངས་ལ། རྩ་བའི་རྒྱུད་ལས་ཀྱང་། སྟོང་པ་ཉིད་རྡོ་རྗེ་རྣམ་རྟོག་གིས་མི་ཕྱེད་ཅེས་བྱར་བརྗོད། །སེམས་དཔའ་སྲིད་པ་གསུམ་རོ་གཅིག་ཏུ་རྟོགས་པ་ཡེ་ཤེས་སོ། །འདིས་ནི་ཤེས་རབ་རིག་པ་ཡིས། །རྡོ་རྗེ་སེམས་དཔའ་ཞེས་བྱར་བརྗོད། །ཅེས་གསུངས་སོ། །དེ་ཉིད་ལ་དཔལ་ཞེས་བྱ་སྟེ། ཧེ་བཛྲ་ལས། ཤྲཱི་ནི་གཉིས་མེད་ཡེ་ཤེས་ཏེ། །ཞེས་གསུངས་པ་བཞིན་ནོ། །ཡང་དེ་ལ་དཔལ་མཆོག་དང་པོ་ཞེས་བྱ་སྟེ། དཔལ་མཆོག་དང་པོ་ལས། སྐྱེ་འགག་གནས་གསུམ་དང་བྲལ་བས་ཐོག་མཐའ་མེད་པའི་དམིགས་མེད་ཀྱི་ཐུགས་རྗེས་འགྲོ་དོན་ལ་ཆགས་པས་སེམས་དཔའ་དེ་ཉིད་ལ་ནི། །རྡོ་རྗེ་སེམས་དཔའ་ཞེས་ཀྱང་བརྗོད། དེ་ཉིད་ལ་སེམས་ཅན་གྱི་དོན་ལ་དགྱེས་པས་དགའ་བ་ཆེ། །༼དེའི་ཕྱག་རྒྱ་ནི་རྡོ༷་རྗེ༷་སྙེམ༷ས་མ༷འི་ཚུལ་ལོ། །དེའི་བདག་པོ་ནི་བྱང་ཆུབ་སེམས་ཆེན་པོའི་མཚན་ཅན་གྱི་ཐུགས་སོ། །དེའི་བདག་ཉིད་ཡིན་པས་བད༷ག་པོ༷འི་བད༷ག་ཅེས་སོ། །༽དྲི་མས་མ་གོས་པས་ཀུན་ཏུ་བཟང་པོ་ཐམས་ཅད་ཀྱི་རང་བཞིན་ཡིན་པས་ཀུན་བདག་ཉིད། །དེ་ཉིད་ལས་བཅོམ་ལྡན་འདས་དང་དཔལ་དང་མཆོག་དང་དང་པོའི་སྐྱེས་བུའོ་ཞེས་འབྱུང་ངོ་། །དེ་ཉིད་ལ་རྫོགས་པའི་སངས་རྒྱས་ཞེས་བྱ་སྟེ། རྡོ་རྗེ་རྩེ་མོ་ལས། དེ་བཞིན་ཉིད་ནི་མི་བསླུ་བས་བདེན་པ་མི་འགྱུར་བས་ཤིན་ཏུ་བརྟན་པ། །དེ་ལྟ་བུའི་དེ་ཁོ་ན་ཉིད་གང་ཡིན་པ་དེ་རྟོགས་ནས། །ཇི་སྙེད་པའི་ཆོས་ཀུན་རྟོགས་པ་ཞེས་བྱ་གང་ཡིན་པ། །དེ་ཉིད་རྟོགས་པས་སངས་རྒྱས་བརྗོད། །ཅེས་གསུངས་སོ། །དེ་ཉིད་ལ་བྱང་ཆུབ་ཅེས་བྱ་སྟེ། རྡོ་རྗེ་གུར་ལེའུ་བཅུ་བཞི་པ་ལས། ཤེས་བྱ་ཇི་ལྟ་བ་རང་བཞིན་མེད་པའི་ཕྱིར་སེམས་པ་མེད་ཅིང་དམིགས་པ་མེད་པའི་ཕྱིར་ཞེས་པ་ནི་ལྟ་བ་བསྒོམ་པ་མེད། །སྤྱོད་པ་མེད་པའི་ཕྱིར་སྔགས་མེད་ལྷ་ཡང་མེད་པ་སྟེ། །སེམས་ཀྱི་རྡོ་རྗེ་སྐྱེས་པ་མེད་པའི་རང་བཞིན་ལས་བྱུང་བ། །འདི་ནི་བྱང་ཆུབ་ཐོབ་བྱེད་ཀྱི་ལམ་གྱི་རིམ་པ་བསྟན་པའོ། །ཞེས་གསུངས་སོ། །དེ་ཉིད་ལ་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བྱ་སྟེ། དེ་ལ་གཉིས། ཤེས་རབ་དང་། ཤེས་རབ་ཀྱི་ཕ་རོལ་ཏུ་ཕྱིན་པའོ། །དང་པོ་ནི་རྡོ་རྗེ་རྩེ་མོ་ལས། ཤེས་རབ་ཟབ་པ་དང་ཐབས་རྒྱ་ཆེ་བ་རབ་ཏུ་སྦྱོར་བའི་གསང་སྔགས་ཀྱི་སྦྱོར་བ་ཤེས་པར་གྱུར་ཅིང་། །གོང་ནས་གོང་དུ་ཁྱད་པར་དུ་ནི་རྟོགས་པ་འཕེལ་བར་བྱེད། །དོན་དམ་པའི་བདེན་པ་དེ་བཞིན་ཉིད་ཤེས་པའི། །ཤེས་པ་ལ་ཤེས་རབ་ཅེས་སུ་བཤད། །ཅེས་པ་དང་། གཉིས་པ་ལའང་དེ་ཉིད་ལས། ཕྱི་རོལ་པ་དང་ཉན་ཐོས་དང་རང་རྒྱལ་གྱི། །ཤེས་རབ་ལས་ནི་བླ་མ་སྟེ་གོང་མར་བརྗོད་པའི། །དེ་བཞིན་ཉིད་སྤྲོས་པ་ཐམས་ཅད་ཞི་བ་རབ་ཀྱི་མཐར་ཐུག་པའི་ཕ་རོལ་ཏུ་ཕྱིན་པ་ནི། །ཤེས་རབ་ཕ་རོལ་ཕྱིན་ཞེས་བཤད། །ཅེས་གསུངས་སོ། །དེ་ཉིད་ལ་ཕ་རོལ་ཏུ་ཕྱིན་པ་ཀུན་གྱི་དངོས་ཏེ། ཡེ་ཤེས་དེ་ཉིད་ལ་མ་ཆགས་པས་སྦྱིན་པ། ཉེས་པས་མ་གོས་པས་ཚུལ་ཁྲིམས། ཞེ་སྡང་མེད་པས་བཟོད་པ། མྱུར་དུ་འཛུད་པས་བརྩོན་འགྲུས། རྩེ་གཅིག་པས་བསམ་གཏན་ནོ། །དེས་ན་འཕགས་པ་སྡུད་པ་ལས། སྦྱིན་པ་སྦྱིན་པའི་སྔོན་དུ་འགྲོ་བ་ཤེས་རབ་སྟེ། །ཚུལ་ཁྲིམས་བཟོད་པ་བརྩོན་འགྲུས་བསམ་གཏན་དེ་བཞིན་ནོ། །དགེ་ཆོས་ཆུད་མི་གསན་ཕྱིར་ཡོངས་སུ་འཛིན་པ་ཡིན། །འདི་ནི་ཆོས་རྣམས་ཐམས་ཅད་ཚུལ་གཅིག་སྟོན་པར་བྱེད། །ཅེས་གསུངས་སོ། །དེ་ཉིད་ལ་མཉམ་ཉིད་ཅེས་བྱ་སྟེ། འབུམ་ལས། ཆོས་ཐམས་ཅད་མཉམ་པ་ཉིད་པས་ཤེས་རབ་ཀྱི་ཕ་རོལ་ཏུ་ཕྱིན་པ་མཉམ་པ་ཉིད་དོ་ཞེས་གསུངས་སོ། །ཡང་འཁོར་འདས་མཉམ་པའི་ཕྱིར་ཏེ། དབུ་མ་ལས། མྱ་ངན་འདས་མཐའ་གང་ཡིན་པ། །དེ་ཉིད་འཁོར་བའི་མཐའ་ཡིན་ཏེ། །དེ་ཉིད་ཁྱད་པར་ཅུང་ཟད་ནི། །ཤིན་ཏུ་ཕྲ་བའང་ཡོད་མ་ཡིན། །ཞེས་གསུངས་སོ། །དེ་ཉིད་བསམ་པར་བྱ་བ་ཉིད་དེ། རིགས་པ་དྲུག་ཅུ་པ་ལས། མྱ་ངན་འདས་པ་བདེན་གཅིག་པུ། །དེ་ཚེ་ལྷག་མ་ལོག་པ་ཞེས། །རྒྱལ་བ་རྣམས་ཀྱིས་གང་གསུངས་པ། །མཁས་པ་ཅི་ཕྱིར་འདོད་མི་བྱེད། །ཅེས་གསུངས་སོ། །དེ་ཉིད་ལ་སངས་རྒྱས་ཀུན་ཞེས་བྱ་སྟེ། མཉམ་སྦྱོར་ལས། སྐུ་གསུམ་གཉིས་སུ་མེད་པའི་ཡེ་ཤེས་ནི་སངས་རྒྱས་ཀུན་གྱི་དངོས་པོ། །རྡོ་རྗེ་སེམས་དཔའ་སྟེ་དེ་ཉིད་བདེ་བའི་མཆོག་ཀྱང་ཡིན་ནོ། །ཅེས་གསུངས་སོ། །དེ་ཉིད་མཆོག་སྟེ། དཔལ་མཆོག་ལས། སྒྲིབ་གཉིས་རྣམ་པར་དག་པའི་ཡེ་ཤེས་བྱང་ཆུབ་ཀྱི་སེམས་ནི་རྡོ་རྗེ་འཆང་ཡིན་ལ། དེ་ཆེན་པོ་རྣམས་ཀྱི་འདོད་མངོན་རྟོགས་ལྗོན་ཤིང་གི་ཡི་གེ་དག་བཅོས་དང་མཆན་བུ། བྱ་ཡིན་པའི་འདོད་པའི་སྒྲས་བསྟན་ཏེ། འདོད་པ་དེས་སངས་རྒྱས་ནས་སོ་སྐྱེའི་བར་གྱི་སེམས་ཅན་ཀུན་གྱི་ཡིད་ལ་ཁྱབ་པ་སྟེ་སངས་རྒྱས་རྣམས་ལ་རྣམ་དག་གི་ཚུལ་དང་། །བྱང་སེམས་རྣམས་ལ་རང་གི་བའི་ཚུལ་གྱི་ཁྱབ། །སེམས་ཅན་ཀུན་གྱི་སྡུག་ཅིང་ཡིད་དུ་འོང་བས་ཡིད་ལ་གནས། །སེམས་ཅན་ཀུན་གྱི་ཡབ་གྱུར་ཉིད་དེ་བདེ་བ་རབ་ཏུ་སྩོལ་བས་སོ། །བཅོམ་ལྡན་འདི་ནི་འདོད་ཆགས་ཏེ་འདོད་པའི་མཆོག་ཀྱང་ཡིན་ལ་འདོད་ཆགས་དམ་ཚིག་གི་མཆོག་ཏུ་གྱུར་པ་ཡང་དག་པའི་ཡེ་ཤེས་ཡིན་ནོ། །ཞེས་གསུངས་སོ། །དེ་ཉིད་ལ་སྒོམ་པ་ཞེས་བྱ་སྟེ། འདུས་པ་ལས། བྱང་ཆུབ་ཀྱི་སེམས་དེ་མེད་པ་ཞིག་བསྒོམ་མམ། ཡོད་པ་ཞིག་བསྒོམ། དང་པོ་ལྟར་ན། དངོས་པོ་ཐམས་ཅད་ཀྱི་ངོ་བོ་ཉིད་མེད་པ་སྒོམ་པའི་དངོས་པོ་མེད་དེ་བསྒོམ་བྱ་མེད་པས་སོ། །གཉིས་པ་ལྟར་ན། བསྒོམ་པར་བྱ་བའི་དངོས་པོ་ཡོད་པ་དེའང་སྒོམ་པ་ལ་དགོས་པ་ཡོད་པ་མིན་ཏེ་མ་བསྒོམས་ཀྱང་ཡོད་པས་སོ། །ཕྱོགས་གཉིས་ཀ་བཀཀ་པ་དེ་བས་ན་དངོས་པོ་དང་དངོས་མེད་གཉིས་ཡིན་པ་དང་མིན་པའི་ཕུང་གསུམ་པ་དེ་མེད་པས་ན། །གང་དུའང་དམིགས་སུ་མེད་པ་ནི་སྒོམ་པའོ། །ཞེས་གསུངས་སོ། །དེ་བཞིན་དུ་ཀྱེའི་རྡོ་རྗེ་དང་། བདེ་མཆོག་དང་། དུས་ཀྱི་འཁོར་ལོ་དང་། གསང་བ་འདུས་པ་དང་། ཐམས་ཅད་མཁྱེན་པ་དང་། བསམ་གྱིས་མི་ཁྱབ་པ་དང་། ཡིད་ལ་མི་བྱེད་པ་ལ་སོགས་པ་མིང་གི་རྣམ་གྲངས་མཐའ་ཡས་པའི་བདག་ཉིད་ཅན་ནི་གཉིས་སུ་མེད་པ་འདི་ཉིད་ཡིན་ནོ་ཞེས་སྤྲོས་པ་ཆོད་པར་བྱའོ། །ཐམས་ཅད་ཀྱི་རྟོགས་བྱའང་འདི་ཉིད་ཡིན་ནོ་ཞེས་པས་བསྟན་ཟིན་ཏོ། །
ལྟ་བ་དེ་རྟོགས་བྱེད་ཁྱད་དུ་འཕགས་པ་གསང་སྔགས་ཡིན་ཞིང་གཞན་གྱིས་མི་རྟོགས་པར་བསྟན་པ།
ད་ནི་སྤྱི་དོན་ལྔ་པ་དེ་ལྟ་བུའི་ལྟ་བ་དེ་རྟོགས་བྱེད་ཁྱད་པར་དུ་འཕགས་པ་གསང་སྔགས་ཡིན་ཞིང་གཞན་གྱིས་མི་རྟོགས་པར་བསྟན་པའོ། །འདི་ལ་བཞི་སྟེ། དེ་ཁོ་ན་ཉིད་དེ་ཐབས་གཞན་གྱིས་མི་རྟོགས་ཤིང་ཐབས་ཟབ་མོས་རྟོགས་པར་བསྟན་པ་དང་། གསང་སྔགས་ཀྱི་ལུགས་ཀྱི་ལྟ་བ་ལས་ཁྱད་པར་དུ་ཡེ་ཤེས་བསྟན་པ་དང་། ཡེ་ཤེས་དེ་དཔེའི་ཡེ་ཤེས་སུ་བསྟན་པ་དང་། ཡེ་ཤེས་དེའང་ལུས་ལ་གནད་དུ་བསྣུན་པས་རྟོགས་པའི་ཕྱིར་རྡོ་རྗེ་ལུས་ཀྱི་གནས་ལུགས་གཏན་ལ་དབབ་པའོ། །དེ་ལ་དང་པོ་ནི། རྩ་བའི་རྒྱུད་ཀྱི་ལེའུ་བརྒྱད་པ་ལས། གཞན་གྱིས་བརྗོད་མིན་ལྷན་ཅིག་སྐྱེས། །གང་དུ་ཡང་ནི་མི་རྙེད་དེ། །ཞེས་འབྱུང་སྟེ། ཕ་རོལ་ཏུ་ཕྱིན་པའི་ཐེག་པ་ལ་སོགས་པའི་ཐོས་བསམ་ལ་སོགས་པས་མི་རྟོགས་ཏེ། སློབ་དཔོན་ཨཱཪྱ་དེ་ཝས་བདག་བྱིན་གྱིས་བརླབ་པ་ལས། བསྐལ་པ་བྱེ་བ་རྣམས་སུ་ཡང་། །ཐོས་པའི་ཕ་རོལ་སོན་གྱུར་ཀྱང་། ཀུན་རྫོབ་བདེན་པ་སྒྱུ་མའི་དཔེས་མཚོན་པའི་སངས་རྒྱས་ཀྱི་སྐུ་ནི་བདག་བྱིན་བརླབ་ལ་ཕྱིར་ཕྱོགས་པ་སྟེ་དེ་མི་ཤེས་པས། །གང་ཟག་དེ་ཡིས་སྒྱུ་ལུས་དེ་ཉིད་རྙེད་པར་མི་འགྱུར། །ཞེས་པ་དང་། ཆོས་ཀུན་རྨི་ལམ་སྒྱུ་འདྲ་ཞེས། །སངས་རྒྱས་པ་ཀུན་སྨྲ་མོད་ཀྱི། །བདག་བྱིན་བརླབ་ལས་ཕྱིར་ཕྱོགས་པས། །རྨི་ལམ་སྒྱུ་འདྲས་རྟོགས་པ་མེད། །ཅེས་གསུངས་སོ། །འོ་ན་གང་ལས་རྙེད་སྙམ་ན། བླ་མའི་དུས་ཐབས་བསྟེན་པ་དང་། །བདག་གི་བསོད་ནམས་ས་ཤེས་བྱ། །ཞེས་གསུངས་ཏེ། བླ་མས་མན་ངག་གནང་བ་དང་། དབང་གསུམ་པའི་དུས་སུ་བྱང་ཆུབ་ཀྱི་སེམས་བསྒྲུབ་པ་ལ་སོགས་པ་སྔོན་དུ་སོང་བའི་དུས་དང་། དབབ་བཟློག་ལ་སོགས་པའི་ཐབས་དང་། ཕྱག་རྒྱ་བསྟེན་པ་དང་། བདག་གི་སྐྱེ་བ་འདིའམ་སྔ་མའི་བསོད་ནམས་ཀྱི་ཚོགས་བསགས་པས་བླ་མ་ལ་གུས་པ་ལ་སོགས་པ་དང་ལྡན་ཞིང་རྟེན་འབྲེལ་འཛོམ་ན་རྟོགས་པར་འགྱུར་རོ་ཞེས་བྱ་བའི་དོན་ཏོ། །རིམ་པ་ལྔ་ལས་ཀྱང་། རི་དབང་རྩེ་ལས་འགའ་ཞིག་ལྷུང་གྱུར་ན། །ལྟུང་བར་མི་འགྱུར་སྙམ་ཡང་ལྟུང་བར་འགྱུར། །བླ་མའི་དྲིན་གྱིས་ཕན་པའི་ལུང་རྡོར་བཟླས་སོགས་རིམ་ལྔ་ཐོབ་ན། །གྲོལ་བར་མི་འགྱུར་སྙམ་ཡང་གྲོལ་བར་འགྱུར། །ཞེས་གསུངས་པ་ལྟ་བུའོ། །གཉིས་པ་གསང་སྔགས་ཀྱི་ལུགས་ཀྱི་ལྟ་བ་ལས་ཁྱད་པར་དུ་ཡེ་ཤེས་བསྟན་པ་ནི་ལེའུ་དང་པོ་ལས། ལུས་ལ་ཡེ་ཤེས་ཆེན་པོ་གནས། །རྟོག་པ་ཐམས་ཅད་ཡང་དག་སྤངས། །དངོས་པོ་ཀུན་ལ་ཁྱབ་པ་པོ། །ལུས་གནས་ལུས་ལས་མ་སྐྱེས་པའོ། །ཞེས་གསུངས་སོ། །རྡོ་རྗེའི་ཚིག་འདི་ལ་གཉིས། དངོས་པོའི་དེ་ཁོ་ན་ཉིད་རང་བཞིན་ལྷན་སྐྱེས་ལ་སྦྱར་ཏེ་རྣམ་གྲངས་ཀྱི་དོན་དམ་པར་བཤད་པ་དང་། དེ་ཉིད་གསང་སྔགས་ཀྱི་ལུགས་ཀྱི་ཞུ་བདེ་ལྷན་སྐྱེས་ལ་སྦྱར་བའོ། །དང་པོ་ནི་དོན་ལྔ་སྟེ། རང་གི་ངོ་བོ་དང་། མཚན་ཉིད་དང་། དེའི་རྟེན་དང་། ཡེ་ཤེས་དེ་ཐམས་ཅད་ཀྱི་བདག་ཉིད་དུ་བསྟན་པ་དང་། རྟེན་དང་བརྟེན་པའི་གནས་ལུགས་བསྟན་པའོ། །དང་པོ་ནི་ཁམས་གསུམ་གྱིས་བསྡུས་པའི་སེམས་ཅན་ཐམས་ཅད་ཀྱི་ལུས་ལ་རང་བཞིན་ལྷན་སྐྱེས་ཀྱི་ཡེ་ཤེས་ཀྱིས་ཁྱབ་པའོ། །གཉིས་པ་ནི་རྟོག་པ་ཐམས་ཅད་ཡང་དག་སྤངས་ཏེ། རང་བཞིན་གྱིས་སྒྲོ་བཏགས་སམ་མི་བདེན་པ་ལ་བདེན་པར་འཛིན་པས་རྟོག་པ་སྟེ་དེ་དང་བྲལ་བའོ་ཞེས་སྔར་བརྗོད་པའི་བདེན་པ་གཉིས་སམ་མཐའ་བྲལ་ཐམས་ཅད་འདིར་དྲན་པར་བྱའོ། །གསུམ་པ་རྟེན་ནི་ལུས་ལ༷་ཞེས་པ་སྟེ། རང་གི་ལུས་ནི་སངས་རྒྱས་ཀྱི་སྙིང་པོ་ཅན་ཡིན་པའི་ཕྱིར་རོ། །བཞི་པ་ནི། དངོས་པོ་ཀུན་ལ་ཁྱབ་པ་པོ་སྟེ། ཕུང་པོ་ཁམས་དང་སྐྱེ་མཆེད་དང་ཁམས་གསུམ་མམ་འཁོར་འདས་ཀྱིས་བསྡུས་པའམ་བདེན་པ་གཉིས་ཀྱིས་བསྡུས་པའོ། །ལྔ་པ་ནི་ལུས་ལ་གནས་ཀྱང་ལུས་ལས་མ་སྐྱེས་པ་སྟེ། ཡེ་ཤེས་ཀྱི་ངོ་བོ་ཉིད་ཀྱི་ཕྱིར་ཏེ་རྩོད་པ་སྤང་བའོ། །དེ་དག་ཀྱང་ཞིབ་ཏུ་གོང་དུ་མཐའ་གཉིས་སམ་མཐའ་བྲལ་གྱི་སྐབས་སུ་བརྗོད་པ་བཞིན་འདིར་ཡང་རྟོགས་པར་བྱའོ། །གཉིས་པ་ཞུ་བདེ་ལྷན་སྐྱེས་ལ་སྦྱར་ན་སྔར་བཞིན་ལྔ་སྟེ། དང་པོ་ནི་ཡེ་ཤེས་ཆེན་པོ་སྟེ་དབང་གསུམ་པའི་དུས་སུ་རྟོགས་པའི་ཞུ་བདེའི་ཡེ་ཤེས་སོ། །གཉིས་པ་ནི་རྟོག་པ་ཐམས་ཅད་ཡང་དག་སྤངས་ཏེ་གློ་བུར་གྱི་རྟོག་པ་མེད་པའོ། །གསུམ་པ་ནི་ལུས་གནས་༼ལ་༽སྟེ་ཕྱི་རོལ་གྱི་གཏན་ཚིགས་ལ་སོགས་པས་མི་རྙེད་དེ། རྟེན་དཀྱིལ་འཁོར་གསུམ་རླུང་དང་བཅས་པ་ལས་རྟོགས་སོ། །དེ་ཡང་ཆོས་ཀྱི་དབྱིངས་སུ་བསྟོད་པ་ལས། སེམས་ཀྱི་རང་བཞིན་འོད་གསལ་ནི་ངོ་ཤེས་པ་དང་མི་ཤེས་པ་དག་ལས། །དོན་ལ་རང་གི་ལུས་འདི་ཉིད་ལ་ཐམས་ཅད་དུ་ཁྱབ་བྱེད་དུ་གནས་ཀྱང་བླུན་པོས་དེ། །རང་གི་རྣམ་པར་རྟོག་པས་བཅིངས་ལ་མཁས་པས། །བདག་ཉིད་ཤེས་ན་གྲོལ་བར་འགྱུར། །ཞེས་གསུས་ཀྱང་བརྒྱུད་དེ་སྐྱེ་ལ་དངོས་སུ་མ་ཡིན་ནོ་ཞེས་བྱ་བའི་དོན་ཏོ། །དེས་ན་ཚིགས་སུ་བཅད་པ་གཅིག་པོ་འདིས་ནི་ལྟ་བ་ཐམས་ཅད་བསྟན་ཏེ། རང་བཞིན་ལྷན་སྐྱེས་ནི་སྔར་གྱི་རྣམས་ཡིན་ལ། ཞུ་བདེ་ལྷན་སྐྱེས་ནི་ད་འཆད་པ་རྣམས་ཡིན་པས་ན་འདིའི་སྟེང་དུ་ཐམས་ཅད་རྟོགསངས་སོ། །བཞི་པ་ནི་དངོས་པོ་ཀུན་ལ་ཁྱབ་པ་པོ་སྟེ། ལུས་ལ་རྩས་ཁྱབ་ལ་དེ་ལ་བྱང་སེམས་གནས་ལ། དེ་བདེ་བས་ཁྱབ་ལ་དེ་མི་རྟོག་པས་ཁྱབ་ཅིང་དེ་ལས་དཔེའི་ཡེ་ཤེས་སྐྱེ་ཞེས་པའི་དོན་ཏོ། །ལྔ་པ་ནི་ལུས་ལ་གན་པར་བྱ་སྟེ། ཞིབ་ཏུ་རྒྱུད་ཉིད་ཀྱི་སྟེང་དུ་རྟོགས་པར་ཡང་འགྱུར་རོ། །གསུམ་པ་ཡེ་ཤེས་དེ་དཔེའི་ཡེ་ཤེས་སུ་བསྟན་པ་ནི་ལེའུ་བཅུ་པ་ལས། གང་ཕྱིར་འབྱུང་བ་ཆེན་པོ་ལས་བྱུང་བའི་བདེ་བ་ཡིན་པ། །དེ་ཕྱིར་བདེ་བ་ལྷན་སྐྱེས་ཀྱི་ཡེ་ཤེས་དེ་ཉིད་དངོས་མིན་ནོ། །ཐབས་ཤེས་དང་ཞུ་བདེ་གཉིས་ལྷན་ཅིག་ཏུ་སྐྱེས་པ་ལས་གང་སྐྱེས་པའི་མི་རྟོག་པའི་ཡེ་ཤེས་དེ་ལ། །ལྷན་ཅིག་སྐྱེས་པར་དེ་བརྗོད་པར་བྱའ།ོ། ཆས་ོཐམས་ཅད་ཀྱ་རང་ིབཞིན་སྤྲས་ོཔ་དང་བྲལ་བ་ལ་ལྷན་ཅག་ིསྐྱས་ེཔ་དངས་ོཞས་ེབརྗོད་དོ། །དེའང་ཆོས་ཅན་ཀྱི་རྣམ་པ་ཐམས་ཅད་ཆོས་ཉིད་དེ་བཞིན་ཉིད་དུ་སྡོམ་པ་སྟེ་གཅིག་པ་ཉིད་དོ། །ཅེས་གསུངས་ཏེ། དབང་ལས་བྱུང་བའི་ཡེ་ཤེས་དེ་ནི་དཔེའི་ཡེ་ཤེས་ཡིན་ཏེ། ཡེ་ཤེས་གྲུབ་པ་ལས་ཀྱང་། དབང་པོ་གཉིས་འབྱུང་བདེ་བ་ནི། །དེ་ཁོ་ན་ཉིད་དངོས་ཡིན་ཞེས་སྐྱེ་ངན་སྨྲའི། །དེ་ནི་བདེ་བ་མཆོག་ཡིན་ཞེས། །རྒྱལ་བ་མཆོག་གིས་མ་གསུངས་སོ། །ཞེས་གསུངས་ཏེ། བཞིན་གྱི་དཀྱིལ་འཁོར་ལྟ་བར་འདོད་པ་ལ་མེ་ལོང་གི་གཟུགས་༼བརྙ༷ན་༽བཞིན་ནོ། །དེ་ཁོ་ན་མཐོང་ལམ་དངོས་ཡིན་ན་སྐྱོན་ཡོད་དེ། བདེན་པ་མཐོང་བར་འགྱུར་བ་དང་། དེ་འདོད་ན་གྲུབ་པར་འགྱུར་བ་དང་། དེ་འདོད་ན་མངོན་སུམ་གྱིས་བསལ་བ་དང་། བདེན་པ་མཐོང་ཡང་མི་འགྲུབ་ན་སྣང་གྲགས་ཀྱི་ཆོས་ཐམས་ཅད་སེམས་ལས་མེད་ལ། སེམས་རྟོགས་ནས་མི་འགྲུབ་ན་གྲུབ་པའི་ཡོན་ཏན་སྐྱེས་པ་མེད་པར་འགྱུར་བ་དང་། བདེན་པ་མཐོང་ཡང་འགགས་ན་ཕྱིས་གྲུབ་ནའང་འགག་པར་འགྱུར་བ་དང་། དེ་ལྟ་ན་འབད་པ་དོན་མེད་པར་འགྱུར་བ་དང་། ཕྱིས་ཀྱི་བདེན་པ་མཐོང་བ་མཐོང་ལམ་མ་ཡིན་པར་འགྱུར་བ་ལ་སོགས་པའི་སྐྱོན་དུ་མ་ཡང་འབྱུང་སྟེ། འོག་དཀྱིལ་འཁོར་འཁོར་ལོའི་སྐབས་སུ་རྒྱས་པར་བརྗོད་པར་འོ། །བཞི་པ་དེ་ལྟ་བུའི་ལྟ་བ་རྟོགས་པ་དེ་ཐབས་ཟབ་མོ་ལུས་ལ་བརྟེན་ནས་རྟོགས་པའི་ཕྱིར་རྡོ་རྗེ་ལུས་ཀྱི་གནས་ལུགས་དཀྱིལ་འཁོར་གསུམ་རླུང་དང་བཅས་པས་རྟོགས་པར་བྱ་བས་ན། འདིར་བསྟན་པ་ལ་གསུམ་སྟེ། དང་པོ་ལུས་ཇི་ལྟར་འགྲུབ་པའི་ཚུལ་བསྟན་པ་དང་། ད་ལྟ་ལུས་གནས་པ་ལ་རྩ་དང་འཁོར་ལོ་ལ་སོགས་པ་ཇི་ལྟར་གནས་པ་གཏན་ལ་དབབ་པ་དང་། ཐ་མ་ཇི་ལྟར་འཇིག་པའི་ཚུལ་ལོ། །དེ་ལ་ཐ་མ་འདི་ཉིད་སྔོན་དུ་བརྗོད་ན་བདེ་བས་དེ་སྔོན་དུ་བརྗོད་ན། འཆི་བའི་དུས་སུ་ས་ཆུ་ལ་ཐིམ་སྟེ་ལུས་ཀྱི་སྟོབས་ཉམས། ཆུ་མེ་ལ་ཐིམ་སྟེ་ལུས་ཀྱི་གཤེར་བའི་དངོས་པོ་སྐམ། མེ་རླུང་ལ་ཐིམ་སྟེ་ལུས་ཀྱི་དྲོད་ཡལ། རླུང་རྣམ་པར་ཤེས་པ་ལ་ཐིམ་སྟེ་དབུགས་རྒྱུ་བ་ཆད། རྣམ་པར་ཤེས་པ་འོད་གསལ་ལ་ཐིམ་སྟེ་དེའི་དུས་སུ་གདམས་ངག་ཡོད་ན་འཆི་ཁ་མའི་ཡེ་ཤེས་ངོ་འཕྲོད། ངོ་མ་འཕྲོད་ན་བར་དོར་རྫུས་སྐྱེས་ཀྱི་ལུས་ལེན། དེར་བར་དོའི་གདམས་ངག་ཡོད་ན་ངོ་འཕྲོད། མ་འཕྲོད་ན་སྐྱེ་བ་ལེན་པས་ན་ཐོག་མར་ལུས་ཇི་ལྟར་ཆགས་པ་དང་སྦྱར་བར་བྱ་སྟེ། དེ་ཡང་སཾ་པུ་ཊའི་དྲུག་པའི་དང་པོ་ལས། སྙིང་སྟོབས་སྐུ་སྟེ་ལུས་དང་རྡུལ་འོག་དང་བཅས། །མུན་པ་སེམས་ཀྱི་རང་བཞིན་འདྲེས་པ་ལས་གྲུབ་བོ། །དེའང་སྙིང་སྟོབས་ཁུ་བ་དང་རིན་ཆེན་ཏེ་རཀྟ་རྡུལ་དང་། །མུན་པ་སེམས་གསུམ་ལས་ལུས་སྐྱེད་པར་བྱེད་པ་ཉིད་དོ། །དེ་ལྟར་བསྐྱེད་པ་དེའང་ཁུ་ཁྲག་འབབ་པའི་རྩ་ཡི་ཀུན་སྤྱོད་ཉིད་གསུངས་པ། །ཁུ་ཁྲག་འབབ་པའི་རྩ་དེ་ཡི་སྒོ་ཡང་རོ་རྐྱང་གི་སྒོ་དེ་ཉིད་ལས། །དེ་རྣམས་མ་ཡི་མངལ་དུ་འདུ་བའི་དུས་སུ་ནི། །བུ་ཚའི་ལུས་ལྷ་ཡི་ཞལ་ཕྱག་གི་རྣམ་པ་ཅན་དམིགས་པ་སྟེ་སྐྱེ་བར་འགྱུར་བ་ཡིན་ནོ། །ཁམས་དཀར་པོ་རུས་པ་རྐང་ཁུ་བ་གསུམ་གྱི་རྒྱུ་དང་། དམར་པོ་པགས་པ་ཤ་ཁྲག་གསུམ་གྱི་རྒྱུ། ཞེས་གསུངས་སོ། །དེ་ལ་དང་པོ་གྲུབ་ཚུལ་ལ་བཞི། ལུས་ངག་ཡིད་གསུམ་རྟེན་དང་བརྟེན་པའི་ཚུལ་དང་། སེམས་ལས་ལུས་ངག་ཇི་ལྟར་སྐྱེ་བའི་ཚུལ་དང་། དེ་ལ་དཔེ་བརྒྱད་དང་སྟོང་པ་གསུམ་གྱིས་རྟེན་འབྲེལ་ལས་ཇི་ལྟར་སྐྱེ་བའི་ཚུལ་དང་། དེའང་སྐྱེ་གནས་བཞི་འགྲུབ་པའི་ཚུལ་ལོ། །དང་པོ་ནི་དེ་ལ་སྤྱིར་སེམས་གཟུང་བ་དང་འཛིན་པས་བསྡུས་པ་མཚན་མ་དང་རྣམ་པར་རྟོག་པ་སྣ་ཚོགས་སུ་སྣང་བ་དང་། ངག་རགས་པ་སྨྲ་བ་དང་སྤྱོད༼དགོ༷ད་༽པ་ལ་སོགས་པ། ཕྲ་བ་རླུང་གིས་བསྡུས་པ་དང་། ལུས་རགས་པ་དབང་པོ་རྟེན་ཁོག་པ་དང་བཅས་པ་ཕྲ་བ་རྩ་དང་ཐིག་ལེས་བསྡུས་པ་འདི་ལ་ལུས་ངག་ལ་རྟེན་ཞེས་གྲགས། སེམས་ལ་བརྟེན་པ་ཞེས་གྲགས་སོ། །ཡང་། ལུས་དང་ངག་དང་ཡིད་དང་གསུམ། །གཅིག་ལ་གཅིག་བརྟེན་པ་ཡིན་ཏེ་དེ་དག་ཀྱང་སེམས་གཅིག་གི་ངང་སྟེ་རང་བཞིན་ཡིན་ནོ། །ཞེས་གསུངས་སོ། །ཕྱག་རྒྱ་ཆེན་པོ་ཐིག་ལེ་ལས་ཀྱང་། འབྱུང་བ་ཆེན་པོ་བཞི་པོ་ནི། །སྲོག་གི་རྟེན་དུ་ཤེས་པར་བྱ། །ཡང་ན་སྲོག་སྟེ་རྣམ་ཤེས་ནི་འབྱུང་བ་དེ་རྣམས་ཀྱི་རྟེན་དུ། །ལེགས་དགྱེས་དབང་མོས་ཤེས་པར་གྱིས། །ཞེས་སོ། །དེས་ན་ད་ལྟ་ལུས་ངག་ཡིད་གསུམ་རགས་པ་སྣང་བ་འདི་ད་ལྟ་གནས་པའི་དབང་དུ་བྱས་ན། སེམས་གཟུང་བ་དང་འཛིན་པ་སྣ་ཚོགས་སུ་སྣང་བ་འདི་རླུང་ལ་བརྟེན་ལ། རླུང་ནི་ལུས་ཀྱི་དབང་པོ་དང་རྩའི་སྒོ་ལ་བརྟེན་ཏེ་གནས་སོ། །དེ་བས་ན་རྟེན་ལུས་ལ་གནད་དུ་བསྣུན་པས་བརྟེན་པ་སེམས་ལ་གནད་དུ་བསྣུན་པར་བྱེད་དོ། །གཉིས་པ་སེམས་ལས་ངག་ལུས་ཇི་ལྟར་སྐྱེ་ཚུལ་ནི། གལ་ཏེ་དེ་ལྟ་ན་ཉན་ཐོས་སམ་ཕྱི་རོལ་པ་ལྟར་ཕྱིའི་དོན་འགྲུབ་པར་མི་འགྱུར་རམ་ཞེ་ན། མ་ཡིན་ཏེ་ལུས་ནི་འབྱུང་བ་བཞི་ལས་སྐྱེ་ལ། འབྱུང་བ་གསུམ་པོ་རླུང་ལས་སྐྱེས། རླུང་རྣམ་པར་ཤེས་པ་ལས་སྐྱེ་བའི་ཕྱིར་ཏེ། ཞུ་བདེ་རོ་གཅིག་པའི་སེམས་ནི་ཆེན་པོ་ལྷན་སྐྱེས་ཀྱི་དགའ་བ་གཅིག་ཉིད་ལས། །འབྱུང་བ་ལྔ་དང་དཔེ་ཡེ་ཤེས་ལྔ་ཡི་གཟུགས་སམ་རང་བཞིན་ཀྱིས་དོན་གྱི་ཡེ་ཤེས་ལྔ་རྣམ་པར་མཚོན། །རྒྱུད་ཀྱི་ཚིག་ཕལ་ཆེར་གཞི་ལམ་འབྲས་གསུམ་ལ་སྦྱར་དགོས་ལ། ཚིག་གི་འབྲུ་སྣོན་ལམ་ལ་སྦྱར་ཏེ་བྲིས་ཀྱང་སྐབས་དོན་གྱི་ཤེས་བྱེད་དུ་འགྲོ་བ་ནི། སེམས་ཆེན་པོ་གཅིག་ཉིད་ལས་འབྱུང་བ་ལྔ་དང་ཕུང་པོ་ལྔ་སོགས་བྱུང་བ་ལ་གོ་དགོས་ཏེ་གཞིའི་སྐབས་ཡིན་པས་སོ། །ཞེས་ཧེ་བཛྲ་ལས་བཤད་དོ། །ཕྱག་རྒྱ་ཆེན་པོ་ཐིག་ལེ་ལས་ཀྱང་། རྣམ་ཤེས་གསུམ་གཡོ་བ་ལས་ནི་སྐྱེས་པ་རླུང་འབྱུང་ལ། །དེ་བསྐྱོད་པ་ལས་མེ་ནི་སྐྱེ་བར་འགྱུར། །དྲོད་དེ་ལས་ཆུ་ནི་རླངས་པའི་ཚུལ་གྱིས་འབྱུང་བར་འགྱུར། །དེ་ལས་སྐྱེས་པ་ནི་སའི་ཡིན་ཏེ། །འབྱུང་བ་དེ་རྣམས་ཀུན་ལས་ཕུང་པོ་འབྱུང་། །དེ་ལས་སྐྱེ་མཆེད་འབྱུང་བར་འགྱུར། །དེ་ལས་ཡེ་ཤེས་ཏེ་ཤེས་པའི་རང་བཞིན་རྟོག་པ་སྣ་ཚོགས་སྐྱེ། །དེའང་འདོད་ཆགས་སོགས་བརྒྱ་རྩ་བརྒྱད་ཀྱི་རིམ་པས་སོ། །ཞེས་གསུངས་སོ། །དེ་ལ་སེམས་གང་ལས་སྐྱེ་ཞེ་ན། འོད་གསལ་བ་ལས་སོ། །དེ་ལ་འོད་གསལ་བ་ཞེས་བྱ་བ་གང་ཡིན། དེ་ལས་སེམས་ཇི་ལྟར་སྐྱེ་ཞེ་ན། དེ་ལ་འོད་གསལ་བ་ནི་མ་བསྒྲིབས་པའི་ཕྱིར་འོད་གསལ་བ་སྟེ་སེམས་ཀྱི་ཆོས་ཉིད་གང་གི་ངོ་བོར་ཡང་མ་གྲུབ་པའོ། །དེ་ལ་རང་བཞིན་གྱིས་འོད་གསལ་བ་ནི་འཁོར་འདས་ཐམས་ཅད་ཀྱི་ཆོས་ཉིད་ཡིན་པས་དེ་ལ་ད་ལྟ་སེམས་གློ་བུར་དུ་སྐྱེ་བ་ནི་མ་ཡིན་ཏེ། རྒྱུ་མེད་ལས་སྐྱེ་བ་དང་འཁོར་བ་ལ་ཐོག་མ་ཡོད་པའི་སྐྱོན་དུ་འགྱུར་རོ། །འོ་ན་འོད་གསལ་ལས་ཇི་ལྟར་སྐྱེ་ཞེ་ན། དེ་ལ་སྔ་མ་འགགས་པ་ཐམས་ཅད་ནི་འོད་གསལ་ལ་ཐིམ་པ་ཞེས་བྱ་སྟེ། སློབ་དཔོན་ཨཱཪྱ་དེ་ཝས་འཆི་བ་ནི་དོན་དམ་པའི་བདེན་པ་ཡིན་ལ། སྐྱེ་བ་ནི་ཀུན་རྫོབ་ཅེས་གསུངས་སོ། །འོ་ན་དོན་དམ་པའི་བདེན་པ་འགག་པའམ་མེད་པར་འདོད་པའི་ཕྱིར་བློའི་ཡུལ་དུ་ཐལ་བར་འགྱུར་རོ་སྙམ་ན་བདེན་མོད་ཀྱང་གནས་པ་འགག་པའི་ཆ་ནས་དོན་དམ་མ་ཡིན་ཀྱང་འགགས་ནས་གང་དུ་ཡང་མ་གྲུབ་པ་སུས་བློའི་ཡུལ་དུ་བྱ། དཔེར་ན་འཁོར་བ་སྤངས་པ་མྱ་ངན་ལས་འདས་པ་ཡིན་མོད་ཀྱང་འཁོར་བ་མ་དམིགས་པའི་ཞི་བ་མྱ་ངན་ལས་འདས་པར་བཤད་པ་དང་འདྲའོ། །ཡང་ན་རང་བཞིན་གྱིས་སྐྱེ་བར་མ་གྲུབ་པ་ཉིད་ནི་འོད་གསལ་བ་སྟེ། བརྟེན་ཏེ་དེ་སྐྱེ་བ་ཉིད་ཅེས་བྱ་བའི་དོན་ཏོ། །དེས་ན་སྐྱེ་བ་སྔ་མའི་རྣམ་པར་ཤེས་པ་འགགས་པ་དེ་ཐ་སྙད་དུ་འགགས་པ་ཡིན་ཡང་། དོན་དམ་པར་མ་སྐྱེས་མ་འགགས་པ་དེས་ན་འོད་གསལ་བའོ། །ཐ་སྙད་དུ་བྱས་ན་འགགས་པ་ལས་སྐྱེ་བ་ཡང་མིན། སྔ་མ་ཉིད་འོངས་པ་ཡང་མིན་ཏེ། དེ་ལྟ་ནའང་སྐྱེ་བས་ན་འོད་གསལ་བ་ལས་སྐྱེ་བ་ཞེས་བྱའོ། །གསུམ་པ་དཔེ་བརྒྱད་དང་སྟོང་པ་གསུམ་གྱིས་རྟེན་འབྲེལ་ལས་སྐྱེ་བའི་ཚུལ་ནི་དེ་ལྟར་ཡང་། ཁ་ཏོན་མར་མེ་མེ་ལོང་རྒྱ། །མེ་ཤེལ་ས་བོན་སྐྱུར་དང་སྒྲ་བརྙན་བཞིན་དུ། །ཕུང་པོ་ཉིང་མཚམས་སྦྱོར་བ་དང་སྐྱེ་བ་ཡིན་པས་འཇིག་རྟེན་འདི་ཕ་རོལ་ཏུ། །མི་འཕོ་བར་ཡང་མཁས་རྟོགས་བྱ། །ཞེས་གསུངས་པ་ལྟ་བུའོ། །དེ་ལ་རྣམ་པར་ཤེས་པའི་རྒྱུན་སྐྱེ་བ་འདི་ཡང་རྒྱུ་དུ་མ་དང་ལྡན། རྐྱེན་དུ་མ་དང་ལྡན་ཏེ། སྔ་མའི་ཀུན་གཞི་ནི་རྒྱུ་ཡིན་ལ། ལས་ཀྱི་བག་ཆགས་བསྒོས་པ་ནི་རྐྱེན་ཡིན་ནོ། །བག་ཆགས་ཞེས་བྱ་བ་འདི་ཅི་ཞིག་ཡིན་ཞེ་ན། སྐྱེ་བ་སྔ་མར་མ་རིག་པའི་དབང་གིས་ལས་འདུས་བྱས་པས་མངོན་པར་བསྒོས་པའི་སེམས་རིག་པ་ཕྱི་མ་མངོན་པར་སྐྱེ་བར་འགྱུར་བ་གང་ཡིན་པའོ། །དེས་ན་སྔ་མའི་ཀུན་གཞིའི་སྐད་ཅིག་འགགས་པ་ནི་འོད་གསལ་བར་གྱུར་པ་ཡིན་ལ། དེ་ལ་བག་ཆགས་ཀྱི་དབང་གིས་ཀུན་གཞི་ད་ལྟར་བ་སྐྱེ་བ་ནི་སྟོང་པ་ཆེན་པོ་ཞེས་བྱའོ། །དེས་བདག་ཏུ་འཛིན་པ་ཉོན་མོངས་པ་ཅན་གྱི་ཡིད་སྐྱེ་བ་ནི་ཤིན་ཏུ་སྟོང་པ་ཞེས་བྱའོ། །དེ་ལས་རྣམ་པར་ཤེས་པའི་ཚོགས་དྲུག་སྟོང་པའི་བདག་ཉིད་ཅན་སྐྱེའོ། །དེ་ལྟར་ན་མ་རིག་པས་རྒྱུ་བྱས། འདུ་བྱེད་ཀྱིས་རྐྱེན་བྱས་ཏེ་རྣམ་པར་ཤེས་པ་གསུམ་དེ་ལྟར་སྐྱེའོ། །དེ་ལས་མིང་དང་གཟུགས་ལ་སོགས་པ་ཇི་ལྟར་སྐྱེ་ཞེ་ན། རྣམ་པར་ཤེས་པ་དེ་ལས་རླུང་སྐྱེ་ལ། དེ་ལས་མེ་དང་ཆུ་དང་ས་སྐྱེ། དེ་ལས་ཕུང་པོ་ཁམས་དང་སྐྱེ་མཆེད་རྣམས་སྐྱེའོ། །བཞི་པ་སྐྱེ་གནས་བཞི་འགྲུབ་པའི་ཚུལ་ནི། དེའང་སེམས་ཅན་སྐྱེ་བ་བཞིས་བསྡུས་པ་ལས། བརྫུས་ཏེ་སྐྱེ་བ་ནི་རང་གི་སྒྲོ་བཏགས་པ་ཙམ་ལས་སྐྱེའོ། །སྒོང་སྐྱེས་དང་། དྲོད་གཤེར་ལས་སྐྱེ་བའང་རྐྱེན་གཞན་འགའ་ཞིག་ཙམ་ལས་རག་ལས་ཏེ་སྐྱེའོ། །མངལ་སྐྱེས་ཀྱི་དབང་དུ་བྱས་ཏེ་བསྟན་པ་ནི་མདོ་རྒྱུད་ཀུན་ལས་གསུངས་ཏེ་ཉེ་བར་མཐོང་བའི་ཕྱིར་རོ། །དེས་ན་འདིར་ཡང་དེ་བརྗོད་པར་བྱའོ། །དེ་ལ་སྐྱེ་བ་སྔ་མ་གང་འགགས་པ་ཡིན་ཡང་རུང་སྟེ། བར་དོའི་སྐབས་སུ་བརྫུས་ཏེ་སྐྱེ་བའི་ལུས་ལེན་ནོ། །དེ་ལས་མངལ་དུ་འཇུག་པའི་ཚུལ་ལ་གཉིས་ཏེ། ཐོག་མར་ལུས་གང་ལས་སྐྱེ་བའི་རྒྱུ་དང་། རྒྱུ་དེས་ལུས་ཇི་ལྟར་གྲུབ་པའི་ཚུལ་ལོ། །དང་པོ་ལ་གཉིས། དངོས་པོ་དང་དངོས་མེད་ལས་སྐྱེ་བར་འདོད་པ་དང་། སེམས་གསུམ་ལ་སོགས་པ་ལས་སྐྱེ་བར་འདོད་པའོ། །དང་པོ་ནི། ཁུ་ཁྲག་དངོས་པོ་དང་སེམས་དངོས་མེད་འདྲེས་པ་ལས་སྐྱེ་བར་འདོད་པ་ནི་དེ་མངལ་དུ་སྐྱེ་བའི་ལུས་ལེན་པ་ན། རྒྱུ་དུ་མ་རྐྱེན་དུ་མ་དང་ལྡན་དགོས་ཏེ། ཕ་མའི་སྙོམས་འཇུག་བྱས་པའི་ཚེ་རྩ་སྒོ་གཉིས་ལ་བརྟེན་ཏེ་ཐིག་ལེ་མཉམ་དུ་བབས་པ་དྲི་ཟ་ཉེ་བར་འཁོར་བ་སྟེ། བར་དོའི་ཤེས་པ་རླུང་ལ་ཞོན་ཏེ་དེར་འོངས་པ། ལས་མཉམ་པར་བསགས་པ། ཕ་མའི་བདེ་བ་དང་། བར་དོའི་ཤེས་པའི་སེམས་སྣང་བ་གསུམ་སྟེ་རྣམ་ཤེས་གསུམ་རོ་གཅིག་ཏུ་མཉམ་དུ་གྱུར་པ། ཕོ་མོའི་དབང་གིས་ཕ་མ་ལ་ཆགས་སྡང་གི་ཉོན་མོངས་པ་སྐྱེས་པའི་རྐྱེན་ཏེ། དེ་དག་འཛོམ་པའི་ཚེ་མངལ་དུ་སྐྱེ་བ་ལེན་ཏོ། །གཉིས་པ་ནི་དེ་ལྟར་ན་རྒྱུ་རྐྱེན་དུ་མ་དང་ལྡན་པས་ཁ་ཅིག་སེམས་གསུམ་ལས་སྐྱེ་ཞེས་ཟེར། ཁ་ཅིག་ནི་ལས་ལས་སྐྱེ་བར་རྟོག །ཁ་ཅིག་ནི་ལུས་ངག་ཡིད་གསུམ་ལས་སྐྱེ་བར་རྟོག །ཁ་ཅིག་ནི་ཁུ་ཁྲག་དང་རླུང་ལས་སྐྱེ་བར་རྟོག །ཁ་ཅིག་ནི་རྡུལ་མུན་པ་སྙིང་སྟོབས་ལས་སྐྱེ་བར་རྟོག །དེ་ལྟར་དེ་དག་ཀྱང་རྒྱུ་རྐྱེན་ཕྱོགས་རེ་ཙམ་ལ་བསམས་ནས་ནོར་བའང་མ་ཡིན་ལ། དེ་ཉིད་ཁོ་ན་དང་རྟག་པ་དང་གཅིག་པུ་ལ་སོགས་པར་འཛིན་ན་ནོར་བར་ཡང་འགྱུར་ཏེ། དཔེར་ན་ཉི་མའི་དཀྱིལ་འཁོར་ལྟ་བུའམ། དམུས་ལོང་བརྒྱས་གླང་པོ་ཆེ་བལྟས་༼འཇུས༷་༽པ་ལྟ་བུའོ། །སྤྱི་དོན་གཉིས་པ་རྒྱུ་དེས་ལུས་ཇི་ལྟར་གྲུབ་པའི་ཚུལ་ལ་གཉིས། ཕྲ་བ་གྲུབ་ཚུལ་དང་། རགས་པ་གྲུབ་ཚུལ་ལོ། །དང་པོ་ནི་རྒྱུ་རྐྱེན་རྟེན་འབྲེལ་དེ་རྣམས་འཛོམ་པའི་དུས་སུ་ཕ་མའི་ཁུ་ཁྲག་དང་རླུང་འདྲེས་པ་དེའི་ཚེ་རྣམ་པར་ཤེས་པ་བརྒྱལ་ལོ། །དེ་ལ་བརྟེན་ནས་དཀྱིལ་འཁོར་གསུམ་རླུང་དང་བཞི་རིམ་གྱིས་སྐྱེ་སྟེ། དེའང་མེར་མེར་པོ་ལ་སོགས་པའི་དུས་སུ་རླུང་གནས་པ་ལས་རྩ་ཨ་ཝ་དྷཱུ་ཏཱི་དང་ཁུ་ཁྲག་གྲུབ་བོ། །དེ་ནས་རླུང་འཇུག་པའི་དབང་གིས་རྩ་རྐྱང་མ་དང་། ལྡང་བའི་རིམ་པས་རྩ་རོ་མ་སྟེ། དེ་ལྟར་རྩ་གཉིས་གྲུབ་ལ། དེ་བཞིན་དུ་རྩ་རྣམས་དང་། རྩའི་ཡི་གེ་རྣམས་དང་། ཁམས་བདུད་རྩི་རྣམས་འཕེལ་ཞིང་སྐྱེ་ལ་འཕོ་ཞིང་འགྱུར་རོ། །གཉིས་པ་ནི་དེའང་ཟླ་བ་དང་པོ་ལ་སྲོག་གི་རླུང་ལྡང་འཇུག་གནས་པ་ལ་བརྟེན་ཏེ་ཉའི་རྣམ་པ་ལྟ་བུར་འགྱུར་རོ། །དེ་བཞིན་དུ་གཉིས་པ་ལ་རུ་སྦལ་གྱི་རྣམ་པ་ལྟ་བུར་ཡན་ལག་ལྔའི་ཐད་ཀར་ཅུང་ཟད་འབུར་རོ། །གསུམ་པ་ཕག་རྒོད་ཀྱི་རྣམ་པ་ལྟ་བུར་མགོ་ཅུང་ཟད་མཐོ་བའོ། །བཞི་པ་དང་ལྔ་པ་ལ་ར་མ་གཉིས་ཀྱི་རྣམ་པ་ལྟ་བུ་སྟེ་ཡན་ལག་གི་ཚོགས་ཅུང་ཟད་གསལ་བའོ། །དྲུག་པ་ལ་ནག་པའི་རྣམ་པ་ལྟ་བུ་སྟེ་ཡན་ལག་ཕལ་ཆེ་བ་རྫོགས་པའོ། །བདུན་པ་ལ་མིའི་སེང་གེ་སྟེ་མགོ་སེང་གེའི་རྣམ་པ་ལྟ་བུ་རྫོགས་པའོ། །བརྒྱད་པ་ལ་མིའུ་ཐུང་གི་གཟུགས་ལྟ་བུར་གྲུབ་པའོ། །དགུ་པ་ལ་ངང་པ་ལྟ་བུ་སྟེ་མངལ་ནས་འབྱུང་བར་འདོད་པའོ། །བཅུ་པ་ལ་སངས་རྒྱས་ཏེ་ས་བཅུ་ཡོངས་སུ་རྫོགས་པའི་ཕྱིར་རོ། །དེ་ལྟར་ཡང་ཕྱི་མའི་བཞི་པ་ལས། མངལ་གྱི་གནས་སྐབས་ཀྱི་ཟླ་བ་བཅུ་ཡང་ས་བཅུ་རྣམས་ཏེ། ཟླ་བཅུ་རྫོགས་ནས་སེམས་ཅན་སྐྱེ་བ་ནི་ས་བཅུའི་དབང་ཕྱུག་སངས་རྒྱས་ཉིད་དུ་གོ། ཆོས་མཐུན་འདི་དག་གི་རྐྱེན་གྱི་སེམས་ཅན་རྣམས། །སངས་རྒྱས་ཉིད་དུ་ཐེ་ཚོམ་མེད། །ཅེས་གསུངས་པ་ལ་བརྟེན་ཏེ། གནས་སྐབས་བཅུ་པོ་ལ་ཁྱབ་འཇུག་གི་འཇུག་པ་བཅུའི་མིང་བཏགས་པ་ནི། ཁྱབ་འཇུག་གི་རྗེས་སུ་འབྲང་བའི་སེམས་ཅན་རྗེས་སུ་གཟུང་བའི་ཕྱིར་དཔལ་རྡོ་རྗེ་ཕྲེང་བ་དང་། དཔལ་དུས་ཀྱི་འཁོར་ལོ་ལས་གསུངས་པ་དེ་འདིར་ཡང་ཅུང་ཟད་སྦྱར་བ་ཡིན་ནོ། །དེ་བཞིན་དུ་ཐིག་ལེ་ལས། གང་དང་གང་གྲུབ་པའི་ཚུལ་དང་། རྩ་སྐྱེ་བའི་རིམ་པའང་དཀྱིལ་འཁོར་གསུམ་གྱི་རིམ་པ་ལ་བརྟེན་ནས་ཞིབ་ཏུ་གོ་བར་བྱའོ། །དེ་ལྟར་རགས་པའི་ཕུང་པོ་དང་ཁམས་དང་སྐྱེ་མཆེད་ཕྲ་བའི་རླུང་དང་སེམས་ལས་གྲུབ་པ་ཡིན་ནོ་ཞེས་བྱ་བ་བསྟན་ཏོ། །དེ་ལྟར་རྡོ་རྗེའི་ལུས་གྲུབ་པའི་རྒྱུ་དང་འགྲུབ་པའི་ཚུལ་གཏན་ལ་ཕབ་ནས། ད་ནི་ད་ལྟ་ལུས་གནས་པའི་ཚུལ་གཏན་ལ་དབབ་པ་ནི། ལུས་རགས་པ་དབང་པོ་རྟེན་ཁོག་པ་དང་བཅས་པ་འདི་ལ་ཕྲ་བའི་གནད་གཏན་ལ་མ་ཕབ་ན་ཏིང་ངེ་འཛིན་འབྱུང་བར་མི་འགྱུར་ཏེ། དཔེར་ན་འོ་མ་འདོད་པས་རྭ་ལས་འཐེན་པ་དང་འདྲ་སྟེ། སཾ་པུ་ཊའི་རྒྱུད་ཕྱི་མ་ལས། མཚན་ཉིད་ཐེག་པར་གསུངས་པའི་ཆོས་ཀྱི་ཕུང་པོ་བརྒྱད་ཁྲི་དང་། །བཞི་སྟོང་གི་ནི་ཆོ་གས་ནི། །ལུས་ཀྱི་དེ་ཉིད་མི་ཤེས་པ་སྟེ་ནང་གི་རྟེན་འབྲེལ་མ་གསུངས་པས། །དེ་དག་ཐམས་ཅད་ལ་བརྟེན་ནས་ཚེ་གཅིག་གིས་སངས་རྒྱས་པའི་འབྲས་བུ་མེད་སྟེ་མི་འབྱུང་བ་ཡིན་ནོ། །ཅེས་གསུངས་པའི་ཕྱིར་རོ། །དེས་ན་གནད་ཤེས་ན་དེ་དང་དེར་གནད་དུ་བསྣུན་པས་ཏིང་ངེ་འཛིན་སྐྱེ་བར་བྱེད་དེ། དཔེར་ན་འོ་མ་འདོད་པས་ནུ་མ་ལ་འཐེན་པ་དང་འདྲའོ། །དེ་ལ་ལུས་ཀྱི་ཕྲ་བ་གཏན་ལ་དབབ་ན། སཾ་པུ་ཊའི་རྒྱུད་ཕྱི་མ་ལས། དཀྱིལ་འཁོར་ལུས་སུ་གསུངས་པ་སྟེ། །དཀྱིལ་འཁོར་བྷ་གར་བརྗོད་པ་ཉིད། །དཀྱིལ་འཁོར་ཡང་ནི་བྱང་ཆུབ་སེམས། །དཀྱིལ་འཁོར་གསུམ་ནི་བརྟག་པར་བྱ། །ཞེས་གསུངས་པས་ན། དཀྱིལ་འཁོར་གསུམ་དང་དེ་ལ་མངོན་སུམ་དུ་བྱེད་པ་རླུང་སྟེ་བཞིའོ། །དེ་ལ་ལུས་ཀྱི་དཀྱིལ་འཁོར་ནི་རགས་པ་དང་དབང་པོ་རྟེན་ཁོག་པ་དང་བཅས་པ་ཕྲ་བ་རྩའི་རྣམ་པར་གནས་པ་རྣམས་སོ། །བྷ་གའི་དཀྱིལ་འཁོར་ནི་རགས་པ་ཡབ་ཡུམ་གྱི་རྡོ་རྗེ་དང་པདྨ་ཕྲ་བ་རྩ་ཡི་གེའི་རྣམ་པར་གནས་པ་རྣམས་སོ། །བྱང་ཆུབ་སེམས་ཀྱི་དཀྱིལ་འཁོར་ནི་བསྡུ་ན་ཁུ་ཁྲག་བདུད་རྩི་ལྔ། དབྱེ་ན་ཁམས་བཅུ་དྲུག་དང་། སུམ་ཅུ་རྩ་གཉིས་ལ་སོགས་པའོ། །འདི་དག་ཇི་ལྟར་གནད་ཡིན་ན། །རླུང་སེམས་ལ་གནས་ལ། རླུང་བྱང་ཆུབ་ཀྱི་སེམས་དང་གཅིག་ཏུ་འདྲེས་ལ། དེ་རྩ་ལ་གནས་པས་རྩའི་གནད་ཤེས་ན་རླུང་སེམས་དབང་དུ་འདུ་ལ། དེ་འདུས་པས་རྟོག་བཅས་ཀྱི་སེམས་དབང་དུ་འདུས་པར་འགྱུར་བས་དེ་བསྟན་པར་བྱའོ། །དེ་ལ་གཉིས་ཏེ། དཀྱིལ་འཁོར་གསུམ་གཏན་ལ་དབབ་པ་དང་། དེ་མངོན་དུ་བྱེད་པའི་རླུང་གཏན་ལ་དབབ་པའོ། །དང་པོ་ལ་གསུམ། རྩ་ལུས་ཀྱི་དཀྱིལ་འཁོར་དང་། ཡི་གེ་བྷ་གའི་དཀྱིལ་འཁོར་དང་། ཁམས་བདུད་རྩིའི་དཀྱིལ་འཁོར་རོ། །དེ་ལ་དང་པོ་རྩ་གཏན་ལ་ཕབ་པས་གཉིས་པོ་ཤུགས་ལ་ཤེས་པར་འགྱུར་རོ། །དེ་ལ་རྩ་ནི་རྩའི་གཙོ་མོ་གསུམ་དང་། བྱང་ཆུབ་ཀྱི་སེམས་འབབ་པའི་གཙོ་བོ་སུམ་ཅུ་རྩ་གཉིས་དང་། ཡི་གེ་དགོད་པའི་གཙོ་བོ་བརྒྱ་ཉི་ཤུ་དང་། ཡན་ལག་གི་རྩའི་གཙོ་བོ་སྟོང་ཕྲག་བདུན་ཅུ་རྩ་གཉིས་དང་། རྩ་བསམ་གྱིས་མི་ཁྱབ་པའོ། །དེ་ལ་དང་པོ་ནི་ཐོག་མར་རླུང་གནས་པ་ལ་བརྟེན་ནས་རྩ་ཨ་ཝ་དྷཱུ་ཏཱི་གྲུབ་བོ། །རླུང་ནང་དུ་འཇུག་པ་དང་འཛིན་པའི་རྣམ་རྟོག་གཉིས་ལ་བརྟེན་ནས་གཡོན་རྐྱང་མ་ཁ་ཐུར་དུ་བལྟས་པ་གྲུབ་བོ། །རླུང་ཕྱིར་འགྲོ་བ་དང་གཟུང་བའི་རྣམ་རྟོག་ལ་བརྟེན་ནས་གཡས་རོ་མ་ཁ་གྱེན་ལ་བལྟས་པ་གྲུབ་སྟེ། རྩ་རྒྱུད་ལེའུ་དང་པོ་ལས། དེ་རྣམས་ཀྱི་ནང་ནས་རྩ་རྣམ་པ་གསུམ་ནི་རྒྱུ་ལམ་འབྲས་གསུམ་དུ་གཙོ་ཆེ་བའི་ཕྱིར་གཙོ་མོ་སྟེ་རྒྱུ་དུས་སུ་རྩ་གསུམ་གྱིས་ལུས་ངག་ཡིད་གསུམ་བསྐྱེད་པ་དང་། ལམ་དུས་སུ་བདེ་གསལ་མི་རྟོག་པའི་ཉམས་བསྐྱེད་པ་དང་། འབྲས་དུས་སུ་སྐུ་གསུང་ཐུགས་སམ་སྐུ་གསུམ་བསྐྱེད་པ་ལ་རྩ་འདི་རྣམས་གཙོ་ཆེ་བས་སོ། །རྐྱང་མ་དང་། རོ་མ་དང་། ཀུན་འདར་མའོ་ཞེས་སོ། །གཉིས་པ་ནི་བྱང་ཆུབ་ཀྱི་སེམས་འབབ་པ་གཙོ་བོའི་དབང་དུ་བྱས་ན་གཙོ་མོ་གསུམ་པོ་དེའང་གཏོགས་པའི་སུམ་ཅུ་རྩ་གཉིས་ཏེ། ལེའུ་དང་པོ་ལས། རྩ་རྣམས་ནི་སུམ་ཅུ་རྩ་གཉིས་ཏེ། བྱང་ཆུབ་ཀྱི་སེམས་སུམ་ཅུ་རྩ་གཉིས་འབབ་པའོ་ཞེས་གསུངས་སོ། །གསུམ་པ་ནི་དེ་དག་ལ་ཡི་གེ་དགོད་པའི་རྩ་གཙོ་བོའི་དབང་དུ་བྱས་ན་བརྒྱ་ཉི་ཤུ་གྲུབ་སྟེ། སཾ་པུ་ཊའི་དང་པོའི་གཉིས་པ་ལས། ལྟེ་བར་དྲུག་ཅུ་རྩ་བཞི། སྙིང་ཁར་བརྒྱད། མགྲིན་པར་བཅུ་དྲུག །སྤྱི་བོར་སོ་གཉིས་ཏེ། འཁོར་ལོ་བཞི་ཡི་རབ་དབྱེ་བས། །བརྒྱ་ཕྲག་གཅིག་དང་ཉི་ཤུ་ལྷག །སོ་སེན་བསྐྱེད་པ་སོགས་བྱང་ཆུབ་སེམས་ཀྱི་རང་བཞིན་གྱིས་གང་བའི་མི་ཕྱེད་མ་སོགས། །རྩ་རྣམས་སུམ་ཅུ་རྩ་གཉིས་ནི་གཙོ་བོ་སྟེ་མཆོག་གོ། ཅེས་གསུངས་སོ། །བཞི་པ་ནི་དེ་དག་ལ་བརྟེན་ནས་ཡན་ལག་གི་རྩ་གཙོ་བོར་གྱུར་པ་སྟོང་ཕྲག་བདུན་ཅུ་རྩ་གཉིས་གྲུབ་སྟེ། ཕྱག་རྒྱ་ཆེན་པོ་ཐིག་ལེའི་ལེའུ་བཞི་པ་ལས། ཉོན་ཅིག་ལྷ་མོ་སྐལ་ཆེན་མོ། །རྩ་ཡི་འཁོར་ལོ་འབྱུང་བ་མཆོག །སྟོང་ཕྲག་བདུན་ཅུ་རྩ་གཉིས་ཏེ། །རྩ་རྣམས་ཀྱི་ནི་རིགས་བཤད་དོ། །ཞེས་གསུངས་སོ། །ལྔ་པ་ནི་དེ་དག་ལ་བརྟེན་ནས་རྩ་ཕྲན་བ་སྤུའི་བུ་གའི་སྒོར་ཟུག་པ་བྱེ་བ་ཕྲག་བརྒྱད་ཅུ་གནས་སོ་ཞེས་ཀྱང་གསུངས་སོ། །བྷ་གའི་དཀྱིལ་འཁོར་ལ་ལྔ། རྩ་བ་ཨ་དང་ཨེ་བྃ་གཉིས་དང་ཨ་ཀ་ཙ་ཊ་ཏ་པ་ཡ་ཤ་ཡི་གེ་བརྒྱད་དང་། སཾ་པུ་ཊ་ལས། ར་ཡི་རྣམ་པ་ཁྲག་གི་ཁམས། །ཧ་ནི་དེ་བཞིན་རེག་བྱ་ཉིད། །བྱེ་ནི་བད་ཀན་ཞེས་བྱར་གསུངས། །པ་ཡི་རྣམ་པ་སེམས་ཉིད་དང་། །ར་ཡི་རྣམ་པ་རོ་ཉིད་དེ། །མེ་ནི་དེ་བཞིན་ལྟོ་ཚིལ་དག །ར་ནི་མེ་ཉིད་དུ་ནི་གསུངས། །མེ་ཡི་རྣམ་པ་བཤང་བར་གསུངས། །ས་ཡི་རྣམ་པ་བཤང་བར་གསུངས། །རྦ་ཡི་རྣམ་པས་དེ་བཞིན་ཚིལ། །རྨ་ཡི་པགས་པ་ཉིད་དུ་གསུངས། །ནི་ཡི་རྣམ་པ་རུས་པ་ཉིད། །ས་ཡི་རྣམ་པས་གཅི་བ་ཡིན། །ད་ཡི་རྣམ་པས་གློ་བ་ཉིད། །སྠི་ནི་པདྨ་ཉིད་དུ་གསུངས། །ཤིན་ཏུ་མཛེས་པའི་རྫས་དང་ལྡན། །ཏ་ཡི་རྣམ་པ་ཁུ་བ་ནི། །བྱང་ཆུབ་སེམས་ལས་བྱུང་བ་ཡིན། །ཞེས་པ་འདིས་ཡི་གེ་བཅུ་དྲུག་དང་ཁམས་བཅུ་དྲུག་གཉིས་ཀ་སྟོན་པས་ཡི་གེ་བཅུ་དྲུག་དང་། པུ་ཛ་ཨོ་ཨ་གོ་ར་དེ་མ་ན་ཨོ་ཏྲི་ཀོ་ཀ་ལཾ་ཀ་ཧི་པྲེ་གྲྀ་སཽ་སུ་ན་སི་མ་ཀུ་ཧཱུྃ་རིང་པོ་བརྒྱད་བྷྲཱུྃ་ཨཾ་ཛྲིཾ་ཁཾ་ཧཱུྃ་སྟེ་ཡི་གེ་སུམ་ཅུ་སོ་བདུན་དང་། ཡི་གེ་བསམ་གྱིས་མི་ཁྱབ་པ་སྟེ། དེ་དག་རྣམས་དེ་བཞིན་དུ་བྱང་ཆུབ་ཀྱི་སེམས་འཕོ་བའི་རྩ་དང་ཡི་གེ་བཅུ་དྲུག་ལ་སོགས་པ་རྩ་དང་ཡི་གེ་བསམ་གྱིས་མི་ཁྱབ་པའི་དབྱིབས་སུ་གནས་སོ། །ཁམས་བདུད་རྩིའི་དཀྱིལ་འཁོར་ལ་ལྔ། རྩ་བ་ཞུ་༼ཁུ༷་༽བ་དང་། ཁྲག་གཉིས་དང་། བདུད་རྩི་ལྔ་དང་། ཁམས་བཅུ་དྲུག་དང་། ཡི་གེ་༼ཁ༷མས་༽སུམ་ཅུ་སོ་བདུན་དང་། དེ་དག་ལའང་ཁམས་དྭངས་མ་བསམ་གྱིས་མི་ཁྱབ་པ་གནས་སོ་ཞེས་གསུངས་སོ། །དེ་དག་ཀྱང་ཞིབ་ཏུ་བརྗོད་ན། བྱང་ཆུབ་ཀྱི་སེམས་རྣམས་ནི་རྩ་རྣམས་དང་མཉམ་དུ་རིམ་པ་བཞིན་དུ་སྐྱེ་སྟེ། རྩ་དབུ་མའི་ཡར་སྣས་ཕ་ལས་ཐོབ་པའི་ཁུ་བ་འཛིན། མར་སྣས་མ་ལས་ཐོབ་པའི་ཁྲག་བཟུང་ནས་མི་གཡོ་བར་བྱེད། རོ་རྐྱང་གཉིས་ཀྱི་སྨད་རྩ་ཁ་གཉིས་སུ་གྱེས་ནས་རྐྱང་མའི་གཡོན་ལ་བརྟེན་ནས་ཁུ་བ་འཕེན་འཛིན་བྱེད། མདུན་ངོས་ནས་དྲི་ཆུ་འཕེན་འཛིན་བྱེད། རོ་མའི་གཡས་ལ་བརྟེན་ནས་ཁྲག་འཕེན་འཛིན་བྱེད། རྒྱབ་ངོས་ནས་དྲི་ཆེན་འཕེན་འཛིན་བྱེད་དེ། རྩ་རྒྱུད་ལེའུ་དང་པོ་ལས། རྐྱང་མའི་མདུན་ནས་མི་བསྐྱོད་པ་དྲི་ཆུ་དང་གཡོན་ནས་ཁུ་བ་འབབ་པ་སྟེ། །རོ་མའི་གཡས་ནས་དེ་བཞིན་དུ་ཁྲག་དང་རྒྱབ་ནས་དྲི་ཆེན་འབབ་ཅིང་། །ཤེས་རབ་ཀྱི་ངོ་བོ་ཟླ་བ་སྟེ་ཐིག་ལེ་དྭངས་མ་འབབ་པར་བཤད་པ། །དེ་ནི་ཀུན་འདར་མ་རབ་གྲགས། །ཞེས་བཤད་པ་དང་། སཾ་པུ་ཊའི་དྲུག་པའི་དང་པོ་ལས། རྩ་རོ་རྐྱང་གཉིས་ནི་སྐྱེ་གནས་ཀཀྐོ་ལིའི་དབུས་སུ་སྟེང་ནང་གི་ནི། །གཡོན་དང་གཡས་སུ་དེ་བཞིན་དུ། །གཡོན་དུ་སྟེ་དང་དབུ་མའི་ཡར་རྩེ་སྨིན་མཚམས་སུ་ཁུ་བ་རྣམས་ཤེས་བྱ། །གཡས་པ་ལ་ནི་སྟེ་གཡས་པས་དབུ་མའི་མར་རྩེ་གསང་གནས་སུ་ཁྲག་བཟུང་སྟེ་གནས་པ་ཉིད་དེ། །རྩ་དེ་གཉིས་ལས་ཐིག་ལེ་དེ་གཉིས་འདུ་བ་དེའང་ཆོས་ཕུང་པོ་དང་དབྱིངས་དེ་དག་གི་རྒྱུ་སྡུད་པའོ། །ཅེས་གསུངས་སོ། །ཤ་ཆེན་གྱི་དྭངས་མ་ནི་ཀུན་གྱི་སྟོབས་ཀྱིས་འཛིན་ལ། དེ་༼ལྟ༷ར་༽བདུད་རྩི་ལྔ་པོ་དེ་དག་ལ་བརྟེན་ནས་ཁམས་དྭངས་མ་ཐམས་ཅད་འཕེལ་བར་འགྱུར་ཏེ། དེ་དག་ལས་འཕེལ་བས་གནས་ཉི་ཤུ་རྩ་བཞིར་ཡི་གེ་ཉི་ཤུ་རྩ་བཞིར་གྲུབ་ཅིང་། དེར་ཁམས་དྭངས་མ་གནས་པ་དང་། ཡང་སྙིང་གའི་དཀྱིལ་དུ་རྩ་བརྒྱད་གྲུབ་པས། སུམ་ཅུ་སོ་གཉིས་སུ་གྲུབ་པ་དེ་བྱང་ཆུབ་ཀྱི་སེམས་སུམ་ཅུ་རྩ་གཉིས་གྲུབ་པས་ལུས་ཐམས་ཅད་ཀྱི་གནད་དེ་དག་ཡིན་ཏེ། སཾ་པུ་ཊའི་དང་པོའི་གཉིས་པ་ལས། སོ་སེན་བསྐྱེད་པ་སོགས་བྱང་སེམས་སུམ་ཅུ་རྩ་གཉིས་ཀྱིས། །གང་ཚེ་རྩ་སོ་བདུན་པོ་འདིར་ནི་གང་གྱུར་པ་དེའི་ཚེ། །དབང་པོ་དྲུག་དང་ཕུང་པོ་ལྔ་དང་འབྱུང་བ་བཞི་ལ་སོགས་པའི་ལུས་བསྐྱེད་པའི་བྱང་སེམས་ཡིས། །བུ་ཚའི་ལུས་རང་བཞིན་ལྷུན་གྲུབ་ཀྱི་སངས་རྒྱས་རྒྱུ་དེ་ཡིས་དེ་མ་ཐག་བསྐྱེད་དོ། །ད་ལྟ་རང་གི་ལུས་ཀྱི་རྩ་སོ་བདུན་ལས་བྱུང་བའི་བྱང་སེམས་དེ་ཡིས་རང་ལུས་ཀྱི་ཕུང་ཁམས་སོགས་དེ་མ་ཐག་བསྐྱེད་དོ། །ཅེས་བྱ་བ་དང་། དྲུག་པའི་དང་པོ་ལས་ཀྱང་། ར་ནི་མེ་ཞེས་བྱ་བའི་ས་བོན་ཡིན་པས་མེ་ཁམས་མཚོན་པར་གསུངས། །དེ་ལས་ཁྲག་སྐྱེ་དེ་ལས་མཁྲིས་པ་ཡང་དག་ངས། །མཚན་ཉིད་གཅིག་འདོད་ཅེས་པ་ནི་སྱེའི་འགྲེང་བུ་ཨེ་གུད་དུ་ཕྲལ་བས་ཨེ་ཀ་སྟེ་གཅིག་ཡིན་ལ་རླུང་མཁྲིས་བད་ཀན་འདུས་པས་གཅིག་པ་ནི་འདུས་ནད་དེ། སྱེ་ཞེས་པའི་ས་དངོས་ཀྱིས་བད་ཀན་བསྟན་ལ་ས་དེ་ལས། །རྡུལ་དང་ཆུ་རྒྱུས་ཡང་དག་འབྱུང་བར་གྱུར་པ་བསྟན་ཏེ་སྱ་ནི་བད་ཀན་ནོ། །དེ་དག་གི་གཙོ་བོར་གྱུར་པ་ཡི་མགོན་པོར་བརྗོད་པའི་རླུང་ནི། །ཧ་ནི་ས་བསྟན་ཏེ་ཧ་ཡན་མགྱོགས་འགྲོ་ལ་འཇུག་པས་ཀུན་ཏུ་འགྲོ་བར་རླུང་ཡིན་པར་གསུངས། །དེས་ན་རུས་པའི་མཚམས་ནི་སྟེ་ཚིགས་ཆེན་བཅུ་གཉིས་འདི་རྣམས་སུ། །ས་བོན་ར་ཧ་ས་ཡ་ཨེ་ལྔ་ནི་ཡང་དག་པར་བཏབ་པ་སྟེ་གནས་ལ་དེས་འདུ་བ་བཞི་དང་ལུས་བསྐྱེད་དོ། །ཅེས་བྱ་བ་ལ་སོགས་པ་དང་། དྲུག་པའི་གཉིས་པ་ལས་ཀྱང་། པུལླཱི་རར་ནི་མི་ཕྱེད་མ། །སོ་དང་སེན་མོ་འབབ་པར་བརྗོད། །ཅེས་བྱ་བ་ལ་སོགས་པ་གསུངས་སོ། །དེ་ལྟར་ན་ཕྲ་བའི་གནད་དེ་དག་ལ་བརྟེན་ཏེ་ཕུང་པོ་དང་ཁམས་དང་སྐྱེ་མཆེད་ཡོངས་སུ་རྫོགས་ནས་ཡུལ་ལ་ཉེ་བར་ལོངས་སྤྱོད་པ་ནི་གནས་པའོ། །
དཀྱིལ་འཁོར་གསུམ་ལ་མངོན་དུ་བྱེད་པའི་སྙིང་པོ་ཡེ་ཤེས་རླུང་གཏན་ལ་དབབ་པ།
གཉིས་པ་དེ་ལྟ་བུའི་དཀྱིལ་འཁོར་གསུམ་ལ་མངོན་དུ་བྱེད་པའི་སྙིང་པོ་ཡེ་ཤེས་རླུང་གཏན་ལ་དབབ་ན་སྤྱིར་རླུང་གི་མངོན་པར་རྟོགས་པའི་དབང་དུ་བྱས་ན་ལྔ་སྟེ། རླུང་གི་རང་གི་ངོ་བོ་དང་། རབ་ཏུ་དབྱེ་བ་དང་། བྱེད་པའི་ལས་དང་། རླུང་རྒྱུ་བའི་ཚུལ་རྣམ་པར་གཞག་པ་དང་། ལམ་དུ་བྱས་པ་ན་ཇི་ལྟར་འགྱུར་བའོ། །དང་པོ་རླུང་གི་ངོ་བོ་ནི་འབྱུང་བ་ཆེན་པོའི་ཁོངས་སུ་འདུ་བ་ཉིད་ཡིན་ལ། དེའང་ཕྱིའི་འབྱུང་བ་མ་ཡིན་ཏེ། ནང་གི་འབྱུང་བ་སྣ་ཚོགས་བྱེད་པ་ཐམས་ཅད་ཀྱི་རྩ་བར་གྱུར་པ་ཡིན་ཏེ། བརྟག་པ་དྲུག་པའི་དང་པོ་ལས། །དེ་ཡི་མགོན་པོར་བརྗོད་པའི་རླུང་། །ཧ་ནི་ཀུན་ཏུ་འགྲོ་བར་བརྗོད། །ཅེས་གསུངས་ཏེ། རྣམ་པར་ཤེས་པའི་རྟེན་དུ་གྱུར་པ་ཡིན་ནོ། །གཉིས་པ་རབ་ཏུ་དབྱེ་ན་གསུམ་སྟེ། རླུང་གི་ངོ་བོའི་སྒོ་ནས་དབྱེ་བ་དང་། རྒྱུ་ཚུལ་གྱི་སྒོ་ནས་དབྱེ་བ་དང་། བྱེད་ལས་ཀྱི་སྒོ་ནས་དབྱེ་བའོ། །དང་པོ་ནི་ས་དང་ཆུ་དང་མེ་དང་རླུང་དང་ནམ་མཁའ་དང་། རྣམ་པར་ཤེས་པའི་རླུང་ཞེས་བྱ་སྟེ། དྲུག་པའི་དང་པོ་ལས། མེ་ཉིད་དང་ནི་རླུང་ཉིད་དང་། །དབང་ཆེན་ཏེ་ས་དང་ནི་དེ་བཞིན་ཆུའི་རླུང་། །འཁོར་ལོ་སྟེ་ནམ་མཁའི་རླུང་སེམས་ཀྱི་ཀུན་སྤྱོད་པ་སྟེ་རྣམ་ཤེས་ཀྱི་རླུང་། །མེ་རླུང་སྟེང་དང་རླུང་གི་རླུང་ངོས་དང་བྲལ་༼དྲ༷ང་༽པོར་ཐད་ཀ་དང་ཆུ་རླུང་འོག་ཏུ་འགྲོ། །ཞེས་པ་དང་། དེ་ཉིད་ལས། རྣམ་སྣང་ལ་སོགས་སངས་རྒྱས་སྟེ་རིགས་ལྔའི་རླུང་རྣམས། །རྒྱུ་ཚུལ་ནི་སྟེང་གི་སྒོར་ནི་གཡོ་ཞིང་གནས། །དེ་རྣམས་འོག་ཏུའང་རྣམ་པར་གནས། །ཞེས་གསུངས་སོ། །༼གཉི༷ས་པ༷་༽རླུང་རྒྱུ་ཚུལ་གྱི་སྒོ་ནས་དབྱེ་ན་གཉིས་ཏེ། ཡེ་ཤེས་ཀྱི་རླུང་ཞེས་བྱ་བ་གནས་པ་རྒྱུ་བ་མེད་པའི་བདག་ཉིད་ཅན་དང་། ལས་ཀྱི་རླུང་ཞེས་བྱ་བ་ལྡང་འཇུག་རྒྱུ་བའི་བདག་ཉིད་ཅན་ཏེ། དྲུག་པའི་དང་པོ་ཉིད་ལས། རྟག་ཏུ་ནུབ་པ་སྟེ་ཡེ་ཤེས་ཀྱི་རླུང་རྒྱུ་བ་མེད་པ་དང་རབ་རྒྱུ་བ་ལས་རླུང་གཉིས་ནི། །སེམས་ཅན་ཀུན་ལ་འགྲོ་བ་སྟེ་གནས་པའོ། །ཞེས་གསུངས་སོ། །གསུམ་པ་བྱེད་ལས་ཀྱི་སྒོ་ནས་དབྱེ་ན། རྩ་བའི་རླུང་ལྔ་དང་། ཡན་ལག་གི་རླུང་ལྔ་སྟེ་བཅུར་འགྱུར་ཏེ། དྲུག་པའི་དང་པོ་ཉིད་ལས། སྤྱིར་སྟེང་འོག་གི་སྒོ་ལ། སྣ་སྒོ་དང་བཤང་ལམ། སྤྱི་གཙུག་དང་སྨིན་མཚམས། རྩ་གཡས་པ་དང་གཡོན་པ། རླུང་ལྡང་བ་དང་འཇུག་པ། སྲོག་རྩོལ་དང་ཐུར་སེལ་རྣམས་ཀྱི་སྔ་མ་ལ་སྟེང་སྒོ་དང་ཕྱི་མ་ལ་འོག་སྒོར་བྱས་པ་མང་ཡང་འདིར་སྟེང་གི་སྒོར་སྟེ་སྣ་སྒོར་ནི་ལྡང་འཇུག་གནས་པའི་སྦྱོར་བ་གསུམ་རྒྱུ་བ་ན་མིག་སོགས་། སྒོ་དགུ་རྣམས་ཀྱིས་ཡོངས་སུ་བསྐོར་ཏེ་དེ་འཁོར་བའི་ཚུལ་གྱིས་རྒྱུའོ། །ཡང་ན་སྟེང་གི་སྒོར་ནི་སྲོག་རླུང་དེས་སྦྱོར་བ་གསུམ་མངོན་རྟོགས་ལྗོན་ཤིང་གི་ཡི་གེ་དག་བཅོས་དང་མཆན་བུ། དུ་རྒྱུ་བའི་ཚེ་སྒོ་དགུ་རྣམས་ཀྱིས་ཡོངས་སུ་བསྐོར་ཏེ་རླུང་ལྷག་མ་དགུའང་རང་རང་གི་གནས་སུ་རྒྱུའོ་ཞེས་པ་འདི་སྐབས་དོན་ནོ། །ཞེས་པ་དང་། ཀ་བ་གཅིག་སྟེ་རྩ་དབུ་མ་དང་སྒོ་དགུ་ནི་མིག་ལ་སོགས་པ། །སྦོམ་པོ་ཕུང་པོ་ལྔ་ནི་ལྷག་པའི་ལྷ་རྒྱལ་བ་་རིགས་ལྔ། །དེ་ལྟ་བུའི་སྐུའི་སྒོ་ནས་རླུང་ལྟར་རྒྱུ་ན། ལྡང་འཇུག་གནས་པའི་རླུང་མིག་སོགས་བུ་ུག་དགུར་ནི་སོན་ཅིང་རྒྱུ་པའི་ཕྱིར་ན་དེ་རྣམས་ལ་སྒོ། །དགུ་ཡི་རྣམ་པར་ཡོངས་སུ་གྲགས་སོ། །ཡང་ན་ཀ་བ་གཅིག་ནི་སྲོག་རླུང་། དེ་ལས་སྐྱེས་པའི་རླུང་དགུ་ནི་སྒོ་དགུ། སྦོམ་པོ་ལྔ་ནི་རླུང་ལྔ་ཁམས་ལྔར་འདུས་པ་སྟོན་ནོ། །ཞེས་གསུངས་སོ། །རླུང་བཅུ་པོ་དེ་དག་གི་མིང་ནི་གང་ཡིན་ཞེ་ན། རྡོ་རྗེ་ཕྲེང་བ་ལས། སྲོག་དང་ཐུར་སེལ་གྱེན་རྒྱུ་དང་། །ཁྱབ་དང་མཉམ་གནས་ཞེས་བྱ་དང་། །ཀླུ་ནི་རྒྱུ་བ་སྟེ་རྒྱུ་མ་སྦྲུལ་ལྟ་བུ་ལ་གནས་ནས་མིག་དང་གཟུགས་སྤྲོད་པ་དང་རུ་སྦལ་ནི་རྣམ་པར་རྒྱུ་བ་སྟེ་མཆིན་པ་རུས་སྦལ་ལྟ་བུ་ལ་གནས་ནས་རྣ་བ་དང་སྒྲ་སྤྲོད་པ་རྩངས་པ་ནི་ཡང་དག་རྒྱུ་སྟེ་གློ་བ་རྩངས་པ་ལྟ་བུ་ལ་གནས་ནས་སྣ་དང་དྲི་སྤྲོད་པ་དང་། །ལྷས་བྱིན་ནི་རབ་ཏུ་རྒྱུ་བ་སྟེ་སྙིང་ལྷས་སྦྱིན་ལྟ་བུ་ལ་གནས་ནས་ལྕེ་དང་རོ་སྤྲོད་པ་དང་ནི་གཞུ་ལས་རྒྱལ་ནི་ངེས་པར་རྒྱུ་བ་སྟེ་མཁལ་མ་གཞུ་རྒྱུད་ལྟ་བུ་ལ་གནས་ནས་ལུས་དང་རེག་བྱ་སྤྲོད་པའོ། །ཞེས་གསུངས་སོ། །དེ་ལ་རླུང་དེ་དག་འབྱུང་བ་རྣམས་དང་ཕན་ཚུན་ཇི་ལྟར་འབྲེལ་སྙམ་ན། འདིར་བླ་མའི་མན་ངག་གིས་སྲོག་འཛིན་ཆུ་སྙིང་ལ་གནས། མཉམ་གནས་སའི་ཁམས་ལྟེ་བ་ན་གནས། ཐུར་སེལ་རླུང་ཁམས་བཤང་གཅིིའི་ལམ་ན་གནས། གྱེན་རྒྱུ་མེ་མགྲིན་པ་ན་གནས། ཁྱབ་བྱེད་ནམ་མཁའི་ཁམས་ལུས་ཐམས་ཅད་ལ་ཁྱབ་པར་གནས་པ་དང་ལྔ་ནི་རྩ་བའི་རླུང་ཡིན་ལ། ཡན་ལག་གི་རླུང་རྣམས་ནི་རྒྱུ་བ་ས་མིག་ན། མཉམ་རྒྱུ་ཆུ་རྣ་བ་ན། ཡང་དག་རྒྱུ་མེ་སྣ་ན། རབ་ཏུ་རྒྱུ་རླུང་ལྕེ་ན། ངེས་པར་རྒྱུ་ནམ་མཁའི་ཁམས་ཚིགས་ལ་གནས་སོ་ཞེས་གསུངས་ཏེ། རེ་རེ་ལ་ཡང་འབྱུང་བ་ལྔའི་བདག་ཉིད་གནས་པ་ཡིན་ནོ། །དུས་ཀྱི་འཁོར་ལོ་ལས་ནི། ཐུར་སེལ་ཞེས་བྱ་ཡེ་ཤེས་ཁམས་སུ་གྱུར་ལ་སྲོག་རླུང་ཡང་ནི་སྟོང་པ་ནམ་མཁའ་འོ། །རླུང་ལས་ཡང་ནི་མཉམ་གནས་ཡིན་ལ་སླར་ཡང་མེ་ནི་གྱེན་རྒྱུ་ཁྱབ་བྱེད་ཉིད་ནི་ཆུ་ཡིན་ནོ། །ཀླུ་ནི་ས་ཡིན་དེ་ནས་རུ་སྦལ་དང་ནི་རྩངས་པའི་རླུང་དང་ལྷས་བྱིན་དང་ནི་ནོར་ལས་རྒྱལ། །བཞི་པོ་འབྱུང་བ་གང་གི་ངོ་བོར་འབྱུང་ན་རླུང་དང་མེ་དང་ཆུ་དང་ས་རྣམས་ལ་ནི་རིམ་གྱིས་ཡང་ནི་འབྱུང་བར་འགྱུར། །ཞེས་ཁམས་དྲུག་ཏུ་གསུངས་སོ། །སྤྱིར་རླུང་རེ་རེ་ལ་འབྱུང་བ་ལྔ་ལྔ་ཡོད་པར་རྡོ་རྗེ་ཕྲེང་བ་ལས་ཀྱང་། སྲོག་རླུང་སྟོང་ཉིད་ཡེ་ཤེས་མིང་། །ཞེས་པ་དང་། སྲོག་རླུང་མི་བསྐྱོད་པར་བཤད་པ་ལ་མི་བསྐྱོད་པ་ཆུ་ཡིན་པ་དུ་མ་བཤད་པས་འགལ་བ་མེད་དོ། །སྤྱི་དོན་གསུམ་པ་བྱེད་པའི་ལས་ནི་གཉིས་ཏེ། སྤྱིའི་ལས་དང་། སོ་སོའི་ལས་སོ། །དང་པོ་ནི་རྣམ་པར་ཤེས་པའི་རྟེན་བྱེད་པ་ཡིན་ཏེ། འབུམ་ཕྲག་ལྔ་པ་ལས། གསལ་བྱེད་ཧ་ནི་དབྱངས་ཀྱི་དྲུག་པ་ཨཱུ་རིང་པོ་དང་ཀླད་ཀོར་དང་ལྡན་པ། །ཧཱུྃ་ཡིན་པའི་རྟེན་འབྲེལ་དེས་རླུང་ལ་བརྟེན་པའི་སེམས་ལ། རྣམ་པར་ཤེས་པར་ཡོངས་སུ་གྲགས་སོ། །ཞེས་པ་དང་། རྡོ་རྗེ་ཕྲེང་བ་ལས་ཀྱང་། འདི་ནི་རླུང་ཁམས་ཆེན་པོ་སྟེ། །རྣམ་ཤེས་ཀུན་གཞི། ཉོན་ཡིད། འཇུག་ཤེས་གསུམ་གྱི་བཞོན་པ་ཡིན། །ཞེས་གསུངས་པའོ། །ཡང་འདིས་ལུས་བསྐྱེད་པ་དང་འཕེལ་བར་བྱེད་པ་ལ་སོགས་པའི་བྱ་བའང་བྱེད་དེ། ཧ་ནི་རླུང་སྟེ་དེ་ཡི་རྣམ་པ་ཐམས་ཅད་དུ། །བདུད་རྩི་ལྔའི་བདག་ཉིད་ཀྱི་སངས་རྒྱས་ཀུན་དང་མཉམ་པར་སྦྱོར་བ་སྟེ་རླུང་སེམས་གཉིས་སྦྱོར་ཞིང་འཕེལ་བར་བྱེད་དོ། །ཞེས་འབྱུང་བས། དང་པོ་ལུས་སྐྱེ་བའི་དུས་སུ་མའི་མངལ་དུ་རྣམ་པར་ཤེས་པ་རླུང་ལ་ཞོན་ཏེ་ཞུགས་པས་རླུང་གནས་པ་ལ་བརྟེན་ཏེ་རྣམ་པར་ཤེས་པ་བརྒྱལ་ལོ། །དེ་ཡེ་ཤེས་ཀྱི་རླུང་གི་བདག་ཉིད་ལ་གནས་སོ། །དེ་ནས་སྲོག་རླུང་ནས་བརྩམས་ཏེ། རླུང་བཅུ་པོ་རིམ་གྱིས་སྐྱེས་པས་ལུས་རྒྱས་པར་བྱེད་དོ། །ད་ལྟ་གནས་པའི་དུས་སུ་རླུང་རྒྱུས་པས། ལུས་མི་རུལ་བར་འཛིན་པར་བྱེད། རླུང་ལྡང་བ་དང་འཇུག་པའི་སྒོ་ནས་སེམས་རྣམ་པར་རྟོག་པ་སྣ་ཚོགས་སུ་སྐྱེད་པར་བྱེད་དོ། །དེ་བཞིན་དུ་འཆི་བའི་དུས་སུའང་ས་ཆུ་ལ་ཐིམ་པ་དང་། ཆུ་མེ་ལ་ཐིམ་པ་དང་། མེ་རླུང་ལ་ཐིམ་པ་དང་། རླུང་ནམ་མཁའ་ལ་ཐིམ་པ་ལ་སོགས་པ་རླུང་རྣམས་རིམ་གྱིས་འགགས་ཏེ་འཆི་བར་འགྱུར་རོ། །དེས་ན། བདེ་བ་དང་སྡུག་བསྔལ་རང་བཞིན་གྱིས། །ལྷན་ཅིག་སྐྱེས་པ་གྲུབ་པའི་གནས་ནི་ལུས་ཡིན་ཏེ། །རླུང་དང་བྱང་ཆུབ་ཀྱི་སེམས་འཕེལ་འགྲིབ་ཀྱི་དབང་གིས་བདེ་སྡུག་ཐམས་ཅད་འབྱུང་བས་སོ། །ཞེས་གསུངས་སོ། །གཉིས་པ་སོ་སོའི་ལས་ནི་བླ་མའི་མན་ངག་གི་རྡོ་རྗེ་ཕྲེང་བ་དང་མཐུན་པར་གསུངས་ཏེ། དང་པོ་སྲོག་གི་རླུང་གིས་ལུས་སེམས་མི་འབྲལ་བར་བྱེད་ཅིང་། སྣ་སྒོར་རླུང་རྒྱུ་བའི་ལས་བྱེད་དོ། །ཐུར་སེལ་གྱིས་བཤང་གཅི་ལ་སོགས་པ་ཐུར་དུ་འཕེན་པའི་ལས་བྱེད། མཉམ་གནས་ཀྱིས་ཁ་ཟས་འཇུ་བ་ལ་སོགས་པ་དང་། དྭངས་མ་ལུས་ལ་ཁྱབ་པའི་ལས་བྱེད་དོ། །གྱེན་རྒྱུས་སྨྲ་བ་དང་དགོད་པ་དང་། སྐྱུག་པ་ལ་སོགས་པ་བྱེད། ཁྱབ་བྱེད་ཀྱིས་འདེགས་པ་དང་འཇོག་པ་ལ་སོགས་པའི་ལས་བྱེད་དོ། །ཡན་ལག་གི་རླུང་རྣམས་མིག་ལ་སོགས་པའི་སྒོ་ལྔ་ནས་བྱུང་ནས་གཟུགས་རིག་པ་ལ་སོགས་པའི་ལས་བྱེད་དོ་ཞེས་གསུངས་སོ། །དུས་ཀྱི་འཁོར་ལོ་ལས་ནི། སྲོག་གིས་ལུས་སེམས་མི་འབྲལ་བར་སྡེབ་པར་བྱེད་ཅིང་རོ་རྐྱང་ཉི་ཟླའི་ལམ་འགྲོ་ཐུར་སེལ་ཐུར་དུ་འབྱིན་ལ་རོ་རྣམས་མ་ལུས་ལུས་ལ་ཁྱེར་བ་མཉམ་གནས་ཀྱིས། །གྱེན་དུ་རྒྱུ་བས་ལུས་བསྐྱོད་པ་ནི་བྱེད་དེ་གང་ཞེ་ན་ཁ་དང་ལག་པ་རྐང་པ་རྣམས་དང་གླུ་དང་གར་བྱེད་པ། །ཁྱབ་བྱེད་ནད་རྣམས་སྐྱེད་པར་བྱེད་དེ་རང་བཞིན་ཆུ་ཡིན་པས་དེའི་ཡོན་ཏན་དབང་གིས་ལུས་འཁྱོགས་པ་ཡང་དེ་བཞིན་ནོ། །ཀླུ་ཡིས་སྒྲེགས་པ་ཉིད་དེ་ལག་པ་དང་ནི་རྐང་པ་བསྐུམ་པ་རླུང་ནི་རུ་སྦལ་གྱིས། །ཁྲོ་བ་དང་ནི་འཁྲུགས་པ་མ་ལུས་རླུང་ནི་རྩངས་པ་ཡིན་ལ་ལྷས་བྱིན་གྱིས་ནི་གླལ་བར་བྱེད། །ལུས་ལ་བྱིས་པ་གཞོན་ནུ་དར་བབས་རྒས་པ་འཆི་བ་སྟེ་དེ་ལས་ལྔ་པ་འཆི་བ་ཡིན་པས་དེ་ཉིད་ལྔ་པོ༼པ༷་༽བྲལ་བར་གྱུར་གྱི་བར་དུ་གཏོང་བར་མི་བྱེད་པ་མི་བདག་ཅེས་བོས་ཏེ་ཀླུང་༼རླུང༷་༽ནི་ནོར་ལས་རྒྱལ་བ་ཡིན་ནོ། །ཞེས་གསུངས་སོ། །སྤྱི་དོན་བཞི་པ་རླུང་རྒྱུ་བའི་ཚུལ་རྣམ་པར་གཞག་པ་ལ་ལྔ་སྟེ། རླུང་རྒྱུ་བ་ཞེས་བྱ་བ་གང་ཡིན་པ་དང་། དེ་ཚུལ་ལམ་རྣམ་པ་ཇི་ལྟར་རྒྱུ་བ་དང་། གནས་དང་ལམ་གང་ནས་རྒྱུ་བ་དང་། གྲངས་དུ་ཞིག་རྒྱུ་བ་དང་། གྲངས་དེ་ལྟར་འོང་བའི་རྒྱུ་མཚན་བསྟན་པའོ། །དང་པོ་ནི་ཐུར་སེལ་ལ་སོགས་པའི་རླུང་དགུ་ནི་རང་རང་གི་གནས་ནས་རང་གི་ལས་བྱེད་པ་ཉིད་ལ་རྒྱུ་བ་ཞེས་ཟེར་ལ། སྲོག་གི་རླུང་ནི་ཐོག་མར་ཨ་ཝ་དྷཱུ་ཏཱི་ལ་གནས་པའི་༼ནི༷་༽ཡེ་ཤེས་ཀྱི་རླུང་ཞེས་ཀྱང་བྱ་ལ། དེ་བདག་ཏུ་འཛིན་པའི་སྒོ་ནས་སྙིང་གར་སྲོག་གི་རླུང་དུ་གནས་ནས་རྩ་གཉིས་ཀྱི་ནུས་པས་སྲོག་དང་རྩོལ་བ་ཞེས་བྱ་བར་འཇུག་པ་དང་། གནས་པ་དང་ལྡང་བར་སྣའི་བུ་གའི་སྒོ་ནས་རྒྱུ་བ་ཡིན་ཏེ། དྲུག་པའི་དང་པོ་ལས། ང་ཡི་ལུས་ཀྱིས་སྟེང་སྒོ་ལའང་། །རྡོ་རྗེ་ཅན་ཏེ་སྲོག་རྩོལ་གྱི་རླུང་ནི་རྟག་ཏུ་བཞུགས་ཏེ་རྒྱུའོ། །སྟེང་གི་སྒོར་ནི་སྦྱོར་བ་གསུམ། །སྒོ་དགུ་རྣམས་ཀྱིས་ཡོངས་སུ་བསྐོར། །ཞེས་པ་དང་། དེ་ཉིད་ལས། ལྡང་འཇུག་གནས་གསུམ་པོ་ཉིད་ཀྱི་སྦྱོར་བ་སྦྱོར་བ་ཐབས་ཤེས་ཀྱི་གསུམ་དུ་གནས་ཏེ། །རྣམ་པ་གསུམ་དུ་དབྱེ་བས་རྣམ་པར་གནས་སོ། །ཞེས་གསུངས་སོ། །དེ་ལྟར་ན་སྣའི་སྒོ་ནས་གསལ་བ་རྒྱུ་བ་ནི་སྲོག་རླུང་ཁོ་ན་ཡིན་ཏེ། ཕྱག་རྒྱ་ཆེན་པོ་ཐིག་ལེ་དང་། །རྡོ་རྗེ་ཕྲེང་བ་གཉིས་ག་ལས། །སྣ་ཡི་སྒོ་ཡི་རྒྱུན་ལས་ནི། །སྲོག་དང་རྩོལ་བའི་རྒྱུ་བ་དག །དུས་ཀུན་དུ་ནི་རྒྱུ་བ་ནི། །སྲོག་ཅེས་བྱ་བ་ཡིན་པར་བཤད། །ཅེས་པ་དང་། སྨིན་མའི་དབུས་སུ་སྲོག་གི་རླུང་། །དེ་ལྟར་གཅིག་པུའང་ལྡང་འཇུག་གནས་གསུམ་དུ་བཤད། །ཅེས་སོ། །འོ་ན་སྲོག་རླུང་ཆུ་ཡིན་ལ། གྱེན་རྒྱུ་མེ་ཡིན་པ་ལ་སོགས་པ་བཤད་པས། སྣའི་བུ་ག་ནས་ཆུ་རླུང་ཁོ་ན་ལས་མི་རྒྱུའམ་སྙམ་ན། དེ་ནི་མ་ཡིན་ཏེ། སྙིང་ག་ན་ཆུའི་ཁམས་གཙོར་གནས་ཤིང་སྲོག་རླུང་ཡང་སྙིང་ག་ན་གཙོར་གནས་པས་ཆུའི་ཁམས་ཞེས་བརྗོད་ཀྱི། སྤྱིར་ཡང་རླུང་རེ་རེ་ལ་ཡང་འབྱུང་བ་ལྔ་ལྔ་གནས་པ་ཡིན་པ་ལ། སྲོག་གི་རླུང་ནི་རླུང་ཐམས་ཅད་ཀྱི་རྩ་བ་ཡིན་ཞིང་། འབྱུང་བ་ལྔ་ཀའི་བདག་ཉིད་དོ། །གཉིས་པ་རླུང་དེ་དག་ཚུལ་ལམ་རྣམ་པ་ཇི་ལྟར་རྒྱུ་ཞེ་ན། རྣམ་ཤེས་ཀྱི་རླུང་ནི་ཡེ་ཤེས་ཀྱི་རླུང་ཡིན་ལ། ཡེ་ཤེས་ཀྱི་རླུང་ནི་ཁ་ཅིག་ལས་མི་རྒྱུ་བར་བཤད། དུས་ཀྱི་འཁོར་ལོ་ལས་ཆ་རེ་རྒྱུ་བར་བཤད་ཀྱང་། རྡོ་རྗེ་ཕྲེང་བ་དང་། བླ་མའི་མན་ངག་གིས་ཐུན་བཞིའི་མཚམས་སམ། ཀུན་ལ་ཁྱབ་པའི་ཚུལ་གྱིས་རྒྱུ་ཞིང་གསལ་བར་ནི་མི་རྒྱུ་སྟེ། རྡོ་རྗེ་ཕྲེང་བ་ལས། འཁོར་ལོ་བཞི་ཡི་རབ་ཏུ་དབྱེ་བའི་རྟེན་འབྲེལ་གྱི་དབང་གིས། །ཐུན་བཞིར་བྱིན་གྱིས་བརླབ་པ་དང་སྟེ་ཐུན་བཞིའི་མཚམས་སམ། །རྡོ་རྗེ་སེམས་དཔའི་གཟུགས་ཀྱིས་ནི་སྟེ་ཀུན་ལ་ཁྱབ་པའི་ཚུལ་གྱིས་ཡེ་ཤེས་ཀྱི་རླུང་། །འདི་ནི་ཇི་ལྟར་བདེ་བར་རོལ། །ཞེས་གསུངས་སོ། །ནམ་མཁའི་རླུང་ནི་དུས་ཀྱི་འཁོར་ལོ་ལས་ཆ་རེ་རྒྱུ་བར་བཤད། རྡོ་རྗེ་ཕྲེང་བ་དང་བླ་མའི་མན་ངག་གིས་ད་ལྟ་ནི་གསལ་བར་རྒྱུ་བ་མེད་ལ་འཁོར་གྱི་ཚུལ་གྱིས་རྒྱུ་ཞིང་། འཆི་བའི་དུས་སུ་འབྱུང་བ་བཞིའི་རླུང་ཡང་ནམ་མཁའི་རླུང་གིས་དབང་བྱས་ཏེ། གཙོ་བོའི་ཚུལ་གྱིས་རྒྱུ་སྟེ། དྲུག་པའི་དང་པོ་ལས་ཀྱང་། རྣམ་སྣང་ལ་སོགས་སངས་རྒྱས་རྣམས། །སྟེང་གི་སྒོར་ནི་གཡོ་ཞིང་གནས། །ཞེས་གསུངས་པས། ལྔ་ཀ་རྒྱུ་བའང་ཡིན་ལ། ཡང་དེ་ཉིད་ལས། རླུང་ལ་སོགས་པའི་དབྱེ་བ་ཡིས། །རྟག་ཏུ་འགྲོ་བ་རླུང་རྣམ་བཞི། །ཞེས་པས་ད་ལྟ་གཙོ་བོ་བཞི་པོ་རྒྱུ་བར་མངོན་ལ། རྡོ་རྗེ་ཕྲེང་བ་ལས་ཀྱང་། ལུས་ཀུན་ལ་ནི་གནས་པའི་ནམ་མཁའི་རླུང་། །བྱ་བ་ཀུན་ལ་འཇུག་པའོ། །འདི་ནི་རྣམ་སྣང་ངོ་བོ་སྟེ། །འཆི་བའི་དུས་ལ་འབྱུང་བར་འགྱུར། །ཞེས་གསུངས་སོ། །འབྱུང་བ་བཞིའི་རླུང་ཁ་དོག་བཞིར་རྒྱུ་ཚུལ་བཞིས་རྒྱུ་སྟེ། ས་རླུང་སེར་པོ་སྣའི་བུ་ག་གཉིས་ཀ་ལས་རྒྱུ་སྟེ། གཉིས་ཀ་ལས་ནི་འབྱུང་བའི་ཁམས། །གསེར་གྱི་མདོག་ཏུ་སྣང་བ་སྟེ། །དབང་ཆེན་གྱི་ནི་དཀྱིལ་འཁོར་ཉིད། །རིན་ཆེན་མགོན་པོའི་རྒྱུ་བའོ། །ཆུ་རླུང་ནི་སྣ་བུག་གཉིས་ནས་དལ་ཞིང་རྒྱུ་བ་མི་ཚོར་བར་དཀར་པོར་རྒྱུ་སྟེ། དལ་ཞིང་རྒྱུ་བ་མེད་པའི་ཁམས། །ཆུ་ཡི་དཀྱིལ་འཁོར་ཉིད་ཡིན་ཏེ།ཾ། དག་པ་ཤེལ་ལྟར་སྣང་བ་ནི། །རྡོ་རྗེ་མགོན་པོའི་རྒྱུ་བའོ། །མེ་རླུང་སྣ་བུག་གཡས་ནས་དམར་པོར་རྒྱུ་སྟེ། གཡས་པ་ནས་ནི་འབྱུང་བའི་ཁམས། །མེ་ཡི་དཀྱིལ་འཁོར་ཉིད་ཡིན་ཏེ། །ཁ་དོག་དམར་ཞིང་གསལ་བ་འདིས། །པདྨ་མགོན་པོའི་རྒྱུ་བའོ། །རླུང་གི་རླུང་སྣ་བུག་གཡོན་ནས་ལྗང་སེར་དུ་རྒྱུ་སྟེ། གཡོན་པ་ལས་ནི་འབྱུང་བའི་ཁམས། །རླུང་གི་དཀྱིལ་འཁོར་ཞེས་བྱ་བ། །ལྗང་སེར་དུ་ནི་སྣང་བ་སྟེ། །ལས་ཀྱི་མགོན་པོའི་རྒྱུ་བའོ། །ཞེས་པའོ། །དེ་ལྟར་གསུང་སྒྲོས་ཀྱིས་སྣ་བུག་ཐ་དད་པར་གསུང་ཡང་། ཁོ་བོའི་རྣམ་པར་རྟོག་པས་ནི་སྣ་བུག་རེ་རེའི་ལོགས་གཡས་གཡོན་ལ་དགོངས་ནས་གསུངས་པ་ཡིན་ནམ་སྙམ་སྟེ་མྱོང་བ་ལས་གྲུབ་བོ། །རླུང་དེ་དག་ཇི་ལྟར་རྒྱུ་སྙམ་ན། དྲུག་པའི་དང་པོ་ལས། སྟེང་དང་ངོས་དང་བྲང་༼དྲ༷ང་༽འོག་འགྲོ། །ཞེས་གསུངས་པས། མགོན་པོ་རེ་རེའི་རླུང་ཡང་ལྷ་མོ་བཞི་བཞི་དང་ལྡན་ཏེ། པདྨའི་མགོན་པོ་ལྟ་བུའི་རྒྱུ་བའི་དུས་སུའང་ནང་ཚན་གྱི་འབྱུང་བ་བཞི་ཕྱོགས་ཐ་དད་པ་ནས་རྒྱུ་སྟེ། མེ་རླུང་སྟེང་དུ་སོར་བཞི་གྲངས་ཉིས་བརྒྱ་ཉི་ཤུ་རྩ་ལྔ་རྒྱུ། རླུང་གི་རླུང་ངོས་སུ་སོར་དྲུག་གྲངས་སྔར་བཞིན་ཀུན་ལ་སྦྱར། ས་རླུང་དྲང་པོ་ཐད་ཀར་སོར་བཅུ་དྲུག་ཏུ་རྒྱུ། ཆུ་རླུང་འོག་ཏུ་སོར་བཅུ་གཉིས་སུ་རྒྱུའོ། །དུས་ཀྱི་འཁོར་ལོ་ལས་ནི། ས་རླུང་སོར་བཅུ་གཉིས། ཆུ་རླུང་བཅུ་གསུམ། མེ་བཅུ་བཞི། རླུང་བཅོ་ལྔ། ནམ་མཁའི་རླུང་བཅུ་དྲུག་རྒྱུའོ་ཞེས་གསུངས་སོ། །སཾ་པུ་ཊའི་དགོངས་པའང་འདི་དང་མཐུན་ནམ་སྙམ་སྟེ། དྲུག་པའི་དང་པོ་ལས། རྐང་མེད་རྐང་གཅིག་རྐང་གཉིས་དང་། །རྐང་བཞི་ལ་ནི་སོགས་པ་ཡིས། །རླུང་ལ་སོགས་པས་རབ་དབྱེ་བས། །རྟག་ཏུ་འགྲོ་བ་རླུང་རྣམ་བཞི། །ཞེས་གསུངས་པས། སོར་གྱི་གྲངས་རིམ་པ་བཞིན་འཕེལ་བར་མངོན་ནོ། །རླུང་དེ་དག་གི་མིིང་གི་རྣམ་གྲངས་ནི། དྲུག་པའི་དང་པོ་ལས། སེམས་དང་བཅིངས་པ་ས་རླུང་སྐྱེས་བུ་དང་དལ་བ་ཆུ་རླུང་སྐྱེས་བུ་ཅན་དང་རླངས་པ་མེ་རླུང་། །ཁྱད་པར་དང་མྱུར་བ་རླུང་གི་རླུང་རྣལ་འབྱོར་པ་ཡིས་དོན་ནམ་ཁའི་རླུང་ངོ་། །ཞེས་བྱ་བ་དང་། ཡེ་ཤེས་རྡོ་རྗེ་ཀུན་ལས་བཏུས་པ་ལས། བཅིངས་པ་དང་དལ་བ་དང་རླངས་པ་དང་མྱུར་བ་ཞེས་བྱ་བ་ནས་རིམ་པ་བཞིན་དུ་སྦྱར་བར་བྱའོ། །གསུམ་པ་གནས་དང་ལམ་གང་ནས་རྒྱུ་ཞེ་ན། སྤྱིར་ཡེ་ཤེས་ཀྱི་རླུང་རྩ་ཨ་ཝ་དྷཱུ་ཏཱིའི་མར་སྣེའི་ཨ་ཐུང་བྷ་གའི་དཀྱིལ་འཁོར་ལ་གནས་པ་ནི། ཀུན་གྱི་རྩ་བ་ཡིན་ལ། དེ་རྩ་གཉིས་ཀྱི་དབང་གིས་སྲོག་དང་རྩོལ་བར་བྱུང་། དེ་འཁོར་ལོ་བཞི་ལ། དེ་སྙིང་གའི་རྩ་འདབ་བཞི་ལས་འབྱུང་བ་བཞིར་བྱས་ནས། འཁོར་ལོ་བཞིའི་རྩ་འདབ་རྣམས་ལ་རིམ་པ་བཞིན་འབྱུང་སྟེ། ཡུལ་ཉི་ཤུ་རྩ་བཞི་ལ་སོགས་པ་ཀུན་ཏུ་རྒྱུས་ནས་འབྱུང་བ་བཞིའི་བདག་ཉིད་དུ་མགྲིན་པ་ནས་འབྱུང་བ་ནི་གསུང་གི་སྒོ་བཞི་ཞེས་བྱ། སྣ་སྒོ་གཉིས་ནས་འབྱུང་བ་ནི་ཐུགས་ཀྱི་སྒོ་གཉིས་ཞེས་བྱ། ཡན་ལག་གི་རླུང་ཕྲ་མོ་བུ་ག་དགུ་ནས་རྒྱུ་བ་ནི་སྐུའི་སྒོ་དགུ་ཞེས་བྱ་སྟེ། དྲུག་པའི་དང་པོ་ལས། སྐུའི་སྒོ་དགུ་དང་གསུང་གི་སྒོ་བཞི་དང་ཐུགས་ཀྱི་རང་བཞིན་གྱི་སྒོ་གཉིས་ལས་རྒྱུ་བའི་རླུང་ནི་རིམ་པ་བཞིན་ནི། །ཐ་མ་འབྲིང་པོ་དམ་པ་ཉིད་དེ་རྟོགས་དཀའ་སླའི་དབང་གིས་བཞག་པའོ། །ཅེས་པ་དང་། ཟླ་བ་སྟེ་ཐིག་ལེ་འབབ་པ་རྐྱང་མ་ཉི་མ་སྟེ་རཀྟ་འབབ་པ་རོ་མ་སྟེ་རྩ་གཉིས་པའི་རབ་ཏུ་དབྱེ་བས། །གསུམ་པའི་སྒོ་ནི་སྟེ་ཐུགས་ཀྱི་སྒོ་ཡིད་དང་བཅས་ཏེ་ཡིད་གཟུང་འཛིན་གཉིས་སུ་ཤར་བའི་རྩ་གཉིས་ཕྱུང་ངོ་། །ཞེས་བྱ་བ་ལ་སོགས་པ་གསུངས་སོ། །བཞི་པ་སྣ་བུག་ལས་གྲངས་དུ་ཞིག་རྒྱུ་ཞེ་ན། ཉིན་ཞག་ཕྲུགས་གཅིག་ལ་ཉི་ཁྲིའི་ཆིག་སྟོང་དྲུག་བརྒྱ་རྒྱུ་སྟེ། ཕྱག་རྒྱ་ཆེན་པོ་ཐིག་ལེ་ལས། ཐོག་མར་འབྱུང་དང་རྔུབ་པའི་གྲངས། །ཉི་ཁྲི་དང་ནི་ཆིག་སྟོང་དང་། །དེ་བཞིན་གྲངས་ནི་བརྒྱ་ཕྲག་དྲུག །ཉིན་དང་མཚན་མོར་ངེས་པར་རྒྱུ། །ཞེས་གསུངས་སོ། །ལྔ་པ་དེ་ལྟར་འོང་བའི་འཐད་པ་ནི། ཕྱི་རོལ་ན་ཇི་ལྟར་བར་ནང་ལུས་ལའང་དེ་ལྟར་གནས་ཏེ། ཕྱི་རོལ་དུ་དབུགས་ཚོད་དང་ཆུ་ཚོད་ལ་སོགས་པས་ཉིན་ཞག་འཛིན་པ་ཡོད་པ་ལྟར་ནང་གིའང་རླུང་གིས་འཛིན་པར་བྱེད་དེ། དེ་ལའང་གཉིས་ཏེ། རྡོ་རྗེ་མཁའ་འགྲོ་དང་། རྡོ་རྗེ་ཕྲེང་བའི་དབང་དུ་བྱས་པ་དང་། ཀྱེའི་རྡོ་རྗེའི་དགོངས་པའོ། །དང་པོ་ནི་ཡུལ་ཉི་ཤུ་རྩ་བཞིའི་དབང་གིས་དགུ་བརྒྱ་ཕྲག་ཉི་ཤུ་རྩ་བཞི་དང་། དེ་རེ་རེ་ལའང་ལྷ་མོའི་རླུང་ཉིས་བརྒྱ་ཉི་ཤུ་རྩ་ལྔ་པ་བཞི་བཞིའོ། །མགོན་པོ་བཞི་པའི་ལྟེ་བའི་ནང་སྐོར་རྩ་འདབ་བཞི་དང་སྣ་སྒོའི་དབྱེ་བས་འཕོ་བ་གཉིས་གཉིས་ཏེ་དྲུག་གཉིས་བཅུ་གཉིས་དང་ལྡན་ཏེ། རྡོ་རྗེ་ཕྲེང་བ་ལས། གཡོན་ནས་ལས་ཀྱི་མགོན་པོ་དང་གཡས་ནས་པདྨ་མགོན་པོ་དང་གཉིས་ཀ་ནས་རིན་ཆེན་མགོན་པོ་དང་། །འོག་ནས་དལ་བར་རྒྱུ་བ་རྡོ་རྗེ་མགོན་པོ་དང་རྣམ་པ་བཞིར་འགྱུར། །མགོན་པོ་རེ་རེ་ལ་ཐུན་ཕྱེད་དེ་དུས་སྦྱོར་ཕྱེད་ཀྱི་ནི་དུས་དབུགས་དགུ་བརྒྱའི་ཡུན་དག་ཏུ། །ལས་ནི་གཉིས་གཉིས་དག་ཏུ་གནས། །རླུང་གི་རླུང་རྒྱུ་བའི་དུས་སུ་དབང་། མེ་ལ་མགོན་སྤྱོད། ས་ལ་རྒྱས་པ། ཆུ་ལ་ཞི་བ་འགྲུབ་པས་སོ། །ཞེས་གསུངས་པས་ཐུན་ཕྱེད་ནི་འཕོ་བ་ཕྱེད་དོ། །འཕོ་བ་རེ་རེ་ལ་རླུང་དགུ་བརྒྱ་ཕྲག་གཉིས་གཉིས་རྒྱུ་བས་ཉིན་ཞག་གཅིག་ལ་འཕོ་བ་བཅུ་གཉིས་ཞེས་ཟེར་རོ། །གཉིས་པ་ཀྱེའི་རྡོ་རྗེའི་ལུགས་ཀྱི་ཟླ་བ་དང་། ཉི་མ་དང་། ཨཱ་ལི་དང་། ཀཱ་ལི་དང་། འཕོ་བ་བཅུ་དྲུག་དང་། དབྱུ་གུ་དྲུག་ཅུ་རྩ་བཞི་དང་། ཆུ་ཚོད་སུམ་ཅུ་རྩ་གཉིས་དང་། ཐུན་ཚོད་བཞི་སྟེ། དེ་ལྟར་ཐམས་ཅད་བཞིའོ་ཞེས་གསུངས་པ་ལ་བརྟེན་ནས་ལྟེ་བའི་རྩ་འདབ་ཀྱི་དབང་གིས་དབྱུ་གུ་དྲུག་ཅུ་རྩ་བཞི་ཡིན་ལ། དབྱུ་གུ་རེ་རེ་ལ་རླུང་སུམ་བརྒྱ་སུམ་ཅུ་རྩ་ཕྱེད་དང་བརྒྱད་ཀྱིས་ཉིན་ཞག་འདའོ། །དབྱུ་གུ་གཉིས་ལ་ཆུ་ཚོད་གཅིག་སྟེ། སྤྱི་བོའི་རྩ་འདབ་ཀྱི་དབང་གིས་སུམ་ཅུ་རྩ་གཉིས་ཆུ་ཚོད་རེ་རེ་ལ་དྲུག་བརྒྱ་བདུན་ཅུ་རྩ་ལྔའོ། །ཆུ་ཚོད་གཉིས་ལ་འཕོ་བ་གཅིག་སྟེ་མགྲིན་པའི་རྩ་འདབ་ཀྱི་དབང་གིས་བཅུ་དྲུག་གོ། འཕོ་བ་རེ་རེ་ལ་རླུང་སྟོང་སུམ་བརྒྱ་ལྔ་བཅུའོ། །འཕོ་བ་གཉིས་ལ་ཐུན་ཕྱེད་པ་གཅིག་སྟེ་སྙིང་གའི་རྩ་འདབ་ཀྱི་དབང་གིས་བརྒྱད་དེ་ཐུན་ཕྱེད་པ་རེ་ལ་རླུང་ཉིས་སྟོང་བདུན་བརྒྱ་པ་རེ་རྒྱུ་སྟེ། དེ་ལྟ་བུ་བརྒྱད་ཀྱིས་ཉིན་ཞག་འདའོ། །ཐུན་ཕྱེད་པ་གཉིས་ལ་ཐུན་གཅིག་སྟེ། སྙིང་གའི་ནང་སྐོར་གྱི་རྩ་འདབ་ཀྱི་དབང་དུ་བྱས་ན་བཞི་སྟེ་འདབ་མ་རེ་ལ་རླུང་ལྔ་སྟོང་བཞི་བརྒྱ་པ་རེ་རྒྱུའོ། །དེ་ལྟ་བུ་བཞིས་ཉིན་ཞག་འཛིན་ཏེ། གང་ལྟར་བསྔོས་ཀྱང་ཉིན་ཞག་གཅིག་གིས་རླུང་ཉི་ཁྲི་ཆིག་སྟོང་དྲུག་བརྒྱ་ཚང་ངོ་། །དེ་ཡང་ཕྱིར་རྒྱུ་བ་དང་། ནང་དུ་རྒྱུ་བ་དང་། གནས་པ་དང་། གསུམ་ལ་གཅིག་ཏུ་བྱས་ནས་བསྔོ་བ་ཡིན་ནོ། །སྤྱི་དོན་ལྔ་པ་ལམ་དུ་བྱས་པ་ན་ཇི་ལྟར་འགྱུར་ཞེ་ན། དང་པོར་རླུང་བཟུང་བས་རྣམ་པར་ཤེས་པ་ཟིན་པ་ཡིན་ཏེ། ཡིད་ཀྱི་རྟ་ཡིན་པའི་ཕྱིར་རོ། །ཡིད་ཟིན་པས་ཞི་གནས་སྐྱེ་ལ་དེ་ལས་ལྷག་མཐོང་གི་ཏིང་ངེ་འཛིན་སྐྱེའོ། །དང་པོར་སྲོག་རྩོལ་བགྲངས་པས་བཟླས་པར་འགྱུར་བས་དེས་སྒྲིབ་པ་ཟད་པར་འགྱུར་རོ། །ཡང་རླུང་རྣམ་པ་བཞི་གསལ་བས་ཕྲིན་ལས་བཞིའང་འགྲུབ་པར་བྱེད་དོ། །མཐར་ལས་ཀྱི་རླུང་འགགས་ཏེ་ཡེ་ཤེས་ཀྱི་རླུང་མངོན་དུ་འགྱུར་བར་བྱེད་དེ། དྲུག་པའི་དང་པོ་ལས། སེམས་མེད་སྐྱེས་བུ་མེད་པ་དང་། །ཡིད་དང་ལྡན་པ་མེད་པ་དང་། །ཞེས་པ་དང་། ཕྱག་རྒྱ་ཆེན་པོ་ཐིག་ལེ་ལས་ཀྱང་། རྣལ་འབྱོར་པ་ཡིས་རླུང་བསྒོམས་ན། །དངོས་གྲུབ་མྱུར་དུ་འཐོབ་པར་འགྱུར། །ཞེས་གསུངས་སོ། །རླུང་གི་མངོན་པར་རྟོགས་པ་བཤད་ཟིན་ཏོ། །དེ་ལྟར་ན་ལུས་རྩ་དང་། ཡི་གེ་བྷ་ག་དང་། བྱང་ཆུབ་ཀྱི་སེམས་རྣམས་ནི་དཀྱིལ་འཁོར་གསུམ་ཞེས་བྱ་སྟེ། རྒྱུད་ཕྱི་མ་ལས། དཀྱིལ་འཁོར་ལུས་སུ་བརྗོད་པ་སྟེ། །དཀྱིལ་འཁོར་ཡང་ནི་བྷ་གར་གསུངས། །དཀྱིལ་འཁོར་བྱང་ཆུབ་སེམས་ཉིད་དོ། །དཀྱིལ་འཁོར་གསུམ་ནི་བརྟག་པར་བྱ། །ཞེས་གསུངས་སོ། །དེ་ལ་མངོན་དུ་བྱེད་པ་ནི་རླུང་སྟེ། རླུང་ཞེས་བྱ་བས་ལས་ཀུན་བྱེད། །ཅེས་སོ། །དེ་ལྟར་ལུས་ཀྱི་གནད་ངོ་ཤེས་པས་བླ་མའི་མན་ངག་གིས་གནད་དེ་དང་དེར་བསྣུན་པས་སེམས་བདེ་སྟོང་གི་ཏིང་ངེ་འཛིན་སྐྱེད་པར་བྱེད་པས་ཕ་རོལ་ཏུ་ཕྱིན་པ་བས་རྟོགས་པར་བྱེད་པའི་ཐབས་ཁྱད་པར་དུ་འཕགས་པ་ཞེས་བྱ་བ་འདི་གྲུབ་པ་ཡིན་ནོ། །དེ་ལྟར་འདི་དག་ཀྱང་ལེའུ་དང་རབ་ཏུ་བྱེད་པ་གང་གི་ཡིན་ཞེ་ན། ཧེ་བཛྲའི་ལེའུ་དང་པོ་དང་། ཕྱི་མའི་བཞི་པ་དང་། སཾ་པུ་ཊའི་བརྟག་པ་དྲུག་པ་རྣམས་ཀྱིས་མངོན་པར་རྟོགས་པའོ། །དང་པོར་རྟོགས་པའི་ལྟ་བ་གཏན་ལ་དབབ་པའི་སྐབས་རྫོགས་སོ། །དེ་ལྟར་རྟོགས་པ་དང་ལྡན་པ་དེས་ལུས་ལ་གནད་དུ་བསྣུན་པའི་བསམ་གཏན་སྒོམ་པར་བྱེད་དོ། །དེ་ལྟ་བུའི་ལམ་འདི་ཡང་རིམ་པ་གཉིས་སུ་གསུངས་ཏེ། ལེའུ་བརྒྱད་པ་ལས། བསྐྱེད་པའི་རིམ་པ་ཉིད་དང་ནི། །རྫོགས་པ་ཡི་ཡང་རིམ་པ་ཉིད། །རིམ་གཉིས་མཉམ་པར་གནས་ནས་ནི། །རྡོ་རྗེ་ཅན་གྱི་ཆོས་འཆད་དོ། །ཞེས་གསུངས་སོ། །དཔལ་གསང་བ་འདུས་པའི་རྒྱུད་ཕྱི་མ་ལས་ཀྱང་། སངས་རྒྱས་རྣམས་ཀྱིས་ཆོས་བསྟན་པ། །རིམ་པ་གཉིས་ལ་ཡང་དག་བརྟེན། །བསྐྱེད་པ་ཡི་ནི་རིམ་པ་དང་། །དེ་བཞིན་རྫོགས་པའི་རིམ་ཉིད་དོ། །ཞེས་གསུངས་སོ། །གལ་ཏེ་རྡོ་རྗེ་ཅན་གྱི་ཆོས་རིམ་པ་གཉིས་སུ་འདུས་ན། རྒྱུའི་རྒྱུད་དང་། འབྲས་བུའི་རྒྱུད་རིམ་པ་གཉིས་སུ་ཇི་ལྟར་འདུ་སྙམ་ན། དེ་ལ་རིམ་པ་གཉིས་ཞེས་བྱ་བ་ནི་ལམ་གཉིས་པོ་ཉིད་ཡིན་མོད་ཀྱང་། རྒྱུའི་རྒྱུད་ནི་དེ་གཉིས་ཀྱི་སྦྱང་གཞི་ཡིན་ལ། དབང་བསྐུར་བ་ནི་དེ་གཉིས་ཀྱི་སྔོན་དུ་འགྲོ་བ་ཡིན་ལ། གཏོར་མ་ལ་སོགས་པ་ནི་དེ་གཉིས་ཀྱི་གྲོགས་ཡིན་ཞིང་། འབྲས་བུ་སྐུ་གཉིས་ནི་དེ་གཉིས་ཀྱིས་ཐོབ་པར་བྱ་བའི་འབྲས་བུ་ཡིན་པས། དེར་འདུས་ཏེ་རྒྱས་པར་འོག་ནས་བཤད་པར་བྱའོ། །
ལམ་རིམ་པ་གཉིས་ཀྱི་སྤྱིའི་དོན་གྱི་མངོན་པར་རྟོགས་པ།
རིམ་པ་གཉིས་པོ་འདི་ལ་དྲུག་སྟེ། དབྱེ་བའི་གཞི་དང་། དབྱེ་བའི་དོན་དང་། མིང་དོན་ནམ་ངེས་ཚིག་བསྟན་པ་དང་། རིམ་པ་གཉིས་གྲངས་ངེས་པར་བསྒོམ་དགོས་པའི་འཐད་པ་དང་། རིམ་པ་གཉིས་ཀྱིས་གྲོལ་བའི་རྒྱུ་མཚན་དང་། རིམ་པ་གཉིས་བསྒོམ་པའི་གོ་རིམ་བསྟན་པའོ། །༼ད༷ང་པོ༷་ནི༷། ཡི༷ད་མཚ༷ན་རྟོ༷ག་ལ༷ས་སྐྱོབ༷་པ༷འི་ཐ༷བས་ཁྱ༷ད་པ༷ར་ཅ༷ན་ག༷ང་ཞི༷ག་གྲོ༷ལ་བྱེད༷་ཀྱི༷་ལ༷མ་དུ༷་གྱུར༷་པ༷འོ། །གཉི༷ས་པ༷་དེ༷་ལ༷་ད༷བྱེ་ན༷་བུ༷མ་དབ༷ང་ཐོ༷བ་པ༷ས་གོ༷མས་པ༷ར་བྱ༷་བ༷་བསྐྱེད༷་རི༷མ་ད༷ང་། མཆོ༷ག་དབ༷ང་ཐོ༷བ་པ༷ས་གོ༷མས་པ༷ར་བྱ༷་བ༷་རྫོ༷གས་པ༷འི་རི༷མ་པ༷་གཉི༷ས་སོ༷༽། །དང་པོ༼གསུམ༷་པ༷་༽ལ་གསུམ། གཙོར་སྦྱང་གཞི་ལས་མིང་དུ་བཏགས་པ་དང་། གཙོར་འབྲས་བུ་ལས་མིང་དུ་བཏགས་པ་དང་། གཙོར་ལམ་ལས་མིང་དུ་བཏགས་པའོ། །དང་པོ་ནི་སློབ་དཔོན་འཕགས་པ་ཀླུ་སྒྲུབ་ཡབ་སྲས་ཀྱི་བཞེད་པས། སྦྱང་གཞི་དང་སྦྱོང་བྱེད་ཀྱི་རིམ་པ་གཉིས་ཏེ། དེ་ལ་སྦྱང་གཞི་བསྐྱེད་པའི་རིམ་པ་ལ་བསྐྱེད་པ་ཞེས་བྱ་བ་ནི་ཐ་མལ་གྱི་ལུས་གྲུབ་པ་ཡིན་ལ། རིམ་པ་ཞེས་བྱ་བ་ནི་དེ་སྐྱེས་པའི་རིམ་པ་སྐྱེ་གནས་བཞི་དང་། བྱེ་བྲག་ཏུ་མངལ་སྐྱེས་ཀྱི་དབང་དུ་བྱས་ནས། མངལ་གྱི་གནས་སྐབས་ལྔའོ། །དེ་སྦྱོང་བར་བྱེད་པའི་ཐབས་ལྷའི་རྣམ་པ་ནི་སྦྱོང་བྱེད་བསྐྱེད་རིམ་མོ། །སྦྱང་གཞི་རྫོགས་པ་ནི་ཐ་མལ་གྱི་སེམས་ཅན་ཤི་བ་ཡིན་ལ། རིམ་པ་ནི་ས་ཆུ་ལ་ཐིམ་པ་ལ་སོགས་པ་འཆི་བའི་རིམ་པའོ། །དེ་སྦྱོང་བར་བྱེད་པའི་ཐབས་རྡོ་རྗེའི་བཟླས་པ་དང་འོད་གསལ་ལ་སོགས་པ་ནི་སྦྱོང་བྱེད་རྫོགས་པའི་རིམ་པ་ཡིན་ནོ་ཞེས་བཞེད་དོ། །གཉིས་པ་ནི་བྱང་ཆུབ་སེམས་དཔའ་རྣམས་ཀྱི་བཞེད་པས་བསྐྱེད་པ་ཞེས་བྱ་བ་ནི། མཆོག་གི་དངོས་གྲུབ་ལ་བྲོད་པ་བསྐྱེད་པའི་ཕྱིར་ཐུན་མོང་གི་དངོས་གྲུབ་ཡིན་ལ། དེ་སྒྲུབ་པར་བྱེད་པའི་ཐབས་ལྷའི་རྣམ་པ་བསྒོམ་པ་ལ་རིམ་པ་ཞེས་བྱའོ། །རྫོགས་པ་ཞེས་བྱ་བ་ནི་དེ་ལས་འབྲས་བུ་གོང་དུ་བོགས་དབྱུང་དུ་མེད་པའི་ཕྱིར་མཆོག་གི་དངོས་གྲུབ་ཡིན་ལ། རིམ་པ་ནི་དེ་སྒྲུབ་པར་བྱེད་པའི་སྦྱོར་བ་ཉིན་མོའི་རྣལ་འབྱོར་ནམ་མཁའ་དང་། མཚན་མོའི་རྣལ་འབྱོར་མུན་ཁང་ལ་བརྟེན་ནས་དབང་པོ་ལྔ་ཡུལ་ལ་མི་གཡེང་བར་བྱེད་པ་སོར་བསྡུས། དེ་ལས་རྟགས་བཅུ་ཡིས་སྟོང་གཟུགས་མངོན་དུ་གྱུར་ནས་ཡུལ་སེམས་གཉིས་སུ་མེད་པའི་མཉམ་བཞག་སྐྱེས་པ་བསམ་གཏན། གཡས་གཡོན་དང་སྟེང་འོག་གི་རླུང་གཅིག་ཏུ་འདྲེས་པ་སྲོག་སྩོལ། འཁོར་ལོ་བཞི་ཡིས་རླུང་སེམས་ལས་སུ་རུང་སྟེ་གཟུང་འཛིན་དབུ་མར་ཐིམ་པ་འཛིན་པ། ལས་དང་ཡེ་ཤེས་ཀྱི་ཕྱག་རྒྱ་ཆེན་པོ་གསུམ་གང་རུང་ལ་བརྟེན་ནས་བདེ་སྟོང་ལྷན་གཅིག་སྐྱེས་པའི་ཡེ་ཤེས་སྐྱེས་པ་རྗེས་དྲན། མི་འགྱུར་བའི་བདེ་བ་ཆེན་པོའི་ཡེ་ཤེས་མངོན་དུ་བྱས་པ་ཏིང་ངེ་འཛིན་ཏེ་ཡན་ལག་དྲུག་ཡིན་ནོ་ཞེས་བཞེད་དོ། །གསུམ་པ་སློབ་དཔོན་བིཪྺ་པ་དང་། ཌོམྦིའི་རྗེས་སུ་འབྲང་བས་ལམ་ལས་མིང་གཙོར་བཏགས་ཏེ། བློས་ཀུན་ཏུ་ལྷའི་རྣམ་པ་བསྐྱེད་པ་ནི་བསྐྱེད་པ་ཡིན་ལ། གསལ་འདེབས་པ་ནི་རིམ་པ་ཡིན་ཏེ། དེའི་སྦྱང་གཞི་རྒྱུ་དང་འབྲས་བུའང་བསྐྱེད་པའི་རིམ་པ་ཞེས་བྱ་བར་ཤེས་པར་བྱའོ། །རྫོགས་པ་ཞེས་བྱ་བ་ནི་ལུས་ངག་ཡིད་གསུམ་རྫོགས་པ་ཉིད་གསལ་འདེབས་པས་རྫོགས་པ་སྟེ། རང་བྱིན་རླབས་དང་དཀྱིལ་འཁོར་འཁོར་ལོ་བསྒོམ་པ་ཡིན་ལ། རིམ་པ་ཞེས་བྱ་བ་ནི་རིམ་གྱིས་བསྒོམ་པ་སྟེ། དེའི་རྒྱུ་སྦྱང་གཞི་དང་འབྲས་བུ་རྫོགས་པའི་རིམ་པར་ཤེས་པར་བྱའོ། །དོན་གཉིས་པ་༼བཞི༷་༽པ་རིམ་པ་གཉིས་གྲངས་ངེས་པར་བསྒོམ་པའི་འཐད་པ་སྟོན་ཏོ། །དེ་ལ་དེ་ལྟ་བུའི་རིམ་པ་གཉིས་ཀ་བསྒོམ་པའམ། འོན་ཏེ་གང་རུང་ཅིག་བསྒོམ་སྙམ་ན། དེ་ལ་གཉིས་བསྒོམ་དགོས་སོ། །དེའི་འཐད་པ་ལ་གསུམ་སྟེ། སྤང་བྱ་གཉིས་ཡིན་པའི་ཕྱིར་རིམ་པ་གཉིས་ཀ་བསྒོམ་པའི་འཐད་པ་དང་། ཐོབ་བྱ་གཉིས་ཡིན་པའི་ཕྱིར་རིམ་པ་གཉིས་ཀ་བསྒོམ་དགོས་པ་དང་། རང་གི་ངོ་བོ་རྟེན་དང་བརྟེན་པར་གྲུབ་པའི་ཕྱིར་བསྒོམ་པར་འཐད་པའོ། །དང་པོ་ལ་གཉིས། ཐ་མལ་གྱི་རྣམ་རྟོག་དང་། གྱ་ནོམ་པ་ལྷར་ཞེན་པའོ། །དེ་ལ་དང་པོ་ནི་སྤང་བྱ་ཐ་མལ་གྱི་རྣམ་རྟོག་སྦྱོང་བའི་ཕྱིར་བསྐྱེད་པའི་རིམ་པ་བསྒོམ་ལ། གྱ་ནོམ་པ་ལྷར་ཞེན་པ་སྤང་བའི་ཕྱིར་རྫོགས་པའི་རིམ་པ་བསྒོམ་པའོ། །དེ་ལ་བསྐྱེད་རིམ་གྱིས་ཐ་མལ་གྱི་རྣམ་རྟོག་སྤང་བའང་། རྡོ་རྗེ་གུར་གྱི་ལེའུ་བཅུ་བཞི་པ་ལས། ཕལ་པའི་གནས་སྐབས་ཏེ་ཐ་མལ་རྣམ་རྟོག་གཞོམ་པའི་ཕྱིར། །བསྐྱེད་རིམ་བསྒོམ་པ་ཡང་དག་རབ་ཏུ་གྲགས། །རང་བཞིན་གྱི་གནས་སྐབས་རྫོགས་རིམ་བསྒོམ་པ་ལས། །དངོས་དང་དངོས་མེད་གང་དུ་བསྒོམ་པའང་མ་ཡིན་རྣམ་པར་མི་རྟོག་པ་མི་བསྒོམ་པའང་མིན་ནོ། །བྱང་ཆུབ་སེམས་དཔའ་རྣམས་ཀྱི་རྟོག་པ་དེ་བཞིན་ཏེ། འོན་ཀྱང་མི་གཙང་བའི་ཚད་དེ་ཐ་མལ་རྣམ་རྟོག་མཉམ་པར༷་སྦྱང་བར་བྱ་བའི་ཕྱིར་དེ་བཞིན་གཤེགས་པའི་སྐུ་གཟུགས་རབ་ཏུ་བསྒོམ་པར་བྱའོ་ཞེས་གསུངས་སོ། །དེ་ལ་མི་གཙང་བའི་ཚད་ཐ་མལ་གྱི་རྣམ་རྟོག་ལ་གཉིས། རྒྱུ་ལས་དང་ཉོན་མོངས་པ་དང་། འབྲས་བུ་བདག་དང་བདག་གིར་འཛིན་པའོ། །དང་པོ་སྦྱོང་བ་ནི་ཚོགས་གཉིས་བསགས་པ་ཡིན་ལ། གཉིས་པ་བདག་དང་བདག་གིར་འཛིན་པ་ནི་སྣོད་བཅུད་གཉིས་ཏེ། དེའང་སྣོད་སྦྱོང་བ་ནི་འབྱུང་བ་བཞི་ལས་གྲུབ་པའི་གཞལ་ཡས་ཁང་དང་། ཡང་དཔའ་བོ་གཅིག་པའི་དབང་དུ་བྱས་ན་གདན་ནོ། །བཅུད་སྦྱོང་བ་ལ་གཉིས། སྐྱེད་ཆོག་གིས་སྐྱེ་གནས་བཞི་སྦྱོང་ཚུལ་དང་། ལྷའི་རྣམ་པས་ཉོན་མོངས་པ་གསུམ་སྦྱོང་ཚུལ་ལོ། །དང་པོ་ནི་འཁོར་བར་སྐྱེ་བའི་གནས་སྐྱེ་གནས་བཞི་ཡིན་ལ། དེ་སྦྱོང་བ་སྐྱེད་ཆོག་བཞི་སྟེ། དེའང་དཀྱིལ་འཁོར་གྱི་འཁོར་ལོ་གཅིག་ལ་སྦྱར་ན་མངོན་བྱང་ལྔ་ལས་རྒྱུ་རྡོ་རྗེ་འཛིན་པ་བསྐྱེད་པ་ནི། ཉི་མ་ནི་དྲོད། ཟླ་བ་ནི་གཤེར་ཏེ། དྲོད་གཤེར་གཉིས་ལས་སྐྱེ་བའམ། ཉི་ཟླ་གཉིས་ཀྱིས་ཁུ་ཁྲག་མཚོན་པས་མངལ་སྐྱེས་ཀྱི་བློ་སྦྱོང་ངོ་། །འཁོར་གྱི་ལྷ་མོ་མངལ་ནས་འབྱིན་པས་མངལ་སྐྱེས་སྦྱོང་ངོ་། །འབྲས་བུ་རྡོ་རྗེ་འཛིན་པ་ཐིག་ལེའི་གོང་བུ་ལས་བཞེངས་པས་སྒོང་སྐྱེས་སྦྱོང་ངོ་། །སྐྱེ་མཆེད་ཀྱི་ལྷ་སྐད་ཅིག་གམ། ས་བོན་ཙམ་ལས་བསྐྱེད་པས་བརྫུས་སྐྱེས་ཀྱི་བློ་སྦྱོང་ངོ་། །དེ་ནས་དཀྱིལ་འཁོར་བསྡུ་བ་ནི་སྣོད་བཅུད་འཇིག་པ་སྦྱོང་ངོ་། །ལྷ་སོ་སོའི་སྐྱེད་ཆོག་ནི་འོག་ཏུ་བསྐྱེད་པའི་རིམ་པའི་སྐབས་སུ་བསྟན་པར་བྱའོ། །དེ་ལྟར་ན་སྦྱང་གཞི་སྦྱོང་བའི་སྐྱེད་པའི་ཆོ་ག་ཞེས་བྱ་བ་ཡིན་ནོ། །སྤྱི་དོན་གཉིས་པ་ལྷའི་རྣམ་པས་ཉོན་མོངས་པ་གསུམ་སྦྱོང་ཚུལ་ནི། ཤིན་ཏུ་ཟབ་པའི་བསྐྱེད་པའི་རིམ་པ་ཁྲོ་ཆགས་ཀྱི་རྣམ་པ་སྟེ། ཁྲོ་བོའི་སྐུར་བཞུགས་པས་ཞེ་སྡང་འདུལ། བཙུན་མོའི་འཁོར་གྱི་དབུས་ན་བཞུགས་པས་ནི་འདོད་ཆགས་སྦྱོང་། མཚན་དང་དཔེ་བྱད་ཀྱིས་བརྒྱན་པའི་གཟུགས་ཀྱི་སྐུར་བསྒོམས་པས་ནི་གཏི་མུག་ཞི་བར་བྱེད་པ་ཡིན་ཏེ། རྡོ་རྗེ་གུར་ལས། འདོད་ཆགས་ཞེ་སྡང་གཏི་མུག་དང་། །ང་རྒྱལ་སེར་སྣའི་སྐྱེ་བོ་རྣམས། །བསྡུ་ཕྱིར་རང་གི་འཁོར་ལོ་སྟེ་དཀྱིལ་འཁོར་ལ། །འོད་དཔག་མེད་སོགས་རྡོ་རྗེའི་སྟེ་ལྷའི་གཟུགས་ནི་དུ་མ་འཛིན། །ཞེས་པ་དང་། ཞེ་སྡང་འདུལ་བའི་དབང་དུ་བྱས་ནས། ཤིན་ཏུ་གདུག་པ་དྲག་པོ་ལ། །ཞི་བ་ཉེ་བར་མི་སྦྱོར་ཏེ། །འདི་མཁྱེན་རྡོ་རྗེ་ཅན་ཆེན་གྱིས། །རང་ཉིད་ཀྱེ་ཡི་རྡོ་རྗེར་འགྱུར། །ཞེས་པ་དང་། གཏི་མུག་འདུལ་བའི་དབང་དུ་བྱས་ནས། ཤིན་ཏུ་སྟོང་པ་སྟེ་མེད་པར་ཞེན་པ་རྣམས་ཀྱིས། །ལས་འབྲས་ཡོད་པ་མིན་པའི་བརྟུལ་ཞུགས་འཛིན་པ་རྣམས་ཀྱི། །དོན་དུ་སངས་རྒྱས་གཏི་མུག་སྤྱོད་པའི་ཚུལ་སྟོན་པ། །རྡོ་རྗེ་རྫོགས་པའི་སངས་རྒྱས་རྣམ་སྣང་དུ་འགྱུར། །འདི་ནི་གྲུབ་ཐོབ་རྣམས་ཀྱི་དགོངས་པ་མཐོ་བའི་སྤྱོད་པ་ལྟ་བུ་ལ་གོ་རུང་ངམ་སྙམ། ཞེས་པ་དང་། འདོད་ཆགས་འདུལ་བའི་དབང་དུ་བྱས་ཏེ། བྱང་ཆུབ་ཆགས་དང་བྲལ་བ་ལས་སྐྱེས་པ་སྤངས་ཤིང་མི་མོས་པ། །སེམས་ཅན་གང་ཞིག་བདེ་བར་བྱེད་པའི། །ཆགས་པས་བྱང་ཆུབ་རབ་ཏུ་སྒྲུབ་པར་འདོད་པ་རྣམས་ལ་བྱང་ཆུབ་དེ་སྦྱིན་ཕྱིར། །པདྨ་གར་གྱི་དབང་ཕྱུག་གི་སྐུར་གྱུར། །ཞེས་པ་དང་། སཾ་པུ་ཊའི་བརྟག་པ་དང་པོ་དངོས་ལས་ཀྱང་། ཨེ་མའོ་སངས་རྒྱས་ཐམས་ཅད་ཀྱི། །ཀུན་མཁྱེན་ཡེ་ཤེས་བླ་ན་མེད་པ། །དེ་བཞིན་གཤེགས་པའི་འགྱུར་མེད་ཀྱི་བདེན་༼བདེ༷་༽བའི་དོན་གང་ཡིན་པ་མཚོན་བྱེད་དུ། །བཙུན་མོ་སྤྲུལ་ནས་ཉེ་བར་སྤྱོད་པར་མཛད་པའོ། །ཞེས་གསུངས་སོ། །དེ་ལྟར་ཁྲོ་ཆགས་ཀྱི་སྐུས་རྩ་བའི་ཉོན་མོངས་པ་གསུམ་ཞི་བར་བྱེད་པ་ཡིན་པས་ན། ཉོན་མོངས་པ་གཞན་རྣམས་ཤུགས་ལ་ཞི་བར་བྱེད་པ་ཡིན་ནོ། །ཁྲོ་ཆགས་ཀྱི་རྣམ་པའི་སྐུ་མེད་པ་རྣམས་ནི་བསྐྱེད་པའི་རིམ་པ་མི་ཟབ་པ་ཞེས་བྱའོ། །སྤྱི་དོན་གཉིས་པ་རྫོགས་པའི་རིམ་པས་ནི་གྱ་ནོམ་པ་ལྷར་ཞེན་པ་ཉིད་སྦྱོང་བར་བྱེད་དེ། བརྟག་པ་གཉིས་པའི་ལེའུ་གཉིས་པ་ལས། བསྐྱེད་པའི་རིམ་པའི་རྣལ་འབྱོར་གྱི། །བརྟུལ་ཞུགས་ཅན་གྱིས་སྤྲོས་པ་བསྒོམ། །སྤྲོས་པ་རྨི་ལམ་ལྟར་བྱས་ནས། །སྤྲོས་པ་ཉིད་ནི་སྤྲོས་མེད་བྱེད། །ཅེས་བྱ་བ་དང་། དེ་ནས་ཟུང་དུ་ཆུད་པ་ན། །ཇི་ལྟར་སྣང་ལ་རང་བཞིན་མེད་པར་སྒྱུ་མ་མྱོང་ལ་རང་བཞིན་མེད་པ་རྨི་ལམ་དང་། །གསལ་ལ་ཐོགས་པ་མེད་པ་ཇི་ལྟར་བར་མའི་སྲིད་པ་ཡིན་པ་བཞིན། །རྟག་ཏུ་གོམས་པའི་རྣལ་འབྱོར་གྱིས། །བདེ་བ་ཆེན་པོ་ལེན་པའི་དཀྱིལ་འཁོར་ཉིད་ནི་ཇི་ལྟར་བསྒོམ་པ་དེ་བཞིན་དུ་ཐོབ་པར་འདོད། །ཅེས་གསུངས་སོ། །གཞན་ཡང་རྫོགས་པའི་རིམ་པས་སྦྱང་གཞི་ཐ་མལ་པ་མཐའ་དག་ཀྱང་སྦྱོང་སྟེ། སཾ་པུ་ཊའི་བརྟག་པ་བཅུ་པ་ལས། བདེན་འཛིན་གྱི་རྣམ་རྟོག་གཏི་མུག་ཆེན་པོ་སྟེ། །འཁོར་བའི་རྒྱ་མཚོར་ལྟུང་བར་བྱེད། །མི་རྟོག་ཏིང་འཛིན་ལ་གནས་ན། །ནམ་མཁའ་སྐྱོན་གྱིས་མ་གོས་པ་བཞིན་དྲི་མ་མེད་པར་འགྱུར། །ཞེས་སོ། །ཡང་བརྟག་པ་གཉིས་པ་ལས། ལྷན་སྐྱེས་ཀྱི་ཡེ་ཤེས་འདི་ནི་བདེ་བ་ཆེན་པོའི་རང་བཞིན་ཡིན་པའི་ཕྱིར་དངོས་པོ་དང་དེའི་རང་བཞིན་སྟོང་པར་ཤེས་པས་དངོས་པོ་མེད་པ་ང་། །འཁོར་འདས་ཀྱི་དངོས་པོའམ་རང་བཞིན་མངོན་སུམ་དུ་རྟོགས་པའི་ཕྱིར་སངས་རྒྱས་ང་། །ཞེས་བྱ་བ་ལ་སོགས་པའི་གཞུང་གིས་རང་བྱིན་བརླབ་དང་། དཀྱིལ་འཁོར་འཁོར་ལོའི་ཡེ་ཤེས་སྐྱེ་བའི་རྟེན་འབྱུང་བ་བཞི་ལས་གྲུབ་པའི་རྩ་ལ་སོགས་པ་རྣམས་ཀྱིས་ནི་མ་དག་པའི་སྣོད་དང་བཅུད་ཀྱིས་བསྡུས་པའི་རྟེན་རྣམས་སྦྱོང་ལ། དེ་ལ་བརྟེན་ནས་སྐྱེས་པའི་ཡེ་ཤེས་ཀྱིས་ནི་དེ་ལ་བརྟེན་པའི་ཡིད་སྦྱོང་སྟེ། ལུང་ནི་ལྟ་བའི་སྐབས་སུ་མང་དུ་བརྗོད་ཟིན་ཏོ། །ཡང་རྫོགས་པའི་རིམ་པའི་ཡེ་ཤེས་ཀྱི་སྦྱང་གཞི་རྟེན་དང་བརྟེན་པ་འཇིག་པའི་ཚུལ་སྦྱོང་སྟེ། འཆི་བའི་དུས་སུ་ས་ཆུ་ལ་ཐིམ་པ་དང་། ཆུ་མེ་ལ་ཐིམ་པ་དང་། མེ་རླུང་ལ་ཐིམ་པ་དང་། རླུང་ནམ་མཁའ་ལ་ཐིམ་པ་དང་། ནམ་མཁའ་རྣམ་པར་ཤེས་པ་ལ་ཐིམ་པ་ལ་སོགས་པའི་རྟགས་རྣམས་རྣལ་འབྱོར་པས་བསྒོམ་པའི་རྟགས་ད་ལྟར་འབྱུང་སྟེ། གུར་ལེའུ་བཞི་པ་ལས། དང་པོ་སྤྲིན་གྱི་རྣམ་པ་འཆར་བ་སྟེ་དྲོད་ཐོབ་པའི་རྟགས་དང་། །གཉིས་པ་དུ་བ་འདྲ་བ་ཉིད་རྩེ་མོ། །གསུམ་པ་མེ་ཁྱེར་རྣམ་པ་སྟེ་བཟོད་པ། །བཞི་པ་མར་མེ་ཉེར་འབར་བ་ཆོས་མཆོག །ལྔ་པ་རྟག་ཏུ་སྣང་བ་སྟེ། །སྤྲིན་མེད་ནམ་མཁའ་འདྲ་བ་ཉིད་མཐོང་ལམ་ལ་སྦྱར་རོ། །ཅེས་བྱ་བ་ལ་སོགས་པ་གསུངས་སོ། །དེ་ལྟར་སྦྱང་གཞི་རིམ་པ་གཉིས་ཀྱིས་སྦྱོང་ཚུལ་ནི། བསྐྱེད་པས་ཀུན་རྟོག་སྦྱོང་ལ། དེ་ཉིད་རྫོགས་པས་སྦྱོང་བ་དང་། སྐྱེ་བ་བསྐྱེད་པས་སྦྱོང་ལ། འཆི་བ་རྫོགས་པས་སྦྱོང་བ་དང་། བསྐྱེད་རྫོགས་རེ་རེས་ཀྱང་སྐྱེ་བ་དང་འཆི་བ་དང་། སྣང་བ་དང་སྟོང་པའམ། རྟོག་པ་མཐའ་དག་སྦྱོང་བ་ཡིན་ནོ། །དང་པོ་ནི་རྡོ་རྗེ་གུར་ལས། །ཕལ་པའི་རྣམ་རྟོག་སྦྱོང་བའི་ཕྱིར། །ཞེས་བྱ་བའི་ལུང་གིས་གྲུབ་བོ། །གཉིས་པའང་རྡོ་རྗེ་གུར་ལས། དང་པོ་སྤྲིན་གྱི་རྣམ་པ་ཉིད། །ཅེས་བྱ་བ་ལ་སོགས་པ་དང་། སྤྱོད་པ་བསྡུས་པ་ལས། འཕགས་པ་ལྷས། གང་ཞིག་སྐྱེ་བ་སྒྱུ་མའི་དཔེ་བཅུ་གཉིས་ཀྱིས་མཚོན་པ་སྟེ་ཀུན་རྫོབ་བདེན་པ་སྟེ། །འཆི་བའི་མིང་ཡང་རིལ་འཛིན་རྗེས་གཞིག་གིས་གཤིགས་པའི་དོན་དམ་བདེན་པ་ཡིན་ལ། །སྒྱུ་ལུས་འོད་གསལ་གྱི་རིམ་པ་གཉིས་པོ་དེ་དག་བླ་མའི་དྲིན་གྱིས་ནི། །རྙེད་པ་འདི་ནི་མ་འོངས་སངས་རྒྱས་ཡིན། །བདེན་གཉིས་དེ་ལ་དབྱེར་མེད་ཟུང་དུ་འཇུག་པ་ནི། །རྒྱུན་མི་འཆད་བཞིན་དུ་བདེན་གཉིས་དེ་དག་ཁྱད་པར་མེད་པ། །མིང་གཉིས་མཐའ་མ་ཟུང་འཇུག་གཅིག་ཏུ་གོ་ན་༼པོ༷་ཁོ༷་ན༷ར་༽ནི། །ཤེས་པ་དེ་འདིར་ཅིངས་ལས་གྲོལ་བ་ཡིན། །ཞེས་གསུངས་པས་ན། རིམ་པ་གཉིས་པོ་དེ་བདེན་པ་གཉིས་ཀྱང་ཡིན་ནོ། །ཚིགས་སུ་བཅད་པ་དེ་དག་ནི་རིམ་པ་ལྔ་པ་ལས་ཀྱང་འབྱུང་བ་ཡིན་ནོ། །གསུམ་པ་རེ་རེས་ཀྱང་སྐྱེ་འཆི་ལ་སོགས་པ་སྦྱོང་བ་ནི། སྦྱང་གཞི་དང་སྦྱོང་བྱེད་ཐམས་ཅད་ངོ་སྤྲད་ལ་ལམ་ཐམས་ཅད་གཅིག་ཏུ་བསྡེབས་ནས་སྟོན་པ་འདི་ནི་རྣལ་འབྱོར་གྱི་དབང་ཕྱུག་ཆེན་པོ་བིཪྺ་པའི་བཞེད་པ་ཡིན་ནོ། །གཉིས་པ་ཐོབ་བྱ་སྐུ་གཉིས་ཡིན་པའི་ཕྱིར་རིམ་པ་གཉིས་བསྒོམ་པའི་འཐད་པ་ནི། དེ་ལ་བསྐྱེད་པའི་རིམ་པས་གཟུགས་ཀྱི་སྐུ་ཐོབ་པར་བྱེད་ལ། རྫོགས་པའི་རིམ་པས་ཆོས་ཀྱི་སྐུ་ཐོབ་པར་བྱེད་དོ། །དང་པོའང་གུར་གྱི་ལེའུ་དང་པོ་ལས་གསུངས་པ། འདིའི་ཚིག་དང་པོ་གཉིས་རྫོགས་རིམ་ལ་སྦྱར་བའི་བཤད་པ་འབྱུང་མོད་འདིར་བསྐྱེད་རིམ་ལྟར་བཤད་ན་ལེགས་སྙམ། དེ་ཕྱིར་ལྷའི་དཀྱིལ་འཁོར་གྱི་འཁོར་ལོ་ཞེས། །སྣང་བ་ཐམས་ཅད་ལྷར་བསྒོམ་པའི་ཐབས་ནི་བདེ་བའི་སྡོམ་པ་སྟེ། །སངས་རྒྱས་ང་རྒྱལ་རྣལ་འབྱོར་གྱིས། །སངས་རྒྱས་ཉིད་ནི་མྱུར་བར་འགྲུབ། །སྟོན་པ་སུམ་ཅུ་རྩ་གཉིས་མཚན། །གཙོ་བོ་དཔེ་བྱད་བརྒྱད་ཅུར་ན། །བསྐྱེད་རིམ་དེ་ནི་ཐབས་ཀྱི་གཟུགས་ཅན་ཡིན་པས་འབྲས་བུ་གཟུགས་སྐུ་འགྲུབ་པ་ཡིན་ནོ། །ཞེས་གསུངས་པས་འབྲས་བུ་དང་མཐུན་པས་སྦྱང་བར་བྱ་བའི་ཕྱིར་སངས་རྒྱས་ཀྱི་སྐུ་གཟུགས་བསྒོམ་པར་བྱ་བའི་དབང་དུ་བྱས་ནས་གོང་དུ་བསྟན་པ་དེ་དག་དེ་བཞིན་གཤེགས་པ་མངོན་པར་སངས་རྒྱས་པ་དང་མཐུན་ཏེ། ཚོགས་གཉིས་བསགས་པས་ནི་བསྐལ་པ་གྲངས་མེད་གསུམ་དུ་ཚོགས་བསགས་པ་དང་འདྲ། སྲུང་བའི་འཁོར་ལོས་སྲོད་ལ་བདུད་བཏུལ་བ། གཞལ་ཡས་ཁང་གིས་མ་དག་པའི་སྣོད་སྦྱངས་ཏེ་འོག་མིན་དུ་བྱིན་གྱིས་བརླབས། མངོན་པར་བྱང་ཆུབ་པ་ལྔའི་རིམ་པས་ལྷའི་རྣམ་པར་གྲུབ་པ་ནི་འོག་མིན་ནམ་རྡོ་རྗེ་གདན་གྱི་སྟེང་དུ་ཐོ་རངས་སངས་རྒྱས་པ་དང་འདྲ། དབང་བསྐུར་བ་ནི། ཁམས་གསུམ་ཆོས་ཀྱི་རྒྱལ་པོར་དབང་བསྐུར་འོད་ཟེར་གྱི་འཕྲོ་འདུས་སེམས་ཅན་གྱི་དོན་བྱེད་པ་དང་། བཟླས་པ་ནི་ཆོས་ཀྱི་འཁོར་ལོ་བསྐོར་བ་དང་མཐུན་ནོ། །བསྐྱེད་པའི་རིམ་པ་བསྡུས་ཏེ་སྟོང་པ་ཉིད་དུ་བསྒོམས་པས་ཡོངས་སུ་མྱ་ངན་ལས་འདས་པ་དང་མཐུན་ཏེ། དེ་ལྟར་མཛད་པ་བཅུ་གཉིས་དང་མཐུན་པས་སངས་རྒྱས་ཀྱི་ཕྲིན་ལས་མཛད་ནས། སླར་ཡང་མཛད་པ་རྒྱུན་མི་འཆད་པ་དང་འདྲ་བར་སྟོང་པ་ཉིད་ཀྱི་ངང་ལས་ལྷའི་སྐུར་ལངས་ནས་སྤྱོད་ལམ་གྱི་རྣལ་འབྱོར་གྱི་ཚུལ་གྱིས་སེམས་ཅན་གྱི་དོན་བྱེད་པ་ཡིན་ནོ། །དེས་ན་བསྐྱེད་པའི་རྣམ་པས་སངས་རྒྱས་ཀྱི་གཟུགས་ཀྱི་སྐུ་གྲུབ་པར་བྱེད་པ་དང་མཐུན་པས་འབྲས་བུ་ལམ་དུ་བྱེད་པ་ཞེས་ཀྱང་བྱའོ། །ཡང་རྡོ་རྗེ་གུར་ལེའུ་བཅུ་བཞི་པ་ལས་ཀྱང་། བཅོམ་ལྡན་འདས་ལུས་ཅན་བསྒོམ་པའི་ཐབས་ཀྱི་དགོས་པ་ཅི་ལགས། གསང་བའི་བདག་པོ་དགོས་པ་ཡོད་དོ། །དེ་ཅི་ལགས། སངས་རྒྱས་ཉིད་དོ། །སངས་རྒྱས་ཉིད་དེ་ཅི་ལགས། རྣམ་པ་ཐམས་ཅད་མཁྱེན་པ་ཉིད་དོ། །དེ་ཅི་ལགས། ལུས་ཅན་ཏེ་གཟུགས་སྐུ་འདི་ནི་ཡེ་ཤེས་སྣང་ཆ་ཡིན་པས་བདེན་པའོ། །ཅི་བཅོམ་ལྡན་འདས་བེམ་པོ་ལགས་སམ། བཀའ་སྩལ་པ། བེམ་པོ་མ་ཡིན་ཏེ་ང་ཉིད་མེ་ལོང་ལྟ་བུའི་ཡེ་ཤེས་སོ་ཞེས་བྱ་བ་ལ་སོགས་པ་གསུངས་སོ། །འདིས་ནི་སངས་རྒྱས་ཀྱི་སྐུ་གཟུགས་ཀྱི་སྐུ་ཡེ་ཤེས་ཀྱི་རང་བཞིན་གྱི་སྐུ་ཞེས་བྱ་བར་བསྒྲུབ་པ་ཡིན་ནོ། །གཞན་ཡང་འདིས་ལོག་པར་རྟོག་པ་རྣམ་པ་བཞི་བསལ་བ་ཡིན་ཏེ། སངས་རྒྱས་ལ་གཟུགས་ཀྱི་སྐུ་མི་འདོད་པའི་ལོག་པར་རྟོག་པ་བསལ་བ་དང་། སངས་རྒྱས་ལ་ཡེ་ཤེས་མེད་པའི་ལོག་རྟོག་བསལ་བ་དང་། གཟུགས་ཀྱི་སྐུ་ནི་རྣམ་པའམ་ཕྱི་རོལ་ལ་ཐུགས་ཡེ་ཤེས་ཀྱི་རང་བཞིན་དུ་འདོད་པའི་ལོག་པར་རྟོག་པ་བསལ་བ་དང་། བསྐྱེད་པའི་རིམ་པས་ཐུན་མོང་འགྲུབ་པ་ཙམ་ལས་མཆོག་སྒྲུབ་པ་ལ་བསྐྱེད་རིམ་གྱིས་མ་ཡིན་ནོ་ཞེས་བྱ་བའི་ལོག་པར་རྟོག་པ་བསལ་བ་ཡིན་ནོ། །ཞིབ་ཏུ་བླ་མས་བསྟན་པར་བྱའོ། །གཉིས་པ་རྫོགས་པའི་རིམ་པ་བསྒོམ་པ་ནི་ཆོས་ཀྱི་སྐུ་འཐོབ་པར་བྱེད་དེ། སཾ་པུ་ཊའི་བརྟག་པ་དྲུག་པ་ལས། ཞུ་བདེའི་ཡེ་ཤེས་ཕྱག་རྒྱ་ལ་མ་ལྟོས་པར་རང་བྱིན་རླབས་ཀྱི་ཐབས་ལས་རང་བྱུང་ངོ་བོ་ཉིད་འདི་ནི། །ཉམས་སྣང་ལ་ཆོས་སྐུ་དང་འདྲ་བར་སྣང་བས་ཆོས་ཀྱི་སྐུར་ནི་རབ་ཏུ་གྲགས། །ཞེས་གསུངས་སོ། །ཡང་གུར་གྱི་ལེའུ་དྲུག་པ་ལས། རྫོགས་རིམ་ཆོས་ཀྱི་དབྱིངས་ནི་འོད་གསལ་བ། །གང་ཞིག་བསྒོམ་པ་དེ་བས་ན། །སེམས་ཅན་དེས་སངས་རྒྱས་ཐོབ་ནས་དེ་དང་མཉམ་པར་འགྱུར་རོ། །ཞེས་གསུངས་པ་ལྟ་བུ་སྟེ། རྫོགས་རིམ་གྱི་ཉམས་ཟུང་འཇུག་ངོ་བོ་ཉིད་དང་མཐུན་པ་རྣམས་ཆོས་སྐུ་དང་མཐུན་པར་མོས་ཤིང་བསྲེས་ལ་ལམ་དུ་བྱའོ། །དེ་ལྟ་བུའི་རིམ་པ་གཉིས་བསྒོམས་པས་འབྲས་བུ་སངས་རྒྱས་ཀྱི་སྐུ་གཉིས་འགྲུབ་པ་དེའང་ལན་ཅིག་དེ་ལྟ་བུའི་རྣམ་པར་འགྲུབ་པ་ལ་ད་ལྟ་ནས་དེ་ལྟ་བུ་བསྒོམས་པས་འབྲས་བུ་ལམ་དུ་བྱེད་པ་ཞེས་བྱ་ལ། དེའང་འབྲས་བུའི་རྣམ་པ་ཙམ་ཡིན་པས་རྣམ་པ་ལམ་དུ་བྱེད་པ་ཞེས་བྱ་སྟེ། འདི་རྒྱས་པར་ལམ་གྱི་སྐབས་ཉིད་དུ་བཤད་པར་བྱའོ། །གསུམ་པ་རང་གི་ངོ་བོ་རྟེན་དང་བརྟེན་པ་ཡིན་པའི་ཕྱིར་བསྒོམ་པར་འཐད་པ་ལ། བརྒལ་བའི་དོན་ནི་རྫོགས་པའི་རིམ་པས་བསྐྱེད་རིམ་ཉིད་ཀྱང་སྦྱོང་བའི་ཕྱིར་དང་། འབྲས་བུ་ཆོས་ཀྱི་སྐུ་འགྲུབ་པ་ཡིན་ན་དེ་ཉིད་ཀྱིས་ཆོག་པས་བསྐྱེད་རིམ་དོན་མེད་སྙམ་དུ་རྒོལ་བ་ནི། ཧེ་བཛྲའི་ཕྱི་མའི་གཉིས་པ་ལས། རྡོ་རྗེ་སྙིང་པོས་གསོལ་པ། རྫོགས་པའི་རིམ་པའི་རྣལ་འབྱོར་འདི། །དེ་ཡི་བདེ་བ་ནི་བདེ་ཆེན་ལྷན་སྐྱེས་ཡེ་ཤེས་སུ་བརྗོད། །རྫོགས་པའི་རིམ་པའི་ཡེ་ཤེས་བསྒོམ་པ་མེད་པ་སྟེ་མི་སྒོམ་པར། །བསྐྱེད་པ་ཡིས་ནི་ཅི་ཞིག་འཚལ། །ཞེས་གསུངས་སོ། །དེའི་ལན་ནི་རྫོགས་པའི་རིམ་པ་དེ་ལྟར་བཟང་ཡང་། དེ་ལ་རྟེན་བསྐྱེད་རིམ་མེད་ན་དེ་ཉིད་ཀྱང་མི་འབྱུང་ཞེས་དཔེ་དང་བཅས་ཏེ་ལན་འདེབས་པ་ནི། ཨེ་མ་བྱང་ཆུབ་སེམས་དཔའ་ཆེ། །རྫོགས་རིམ་ལ་དད་པའི་ཤུགས་ཀྱིས་བསྐྱེད་རིམ་ལས་རབ་ཏུ་ཉམས། །ལུས་ཀྱི་དངོས་པོ་མེད་པར་རྟེན་གང་ལས་བདེ་བ་སྐྱེ། །བདེ་བ་སྨྲ་བར་མི་ནུས་སོ། །ཁྱབ་དང་ཁྱབ་བྱེད་ཚུལ་གྱིས་ནི། །བདེ་བས་འགྲོ་བ་ཁྱབ་པ་ཉིད། །ཇི་ལྟར་མེ་ཏོག་ལ་གནས་དྲི། །མེ་ཏོག་དངོས་མེད་ཤེས་མི་འགྱུར། །དེ་བཞིན་གཟུགས་སོགས་དངོས་མེད་ན། །བདེ་བ་ཉིད་ཀྱང་དམིགས་མི་འགྱུར། །ཞེས་གསུངས་ཏེ། རྒྱུའི་གནས་སྐབས་སུའང་། རྟེན་ཞུ་བ་མེད་ན་བརྟེན་པ་བདེ་བ་མེད་པར་འགྱུར། །ཞུ་བདེ་གཉིས་སོ་སོར་གནས་པའི་ནུས་པ་མེད་ཕྱིར་ཕན་ཚུན་ལྟོས་དང་བཅས་པའོ། །སྐྱེས་མ་ཐག་ཞལ་ཕྱག་རྣམ་པ་ལྷའི་གཟུགས་ཅན་ཉིད་དུ་གྲུབ་པ་ལྷ་སོ་སོའི་དག་པ། །སེམས་ཀྱི་རང་བཞིན་མཆོག་ཏུ་བདེ་བ་གཟུགས་སམ་རང་བཞིན་མེད་པ་དེ་བཞིན་ཉིད་ཀྱི་དག་པ། །ཞེས་འབྱུང་ལ། འབྲས་བུའི་སྐབས་སུའང་རྡོ་རྗེ་སྙིང་པོ་རྣམ་པ་མེད་པའི་བྱང་ཆུབ་དེ་སྐད་མ་སྨྲ་ཞིག །ང་ཉིད་དངོས་པོ་གཟུགས་སྐུ་དང་དངོས་མེད་ཆོས་སྐུ་ང་། །དང་པོ་ནས་རང་བཞིན་གྱིས་གནས་པའི་དེ་བཞིན་གཤེགས་པ་བརྗོད། །རང་བཞིན་མེད་པས་གཟུགས་མེད་པ་དང་མ་འགགས་པས་གཟུགས་དང་ལྡན་པའི་མཆོག །བསམ་གྱིས་མི་ཁྱབ་པ་ཟབ་མོ་ཞི་བའི་གཟུགས་དང་ལྡན། །ཞེས་གུར་ལས་གསུངས་ཏེ། དེས་ན་རྟེན་དང་བརྟེན་པ་འབྲལ་བ་མེད་དོ་ཞེས་བྱ་བའི་དོན་ནོ། །སྤྱི་དོན་ལྔ་པ་དེ་ལྟ་བུའི་རིམ་པ་གཉིས་པོ་བསྒོམས་པས་གྲོལ་བའི་འཐད་པ་སྟོན་ཏོ། །འདི་ལ་གསུམ་སྟེ། རིགས་སམ་རྒྱུ་ཡིན་པའི་ཕྱིར་གྲོལ་བར་འཐད་པ་དང་། ཐབས་ཁྱད་པར་ཅན་གྱིས་ཟིན་པའི་ཕྱིར་གྲོལ་བར་འཐད་པ་དང་། དག་པ་རྣམ་པ་གསུམ་གྱི་བདག་ཉིད་ཡིན་པའི་ཕྱིར་གྲོལ་བར་འཐད་པའོ། །དང་པོ་ནི་དེ་ལྟ་བུའི་རིམ་པ་གཉིས་པོ་དེ་བསྒོམས་པས་ཅི་ཞིག་བྱ་སྙམ་ན་རིགས་ཡིན་པའི་ཕྱིར་ཏེ། འབྲས་བུ་དེ་བཞིན་གཤེགས་པའི་དངོས་གྲུབ་ཀྱི་རྒྱུ་ཡིན་པའི་ཕྱིར་རོ། །རྒྱུ་ཡིན་ནོ་ཞེས་གོང་དུའང་བཤད་ཟིན་མོད། རྒྱུ་རང་ཇི་ལྟར་ཡིན་སྙམ་ན། ཐམས་ཅད་གསང་བ་ལས། རྒྱུ་ལ་འབྲས་བུས་རྒྱས་གདབ་ཅིང་། །འབྲས་བུ་ལ་ཡང་རྒྱུས་རྒྱས་གདབ། །ཅེས་གསུངས་པས། སྤྱིར་རྒྱུ་ཐམས་ཅད་ཀྱང་དེ་བཞིན་གཤེགས་པའི་རིགས་ཡིན་ལ། འབྲས་བུ་དེ་བཞིན་གཤེགས་པའང་རྒྱུའི་རིགས་ཡིན་ཞིང་། དེ་བཞིན་དུ་ལམ་ཡང་དེ་གཉིས་ཀྱི་རིགས་ཡིན་ལ། དེ་གཉིས་ཀྱང་ལམ་གྱི་རིགས་ཡིན་པའི་ཕྱིར་རོ། །དེ་ལྟར་ཡང་། ཧེ་བཛྲའི་ལེའུ་ལྔ་པ་ལས་གསུངས་ཏེ། རིགས་ཡིན་པ་དང་གྲངས་འབྱུང་བ་ལྔ་རྣམས་དང་། །ཕུང་པོ་ལྔ་ཡི་རང་བཞིན་གྱིས། །རིགས་དང་བགྲང་བྱ་འདི་ཡིས་ནི། །རྒྱུ་ལ་རིགས་དང་འབྲས་བུ་ལ་རིགས་བདག་ཞེས་མངོན་པར་བརྗོད་པར་བྱ། །ཞེས་སོ། །དེའང་སྤྱིར་རྒྱུ་ལ་འབྲས་བུའི་རིགས་སུ་བཞག་པ་ཡོད་དེ། བུད་ཤིང་ལ་མེའི་རིགས་ཟེར་བ་ལྟ་བུའོ། །འབྲས་བུའང་རྒྱུའི་རིགས་སུ་བཞག་པ་ཡོད་དེ། བུམ་པ་ལ་འཇིམ་པའི་རིགས་ཟེར་བ་ལྟ་བུའོ། །ཡང་བརྟེན་པ་ལ་རྟེན་གྱི་རིགས་སུ་བཞག་པ་ཡོད་དེ། རྒྱལ་པོ་ལ་བརྟེན་པ་ལ་རྒྱལ་པོའི་རིགས་ཅན་ཟེར་བ་ལྟ་བུའོ། །རྟེན་ལ་བརྟེན་པའི་རིགས་སུ་བཞག་པ་ཡོད་དེ། ངན་པར་བརྟེན་པ་ལ་ངན་པའི་རིགས་ཟེར་བ་ལྟ་བུའོ། །དེ་བཞིན་དུ་སྤྱི་དང་བྱེ་བྲག་ལའང་སོ་སོར་ཤེས་པར་བྱའོ། །དཔེ་དེ་བཞིན་དུ་ཡོད་པ་ལས། དོན་ནི་འབྱུང་བ་ལྔ་རྣམས་དང་། །ཞེས་བྱ་བ་ལ་སོགས་པ་སྟེ། འདི་དག་སྦྱངས་པ་ལས་དེ་བཞིན་གཤེགས་པའི་དངོས་གྲུབ་འབྱུང་བས་རྒྱུ་ལ་འབྲས་བུའི་རིགས་སུ་བཞག་གོ། འདི་དག་སྦྱངས་པ་ལས་བྱུང་བའི་དེ་བཞིན་གཤེགས་པ་ལ་དེ་དག་གི་རིགས་སུ་བཞག་སྟེ། ཐུབ་པ་རྣམ་པར་སྣང་མཛད་རྨོངས། །ཞེས་བྱ་བ་ལྟ་བུའོ། །དེས་ན་དཔེ་བུད་ཤིང་དང་མེ་འདྲ་བའི་ཕྱིར། སཾ་པུ་ཊ་ལས། བུད་ཤིང་བསྲེགས་པ་ཡིན་ཡང་བུད་ཤིང་ལས་བྱུང་བས་ན་དའེ ི་རགས་ིཞས་ེབརྗད་ོཔ་ལྟར་ཞ་སྡང་ེསྤང་ོབའ་སངས་ིརྒྱས་ལ་ན་ཞ་སྡང་ེིག་མཚན་ིབརྗོད་པ་ཡིན་ནོ། །འགྲོ་དོན་ལ་དགྱེས་པའི་རྒྱལ་བ་རྣམས་རྣམ་འགྱུར་སྣ་ཚོགས་སྟོན་པས་གར་མཁན་མཆོག་གོ། ཅེས་གསུངས་སོ། །དེས་ན་གང་གི་ཡོངས་སུ་འཛིན་པ་པོ་ནི་རིགས་ཀྱི་བདག་པོ་ཡིན་ལ། གང་ཡོངས་སུ་བཟུང་བ་དེ་ནི་དེའི་རིགས་ཡིན་ནོ། །དེ་ལྟར་རྡོ་རྗེ་རྩེ་མོ་ལས། སྦྱང་འབྲས་རིགས་ལྔའི་མགོན་དེས་ཡོངས་སུ་བཟུང་བས་ན། །སྦྱང་གཞི་ལ་དེ་ཡི་རིགས་ཀྱི་དཀྱིལ་འཁོར་དུ་བཞག་པ་ཡིན་ནོ། །ཞེས་གསུངས་སོ། །དེ་བས་ན་ལམ་གཏན་ལ་འབེབས་པའི་སྐབས་འདིར་འབྲས་བུ་ནི་རིགས་ཀྱི་བདག་པོ་ཡིན་ལ། ལམ་དང་རྒྱུ་ནི་རིགས་ཡིན་པར་འཇོག་གོ། དེ་བས་ན་རིགས་དང་རིགས་ཀྱི་བདག་པོ་མི་འབྲལ་ཞིང་འབྲེལ་བ་ཅན་དུ་གྲུབ་པའི་ཕྱིར་རིམ་པ་གཉིས་པོ་འདིས་གྲོལ་བར་འགྱུར་ཏེ། ཞེན་པས་འཇུག་ཅིང་འབྲེལ་བས་མི་བསླུ་བ་ཡིན་ནོ། །དེའང་ཞེན་པ་ནི་འབྲས་བུ་ལ་ཞེན་ལ། འཇུག་ནི་ལམ་ལ་འཇུག་པའོ། །འབྲེལ་བ་ནི། རིམ་པ་དེ་བསྒོམས་ན་འབྲས་བུ་འགྲུབ་པར་ངེས་ཏེ་མི་བསླུ་བའོ། །དེའང་འབྲས་བུ་ལམ་དུ་བྱེད་པ་དང་། རྣམ་པ་ལམ་དུ་བྱེད་པ་དང་། མོས་པ་ལམ་དུ་བྱེད་པ་དང་། བྱིན་རླབས་ལམ་དུ་བྱེད་པ་ཞེས་བྱ་བ་བཞི་རྡོ་རྗེ་ཐེག་པའི་ལམ་ཐམས་ཅད་གཏན་ལ་འབེབས་པ་ཡིན་ནོ། །དེའང་རྣམ་པ་ལམ་དུ་བྱེད་པའི་མཚོན་བྱེད་ཕྱོགས་གཅིག་ནས་མཚོན་ན་འབྲས་བུ་ཆོས་ཀྱི་སྐུ་རྣམ་པར་རྟོག་པས་མི་ཕྱེད་པས་རྡོ་རྗེ། ཆགས་པས་མ་གོས་པས་པདྨ། དེ་བཞིན་ཉིད་དུ་གཤེགས་པས་དེ་བཞིན་གཤེགས་པ་ཞེས་བྱ་བ་ལ་སོགས་པ་ཡིན་ལ། དེ་མཚོན་པར་བྱ་བའི་ཕྱིར་གཟུགས་ཀྱི་སྐུ་ལའང་དེའི་བརྡས་རྣམ་པར་འཇོག་པས་རྡོ་རྗེ་ལ་སོགས་པའོ། །ཡང་དེ་ལས་བྱུང་བའི་དཀྱིལ་འཁོར་འཁོར་ལོ་ལ་སོགས་པའང་དེའི་རིགས་སོ། །དེ་ལྟ་བུའི་མཚོན་བྱེད་དེ་བསྒོམ་པའི་རྣལ་འབྱོར་པའི་ལམ་རིམ་པ་གཉིས་ཀྱང་དེའི་རིགས་སོ། །ལམ་དེས་སྦྱང་བར་བྱས་པས་འབྲས་བུ་དེ་འགྲུབ་པའི་རྒྱུ་འབྱུང་བ་བཞི་ལ་སོགས་པ་དེའི་རིགས་ཞེས་བྱ་ལ། ལམ་བསྐྱེད་རིམ་ལའང་དེ་ལ་སོགས་པ་མཐའ་ཡས་པ་དང་། རྫོགས་རིམ་ལས་ཀྱི་ཕྱག་རྒྱ་ལའང་དེའི་རིགས་ཡིན་ཞེས་བྱ་བ་ལ་སོགས་པ་མཐའ་ཡས་པ་རྣམས་ཀྱང་རིགས་པའི་ཚུལ་འདིས་རྒྱས་པར་བླ་མས་སྟོན་པར་འགྱུར་བས་ན་ཤེས་པར་བྱའོ། །དེས་ན་རིགས་དང་རིགས་ཀྱི་བདག་པོ་དང་ཕྱག་རྒྱས་གདབ་པར་བྱ་བ་དང་། འདེབས་པའི་དབྱེ་བ་ནམ་ཡང་དབྱེ་མི་ཕྱེད་པའི་ཕྱིར་གྲོལ་བའི་རྒྱུ་ཡིན་ཞེས་བྱ་བའི་དོན་ནོ་འདིའི་དོན་སྦྱང་གཞི་དེ་དག་གི་རང་བཞིན་ལེགས་པར་ངོ་ཤེས་ཚེ་སྦྱང་འབྲས་ཀྱང་དེ་ལས་གཞན་ན་མེད་པར་ཐག་ཆོད་པ་ལ་ཟེར་བ་ཡིན་ནོ། །གཉིས་པ་ཐབས་ཁྱད་པར་ཅན་གྱིས་ཟིན་པའི་ཕྱིར་གྲོལ་བར་འཐད་པ་ནི། རྩ་རྒྱུད་ཕྱི་མའི་གཉིས་པ་ལས། དུག་གི་དུམ་བུ་གང་ཉིད་ཀྱིས། །སྐྱེ་བོ་ཐམས་ཅད་འཆི་བར་འགྱུར། །དུག་གི་དེ་ཉིད་ཤེས་པ་དེས། །བོང་བ་ལྟ་བུ་བརྟེན་པའི་དུག་གིས་ཁྱི་སྨྱོན་སོགས་གཡོ་བའི་དུག་ནི་འབིགས་པར་བྱེད། །ཅེས་བྱ་བ་ལ་སོགས་པ་གསུངས་ཏེ། འདི་ལ་བཞི། དུག་གིས་དུག་ལ་བསྣུན་པའི་རིགས་འདྲ་གཉེན་པོར་ཆེ་བ་དང་། རླུང་གིས་རླུང་ལ་བསྣུན་པས་བཟློག་པ་གཉེན་པོར་ཆེ་བ་དང་། ཆུས་ཆུ་དགུག་པ་མང་པོ་ལྷན་ཅིག་ཏུ་སྦམས་པ་གཉེན་པོར་ཆེ་བ་དང་། ཚིག་པ་མེས་གདུང་བ་ཡང་ནས་ཡང་དུ་བསྣན་པ་གཉེན་པོར་ཆེ་བའོ། །དེས་ན་དྲི་མས་དྲི་མ་འཁྲུ་བ་གཉེན་པོར་ཆེ་བའམ། རྟོག་པས་རྟོག་པ་བཟློག་པ་སྟེ། དེ་ཉིད་ལས། སྐྱེ་བོ་མི་བཟད་པ་ཡི་ལས་ཉོན་མོངས་སོགས། །གང་དང་གང་གིས་འཆིང་འགྱུར་བ། །ཐབས་དང་བཅས་ན་དེ་ཉིད་ཀྱིས། །སྲིད་པའི་འཆིང་བ་ལས་གྲོལ་འགྱུར། །ཞེས་གསུངས་ཏེ། གོང་དུ་བསྟན་པའི་དཔེ་བཞིས་སྤང་བྱ་ཉིད་ལ་ཐབས་ཀྱིས་ཟིན་ན་དེ་ཉིད་ཀྱིས་གྲོལ་ཏེ། སྲིད་པའི་འཆིང་བ་ལས་གྲོལ་ན་སངས་རྒྱས་ཀྱི་འབྲས་བུར་འགྱུར་ཞེས་བྱ་སྟེ། ཞིབ་ཏུ་རྟོགས་པར་བྱའོ། །གསུམ་པ་དག་པ་གསུམ་གྱི་བདག་ཉིད་ཡིན་པའི་ཕྱིར་གྲོལ་བར་འཐད་པ་ནི། དེ་ལ་རིམ་པ་གཉིས་བསྒོམས་པས་ཇི་ལྟར་གྲོལ་སྙམ་པ་ལ། ཧེ་བཛྲའི་ལེའུ་དགུ་པ་ལས། ཕུང་པོ་ལྔ་དང་དབང་པོ་དྲུག །སྐྱེ་མཆེད་དྲུག་དང་འབྱུང་ཆེན་ལྔ། །རང་བཞིན་གྱིས་ནི་རྣམ་པར་དག །ཅེས་ཏེ། དེ་ལྟར་རང་བཞིན་གྱིས་དག་པའི་ཕྱིར་གྲོལ་ལོ། །འོ་ན་བསྒོམས་ནས་ཅི་བྱ་སྙམ་ན། ཉོན་མོངས་ཤེས་བྱའི་སྒྲིབ་སྦྱང་བྱ་སྟེ། དྲི་མ་གློ་བུར་བ་རྣམས་སྦྱང་ཞེས་བྱ་བའི་དོན་ཏོ། །དེ་ལ་རང་བཞིན་གྱིས་ཇི་ལྟར་དག །དེ་སྦྱང་བའི་གཉེན་པོས་ནི་ཇི་ལྟར་དག །དེའི་འབྲས་བུ་ནི་ཇི་ལྟར་འགྱུར་སྙམ་ན། དེ་རེ་རེ་ལའང་དག་པ་གསུམ་གསུམ་དང་ལྡན་ནོ། །དེ་ལ། ངེས་པར་དངོས་པོ་ཐམས་ཅད་ཀྱི། །དག་པ་དེ་བཞིན་ཉིད་དུ་བརྗོད། །ཅེས་ཏེ། དེ་བཞིན་ཉིད་ཀྱི་དག་པ་ཞེས་བྱ་བ་ཆོས་ཐམས་ཅད་རང་བཞིན་གྱིས་མ་སྐྱེས་པའི་དེ་བཞིན་ཉིད་དོ། །དག་པ་གཉིས་པ་ནི། ཕྱི་ནས་རེ་རེའི་དབྱེ་བ་ཡིས། །ལྷ་རྣམས་ཀྱིས་ནི་བརྗོད་པར་བྱ། །ཞེས་ཏེ། སེམས་ཅན་ཐམས་ཅད་ཀྱི་ལུས་རང་བཞིན་གྱིས་དག་པ་ཞལ་ཕྱག་གི་རྣམ་པར་གྲུབ་པ་སྟེ། ཕྱི་མའི་གཉིས་པ་ལས། ཞལ་ཕྱག་རྣམ་པའི་གཟུགས་ཅན་ཉིད། །ཅེས་སོ། །འོ་ན་དེ་ལྟར་དེ་བཞིན་ཉིད་དུ་རང་བཞིན་གྱིས་དག་ན་ཞལ་ཕྱག་གི་རྣམ་པ་ཉིད་གང་ལས་འབྱུང་སྙམ་ན། རང་རིག་བདག་ཉིད་དག་པ་ཉིད། །དག་པ་གཞན་གྱིས་རྣམ་གྲོལ་མིན་ཏེ། རང་གི་སེམས་ཀྱི་ཆོ་འཕྲུལ་ཡིན་ཞེས་བྱ་བའི་དོན་ནོ། །དེ་ལྟར་རང་བཞིན་གྱིས་དག་པས་ན་གློ་བུར་དུ་གཟུང་འཛིན་དུ་སྣང་བའི་དྲི་མ་སྦྱོང་བ་ལ་ཐབས་ཀྱི་རྒྱུད་ཀྱི་དག་པ་གསུམ་དགོས་པས་དེས་ན་ལམ་བསྒོམ་པར་རིགས་སོ། །དེ་ལ་ཐབས་ཀྱི་རྒྱུད་ཀྱི་དེ་བཞིན་ཉིད་ཀྱི་དག་པ་ནི་རྟོགས་པའི་ལྟ་བ་སྟེ། དེ་བཞིན་ཉིད་ལ་མོས་པ་བྱེད་པའི་ཕྱིར་རོ། །ཐབས་རྒྱུད་ཀྱི་ལྷ་སོ་སོའི་དག་པ་ནི་ཕྱི་ནས་རེ་རེ་སྟེ་རྣམ་པ་གཟུགས་ཅན་སྦྱོང་བར་བྱེད་པ་བསྐྱེད་པའི་རིམ་པའོ། །ཐབས་རྒྱུད་ཀྱི་རང་རིག་པའི་དག་པ་ནི་ཆོས་ཐམས་ཅད་སེམས་ཡིན་པ་དེ་རྟོགས་པར་བྱེད་པའི་ཐབས་རྫོགས་པའི་རིམ་པའོ། །དེ་ཐམས་ཅད་ཀྱང་མཉམ་རྗེས་གཉིས་གཉིས་སུ་ཤེས་པར་བྱའོ། །དེ་ལྟ་བུའི་ལམ་རིམ་པ་གཉིས་དག་པ་གསུམ་ལྡན་བསྒོམས་པའི་འབྲས་བུ་ནི། དེ་བཞིན་ཉིད་ཀྱི་དག་པ་མཐར་ཕྱིན་པ་ཆོས་ཀྱི་སྐུ་ཡིན་ལ། རང་རིག་པའི་དག་པ་མཐར་ཕྱིན་པས་ངོ་བོ་ཉིད་ཀྱི་སྐུ་ཡིན་ལ། ལྷ་སོ་སོའི་དག་པ་མཐར་ཕྱིན་པ་ནི་གཟུགས་ཀྱི་སྐུ་ཡིན་ནོ། །དེ་བས་ན་རྒྱུ་ལམ་འབྲས་བུ་ཐམས་ཅད་དག་པ་གསུམ་ཡིན་པའི་ཕྱིར་ན་རིམ་པ་གཉིས་ཀྱིས་གྲོལ་བར་རིགས་ཞེས་བྱ་བའི་དོན་ནོ། །སྤྱི་དོན་དྲུག་པ་རིམ་པ་གཉིས་ཀྱི་བསྒོམ་ཚུལ་ལམ་གོ་རིམ་བསྟན་པ་ནི། སློབ་དཔོན་ཀླུ་སྒྲུབ་ཡབ་སྲས་ནི་བསྐྱེད་རིམ་བསྟན་༼བརྟ༷ན་༽ནས། རྫོགས་རིམ་བསྒོམ་པར་བཞེད་དེ། རིམ་པ་ལྔ་པ་ལས། བསྐྱེད་པའི་རིམ་པར་ལེགས་གནས་ནས། །རྫོགས་པའི་རིམ་པ་འདོད་རྣམས་ལ། །ཐབས་འདི་རྫོགས་པའི་སངས་རྒྱས་ཀྱིས། །སྐས་ཀྱི་གདང་བུ་ལྟ་བུར་གསུངས། །ཞེས་བཤད་དོ། །བྱང་ཆུབ་སེམས་དཔའ་རྣམས་ནི་བརྟན་རུང་མི་བརྟན་རུང་ལོ་བཅུ་གཉིས་བསྐྱེད་རིམ་བསྒོམས་ནས། དེ་ནས་གདོད་རྫོགས་པའི་རིམ་པ་སྒོམ་པར་བྱེད་དོ། །སློབ་དཔོན་སངས་རྒྱས་ཡེ་ཤེས་ཞབས་ནི་བསྐྱེད་པའི་རིམ་པ་ལ་རྫོགས་པའི་རིམ་པས་རྒྱས་གདབ་ནས་བསྒོམ་མོ་ཞེས་གསུངས་ཏེ་ཁོ་བོས་ལེགས་པར་མ་རྟོགས་སོ། །སློབ་དཔོན་ཌོམྦི་པས་ནི་བདུད་རྩི་འོད་ཀྱི་གཞུང་ལས། བློ་བཟང་དང་པོར་བསྐྱེད་པའི་རིམ་པ་སྒོམ་པར་བྱེད་དང་༼པ༷་༽ཕན་པའི་ཕྱག་རྒྱ་དང་། །སྔགས་ནི་རྣམ་དག་གུག་སྐྱེད་དེ་དབྱངས་ཀྱི་ཡི་གེ་རྣམ་པར་དག་པ་གོ་ཆ་སྐྱེ་མཆེད་བྱིན་རླབས་ལྟ་བུ་ཡིན་ནམ་སྙམ་ངེས་པར་སེམས་པ་སྟེ་བསྒོམ་པ་དྲན་པ་བྲལ་མི་བྱ་སྟེ་བརྗེད་མི་བྱ། །དེ་ལྟར་བསྒོམ་པའི་ཕྱིས་ནི་རངས་ཤིང་སྟེ་སྤྲོ་ན་བསྐྱེད་རིམ་སྒོམ་པའི་བློ་བཟང་པོ་དེ་ཉིད་སྐད་ཅིག་གཅིག་གི་བར་དུའང་མ་ཡེངས་པའི་སེམས་དང་སྐད་ཅིག་རྒྱུན་དུ་ལྡན་པར་བྱས་ནས། །རྫོགས་པའི་རིམ་པ་ལས་བྱེད་༼འཇི༷ག་བྱེ༷ད་༽ལྷན་ཅིག་སྐྱེས་པའི་ཡེ་ཤེས་རྒྱུན་ཆད་མེད་པར་རྟག་ཏུ་རྣམ་པར་བསམ། །ཞེས་གསུངས་པས་ན་བསྐྱེད་རིམ་བརྟན་ནས་རྫོགས་རིམ་བསྒོམ་པར་གསལ་ལོ། །ཇོ་བོ་ག་ཡ་དྷ་རའི་བཞེད་པས་ལེའུ་བརྒྱད་པ་ལས། རིམ་གཉིས་མཉམ་པར་གནས་ནས་ནི། །ཞེས་གསུངས་པས་ན་སྟན་ཐོག་གཅིག་ཏུ་རིམ་པ་གཉིས་བསྒོམ་སྟེ། ཐུན་སྟོད་ལ་བསྐྱེད་པའི་རིམ་པ་བསྒོམས་ནས། ཐུན་སྨད་ལ་རྫོགས་པའི་རིམ་པ་བསྒོམ་པར་བཞེད་དོ། །དེ་ལྟ་བུའི་དོན་དེ་དག་ཀྱང་རྩ་རྒྱུད་དང་པོའི་ལེའུ་དང་པོ་དང་། བརྒྱད་པ་དང་། དགུ་པ་དང་། ཕྱི་མའི་གཉིས་པ་དང་། དགུ་པ་དང་། གུར་ལེའུ་བཞི་པ་དང་། བརྒྱད་པ་དང་། བཅུ་བཞི་པ་དང་། ལུང་གཞན་གྱིས་གྲོགས་བྱས་པ་རྣམས་ཀྱི་ཡིན་ནོ། །རིམ་པ་གཉིས་ཀྱི་སྤྱིའི་མངོན་པར་རྟོགས་པ་བསྟན་ཟིན་ཏོ། །
སོ་སོའི་མངོན་པར་རྟོགས་པ་ལས་ཐོག་མར་རྫོགས་པའི་རིམ་པའི་རྟེན་བསྐྱེད་པའི་རིམ་པ།
ད་ནི་སོ་སོའི་མངོན་པར་རྟོགས་པ་ལས་ཐོག་མར་རྫོགས་པའི་རིམ་པའི་རྟེན་བསྐྱེད་པའི་རིམ་པ་བརྗོད་ན་ལྔ། བསྐྱེད་པའི་རིམ་པ་བསྒོམ་པའི་གང་ཟག་དང་། གནས་དང་། དུས་དང་། བསམ་པ་དང་། ལྷའི་རྣལ་འབྱོར་རོ། །དང་པོ་ནི་དབང་ཐོབ་ཅིང་དམ་ཚིག་དང་ལྡན་པའོ། །གནས་ནི་གསུམ་ལས་ཏེ། ལས་དང་པོ་པའི་གནས་དང་། ཅུང་ཟད་བརྟན་པ་དང་། བརྟན་པ་ཆེར་ཐོབ་པའི་གནས་སོ། །དང་པོ་ནི་རྩ་རྒྱུད་ཕྱི་མའི་གཉིས་པ་ལས། ལས་དང་པོ་པས་གོམས་པར་བྱེད་དུས་ཀྱི། །སྒྲུབ་པའི་གནས་ནི་གང་དུ་བསྔགས་པའི་སེམས་དང་མཐུན་ཞིང་། །གཅིག་ཏུ་མཉམ་གཞག་འགྲུབ་འགྱུར་བའི་མཐུན་རྐྱེན་ཚང་བའི། །གནས་ནི་བཟང་པོ་ངེས་པར་བརྟག །རང་གི་ཁྱིམ་དུ་ཞེས་བྱ་བ་དང་། རྡོ་རྗེ་གུར་ལས་ཀྱང་། ཆུ་དང་འབྲས་བུས་བརྒྱན་པ་ཡི། །ནགས་ཚལ་ཆེན་པོའི་གནས་སུ་ནི། །ཞེས་བྱ་བ་ལ་སོགས་པ་གསུངས་སོ། །སེམས་ཅུང་ཟད་བརྟན་པའི་གནས་ནི་དུར་ཁྲོད་ཡིན་ནོ། །བརྟན་པ་ཆེར་ཐོབ་པའི་གནས་ནི་རིགས་དང་རྗེས་སུ་མཐུན་པའི་གནས་ཏེ། རྡོ་རྗེ་གུར་ལེའུ་གཉིས་༼བཞི༷་༽པ་ལས། སྙིང་རྗེ་ཆེན་པོ་ཀྱེ་རྡོ་རྗེ། །ང་ནི་དུར་ཁྲོད་ཆུ་འགྲམ་དང་། །ནགས་ཚལ་ཆེན་པོའི་འགྲམ་དུ་ནི། །བསྙེན་བཀུར་ཅན་སྒྲུབ་པ་པོ་ལ་དངོས་གྲུབ་སྟེར། །ཞེས་བྱ་བ་ལ་སོགས་པ་གསུངས་སོ། །གནས་དེ་དག་ཀྱང་ལས་དང་པོ་པའི་གནས་ནི་དབེན་པ་དང་། ཡིད་དང་མཐུན་པ་དང་། རང་གི་ཁྱིམ་དང་། བཀྲ་ཤིས་པ་དང་བཞི་ཡིན་ལ། ཅུང་ཟད་བརྟན་པའི་གནས་ནི་བརྩོན་འགྲུས་རྩོམ་པའི་གནས་ཡིན་ལ། བརྟན་པ་ཆེར་ཐོབ་པའི་གནས་ནི་ངེས་པ་མེད་པ་ཡིན་ནོ། །གསུམ་པ་དུས་ལ་ཡང་གསུམ་སྟེ། ལས་དང་པོ་པའི་བསྒོམ་པའི་དུས་ནི་རྣམ་རྟོག་གི་འདུ་འཕྲོ་ཉུང་བའི་རྟེན་འབྲེལ་ཡིན་པས། རྩ་རྒྱུད་ཕྱི་མའི་གཉིས་པ་ལས། མཚན་དུས་སུ་ཞེས་གསུངས་སོ། །ཅུང་ཟད་བརྟན་པའི་དུས་ནི་ཐུན་བཞིའི་དུས་སུ། བརྟན་པ་ཆེར་ཐོབ་པ་ནི་དུས་ཐམས་ཅད་དུ་བསྒོམ་སྟེ། རྩ་རྒྱུད་ཕྱི་མའི་གཉིས་པ་ལས། རྐང་པ་འཁྲུད་དང་ཟ་བ་དང་། །འཐོར་འཐུང་གིས་ཁ་བཤལ་བ་དང་སོ་རྩི་གོ་ལ་སོགས་ཟ་བ་དང་། །ཙནྡན་གྱིས་ཕྱེ་མས་ནི་ལག་པ་ཉེད་པ་དང་། །སྨད་གཡོགས་ཀྱིས་ནི་རྐེད་འགེབས་དང་། །ཕྱིར་འབྱུང་བ་དང་སྨྲ་དང་འགྲོ་བ་དང་། །འདུག་དང་ཁྲོ་བ་དང་རྩེ་ཞིང་དགོད་པ་དང་། །བཅོམ་ལྡན་འདས་མ་བརྟེན་པ་དང་མདོར་ན་དུས་ཐམས་ཅད་དུ། །ཤེས་རབ་དང་ལྡན་ཞིང་བརྟུལ་ཞུགས་ཅན་ཉིད་ཀྱིས། །རྣལ་འབྱོར་མ་ནི་རྣམ་པར་བསྒོམ། །ཞེས་གསུངས་སོ། །བཞི་པ་བསམ་པ་ནི་བདག་སེམས་ཅན་ཐམས་ཅད་ཀྱི་དོན་དུ་སངས་རྒྱས་འདོད་པ་སྟེ། རྩ་རྒྱུད་ཕྱི་མའི་གཉིས་པ་ལས། བདག་ཉིད་གྲུབ་པའི་སེམས་ཀྱིས་ནི། །རྣལ་འབྱོར་མ་བདག་མེད་མ་བསྒོམ་མོ་ཤེས་རབ་ཅན། །ཡང་ན་ཧེ་རུ་ཀ་དཔལ་གཟུགས། །ཞེས་གསུངས་སོ། །ལྔ་པ་ལྷའི་རྣལ་འབྱོར་ནི་སྤྱིར་མཆོག་གི་དངོས་གྲུབ་བསྒྲུབ་པ་དང་། ཐུན་མོང་གི་དངོས་གྲུབ་བསྒྲུབ་པའི་ལྷའི་རྣལ་འབྱོར་གཉིས་སུ་གསུངས་པའི་ཐུན་མོང་གི་དངོས་གྲུབ་ཀྱི་ལྷའི་རྣལ་འབྱོར་རྣམས་ལས་ཀྱི་ཚོགས་རབ་འབྱམས་ཀྱི་སྐབས་སུ་འབྱུང་བ་ཡིན་ནའང་གཟུང་བདེ་བས་འདིར་ཕྱོགས་གཅིག་ཏུ་བརྗོད་དེ། དེ་ལ་ལྷའི་རྣལ་འབྱོར་ལ་གཉིས་ཏེ། ལྷའི་རྣམ་པ་དང་། མངོན་པར་རྟོགས་པའོ། །དང་པོ་ལ་གཉིས་ཏེ། གཙོ་བོར་མཆོག་བསྒྲུབ་པའི་དཀྱིལ་འཁོར་དང་། ལས་རྒྱས་པའི་ལྷའི་རྣལ་འབྱོར་རོ། །དང་པོ་ནི་རྩ་བའི་རྒྱུད་ལས། ཧེ་རུ་ཀ་བཞི་བདག་མེད་མ་དང་ལྔ། དྲུག་པ་རྡོ་རྗེ་འཛིན་པ་དང་དྲུག་འབྱུང་ངོ་། །རྡོ་རྗ་གུར་ལས། རིགས་བསྡུས་པ་དང་རྐྱང་པ་གཉིས། བསྡུས་པ་ལ་རྒྱས་པ་དང་བསྡུས་པ་གཉིས་འབྱུང་སྟེ། ལེའུ་ལྔ་པ་ལས། དཀྱིལ་འཁོར་རེ་རེ་སྟེ་རིགས་རྐྱང་བསྒོམ་པའམ། །ཡང་ན་རིགས་ལྔ་དབུས་སུ་བཞུགས་པའི་བསྡུས་པའི་དཀྱིལ་འཁོར་རོ། །ལྷ་མོ་བརྒྱད་བརྒྱད་ཀྱི་དབུས་སུ་གནས་པའམ། །ཡང་ན་བཞི་བཞིའི་དབུས་སུ་གནས་པ་ལྷ་ལྔ་ལ་ལྔ་སྟེ་ཉི་ཤུ་རྩ་ལྔའི་བར། །གང་ཚེ་དཀྱིལ་འཁོར་རིགས་བསྡུས་པ་རྒྱས་བསྡུས་གཉིས་ཀ་ཡི། །སྒོར་ནི་ལྕགས་ཀྱུ་ཞགས་པ་དང་། །ལྕགས་སྒྲོག་དེ་བཞིན་དྲིལ་བུ་དང་། །འཇུག་པའི་སྒོ་སྲུང་དགོད་པར་བྱ། །ཞེས་གསུངས་སོ། །རིགས་བསྡུས་པའི་ཕྱོགས་གཉིས་ཀྱང་གཙོ་བོ་འཕོ་བའི་གནད་ཀྱིས་དཀྱིལ་འཁོར་ལྔ་ལྔར་འགྱུར་ཏེ། དེ་ཉིད་ལས། སངས་རྒྱས་མགོན་པོ་མི་བསྐྱོད་པ་སོགས་གང་ཉིད་ཀྱིས། །དབུས་སུ་དཀྱིལ་འཁོར་གྱི་གཙོ་འཁོར་གང་བྱུང་བར་གྱུར་པ། །དེ་ཉིད་ཀྱི་ནི་མིང་གི་དཀྱིལ་འཁོར་བརྗོད། །སྙིང་པོ་བདེ་བ་ཆེན་པོ་ཡོངས་སུ་བཟུང་བའམ་ལེན་པས་དཀྱིལ་འཁོར་རོ། །ཞེས་གསུངས་སོ། །དེ་ལྟར་ན་རྒྱུད་ལས། དངོས་སུ་དཀྱིལ་འཁོར་གྱི་གྲངས་རྐྱང་པ་ལྔ་དང་། བསྡུས་པའི་རྒྱས་པ་ལྔ། བསྡུས་པ་ལྔ་སྟེ་བཅོ་ལྔ་རྩ་བའི་རྒྱུད་ཀྱི་དཀྱིལ་འཁོར་ཁ་བསྐངས་ནས་ཧེ་རུ་ཀ་གསུམ་སྟེ་བཅོ་བརྒྱད་རྗེ་བཙུན་མའི་སྒྲུབ་ཐབས་གཉིས་ཏེ་ཉི་ཤུ་ཐམ་པ་འབྱུང་བ་ལ། བླ་མའི་མན་ངག་གིས་དཀྱིལ་འཁོར་དྲུག་ཅུ་རྩ་གཉིས་སུ་བྱེད་དོ་༼དེ༷། ༽མི་བསྐྱོད་པ་ལ་ཧེ་རུ་ཀ་བཞི་ཡོད་པ་དེ་བཞིན་དུ་རིགས་གཞན་རྣམས་ལའང་བཞི་བཞིར་བྱས་ཏེ། དེ་ལྟར་ན་རིགས་རྐྱང་པའི་སྒྲུབ་ཐབས་ཉི་ཤུ། བསྡུས་པའི་རྒྱས་པ་ལ་ཉི་ཤུ། བསྡུས་པའི་བསྡུས་པ་ལ་ཉི་ཤུ། རྗེ་བཙུན་མའི་གཉིས་ཏེ་དྲུག་ཅུ་རྩ་གཉིས་སུ་བཞེད་དོ། །སཾ་པུ་ཊ་ལས། མཆོག་བསྒྲུབ་པའི་དཀྱིལ་འཁོར་གཞུང་ལས་བརྒྱད་འབྱུང་སྟེ། ཧེ་རུ་ཀ་བཞི། བདག་མེད་མ། ཡེ་ཤེས་མཁའ་འགྲོ་མ་ལྷ་བཅུ་གསུམ་དང་། བསྡུས་པའི་དཀྱིལ་འཁོར་རྡོ་རྗེ་དབྱིངས་དང་། དྲག་པོའི་གདན་ཅན་ལྷ་བཅུ་བདུན་ནོ། །དེ་ལ་བླ་མའི་མན་ངག་དང་བརྟག་པ་བདུན་པ་དངོས་ལས། གང་གི་ཡང་༼ག༷ང་༽ཡང་འི་འཁོར་ལོའི་དབུས་སུ་བཅུག་པ་དེའི་མཚན་དུ་བསྟན་པར་གྱུར་པའི་རྡོ་རྗེའི་དཀྱིལ་འཁོར་ནི་མཁས་པས་བསྔགས་སོ་ཞེས་གསུངས་པས། རྡོ་རྗེ་དབྱིངས་ལ་གཙོ་བོ་འཕོ་བའི་གནད་ཀྱིས་དཀྱིལ་འཁོར་ཆེན་པོ་ལྔ་རུ་བྱས་ཏེ། དེ་ལྟར་ན་མཆོག་བསྒྲུབ་པའི་དཀྱིལ་འཁོར་བཅུ་གཉིས་སོ། །འོ་ན་གཙོ་བོ་དུ་མ་འཕོ་བས་དཀྱིལ་འཁོར་དེ་བས་ཀྱང་མང་བར་མི་འགྱུར་རམ་སྙམ་ན། རིགས་ལྔ་ལས་ལྷག་པའི་གཙོ་བོ་གཞན་ནི་མི་བཞེད་དེ། ལྷ་གཞན་ནི་ལས་རྒྱས་པའི་ལྷ་ཞེས་བྱ་བར་འགྱུར་ཏེ། བརྟག་པ་བདུན་པ་དངོས་ལས། ཞི་བ་དང་། རྒྱས་པ་དང་། དབང་དང་། མངོན་སྤྱོད་ཀྱི་ལས་རྣམས་ལ་འཁོར་ལོའི་བདག་པོས་༼པོའི༷་༽རྒྱལ་པོ་༼མོ༷་༽རྣམ་པར་སྒོམ་པར་བྱེད་དོ་ཞེས་གསུངས་སོ། །གཉིས་པ་ལས་རྒྱས་པའི་ལྷའི་རྣལ་འབྱོར་ནི། རྩ་བའི་རྒྱུད་ལས། ཀུ་རུ་ཀུལླེ་དང་། དྲག་པོའི་སྔགས་བདུན་གསུངས། རྡོ་རྗེ་གུར་གྱི་ལེའུ་གཉིས་པ་ལས། འབྱུང་པོ་འདུལ་བ་དང་། སྟོབས་པོ་ཆེ་གཉིས། བཞི་པ་ལས་ཁྲོ་བོ་བཅུ། བརྒྱད་པ་ལས་སྒྲོལ་མ་དང་། ཤེས་རབ་ཕ་རོལ་ཕྱིན་མ། བཅུ་གཉིས་པ་ལས་ཁྲོ་བཅུ་སྤྱིའི་སྲུང་འཁོར། བཅུ་བཞི་པ་ལས་རྡོ་རྗེ་ལུས་མེད། བཅོ་ལྔ་པ་ལས་ཀུ་རུ་ཀུལླེ་དང་། སྤྱན་རས་གཟིགས་ལ་སོགས་པ་ལྷའི་རྣལ་འབྱོར་བཅུ། རྡོ་རྗེ་ནག་པོ་རྣམས་ཏེ། དེ་ལྟར་ན་ལས་རྒྱས་པའི་ལྷའི་རྣལ་འབྱོར་ཉི་ཤུ་རྩ་བརྒྱད་གསུངས་སོ། །བཤད་པའི་རྒྱུད་སཾ་པུ་ཊའི་བརྟག་པ་གཉིས་པའི་རབ་བྱེད་བཞི་པ་ལས་སྒྲོལ་མ་དང་། ཀུ་རུ་ཀུལླེ། ཤེས་རབ་ཀྱི་ཕ་རོལ་ཏུ་ཕྱིན་མ། རིགས་བཞི་དང་ཡུམ་བཞི་དང་བརྒྱད། བདུན་པ་དངོས་ནས་ལས་ཚོགས་དང་འབྲེལ་བའི་ལྷའི་རྣལ་འབྱོར་བཅུ་བདུན་ཏེ། དེ་ལྟར་ན་ལྷའི་རྣལ་འབྱོར་ཉི་ཤུ་རྩ་བརྒྱད་གསུངས་སོ། །སཾ་པུ་ཊའི་ལྔ་པའི་གཉིས་པ་ལས། རྫོགས་རིམ་དང་འབྲེལ་བ་དང་ཕྲེང་བ་དང་འབྲེལ་བ་ལས་ལྷའི་རྣལ་འབྱོར་གཉིས་ཀྱང་འབྱུང་ངོ་། །འོ་ན་སཾ་བུ་ཊའི་བདག་མེད་མའི་སྐབས་ཀྱི་དྲུག་པ་རྡོ་རྗེ་འཛིན་པ་མི་བགྲང་ངམ་སྙམ་ན། རྡོ་རྗེ་དབྱིངས་ཀྱི་ཁོངས་སུ་བསྡུ་བས་དེ་ནི་མི་བགྲང་ངོ་། །
དེ་དག་གི་མངོན་པར་རྟོགས་པ་གསུམ་དུ་བསྡུ་བ།
སྤྱི་དོན་གཉིས་པ་དེ་དག་གི་མངོན་པར་རྟོགས་པ་ནི་གསུམ་དུ་བསྡུས་ཏེ། སྔོན་དུ་འགྲོ་བའི་ཆོ་ག་དང་། དངོས་གཞིའི་རྣལ་འབྱོར་དང་། རྫོགས་པར་བྱེད་པའི་ལམ་གྱི་ཡན་ལག་གོ། དེ་ལྟར་གསུམ་པོ་རེ་རེ་ལའང་རྒྱས་བསྡུས་ཀྱི་དབྱེ་བས་མང་དུ་ཤེས་པར་བྱའོ། །དེ་ལ་སྔོན་དུ་འགྲོ་བའི་རྣལ་འབྱོར་ལ་གསུམ་སྟེ། བསོད་ནམས་ཀྱི་ཚོགས་བསག་པ་དང་། ཡེ་ཤེས་ཀྱི་ཚོགས་བསག་པ་དང་། བར་ཆད་ཞི་བར་བྱ་བའི་ཕྱིར་སྲུང་བའི་འཁོར་ལོ་བསྒོམ་པ་དང་མི་བསྒོམ་པའོ། །བསོད་ནམས་ཀྱི་ཚོགས་ལ་རྒྱས་བསྡུས་བཞི། ཚད་མེད་བཞིས་བསྡུས་པ་དང་། དེའི་སྔོན་དུ་མཆོད་པ་དང་གཉིས་ཀྱིས་བསྡུས་པ་དང་། ཡན་ལག་བདུན་པ་དང་གསུམ་གྱིས་བསྡུས་པ་དང་། རིགས་ལྔའི་སྡོམ་པ་བཟུང་བ་དང་བཞིས་བསྡུས་པའོ། །དེ་དག་ཞིབ་ཏུ་བརྗོད་ན་དང་པོ་ནི། རྡོ་རྗེ་གུར་ལས། བླ་མ་རྡོ་རྗེ་རྣམས་མཆོད་ནས། །བདུན་པོ་ཡོངས་སུ་དག་པར་བྱ། །ཞེས་པ་དང་། ཚངས་པའི་གནས་ནི་བཞི་པོ་ཡིས། །སེམས་ཀྱི་ངལ་ནི་བསོ་བར་བྱ། །ཞེས་འབྱུང་བས་ན། ཚོགས་བསག་པའི་ཞིང་སྤྱན་དྲངས་ཏེ། ཕྱག་དང་མཆོད་པ་དང་སྡིག་པ་བཤགས་པ་ལ་སོགས་པའི་རྒྱུན་བཤགས་དང་ཚད་མེད་པ་བཞི་བསྒོམ་པའོ། །༼བཞི༷་པ༷་ནི༷། ༽སཾ་པུ་ཊའི་རྡོ་རྗེ་དབྱིངས་ཀྱི་སྐབས་སུ་སྡོམ་པ་བཟུང་བ་གསུངས་པའང་ཡན་ལག་བདུན་པའི་ཁོངས་སུ་བསྡུའོ། །དེ་ནས་ཡེ་ཤེས་ཀྱི་ཚོགས་སྟོང་པ་ཉིད་བསྒོམ། དེ་ནས་སྲུང་བའི་འཁོར་ལོ་ལས་སྤྲོས་པའི་བྱེ་བྲག་གི་རྡོ་རྗེ་ར་བ་ལ་སོགས་པ་ཐུན་མོང་གི་སྲུང་འཁོར་དང་། ཁྲོ་བོ་བཅུའི་ཐུན་མོང་མ་ཡིན་པའི་སྲུང་འཁོར་གཉིས་སུ་ཤེས་པར་བྱའོ། །སྔོན་འགྲོ་འབྲིང་དུ་བྱེད་ན་ཚོགས་གཉིས་བསག་པ་ལས་༼ཁྲོ༷་བཅུའི་༽སྲུང་འཁོར་མེད་དོ། །བསྡུས་ནས་བྱེད་ན་བསོད་ནམས་ཀྱི་ཚོགས་ནི་སྐྱབས་འགྲོ་སེམས་བསྐྱེད་ཙམ་མམ། ཚད་མེད་བཞིར་བསྡུས་ནས། ཡེ་ཤེས་ཀྱི་ཚོགས་བསྒོམ་པའོ། །འབྲིང་བསྡུས་ཀྱི་སྔོན་འགྲོ་འདི་ལས་རྒྱས་པའི་རྣལ་འབྱོར་ལས་མཆོག་བསྒྲུབ་པ་ལ་མི་བྱ་གསུང་ཡང་། བརྟག་པ་གཉིས་པའི་ལེའུ་གསུམ་པ་བཞིན་བྱས་ན་ཀུན་ལ་འཇུག་པར་མངོན་ནོ། །དངོས་བཞིའི་རྣལ་འབྱོར་ལ་ཡང་རྒྱས་བསྡུས་གསུམ་སྟེ། ཡན་ལག་ཡོངས་སུ་རྫོགས་པ་རྒྱས་པའི་ལུགས་དང་། འབྲིང་དང་། བསྡུས་པའོ། །དང་པོ་ལ་ཡང་རྒྱུད་སོ་སོའི་དགོངས་པས་མི་འདྲ་བ་གསུམ་གསུངས་ཏེ། ཏིང་ངེ་འཛིན་གསུམ་དུ་བསྡུ་བ་དང་། ཡན་ལག་དྲུག་ཏུ་བསྡུ་བ་དང་། བསྙེན་སྒྲུབ་བཞིར་བསྡུས་པའོ། །དང་པོ་ནི་རྡོ་རྗེ་རྩེ་མོའི་དགོངས་པ་དང་། སཾ་པུ་ཊའི་རྡོ་རྗེ་དབྱིངས་གཉིས་མཐུན་ཏེ། རྡོ་རྗེ་རྩེ་མོ་ལས། དང་པོ་གཞལ་ཡས་ཁང་བསྐྱེད། དེ་ནས་འོག་མིན་དུ་སངས་རྒྱས་ཏེ་གཞལ་ཡས་ཁང་དེར་བྱོན་ནས་བཞུགས་པར་བསམ་པ་ནི་སྦྱོར་བའི་ཏིང་འཛིན་མཆོག་གོ། དེ་ལ་ཡང་རྣལ་འབྱོར་པས་ནི་སྙོམས་འཇུག་བྱ། །དེ་ནས་ཐུགས་ཀ་ནས་འཁོར་གྱི་ལྷ་ཐམས་ཅད་བསྐྱེད་པ་ནི་དཀྱིལ་འཁོར་རྒྱལ་པོ་མཆོག་གོ། དེ་ནས་ཡང་ཕྱག་རྒྱས་གདབ་པའི་བར་བྱས་ནས་སོ་སོར་ལས་ལ་སྦྱར་བ་ནི་ལས་རྒྱལ་པོ་མཆོག་གོ། ཞེས་གསུངས་ཏེ་འདི་ཤར་ཆེན་གྱི་གསུང་ཡིན་ལ་སྐབས་དོན་རྗེ་བཙུན་གྱི་གསུང་འདིས་འབྲུ་སྣོན་བྱས་ན་ཆོག་པར་འདུག་གོ། སྐུ་གསུམ་ལམ་དུ་བྱ་བའི་ཕྱིར་དང་པོ་གཙོ་བོ་བསྐྱེད་པ་ངོ་བོ་ཉིད་ཀྱི་སྐུ། འཁོར་བསྐྱེད་ནས་ཡེ་ཤེས་པ་བཀུག་སྟེ་དབང་བསྐུར་ལ་མཆོད་བསྟོད་བདུད་རྩི་མྱང་བ་ཡན་ཆད་ཏིང་ངེ་འཛིན་གཉིས་པ་ལོངས་སྐུ། ཕྲ་ཐིག་ལ་སོགས་པའི་རྣལ་འབྱོར་ལ་བཞག་པ་གསུམ་པ་སྤྲུལ་སྐུའོ། །གཉིས་པ་རྡོ་རྗེ་གུར་གྱི་རྗེས་སུ་འབྲངས་ནས་ཡན་ལག་དྲུག་གིས་བཅིངས་པ་ནི། གུར་ལེའུ་བདུན་པ་ལས། སངས་རྒྱས་གནས་ནི་རྫོགས་པ་གཞལ་ཁང་དང་། །ཀུན་ཏུ་བཟང་པོའི་རང་བཞིན་རྗེས་སུ་ཆགས་པ་རྡོ་རྗེ་སེམས་དཔའི་ཡན་ལག་དང་། །རང་གི་ལྷག་པའི་ལྷར་སྒྲུབ་དབང་བསྐུར་བ་དང་། །མཆོད་བསྟོད་བདུད་རྩི་མྱང་ལ་སོགས། །རྣལ་འབྱོར་ཡན་ལག་དྲུག་ཏུ་འདོད། །ཅེས་གསུངས་པས་གཞལ་ཡས་ཁང་བསྐྱེད་པ་རྣམ་པར་སྣང་མཛད་ཀྱི་ཡན་ལག་སྟེ། གུར་ལེའུ་བཞི་པ་ལས། ཆོས་ཀྱི་འབྱུང་གནས་རྣམ་པར་བསྒོམ། །དེ་ལ་སྟེ་དེའི་ནང་དུ་སངས་རྒྱས་གནས་གཞལ་ཡས་ཁང་བསམས་ནས། །ཞེས་སོ། །གཉིས་པ་རྗེས་སུ་ཆགས་པ་རྡོ་རྗེ་སེམས་དཔའི་ཡན་ལག་ནི། རྒྱུ་རྡོ་རྗེ་སེམས་དཔའ་བསྐྱེད་པ་དང་། འཁོར་གྱི་ལྷ་མོ་དབྱུང་བ་དང་། འབྲས་བུ་རྡོ་རྗེ་འཛིན་པར་བཞེངས་པ་སྟེ། སྐྱེ་མཆེད་དང་སྐུ་གསུང་ཐུགས་བྱིན་གྱིས་བརླབ་པ་དང་། ཡེ་ཤེས་པ་དགུག་པ་རྣམས་ཏེ། གུར་ལེའུ་བཞི་པ་ལས། མངོན་བྱང་རྣམ་པ་ལྔ་པོ་བསྒོམ་པར་བྱ། །དང་པོ་སྐྱེས་བུ་རྒྱུ་རྡོ་རྗེ་འཛིན་པ་བསམ་དེ་ནས། །མཁའ་འགྲོ་མ་ཡི་འཁོར་ལོ་སྤྲོ། །དྲི་ཟ་མཉམ་པར་ཞུགས་པ་ནི། །ཁུ་བ་རྗེས་སུ་དྲན་པར་བྱ། །མཚམས་ཀྱི་ལྷ་མོས་བསྐུལ་བ་སྟེ། །འཁོར་ལོའི་འདྲེན་པས་བསྐུལ་ནས་ནི། །མིག་ལ་སོགས་ལ་གཏི་ག་སོགས། །རྡོ་རྗེ་གསུམ་ནི་གནས་གསུམ་དགོད། །ཕྱི་ནས་རྗེས་ཆགས་རྡོ་རྗེ་སྟེ། །ཡེ་ཤེས་རྣམ་པར་གཞུག་འོད་དཔག་ཏུ་མེད་པའི་ཡན་ལག །མཆོད་པ་དོན་ཡོད་གྲུབ་པའི་ཡན་ལག །བསྟོད་པ་རིན་ཆེན་འབྱུང་ལྡན་གྱི་ཡན་ལག་རྣམས་ཏེ། རྡོ་རྗེ་གུར་ལེའུ་བཞི་པ་ལས། དབང་ནི་གཽ་རི་སོགས་རིག་མ་བརྒྱད་རྣམས་ཀྱིས་དབང་བསྐུར་བ་དང་། །ཡང་ན་བདུད་རྩི་མྱང་བ་དང་། །ལྷ་མོ་བརྒྱད་ཀྱིས་མཆོད་པ་ཉིད། །འཁོར་ལོ་འདྲེན་ས་༼པ༷་༽བསྟོད་པའོ། །ཞེས་གསུངས་སོ། །དེ་ལྟར་ཏིང་ངེ་འཛིན་གསུམ་དང་ཡན་ལག་དྲུག་རྫོགས་པ་འདི་དཀྱིལ་འཁོར་གྱི་འཁོར་ལོ་ཁོ་ན་ལ་སྦྱར་བའི་མངོན་རྟོགས་ཡིན་གྱི་། ལྷ་རྐྱང་པ་རྣམས་ལ་ནི་མ་ཡིན་ནོ། །གསུམ་པ་བསྐྱེད་པའི་རིམ་པ་མཐའ་དག་ལ་འཇུག་པ་བསྙེན་སྒྲུབ་ཡན་ལག་རྣམ་པ་བཞིས་བསྡུས་པ་ནི། རྩ་བའི་རྒྱུད་བརྟག་པ་གཉིས་པ་དང་། གསང་བ་འདུས་འི་དགོངས་པ་དང་མཐུན་པ་ཡིན་ཏེ། རྩ་རྒྱུད་ལེའུ་གསུམ་པ་ལས། དངཔོ་༼ཡ༷ང་ནི༷་༽སྟོང་ཉིད་ཡེ་ཤེས་ཚོགས་བསག་བྱང་ཆུབ་སེམས་ཏེ་དམ་ཚིག་སེམས་དཔའ་བསྐྱེད་པ་བསྙེན་པའི་ཡན་ལག །གཉིས་པ་ལ་ནི་ས་བོན་བསྡུ་བ་སྟེ་གནས་གསུམ་དུ་ཡི་གེ་དགོད་ཉེ་བར་བསྒྲུབ་པའི་ཡན་ལག །གསུམ་པ་ལ་ནི་གཟུགས་བརྙན་རྫོགས་པ་སྟེ་ཡེ་ཤེས་པ་གཞུག་པ་སྒྲུབ་པའི་ཡན་ལག །བཞི་པ་ལ་ནི་ཡིག་འབྲུ་དགོད་པ་སྟེ་རིགས་བདག་གིས་རྒྱས་འདེབས་པ་སྒྲུབ་པ་ཆེན་པོའི་ཡན་ལག །ཅེས་གསུངས་ལ། གསང་བ་འདུས་པའི་ལེའུ་བཅུ་གཉིས་པ་ལས། དམ་ཚིག་པ་བསྐྱེད་པ་བསྙེན་པའི་དམ་ཚིག་སྦྱོར་བ་དང་། །དེ་ནས་སྐྱེ་མཆེད་སྐུ་གསུང་ཐུགས་བྱིན་གྱིས་རླབས་པ་ཉེ་བར་བསྒྲུབ་པ་འབྱུང་བ་དང་། །ཡེ་ཤེས་པ་གཞུག་པ་བསྒྲུབ་པའི་དོན་གྱི་དམ་ཚིག་དང་། །དབང་བསྐུར་ཞིང་རྒྱས་གདབ་པ་སྒྲུབ་པ་ཆེན་པོ་དག་དང་བཞི་ཞེས་པ་བསྙེན་སྒྲུབ་ཡན་ལག་བཞིའི་མིང་ཙམ་འབྱུང་། ཞེས་པ་དང་། ཡང་། བསྙེན་པའི་ཏིང་ངེ་འཛིན་དམ་ཚིག་ལ་རྩེ་གཅིག་ཏུ་རབ་ཏུ་སྦྱོར་བ་ལ། །རང་ཉིད་བྱང་ཆུབ་མཆོག་སྟེ་ལྷ་དམ་ཚིག་སེམས་དཔར་ནི་བསྒོམ་པར་བྱ། །ཞེས་དམ་ཚིག་སེམས་དཔའ་བསྐྱེད་པའོ། །ཡན་ལག་གཉིས་པ་ཉེ་བར་བསྒྲུབ་པ་ནི་བསྒྲུབ་མཆོག་སྟེ་དམ་ཚིག་སེམས་དཔའ་བསྐྱེད་པ་དེ་ལ། །སྐྱེ་མཆེད་བྱིན་གྱིས་བརླབས་པ་བསྒོམ་དགོས་པས་སོ། །རྡོ་རྗེ་སྐྱེ་མཆེད་རྣམ་པར་དཔྱོད་ཅེས་སོ། །ཅེས་སྐྱེ་མཆེད་དང་སྐུ་གསུང་ཐུགས་བྱིན་གྱིས་བརླབ་པའོ། །ཏིང་འཛིན་སེམས་དཔའ་སྔགས་ཀྱི་བདག་པོ་ཡེ་ཤེས་སེམས་དཔའ་བསྒོམ་པ་ཡི་ཚུལ་གྱིས། །ཡན་ལག་གསུམ་པ་བསྒྲུབ་པའི་ཚེ་ན་སངས་རྒྱས་ཀུན་འཛིན་དཔལ་དང་ལྡན་ཞེས་སོགས་ཚིགས་བཅད་གཉིས་ཀྱིས་ཡེ་ཤེས་པ་བསྐུལ་བར་གསུངས། །ཞེས་ཡེ་ཤེས་པ་གཞུག་པའོ། །ཡན་ལག་བཞི་པ་སྒྲུབ་པ་ཆེན་པོ་བྱེད་པའི་ཚེ། །རང་གི་སྔགས་བཛྲ་དྷྲྀཀ་ལ་སོགས་པས་རྡོ་རྗེ་ཅན་གྱི་གཟུགས་དེ་བཞིན་གཤེགས་པ་རྣམས་བསྒོམས་ལ། །དབུ་རྒྱན་ལ་ནི་རིགས་ལྔ་ལ་བདག་པོ་རྡོ་རྗེ་འཆང་ཆེན་པོ་དང་ལྷག་མ་རྣམས་ལ་རྣམ་སྣང་ལ་སོགས་པ་བསམ། །ཞེས་དབང་བསྐུར་ཞིང་རྒྱས་གདབ་པའོ། །མཆོད་བསྟོད་ལ་སོགས་པ་རྣམས་ནི་དེའི་ཡན་ལག་ཙམ་སྟེ་བསྙེན་སྒྲུབ་ཡན་ལག་བཞིའོ། །བརྟག་པ་གཉིས་པའི་གཞུང་དེ་བསྙེན་སྒྲུབ་བཞིར་ཇི་ལྟར་འགྲུབ་སྙམ་ན། གསང་བ་འདུས་པའི་ལེའུ་བཅུ་གཉིས་པ་ལས། །སྒྲུབ་པ་ཆེན་པོ་དག་དང་བསྙེན་སྒྲུབ་ཡན་ལག་བཞིའི། །རྡོ་རྗེའི་བྱེ་བྲག་ཤེས་བྱས་ལ། །དེ་ནས་ཐུན་མོང་གི་ལས་རྣམས་བསྒྲུབ་པར་བྱ། །ཞེས་གསུངས་ནས། རྒྱུད་ཕྱི་མ་ལས། ཐ་མལ་པ་ནི་སྟེ་ཐུན་མོང་གི་ལས་སྒྲུབ་པ་ལ་རྡོ་རྗེ་བཞི་སྟེ་བསྙེན་སྒྲུབ་ཡན་ལག་བཞི་དང་། མཆོག་སྒྲུབ་པ་ལ་ནི་ཡེ་ཤེས་བདུད་རྩི་སྟེ་སྦྱོར་བ་ཡན་ལག་དྲུག་མཆོག་ཡིན་ནོ། །དེའང་ལུས་དབེན། ངག་དབེན། སེམས་དབེན་སྒྱུ་ལུས། འོད་གསལ། ཟུང་འཇུག་དྲུག་གོ། ཡན་ལག་བཞིའི་ངོས་འཛིན་ནི་དང་པོ་སྟོང་ཉིད་བྱང་ཆུབ་སེམས། །གཉིས་པ་ལ་ནི་ས་བོན་བསྡུ། །གསུམ་པ་ལ་ནི་གཟུགས་བརྙན་རྫོགས། །བཞི་པ་ལ་ནི་ཡིག་འབྲུ་དགོད། །རྡོ་རྗེ་རྣམ་བཞི་དག་གིས་ནི། །ཐ་མལ་ཐུན་མོངགི་བསྒྲུབ་པའི་བསྙེན་པར་བྱ། །ཞེས་གསུངས་པས། །བཅུ་གཉིས་པ་ལས། རྡོ་རྗེའི་བྱེ་བྲག་ཤེས་པར་བྱ། །ཞེས་པ་དང་། ཕྱི་མའི། རྡོ་རྗེ་རྣམ་བཞི་དེ་དག་གིས། །ཞེས་གསུངས་པ་དང་མཐུན་པས་ན། བརྟག་པ་གཉིས་པའི་གཞུང་དེ་བསྙེན་སྒྲུབ་བཞིར་ཤེས་པར་བྱའོ། །འདིར་ཤར་ཆེན་གྱི་ལུང་འགྲེལ་བའང་བརྟེན། རྗེ་བཙུན་གྱིས་གསུངས་པའི་སྐབས་དོན་ལའང་དཔྱད་ནས་འབྲུ་སྣོན་བགྱིས་པ་ལགས། དེ་ལྟ་བུའི་སྐྱེད་ཆོག་གསུམ་པོ་དེ་རིགས་བསྡུས་པ་ལ་ནི་གསུམ་ཀ་སྦྱོར་ལ། སཾ་པུ་ཊའི་རྡོ་རྗེ་དབྱིངས་ལ་ཏིང་ངེ་འཛིན་གསུམ་དང་བསྙེན་སྒྲུབ་བཞི་སྦྱར་རོ། །རིགས་སོ་སོའི་དཀྱིལ་འཁོར་དང་། བདག་མེད་མ་ལ་ཡན་ལག་དྲུག་དང་བསྙེན་སྒྲུབ་བཞིས་སྡུད། གཞན་དཀྱིལ་འཁོར་གྱི་འཁོར་ལོ་དང་ལྷ་རྐྱང་པ་ཐམས་ཅད་ལ་བསྙེན་སྒྲུབ་བཞིས་སྡུད་དེ། སློབ་དཔོན་བིཪྺ་པའི་བཞེད་པས་བསྙེན་སྒྲུབ་ཡན་ལག་བཞི་མ་ཚང་བའི་མངོན་པར་རྟོགས་པ་མཆོག་ཐུན་མོང་གང་ལ་ཡང་མི་བཞེད་དེ། རྒྱས་པའི་དབང་དུ་བྱས་པའོ། །འབྲིང་གི་དབང་དུ་བྱས་པ་ནི་ཏིང་ངེ་འཛིན་གསུམ་དང་ཡན་ལག་དྲུག་ནི་མེད་ལ། བསྙེན་སྒྲུབ་བཞིས་བསྐྱེད་ནས་མཆོད་བསྟོད་ལ་སོགས་པ་མི་བྱ་བར་བཟླས་པ་ལ་འཇུག་པ་ཡིན་ནོ། །བསྡུས་པ་ནི་སྐྱེ་མཆེད་བྱིན་གྱིས་མི་རློབ་པར་སྐུ་གསུང་ཐུགས་བྱིན་གྱིས་བརླབ་པ་དང་། དབང་མི་བསྐུར་བར་དབུ་རྒྱན་རང་ཆས་སུ་བསྒོམ་པའི་ཡན་ལག་བཞིའམ་དམ་ཚིག་སེམས་དཔའ་དབུ་རྒྱན་རང་ཆས་ཅན་སྐད་ཅིག་མས་བསྐྱེད་ནས་བཟླས་པ་ལ་འཇུག་པ་ཡིན་ནོ། །དེ་ལྟ་བུའི་དངོས་གཞི་ལ་དམ་ཚིག་སེམས་དཔའི་སྐྱེད་ཆོག་ཚུལ་མི་འདྲ་བ་བཞི་སྟེ། མངོན་བྱང་ལྔ་ལས་བསྐྱེད་པ་དང་། ས་བོན་གསུང་རྡོ་རྗེ། ཕྱག་མཚན་ཐུགས་རྗེ། རྫོགས་པ་སྐུ་རྡོ་རྗེ། འོད་ཟེར་སྤྲོ་བསྡུ་ཡེ་ཤེས་རྡོ་རྗེ། རྡོ་རྗེ་ཆོ་ག་ཡན་ལག་གསུམ་ལ་སོགས་པ་ལས་བསྐྱེད་པ་དང་། སྙིང་པོ་ཚིག་ཙམ་ལས་བསྐྱེད་པ་དང་། དབུགས་ཀྱི་སྤྲོ་བསྡུ་ལས་བསྐྱེད་པའོ། །དང་པོ་མངོན་བྱང་ལས་བསྐྱེད་པ་ལ་གཉིས་ཏེ། མཉམ་པར་སྦྱོར་བ་དང་། མི་མཉམ་པར་སྦྱོར་བའོ། །དེ་ལ་མཉམ་པར་སྦྱོར་བ་ནི་གུར་དང་། སཾ་པུ་ཊ་གཉིས་ཀའི་རིགས་བསྡུས་པའི་རྒྱུ་རྡོ་རྗེ་འཆང་བསྐྱེད་དོ། །མི་མཉམ་པར་སྦྱོར་བ་ནི་རིགས་སོ་སོ་བ་རྣམས་དང་བདག་མེད་མ་བསྐྱེད་དོ། །ཧེ་རུ་ཀ་གསུམ་ལ་ནི་མི་མཉམ་པར་སྦྱོར་བ་དང་། རྡོ་རྗེ་ཆོ་ག་གསུམ་དང་བཞི་དང་སྙིང་པོ་ཚིག་ཙམ་ལས་བསྐྱེད་པ་དང་བཞི་ཀ་འཇུག་གོ། དྲག་པོའི་གདན་ཅན་ནི་སྙིང་པོ་ཚིག་ཙམ་ལས་བསྐྱེད་དོ། །ཡེ་ཤེས་མཁའ་འགྲོ་དང་ལྡན་པ་ནི་དབུགས་འབྱུང་རྔུབ་ཀྱི་སྤྲོ་བསྡུ་ལས་བསྐྱེད་དོ། །འཁོར་ཕལ་ཆེར་ནི་མངལ་ནས་བསྐྱེད་དོ། །སྐྱེ་མཆེད་ཀྱི་ལྷ་ནི་སྙིང་པོ་ཚིག་ཙམ་ལས་བསྐྱེད་དོ། །ལས་རྒྱས་པའི་ལྷའི་རྣལ་འབྱོར་ཐམས་ཅད་རྡོ་རྗེ་ཆོ་ག་གསུམ་དང་བཞི་དང་། སྙིང་པོ་ཚིག་ཙམ་ལས་བསྐྱེད་པ་གང་མོས་ཀྱིས་བསྐྱེད་པའི་ཆོ་གའོ། །སྐྱེད་ཆོག་དེ་རྣམས་ཀྱང་སྐྱེ་གནས་བཞི་སྦྱོང་བར་བསྡུ་སྟེ། མངོན་བྱང་ལྔས་བསྐྱེད་པ་ནི་དྲོད་གཤེར་ལས་སྐྱེས་པ་དང་མངལ་སྐྱེས་སྦྱོང་། རྡོ་རྗེ་ཆོ་ག་གསུམ་དང་བཞི་དང་ཐིག་ལེ་ལས་བཞེངས་པས་སྒོང་སྐྱེས་སྦྱོང་། དབུགས་འབྱུང་རྔུབ་དང་སྙིང་པོ་ཚིག་ཙམ་གྱིས་རྫུས་སྐྱེས་སྦྱོང་། འཁོར་གྱི་ལྷ་མངལ་ནས་འབྱིན་པ་རྣམས་ཀྱིས་མངལ་སྐྱེས་སྦྱོང་སྟེ། དེ་ལྟར་ན་སྐྱེ་གནས་བཞི་སྦྱོང་བ་དང་ཚོགས་གཉིས་བསགས་ནས་ལྷའི་སྐུར་གྲུབ་པས་འབྲས་བུ་བསྒྲུབ་པ་སྟེ། སྦྱང་གཞི་སྦྱོང་ཞིང་འབྲས་བུ་འགྲུབ་པའི་བསྐྱེད་པའི་རིམ་པ་ཞེས་བྱ་བ་ཡིན་ནོ། །སྤྱི་དོན་གསུམ་པ་རྫོགས་པར་བྱེད་པའི་ཡན་ལག་ནི། བཟླས་པ་དང་། སྤྱོད་ལམ་དང་། ཁ་ཟས་དང་། གཏོར་མ་དང་། ཁྲུས་དང་། ཐུན་མཚམས་ཀྱི་བྱ་བ་དང་། ཉལ་བ་དང་། ལྡང་བ་རྣམས་ནི་ཀུན་གྱི་ཐུན་མོང་བ་ཡིན་ལ། མཆོག་བསྒྲུབ་པའི་དཀྱིལ་འཁོར་ལ་ནི་དག་པ་དྲན་པ་ཞེས་བྱ་བ་ཁྱད་པར་གྱི་ཆོས་ཡིན་ནོ། །འདི་དག་ཀྱང་རྩ་རྒྱུད་དང་པོའི་གསུམ་པ་དང་། བཞི་པ་དང་། བརྒྱད་པ་དང་། བཅུ་གཅིག་པ་དང་། ཕྱི་མའི་བཞི་པ་དང་། ལྔ་པ་རྣམས་དང་། གུར་གྱི་དང་པོ་དང་། གཉིས་པ་དང་། བཞི་པ་དང་། ལྔ་པ་དང་། བདུན་པ་དང་། བརྒྱད་པ་དང་། བཅུ་གཉིས་པ་དང་། བཅུ་བཞི་པ་དང་། བཅོ་ལྔ་པ་རྣམས་དང་། སཾ་པུ་ཊའི་གཉིས་པའི་གསུམ་པ་ནས་གསུམ་པ་དངོས་ཀྱི་བར་དང་། བདུན་པ་དངོས་དང་། ཞར་ལས་བྱུང་བ་ལྔ་པའི་གཉིས་པ་དང་། བརྒྱད་པའི་གཉིས་པ་རྣམས་ཀྱི་ཡང་ཡིན་ནོ། །རྫོགས་པའི་རིམ་པའི་རྟེན་བསྐྱེད་པའི་རིམ་པ་བསྟན་ཟིན་ཏོ། །
བསྐྱེད་པའི་རིམ་པའི་ལྷ་ཡེ་ཤེས་སུ་རྟོགས་པར་བྱ་བའི་ཕྱིར་རྫོགས་པའི་རིམ་པ་བསྒོམ་པ།
བསྐྱེད་པའི་རིམ་པའི་ལྷ་ཡེ་ཤེས་སུ་རྟོགས་པར་བྱ་བའི་ཕྱིར་རྫོགས་པའི་རིམ་པ་བསྒོམ་པ་ལ་གསུམ་སྟེ། རྫོགས་པའི་རིམ་པའི་མཚན་ཉིད་དང་། རྫོགས་པ་གཉིས་ཀྱི་སྤྱིར་འགྲོ་དང་། ཉམས་སུ་བླངས་པའི་ཐབས་སོ། །དང་པོ་ལ་གཉིས། གཞན་ལུགས་དགག་པ་དང་། རང་ལུགས་བཞག་པའོ། །དང་པོ་ནི་རྫོགས་རིམ་མ་ཡིན་པ་ལ་དེར་འཁྲུལ་པ་བཞི་སྟེ། དཀྱིལ་འཁོར་བསྡུ་བ་དང་། ལྟ་བའི་རྒྱ་དང་། རྟོག་པ་ཁ་འཚོམ་དང་། ལྟ་བ་ཡིད་ལ་བྱེད་པའི་བསམ་གཏན་ནོ། །དེ་ལ་དང་པོ་ནི་བསྐྱེད་རིམ་གྱི་མཐར་སྣོད་བཅུད་ནས་བཟུང་སྟེ་ནཱ་དའི་མཐར་སྟོང་པར་བྱེད་པའོ། །གཉིས་པ་ནི་ལྷ་སྣང་ལ་རང་བཞིན་མེད་པར་བསྒོམ་པའོ། །གསུམ་པ་ནི་རྟོག་པ་གང་ཡང་མི་འགྱུ་བའི་ཤེས་པ་ཐོམ་མེ་བའོ། །བཞི་པ་ནི་གནས་ལུགས་གང་ཡིན་པ་གཏན་ལ་ཕབ་ནས་དེའི་ངང་དུ་ཅུང་ཟད་གནས་པར་བྱེད་པའོ། །འོ་ན་རྫོགས་རིམ་གང་ཡིན་ཞེ་ན། དེ་ལ་རང་ལུགས་བཞག་པ་ལ་གསུམ། ལུས་རྫོགས་ཚུལ་དང་། ངག་རྫོགས་ཚུལ་དང་། སེམས་རྫོགས་ཚུལ་ལོ། །དེ་གསུམ་ཀའང་ལུང་དང་བསྟུན་ནས་བརྗོད་ན་གཉིས་ཏེ། རང་བྱིན་གྱིས་བརླབ་པའི་རིམ་པ་དང་། དཀྱིལ་འཁོར་འཁོར་ལོའི་ཐབས་སོ། །ཡང་གཉིས་ཏེ། དམིགས་པ་དང་བཅས་པ་དང་། དམིགས་པ་མེད་པའོ། །ཡང་གཉིས་ཏེ། རང་བཞིན་ལྷན་ཅིག་སྐྱེས་པ་དང་། ཞུ་བདེ་ལྷན་ཅིག་སྐྱེས་པའོ། །གཉིས་པ་རྫོགས་པའི་རིམ་པ་གཉིས་ཀྱི་སྤྱིར་འགྲོ་ནི། དེ་ལྟ་བུའི་རྫོགས་པའི་རིམ་པ་དེ་དག་ཐམས་ཅད་ཀྱང་དཀྱིལ་འཁོར་གསུམ་ལ་བརྟེན་ནས་སྐྱེ་བས་འདི་ལ་གསུམ་སྟེ། ལམ་ལ་སོམ་ཉི་སྤང་བའི་ཕྱིར་ཕྱི་རོལ་གྱི་སྤྲོས་པ་ཐམས་ཅད་ནང་དུ་བཅད་པ་དང་། དེ་ཉིད་གཏན་ལ་དབབ་པའི་སྒོ་ནས་བྱང་ཆུབ་ཀྱི་སེམས་ཀྱི་རང་གི་ངོ་བོ་བསྟན་པ་དང་། དེ་མི་སྤང་ཞིང་བསྐྱེད་པར་བསྟན་པའོ། །དང་པོ་ལ་གཉིས། སྡོམ་པའི་རབ་ཏུ་དབྱེ་བའི་སྒོ་ནས་ལུས་དང་རྩ་གཏན་ལ་དབབ་པ་དང་། རྩ་དང་བྱང་ཆུབ་ཀྱི་སེམས་བསྟ༷ན་པའི་སྒོ་ནས་ས་དང་ལམ་ཐམས་ཅད་ནང་དུ་གཏན་ལ་དབབ་པའོ། །དང་པོ་ནི་རྩ་རྒྱུད་ཕྱི་མའི་བཞི་པ་ལས། རྣལ་འབྱོར་མའམ་རྣལ་འབྱོར་པའི་ལུས་དབུས་གནས་སུ། །ཨ་ཡི་སྟེ་ཨ་ཤད་ཀྱི་རྣམ་པ་ལྟ་བུ་ནི་སྡོམ་པའི་གནས་སོ། །ཇི་ལྟར་ཕྱི་རོལ་ན་ཇི་སྙེད་ཡོན་པའི་ཆོས་ཐམས་ཅད་ཇི་ལྟ་བ་དེ་ལྟར་དུ་ནང་ལུས་སེམས་ལ་སྡོམ་སྟེ། །སྡོམ་པའི་ཚུལ་དེ་ཉིད་རབ་ཏུ་ཕྱེ་ཞིང་རྒྱས་པར་ཤེས་པར་བྱའོ། །ཞེས་པས་ལུས་ཀྱི་དཀྱིལ་འཁོར་བསྟན་ཏོ། །དེ་ལ་སྡོམ་པའི་དབྱེ་བ་ལ་ལྔ་སྟེ། གང་དུ་སྡོམ་པ་དང་། ཇི་སྙེད་སྡོམ་པ་དང་། གང་སྡོམ་པ་དང་། གང་གིས་སྡོམ་པ་དང་། སྡོམ་པ་རང་གི་ངོ་བོའོ། །དང་པོ་ནི་སྐྱེ་བའི་གནས་གཙོ་བོ་ལྟེ་བའི་ཨྃ་ངོ་། །སྐྱེ་བའི་གནས་མཐའ་དག་ནི་འཁོར་ལོ་བཞིའོ། །དེ་ལས་ཀྱང་སྤྲོས་ན་རྩ་བསམ་གྱིས་མི་ཁྱབ་པའི་བར་རོ། །གཉིས་པ་ཇི་སྙེད་ཅིག་སྡོམ་ཞེ་ན། ཕྱི་རོལ་དུ་ཇི་སྙེད་ཡོད་པའི་ཆོས་ཐམས་ཅད་ནང་དུ་ཇི་ལྟ་བ་བཞིན་དུ་སྡོམ་པ་སྟེ། ཕྱི་རོལ་གྱིི་ཆོས་བཞི་ཚན་སྡེ་པ་བཞི་ལ་སོགས་པ་ཐམས་ཅད་འཁོར་ལོ་བཞི་ལ་སོགས་པ་ལ་སྡོམ། སྐུ་གསུམ་ལ་སོགས་པའི་ཆོས་སུམ་ཚན་ཐམས་ཅད་རྩ་གསུམ་ལ་སྡོམ། ཐབས་ཤེས་རབ་ལ་སོགས་པ་ཆོས་གཉིས་ཚན་ཐམས་ཅད་ཐབས་ཤེས་རབ་གཉིས་སམ་རྩ་གཉིས་ལ་སྡོམ་པ་ལ་སོགས་པ་ཕྱི་རོལ་གྱི་སྤྲོས་པ་ཐམས་ཅད་ནང་དུ་གཅོད་པ་སྟེ། ཨེ་ནི་ས་རུ་ཤེས་པར་བྱ། །ཞེས་བྱ་བ་ལ་སོགས་པ་ལྟ་བུའོ། །གསུམ་པ་གང་སྡོམ་སྙམ་ན། ཉན་ཐོས་ལུས་ངག་གི་ཁ་ན་མ་ཐོ་བ་སྡོམ་ལ། བྱང་ཆུབ་སེམས་དཔའ་མི་དགེ་བ་བཅུ་སྡོམ་ཞིང་། འདིར་ཡང་སྤང་བྱ་མི་མཐུན་པའི་ཕྱོགས་མཚན་མ་དང་རྣམ་པར་རྟོག་པ་ཐམས་ཅད་སྡོམ་པའོ། །དེ་ལྟར་ན་བསྡོམས་ཞེས་པ་དང་སྡོམ་པ་ཞེས་པ་གཉིས་སྒྲ་བཤད་གཅིག་ཏུ་འདུ་བར་མི་རིགས་སོ་སྙམ་ན། རྒྱ་གར་གྱི་སྐད་ལས་མང་པོ་གཅིག་ཏུ་བསྡོམས་པ་ལ་ཡང་སཾ་བ་ར་ཞེས་ཟེར་ལ། བསྲུང་བའི་དམ་ཚིག་སྤང་བྱ་རྣམས་སྡོམ་པ་ལ་སཾ་བ་ར་ཞེས་ཟེར་བས་སྒྲ་གཅིག་པོ་འདི་ལ་རྣམ་གྲངས་གཉིས་སུ་འཇུག་པ་ཡིན་པས་ན་འདིར་ཡང་དེ་བཞིན་དུ་ཤེས་པར་བྱའོ། །བཞི་པ་གང་གིས་སྡོམ་སྙམ་ན། ཕྱག་རྒྱའམ་གཏུམ་མོའི་རྣལ་འབྱོར་གྱིས་སྡོམ་མོ། །ལྔ་པ་སྡོམ་པ་རང་གི་ངོ་བོ་ནི་རང་བྱུང་གི་ཡེ་ཤེས་སམ་ལྷན་སྐྱེས་སོ། །གཉིས་པ་རྩ་དང་བྱང་ཆུབ་ཀྱི་སེམས་བསྟན་པས་ས་དང་ལམ་ཐམས་ཅད་ནང་དུ་གཏན་ལ་དབབ་པ་ནི། སཾ་པུ་ཊའི་དང་པོའི་གཉིས་པ་ལས། གོང་ནས་བསྟན་པའི་བྱང་ཕྱོགས་སོ་བདུན་དེ་ཉིད་དུ་ལུས་ལ་ཚང་ཚུལ་ཡང་དག་བཤད་པ་ནི། །བྱང་ཕྱོགས་ཀྱི་སྒྲུབ་ཀྱང་རབ་ཏུ་དགའ་བ་ལ་སོགས་ས་རྣམས་དང་སངས་རྒྱས་འགྲུབ་ལ་ལུས་ལའང་ཐོབ་བྱ་ཐོབ་བྱེད་དེ་དག་གནས་ཏེ། །འདི་ལྟར་དབང་པོ་དྲུག་དང་ལ་སོགས་པ་ཡུལ་དྲུག་དང་ཚིགས་ཆེན་བརྒྱད་སྤྱི་བོ་རྐང་མཐིལ་གཉིས་རྣམས་ནི་རང་བཞིན་གྱི་འཁོར་རམ་ལམ་གྱི་དབང་དུ་བྱས་པའི། །བྱང་ཆུབ་སེམས་དཔའ་དང་ལྷ་མོ་དང་ཁྲོ་བོ་རྣམས་ཀྱི་གནས་ཏེ་ངོ་བོ་ཡིན་ནོ། །ཕུང་པོ་ལྔ་དང་ལ་སོགས་པ་ཉོན་མོངས་ལྔ་དང་འབྱུང་བ་ལྔ་རྣམས་ནི་གཙོ་བོའམ་འབྲས་བུའི་ཁྱད་པར་གྱིས། །སངས་རྒྱས་ཐམས་ཅད་དེ་རིགས་ལྔ་ཡེ་ཤེས་ལྔ་ཡུམ་ལྔ་རྣམས་ཀྱི་ནི་གནས་ཏེ་ངོ་བོ་ཡིན་ནོ། །སངས་རྒྱས་བྱང་ཆུབ་སེམས་དཔའ་ཡིས་༼ཡི༽༷། །ཆོས་ལ་ཕྱི་ན་དབྱེ་བསྡུ་ཡོད་པ་ལྟར་ནང་ལའང་དབྱེ་བསྡུ་ཡོད་པས། སངས་རྒྱས་ཉིད་ནི་ཕྱི་ན་མེད་ཀྱི་ནང་ན་མཆོག་ཏུ་འབབ་བོ་སྟེ་གནས་སོ་ཞེས་པའོ། །ཅེས་གསུངས་ཏེ། །དེའི་དོན་ཡང་ཆོས་དགུ་དགུ་བསྲེས་ནས་སྦྱང་གཞི་སྦྱོང་བྱེད་ངོ་སྤྲད་དེ། །སྦྱང་གཞི་ཕུང་པོ་ཁམས་དང་སྐྱེ་མཆེད་༡བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་དང་༢། གཞལ་ཡས་ཁང་ལྷ་དང་བཅས་པ་དང་༣། རྩ་དང་༤། ཡི་གེ་དང་༥། ཁམས་བདུད་རྩི་དང་༦། རླུང་དང་༧། ས་བཅུ་གཉིས་དང་༨། སངས་རྒྱས་ཀྱི་ས་རྣམས་ཏེ༩། འདི་དག་ཀྱང་བླ་མས་འཆད་པའམ། རྒྱུད་ཉིད་ཀྱི་སྟེང་དུ་རྒྱས་པར་བསྙད་ལ་རྟོགས་པར་བྱའོ། །སྤྱི་དོན་གཉིས་པ་དེ་ཉིད་གཏན་ལ་དབབ་པའི་སྒོ་ནས་བྱང་ཆུབ་ཀྱི་སེམས་ཀྱི་ངོ་བོ་བསྟན་པ་ནི། འཕོ་བ་དང་ལྷ་མོ་ལ་སོགས་པ་ཐམས་ཅད་ནང་དུ་གཏན་ལ་དབབ་པའི་ཕྱིར། རྩ་རྒྱུད་ཕྱི་མའི་བཞི་པ་ལས། གང་ཕྱིར་བཅུ་དྲུག་པའི་ཆ་རྣམས་སྦྱོང་བའི་ལྷ་མོ་མེད་པས། །འབད་པས་རྩ་ཡི་གེ་ཀུན་གྱི་ལྷག་མ་བཅུ་དྲུག་པ་རྣམས་ལྷ་མོའི་སྦྱངགཞིར་སྤང་པར་བྱའོ། །ཅིའི་སླད་དུ་ཞེ་ན། བཅུ་དྲུག་པ་རྣམས་ཀྱིས་དོན་གྱི་བྱ་བ་མི་བྱེད་ཕྱིར། །བཅོ་ལྔའི་ཆ་ཤས་དང་ལྡན་པ་ཡི་བདག་ཉིད་ཀྱི། །ཟླ་བ་ཡར་ངོ་མར་ངོ་ལ་འཕེལ་འགྲིབ་བཅོ་ལྔར་འགྱུར་བ་ལྟར་བྱང་ཆུབ་ཀྱི་སེམས་ལའང་དགའ་བ་ལ་སོགས་པའི་རྟོགས་པ་བསྐྱེད་ཅིང་བགྲོད་པ་དང་བཅས་པའི་བྱ་བ་བྱེད་པ་རྣམས་སུ་འགྱུར་བས་ཐབས་ཧེ་རུ་ཀའ།ོ། བད་ེབ་ཆེན་པོ་ཧེ་རུ་ཀ་ནི་ཨཱ་ལི་བཅོ་ལྔའི་གཟུགས་ཏེ་སྤྲོས་བཅས་ཡིན་ལ། །རྣལ་འབྱོར་མ་བཅོ་ལྔ་པོ་རྣམས་ནི་དེ་ཡི་ཆ་བཅུ་དྲུག་རྣམས་ཏེ་སྤྲོས་མེད་རྣམས་ཡིན་ནོ། །ཞེས་གསུངས་ཏེ། དེའང་ཚེས་དང་། འཕོ་བ་དང་། རྩ་དང་། ཡི་གེ་དང་། བྱང་ཆུབ་ཀྱི་སེམས་དང་། དགའ་བ་བཅུ་དྲུག་དང་། ལྷ་མོ་རྣམས་ཏེ། བདུན་བདུན་གཅིག་ཏུ་བསྲེས་ཏེ་དེའང་རྒྱས་པར་བླ་མས་འཆད་པའམ། རྒྱུད་ཀྱི་སྟེང་དུ་རྟོགས་པར་བྱའོ། །དོན་གསུམ་པ་དེ་མི་སྤང་ཞིང་བསྐྱེད་པར་བསྟན་པ་ལ་གཉིས། མི་སྤོང་པ་དང་། བསྐྱེད་པའོ། །དང་པོ་ནི་ཧེ་བཛྲ་ཕྱི་མའི་བཞི་པ་ལས། རྡོ་རྗེ་སྙིང་པོས་གསོལ་པ། རྣལ་འབྱོར་མ་ཀུན་བསྟེན་པའམ་དེའི་ངོ་བོ་རྩ་རྣམས་ཀུན་ལས་བྱུང་བ། །ལྷན་ཅིག་སྐྱེས་པའི་དགའ་བ་བསྐྱེད་པའི་རང་བཞིན་ཉིད། །སྒྲིབ་སེལ་ལས་འགྲིབ་མེད་བདེ་བ་བསྐྱེད་པས་བཏུང་མཆོག་རྟོག་པ་མེད་པས་ནམ་མཁའ་ཉིད། །ག་པུར་ཅི་ནས་ངས་༼ངེ༷ས་༽པར་མི་སྤོང་བར་བྱ་བ་ལགས་སམ། །བཅོམ་ལྡན་འདས་ཀྱིས་བཀའ་སྩལ་པ། །ཇི་སྐད་སྨྲས་པ་དེ་བཞིན་ནོ། །ཞེས་གསུངས་པས་སོ། །གཉིས་པ་བསྐྱེད་པའི་ཐབས་ནི་དེ་ཉིད་ལས། ཐབས་གང་གིས་བྱང་ཆུབ་ཀྱི་སེམས་བསྐྱེད་པ་ལགས། བཀའ་སྩལ་པ། དཀྱིལ་འཁོར་འཁོར་ལོའི་ཐབས་དང་ནི། །རང་བྱིན་བརླབ་པའི་རིམ་པས་ཀྱང་། །རྟེན་ཀུན་རྫོབ་ཀུནྡ་ལྟ་བུ་དང་བརྟེན་པ་དོན་དམ་ཚུལ་ཅན་གྱི། །བྱང་ཆུབ་སེམས་ནི་རབ་ཏུ་བསྐྱེད། །ཅེས་གསུངས་ཏེ། ཀུན་རྫོབ་དང་དོན་དམ་པའི་བྱང་ཆུབ་སེམས་ཀྱི་དཀྱིལ་འཁོར་བསྟན་ཏེ། རྒྱས་པར་ཉམས་སུ་བླང་བ་ཉིད་ཀྱི་སྐབས་སུ་འཆད་པར་འགྱུར་རོ། །སྤྱི་དོན་གསུམ་པ་རྟེན་དེ་ལ་བརྟེན་ནས་སྐྱེ་བའི་རྫོགས་པའི་རིམ་པ་ཉམས་སུ་བླང་བ་ལ་ལྔ་སྟེ། ཐབས་གཉིས་ཉམས་སུ་བླང་བའི་ཚུལ་དང་། དེ་ལས་སྐྱེས་པའི་ཏིང་ངེ་འཛིན་གྱི་མཚན་ཉིད་དང་། མ་སྐྱེས་པ་སྐྱེད་ཅིང་སྐྱེས་པ་བོགས་དབྱུང་བའི་ཐབས་དང་། མི་མཐུན་པའི་བར་ཆད་བསལ་བ་དང་། ཏིང་ངེ་འཛིན་གྱི་དྲོད་རྟགས་སོ། །དང་པོ་ཉམས་སུ་བླང་བ་ལ་གཉིས། རང་བྱིན་བརླབ་དང་། དཀྱིལ་འཁོར་འཁོར་ལོའི་ཐབས་སོ། །དེ་རེ་རེ་ལ་ཡང་རྟེན་དམིགས་པ་དང་བཅས་པ་ཀུན་རྫོབ་བྱང་ཆུབ་ཀྱི་སེམས་དང་། བརྟེན་པ་དམིགས་པ་མེད་པ་དོན་དམ་པ་བྱང་ཆུབ་ཀྱི་སེམས་ཏེ། ཀུན་རྫོབ་དོན་དམ་ཚུལ་ཅན་གྱི། །བྱང་ཆུབ་སེམས་གཉིས་རབ་ཏུ་བསྐྱེད། །ཅེས་པ་དང་། དང་པོའི་བཅུ་པ་ལས་ཀྱང་། ལྷན་ཅིག་སྐྱེས་པས་གང་སྐྱེས་པ། །ལྷན་ཅིག་སྐྱེས་པར་དེ་བརྗོད་བྱ། །རང་བཞིན་ལྷན་ཅིག་སྐྱེས་ཞེས་བརྗོད། །རྣམ་པ་ཐམས་ཅད་སྡོམ་པ་གཅིག །ཅེས་གསུངས་པས་ན། རྟེན་ཞུ་བདེ་ལྷན་སྐྱེས་དང་། བརྟེན་པ་རང་བཞིན་ལྷན་སྐྱེས་སོ། །དེ་ལྟར་ན་གང་ལྟར་བསྡེབས་ཀྱང་བཏུབ་མོད་ཀྱི་རེ་ཞིག་གཟུང་བདེ་བའི་དབང་དུ་བྱས་ནས། རང་བྱིན་བརླབ་དང་དཀྱིལ་འཁོར་འཁོར་ལོའི་དམིགས་བཅས་གཉིས་སྔོན་ལ་བརྗོད་པར་བྱའོ། །དེ་ལ་རང་བྱིན་བརླབ་དམིགས་བཅས་ལ་གཉིས། ཟབ་མོ་རྫོགས་པའི་རིམ་པ་དང་། མི་ཟབ་པ་རྫོགས་པའི་རིམ་པའོ། །དང་པོ་ལ་གཉིས། སོ་སོར་བསྒོམ་པ་དང་། ལྡན་པར་བསྒོམ་པའོ། །དང་པོ་ལ་བཞི། རྩ་ལུས་ཀྱི་རྣལ་འབྱོར། །ཡི་གེ་བྷ་གའི་རྣལ་འབྱོར། བདུད་རྩི་ཐིག་ལེའི་རྣལ་འབྱོར། སྙིང་པོ་རླུང་གི་རྣལ་འབྱོར་རོ། །དང་པོ་ནི་རྩ་རྒྱུད་ལས། རྐྱང་མ་དང་རོ་མ་ལ་སོགས་པའོ། །གཉིས་པའང་ཨྃ་གི་རྣམ་པར་སྡོམ་པའི་གནས་ལ་སོགས་པའོ། །གསུམ་པའང་རྡོ་རྗེ་གུར་བཅུ་བཞི་པ་ལས། སྙིང་གི་དབུས་སུ་ཟླ་བའི་དཀྱིལ་འཁོར་གནས་པར་གྱུར། །གཟུགས་བརྙན་ཟླ་བའི་དབུས་དེར་མ་བཅོམ་པ་སྟེ་ཧཱུྃ་ཡིག །སྣ་ཚོགས་འོད་ཀྱིས་ཡང་དག་ཁྱབ་པ་ཞིག་བསམ། །དེ་ལས་རྡོ་རྗེ་སྔོན་པོ་ཧཱུྃ་གིས་མཚན་པ་བསྒོམ་པར་བྱ། །དེ་ལས་འོད་ཟེར་འཕྲོས། ལྟེ་བའི་ༀ་ལ་ཕོག །དེ་མེར་འབར་བས་ཐིག་ལེ་འབར་འཛག་བསྒོམ་པ་ནི་རྡོ་རྗེ་མཁའ་འགྲོ་བདག་མེད་མ། ཆོ་གས་བསྐུལ་བས་བསྒོམ་པར་བྱ། །ཞེས་པ་སྟེ་འདི་ནང་ལ་སྦྱར་བའི་སྐབས་ཡིན་པས་བདག་མེད་མ་ལྟེ་བའི་ༀ་ལ་གོ་དགོས། ཞེས་པ་དང་། སཾ་པུ་ཊའི་ལྔ་པའི་གཉིས་པ་ལས་ཀྱང་མང་དུ་གསུངས་སོ། །བཞི་པའང་། རྟག་ཏུ་འགྲོ་བ་རླུང་རྣམ་བཞི། །ཞེས་བྱ་བ་ལ་སོགས་པའོ། །གཉིས་པ་ལྡན་པར་བསྒོམ་པ་ལ་གསུམ། དེ་དག་གཉིས་སམ། གསུམ་མམ། བཞི་དང་ལྡན་པར་བསྒོམ་པའོ། །དེ་ལྟར་ཟབ་མོ་ཀུན་ལ་གཏུམ་མོའམ་ཐིག་ལེའི་རྣལ་འབྱོར་ཞེས་མིང་འདོགས་སོ། །དེའི་དམིགས་པ་གཏུམ་མོའི་རྣལ་འབྱོར་ནི། ལེའུ་དང་པོ་ལས། ལྟེ་བར་གཏུམ་མོ་འབར་བ་ཡིས། །དེ་བཞིན་གཤེགས་པ་ལྔ་བསྲེགས་ཤིང་། །སྤྱན་ལ་སོགས་པ་ཡང་བསྲེགས་ཏེ། །བསྲེགས་པས་རི་བོང་ཅན་ཧྃ་འཛག །ཅེས་གསུངས་ལ། སྤྱིར་བཤད་པའི་རྒྱུད་སཾ་པུ་ཊ་དང་། རྡོ་རྗེ་གུར་ལས་འཁོར་ལོ་ལ་བརྟེན་པ་དང་། མ་བརྟེན་པའོ། །བརྟེན་པ་ལ་ཡང་གཅིག་ལ་བརྟེན་པ་ལ་སོགས་པ་མང་དུ་གསུངས་ཏེ། རྒྱས་པར་བླ་མས་བཤད་དེ་ཤེས་པར་བྱའོ། །གཉིས་པ་མི་ཟབ་པ་རྫོགས་པའི་རིམ་པ་ནི། ཕྲ་མོའི་རྣལ་འབྱོར་གྱི་རྩ་གཉིས་འཛོམ་པའི་སྣ་རྩེར་ཕྲ་མོའི་དཀྱིལ་འཁོར་བསྒོམ་པ་སྟེ། རྡོ་རྗེ་གུར་ལེའུ་བཅུ་བཞི་པ་ལས། སྤྱིར་རྒྱུད་ཀྱི་ཚིག་རྣམས་ཕྱི་བསྐྱེད་རིམ་ལ་སྦྱར་ཏེ་བཤད་པ་དང་། ནང་སྦྱར་ཏེ་བཤད་པ་གཉིས་སུ་ཡོད་པ་ལས་འདིར་རྡོ་རྗེ་མཁའ་འགྲོ་བདག་མེད་མ། །ཆོ་གས་བསྐུལ་བས་བསྒོམ་པར་བྱ། །ཞེས་པ་བསྐྱེད་རིམ་གྱི་ལྷ་སྐུ་ཡབ་ཡུམ་བསྒོམ་པ་ལ་གོ་དགོས་ཀྱི་གོང་དུ་བཤད་པའི་འབྲུ་སྣོན་དང་མི་འདྲའོ། །དེས་ཐིག་ལེ་ཕབ་པ་མཁའ་འགྲོ་མའི་དབུ་མའི་སྣ་ཡི་མཐར་གནས་པ། །ཐིག་ལེ་ཡུངས་ཀར་ཙམ་དུ་རྣམ་པར་བསྒོམ། །ཡུངས་ཀར་ཙམ་གྱི་ཐིག་ལེའི་ནང་དུ་རྡོ་རྗེའི་ལྟེ་བ་ལ་ནི་འགྲོ་བ་ཀུན་ཏེ་རིགས་བསྡུས་སོགས་ཀྱི་དཀྱིལ་འཁོར་བརྟེན་པར་བཅས་པ་དམིགས་ལ། །ནང་ལ་དེའི་ཡུམ་གྱི་སྣ་རྩེ་ཐིག་ལེ་ཕྲ་མོ་བསམ། དེའུ་ནང་དུ་ཕྱག་མཚན་ས་བོན་གྱིས་མཚན་པར་བསམས། དེ་ལས་འོད་འཕྲོས་ཁམས་གསུམ་རྒྱུ་བ་བཅུད་དང་མི་རྒྱུ་པ་སྣོད་ཐམས་ཅད་ལ་ཕོག །དེ་ཐམས་ཅད་འོད་དུ་ཞུ། ཕྱིའི་གཞལ་ཡས་ཁང་ལ་ཐིམ། དེ་ནས་རིམ་གྱིས་ཡུམ་ལ་བསྡུ། ཡུམ་གསང་བའི་ཐིག་ལེ་ལ་བསྡུ་། དེ་ཕྱག་མཚན་ལ། དེ་ནང་གི་སྲུང་འཁོར་ནས་རིམ་བཞིན་ཕྲ་མོའི་ས་བོན་གྱི་བར་བསྡུ། དེ་ལ་སེམས་གཏད། དེའང་སྟོང་པར་བྱས་ཏེ་དེའི་ངང་ལ་བཞག །དེ་ལྟར་སྒོམ་པར་བྱེད་པ་ཡིས། །རང་གི་བྱིན་བརླབ་རབ་ཏུ་འགྲུབ། །ཅེས་གསུངས་ཏེ་རྒྱས་པར་བླ་མས་གསུང་བར་འགྱུར་རོ། །རང་བྱིན་བརླབ་བསྟན་ཟིན་ཏོ། །ད་ནི་དཀྱིལ་འཁོར་འཁོར་ལོའི་ཐབས་དམིགས་པ་དང་བཅས་པ་ལ་གསུམ་སྟེ། གང་ལ་བརྟེན་ནས་སྐྱེ་བའི་རྟེན་དང་། དེ་བསྟེན་པའི་ཐབས་དང་། བསྟེན་པ་ལས་བྱུང་བའི་ཡེ་ཤེས་ཀྱི་མཚན་ཉིད་དོ། །རྟེན་ལ་གཉིས་ཏེ། དངོས་ཀྱི་ཕྱག་རྒྱ་དང་། ཡེ་ཤེས་ཀྱི་ཕྱག་རྒྱའོ། །དངོས་ཀྱི་ཕྱག་རྒྱ་ལ་གཉིས་ཏེ། གནས་སྐབས་ལ་དགོངས་ནས་གསུམ་དུ་དབྱེ་བ་དང་། དེ་ཉིད་ངོ་བོ་ལ་དགོངས་ནས་བཞིར་དབྱེ་བའོ། །དང་པོ་ལ་གསུམ་དུ་དབྱེ་ན། ལང་ཚོ་དང་རྗེས་སུ་མཐུན་པ་དང་། རིགས་དང་རྗེས་སུ་མཐུན་པ་དང་། ཡོན་ཏན་དང་རྗེས་སུ་མཐུན་པའོ། །དང་པོ་ནི་དབང་དུས་སུ་གཙོ་སྟེ། ཕྱི་མའི་ལྔ་པ་ལས། བཅུ་གཉིས་བརྒྱད་གཉིས་ལོན་པ་ཡི། །ཞེས་བྱ་བ་ལ་སོགས་པ་གསུངས་ལ། གཉིས་པའང་ལམ་དུས་གཙོ་བོ་སྟེ། དེའང་རྩ་རྒྱུད་དང་པོའི་ལྔ་པ་ལས། གར་མ་ཚོས་མ་རྡོ་རྗེ་མ། །གདོལ་མ་དེ་བཞིན་བྲམ་ཟེ་མོ། །ཞེས་བྱ་བ་ལ་སོགས་པ་དང་། རྡོ་རྗེའི་ཕྱག་རྒྱ་གཡུང་མོ་ཉིད། །དེ་བཞིན་པདྨ་གར་མ་ཉིད། །ཅེས་བྱ་བ་ལ་སོགས་པ་གསུངས་སོ། །གསུམ་པ་ལ་གཉིས། སྦྱངས་པའི་ཡོན་ཏན་ཅན་དང་། སྐྱེས་ཐོབ་ཀྱི་ཡོན་ཏན་ཅན་ནོ། །དང་པོ་ནི་འབྲས་བུའི་དུས་གཙོ་བོ་སྟེ། རྩ་རྒྱུད་ཕྱི་མའི་གཉིས་པ་ལས། མཆོག་ཐོབ་པ་ཡི་བུད་མེད་གང་། །རྟོག་པ་ཐམས་ཅད་ཡང་དག་སྤངས། །ཞེས་གསུངས་སོ། །གཉིས་པ་ནི་གནས་སྐབས་ཀུན་ཏུ་འཇུག་པ་པདྨ་ཅན་ཏེ། ཕྱི་མའི་བརྒྱད་པ་ལས། ཤིན་ཏུ་རིང་མིན་ཐུང་བ་མིན། །ཞེས་པ་དང་། དེ་རྙེད་ན་ནི་དངོས་གྲུབ་འགྱུར། །ཞེས་བྱ་བ་ལ་སོགས་པ་གསུངས་སོ། །གཉིས་པ་ལ་བཞི། སྒྲ་ཇི་བཞིན་པ་དང་། ཇི་བཞིན་མ་ཡིན་པ་དང་། དབང་དང་རྗེས་སུ་འབྲེལ་པ་དང་། ཡོན་ཏན་དང་མཐུན་པའོ། །དང་པོ་ནི་མ་ལ་སོགས་པ་བརྒྱད། བྲམ་ཟེ་མོ་ལ་སོགས་པ་བརྒྱད་དེ་བཅུ་དྲུག་ཏུ་འགྱུར་ཏེ། ཧེ་བཛྲ་ལས། མ་དང་སྲིང་མོ་ཉིད་དང་ཡང་། །ཞེས་བྱ་བ་ལ་སོགས་པ་བརྒྱད་དང་། གར་མ་ཚོས་མ་རྡོ་རྗེ་མ། །ཞེས་བྱ་བ་ལ་སོགས་པ་བརྒྱད་དོ། །གཉིས་པ་ཇི་བཞིན་མ་ཡིན་པ་ནི་མ་ལ་སོགས་པ་བརྒྱད་བྲམ་ཟེ་མོ་ལ་སོགས་པ་བརྒྱད་དུ་འགྱུར་བ་སྟེ། སཾ་པུ་ཊ་དང་ཡེ་ཤེས་ཐིག་ལེ་ལས། མ་ནི་སྐྱེ་གཉིས་དེ་བཞིན་གཤེགས། །བུ་མོ་གཡུང་མོ་རུ་ནི་བརྗོད། །མནའ་མ་གདོལ་པ་མོར་ཤེས་བྱ། །སྲིང་མོ་གར་མར་ཤེས་པར་བྱ། །སྲིང་མོའི་བུ་མོ་ཚོས་མ་སྟེ། །ཞེས་བྱ་བ་ལ་སོགས་པ་ཞང་པོའི་ཆུང་མ་རྗེ་མི་ཉིད། །མ་ཡི་སྤུན་ནི་རྒྱལ་རིགས་ཏེ། །སྒྱུག་མོ་དམངས་པོར་ཤེས་པར་བྱ། །གསུངས་པ་སྟེ། འཇིག་རྟེན་དང་འབྲེལ་པའི་མ་ལ་སོགས་པ་མ་ཡིན་པར་ཚོས་མ་ལ་སོགས་པ་ཡིན་པར་གསུངས་སོ། །གསུམ་པ་ནི་ཕྱག་རྒྱ་གཅིག་ལ་ལྡོག་པ་བརྒྱད་ཚང་བ་སྟེ། དེའང་གསང་དབང་གི་རྟེན་ལ་མ་ཞེས་བྱ་བ་ལ་སོགས་པའོ། །དབང་གི་གཉེན་རྩིས་ནི། གསང་དབང་གི་རྟེན་མ། ཤེར་དབང་རྟེན་སྲིང་མོ། བདག་གིས་དབང་བསྐུར་བ་བུ་མོ། བདག་གི་ཕྱག་རྒྱས་དབང་བསྐུར་བ་སྲིང་མོའི་བུ་མོ། བདག་གིས་གསང་དབང་གི་རྟེན་གྱི་གྲོགས་མཆེད་ཀྱི་ཕྱག་རྒྱ་ཞིང་པོའི་ཆུང་མ། གསང་དབང་གི་རྟེན་དེའི་གྲོགས་མཆེད་མོ་ནི་མའི་སྤུན། རང་གི་ཕྱག་རྒྱའི་གསང་དབང་གི་རྟེན་སྒྱུག་མོ། བླ་མའི་གྲོགས་མཆེད་མོ་ཕའི་སྲིང་མོ་དེ་བརྒྱད་དམ། རང་གི་གསང་དབང་གི་གྲོགས་མཆེད་ཕྱག་རྒྱ་མ་མནའ་མ་སྟེ་འདི་རྩིས་ན་ཕའི་སྲིང་མོ་མི་བགྲང་ངོ་། །བཞི་པ་ནི་ཕྱག་རྒྱ་ཐམས་ཅད་ཡོན་ཏན་གྱི་ལྡོག་པས་ཕྱེ་ན་ཕྱག་རྒྱ་གཅིག་ལ་ཡོན་ཏན་བཅུ་དྲུག་བཅུ་དྲུག་སྟེ། ཡོན་ཏན་གྱི་གཉེན་རྩིས་ནི། ཕྱག་རྒྱ་ལས་འབྱུང་བའི་ཡེ་ཤེས་དེས་སྐྱེ་འགྲོ་ཡེ་ཤེས་སུ་བསྐྱེད་པས་མ། ཡེ་ཤེས་ཀྱི་སྐལ་པ་སྟོན་པས་སྲིང་མོ། དེའི་ངོ་བོར་འཚེད་པས་གཙོ་བླག་མ། དེའི་ཡོན་ཏན་འཇོ་བས་བུ་མོ། དེའི་སྐལ་བ་སྟོན་པ་ལས་ཆེར་འཕེལ་བས་སྲིང་མོའི་བུ་མོ། སྐྱེ་འགྲོ་བསྐྱེད་པའི་གྲོགས་སུ་གྱུར་པས་ཞང་པོའི་ཆུང་མ་དང་མའི་སྤུན། སྐལ་བ་སྟོན་པའི་ཡེ་ཤེས་ཀྱི་རྒྱུར་གྱུར་པས་སྒྱུག་མོ་དང་སྲིང་མོ། ཡེ་ཤེས་གཡོ་ཞིང་འཕེལ་བས་གར་མ། རྣམ་རྟོག་ཡེ་ཤེས་ལ་མི་རེག་པས་གཡུང་མོ་དང་དམངས་མོ། ཡེ་ཤེས་རྣམ་རྟོག་ལ་ལ་མི་རེག་པས་བྲམ་ཟེ་མོ་དང་རྒྱལ་རིགས་མོ་དང་རྗེ་མོ། རྣམ་རྟོག་གསོད་པས་གདོལ་པ་མོ་སྟེ་བཅུ་དྲུག་ལས་བདུན་ནི། རྒྱུད་ལས། གང་ཕྱིར་སྐྱེ་འགྲོ་བསྐྱེད་པ་ཡི། །སོགས་ཀྱི་ལུང་གིས་ཤེས་ལ། གཞན་རྣམས་ནི་ཡོན་ཏན་གྱི་གཉེན་རྩིས་བྱས་པ་ལས་བྱུང་བ་ཡིན་ནོ། །དེའང་མ་ཞེས་བྱ་བ་ལ་སོགས་པར་འགྱུར་ཏེ། རྩ་རྒྱུད་དང་པོའི་ལྔ་པ་ལས། གང་ཕྱིར་སྐྱེ་འགྲོ་བསྐྱེད་པའི་ཕྱིར། །ཤེས་རབ་མ་ཞེས་བརྗོད་པར་བྱ། །ཞེས་བྱ་བ་ལ་སོགས་པ་གསུངས་སོ། །དོན་གཉིས་པ་ཡེ་ཤེས་ཀྱི་ཕྱག་རྒྱ་ནི། སཾ་པུ་ཊའི་བརྟག་པ་གཉིས་པའི་གཉིས་པ་ལས། བསྟན་པ་ལ་སྨོད་པའི་འཇིགས་པ་དང་། སྐྱེ་བོ་གདུག་པའི་ནང་དུ་ནི་རྣལ་འབྱོར་པ་རང་གི་སེམས་འབའ་ཞིག་ལ་དེར་བསམས་པས་སེམས་ལ་ལྷག་པར་མོས་པ་མངོན་དུ་བྱའོ་ཞེས་གསུངས་སོ། །སྤྱི་དོན་གཉིས་པ་བསྟེན་པའི་ཐབས་ལ་གསུམ། སྦྱོར་བ་འདུ་ཤེས་གསུམ་ལྡན་དང་། དངོས་གཞི་དབབ་གཟུང་གི་ཡེ་ཤེས་ངོས་བཟུང་བ་དང་། རྗེས་བཟློག་ཁྱབ་ཀྱི་ཡེ་ཤེས་མི་ཉམས་པར་བསྲུང་བའོ། །དང་པོ་ནི་བདག་དང་ཕྱག་རྒྱ་ལྷར་བསྐྱེད་པ་ལྷའི་འདུ་ཤེས་དང་། མཁའ་གསང་བྱིན་གྱིས་བརླབས་པ་སྔགས་ཀྱི་འདུ་ཤེས་དང་། ལྷན་སྐྱེས་མངོན་དུ་བྱའོ་སྙམ་པ་ཆོས་ཀྱི་འདུ་ཤེས་ཏེ། ཐབས་འདུ་ཤེས་གསུམ་དང་ལྡན་པས་ཡེ་ཤེས་མངོན་དུ་བྱེད་དེ། རྩ་རྒྱུད་དང་པོའི་ལྔ་པ་ལས། ཐབས་སྒྲུབ་པོ་དང་ཤེས་རབ་རིག་མས་ཆོ་ག་འདུ་ཤེས་གསུམ་ལྡན་ལ་སོགས་པ་ཡིས། །དེ་ཁོ་ན་ཉིད་རིག་པའི་རྣལ་འབྱོར་པས་རྟག་ཏུ་མཆོད། །ཅེས་གསུངས་སོ། །གཉིས་པ་ལ། མཆོག་མཐའ་དགའ་བྲལ་དང་པོར་ནི། །མུན་པ་ལ་ནི་མར་མེ་ལྟར། །དེ་བཞིན་བུས་ཀྱང་ཡིད་ཆེས་ཀྱིས། །ཞེས་གསུངས་སོ། །གསུམ་པ་ལ། དེས་ནི་སྦྱོར་བ་ལས་བྱུང་བའི། །ག་པུར་མཁས་པས་མི་སྤང་སྟེ། །ཞེས་བྱ་བ་ལ་སོགས་པ་གསུངས་ཏེ། ཞིབ་ཏུ་བླ་མས་མན་ངག་ཏུ་སྟོན་པར་འགྱུར་རོ། །སྤྱི་དོན་གསུམ་པ་དེ་ལ་བརྟེན་ནས་སྐྱེས་པའི་ཡེ་ཤེས་ལ་གཉིས་ཏེ། གཞན་གྱི་ལོག་པར་རྟོག་པར་དགག་པ་དང་། རང་གི་འདོད་པ་བརྗོད་པའོ། །དང་པོ་ལ་གཉིས་ཏེ། ལོག་རྟོག་དང་། དེ་དགག་པའོ། །དང་པོ་ལ་གསུམ་སྟེ། གནས་ལ་ལོག་པར་རྟོག་པ་བྱང་ཆུབ་ཀྱི་སེམས་རྡོ་རྗེ་ནོར་བུའི་དཀྱིལ་ན་གནས་པ་ན་ལྷན་ཅིག་སྐྱེས་པའི་ཡེ་ཤེས་སྐྱེ་ཞེས་ཟེར་བ་དང་། རང་གི་ངོ་བོ་ལོག་པར་རྟོག་པ་དབང་གི་ཡེ་ཤེས་ནི་དོན་གྱི་ཡེ་ཤེས་ཡིན་ཏེ། སྤྲིན་བར་གྱི་ཉི་མའམ། ཉི་ཤུ་དགུའི་ཟླ་བ་བཞིན་སྐྱེས་མ་ཐག་འགག་གོ་ཞེས་ཟེར་བ་དང་། གོ་རིམ་ལ་ལོག་པར་རྟོག་པ་ལྷན་སྐྱེས་དགའ་བ་གསུམ་པར་སྐྱེ་སྟེ། བརྟག་པ་དང་པོའི་བཅུ་པ་ལས་ཀྱང་། དེའང་དགའ་བྲལ་དང་པོར་མཚོན། །ཞེས་པ་དང་། ཕྱི་མའི་གཉིས་པ་ལས་ཀྱང་། མཆོག་མཐའ་དགའ་བྲལ་དང་པོར་ནི། །མུན་པ་ལ་ནི་མར་མེ་ལྟར། །ཞེས་པ་དང་། ལྔ་པ་ལས་ཀྱང་། མཆོག་གི་མཐའ་དང་དགའ་བྲལ་དབུས། །སྟོང་དང་སྟོང་མིན་ཧེ་རུ་ཀ། ཞེས་གསུངས་པ་ལ་བརྟེན་ནས་མན་ངག་དང་བྲལ་བ་རྣམས་སྨྲའོ། །སྤྱི་དོན་གཉིས་པ་ལོག་རྟོག་དགག་པའང་གསུམ་སྟེ། དང་པོ་གནས་ཀྱི་ལོག་རྟོག་དགག་པ་ལ་གཉིས། བྱང་སེམས་ནོར་བུར་གནས་པའི་ལོག་རྟོག་དང་། པདྨར་གནས་པའི་ལོག་རྟོག་དགག་པའོ། །དང་པོ་ནི་བྱང་སེམས་རྡོ་རྗེ་བུམ་པའི་དཀྱིལ་དུ་གནས་པ་ལྷན་སྐྱེས་ཡིན་པར་སྨྲ་བ་ནི་མུ་སྟེགས་ཀྱི་འདོད་པ་ཡིན་ཏེ། ལྷ་མོ་ཨུཙྪུ་མའི་རྒྱུད་ཅེས་བྱ་བ་ཕྱི་རོལ་པའི་རྒྱུད་ལས། ཞི་བ་དབང་ཕྱུག་དང་ནུས་པ་ཨུ་མ་མཉམ་པར་སྦྱོར་བའི། །དམ་པའི་བདེ་བ་མཆོག་ཞི་ནུས་གཉིས་སུ་མེད། །ཞི་མིན་ནུས་པ་མ་ཡིན་པས། །རིན་ཆེན་དཀྱིལ་དུ་གང་གནས་པའོ། །ཞེས་གསུངས་སོ། །གཉིས་པ་ནི་ཡང་ཁ་ཅིག་བྱང་ཆུབ་ཀྱི་སེམས་ཉམས་ནས་པདྨར་གནས་པ་ལྷན་སྐྱེས་སུ་སྨྲ་བ་ནི་ཤིན་ཏུ་ཡང་དམན་ཏེ། བྱང་ཆུབ་ཀྱི་སེམས་ནི་ལྷན་སྐྱེས་ཀྱི་རྟེན་ཡིན་པའི་ཕྱིར། དེ་སྤངས་ན་ལྷན་སྐྱེས་མི་སྐྱེ་སྟེ། ཕྱི་མའི་བཞི་པ་ལས། ག་པུར་ཉིད་ནི་བདག་མེད་མ། །བདེ་བ་བདག་མེད་ཚུལ་ཅན་ནོ། །ཞེས་པ་དང་། གསང་བ་གྲུབ་པ་ལས་ཀྱང་། བྱང་ཆུབ་སེམས་ནི་སྤངས་གྱུར་ན། །རྣམ་ཤེས་ཕུང་པོ་བརྒྱལ་འགྱུར་བས། །མ་སྨད་དངོས་གྲུབ་ག་ལ་ཡོད། །ཅེས་གསུངས་པའི་ཕྱིར་རོ། །གཉིས་པ་རང་གི་ངོ་བོ་ལ་ལོག་པར་རྟོག་པ་དགག་པ་ནི། མི་མཁས་པ་ཁ་ཅིག་དབང་གསུམ་པའི་ཡེ་ཤེས་ཉིད་དོན་གྱི་ཡེ་ཤེས་ཡིན་ནོ་ཞེས་འདོད་དོ། །དེ་ལ་འདི་སྐད་དུ་འདྲི་སྟེ། དོན་གྱི་ཡེ་ཤེས་བྱ་བ་སྟེ་རྣམ་པར་རྟོག་པ་ནུབ་ཅིང་བརྗོད་དུ་མེད་པ་ཅུང་ཟད་གསལ་བར་བྱས་པ་མཐོང་བའི་ལམ་གྱིི་ཡེ་ཤེས་དང་འདྲ་བ་དེ་ཡིན་ནམ་མཐོང་བའི་ལམ་ཉིད་སྐད་ཅིག་ཙམ་སྐྱེས་པ་ཡིན། དང་པོ་ལྟར་ན་དོན་གྱི་ཡེ་ཤེས་སུ་འདོད་ཀྱང་དཔེ་རུ་ཐལ་ལོ། །གཉིས་པ་ལྟར་ན་མུ་སྟེགས་བྱེད་ཀྱི་ཡེ་ཤེས་དང་མཐུན་པར་འགྱུར་ཏེ། རིག་བྱེད་ཀྱི་མཐའ་གསང་བར་སྨྲ་བའི་གཞུང་ལས། ནུས་དང་ཕྲད་ཅིང་སྦྱོར་བ་ལས། །ནུས་པ་ལ་ཕན་ཚུན་ཆགས་འགྱུར་མཐར་འགྱུར་བ། །ཚངས་པའི་དེ་ཉིད་ནི་བདེ་བ་གང་ཞི་བ་ཡིན་ལ། །བདེ་བ་དེས་མངོན་སུམ་གྲོལ་བར་འགྱུར། །ནུས་པ་དང་སྦྱོར་བས་བདེ་བ་རྒྱུན་མི་འཆད། །སྡུག་བསྔལ་འབྱུང་བ་མེད་པ་ཡིས། །ཀུན་ཏུ་དགའ་བ་ཚངས་པའི་གཟུགས། །བདེ་བ་དེ་ཉིད་ལ་ཐར་པ་ཞེས་བརྗོད་དོ། །ཞེས་བཤད་པས་སོ། །རྩ་རྒྱུད་དང་པོའི་བརྒྱད་པ་ལས་ཀྱང་། ཀུན་མཁྱེན་ཡེ་ཤེས་དེ་ལྟ་བུ། །ཞེས་དཔེར་བཤད་པ་དང་། ཡང་དེ་ཉིད་ཀྱི་བཅུ་པ་ལས། གང་ཕྱིར་འབྱུང་བ་ཆེ་བདེ་བ། །དེ་ཕྱིར་བདེ་བ་དེ་ཉིད་མིན། །ཞེས་འབྱུང་བ་ལ་བརྟེན་ནས་དངོས་ཀྱི་ཡེ་ཤེས་སྐྱེ་བར་མི་འགྱུར་རོ་ཞེས་བཤད་པས་སོ། །རིག་༼རིགས༷་༽པས་ཀྱང་གནོད་དེ་དོན་གྱི་ཡེ་ཤེས་སྐྱེས་ནས་འགག་པའི་ཕྱིར་མཐོང་བའི་ལམ་གྱི་ཡེ་ཤེས་དང་། སངས་རྒྱས་ཀྱི་ས་ཐོབ་ཀྱང་ཉམས་པར་འགྱུར་རོ། །དེ་འདོད་ན་འབད་པ་དོན་མེད་པར་ཐལ་ལོ། །ཡང་མཐོང་ལམ་ནི་མ་མཐོང་བ་མཐོང་བས་མཐོང་ལམ་ཞེས་བྱ་བ་ཡིན་པས། སྔར་དབང་གི་སྐབས་སུ་མཐོང་ཟིན་པའི་ཕྱིར་མཐོང་ལམ་ཡང་མཐོང་ལམ་མ་ཡིན་པར་ཐལ་ལོ། །ཡང་དེ་དག་གི་སྐྱོན་སྤོང་ཡང་སྐད་ཅིག་ཙམ་མཐོང་ལམ་སྐྱེ་བ་ནི་གསང་སྔགས་ཀྱི་ལུགས་ཡིན་ནོ་ཞེས་སྨྲ་ན། སྐད་ཅིག་མཐོང་བའི་ཚེ་གླིང་བཞི་བྱེ་བ་ཕྲག་བརྒྱ་བསྒུལ་བ་ལ་སོགས་པའི་རྫུ་འཕྲུལ་སྟོན་ཅིག །དེ་ལྟར་མི་ནུས་ཀྱང་མཐོང་ལམ་དུ་འདོད་ན་སྨྱོན་པའི་གཏམ་བཞིན་བཞད་གད་ཀྱི་གནས་སོ། །ལོག་རྟོག་རྣམས་ལ་ནི་འདི་དམན་ནོ། །གསུམ་པ་གོ་རིམ་ལ་ལོག་པར་རྟོག་པ་དགག་པ་ལ་གཉིས། གསུམ་པར་འདོད་པའི་ལུགས་གཉིས་དགག་པ་དང་། བཞི་པར་འདོད་པའི་ལུགས་གཅིག་དགག་པའོ། །དང་པོ་ལ་གཉིས། དབང་བསྐུར་ངན་པའི་ལུགས་དགག་པ་དང་། ཡང་དག་དབང་བསྐུར་མ་ཡིན་པའི་ལུགས་དགག་པའོ། །དང་པོ་ལ་ནི་ངོ་བོའི་ལོག་རྟོག་ཀྱང་ཡོད་ལ། གཉིས་པ་ལ་ནི་གོ་རིམ་གྱི་ལོག་རྟོག་ཡོད་དོ། །དེ་གཉིས་ཕྱོགས་གཅིག་ཏུ་དགག་སྟེ། དེ་ལ་གཉིས། ལུང་གིས་དགག་པ་དང་། རིགས་པས་དགག་པའོ། །དང་པོ་ནི་དང་པོའི་བཅུ་པ་ལས། དང་པོ་དགའ་བ་ཙམ་ཉིད་དེ། །གཉིས་པའི་གྲངས་ལས་མཆོག་དགའ་ཉིད། །གསུམ་པ་ལ་ནི་དགའ་བྲལ་ཏེ། །བཞི་པ་ལྷན་ཅིག་སྐྱེས་པར་བརྗོད། །ཅེས་བྱ་བ་དང་། རྡོ་རྗེ་གུར་ལས། དགའ་བྲལ་དགའ་བ་དག་གི་མཐར་བྱུང་བའི་ལྷན་སྐྱེས་ནི་གཟུང་འཛིན་གྱི། །རྟོག་པའི་དྲྭ་བ་རྣམ་པར་སྤངས། །འཛག་པའི་འགྱུར་བ་མེད་ཅིང་ཕྱིན་ཅི་ལོག་གི་འཁྲུལ་པ་ལས་འདས་ཤིང་། །ཞུ་བདེ་ཐ་མི་དད་པའི་ཀྱེ་ཡི་རྡོ་རྗེ་རྣམ་པར་གསལ། །ཞེས་གསུངས་པ་དང་། དང་པོའི་བརྒྱད་པ་ལས་ཀྱང་། བསྐྱེད་རིམ་གྱི་སྐབས་ཁ་དོག་ནག་པོ་སོགས་ཡན་ལག་དྲུག་བསྒོམ་པའི་རྣལ་འབྱོར་པས་ཡེ་ཤེས་ཉམས་སུ་མྱོང་ལ། །དགའ་བྲལ་གྱི་མཐར་ཡང་དེ་བཞིན་དུ་འབྱུང་བ་ཡིན་ནོ། །ཞེས་གསུངས་སོ། །རིགས་པས་ཀྱང་གནོད་དེ། དེ་ལ་བཅུ་གཅིག་སྟེ། སྐད་ཅིག་མ་བཞི་འཁྲུགས་པ་དང་༡། དེ་བཞིན་དུ་དགའ་བ་དང་༢། འཁོར་ལོ་དང་༣། ཡས་འབབ་དང་༤། དབང་དང་༥། དྲི་མ་དང་༦། ཁམས་གསུམ་གྱི་འདོད་པ་དང་། བསམ་གཏན་དང་༧། ས་ལམ་དང་༨། མས་བརྟན་དང་༩། ཕྱག་རྒྱ་བཞི་དང་༡༠། འབྲས་བུའི་བར་དུ་འཁྲུགས་པའོ། །སྐད་ཅིག་མ་བཞིས་དགའ་བ་བཞི་མཚོན་པར་གསུངས་པ་ལ་སྐད་ཅིག་མ་བཞི་འཁྲུགས་པས་དགའ་བ་བཞིའང་འཁྲུགས་པར་འགྱུར་རོ། །གསུམ་པ་འཁོར་ལོ་བཞིའི་གོ་རིམ་ཡང་འཁྲུགས་པར་འགྱུར་ཏེ། མགྲིན་པའི་འཁོར་ལོ་ལྷན་སྐྱེས་སུ་འགྱུར་ལ། སྤྱི་བོ་དགའ་བྲལ་དུ་འགྱུར་རོ། །བཞི་པ་ཡས་འབབ་ཀྱི་དགའ་བ་བཞིའི་གོ་རིམ་ཡང་འཁྲུགས་ཏེ། སྤྱི་བོ་ནས་མགྲིན་པ་དགའ་བ། སྙིང་ག་མཆོག་དགའ་ནི་མཐུན་ལ། ལྟེ་བ་དགའ་བྲལ་ནི་ལྷན་སྐྱེས་སུ་འགྱུར་ལ། རྡོ་རྗེའི་རྩེ་མོར་ལྷན་སྐྱེས་ནི་དགའ་བྲལ་དུ་འགྱུར་ཏེ། དེའི་རིམ་པ་ཡང་། དཔལ་བདེ་བ་ཆེན་པོ་ཞེས་བྱ་བའི་རྒྱུད་ལས། དགའ་བ་བཞི་ནི་ཁུ་བ་འབབ་པའི་རིམ་པ་སྟེ། །གཙུག་ཏོར་རྩ་འདབ་ནས་སྨིན་ཕྲག་གི་རྩ་འདབ་བར་ཁྱབ་པ་དགའ་བ་མགྲིན་པའི་ཚད་དེ། །མགྲིན་པའི་རྩ་འདབ་ནས་སྙིང་གའི་རྩ་འདབ་བར་མཆོག་དགའ་སྟེ། །དེས་ན་༼དེ༷་ན༷ས་༽སྙིང་ག་ལྟེ་བའི་རྩ་འདབ་བར་ལ་འབབ་པ་དགའ་བ་དང་བྲལ་བར་འགྱུར་ཞིང་དེས་དགའ་བྲལ་རྫོགས་པ་ནི་མ་ཡིན་ཏེ། །སྣ་ཚོགས་རོལ་མོ་སྟེ་དང་པོའི་དགའ་བ་ནས་བཟུང་སྙིང་ག་ཡན་ཆོད་དུ་དགའ་བ་དང་པོ་གསུམ་དང་། དེ་ནས་སྟེ་བ་དང་ལྟེ་བ་ནས། །ཇི་སྲིད་གསང་བའི་པདྨའི་རྡོ་རྗེ་ནོར་བུར་སོན་པ་ཁྱད་དགའ་དང་། །ཇི་སྲིད་གསང་བའི་ནོར་རྩེ་ནས། །ཕྱིར་ལ་མ་འཕྲོས་བར་དུ་ལྷན་ཅིག་སྐྱེས་པའི་དགའ་བའི་ཡེ་ཤེས་སོ། །ཞེས་གསུངས་ཏེ་༼སོ༷། ༽། ལྔ་པ་ཡང་དབང་བཞིའི་གོ་རིམ་ཡང་འཁྲུགས་པར་འགྱུར་ཏེ། ཕྱི་མའི་གསུམ་པ་ལས། དབང་ནི་བཞི་ཡི་གྲངས་ཀྱིས་ནི། །དགའ་བ་ལ་སོགས་རིམ་ཤེས་བྱ། །ཞེས་གསུངས་པས་ན། བུམ་དབང་གིས་དགའ་བ། གསང་དབང་གིས་མཆོག་དགའ། ཤེས་རབ་ཡེ་ཤེས་ཀྱིས་དགའ་བྲལ་མཚོན་ལ། བཞི་པས་ལྷན་སྐྱེས་མཚོན་པ་ཡིན་པ་ལ། བཞི་པས་དགའ་བྲལ་མཚོན་པར་འགྱུར་རོ། །དེ་འདོད་དོ་ཞེ་ན། དྲུག་པ་དྲི་མ་འཁྲུད་པའི་གོ་རིམ་ཡང་འཁྲུགས་པར་འགྱུར་ཏེ། ཕྱི་མའི་གསུམ་པ་ཉིད་ལས། དགོད་པ་དག་པ་སློབ་དཔོན་ཉིད། །ལྟ་བ་གསང་བ་དེ་བཞིན་ནོ། །ལག་བཅངས་ལ་ནི་ཤེས་རབ་ཉིད། །གཉིས་གཉིས་འཁྱུད་པ་དེ་ཉིད་དང་། །ཞེས་གསུངས་པས་ན་དབང་བཞི་དང་། དགའ་བ་བཞི་གོ་རིམ་མཐུན་པའི་ཕྱིར་ཤེས་རབ་ཡེ་ཤེས་ཀྱིས་ལག་བཅངས་ཀྱི་འདོད་ཆགས་བྲལ་བར་བྱེད་པ་བཞིན་ལྷན་སྐྱེས་ཀྱིས་ཀྱང་ལག་བཅངས་ཀྱི་འདོད་ཆགས་བྲལ་བར་བྱེད་ལ། དབང་བཞི་པས་འཁྱུད་པའི་དྲི་མ་བྲལ་བ་བཞིན་དགའ་བྲལ་གྱིས་ཀྱང་འཁྱུད་པའི་དྲི་མ་བྲལ་བར་འགྱུར་རོ། །དེའང་འདོད་དོ་ཞེ་ན། ལྷན་ཅིག་སྐྱེས་པས་དགའ་བྲལ་ཉིད་བཟང་བར་འགྱུར་ཏེ། དྲི་མ་ཆེན་པོ་འདག་པའི་ཕྱིར་རོ། །བདུན་པ་ཁམས་གསུམ་གྱི་འདོད་པ་དང་བསམ་གཏན་འཁྲུགས་པ་ནི། ཁམས་གསུམ་གྱི་འདོད་པ་དང་བསམ་གཏན་བཞི་པ་རྣམས་བཟང་ཞིང་། དེ་ལ་བརྟེན་ནས་འཁོར་བ་སྤོང་སྟེ་ཞིབ་ཏུ་བླ་མས་བསྟན་པར་བྱའོ། །ས་ལམ་དང་། མས་བརྟན་དང་། ཕྱག་རྒྱ་དང་། འབྲས་བུ་རྣམས་ཀྱང་མཐར་ཐུག་དང་བཞི་པ་རྣམས་བཟང་བ་ཡིན་ཏེ། ཞིབ་ཏུ་བརྗོད་པར་བྱའོ། །གཉིས་པ་ལྷན་སྐྱེས་བཞི་པར་འདོད་ཀྱང་ནོར་བ་ནི། བྱང་ཆུབ་ཀྱི་སེམས་པདྨར་བབས་ནས་དེའི་རྗེས་ལ་ཚུར་ཕྲོགས་པ་ལས་ཡེ་ཤེས་སྐྱེའོ་ཞེས་ཟེར་ན་གཞུང་དང་འགལ་ཏེ། ཧེ་བཛྲ་ལས། མཆོག་མཐའ་དགའ་བྲལ་དང་པོར་ནི། །ཞེས་པ་དང་། བདེ་བ་ཆེན་པོའི་རྒྱུད་ལས་ཀྱང་། ཇི་སྲིད་གསང་བའི་ནོར་རྩེ་ནས། །མ་འཕྲོས་བར་ལ་ལྷན་ཅིག་སྐྱེས། །ཞེས་གསུངས་སོ། །དེ་དག་ཀྱང་ཞིབ་ཏུ་བླ་མས་བསྟན་པར་བྱའོ། །དེ་དག་གི་བརྗོད་པ་མང་དུ་ཡོད་མོད་ཀྱང་གཞུང་མང་བས་འཇིགས་པས་མ་སྤྲོས་སོ། །ད་ནི་རང་གི་འདོད་པ་བརྗོད་པར་བྱ་སྟེ། དེ་ལ་གཉིས། འདོད་པ་དངོས་དང་། དེ་ལ་རྩོད་པ་སྤང་བའོ། །དང་པོ་ལ་གསུམ། ཡང་དག་པའི་གནས་དང་། རང་གི་ངོ་བོ་ཡང་དག་པ་དང་། གོ་རིམ་ཡང་དག་པའོ། །དང་པོ་ནི། གནས་ཀྱི་དབང་དུ་བྱས་ན་ཐབས་ཀྱི་རིགས་ཀྱི་བདག་པོའི་ཁ་དང་། ཤེས་རབ་ཀྱི་རྩ་མཛེས་པའི་སྣ་རྩེར་བྱང་ཆུབ་ཀྱི་སེམས་གནས་ཏེ། མ་ཉམས་པའི་དུས་དེར་སྐྱེ་བར་འགྱུར་ཏེ། རྩ་རྒྱུད་ཕྱི་མའི་གཉིས་པ་ལས་ཀྱང་། མཆོག་མཐའ་དགའ་བྲལ་དང་པོར་ནི། །མུན་པ་ལ་ནི་མར་མེ་ལྟར། །ཞེས་བྱ་བ་དང་། བདེ་བ་ཆེན་པོའི་རྒྱུད་ལས་ཀྱང་། ཆགས་པ་ཐིག་ལེ་བཙུག་ཏོར་ནས་ནོར་བུའི་བར་འཕེལ་བ་དཀར་ཕྱོགས་དང་ཆགས་བྲལ་ཐིག་ལེ་ནོར་བུ་ལས་ཕྱིར་ཟག་པ་ནག་ཕྱོགས་ཀྱི་རང་བཞིན་ཉམས་པ། །རྡོ་རྗེའི་རྩེ་མོར་རབ་ཏུ་རྒྱས་པར་འགྱུར་བའི། །བདེ་ཆེན་རང་བཞིན་འདི་ཉིད་ནི། །དགའ་བཟང་རྒྱལ་སྟོང་རྫོགས་པ་རྣམས་ཀྱི་ཕྱི་མ་རྫོགས་པའི་སྒྲ་ཡིས་བསྟན་པ་ཡིན། །ཞེས་གསུངས་སོ། །གཉིས་པ་རང་གི་ངོ་བོ་ནི་མཚོན་བྱེད་དཔེའི་ཡེ་ཤེས་ཞེས་བྱ་བ་བཞིན་གྱི་དཀྱིལ་འཁོར་བལྟ་བར་འདོད་པ་ལ་མེ་ལོང་གི་གཟུགས་བརྙན་ནམ། བདུད་རྩི་དོན་དུ་གཉེར་བ་ལ་སྦྲང་རྩི་ལྕེ་ལ་བཞག་པ་ལྟ་བུ་སྟེ། ཡང་དག་པར་རྫོགས་པའི་སངས་རྒྱས་ཀྱི་ཆོས་ཉིད་དམ་མཐོང་ལམ་གྱི་ཡེ་ཤེས་དེ་ཉིད་ནི་མ་ཡིན་ཞིང་ཡེ་ཤེས་དེ་མཚོན་དུ་རུང་བ་སྤྲོས་པའི་མཐའ་ཐམས་ཅད་དང་བྲལ་བ་སྐྱེ་བ་ཡིན་ཏེ། རྩ་བའི་རྒྱུད་ལས་ཀྱང་། ཀུན་མཁྱེན་ཡེ་ཤེས་དེ་ལྟ་བུ། །ཞེས་གསུངས་ལ། སློབ་དཔོན་ཀླུ་སྒྲུབ་ཀྱིས་ཕྱག་རྒྱ་བཞི་པ་ལས་ཀྱང་། ལས་ཀྱི་ཕྱག་རྒྱ་ལ་བརྟེན་ནས་རྒྱུ་མཐུན་པའི་འབྲས་བུ་སྐྱེ་བར་བྱེད་དོ། །འདྲ་བར་འབྱུང་བས་རྒྱུ་མཐུན་པའོ། །ཇི་ལྟར་མེ་ལོང་ལ་བརྟེན་ནས་བཞིན་གྱི་གཟུགས་བརྙན་འབྱུང་བ་དེ་ནི་དེ་བཞིན་དུ་མི་འབྱུང་བར་མི་འགྱུར་རོ། །སྔོན་དུ་ཡང་མ་གྲུབ་ལ་ད་ལྟར་ཡང་མ་གྲུབ་པའི་ཕྱིར། དེ་ལྟར་བཞིན་གྱི་གཟུགས་བརྙན་ནི་འདྲ་བ་ཙམ་དུ་རྟོགས་པར་བྱའོ། །དེ་ལྟར་ན་འཇིག་རྟེན་པ་རྣམས་རང་གི་བཞིན་མཐོང་བ་ཞེས་འཁྲུལ་པས་དགའ་བར་འགྱུར་རོ། །དེ་བཞིན་དུ་སློབ་དཔོན་དམན་པས་སློབ་མ་དམན་པ་རྣམས་ཤེས་རབ་ཡེ་ཤེས་བསྒྲུབས་ནས་དེ་ཁོ་ན་ཉམས་སུ་མྱོང་ངོ་ཞེས་དགའ་བ་སྐྱེ་བར་འགྱུར་ཏེ། དེ་ལ་དགའ་ཞིང་མགུ་བས་ཆོས་ཀྱི་ཕྱག་རྒྱའི་གཏམ་ཡང་མི་ཤེས་སོ་ཞེས་གསུངས་སོ། །འདི་ལ་རྨོངས་པ་དག་འདི་སྐད་དུ་སློབ་དཔོན་དག་གིས་གཉིད་དང་འཁྲིག་དུས་སྐད་ཅིག་མ་ཞེས་གསུངས་པ་སྟེ། རྣམ་རྟོག་ཅུང་ཟད་ནུབ་པ་ཙམ་ལ་དགོངས་པ་ལ། དེ་ལ་ལོག་པར་རྟོག་པས་གཉིད་མཐུག་པོ་དང་འཁྲིག་པའི་དུས་སུ་ཡེ་ཤེས་སྐད་ཅིག་ཙམ་སྐྱེའོ་ཞེས་སྨྲ་སྟེ། དེ་ལྟར་ན་སེམས་ཅན་དང་འགོག་པའི་བསམ་གཏན་པ་རྣམས་ཀྱིས་ཀྱང་སངས་རྒྱས་འབད་པ་མེད་པར་ཐོབ་པར་འགྱུར་བ་ལ་སོགས་པའི་སྐྱོན་དང་། སློབ་དཔོན་ཨིནྡྲ་བྷཱུ་ཏིས་ཀྱང་ཡེ་ཤེས་གྲུབ་པ་ལས། དབང་པོ་གཉིས་འབྱུང་བདེ་བ་ནི། །དེ་ཉིད་ཡིན་ཞེས་སྐྱེ་ངན་སྨྲའི། །དེ་ནི་བདེ་བ་ཆེ་ཡིན་ཞེས། །རྒྱལ་བ་མཆོག་གིས་མ་གསུངས་སོ། །ཞེས་བྱ་བ་འཁྲིག་པའི་ཡེ་ཤེས་བཀག་པ་དང་། གཉིད་ཀྱི་ཡེ་ཤེས་དང་རྨོངས་པའི་བསྒོམ་པ་ཡེ་ཤེས་སུ་འདོད་པ་དགག་པའི་ཕྱིར། དེ་ཉིད་ལས། དེས་ན་སེམས་མེད་པའི་གནས་སྐབས་ལ་དེ་ཁོ་ན་ཉིད་ནི། །དེ་ནི་རབ་ཏུ་དགག་པར་བྱ། །ཤིན་ཏུ་རྨོངས་པ་ཅི་ཡང་མི་དྲན་པའི་གནས་སྐབས་ཡེ་ཤེས་སུ། །རྣལ་འབྱོར་པ་ནི་ལ་ལ་འདོད། །རྒྱུ་རྨོངས་པ་བསྒོམས་པས་འབྲས་བུ་རྨོངས་པ་ནི། །གང་ཟག་རྨོངས་པ་རྣམས་ཀྱིས་འཐོབ་པར་འགྱུར། །ཐམས་ཅད་རྒྱུ་དང་མཚུངས་པ་ཡི། །འབྲས་བུ་འཇིག་རྟེན་ལ་སྤྱོད་དེ། །ཀོ་ཏྲ་པ་ལས་འབྲས་སྐྱེ་བ། །གང་ནའང་ཡོད་པ་མ་ཡིན་ནོ། །ཞེས་བྱ་བ་ལ་སོགས་པ་རྒྱས་པར་གསུངས་སོ། །སློབ་དཔོན་ཞི་བ་འཚོས་ཀྱང་དེ་ཁོ་ན་ཉིད་གྲུབ་པ་ལས། ཤར་ཆེན་གྱིས། འདི་ལྷ་྄ཐམས་ཅད་ཡང་དག་པར་འདུས་པའི་རྒྱུད་ཀྱི་ལུང་ཡིན་ཟེར་བའང་ཡོད་གསུངས། གཉིད་མཐུག་ལོག་གནས་ལྟ་བུར་ནི། །རྣམ་རྟོག་མེད་ཅིང་བདག་མེད་པ། །མཚན་འཛིན་གྱི་འདུ་ཤེས་མེད་ཅིང་རྟོག་པ་དང་སྤྱོད་༼དཔྱོ༷ད་༽པ་མེད། །གཟུགས་མེད་འདུས་བྱས་ཀྱི་ཡོན་ཏན་གང་ཡང་མེད། །ཅེས་བྱ་བ་ནས། བདག་ཉིད་ཀྱི་ཡོན་ཏན་ཐམས་ཅད་འཕྲོག་པའི་རྐུན་པོ་ནི། །དེ་ཡིས་སྡིག་པ་ཅི་མ་བྱས། །ཞེས་བྱ་བ་ལ་སོགས་པ་མྱ་ངན་ལས་འདས་པ་ལས་འཕྲོས་ནས་གསུངས་སོ། །རྒྱས་པར་གོང་དུ་བཀག་ཟིན་ཏོ། །གསུམ་པ་གོ་རིམ་གྱི་དབང་དུ་བྱས་ན་ལྷན་ཅིག་སྐྱེས་པ་ནི་བཞི་པར་སྐྱེ་སྟེ། དེ་ལ་ཐོག་མར་སྐད་ཅིག་མའི་གོ་རིམ་གྱིས་དགའ་བའི་གོ་རིམ་ཤེས་པར་བྱ་སྟེ། ཕྱི་མའི་གསུམ་པ་ལས། དུས་སྐད་ཅིག་མ་བཞིའི་དབྱེ་བས་ཕྱེ་བ་ཉིད་ཀྱིས། །དུས་ཅན་དགའ་བ་བཞིིའི་ཉམས་མྱོང་དུས་དེ་ལས་སྐྱེ་བར་འགྱུར་བས། །དུས་སྐད་ཅིག་བཞི་ཤེས་ན་བདེ་བ་ལ་དགའ་བ་ཤེས་པར་འགྱུར། །དེའི་གནས་ཨེ་བྃ་རྣམ་པར་རབ་ཏུ་གནས། །ཞེས་སོ། །སྐད་ཅིག་མ་ཉིད་གང་ཡིན་ཞེ་ན། དེ་ཉིད་ལས། སྣ་ཚོགས་དང་ནི་རྣམ་སྨིན་དང་། །རྣམ་ཉེད་དེ་བཞིན་མཚན་ཉིད་བྲལ། །སྐད་ཅིག་བཞི་ནི་རབ་ཤེས་པ། །དེ་ལྟར་རྣལ་འབྱོར་པས་ཤེས་འགྱུར། །ཞེས་སོ། །སྣ་ཚོགས་ལ་སོགས་པ་གང་ཡིན་ཇི་ལྟ་བུ་ཞེ་ན། དེ་ཉིད་ལས། འཁྱུད་དང་འོ་བྱེད་ལ་སོགས་པ། །སྣ་ཚོགས་རྣམ་པ་སྣ་ཚོགས་བཤད། །རྣམ་པར་སྨིན་པ་དེ་ལས་བཟློག་པ་སྟེ་རྩོལ་བ་ཆུང་ཞིང་བདེ་བ་ཆེའོ། །འདི་ལ་བདེ་བའི་ཚོར་བ་ཡེ་ཤེས་ཀྱིས་ཟ་ཞིང་མྱོང་བ་ཉིད། །བདག་གི་བདེ་བ་ཟོས་ཤིང་མྱོང་ངོ་ཞེས་འཇིག་རྟེན་པ་ཡིས། །གྲོས་བྱེད་པ་ལྟར་རྟོག་ཅིང་དཔྱོད་པ་ནི་རྣམ་པར་ཉེད་པར་བརྗོད། །མཚན་ཉིད་དང་བྲལ་བ་ནི་གོང་མ་གསུམ་ལས་གཞན་པ། །ཆགས་པ་དང་ཆགས་བྲལ་གྱི་མཐར་རྣམ་ར་སྤངས། །ཞེས་སོ། །སྐད་ཅིག་མ་བཞི་དང་དགའ་བ་བཞིའི་དུས་ནི། སྣ་ཚོགས་དང་པོ་དགའ་བ་ཉིད། །རྣམ་སྨིན་ལ་ནི་མཆོག་དགའ་ཉིད། །རྣམ་ཉེད་དགའ་བྲལ་དགའ་བ་ཉིད། །མཚན་བྲལ་ལྷན་ཅིག་སྐྱེས་པ་ཉིད། །ཅེས་སོ། །དེ་ལྟར་བརྗོད་ཀྱང་ལུང་ལས། ལོག་པར་རྟོག་པའི་སྐྱེ་བོ་དག་ནི། བདག་གི་བདེ་བ་ཟོས་པ་ཡིས། །གྲོས་ནི་རྣམ་པར་ཉེད་པར་བརྗོད། །ཅེས་བྱ་བ་ཉིད་ཀྱིས་རྣམ་པར་ཉེད་པ་བཞི་པར་འབྱུང་ངོ་ཞེས་ཟེར་ན། དེ་ནི་མ་ཡིན་ཏེ། ལུང་གོང་མ་ཉིད་བརྟན་པར་བྱ་བའི་ཕྱིར་ཡེ་ཤེས་ཐིག་ལེའི་རྒྱུད་ལས། འོ་དང་འཁྱུད་པ་ལ་སོགས་ཀྱི། །སྣ་ཚོགས་དགའ་བ་སྣ་ཚོགས་ཉིད། །བྷ་གར་ལིངྒ་རབ་སྦྱོར་བས། །རྣམ་པར་སྨིན་པ་ཡེ་ཤེས་མཆོག །ཕྱག་རྒྱ་ཉིད་ལ་རྣམ་པར་ཉེད། །མཚན་ཉིད་བྲལ་བས་ངེས་མཚོན་བྱ། །ཞེས་གསུངས་པས་བསྲུབ་པ་དང་སྲུབ་པའི་སྦྱོར་བས་ཕྱག་རྒྱ་ཉེད་པ་ནི་རྣམ་པར་ཉེད་པ་ཞེས་བྱ་བ་གསུམ་པར་འབྱུང་བར་རིགས་སོ། །ལུང་གཞན་དང་པོ་དགའ་བ་ཙམ་ཉིད་དེ། ཞེས་བྱ་བ་ལ་སོགས་པ་སྔར་བརྗོད་པའི་ལུང་ཡང་འདིར་སྦྱར་བར་བྱའོ། །གཉིས་པ་རྩོད་སྤང་ནི་གཉིས། དགའ་བྲལ་དང་དགའ་བྲལ་གྱི་དགའ་བ་མི་འཁྲུལ་བར་བྱ་བ་དང་། མཆོག་དགའ་དང་མཆོག་དགའི་དགའ་བ་མི་འཁྲུལ་བར་བྱ་བའོ། །དེ་གཉིས་ཀྱང་ཕྱོགས་གཅིག་ཏུ་ཞིབ་ཏུ་བརྗོད་ན། དེ་ལྟར་ན་མཆོག་མཐའ་དགའ་བྲལ་ཞེས་བྱ་བའི་ལུང་ཇི་ལྟར་དྲང་ཞེ་ན། མཆོག་དགའ་ལ་ནི་གཉིས་ཡོད་དེ། རྣམ་པར་སྨིན་པའི་དུས་ཀྱི་མཆོག་དགའ་དང་། ལྷན་སྐྱེས་ཉིད་ལ་མཆོག་དགར་བཤད་པའོ། །དང་པོ་ལ་ཅིའི་ཕྱིར་མཆོག་དགའ་ཞེས་བྱ་ཞེ་ན། རྡོ་རྗེ་དང་པདྨ་སྦྱར་བས་མཆོག་ཏུ་གྱུར་པའི་དགའ་བ་སྐྱེས་པའི་ཕྱིར་མཆོག་དགའོ། །ལྷན་སྐྱེས་ནི་དགའ་བ་གསུམ་ལས་མཆོག་ཏུ་གྱུར་པའི་ཕྱིར་མཆོག་དགའ་སྟེ། རྩ་རྒྱུད་དང་པོའི་བཅུ་པ་ལས། དགའ་བ་གསུམ་ལས་མཆོག་ཏུ་གྱུར་པ་ལྷན་སྐྱེས་ཀྱི་དགར་བསྒོམ་པར་བྱ་བ་ལམ་མེད་ཅིང་སྒོམ་པ་པོ་གང་ཟག་ཡང་མེད་ལ། །དེའི་ལུས་ཀྱང་མེད་ཅིང་གཟུང་བ་མེད་དང་འཛིན་པའང་མེད་མདོར་བསྟན་ནས། །ལུས་མེད་པས་ན་ཤ་དང་ཁྲག་ཀྱང་མེད་ཅིང་བཤང་དང་གཅི་བ་མེད། །གཟུང་འཛིན་མེད་པས་སྐྱུག་བྲོ་འཇིག་རྟེན་པའི་ཚུལ་ལུགས་ལ་རྨོངས་མེད་གཙང་སྦྲ་མེད་༼མཆོ༷ད་༽ཕྱིར་ཐོགས་མེད་དང་། །ཆགས་མེད་སྡང་བ་མེད་དང་རྨོངས་མེད་ཕྲག་དོག་མེད། །སེར་སྣ་མེད་ཅིང་ང་རྒྱལ་མེད་དང་མཐོང་བྱ་སྟེ་ཐོབ་བྱའི་འབྲས་བུ་མེད། །ལམ་མེད་པས་བསྒོམ་དང་སྒོམ་པ་པོ་སེམས་ཀྱང་མེད་ཅིང་བཤེས་དང་དགྲ་མེད་ཅིང་། །མདོར་ན་རློམ་སེམས་མེད་པའི་ལྷན་ཅིག་སྐྱེས་པའི་ཡེ་ཤེས་དེ་ཉིད་ཀུན་རྫོབ་ཏུ་སྣ་ཚོགས་སུ་སྣང་བས་ཟུང་འཇུག་ཉིད་དོ། །ཅེས་གསུངས་ཏེ། ཐོག་མར་མཆོག་དགའ་ཞེས་པ་དང་། མཇུག་ཏུ། ལྷན་ཅིག་སྐྱེས་པ་སྣ་ཚོགས་ཉིད། །ཅེས་ལྷན་སྐྱེས་ཉིད་ལ་མཆོག་དགར་གསུངས་པས་སོ། །གའ་བྲལ་ལ་ཡང་ཉིས་ཡོད་དེ། དགའ་བྲལ་གྱི་དགའ་བ་དང་། དགའ་བ་དང་བྲལ་བའི་དགའ་བྲལ་ལོ། །དང་པོ་ནི་སྐད་ཅིག་གསུམ་པ་རྣམ་པར་ཉེད་པའི་སྐབས་སུ་བྱུང་བའི་ཕྱི་བྱད་གཟུགས་སུ་ཞེན་པའི་དགའ་བ་དང་བྲལ་ཞིང་། རྣམ་པར་རྟོག་པ་རགས་རིམ་ནུབ་པས་དགའ་བྲལ་གྱི་དགའ་བའོ། །དགའ་བྲལ་ནི་བྱང་ཆུབ་ཀྱི་སེམས་ལུས་ལ་ཉམས་པ་སྟེ། དགའ་བའི་རྒྱུ་དང་བྲལ་བའི་ཕྱིར་རོ། །འདི་ལ་ཁ་ཅིག་དགའ་བྲལ་གྱི་དགའ་བར་འདོད་ན་ཤིན་ཏུའང་འཁྲུལ་ཏེ། འདི་ནི་གནས་སྐབས་ཐམས་ཅད་དུ་སྤང་བར་བྱ་བ་ཉིད་ཡིན་ཏེ། ག་པུར་ཉིད་ནི་བདག་མེད་མ། །བདེ་བ་བདག་མེད་ཚུལ་ཅན་ཉིད། །ཅེས་ག་པུར་སྤངས་ན་བདག་མེད་མ་སྤངས་པར་འགྱུར་བའི་ཕྱིར་མི་སྤང་བ་དང་། བདེ་བ་ཆེན་པོའི་རྒྱུད་ལས་ཀྱང་། འཕྲོས་པ་ལས་ནི་ཆགས་པའི་བདེ་བ་དང་བྲལ་བར་འགྱུར། །སྡུག་བསྔལ་བས་ནི་ཁམས་ཟད་དེ། །ཁམས་ཟད་པས་ནི་འཆི་བར་འགྱུར། །ཤི་ནས་དེ་དག་འགྲོ་བ་གཞན་དུ་སྐྱེ་བར་འགྱུར། །སྲིད་པར་འཆི་འཕོ་ཞིང་སྐྱེ་བ་སྟེ། །དེ་ཕྱིར་འབད་པ་ཐམས་ཅད་ཀྱིས། །ཆགས་པས་དོར་བ་རྣམ་པར་སྤངས། །ཞེས་པ་དང་། གསང་བ་གྲུབ་པ་ལས་ཀྱང་། དངོས་གྲུབ་ཀུན་གྱི་རྟེན་གྱུར་པའི། །བྱང་ཆུབ་སེམས་ནི་སྤངས་གྱུར་ན། །རྣམ་ཤེས་ཕུང་པོ་བརྒྱལ་འགྱུར་བས། །མ་སྨད་དངོས་གྲུབ་ག་ལ་ཡོད། །ཅེས་གསུངས་པས་ན། བྱང་ཆུབ་ཀྱི་སེམས་སྤངས་པ་ནི་རྣམ་པ་ཐམས་ཅད་དུ་སྤང་བྱ་ཉིད་ཡིན་པ་དང་། དེ་ལ་དགའ་བྲལ་གྱི་དགའ་བར་བྱས་ན། དགའ་བ་དང་བྲལ་བར་ནི་འགྱུར་གྱ།ིདགའ་བ་ན་མ་ིཡན་ིཏེ། དགའ་བའི་རྒྱུ་སྤངས་པའི་ཕྱིར་རོ། །དགའ་བ་བཞིར་ཡང་མི་འགྱུར་ཏེ་ཐ་མ་དགའ་བ་དང་བྲལ་བའི་ཕྱིར་རོ། །ཡང་དགའ་བ་གསུམ་པོ་ཁོ་ན་ལས་མེད་དོ་ཞེ་ན། བཅོམ་ལྡན་འདས་ཀྱིས་དགའ་བ་བཞིར་གསུངས་པ་ལ་དོན་མེད་དོ། །དེ་བས་ན་མཆོག་མཐའ་ཞེས་བྱ་བ་ལ་སོགས་པ་ནི་དགའ་བ་གསུམ་ལས་མཆོག་ཏུ་གྱུར་པའི་ལྷན་སྐྱེས་དེ་ལ་ཡང་ནང་གི་དབྱེ་བས་དགའ་བ་བཞི་ཡོད་པ་ལས་ལྷན་སྐྱེས་ཀྱི་ལྷན་སྐྱེས་ཞེས་སོ། །དགའ་བྲལ་གྱི་དང་པོ་ཞེས་བྱ་བ་ནི་ཐིག་ལེ་དབང་གི་གནས་སུ་མ་ལྟུང་བའི་སྔོན་དུ་ལྷན་སྐྱེས་ཀྱི་ལྷན་སྐྱེས་དེ་སྐྱེ་བར་འགྱུར་རོ་ཞེས་བྱ་བའི་དོན་ཏོ། །ལུང་དང་རིགས་པ་གཞན་ནི་གཞུང་མང་དུ་དོགས་པས་མ་བྲིས་སོ། །དམིགས་པ་དང་བཅས་པའི་རང་བྱིན་བརླབ་དང་དཀྱིལ་འཁོར་འཁོར་ལོའི་ཐབས་བསྟན་ཟིན་ཏོ། །དམིགས་མེད་བསྒོམ་པ་ལ་གཉིས། གཉིས་ཀའི་དམིགས་པ་ལ་བརྟེན་ནས་སྐྱེས་པའི་ཡེ་ཤེས་བསྐྱང་ཚུལ་དང་། རང་བྱིན་བརླབ་ཀྱི་དམིགས་མེད་བྱེ་བྲག་ཏུ་བསྐྱང་ཚུལ་ལོ། །དང་པོ་ནི་དམིགས་པ་དང་བཅས་པ་དེ་དག་ལ་བརྟེན་ནས་དམིགས་པ་མེད་པ་སྐྱེའི། དམིགས་པ་མེད་པ་ཐོག་མ་ཉིད་ནས་བསྒོམ་པ་ནི་མ་ཡིན་ཏེ། རྟེན་དང་བརྟེན་པ་ཡིན་པའི་ཕྱིར་རོ། །དེ་སྐད་དུ། མདོ་སྡེ་རྒྱན་ལས་ཀྱང་། དམིགས་པ་ལ་ནི་བརྟེན་ནས་སུ། །མི་དམིགས་པ་ནི་རབ་ཏུ་སྐྱེ། །མི་དམིགས་པ་ལ་བརྟེན་ནས་སུ། །མི་དམིགས་པ་ནི་རབ་ཏུ་སྐྱེ། །ཞེས་གསུངས་ལ། ཀོ་ཏ་ལི་པས་ཀྱང་། མིག་གི་རྣམ་ཤེས་རྟོགས་པ་ཡིས། །གཉིས་མེད་ཡེ་ཤེས་ངོ་མཚར་ཆེ། །ཞེས་བྱ་བ་ལ་སོགས་པ་དང་། གཉིས་པོ་དག་གི་༼ནི༷་༽སྤྱོད་པ་ཡིས། །གཉིས་མེད་ཡེ་ཤེས་འབར་ར་འགྱུར། །ཞེས་གསུངས་སོ། །དེ་ལ་དམིགས་པ་དང་བཅས་པའི་རང་བྱིན་བརླབ་བམ་དཀྱིལ་འཁོར་འཁོར་ལོའི་ཐབས་ལ་བརྟེན་ནས་ཡེ་ཤེས་ཅུང་ཟད་ཙམ་སྐྱེས་པ་ལ་བརྟེན་ནས་དམིགས་པ་མེད་པ་བསྒོམ་པར་བྱ་སྟེ། རྒྱུ་དང་མ་དང་འབྲས་བུ་ཐམས་ཅད་བརྗོད་དུ་མེད་པའི་རང་བཞིན་ཡིན་ནོ་ཞེས་བྱ་བར་ཤེས་པར་བྱ་སྟེ། རྩ་རྒྱུད་དང་པོའི་ལྔ་པ་ལས། སྒོམ་པ་པོ་མེད་བསྒོམ་པ་མེད། །ལྷ་མེད་སྔགས་ཀྱང་ཡོད་མ་ཡིན། །སྤྲོས་པ་མེད་པའི་རང་བཞིན་ལས། །ལྷ་དང་སྔགས་ནི་ཡང་དག་གནས། །ཞེས་སོ། །བརྗོད་དུ་མེད་པའི་རང་བཞིན་ཡིན་ན་སྣ་ཚོགས་སུ་སྣང་བ་ཇི་ལྟར་ཡིན་སྙམ་ན། ཀུན་རྫོབ་ཙམ་དུའོ། །ཀུན་རྫོབ་ཙམ་དུ་སྣང་ཡང་དེ་རྣམས་ཐམས་ཅད་ལྷན་ཅིག་སྐྱེས་པའི་ཡེ་ཤེས་ཡིན་ནོ་ཞེས་ཤེས་པར་བྱ་སྟེ། རྩ་རྒྱུད་ཕྱི་མའི་བཞི་པ་ལས། ཉམས་མྱོང་ཡེ་ཤེས་དེ་ཉིད་ལྷན་ཅིག་སྐྱེས་པའི་གཟུགས་ཏེ་རང་བཞིན་དང་། །བདེ་བ་བསྐྱེད་པས་བདེ་བ་ཆེན་པོའི་རྣལ་འབྱོར་མ། །དེ་ཉིད་ལ་སྙིང་པོ་ལེན་ཅིང་རྟོག་པ་གཅོད་པས་དཀྱིལ་འཁོར་འཁོར་ལོ་དང་། །དཔེའི་ཡེ་ཤེས་ལྔ་ཡི་རང་བཞིན་ཅན་ཡིན་ནོ། །ཞེས་བྱ་བ་དང་། སཾ་པུ་ཊའི་བརྟག་པ་དྲུག་པ་ལས་ཀྱང་། ཡེ་ཤེས་དེ་ནི་རྡོ་རྗེ་སེམས་དཔའ་ཞེས་བྱར་བཤད། །བདེ་བ་དམ་པ་རུ་ནི་བརྗོད། །རང་འབྱུང་ངོ་བོ་ཉིད་འདི་ནི། །ཆོས་ཀྱི་སྐུར་ནི་རབ་ཏུ་གྲགས། །ཞེས་གསུངས་སོ། །དེ་ལྟར་ཤེས་པར་བྱས་ནས་ཆོས་བདག་མེད་པ་བསྒོམ་པར་བྱ་སྟེ། རྩ་རྒྱུད་ལེའུ་བརྒྱད་པ་ལས། གང་ཕྱིར་ཡིད་བདེན་ཞེན་དང་བཅས་ཏེ་ཀྱིས་མི་སྒོམ་པར། །འགྲོ་བ་སྟེ་དངོས་པོ་ཐམས་ཅད་ལྟ་བས་ཟིན་པར་བྱས་ནས་བསྒོམ་པར་བྱ། །ཐམས་ཅད་ཀྱི་ཆོས་ཉིད་ནི་ཡོངས་སུ་ཤེས་ན། །འཛིན་པ་དང་བཅས་པས་སྒོམ་པ་ཉིད་ནི་གནས་ལུགས་ཀྱི་དོན་སྒོམ་པ་མིན། །ཞེས་གསུངས་སོ། །དེ་ལ་གང་ཕྱིར་ཡིད་ཀྱིས་མི་བསྒོམ་པ་ཇི་ལྟར་སྒོམ་སྙམ་ན། མཐའ་ཐམས་ཅད་དང་བྲལ་བ་ཡིན་ཏེ། སཾ་པུ་ཊའི་བརྟག་པ་གཉིས་པའི་གཉིས་པ་ལས། སྟོང་པ་བསྒོམ་པར་མི་བྱ་སྟེ། །སྟོང་མིན་བསྒོམ་པར་མི་བྱའོ། །སྟོང་པ་མི་སྤང་རྣལ་འབྱོར་པས། །སྟོང་མིན་ཡོངས་སུ་མི་སྤང་ངོ་། །སྟོང་དང་སྟོང་མིན་བཟུང་བ་ལས། །རྟོག་པ་ཉུང་མིན་སྐྱེ་བར་འགྱུར། །རྟོག་པ་ཡོངས་སུ་སྤངས་སྙམ་ན་ཀུན་རྟོག་སྟེ། །དེ་ཕྱིར་དེ་ཉིད་ཡོངས་སུ་སྤངས། །ཞེས་བྱ་བ་དང་། ཐ་ན་ང་ཅི་ཡང་མི་སྒོམ་མོ་སྙམ་པའི་རྣམ་པར་རྟོག་པའང་སྤངས་ཏེ། དེ་ཉིད་ལས། དེ་ལྟ་བུའི་གཉིས་ཀྱི་གཟུང་བ་ཡོངས་སུ་སྤངས་པ་ནི། །རྣམ་པར་གྲོལ་བ་སྟེ་དེ་ཁོ་ཉིད་མཐོང་བའམ་དེ་ནི་དམིགས་གཏད་དང་བྲལ་བས་གནས་དང་ལྡན་པ་༼བྲ༷ལ་བ༷་༽སྟེ། །ང་ཞེས་བྱ་བའི་ཀུན་རྟོག་འདི་འཛིན་བཅས་པ་ཡིན་པས། །དེ་ཕྱིར་འདི་ནི་ཡང་དག་སྤངས། །ཞེས་སོ། །དེ་ལྟ་བུ་དེའི་མཚན་ཉིད་རེ་ཞིག་ལས་དང་པོ་པས་བློའི་ཡུལ་དུ་ཇི་ལྟར་བྱ་སྙམ་ན་རྣམ་པར་རྟོག་པ་ཐམས་ཅད་སྤངས་པ་སྟེ། དེ་ཉིད་ལས། རྣམ་པ་མེད་ཅིང་དོགས་པ་མེད། །འདོད་པ་མེད་ཅིང་སྡིག་པ་བྲལ། །ཐོག་མ་ཐ་མའི་རྟོག་ལས་གྲོལ། །ནམ་མཁའ་ལྟ་བུར་མཁས་པས་བསྒོམ། །ཞེས་གསུངས་ཏེ། བསྒོམ་པར་བྱ་བའི་ཡུལ་འདི་ལ་སྒོམ་བྱེད་ཀྱི་ཤེས་པ་འདིས་བསྒོམ་པའི་དངོས་པོ་འདི་ལྟ་བུ་ཞིག་བསྒོམ། བསྒོམས་པའི་འབྲས་བུ་འདི་ལྟ་བུ་ཞིག་ཐོབ་པར་བྱ་སྙམ་པའི་རྣམ་པར་རྟོག་པའང་མེད། ཉོན་མོངས་པ་དང་དེའི་འབྲས་བུ་སྡུག་བསྔལ་སྤངས་པའི་རྣམ་རྟོག་ཀྱང་མེད། འབྲས་བུ་སངས་རྒྱས་དང་། དེ་སྒྲུབ་པའི་གཉེན་པོ་ཡེ་ཤེས་བརྟེན་པའི་རྣམ་པར་རྟོག་པའང་མེད་པས་དམིགས་པ་ལ་བརྟེན་ནས་ཡེ་ཤེས་ཅུང་ཟད་སྐྱེས་པ་དང་བསྲེས་ནས་ཉམས་སུ་ལེན་པ་ཡིན་ནོ། །དེ་སྐད་དུ། བྱང་ཆུབ་སེམས་འགྲེལ་ལས། དམིགས་པ་མེད་པའི་སེམས་སུ་ནི། །གནས་པ་ནམ་མཁའི་མཚན་ཉིད་ཡིན། །ནམ་མཁའ་སྒོམ་པ་དེ་ཉིད་ནི། །སྟོང་ཉིད་སྒོམ་པར་བཞེད་པ་ཡིན། །ཞེས་གསུངས་སོ། །དེ་ལྟར་ན་སྙིང་རྗེ་སྤངས་པར་མི་འགྱུར་རམ་སྙམ་ན། མི་འགྱུར་ཏེ། སཾ་པུ་ཊའི་གཉིས་པའི་གཉིས་པ་ལས། སྙིང་རྗེ་ལྡན་པས་སེམས་ཅན་ལ། །རྒྱབ་ཀྱིས་ཕྱོགས་པར་མི་བྱ་ཞིང་། །ཞེས་བྱ་བ་ནས། དམིགས་མེད་གནས་སུ་ཤེས་རབ་དང་། །དམིགས་མེད་སྙིང་རྗེ་ཆེན་པོ་ཉིད། །བློ་དང་ལྷན་ཅིག་གཅིག་གྱུར་པས། །ནམ་མཁར་ནམ་མཁའ་ཇི་ལྟ་བའོ། །ཞེས་བྱ་བའི་བར་འབྲས་བུ་དང་ཐུན་མོང་དུ་གསུངས་སོ། །རང་བྱིན་བརླབ་དང་དཀྱིལ་འཁོར་འཁོར་ལོའི་དམིགས་པ་དང་བཅས་པ་གཉིས་ཀའི་ཐུན་མོང་གི་དམིགས་པ་མེད་པའི་བསྒོམ་པའོ། །གཉིས་པ་རང་བྱིན་བརླབ་འབའ་ཞིག་གི་དམིགས་པ་མེད་པར་སྦྱོར་ན་ལེའུ་བརྒྱད་པའི། གང་ཕྱིར་ཡིད་ཀྱིས་མི་སྒོམ་པར། །ཞེས་བྱ་བ་ལ་སོགས་པ་ལ་བརྟེན་ནས་བསྐྱེད་པའི་རིམ་པ་ལ་བརྟེན་པའི་ལས་དང་པོ་པས་ཀྱང་སྒོམ་དུ་རུང་ཡང་ཡུལ་ལ་ཡེ་ཤེས་ངོས་བཟུང་བའི་མན་ངག་ལ་སོགས་པ་སྟོན་ཏེ། ལེའུ་བརྒྱད་པར་འཆད་པར་འགྱུར་རོ། །གཉིས་པ་ཐབས་ལ་བརྟེན་ནས་སྐྱེས་པའི་ཏིང་ངེ་འཛིན་ལ་གཉིས། དོན་དམ་པར་སྤྲོས་པ་དང་བྲལ་ཡང་ཀུན་རྫོབ་ཏུ་སྔགས་དང་ལྷ་ཡང་དག་པར་གནས་པ་དང་། དེས་ན་འཁོར་འདས་ཀྱི་ཆོས་ཐམས་ཅད་རྣལ་འབྱོར་པའི་ཏིང་ངེ་འཛིན་ལས་བྱུང་བའོ། །དང་པོ་ནི་དང་པོའི་ལྔ་པ་ལས། སྒོམ་པ་པོ་མེད་ཚུལ་ཇི་ལྟར་བསྒོམ་པའང་མེད། །ལྷ་མེད་སྔགས་ཀྱང་ཡོད་མ་ཡིན། །གཟུང་འཛིན་གྱི་སྤྲོས་པ་མེད་པའི་རང་བཞིན་ལས། །སྔགས་དང་ལྷ་ནི་ཡང་དག་གནས། །ཞེས་གསུངས་སོ། །གཉིས་པ་ནི། དང་པོའི་བརྒྱད་པ་ལས། སྣང་ལུགས་ཀྱི་དབང་དུ་བྱས་ན་ཡེ་ཤེས་ང་ལས་འགྲོ་བ་སེམས་ཅད་ཐམས་ཅད་འབྱུང་ཞིང་། །ང་ལས་ས་འོག་ས་སྟེང་ས་བླའི་གནས་གསུམ་པོ་ཡང་འབྱུང་ལ། །ཡེ་ཤེས་ང་ཡིས་འཁོར་འདས་འདི་ཀུན་ལ་ཁྱབ་པ་སྟེ། །གྲུབ་ལུགས་ཀྱི་དབང་དུ་བྱས་ན་སྤྲོས་བྲལ་ལས་མ་གཏོགས་པའི་འགྲོ་བའི་རང་བཞིན་གཞན་མ་མཐོང་། །ཞེས་གསུངས་པས་རྟོགས་པར་བྱའོ། །གསུམ་པ་བོགས་དབྱུང་བ་ནི་གཉིས། ཐབས་ཀྱིས་བསྟེན་ཚུལ་དང་། གོམས་པས་ཆུ་བོ་རྒྱུན་གྱི་ཏིང་ངེ་འཛིན་འབྱུང་བའོ། །དང་པོ་ནི་ལེའུ་བརྒྱད་པ་ལས། བཟའ་དང་བཏུང་དང་ཆུ་བླུགས་ནས་འཁྲིད་བྱེད་པ་དང་། །ཉལ་དང་གཉིད་ལོག་པ་དང་བསམ་མནོ་སེམས་པ་དང་། །ཕྱག་རྒྱ་ཆེན་པོ་མངོན་དུ་ཐོབ་པར་འདོད་པས། །དེ་ནས་མངོན་དུ་འགྲོ་བ་སྟེ་ཐོབ་པར་འགྱུར། །ཞེས་གསུངས་ཏེ་མཉམ་གཞག་གི་རྗེས་ལའང་གོམས་པར་བྱའོ་ཞེས་བྱ་བའི་དོན་ཏོ། །གཉིས་པ་གོམས་ན་ཆུ་བོ་རྒྱུན་གྱི་རྣལ་འབྱོར་དུ་འགྱུར་བ་ནི་འདི་སྐད་དུ། དབང་པོ་གང་དང་གང་ལམ་ཉིད། །དེ་ནི་དེ་ཡི་ངོ་བོར་འགྱུར། །མཉམ་པར་མ་གཞག་རྣལ་འབྱོར་གྱིས། །རྟག་པར་ཤིན་ཏུ་མཉམ་གཞག་ཉིད། །ཅེས་འབྱུང་བ་དང་། གཞན་ཡང་རྟག་ཏུ་ཉམས་སུ་བླངས་པས་ཉམས་སུ་མྱོང་བར་འགྱུར་ཏེ། རྩ་རྒྱུད་དང་པོའི་བརྒྱད་པ་ལས། ཆུ་བོའི་རྒྱུན་ནི་རབ་འབབ་དང་། །མར་མེའི་རྩེ་མོར་རབ་བཅིངས་ལྟར། །རྟག་ཏུ་དེ་ཉིད་རྣལ་འབྱོར་གྱིས། །ཉིན་དང་མཚན་དུ་མཉམ་པར་བཞག །ཅེས་གསུངས་སོ། །ཡང་རྗེས་སྤྱོད་ཀྱི་དུས་ཐམས་ཅད་དུའང་གོམས་པས་མྱོང་བར་འགྱུར་ཏེ། རྩ་རྒྱུད་ཕྱི་མའི་གཉིས་པ་ལས། ཇི་ལྟར་སྒྱུ་མ་རྨི་ལམ་དང་། །ཇི་ལྟར་བར་མའི་སྲིད་ཡིན་པ། །རྟག་ཏུ་གོམས་པའི་རྣལ་འབྱོར་གྱིས། །དཀྱིལ་འཁོར་འདི་ནི་དེ་བཞིན་འདོད། །ཅེས་གསུངས་སོ། །བཞི་པ་བར་ཆད་བསལ་བ་ལ་གཉིས། བར་ཆད་ཀྱི་རྣམ་གྲངས་དང་། དེ་ཏིང་ངེ་འཛིན་གྱིས་བསལ་བའོ། །དང་པོ་ནི་འབྱུང་བ་དང་། གདོན་དང་། ཏིང་ངེ་འཛིན་གསུམ་གྱིའོ། །དེ་སེལ་བའང་ཏིང་ངེ་འཛིན་དེ་ཉིད་ཀྱིས་ཏེ། ལེའུ་བརྒྱད་པ་ལས། ས་རྡིབ་དང་ཆུ་དང་རླུང་གིས་ཁྱེར་བ་དང་ནི། །མེས་ཚིག་པ་དང་ནམ་མཁའ་ཉིད་དེ་གཡང་ལ་ལྷུང་བ་དང་ནི། །རང་འཛིན་རྟོག་གཞན་གཟུང་བའི་རིག་པའི་ཚོར་བ་ཡིས། །ཀུན་གྱིས་སྐད་ཅིག་མི་གནོན་ནོ། །ཞེས་གསུངས་ཏེ། རྐང་པ་གོང་མ་གསུམ་གྱིས་བར་ཆད་བསྟན་ལ། འོག་མས་ལམ་ཉམས་སུ་ལེན་པའི་བར་ཆད་ཐམས་ཅད་ཞི་བར་འགྱུར་བའི་དོན་ཏོ། །ལྔ་པ་ཏིང་ངེ་འཛིན་གྱི་དྲོད་རྟགས་ལ་གཉིས། ལམ་གྱི་ས་མཚམས་དང་། དེའི་རྟགས་སོ། །དང་པོ་ནི། འཇིགས་སྨྱོ་དེ་བཞིན་སྡུག་བསྔལ་དང་། །ཞེས་བྱ་བ་ལ་སོགས་པ་གསུངས་ཏེ། སྤྱོད་པའི་སྐབས་བཞིན་ནོ། །གཉིས་པ་རྟགས་ཀྱང་། དང་པོ་སྤྲིན་གྱི་རྣམ་པ་ཉིད། །ཅེས་བྱ་བ་ལ་སོགས་པ་གསུངས་ཏེ། དེའང་འོག་སྤྱོད་པའི་དྲོད་རྟགས་ཀྱི་སྟེང་དུ་རྟོགས་པར་བྱའོ། །དེ་ལྟར་དེ་དག་ཞིབ་ཏུ་བླ་མས་འཆད་པར་འགྱུར་རོ། །དེ་ལྟར་དེ་དག་ཀྱང་རྩ་རྒྱུད་ལེའུ་དང་པོ་དང་། ལྔ་པ་དང་། བརྒྱད་པ་དང་། ཞར་ལས་བྱུང་བ་དགུ་པ་དང་། བཅུ་པ་དང་། ཕྱི་མའི་གཉིས་པ་དང་། གསུམ་པ་དང་། བཞི་པ་དང་། བཅུ་གཅིག་པ་རྣམས་དང་། རྡོ་རྗེ་གུར་ལེའུ་གཉིས་པ་དང་། བདུན་པ་དང་། བརྒྱད་པ་དང་། བཅུ་བཞི་པ་རྣམས་དང་། སཾ་པུ་ཊའི་བརྟག་པ་དང་པོ་ཐམས་ཅད་དང་། གཉིས་པའི་གཉིས་པ་དང་། ལྔ་པའི་གཉིས་པ་དང་། དྲུག་པ་ཐམས་ཅད་དང་། དགུ་པའི་དང་པོས་ཀྱང་ཅུང་ཟད་བསྟན་ཏོ། །རྫོགས་པའི་རིམ་པ་བསྟན་ཟིན་ཏེ། རིམ་པ་གཉིས་ཀའི་མངོན་པར་རྟོགས་པའང་བསྟན་ཟིན་ཏོ། །
ལམ་གྱི་གཙོ་བོ་མཆོག་སྒྲུབ་པའི་མངོན་རྟོགས་ཀྱི་རིམ་པ།
དེ་ལྟར་ལམ་གྱི་གཙོ་བོ་རིམ་པ་གཉིས་ལ་གནས་པ་དེས་གང་ཟག་ཕྱི་ལ་མཆོག་ཏུ་གཞོལ་བའི་དབང་དུ་བྱས་ནས་བཟླས་པ་དང་། སྦྱིན་སྲེག་ལ་སོགས་པ་འདིའི་རྗེས་ལ་འབྱུང་ཡང་། ནང་དུ་མཆོག་ཏུ་གཞོལ་བ་གཙོ་བོར་བྱས་པ་དང་། སྤྱི་དོན་མཆོག་བསྒྲུབ་པའི་མངོན་རྟོགས་ལྔར་བྱས་པའི་ཕྱིར་གཟུང་བདེ་བའི་དབང་དུ་བྱས་ནས། རིམ་པ་གཉིས་ལ་གནས་པ་དེས་དྲོད་ཐོབ་ནས་རང་གི་སེམས་ཀྱི་བརྟན་གཡོ་བརྟག་པར་བྱ་བའི་ཕྱིར་སྤྱོད་པ་བརྗོད་པར་བྱའོ། །དེ་ལ་གཉིས་ཏེ། སྤྱོད་པའི་སྔོན་དུ་འགྲོ་བ་དྲོད་དང་། དྲོད་ཐོབ་པས་སྤྱད་པའི་སྤྱོད་པ་དངོས་སོ། །དང་པོ་ལ་དྲུག་སྟེ། དྲོད་ཅེས་བྱ་བའི་རང་གི་ངོ་བོ་དང་། རབ་ཏུ་དབྱེ་བ་དང་། དབྱེ་བ་སོ་སོའི་མཚན་ཉིད་དང་། དྲོད་མ་ཐོབ་པ་ཐོབ་པར་བྱེད་པའི་ཐབས་དང་། ཐོབ་པ་བརྟན་པར་བྱེད་པའི་དུས་དང་། དྲོད་དང་སྤྱོད་པ་མཚམས་སྦྱར་བའོ། །དང་པོ་ནི་ཏིང་ངེ་འཛིན་ལས་སྐྱེས་པའི་ལུས་ངག་ཡིད་ཀྱི་མཐུའམ་ནུས་པའི་ཁྱད་པར་ལ་དྲོད་ཅེས་བྱའོ། །གཉིས་པ་དེ་ལ་དབྱེ་ན་གཉིས་ཏེ། དྲོད་སྤྱིའི་རྟགས་དང་། བྱེ་བྲག་དྲོད་གསུམ་དུ་དབྱེ་བའོ། །གསུམ་པ་དབྱེ་བ་སོ་སོའི་མཚན་ཉིད་ལའང་གཉིས་ཏེ། དྲོད་སྤྱིའི་མཚན་ཉིད་དང་། ཆེ་འབྲིང་གསུམ་གྱི་མཚན་ཉིད་དོ། །དང་པོ་ནི། རྡོ་རྗེ་གུར་ལེའུ་བཞི་པ་ལས། མཚན་མ་ཡང་དག་མཚོན་པར་བྱ། །དང་པོ་སྤྲིན་གྱི་རྣམ་པ་སྟེ་དྲོད། །གཉིས་པ་དུ་བ་འདྲ་བ་ཉིད་རྩེ་མོ། །གསུམ་པ་མེ་ཁྱེར་རྣམ་པ་ཉིད་བཟོད་པ། །བཞི་པ་མར་མེ་ཉེར་འབར་བ་ཆོས་མཆོག །།ལྔ་པ་རྟག་ཏུ་སྣང་བ་སྟེ། །སྤྲིན་མེད་ནམ་མཁའ་འདྲ་བ་ཉིད། །དེ་ནི་ཐམས་ཅད་མཁྱེན་པ་ཐོབ་པའི་རྒྱུ། །དངོས་གྲུབ་དང་ཉེ་བར་འགྱུར་བ་དང་པོ་ཡིན། །ཕྱི་ནས་སྒྱུ་མའི་རྣམ་པ་ལྟར། །རྨི་ལམ་རྣམ་པ་ལྟ་བུའི་བདེན་མེད་དུ་སྐད་ཅིག་སྐད་ཅིག་ལ་འགྱུར། །ཁམས་གསུམ་རྒྱུ་དང་མི་རྒྱུ་བ། །མ་ལུས་ལུས་པ་མེད་པར་ཡེ་ཤེས་གཅིག་གིས་རྟོགས་ཤིང་འབྲས་བུ་འགྲུབ་པར་འགྱུར་བ་བསྒོམ་ལམ་མོ། །ཅེས་བྱ་བ་དང་། སཾ་པུ་ཊའི་བརྟག་པ་ལྔ་པའི་གཉིས་པ་ལས། ཚོགས་ལམ་ཆུང་ངུར་དང་པོ་མཚན་མ་ཐམས་ཅད་ཀྱི། །ཐོག་མར་མར་མེའི་རྣམ་པ་མཐོང་བར་འགྱུར། །འབྲིང་པོར་གཉིས་པ་མཚན་མ། གཅིག་གམ་གཉིས་སམ་ངེས་མེད་དུ་མེ་ཁྱེར་གྱི། རྣམ་པར་མཐོང་ན་རྡུལ་དུ་མཚོན་པར་བྱེད་ཆེན་པོར་རྡུལ་རྡུལ་དཀར་ཐིག་མངོན་རྟོགས་ལྗོན་ཤིང་གི་ཡི་གེ་དག་བཅོས་དང་མཆན་བུ། ལེ་ཙ་ན་ཀ་ཙམ་གྱི་དབྱིབས་སུ། ཕྱོགས་བཅུར་འཕྲོ་བ་དེ་བཞིན་མཐོང་བར་འགྱུར། དྲོད་དུ་རྟགས་གསུམ་པར་མཐོང་བ་དེ་སྔ་མ་ལས་ཉོན་མོངས་བཅོམ་སྟེ་ཆུང་ངུ་སོང་བས་ཕྲ་མོར་བྱས་པ་ནི་རྣལ་འབྱོར་པ་ཡིས་རྣམ་པར་བརྟག་སྟེ་མཚོན། རྩེ་མོར་འདོད་པའི་ལྷ་ཡི་ལོངས་སྤྱོད་ངང་གི་འདུས་པ་ཡང་མཐོང་། བཞི་པར་ཡང་ནི་བསྟན་པའོ། །བཟོད་པར་གཟུགས་ཁམས་ཀྱི་ལྷ་ཡི་གཟུགས་ནི་ཐམས་ཅད་དུ་མཐོང་། ལྔ་པར་སེམས་ཀྱིས་བརྟག་པར་བྱ། ཆོས་མཆོག་ཏུ་དྲུག་པ་གཟུགས་ནི་མེད་པའི་ཆ་ཡང་ཤེས། མཐོང་ལམ་དུ་བདུན་པ་ཆོས་ཀྱི་དབྱིངས་མངོན་སུམ་དུ་རྟོགས་པ་ཉིད་དོ། །སྒོམ་ལམ་གྱི་མཐར་རྟག་ཞེས་བྱ་བ་ནས། བརྒྱད་པ་ཉིད་ཀྱིས་མཚོན་བྱའམ་རྟགས་ཀྱི་མཚན་གཞི་ནི་རང་འདོད་རྣལ་འབྱོར་པའི། །སངས་རྒྱས་རྣམས་ཀྱི་འབྲས་བུའི་དོན། །ཞེས་བྱ་བའི་བར་དང་། གཞན་ཡང་གསུངས་ཏེ། ཞིབ་ཏུ་རྒྱུད་ཉིད་ཀྱི་སྟེང་དུ་རྟོགས་པར་བྱའོ། །གཉིས་པ་བྱེ་བྲག་ཏུ་དྲོད་གསུམ་གྱི་མཚན་ཉིད་ལ་གསུམ། དྲོད་ཆུང་ངུ་ཞེས་བྱ་བ་མཉམ་གཞག་ལ་འཇིག་རྟེན་གྱི་ཆོས་བརྒྱད་མགོ་སྙོམས་པར་སྙོམ་བྱེད། ཉོན་མོངས་པ་གློ་བུར་བ་དྲག་པོ་ལྡོག་པ་སྙམ་བྱེད་ན། ཀུན་འདར་གྱི་སྤྱོད་པ་སྤྱད་དེ་བརྟན་ནམ་མི་བརྟན་བརྟག །མི་བརྟན་ན་སླར་བསམ་གཏན་ལ་འཇུག་སྟེ། ལྔ་པའི་གསུམ་པ་ལས། ཡང་ནི་བསྒོམ་པ་བརྟན་ནམ་མི་བརྟན་བརྟག་པའི་ཕྱིར་ནུབ་པ་ན་སྟེ་མཚན་མོར་བསམ་གཏན། །བསྡུས་ནས་བྱིས་པའི་རྩེ་བ་ལྟར་བྱའོ། །ཞེས་གསུངས་པས་སོ། །བརྟན་ན་དྲོད་ཆུང་ངུ་ཡིན་ཏེ། ལྔ་པའི་གསུམ་པ་ལས། དེ་བཞིན་འཇིག་རྟེན་ཆོས་བརྒྱད་ནི། །ཐམས་ཅད་ཤིན་ཏུ་ཡུན་དུ་སྤངས། །ཞེས་པ་དང་། རྩ་རྒྱུད་ཕྱི་མའི་གཉིས་པ་ལས། འཆི་བ་སོགས་ཀྱིས་འཇིགས་པ་དང་རང་གི་སེམས་སྨྱོ་བ་དང་དེ་བཞིན་སྡུག་བསྔལ་དང་། །སེམས་མྱ་ངན་གྱིས་གདུང་བས་འཚེ་བ་དང་། །འདོད་ཆགས་ཞེ་སྡང་གཏི་མུག་ཆོས། །སྒྲུབ་པ་པོ་ཉིད་ཉོན་མི་མོངས། །ཞེས་གསུངས་པས་སོ། །དྲོད་འབྲིང་པོ་ནི་ཚར་གཅད་པ་དང་། རྗེས་སུ་གཟུང་བའི་ལས་གང་ཡང་རུང་བ་ཅིག་ནུས་པ་སྟེ། རྣམ་ཤེས་དང་ཡེ་ཤེས་ཀྱི་ལས་ཆ་མི་མཉམ་པ་ཞེས་བྱའོ། །དྲོད་ཆེན་པོ་ནི་ཚར་གཅད་པ་དང་རྗེས་སུ་གཟུང་བ་གཉིས་ཀ་ནུས་པ་སྟེ། རྣམ་ཤེས་དང་ཡེ་ཤེས་ཀྱི་ལས་ཆ་མཉམ་པ་ཞེས་བྱ་སྟེ། དྲོད་ཆེ་འབྲིང་གཉིས་ཀའི་ལུང་ཡང་། རྩ་རྒྱུད་ཕྱི་མའི་གཉིས་པ་ལས། ཕན་པ་གཞན་རྗེས་སུ་འཛིན་པ་དང་གནོད་པ་ཚར་གཅོད་པའི་འབྲས་བུ་སྒྲུབ་བྱ་ལ་འབྱུང་བ། །དེ་ལྟར་ངེས་པར་ཤེས་ནས་ནི། །ཇི་ལྟར་དེ་ནི་སྐད་ཅིག་ཀྱང་། །རྣལ་འབྱོར་ངུ་འབོད་ག་ལ་འགྲོ་སྟེ་མི་འགྲོའོ། །རྣམ་ཤེས་དང་ཡེ་ཤེས་ཆ་མཉམ་མི་མཉམ་གྱི་དོན་ནི་རྗེས་ཐོབ་ཏུ་ཡེ་ཤེས་རྒྱུན་ལྡན་འབྱུང་མི་འབྱུང་གི་དོན་ཡིན་ནོ། །ཞེས་གསུངས་སོ། །དོན་བཞི་པ་དྲོད་མ་ཐོབ་པ་ཐོབ་པར་བྱེད་པའི་ཐབས་ནི་གསུམ་སྟེ། དྲོད་ཆུང་ངུ་མ་ཐོབ་པ་ཐོབ་པར་བྱེད་པའི་ཐབས་རིམ་པ་གཉིས་བསྒོམ་པ་ཉིད་ཡིན་ལ། འབྲིང་མ་ཐོབ་པ་ཐོབ་པ་བྱེད་པ་ནི་ཀུན་འདར་གྱི་གསང་སྤྱོད་ཡིན་ཞིང་། ཆེན་པོ་མ་ཐོབ་པ་ཐོབ་པར་བྱེད་པ་ནི་དྲག་ཤུལ་གྱི་ལས་སོ། །དང་པོ་གཉིས་ནི་རྟོགས་པར་སླའོ། །གསུམ་པ་རིམ་པ་གཉིས་ལ་བརྟེན་ནས་དུ་བ་ལ་སོགས་པའི་རྟགས་ལྔའང་མཐོང་། དྲོད་ཆུང་ངུ་དང་འབྲིང་པོ་ཐོབ་ཀྱང་། དྲོད་ཆེན་པོ་ཐོབ་ཏུ་མ་བཏུབ་ན་རིམ་པ་གཉིས་ལ་བརྩོན་འགྲུས་དང་བརྟུན་པ་དྲག་པོས་བསྒྲུབ་པ་ཟླ་བ་དྲུག་བྱ། དེ་ལ་མ་གྲུབ་ན་སླར་ཡང་དྲུག །དེ་ལ་མ་གྲུབ་ན་སླར་ཡང་དྲུག་བྱ་སྟེ། སློབ་དཔོན་ཌོམྦི་པའི་དེ་ཉིད་བཅུ་པ་ལས། སྒྲུབ་པ་ཆེན་པོ་ཟླ་བ་བཅོ་བརྒྱད་ཀྱིས་ཀྱང་མ་གྲུབ་ན་དྲག་ཤུལ་གྱིས་བསྒྲུབ་པར་བྱའོ་ཞེས་གསུངས་པས་ན། སྒྲུབ་པ་ཟླ་བ་བཅོ་བརྒྱད་ཀྱིས་མ་གྲུབ་ན་དངོས་པོ་ལ་མངོན་པར་ཞེན་པའི་རྟགས་ཡིན་པས་ལྷ་གནད་ལ་བོར་བ་བསྒྲུབ་པར་བྱ་སྟེ། རྡོ་རྗེ་གུར་ལས། རང་ཉིད་ཀྱིས་རིགས་རྐྱང་བསྡུས་ཀྱི་མངོན་རྟོགས་བསྒོམས་ནས་ཡེ་ཤེས་པ་སྤྱན་འདྲེན་གྱི་ཚུལ་དུ་བསྒྲུབ་པ་ནི། རང་གི་སྙིང་ག་ནས་གཽ་རི་སོགས་སྤྲོས་ཏེ་དེ་བཞིན་གཤེགས་པ་རྣམས་སྤྱན་དྲངས་རང་གི་ཞལ་དུ་ཞུགས། སྙིང་གར་ཞུ། ཡུམ་གྱི་ཆོས་འབྱུང་གྲོང་ཁྱེར་ཡིད་འོང་བར་སླེབས་བའི་སྐད་ཅིག་ལ་དཀྱིལ་འཁོར་ཡོངས་རྫོགས་བསམ། ཡང་སངས་རྒྱས་རྣམས་སྤྱན་དྲངས། ཞལ་དུ་ཞུགས། སྙིང་གར་ཞུ་བ་ལས་ཁྲོ་བོ་བདུད་རྩི་འཁྱིལ་པའམ་གནོད་མཛེས་རབ་ཏུ་ཁྲོས་པ་གཡས་ན་གཏུན་ཤིང་དང་། གཡོན་སྡིགས་མཛུབ་དང་བཅས་པས་ཕུར་བུ་འཛིན་པར་བསྒོམ་ལ་ཡེ་ཤེས་དགུག་གཞུག་སོགས་བྱས་པ། རྡོ་རྗེ་མཛུབ་མོའི་སྦྱོར་བ་ཡིས། །གལ་ཏེ་མཆོག་གི་དངོས་གྲུབ་མི་སྟེར་ན། །ཁྲོ་བོ་དེ་ཉིད་ༀ་དུ་རུ་དུ་རུ་ཙྪིནྡ་ཙྪིནྡ་ཧཱུྃ་ཕཊ་ཞེས་པའི་སྔགས་ཀྱིས་བསྐུལ་ནས་གདབ་བྱ་འདེབས་བྱེད་རྣམས་མི་དམིགས་པའི་ཚུལ་གྱིས་རྩ་དབུ་མའི་ལམ་ནས་སོང་སྟེ་དཀྱིལ་འཁོར་གྱི་རྡོ་རྗེ་སེམས་དཔའ་མི་སྐྱོད་པའི་དབུ་ནས་སོང་སྟེ་ཞབས་ཀྱི་བར་དུ་བྱུང་བས་གསད་པར་བྱའོ། །དེ་བཞིན་དུ་སྔར་གྱི་དམིགས་པ་དེས་འཁོར་རྣམས་ཀྱང་བསད་དེ་མཐར་ཅི་ཡང་མི་དམིགས་པ་ལ་བློ་བཞག་པས་འགྲུབ་པར་འགྱུར་རོ། །ཞེས་བྱ་བ་ལ་སོགས་པ་གསུངས་ཏེ། མངོན་པར་རྟོགས་པ་ནི་རྒྱུད་ཀྱི་སྟེང་དུ་འཆད་པར་འགྱུར་རོ། །དོན་ལྔ་པ་དེས་དྲོད་ཆེན་པོ་ཐོབ་ནས། ཐོབ་པ་བརྟན་པར་བྱེད་པ་ནི་ཟླ་བ་ཕྱེད་དུ་སྔར་གྱི་དེ་ལ་གོམས་པར་བྱེད་ཅིང་གནས་པར་བྱ་སྟེ། རྩ་རྒྱུད་ཕྱི་མའི་གཉིས་པ་ལས། འདོད་ཡོན་ལ་བརྩེ་ཞིང་རོལ་བས་དངོས་གྲུབ་དོན་དུ་ཡང་། །ཟླ་བ་ཕྱེད་ཀྱི་བར་དུ་གསང་སྤྱོད་ཀྱི་རྟོགས་པ་ཡོངས་སུ་བརྟགས་ནས་རྟོགས་ཤིང་། ༼། བས༷མ་པ༷་ཐ༷མས་ཅ༷ད་ཡོ༷ངས་སྤ༷ངས་ན༷ས། །ལྷ༷་ཡི༷་གཟུ༷གས་སུ༷་སེ༷མས་པ༷་ཡི༷ས། ༽། ཉི་མ་གཅིག་ཀྱང་མ་ཆད་པར། །བསྒོམས་པས་ཡོངས་སུ་བརྟག་པར་གྱིས། །ཞེས་གསུངས་སོ། །དྲུག་པ་དྲོད་དང་སྤྱོད་པ་མཚམས་སྦྱར་བ་ནི། དྲོད་ཆུང་ངུ་ཐོབ་ནས་ཀུན་འདར་གསང་ནས་སྤྱོད་ལ། འབྲིང་པོ་ཐོབ་ནས་ཀུན་འདར་འཇིག་རྟེན་པའི་མངོན་དུ་སྤྱོད་ཅིང་། དྲོད་ཆེན་པོ་ཐོབ་ནས་ཀུན་ཏུ་བཟང་པོ་སྤྱོད་དོ་ཞེས་ཤེས་པར་བྱའོ། །
དྲོད་ཐོབ་པས་སྤྱད་པའི་སྤྱོད་པ་དངོས།
སྤྱི་དོན་གཉིས་པ་དྲོད་ཐོབ་པས་སྤྱད་པ་སྤྱོད་པ་དངོས་ལ་རྒྱས་པར་དབྱེ་ན་བཅུ་བཞི་ལ་སོགས་པར་གསུངས་ཀྱང་ངོ་བོའི་དགུ་གཅིག་ཏུ་མདོར་བསྡུ་ན་དྲུག་ཏུ་འདུས་ཏེ། སྤྱོད་པ་རང་གི་ངོ་བོ་དང་། རབ་ཏུ་དབྱེ་བ་དང་། དབྱེ་བ་སོ་སོའི་མཚན་ཉིད་དང་། སྤྱོད་པ་སྤྱད་པའི་དུས་དང་། རྟེན་གྱི་གང་ཟག་དང་། སྤྱོད་པའི་དགོས་པའོ། །དང་པོ་ལ་དབྱེ་བ་དགུ་ཡོད་ཨངྐི་ལྟར་ཤེས་པར་བྱ་ནི་སྤྱིར་ལས་དང་པོ་པའི་སྤྱོད་པ་ཞེས་བྱ་བ་ལ་སོགས་པ་ལུས་ངག་གི་སྤྱོད་པ་མང་དུ་གནས་ན་ཡང་འདིར་གནས་སྐབས་ཀྱི་སེམས་བརྟན་པ་ཐོབ་པ་ལ་བྱ་སྟེ། དང་པོར་བླ་མ་ལ་ཕྱག་བྱས། དངོས་པོ་ཐམས་ཅད་ཕུལ། ལུས་ཀྱང་སེམས་ཅན་ཐམས་ཅད་ལ་བསྔོས་ལ་སྤྱོད་པ་ལ་འགྲོ་སྟེ། ལྔ་པའི་གསུམ་པ་ལས། དཔལ་ལྡན་སློབ་དཔོན་རྡོ་རྗེ་ཅན། །ཀུན་གྱི་མགོན་ལ་ཕྱག་འཚལ་ལོ། །ཞེས་པ་དང་། ལེའུ་དྲུག་པ་ལས། ལུས་ཀྱི་སྦྱིན་པ་བྱིན་ནས་ནི། །ཞེས་གསུངས་སོ། །དེ་ནས་སྤྱོད་པ་དངོས་ནི། ནང་དུ་དེ་ཁོ་ན་ཉིད་ཀྱི་རྟོགས་པས་ཀུན་ནས་བསླང་བའི་ཕྱི་རོལ་དུ་ལུས་ངག་གཡོ་ཞིང་རྒྱུ་བ་ཅི་འདོད་བྱེད་པའི་ཁྱད་པར་ལ་བྱའོ་ཞེས་བྱ་སྟེ། ལུས་ཅི་འདོད་བྱ་བ་བྱེད་པའི་ཁྱད་པར་ནི་རེས་ཅོ་རེག་དང་རལ་པ་ཅན་ལ་སོགས་པ་དང་། བགོ་བར་བྱ་བ་ལ་ངེས་པ་མེད་དེ། ལྔ་པའི་བཞི་པ་ལས། རོ་ཡི་དཀྲིས་མའི་གོས་བཟང་དང་། །རོ་བསྲེགས་ཐལ་བས་དེ་བཞིན་བརྒྱན། །ཞེས་བྱ་བ་དང་། སྨད་གཡོགས་ཁ་དོག་སྣ་ཚོགས་ཉིད། །ཅེས་བྱ་བ་ལ་སོགས་པ་དང་། རྩ་རྒྱུད་ལས། བགོ་བ་སྟག་གི་པགས་པ་ཉིད། །བཟའ་བ་མི་འཆི་བཅུ་ཕྱེད་དེ། །ཞེས་བྱ་བ་ལ་སོགས་པའོ། །བཟའ་བར་བྱ་བ་ལ་ངེས་པ་མེད་དེ། རེས་བཟའ་བར་བྱ་བ་བཟང་པོ་རྒུན་འབྲུམ་ལ་སོགས་པ་ཟ་ལ། རེས་ངན་པ་སྐྱུགས་པ་ལ་སོགས་པ་རྣམས་ཀྱང་ཟ་སྟེ། ལྔ་པའི་གསུམ་པ་དང་བཞི་པ་ལས། ཁྱི་དང་བོང་བུ་རྔ་མོ་དང་། །གླང་པོ་ལ་སོགས་ཁྲག་འཐུང་ནས། །ཞེས་བྱ་བ་ལ་སོགས་པ་དང་། ཇི་ལྟར་རྙེད་པ་བཞིན་དུ་བཟའ། །ཟོས་ཤིང་ཟོས་དང་གཏོར་མ་སྦྱིན། །ཞེས་བྱ་བ་ལ་སོགས་པ་གསུངས་སོ། །རྒྱན་ཆ་ལའང་ངེས་པ་མེད་དེ། འབྲས་བུ་སྣ་ཚོགས་དོ་ཤལ་སོགས། །འོལ་མ་ཟིལ་སོགས་དེ་བཞིན་སྤྲས། །ཞེས་བྱ་བ་ལ་སོགས་པ་དང་། སྣོད་དང་སྤྱོད་པ་བྱེད་པའི་དུས་དང་གནས་རྣམས་ལའང་ངེས་པ་མེད་དེ། རོ་ཡི་ཁམ་ཕོར་ཐོགས་ནས་ནི། །མཚན་མོའི་དུས་སུ་རྒྱུ་བར་བྱ། །བཞི་མདོ་དང་ནི་རི་བོ་དང་། །ཤིང་གཅིག་གམ་ནི་དུར་ཁྲོད་དུ། །ཞེས་བྱ་བ་ལ་སོགས་པ་དང་། གཞན་པའི་ཡུལ་འཁོར་གྲུབ་པ་དང་། །རི་ཡི་ཕུག་དང་ཚང་ཚིང་དང་། །གདོད་ནས་གྲུབ་པའི་དུར་ཁྲོད་ཆེ། །རྒྱ་མཚོའི་ཆེན་པོའི་འགྲམ་དུའམ། །སྐྲག་པ་ཐམས་ཅད་རྣམ་སྤངས་ཏེ། །དེ་ལྟར་ཤེས་རབ་ཅན་གྱིས་བསྒོམ། །ཞེས་བྱ་བ་ལ་སོགས་པ་གསུངས་སོ། །ངག་ལའང་ངེས་པ་མེད་པར་སྨྲ་སྟེ། རེས་འགའ་ལེགས་སྦྱར་ཟུར་ཆག་ནི། །ལྡོག་པ་ཡིས་ནི་འདོན་པར་བྱེད། །ཅེས་སོ། །གྲོགས་ལའང་ངེས་པ་མེད་དེ། བགྲོད་པ་དང་བགྲོད་པར་བྱ་བ་མ་ཡིན་པ་དེ་ལ་བགྲོད་པ་དང་ཞེས་གསུངས་སོ། །ལུས་ངག་གི་དམ་ཚིག་ལས་གྲོལ་བས་ན། ལུས་ངག་གི་དམ་ཚིག་ལ་ངེས་པ་མེད་དེ། གང་ཞིག་བྱ་བ་མ་ཡིན་པ་དེ་ནི་བྱ་བ་དང་ཞེས་བྱ་བ་ལ་སོགས་པ་རྒྱས་པར་གསུངས་སོ། །ལུས་ངག་གི་དམ་ཚིག་ལ་བླ་མ་ལ་ཕྱག་བྱ་བ་ནི་མི་འདོར་ཏེ། ཡེ་ཤེས་ཀྱི་དམ་ཚིག་ཡིན་པའི་ཕྱིར་རོ། །དེ་ཡང་ལྔ་པའི་གསུམ་པ་ལས། རྒྱལ་བས་མཆོད་པའི་སློབ་དཔོན་ནི། སེམས་ཅན་ཡིན་ཡང་ཡེ་ཤེས་ཀྱི་དམ་ཚིག་གིས་རྟག་ཏུ་དངོས་གྲུབ་སྦྱིན་པར་བྱེད་དེ། བློ་དང་ལྡན་པའི་སློབ་དཔོན་ལ་ཕྱོགས་བཅུར་བཞུགས་པའི་སློབ་མ་དེ་བཞིན་གཤེགས་པས་མཆོད་པར་བྱེད་དོ། །གང་གི་ཕྱིར་རྫོགས་པའི་སངས་རྒྱས་དང་། བྱང་ཆུབ་སེམས་དཔའ་མཆོད་པའི་བསོད་ནམས་གང་ཞིག་སློབ་དཔོན་གྱི་བ་སྤུའི་ཁུང་བུའི་རྩེ་མོ་གཅིག་ལ་མཆོད་ན་མཐོང་བ་དེའི་ཕྱིར་བྱང་ཆུབ་སེམས་དཔའི་སློབ་དཔོན་སོ་སྐྱེ་དེ་ལ་སངས་རྒྱས་ཀྱི་མཆོད་པ་བྱེད་པ་མཐོང་ངོ་། །ངེས་པར་རང་གི་ཐོབ་བྱ་ལས་མི་འདའ་བའི་དམ་ཚིག་གི་སངས་རྒྱས་འདོད་པས་དངོས་གྲུབ་སྦྱིན་པར་བྱེད་པ་བླ་མ་དམ་པ་ལ་སྨད་པར་མི་བྱ་བ་དང་ཞེས་བྱ་བ་ལ་སོགས་པ་དང་། དཔལ་ལྡན་སློབ་དཔོན་རྡོ་རྗེ་ཅན། །ཀུན་གྱི་མགོན་ལ་ཕྱག་འཚལ་ལོ། །ཞེས་བྱ་བ་ལ་སོགས་པ་གསུངས་སོ། །རྩ་རྒྱུད་དང་པོའི་དྲུག་པ་ལས་ཀྱང་། དངོས་གྲུབ་ཐོབ་པའི་སློབ་མ་གང་། །རང་ལ་ཡང་དག་པའི་ཡེ་ཤེས་ཀྱི་སྣང་བ་སྦྱིན་པ་པོ། །མནར་མེད་སྤངས་པའི་རྒྱུ་སློབ་དཔོན་ཡིན་པ་དེ་ཡི་ཕྱིར། །གྲུབ་པ་ཐོབ་པའི་སློབ་མས་བླ་མ་མངོན་ཕྱག་འཚལ། །ཞེས་གསུངས་སོ། །སྤྱོད་པའི་རང་གི་ངོ་བོ་བསྟན་ཟིན་ཏོ། །རབ་ཏུ་དབྱེ་ན་གཉིས་ཏེ། ཀུན་འདར་གྱི་སྤྱོད་པ་དང་། ཀུན་ཏུ་བཟང་པོའི་སྤྱོད་པའོ། །དེའང་ལྔ་པའི་གསུམ་པ་ལས། གང་ཞིག་འགྲོ་ལ་ཕན་པ་ཡི། །ཀུན་འདར་གྱི་ནི་སྤྱོད་པ་གསུངས། །ཞེས་པ་དང་། ཀུན་བཟང་རྫོགས་པའི་སངས་རྒྱས་མཚུངས་པ་མེད་པ་གྲུབ་པར་འགྱུར་བས། །སྤྱོད་པའི་ཕན་ཡོན་ངེས་པར་རིག་ནས་རྡོ་རྗེ་ཅན་གྱིས་གསུངས་སོ། །ཞེས་གསུངས་སོ། །ཀུན་འདར་གྱི་སྤྱོད་པ་ལ་མིང་གི་རྣམ་གྲངས་སྨྱོན་པའི་བརྟུལ་ཞུགས་ཀྱི་སྤྱོད་པ་ཞེས་བྱ་བ་དང་། རྒྱལ་བུ་གཞོན་ནུའི་སྤྱོད་པ་ཞེས་བྱ་བ་དང་། གསང་སྤྱོད་ཅེས་བྱའོ། །ཀུན་ཏུ་བཟང་པོའི་སྤྱོད་པ་ལ་མིང་གཞན་དོན་ཕྱོགས་ལས་རྣམ་པར་རྒྱལ་བའི་སྤྱོད་པ་ཞེས་བྱ་བ་དང་། རྒྱལ་ཚབ་ཆེན་པོའི་ས་ལ་གནས་པ་བརྟུལ་ཞུགས་ཀྱི་སྤྱོད་པ་ཞེས་བྱ་བ་དང་། འཇིག་རྟེན་པའི་མངོན་དུ་སྤྱོད་པ་ཞེས་བྱའོ། །དབྱེ་བ་སོ་སོའི་མཚན་ཉིད་ནི། ཅིའི་ཕྱིར་ཀུན་འདར་གྱི་སྤྱོད་པ་ཞེས་བྱ་ཞེ་ན། སྨྱོན་པ་འདྲ་བས་འཇིག་རྟེན་པ་རྣམས་འཇིགས་ཤིང་འདར་བས་ཀུན་འདར་རམ། ཡང་ཀུན་འདར་ལ་སྒྲ་སོར་བཞག་ན་ཨ་ཝ་དྷཱུ་ཏཱི་ཞེས་བྱ་སྟེ། དེ་ནི་གཉིས་སྤངས་ཞེས་བྱ་བར་ཡང་འགྱུར་བས་ན་བཟའ་བྱ་དང་། བཟའ་བྱ་མ་ཡིན་པ་གཉིས་མེད། བཏུང་བྱ་དང་བཏུང་བྱ་མ་ཡིན་པ་གཉིས་མེད། བགྲོད་བྱ་དང་བགྲོད་བྱ་མ་ཡིན་པ་གཉིས་མེད། བླང་བྱ་དང་དོར་བྱ་གཉིས་སུ་མེད་པར་སྤྱོད་པ་སྟེ། རྩ་རྒྱུད་དང་པོའི་དྲུག་པ་ལས། བཟའ་དང་བཟའ་མིན་སྤྱོད་པ་དང་། །དེ་བཞིན་བཏུང་མིན་སྤྱོད་པ་དང་། །བགྲོད་དང་བགྲོད་མིན་སྔགས་པ་ཡིས། །རྣམ་རྟོག་ཉིད་དུ་མི་བྱའོ། །ཞེས་པ་དང་། བརྟག་པ་ལྔ་པ་དངོས་ལས། བཟའ་བཅའ་དེ་བཞིན་བཏུང་བ་ཉིད། །ཇི་ལྟར་རྙེད་པ་རབ་ཏུ་བཟའ། །ཡིད་འོང་མི་འོང་རྣམ་རྟག་༼རྟོ༷ག་༽ཙམ་ཡིན་པའི་ཕྱིར། །ཞེན་པ་ཙམ་དུ་མི་བྱའོ། །ཞེས་བྱ་བ་ལ་སོགས་པ་གསུངས་སོ། །དེ་ལྟར་ན་ཨ་ཝ་དྷཱུ་ཏཱིའི་སྤྱོད་པ་ཞེས་བྱ་སྟེ། ལྔ་པའི་གསུམ་པ་ལས། དཔལ་ལྡན་རྡོ་རྗེ་སེམས་དཔས་ནི། །གང་ཞིག་འགྲོ་ལ་ཕན་པའི་ཕྱིར། །ཀུན་འདར་གྱི་ནི་སྤྱོད་པ་གསུངས། །ཞེས་སོ། །ཅིའི་ཕྱིར་སྨྱོན་པའི་བརྟུལ་ཞུགས་ཞེས་བྱ་ཞེ་ན། སྨྱོན་པར་བརྫུས་ནས་རིགས་ལ་སོགས་པ་གསང་ནས་སྤྱོད་པ་བྱེད་པ་སྟེ། ལྔ་པ་དངོས་ལས། བཟའ་དང་བཟའ་མིན་ཇི་སྙེད་པ། །སྨྱོན་པའི་སྦྱོར་བས་བཟའ་བར་བྱ། །ཞེས་སོ། །ཅིའི་ཕྱིར་རྒྱལ་བུ་གཞོན་ནུའི་སྤྱོད་པ་ཞེས་བྱ་ཞེ་ན། རྒྱལ་ཚབ་ཆེན་པོའི་ས་དྲོད་ཆེན་པོ་མ་ཐོབ་པའི་ཕྱིར་རྒྱལ་བུ་གཞོན་ནུའི་སྤྱོད་པ་ཞེས་བྱའོ། །རྣལ་འབྱོར་པ་ཁས་མི་ལེན་པར་གསང་སྟེ་སྤྱོད་པའི་ཕྱིར་གསང་སྤྱོད་ཅེས་བྱ་སྟེ། ལྔ་པའི་གསུམ་པ་ལས། དེ་ལྟར་སྤྱོད་པ་དེའི་བསམ་པ་དང་དགོས་ཆེད་སོགས་མཆོག་ཏུ་བསམ་བྱས་ནས་༼ཡ༷ས་གན༷ས༽། །ཏེ་གཞན་གྱིས་རྟོགས་དཀའ་བ་ཡིན་ནོ། །ཤིན་ཏུ་གསང་བས་ཡོ་གིས་བསྒོམ། །ཞེས་སོ། །ཅིའི་ཕྱིར་ཀུན་ཏུ་བཟང་པོའི་སྤྱོད་པ་ཞེས་བྱ་ཞེ་ན། རང་གི་རྟོགས་པའི་ཡེ་ཤེས་ཀྱི་ངོ་བོར་ཀུན་ཏུ་བཟང་པོར་རྟོགས་པའི་ཕྱིར་ཀུན་ཏུ་བཟང་པོ་སྟེ། ལྔ་པའི་གསུམ་པ་ལས། ཀུན་བཟང་མཚུངས་པ་མེད་འགྲུབ་པས། །སྤྱོད་པ་ངེས་རིག་རྡོ་རྗེ་ཅན། །ཞེས་གསུངས་སོ། །ཅིའི་ཕྱིར་ཕྱོགས་ལས་རྣམ་པར་རྒྱལ་བའི་སྤྱོད་པ་ཞེས་བྱ་ཞེ་ན། མི་མཐུན་པའི་ཕྱོགས་གང་གིས་ཀྱང་རྫི་མི་ནུས་ཤིང་དེ་ལ་རྒྱལ་༼ལས༷་རྒྱལ༷་༽བས་ན་ཕྱོགས་ལས་རྣམ་པར་རྒྱལ་བ་སྟེ། ལྔ་པའི་གསུམ་པ་ལས། བྱང་ཆུབ་སེམས་ལ་ནི་སེམས་བཞག་ནས། །ཕྱོགས་ལས་རྒྱལ་བའི་སྤྱོད་པ་བརྩམ། །ཞེས་གསུངས་སོ། །ཅིའི་ཕྱིར་རྒྱལ་ཚབ་ཆེན་པོའི་སྤྱོད་པ་ཞེས་བྱ་ཞེ་ན། རྣམ་ཤེས་དང་ཡེ་ཤེས་ཆ་མཉམ་སྟེ་ཟག་པ་མེད་པའི་ཡེ་ཤེས་རྣམས་མངོན་དུ་གྱུར་པས་གཞན་དོན་རྣམས་ཐོགས་པ་མེད་པར་ནུས་པའི་ཕྱིར་འཇིག་རྟེན་པའི་རྒྱལ་པོའི་རྒྱལ་ཚབ་ཆེན་པོ་དང་འདྲ་སྟེ། ལྔ་པ་དངོས་ལས། ཡང་ནི་དཔལ་ལྡན་རྒྱལ་ཚབ་ཆེ། །བརྟུལ་ཞུགས་སྤྱོད་པའང་བསྒྲགས་པ་ཉིད། །སེམས་ཅན་ཀུན་གྱི་དོན་གྱི་ཕྱིར། །གང་གིས་དངོས་གྲུབ་མཐར་འགྲོ་བ། །ཞེས་གསུངས་སོ། །དེ་ཉིད་ལ་འཇིག་རྟེན་པའི་མངོན་དུ་སྤྱོད་པའི་ཕྱིར་ཚོགས་བདག་ཆེན་པོའི་སྤྱོད་པ་ཞེས་ཀྱང་བྱའོ། །སྤྱི་དོན་བཞི་པ་སྤྱོད་པ་སྤྱད་པའི་དུས་ནི་གཉིས་ཏེ། གང་གི་ཚེ་སྤྱད་པ་དང་། ཇི་སྲིད་ཅིག་སྤྱད་པའོ། །དང་པོ་ནི་དྲོད་ཐོབ་ནས་སྤྱོད་པ་སྤྱད་པ་ཡིན་ཏེ། དེའང་གསུམ་སྟེ། དྲོད་ཆུང་ངུ་ཐོབ་ནས་ཀུན་འདར་གྱི་སྤྱོད་པ་གསང་སྟེ་སྤྱོད་པ་ཞེས་བྱ་བ་མཚན་མོའི་དུས་སུ་བཟའ་བྱ་དང་བཟའ་བྱ་མ་ཡིན་པ་གཉིས་སུ་མེད་པ་ལ་སོགས་པ་སྤྱོད་ལ། ཉིན་མོར་རང་གི་ཁྱིམ་དུ་བྲམ་ཟེ་ཡིན་ན་བྲམ་ཟེ་ཟླ་དང་མཐུན་པར་སྤྱོད། དེ་བཞིན་དུ་རང་གི་རིགས་དང་རྗེས་སུ་མཐུན་པར་སྤྱོད་ཅིང་སྡོད་དོ། །དེས་ངེས་པར་དྲོད་འབྲིང་པོ་སྐྱེ་སྟེ། དེ་སྐྱེས་པ་དང་ཀུན་འདར་གྱི་སྤྱོད་པ་འཇིག་རྟེན་པའི་མངོན་དུ་སྤྱོད་པ་ཞེས་བྱ་བ་རང་གི་ཡུལ་འཁོར་སྤངས་ནས་རིགས་ལ་སོགས་པ་གསང་ནས་སྨྱོན་པར་བརྫུས་ཏེ་སྤྱོད་པ་ཡིན་ནོ། །དེས་དྲོད་ཆེན་པོ་ཐོབ་སྟེ་ཟག་པ་མེད་པའི་ཡེ་ཤེས་འཇིག་རྟེན་ལས་འདས་པའི་གྲུབ་མཐའ་སྙོགས་ནས། ལུང་བསྟན་པའི་ཕྱག་རྒྱ་བྱུང་བ་དང་། ཀུན་ཏུ་བཟང་པོའི་སྤྱོད་པ་འཇིག་རྟེན་གྱི་མངོན་དུ་སྤྱད་དོ། །གལ་ཏེ་དྲོད་འབྲིང་པོ་ལ་བརྟེན་ནས་ཀུན་འདར་སྤྱད་ཀྱང་དབང་པོ་རྟུལ་ཏེ། དེ་དྲོད་ཆེན་པོ་མ་ཐོབ་ན་དྲག་ཤུལ་གྱིས་སྒྲུབ་པར་བྱེད་པ་ནི་གོང་དུ་བཤད་ཟིན་ཏོ། །གཉིས་པ་སྤྱོད་པ་དེ་དག་ཀྱང་དུས་ཇི་སྲིད་ཅིག་སྤྱད་སྙམ་ན། ཟླ་བ་རེ་རེ་སྤྱོད་དེ། རྩ་རྒྱུད་ཕྱི་མའི་གཉིས་པ་ལས། ཟླ་བ་གཅིག་ཏུ་གསང་ལ་སྤྱོད། །ཇི་སྲིད་ཕྱག་རྒྱ་མ་རྙེད་པ། །ཞེས་གསང་སྤྱོད་ཀྱི་དུས་བསྟན་ལ། དེ་ཉིད་ལས། ཟླ་བ་གཅིག་གིས་སྐལ་ལྡན་པར། །འགྱུར་བ་འདི་ལ་ཐེ་ཚོམ་མེད། །ཅེས་འཇིག་རྟེན་པའི་མངོན་དུ་སྤྱད་པའི་དུས་བསྟན་ཏོ། །སྤྱི་དོན་ལྔ་པ་རྟེན་གྱི་གང་ཟག་ནི་དྲོད་ཐོབ་ཅིང་སེམས་ཅན་གྱི་དོན་དུ་ཚེ་འདི་ཉིད་ལ་མཆོག་གི་དངོས་གྲུབ་འདོད་པ་ཆོས་གཉིས་དང་ལྡན་པ་ཡིན་ཏེ། རྩ་རྒྱུད་དང་པོའི་དྲུག་པ་ལས། ཅུང་ཟད་དྲོད་ནི་ཐོབ་པ་ན། །གལ་ཏེ་སྤྱོད་པ་བྱེད་འདོད་པས། །གལ་ཏེ་ཚེ་འདི་ལ་སངས་རྒྱས་འགྲུབ་པར་འགྱུར་བའི་འདོད་ཡོད་ན། །འདིས་ནི་སྤྱོད་པ་སྤྱད་པ་ཉིད། །ཅེས་གསུངས་སོ། །དེ་ཡང་དྲོད་མ་ཐོབ་ན་སྤྱོད་པ་སྤྱད་པར་མི་རིགས་ཏེ། རྩ་རྒྱུད་ཕྱི་མའི་གཉིས་པ་ལས། གང་བཤད་འཇིགས་སུ་རུང་པའི་ཚུལ་ཅན་གྱིས། །སྤྱོད་པ་འདོད་ཡོན་ལ་ལོངས་སྤྱོད་ཕྱིར་མ་གསུངས་ཏེ་རང་གི་རྟོགས་པ་འཕེལ་བའི་ཕྱིར་རོ། །ཞེས་པ་དང་། དཔལ་གསང་བ་གྲུབ་པ་ལས་ཀྱང་། གང་ཕྱིར་དེ་ཁོ་ན་ཉིད་རྟོགས་པ་མེད་བཞིན་དུ། །ངོ་མཚར་ཆེ་བ་ལྟར་བྱེད་པ། །ཇི་སྲིད་ནམ་མཁའ་མི་འཇིག་པའི་བར་དུ། །ཤི་བའི་འོག་ཏུ་དམྱལ་བར་སྐྱེ། །ཞེས་པ་དང་། དེ་ཉིད་ལས། གཞན་དུ་དེ་ཁོ་ན་ཉིད་རྟོགས་པ་དམན་པ་ཡིས། །འཚོ་བ་ཙམ་འགྲུབ་པའི་རྒྱུ་ཅན་ཉིད་གྱུར་པ། །དམྱལ་བ་ཐོབ་པར་བྱེད་པའི་རྒྱུ། །རྟོགས་ལྡན་དུ་མིང་བཏགས་པའི་བརྟུལ་ཞུགས་ཀྱིས་ནི་ཅི་ཞིག་བྱ། །ཞེས་གསུངས་སོ། །མཚན་ཉིད་གཉིས་པ་དྲོད་ཐོབ་ཀྱང་བྱང་ཆུབ་ཀྱི་སེམས་ཀྱིས་ཚེ་འདི་ཉིད་ལ་ཕྱག་རྒྱ་ཆེན་པོ་མི་འདོད་ན་སྤྱོད་པ་སྤྱད་མི་དགོས་ཏེ། ཐུན་མོང་གི་དངོས་གྲུབ་ནི་ངག་ཏུ་བརྗོད་པ་ཙམ་གྱིས་འགྲུབ་པའི་ཕྱིར་རོ། །དེ་ལྟར་མཚན་ཉིད་གཉིས་དང་ལྡན་པས་སྤྱོད་པ་སྤྱད་དོ། །སྤྱི་དོན་དྲུག་པ་སྤྱོད་པའི་དགོས་པ་ནི་གཉིས་ཏེ། ཀུན་འདར་གྱི་སྤྱོད་པའི་དགོས་པ་དང་། ཀུན་ཏུ་བཟང་པོའི་དགོས་པའོ། །དང་པོ་ལ་གཉིས་ཏེ། རང་གི་སེམས་ཀྱི་བརྟན་གཡོ་བརྟག་པ་དང་། གྲུབ་པ་ཐོབ་པའི་ཡུལ་དང་གྲོགས་དབང་དུ་བྱ་བའོ། །དང་པོ་ལ་ཡང་རྩ་རྒྱུད་ཕྱི་མའི་གཉིས་པ་ལས། ཡིད་ནི་བརྟན་ནམ་གཡོ་འམ་ཅི། །རང་གི་སེམས་ནི་སོ་སོར་བརྟག །ཅེས་པ་དང་། རྩ་རྒྱུད་དང་པོའི་དྲུག་པ་ལས། སྤྱོད་པ་གང་གིས་དངོས་གྲུབ་ཀྱི་མཐར་ཐུག་པར་འགྲོ་བ། །ཀྱེ་ཡི་རྡོ་རྗེའི་དངོས་གྲུབ་རྒྱུས། །ཞེས་བྱ་བ་ལ་སོགས་པ་གསུངས་སོ། །ཀུན་ཏུ་བཟང་པོའི་སྤྱོད་པའི་དགོས་པ་ནི་སེམས་ཅན་རྣམས་ཡོངས་སུ་སྨིན་པར་བྱ་བའི་དགོས་པ་སྟེ། བརྟག་པ་ལྔ་པ་དངོས་ལས། སེམས་ཅན་རྗེས་སུ་གཟུང་བའི་རྒྱུར། །བློ་ལྡན་ཆེན་པོས་རྒྱུ་བར་བྱ། །ཞེས་བྱ་བ་ལ་སོགས་པ་གསུངས་སོ། །མདོར་ན་ཀུན་འདར་གྱི་སྤྱོད་པ་རང་དོན། ཀུན་ཏུ་བཟང་པོའི་སྤྱོད་པ་གཞན་དོན་ནོ། །དེ་ལྟར་སྤྱོད་པ་འདིའང་རྩ་རྒྱུད་ལེའུ་དྲུག་པ་དང་། ཕྱི་མའི་གཉིས་པ་དང་། གསུམ་པ་རྣམས་དང་། རྡོ་རྗེ་གུར་ལེའུ་བཅུ་པ་དང་། སཾ་པུ་ཊའི་བརྟག་པ་ལྔ་པའི་གསུམ་པ་དང་། བཞི་པ་ལས་བསྟན་ཏོ། །དྲོད་ཐོབ་ནས་སྤྱོད་པ་བྱ་བ་བསྟན་ཟིན་ཏོ། །དེ་ལྟར་སྤྱོད་པ་ལ་གནས་པ་དེས་མཆོག་གི་དངོས་གྲུབ་ཀྱི་མངོན་པར་རྟོགས་པ་ལྔ་པ་ཕྱག་རྒྱ་ལ་བརྟེན་ནས་ཨཱ་ལི་དང་ཀཱ་ལིའི་བདག་ཉིད་ཀྱི་བྱང་ཆུབ་ཀྱི་སེམས་བསྒོམ་པ་བསྟན་ཏོ། །དེ་ལ་གཉིས། ཉེ་རྒྱུའི་དགོས་པ་དང་། དེ་ཉམས་སུ་བླང་བའི་ཚུལ་ལོ། །དང་པོ་ནི་ཕྱག་རྒྱ་ཆེན་པོ་བསྒྲུབ་པ་ལ་རྟེན་ཕྱག་རྒྱར་མ་བརྟེན་པར་འགྲུབ་པར་མི་འགྱུར་ཏེ། རྩ་རྒྱུད་དང་པོའི་བཅུ་པ་ལས། དངོས་གྲུབ་ཀྱི་མཚན་ཉིད་རྟོགས་པས་མི་ཕྱེད་པ། །ཕྱག་རྒྱའི་རྣལ་འབྱོར་པ་ཡིས་འགྲུབ། །ཅེས་གསུངས་པ་དང་། གུར་ལེའུ་བཅོ་ལྔ་པ་ལས་ཀྱང་། ཕྱག་རྒྱའི་དངོས་གྲུབ་དངོས་གྲུབ་ཆེ། །དངོས་གྲུབ་ཀུན་གྱི་སྤྱོད་ཡུལ་མིན། །ཞེས་བྱ་བ་ལ་སོགས་པ་གསུངས་སོ། །དེ་ཡང་སྤྱིར་ཕྱག་རྒྱ་བསྟེན་པའི་དུས་གསུམ་སྟེ། དང་པོ་དབང་དུས་དང་། བར་དུ་ལམ་དུས་དང་། མཐར་འབྲས་བུའི་དུས་སོ། །དེ་ལ་དུས་ཐམས་ཅད་དུ་བསྟེན་ན་ནི་འགྲུབ་ལ། ཐོག་མ་གཉིས་སུ་བསྟེན་ཡང་མཐར་མ་བསྟེན་ན་མི་འགྲུབ་ཅིང་། ཐོག་མ་གཉིས་སུ་མ་བསྟེན་ཡང་མཐར་བསྟེན་ན་འགྲུབ་པས་ན་མངོན་པར་རྟོགས་པ་འདི་གལ་ཆེའོ། །དེ་ལ་དེ་ལྟར་ཕྱག་རྒྱའི་ལམ་གྱིས་ཅིས་ཀྱང་གྲོལ་ཞིང་དེ་དགོས་ན་བུད་མེད་བདག་མེད་མའི་རྣལ་འབྱོར་མས་བདག་དང་རྟོགས་པ་མཉམ་པའི་སྐྱེས་པ་དང་ཕྲད་ན་ནི་གྲོལ་བར་འགྱུར་ལ། གལ་ཏེ་མ་ཕྲད་ན་ཇི་ལྟར་སངས་རྒྱས་ཀྱི་ལམ་བསྒྲུབ་སྙམ་ན། ས་བཅུ་པའི་བར་དུ་ནི་རྟེན་དེ་ཉིད་ཀྱིས་བགྲོད་ལ། དེ་ནས་ནུས་པ་མཆོག་དང་ལྡན་པའི་ཕྱིར་བདག་ཉིད་ཀྱི་ལུས་སྐྱེས་པར་བསྒྱུར་ལ། མངོན་པར་རྟོགས་པ་ལྔ་པ་འདི་ཉམས་སུ་བླངས་ལ་སངས་རྒྱས་བསྒྲུབ་བོ། །དེ་ཡང་ཐབས་ཀྱི་རྐྱེན་གྱིས་ནི་ཤེས་རབ་གྲོལ་བར་འགྱུར་ལ། ཤེས་རབ་ཀྱི་རྐྱེན་གྱིས་ཐབས་གྲོལ་བར་ཡང་མི་འགྱུར་ཞིང་། ཤེས་རབ་ཀྱི་རྟེན་རྐྱང་པ་ཉིད་ཀྱིས་གྲོལ་བར་མི་འགྱུར་བས་བུད་མེད་དྲོད་ཆེན་པོ་ཐོབ་པ་དེས་བདག་ཉིད་ཀྱི་ལུས་ཧེ་རུ་ཀ་ཆེན་པོར་བྱིན་གྱིས་བརླབས་ཏེ། གཟོད་མིའི་ཕྱག་རྒྱ་ལ་སོགས་པ་ཕྱག་རྒྱའི་རིགས་བཞི་པོ་དང་པོ་ནས་གོམས་པ། གྲུབ་པ་ཐོབ་པ། ལུང་བསྟན་པ། ནུས་མཐུའི་བཀུག་པ་གང་རུང་ཞིག་བླངས་ལ་འབྲས་བུ་དང་མཚམས་སྦྱར་བར་བྱ་སྟེ། དེ་སྐད་དུ། རྩ་རྒྱུད་ཕྱི་མའི་གཉིས་པ་ལས་ཀྱང་། བུད་མེད་གཟུགས་ནི་སྤངས་ནས་གཞན། །ཧེ་རུ་ཀ་ཡི་གཟུགས་སུ་བྱ། །ཞེས་བྱ་བ་ལ་སོགས་པ་གསུངས་སོ། །དོན་གཉིས་པ་དེ་ལྟ་བུའི་མངོན་པར་རྟོགས་པ་དེ་ཉམས་སུ་བླང་བ་ལ་དྲུག་སྟེ། ཉེ་བའི་རྒྱུའི་རང་གི་ངོ་བོ་དང་། དེ་གང་གི་ཚེ་མངོན་དུ་བྱ་བའི་དུས་དང་། མངོན་དུ་བྱ་བའི་གནས་དང་། གང་ལ་བརྟེན་ཏེ་སྒྲུབ་པའི་རྟེན་དང་། མངོན་དུ་བྱེད་པའི་ཐབས་དང་། ཐབས་ལ་བརྟེན་ཏེ་མངོན་དུ་བྱས་པ་ལས་འབྲས་བུ་འགྲུབ་པའི་ཚུལ་ལོ། །དང་པོ་ལ་གཉིས། བརྒྱད་དྲུག་གི་བདག་ཉིད་དང་། དེ་ལ་རྩོད་པ་སྤང་བའོ། །དང་པོ་ནི་ཐབས་གཉིས་ལས་བྱུང་བའི་ཨཱ་ལི་དང་ཀཱ་ལིའི་བདག་ཉིད་བྱང་ཆུབ་ཀྱི་སེམས་ཆོས་བརྒྱད་དམ་དྲུག་གི་བདག་ཉིད་ཅན་ཞེས་བྱ་བ་ཡིན་ནོ། །དེ་ལ་ཐབས་གཉིས་ལ་བརྟེན་ནས་བྱུང་བ་ནི། རང་བྱིན་བརླབ་ལ་བརྟེན་ནས་བྱུང་བ་ནི་ཨཱ་ལི་བྱང་ཆུབ་ཀྱི་སེམས་ཞེས་བྱ་ལ། དཀྱིལ་འཁོར་འཁོར་ལོ་ལ་བརྟེན་ནས་བྱུང་བ་ལ་ཀཱ་ལི་བྱང་ཆུབ་ཀྱི་སེམས་ཞེས་བྱ་སྟེ། བརྟག་པ་དགུ་པའི་དང་པོ་ལས། ཨཱ་ལི་ནི་ཨ་ས་མ་མཉམ་པ། ལ་ཏི་ཡང་ན་ལི་ལེན་པ་སྟེ་མི་མཉམ་པའི་བདེ་བ་ལེན་པའི་ཕྱིར་ཁུ་བ་བུང་བ་ནི་བྷྲ་མ་ར་སྟེ་བྷྲ་མ་ར་འཁྲུལ་བ། ར་ཧེ་ཡ་བྲལ་བར་བྱེད་པ་ཞེས་པ་འཁྲུལ་པ་བྲལ་བར་བྱེད་པ་ཞེས་བྱར་བརྗོད། །བུང་བ་དེ་ཉིད་ནི་ཡེ་ཤེས་ཡིན་པའི་ཕྱིར་རྡོ་རྗེ་བྱིས་པ་སྐྲག་པས་འཇིགས་བྱེད་ཉིད། །ཀཱ་ལི་ནི་ཀཾ་བདེ་བ་ཨཱ་ལི་དྲི་ཀུན་ནས་མྱོང་བའི་ཕྱིར་ཕྱག་རྒྱའི་བྷ་ག །སྐྱེ་གནས་ཀྱི་ཆུ་སྐྱེས་འདིས་རྒྱས་པར་བྱེད་པའི་ཕྱིར་མེ་ཏོག་ཅེས་རྡུལ་རྒྱལ་པོ་ནི་རཱ་ཛ་སྟེ་རཉྫ་ཡ་ནི་འཚེད་པར་བྱེད་པ་སྟེ་བྱང་སེམས་རང་གི་གནས་སུ་དྲངས་ནས་བདེ་བའི་ཡེ་ཤེས་ཀྱི་འཚེད་པས་རྒྱལ་པོ། །དེས་ཁྱད་པར་དུ་བྱས་པའི་ལུས་ནི་མེ་ཏོག་རྡོ་རྗེ་ཅན་གྱི་ལུས་ཏེ་དེའང་རྡོ་རྗེ་ནི་སེམས་ཀྱི་རྡོ་རྗེ་སྟེ་བྱང་ཆུབ་ཀྱི་སེམས་དེས་བཟུང་བའོ། །ཞེས་བྱ་བ་ལ་སོགས་པ་གསུངས་སོ། །ཆོས་བརྒྱད་དམ་དྲུག་གི་བདག་ཉིད་ཅན་ཞེས་བྱ་ལ། བྱང་ཆུབ་ཀྱི་སེམས་གཅིག་ཉིད་སྟོན་༼རྟེ༷ན་༽ནམ་ཡོན་ཏན་གྱི་ལྡོག་པས་ཕྱེ་ན་ཐབས་སྒྲུབ་པ་པོས་རང་བྱིན་བརླབ་བསྒོམ་པའི་ཞུ་བདེ་གཉིས། དཀྱིལ་འཁོར་འཁོར་ལོ་བསྒོམ་པའི་ཞུ་བདེ་གཉིས་ཏེ་བཞི། ཤེས་རབ་ལ་ཡང་དེ་བཞིན་དུ་བཞི་སྟེ་བརྒྱད་དོ། །དྲུག་ནི་ཤེས་རབ་ཀྱིས་རང་བྱིན་བརླབ་མ་བསྒོམས་ཀྱང་ཐབས་ཀྱི་དེས་བཏུབ་པས་དྲུག་གོ། ཡང་ན་ཐབས་ལ་ཞུ་བ་བདེ་བ་མི་རྟོག་པ་རང་རིག་པ་བཞི། ཤེས་རབ་ལ་ཡང་བཞི་སྟེ་བརྒྱད་དོ། །དྲུག་ནི་ཞུ་བདེ་༼མི༷་རྟོ༷ག་པ༷་༽གསུམ་གསུམ་རང་རིག་པ་ནི་དེའི་ཆོས་ཉིད་ཡིན་པས་མ་བསྔོས་ན་དྲུག་སྟེ། གང་ལྟར་ཡང་རྟེན་ཐིག་ལེ་བཞི་ལ་བརྟེན་པ་བདེ་བ་བཞི་ཡོད་པ་ལྟ་བུ་ནི་མ་ཡིན་ཏེ། རྟེན་ཐིག་ལེ་གཅིག་ཉིད་བརྟེན་པ་བདེ་བ་ལ་སོགས་པ་དུ་མ་དང་ལྡན་པས་ཡོན་ཏན་གྱི་ལྡོག་པས་ཕྱེ་བས་བརྒྱད་དྲུག་ལ་སོགས་པར་འགྱུར་བ་ཡིན་ནོ། །དེའང་དང་པོ་རང་བྱིན་བརླབ་ཀྱི་ཐིག་ལེ་ཅུང་ཟད་དྭངས་པར་བྱས་ལ་དཀྱིལ་འཁོར་འཁོར་ལོས་ཤིན་ཏུ་དྭངས་པར་བྱས་པ་ཡིན་ནོ། །གཉིས་པ་རྩོད་སྤོང་ནི་འོ་ན་སེམས་ཀྱི་རྟོག་པ་འཆར་བ་ཞུ་བ་ལ་ལྟོས་པར་མི་རིགས་སོ་སྙམ་ན། ལྟོས་ཏེ་ཇི་སྲིད་དུ་ཟག་བཅས་ཀྱི་ལུས་གནས་པ་དེ་སྲིད་དུ་ཚོགས་པ་གཅིག་པའི་འབྲེལ་བས་གནས་ཏེ། རྩ་རྒྱུད་ཕྱི་མའི་བཞི་པ་ལས། ལུས་སྤངས་ནས་ནི་སེམས་ཀྱིས་ནི། །གནས་པ་གཞན་དུ་མི་མཐོང་ངོ་། །ཞེས་བྱ་བ་དང་། སེམས་སྤངས་ནས་ནི་ལུས་ཀྱིས་ནི། །མཛེས་པ་གཞན་དུ་མི་འགྱུར་རོ། །ཞེས་གསུངས་པས་སོ། །དེ་བས་ན་གསང་སྔགས་ཀྱི་ཐབས་ཟབ་མོ་ནི་རྟེན་ལུས་ལ་གནད་དུ་བསྣུན་པས་བརྟེན་པ་སེམས་ལ་གནད་དུ་བསྣུན་པ་ཡིན་ནོ་ཞེས་གསུངས་སོ། །ཟག་པ་མེད་པ་སངས་རྒྱས་ཀྱི་དུས་ནའང་ཐུགས་རྟོག་པ་མེད་པ་ཆོས་ཀྱི་སྐུ། ལུས་ཟག་པ་མེད་པ་ལོངས་སྤྱོད་རྫོགས་པའི་སྐུ། ཡེ་ཤེས་ཀྱི་རང་བཞིན་ཅན་གྱི་སྐུ་ལ་བརྟེན་པ་ཡིན་ཏེ། རྡོ་རྗེ་གུར་ལེའུ་བཅུ་བཞི་པ་ལས། རྡོ་རྗེ་སྙིང་པོ་རྣམ་པ་མེད་པའི་བྱང་ཆུབ་དེ་སྐད་མ་སྨྲ་ཞིག་ཅེས་གསུངས་པས་སོ། །གལ་ཏེ་དེ་ལྟར་ན། གང་དག་ང་ལ་གཟུགས་སུ་མཐོང་། །གང་གིས་ང་ལ་སྒྲར་ཤེས་པ། །ལོག་པར་ཤེས་པའི་བསམ་པ་ཅན། །སྐྱེ་བོ་དེས་ནི་ང་མི་མཐོང་། །ཞེས་བྱ་བའམ། སློབ་དཔོན་ཀླུ་སྒྲུབ་ཀྱིས་ཀྱང་། སྐུ་མིན་སྐུ་ལས་གཞན་པ་མིན། །དེ་བཞིན་གཤེགས་པ་སྐུ་ལྡན་མིན། །ཞེས་བྱ་བ་ལ་སོགས་པ་དང་མི་འགལ་ལམ་སྙམ་ན། དེ་དག་ནི་དོན་དམ་པ་འབའ་ཞིག་ལ་དགོངས་པ་ཡིན་ཏེ། ཡང་དག་པར་ན་སངས་རྒྱས་ཞེས་བྱ་བ་ཉིད་ཀྱང་བློའི་ཡུལ་དུ་མ་གྲུབ་པའི་ཕྱིར་རོ། །སངས་རྒྱས་འདོད་པའི་ཚེ་སེམས་མེད་པའི་སངས་རྒྱས་བེམ་པོའང་མི་རིགས་ལ་སྐུ་མེད་པའང་མི་རིགས་པས་ན། སློབ་དཔོན་ཀླུ་སྒྲུབ་ལ་སོགས་པ་ཐམས་ཅད་ཀྱང་ཟུང་དུ་འཇུག་པའི་སྐུ་ཞེས་བྱ་བ་བཞེད་པ་ཡིན་ནོ། །གཉིས་པ་དུས་ལ་གཉིས། ཉེ་རྒྱུ་ནམ་བསྒོམ་པའི་དུས་དང་། ནམ་འགྲུབ་པའི་དུས་སོ། །དང་པོ་ནི་རིམ་པ་གཉིས་བསྒོམས་ཏེ་དྲོད་ཐོབ་ནས་གསང་སྤྱོད་ཟླ་བ་གཅིག་དང་། འཇིག་རྟེན་པའི་མངོན་དུ་ཟླ་བ་གཅིག་སྤྱད་པའི་མཐར་ཉེ་རྒྱུ་སྤྱོད་པའི་སྐལ་པ་དང་ལྡན་པར་འགྱུར་རོ། །གཉིས་པ་ནམ་འགྲུབ་ཅེ་ན། ཞག་བདུན་དུ་སྤྱད་ན་འགྲུབ་པར་གསུངས་ཏེ། རྡོ་རྗེ་གུར་ལེའུ་བཅོ་ལྔ་པ་ལས། ས་བཅུ་གཉིས་པས་བསྒྲུབས་ན་ཉི་མ་གཅིག་གིས་འགྲུབ་པར་འགྱུར། །དེས་མ་འགྲུབ་ན་ཉི་མ་གཉིས་ཀྱིས་ཆོ་ག་དང་། །ས་བཅུ་གཅིག་པས་ཉི་མ་གསུམ་གྱི་སྦྱོར་བ་དང་། །བཅུ་པས་དེ་བཞིན་དུ་ནི་ཉི་མ་བཞི། །དགུ་པས་ཉི་མ་ལྔ་ཡི་སྦྱོར་བ་ཡིས། །འགྲུབ་འགྱུར་འདི་ལ་ཐེ་ཚོམ་མེད། །ཅེས་སོ། །ཞག་བདུན་གྱིས་བསྒྲུབ་པའི་དབང་དུ་བྱས་ན་ཞག་དྲུག་པ་ལ་སྔོན་དུ་ལྷ་དང་བླ་མ་ལ་མེ་ཏོག་ལ་སོགས་མཆོད་བྱས་ནས། །བསམ་གཏན་བསྒོམ་པའི་གནས་སུ་འདུག་པ་དང་། །ཕྱག་རྒྱ་དང་ལྷན་ཅིག་སྙོམས་པར་ཞུགས་ནས་ནི། །རྡོ་རྗེ་མཆོད་པ་ཡང་དག་བརྩམས། །རྡོ་རྗེ་ཉི་མ་ནུབ་པ་སྟེ་སྲོད་ལ་བར་ཆད་མེད་པའི་ལམ་གྱི་དུས་ན། །ཉེ་རྒྱུའི་སྦྱོར་བ་འདི་ནི་ཡང་དག་བརྩམས། །ཉི་མ་འཆར་ཀའི་དུས་སུ་ནི། །དངོས་གྲུབ་འགྲུབ་འགྱུར་འདི་ལ་ཐེ་ཚོམ་མེད། །ཐ་མལ་པའི་འདོད་ཆགས་ལས་མཆོག་ཏུ་གྱུར་པས་འདོད་ཆགས་ཆེན་པོ་ཟག་མེད་ཀྱི་བདེ་བ་ལ་རྗེས་ཆགས་པས། །འདོད་ཆགས་ཆེན་པོའི་རང་བཞིན་ལས། །ཆགས་ཆེན་ཏིང་འཛིན་གནས་ནས་ནི། །ཟུང་འཇུག་གི་སྐུ་ཕྱག་རྒྱ་ཆེན་པོ་རབ་བསྒྲུབ་བྱ། །ཞེས་གསུངས་ཏེ། ཐོ་རངས་མངོན་པར་རྫོགས་པར་འཚང་རྒྱ་བའི་དུས་ཞེས་བྱ་སྟེ། ཐོ་རངས་རླུང་སེམས་དྭངས་པར་གྱུར་པའི་དུས་ཡིན་པའི་ཕྱིར་རོ། །གསུམ་པ་གནས་ལ་གཉིས་ཏེ། ཕྱིའི་གནས་དང་། ནང་གིའོ། །དང་པོ་ནི་གསུམ། ཐུན་མོང་གི་དང་། ཐུན་མོང་མ་ཡིན་པ་ལ་གྲགས་པ་དང་། དོན་དམ་པའིའོ། །དང་པོ་ཐུན་མོང་བ་ལ་གྲགས་པ་རྡོ་རྗེའི་དན་ཡིན་ལ། གཉིས་པ་ཐུན་མོང་མ་ཡིན་པ་ལ་གྲགས་པ་ནི་འོག་མིན་ཡིན་ནོ། །གསུམ་པ་དོན་དམ་པའི་གནས་ནི་རྡོ་རྗེ་ཐེག་པ་བས་སྒྲུབ་པ་པོ་རང་ཉིད་གང་ན་གནས་པ་དེ་ཉིད་རྡོ་རྗེའི་གདན་ཡིན་ཏེ། བདེ་མཆོག་རྩ་རྒྱུད་ལས། རྣལ་འབྱོར་པ་ཆེན་པོ་མཆོག་ཏུ་གྱུར་པ་སེམས་ཀྱི་སྟོང་ཉིད་རྟོགས་པའི་ཧེ་རུ་ཀ། ཡུལ་ཕྱོགས་གང་ན་གནས་གྱུར་པ། །ཡུལ་ངན་མཐའ་འཁོབ་ཡིན་ན་ཡང་། །ཡུལ་དེ་རྡོ་རྗེ་གདན་དུ་ཡོངས་སུ་བརྟག་པ་ཡིན། །ཞེས་གསུངས་ཏེ་༼སོ༷། །༽ནང་གི་གནས་ནི་ཐབས་ཀྱི་རིགས་ཀྱི་བདག་པོའི་ཁ་དང་ཤེས་རབ་ཀྱི་རྩ་མཛེས་པའི་སྤྱི་བོར་ཆོས་འབྱུང་གི་གནས་སུ་འཛོམ་པ་སྟེ། རྩ་རྒྱུད་ཕྱི་མའི་གསུམ་པ་ལས། ཨེ་ཡི་ཆ་བྱད་བཟང་པོ་གང་། །དབུས་སུ་བྃ་གྱིས་རྣམ་པར་བརྒྱན། །བདེ་བ་ཐམས་ཅད་ཀྱི་ནི་གནས། །སངས་རྒྱས་རིན་ཆེན་ཟ་མ་ཏོག །ཅེས་གསུངས་ཏེ། གནས་དེ་ནས་ཨ་ཝ་དྷཱུ་ཏཱིར་མངོན་དུ་བྱའོ། །བཞི་པ་རྟེན་གང་ལ་བརྟེན་ནས་མངོན་དུ་བྱ་ན། སྤྱིར་ཕྱག་རྒྱ་ནི་དང་པོ་ནས་གོམས་པ་དང་། གྲུབ་པ་ཐོབ་པ་དང་། ལུང་བསྟན་པ་དང་། མཐུའམ་ནུས་པས་བཀུག་པ་ཞེས་བྱ་བ་བཞིར་བཤད་པ་ལས། སཾ་པུ་ཊའི་དགོངས་པ་བཞི་ཀས་ཀྱང་གྲོལ་བའི་རྟེན་དུ་འགྱུར་ཏེ། བཅུ་པའི་དང་པོ་ལས། གཏི་མུག་རྣམ་སྣང་གི་བདག་ཉིད་ཀྱི་རྣལ་འབྱོར་ངེས་པར་བསྟེན་བྱ་མ་ཞེས་པ་བརྡ་མིང་ཡིན་ལ་ངོ་བོ། །ལྷ་མོའང་༼མོའམ༷་༽སྐྱེ་གཉིས་བདག་ཉིད་སྐྱེས་ཏེ་བྲམ་ཟེ་མོ། །གཏི་མུག་རྣམ་དག་བསམ་གཏན་པས། །བླངས་ནས་ཡུམ་སྤྱན་མར་བསྐྱེད་ན་མངོན་སུམ་དུ་རྣམ་སྣང་དུ་འགྱུར་རོ། །མ་ནི་རིག་མ་དམ་པ་སྟེ། །གལ་ཏེ་ཕ་སྟེ་བླ་མ་ཡིས་སྔར་བསྟེན་ཀྱང་། །དེ་བཞིན་དེ་ཉིད་ཀྱིས་ཀྱང་འགྲུབ། །བདེ་བ་ཆེན་པོས་བཀའ་སྩལ་ཏོ། །ཞེས་བྱ་བ་ལ་སོགས་པ་གསུངས་སོ། །རྡོ་རྗེ་གུར་གྱི་དགོངས་པས་ནི། མིའི་ཕྱག་རྒྱ་རྣམས་ཀྱིས་ནི་གྲོལ་བའི་རྟེན་དུ་འགྱུར་ལ། ལྷ་མོ་ལ་སོགས་པ་རྣམས་ཀྱིས་ནི་ལོངས་སྤྱོད་ཀྱི་རྐྱེན་ལས་གྲོལ་བར་མི་འགྱུར་ཏེ། གུར་ལེའུ་བཅོ་ལྔ་པ་ལས། པདྨར་རྡོ་རྗེ་ཅན་བཅུག་ནས། །རང་གི་རིག་མ་བདག་སྟེེ་མ་མཱ་ཀིར་བྱ། །དེ་དང་ལྷན་ཅིག་འགྲུབ་པར་འགྱུར། །མིའི་ཕྱག་རྒྱ་འདི་ནི་ཕྱག་རྒྱ་ཆེན་པོར་བརྗོད། །མི་ཡི་ཕྱག་རྒྱ་བླངས་ནས་ནི། །དེ་ལ་ཆོས་ཀྱིས་རབ་ཏུ་དབྱེ་བ་སྟེ་ཕྱག་རྒྱའི་དབྱེ་བ་སོ་སོར་ཤེས་པར་བྱའ།ོ། ཞེས་བྱ་བ་ནས། བདུན་གྱི་རྒྱལ་པོ་དོན་གྲུབ་འགྲུབ་པ་དང་། །ཐམས་ཅད་འདྲེན་པ་རྡོ་རྗེ་འཆང་འགྲུབ་པར་འགྱུར། །ཞེས་གསུངས་པས་ན། མིའི་ཕྱག་རྒྱ་འབའ་ཞིག་བསྔགས་སོ། །གང་ལྟར་ཡིན་ཡང་རུང་སྟེ། ཕྱག་རྒྱ་རྣམས་སྤྱན་ལ་སོགས་པར་བསྐྱེད་ལ། སྙོམས་པར་འཇུག་པ་བྱ་སྟེ། སཾ་པུ་ཊའི་བཅུ་པའི་དང་པོ་ལས། སྤྱན་དང་ལྷན་ཅིག་སངས་རྒྱས་ཉིད། །མཱ་མ་ཀཱི་དང་མི་བསྐྱོད་པ། །འགྲུབ་འགྱུར་དཀར་མོ་ལྷན་ཅིག་ཏུ། །པདྨ་ཅན་དང་སྒྲོལ་མ་ནི། །ལྷན་ཅིག་དོན་ཡོད་གྲུབ་པར་འགྱུར། །རིན་ཆེན་རིན་ཆེན་མ་དང་འགྲུབ། །ཅེས་བྱ་བ་ལ་སོགས་པ་གསུངས་སོ། །ལྔ་པ་རྒྱུ་དེ་མངོན་དུ་བྱེད་པའི་ཐབས་ལ་གཉིས་ཏེ། རང་བྱིན་བརླབ་དང་། དཀྱིལ་འཁོར་འཁོར་ལོའོ། །དང་པོ་རང་བྱིན་གྱིས་བརླབ་པའི་རིམ་པ་ཅུང་ཟད་མངོན་དུ་བྱས་པས་རླུང་སེམས་ཤིན་ཏུ་དྭངས་པར་བྱའོ། །དེ་ནས་གཉིས་པ་དཀྱིལ་འཁོར་འཁོར་ལོའི་ལམ་གྱི་འབྲས་བུ་མངོན་དུ་བྱའོ། །དྲུག་པ་ཐབས་མངོན་དུ་བྱས་པ་ལས་འབྲས་བུ་འགྲུབ་པའི་ཚུལ་ནི། གཉིས་ལས། དང་པོ་ཐེག་པ་ཐུན་མོང་བ་ལ་གྲགས་པའི་དབང་དུ་བྱས་ན། སྲོད་ལ་བར་ཆད་མེད་པའི་ལམ་གྱིས་བདུད་བཏུལ་ནས། ཐོ་རངས་བསམ་གཏན་བཞི་པ་ལ་བརྟེན་ཏེ། རྣམ་པར་གྲོལ་བའི་ལམ་གྱིས་སངས་རྒྱས་ཞེས་ཟེར་ལ། གཉིས་པ་འཚང་རྒྱ་ཚུལ་ཐུན་མོང་མ་ཡིན་པ་ལས་འབྱུང་བ་ལ་གཉིས། ཕྱིའི་མངོན་པར་བྱང་ཆུབ་པ་དང་། ནང་གི་མངོན་པར་བྱང་ཆུབ་པའོ། །དང་པོ་ནི་མངོན་པར་བྱང་ཆུབ་པ་ལྔའི་རིམ་པས་འཚང་རྒྱ་བར་བཤད་ལ། ནང་གི་ནི་དབང་གི་གནས་མཆོག་གི་ཟེ་བར་བྱང་ཆུབ་ཀྱི་སེམས་ཆོས་བརྒྱད་དམ་དྲུག་གི་བདག་ཉིད་ཅན་མངོན་དུ་བྱས་ནས་རླུང་འདྲེན་པ་རྣམ་པ་གསུམ་ཞེས་བྱ་བ་གཡས་དང་། གཡོན་དང་། དབུས་མ་གསུམ་ནས་དྲངས་ཏེ་ཐབས་དང་ཤེས་རབ་ཀྱི་རྒྱུད་སོ་སོར་དག་པར་བྱས་ནས། རླུང་སེམས་ཨ་ཝ་དྷཱུ་ཏཱིར་ཚུད་ཅིང་ཐིམ་པའི་སྐད་ཅིག་ལ་ལུས་ཟག་པ་མེད་པ་འཇའ་ཚོན་ལྟ་བུའི་སྐུ་དང་། སེམས་རྟོག་པ་མེད་པ་མངོན་དུ་འགྲུབ་པར་འགྱུར་ཏེ། རྡོ་རྗེ་གུར་གྱི་བཅོ་ལྔ་པ་ལས། ཕྱག་རྒྱ་ལ་བརྟེན་པའི་དངོས་གྲུབ་ནི་དངོས་གྲུབ་ཆེ་སྟེ་རྣལ་འབྱོར་རྒྱུད་མན་གྱི། །དངོས་གྲུབ་ཀུན་གྱི་སྤྱོད་ཡུལ་མིན། །ཞག་དྲུག་པའི་ཐོ་རངས་དེའི་དུས་སུ་རྡོ་རྗེ་འཆང་དེ་ཡི་ལུས་སྐད་ཅིག་ལ་ཐོབ་ཅིང་། །སྐད་ཅིག་དེ་ཉིད་ན་ནི་བདེ་བ་ཆེན་པོའི་ཚུལ་ཏེ་སྐུར་འགྱུར། །སྐད་ཅིག་ན་ནི་འཇིག་རྟེན་དང་འཇིག་རྟེན་ལས་འདས་པ་ཐམས་ཅད་དེའི་འཁོར་དུ་ལྡན། །ལྷའི་རྣལ་འབྱོར་གང་སྒོམ་པ་དང་ནི་སྔགས་གང་བཟླས་པ་ཉིད་དག་གི་གོ་འཕང་ཐོག་མར་འགྲུབ་པས་རྣམ་སྣང་གི་རྣལ་འབྱོར་པ་ཡིན་ན་ཐོག་མར། སྐད་ཅིག་ལ་སངས་རྒྱས་རྣམ་སྣང་མཛད། །སྤྱན་གྱིས་ཕྲག་ནས་འཁྱུད་པའོ། །ཞེས་བྱ་བ་ནས། ཐམས་ཅད་འདྲེན་པར་འགྲུབ་པར་འགྱུར། །ཞེས་པ་དང་། ཡང་སཾ་པུ་ཊའི་བཅུ་པའི་གཉིས་པ་ལས། དེ་ནས་གང་དུ་རིག་མའི་སྐྱེས་བུ་གྲུབ་པ་དེས་འདི་ལྟ་བུའི་ཕུན་སུམ་ཚོགས་པ་འབྱུང་སྟེ་ཞེས་བྱ་བ་ལ་སོགས་པ་དང་། ཕྱག་རྒྱའི་སྐྱེ་གནས་ཀྱི་སྙིང་པོར་ཁམས་གསུམ་ཐམས་ཅད་མཐོང་བ་དང་། ཞེས་བྱ་བ་ལ་སོགས་པ་གསུངས་སོ། །དེ་ལྟ་བུའི་ཉེ་བའི་རྒྱུ་དེ་དག་ཀྱང་བརྟག་པ་གཉིས་པའི་ལེའུ་བརྒྱད་པ་དང་། བཅུ་པ་དང་། ཕྱི་མའི་གཉིས་པ་དང་། གསུམ་པ་དང་། བཞི་པ་ལས་ཅུང་ཟད་ཙམ་གསུངས་ལ། རྡོ་རྗེ་གུར་གྱི་བཅོ་ལྔ་པ་དང་། སཾ་པུ་ཊའི་དགུ་པ་དངོས་དང་། བཅུ་པའི་དང་པོ་དང་། གཉིས་པ་ལས་ཤིན་ཏུ་གསལ་བར་གསུངས་སོ། །ཉེ་བའི་རྒྱུ་བསྟན་ཟིན་ཏེ། ལམ་གྱི་གཙོ་བོ་མཆོག་གི་དངོས་གྲུབ་བསྒྲུབ་པའི་མངོན་པར་རྟོགས་པར་བསྟན་ཟིན་ཏོ། །
འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་མཐའ་དག་བསྒྲུབ་པ།
སྤྱི་དོན་གཉིས་པ་གཙོ་བོར་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་མཐའ་དག་བསྒྲུབ་པའི་དབང་དུ་བྱས་ནས། ལམ་གྱི་ཡན་ལག་གི་གྲངས་དང་གོ་རིམ་ལ་ངེས་པ་མེད་ཀྱང་། གཟུང་བདེ་བའི་དབང་དུ་བྱས་ནས་ལྔར་གསུངས་ཏེ། དེ་བཞིན་གཤེགས་པ་ཐམས་ཅད་ཀྱི་ཐུགས་བསྐུལ་བར་བྱ་བའི་ཕྱིར་སྔགས་ཀྱི་བཟླས་པ་དང་། བར་ཆད་ཞི་བར་བྱ་བའི་ཕྱིར་གཏོར་མ་དང་། དངོས་གྲུབ་མྱུར་དུ་འགྲུབ་པར་བྱེད་པའི་ཐབས་སྦྱིན་སྲེག་དང་། སྐུ་གཟུགས་བྱིན་གྱིས་བརླབས་པས་ཀྱང་འགྲུབ་པའི་ཕྱིར་རབ་གནས་དང་། སེམས་ཅན་དངོས་གྲུབ་དམན་པ་ལ་མོས་པའི་གང་ཟག་རྗེས་སུ་གཟུང་བའི་ཕྱིར་ལས་ཀྱི་ཚོགས་རབ་འབྱམས་སོ། །དང་པོ་སྔགས་ཀྱི་བཟླས་པ་ལ་གཉིས་ཏེ། སྔགས་ཀྱི་ངོ་བོ་དང་། དབྱེ་བའོ། །ངོ་བོ་ནི་རང་གི་སེམས་ཉིད་སྤྲོས་པའི་མཐའ་ཐམས་ཅད་དང་བྲལ་བའོ། །དབྱེ་ན་གསུམ་སྟེ། དོན་དམ་པའི་སྔགས་དང་། ནང་ལྟར་བཤད་པའི་སྔགས་དང་། ཕྱི་དོན་གྱི་སྔགས་སོ། །དང་པོ་ནི་ངོ་བོ་དང་མཐུན་པར་རང་གི་སེམས་ཉིད་དེ། སཾ་པུ་ཊའི་གཉིས་པའི་གསུམ་པ་ལས། སྒོམ་པ་ལྷ་ཡི་རྣལ་འབྱོར་དང་། །སྔགས་ཀྱི་བཟླས་པའི་ཆོག་རིམ་དང་། །བྲིས་སྐུ་དང་ནི་སྐུ་གཟུགས་ཀྱང་དོན་དམ་པར་བཤད་དུ་མེད་ཀྱང་གཉིས་མེད་ཡེ་ཤེས་ཀྱི། །སེམས་ཀྱིས་ཐམས་ཅད་སྤྲུལ་པ་སྟེ། །དེའི་དགོས་པ་ནི་སེམས་ཅན་རྣམས་ལ་ཕན་འདོད་ཕྱིར། །ང་ཡི་རྒྱུད་དུ་བསྒྲགས་པ་ཡིན། །ཞེས་གསུངས་སོ། །གཉིས་པ་ནི་རང་གི་ལྟེ་བའི་ཨྃ་སྟེ། སཾ་པུ་ཊའི་དང་པོའི་བཞི་པ་ལས། ལུས་ཅན་རྣམས་ནི་ཐམས་ཅད་ཀྱི། །ལྟེ་བའི་ཨྃ་སྒྲ་ནི་སྔགས་ཞེས་བརྗོད་པར་བྱ། །ཞེས་པ་ནས། རང་བཞིན་གྱིས་ནི་མ་སྐྱེས་པའི། །ཨའི་སྔགས་ནི་ཡི་གེ་ཐམས་ཅད་ཀྱི་འབྱུང་གནས་ཡིན་པས་ཡིག་འབྲུའི་དབང་ཕྱུག་མཆོག་གོ། ཅེས་བྱ་བའི་བར་དུ་གསུངས་སོ། །ཡང་ལྟེ་བའི་ཨྃ་ལས་སྔགས་ཐམས་ཅད་འབྱུང་སྟེ། དེ་ཉིད་ལས། དེ་ལྟར་དོན་ཆེན་པོ་ལྡན་པའི་ཨ་ནི་སྡེ་ཚན་གཙོ་བོ་སྟེ། །ལུས་ཅན་རྣམས་ཀྱི་སྔགས་ཀུན་ནི། །འདི་ཉིད་ལས་ནི་ཡང་དག་འབྱུང་། །ཞེས་གསུངས་པས་སོ། །ཕྱི་དོན་གྱི་སྔགས་ལ་དྲུག་སྟེ། སྔགས་དག་པར་བྱ་བའི་དོན་ཏུ་བཏུ་བ་དང་། བཏུས་པའི་སྔགས་དངོས་དང་། བཟླས་པའི་ཡུལ་ཕྲེང་བ་དང་། ཁ་ཟས་དང་། བཟླས་པའི་མན་ངག་དང་། དགོས་པའོ། །དང་པོ་ལ་གསུམ། ལུས་དང་ཡན་ལག་གིས་བཏུ་བ་དང་། ཚིགས་སུ་བཅད་པས་བཏུ་བ་དང་། བཟློག་སྟེ་བཏུ་བའོ། །དང་པོ་ལ་གཉིས་ཏེ། བཏུ་བའི་གཞི་དང་། བཏུ་བའི་ཐབས་སོ། །གཞི་ནི་ཨཱ་ལི་ཀཱ་ལིའོ། །བཏུ་བའི་ཐབས་ནི་ཀཱ་ལི་ལས་ལུས་བཏུ་ལ། ཨཱ་ལི་ལས་ཡན་ལག་བཏུ་སྟེ། དེ་ལའང་གསུམ། འཁོར་ལོ་ལ་བརྟེན་ཏེ་བཏུ་བ་དང་། དབྱངས་གསལ་བྱེད་རྐྱང་པ་ལ་བརྟེན་ཏེ་བཏུ་བ་དང་། ས་བོན་ལ་བརྟེན་ཏེ་བཏུ་བའོ། །དེའང་སཾ་པུ་ཊ་ལས། ཨཱ་ལི་ཀཱ་ལི་གཉིས་ནི་སྔགས། །ཡང་ན་དེ་ལས་བཏུས་པའོ། །ཞེས་གསུངས་ཏེ། རྩ་རྒྱུད་ཕྱི་མའི་དགུ་པ་དང་། སཾ་པུ་ཊའི་བདུན་པའི་གསུམ་པ་ནས་བསྟན་ཏོ། །བཏུས་པའི་སྔགས་དངོས་ལ་བཞི། བཟླས་པའི་སྔགས། ལས་ཚོགས་ཀྱི་སྔགས། ས་བོན་གྱི་སྔགས། གཏོར་མ་དང་ཁ་ཟས་ལ་སོགས་པ་བྱིན་གྱིས་རློབ་པའི་སྔགས་ཏེ། རྩ་རྒྱུད་དང་པོའི་གཉིས་པ་དང་། ཕྱི་མའི་བཞི་པ་དང་། ལྔ་པ་དང་། རྡོ་རྗེ་གུར་དང་། སཾ་པུ་ཊའི་ལེའུ་ཅི་རིགས་པ་ལས་བསྟན་ཏོ། །བཟླས་པའི་ཡུལ་ཕྲེང་བ་ལ་བདུན། ཕྲེང་བའི་རྒྱུ་དང་། གྲངས་དང་། ཕྲེང་ཐག་དང་། མདོ་འཛིན་དང་། བརྒྱུ་བའི་ཚུལ་དང་། བྱིན་གྱིས་བརླབ་པ་དང་། བགྲང་བའི་ཚུལ་ལོ། །ཁ་ཟས་ནི་འོ་མའི་བཏུང་བ་ལ་སོགས་པའོ། །དེ་དག་ནི་༼རྩ༷་༽རྒྱུད་ཕྱི་མའི་བཅུ་པ་དང་། རྡོ་རྗེ་གུར་གྱི་ལེའུ་དྲུག་པ། སཾ་པུ་ཊའི་བརྒྱད་པའི་གཉིས་པ་རྣམས་ལས་བསྟན་ཏོ། །བཟླས་པའི་མན་ངག་ལ་དྲུག །འགོག་པའི་བཟླས་པ་དང་། སྤྲོ་བསྡུ་དང་། རྡོ་རྗེའི་བཟླས་པ་དང་། ཤུབ་བུ་དང་། བཀོད་པ་དང་། འཁོར་བའི་བཟླས་པའོ། །གོང་མ་ལྔ་ནི་བླ་མས་ཞིབ་ཏུ་འཆད་པར་འགྱུར་ལ། དྲུག་པ་ནི་གཉིས་ཏེ། ཡུམ་དང་བཅས་པ་ལ་འདོ་ལའི་བཟླས་པ་ཞེས་བྱ་བ་དང་། ཡུམ་མེད་པ་ལ་མ་ནིང་གི་བཟླས་པ་ཞེས་བྱ་བ་ཡིན་ཏེ། རྡོ་རྗེ་གུར་ལས། ཡབ་ཀྱི་ཞལ་ནས་ཡུམ་གྱི་ཞལ་དུ་འཁོར་བའི་ནང་དུ་བརྗོད་པའི་སྦྱོར་བ་ཡིས། །བརྟུལ་ཞུགས་ཅན་གྱིས་བཟླས་པ་བྱ། །ཞེས་དང་། སཾ་པུ་ཊའི་བརྒྱད་པའི་གཉིས་པ་ལས། ཟུང་ལྟར་ཏེ་ཁ་སྦྱོར་གྱི་བཟླས་པ་རིམ་པའི་ཆོ་ག་ཡིས། །སྔགས་ཀྱི་བཟླས་པ་རབ་ཏུ་གྲགས། །ཞེས་གསུངས་སོ། །བཟླས་པའི་མན་ངག་གཞན་དེ་བཞིན་གཤེགས་པའི་སྐུ་ལ་དམིགས་ནས་བཟླས་པར་ཡང་བཤད་དེ། དེ་ཉིད་ལས། མཉམ་གཞག་བཟླས་དང་བསྒོམ་པ་ཡིས། །འགྲུབ་འགྱུར་འདི་ལ་ཐེ་ཚོམ་མེད། །ཅེས་གསུངས་པས་ན་བཟླས་པའི་མན་ངག་ལྔ་ལ་སོགས་པར་བླ་མས་བཤད་དེ་ཤེས་པར་བྱའོ། །བཟླས་པའི་དགོས་པ་ནི་གཉིས། སྤྱིའི་དོན་དང་། ཆེད་དུ་བྱ་བའི་ཁྱད་པར་རོ། །དང་པོ་ནི་དེ་བཞིན་གཤེགས་པ་ཐམས་ཅད་ཀྱི་ཐུགས་བསྐུལ་ཞིང་སྙན་གསན་འབེབས་པ་སྟེ། རྡོ་རྗེ་གུར་ལེའུ་དྲུག་པ་ལས། སངས་རྒྱས་བྱང་ཆུབ་སེམས་དཔའ་དང་། །མཁའ་འགྲོ་མ་དང་རང་བཙུན་མོ། །བདག་མེད་མ་བརྙེས་ནས་མངོན་སུམ་དུ་ནི་བྱ་བའི་ཕྱིར། །སྔགས་ནི་དངོས་གྲུབ་སྩོལ་ཅིག་ཅེས་སྙན་གསན་འབེབས་པར་བརྗོད། །ཅེས་བྱ་བ་ལ་སོགས་པ་གསུངས་སོ། །གཉིས་པ་ཆེད་དུ་བྱ་བའི་ཁྱད་པར་ནི། རང་གི་སེམས་ལ་ཇི་ལྟར་འདོད་པ་བསྒྲུབ་པའི་ཕྱིར་གསང་སྔགས་སྦྱར་བར་བྱའོ། །འདིའང་རྩ་རྒྱུད་དང་པོའི་གཉིས་པ་དང་། ཕྱི་མའི་ལྔ་པ་དང་། དགུ་པ་དང་། བཅུ་པ་རྣམས་དང་། རྡོ་རྗེ་གུར་གྱི་གཉིས་པ་དང་། བཞི་པ་དང་། དྲུག་པ་དང་། བདུན་པ་དང་། བརྒྱད་པ་དང་། དགུ་པ་དང་། བཅུ་བཞི་པ་དང་། བཅོ་ལྔ་པ་རྣམས་དང་། སཾ་པུ་ཊའི་བརྒྱད་པའི་གཉིས་པ་དང་། བཞི་དང་། བརྟག་པ་བདུན་པ་དག་ལས་བསྟན་ཏེ། བཟླས་པ་བསྟན་ཟིན་ཏོ། །གཏོར་མ་ལ་ལྔ་སྟེ། བཏང་བའི་དུས་དང་། ཡོ་བྱད་དང་། ཆོ་ག་དང་། དགོས་པ་དང་། གནས་སྐབས་ཀྱི་ཆེད་དུ་བྱ་བའོ། །དུས་ལ་གཉིས་ཏེ། རྒྱུན་གྱི་དུས་དང་། ཁྱད་པར་གྱི་དུས་སོ། །དང་པོ་ནི་ཐུན་མཚམས་དང་འབྲེལ་བ་ཡིན་ལ། ཁྱད་པར་ནི་ཚེས་བརྒྱད་ལ་སོགས་པ་ཟླ་བ་གཅིག་ལ་དུས་དྲུག་གམ་བརྒྱད་ཡིན་ནོ། །ཡོ་བྱད་ནི་ཅི་འབྱོར་བ་ཡིན་ནའང་ཁྱད་པར་དུ་དཀུ་བག་ཅན་དང་རྗེས་སུ་འབྲེལ་བའོ། །ཆོ་ག་ལ་བཞི་སྟེ། རྫས་ཀྱི་དང་། མགྲོན་དང་། གཏོར་མ་ལ་སོགས་པ་དབུལ་བ་དང་། མཇུག་གི་ཆོ་གའོ། །དང་པོ་ལ་བཞི་སྟེ། རྫས་གསང་བ་དང་། སྦྱང་བ་དང་། བསྐྱེད་པ་དང་། བྱིན་གྱིས་བརླབ་པའོ། །མགྲོན་ལ་བཞི་སྟེ། བསྐྱེད་པ་དང་། དགུག་པ་དང་། བྱིན་གྱིས་བརླབ་པ་དང་། དབང་བསྐུར་བའོ། །གཏོར་མ་ལ་སོགས་པ་དབུལ་བ་ལ་ཡང་བཞི། གཏོར་མ་དབུལ་བ། མཆོད་པ་འབུལ་བ། བསྟོད་པ་བྱ་བ། ཕྲིན་ལས་གཞོལ་བའོ། །མཇུག་ལ་བཞི། རྡོ་རྗེའི་གླུ་དང་བཀྲ་ཤིས་ཀྱིས་དགྱེས་པ་བསྐྱེད་པ་དང་། འདོད་པའི་དོན་ལ་གསོལ་བ་གདབ་པ་དང་། བཟོད་པར་གསོལ་ཏེ་གཤེགས་སུ་གསོལ་བ་དང་། སྨོན་ལམ་གདབ་ཅིང་གཏོར་མ་བཏང་བ་སྟེ། དེ་དག་ཀྱང་རྩ་རྒྱུད་དང་པོའི་གཉིས་པ། ཕྱི་མའི་བཞི་པ། རྡོ་རྗེ་གུར་གྱི་ལེའུ་གསུམ་པ་རྣམས་ལས་གཙོར་བསྟན་ལ། སཾ་པུ་ཊའི་དགུ་པའི་གཉིས་པ་ལས། ཟླ་བ་མར་ངོའི་བཅུ་བཞི་དང་། །ཁྱད་པར་དུ་ནི་བརྒྱད་པ་དང་། །ཡར་གྱི་ངོ་ཡི་བཅུ་པ་ལ། །མཆོད་པ་མཆོད་པའི་བདག་ཉིད་འགྱུར། །ཞེས་དུས་བསྟན་ཞིང་། དེ་ཉིད་ལས། རླུང་གཡོས་པས་མེ་འབུད་པ་དང་མེ་སྦར་བས་འབར་བ་ཉིད་དང་ནི། །དེ་བཞིན་དུ་ཡང་མེ་བདུད་རྩི་ལྔ་ཁྱད་པར་དུ་བསྐོལ་བ་ཉིད་དོ། །ཁ་དོག་དྲི་རོ་ནུས་པ་ཕུན་སུམ་ཚོགས་པའི་བར་བསྒོམ་པ་ནི་ཤེལ་གྱི་གཟུགས་ཀྱིས་མཚོན་པ་དྭངས་ཤིང་གསལ་བར་བསྐྱེད་བྱ་ཞིང་། །དེ་ཕྱིར་ཆོ་ག་ཐམས་ཅད་བརྟག་པར་བྱ། །ཞེས་བྱ་བ་ལ་སོགས་པ་བྱིན་གྱིས་བརླབ་པ་བསྟན་ལ། ཤིང་གཅིག་དང་ནི་དུར་ཁྲོད་དང་། །ཞེས་བྱ་བས་མགྲོན་གྱི་བྱེ་བྲག་མི་འདྲ་བའི་ཁྱད་པར་ཡང་བསྟན་ཏོ། །སྤྱི་དོན་བཞི་པ་དགོས་པ་ནི། རྩ་རྒྱུད་ཕྱི་མའི་བཞི་པ་ལས། བགེགས་དང་ལོག་པར་འདྲེན་པ་ལས། །སེམས་ཅན་རྣམས་ཀྱི་སྲོག་བསྲུང་ཕྱིར། །རྡོ་རྗེ་འཛིན་པས་གཏོར་མ་བསྟན། །ཞེས་གསུངས་སོ། །གནས་སྐབས་ཀྱི་ཆེད་དུ་བྱ་བ་ནི། ནད་ཞི་བ་དང་ལོངས་སྤྱོད་འཕེལ་བ་ལ་སོགས་པ་ཇི་ལྟར་འདོད་པ་ལ་སྦྱར་བར་བྱའོ། །འདིའང་རྩ་བའི་རྒྱུད་ཀྱི་དང་པོའི་གཉིས་པ་དང་། ཕྱི་མའི་བཞི་པ་དང་། དགུ་པ་རྣམས་དང་། གུར་ལེའུ་གསུམ་པ་དང་། སཾ་པུ་ཊའི་དགུ་པའི་གཉིས་པ་དང་། བརྒྱད་པའི་བཞི་པ་རྣམས་ཀྱིས་བསྟན་ཏོ། །གཏོར་མ་བསྟན་ཟིན་ཏོ། །དངོས་གྲུབ་མྱུར་དུ་འགྲུབ་པར་བྱེད་པའི་ཐབས་སྦྱིན་སྲེག་ལ་གསུམ་སྟེ། སྦྱོར་བ་དང་། དངོས་གཞི་དང་། མཇུག་གི་ཆོ་གའོ། །དང་པོ་ལ་དྲུག་སྟེ། ཐབ་དང་། བུད་ཤིང་དང་། མེ་དང་། མཆོད་རྫས་དང་བསྲེག་རྫས་བཤམ་ཐབས་དང་བཅས་པ་དང་། དུས་ཕྱོགས་དང་བཅས་པ་དང་། སྒྲུབ་པ་པོའི་ཁྱད་པར་རོ། །དང་པོ་ལ་ལྔ་སྟེ། ཐབ་ཀྱི་དབྱིབས། ཚད། ཁ་དོག །མཚན་མ། མུ་རན་རྣམས་ཏེ། ལས་བཞིའི་བྱེ་བྲག་གིས་སོ་སོའོ། །བུད་ཤིང་དང་མེའང་ལས་བཞིའི་བྱེ་བྲག་གིས་སོ་སོའོ། །བཤམ་ཐབས་ནི་ལས་འཇམ་པོ་གསུམ་ལ་སྲེག་རྫས་ནི་གཡས་ལ། མཆོད་རྫས་གཡོན་ནོ། །དུས་དང་ཕྱོགས་ཀྱང་ལས་བཞིའི་བྱེ་བྲག་གིས་བཞིའོ། །སྒྲུབ་པ་པོའི་ཁྱད་པར་ལ་ལྔ་སྟེ། ཁ་ལྟ་ཕྱོགས། འདུག་སྟངས། རྒྱན་དང་ཆས་གོས། བསམ་པ། དགང་གཟར་དང་བླུགས་གཟར་རྣམས་ཏེ། ལས་བཞིའི་བྱེ་བྲག་གིས་སོ་སོའོ། །དངོས་གཞི་ལ་དྲུག་སྟེ། བདག་གི་རྣལ་འབྱོར་དང་། མེ་བཙལ་ཞིང་བསྒྲུབ་པ་དང་། ཐབ་དང་ཡོ་བྱད་བསང་བ་དང་། ཐབ་ཁུང་མངོན་པར་འདུ་བྱ་བ་དང་། འཇིག་རྟེན་པའི་མེ་ལྷ་མཆོད་པ་དང་། འཇིག་རྟེན་ལས་འདས་པའི་མེ་ལྷ་མཆོད་པའོ། །མཇུག་གི་ཆོ་ག་ལ་དྲུག་སྟེ། འཇིག་རྟེན་པའི་མེ་ལྷ་ལྷག་མས་མཆོད་པ་དང་། གཏོར་མ་གཏང་བ་དང་། ཙ་རུའི་བཟའ་བ་ལ་ལོངས་སྤྱོད་པ་དང་། འདོད་པའི་དོན་ལ་གསོལ་བ་གདབ་ལ་བཟོད་པར་གསོལ་ཏེ་གཤེགས་སུ་གསོལ་བ་དང་། སྨོན་ལམ་གདབ་པ་དང་། ལས་ཀྱི་རྗེས་མི་མངོན་པར་བྱ་བ་སྟེ། དེ་དག་ཀྱང་རྩ་རྒྱུད་ཕྱི་མའི་དང་པོ་དང་། རྡོ་རྗེ་གུར་ལེའུ་བརྒྱད་པ་དང་། བཅུ་བཞི་པ་དང་། སཾ་པུ་ཊའི་བདུན་པའི་གཉིས་པ་དང་། བདུན་པ་དངོས་རྣམས་ལས་ཞིབ་ཏུ་འབྱུང་བས་དེར་རྟོགས་པར་བྱའོ། །སྦྱིན་སྲེག་བསྟན་ཟིན་ཏོ། །སྐུ་གཟུགས་བྱིན་གྱིས་བརླབས་པས་ཀྱང་དངོས་གྲུབ་ཐམས་ཅད་འགྲུབ་པའི་ཕྱིར་རབ་ཏུ་གནས་པ་ལ། དོན་དམ་པར་དེ་བཞིན་གཤེགས་པའི་སྐུ་གཟུགས་ལ་རབ་ཏུ་གནས་པ་བྱས་པས་བཟང་དུ་འགྲོ་རྒྱུ་མེད་ལ། མ་བྱས་པས་ངན་དུ་འགྲོ་བ་མེད་ཀྱང་སྐྱེ་བོ་དད་པ་དང་ལྡན་པའི་དགེ་བ་སྤེལ་བར་བྱ་བའི་ཕྱིར་ཀུན་རྫོབ་ཐ་སྙད་ཙམ་དུ་རབ་གནས་བསྟན་ཏེ། རབ་ཏུ་གནས་པའི་རྒྱུད་ལས། སྐྱེ་བོ་རབ་ཏུ་དད་པ་ཡིས། །བྱེད་པ་དགེ་བ་སྤེལ་བའི་ཕྱིར། །རབ་གནས་བསྟན་བཅོས་ལས་གསུངས་པ། །ཐ་སྙད་ཙམ་དུ་བྱས་པ་ཡིན། །ཞེས་གསུངས་པས་སོ། །དེ་ལ་དྲུག་སྟེ། རྟེན་ཡོངས་སུ་དག་པ་བཟང་པོ་དང་། དེ་བཞིན་དུ་རྡོ་རྗེ་སློབ་དཔོན་དང་། དུས་དང་། གནས་དང་། ཡོ་བྱད་དང་། ཆོ་ག་ཡོངས་སུ་དག་པ་བཟང་པོ་སྟེ་བཟང་པོ་དྲུག་གོ། དང་པོ་ནི་བྲིས་སྐུ་ལ་སོགས་པ་མཚན་ཉིད་དང་ལྡན་ཞིང་བཟོ་བོས་བྱ་བ་ཡོངས་སུ་རྫོགས་པའོ། །གཉིས་པ་ནི་རྡོ་རྗེ་སློབ་དཔོན་དུ་དབང་ཐོབ་པ་གསང་སྔགས་ཀྱི་ཕ་རོལ་ཏུ་སོན་པ། སྔོན་ཆད་ལས་ཀྱི་ཆོ་ག་མཐོང་ཞིང་བསྙེན་པ་ཡོངས་སུ་རྫོགས་པ་སྟེ། རྩ་རྒྱུད་ཕྱི་མའི་དང་པོ་ལས། སྔོན་རབ་གནས་ཀྱི་ཆོ་ག་མཐོང་ཞིང་རྒྱུད་དང་མན་ངག་སོགས་སྔགས་ཀྱི་ཕ་རོལ་སོན། །ཞེས་བྱ་བ་ལ་སོགས་པ་གསུངས་སོ། །གསུམ་པ་དུས་ནི་ཡར་གྱི་ངོ་གཟའ་སྐར་བཟང་པོ་འཛོམ་པ་སྟེ། རབ་ཏུ་གནས་པའི་རྒྱུད་ལས། ཉི་མ་བྱང་བགྲོད་ཀྱི་ཟླ་བ་དྲུག་དང་ཟླ་བ་ལྷག་པ་པ་སངས་ཕུར་བུ་གཟའ་བཞི་དང་། །ཞེས་བྱ་བ་ལ་སོགས་པ་གསུངས་ལ། གཟའ་སྐར་འཛོམ་ན་མར་ངོ་ལའང་ཉེས་པ་མེད་དེ། གསང་བ་སྤྱི་རྒྱུད་ལས། རབ་གནས་དང་ནི་དབང་བསྐུར་ཉིད། །ཡར་གྱི་ངོ་ལ་བརྟག་པར་བྱ། །གཟའ་དང་སྐར་མ་འཛོམ་གྱུར་ན། །མར་གྱི་ངོ་ལའང་ཉེས་པ་མེད། །ཅེས་གསུངས་སོ། །བཞི་པ་གནས་ནི་རབ་ཏུ་གནས་པའི་རྒྱུད་ལ་སོགས་པ་ནས་ཇི་ལྟར་ཇི་སྐད་བཤད་པ་བཞིན་རྟོགས་པར་བྱ་ཞིང་། ཁྱད་པར་དུ་ཁྲུས་སའི་སྟེགས་བུ་བཤམ་༼ཤང་༽པའོ། །ལྔ་པ་ཡོ་བྱད་ནི་རབ་ཏུ་གནས་པ་ཡང་དཀྱིལ་འཁོར་དང་སྦྱིན་སྲེག་གཉིས་དང་འབྲེལ་བས། སྦྱིན་སྲེག་ལ་མཁོ་བའི་ཡོ་བྱད་དང་། དཀྱིལ་འཁོར་ལ་མཁོ་བའི་ཡོ་བྱད་དང་། རབ་ཏུ་གནས་པ་ལ་མཁོ་བའི་ཡོ་བྱད་དང་། ཁྲུས་དང་མངའ་དབུལ་བ་ལ་མཁོ་བའི་ཡོ་བྱད་དང་། དབང་བསྐུར་བ་དང་འབྲེལ་བར་བྱེད་ན་སློབ་མ་ལ་མཁོ་བའི་ཡོ་བྱད་དང་། རྡོ་རྗེ་སློབ་དཔོན་ལ་མཁོ་བའི་ཡོ་བྱད་རྣམས་སོ། །དྲུག་པ་ཆོ་ག་ལ་གསུམ་སྟེ། སྦྱོར་བ་དང་། དངོས་གཞི་དང་། མཇུག་གོ། དང་པོ་ནི་དཀྱིལ་འཁོར་དང་འབྲེལ་བའི་ཕྱིར་བསྙེན་པ་དང་། ས་ཆོག་དང་། སྟ་གོན་གྱི་ཆོ་ག་དང་། དཀྱིལ་འཁོར་ཆེན་པོ་བྲི་ཞིང་རྒྱན་དགྲམ་པ་དང་། སྒྲུབ་ཅིང་མཆོད་པ་རྣམས་སྔོན་དུ་སོང་བས་རབ་ཏུ་གནས་པའི་སྦྱོར་བ་སྟ་གོན་ལ་འཇུག་པར་བྱའོ། །དབང་བསྐུར་དང་འབྲེལ་ན་སློབ་མ་འཇུག་ཅིང་དབང་བསྐུར་བ་ཚར་ནས། རབ་གནས་ཀྱི་སྟ་གོན་བྱེད་པ་དང་། རབ་གནས་ཀྱི་དངོས་གཞི་ཚར་ནས། ནུབ་གསུམ་པར་བྱས་ནས་ཕྱིད་ནུབ་སློབ་མ་འཇུག་ཅིང་དབང་བསྐུར་བ་ལུགས་གཉིས་གང་རུང་བྱའོ། །དེ་ལྟར་གང་ལྟར་ཡང་རུང་སྟེ། སྟ་གོན་ལ་བདུན། ཁྲུས་དང་། སྦྱང་བ་དང་། ཡན་ལག་བཞིས་བསྐྱེད་པ་དང་། མཆོད་པ་དང་། སང་རབ་གནས་བྱ་བར་སྙན་གསན་དབབ་པ་དང་། ཡེ་ཤེས་པ་གཤེགས་སུ་གསོལ་བ་དང་། ཞལ་བསྒྱུར་བའམ་ཞབ་དགབ་པའོ། །དངོས་གཞི་ནི་སྔ་དྲོར་བྱེད་པ་ཡིན་ཏེ། སྔ་བར་སྐུ་གཟུགས་སྦྱང་བ་དང་། །ཞེས་བྱ་བ་དང་། དེ་བཞིན་དུ་རྒྱུད་དང་བསྟན་བཅོས་དུ་མ་ནས་སྔ་དྲོ་འབའ་ཞིག་བྱ་བར་གསུངས་སོ། །དེ་ལ་བདུན་ཏེ། དེའང་སྟ་གོན་བཞིན་ཁྲུས་དང་། སྦྱང་བ་དང་། ཡན་ལག་བཞི་རྫོགས་སུ་བསྐྱེད་པ་དང་། མཆོད་པ་དང་བཞི་ནི་འདྲ་ལ། སྟ་གོན་གྱི་སྙན་གསན་དབབ་པ་དང་། གཤེགས་སུ་གསོལ་བ་དང་། ཞལ་བསྒྱུར་བ་གསུམ་གྱི་དོད་པོར། སྤྱན་དབྱེ་བ་དང་། བརྟན་པར་བཞུགས་སུ་གསོལ་བ་དང་། མངའ་དབུལ་བ་ཐུན་མོང་མ་ཡིན་པ་བྱའོ། །མཇུག་གི་ཆོ་ག་ལ་བདུན་ཏེ། རྟེན་སྤྱན་དྲང་དུ་བཏུབ་ན་སྤྱན་དྲང་བ་དང་། སྲུང་མར་བསྒོ་བ་དང་། ཡོན་བདག་ལ་མཆོད་པ་བསྒོ་བ་དང་། སྨོན་ལམ་རྒྱ་ཆེན་པོ་གདབ་པ་དང་། ལས་ཀྱི་ལྷག་ཆད་བསྐང་བའི་ཞི་བའི་སྦྱིན་སྲེག་བྱ་བ་དང་། ཡོན་བླང་བ་དང་། དགའ་སྟོན་བྱ་བའོ། །དེ་ལ་ཅིའི་ཕྱིར་རབ་གནས་ཞེས་བྱ་ཞེ་ན། རྟེན་དམ་ཚིག་པ་ལ་ཡེ་ཤེས་པ་བཀུག་ནས་སེམས་ཅན་གྱི་དོན་དུ་ཇི་སྲིད་འཁོར་བའི་མཐའི་བར་བཞུགས་སུ་གསོལ་བས་ན་དམ་ཚིག་སྟེ་༼དམ་ཚི༷ག་པ༷་དེ༷་༽ཡེ་ཤེས་པར་བྱིན་གྱིས་བརླབས་པས་རབ་ཏུ་གནས་པ། བཟང་པོར་གནས་པ། མཆོག་ཏུ་གནས་པ་ཞེས་བྱའོ། །ལོང་བ་མིག་ཕྱེ་ནས་གྲོང་ཁྱེར་དུ་འཇུག་ནུས་པ་བཞིན་སྐུ་གཟུགས་སྤྱན་ཕྱེ་ནས་སེམས་ཅན་གྱི་དོན་ནུས་པར་བྱ་བའི་ཕྱིར་སྤྱན་དབྱེ་ཞེས་བྱའོ། །མཆོད་པ་དཔག་ཏུ་མེད་པ་བྱས་ནས་མངའ་ཕུལ་བས་ན་རྒྱལ་པོ་རྒྱལ་སར་ཐོན་པ་དང་འདྲ་སྟེ་མངའ་དབུལ་བ་ཞེས་བྱའོ། །དེ་ཡང་རྩ་རྒྱུད་ཕྱི་མའི་དང་པོ་དང་། རྡོ་རྗེ་གུར་ལེའུ་དགུ་པ་དང་། སཾ་པུ་ཊའི་བདུན་པ་དངོས་ལས་མིང་ཙམ་འབྱུང་ངོ་། །རབ་ཏུ་གནས་པ་བསྟན་ཟིན་ཏོ། །སེམས་ཅན་དངོས་གྲུབ་དམན་པ་ལ་མོས་པའི་རྟེན་གྱི་གང་ཟག་རྗེས་སུ་གཟུང་བར་བྱ་བའི་ཕྱིར་ལས་ཀྱི་ཚོགས་རབ་འབྱམས་བསྒྲུབ་པ་ལ་གཉིས། སྒྲུབ་པའི་ཐབས་དང་། དེས་བསྒྲུབས་པའི་དངོས་གྲུབ་དངོས་སོ། །དང་པོ་ལ་གསུམ། ཞི་སོགས་དམན་པ་སྒྲུབ་པའི་ཐབས། འབྲིང་གྲུབ་ཆེན་བརྒྱད་སྒྲུབ་ཐབས། འབྲིང་གི་རབ་མཁའ་སྤྱོད་ལ་སོགས་པ་སྒྲུབ་པའི་ཐབས་སོ། །དང་པོ་ལ་གཉིས། རྐྱང་པས་སྒྲུབ་པ་དང་། ཚོགས་པས་སྒྲུབ་པའོ། །རྐྱང་པས་སྒྲུབ་པ་ལ་ལྔ། རྫས་སྦྱོར་ལ་བརྟེན་པ་དང་། འཁྲུལ་འཁོར་ལ་བརྟེན་པ་དང་། བཟླས་པ་ལ་བརྟེན་པ། སྦྱིན་སྲེག་ལ་བརྟེན་པ། བསམ་གཏན་ལ་བརྟེན་པའོ། །ཚོགས་པ་ལ་བརྟེན་པ་ནི། དེ་དག་གི་གཉིས་སམ། གསུམ་མམ། བཞིའམ། ལྔ་ཀ་འཚོགས་པ་གང་རུང་གིས་ལས་བསྒྲུབ་པའོ། །དེ་ལ་རྐྱང་པས་བསྒྲུབ་པ་ནི། བདུན་པའི་དང་པོ་ལས། རྫས་སྦྱོར་རོའི་ཁའི་བུག་པའི་ནང་དུ་སོན་པ་ཞེས་བྱ་བ་ལ་སོགས་པ་གསུངས་སོ། །འཁྲུལ་འཁོར་ཡང་བདུན་པའི་གསུམ་པ་ལས། དེ་ནས་ལས་རྣམས་ཀུན་བྱེད་པའི། །སྒྲོལ་མའི་འབྱུང་བ་བཤད་པར་བྱ། །ཞེས་སོགས་གསུངས་སོ། །བཟླས་པ་ཡང་། བེ་ཌུ་ཡཱ་བེ་ཌུ་ཡཱ་ཞེས་བརྗོད་ན་གླང་པོ་ཆེ་འབྲོས་པར་འགྱུར་རོ་ཞེས་བྱ་བ་ལ་སོགས་པ་གསུངས་སོ། །སྦྱིན་སྲེག་ཀྱང་སྤྱིར་ལས་ཀུན་ལ་དགོས་པར་མངོན་ཡང་། སྦྱིན་སྲེག་རྐྱང་པས་བསྒྲུབ་པ་བདུན་པའི་གཉིས་པ་ལས། དེ་ནས་རྒྱས་པར་འདོད་ན་ཞེས་བྱ་བ་ལ་སོགས་པའོ། །བསམ་གཏན་ལ་བརྟེན་པ་ཡང་བདུན་པ་དངོས་ལས། དེ་ནས་དུག་གིས་ཟིན་པ་བསླང་བའི་ཕྱིར་ཞེས་བྱ་བ་ལ་སོགས་པ་གསུངས་སོ། །སྤྱིར་ཚོགས་པ་ལ་བརྟེན་པ་དང་། རྐྱང་པ་ལ་བརྟེན་པ་རྣམས་ལ་ཡང་བསམ་གཏན་ཙམ་རེ་དགོས་པར་མངོན་ནོ། །གཉིས་པ་འབྲིང་གྲུབ་ཆེན་བརྒྱད་སྒྲུབ་པའི་ཐབས་ལ་སྤྱིར་རྒྱུད་སྡེ་ཀུན་ལས་སྤྱིའི་སྒྲུབ་པ་དང་། སོ་སོའི་སྒྲུབ་པ་གཉིས་འབྱུང་བ་ལས། སྤྱི་སྒྲུབ་ནི་རོ་ལངས་དང་། གནོད་སྦྱིན་མོས་གྲུབ་ཆེན་བརྒྱད་གང་རུང་ཅིག་སྟེར་ནུས་པར་བཤད་ཀྱང་། རོ་ལངས་ཀྱི་སྒྲུབ་པ་ནི་རྒྱུད་གསུམ་པོ་འདི་ན་མི་སྣང་། གནོད་སྦྱིན་མོའི་སྒྲུབ་པ་རྒྱུད་ན་ཡོད་ཀྱང་། རེས་གནོད་སྦྱིན་མོ་ཉིད་གཅིག་ཏུ་བསྔོ། རེས་སྤྱི་སྒྲུབ་ཏུ་བསྔོ། སོ་སོའི་སྒྲུབ་པ་ལ་རྩ་བའི་རྒྱུད་ལས་ནི། བཟའ་བའི་དམ་ཚིག་ལ་བརྟེན་ནས་བཅུད་ལེན་གཟུང་དུ་རུང་བ་ལས་གཞན་མེད། རྡོ་རྗེ་གུར་ལེའུ་བཅུ་བཞི་པ་ལས། དྲི་ལྔ་བདུད་རྩི་ལྔ་ཡང་དག་བླངས་ནས་ནི། །རྫས་ལྔ་དང་ནི་བསྲེ་བར་བྱ། །ཞེས་བྱ་བ་ལ་སོགས་པས་རི་ལུ་བསྟན། ཀླུ་ཡི་རྒྱལ་པོའི་མགོ་བསྲེགས་ནས་ཏེ་སྦྲུལ་མགོ་གཉིས་པའི་མགོ་ཁམ་ཕོར་ཁ་སྦྱོར་དུ་བསྲེག་པ་ལ་ཟེར། །ཞེས་བྱ་བ་ལ་སོགས་ཀྱིས་མིག་སྨན། བ་བླའི་ས་བོན་ལྡན་པ་དང་། །ཞེས་སོགས་ཀྱི་རྐང་བྱུག །ཡན་ལག་མེད་པའི་སྟེ་སྣང་བ་མཐའ་ཡས་ཀྱི་དཀྱིལ་འཁོར་དབུས། །ཞེས་སོགས་ཀྱིས་གནོད་སྦྱིན་མོ། ཨོ་ཌའི་ཡུལ་ཏེ་ཨོ་རྒྱན་དུ་དུ་ཉེ་བ་ན། །ཞེས་སོགས་ཀྱིས་ས་འོག་བསྒྲུབ་པ། ལེའུ་བདུན་པའི་བཟའ་བའི་དམ་ཚིག་གིས་བཅུད་ལེན་བསྟན། གནོད་སྦྱིན་མོ་བསྒྲུབ་པ་ནི་ལེའུ་གཉིས་པའི་འབྱུང་པོ་འདུལ་བ་དང་། བཞི་པའི་གནོད་མཛེས་ཀྱིས་བསྟན་ཏོ། །མི་སྣང་བའི་ནི་རི་ལུའི་ཤུགས་ལས་འབྱུང་བ་ཡིན་ནོ། །རལ་གྲིའི་སྒྲུབ་ཐབས་མེད་དོ། །སཾ་པུ་ཊའི་བརྒྱད་པའི་དང་པོ་ལས། རི་ལུ་ནི་ཡང་ན་རི་ལུ་བྱ་བར་འདོད་པས་ཞེས་བྱ་བ་ལ་སོགས་པ་གསུངས་ལ། དེ་ཉིད་ལས། སྤང་བའི་ཚུལ་དུ་ཞེས་བྱ་བས་མི་སྣང་བར་བསྟན་ཏོ། །རི་ལུ་དང་མི་སྣང་བ་གཉིས་ཀས་ནི་མི་སྣང་བ་བསྒྲུབ་པ་ནི་མཐུན་ལ། བསྒྲུབ་ལུགས་ཀྱི་ཕྱེ་བས་གཉིས་སུ་བསྔོ་བ་ཡིན་ནམ་སྙམ་མོ། །དེ་ནས་མིག་སྨན་གྱི་སྦྱོར་བ་བཤད་དེ། ཞེས་བྱ་བ་ལ་སོགས་པས་མིག་སྨན་བཤད། དེ་ནས་ལས་ཀྱི་ཆོ་ག་བཤད། །བཟླས་དང་བསམ་གཏན་རྟག་དགའ་བ། །གང་གིས་སྒྲུབ་པོ་འགྲུབ་འགྱུར་བའི། །བཅུད་ཀྱིས་ལེན་གྱི་ཆོ་ག་བཤད། །ཅེས་བྱ་བ་ལ་སོགས་པས་བཅུད་ལེན་བཤད་དོ། །ལུས་དང་ཚེ་དང་ལོངས་སྤྱོད་ཀྱི་བཅུད་ལེན་རྣམས་བསྟན་ཏོ། །དེ་ལྟར་བཞི་ལས་ལྷག་མ་བཞི་༼མ༷་༽བསྟན་ཏོ། །གསུམ་པ་འབྲིང་གི་མཆོག་སྒྲུབ་པའི་ཐབས་ནི་བཟླས་བསྒོམ་ལ་བརྟེན་ཏེ་འགྲུབ་པ་ལས་བྱེ་བྲག་གི་སྒྲུབ་པའི་ཐབས་རྒྱུད་གསུམ་ན་མི་སྣང་ངོ་། །སྤྱི་དོན་གཉིས་པ་དངོས་གྲུབ་ནི་དེ་དག་གིས་བསྒྲུབས་པའི་འབྲས་བུ་རྣམས་ཏེ། དེ་ལ་གསུམ། ཞི་སོགས་དམན་པ་དང་། འབྲིང་དང་། འབྲིང་གི་ཆེན་པོའོ། །དང་པོ་ནི་རྩ་བའི་ལས་བཞི། ཡན་ལག་གི་ལས་བསམ་གྱིས་མི་ཁྱབ་པའོ། །རྩ་བའི་ལས་ནི། ཞི་བ་དང་། རྒྱས་པ་དང་། དབང་དང་། མངོན་སྤྱོད་དོ། །དེ་དག་གི་ཡན་ལག་ནི་ཞི་བ་ལ་ནད་ཞི་བ་དང་། གདོན་ཞི་བ་ལ་སོགས་པ་མང་པོ་དང་། རྒྱས་པ་ལ་ཚེ་རྒྱས་པ་དང་། ལོངས་སྤྱོད་དང་འཁོར་རྒྱས་པ་ལ་སོགས་པ་མང་པོའོ། །དབང་ལ་རྒྱལ་པོ་ལ་སོགས་པ་དབང་དུ་བྱ་བ་དང་། དགུག་པ་ལ་སོགས་པ་མང་པོའོ། །མངོན་སྤྱོད་ལ་གསོད་པ་དང་། བསྐྲད་པ་དང་། དབྱེ་བ་དང་། རེངས་པ་ལ་སོགས་པ་དྲག་པོའི་ལས་མང་པོའོ། །ཡང་གནས་སྐབས་ཀྱི་བྱེ་བྲག་གིས་ལས་བཞི་གང་ཡང་རུང་བར་འདུ་བ་རྣམ་ཤེས་དང་ཡེ་ཤེས་ཀྱི་ལས་ཀྱི་དབབ་པ་དང་། འདི་དག་སྤྱོད་པའི་སྐབས་ཀྱི་ཚར་གཅོད་རྗེས་འཛིན་གང་རུང་ནུས་པ་དང་། གཉིས་ཀ་ནུས་པ་ལྟ་བུ་ལ་གོ་རུང་སྙམ། མེ་མ་མུར་བསིལ་བ་དང་། ཆུ་ལ་འགྲོ་བ་ལ་སོགས་པ་རྣམས་ནི་དེ་དག་གིས་སྐྱེ་བོ་དད་ན་དབང་དང་འབྲེལ། དེ་འཁོར་དུ་འདུ་ན་རྒྱས་པ་དང་འབྲེལ། མེ་མ་མུར་བསིལ་བ་ཞི་བ་ལྟ་བུར་ཡང་འགྲོ། ཕབ་པས་སྨྱོ་ན་དྲག་པོར་ཡང་འགྲོ། ལྷག་མ་རྣམས་ལས་བཞིར་གསལ། གཟུགས་བསྒྱུར་བ་གྲུབ་ཆེན་གྱི་མི་སྣང་བའི་ཁོངས་སུ་འདུའམ་སྙམ། སྲིད་པ་ཐ་མ་པའི་བྱང་སེམས་བཏགས་པ་དེ་མིག་སྨན་གྱི་ཁོངས་སུ་འདུའམ་སྙམ་མོ། །དེ་ལ་དམན་པ་ལས་བཞིར་འདུ་བ་ནི། རྡོ་རྗེ་གུར་ལེའུ་བཅུ་གཅིག་པ་ལས། ཕན་པ་རྣམ་སྣང་ཉིད་ཀྱིས་ཞི་བ་སྟེ། །རྡོ་རྗེ་ཉི་མ་རིན་འབྱུང་གིས་རྒྱས་པའོ། །རྡོ་རྗེ་ཆོས་འོད་དཔག་མེད་ཀྱིས་དབང་ཞེས་བྱ། །རྡོ་རྗེ་སེམས་དཔའ་མི་བསྐྱོད་པ་ལ་བརྟེན་ནས་གསད་པར་བྱ། །ཞེས་ལྷའི་རྣལ་འབྱོར་བཞི་དང་། ཞི་བའི་སེམས་ཀྱིས་ཞི་བ་སྟེ། །ཞེས་བྱ་ལ་སོགས་པ་བསམ་པ་བཞི་དང་། མཐར་ནི་སྭཱ་ཧཱ་ཞི་བ་སྟེ། །ཞེས་བྱ་བ་ལ་སོགས་པ་སྔགས་ཀྱི་མཐའ་རྟེན་བཞི་གསུངས་པས་ཤེས་སོ། །ཡན་ལག་རྣམས་ནི་དེ་དག་གི་ཁོངས་སུ་འདུས་པར་ཤེས་པས་སོ། །ཡང་ལས་ཕྲ་མོ་རྣམས་ཀྱི་གྲངས་རྩ་རྒྱུད་ཕྱི་མའི་ལེའུ་བཞི་པའི་གཏོར་མའི་ཕན་ཡོན་གྱི་སྐབས་སུ་དབང་དང་། མངོན་སྤྱོད་དང་། དགྲའི་སྡེ་འཇིག་པ་དང་། བསྐྲད་པ་དང་། བསད་པ་དང་། དགུག་པ་དང་། ཞི་བ་དང་། རྒྱས་པར་ཡང་འགྱུར་རོ། །ཞེས་བརྒྱད་དུ་བཤད་པ་༼ད༷ང་། ༽དང་པོའི་ལེའུ་གཉིས་པ་ལས་སྔགས་བདུན་གྱིས་ལས་བདུན་བཤད་ཀྱང་དེ་གཉིས་ཀའང་ཧ་ཅང་བསྡུ་བའི་ལུགས་རྒྱས་བསྡུས་མི་མཛེས་པས་གནས་སྐབས་སུ་བདེ་བར་གཤེགས་པས་གསུངས་པ་ཡིན་གྱི། ལེགས་པར་ཕྱེ་བ་ནི་གུར་ཉིད་ཀྱིའོ། །དམན་པའི་འབྲིང་གྲུབ་ཆེན་བརྒྱད་དང་། དམན་པའི་མཆོག་མཁའ་སྤྱོད་ལ་སོགས་པ་ནི་རྡོ་རྗེ་གུར་ལེའུ་བཞི་པ་ལས། མིག་སྨན་དང་ནི་རྐང་བྱུག་དང་། །རལ་གྲི་ས་འོག་བསྒྲུབ་པ་དང་། །རི་ལུ་མཁའ་ལ་སྤྱོད་པ་དང་། །མི་སྣང་བ་དང་བཅུད་ཀྱིས་ལེན། །རིག་འཛིན་འཁོར་ལོས་སྒྱུར་བ་ཉིད། །བུ་མོ་དམ་པ་དགུག་པ་ནི། །བདག་བརྙེས༼མཉེ༷ས་༽པས་ནི་སྒྲུབ་པ་པོས། །དངོས་གྲུབ་རྡོ་རྗེ་རྣམས་ཐོབ་བོ། །ཞེས་གསུངས་པས། དམན་པའི་འབྲིང་གྲུབ་ཆེན་བརྒྱད་ནི། མིག་སྨན་མིག་ལ་བྱུགས་པས་འཇིག་རྟེན་གསུམ་མཐོང་བ་དང་། རྐང་པ་ལ་རྫས་བྱུགས་པས་རྐང་མགྱོགས་དང་། རལ་གྲི་ཁར་བཅུག་ན་ནམ་མཁའ་ལ་འགྲོ་བ་དང་། ས་འོག་གི་གཏེར་རམ། བུམ་པ་ཆེན་པོ་བཏོན་ནས་སེམས་ཅན་རྣམས་ལ་ཅི་འདོད་པ་སྟེར་བ་དང་། རི་ལུ་ཁར་བཅུག་ན་སུས་ཀྱང་མི་མཐོང་ཞིང་། གནོད་སྦྱིན་ལྟར་འདོད་པའི་གཟུགས་ཅན་དུ་འགྱུར་བ་སྟེ། འདིའི་ཁོངས་སུ་གཟུགས་བསྒྱུར་བའང་འདུ་སྙམ་མོ། །ཐིག་ལེ་དཔྲལ་བར་བྱས་ན་བདག་སུས་ཀྱང་མི་མཐོང་བ་དང་། ཚེ་ཉི་ཟླ་ལྟར་གནས། ལུས་ལོ་བཅུ་དྲུག་ལོན་པ་འདྲ། ལྕགས་དང་ཟངས་གསེར་དུ་བསྒྱུར་བ་སྟེ། གསུམ་པོ་ལ་བཅུད་ལེན་ཞེས་བྱ་སྟེ། ཚེ་དང་ལུས་དང་ལོངས་སྤྱོད་ཀྱི་བཅུད་ལེན་ཞེས་བྱའོ། །བུ་མོ་དམ་པ་དགུག་པ་ནི་གནོད་སྦྱིན་མོ་བསྒྲུབ་པའོ། །དེ་ལ་རི་ལུ་དང་མི་སྣང་བ་གཅིག་ཏུ་བྱས། གནོད་སྦྱིན་མོ་གྲུབ་ཆེན་གྱི་སྤྱི་བསྒྲུབ་ཏུ་བྱས་ན་བཅུད་ལེན་ལ་གསུམ་དུ་ཕྱེ་ལ་བརྒྱད་དུ་བྱའོ། །ཡང་ན་དྲག་པོའི་ལས་ཐོགས་པ་མེད་པར་འགྲུབ་པ་ལ། རྡོ་རྗེ་མཁའ་འགྲོ་དང་། ཨ་བྷི་དྷ་ན་ལས་བཤད་དེ། ཡང་ན་རི་ལུ་དང་མི་སྣང་བ་གཅིག་ཏུ་བྱས་གནོད་སྦྱིན་མ་གྲུབ་ཆེན་བརྒྱད་ཀྱི་ཁོངས་སུ་བསྔོ་ན། ཚེ་དང་ལུས་ཀྱི་བཅུད་ལེན་གཅིག་ཏུ་བྱས། ལོངས་སྤྱོད་ཀྱི་གསེར་འགྱུར་གུད་དུ་བྱས་ལ་བརྒྱད་དུ་བརྩིའོ། །དམན་པའི་མཆོག་ནི་མཁའ་སྤྱོད་དང་། རིག་འཛིན་དང་། འཁོར་ལོས་སྒྱུར་བའོ། །འདི་ལ་སྒྲུབ་ཐབས་གསུམ་སྟེ། བརྩོན་འགྲུས་རབ་ཚེ་འདི་ཉིད་ལ་འགྲུབ་པ་དང་། འབྲིང་འཆི་བས་རྐྱེན་བྱས་ཏེ་འཕོ་བའི་ཐབས་ཀྱིས་བར་དོར་འགྲུབ་པ་དང་། ཐ་མ་སྨོན་ལམ་གྱིས་འགྲུབ་པའོ། །དེ་ལ་མཁའ་སྤྱོད་ནི་རྫུ་འཕྲུལ་གྱིས་ནམ་མཁའ་ལ་རྒྱུ་ཞིང་སྤྱོད་ཡུལ་དུ་བྱེད་པ་ལ་བྱ། རིག་འཛིན་ནི་གསང་སྔགས་ཀྱི་རིག་པ་གཟུང་བ་ལ་བརྟེན་ནས་ཚེ་ཉི་ཟླ་གནས་ཀྱི་བར་དུ་ཐུབ་ཅིང་། ནམ་མཁའ་ལ་འགྲོ་བ་ཞེས་བྱ་བ་ནི་ཐུན་མོང་དུ་གྲགས་པ་ཙམ་མོ། །འདི་དེ་གཉིས་ཀའི་ཡོན་ཏན་ནི་ལུས་ཤིན་ཏུ་མཛེས་ཤིང་ལོ་བཅུ་དྲུག་ལོན་པའི་ཆ་བྱད་ཅན། ཅི་བསམ་པའི་ལོངས་སྤྱོད་ནམ་མཁའ་ལས་འབྱུང་བ། རྫུ་འཕྲུལ་གྱི་སྟོབས་ཀྱིས་སངས་རྒྱས་ཀྱི་ཞིང་ནས་སངས་རྒྱས་ཀྱི་ཞིང་དུ་འགྲོ་ཞིང་སྤྲུལ་པའི་སྐུ་ལས་ཆོས་ཉན་པ་སྟེ། ས་དང་པོ་ཐོབ་ཏུ་ཆ་བའམ། ས་དང་པོ་ཉིད་དང་འདྲ་བ་ཡིན་ཡང་གསུང་ངོ་། །འཁོར་ལོས་སྒྱུར་བ་ནི་གྲགས་པར་ཟད་དོ། །འདི་དག་ཀྱང་རྩ་རྒྱུད་དང་པོའི་གཉིས་པ་དང་། བཅུ་གཅིག་པ་དང་། ཕྱི་མའི་དང་པོ་དང་། དགུ་པ་དང་། བཅུ་པ་རྣམས་དང་། རྡོ་རྗེ་གུར་གྱི་ལེའུ་གཉིས་པ་དང་། བཞི་པ་དང་། དྲུག་པ་དང་། བདུན་པ་དང་། བརྒྱད་པ་དང་། བཅུ་གཅིག་པ་དང་། བཅུ་བཞི་པ་དང་། བཅོ་ལྔ་པ་རྣམས་དང་། སཾ་པུ་ཊའི་གསུམ་པའི་གསུམ་པ་དང་། བརྟག་པ་བདུན་པས་ཧྲིལ་གྱིས་བསྟན་ཏོ། །སེམས་ཅན་དངོས་གྲུབ་དམན་པ་ལ་མོས་པའི་གང་ཟག་རྗེས་སུ་གཟུང་བར་བྱ་བའི་ཕྱིར་ལས་ཀྱི་ཚོགས་རབ་འབྱམས་བཤད་ཟིན་ཏེ། གཙོ་བོར་འཇིག་རྟེན་པའི་དངོས་གྲུབ་སྒྲུབ་པའི་མངོན་པར་རྟོགས་པ་ལྔ་ཀ་བསྟན་ཟིན་ཏོ། །སྤྱི་དོན་གསུམ་པ་གཉིས་ཀ་ལ་དགོས་པའི་གྲོགས་དམ་ཚིག་དང་སྡོམ་པ་ལ་གཉིས་ཏེ། དམ་ཚིག་གི་རྣམ་གྲངས་དང་། དེ་ཇི་ལྟར་བསྲུང་བའི་ཚུལ་ལོ། །དང་པོ་ལ་གསུམ་སྟེ། དབང་བཞི་དང་འབྲེལ་བས་དམ་ཚིག་བཞིའམ། ལུས་ངག་ཡིད་གསུམ་དུ་འདུ་བས་དམ་ཚིག་གསུམ་མམ། ཡང་གང་ཟག་ཐམས་ཅད་ཀྱི་དམ་ཚིག །ཐ་མའི་དམ་ཚིག །འབྲིང་གི་དམ་ཚིག །རབ་ཀྱི་དམ་ཚིག་ཅེས་བྱ་བ་བཞིའམ། དེ་ཉིད་ལ་ཡང་ན་ལས་དང་པོ་པ་དང་། དྲོད་ཅུང་ཟད་པ་དང་། དྲོད་ཆེན་པོ་ཐོབ་པ་སྟེ། གང་ཟག་གསུམ་དུ་གནས་པས་ན་དམ་ཚིག་གསུམ་དུ་འདུས་སོ། །སྤྱི་དོན་གཉིས་པ་ཇི་ལྟར་བསྲུང་བའི་ཚུལ་ལ་གསུམ་སྟེ། ལས་དང་པོ་པས་ཇི་ལྟར་བསྲུང་བ་དང་། དྲོད་ཆུང་ངུ་ཐོབ་པས་བསྲུང་ཚུལ་དང་། ཆེན་པོ་ཐོབ་པས་བསྲུང་ཚུལ་ལོ། །དང་པོ་ལ་གཉིས་ཏེ། ཐོབ་པ་རྗེས་སུ་བསྲུང་བའི་ཚུལ་བསྟན་པ་དང་། ཉམས་ན་ཕྱིར་བཅོས་པའི་ཐབས་བསྟན་པའོ། །དང་པོ་ལ་གཉིས། བསྲུང་བའི་དམ་ཚིག་དང་། བཟའ་བའི་དམ་ཚིག་གོ། དང་པོ་ལ་གཉིས་ཏེ། རྒྱས་པར་བསྲུང་བ་དང་། མདོར་བསྡུས་ཏེ་བསྲུང་བའོ། །དང་པོ་ལ་གཉིས། རྩ་བའི་ལྟུང་བ་བཅུ་བཞི་དང་། ཡན་ལག་གི་དམ་ཚིག་ཕྲ་མོ་རྣམས་སོ། །དེ་དག་ཀྱང་རྡོ་རྗེ་གུར་ལེའུ་བཅོ་ལྔ་པ་ལས། སློབ་དཔོན་སྨད་པར་མི་བྱ་ཞིང་། །བདེ་གཤེགས་བཀའ་ལས་འདའ་མི་བྱ། །སྤུན་ལ་སྨད་པ་ཉིད་མི་བྱ། །སེམས་ཅན་རྣམས་ལ་གདུག་བྱམས་དང་ཞེས་པ་འདིས་སེམས་ཅན་བྱམས་སྤོང་དང་སྨོན་སེམས་གཏོང་བ་གཉིས་བསྟན་ཞེས་གུར་རྒྱན་ལས་གསུངས། །བྱང་ཆུབ་སེམས་ནི་སྤང་མི་བྱ་ཞེས་པ་འདི་གཞུང་ན་མེད། །སྐལ་མེད་དེ་ཉིད་གཏམ་མི་བྱ་ཞེས་པས་གསང་སྒྲོགས་དང་གདུག་ལ་བྱམས་པ་བསྟན། །སྐལ་ལྡན་སེམས་ཅན་སྤང་མི་བྱ། །བདག་གི་ལུས་ལ་ངེས་མི་སྨད། །ཆོས་ཀྱི་ཚད་ནི་གཟུང་མི་བྱ་ཞེས་པས་དགུ་པ་དང་བཅུ་གཅིག་པ་བསྟན། །གཞན་གྱི་ཆོས་ལའང་སྨད་མི་བྱ་། བུད་མེད་ཉིད་ལའང་སྨད་མི་བྱ། །རྩ་བའི་ལྟུང་བ་རབ་ཏུ་སྤང་བ་མདོར་བསྡུས་པ་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །ཇི་སྲིད་བྱང་ཆུབ་སྙིང་པོའི་བར། །དཀོན་མཆོག་གསུམ་ནི་སྤང་མི་བྱ། །རྟག་ཏུ་དམ་ཚིག་བསྲུང་བར་བྱ། །རྡོ་རྗེ་དྲིལ་བུའང་གཟུང་བར་བྱ། །གཙུག་ཏོར་རྟག་ཏུ་གཟུང་བར་བྱ། །རྟག་ཏུ་སྦྱིན་སྲེག་དགང་བར་བྱ། །རྟག་ཏུ་དཀྱིལ་འཁོར་བཞེངས་པར་བྱ། །རྟག་ཏུ་བདེ་གཤེགས་རབ་གནས་བྱ། །འབྱུང་པོ་ཆེ་ལ་གཏོར་མ་སྦྱིན། །ཞེས་བྱ་བ་དང་། ཡང་དེ་ཉིད་ལས། རྟག་པར་རྒྱུན་དུ་སྔགས་བཟླས་ཤིང་། །བསམ་གཏན་ཉིད་དང་འབྲལ་མི་བྱ། །རྟག་ཏུ་སློབ་མ་བསྡུ་བྱ་ཞིང་། །རྟག་པ་རུ་ནི་བཤད་པ་གྱིས། །རྟག་ཏུ་སེམས་ཅན་བསྐྱང་བར་བྱ། །རྟག་ཏུ་སངས་རྒྱས་ཆེར་མཉེས་བྱཛམྦྷ་ལ་ལ་ཆུ་སྦྱིན་ཞིང་། །ལས་རྣམས་ཐམས་ཅད་ཡང་དག་སྤྱད། །བྱེ་མའི་མཆོད་རྟེན་ལས་ལ་ཡང་། །མཁས་པས་ཆོ་ག་བཞིན་དུ་བྱ། །ཞེས་པ་དང་། སཾ་པུ་ཊའི་བརྒྱད་པའི་དང་པོ་ལས། དང་པོ་རྡོ་རྗེའི་ཚད་དང་ལྷ་དགོད་ཚུལ་སོགས་རྡོ་རྗེའི་དེ་ཉིད་དེ། །དྲིལ་བུའི་ཚད་དང་ལྷ་དགོད་ཚུལ་སོགས་དྲིལ་བུ་ཡང་ནི་གཉིས་པའོ། །གསུམ་པ་ཕྲེང་བའི་རྒྱུ་དང་གྲངས་སོགས་ཕྲེང་བའི་དེ་ཉིད་དེ། །བཞི་པ་ཡེ་ཤེས་ཀྱི་དེ་ཁོ་ན་ཉིད་ནི་ཡེ་ཤེས་ཀྱི་འཕོ་བ་དང་ཡེ་ཤེས་ཀྱི་དེ་ཁོ་ན་ཉིད་དངོས་ཤེས་པ་ཡིན་པར་ཤེས་པར་བྱ། །ཞེས་བྱ་བ་ལ་སོགས་པ་གསུངས་སོ། །གཞན་ཡང་རྩ་རྒྱུད་ཕྱི་མའི་གསུམ་པ་ལས། ཁྱོད་ཀྱིས་སྲོག་ཆགས་གསད་པར་བྱ། །ཞེས་བྱ་བ་ལ་སོགས་པ་གསུངས་པ་རྣམས་ནི་དགོངས་ཏེ་གསུངས་པའི་དམ་ཚིག་དེ་གོང་མ་ཉིད་ཀྱི་ཁོངས་སུ་འདུའོ། །དོན་གཉིས་པ་དམ་ཚིག་དེ་དག་མདོར་བསྡུས་པའི་ཚུལ་གྱིས་བསྲུངས་ན་སྦྱང་གཞི་ལུས་ངག་ཡིད་གསུམ་དུ་འདུས་པས། དམ་ཚིག་ཀྱང་སྐུ་གསུང་ཐུགས་ཀྱི་དམ་ཚིག་ཏུ་འདུ་སྟེ། སཾ་པུ་ཊའི་བཅུ་པ་དངོས་ལས། བུད་མེད་དང་ནི་སྐྱེས་པའི་ལུས་བཟང་ངན་དུ་མར་སྣང་བ་ནི། །ལས་ནི་དགེ་སྡིག་དུ་མས་བསྐྱེད་པས་ན། །ལས་དེའང་དེ་ཁོ་ན་ཉིད་མི་ཤེས་པས་ཀྱང་འཕེན་པ་ཅིས་གཞན་གྱི་ལུས་ལ་སྨད་པར་མི་བྱ་སྟེ་དེའི་ཤུགས་བསྟན་རང་གི་ལུས་ཀྱི་ཉེས་སྤྱོད་གསུམ་སྤོང་བ་དང་བཅས་པ་ནི། །སྐུ་ཡི་རྡོ་རྗེའི་དམ་ཚིག་གོ། སེམས་ཅན་སྣ་ཚོགས་ལ་གདུང་བ་སྟེ་གནོད་པ་བསྐྱེད་པའི་བརྣབ་སེམས་སོགས་དང་། །ཀུན་རྟོག་དྲ་བའི་རྣམ་རྟོག་གིས། །སེམས་ལ་སྨད་པ་སྟེ་སྐྱོན་གྱིས་གོས་པར་མི་བྱ་སྟེ། །ཐུགས་ཀྱི་རྡོ་རྗེ་དམ་ཚིག་གོ། ཕྲག་དོག་ཉིད་ཀྱིས་མ་རངས་པས། །ཚིག་རྩུབ་ལ་སོགས་སྨྲ་མི་བྱ། །རང་གཞན་གྱི་ངག་ལ་མི་སྨད་པས་རྣ་བ་བདེ་བར་བྱེད་པ་ཉིད། །གསུང་གི་རྡོ་རྗེའི་དམ་ཚིག་གོ། ཞེས་གསུངས་པ་སྟེ། དམ་ཚིག་གསུམ་པོ་འདི་བསྲུངས་པས་གཞན་རྣམས་ཤུགས་ཀྱིས་བསྲུང་བར་འགྱུར་རོ། །མངོན་པར་རྟོགས་པ་དེ་དག་ཀྱང་ཧེ་-བཛྲ-་ཕྱི་མའི་གསུམ་པ་དང་། གུར་ལེའུ་བཅོ་ལྔ་པ། ས་ཾཔུ་ཊའི་བརྒྱད་པའི་དང་པོ་རྣམས་ནས་འབྱུང་ངོ་། །སྤྱི་དོན་གཉིས་པ་བཟའ་བའི་དམ་ཚིག་ནི་རྣམ་པར་རྟོག་པ་སྤང་བར་བྱ་བའི་ཕྱིར་ཤ་ལྔ་བདུད་རྩི་རྣམ་པ་ལྔས་བདག་དང་གཞན་ལ་ཁ་ཟས་ཀྱི་ཚུལ་དུ་མཆོད་པ་སྟེ། དེ་ལ་གཉིས་ཏེ། རྒྱུན་གྱི་བཟའ་བའི་དམ་ཚིག་དང་། ཁྱད་པར་གྱི་བཟའ་བའི་དམ་ཚིག་གོ། དང་པོ་ལ་གསུམ་སྟེ། བདུད་རྩིའི་རི་ལུ་སྒྲུབ་པ་དང་། བསྟེན་པ་དང་། ཕན་ཡོན་བསྟན་པའོ། །སྒྲུབ་པ་ནི། རྩ་རྒྱུད་དང་པོའི་བཅུ་གཅིག་པ་ལས། ན་ར་མི་དང་ག་བི་བ་ལང་ཧ་དང་པོ་ཧསྟེ་གླང་ཆེན་དང་། །མཐའ་ཡི་ཤྭ་སྟེ་ཨ་ཤྭ་རྟ་དང་དང་པོའི་ཤྭ་སྟེ་ཤྭ་ན་ཁྱི། །ཀྱེ་ཡི་རྡོ་རྗེའི་དངོས་གྲུབ་ཕྱིར། །བདུད་རྩི་ལྔ་ཡང་དེ་བཞིན་བཟའ། །ཞེས་པ་དང་། ཕྱི་མའི་དགུ་པ་ལས་ཀྱང་། ཡི་གེ་གསུམ་བཏུས་པའི་རྗེས་ལ་བཟའ་བ་དང་བཏུང་བ་བྱིན་གྱིས་བརླབ་པའོ། །ཞེས་གསུངས་ལ། སཾ་པུ་ཊའི་དགུ་པའི་གཉིས་པ་ལས་ཀྱང་། ཡེ་ཤེས་ཀྱང་ཡིན་ལྕགས་ཀྱུའང་ཡིན་པས་ཡེ་ཤེས་ལྕགས་ཀྱུ་ུསྟེ་དེའང་ཡེ་ཤེས་ལྔའི་རབ་ཏུ་དབྱེ་བས་ལྔའོ། །ཡིད་ཀྱིས་དམིགས་པས་ཐམས་ཅད་དགུག་པའོ། །ཞེས་བྱ་བ་ལ་སོགས་པ་དང་། ཧ་འོད་དཔག་མེད་པའི་ངོ་བོ་ཡིས་ཁ་དོག་ངན་པ་འཕྲོག་ཅིང་ཁ་དོག་ཕུན་སུམ་ཚོགས་པར་བྱེད། །རྣམ་སྣང་གི་ངོ་བོ་ཧོ༵ས་ནི༵་དྲི༵་ང༵ན་པ་འཇི༵ག་ཅིང་བཟང་བ༵ར་བྱེ༵ད། མི་བསྐྱོད་པའི་ངོ་བོ་ཧྲཱི༵ཿས༵་ནི་བརྩོ༵ན་འགྲུ༵ས་ཏེ་རོ་ངན་པ་འཇོ༵མས་ནས་བཟང་བ༵ར་བྱེ༵ད། ཅེས་བྱ་བ་ལ་སོགས་པས་གཏོར་མ་བྱིན་གྱིས་བརླབ་པ་དང་ཐུན་མོང་དུ་བསྟན་ལ། ཐོད་པ་དེ་ཡི་དབུས་ནས་མཐེབ་སྲིན་གྱིས་བླངས་ནས་ནི། །དེ་ནས་བདུད་རྩི་མྱང་བར་བྱ། །ཞེས་བྱ་བས་བདུད་རྩི་མྱང་བ་བསྟན་ཏོ། །རྒྱས་པར་ནི་ཕྱག་རྒྱ་ཆེན་པོ་ཐིག་ལེ་ལས་བསྟན་ཅིང་། ལག་ཏུ་བླང་བ་ནི་བླ་མའི་མན་ངག་ལས་ཤེས་པར་བྱའོ། །གཉིས་པ་བསྟེན་པ་ནི་ཐུན་གྱི་ཐོག་མཐའ་འམ་ཐུན་རེ་ལ་རེ་རེའམ་ཞག་རེ་ལ་རེ་རེའམ་ཟླ་བ་རེ་ལ་རེ་རེ་བསྟེན་པར་བྱ་ཞིང་། ཁ་ཟས་ཐམས་ཅད་ཀྱང་བདུད་རྩིར་བྱིན་གྱིས་བརླབས་ལ་ལོངས་སྤྱད་པར་བྱའོ། །གསུམ་པ་ཕན་ཡོན་ནི་རྡོ་རྗེ་རྣལ་འབྱོར་མ་རྣམས་ཀྱི་བྱིན་གྱིས་རློབ་པ་དང་། ཚེ་དང་ལུས་ཀྱི་བཅུད་ལེན་དུ་འགྱུར་བ་སྟེ། ཧེ་བཛྲའི་དྲུག་པ་ལས། རྒ་ཤིས་ཟིལ་གྱིས་མི་གནོན་ཅིང་། །རྟག་ཏུ་བསྲུང་བར་འགྱུར་བ་ཡིན། །ཞེས་གསུངས་སོ། །ཁྱད་པར་གྱི་བཟའ་བའི་དམ་ཚིག་ནི་ཚོགས་ཀྱི་འཁོར་ལོ་སྟེ། དེ་ལ་གཉིས། མིང་དོན་དང་། ཆོ་གའོ། །དང་པོ་ལ་ལྔ་སྟེ། གང་ཟག་གིས་དབྱེ་བ་དང་། རྣལ་འབྱོར་གྱིས་དབྱེ་བ་དང་། དུས་ཀྱིས་དབྱེ་བ་དང་། དགོས་པས་དབྱེ་བ་དང་། མཆོད་བྱས་དབྱེ་བའོ། །དང་པོ་ལ་གསུམ། དཔའ་བོ་དང་རྣལ་འབྱོར་མ་འཚོགས་པ་ཚོགས་ཀྱི་འཁོར་ལོ་ཞསེ་བྱ་ལ། དཔའ་བོ་འབའ་ཞིག་འཚོགས་ན་དཔའ་བོའི་སྟོན་མོ། དཔའ་མོ་འབའ་ཞིག་འཚོགས་ན་དཔའ་མོའི་སྟོན་མོའོ། །གཉིས་པ་རྣལ་འབྱོར་གྱིས་ཕྱེ་ན་ལྷའི་རྣལ་འབྱོར་མི་མཐུན་པ་དུ་མ་འཚོགས་ན་མཛའ་བ་འདུས་པའོ། །གསུམ་པ་དུས་ཀྱིས་ཕྱེ་ན་སྦྱིན་སྲེག་དང་རབ་གནས་ཀྱི་དུས་ལ་ཙ་རུའི་བཟའ་བའོ། །བཞི་པ་དགོས་པས་ཕྱེ་ན་ལྷ་གྲངས་དང་མཐུན་པའི་འབག་བྱས་ཏེ། ཚར་གཅད་པ་ལ་སོགས་པའི་དུས་སུ་བྱས་ན་སངས་རྒྱས་ཀྱི་གར་རོ། །ལྔ་པ་མཆོད་བྱས་ཕྱེ་ན་བྱེ་བྲག་ཏུ་འཇིག་རྟེན་དང་འཇིག་རྟེན་ལས་འདས་པའི་མཁའ་འགྲོ་མ་འབའ་ཞིག་མཆོད་ན་རིགས་ལྡན་མ་མཆོད་པ་དང་། གཞོན་ནུ་མའི་སྟོན་མོ་ཞེས་གཉིས་ཀྱི་མིང་འཐོབ་བོ། །དེ་དག་ཀྱང་མངོན་པར་རྟོགས་པ་གཅིག་པ་ཡིན་པས། སྤྱི་དོན་གཉིས་པ་དེའི་ཆོ་ག་ལ་དྲུག་སྟེ། གནས་དང་། དུས་དང་། ཡོ་བྱད་དང་། གང་ཟག་དང་། ཆོ་ག་དང་། དགོས་པའོ། །གནས་ལ་གཉིས་ཏེ། ལས་དང་པོ་པའི་གནས་དང་། སེམས་བརྟན་པ་ཐོབ་པ་ཡིའོ། །དང་པོ་ནི་རྩ་རྒྱུད་ཕྱི་མའི་བདུན་པ་ལས། དུར་ཁྲོད་རི་ཡི་བྱ་སྐྱིབས་དང་། །དེ་བཞིན་མི་མེད་གྲོང་ཁྱེར་དང་། །ཡང་ན་དབེན་པའམ་རྒྱ་མཚོའི་མཐར། །བཟའ་བ་འདི་ནི་རབ་ཏུ་བཟའ། །ཞེས་གསུངས་ལ། བཤད་པའི་རྒྱུད་གཉིས་ལས་ཀྱང་གསལ་བར་གསུངས་སོ། །སེམས་བརྟན་པ་ཐོབ་པའི་གནས་ནི་ཡུལ་ཉི་ཤུ་རྩ་བཞིའམ། ཡུལ་སུམ་ཅུ་རྩ་གཉིས་ཏེ། རྩ་རྒྱུད་དང་པོའི་བདུན་པ་ལས། གནས་དང་ཉེ་བའི་གནས་དང་ནི། །ཞེས་བྱ་བ་ལ་སོགས་པ་དང་། གནས་ནི་ཛཱ་ལནྡྷ་རར་བཤད། །ཅེས་བྱ་བ་ལ་སོགས་པ་གསུངས་སོ། །དུས་ནི་གཉིས་ཏེ། རྒྱུན་གྱི་དུས་དང་། ཁྱད་པར་གྱི་དུས་སོ། །དང་པོ་ནི་ཡར་ངོའི་བརྒྱད་དང་། བཅུ་དང་། བཅུ་བཞི་དང་། བཅོ་ལྔ་དང་། མར་ངོ་ལའང་དེ་བཞིན་དུ་དུས་བཞི་སྟེ། ཟླ་བ་གཅིག་ལ་དུས་བརྒྱད་ཡིན་ཏེ། རྩ་རྒྱུད་དང་པོའི་བདུན་པ་ལས། ཡི་དྭགས་ཟླ་ཕྱེད་བཅུ་བཞི་དང་། །དེ་བཞིན་དུ་ནི་བརྒྱད་པ་ཉིད། །ཅེས་པ་དང་། སཾ་པུ་ཊའི་དགུ་པའི་གཉིས་པ་ལས། ཟླ་བ་མར་ངོའི་བཅུ་བཞི་དང་། །ཁྱད་པར་དུ་ནི་བརྒྱད་པ་དང་། །ཡར་གྱི་ངོ་ཡི་བཅུ་པ་ལ། །མཆོད་པ་མཆོད་པའི་བདག་ཉིད་འགྱུར། །ཞེས་གསུངས་སོ། །ཁྱད་པར་གྱི་དུས་ནི་རྒྱུད་ཉན་པ་དང་བཤད་པ་ལ་སོགས་པ་དང་འབྲེལ་བ་དང་། འཆི་བ་བསླུ་བ་དང་། མུ་གེ་ཞི་བར་བྱ་བ་ལ་སོགས་པའི་དུས་ཏེ། རྡོ་རྗེ་གུར་ལེའུ་གཉིས་པ་ལས། འཆི་བའི་ཚེའམ་མུ་གེ་འམ། །ཕས་ཀྱི་འཁོར་ལོའི་གནོད་པ་དང་། །རབ་གནས་དཀྱིལ་འཁོར་སྦྱིན་སྲེག་དང་། །ཆར་མེད་པ་དང་ཞི་བ་ལ། །སྔགས་དང་བསྒོམ་པར་ལྡན་པ་ཡིས། །གང་ཞིག་བདག་ནི་རྟག་རོལ་པ། །དེ་ཡི་མདུན་དུ་བདག་འདུག་སྟེ། །དེར་ནི་རྫུན་དུ་མི་འགྱུར་རོ། །ཞེས་གསུངས་སོ། །ཡོ་བྱད་ནི་ཅི་འབྱོར་པ་ཡིན་ནའང་མེད་དུ་མི་རུང་བ་ཤ་དང་ཆང་ཡིན་ཏེ། རྩ་རྒྱུད་དང་པོའི་བདུན་པ་ལས། རྒྱལ་མཚན་དང་ནི་མཚོན་བསྣུན་དང་། །ལན་བདུན་པོ་ཡང་བཟའ་བར་བྱ། །ཞེས་པ་དང་། ཕྱི་མའི་བདུན་པ་ལས། སྐྱེས་པའི་ཐོད་ཆེན་ཆ་གཅིག་པར། །ཆང་ནི་བཟང་པོས་ཡོངས་བཀང་སྟེ། །ཞེས་བྱ་བ་རྩ་བ་དང་བཤད་པའི་རྒྱུད་ལས་མང་དུ་གསུངས་སོ། །གང་ཟག་ལ་གསུམ་སྟེ། ལས་དང་པོ་པ་དང་། སེམས་བརྟན་པ་ཐོབ་པ་དང་། བརྟན་པ་ཆེར་ཐོབ་པའོ། །དང་པོ་ནི་དམ་ཚིག་ཐོབ་ལ་མ་ཉམས་པའི་དཔའ་བོ་དང་རྣལ་འབྱོར་མ་དང་། དཔའ་བོ་འབའ་ཞིག་གམ། །རྣལ་འབྱོར་མ་འབའ་ཞིག་གམ། རིགས་ལྡན་མ་མཆོད་པའི་དབང་དུ་བྱས་ཏེ། མཁའ་འགྲོ་མ་བདུན་པོའི་ཁྱིམ་དུ་ཐོད་པ་སོགས་མཚན་མ་བྲིས་ནས་མཆོད་པའམ། རྒྱས་བཏབ་པའི་མིའི་བུ་མོ༼འ༷མ་༽རིགས་ལྡན་མ་མཆོད་པའི་དབང་དུ་བྱས་ཏེ། རོའི་རས་ལ་སོགས་པ་ལ་ཐོད་པའི་མཚན་མ་བྲིས་པའང་མཆོད་པར་བྱ་སྟེ། སཾ་པུ་ཊའི་བཞི་པའི་གཉིས་པ་ལས། ཐོད་པ་ནི་གཟུགས་ཅན་མའི་དགྲ་སྟ་ནི་འོ་བྱེད་མའི་མཆེ་བ་སྟེ་ཕག་གི་སོ་ནི་ལཱ་མཱའི་དང་། །ཆུ་སྲིན་རྒྱལ་མཚན་ནི་ཡོངས་གྱུར་མའི་རལ་གྲི་ནི་བྱིས་བཅས་མའི་དང་། །འཕང་མདུང་ནི་མི་ལྡོག་མའི་དུང་ནི་འདོད་པ་མོའི་ཕྱག་རྒྱ་དང་བདུན་དུ་གསུངས། །གཟུགས་ཅན་མ་ལ་སོགས་པ་དང་ཡང་དག་པར་སྦྱོར་བའི་ཆོ་ག་འདི། །སྟོང་ཉིད་སྙིང་རྗེའི་རྣལ་འབྱོར་རིག་པས་རྟག་ཏུ་མཆོད། །ཅེས་པ་དང་། དེ་ཉིད་ཀྱི་གསུམ་པ་ལས། པདྨའི་འདབ་མ་ལྟ་བུའི་མིག །ཅེས་བྱ་བ་ལ་སོགས་པ་རྒྱས་པར་གསུངས་སོ། །སེམས་བརྟན་པ་ཐོབ་པ་ནི་དྲོད་ཆུང་འབྲིང་ཐོབ་པའོ། །བརྟན་པ་ཆེར་ཐོབ་པའི་གྲོགས་ནི་དངོས་གྲུབ་ཐོབ་པའི་དཔའ་བོ་དང་རྣལ་འབྱོར་མ་དང་། འཇིག་རྟེན་དང་འཇིག་རྟེན་ལས་འདས་པའི་མཁའ་འགྲོ་མ་རྣམས་ཏེ། དེ་ལ་མཁའ་འགྲོ་མ་ནི་འཇིག་རྟེན་དང་འཇིག་རྟེན་ལས་འདས་པའི་མཁའ་འགྲོ་མ་བྱེ་བ་ཕྲག་བསམ་གྱིས་མི་ཁྱབ་པ་རྣམས་ནི་རྣལ་འབྱོར་མ་སུམ་ཅུ་རྩ་བདུན་དུ་འདུས་ལ། དེ་དག་ཀྱང་རྣལ་འབྱོར་མ་བདུན་དུ་འདུ་ཞིང་། དེ་དག་ཀྱང་རྡོ་རྗེ་ཕག་མོའམ། རྡོ་རྗེ་བདག་མེད་མ་ཞེས་བྱ་བ་གཅིག་ཏུ་འདུ་བ་ཡིན་ཏེ། སཾ་པུ་ཊའི་བཞི་པའི་གཉིས་པ་ལས། གཟུགས་ཅན་མ་དང་འོ་བྱེད་མ། །ལཱ་མཱ་ཡོངས་གྱུར་བྱིས་བཅས་མོ། །མི་ལྡོག་མ་དང་འདོད་པ་མོ། །འདི་དག་མཁའ་འགྲོ་བདུན་དུ་གསུངས། །ཞེས་བྱ་བ་དང་། བདེ་མཆོག་རྩ་བའི་རྒྱུད་ལས། རྣལ་འབྱོར་མ་ནི་སུམ་ཅུ་དྲུག །རྡོ་རྗེ་ཕག་མོའི་རིགས་ལས་བྱུང་། །ཞེས་གསུངས་པ་ཡིན་ཏེ། དེ་ལྟ་བུའི་རྣལ་འབྱོར་མ་རྣམས་དང་བརྡ་དང་བརྡའི་ལན་བྱས་པས། དམ་ཚིག་དང་ལྡན་པར་ཤེས་ནས་ཚོགས་ཀྱི་འཁོར་ལོ་ལ་འདུ་བ་ཡིན་ཏེ། རྩ་རྒྱུད་དང་པོའི་ལེའུ་བདུན་པ་ལས། ཕྱག་རྒྱ་ཕྱག་རྒྱའི་ལན་གྱིས་ནི། །དམ་ཚིག་གིས་ནི་རྣམ་པར་དབྱེ། །དེ་ལ་རྣལ་འབྱོར་མས་སྨྲས་པ། །ཨེ་མ་བུ་ནི་སྙིང་རྗེ་ཆེ། །གལ་ཏེ་ཕྲེང་བའི་ལག་སྟོན་ན། །འདུ་བར་བྱ་ཞེས་སྨྲ་བ་ཡིན། །ཕྲེང་བ་མངོན་པར་བཏང་བྱས་ན། །དམ་ཚིག་ལ་མནོས་ལ་ཤོག་ཅིག་བརྟུལ་ཞུགས་བཟང་པོ་ཞེས་བོད་པའོ། །དེ་ལ་ཕལ་པ་ལས་ཕྱི་རོལ་དུ་གྱུར་པ་ཞེས་སྤྱིར་མཁའ་འགྲོ་འདུ་བའི་གནས་ཙམ། །བཟང་པོའི་སྤྱོད་ཡུལ་ཏེ་མཁའ་འགྲོ་མཆོག་རྣམས་འདུ་ཞིང་གནས་པའི་ས་ནི་ཡུལ་སོ་གཉིས་སོ། །དེ་ལ་འདུ་བར་རྣལ་འབྱོར་མས། །གང་སྨྲས་དེ་ལྟར་ཐམས་ཅད་བྱ། །ཞེས་གསུངས་པས་སོ། །ཆོ་ག་ལ་གསུམ་སྟེ། སྦྱོར་བ། དངོས་གཞི། མཇུག་གོ། དང་པོ་ལ་དྲུག་སྟེ། གནས་ཁང་བརྒྱན་པར་བྱས་ལ་ཚོགས་ཀྱི་ཁ་ཟས་དང་མཆོད་གཏོར་བཤམ་པ་དང་། སློབ་དཔོན་ནང་དུ་བྱོན་ནས་སྔོན་དུ་བཞུགས་པ་དང་། དེའི་རྗེས་ལ་དབྱུག་པ་སྔོན་པོའི་ང་རྒྱལ་འཛིན་པའི་རྣལ་འབྱོར་པ་ལ་གསོལ་བ་བཏབ་སྟེ་ནང་དུ་འཇུག་པ་དང་། ཕྱག་དང་མཎྜལ་སྔོན་དུ་འགྲོ་བས་རྒན་རིམ་བཞིན་གྲལ་བྱ་བ་དང་། ལྷའི་རྣལ་འབྱོར་ལ་གནས་པར་གསོལ་བ་གདབ་པ་དང་། ཡི་གེ་བརྒྱ་པས་རྒྱུད་༼སྦྱང༷་ཞི༷ང་སྲུང༷་འཁོ༷ར་སྒོ༷མ་༽པའོ། །གཉིས་པ་དངོས་གཞི་ལ་ལུགས་གཉིས་ཏེ། བདག་བསྐྱེད་འབའ་ཞིག་མཆོད་པ་དང་། བདག་དང་མདུན་བསྐྱེད་གཉིས་ཀ་མཆོད་པའི་ལུགས་སོ། །དང་པོ་ནི་རྩ་བའི་རྒྱུད་དང་རྡོ་རྗེ་གུར་གྱི་གཞུང་ཡིན་ལ། གཉིས་པ་ནི་སཾ་པུ་ཊའི་དགོངས་པ་ཡིན་ནོ། །དང་པོ་ལྟར་ན་དངོས་གཞི་བདག་གི་རྣལ་འབྱོར་རྫོགས་པ་གཅིག་ལ་ཚིམ་པ་དྲུག་ཏུ་བྱའོ། །གཉིས་པ་སཾ་པུ་ཊའི་དགོངས་པ་ལྟར་ན་གསུམ་སྟེ། བདག་གི་རྣལ་འབྱོར་བྱ་བ་དང་། མདུན་གྱི་དཀྱིལ་འཁོར་བསྐྱེད་པ་དང་། དངོས་གཞི་ཚིམ་པ་དྲུག་བྱའོ། །གང་ལྟར་ཡང་རུང་སྟེ་ཚིམ་པ་དྲུག་ཏུ་ཐམས་ཅད་འདུ་བས་ན་ཚིམ་པ་དྲུག་ནི། བདག་བསྐྱེད་ཡན་ལག་དྲུག་གིས་བདག་གི་རྣལ་འབྱོར་རྫོགས་པར་བྱས་ནས། དེ་ཉིད་ལ་ཏིང་ངེ་འཛིན་གྱི་དཀྱིལ་འཁོར་མཆོད་པས་ཚིམ་པར་བྱ་བ་དང་། སྙིང་གའི་དཀྱིལ་འཁོར་བདུད་རྩི་མྱངས་པས་ཚིམ་པར་བྱ་བ་དང་། ཆོས་སྐྱོང་སྲུང་མ་གཏོར་མས་ཚིམ་པར་བྱ་བ་དང་། དམ་ཚིག་དང་ལྡན་པའི་སྐྱེ་བོ་རྣམས་ཁ་ཟས་ཀྱིས་ཚིམ་པར་བྱ་བ་དང་། མཐར་༼སྐྱེེ༷་མཆེ༷ད་ཀྱི༷་ལྷ༷་རྣ༷མས་༽གླུ་གར་དང་རོལ་མོས་ཚིམ་པར་བྱ་བ་དང་། ཚིམ་པ་དྲུག་པོ༼པ༷་ཐ༷བས་སྙོ༷མས་འཇུ༷ག་བདེ༷་བ༷ས་ཚི༷མ་པ༷་༽དངོས་སོ། །གསུམ་པ་རྗེས་ཀྱི་བྱ་བ་ལ་དྲུག་སྟེ། བྱིན་གྱིས་བརླབ་པར་བྱ་བའི་ཕྱིར་རྡོ་རྗེའི་གླུ་བླང་ཞིང་བཀྲ་ཤིས་པར་བྱ་བའི་ཕྱིར་བཀྲ་ཤིས་ཀྱི་ཚིགས་བཅད་བརྗོད་པ་དང་། ལྷག་མའི་གཏོར་མས་ཚིམ་པར་བྱ་ཞིང་། ཆོ་ག་ལྷག་ཆད་བསྐང་བའི་དོན་དུ་ཡི་གེ་བརྒྱ་པ་འདོན་པ་དང་། ལས་བསགས་པ་འབྲས་བུ་དང་ལྡན་པར་བྱ་བའི་ཕྱིར་སྨོན་ལམ་གདབ་ཅིང་འདོད་པའི་དོན་ལ་གསོལ་བ་གདབ་པ་དང་། བཟོད་པར་གསོལ་ཏེ་འཇིག་རྟེན་དང་འཇིག་རྟེན་ལས་འདས་པའི་མགྲོན་གཤེགས་སུ་གསོལ་བ་དང་། བསྲུང་བ་བྱས་ལ་སྣོད་མ་ཡིན་པ་ལ་གསང་བའི་ཕྱིར་ལས་ཀྱི་རྗེས་མི་མངོན་པར་བྱ་བའོ། །སྤྱི་དོན་དྲུག་པ་དགོས་པ་ལ་གཉིས་ཏེ། གཙོ་བོར་གྱུར་པའི་དགོས་པ་དང་། གནས་སྐབས་ཀྱི་དགོས་པའོ། །དང་པོ་ནི་སངས་རྒྱས་ཉིད་ཡིན་ཏེ། རྡོ་རྗེ་གུར་ལེའུ་བཅུ་གསུམ་པ་ལས། བྱང་ཆུབ་འདོད་པས་ལུས་བདེ་བ་དང་སེམས་རངས་ཤིང་སྤྲོ་བའི་ཕྱིར་གར་དང་ནི། །གླུ་དང་རོལ་མོའི་སྒྲ་བྱེད་དང་། །དྲི་དང་ཕྲེང་བ་བྱུག་པ་ཡིས། །རིག་པའི་རྒྱལ་པོ་མཆོག་གི་དངོས་གྲུབ་རབ་ཏུ་འགྲུབ། །ཅེས་གསུངས་སོ། །གནས་སྐབས་ཀྱི་དགོས་པ་ནི་ཚེ་རིང་བ་དང་། ནད་མེད་པ་ལ་སོགས་པ་ཡིན་ཏེ། སྔར་དུས་ཀྱི་སྐབས་སུ་བཤད་ཟིན་ཏོ། །མངོན་པར་རྟོགས་པ་དེ་དག་ནི་རྩ་བའི་རྒྱུད་ཀྱི་དང་པོའི་བདུན་པ་དང་། ཕྱི་མའི་བདུན་པ་དང་། རྡོ་རྗེ་གུར་གྱི་ལེའུ་གཉིས་པ་དང་། བརྒྱད་པ་དང་། བཅུ་བཞི་པ་དང་། བཅོ་ལྔ་པ་དང་། སཾ་པུ་ཊའི་དགུ་པའི་གཉིས་པ་དང་། གསུམ་པ་དང་། བཞི་པ་རྣམས་ལས་ཞིབ་ཏུ་རྟོགས་པར་བྱའི། ལུང་རྣམས་ནི་ཡི་གེ་མང་དུ་དོགས་པས་མ་བྲིས་སོ། །སྤྱི་དོན་གཉིས་པ་ཉམས་ན་ཕྱིར་བཅོས་པའི་ཐབས་ནི་གཉིས་ཏེ། ཉེས་པ་ཕྲ་མོ་ལས་ལྟུང་བ་ལས་ལྡང་བ་དང་། ཉེས་པ་ཆེན་པོ་ལས་དམ་ཚིག་དང་སྡོམ་པ་ཡང་དག་པར་བླང་བའོ། །དང་པོ་ནི་རྡོ་རྗེ་གུར་ལེའུ་གསུམ་པ་ལས་ཡི་གེ་བརྒྱ་པ་གསུངས་ལ། ཉེས་པ་ཆེན་པོ་བཅོས་པ་ནི། སཾ་པུ་ཊའི་གཉིས་པའི་གཉིས་པ་ལས། རྣལ་འབྱོར་པ་དམ་ཚིག་ཉམས་པས་བག་མེད་པ་སྐྱེ་བར་འགྱུར་ཏེ། ཡང་བྱང་ཆུབ་སེམས་དཔའི་དམ་ཚིག་བླང་བར་བྱས་ནས་ཕྱིས་མི་བྱེད་པར་སྡོམ་པ་གཟུང་བར་བྱ་སྟེ། དེའི་ཕྱིར་ཀུན་གྱི་སྡོམ་པ་དང་ལྡན་ཞིང་དེ་ཁོ་ན་ཉིད་ལ་གནས་པས་ཕྱག་རྒྱའི་རྣལ་འབྱོར་བྱའོ། །ཞེས་པ་དང་། ཡང་། སྔགས་ཀྱི་ལམ་ནི་རྗེས་བཙལ་བས། །གང་ཚེ་མཁས་པས་དབང་བསྐུར་བ། །ཞེས་པ་ནས། དམ་ཚིག་ཉམས་པས་འཇིགས་པ་ཡི། །བློ་དང་ལྡན་པས་དེ་བཞིན་བླང་། །ཞེས་གསུངས་པས། དབང་བསྐུར་ཡང་དག་པར་བླང་བར་བྱའོ། །སྤྱི་དོན་གཉིས་པ་དྲོད་ཆུང་ངུ་ཐོབ་པའི་དམ་ཚིག་ནི། གུར་གྱི་ལེའུ་བཅོ་ལྔ་པ་ལས། ཕྱག་རྒྱ་བཅིང་བ་རྣམས་སྤངས་ཤིང་། །མཆོད་རྟེན་ལས་ནི་མི་བྱ་སྟེ། །དཀྱིལ་འཁོར་ལ་སོགས་ལུས་ཀྱི་ལས། །རྨི་ལམ་དུ་ཡང་མི་བྱའོ། །སློབ་དཔོན་གཞན་ལ་ཕྱག་མི་བྱ། །བླ་མའི་རྒན་རབས་ཕྱག་བྱའོ། །ཞེས་བྱ་བ་ལ་སོགས་པ་གསུངས་པ་རྣམས་ཡིན་ནོ། །ཡང་སཾ་པུ་ཊའི་ལྔ་པའི་གཉིས་པ་ལས་ཀྱང་། གླེགས་བམ་བཀླག་པར་གསུངས་པ་མི་བྱ་བ་དང་ཞེས་བྱ་བ་ལ་སོགས་པ་གསུངས་སོ། །སྤྱི་དོན་གསུམ་པ་དྲོད་ཆེན་པོ་སྐྱེས་པའི་དམ་ཚིག་ནི། དམ་ཚིག་སྡོམ་ལས་རྣམ་པར་གྲོལ། །ཞེས་བྱ་བ་ལ་སོགས་པ་རྣམས་ཏེ། དེ་དག་ཀྱང་ཧེ་བཛྲའི་དྲུག་པ་དང་། གུར་བཅོ་ལྔ་པ་དང་། སཾ་པུ་ཊའི་བརྟག་པ་ལྔ་པ་ལ་སོགས་པ་ལས་གསུངས་ཏེ། གོང་དུ་བསྟན་པའི་སྤྱོད་པ་ཉིད་ཡིན་པས་འདིར་བཤད་མི་དགོས་སོ། །གཉིས་ཀ་ལ་དགོས་པའི་གྲོགས་དམ་ཚིག་དང་སྡོམ་པ་བསྟན་ཟིན་ཏེ། ཐབས་ཀྱི་རྒྱུད་ཀྱི་མངོན་པར་རྟོགས་པ་བཅུ་གཅིག་པོ་མཐའ་དག་བསྟན་ཟིན་ཏོ། །དེ་ལྟ་བུའི་ལམ་དེ་ཉམས་སུ་ལེན་པའི་གང་ཟག་ལམ་ལ་འཇུག་པའི་སྔོན་དུ་ཅུང་ཟད་བཤད་པ་དེ་རྒྱས་པར་འོག་ཏུ་བཤད་པར་བྱའོ་ཞེས་ཁས་བླངས་པའི་དབང་ཐོབ་པའི་གང་ཟག་གི་རིགས་གསལ་བར་བཤད་ན་གསུམ་སྟེ། གང་ཟག་གི་རིགས་དབྱེ་བ་དང་། དྲི་བ་དགོད་པ་དང་། ལན་གདབ་པའོ། །དང་པོ་ལ་གསུམ། དབང་གིས་དབྱེ་བ་དང་། སྤྱོད་པས་དབྱེ་བ། འབྲས་བུ་གྲུབ་ཉེ་རིང་གི་སྒོ་ནས་དབྱེ་བའོ། །དང་པོ་ནི་སྤྱིར་དབང་གི་སྒོ་ནས་སློབ་དཔོན་དང་སློབ་མ་ཞེས་བྱ་བ་གཉིས་སུ་འགྱུར་ལ། གཉིས་པའང་སྤྱོད་པའི་སྒོ་ནས་ཕྱི་ལ་མཆོག་ཏུ་གཞོལ་བ་དང་། ནང་ལ་མཆོག་ཏུ་གཞོལ་ཞེས་བྱ་བར་ཡང་འགྱུར་ལ། གསུམ་པའང་འབྲས་བུ་གྲུབ་ཉེ་རིང་གི་སྒོ་ནས་རབ་དང་འབྲིང་དང་ཐ་མ་ཞེས་བྱ་བར་དབྱེ་བ་བྱའོ། །སྤྱི་དོན་གཉིས་པ་དེ་ལྟར་གང་ཟག་གི་རིགས་མང་དུ་ཡོད་ན། གང་ཟག་དེ་དག་གིས་དེ་ལྟར་བསྟན་པའི་ལམ་ཇི་ལྟར་ཉམས་སུ་ལེན་སྙམ་པའི་རྟོག་པས་དྲི་བ་ལ་གསུམ་སྟེ། བསྐྱེད་རྫོགས་གཉིས་སམ་ལམ་དང་ལམ་གྱི་ཡན་ལག་ལས་ཕྱེ་བའི་མངོན་པར་རྟོགས་པ་བཅུ་གཅིག་པོ་དེ་ཐམས་ཅད་ཉམས་སུ་ལེན་པ་ལ་རྡོ་རྗེ་སློབ་དཔོན་དུ་གྱུར་པ་གཅིག་དགོས་སམ། རྡོ་རྗེ་སློབ་མས་ཀྱང་བཏུབ། ཡང་རྡོ་རྗེ་སློབ་དཔོན་དུ་གྱུར་ནས་ཀྱང་ཐམས་ཅད་ཉམས་སུ་བླང་དགོས་སམ་མི་དགོས། དེ་ལྟར་ཉམས་སུ་བླངས་ན་ཚེ་འདི་ཁོ་ན་ལ་འགྲུབ་བམ། འོན་ཏེ་འཆི་ཀ་ལ་སོགས་པར་ཡང་འགོར་སྙམ་པའི་དྲི་བ་གསུམ་མོ། །ལན་ལ་ཡང་གསུམ། ཐམས་ཅད་ཉམས་སུ་ལེན་པ་ལ་རྡོ་རྗེ་སློབ་དཔོན་དགོས་ཀྱི་སློབ་མས་མི་བཏུབ་པ་དང་། རྡོ་རྗེ་སློབ་དཔོན་གྱིས་ཐམས་ཅད་ཉམས་སུ་བླང་དུ་བཏུབ་ཀྱང་ནང་ལ་གཞོལ་བས་ལམ་གྱི་ཡན་ལག་ལྔ་སྤོང་བ་དང་། ཉམས་སུ་བླངས་ན་གང་ཟག་རབ་འབྲིང་གི་དུས་བཞིའམ་གསུམ་ན་འགྲུབ་པའོ། །དེ་ལ་དྲི་བ་དང་པོའི་ལན་བསྟན་པ་དབང་གི་སྒོ་ནས་གཉིས་ཏེ། སློབ་དཔོན་གྱི་གང་ཟག་དང་། སློབ་མའི་གང་ཟག་གོ། སློབ་མ་ལ་ཡང་ཁམས་བརྟགས་ལ་རབ་འབྲིང་གསུམ་དུ་དབྱེ་སྟེ། སཾ་པུ་ཊའི་ཕྱི་མ་ལས། ཡོངས་སུ་རྫོགས་པའི་དབང་ནི་སློབ་དཔོན་གྱི་དབང་ཐམས་ཅད་དོ། །སློབ་མ་མཆོག་འབྲིང་ཐ་མ་གསུམ་ལས། ཐ་མ་ལ་དཀྱིལ་འཁོར་གྱི་བུམ་དབང་དང་གསང་དབང་ལེན་པའི་རིམ་པ་རྣམ་རྟོག་ཆེ་ན་མགྲིན་པར་ཉིན་པར་གྱི་ཐིག་ལེའོ། །འབྲིང་པོ་ལ་ནི་ཉ་ཕྱིས་ཀྱི་སྣོད་སོགས་སུ་མངོན་དུ་བྱས་ནས་སྦྱིན་པའོ། །མཆོག་ལ་ནི་སངས་རྒྱས་གཅིག་པའི་བདག་ཉིད་ཀྱིས་ཏེ་ཡབ་ཀྱི་རྡོ་རྗེའི་ཡུམ་གྱི་མཁའ་ནས་སྦྱིན་པར་བྱའོ་ཞེས་གསུངས་སོ། །དེ་ལ་རྡོ་རྗེ་སློབ་དཔོན་གྱི་དབང་ཐོབ་པས་ནི་ལམ་ཐམས་ཅད་རྫོགས་པར་ཉམས་སུ་མི་ལེན་པ་ཡོད་ཀྱང་ཉམས་སུ་ནི་ཐམས་ཅད་བླང་དུ་བཏུབ་སྟེ། དེའི་མཚན་ཉིད་ཀྱང་གུར་ལེའུ་བརྒྱད་པ་ལས། དེ་ནས་རྡོ་རྗེ་སློབ་དཔོན་གྱི། །མཚན་ཉིད་ཡང་དག་རབ་བཤད་བྱ། །དེ་ཡིས་ཉེ་བར་བསྟན་པའི་སྔགས། །སྒྲུབ་པ་པོ་ཡིས་ཉེ་བར་འགྲུབ། །སྤྱོད་ལམ་དལ་ཞིང་ཟབ་མོའི་ཆོས་རྟོགས་པ་དང་ལྡན། །རིག་པའི་གནས་ལྔ་པོ་ཐམས་ཅད་ལ་མཁས་དང་བཅས། །སྦྱིན་སྲེག་གི་ཆོ་ག་དང་དཀྱིལ་འཁོར་གྱི་ཆོ་ག་དང་སྔགས་ཀྱི་ཆོ་ག་ཤེས་ཤིང་། །རབ་གནས་དང་གཏོར་མའི་ཆོ་གའི་ཕ་རོལ་ཏུ་སོན་པ། །བསྲུང་བ་དབང་བསྐུར་གཏོར་མ་བཟླས་དགར་དང་། །ཕྱིར་བཟློག་གཉིས་དང་དཀྱིལ་འཁོར་བསྒྲུབ་པ་དང་། །བསྡིགས་སྦྱོར་བ་དང་གཤེགས་སུ་གསོལ་བ་སྟེ། །དེ་ཉིད་བཅུ་ཞེས་རྒྱལ་བ་རྣམས་ཀྱིས་གསུངས། །ཞེས་པའི་དེ་ཉིད་བཅུ་ནི་རྣམ་པར་རིག །ཉན་ཐོས་སྤྱོད་པ་བསྲུང་བའོ། །སྔགས་སྤྱོད་རིམ་པར་གུས་པ་དང་། །གཟུགས་ལྡན་མཐོང་ན་དགའ་བ་དང་། །དཀྱིལ་འཁོར་འབྲི་བ་ལ་མཁས་ཞིང་བཟླས་པར་ལྡན་པ་བསྙེན་པ་སོང་བ། །རྩ་བའི་ལྟུང་བ་འཇོམས་པ་སྟེ་དེས་མ་གོས་པའོ། །སྔགས་ཀྱི་མིང་དོན་སྔགས་སྤེལ་བ་རྡོ་རྗེའི་ཚིག་སྒྲ་སྤངས་བ་དང་བཞིའི་སྒོ་ནས་སྔགས་ཀྱི་སྦྱོར་བ་དང་ཏནྟྲ་ལ་ཏ་ན་ལུས་ཏྲ་ཡ་སྐྱོབ་པ་སྟེ་ལུས་སྐྱོབ་པ་རྒྱུད་ཀྱི་སྦྱོར་བ་སྟེ་ཞི་རྒྱས་སོགས་ཀྱི་ཆོ་ག་ཡིས། །འཇིག་རྟེན་རྣམས་ནི་བདེ་བར་བྱེད། །ཅེས་གསུངས་སོ། །སློབ་དཔོན་གྱི་དབང་མ་ཐོབ་པ་རྣམས་ནི་རྡོ་རྗེ་སློབ་མ་སྟེ། དེས་ནི་རབ་གནས་ལ་སོགས་པ་གཞན་དོན་གྱི་བྱ་བ་རྣམས་ནི་བྱར་མི་བཏུབ་སྟེ། འོན་ཀྱང་སངས་རྒྱས་འདོད་པས་རྡོ་རྗེ་སློབ་དཔོན་གྱི་དབང་ཕྱིས་བླང་བར་བྱའོ། །དྲི་བ་གཉིས་པའི་ལན་རྡོ་རྗེ་སློབ་དཔོན་དུ་གྱུར་ཀྱང་ཐམས་ཅད་ཉམས་སུ་ལེན་པ་དང་མི་ལེན་པ་ནི་གཉིས་ཏེ། སློབ་དཔོན་གསང་སྔགས་ལ་གཞོལ་བ་དང་། ནང་ལ་གཞོལ་བ་ཞེས་བྱ་བའམ། ཡང་ཕྱི་ལ་གཞོལ་བ་དང་། ནང་ལ་གཞོལ་བ་ཞེས་བྱ་བའི་དབྱེ་བ་གཉིས་སོ། །དེ་ལ་ཕྱི་ལ་གཞོལ་བས་ནི་དབང་ཐོབ་ནས་མངོན་རྟོགས་བཅུ་གཅིག་པོ་ཐམས་ཅད་ཉམས་སུ་ལེན་ཏེ། ལྟ་བ་དང་དམ་ཚིག་དང་ལྡན་པས་རིམ་པ་གཉིས་བསྒོམ་ཞིང་། བཟླས་པ་དང་གཏོར་མ་ཡང་བྱེད། གྲུབ་པ་བརྟན་པ་ལ་སོགས་པའི་དོན་དུ་སྦྱིན་སྲེག་ཀྱང་བྱེད། རང་གཞན་གྱི་དོན་དུ་དབང་བསྐུར་དང་རབ་གནས་ཀྱང་བྱེད། ཅུང་ཟད་གྲུབ་ནས་རང་གཞན་གྱི་དོན་དུ་ལས་རབ་འབྱམ་ཡང་བསྒྲུབ། དེ་དག་ལ་བརྟེན་ནས་དྲོད་ཐོབ་ན་སྤྱོད་པ་ཡང་སྤྱད། ཉེ་རྒྱུ་ཡང་བྱས་ནས་ས་རྣམས་བགྲོད་པར་བྱེད། འབྲས་བུ་མངོན་དུ་བྱེད་པ་སྔར་བཤད་པའི་རྡོ་རྗེ་གུར་ལེའུ་བརྒྱད་པའི། དེ་ནས་རྡོ་རྗེ་སློབ་དཔོན་གྱིས། །ཞེས་བྱ་བ་ལ་སོགས་པའི་ལུང་འདིར་ཡང་རྒྱས་པར་སྦྱར་བར་བྱའོ། །རྡོ་རྗེ་སློབ་དཔོན་གྱི་དབང་ཐོབ་ནས་ནང་ལ་མཆོག་ཏུ་གཞོལ་བས་ནི་སྤྲོས་མེད་ཀྱི་རྣལ་འབྱོར་བྱ་སྟེ། མཆོག་སྒྲུབ་པའི་མངོན་རྟོགས་ལྔ་དང་། དམ་ཚིག་དང་དྲུག་སྤྱོད་ལ་དངོས་གྲུབ་མཐའ་དག་སྒྲུབ་པའི་བསྐྱེད་པའི་རིམ་པའི་ཡན་ལག་བཟླས་པ་ལ་སོགས་པ་ལྔ་མི་སྤྱོད་དེ། ནང་གི་བཟླས་པ་ལ་སོགས་པར་འདུ་བའི་ཕྱིར་རོ། །དེ་ཡང་སཾ་པུ་ཊའི་དྲུག་པ་ལས། ནང་གི་བཟླས་པ་རྩ་གཉིས་ནས་རྒྱུ་བའི་རླུང་ལྡང་འཇུག་གནས་གསུམ་ཡིག་འབྲུ་གསུམ་གྱི་བདག་ཉིད་དུ་འཁོར་བར་བྱེད་པར་དམིགས་པ་ཉིད། །ཅེས་བྱ་བ་ལ་སོགས་པ་གསུངས་ལ། ལས་རབ་འབྱམས་ཐམས་ཅད་ཀྱང་རྫོགས་རིམ་ཉིད་ཀྱིས་འགྲུབ་སྟེ། སཾ་པུ་ཊའི་དང་པོའི་བཞི་པ་ལས། གང་ཞིག་ལུས་ལ་སྔགས་གནས་པས་དེ་ལ་དམིགས་པ་དང་མ་བྲལ་བར་བསྒྲུབ་ན་རལ་གྲི་དང་། མིག་སྨན་གྱིས་འཇིག་རྟེན་གསུམ་མཐོང་བ་དང་། རྐང་བྱུག་དང་། རི་ལུ་དང་། རྐང་འོག་དང་། གནོད་སྦྱིན་མོའི་ཡན་ལག་སྟེ་དབང་དུ་བྱ་བ་དང་། འཇིག་རྟེན་གསུམ་གྱི་ཁོངས་སུ་རྒྱུ་བ་དངུལ་ཆུའི་ལས་ཀྱིས་འགྲོ་བ་རྗེས་སུ་འབྲང་བ་ཚེ་བསྐལ་པར་གནས་ཤིང་ཁམས་གསེར་དུ་བསྒྱུར་བ་གསུམ་མཐོང་བ་དང་། གང་ཞིག་རྣམ་པ་ཐམས་ཅད་དུ་རྫུ་འཕྲུལ་གྱིས་མཐུ་ཆེ་བ་རང་གི་ལུས་ཀྱི་ཁྱིམ་དུ་ཨ་ལས་བྱུང་བའི་ཨཱ་ལི་ཀཱ་ལི་ལྔ་བཅུ་ལ་བརྟེན་པ་འདོད་པ་དང་ལྡན་པ་དམིགས་པ་དང་མ་བྲལ་བས་འགྲུབ་བོ་ཞེས་པ་དང་། ཡང་དེ་ཉིད་ལས། སྔགས་ཀྱི་གཟུགས་ལྟེ་བའི་ༀ་ཉིད་ཀྱིས་ལུས་ཅན་གྱི། །ཞི་རྒྱས་སོགས་ལས་ཀྱི་ཚོགས་ནི་བྱེད་པར་འགྱུར། །ཞེས་བྱ་བ་ལ་སོགས་པ་རྒྱས་པར་གསུངས་སོ། །དེས་ན་སྤྲོས་མེད་ཀྱི་རྣལ་འབྱོར་ཉིད་དུ་བྱས་ཏེ། སཾ་པུ་ཊའི་གཉིས་པའི་གཉིས་པ་ལས། གཉིས་སུ་མེད་པའི་དོན་རྟོགས་ཤིང་ཉམས་སུ་བླང་བར་འདོད་པ་དེ་ཁོ་ན་ཉིད་ཀྱི་རྣལ་འབྱོར་པས་བདག་ཉིད་འདི་ལས་འགྱུར་བར་མི་བྱའོ་སྙམ་པའི་རྣལ་འབྱོར་གྱི་ངེས་པ་བྱས་ནས་བླ་མའི་བཀའི་གནང་བ་དང་། རང་གི་དམ་ཚིག་སྤྲོས་མེད་ལ་གནས་པས་སྒོམ་པར་བྱེད་ན། ལག་པའི་ཕྱག་རྒྱ་དང་སྔགས་དང་། སྐུ་གཟུགས་ཀྱི་ང་རྒྱལ་བསྒོམས་པས་ཐུན་མོང་གི་དངོས་གྲུབ་སྐྱེད་པར་བྱེད་པའི་དམ་ཚིག་ཡིན་ནོ་ཞེས་བྱ་བས་མཆོག་གི་དངོས་གྲུབ་བསྒྲུབ་པ་ལ་ཅི་ཞིག་བྱ། དེ་ལྟ་བུའི་གཞུང་ཐམས་ཅད་སྤངས་ནས་བླ་མ་ལས་ཐོབ་པའི་གནས་ཀྱི་བསམ་གཏན་བསམ་ཁྱབ་གྱི་རྣལ་འབྱོར་དེ་ལ་བརྩོན་པས་སེམས་ཉིད་རང་རིག་པ་ཙམ་ལ་སྤྲོ་བས་ཉིན་མཚན་དུ་གོམས་པར་བྱའོ་ཞེས་གསུངས་པས་ན་སྤྲོས་མེད་འབའ་ཞིག་གོ། འོ་ན་སྐུ་གཟུགས་ཀྱི་ང་རྒྱལ་བསྒོམ་ཞེས་པས་བསྐྱེད་རིམ་ཡང་སྤོང་བར་མངོན་ནོ། །དེ་ལྟར་ན་རིམ་པ་གཉིས་མ་ཡིན་ཞིང་ལུང་རྣམས་དང་ཡང་འགལ་ལོ་ཞེ་ན། དེ་ནི་མ་ཡིན་ཏེ་འཇིག་རྟེན་གྱི་དངོས་གྲུབ་སྒྲུབ་པར་འདོད་པའི་བསམ་པ་ཅན་གྱིས་ལྷ་བསྒོམ་པ་སྤོང་བ་ཡིན་ལ། མཆོག་སྒྲུབ་པ་ནི་སྤོང་བ་མ་ཡིན་ཏེ། དེ་ཉིད་ལ་སྐུ་གཟུགས་ཀྱི་ང་རྒྱལ་བསྒོམས་པས་ཐུན་མོང་གི་དངོས་གྲུབ་སྐྱེད་པར་བྱེད་པས་ཅི་ཞིག་བྱ་ཞེས་གསལ་བར་གསུངས་སོ། །དེ་ལྟ་མ་ཡིན་ན་རྩ་རྒྱུད་ཕྱི་མའི་གཉིས་པ་ལས། ཇི་ལྟར་མེ་ཏོག་ལ་གནས་དྲི། །ཞེས་པ་ལ་སོགས་པའི་ལུང་དང་ཡང་མི་འགྲིག་ལ། ལུང་གཞན་གྱི་གནོད་པ་ཡང་འབྱུང་ངོ་། །དེ་ལྟར་ན་ལུང་ལས། ནང་ལ་གཞོལ་བའི་རྣལ་འབྱོར་པས་ནི་བསྐྱེད་རིམ་གྱི་ཡན་ལག་བཟླས་པ་ལ་སོགས་པ་ལྔ་སྤང་བར་བཤད་དོ། །སློབ་དཔོན་གྱི་ཞལ་སྔ་ནས་ནི་ནང་ལ་གཞོལ་བའི་རྣལ་འབྱོར་པས་བཟླས་པ་ལ་སོགས་པ་ཅི་ནས་ཀྱང་སྤང་ངོ་ཞེས་ལུང་བསྟན་པ་ཁོ་ནར་ཡང་དཀའ་ཞེས་ཀྱང་གསུངས་སོ། །དྲི་བ་གསུམ་པ་དེ་ལྟར་ཉམས་སུ་བླངས་ན་འབྲས་བུ་དུས་ནམ་ཞིག་འགྲུབ་པར་འགྱུར་སྙམ་ན། དེ་ལ་གཉིས་ཏེ། ནམ་འགྲུབ་པའི་དུས་དང་། དེའི་ཡན་ལག་གོ། དང་པོ་ནི་བརྩོན་འགྲུས་དང་བསྟུན་པའི་བྱེ་བྲག་གིས་གང་ཟག་རིགས་བཞིའི་འགྲུབ་པའི་དུས་བཞི་སྟེ། ཚེ་འདི་ལ་འགྲུབ་པ་དང་། འཆི་ཁར་འགྲུབ་པ་དང་། བར་དོར་འགྲུབ་པ་དང་། སྐྱེ་བ་བརྒྱུད་དེ་འགྲུབ་པའོ། །གཉིས་པ་དེའི་ཡན་ལག་ཀྱང་བཞི་སྟེ། སྐྱེ་བ་འདིར་འགྲུབ་པའི་ཡན་ལག་བཅུད་ལེན་དང་། འཆི་ཁར་འགྲུབ་པའི་ཡན་ལག་འདའ་ཀ་མ་དང་། བར་དོར་འགྲུབ་པའི་ཡན་ལག་བར་དོ་དང་། སྐྱེ་བ་བརྒྱུད་དེ་འགྲུབ་པའི་ཡན་ལག་སྨོན་ལམ་མོ། །དེ་དག་ཀྱང་ཞིབ་ཏུ་བརྗོད་ན་སྐྱེ་བ་འདིར་འགྲུབ་པ་ནི་ལམ་མང་པོ་ཉམས་སུ་བླངས་པ་སྟེ། སྤྱོད་པ་དང་ཉེ་རྒྱུ་ཚུན་ཆད་སྤྱད་པ་ནི་ཚེ་འདི་ཉིད་ལ་འགྲུབ་པར་འགྱུར་ཏེ། སཾ་པུ་ཊའི་དང་པོའི་བཞི་པ་ལས། བསྐལ་པ་བྱེ་བ་གྲངས་མེད་པར། །ཇི་སྲིད་སངས་རྒྱས་མ་ཐོབ་པ། །གསང་སྔགས་ཀྱི་ཐབས་མཁས་གང་གི་ཉེ་རྒྱུ་ལ་བརྟེན་པའི་དམ་པའི་བདེ་བས་སངས་རྒྱས་ཁྱོད། །སྐྱེ་བ་འདིར་ནི་འགྲུབ་པར་འགྱུར། །ཞེས་གསུངས་སོ། །གཉིས་པ་དེའི་ཡན་ལག་ནི་ཚེ་འདི་ལ་སངས་རྒྱས་འདོད་པས་དྲོད་ནི་མ་ཐོབ་ན་སྔོན་ལ་བཅུད་ཀྱིས་ལེན་ལ་སོགས་པས་ཚེ་བསྒྲུབས་ཏེ། སཾ་པུ་ཊའི་བདུན་པའི་དང་པོ་ལས། སྨན་འདི་དང་ལྡན་པས་རྣལ་འབྱོར་པས་ལོ་བརྒྱ་ཕྲག་སྟོང་ལ་སོགས་པར་གནས་པར་བྱའོ། །དུས་ཀྱི་འཆི་བ་ནམ་འོང་མི་རིགས་པས། །གང་ཞིག་རྣལ་འབྱོར་པ་སངས་རྒྱས་པར་འདོད་པ། །དེ་ཡི་ངལ་བ་དོན་མེད་ཅིང་། །དེ་ཉིད་འབྲས་བུ་ཐོབ་མི་འགྱུར། །ཡོ་གི་ཏིང་འཛིན་ལ་ཤིན་ཏུ་མཉམ་གཞག་པས། །དེ་ལྟར་བཅུད་ལེན་གྱི་འཆི་བསླུའི་ཆོ་ག་ང་ཡིས་བསྔགས། །ཞེས་གསུངས་ལ། གུར་གྱི་ལེའུ་བཞི་པ་ལས། མིག་སྨན་ལ་སོགས་པ་གསུངས་པས་དེ་དག་ནི་ཚེ་འདིར་འགྲུབ་པའི་གྲོགས་ཡིན་ནོ། །འདི་དག་ལམ་གང་གི་ཁོངས་སུ་བསྡུ་ན། དམ་ཚིག་དང་ལས་ཚོགས་ཀྱི་ཁོངས་སུ་བསྡུའོ། །གཉིས་པ་ནི་འཆི་ཁ་ལ་སོགས་པ་འདི་ལ་ལམ་གཞན་རྣམས་རྫོགས་པར་ཉམས་སུ་མི་ལེན་ཀྱང་བླང་དུ་བཏུབ་ལ། ཉེ་རྒྱུ་ནི་ཅི་ནས་ཀྱང་མ་སྤྱད་ལ། སྤྱོད་པ་ནི་སྤྱོད་འཕྲོ་ལ་འདའ་བའང་སྲིད་དེ། སློབ་དཔོན་ནག་པོ་པ་བཞིན་ནོ་སྙམ་མོ། །འབྲས་བུ་འགྲུབ་པ་ལ་སྤྱོད་པ་དང་། ཉེ་རྒྱུ་ཅིས་ཀྱང་དགོས་སམ་མི་དགོས་སྙམ་ན། སྤྱོད་པ་དང་ཉེ་རྒྱུ་མ་སྤྱད་པར་འབྲས་བུ་མི་འགྲུབ་བོ། །དེ་བཞིན་དུ་སློབ་དཔོན་ཀླུ་སྒྲུབ་ཀྱང་བཞེད་དེ། རིམ་པ་ལྔ་པ་ལས། ཇི་ལྟར་ཤིང་ལ་མེ་གནས་ཀྱང་། །མ་གཙུབས་བར་དུ་མི་འབྱུང་ལྟར། །དེ་བཞིན་བྱང་ཆུབ་ཟླ་སྟེ་ཐབས་དང་བྲལ་བ་༼བས༷། ༽། རྣམ་པ་ཀུན་ཏུ་མི་འཐོབ་བོ། །ཞེས་གསུངས་པས་འཆི་ཁ་ལ་སོགས་པར་ཡང་རང་སྐལ་གྱི་སྤྱོད་པ་བག་ཙམ་རེ་བྱེད་པར་བཞེད་དོ། །འདི་ནི་མངོན་པར་རྟོགས་པ་བཅུ་གཅིག་པོ་ལམ་ཐམས་ཅད་ཉམས་སུ་ལེན་པའི་རིགས་ཀྱི་གང་ཟག་ལ་དགོངས་ཀྱི། དབང་རྗེས་ལ་གྲོལ་བ་ཨིནྡྲ་བྷཱུ་ཏི་ལྟ་བུ་དང་སྟན་གཅིག་གི་སྟེང་དུ་གྲོལ་བ་ལ་སོགས་པ་རྣམས་ལ་ལམ་ཚང་བར་མི་དགོས་ཞེས་གསུངས་ཏེ། ཉེ་རྒྱུ་ནི་ཅིས་ཀྱང་དགོས་པས་དབང་ཉིད་ཀྱི་སྟེང་དུ་ལམ་དྲུག་གམ་བཅུ་གཅིག་ཚང་བས་ན་དེ་ཇི་ལྟར་ཚང་བའི་ཚང་བརྩིས་ལ་ཞིབ་ཏུ་བཤད་དེ། འདི་ནི་བདག་གི་རྟོག་པ་ལ་ལེགས་པར་གསུངས་སོ། །ཡང་འདའ་ཀ་མ་ལ་སོགས་པར་འགྲུབ་ཅེས་གསུངས་པ། འདི་ཡང་སངས་རྒྱས་ཉིད་འགྲུབ་བམ། འོན་ཏེ་གཞན་ཞིག་འགྲུབ་སྙམ་ན། ཁ་ཅིག་ནི་སངས་རྒྱས་ཉིད་འགྲུབ་པར་འདོད་དེ། བུ་ག་དགུ་ཡི་སྟེང་མཆོག་སྟེ་དམ་པ་གསེར་གྱི་སྒོ་ཕྱེ་ནས། །འཕྲལ་དུ་ཡིད་ཀྱིས་འཕོ་བྱེད་པ། །ཉིན་རེ་ཞིང་བྲམ་ཟེ་སྟེ་སྡིག་པ་དང་བྲལ་བའི་མི་གསོད་པ་དང་། །མཚམས་མེད་ལྔ་ནི་བྱེད་པ་དང་། །ཆོམ་རྐུན་བྱེད་པ་དང་ལས་ཀྱིས་ལོངས་སྤྱོད་འདོད་ལོག་སྤྱོད་པ་དང་། །འདི་ཡི་ལམ་གྱིས་གྲོལ་བར་འགྱུར། །ཞེས་པས་ཤེས་སོ། །བླ་མ་རྣམས་ཀྱི་གསུང་གི་ལུང་དེ་ནི་བར་དོར་རིག་འཛིན་གྲུབ་པ་ལ་དགོངས་ཀྱི། དེ་ལ་བརྟེན་ནས་སངས་རྒྱས་སུ་འགྲོ་བར་འདོད་དེ། བཟང་པོའི་ལམ་གྱི་སྟེ་སྤྱི་བོ་ནས་འཕོ་བས་རྣལ་འབྱོར་པའི། །འགྲོ་བ་མཛེས་པར་ཏེ་རིག་པ་འཛིན་པ་སོགས་སུ་སྐྱེ་བ་ཁྱོད་ལ་བསྟན། །ཞེས་པས་སོ། །གང་ཟག་གི་དབྱེ་བས་ངེས་པ་མེད་པར་མངོན་ནོ། །གསུམ་པ་བར་དོར་འགྲུབ་པ་ནི་བླ་མ་བརྒྱུད་པ་རྣམས་ཀྱི་མན་ངག་དག་ལས་ཟབ་ཅིང་གསལ་བར་གསུངས་མོད། བཀའ་དང་བསྟན་བཅོས་ཕལ་ཆེར་ལས་གསལ་བར་བྲིས་པ་ནི་མ་མཐོང་ངོ་། །འོན་ཀྱང་ཡེ་ཤེས་ཐིག་ལེ་ལས། ཡང་ན་ལུས་ནི་སྤངས་མ་ཐག །བརྩོན་པར་མི་ལྡན་པས་ཀྱང་འགྲུབ། །ཅེས་པ་དང་། སློབ་དཔོན་སངས་རྒྱས་ཡེ་ཤེས་ཞབས་ཀྱིས་ཞལ་གྱི་ལུང་ལས། སངས་རྒྱས་ཡེ་ཤེས་ཁྱོད་ཀྱང་ཁྱི་མོས་འབྲས་ཆན་དང་ཞོ་སྐྱུག་པ་དང་ཉ་ཤའི་ཚོད་མ་སོགས་མ་ཟོས་པའི་ཟས་ཀྱི་བྱ་བ་དང་། །འཇམ་པའི་རྡོ་རྗེ་ང་ལ་ཁྱིམ་བཙུན་དུ་མཐོང་ནས་ཅུང་ཟད་མ་དད་པའི་འཁྲུལ་རྟོག་པས། །ཐོགས་བཅས་ཀྱི་གཟུགས་དང་བཅས་ཕུང་པོ་རང་ལུས་མ་སྤངས་པར་ནི། །ཚེ་འདི་ཉིད་ལ་རྡོ་རྗེ་འཆང་མི་འགྲུབ་སྟེ། །ཡིད་ཤེས་འཁོར་བཅས་ནི་མི་ཤིས་པ་གྲིབ་མ་ལྟ་བུའི་རྡོ་རྗེའི་སྐུར་གྲུབ་ནས། །བར་དོར་མཆོག་གི་དངོས་གྲུབ་ཡང་དག་འགྲུབ་པར་འགྱུར། །ཞེས་ལེགས་པར་གསུངས་སོ། །ཡང་ཁ་ཅིག་རྩ་རྒྱུད་ཕྱི་མའི་ལེའུ་གཉིས་པའི། ཇི་ལྟར་སྒྱུ་མ་རྨི་ལམ་དང་། །ཇི་ལྟར་བར་མའི་སྲིད་ཡིན་པ། །རྟག་ཏུ་གོམས་པའི་རྣལ་འབྱོར་པས། །དཀྱིལ་འཁོར་ཉིད་ནི་དེ་བཞིན་འདོད། །ཅེས་གསུངས་པས་ཟིན་ཟེར་ན་ཡང་། དེ་ནི་མ་ཡིན་ཏེ། འདིས་ནི་ཆོས་ཐམས་ཅད་རྨི་ལམ་ལྟ་བུ་ལ་སོགས་པའི་དཔེ་བསྟན་གྱིས་བར་དོར་འགྲུབ་པའི་ལུང་ནི་མ་ཡིན་ནོ། །དེ་ལྟར་འཕོ་བ་དང་བར་དོ་གཉིས་གང་གི་ནང་དུ་བསྡུ་ན་བླ་མ་གོང་མ་རྣམས་དམ་ཚིག་དང་སྡོམ་པའི་ནང་དུ་འདུའོ་ཞེས་གསུངས་སོ། །ཁ་ཅིག་ན་རེ་རིམ་པ་གཉིས་ཀའི་ཁོངས་སུ་བསྡུ་ཞེས་གསུངས་ལ། སློབ་དཔོན་གྱི་ཞལ་སྔ་ནས་ནི་རྫོགས་རིམ་ཉིད་ཀྱི་ཁོངས་སུ་བསྡུ་སྟེ། སློབ་དཔོན་བྷ་ཝ་པས་གྲོང་འཇུག་གི་སྐབས་སུ་ནང་གི་ལས་ཀྱི་ཚོགས་ཡིན་ནོ་ཞེས་གསུངས་པས་སོ། །དེས་ན་འདི་ནི་ལས་ཚོགས་དང་། དམ་ཚིག་གཉིས་ཀའི་ཁོངས་སུ་འདུའོ་ཞེས་ཀྱང་གསུངས་སོ། །གང་ལྟར་ཡང་འདའ་ཁ་དང་བར་དོར་འགྲུབ་པར་འདོད་པའི་གང་ཟག་འབྲིང་པོའི་ལམ་གྱི་ཡན་ལག་ཁྱད་པར་བ་ཡིན་ནོ། །བཞི་པ་སྐྱེ་བ་བརྒྱུད་དེ་འགྲུབ་པར་འདོད་པ་སྨོན་ལམ་གྱི་ལམ་པ་མོས་པ་ལམ་དུ་བྱེད་པ་ནི་སྐྱེ་བ་གཅིག་ནས་བཅུ་དྲུག་གི་བར་རམ་དེ་ལས་ཀྱང་འགོར་བ་སྲིད་ནའང་འགྲུབ་པར་འགྱུར་ཏེ། འདིའི་ལམ་གྱི་ཡན་ལག་ཁྱད་པར་བ་ནི་སྨོན་ལམ་ཡིན་ཏེ། རྩ་རྒྱུད་ཕྱི་མའི་བརྒྱད་པ་ལས། རིགས་སུ་སྐྱེ་དང་དམ་ཚིག་ཅན། །ཞེས་བྱ་བ་ལ་སོགས་པ་དང་། སཾ་པུ་ཊའི་དགུ་པའི་གཉིས་པ་ལས། སེམས་ཅན་ཐམས་ཅད་བདེ་གྱུར་ཅིག །ཅེས་བྱ་བ་ལ་སོགས་པས་སོ། །འདི་ནི་དམ་ཚིག་དང་སྡོམ་པའི་ཁོངས་སུ་འདུ་བ་ཡིན་ནོ། །སྨོན་ལམ་དང་མོས་པ་ལ་བརྟེན་ནས་ཇི་ལྟར་འགྲུབ་ན་འཁོར་ལོས་སྒྱུར་བ་ལ་སོགས་པ་སྐྱེ་ཞིང་སེམས་ཅན་གྱི་དོན་དུ་མ་བྱས་ནས་འབྲས་བུ་འགྲུབ་སྟེ། རྡོ་རྗེ་གུར་ལེའུ་བཅུ་བཞི་པ་ལས། རྣལ་འབྱོར་པ་གང་དབང་བསྐུར་མེད། །དཀྱིལ་འཁོར་དུ་ནི་མ་ཞུགས་དང་། །གང་ཞིག་རབ་གནས་མ་མཐོང་དང་། །གང་གིས་སྦྱིན་སྲེག་མ་བྱས་དང་། །འཇིག་རྟེན་འདི་དང་ཕ་རོལ་ཏུ། །དེ་ཡི་དངོས་གྲུབ་མཆོག་ཉིད་མེད། །གང་གིས་སློབ་དཔོན་གསོལ་མ་བཏབ། །འདིར་ནི་རིགས་སུ་སྐྱེ་བ་མེད། །ཅེས་སྤང་བྱའི་གང་ཟག་བསྟན་ནས་ལམ་ལ་ཞུགས་ནས་མོས་ན་ཅི་འགྲུབ་སྙམ་ན། དེ་ཉིད་ཀྱི་རྗེས་ཐོགས་ལ། རྣམ་སྣང་ལ་སོགས་པའི་སངས་རྒྱས་ཐམས་ཅད་བསྐྱེད་རིམ་པ་སྒོ་ནས་བསྒོམ་པར་བྱ། །གང་ཞིག་བྱང་ཆུབ་མ་ཐོབ་ནའང་། །འཁོར་ལོས་སྒྱུར་བའི་གནས་སུ་རྣལ་འབྱོར་པ་དེ། །སྐྱེ་ཞིང་དེའི་སྐྱེ་བ་ཕྱིར་མར་ཡང་སྐྱེ་བར་འགྱུར། །ཡང་ན་ས་ཡི་བདག་པོ་ཆོས་ལྡན་གྱི་རྒྱལ་པོ་ཉིད། །འོག་མིན་སོགས་གཙང་མའི་གནས་སུ་མངོན་པར་འགྲོ། །བདེ་བ་ཅན་དང་མཁའ་འགྲོ་དང་། །དགའ་ལྡན་དུ་ནི་བློ་ལྡན་འགྲོ། །ཞེས་གསུངས་ལ། སཾ་པུ་ཊའི་དང་པོའི་བཞི་པ་ལས་ཀྱང་། ཡང་ནི་རྡོ་རྗེ་འཛིན་པ་ས་བཅུ་གསུམ་པ་ཉིད། །ཡང་ན་འཁོར་ལོས་སྒྱུར་བའམ། །འདིས་ནི་གྲུབ་པ་ཆེན་པོ་བརྒྱད། །གཞན་ཡང་ཡིད་ལ་འདོད་པའང་སྟེར། །ཞེས་གསུངས་སོ། །དེ་དག་ཀྱང་སྨོན་ལམ་དང་མོས་པ་ལ་གནས་པས་དམ་ཚིག་གི་ཉེས་པས་མ་གོས་ན་སྐྱེ་བ་བཅུ་དྲུག་ན་འགྲུབ་སྟེ། སློབ་དཔོན་པདྨ་བས་དམ་ཚིག་ལྔ་པ་ལས། གལ་ཏེ་ལྟུང་བ་མེད་གྱུར་ན། །སྐྱེ་བ་བཅུ་དྲུག་དག་ན་འགྲུབ། །ཅེས་གསུངས་སོ། །ཡང་དེའི་སྟེང་དུ་བླ་མ་ལ་དབང་བསྐུར་བ་ཡང་ཡང་མནོས་ན་སྐྱེ་བ་བདུན་ན་འགྲུབ་སྟེ། གསང་བའི་རྒྱུད་ཀྱི་མཛོད་ལས། དབང་བསྐུར་ཡང་དག་སྦྱིན་ལྡན་ན། །སྐྱེ་ཞིང་སྐྱེ་བར་དབང་བསྐུར་འགྱུར། །དེ་ཡི་སྐྱེ་བ་བདུན་ན་ནི། །མ་བསྒོམས་པར་ཡང་དངོས་གྲུབ་འཐོབ། །ཅེས་གསུངས་སོ། །དེ་བཞིན་དུ་བརྩོན་འགྲུས་དང་བསྟུན་པའི་བྱེ་བྲག་གིས་མྱུར་དུ་འགྲུབ་པར་ཤེས་པར་བྱའོ། །ལམ་ཉམས་སུ་ལེན་པའི་གང་ཟག་གི་རིགས་ཀྱི་རྣམ་པར་དབྱེ་བ་བསྟན་ཟིན་ཏེ། ཐབས་ཀྱི་རྒྱུད་ཀྱི་མངོན་པར་རྟོགས་པ་དང་དབང་ཐོབ་ནས་ཉམས་སུ་ལེན་པའི་གང་ཟག་གི་དབྱེ་བ་དང་བཅས་པ་ཐམས་ཅད་བསྟན་ཟིན་ཏོ། །
ཉམས་སུ་བླངས་པ་ལས་བྱུང་བའི་འབྲས་བུའི་རྒྱུད་ཀྱི་མངོན་པར་རྟོགས་པ།
དེ་ལྟར་ལམ་རིམ་པ་ཅན་དུ་བསླབ་བམ་ཅིག་ཅར་དུ་བསླབ་ཀྱང་རུང་། ནང་ལ་གཞོལ་བ་བཞིན་ནམ་ཕྱི་ལ་གཞོལ་བ་བཞིན་པས་གང་ལ་བསླབ་ཀྱང་རུང་སྟེ། འབྲས་བུ་འགྲུབ་པའི་འབྲས་བུའི་རྒྱུད་ཀྱི་མངོན་པར་རྟོགས་པ་ནི་གཉིས་ཏེ། གནས་སྐབས་ཀྱི་འབྲས་བུ་ས་བཅུ་གཉིས་འགྲུབ་པའི་ཚུལ་དང་། མཐར་ཐུག་གི་འབྲས་བུ་སངས་རྒྱས་ཀྱི་ས་འགྲུབ་པའི་ཚུལ་བསྟན་པའོ། །དེ་ལ་གནས་སྐབས་ཀྱི་འབྲས་བུ་སའི་རིམ་པ་ལ་གཉིས། སྤྱིར་ས་ཐོབ་པ་གནས་སྐབས་རྣམ་གྲངས་བཞིར་གཞག་པ་དང་། སའི་མངོན་པར་རྟོགས་པ་ཞིབ་ཏུ་བཤད་པའོ། །དང་པོ་ནི་མདོ་སྡེ་རྒྱན་ལས། ས་ཐོབ་པ་ནི་མོས་པ་དང་། །སྤྱོད་པ་དག་ལ་འཇུག་པ་དང་། །རྟོགས་པའི་ཕྱིར་དང་ས་རྣམས་ནི། །གྲུབ་པའི་སྒོ་ནས་རྣམ་པ་བཞི། །ཞེས་གསུངས་ཏེ། མོས་པས་ཐོབ་པ་ནི་མོས་པ་སྤྱོད་པའི་ས་སྟེ། ས་དང་པོ་ལ་མོས་པ་ཐོབ་པའོ། །སྤྱོད་པས་ཐོབ་པ་ནི་མོས་པས་སའི་ཚེ་ཆོས་སྤྱོད་བཅུ་ལ་འཇུག་པའོ། །རྟོགས་པས་ཐོབ་པ་ནི་ས་དང་པོ་ལ་ཆོས་ཀྱི་དབྱིངས་རྟོགས་ནས་ལམ་ཐམས་ཅད་ཐེག་པ་གཅིག་ཏུ་རྟོགས་པའོ། །གྲུབ་པས་ཐོབ་པ་ནི། ཕྱིར་མི་ལྡོག་པའི་ས་ལ་འཇུག་༼པ༷་ད༷ང་ཞུག༷ས་༽པའི་ཚེའོ། །འདིར་ས་དེ་དག་ལས་གང་ཡིན་ཞེ་ན། རྟོགས་པའི་ས་དང་། གྲུབ་པའི་སའོ། །འོ་ན་ས་དང་པོས་མ་གྲུབ་བམ་ཞེ་ན། ཅུང་ཟད་གྲུབ་སྟེ། མདོ་སྡེ་རྒྱན་ཉིད་ལས། ས་རྣམས་ཐམས་ཅད་མ་གྲུབ་དང་། །གྲུབ་པ་དག་ཏུ་ཤེས་པར་བྱ། །གྲུབ་པ་དག་ཀྱང་མ་གྲུབ་དང་། །གྲུབ་པ་དག་ཏུ་ཡང་འདོད་དོ། །ཞེས་གསུངས་ཏེ། མོས་སྤྱོད་ནི་མ་གྲུབ་པའོ། །ལྷག་མ་གཉིས་ནི་གྲུབ་པའོ། །གྲུབ་པ་ལ་ས་བདུན་པ་མན་ཆད་ནི་མ་གྲུབ་པའོ། །དེ་ཡན་ཆད་ནི་གྲུབ་པའོ། །དེ་ལ་འདིར་རྟོགས་པ་དང་གྲུབ་པའི་སའམ་མ་གྲུབ་པ་༼དང་གྲུབ༷་པ༷་༽ཞེས་བྱ་བ་ཉིད་དུའང་བསྡུར་བཏུབ་པས། ས་དང་པོ་ཡན་ཆད་ཀྱི་མངོན་པར་རྟོགས་པ་ཡིན་ནོ། །སྤྱི་དོན་གཉིས་པ་མངོན་པར་རྟོགས་པ་ཞིབ་ཏུ་བཤད་ན། ས་རེ་ལ་བཀའ་དང་བསྟན་བཅོས་དག་ལས་དུ་མ་བཤད་ཀྱང་འདིར་བླ་མའི་གསུང་གིས་ས་རེ་རེ་ལ་བསྡུས་པའི་དོན་བཞི་བཞི་སྟེ། ས་གྲུབ་པའི་རྒྱུ་གང་ཡིན་པ་དང་། རྟོགས་པའི་ཁྱད་པར་དང་། གྲུབ་པའི་རྟགས་དང་། མིང་གི་དོན་ནོ། །དང་པོ་ལ་གཉིས། བརྒྱུད་པའི་རྒྱུ་དང་། དངོས་ཀྱི་རྒྱུའོ། །དང་པོ་ནི་སྤྱོད་པ་དང་། ཉེ་རྒྱུ་སྟེ། དེ་ཡང་ཀུན་འདར་གྱི་སྤྱོད་པ་ལ་བརྟེན་ནས་དྲོད་ཆེན་པོ་མཐོང་ལམ་ཐོབ་སྟེ། དེ་ནས་ཀུན་བཟང་གི་སྤྱོད་པ་སྤྱད་པ་ཡིན་ཏེ། དེའང་མྱུར་དུ་འགྲུབ་པའི་དབང་དུ་བྱས་ན་ཀུན་བཟང་ཟླ་བ་གཅིག་ཏུ་སྤྱད་པས་ས་བརྒྱད་པ་མངོན་དུ་བྱས་ནས། དེ་ནས་ཕྱག་རྒྱ་ལ་བརྟེན་ནས་ནང་རྟེན་འབྲེལ་བསྒྲིགས་ནས་ཉེ་རྒྱུ་ཞག་བདུན་གྱིས་ས་ལྷག་མ་རྣམས་འགྲུབ་པར་འགྱུར་བ་ཡིན་ཏེ། དེའང་རྡོ་རྗེ་གུར་ལས། ཉི་མ་གཅིག་གིས་འགྲུབ་པར་འགྱུར། །ཞེས་བྱ་བ་ལ་སོགས་པ་གསུངས་ཏེ། སྔར་ཉེ་རྒྱུའི་སྐབས་སུ་བརྗོད་ཟིན་ཏོ། །འདི་ཕ་རོལ་ཏུ་ཕྱིན་པ་དང་ཡང་མཐུན་ཏེ། གསང་ཆེན་ཐབས་ལ་མཁས་པ་ལས་མི་སྐྱེ་བའི་ཆོས་ལ་བཟོད་པ་ཐོབ་པའི་བྱང་ཆུབ་སེམས་དཔའ་ནི་འདོད་ན་ཞག་བདུན་ནའང་བླ་ན་མེད་པའི་བྱང་ཆུབ་འགྲུབ་ལ། འདོད་ན་བསྐལ་པ་བརྒྱ་ནའང་འགྲུབ་བོ་ཞེས་བྱ་བ་ལ་སོགས་པ་གསུངས་སོ། །ཡང་དུས་རིང་དུ་སྡོད་པའི་དབང་དུ་བྱས་ན། ཀུན་འདར་གྱི་སྤྱོད་པའི་མཇུག་ཏུ་ཉེ་རྒྱུའི་ཆ་མཐུན་སྤྱད་ནས། དྲོད་ཆེན་པོ་ཐོབ་པས་ཀུན་བཟང་གི་སྤྱོད་པས་ཟླ་བའམ། ལོའམ། བསྐལ་པ་ལ་སོགས་པ་དུས་ཇི་སྲིད་འདོད་པར་སྤྱད་པས། ས་བཅུ་གཉིས་མངོན་དུ་བྱས་ཏེ། ཉེ་རྒྱུ་ཞག་བདུན་གྱིས་འབྲས་བུ་འགྲུབ་པའང་ཡོད་དོ། །གཉིས་པ་དངོས་ཀྱི་རྒྱུ་ནི་དཀྱིལ་འཁོར་བཞི་སྟེ། དེའང་གཉིས་ནི་༼ལུས༷་༽རྩ་དང་། རྩའི་ཡི་གེ་དང་། ཁམས་བདུད་རྩི་དང་། རླུང་རྣམས་དབུ་མའི་ནང་དུ་རིམ་གྱིས་ཐིམ་པས་ས་རྣམས་རིམ་གྱིས་རྟོགས་པ་ཡིན་ནོ། །དེ་ལ་རྩ་ནི་ཕྲ་མོ་བྱེ་བ་ཕྲག་ཕྱེད་དང་བཞི། དེ་ལས་བསྡུ་ན་ཡན་ལག་གི་རྩ་གཙོ་བོར་གྱུར་པ་སྟོང་ཕྲག་བདུན་ཅུ་རྩ་གཉིས། ཡི་གེ་དགོད་པའི་རྩ་གཙོ་བོར་གྱུར་པའི་དབང་དུ་བྱས་ན་བརྒྱ་ཉི་ཤུ། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་སོ་བདུན་དག་པ་ལ་དགོངས་ནས་སྦས་པའི་རྩ་ལྔ་བསྣན་པས་སུམ་ཅུ་སོ་བདུན་ནམ། བྱང་ཆུབ་ཀྱི་སེམས་འབབ་པ་གཙོ་བོའི་དབང་དུ་བྱས་ན་རྩ་སུམ་ཅུ་སོ་གཉིས་སོ། །རྩ་ཡི་གེ་ནི་སུམ་ཅུ་སོ་གཉིས་པོ་དེ་ཉིད་དང་། གཞན་ཡང་ཡི་གེའི་དབྱིབས་སུ་གནས་པ་རྣམས་སོ། །བྱང་ཆུབ་ཀྱི་སེམས་ནི་མི་ཕྱེད་མ་ནི་སོ་དང་སེན་མོ་སྐྱེད་པའི་ཁམས་ཀྱི་དྭངས་མ་གནས་སོ་ཞེས་བྱ་བ་ལ་སོགས་པ་རྣམས་སོ། །རླུང་ནི་ལས་ཀྱི་རླུང་ཉི་ཁྲི་ཆིག་སྟོང་དྲུག་བརྒྱ་སྟེ། དེ་ཉིད་ལ་ཡུལ་ཉི་ཤུ་རྩ་བཞིའི་དབང་དུ་བྱས་ན་ཡུལ་རེ་རེ་ན་དགུ་བརྒྱ་པ་ཕྲག་རེ་རེ་གནས་ལ། ཡུལ་སུམ་ཅུ་སོ་གཉིས་ཀྱི་དབང་དུ་བྱས་ན་ཡུལ་རེ་ན་དྲུག་བརྒྱ་བདུན་ཅུ་རྩ་ལྔ་པ་རེ་གནས་པ་སྟེ། འདིར་ནི་སུམ་ཅུ་སོ་གཉིས་པ་གཙོར་བྱའོ། །དེ་ལྟ་བུའི་རྩ་རྣམས་ཀྱི་རླུང་དང་བྱང་ཆུབ་ཀྱི་སེམས་རྣམས་དབུ་མར་རིམ་གྱིས་ཐིམ་པ་ལས་ས་རྣམས་ཀྱི་རྟོགས་པ་སྐྱེའོ། །དེ་ལ་ཡུལ་དུ་དུ་ལས་ས་རེའི་རྟོགས་པ་སྐྱེ་སྙམ་ན། རྒྱུད་ཁ་ཅིག་ལས་གྲངས་ལ་ངེས་པ་མ་བཤད། ཁ་ཅིག་ལས་བཤད་པ་ལ་མང་ཉུང་མི་མཐུན་པ་སྣང་ཡང་བཤད་པའི་རྒྱུད་ཀྱི་རྗེས་སུ་འབྲངས་ན་ཐོག་མར་ས་གཉིས་དང་། ཐ་མར་ས་གཉིས་ནི་ཡུལ་བཞི་བཞིའི་ས་རེ་རེའི་རྟོགས་པ་སྐྱེ་ལ། བར་གྱི་ས་བརྒྱད་ལ་ནི་ས་རེ་རེ་ལ་ཡུལ་གཉིས་གཉིས་ཀྱི་རླུང་སེམས་ལ་སོགས་ཐིམ་པ་ལས་སྐྱེ་བར་བརྟག་པར་དྲུག་པ་ལས་གསལ་ལོ། །མཇུག་ཏུ་ས་བཅུ་གསུམ་པ་ནི་རླུང་སེམས་ཐམས་ཅད་ཀྱི་སྟོབས་བསྡམས་པས་སྙིང་གའི་ནང་དུ་དབུ་མ་ཉིད་ལ་བསྟེན་པའི་སྦས་པའི་རྩ་ལྔས་གཙོ་བྱས་ཏེ། སྤྱི་གཙུག་གི་དབུ་མར་ཐིམ་པ་ལས་བཅུ་གསུམ་པ་སངས་རྒྱས་ཀྱི་སའོ། །སྟོབས་བསྡམ་པ་ཅིའི་ཕྱིར་ཞེ་ན། རྩ་ལྔ་པོ་འདི་ན་རླུང་དང་བྱང་ཆུབ་ཀྱི་སེམས་གྲངས་སུ་བྱས་པས་སྔར་གྱི་རྣམ་པ་ཉིད་ལས་མེད་པའི་ཕྱིར་རོ་ཞེས་གསུངས་སོ། །དབུ་མའི་མདུད་པའི་གྲངས་ལ་སོགས་པ་ནི་འདིར་མི་གསུངས་སོ། །རྒྱུ་བསྟན་པའོ། །རྟོགས་པའི་ཁྱད་པར་ནི་ས་དང་པོ་ལ་ཆོས་ཀྱི་དབྱིངས་ཀུན་ཏུ་འགྲོ་བ་བདག་མེད་པ་ཚེས་གཅིག་པའི་ཟླ་བ་ལྟ་བུར་རྟོགས། གཉིས་པ་ནས་བརྩམས་ཏེ་བཅུ་གསུམ་པའི་བར་དུ་ཇེ་གསལ་ཇེ་གསལ་རྟོགས་ཏེ། ཚེས་གཉིས་ནས་བཅོ་ལྔའི་ཟླ་བ་བཞིན་ནོ། །རྟོགས་པའི་ཁྱད་པར་རོ། །གྲུབ་པའི་རྟགས་ལ་གཉིས་ཏེ། ས་དང་པོའི་རྟགས་དང་། ས་ལྷག་མ་རྣམས་དེས་བསྒྲེའོ། །དང་པོ་ནི་བཅུ་གསུམ༼གཉི༷ས་༽ཏེ། མདོ་སྡེ་ས་བཅུ་པ་ལས། ཇི་སྐད་དུ་སྐད་ཅིག་ཐང་ཅིག་ཡུད་ཙམ་གཅིག་ལ་ཏིང་ངེ་འཛིན་བརྒྱ་རབ་ཏུ་ཐོབ་པ་དང་། དེ་དག་ལ་སྙོམས་པར་འཇུག་པ་དང་། སངས་རྒྱས་བརྒྱ་མཐོང་བ་དང་། དེ་དག་གི་བྱིན་རླབས་ཀྱང་ཡང་དག་པར་ཤེས་པ་དང་། འཇིག་རྟེན་གྱི་ཁམས་བརྒྱ་གཡོ་བར་བྱེད་པ་དང་། ཞིང་བརྒྱར་ཡང་འགྲོ་བ་དང་། འཇིག་རྟེན་གྱི་ཁམས་བརྒྱ་སྣང་བར་བྱེད་པ་དང་། སེམས་ཅན་བརྒྱ་ཡོངས་སུ་སྨིན་པར་བྱེད་པ་དང་། བསྐལ་པ་བརྒྱར་གནས་པར་བྱེད་པ་དང་། བསྐལ་པ་བརྒྱ་ལ་སྔོན་དང་ཕྱི་མའི་མཐར་འཇུག་པ་དང་། ཆོས་ཀྱི་སྒོ་བརྒྱ་རྣམ་པར་འབྱེད་པ་དང་། ལུས་བརྒྱ་ཀུན་ཏུ་སྟོན་པ་དང་། ལུས་རེ་རེ་ལ་ཡང་འཁོར་བྱང་ཆུབ་སེམས་དཔའ་བརྒྱ་བརྒྱ་དང་ལྡན་པར་ཀུན་ཏུ་སྟོན་པའོ་ཞེས་གསུངས་པ་ལྟ་བུ་སྟེ། དེ་རྣམས་བསྡུ་བའི་ཚིགས་སུ་བཅད་པ་ནི། སྙོམས་འཇུག་༡མཐོང་༢དང་བྱིན་རླབས་ཤེས༣། །གཡོ་༤འགྲོ་༥སྣང་༦མིན༼སྨི༷ན་༧༽བསྐལ་པར་གནས༨། །སྔོན་༩ཕྱི་ཆོས་སྒོ་༡༠ལུས་བརྒྱ་སྟོན༡༡། །གཅིག་༡༢ལ་བསྐོར་བའི་བརྩོན་འགྲུས་རྩོམ། །ཞེས་བྱ་བར་རྟོགས་པར་བྱའོ། །དེ་ལྟར་ན་ཡོན་ཏན་བཅུ་གསུམ་༼གཉི༷ས་༽པོ་དེ་དག་ཀྱང་བརྒྱ་ཕྲག་ནི་ས་དང་པོའིའོ། །གཉིས་པ་ས་ལྷག་མ་རྣམས་དེས་བསྒྲེ་བ་ནི་བཅུ་གཅིག་སྟེ་བཅུ་གསུམ་༼གཉི༷ས་༽པོ་དེ་ཉིད་ས་གཉིས་པ་ལ་ནི་བཅུ་གསུམ༼གཉི༷ས༽་པ་སྟོང་ཐོབ་བོ། །གསུམ་པ་ལ་ནི་འབུམ་ཐོབ་བོ། །བཞི་པ་ལ་ནི་བྱེ་བ་ཕྲག་བརྒྱ་ཐོབ་བོ། །ལྔ་པ་ལ་ནི་བྱེ་བ་སྟོང་ཐོབ་བོ། །དྲུག་པ་ལ་ནི་བྱེ་བ་འབུམ་ཐོབ་བོ། །བདུན་པ་ལ་ནི་བྱེ་བ་ཁྲག་ཁྲིག་ཕྲག་འབུམ་ཐོབ་པར་ཤེས་པར་བྱའོ། །དེ་ཡན་ཆད་ཡོན་ཏན་དེ་དག་ལ་གྲངས་ཀྱིས་ཡོངས་སུ་བགྲང་བར་མི་ནུས་པས། རྡུལ་ཕྲ་རབ་ཀྱིས་ཡོངས་སུ་བགྲང་ཏེ། བརྒྱད་པ་ལ་ནི་ཇི་སྐད་བཤད་པའི་ཡོན་ཏན་རྣམས་འཇིག་རྟེན་གྱི་ཁམས་འབུམ་གྱི་རྡུལ་ཕྲ་རབ་ཀྱི་རྡུལ་སྙེད་ཐོབ། དགུ་པ་ལ་ནི་ཡོན་ཏན་རྣམས་སྟོང་གསུམ་གྱི་འཇིག་རྟེན་གྱི་ཁམས་གྲངས་མེད་པ་འབུམ་ཕྲག་བཅུའི་རྡུལ་ཕྲ་རབ་ཀྱི་རྡུལ་སྙེད་ཐོབ། བཅུ་པ་ནི་ཇི་སྐད་དུ་བསྟན་པའི་ཡོན་ཏན་རྣམས་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཕྲ་རབ་ཀྱི་རྡུལ་སྙེད་ཐོབ་པར་འགྱུར་རོ། །གཞན་ཡང་ས་བཅུ་པ་ལ་གནས་པ་འདིས་ཡོན་ཏན་གཞན་ཡང་རང་གི་ལུས་ཀྱི་བ་སྦུའི་བུ་ག་རེ་རེར་སངས་རྒྱས་བཅོམ་ལྡན་འདས་བགྲང་བ་ལས་འདས་པ་རེ་རེ་ཞིང་ཡང་བྱང་ཆུབ་སེམས་དཔའ་གཞལ་གྱིས་མི་ལང་བའི་འཁོར་མངའ་བ་དག་སྐད་ཅིག་རེ་རེ་ལ་རྣམ་པ་གཞན་དང་གཞན་དག་ཏུའང་སྟོན་པར་ནུས་ལ། དེ་ལས་གཞན་འགྲོ་བ་ལྔའི་འཁོར་བ་མི་ལ་སོགས་པའི་དབྱེ་བ་ཐ་དད་པ་རྣམས་མ་འདྲེས་པར་བ་སྤུའི་ཁུང་བུ་རེ་རེ་ནས་སྐད་ཅིག་རེ་རེ་སྟོན་པར་ནུས་ཤིང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་དང་། མིའི་རྒྱལ་པོ་དང་། ཉན་ཐོས་དང་། རང་སངས་རྒྱས་དང་། དེ་བཞིན་གཤེགས་པས་འདུལ་བའི་སེམས་ཅན་རྣམས་ལ་བརྒྱ་བྱིན་ལ་སོགས་པའི་གཟུགས་བཟུང་ནས་ལྷུན་གྱིས་གྲུབ་པར་ཆོས་སྟོན་པར་ནུས་སོ། །ས་བཅུ་གཅིག་པ་ལ་དེས་དཔེ་བྱ་བར་མི་བཟོད་པ་ཐོབ་པ་དང་། བཅུ་གཉིས་པ་ཡང་གོང་མ་ལས་ཆེས་ཆེ་བ་ཉིད་ཐོབ་པར་ཤེས་པར་བྱའོ། །དེ་ལ་སོགས་པའི་ཡོན་ཏན་གྱི་ཁྱད་པར་རྒྱས་པར་ནི་མདོ་སྡེ་ས་བཅུ་པ་ཉིད་དང་ཐུན་མོང་མ་ཡིན་པའི་མན་ངག་ལས་བཙལ་བར་བྱ་སྟེ་འདིར་རྒྱས་པར་ནི་མི་གསུང་ངོ་། །གྲུབ་པའི་རྟགས་རྣམས་སོ། །མིང་གི་དོན་གང་ཡིན་ཞེ་ན། དེ་ནི་གཉིས་ཏེ། ཐུན་མོང་མ་ཡིན་པའི་མིང་གི་སྒོ་ནས་མདོར་བསྟན་པ་དང་། ཐུན་མོང་མ་ཡིན་པ་ཉིད་ཐུན་མོང་བའི་མིང་ལ་སྦྱར་ཏེ་རྒྱས་པར་བཤད་པའོ། །དང་པོ་ནི་གཉིས། ཕྱིའི་ཡུལ་གྱི་རབ་ཏུ་དབྱེ་བ་དང་། དེ་ཉིད་ནང་གི་ཡུལ་དང་སྦྱར་ཏེ་བཤད་པའོ། །དང་པོ་ནི། རྩ་རྒྱུད་དང་པོའི་བདུན་པ་ལས། གནས་དང་ཉེ་བའི་གནས་དང་ནི། །ཞིང་དང་ཉེ་བའི་ཞིང་དང་ནི། །ཚནྡོ་ཉེ་བའི་ཚནྡོ་ཉིད། །དེ་བཞིན་འདུ་བ་ཉེ་འདུ་བ། །འཐུང་གཅོད་ཉེ་བའི་འཐུང་གཅོད་དང་། །དུར་ཁྲོད་ཉེ་བའི་དུར་ཁྲོད་ཉིད། །འདི་རྣམས་ས་ནི་བཅུ་གཉིས་ཏེ། །ས་བཅུའི་དབང་ཕྱུག་མགོན་པོ་ཉིད། །ཅེས་གསུངས་སོ། །དེ་དག་གི་དོན་ནི་ཕྱི་རོལ་ན་གནས་ལ་སོགས་པ་བཅུ་གཉིས་ལས་ཕྱེ་བའི་ཡུལ་སུམ་ཅུ་སོ་གཉིས་ཡོད་དོ། །གཉིས་པ་དེ་ཉིད་ནང་ནའང་ཡོད་དེ། སྤྱི་བོ་པུལླཱི་ར་མཱ་ལ་ཡ་ལ་སོགས་པ་སུམ་ཅུ་སོ་གཉིས་པའོ། །དེ་ལ་ཕྱི་དང་ནང་གི་པུལླཱི་ར་མཱ་ལ་ཡ་ལ་སོགས་པ་ཡུལ་བཞི་ལ་ནི་གནས་ཞེས་གསུངས་ལ། ནང་དུ་ཡུལ་བཞིའི་རླུང་སེམས་དབུ་མར་ཐིམ་པ་ལས་ས་དང་པོའི་རྟོགས་པ་སྐྱེ་ལ། དེའི་རྟེན་འབྲེལ་གྱིས་ཕྱི་རོལ་གྱི་ཡུལ་བཞི་ན་གནས་པའི་དཔའ་བོ་དང་རྣལ་འབྱོར་མ་རྣམས་སྤྲུལ་པའི་སྐུ་ཡིན་ཡང་ས་དང་པོ་ཐོབ་པའི་ཚུལ་བཟུང་ནས་གནས་པ་རྣམས་དང་། ཡུལ་རྣམས་བདག་གི་དབང་དུ་འགྱུར་བའི་ཕྱིར་ས་དང་པོ་ལ་གནས་ཞེས་བརྡ་གདགས་སོ། །དེ་བཞིན་དུ་ས་གཉིས་པ་ལ་སོགས་པ་རྣམས་ཀྱང་རིམ་པ་བཞིན་དུ་ཉེ་བའི་གནས་དང་ཞིང་ལ་སོགས་པ་ལ་སྦྱར་ཏེ་རྒྱས་པར་རྟོགས་པར་བྱའོ། །འདི་རྣམས་ས་ནི་བཅུ་གཉིས་ཏེ། །ཞེས་བྱ་བ་ནི་གནས་ལ་སོགས་པ་བཅུ་གཉིས་པོ་འདི་རྣམས་ས་བཅུ་གཉིས་ཡིན་ནོ་ཞེས་བྱ་བ་ལ་སོགས་པའོ། །ས་བཅུའི་དབང་ཕྱུག་མགོན་པོ་ཉིད། །ཅེས་བྱ་བ་ནི་ས་བཅུ་པའི་དབང་ཕྱུག་གི་མགོན་པོ་བྱང་ཆུབ་སེམས་དཔའ་ཡིན་ནོ། །འདི་ནི་གཞན་གྱིས་བརྗོད་མི་བྱ། །ཞེས་བྱ་བ་འདིས་ནི་ས་བཅུ་གཉིས་བརྗོད་ཀྱི། གཞན་གྱིས་བརྗོད་པར་མི་བྱའོ། །གཉིས་པ་ཐུན་མོང་མ་ཡིན་པ་ཉིད་ཐུན་མོང་བའི་མིང་ལ་སྦྱར་ཏེ་རྒྱས་པར་བཤད་པ་ལ་གཉིས། ས་བཅུ་གཉིས་སོ་སོའི་མིང་དོན་དང་། ས་ཞེས་བྱ་བ་སྤྱིའི་མིང་དོན་ནོ། །དང་པོ་ནི་སཾ་པུ་ཊའི་བརྟག་པ་ལྔ་པའི་དང་པོ་ལས། གནས་ནི་རབ་ཏུ་དགའ་བའི་ས། །དེ་བཞིན་ཉེ་གནས་དྲི་མ་མེད། །ཞིང་ནི་འོད་བྱེད་ཤེས་པར་བྱ། །ཉེ་བའི་ཞིང་ནི་འོད་འཕྲོ་ཅན། །ཚནྡོ་མངོན་དུ་གྱུར་པ་སྟེ། །ཉེ་བའི་ཚནྡོ་སྦྱང་དཀའ་བ། །འདུ་བ་རིང་དུ་སོང་བ་ཉིད། །ཉེ་བའི་འདུ་བ་མི་གཡོ་བ། །དུར་ཁྲོད་ལེགས་པའི་བློ་གྲོས་ཉིད། །ཉེ་བའི་དུར་ཁྲོད་ཆོས་ཀྱི་སྤྲིན། །ཕ་རོལ་ཕྱིན་བཅུའི་ས་རྣམས་ལ། །རྣལ་འབྱོར་མ་ཡི་ཀླ་ཀློའི་སྐད་དེ་བརྡ་སྐད་ཡིན་ནོ། །པུ་ལ་སོགས་པ་ཅི་གསུངས་པ། །ཕྱི་དང་ནང་དུ་ཡང་དག་བསམ། །ཞེས་གསུངས་སོ། །དེ་ལ་གནས་ཞེས་བྱ་བ་ནི་ས་དང་པོའི་བརྡ་སྟེ། བརྡ་དེར་འདོགས་པའི་རྒྱུ་ནི་སྔར་མདོར་བསྟན་པའི་སྐབས་སུ་བརྗོད་ཟིན་ཏེ། བརྡ་འོག་མ་རྣམས་ཀྱང་ཤེས་པར་བྱའོ། །རབ་ཏུ་དགའ་བ་ཞེས་བྱ་བ་ནི་ཕ་རོལ་ཏུ་ཕྱིན་པ་དང་མཐུན་པར་སྦྱར་བ་སྟེ། དེ་དག་གི་མིང་གི་དོན་ནི། མགོན་པོ་བྱམས་པས་མདོ་སྡེ་རྒྱན་ལས། བྱང་ཆུབ་ལ་ནི་ཉེ་བ་དང་། །སེམས་ཅན་དོན་སྒྲུབ་མཐོང་བ་ལ། །རབ་ཏུ་དགའ་བ་སྐྱེ་འགྱུར་ཏེ། །དེ་ཕྱིར་རབ་དགའ་ཞེས་བརྗོད་དོ། །འཆལ་ཚུལ་རྩོལ་བའི་དྲི་བྲལ་ཕྱིར། །དྲི་མ་མེད་པའི་ས་ཞེས་བྱ། །ཐོས་པ་རྒྱས་པའི་སྒོ་ནས་ཆོས་ཀྱི་སྣང་བ་ཆེན་པོ་ནི། །བྱེད་པའི་ཕྱིར་ན་འོད་བྱེད་པ། །འདི་ལྟར་བྱང་ཆུབ་ཕྱོགས་མཐུན་ཆོས། །རབ་ཏུ་སྲེག་བྱེད་འོད་ལྟ་བུ། །དེ་དང་ལྡན་ཕྱིར་ས་དེ་ནི། །གཉིས་པ་༼པོ༷་༽བསྲེགས་པས་འོད་འཕྲོ་ཅན། །སེམས་ཅན་རྣམས་ཡོངས་སྨིན་བྱེད་ཅིང་། །ལོག་སྒྲུབ་ཀྱིས་སྐྱེ་བར་རང་གི་སེམས་ཀྱང་བསྲུང་བའི་ཕྱིར། །བློ་ལྡན་རྣམས་ཀྱིས་སྦྱང་དཀའ་བ། །དེ་ཕྱིར་སྦྱང་དཀའ་ཞེས་བྱའོ། །ཤེས་རབ་ཕ་རོལ་ཕྱིན་བརྟེན་ནས། །འཁོར་བ་དང་ནི་མྱ་ངན་འདས། །གཉིས་འདིར་མངོན་དུ་འགྱུར་བའི་ཕྱིར། །མངོན་དུ་གྱུར་པའི་ས་ཞེས་བཤད། །བགྲོད་གཅིག་ལམ་དང་འབྲེལ་བའི་ཕྱིར། །རིང་དུ་སོང་བའི་སར་འདོད་དོ། །མཚན་བཅས་མཚན་མེད་ཀྱི་འདུ་ཤེས་གཉིས་ཀྱིས་མི་གཡོའི་ཕྱིར། །མི་གཡོ་བ་ཞེས་ངེས་པར་བརྗོད། །སོ་སོ་ཡང་དག་རིག་བློ་བཟང་། །ས་དེ་ལེགས་པའི་བློ་གྲོས་ཡིན། །སྤྲིན་བཞིན་གཉིས་ཀྱིས་ནམ་མཁའི་ཆོས། །ཁྱབ་པའི་ཕྱིར་ན་ཆོས་ཀྱི་སྤྲིན། །ཞེས་གསུངས་ཏེ། དེ་དག་གི་དོན་ནི་ས་དང་པོ་ལ་བདག་དང་གཞན་གྱི་དོན་བསྒྲུབ་ནུས་པའི་ཕྱིར་རབ་ཏུ་དགའ་བའོ། །གཉིས་པ་ལ་འཆལ་བའི་ཚུལ་ཁྲིམས་ཀྱི་དྲི་མ་ཐག་བསྲིངས་པས་དྲི་མ་མེད་པའོ། །གསུམ་པ་ལ་ཏིང་ངེ་འཛིན་གྱི་སྟོབས་ཀྱིས་༼ཆོ༷ས་༽ཚད་མེད་པ་ཡོངས་སུ་ཚོལ་བའི་ཕྱིར་གཞན་ལ་ཆོས་ཀྱི་སྣང་བའི་འོད་བྱེད་དོ། །བཞི་པ་བྱང་ཆུབ་ཀྱི་ཕྱོགས་ཀྱི་ཆོས་རྣམས་ཀྱི་ཤེས་རབ་ཀྱིས་ཉོན་མོངས་པ་དང་ཤེས་བྱའི་སྒྲིབ་པ་གཉིས་བསྲེགས་པས་འོད་འཕྲོ་བའོ། །ལྔ་པ་སེམས་ཅན་ཡོངས་སུ་སྨིན་པར་བྱེད་པའི་ཚེ་སེམས་ཅན་གྱི་ལོག་པར་བསྒྲུབས་པས་ཉོན་མི་མོངས་པར་རང་གི་སེམས་བསྲུང་བ་དེ་སྦྱང་དཀའ་བས་སྦྱང་དཀའ་བའོ། །དྲུག་པ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བརྟེན་ནས་འཁོར་བ་དང་མྱ་ངན་ལས་འདས་པ་ལ་མི་གནས་ཤིང་དེ་མངོན་དུ་གྱུར་པའོ། །བདུན་པ་ལ་བགྲོད་པ་གཅིག་པ་དང་འབྲེལ་ཞིང་རིང་དུ་སོང་བ་སྟེ་རྩོལ་བ་ལས་བྱུང་བའི་སྤྱོད་པའི་མཐར་འགྲོ་བའོ། །བརྒྱད་པ་ལ་མཚན་མ་དང་མཚན་མ་མེད་པ་གཉིས་ལ་རྩོལ་བའི་འདུ་ཤེས་གཉིས་ཀྱིས་མི་གཡོ་བའོ། །དགུ་པ་ལ་སོ་སོ་ཡང་དག་པར་རིག་པའི་བློ་གྲོས་བཟང་པོ་ལེགས་པར་ཐོབ་པའོ། །བཅུ་པ་ལ་སྤྲིན་བཞིན་དུ་ཏིང་ངེ་འཛིན་དང་གཟུངས་ཀྱི་སྒོ་གཉིས་ཀྱིས་ཐོབ་པའི་ཆོས་རྟེན་ལ་ཡོད་པ་ནམ་མཁའ་ལྟ་བུ་ལ་ཁྱབ་པའི་ཕྱིར་ཆོས་ཀྱི་སྤྲིན་ནོ། །འོ་ན་འདིར་ས་བཅུ་གཅིག་པ་དང་། བཅུ་གཉིས་པ་ཅིའི་ཕྱིར་མ་བཤད་ཅེ་ན། རྒྱུད་ལས། ཕ་རོལ་ཕྱིན་བཅུའི་ས་རྣམས་ལ། །རྣལ་འབྱོར་མ་ཡི་ཀླ་ཀློའི་སྐད། །ཅེས་གསུངས་པའི་ཕྱིར་ཕ་རོལ་ཏུ་ཕྱིན་པའི་ཐེག་པ་ལས་གྲགས་པ་དང་ལུང་སྒོ་བསྟུན་ནས། ས་བཅུ་དང་ཕ་རོལ་ཏུ་ཕྱིན་པ་བཅུ་གྲངས་དང་གོ་རིམ་ལ་སོགས་པ་མཐུན་པ་ཙམ་ལ་དགོངས་ནས་གསུངས་པ་ཡིན་ནོ། །གཞན་དུ་ན་ཐུན་མོང་མ་ཡིན་པའི་མིང་ལས། འདི་རྣམས་ས་ནི་བཅུ་གཉིས་ཏེ། །ཞེས་གསུངས་པ་དང་ཡང་འགལ་བར་འགྱུར་རོ། །ཀླ་ཀློའི་སྐད་ནི་བརྡའི་སྐད་དོ། །པུ་ལ་སོགས་པ་ཅི་གསུངས་པ་ནི་པུལླཱི་ར་མཱ་ལ་ཡ་ལ་སོགས་པའི་ཡུལ་ལོ། །ཡུལ་དེ་དག་གང་ན་གནས་ཤེ་ན། ཕྱི་དང་ནང་དུ་ཡང་དག་གནས། །ཞེས་གསུངས་ཏེ། ལུས་དང་ཕྱི་གཉིས་ཀ་ན་གནས་སོ། །དེ་དག་གི་ནང་རྟེན་འབྲེལ་གྱིས་གནས་ལ་སོགས་པར་འཇོག་པའི་རྒྱུ་ནི་སྔར་མདོར་བསྟན་པའི་སྐབས་སུ་བཤད་ཟིན་ཏོ། །འོ་ན་བཅུ་གཅིག་པ་དང་བཅུ་གཉིས་པའི་མིང་གང་ཡིན་ཞེ་ན། རྒྱུད་རྒྱས་པའི་ལུང་ཀུ་མུ་ཏིར་བྲིས་པ་དང་། ངེས་བརྗོད་བླ་མ་ལས་ཀྱང་གསུངས་ཏེ། འཐུང་གཅོད་དཔེ་མེད་དེ་བཞིན་དུ། །ཉེ་བའི་འཐུང་གཅོད་ཡེ་ཤེས་ཆེ། །ཞེས་གསུངས་པས། བཅུ་གཅིག་པ་ནི་སྔར་གྱི་ས་རྣམས་ཀྱིས་དཔེ་ཙམ་དུའང་བྱ་བར་དཀའ་བས་དཔེ་མེད་པའོ། །བཅུ་གཉིས་པ་ནི་དེ་ལྟ་བུ་དེ་ཆེས་ཆེ་བའི་ཡེ་ཤེས་སུ་གྱུར་པས་ཡེ་ཤེས་ཆེན་པོའོ། །འོ་ན་བཅུ་གསུམ་པ་མ་སྨོས་པ་ཅི་ཞེ་ན། གོང་མ་རྣམས་ནི་བྱང་ཆུབ་སེམས་དཔའི་ས་ཡིན་ལ། བཅུ་གསུམ་པ་ནི་སངས་རྒྱས་རྡོ་རྗེ་འཆང་གི་ས་ཉིད་ཡིན་པས་མ་སྨོས་ཏེ། ངེས་བརྗོད་བླ་མ་ལས། རྡོ་རྗེའི་ས་ནི་བཅུ་གསུམ་པ། །ཞེས་གསུངས་པས་སོ། །གཉིས་པ་ས་ཞེས་བྱ་བ་སྤྱིའི་མིང་དོན་ནི། ཅིའི་ཕྱིར་ས་ཞེས་བྱ་ཞེ་ན། གནས་ཞེས་བྱ་བའམ། ས་ཞེས་བྱ་སྟེ། མདོ་སྡེ་རྒྱན་ལས། དགེ་བ་བསྒྲུབ་པ་སྣ་ཚོགས་ལ། །དགའ་བས་རྟག་པ་ཐམས་ཅད་དུ། །གནས་ཕྱིར་བྱང་ཆུབ་སེམས་དཔའ་ཡི། །ས་རྣམས་གནས་པ་ཡིན་པར་འདོད། །ཅེས་པ་དང་། སའི་ངེས་ཚིག་ནི། འབྱུང་པོ་དཔག་མེད་འཇིགས་མེད་ཕྱིར། །དཔག་ཏུ་མེད་པ་དེ་དག་ལ། །ཕྱིར་ཕྱིར་གོང་དུ་བགྲོད་ལྡན་ཕྱིར། །དེ་དག་ཉིད་ནི་སར་འདོད་དོ། །ཞེས་ཏེ། འགྲོ་བ་དཔག་ཏུ་མེད་པ་འཇིགས་པ་མེད་པའི་རྟེན་དང་། ས་འོག་མ་ལ་བརྟེན་ནས་ཕྱིར་ཞིང་གོང་དུ་འགྲོ་བའི་རྟེན་བྱེད་པས་ས་སྟེ། མདོར་ན་ས་དང་འདྲ་བ་རྟེན་བྱེད་པའི་ཕྱིར་རོ། །འདི་དག་ཀྱང་རྩ་རྒྱུད་དང་པོའི་བདུན་པ་དང་། སཾ་པུ་ཊའི་རབ་ཏུ་བྱེད་པ་ལྔ་པའི་དང་པོ་ནས་བསྟན་ཅིང་། དེའི་གྲོགས་རྣམས་ལེའུ་གཞན་ནས་ཀྱང་ཅི་རིགས་པར་འབྱུང་ངོ་། །གནས་སྐབས་ཀྱི་འབྲས་བུ་བྱང་ཆུབ་སེམས་དཔའི་ས་བཅུ་གཉིས་བསྟན་ཟིན་ཏོ། །
མཐར་ཐུག་གི་འབྲས་བུ།
ད་ནི་མཐར་ཐུག་གི་འབྲས་བུ་བཤད་པར་བྱ་སྟེ། དེ་ལྟར་གནས་སྐབས་ཀྱི་འབྲས་བུ་ས་བཅུ་གཉིས་ཡོངས་སུ་རྫོགས་པའི་མཐར་ས་བཅུ་གསུམ་པ་རྡོ་རྗེ་འཛིན་པའི་ས་ནི་མཐར་ཐུག་གི་འབྲས་བུ་སྟེ། སངས་རྒྱས་ཀྱི་ས་ཞེས་ཀྱང་བྱའོ། །འདི་ལའང་གཉིས་ཏེ། སངས་རྒྱས་ཀྱི་ས་མངོན་དུ་བྱེད་པའི་ཐབས་ཉེ་བའི་རྒྱུ་ངོ་མཚར་གྱི་ལྟས་དང་། དེས་མངོན་དུ་བྱས་པའི་འབྲས་བུའི་མཚན་ཉིད་དོ། །དང་པོ་སངས་རྒྱས་ཀྱི་ས་དེ་མངོན་དུ་བྱེད་པ་ཉེ་རྒྱུའི་རྣམ་གཞག་ནི། དེ་ལྟར་གནས་སྐབས་ཀྱི་འབྲས་བུ་ས་དང་པོ་ཐོབ་ནས། ཀུན་བཟང་གི་སྤྱོད་པ་ལ་བརྟེན་ཏེ་ས་ལྷག་མ་རྣམས་ཟླ་བའམ། ལོའམ། བསྐལ་པ་དཔག་ཏུ་མེད་པར་གནས་པའང་ཡོད་དོ། །སྤྱོད་པ་ཟླ་བ་གཅིག་གི་མཐར་ཉེ་རྒྱུའི་ཞག་དྲུག་གམ་ལྔའི་༼ལྔ༷ས་༽ས་རྣམས་བསྒྲུབས་ནས། བདུན་པའི་སྲོད་ལ་བདུད་བཏུལ་ཏེ། ཐོ་རངས་འཚང་རྒྱ་བས་ཞག་བདུན་ལ་འགྲུབ་པའང་ཡོད་དེ། དེའི་མངོན་རྟོགས་རྒྱས་པར་སྔར་ཉེ་རྒྱུའི་སྐབས་སུ་བརྗོད་ཟིན་ཡང་། རེ་ཞིག་མཚམས་སྦྱར་བར་བྱ་བའི་ཕྱིར་ཅུང་ཟད་བརྗོད་ན། རྡོ་རྗེ་གུར་ལེའུ་བཅོ་ལྔ་པ་ལས་ཀྱང་། ཕྱག་རྒྱའི་དངོས་གྲུབ་དངོས་གྲུབ་ཆེ། །དངོས་གྲུབ་ཀུན་གྱི་སྤྱོད་ཡུལ་མིན། །དེ་དུས་དེ་ཡི་ལུས་ཐོབ་ཅིང་། །སྐད་ཅིག་ན་ནི་བདེ་ཆེན་ཚུལ། །སྐད་ཅིག་ལ་ནི་དེ་འཁོར་ལྡན། །བསྒོམ་པ་དང་ནི་སྔགས་ཉིད་དང་། །སྐད་ཅིག་སངས་རྒྱས་རྣམ་སྣང་མཛད། །སྤྱན་གྱིས་ཕྲག་ནས་འཁྱུད་པའོ། །ཞེས་བྱ་བ་ནས་བརྩམས་ཏེ། སྤྱན་དང་བདག་མ་སྟེ་མ་མཱ་ཀི་དང་སྒྲོལ་མ་དང་། །གོས་དཀར་མོ་ཤིན་ཏུ་ཡིད་འཕྲོག་མ། །མེ་ཏོག་དང་དྲི་ཡིས་ནི་མཐུན་པར་བརྒྱན་ཅིང་མཆོད་པར་བྱས་ནས། །རྡོ་རྗེའི་མཆོད་པ་ཡང་དག་བརྩམ། །སྔགས་པས་ཕན་པ་རྣམ་སྣང་འགྲུབ་འགྱུར་ཞིང་། །ཕྱག་ན་རྡོ་རྗེ་མི་བསྐྱོད་པ་འགྲུབ་པ་དང་། །རྡོ་རྗེ་ཉི་མ་རིན་འབྱུང་འགྲུབ་པ་དང་། །དམ་པའི་ཡི་གེ་འོད་དཔག་མེད་འགྲུབ་པ་དང་། །བདུན་གྱི་རྒྱལ་པོ་འགྲུབ་པ་དང་། །ཐམས་ཅད་འདྲེན་པ་འགྲུབ་པར་འགྱུར། །ཞེས་གསུངས་ཏེ། ཕྱག་རྒྱ་ལ་བརྟེན་ནས་སྐད་ཅིག་གིས་འགྲུབ་པར་འགྱུར་རོ། །དེ་ལྟར་ཉེ་རྒྱུ་ལ་བརྟེན་ནས་འབྲས་བུ་འགྲུབ་པའི་ངོ་མཚར་གྱི་ལྟས་བསྟན་པ་ནི། སཾ་པུ་ཊའི་བརྟག་པ་བཅུ་པའི་གཉིས་པ་ལས་གསུངས་པ། གང་དུ་རིག་མའི་སྐྱེས་བུ་གྲུབ་པ་དེར་འདི་ལྟ་བུའི་ཕུན་སུམ་ཚོགས་པ་འབྱུང་སྟེ། ས་འདི་དགའ་ཞིང་མགུ་ལ་རངས་པ་རྣམ་པ་དྲུག་ཏུ་གཡོས་པ་ལ་སོགས་པ་འགུལ། ལྡེག །འུར། ཆེམས། འཁྲུགས་ནས། བདུད་ཀྱི་གནས་སུ་ཆ་ལང་ལྟ་བུའི་སྒྲ་གྲག་པ་དང་། ཕྱོགས་བཅུར་བསྐལ་པའི་མེ་ལྟ་བུའི་སྐར་མ་ལྟ་བུ་དང་། རྒྱ་མཚོ་ཆེན་པོ་འཁྲུགས་པའི་སྒྲ་དང་། ཐམས་ཅད་དུ་གནམ་རྡོ་སྟེ་ཐོག་ལྟུབ་དང་། དེ་ཉིད་བསྐལ་པའི་མེའི་གཟུགས་ལྟ་བུའི་ཡེ་ཤེས་ཀྱི་སྣང་བ་འབར་བ་དང་། ཕྱག་རྒྱའི་སྐྱེ་གནས་ཀྱི་སྙིང་པོར་ཁམས་གསུམ་ཐམས་ཅད་སྣང་བ་དང་། ཞེས་བྱ་བ་དང་། མཆོད་པའི་ཁྱད་པར་རྣམ་པ་མང་པོས་མཆོད་ཅིང་བསྟོད་པར་ཡང་གསུངས་ཏེ། དོན་བསྡུས་ན་ཚངས་པ་ལ་སོགས་པ་ལྷ་རྣམས་དང་། ཀླུ་དང་། གནོད་སྦྱིན་དང་། དྲི་ཟ་ལ་སོགས་པ་རྣམས་ཀྱིས་རྣམ་པ་སྣ་ཚོགས་པའི་མཆོད་པའི་ཁྱད་པར་སྣ་ཚོགས་པས་མཆོད་པར་གསུངས་ཏེ། ཡི་གེ་མང་བས་འཇིགས་པས་མ་བྲིས་པས། སཾ་པུ་ཊའི་བཅུ་པའི་གཉིས་པ་ཉིད་དུ་བལྟ་བར་བྱའོ། །དེ་ཉིད་ལས་མཇུག་བསྡུས་ནས་གསུངས་པ། གཞན་ཡང་ཁྱོད་ལ་རྒྱས་པར་བཤད་པའི་ཚུལ་གྱིས་ཅི་ཞིག་དགོས་ཏེ་བསྒྲུབས་པའི་བསོད་ནམས་ཀྱིས་ཁམས་གསུམ་དུ་སྐྱེས་པའི་མཆོད་པ་དེ་རྣམས་ཀྱིས་མཆོད་པར་བྱའོ། །ཞེས་བྱ་བའི་བར་དུ་གསུངས་སོ། །སཾ་པུ་ཊའི་བཅུ་པའི་རབ་ཏུ་བྱེད་པ་གཉིས་པའི་གཞུང་དེ་སྲོད་ལ་བདུད་བཏུལ་བའི་དུས་སོ། །གྲུབ་པའི་རྟགས་བསྟན་ཟིན་ཏོ། །གཉིས་པ་འབྲས་བུའི་མཚན་ཉིད་ལ་གཉིས། སྤྱི་དང་མཐུན་པའི་སྐུའི་རྣམ་གཞག་དང་། འདི་ཉིད་དུ་གྲགས་པའི་འབྲས་བུའི་མཚན་ཉིད་དོ། །དང་པོ་ལ་གཉིས། ཕ་རོལ་ཏུ་ཕྱིན་པའི་ཐེག་པ་ལས་གྲགས་པ་དང་། རྡོ་རྗེ་ཐེག་པ་ལས་གྲགས་པའོ། །དང་པོ་ལའང་བཞི། སྐུ་གཉིས་སུ་འདོད་པ་དང་། སྐུ་གསུམ་དུ་འདོད་པ་དང་། སྐུ་བཞིར་འདོད་པ་དང་། ཡང་སྐུ་གསུམ་དུ་འདོད་པ་ལུགས་གཉིས་པའོ། །དང་པོ་ནི། ཁ་ཅིག་སངས་རྒྱས་རྣམ་པར་གྲོལ་བའི་སྐུ་དང་། གཟུགས་སྐུའི་བདག་ཉིད་གཉིས་ཡིན་ནོ་ཞེས་ཟེར་ཏེ། ཉན་ཐོས་ལས་གཙོར་གྲགས་པའི་ཕྱིར་འདིར་མི་བརྗོད་དོ། །གཉིས་པའང་ཕལ་ཆེར་ནི་སྐུ་གསུམ་གྱི་བདག་ཉིད་དུ་འདོད་དེ། མདོ་སྡེ་རྒྱན་ལས། སངས་རྒྱས་རྣམས་ཀྱི་སྐུ་དབྱེ་བ། །རང་བཞིན་ཆོས་སྐུ་ལོངས་སྤྱོད་རྫོགས་པ་དང་། །གཞན་ནི་སྤྲུལ་པའི་སྐུ་ཡིན་ཏེ། །དང་པོ་གཉིས་པའི་རྟེན་ཡིན་ནོ། །ཞེས་བྱ་བ་དང་། ཡང་དེ་ཉིད་ལས། སྐུ་གསུམ་དག་གིས་སངས་རྒྱས་ཀྱི། །སྐུ་བསྡུས་པར་ནི་ཤེས་བྱས་ཏེ། །སྐུ་གསུམ་དག་གི་རང་བཞིན་གྱིས་༼གཞ༷ན་གྱི༷། ༽། དོན་འདི་རྟེན་དང་བཅས་པར་བསྟན། །ཞེས་གསུངས་ཏེ། ངོ་བོ་ཉིད་དམ། རང་བཞིན་ནམ། ཆོས་ཀྱི་སྐུ་ཞེས་བྱ་བའི་རྣམ་གྲངས་སུ་འདོད་པས་དེ་དང་ལོངས་སྤྱོད་རྫོགས་པའི་སྐུ་དང་། སྤྲུལ་པའི་སྐུའོ། །དེ་ལ་སྐུ་གསུམ་གྱི་མཚན་ཉིད་ཀྱང་མདོ་སྡེ་རྒྱན་ཉིད་ལས། ལོངས་སྤྱོད་རྫོགས་པའི་འཇིག་རྟེན་གྱི་ཁམས་ཀུན་ཏུ། །འཁོར་ཡོངས་སུ་སྡུད་པ་ཐ་དད་པ་དང་ཞིང་དང་མཚན་དང་། །སྐུ་དང་ཆོས་ལ་རྫོགས་པར་ལོངས་སྤྱོད་པ་དང་། །མཛད་པ་སྟེ་དྲུག་པོ་དག་གིས་ཐ་དད་དོ། །རང་བཞིན་གྱི་སྐུ་ནི་ཁྱད་པར་མེད་པ་ངོ་བོ་མཉམ་པ་ཉིད་དང་། །རྟོགས་དཀའ་བས་ཕྲ་ཞིང་ལོངས་སྐུ་དེ་དང་རྟེན་པར་འབྲེལ་པ་དང་། །དགྱེས་དགུར་ཆོས་ཀྱི་ལོངས་སྤྱོད་བསྟན་པར་བྱ་བ་ལ། །ལོངས་སྤྱོད་རྫོགས་པའི་སྐུའི་ཆོས་ཀྱི་འབྱོར་པ་ཕུན་སུམ་ཚོགས་པའི་རྒྱུར་འདོད་དོ། །སངས་རྒྱས་སྤྲུལ་པ་དཔག་མེད་པ། །སྤྲུལ་པའི་སྐུར་ནི་འདོད་པ་སྟེ། །རང་གཞན་དོན་གཉིས་ཕུན་སུམ་ཚོགས་པ་སྟེ། །རང་དོན་ལོངས་སྐུ་ཆོས་སྐུ་ལ་དང་། གཞན་དོན་སྤྲུལ་སྐུ་ལོངས་སྐུ་རྣམ་པ་ཐམས་ཅད་ཉིད་ལ་བརྟེན་ནས་གནས་སོ། །ཞེས་གསུངས་སོ། །བཞིར་འདོད་པ་ནི། མངོན་རྟོགས་རྒྱན་ལས། ངོ་བོ་ཉིད་ལོངས་སྤྱོད་རྫོགས་བཅས། །དེ་བཞིན་གཞན་པ་སྤྲུལ་པ་ནི། །ཆོས་སྐུ་མཛད་པར་བཅས་པ་སྟེ། །རྣམ་པ་བཞིར་ནི་ཡང་དག་བཤད། །ཅེས་འབྱུང་བས། སེང་གེ་བཟང་པོ་ནི་སྐུ་བཞིར་གསལ་ལོ་ཞེས་ཟེར་ལ། ཁ་ཅིག་ནི་སྐུ་གསུམ་ཁོ་ནའོ་ཞེས་ཟེར་རོ། །དེ་ཡང་གཞུང་ལས་ནི་སྐུ་བཞིར་གསལ་ཏེ། ཐུབ་པའི་ངོ་བོ་ཉིད་སྐུ་ནི། །ཟག་པ་མེད་པའི་ཆོས་གང་དག །ཐོབ་གྱུར་རྣམ་ཀུན་རྣམ་དག་པ། །དེ་དག་རང་བཞིན་མཚན་ཉིད་ཅན། །ཞེས་གསུངས་ལ། ཆོས་ཀྱི་སྐུ་ནི་བྱང་ཆུབ་ཀྱི་ཕྱོགས་ལ་སོགས་པའི་ཡོན་ཏན་བརྒྱ་ཞེ་ལྔ་བཤད་ནས་༼དེ༷། ༽བྱང་ཆུབ་ཕྱོགས་མཐུན་ཚད་མེད་ཆོས། །རྣམ་པར་ཐར་དང་མཐར་གྱིས་ནི། །སྙོམས་འཇུག་དགུ་ཡི་བདག་ཉིད་དང་། །ཟད་པར་བཅུ་ཡི་བདག་ཉིད་དང་། །ཟིལ་གྱིས་གནོན་པའི་སྐྱེ་མཆེད་ནི། །རབ་ཏུ་དབྱེ་བས་རྣམ་བརྒྱད་དང་། །ཉོན་མོངས་མེད་དང་སྨོན་མཁྱེན་དང་། །མངོན་ཤེས་སོ་སོ་ཡང་དག་རིག །རྣམ་པ་ཐམས་ཅད་དག་བཞི་དང་། །དབང་བཅུ་དང་ནི་སྟོབས་བཅུ་དང་། །མི་འཇིགས་པ་ནི་བཞི་དག་དང་། །བསྲུང་བ་མེད་པ་རྣམ་གསུམ་དང་། །དྲན་པ་ཉེར་གཞག་རྣམ་གསུམ་དང་། །བསྙེངས་པ་མི་མངའ་ཆོས་ཉིད་དང་། །བག་ཆགས་ཀུན་དག་བཅོམ་པ་དང་། །སྐྱེ་ལ་ཐུགས་བརྩེ་ཆེན་པོ་དང་། །ཐུབ་པ་ཁོ་ནའི་མ་འདྲེས་ཆོས། །བཅོ་བརྒྱད་བཤད་པ་གང་ཡིན་པ། །རྣམ་པ་ཐམས་ཅད་མཁྱེན་ཉིད་དང་། །ཆོས་ཀྱི་སྐུ་ཞེས་བརྗོད་པ་ཡིན། །ཞེས་གསུངས་ལ། ལོངས་སྐུ་ནི། མཚན་ནི་སུམ་ཅུ་རྩ་གཉིས་དང་། །དཔེ་བྱད་བརྒྱད་ཅུའི་བདག་ཉིད་འདི། །ཐེག་ཆེན་ཉེ་བར་ལོངས་སྤྱོད་ཕྱིར། །ཐུབ་པའི་ལོངས་སྤྱོད་རྫོགས་སྐུར་བཞེད། །ཅེས་པ་དང་། སྤྲུལ་སྐུ་ནི། གང་གི་སྲིད་པ་ཇི་སྲིད་པར། །འགྲོ་ལ་ཕན་པ་སྣ་ཚོགས་དག །མཉམ་དུ་མཛད་པའི་སྐུ་དེ་ནི། །ཐུབ་པའི་སྤྲུལ་སྐུ་རྒྱུན་མི་འཆད། །ཅེས་གསུངས་སོ། །ཐེག་པ་ཆེན་པོ་བསྡུས་པ་ལས་ནི། དེ་ལ་ངོ་བོ་ཉིད་ཀྱི་སྐུ་ནི་དེ་བཞིན་གཤེགས་པ་རྣམས་ཀྱི་ཆོས་ཀྱི་སྐུ་སྟེ། ཆོས་ཐམས་ཅད་ལ་དབང་སྒྱུར་བའི་གནས་ཡིན་པའི་ཕྱིར་རོ། །ལོངས་སྤྱོད་རྫོགས་པའི་སྐུ་ནི་གང་སངས་རྒྱས་ཀྱི་འཁོར་གྱི་དཀྱིལ་འཁོར་སྣ་ཚོགས་ཀྱི་རབ་ཏུ་ཕྱེ་བ་དང་ཆོས་ཀྱི་སྐུ་ལ་བརྟེན་པ་སྟེ། སངས་རྒྱས་ཀྱི་ཞིང་ཡོངས་སུ་དག་པ་དང་། ཐེག་པ་ཆེན་པོའི་ཆོས་ལ་ལོངས་སྤྱོད་མྱོང་བར་མཛད་པའི་ཕྱིར་རོ། །སྤྲུལ་པའི་སྐུ་ནི་གང་ཆོས་ཀྱི་སྐུ་ལ་བརྟེན་པ་ཉིད་དེ་དགའ་ལྡན་གྱི་གནས་ན་བཞུགས་པ་ནས་བཟུང་སྟེ། འཕོ་བ་དང་། བལྟམས་པ་དང་། འདོད་པ་ལ་སྤྱོད་པ་དང་། མངོན་པར་འབྱུང་བ་དང་། མུ་སྟེགས་ཀྱི་ནང་དུ་གཤེགས་པ་དང་། དཀའ་བ་སྤྱོད་པ་དང་། མངོན་པར་རྫོགས་པར་བྱང་ཆུབ་པ་དང་། ཆོས་ཀྱི་འཁོར་ལོ་བསྐོར་བ་དང་། ཡོངས་སུ་མྱ་ངན་ལས་འདས་པ་ཆེན་པོ་ཀུན་ཏུ་སྟོན་པའི་ཕྱིར་རོ། །ཞེས་བཤད་དོ། །གསུམ་དུ་འདོད་པ་ལུགས་གཉིས་པ་ནི། སློབ་དཔོན་ཟླ་བ་གྲགས་པས་སྐུ་གསུམ་དུ་བཞེད་ལ་དེའི་མཚན་ཉིད་ཀྱང་དབུ་མ་ལ་འཇུག་པ་ལས། མཐར་འཛིན་གྱི་རྟོག་པས་བརྟགས་པའི་ཤེས་བྱའི་བུད་ཤིང་སྐམ་པོ་མ་ལུས་པ། །ཡེ་ཤེས་ཀྱི་མེས་བསྲེགས་པས་རྟོག་པ་མཐའ་དག་ཞི་བའི་ཡེ་ཤེས་ཀྱི་སྐུ་དེ་རྒྱལ་རྣམས་ཆོས་སྐུ་སྟེ། །དེ་ཚེ་ལས་ཉོན་གྱིས་སྐྱེ་བ་མེད་ཅིང་དེས་འཆི་འཕོ་བའི་འགག་པ་མེད་ལ་གཞན་ཡང་ཡིད་ལུས་ཀྱིས་སྐྱེ་བ་དང་། །བསམ་མི་ཁྱབ་པའི་འཆི་འཕོའི་འགག་པ་དང་། གཟུགས་སྐུ་ལྟར་འདུལ་བྱའི་ངོར་སྐྱེ་འགག་ཏུ་སྣང་བའམ་མེད་དོ། །སྤྲོས་པའི་སེམས་དང་སེམས་བྱུང་འགགས་པའི་ཡེ་ཤེས་དེ་ལོངས་སྤྱོད་རྫོགས་པའི་སྐུ་ཡིས་མངོན་སུམ་མཛད། །ཅེས་པ་དང་། ཡང་སྐུ་གཉིས་ནི་དེ་ཉིད་ལས། སངས་རྒྱས་དེ་ཡི་ལོངས་སྤྱོད་རྫོགས་པའི་སྐུ་བསོད་ནམས་མཐའ་ཡས་ཀྱིས། །ཟིན་པ་སྟེ་བསྒྲུབས་པ་དང་དེར་མ་ཟད་ཆོས་སྐུའི་བྱིན་རླབས་ཀྱིས་སྤྲུལ་པའི་སྐུ་དང་ནམ་མཁའ་དང་༼དང་༽གཞན་རྩི་ཤིང་ལ་ཆོས་སྐུ་དེ་ཡི་མཐུས། །སྒྲ་གང་ཆོས་ཀྱི་དེ་ཁོ་ན་ཉིད་སྟོན་འབྱུང་བ། །དེ་ལ་འཇིག་རྟེན་གྱིས་ཀྱང་དེ་ཉིད་རིག །ཅེས་ཏེ། དེ་ཉིད་ཀྱི་དོན་བཀྲལ་བ། བྱང་ཆུབ་སེམས་དཔའ་རྣམས་ཀྱི་ཆོས་ཀྱི་ལོངས་སྤྱོད་ཀྱི་རྒྱུ་ཉིད་དུ་ཡོངས་སུ་གྱུར་པ་ཡིན་ཏེ་ཞེས་པ་དང་། དེའི་བྱིན་གྱི་བརླབས་ཀྱིས་སྤྲུལ་པ་དག་ལས། ཆོས་ཀྱི་དེ་ཁོ་ན་ཉིད་གསལ་བར་བྱེད་པའི་སྒྲ་གང་ཞིག་འབྱུང་བ་ཞེས་བྱ་བ་ལ་སོགས་པ་གསུངས་སོ། །དེ་ལ་གཞུང་གི་དོན་ལེགས་པར་མ་རྟོགས་པའི་རྨོངས་པ་ཁ་ཅིག །སེམས་འགགས་པ་སྟེ་སྐུ་ཡི་མངོན་སུམ་མཛད། །ཅེས་གསུངས་པ་ཙམ་ལ་བརྟེན་ནས། སྤང་བྱའི་བུད་ཤིང་ཟད་པ་ན་དེའི་གཉེན་པོ་ཡེ་ཤེས་ཀྱང་ཟད་དེ་སེམས་ཅན་གྱི་དོན་ནི་གཞན་སྣང་གི་སྐུ་འབའ་ཞིག་གིས་མཛད་དོ་ཞེས་ཟེར་ཏེ། དེ་ནི་སངས་རྒྱས་དང་སློབ་དཔོན་གཉིས་ཀ་ལ་སྐུར་པ་བཏབ་པར་འགྱུར་ཏེ། སངས་རྒྱས་བེམས་པོ་ལྟ་བུར་འགྱུར་བའི་ཕྱིར་རོ། །སློབ་དཔོན་གྱི་དགོངས་པའང་དེ་ནི་མ་ཡིན་ཏེ། འཇུག་པ་ཉིད་ལས་ཡེ་ཤེས་ཀྱི་རང་བཞིན་ཅན་གྱི་སྐུ་ཤེས་བྱའི་བུད་ཤིང་སྐམ་པོ་མ་ལུས་པ་བསྲེགས་པ་ལས་ཤེས་བྱ་སྐྱེ་བ་མེད་པ་ལས་སྐྱེ་བ་དང་ལྡན་པར་འགྱུར་བ་གང་ཡིན་པ་དེ་ནི་སངས་རྒྱས་རྣམས་ཀྱི་ཆོས་ཀྱི་སྐུའོ་ཞེས་ཡེ་ཤེས་ཀྱི་སྐུར་བཤད་ལ། སངས་རྒྱས་ཀྱི་ཡོན་ཏན་སྟོབས་བཅུའང་གནས་དང་གནས་མ་ཡིན་པ་མཁྱེན་པ་ཞེས་བྱ་བ་ལ་སོགས་པ་རྣམས་མི་རིགས་པར་འགྱུར་རོ། །འོ་ན་རྣམ་པར་རྟོག་པ་དང་བཅས་པར་མི་འགྱུར་རམ་ཞེ་ན། བསམ་གྱིས་མི་ཁྱབ་པའི་གནས་ཡིན་པའི་ཕྱིར་རྟོག་བཅས་མ་ཡིན་ནོ། །དོན་གཉིས་པ་རྡོ་རྗེ་ཐེག་པའི་ལུགས་ལ་གསུམ། ཡན་ལག་བདུན་ལྡན་དུ་འདོད་པ་དང་། སྐུ་གསུམ་ཡན་ལག་བདུན་ལྡན་དུ་འདོད་པ་དང་། སྐུ་གཉིས་ཡན་ལག་བཅུ་བཞིར་འདོད་པའོ། །དང་པོ་ནི། སློབ་དཔོན་ངག་གི་དབང་ཕྱུག་གྲགས་པས། དཔལ་གསང་བ་འདུས་པའི་དོན་དང་མཐུན་པར་དགོངས་ནས། སངས་རྒྱས་རྣམས་ཀྱི་སྐུ་གསུམ་ནི་ཡན་ལག་བདུན་དང་ལྡན་པ་ཡིན་ཏེ། ལོངས་སྤྱོད་རྫོགས་དང་ཁ་སྦྱོར་བདེ་ཆེན་རང་བཞིན་མེད། །སྙིང་རྗེས་ཡོངས་གང་རྒྱུན་མི་འཆད་དང་འགོག་པ་མེད། །ཡན་ལག་བདུན་དང་ལྡན་པས་སངས་རྒྱས་འདི་ཉིད་ནི། །ངག་དབང་གྲགས་པ་བདག་འདོད་ཚད་མས་ཡོངས་སུ་བསྒོས་པ་སྟེ་ཚད་མས་གྲུབ་པ་ཡིན་པས་གཞན་བློ་ཅན་རྣམས་ཀྱང་འདོད་དོ། །ཅེས་གསུངས་ཏེ། འོག་མིན་གྱི་གནས་སུ་ུས་བཅུ་པའི་བྱང་ཆུབ་སེམས་དཔའ་རྣམས་ཆོས་ཀྱི་ལོངས་སྤྱོད་ཆེན་པོ་མཛད་པ་དང་། མཚན་དང་དཔེ་བྱད་ཀྱིས་ཡོངས་སུ་བརྒྱན་པའི་ཡེ་ཤེས་ཀྱི་རང་བཞིན་ཅན་གྱི་སྐུ་བཙུན་མོ་དང་ཞལ་སྦྱོར་དང་། ཟག་མེད་ཀྱི་བདེ་བས་རྒྱུད་གང་བ་ཉིད་དང་། རང་བཞིན་གྱིས་ངོ་བོ་ཉིད་མེད་པ་ཉིད་དང་། ཐུགས་རྗེ་ཆེན་པོ་ཉིད་ཀྱིས་སེམས་ཅན་གྱི་དོན་རྟག་ཏུ་འབྱུང་བ་ཉིད་དང་། མཛད་པ་རྒྱུན་མི་འཆད་པ་ཉིད་དང་། འགོག་པ་མེད་པ་སྟེ། མི་གནས་པའི་མྱ་ངན་ལས་འདས་པ་ཉིད་དང་བདུན་ནོ། །གཉིས་པ་ནི། འདིར་རྡོ་རྗེ་ཐེག་པའི་གཞུང་གིས་བླ་མ་གོང་མ་རྣམས་ཀྱིས་གསུངས་པ་ལྟར་བརྗོད་པར་བྱ་སྟེ། དེ་ཡང་སྐུ་གསུམ་ཡན་ལག་བདུན་དང་ལྡན་པ་སྟེ། ཆོས་ཀྱི་སྐུ་ནི་སྟོང་པ་དང་སྙིང་རྗེ་གཉིས་སུ་མེད་པ། སེམས་གནས་གྱུར་པ་རང་བཞིན་མེད་པའི་ཡན་ལག་གིས་བསྡུས་པ་ཡིན་ནོ། །ལོངས་སྤྱོད་རྫོགས་པའི་སྐུ་ནི་འོག་མིན་དུ་གྲུབ་ནས་གནས་མི་འཕོ་ཞིང་། མཚན་དང་དཔེ་བྱད་འབར་བའི་ཁ་སྦྱོར་གྱི་སྐུ་ས་བཅུ་གཉིས་པ་ལ་སོགས་པའི་བྱང་ཆུབ་སེམས་དཔའ་རྣམས་ལ་སྣང་བ། ངག་གནས་གྱུར་པའི་ལོངས་སྤྱོད་རྫོགས་པ་ཁ་སྦྱོར་བདེ་ཆེན་དང་གསུམ་གྱིས་བསྡུས་པ་ཡིན་ནོ། །སྤྲུལ་སྐུ་ནི་གདུལ་བྱ་མོས་པ་སྣ་ཚོགས་ལ་ཐབས་སྣ་ཚོགས་ཀྱིས་འདུལ་བ་ལུས་གནས་གྱུར་པ་སྙིང་རྗེ་ཆེན་པོ་དང་རྒྱུན་མི་འཆད་པ་དང་འགོག་པ་མེད་པ་དང་གསུམ་གྱིས་བསྡུས་པ་ཡིན་ནོ། །གསུམ་པ་ནི་འདིར་སློབ་དཔོན་གྱི་ཞལ་སྔ་ནས་རྙེད་པའི་རྡོ་རྗེ་ཐེག་པའི་རྒྱུད་དག་ལས་འདི་ལྟར་འབྱུང་ངོ་ཞེས་གསུངས་པའི་རྡོ་རྗེ་ཐེག་པའི་སྐུའི་རྣམ་པར་གཞག་པ་བརྗོད་པར་བྱའོ། །དེ་ལ་རྡོ་རྗེ་ཐེག་པའི་ལུགས་ཀྱི་སྐུ་གཉིས་སམ་གསུམ་ཡང་རུང་སྟེ། རེ་རེ་ལ་ཡང་ཡན་ལག་བདུན་བདུན་དང་ལྡན་དགོས་ཏེ། ཡན་ལག་ནི་སྔར་བརྗོད་པ་ཉིད་ཡིན་ནོ། །དེ་ལ་འདིར་ཐོག་མར་སྐུ་གཉིས་སུ་ཕྱེ་ལ། དེ་རེ་རེ་ལའང་སྐུ་གསུམ་གསུམ་དང་ཡན་ལག་བདུན་བདུན་དང་ལྡན་པ་ཡིན་ནོ། །དེ་ལ་སྐུ་གཉིས་ནི་དོན་དམ་ཀྱི་སྐུ་དང་། ཀུན་རྫོབ་ཀྱི་སྐུ་ཞེས་བྱ་བའམ། ཡང་དོན་དམ་གྱི་སྐུ་དང་། བརྡའི་སྐུ་ཞེས་བྱའོ། །དེ་ལྟར་སྐུ་གཉིས་ཙམ་དུ་བྱེད་པ་འདི་ཐེག་པ་ཆེན་པོ་རྒྱུད་བླ་མ་དང་ཡང་མཐུན་ཏེ། དེ་ཉིད་ལས། རང་དོན་གཞན་དོན་དོན་དམ་སྐུ་དང་ནི། །དེ་ལ་བརྟེན་པའི་ཀུན་རྫོབ་སྐུ་ཉིད་དེ། །བྲལ་དང་རྣམ་པར་སྨིན་པའི་འབྲས་བུ་ནི། །ཡོན་ཏན་དབྱེ་བ་དྲུག་ཅུ་བཞི་དག་དང་། །ཞེས་པ་དང་། བདག་ཉིད་ཀྱིས་ནི་འབྱོར་པའི་གནས། །དམ་པའི་དོན་གྱི་སྐུ་ཡིན་ཏེ། །དྲང་སྲོང་རྣམས་ཀྱི་བརྡ་ཡི་སྐུ། །ཕ་རོལ་ཕུན་སུམ་ཚོགས་པའི་གནས། །དང་པོའི་སྐུ་ནི་སྟོབས་ལ་སོགས། །བྲལ་བའི་ཡོན་ཏན་རྣམས་དང་ལྡན། །གཉིས་པ་སྐྱེས་བུ་ཆེན་པོའི་མཚན། །རྣམ་སྨིན་ཡོན་ཏན་དག་དང་ལྡན། །ཞེས་གསུངས་སོ། །དེ་ལ་དོན་དམ་གྱི་སྐུ་གསུམ་ཡན་ལག་བདུན་ལྡན་ནི། ཆོས་ཀྱི་སྐུ་སྤྲོས་པ་ཐམས་ཅད་དང་བྲལ་བ་རང་བཞིན་མེད་པ་ཉིད་དོ། །ལོངས་སྐུ་ནི་བྱང་ཆུབ་སེམས་དཔའ་རྣམས་ཀྱི་ཆོས་ཀྱི་ལོངས་སྤྱོད་པའི་གཞིར་གྱུར་པ་དང་། དམིགས་པ་མེད་པའི་སྙིང་རྗེ་དང་། ཤེས་རབ་ཁ་སྦྱོར་དང་། ཟག་པ་མེད་བའི་བདེ་བས་རྒྱུད་གང་བ་དང་ཡན་ལག་གསུམ་མོ། །སྤྲུལ་སྐུ་ནི་དམིགས་པ་མེད་པའི་སྙིང་རྗེ་ཆེན་པོ་ཉིད་ཀྱིས་སེམས་ཅན་གྱི་དོན་འབྱུང་བའི་གཞིར་གྱུར་པ་དང་། དེ་རྒྱུན་མི་འཆད་པ་དང་། འགོག་པ་མེད་པ་དེ་ཉིད་དེ་ཡན་ལག་གསུམ་མོ། །བརྡའི་སྐུ་གསུམ་ནི་ཆོས་སྐུའི་བརྡ་ནི་བཅོམ་ལྡན་འདས་རྣམ་པར་སྣང་མཛད་ལ་སོགས་པའི་ཐུགས་ཀར་རྡོ་རྗེའི་རྣམ་པར་གནས་པ་སྟེ། དེ་ཁོ་ན་ཉིད་འདུས་པ་ལས། བཅོམ་ལྡན་སེམས་དཔའ་འདི་ཉིད་ནི། །རྡོ་རྗེའི་ངོ་བོས་ཐུགས་ཀར་གནས། །ཞེས་ཞལ་ཕྱག་གི་རང་བཞིན་མེད་པའི་ཡན་ལག་དང་། ལོངས་སྐུ་ནི་འོག་མིན་གྱི་གནས་སུ་རྣམ་པར་སྣང་མཛད་ལ་སོགས་པའི་བརྡའི་སྐུས་བྱང་ཆུབ་སེམས་དཔའ་རྣམས་ཀྱི་ཆོས་ཀྱི་ལོངས་སྤྱོད་པ་དང་། སྤྱན་ལ་སོགས་པ་དང་ཞལ་སྦྱོར་གྱི་བརྡ་དང་། དེས་མཚོན་པའི་བདེ་བ་ཆེན་པོའི་བརྡ་དང་ཡན་ལག་གསུམ་མོ། །སྤྲུལ་པའི་སྐུ་ནི་སྙིང་རྗེ་ཆེན་པོ་ཉིད་ཀྱིས་སེམས་ཅན་གྱི་དོན་མཛད་པ་ཤཱཀྱ་ཐུབ་པ་ལྟ་བུ་ནས་རི་བོང་ལ་སོགས་པའི་གཟུགས་ཀྱིས་སེམས་ཅན་གྱི་དོན་མཛད་པ་དང་། དེའང་རྒྱུན་མི་འཆད་པ་དང་། འགོག་པ་མེད་པ་སྟེ་ཡན་ལག་གསུམ་མོ། །དེ་ལ་ཁ་ཅིག་ན་རེ། ཆོས་ཀྱི་སྐུ་ལ་བརྡའི་སྐུ་མི་འཐད་དོ་ཞེ་ན། དེ་ལ་འགལ་བ་མེད་དེ། དེ་བཞིན་གཤེགས་པ་ཉིད་ཀྱིས་མཚོན་བྱེད་ཀྱི་བརྡ་ཙམ་དུ་གསུངས་པའི་ཕྱིར་རོ། །གཞན་དུ་ན་མངོན་རྟོགས་རྒྱན་ལས། ལོངས་སྐུ་ནི་མཚན་དང་དཔེ་བྱད་ཅན་ལ་བཤད་པ་དེའང་རིགས་པ་མ་ཡིན་ཏེ། སྤྲུལ་པའི་སྐུ་ཤཱཀྱ་ཐུབ་པའང་ལོངས་སྐུར་འགྱུར་བའི་ཕྱིར་རོ། །དེ་ལུང་དུ་མི་རིགས་སོ་ཞེ་ན། ས་བཅུ་པའི་མགོན་པོ་བྱམས་པས་གསུངས་པ་ལུང་དུ་དྲང་བར་བྱའོ། །ལོངས་སྐུ་མཚན་དང་དཔེ་བྱད་ཅན་ཁོ་ན་དེ་ནི་མ་ཡིན་ན་སྔར་གྱི་སྐྱོན་འབྱུང་ངོ་། །འོ་ན་ཇི་ལྟར་དྲང་ཞེ་ན། དེ་དག་ཐམས་ཅད་ནི་རྒྱུད་སྡེ་དང་མདོ་སྡེ་སོ་སོའི་ལུང་ལ་བརྟེན་ནས་དགོངས་པ་ཕྱོགས་རེ་ཙམ་ལ་དགོངས་ནས་བཤད་པ་ཡིན་པས་ན། ཐམས་ཅད་ལ་ཡང་སྐྱོན་མེད་དེ་སངས་རྒྱས་ཀྱི་ཡོན་ཏན་ཕྱོགས་རེ་ཙམ་བརྗོད་པ་ཡིན་ལ། མཐའ་དག་བརྗོད་པར་ག་ལ་ནུས། ཡང་མཚན་ཡང་དག་པར་བརྗོད་པ་ལས། སངས་རྒྱས་སྐུ་ལྔའི་བདག་ཉིད་ཅན། །ཞེས་བྱ་བ་ལ་བརྟེན་ནས་སྐུ་ལྔ་ལ་སོགས་པར་བཤད་དོ། །སྐུའི་དབྱེ་བ་བཤད་ཟིན་ཏོ། །སྤྱི་དོན་གསུམ་༼གཉི༷ས་༽པ་དེ་ལྟར་སྐུ་གཉིས་སམ་གསུམ་མམ་བཞིའམ་ལྔ་ལ་སོགས་པ་དུ་མར་བསྟན་ཡང་རུང་ཡན་ལག་བདུན་དང་བཅུ་བཞི་ལ་སོགས་པ་གང་ལྟར་བསྟན་ཡང་རུང་སྟེ་སངས་རྒྱས་ཀྱི་སའི་མཚན་ཉིད་ཀྱེའི་རྡོ་རྗེའི་རྩ་བ་དང་བཤད་པའི་རྒྱུད་འདི་ལས་གསུངས་ཚད་ཀྱི་དབང་དུ་བྱས་ནས་འབྲས་བུའི་མཚན་ཉིད་ནི་གསུམ་སྟེ། བཤད་གཞི་སྐུ་བཞིའམ་ལྔ་ཡེ་ཤེས་ལྔས་བསྡུས་པ་དང་། འཆད་བྱེད་ཡན་ལག་ལྔས་བསྡུས་པ་དང་། སྐུ་དང་ཡན་ལག་བསྲེ་བའོ། །དང་པོ་ནི་རྩ་རྒྱུད་ལེའུ་དང་པོ་ལས། རྡོ་རྗེ་སེམས་དཔའ་དང་། སེམས་དཔའ་ཆེན་པོ་དང་། དམ་ཚིག་སེམས་དཔའ་ཆེན་པོ་དང་། སྙིང་པོ་ཀྱེའི་རྡོ་རྗེ་ཞེས་བྱ་བ་སྟེ། དེ་དག་ལ་རིམ་པ་བཞིན་དུ་ཆོས་སྐུ་དང་། ལོངས་སྐུ་དང་། སྤྲུལ་སྐུ་དང་། ངོ་བོ་ཉིད་ཀྱི་སྐུ་སྟེ་སྐུ་བཞིའམ་ཤིན་ཏུ་རྣམ་པར་དག་པའི་ངོ་བོ་ཉིད་ཀྱི་སྐུ་བསྣན་ཏེ། ལྔ་པོ་དེ་དག་གིས་སངས་རྒྱས་ཀྱི་ཆོས་ཐམས་ཅད་བསྡུས་ནས་བསྟན་ཏེ། དེ་དག་གི་མཚན་ཉིད་ནི་གོང་དུ་བསྟན་པ་རྣམས་ཉིད་ཡིན་ཞིང་། རྒྱུད་ཀྱི་སྟེང་དུའང་སྟོན་པ་ཡིན་ནོ། །ཡེ་ཤེས་ལྔས་བསྡུས་པ་ནི་རྡོ་རྗེ་གུར་ལེའུ་བཅུ་བཞི་པ་ལས། སངས་རྒྱས་ཉིད་དེ་ཅི་ལགས། རྣམ་པ་ཐམས་ཅད་མཁྱེན་པ་ཉིད་དོ་ཞེས་བྱ་བ་ལ་སོགས་པ་ལ་བརྟེན་ནས་ཡེ་ཤེས་ལྔས་སངས་རྒྱས་ཀྱི་ས་ཐམས་ཅད་བསྡུས་པར་འཆད་དེ། ཡེ་ཤེས་ལྔའང་སྐུ་བཞིར་འདུ་བས་འདི་ནི་སངས་རྒྱས་ཀྱི་རྣམ་གཞག་ལེགས་ཏེ། འཕགས་པ་སངས་རྒྱས་ཀྱི་ས་དང་ཡང་མཐུན་ནོ། །དེའི་རྣམ་གཞག་རྒྱས་པར་འོག་ཏུ་གནས་གྱུར་དང་། ཡེ་ཤེས་ཀྱི་སྐུའི་སྐབས་སུ་བརྗོད་པར་བྱའོ། །གཉིས་པ་འཆད་བྱེད་ཡན་ལག་ལྔས་བསྡུས་པ་ནི། བླ་མའི་མན་ངག་གིས་རྒྱུད་གསུམ་ཀའི་དགོངས་པ་ཕྱོགས་གཅིག་ཏུ་བྱས་ནས་བརྗོད་ན་འདིར་འདུས་ཏེ། དེའང་བར་སྐབས་ཀྱི་ཚིགས་སུ་བཅད་པ་ནི། གནས་ཡོངས་གྱུར་དང་ཡེ་ཤེས་སྐུ། །མི་གནས་མྱ་ངན་འདས་ཉིད་དང་། །གཉིས་སུ་མེད་པ་ཉིད་དང་ནི། །མཛད་པ་རྒྱུན་མི་འཆད་པར་འདུས། །ཞེས་བྱའོ། །དེ་ལ་དང་པོར་རྒྱུ་ལ་དམིགས་ནས་གནས་ཡོངས་སུ་གྱུར་པའི་མཚན་ཉིད་ནི། རྡོ་རྗེ་གུར་ལེའུ་བཅུ་བཞི་པ་ལས། ཡིད་ཀྱི་རྣམ་པར་ཤེས་པ་གནས་གྱུར་པ་ཆོས་སྐུ་ནི་འབྱུང་པོས་འདས་པ་དང་འགྲོ་བ་ད་ལྟ་བ་དང་འོང་བ་མ་འོངས་པ་སྟེ་དུས་གསུམ་ཐམས་ཅད་ནི། །ལྷན་སྐྱེས་བསྒོམ་པའོ་རྣལ་འབྱོར་བ་རང་གིས་ཀུན་མཁྱེན་ལྟ་བུར་གཟིགས་ཏེ་ཡེ་ཤེས་ཆེན་པོ་གཅིག་ཏུ་གནས་གྱུར་པའོ། །རྩ་ཡི་གེ་གནས་གྱུར་ལོངས་སྐུ་ནི་སངས་རྒྱས་རིགས་ལྔ་དང་སངས་རྒྱས་སྲས་པོ་སྟེ་བྱང་ཆུབ་སེམས་དཔའ་རྣམས་སུ་གནས་འགྱུར་བའི་རྒྱུ་ནི་དང་། །ཡན་ལག་ཕུང་པོ་ལྔ་པོ་ཀུན་དང་བུ་ག་སྐྱེ་མཆེད་ཀུན་ཡིན་ནོ། །རྩ་ལུས་གནས་གྱུར་སྤྲུལ་སྐུ་ནི་མགོ་བོའི་དྲ་བ་སྟེ་ལུས་ཀྱི་རྩ་ཐམས་ཅད་དང་སྐུད་པ་དབུ་མར་བཅས་པ་གནས་གྱུར་པ། །ལུས་ནི་སྣང་ལ་རང་བཞིན་མེད་ཡོད་པ་མིན་པ་འཇའ་ཚོན་ལྟར་གཟིགས་ཤིང་། །གནས་གྱུར་པ་གྲུབ་པའི་སྐད་ཅིག་ལ་ཀྱེ་རྡོ་རྗེའི་གཟུགས་འཛིན་པ་ཡིན་ནོ། །ཞེས་གསུངས་ཏེ། རྐང་པ་དང་པོ་གཉིས་ཀྱིས་ནི་ཡིད་ཀྱི་རྣམ་པར་ཤེས་པ་གནས་གྱུར་པའི་ཆོས་ཀྱི་སྐུར་མངོན་ནོ། །དེ་ནས་རྐང་པ་གཉིས་ཀྱིས་རྩ་ཡི་གེ་ངག་གནས་གྱུར་ལོངས་སྐུར་མངོན་ནོ། །དེ་ནས་རྐང་པ་གཉིས་ཀྱིས་རྩ་ལུས་གནས་གྱུར་སྤྲུལ་པའི་སྐུར་མངོན་ནོ། །མཇུག་གི་རྐང་པ་གཅིག་གིས་ནི་སྐུ་གསུམ་གྱི་དོན་བསྡུས་པའོ། །དེ་དག་གི་དོན་ནི་འདི་ལྟར་རྟོགས་པར་བྱ་སྟེ། ཕྱིས་གནས་གྱུར་པའི་རྒྱུའི་དབང་དུ་བྱས་ནས། ངོ་བོ་གཅིག་ཀྱང་ལྡོག་པ་ཐ་དད་པ་རྣམ་པ་བཞི་སྟེ། ཕུང་པོ་ལྔར་བསྡུས་པ་དང་། དཀྱིལ་འཁོར་བཞི་རྟེན་ཡིན་ལ་བརྟེན་པ་ཡིད་དང་ལྔར་བསྡུས་པ་དང་། ལུས་ངག་ཡིད་གསུམ་དུ་བསྡུས་པ་དང་། དེ་དག་ཐམས་ཅད་ཀྱི་བྱེད་པ་པོ་ཡིན་པའི་ཕྱིར་ཡིད་འབའ་ཞིག་གནས་གྱུར་ཚུལ་ལོ། །དེ་ལ་དང་པོའི་དབང་དུ་བྱས་ནས་རྡོ་རྗེ་ཐེག་པའི་དགོངས་པ་ལྟར་ན་གཟུགས་ཀྱི་ཕུང་པོ་ནི་རྣམ་པར་སྣང་མཛད་མེ་ལོང་ལྟ་བུ་ལ་སོགས་པ་རིགས་དང་ཡེ་ཤེས་ལྔར་གྱུར་ཀྱང་རུང་སྟེ། ཕུང་པོ་ལྔ་རིགས་ལྔའམ་ཡེ་ཤེས་ལྔར་འགྱུར་རོ། །ཕུང་པོ་ལྔ་པོ་འདི་ལ་ཐེག་པ་ཆེན་པོ་བསྡུས་པ་ལས་ནི་གནས་གྱུར་པའི་མཚན་ཉིད་ནི། སྒྲིབ་པ་ཐམས་ཅད་ཀུན་ནས་ཉོན་མོངས་པའི་ཆར་གཏོགས་པའི་གཞན་གྱི་དབང་གི་ངོ་བོ་ཉིད་རྣམ་པར་ལོག་པ་ནི་སྒྲིབ་པ་ཐམས་ཅད་ལས་རྣམ་པར་གྲོལ་ཞིང་། ཆོས་ཐམས་ཅད་ལ་དབང་སྒྱུར་བ་ཉེ་བར་གནས་པ། རྣམ་པར་བྱང་བའི་ཆར་གཏོགས་པའི་གཞན་དབང་གི་ངོ་བོ་ཉིད་དུ་གྱུར་པའི་ཕྱིར་རོ། །ཞེས་བྱ་བ་དང་། དེ་ཉིད་ལ་དབང་འབྱོར་བ་ལྔས་བསྡུས་ཏེ། གཟུགས་ཀྱི་ཕུང་པོ་གནས་གྱུར་པའི་ཕྱིར་ཞིང་དང་། ལུས་དང་། མཚན་དང་། དཔེ་བྱད་བཟང་པོ་དང་། དབྱངས་མཐའ་ཡས་པ་དང་། སྤྱི་གཙུག་བལྟར་མི་མངོན་པ་ལ་དབང་འབྱོར་པ་དང་། ཚོར་བའི་ཕུང་པོ་གནས་གྱུར་པའི་ཕྱིར་ཁ་ན་མ་ཐོ་བ་མེད་ཅིང་ཚད་མེད་ལ་རྒྱ་ཆེ་བའི་བདེ་བས་ཡང་དག་པར་གནས་པ་ལ་དབང་འབྱོར་པ་དང་། འདུ་ཤེས་ཀྱི་ཕུང་པོ་གནས་གྱུར་པའི་ཕྱིར་མིང་གི་ཚོགས་དང་། ཚིག་གི་ཚོགས་དང་། ཡི་གེའི་ཚོགས་ཐམས་ཅད་ཀྱིས་བསྟན་པ་ལ་དབང་འབྱོར་པ་དང་། འདུ་བྱེད་ཀྱི་ཕུང་པོ་གནས་གྱུར་པའི་ཕྱིར་སྤྲུལ་པ་དང་། སྒྱུར་བ་དང་། འཁོར་སྡུད་པ་དང་། དཀར་པོའི་བསྡུ་བ་ལ་དབང་འབྱོར་པ་དང་། རྣམ་པར་ཤེས་པའི་ཕུང་པོ་གནས་གྱུར་པའི་ཕྱིར་མེ་ལོང་ལྟ་བུ་དང་། མཉམ་པ་ཉིད་དང་། སོ་སོར་རྟོག་པ་དང་། བྱ་བ་གྲུབ་པའི་ཡེ་ཤེས་ལ་དབང་འབྱོར་པའོ་ཞེས་བྱ་བ་ལ་སོགས་པ་རྒྱས་པར་གསུངས་སོ། །གཉིས་པ་དཀྱིལ་འཁོར་བཞིའི་དབང་དུ་བྱས་ནས་སྐུ་ལྔ་དང་ཡེ་ཤེས་ལྔར་གྱུར་ཀྱང་རུང་སྟེ། འདི་ནི་ཐུན་མོང་མ་ཡིན་པའི་གདམས་ངག་ལས་རྟོགས་པར་བྱ་བས་འདིར་མི་བརྗོད་དོ། །གསུམ་པ་ལུས་ངག་ཡིད་གསུམ་གྱི་དབང་དུ་བྱས་ནས་སྐུ་གསུམ་སྟེ། སྐུ་རྡོ་རྗེ་ནི་ཆོས་སྐུ། གསུང་རྡོ་རྗེ་ནི་ལོངས་སྐུ། ཐུགས་རྡོ་རྗེ་ནི་སྤྲུལ་སྐུ་ཞེས་རྩ་རྒྱུད་ལེའུ་དང་པོར་ཞིབ་ཏུ་རྟོགས་པར་བྱ་བ་བཞིན་ནམ། ཡང་མན་ངག་ལས་སྐུ་ནི་སྤྲུལ་སྐུ། གསུང་ལོངས་སྐུ། ཐུགས་ཆོས་སྐུ་ཞེས་བྱ་བ་གོང་གི་དཀྱིལ་འཁོར་བཞི་གནས་གྱུར་ལ་སོགས་པ་དང་བསྟུན་ཏེ། ཐུན་མོང་མ་ཡིན་པའི་སྐབས་སུ་གསུངས་པ་བཞིན་རྟོགས་པར་བྱའོ། །བཞི་པ་ཐམས་ཅད་ཀྱི་བྱེད་པ་པོ་ཡིད་ཡིན་པའི་ཕྱིར་གོང་མ་རྣམས་ཀྱང་ཡིད་གནས་གྱུར་དུ་འདུས་ཏེ་རྟོགས་པར་བྱའོ། །ཇི་ལྟར་གནས་གྱུར་ཞེ་ན། ཀུན་གཞིའི་རྣམ་པར་ཤེས་པའི་ཆོས་ཉིད་གནས་གྱུར་པ་ནི་ཆོས་ཀྱི་དབྱིངས་ཀྱི་ཡེ་ཤེས་ཏེ་༼སོ། ༽། ཀུན་གཞི་ཉིད་གནས་གྱུར་པ་ནི་མེ་ལོང་ལྟ་བུའི་ཡེ་ཤེས་སོ། །ཉོན་མོངས་པ་ཅན་གནས་གྱུར་པ་ནི་མཉམ་པ་ཉིད་ཀྱི་ཡེ་ཤེས་སོ༷། །ཡིད་ཀྱི་རྣམ་ཤེས་གནས་གྱུར་པ་ནི་སོ་སོར་རྟོག་པའི་ཡེ་ཤེས་དང་། སྒོ་ལྔའི་རྣམ་ཤེས་གནས་གྱུར་པ་ནི་བྱ་བ་གྲུབ་པའི་ཡེ་ཤེས་ཏེ། བཤད་པའི་རྒྱུད་ཕྱི་མ་ལས། རང་གི་ངོ་བོ་ཡོངས་སུ་གྱུར་པ་ཞེས་བྱ་བ་ནི། རང་རྣམས་སེམས་དང་དེ་རྣམས་ཡུལ་ཀྱི་གཟུགས་ཅན་ནི་རང་གི་གཟུགས་ཅན་ཏེ་སེམས་ཀྱི་རང་བཞིན་ཡིན་ཞེས་པའི་དོན་ཡིན་ནམ་སྙམ། ཀུན་གཞི་དང་། ཉོན་མོངས་པ་ཅན་དང་། ཡིད་དང་། མིག་དང་། རྣ་བ་དང་། སྣ་དང་། ལྕེ་དང་། ལུས་ཀྱི་རྣམ་པར་ཤེས་པ་དེ་རྣམས་ཡོངས་སུ་གྱུར་པ་ནི་རང་གི་ངོ་བོ་ཡོངས་སུ་གྱུར་པའོ། །བདག་མེད་པའི་ཏིང་ངེ་འཛིན་གྱི་སྒོམ་པས་མེ་ལོང་ལྟ་བུ་དང་། མཉམ་པ་ཉིད་དང་། སོ་སོར་རྟོག་པ་དང་། བྱ་བ་ནན་ཏན་གྱི་རང་བཞིན་ལ་གནས་ནས་ལྡོག་པར་འགྱུར་ཞེས་བྱ་བའི་དོན་ཏོ། །ཞེས་གསུངས་པ་དང་། ཡང་དེ་ཉིད་ལས་འཁོར་བར་བྱེད་པའི་རྒྱུ་ཀུན་གཞིའི་རྣམ་པར་ཤེས་པ་ལ་སོགས་པ་རྣམ་པ་བརྒྱད་ལ་གནས་ནས་དེ་ལྡོག་པའི་མཚན་ཉིད་ཀྱིས་མེ་ལོང་ལྟ་བུ་དང་། མཉམ་པ་ཉིད་དང་། སོ་སོར་རྟོག་པ་དང་། བྱ་བ་ནན་ཏན་གྱི་ཡེ་ཤེས་ཀྱི་སྒྱུ་མའི་རང་བཞིན་གྱིས་གྲུབ་པའོ་ཞེས་གསུངས་སོ། །དོན་དེ་ཉིད་གསལ་བར་བྱ་བའི་ཕྱིར་སློབ་དཔོན་ཙནྡྲ་གོ་མིས་སངས་རྒྱས་ཀྱི་སའི་བསྟན་བཅོས་ལས་གསུངས་པ། ཀུན་གཞིའི་རྣམ་ཤེས་གང་ཡིན་པ། །དེ་ནི་མེ་ལོང་ཡེ་ཤེས་གྱུར། །དེ་ཡང་ཆོས་ཀྱི་དབྱིངས་ཤིན་ཏུ་རྣམ་པར་དག་པ་ཉིད་ཀྱིས། །ངོ་བོ་ཆོས་སྐུ་ཉིད་དུ་ཡང་དག་འདོད། །ཉོན་མོངས་ཅན་ཡིད་གནས་གྱུར་པ། །མཉམ་ཉིད་ཡེ་ཤེས་གནས་སུ་འདོད། །སོ་སོར་རྟོག་པའི་ཡེ་ཤེས་ནི། །ཡིད་ཀྱི་རྣམ་ཤེས་དེ་ཉིད་དོ། །ཡེ་ཤེས་དེ་དག་ལོངས་སྤྱོད་རྫོགས་སྐུར་བཞག་པ་སྟེ། །ཐེག་ཆེན་གྱི་ཆོས་ལ་རྫོགས་པར་ལོངས་སྤྱོད་པར་བསྟན་པའི་ཕྱིར་དང་། །བྱང་ཆུབ་སེམས་དཔའ་ཆེན་པོ་ས་བཅུ་པ་རྣམས། །ཆོས་ལ་རྫོགས་ལོངས་སྤྱོད་པའི་ཕྱིར། །ཁ་ཅིག་མེ་ལོང་ཡེ་ཤེས་ཀྱང་། །ལོངས་སྤྱོད་རྫོགས་པའི་སྐུ་རུ་འདོད། །དེ་ཡང་ལོངས་སྐུ་དེ་ཡི་རྒྱུ་ཉིད་ཀྱིས། །རྒྱུ་མིང་འབྲས་བུར་ཉེ་བར་བརྟག་པའོ་དེ་བཞིན་དུ་གཞན་མཉམ་པ་ཉིད་དང་སོ་སོར་རྟོག་པ་ལ་བཏགས་པའང་རྒྱུའི་མིང་གིས་སོ། །དབང་པོ་ལྔ་ཡི་རྣམ་ཤེས་གཞན། །དེ་ནི་གཟུགས་ནས་རེག་བྱའི་བར་གྱི་དོན་ཀུན་ཡོངས་སུ་འཛིན་པའི་ཕྱིར། །དེ་གནས་གྱུར་ཐོབ་ནས་སེམས་ཅན་ཀུན་གྱི་དོན་དུ། །སྒོ་ལྔའི་རྣམ་ཤེས་དེ་ནི་བྱ་བ་བསྒྲུབ་པའི་ཡེ་ཤེས་ཙམ་དུ་གནས་འགྱུར་བ་ཐོབ་པའོ། །བྱ་གྲུབ་ཡེ་ཤེས་དེ་ཡང་རྟག་པར་ཡུལ་ཐམས་ཅད་དུ། །དུས་ཇི་ལྟ་བར་དང་བསམ་པ་ཇི་ལྟ་བར། །སྤྲུལ་པའི་སྐུ་སྟེ་སངས་རྒྱས་རྣམས། །སྒོ་ལྔའི་རྣམ་ཤེས་གནས་འགྱུར་བ་ཐམས་ཅད་སྤྲུལ་པའི་སྐུའི་རྒྱུ་ལས་སྤྲུལ་སྐུར་བཏགས་པ་ཡིན་ནོ། །འགའ་ཞིག་དག་གིས་ཡིད་ཉིད་ལ། །སྤྲུལ་པའི་སྐུ་ནི་དེར་རྟོགས་ཏེ། །དབང་པོ་ལྔ་ཡི་རྣམ་ཤེས་གང་། །དེ་ནི་ལོངས་སྤྱོད་རྫོགས་སྐུར་རོ། །ཞེས་གསུངས་སོ། །གནས་གྱུར་པ་བསྟན་ཟིན་ཏོ། །ད་ནི་དེ་ལྟར་གནས་གྱུར་ཡེ་ཤེས་ཀྱི་རང་བཞིན་ཅན་ཡིན་པའི་ཕྱིར་ཡེ་ཤེས་ཀྱི་སྐུའི་མཚན་ཉིད་ཇི་ལྟ་བུ་ཞེ་ན། དེ་བརྗོད་པར་བྱ་སྟེ། དེ་ལ་བཞི། སྐུ་མེད་པ་མ་ཡིན་པ་དང་། སྐུ་བེམ་པོ་མ་ཡིན་པ་དང་། ཡེ་ཤེས་ལྔའི་སྐུའི་མཚན་ཉིད་དང་། སྐུ་གསུམ་གྱིས་ཡེ་ཤེས་ལྔ་བསྡུས་པའི་ཚུལ་ལོ། །དང་པོ་གཉིས་ནི་སངས་རྒྱས་ནི་སྐུ་མེད་པ་ཡང་མ་ཡིན་ལ། སྐུ་དེ་ཡང་བེམ་པོ་ཡང་མ་ཡིན་ཏེ། ཡེ་ཤེས་ལྔའི་རང་བཞིན་གྱི་སྐུ་ཡིན་ཏེ། རྡོ་རྗེ་གུར་གྱི་ལེའུ་བཅུ་བཞི་པ་ལས། ཇི་སྐད་དུ། སངས་རྒྱས་ཉིད་དེ་ཅི་ལགས། རྣམ་པ་ཐམས་ཅད་མཁྱེན་པ་ཉིད་དོ། །དེ་ཅི་ལགས། ལུས་ཅན་འདི་ནི་བདེན་པའོ། །དེ་རྒྱུ་ཅིའི་སླད་དུ་ཞེ་ན། རྡོ་རྗེ་འཛིན་པས་བཀའ་སྩལ་པ། འདི་ལྟར་ང་ནི་མཚན་བཟང་པོ་སུམ་ཅུ་རྩ་གཉིས་དང་ལྡན་ཞིང་དཔེ་བྱད་བཟང་པོ་བརྒྱད་ཅུས་བརྒྱན་པའོ། །དེ་ཅིའི་ཕྱིར་ཞེ་ན། ཐ་ཡིའི་གཟུགས་དང་མི་འདྲ་བའི་ཕྱིར་ལམ་དུས་སུ་མཚན་དཔེ་ཅན་བསྒོམ་པས་བསྒྲུབ་པར་བྱ་བ་ཡིན་ནོ། །ཕྱག་ན་རྡོ་རྗེས་གསོལ་པ། ཅི་བཅོམ་ལྡན་འདས་བེམ་པོ་ལགས་སམ། རྡོ་རྗེ་འཛིན་པས་བཀའ་སྩལ་པ། ང་ཉིད་མེ་ལོང་ལྟ་བུའི་ཡེ་ཤེས་སོ། །མེ་ལོང་ལྟ་བུའི་ཡེ་ཤེས་དེ་ཅི་ལགས། རྡོ་རྗེ་འཛིན་པས་བཀའ་སྩལ་པ། བདེན་པ་ཡང་མ་ཡིན་པ་དང་། བརྫུན་པ་ཡང་མ་ཡིན་པ་དང་། རྒྱུ་མ་ཡིན་པ་དང་། རྐྱེན་མ་ཡིན་པ་སྟེ། དེ་ལྟར་ང་ཉིད་མཉམ་པ་ཉིད་ཀྱི་ཡེ་ཤེས་དང་། ང་ཉིད་བྱ་བ་ནན་ཏན་གྱི་ཡེ་ཤེས་དང་། ང་ཉིད་སོ་སོར་རྟོག་པའི་ཡེ་ཤེས་དང་། དེ་ལྟར་ཆོས་ཀྱི་དབྱིངས་ཤིན་ཏུ་རྣམ་པར་དག་པའོ། །དེའི་ཕྱིར་བྱང་ཆུབ་སེམས་དཔའ་ཆེན་པོ་རྣམ་པ་དང་བྲལ་བའི་བྱང་ཆུབ་དེ་སྐད་མ་སྨྲ་ཞིག །ང་ཉིད་དངོས་པོ་དངོས་མེད་ང་། །དང་པོའི་དེ་བཞིན་གཤེགས་པར་བརྗོད། །གཟུགས་མེད་གཟུགས་དང་ལྡན་པའི་མཆོག །ཟབ་མོ་ཞི་བའི་གཟུགས་དང་ལྡན། །ཞེས་གསུངས་ཏེ། ཚིགས་སུ་བཅད་པ་དེའི་དོན་ནི་མཚན་དང་དཔེ་བྱད་དང་བཅས་པ་དངོས་པོ་ཡིན་ཞིང་། དེ་ཡང་ཡེ་ཤེས་ཀྱི་སྐུ་ཡིན་པའི་ཕྱིར་དངོས་པོ་ཡིན་ཡང་། ཡེ་ཤེས་ཉིད་ཀྱང་བརྗོད་དུ་མེད་པས་བདེན་དངོས་སུ་མེད་པའོ། །དེ་ཉིད་ཐོག་མ་ནས་གྲུབ་པས་དང་པོའི་དེ་བཞིན་གཤེགས་པའོ། །རྐང་པ་འོག་མ་གཉིས་ནི་རྟོགས་པར་སླའོ། །དེ་ལྟར་ན་སངས་རྒྱས་རྣམས་ནི་ཡེ་ཤེས་ཀྱི་སྐུ་སྟེ། སྒྱུ་འཕྲུལ་དྲ་བ་ལས། ཡེ་ཤེས་སྐུ་སྟེ་རང་བྱུང་བ། །ཞེས་བྱ་བའི་དོན་ཡང་འདི་ཡིན་ནོ། །གསུམ་པ་ཡེ་ཤེས་ལྔའི་མཚན་ཉིད་ནི། དེ་ཉིད་གསལ་བར་བྱ་བའི་ཕྱིར་མདོ་སྡེ་རྒྱན་ལས། ཡེ་ཤེས་ཀྱི་མཚན་ཉིད་སྐུའི་དབྱེ་བ་དང་བཅས་པ་གསུངས་ཏེ། ཇི་སྐད་དུ། མེ་ལོང་ཡེ་ཤེས་མི་གཡོ་སྟེ། །ཡེ་ཤེས་གསུམ་ནི་དེ་ལ་བརྟེན། །མཉམ་པ་ཉིད་དང་སོ་སོར་རྟོག །བྱ་བ་གྲུབ་པ་ཁོ་ནའོ། །ཞེས་ཏེ། མེ་ལོང་ལྟ་བུ་ནི་མི་གཡོ་ལ། ཡེ་ཤེས་གསུམ་ནི་དེ་ལ་བརྟེན་པ་དང་གཡོ་བའོ། །མེ་ལོང་ལྟ་བུའི་ཡེ་ཤེས་ཀྱི་མཚན་ཉིད་ནི། རྒྱུད་ཀྱི་དོན་བླ་མ་རྣམས་གསུང་པ་དང་། འཕགས་པ་སངས་རྒྱས་ཀྱི་ས་ནི་མཐུན་ཏེ། ཡེ་ཤེས་ལ་ཁམས་གསུམ་གཟུགས་བརྙན་གྱི་ཚུལ་དུ་སྣང་བས་ཡེ་ཤེས་དང་ཁམས་གསུམ་དབྱེར་མེད་པས་མེ་ལོང་གི་གཟུགས་བརྙན་བཞིན་སྣང་བས་ན་མེ་ལོང་ལྟ་བུ་དང་། ཇི་ལྟ་བ་དང་ཇི་སྙེད་པ་ཐམས་ཅད་མཁྱེན་པས་སོ་སོར་རྟོག་པའི་ཡེ་ཤེས་དང་། སྤང་བྱའི་རྣམ་རྟོག་ཐམས་ཅད་བཅོམ་པས་ན་མཉམ་པ་ཉིད་ཀྱི་ཡེ་ཤེས་དང་། རང་དང་གཞན་གྱི་དོན་མ་ལུས་པ་གྲུབ་པས་བྱ་བ་གྲུབ་པའི་ཡེ་ཤེས། ཡེ་ཤེས་དང་ཆོས་ཀྱི་དབྱིངས་དབྱེར་མི་ཕྱེད་པས་ཆོས་ཀྱི་དབྱིངས་ཀྱི་ཡེ་ཤེས་སོ། །དེ་ལྟར་སངས་རྒྱས་ཀྱི་ས་དང་རྒྱུད་ལས་གསུངས་པ་དང་མདོ་སྡེ་རྒྱན་ལས་འབྱུང་བ་དང་ཕལ་ཆེར་ནི་མཐུན་ཏེ། མེ་ལོང་ཡེ་ཤེས་ང་ཡི་མེད། །ཡུལ་གྱི་སྒོ་ནས་ཡོངས་སུ་མ་ཆད་དུས་རྟག་ཏུ་ལྡན། །ཤེས་བྱ་ཀུན་ལ་སྒྲིབ་པ་མེད་པས་མ་རྨོངས་པ། །རྟག་ཏུ་ཡུལ་དེ་ལ་མངོན་ཕྱོགས་པའང་མིན། །ཡེ་ཤེས་ཀུན་གྱི་རྒྱུ་ཡིན་ཕྱིར། །ཡེ་ཤེས་འབྱུང་གནས་ཆེན་པོ་འདྲ། །ལོངས་སྤྱོད་རྫོགས་པའི་སངས་རྒྱས་ཉིད། །ཡེ་ཤེས་གཟུགས་བརྙན་འབྱུང་ཕྱིར་ཏེ། །ཞེས་ཏེ། ཡེ་ཤེས་ཐམས་ཅད་ཀྱི་རྒྱུ་དང་། ཡེ་ཤེས་ཐམས་ཅད་ཀྱི་འབྱུང་གནས་ཏེ། ལོངས་སྤྱོད་རྫོགས་པའི་སངས་རྒྱས་ཡིན་ལ། ཡེ་ཤེས་ཀྱི་གཟུགས་བརྙན་འབྱུང་བའི་ཕྱིར་མེ་ལོང་ལྟ་བུའི་ཡེ་ཤེས་སོ། །སྒོམ་པ་དག་པས་སེམས་ཅན་ལ། །མཉམ་པ་ཉིད་ཀྱི་ཡེ་ཤེས་འདོད། །མི་གནས་ཞི་བར་བཞུགས་པ་ནི། །མཉམ་ཉིད་ཡེ་ཤེས་ཡིན་པར་འདོད། །ཅེས་ཏེ། བྱང་ཆུབ་སེམས་དཔའ་མངོན་པར་རྟོགས་པའི་དུས་ན་སེམས་ཅན་རྣམས་ལ་མཉམ་པ་ཉིད་ཀྱི་ཤེས་པ་ཐོབ་པ་དེ་སྒོམ་པ་དག་པའི་སྒོ་ནས་བྱང་ཆུབ་ཐོབ་པའི་ཚེ་མི་གནས་པའི་མྱ་ངན་ལས་འདས་པར་བཞུགས་པ་ནི་མཉམ་པ་ཉིད་ཀྱི་ཡེ་ཤེས་སོ། །དེའི་མཛད་པ་ཡང་། དུས་རྣམས་ཀུན་ཏུ་བྱམས་པ་དང་། །ཐུགས་རྗེ་ཆེན་པོ་དག་དང་ལྡན། །སེམས་ཅན་རྣམས་ལ་མོས་པ་བཞིན། །སངས་རྒྱས་སྐུ་ནི་ཉེ་བར་སྟོན། །ཞེས་གསུངས་སོ། །སོ་སོར་རྟོག་པའི་ཡེ་ཤེས་ནི། །ཤེས་བྱ་ཀུན་ལ་རྟག་མི་ཐོགས། །ཏིང་ངེ་འཛིན་དང་གཟུངས་རྣམས་ཀྱི། །གཏེར་དང་འདྲ་བ་ཁོ་ན་ཡིན། །འཁོར་གྱི་དཀྱིལ་འཁོར་རྣམས་སུ་ནི། །ཟག་པ་མེད་པའི་ཆོས་ཀྱི་འབྱོར་པ་ཐམས་ཅད་སྟོན་མཛད་པ། །ཐེ་ཚོམ་ཐམས་ཅད་གཅོད་མཛད་པའི། །ཆོས་ཆེན་ཆར་ནི་རབ་ཏུ་འབེབས། །ཞེས་པའོ། །བྱ་བ་གྲུབ་པའི་ཡེ་ཤེས་ནི། །ཁམས་རྣམས་ཀུན་ཏུ་སྣ་ཚོགས་ཤིང་། །དཔག་མེད་བསམ་ཡས་སྤྲུལ་པ་ཡིས། །སེམས་ཅན་ཀུན་དོན་སྒྲུབ་པའོ། །ཞེས་པ་ནི་འཇིག་རྟེན་གྱི་ཁམས་ཀུན་ཏུ་སྤྲུལ་པ་དཔག་ཏུ་མེད་པས་སེམས་ཅན་གྱི་དོན་མཛད་པའོ། །སྤྲུལ་པ་དེ་ཡང་གསུངས་པ། སངས་རྒྱས་སྤྲུལ་པ་དེ་རྟག་ཏུ། །མཛད་པ་གྲུབ་པའི་བྱེ་བྲག་དང་། །གྲངས་དང་ཞིང་གི་རྣམ་ཀུན་ཏུ། །བསམ་མི་ཁྱབ་པར་ཤེས་པར་བྱ། །ཞེས་ཏེ། སངས་རྒྱས་ཀྱི་སྤྲུལ་པ་དེ་ཡང་རྟག་ཏུ་བྱ་བ་མཛད་པའི་བྱེ་བྲག་གྲངས་དང་ཞིང་གི་སྒོ་ནས་རྣམ་པ་ཐམས་ཅད་དུ་བསམ་གྱིས་མི་ཁྱབ་པར་རིགས་པར་བྱའོ། །ཞེས་བྱ་བའོ། །ཡེ་ཤེས་བཞི་པོ་དེ་འབྱུང་བའི་དགོས་པའང་རྒྱུ་ནི། འཛིན་པའི་ཕྱིར་དང་སེམས་མཉམ་ཕྱིར། །ཡང་དག་ཆོས་རབ་སྟོན་ཕྱིར་དང་། །བྱ་བ་གྲུབ་པ་ཉིད་ཀྱི་ཕྱིར། །ཡེ་ཤེས་བཞི་པོ་ཡང་དག་འབྱུང་། །ཞེས་པ་དང་པོ་འཛིན་པ་ནི་ཐོས་པའི་ཆོས་རྣམས་སོ། །གཉིས་པ་ནི་སེམས་ཅན་ཐམས་ཅད་ལ་བདག་གཞན་མཉམ་པའོ། །གསུམ་པ་ནི་ཆོས་སྟོན་པའོ། །བཞི་པ་ནི་བྱ་བའི་དོན་ཀུན་གྲུབ་པའོ། །ཡང་སློབ་དཔོན་ཙནྡྲ་གོ་མིས་ཡེ་ཤེས་ཀྱི་མཚན་ཉིད་བཤད་པ། འགའ་ཞིག་དེ་བཞིན་ཉིད་ལ་དམིགས། །མེ་ལོང་ཡེ་ཤེས་དག་ཏུ་འདོད། །གཞན་དག་མེ་ལོང་ལྟ་བུ་དེ་ཤེས་བྱའི་དོན་ཀུན་གྱི་རྣམ་པ་མཁྱེན་པ་ཡིས། །ཤེས་བྱའི་དོན་ཀུན་གྱི་ནི་སྤྱོད་ཡུལ་འདོད། །མཉམ་ཉིད་ཡེ་ཤེས་གང་ཡིན་པ། །དེ་ནི་དེ་བཞིན་ཉིད་ལ་དམིགས་པའི་ཡུལ་ཅན་ནོ། །བྱ་བ་གྲུབ་པའི་ཡེ་ཤེས་ནི། །ཡུལ་དྲུག་ལ་དམིགས་པའི་དགོས་དོན་རྣམ་པ་དྲུག་ཏུ་འདི་ཡུལ་ཅན་དུ་འདོད། །ཡུལ་དུས་ཐམས་ཅད་དུ་ནི་ཤེས་བྱ་ཐམས་ཅད་མ་འདྲེས་པ་ཉིད་དུ། །རྣམ་པར་ཤེས་པ་སོ་སོར་རྟོག་པའི་ཡེ་ཤེས་འདི་ནི་ཆོས་སྟོན་པའི་ནུས་པ་ཀུན་དང་ལྡན་ནོ། །ཞེས་གསུངས་སོ། །དེ་ལྟ་བུའི་ཡེ་ཤེས་ལྔ་པོ་དེ་དག་གིས་སྐུ་གསུམ་གྱི་བདག་ཉིད་ཀྱི་སངས་རྒྱས་ཀྱི་ཆོས་སྟོབས་དང་མི་འཇིགས་པ་ལ་སོགས་པའམ། གཟུགས་སྐུའི་ཡོན་ཏན་མཚན་དཔེ་བརྒྱ་དང་བཅུ་གཉིས། ཆོས་སྐུའི་ཡོན་ཏན་སྡེ་ཚན་ཉེར་གཅིག །སྤྲུལ་སྐུའི་ཕྲིན་ལས་ཉེར་བདུན་ཏེ། སངས་རྒྱས་ཀྱི་ཡོན་ཏན་བརྒྱ་དྲུག་ཅུའམ། གཟུགས་སྐུའི་ཡོན་ཏན་བརྒྱད་དང་བཅུ་གཉིས། ཆོས་སྐུའི་ཡོན་ཏན་བརྒྱ་དང་ཞེ་ལྔ། སྤྲུལ་སྐུའི་ཡོན་ཏན་ཉེར་བདུན་ཏེ་ཉིས་བརྒྱ་རྩ་གཉིས་༼བརྒྱད༷་ཅུ༷་རྩ༷་བཞི༷་༽ལ་སོགས་པ་ཐམས་ཅད་བསྡུས་པར་འཕགས་པ་སངས་རྒྱས་ཀྱི་ས་དང་བསྟན་བཅོས་བྱེད་པ་རྣམས་ཀྱིས་ཀྱང་བཤད་དེ། སངས་རྒྱས་ཀྱི་ས་ལས་ཇི་སྐད་དུ། སངས་རྒྱས་ཀྱི་ས་ནི་རྣམ་པ་ལྔ་པོ་འདིས་ཡང་དག་པར་བསྡུས་པར་རིག་པར་བྱའོ། །ལྔ་གང་ཞེ་ན། ཆོས་ཀྱི་དབྱིངས་ཤིན་ཏུ་རྣམ་པར་དག་པ་དང་། མེ་ལོང་ལྟ་བུའི་ཡེ་ཤེས་དང་། མཉམ་པ་ཉིད་ཀྱི་ཡེ་ཤེས་དང་། སོ་སོར་ཀུན་ཏུ་རྟོག་པའི་ཡེ་ཤེས་དང་། བྱ་བ་གྲུབ་པའི་ཡེ་ཤེས་སོ་ཞེས་གསུངས་སོ། །དེ་ཉིད་ལས་རྒྱས་པར་གསུངས་པ་རྣམས་དང་བསྟན་བཅོས་མཛད་པ་རྣམས་ཀྱིས་ཡོན་ཏན་རྣམས་ཡེ་ཤེས་ཀྱིས་ཇི་ལྟར་བསྡུས་པ་གསུངས་པ་རྣམས་ནི་ཡི་གེ་མང་བས་འཇིགས་པས་མ་བྲིས་སོ། །བཞི་པ་ཡེ་ཤེས་ལྔས་སྐུ་གསུམ་ཇི་ལྟར་བསྡུས་ཤེ་ན། མདོ་སྡེ་རྒྱན་ལས། མེ་ལོང་ཡེ་ཤེས་ནི་ལོངས་སྐུར་བཤད། ཁ་ཅིག་གིས་མེ་ལོང་ལྟ་བུ་དང་། ཆོས་ཀྱི་དབྱིངས་གཉིས་ཀ་ཆོས་སྐུ་ཡིན་ཏེ། རྒྱན་ལས་ལོངས་སྐུར་བཤད་པ་ནི་ལོངས་སྐུའི་རྒྱུ་ཡིན་པ་ལ་དགོངས་ནས་༼ལ༷་༽མཉམ་པ་ཉིད་དང་། སོ་སོར་རྟོག་པ་ནི་ལོངས་སྐུ་ཞེས་ཟེར་རོ། །འདིར་བླ་མ་རྣམས་དང་སློབ་དཔོན་ཙནྡྲ་གོ་མི་དང་མཐུན་པར་ཆོས་ཀྱི་དབྱིངས་ཀྱི་ཡེ་ཤེས་ནི་ཆོས་སྐུ་ཡིན་ལ། མེ་ལོང་ལྟ་བུ་དང་། མཉམ་པ་ཉིད་དང་། སོ་སོར་རྟོག་པ་ནི་ལོངས་སྐུ་ཡིན་ནོ། །ཕལ་ཆེར་མཐུན་པར་བྱ་བ་གྲུབ་པའི་ཡེ་ཤེས་ནི་སྤྲུལ་པའི་སྐུའོ་ཞེས་འདོད་མོད་ཀྱི། ཁ་ཅིག་གིས་སོ་སོར་རྟོག་པའི་ཡེ་ཤེས་སྤྲུལ་སྐུའོ་ཞེས་ཀྱང་བཤད་དོ། །དེ་ལྟར་ན་སངས་རྒྱས་རྣམས་ནི་ཡེ་ཤེས་ཀྱི་སྐུའོ། །འོ་ན་སེམས་ནི་སྤྲོས་པ་དང་བྲལ་ལ། ལུས་ཡེ་ཤེས་མ་ཡིན་ཏེ་བེམ་པོ་ཡིན་པའི་ཕྱིར། དེས་ན་བེམ་པོས་ཤེས་བྱ་རྟོགས་པར་མི་རིགས་སོ་ཞེ་ན། དེ་ནི་འདི་ཡིན་ཏེ། སེམས་ལས་མ་གཏོགས་པའི་ཕྱི་རོལ་ན་བེམ་པོ་ཞེས་བྱ་བའི་ཆོས་འགའ་ཡང་མེད་དེ། ཀྱེ་རྒྱལ་བའི་སྲས་དག་ཁམས་གསུམ་པོ་འདི་དག་ནི་སེམས་ཙམ་མོ་ཞེས་པ་དང་། རིན་ཆེན་སེམས་ལས་ཕྱིར་བྱུང་བའི། །སངས་རྒྱས་མེད་ཅིང་གང་ཟག་མེད། །རྣམ་པར་ཤེས་པའི་གནས་དོན་ནམ། །ཕྱི་རོལ་གྱུར་པ་ཅུང་ཟད་མེད། །ཅེས་གསུངས་པའི་ཕྱིར་སེམས་ནི་སྒྱུ་མ་ལྟ་བུའི་ཡེ་ཤེས་ཀྱི་སྐུ་ཡིན་ལ། སེམས་ཀྱི་ངོ་བོ་ནི་བརྗོད་དུ་མེད་པ་ཡིན་པས་འགལ་བ་མེད་དོ། །ཡེ་ཤེས་ཀྱི་སྐུ་བསྟན་ཟིན་ཏོ། །དེ་ལ་ཡེ་ཤེས་ཀྱི་སྐུ་ཡིན་པའི་ཕྱིར་མི་གནས་པའི་མྱ་ངན་ལས་འདས་པ་སྟེ། དེ་བསྟན་པ་ནི། རྩ་རྒྱུད་ཕྱི་མའི་གཉིས་པ་ལས། ཆགས་དང་འཇིགས་པ་དག་གིས་ཀྱང་། །ཐབས་དང་ཤེས་རབ་གནོན་མི་འགྱུར། །གང་ཕྱིར་ཐབས་ནི་འབྱུང་བ་ཉིད། །འཇིག་པ་ཤེས་རབ་སྲིད་མཐར་བྱེད། །དེས་ན་རབ་འཇིག་ཡོད་མ་ཡིན། །དེ་ཉིད་ལ་ནི་ཆགས་པ་མེད། །ལ་ལ་འཇིག་པས་འཇིག་པར་འགྱུར། །འཇིག་པའི་དངོས་མེད་ཟད་པ་མེད། །ཅེས་གསུངས་པས་བསྟན་ཏེ། དེ་ལ་གསུམ། འཁོར་བ་མ་ཡིན་པ་དང་། མྱ་ངན་ལས་འདས་པ་མ་ཡིན་པ་དང་། དེས་ན་ཟུང་དུ་འཇུག་པའོ། །དང་པོ་ནི་རྐང་པ་དང་པོ་གཉིས་ཀྱིས་ཤེས་རབ་ཆེན་པོ་ཉིད་བསྟན་ཏེ། ཆགས་པ་ནི་སྐྱེ་བ་སྟེ་ཐོག་མར་སྐྱེ་བ་ཉིད་ངོ་བོ་ཉིད་ཀྱིས་མ་གྲུབ་པས་འཇིག་པ་མི་འགྲུབ་སྟེ། དེས་ན་སྐྱེ་བ་དང་འཇིག་པས་དམིགས་པ་མེད་པའི་ཐབས་དང་ཤེས་རབ་གནོན་པར་མི་ནུས་ཏེ་ངོ་བོས་མ་གྲུབ་པའི་ཕྱིར་རོ། །གཉིས་པ་ནི། འོ་ན་སངས་རྒྱས་ཀྱི་ཡོན་ཏན་རྣམས་ཀྱང་མེད་པར་འགྱུར་རོ་སྙམ་ན་མ་ཡིན་ཏེ། གང་ཕྱིར་ཐབས་ནི་འབྱུང་བ་ཉིད། །ཅེས་ཏེ། དམིགས་པ་མེད་པའི་ཐབས་ནི་སྙིང་རྗེ་ཆེན་པོ་ཡིན་ལ། དེས་མྱ་ངན་ལས་འདས་པའི་མཐའ་མནན་ཅིང་། གཞན་༼དོ༷ན་༽དུ་འཁོར་བར་མི་སྡོད་པས་ན་སངས་རྒྱས་ཀྱི་སྟོབས་ལ་སོགས་པ་བསམ་གྱིས་མི་ཁྱབ་པ་འབྱུང་ངོ་། །དེ་ལྟར་ན་སྤྲོས་པ་དང་བཅས་པར་འགྱུར་རོ་ཞེ་ན། མ་ཡིན་ཏེ། རྐང་པ་བཞི་པར། འཇིག་པ་ཤེས་རབ་སྲིད་མཐར་བྱེད། །ཅེས་གསུངས་པས་དམིགས་པ་མེད་པའི་ཤེས་རབ་ཀྱིས་སྲིད་པ་མཐར་བྱེད་པ་སྟེ། ཤེས་རབ་ཆེན་པོས་འཁོར་བའི་མཐའ་མནན་ནས་མྱ་ངན་ལས་འདས་པ་མི་གཏོང་བའོ། །༼གསུ༷མ་པ༷་ནི༷། ༽འོ་ན་མྱ་ངན་ལས་འདས་པ་ལ་ཞེན་ནམ་ཞེ་ན། མ་ཡིན་ཏེ་ངོ་བོས་མ་གྲུབ་པའི་ཕྱིར་འཇིག་པ་དང་ཆགས་པ་མེད་པས་དེས་ན་ཞེས་རྐང་པ་གཉིས་གསུངས་སོ། །དེས་ན་འཇིག་པ་མེད་པ་དང་ཆགས་པའང་མེད་པས་ན་སྲིད་ཞི་མཉམ་པ་འདི་ནི་མི་གནས་པའི་མྱ་ངན་ལས་འདས་པ་སྟེ། སཾ་པུ་ཊའི་གཉིས་པའི་གཉིས་པ་ལས་ཀྱང་། དམིགས་མེད་གནས་སུ་ཤེས་རབ་དང་། །དམིགས་མེད་སྙིང་རྗེ་ཆེན་པོ་ཉིད། །བློ་དང་ལྷན་ཅིག་གཅིག་གྱུར་པས། །ནམ་མཁའ་ནམ་མཁའ་ཇི་ལྟ་བུ། །ཞེས་གསུངས་ལ། འཕགས་པས་ཀྱང་དབུ་མ་རྩ་བ་ལས། འཁོར་བ་སྤངས་པར་གྱུར་པ་ཡི། །མྱ་ངན་འདས་ཁྱོད་མི་བཞེད་ཀྱི། །འཁོར་བ་མི་དམིགས་པ་ཡིས་ནི། །ཞི་ཉིད་མགོན་པོ་ཁྱོད་ཀྱིས་བསྟན། །ཞེས་གསུངས་ལ། ཐེག་པ་ཆེན་པོ་བསྡུས་པ་ལས་ཀྱང་། སྤངས་པ་ནི་མི་གནས་པའི་མྱ་ངན་ལས་འདས་པ་གང་ཡིན་པའོ། །དེའི་མཚན་ཉིད་ནི་ཉོན་མོངས་པ་ཡོངས་སུ་བཏང་བ་དང་བཅས་པས་འཁོར་བ་ཡོངས་སུ་མི་གཏོང་བའི་གནས་ཏེ་གནས་གྱུར་པའོ། །ཞེས་བྱ་བ་ལ་སོགས་པ་རྒྱས་པར་གསུངས་སོ། །འོ་ན་སྤང་བྱ་མེད་དམ་ཞེ་ན། ཀུན་རྫོབ་ཏུ་མ་གཏོགས་༼རྟོ༷གས་༽པའི་དབང་གིས་འཁོར་བ་སྟེ། ལ་ལ་འཇིག་པས་འཇིག་པར་འགྱུར། །འཇིག་པའི་དངོས་མེད་ཟད་པ་མེད། །ཅེས་གསུངས་ཏེ་རྒྱས་པར་རྟོགས་པར་བྱའོ། །མི་གནས་པའི་མྱ་ངན་ལས་འདས་པ་བསྟན་ཟིན་ཏོ། །གཉིས་སུ་མེད་པའི་མཚན་ཉིད་ནི་མི་གནས་པའི་མྱ་ངན་ལས་འདས་པ་ཉིད་ཀྱིས་ན་གཉིས་སུ་མེད་པ་ཡིན་ཏེ། དེས་ན་གོང་དུ་བསྟན་པ་ཡི། །འབྱུང་པོ་འགྲོ་དང་འོང་བ་ཉིད། །རང་གིས་ཀུན་མཁྱེན་ལྟ་བུར་གཟིགས། །ཞེས་གསུངས་པ་བཞིན་སེམས་གནས་གྱུར་པ་སྲིད་ཞི་མཉམ་པ་ཉིད་དུ་རྟོགས་པ་དེ་རྟོགས་པ་དང་རྟོགས་བྱ་ཐམས་ཅད་བྲལ་བས་ཆོས་ཐམས་ཅད་མཉམ་པ་ཉིད་དུ་གྱུར་ཏེ་སངས་རྒྱས་ཀྱི་ཆོས་ཀྱི་སྐུ་ཞེས་བྱ་བའི་དོན་ཏོ། །དེ་ཉིད་ཀྱི་དོན་རྒྱས་པར་བཤད་པའི་རྒྱུད་སཾ་པུ་ཊའི་བརྟག་པ་བཅུ་པའི་གསུམ་པ་ལས། མཚན་ཉིད་ཉི་ཤུ་རྩ་དྲུག་གིས་བསྡུས་ནས་གསུངས་ཏེ། རིག་མའི་སྐྱེས་བུ་གྲུབ་པ་ནི་གང་དུའང་མི་འགྲོ། ༡གང་དུའང་མི་གནས། ༢ཐོག་མ་དང་ཐ་མ་དང་དབུས་དང་བྲལ་བ། ༣མཐའ་གཉིས་སུ་མེད་པ། ༤ཐམས་ཅད་ལ་ཁྱབ་པའི་ཕྱིར་གནས་གསུམ་དུ་སྣང་བ་ཞེས་བྱ་བ་ནས། ༥གང་དུའང་མི་འགྲོ་བས་ཐམ༵ས་ཅ༵ད་དུ༵་སོ༵ན་པ༵། ༦ཐ༵མས་ཅ༵ད་མཁྱེ༵ན་པ༵། ༧ཀུན་ཏུ་འགྲོ་བའི་དབང་ཕྱུག་ཡིན་པས་ཐམ༵༵ས་ཅ༵༵ད་པ༵༵༵། ༨སེམས་ཅན་གྱི་བསམ་པ་འགེངས་པས་ཐམས་ཅད་ཀྱི་དོན་དུ་ཐམས་ཅད། ༩སེམས་ཅན་ཐམས་ཅད་ཀྱི་སེམས་ལ་གནས་པ། ༡༠སྐྱོན་ཐམས་ཅད་ལས་རྣམ་པར་གྲོལ་བ། ༡༡ཡོན་ཏན་ཐམས་ཅད་ཀྱི་བརྒྱན་པར་བྱས་པ། ༡༢ཐམས་ཅད་དང་ལྡན་པ། ༡༣ཞི་བ། ༡༤མཉམ་པ་མེད་པ། ༡༥རྟག་པར་མཛད་པ། ༡༦མགོན་པོ། ༡༧སྐྱོབ་པ། ༡༨ཀུན་རྟོག་པ་ཐམས་ཅད་སྤངས་པ། ༡༩དབྱིབས་དང་ཁ་དོག་བྲལ་བ་། ༢༠རྒྱལ་བའི་སྤྱོད་ཡུལ་མ་ཡིན་པ། ༢༡རྒྱལ་པོ༢༢། ཕྱེད་པར་དཀའ་བའི་ཕྱིར་རྡོ་རྗེ། ༢༣ཉོན་མོངས་པའི་གདུང་བ་ལས་གྲོལ་བའི་ཕྱིར་ཟླ་བ། ༢༤དོགས་པ་མེད་པའི་ཕྱིར་སེངྒེ། ༢༥གཏིང་དཔག་དཀའ་བའི་ཕྱིར་ཆུའི་ཕུང་པོ། དེ་ལྟར་དཔེ་སྣ་ཚོགས་ཀྱིས་རྣལ་འབྱོར་པ་རྣམས་ཀྱིས་དཔེར་བྱའོ་ཞེས་བྱ་བའི་བར་རྒྱས་པར་གསུངས་སོ། །དེ་ཉིད་ཀྱི་དོན་རྒྱལ་པོ་ཨིནྡྲ་བྷཱུ་ཏིས་ཀྱང་ཡེ་ཤེས་གྲུབ་པ་ལས། བརྟན་གཡོ་ཀུན་ཁྱབ་པ་དང་རྟོགས་པས་མི་ཕྱེད་རྡོ་རྗེའི་སྐུ་ཉིད་དང་། །ནམ་ཡང་འགྱུར་བ་མེད་པའི་བདེ་བ་ཆེན་པོའི་རང་བཞིན་ཉིད་དང་ནི། །སྒྲིབ་པ་དང་བྲལ་ཞིང་ཡང་དག་པའི་ཡེ་ཤེས་རང་གིས་རིག་པ་ལས། །ཀུན་མཁྱེན་ཉིད་ནི་དེ་བས་འདོད། །ཅེས་གསུངས་པའི་དོན་ཡང་འདི་ཡིན་ནོ། །དེ་ཉིད་ཀྱི་དོན་དང་མཐུན་པར་རྒྱུད་བླ་མ་ལས་ཀྱང་། སངས་རྒྱས་དེ་རྒྱུ་རྐྱེན་གྱིས་འདུས་མ་བྱས་པ་དང་ལྡན་ཤིང་སྒྲིབ་གཉིས་ཞི་བའི་ཆོས་སྐུ་ལྷུན་གྱིས་གྲུབ་པ་དང་། །མཁྱེན་དང་བརྩེ་དང་ནུས་པར་ལྡན་པ་དང་། །སོ་སོར་རང་གིས་རིག་པ་ལས་གཞན་གྱི་རྐྱེན་གྱིས་རྟོགས་མིན་པས། །དོན་གཉིས་ལྡན་པས་སངས་རྒྱས་ཉིད། །ཅེས་གསུངས་པས་ཀྱང་འདི་དང་མཐུན་ནོ། །ཡང་དེ་ཉིད་ལས། རྟག་པའི་ཕ་རོལ་ཕྱིན་པ་དང་། །གཙང་བའི་ཕ་རོལ་ཕྱིན་པ་དང་། །བདག་གི་ཕ་རོལ་ཕྱིན་པ་དང་། །བདེ་བའི་ཕ་རོལ་ཕྱིན་པ་ཡི། །ཞེས་གསུངས་པ་ཡང་འདི་ཉིད་ཡིན་ནོ། །གཉིས་སུ་མེད་པའི་མཚན་བསྟན་ཟིན་ཏོ། །མི་གནས་པའི་མྱ་ངན་ལས་འདས་པ་དང་གཉིས་སུ་མེད་པ་ཉིད་ཡིན་པའི་ཕྱིར་སྙིང་རྗེས་འཁོར་བ་མི་གཏོང་བས་ན་གཞན་དོན་དུ་མཛད་པ་རྒྱུན་མི་འཆད་པར་འགྱུར་ཏེ། དེ་ལ་མཛད་པ་ཇི་ལྟ་བུ་ཞེ་ན་གསུམ་སྟེ། ཆོས་སྐུ་མཛད་པའི་རྒྱུ་ཡིན་ལ། ལོངས་སྐུས་ས་བཅུ་པའི་དོན་མཛད་ལ། སྤྲུལ་པའི་སྐུས་མཛད་པ་ནི་གསུམ་སྟེ། མཆོག་དང་། འབྲིང་དང་། ཐ་མའོ། །དེ་དག་ཀྱང་གང་ལ་ཅིས་འདུལ་དེ་ལ་དེའི་རྣམ་པར་སྟོན་པ་སྟེ། རྡོ་རྗེ་གུར་ལེའུ་བརྒྱད་པ་ལས། འདི་ནི་རང་བྱུང་བཅོམ་ལྡན་འདས། །ཆོས་ཀྱི་འཁོར་ལོ་བསྐོར་བ་དང་། །རིགས་དང་བྱང་ཆུབ་བྱེད་པ་དང་། །དེ་བཞིན་དུ་ནི་ལྷར་གཤེགས་དང་། །ཁྱིམ་ནས་འབྱུང་བར་བྱེད་པ་དང་། །རབ་ཏུ་བྱུང་བ་འཛིན་པ་དང་། །སྐྱེ་བ་ཡོངས་སུ་ལེན་པ་དང་། །ཡོངས་སུ་མྱ་ངན་འདས་པ་སྟོན། །འདུལ་བའི་འཇིག་རྟེན་མཐོང་ནས་ནི། །འདི་ནི་གཟུགས་ནི་དུ་མར་བྱེད། །སངས་རྒྱས་སེམས་ཅན་སྐྱབས་བཞེད་པས། །སངས་རྒྱས་གར་ནི་རོལ་པར་མཛད། །རི་བོང་སྟག་དང་སེང་གེ་དང་། །གླང་པོ་རྣམས་ཀྱི་རིགས་སུ་ཡང་། །སྙིང་རྗེ་ཕན་པའི་སེམས་ཀྱིས་ནི། །ཕྱག་རྒྱ་གྲུབ་པས་སྐྱེེ་བར་འགྱུར། །བུད་མེད་སྒྱུ་མའི་སྤྲོས་པ་ཡིས། །འདོད་ཆགས་ཅན་ལ་ཆོས་གསུངས་སོ། །བུད་མེད་སྒྱུ་མ་སངས་རྒྱས་ཉིད། །སྒྱུ་མ་ཐམས་ཅད་སེལ་བར་བྱེད། །ཅེས་བྱ་བ་དང་། སཾ་པུ་ཊའི་བཅུ་པའི་གསུམ་པ་ལས་ཀྱང་། དེ་ཉིད་གཅིག་པུས་སེམས་ཅན་གྱི་དོན་བྱེད་པ་དང་། རྣམ་པར་རྟོག་པ་ཐམས་ཅད་སྤངས་ཀྱང་བལྟམས་པ་སྟོན་པ་དང་ཞེས་བྱ་བ་ནས་བརྩམས་ཏེ། ཡོངས་སུ་མྱ་ངན་ལས་འདས་པ་དང་ཁམས་གསུམ་གྱི་ཆོས་ཀྱི་རྒྱལ་པོ་ཆེན་པོ་སྟེ། དེ་ལྟར་རིགས་ཀྱི་བུ་འདི་ལྟར་ཁྱད་པར་དུ་མར་རྨི་ལམ་ལྟ་བུར་སངས་རྒྱས་ཀྱི་རིམ་༼རོ༷ལ་༽པ་མཆོག་ཏུ་སྟོན་པར་མཛད་དེ། གང་ཞིག་གྲུབ་པ་སྒྱུ་མའི་ཚུལ་གྱིས་འགྲོ་བ་ཐམས་ཅད་ཀྱི་དོན་མཛད་དོ་ཞེས་བྱ་བའི་བར་དུ་མཛད་པ་བཅུ་དྲུག་ལ་སོགས་པའི་ཚུལ་གྱིས་སེམས་ཅན་གྱི་དོན་མཛད་པ་རྒྱས་པར་བཤད་དོ། །མཛད་པ་རྒྱུན་མི་འཆད་པ་བསྟན་ཟིན་ཏོ། །སྤྱི་དོན་གསུམ་པ་སྐུ་དང་ཡན་ལག་བསྲེ་བ་ནི། དེ་ལྟར་ན་སྤྱི་དོན་ལྔ་པོ་འདི་དག་གིས་འདི་སྐད་བསྟན་པར་འགྱུར་ཏེ། རྒྱུའི་དབང་དུ་བྱས་ན་སངས་རྒྱས་ཀྱི་ས་གནས་གྱུར་པའི་མཚན་ཉིད་ཅེས་བརྗོད་ཀྱང་སྐུ་གསུམ་དང་ཡེ་ཤེས་ལས་བརྗོད་པར་འགྱུར་ཏེ་རྒྱས་པར་གོང་དུ་བརྗོད་ཟིན་ཏོ། །ཡེ་ཤེས་ཀྱི་སྐུ་ཞེས་བརྗོད་ཀྱང་སྐུ་གསུམ་ཡེ་ཤེས་ལྔ་བསྟན་པ་སྟེ་གོང་དུ་བརྗོད་ཟིན་ཏོ། །གཉིས་སུ་མེད་པ་དང་མི་གནས་པའི་མྱ་ངན་ལས་འདས་པས་ཀྱང་སངས་རྒྱས་ཀྱིས་དམིགས་པ་མེད་པའི་སྙིང་རྗེ་དང་ཤེས་རབ་རྒྱས་པར་བཤད་པ་སྟེ། དེའང་སྐུ་གསུམ་དང་ཡེ་ཤེས་ལྔ་སྟེ། སྙིང་རྗེ་དང་ཡེ་ཤེས་ཆེན་པོ་ནི་གཟུགས་སྐུ་གཉིས་ཡིན་ལ། ཤེས་རབ་ཆེན་པོ་ནི་རང་བཞིན་ཆོས་སྐུ་ཡིན་ཞིང་གཉིས་སུ་མེད་པས་ནི་དེ་གཉིས་དབྱེར་མི་ཕྱེད་པ་རྟོགས་པ་མངོན་དུ་གྱུར་པ་སངས་རྒྱས་རྣམས་ཀྱི་སྐུའི་ངོ་བོ་ཆོས་ཀྱི་སྐུ་ཡིན་པས་ན་སྐུ་གསུམ་ཡེ་ཤེས་ལྔར་འགྱུར་རོ། །མཛད་པ་ཕྲིན་ལས་རྒྱུན་མི་འཆད་པ་ནི། ཆོས་ཀྱི་སྐུ་ནི་མཛད་པའི་རྒྱུ་ཡིན་ལ་གདུལ་བྱ་ལ་གཟུགས་ཀྱི་སྐུ་གཉིས་སྟོན་པར་འགྱུར་ཏེ། འདི་ལྟར་ལོངས་སྤྱོད་རྫོགས་པའི་སྐུས་ནི་ས་བཅུ་པ་རྣམས་ཀྱི་དོན་མཛད་ལ། སྤྲུལ་པའི་སྐུ་ལ་གསུམ་དུ་དབྱེ་སྟེ། མཆོག་གིས་ནི་གྲུབ་པའི་ས་ལ་གནས་པ་ཡན་ཆད་ཀྱི་དོན་མཛད་ཅིང་། སྤྲུལ་པ་འབྲིང་གིས་ནི་གདུལ་བྱ་དམན་པའི་དོན་མཛད་ཅིང་། སྤྲུལ་པ་ཐ་མས་ནི་གང་ལ་ཅིས་འདུལ་དེ་ལ་དེའི་དོན་མཛད་དེ། རི་བོང་དང་སྟག་ལ་སོགས་པ་དང་། གྲུ་དང་གཟིངས་ལ་སོགས་པ་དང་། འདོད་འཇོ་དང་ཡིད་བཞིན་གྱི་ནོར་བུ་ལ་སོགས་པས་སེམས་ཅན་གྱི་དོན་མཛད་པ་སྟེ། དེ་ལྟར་ན་སྤྲུལ་པ་གསུམ་གྱིས་དོན་མཛད་པའོ། །འོ་ན་དེ་ལྟར་སྤྲུལ་པ་ཐ་མའི་གདུལ་བྱ་ཐ་མ་ལ་ནི་སངས་རྒྱས་ཀྱི་སྐུའི་སྣང་བ་མེད་པ་གྲུ་དང་གཟིངས་ལ་སོགས་པར་སྣང་བས་ན། གདུལ་བྱ་ཐ་མ་འདུལ་བས་ཐ་མ་ཡིན་ན་སྤྲུལ་སྐུ་མཆོག་དང་འབྲིང་གཉིས་གདུལ་བྱ་མཆོག་འབྲིང་ལ་སངས་རྒྱས་ཀྱི་སྐུར་སྣང་བས་ན་ཁྱད་པར་ཅི་ཡང་མེད་དོ། །དེས་ན་སྤྲུལ་པ་འབྲིང་གིས་གདུལ་བྱ་དམན་པའི་དོན་མཛད་ཅེས་ཅིའི་ཕྱིར་བྱ་སྙམ་ན། སྤྲུལ་པ་མཆོག་ནི་གྲུབ་པའི་ས་ཡན་ཆད་ལ་སྣང་ལ། ཕལ་པ་གཞན་གྱིས་མཐོང་བའི་སྐལ་བ་མེད་པ་ཡིན་ཏེ། དེ་སྐད་དུ་དེ་ཉིད་འདུས་པ་ལས། དཀྱིལ་འཁོར་མཐོང་བ་རྣམས་གྲུབ་པའི་ས་ལ་བཞག་གོ་ཞེས་འབྱུང་བའི་ཕྱིར་རོ། །སྤྲུལ་པ་འབྲིང་སངས་རྒྱས་སུ་སྣང་ཡང་དེ་མཐོང་བ་ལ་ཡང་ལ་ལ་དག་ངན་འགྲོར་འགྲོ་བ་དག་ཀྱང་སྣང་ཞིང་། ཉན་ཐོས་དང་རང་རྒྱལ་བའི་ས་ལ་བཞག་པ་རྣམས་ཀྱང་སྣང་བའི་ཕྱིར་རོ། །དེས་ན་ས་བཅུ་པ་ནི་གཟུགས་སྐུ་ཐམས་ཅད་ཀྱི་འཁོར་ཐུན་མོང་བ་ཡིན་ཞིང་གྲུབ་པ་ཡན་ཆད་ཀྱང་སྤྲུལ་སྐུ་ཀུན་གྱི་འཁོར་ཡིན་ནོ། །སྤྲུལ་སྐུ་འབྲིང་ལ་འཁོར་གཉིས་པོ་དེ་མེད་པ་ནི་མ་ཡིན་ལ་གོང་མ་གཉིས་ཀྱི་ནི་འཁོར་དེ་དག་ཉིད་ཡིན་པས། འདིར་གཙོ་ཆེ་བའི་དབང་དུ་བྱས་ནས་སྨོས་པ་ཡིན་ནོ། །དེ་ལྟར་ན་འབྲས་བུ་དེ་དག་ལེའུ་གང་ནས་འབྱུང་སྙམ་ན། རྩ་བའི་རྒྱུད་ཀྱི་བརྟག་པ་དང་པོའི་ལེའུ་དང་པོ་དང་། ཕྱི་མའི་གཉིས་པ་དང་། གུར་བརྒྱད་པ་དང་། བཅུ་བཞི་པ་དང་། སཾ་པུ་ཊའི་བརྟག་པ་བཅུ་པའི་གཉིས་པ་དང་། གསུམ་པ་སྟེ། དེ་དག་གིས་མངོན་པར་རྟོགས་པའོ། །འབྲས་བུའི་རྒྱུད་བསྟན་ཟིན་ཏོ། །རྒྱུད་གསུམ་གྱི་མངོན་པར་རྟོགས་པ་ཐམས་ཅད་ཀྱང་བསྟན་ཟིན་ཏེ་ཡོངས་སུ་རྫོགས་སོ། །དེ་ལྟར་དེ་དག་ཀྱང་ཐོག་མར་བརྗོད་པའི་བླ་མ་གཉིས་ལས་ཇི་ལྟར་བརྒྱུད་དེ་འོངས་སྙམ་ན་འདིར་བརྗོད་པ། རྡོ་རྗེ་འཆང་དབང་དཔལ་ལྡན་ཡེ་ཤེས་མཁའ་འགྲོ་མ། །རྗེ་བཙུན་ཆོས་སྐྱོང་མཐུ་སྟོབས་དབང་ཕྱུག་བིཪྺ་པ། །ནག་པོ་ཌ་མ་པ་དང་ཨ་ཝ་དྷཱུ་ཏཱི་དཔལ། །རྗེ་བཙུན་ག་ཡ་དྷ་ར་ཤཱཀྱ་ཡེ་ཤེས་མཆོག །ཅེས་བྱ་བ་བརྒྱུད་པ་དང་པོ་བརྗོད་ནས། གཞན་ཡང་གཉིས་པའང་བརྗོད་པར་བྱ་སྟེ། གཉིས་པ། ཌྃ་བི་ཧེ་རུ་ཀ་དཔལ་དེ་རྗེས་སུ། །ཨ་ལ་ལ་དང་དཔལ་ལྡན་ནགས་ཁྲོད་གརྦྷ་རི། །རྒྱལ་བ་དཔལ་གྱི་ཡེ་ཤེས་སྦྱང་དཀའ་ཟླ་བ་དང་། །དཔའ་བོ་རྡོ་རྗེས་ཡེ་ཤེས་ཞབས་ལ་གདམས་པའོ། །བརྒྱུད་པ་གཉིས་པོ་འཛིན་པའི་རྗེ་བཙུན་ཤཱཀྱ་ཡེ་ཤེས་ལས་སུས་ཇི་ལྟར་ཐོས་ཤིང་། དེ་དག་ལས་ཀྱང་བླ་མ་ཆེན་པོས་ཇི་ལྟར་ཐོས་སྙམ་ན། དཔེ་དང་བསྟུན་ནས་བརྗོད་པ། མ་དྲོས་ཡེ་ཤེས་ཞབས་ལས་རྒྱུན་བཞིའི་བླ་མ་ནི། །འཁོན་དཀོན་མཆོག་རྒྱལ་པོ་སེ་སྟོན་ཀུན་རིག་དང་མངའ་རིས་གསལ་བའི་སྙིང་པོ་མཁྱིན་ལོ་ཙཱ་བ་འོད་ཀྱི་སྣང་བའི་མཐའ་ཅན་ཏེ། །རིག་དང་སྙིང་པོའི་ཞབས་ལས་ཞང་སྟོན་ཆོས་འབར་བ་འཁོན་སྒྱི་ཆུ་བ་དགྲ་ལྷ་འབར་བའི་མཐའ། །རྒྱུན་བཞི་འཛིན་པའི་བླ་ཆེན་དེ་ལ་རྟག་ཕྱག་འཚལ། །དེ་ལྟར་རྗེ་བཙུན་གཉིས་ལས་བརྒྱུད་དེ་བླ་མ་ཤཱཀྱ་ཡེ་ཤེས་མ་དྲོས་པའི་རྒྱ་མཚོ་ཆེན་པོས་བཟུང་ནས། དེས་ཀྱང་མ་དྲོས་པའི་མཚོ་ལས་ཆུ་བོ་བཞི་འབབ་པ་བཞིན་དུ་སློབ་མའི་མཆོག་བཞི་ལ་གདམས་ཤིང་དེ་དག་གི་གསུང་གི་ཆུ་བོ་ཡང་བདག་ཅག་གི་བླ་མ་ཆོས་ཀྱི་རྒྱ་མཚོ་ཆེན་པོ་ཡོན་ཏན་ཡིད་བཞིན་གྱི་ནོར་བུ་རིན་པོ་ཆེ་དུ་མས་ཡོངས་སུ་གང་བར་བབས་ནས། དེས་ཀྱང་སྐལ་བ་དང་ལྡན་པའི་སྐྱེ་བོ་མ་ལུས་པའི་ཡིད་ཡོན་ཏན་ཡིད་བཞིན་གྱི་ནོར་བུ་རིན་པོ་ཆེས་ཚིམ་པར་བྱེད་པ་ཡིན་ནོ་ཞེས་བྱ་བར་ཤེས་པར་བྱའོ། །དེ་ལྟར་རྗེ་བཙུན་གཉིས་པོའི་གཞུང་ལས་འདིར་གང་གཙོ་བོར་བྲིས་པ་ཡིན་ཞེ་ན། བརྗོད་པ། རྗེ་བཙུན་མཐུ་སྟོབས་གསུང་གི་མན་ངག་ནི། །ག་ཡ་དྷ་རས་གསུངས་པ་འདིར་གཙོ་སྟེ། །ཌྃ་བིའི་རྗེས་སུ་འབྲང་བའི་གསུང་ངག་དོན། །སྦྱང་དཀའ་ཟླ་བས་གསུངས་པ་གཞན་དུ་གསལ། །རྗེ་བཙུན་བིཪྺ་པའི་རྗེས་སུ་འབྲངས་ནས་ག་ཡ་དྷ་རས་གསུངས་པ་འདི་ནི་བཤད་ཐབས་ཀྱི་མན་ངག་དྲུག་དང་མངོན་པར་རྟོགས་པ་རྒྱུད་གསུམ་གྱིས་བཅིངས་པ་འདི་ཡིན་ནོ། །དཔལ་ཌོཾ་བི་པའི་མན་ངག་སློབ་དཔོན་མི་ཐུབ་ཟླ་བས་གསལ་བར་མཛད་པ་ཡང་འདི་ཉིད་དང་མཐུན་པ་ཡིན་ནོ་ཞེས་གསུངས་མོད་ཀྱང་འདི་ནི་བཤད་ཐབས་ཀྱི་མན་ངག་མཐའ་དྲུག་དང་མངོན་པར་རྟོགས་པ་འཇིག་རྟེན་པའི་དཔེ་དང་བསྟུན་ནས་ཡན་ལག་ལྔས་འཆིང་སྟེ་སྟོན་པ་གཙོ་ཆེ་བས་ན། དེ་ཡང་ཀུ་མུ་ཏ་པཉྩི་ཀ་ཉིད་ཀྱི་སྟེང་དུ་ཞིབ་ཏུ་རྟོགས་པར་བྱའོ། །བརྒྱུད་པའི་ལོ་རྒྱུས་ཅུང་ཟད་ཅིག་བཤད་ཟིན་ཏེ་མདོར་བསྡུས་པའི་ཚུལ་གྱིས་ཐམས་ཅད་ཀྱང་བསྟན་ཟིན་ཏོ། །དེ་ལྟར་བསྟན་པ་བླ་མའི་ཚོགས་རྣམས་ཀྱི། །བཀའ་དྲིན་དྲན་ནས་དད་པས་མཆི་མ་ལྷུང་། །རྟག་ཏུ་བླ་མའི་རབ་མཆོག་དེ་དག་གི། ཞབས་པད་དྲི་མ་མེད་ལ་ཕྱག་འཚལ་ལོ། །གཞུང་དོན་ཚར་ནས་བླ་མའི་སྤྱན་སྔ་རུ། །མཆིས་ནས་ཉེས་པ་བཅོས་པར་ཞུ་བ་ཡི། །སྐལ་བ་སྐལ་ངན་བདག་ལ་ག་ལ་ཡོད། །ཀྱི་ཧུད་བླ་མ་སེམས་ཤིང་འཁོད་པར་བྱེད། །བསོད་ནམས་མཐའ་ཡས་ཀྱིས་བསྒྲུབས་ཡོན་ཏན་རྩེ། །ཁྱོད་འདྲའི་མགོན་དང་བྲལ་ནས་མགོན་མེད་བདག །མི་འདུལ་སྐྱེ་བོ་འདུལ་ཞིང་མཆིས་ལགས་ན། །སྤྱན་རས་ཀྱིས་སྐྱོངས་མགོན་པོ་ཐུགས་རྗེ་ཅན། །ཀྱེ་མ་ཁ་བ་ཅན་གྱི་ཁྲོད་འདི་ན། །ཕལ་ཆེར་ལོངས་སྤྱོད་རྒུད་གྱུར་དད་པ་བྲལ། །མུ་སྟེགས་འཕེལ་ཞིང་ཆོས་ལྟར་བཅོས་པ་མང་། །ཆོས་བྱེད་ཕལ་ཆེར་ཚེ་འདིར་སྤྲོ་བར་མཐོང་། །འགའ་ཞིག་རྟོག་གེའི་དུག་ཆུས་བློ་རབ་འཁྲུལ། །ལ་ལ་བསྟན་བཅོས་ཐོས་པའི་ཆང་གིས་མྱོས། །ཁ་ཅིག་ཚུལ་ཁྲིམས་མཆོག་འཛིན་ཀུན་ལ་གཤེ། །ཕལ་ཆེར་གསུང་རབ་མཆོག་འདི་སྤངས་སུ་དོགས། །འགའ་ཞིག་སྨིན་བྱེད་དང་བྲལ་ཟབ་དོན་སྒོམ། །ཁ་ཅིག་ལག་ལེན་སྲོལ་ཉམས་ཚིག་དོན་འཆད། །གཞན་དག་ཆོ་ག་མ་མཐོང་བརྫུན་གྱིས་བསླད། །དེ་དག་རྡོ་རྗེ་ཐེག་པའི་གཟུགས་བརྙན་ཡིན། །ཕ་རོལ་ཕྱིན་གཞུང་ཐོས་པས་ཡིད་རྒྱས་ཀྱང་། །རྒྱུད་ཀྱི་སྣང་བས་བློ་གྲོས་མ་བརླན་པའི། །མན་ངག་ཕྲ་མོ་བཟུང་ནས་འདིས་ཆོག་ཅེས། །སྨྲ་བའི་རྨོངས་རྣམས་དོན་མེད་མ་གྱུར་ཏམ། །ལམ་ལ་མ་ཞུགས་ལོག་པར་ཞུགས་པ་དང་། །རྡོ་རྗེ་ཐེག་སྤངས་ཞུགས་ཀྱང་གཟུགས་བརྙན་འདྲ། །དེ་དག་སྤང་ཕྱིར་བདག་གིས་བརྡ་སྤྲད་ཀྱང་། །བྱོལ་སོང་འཇིག་རྟེན་མི་གོ་ཇི་ལྟར་བྱ། །འདིར་ནི་རྒྱུད་དོན་ཡོན་ཏན་རིན་ཆེན་གཏེར། །སྐྱོན་མེད་གྲུབ་པའི་བླ་མའི་གསུང་གིས་ཕྱེ། །ཚིག་དོན་སྒྲོན་མེ་འདི་ཡིས་གསལ་བྱས་ཀྱིས། །ཡོན་ཏན་རིན་ཆེན་ཇི་ལྟར་འདོད་པ་ལོང་། །རྒྱུད་ཀྱི་ས་གཞིར་ཡིད་ཀྱི་ས་བོན་བཏབ། །བླ་མའི་གསུང་རབ་དྲི་མེད་ཆར་གྱིས་བརླན། །ཐོས་བསམ་གྱིས་བསྐྱངས་རིན་ཆེན་ལྗོན་ཤིང་འཁྲུངས། །སྐལ་ལྡན་སྐྱེ་བོའི་ཚོགས་ཀྱི་བསྟི་གནས་ཡིན། །བདག་ཀྱང་སྐྱེ་བ་འདི་ནས་བཟུང་ནས་ནི། །ཇི་སྲིད་རྡོ་རྗེ་འཛིན་པ་མ་ཐོབ་པར། །མཐུ་སྟོབས་དབང་ཕྱུག་གཞུང་དང་མི་འབྲལ་ཞིང་། །བླ་མའི་ཚོགས་ཀྱི་བྲན་དུ་སྐྱེ་བར་ཤོག །བླ་མའི་ཚོགས་རྣམས་མཉེས་པར་བྱས་པ་ཡིས། །སྐུ་གསུམ་ཡེ་ཤེས་ལྔ་ལྡན་ཐོབ་ནས་ཀྱང་། །ནམ་མཁའི་མཐས་གཏུགས་གྱུར་པའི་སེམས་ཅན་རྣམས། །གཉིས་མེད་སངས་རྒྱས་ས་ལ་འགོད་པར་ཤོག །སངས་རྒྱས་ཞིང་ཁམས་འབྱམས་ཀླས་མ་ལུས་ཀུན། །རྣལ་འབྱོར་འདིས་ནི་དོན་ཀུན་རབ་འགྲུབ་ཅེས། །སྙན་པའི་གྲགས་པས་ཁྱབ་པར་གྱུར་ནས་ཀྱང་། །རྡོ་རྗེ་འཛིན་པའི་རྒྱལ་མཚན་བརྟན་པར་ཤོག །དེ་འདྲའི་བློ་གྲོས་འཆང་བའི་དགེ་བསྙེན་ལ། །རྗེ་བཙུན་བླ་མ་དམ་པས་བསྐུལ་བ་དང་། །བྱང་ཆུབ་ཤེས་རབ་འབུམ་ཕྲག་འོད་གསལ་བས། །གསོལ་བ་བཏབ་ནས་ལེགས་པར་སྦྱར་བ་ཡིན། །ཁོ་བོས་འབད་དེ་ལེགས་པར་སྦྱར་བ་ཡིས། །མངོན་པར་རྟོགས་པ་རིན་ཆེན་ལྗོན་ཤིང་ལས། །ཐུན་མོང་ལྟ་བ་རིམ་པ་ཅན་གྱི་སྐབས། །འདི་ནི་བླ་མ་དམ་པས་གསལ་བར་མཛད། །ལེགས་སྦྱར་འདི་ལ་ཉེས་པ་མེད་པར་སེམས། །ཉེས་པ་གང་སྣང་བདག་གི་ཉེས་པ་སྟེ། །བླ་མ་བླ་མར་བཅས་པའི་མ་ཡིན་པས། །བདག་ལ་མཁའ་འགྲོའི་ཚོགས་ཀྱིས་བཟོད་པར་མཛོད། །འདི་བགྱིས་པ་ལས་དུབ་པར་གྱུར་པ་ཡི། །དགེ་བ་དུང་ཟླ་ཀུནྡ་དང་མཚུངས་པ། །བདག་གི་རྒྱུད་ལ་ངེས་པར་སྐྱེས་པ་དེས། །འགྲོ་ཀུན་དཔལ་ལྡན་རྡོ་རྗེ་འཛིན་འགྱུར་ཤོག །རྒྱུད་གསུམ་པོ་གཅིག་ཏུ་བསྲེས་པའི་ས་གཞིར་ཡིད་ཀྱི་ས་བོན་བཏབ་སྟེ་བླ་མའི་གསུང་ལས་བྱུང་བའི་མངོན་པར་རྟོགས་པའི་ལྗོན་ཤིང་ཐོས་བསམ་གྱི་སྲུང་བས་ཀུན་ཏུ་བསྐྱེད་པ་འདི་ནི་མན་ངག་གི་ཚོགས་ཀྱི་ཚིག་གི་མེ་ཏོག་གིས་མཛེས་ཤིང་འདོད་པའི་དོན་ཐམས་ཅད་འབྱུང་བའི་འབྲས་བུ་དང་ལྡན་པ། ལུང་གིས་རབ་ཏུ་རྒྱས་པའི་ལོ་འདབ་ཀྱིས་ཕྱུག་ཅིང་ཉོན་མོངས་པའི་གདུང་བ་ལས་སྐྱོབ་པའི་བསིལ་གྲིབ་ཅན། སྐལ་པ་དང་ལྡན་པའི་རྣལ་འབྱོར་པ་རྣམས་ཀྱི་བསྟི་གནས་སུ་གྱུར་པའི་ཡོན་ཏན་ཚད་མེད་པ་རིན་པོ་ཆེའི་ལྗོན་ཤིང་ཞེས་བྱ་བ་ཤཱཀྱའི་དགེ་བསྙེན་ཐེག་པ་མཆོག་གི་རྣལ་འབྱོར་པ་གྲགས་པ་རྒྱལ་མཚན་གྱིས་དཔལ་ས་སྐྱའི་དབེན་གནས་དམ་པར་ཉེ་བར་སྦྱར་བ་འདི་ཡོངས་སུ་རྫོགས་སོ།། །།ཉེས་པ་རྣམས་བླ་མའི་ཚོགས་ལ་བཟོད་པར་གསོལ་ལོ། །འདིས་སེམས་ཅན་ཐམས་ཅད་ཀྱི་དོན་བྱེད་པར་གྱུར་ཅིག །འདི་ལྟར་བྱང་ཆུབ་ཀྱི་སྙིང་པོ་རྡོ་རྗེའི་གདན་ལས་བྱང་ཕྱོགས་སུ་དཔག་ཚད་བརྒྱ་ཕྲག་གཅིག་བགྲོད་པའི་སའི་ཆ་འགྲན་ཟླས་དབེན་པའི་མཁས་པ་རྒྱུན་མི་འཆད་པར་འབྱུང་བའི་མཚན་མ་དང་ལྡན་པའི་དཔལ་ས་སྐྱའི་དབེན་གནས་དམ་པར་སྐུ་འཁྲུངས་པ། འཇམ་པའི་རྡོ་རྗེས་མངོན་སུམ་དུ་བྱིན་གྱིས་བརླབས་པས་ཤེས་བྱའི་དཀྱིལ་འཁོར་མ་ལུས་པ་ཐུགས་སུ་ཆུད་པའི་མཁྱེན་རབ་དཔག་ཏུ་མེད་པས་མི་མཐུན་པའི་ཕྱོགས་མཐའ་དག་ལ་འཁོན་པའི་བདག་ཉིད་ཆེན་པོ་གྲགས་པ་རྒྱལ་མཚན་གྱིས་མཛད་པའོ། །སླད་ཀྱིས་ཀྱང་དེ་ཉིད་ཀྱིས་འདིའི་དོན་བསྡུས་པ་ཅིག་ཀྱང་མཛད་ལ། དེ་བར་སྐབས་སུ་བྲིས་ཤིག་ཅེས་དེ་ཉིད་ཀྱི་བཀའ་བབས་ནས། ཤཱཀྱའི་དགེ་བསྙེན་གཞོན་ནུ་མངོན་པའི་ང་རྒྱལ་ལ་འཁོན་པ་ཀུན་དགའ་རྒྱལ་མཚན་གྱིས་ཞུ་དག་བགྱིས་ནས། སླར་ཡང་དེ་ཉིད་ཀྱི་སྤྱན་སྔར་ཕུལ་ཏེ་ཤིན་ཏུ་དག་པར་བགྱིས་སོ།། །།ཐུབ་པའི་དགོངས་པ་མེ་ཏོག་གི། ཕྲེང་བ་བླ་མའི་གསུང་ཟེར་གྱིས། །ཕྱེ་འདི་འགྲོ་བའི་སྤྱི་གཙུག་ན། །ཟླ་ཟེར་བཞིན་དུ་མཛེས་པར་ཤོག །།། རྒྱལ་བ་ཀུན་གྱི་དགོངས་པ་མཐར་ཐུག་པ། །མཁས་གྲུབ་ཀུན་གྱིས་བགྲོད་ཅིང་བསྔགས་པའི་ལམ། །གསུང་རབ་ཀུན་གྱི་གླེགས་བམ་གཅིག་པུ་འདི། །སྐལ་ལྡན་ཀུན་གྱི་འདྲེན་མཆོག་སློབ་དཔོན་ཡིན། །ཚིག་ཙམ་ཐོས་ན་འབྲེལ་ཚད་དོན་ལྡན་ཡིན། །དོན་ལ་བསམ་ན་མཁའ་འགྲོའི་སྙན་བརྒྱུད་ཡིན། །ཉམས་སུ་བླངས་ན་སངས་རྒྱས་ལག་བཅང་ཡིན། །ས་སྐྱའི་བསྟན་འཛིན་ཡོངས་ཀྱི་སྤྱི་ནོར་ཡིན། །དེ་སླད་བརྩོན་པས་གཞུང་བཟང་འདིར། །ཐོས་སོགས་སྒོ་ནས་འཇུག་ནུས་ན། ཤིན་ཏུ་སྐལ་པ་བཟང་པོར་ནི། །གྲོགས་དག་ཅིས་ཀྱང་མཁྱེན་པར་མཛོད། །ཅེས་སྨྲས་སོ། །སྤྱི་ལྗོན་གྱི་མཆན་འདི་ནི་རང་ཉིད་ཀྱི་དྲན་པ་གསོ་བ་དང་། ཆོས་ཀྱི་མཆེད་པོ་བླ་མ་ཀུན་བཟང་དང་། སྐྱེ་རྒུ་མཁན་པོ་ཕྲིན་ལས་ཆོས་འཕེལ་དང་། རྩེ་ཆེན་གདོང་པ་དགེ་འདུན་ཡར་འཕེལ་གསུམ་གྱི་བཞེད་སྐོང་དུ། ཆོས་སྨྲ་བའི་གཟུགས་བརྙན་ཀུན་དགའ་རྒྱལ་མཚན་གྱིས་ཤར་ཆེན་གྱི་ལུང་འགྲེལ་གཙོ་བོར་བྱས་ནས་བྲིས་པ་འདིས་དོན་དུ་གཉེར་བ་རྣམས་ལ་ཕན་ཐོགས་པར་གྱུར་ཅིག། །།