སྒྲུབ་པའི་དུས་ཀྱི་རྟགས་ཚད་ངེས་པའི་ཡི་གེ་དད་པའི་འཇུག་ངོགས་བཞུགས་སོ།།

གུ་རུ་པྲ་ཝ་ཀཱ་ར་ན་མོ་ཧོ། ཇི་ལྟ་ཇི་སྙེད་མཁྱེན་པའི་སངས་རྒྱས་ཉིད། །འགྲོ་མགོན་པད་མ་འབྱུང་གནས་བདག་ལ་དགོངས། །དུས་གསུམ་སངས་རྒྱས་ཐམས་ཅད་འདུས་པ་ནི། །རྗེ་བཙུན་ཨུ་རྒྱན་ཆེན་པོ་ཁོ་ན་སྟེ། །བདག་གི་བླ་མ་རྗེ་དང་ཐ་མི་དད། །དེ་ཕྱིར་རྣམ་པ་ཀུན་ཏུ་བདག་གིས་ནི། །ཁྱེད་ཉིད་མ་གཏོགས་མགོན་གཞན་མ་མཆིས་པས། །སྙིང་ནས་རྩེ་གཅིག་གསོལ་བ་འདེབས་བགྱིད་ན། །ཐུགས་རྗེས་མི་གཡེལ་མྱུར་དུ་དགོངས་ནས་ནི། །སྣང་སྟོང་སྐུ་ཡི་དཀྱིལ་འཁོར་ཞལ་བསྟན་ནས། །གྲགས་སྟོང་གསུང་གིས་བདག་ལ་ཆོས་འཆད་དེ། །བདེ་སྟོང་ཐུགས་ཡིད་གཅིག་ཏུ་བྱིན་གྱིས་རློབས། །སྒོ་གསུམ་སྐུ་གསུམ་ངང་དུ་མ་གྲོལ་བར། །མཚན་མའི་རྟགས་བཟང་ཙམ་གྱིས་ཡིད་མི་ཚིམ། །དེ་ཕྱིར་ངེས་པར་སྒྲུབ་པ་སྲོག་དང་བསྡོ། །བློ་སྣ་མི་མང་བདེ་གཤེགས་གཅིག་ཏུ་སྒྲུབ། །ཚེ་འདི་མི་བསམ་ཕྱི་མ་དོན་དུ་གཉེར། །བློ་གཏད་གཅིག་ཆོག་ཡིན་ནོ་གུ་རུ་རྗེ། །ཅི་མཛད་ཁྱེད་རང་ཤེས་སོ་རིན་པོ་ཆེ། །ཞེས་གསོལ་བ་བཏབ་ནས། ངེས་པའི་བསམ་པས་ད་ནི་བློ་སྣ་མང་པོ་མི་བྱེད་པར་ཡང་ན་ཨོ་རྒྱན་རིན་པོ་ཆེ་འགྲུབ་པ་དང་། ཡང་ན་སྒྲུབ་པ་དེ་ཉིད་གྱི་ངང་དུ་ཤི་བ་གཅིག་བྱེད་བསམ་སྟེ་བླ་མ་རིན་པོ་ཆེ་ལའང་ཐུགས་རྗེ་ཆེན་པོ་དང་པདྨ་འབྱུང་གནས་གཉིས་གང་དགའ་གཅིག་ལ་གཅིག་ཏུ་དྲིལ་བས་གང་བྱེད་ཞུས་ཤིང་། རང་གིས་ཀྱང་དེ་ནུབ་གསོལ་བ་བཏབ་སྟེ་མྱུར་དུ་གང་འགྲུབ་པའི་ལྷ་སོ་སོའི་མཚན་མ་སྟོན་ཅིག་ཅེས་ཡིད་ཀྱིས་རྨོད་བོར་ནས་རྨི་ལམ་བརྟགས་པས། རྨི་ལམ་དུ་ཨོ་རྒྱན་གྱི་སྐུ་པར་རང་ལ་ཡོད་པ་དེ་འདྲ་བ་ཞིག་གཅིག་གིས་བསྟན་ནས་བྱུང་བ་རྨིས། ཕྱིར་ནང་བསམ་པ་ལ་མཚན་བལྟས་ནི་ཨོ་རྒྱན་སྒྲུབ་ཅིག་གི་བརྡའ་རེད་དེ་པར་སྐུ་འདི་ཡོད་པའི་བག་ཆགས་ཡང་ཨེ་ཡིན་བསམ། བླ་མ་རིན་པོ་ཆེའི་ཞལ་ནས། པདྨ་ཀཱ་ར་དགའ་འོ་ཞེས་པའི་ལེགས་གསུངས་འགའ་ཡང་བྱོན་པས། ད་ནི་སྟབས་འགྲིགས་སོ་བསམ་སྟེ། གླང་ལོ་སྟོན་ཟླ་འབྲིང་པོ་ཡར་གྱི་ཚེས་བཅུ་བཞི་གཟའ་སྐར་འགྲུབ་སྦྱོར་བཟང་པོའི་ཉིན་མཚམས་བསྡམས་ནས་ཡོ་ག་གསུམ་པོ་གཅིག་ཏུ་དྲིལ་ཏེ་ཉམས་སུ་བླངས་བས། དང་པོའི་ནུབ་པར་ས་ཡི་བང་རིམ་མཆོད་རྟེན་གྱི་སྨད་དུ་གཅིག་པ་ལ་ཡར་རང་གྲུབ་ཏུ་ཡོད་པའི་བང་རིམ་གཅིག་གི་སྟེང་ན་བདག་འདུག་སྟེ། འདི་ལ་རིམ་པ་བཅུ་གསུམ་དགོས་རྒྱུ་ཡིན་ཏེ་རིམ་པ་དགུའི་ཆོས་སྨྲས་པ་ཞིག་རྨིས། དེ་ནས་ནུབ་གཅིག་ཨོ་རྒྱན་ཡིད་ཡུལ་དུ་མཇལ་སྣང་གཅིག་བྱུང་། དབང་ཕྱུག་རྡོ་རྗེ་མཇལ་རྒྱུ་ཡོད་བསམ་པ་ཡང་རྨིས། དེ་མཉམ་དུ་འོད་ཆེན་པོ་གཅིག་ཏུ་བྱོན་སོང་བའི་རྗེས་སུ་བདག་ཀྱང་སོང་བ་རྨིས་པ་དང་། འོད་ཁྱུག་ཁྱུག་པའི་དངོས་པོ་ལན་མང་དུ་བྱུང་ཞིང་མིག་ལམ་དུ་འཁྱུག་ཞིང་སྡོད་པ་དང་ཡལ་བ་སོགས་མང་དུ་བྱུང་། ནུབ་གཅིག་སྟོན་པ་ཤཱཀྱ་ཐུབ་པ་དེ་དངོས་སུ་ཡིན་སྙམ་པ་བཞུགས་པའི་མདུན་དུ། བདག་དང་གཞན་གཅིག་དང་ངེད་གཉིས་ལ་འཁོར་ཡང་བརྒྱ་ཙམ་འདུག་ཅིང་། ཐུབ་པའི་ཞལ་ནས། རིགས་ཀྱི་བུ་ཕྱིར་འོང་བ་དང་ཕྱིར་མི་འོང་པའི་འབྲས་བུ་མངོན་གསུམ་དུ་འགྱུར་རོ། །ཞེས་གསུངས་པས། བདག་གིས་ལུང་བསྟན་དུ་གོ་སྟེ། ཐུབ་པ་ལ་གུས་པས་འདི་སྐད་ཞུས། བཅོམ་ལྡན་འདས་སུ་ཞིག་གིས་ཕྱིར་འོང་ཞིང་སུའི་ཕྱིར་མི་འོང་བའི་འབྲས་བུར་འགྱུར་རོ། །ཞེས་ཞུས་པས། ཐུབ་པའི་ཞལ་ནས། དེའི་ལོ་རྒྱུས་ཆེས་ཆེར་མང་པོ་འགའ་གསུངས་ཞིང་རང་ཡང་དད་པ་དྭངས་བ་འདྲེན་པ་བྱུང་ཡང་ཚིག་མ་ཟིན་ཏེ་བརྗེད་ཤོར། ཡང་རྨི་ལམ་དུ་པདྨ་འབྱུང་གནས་དེ་བྱིས་པ་ལོ་བརྒྱད་ལོན་པ་ཙམ་དུ་སྤྲུལ་ནས་འདུག་པས། བདག་ལ་འདི་སྐད་གསུངས་ཏེ། ཁྱོད་ང་ཡི་སྤྲུལ་བ་ཡིན། ཁྱོད་ཀྱི་འདིའི་གོང་དུ་ཀོང་པོར་བླ་མ་གཅིག་ཏུ་སྐྱེས་ནས་རིག་གནས་འགའ་ཡང་ཤེས་པ། གང་ཡང་མོས་པ་གཅིག་བྱུང་ཞེས་གསུངས་པ་དང་། ང་རང་ཡང་གསུངས་པ་བཞིན་ཏུ་སྐྱེ་བ་དྲན་ཏེ་བསམ་པ་ལའང་། ང་དང་ཨོ་རྒྱན་ཐུགས་ཡིད་གཅིག་ཡིན་ཞིང་། ང་སྤྲུལ་པ་ཡིན་ཡང་ལུས་ནི་སོ་སོར་རེ་ཞིག་སྣང་། མཐར་ནི་འཇའ་ཚོན་མཁའ་ལ་ཐིམ་བ་བཞིན་དུ་ང་དང་ཨོ་རྒྱན་དབྱེར་མེད་ཡིན་བསམ་ཞིང་བྱིས་པ་དེ་དང་མཉམ་དུ་སོང་བས་གཙུག་ལག་ཁང་ཆེན་པོ་གཅིག་གི་སྒོ་རྩར་སླེབ་པས། བྱིས་པ་དེའི་ཞལ་ནས། ད་ཁྱོད་འདིར་སྡོད་དང་རྟེན་འབྲེལ་གཅིག་བྱའོ་གསུངས་ནས་ནང་དུ་བྱོན་སོང་། ང་གཉིས་སྒོར་བསྡད་ནས་རྟེན་འབྲེལ་ལེགས་པོ་ཡོད་བསམ་ཞིང་ཡོད་ཙ་ན། སྒོ་དེ་ཕྱེས་ནས་འདིར་ཤོག་ལ་མདའ་དར་འདི་ལ་སྨོན་ལམ་ཐོབ་ཅིག་ཟེར་བས། བདག་སོང་ཏེ་མདའ་དར་ལ་འཇུས་ནས་མཆོག་གི་དངོས་གྲུབ་གྲུབ་ཆེན་བརྒྱད་བདག་གིས་ཐོབ་པར་ཤོག་ཅིག་ཅེས་སྨྲས་པ་དང་གཉིད་སད་དོ། །ཡང་རྨི་ལམ་དུ་གཞན་འགས་ཀརྨ་པ་ལ་གྲུབ་རྟགས་མེད་ཟེར་བ། བདག་གིས་ཀརྨ་པ་སངས་རྒྱས་དངོས་ཡིན་པ་ལ་གྲུབ་རྟགས་མེད་ཟེར་རམ་སྨྲས་པས། མཛད་པ་བཅུ་གཉིས་དེ་སྐད་ཅིག་ལ་བསྟན་ན་ཀརྨ་པ་ཡིན་རྒྱུར་འདུག མཛད་པ་བཅུ་གཉིས་པོ་སྟོན་མཁན་དེ་ངེད་རང་ནས་མཐར་མྱ་ངན་ལས་འདས་པ་དེ་ང་རང་ཤེས་སྨྲས། གཅིག་གི་སྟེང་དུ་བདག་འདུག་ནས། རང་གི་ཐུགས་ཀ་ནས་ཡེ་ཤེས་ཀྱི་མེ་སྦར་ཏེ་སྦྱངས་དགོས་བསམ་ཞིང་། འདིའི་བར་ཆད་སེང་གདོང་མས་སེལ་སྙམ་ནས་རང་ལས་སེང་གདོང་མ་འཕྲོས་ཏེ་མདུན་བསྐྱེད་ནས་འཕྲིན་ལས་བཅོལ་བ་རྨིས། །ཡང་རྨི་ལམ་དུ་རྗེ་དུས་གསུམ་མཁྱེན་པ་ཁོ་བོ་ཡིན་བསམ་པ་བྱུང་། དེ་ངེས་པ་ཅན་ཡིན་པ་ག་ལ་སྲིད་ཀྱང་དགོངས་པ་ཅན་དེ་རླུང་སེམས་ཀྱི་གནད་འགགས་ཅུང་ཟད་ཤེས་པའི་བརྡར་གོ་ཞིང་། རླུང་གི་ཡོན་ཏན་བག་ཙམ་གཅིག་དེ་དང་དུས་མཚུངས་པར་བྱུང་བའོ། །ཡང་རྨི་ལམ་དུ་ང་རང་བྲམ་ཟེ་ས་ར་ཧའི་ཆ་ཙམ་ཡིན་བསམ་པ་དྲན་ཞིང་། ས་ར་ཧ་དེ་ཡང་ཡར་ཙམ་དེར་ཡོད་པ་འདྲ་བ་ཞིག་བྱུང་། དེའང་རང་གི་སེམས་ཉིད་རྟོགས་ཚུལ་ཅུང་ཟད་ཡོད་པ་དེ་རྗེ་བྲམ་ཟེའི་དགོངས་པ་མ་བཅོས་པའི་ཤེས་པ་ཕྱག་རྒྱ་ཆེན་པོ་མ་ནོར་བ་ཡིན་ཞེས་པའི་བརྡར་གོ་བས་བོགས་ཀྱང་ཐོན་པ་བྱུང་། ཡང་རྨི་ལམ་དུ་རང་ཉིད་བུ་ཆུང་ལོ་བརྒྱད་ཙམ་པ་གོས་དང་རྒྱན་མཛེས་པ་དང་ལྡན་པ་གཅིག་རེད་ནས་གདའ་ཞིང་། དགོན་སྡེ་ཆེན་པོ་གཅིག་ལ་བསྐོར་བ་བྱས་ནས་སོང་བས། ཁྲོམ་མང་པོ་དང་བུད་མེད་དར་མ་རྒྱན་ཤིན་དུ་མཛེས་པ་ལྟ་ན་སྡུག་པ་སྨིན་མཚམས་ན་མཛོད་སྤུའི་མཚན་རྟགས་ཡོད་པ་གཅིག་དང་། གཞན་ཡང་མང་པོས་བདག་ལ་བལྟས་ནས། བྱིས་པ་འདི་སུའི་མཐོང་ཙམ་ཡང་དོན་དང་ལྡན་པ་ཡིན་ཞེས་ཐམས་ཅད་ཀྱིས་ལེགས་པར་བལྟ་བར་འདུག །ང་རང་དེ་ལྟ་བུ་གཅིག་ཡིན་བསམ་ཞིང་སྣང་བ་མཐོར་སོང་བ་རྨིས། དེ་ཡང་ཐ་མལ་གྱི་བྱིས་པ་བདག་འདྲ་བ་དེ་ལྟ་བུ་ཅུང་ཟད་ཀྱང་མི་སྲིད་ཀྱང་། རང་གི་སེམས་ཉིད་མ་བཅོས་པའི་ངོ་བོ་དེ་བདག་གཞན་སུས་ཅུང་ཟད་མཐོང་ཡང་འཁོར་བ་ལས་རིང་པར་འགྱུར་བས་ན་དོན་དང་ལྡན་པའོ་ཞེས་པའི་བརྡར་གཉིད་སད་མ་ཐག་གོ །ཡང་རྨི་ལམ་དུ་རང་ཉིད་བྱ་རྒོད་དུ་བྱས་ནས་ནམ་མཁའ་ལ་འཕུར་ནས་ཕྱིན་པས་ཡ་ཟད་དུ་འཇའ་ཚོན་དུ་ཡལ་ནས་མཁའ་སྤྱོད་འགྲུབ་པ་ཡོད་བསམ་པ་ཡེ་མི་གསལ་བ་བྱུང་ངོ་། །སྣ་ལམ་དུ་གན་སྤོས་བཟང་པོ་སྣ་སྒོ་རང་ནས་འཐུལ་ཞིང་ཡོད་འདྲ་ཡུན་རིང་དུ་དངོས་སུ་བྱུང་ངོ། །གྲུབ་ཆེན་ཨོ་རྒྱན་པའི་རྣམ་ཐར་བལྟས་པའི་ནུབ་མོ་རྨི་ལམ་དུ་རང་ཉིད་ཨོ་རྒྱན་པའི་སྐྱེ་བ་ཡིན་པ་དྲན། ཨོ་རྒྱན་པ་དེ་ཨིནྜ་བོ་དྷི་དང་། ལྭ་བ་པ་དང་། ནག་པོ་སྤྱོད་པ་སོགས་ཡིན་པ་ཡིད་ལ་ཤར། དེ་ནས་བུ་མོ་གཞོན་ནུ་རལ་པ་བཤེན་པོ་སྐེད་པ་ཙམ་ལ་སླེབས་པ་ཤིན་ཏུ་མཛེས་མ་གཅིག་བདག་གི་རྩར་བྱུང་ནས། ཁོ་མོ་སྔར་ཨོ་རྒྱན་པའི་རོགས་སམ་གཡོག་ཡིན་ཟེར་ཞིང་། ཁྱོད་རང་ཨོ་རྒྱན་པའི་སྐྱེ་བ་ཡིན་ཟེར་ཞིང་དགའ་དགའ་བྱེད་ནས་རང་གི་རྩ་ན་འདུག་པ་རྨིས། ཚེས་བཅུའི་མཆོད་པ་གཅིག་བྱས་པའི་ནུབ་མོ་རྨི་ལམ་དུ། མཁའ་འགྲོ་མ་ཡིན་རྒྱུར་འདུག་སྟེ་ཡེ་གསལ་བོར་མཐོང་རྒྱུ་མེད་པས། འདི་སྐད་དུ། རྒྱ་གར་བྲམ་ཟེ་ས་ར་ཧ་དང་། ཨིནྜ་བྷོ་དྷི་བིར་ཝ་པ་རྣམས་ཀྱི་མདུན་ནས་བྱིན་གྱིས་བརླབས་པའི་ཚོགས་འཁོར་རྒྱུ་ཡིན་ཟེར་ནས་མི་རོ་གཅིག་འདུག་པ་འདི་ལ་ཚོགས་འཁོར་གྱིས་ཟེར་ནས་བྱུང་བས། ང་རང་ཡང་འདི་ལ་ཚོགས་འཁོར་བྱེད་བདུད་རྩིར་བྱིན་གྱིས་བརླབ་བསམ་ཞིང་ཡོད་ཙ་ན་འཁྲུལ་པ་འགའ་བྱུང་། ཡང་རྨི་ལམ་དུ་སྔར་ཨོ་རྒྱན་པས་རྨི་ལམ་བཟུང་བདེ་བ་ཅན་དུ་སོང་བས་ལམ་དུ་དེ་དུས་ཀྱི་བླ་མ་དེ་ཡང་བྱུང་ནས་བྱིན་བརླབས་མཛད་སྣང་། དེ་ནས་བདེ་བ་ཅན་དུ་ཕྱིན་ནས་ཐམས་ཅད་མཐོང་སྣང་དང་། ཡིད་དམ་རྨི་ལམ་དུ་ཡུལ་ཤིན་ཏུ་བདེ་བ་རྒྱ་ཆེ་བ་ཉམས་དགའ་བ་ཞིག་མཐོང་ཞིང་། དེ་དུས་བདེ་བ་ཅན་གྱི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་མཐོང་ནས་ཉམས་འགའ་ཡལ་ལེ་ཡོད་པ་སོགས་རྨིས། དེ་ནས་རང་ཉིད་ཀྱི་འཁོར་དུ་ཁྲོམ་མང་པོ་ཡོད་པ་ཐམས་ཅད་རྣལ་འབྱོར་མའི་ཁྲོམ་ཆེན་པོ་གཅིག་ཏུ་གྱུར་ནས་རང་དེའི་དབུས་སུ་ཉམས་སྣང་མཐོན་པོའི་ངང་ནས་འགུར་དང་སེམས་ཀྱི་གདེང་ཡོད་ལུགས་སོགས་སྨྲས་པ་ཡེ་མི་གསལ་ཙམ་བྱུང་། དེའི་ཕྱིར་ནུབ་སྔར་བཞིན་རང་ཉིད་མཁའ་འགྲོའི་ཁྲོམ་ཆེན་པོའི་དཀྱིལ་ན་འདུག་ཅིང་ཐམས་ཅད་ནམ་མཁའི་བར་སྣང་ལ་ཡོད་པ་འདྲ་བ་གཅིག་འདུག །ཕར་བལྟས་ཙ་ན་རྣལ་འབྱོར་པ་སྐུ་མདོག་ནག་པོ་གཟི་བརྗིད་ཅན་ཕྱག་གཡས་པས་ཡར་སྐུ་ལུས་ཀྱི་རྒྱུད་དུ་མདའ་གཅིག་འཛིན་ནས་འདུག་པ་འདི་ས་ར་ཧ་ཡིན་སྔར་ཨོ་རྒྱན་པའི་བླ་མ་གོང་མ་གཅིག་ཡིན་བསམ་པ་རྨིས་སོ། །ཡང་ཁམས་ཅུང་ཟད་མ་བདེ་བའི་ནུབ་མོ་འཁྲུལ་པའི་རྨི་ལམ་ན་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ། བླ་མ་ཡི་དམ། ནམ་མཁར་སྤྲིན་གྱི་ཕུང་པོ་བཞིན་གཏིབས་ནས་བྱུང་སྣང་དང་། ཁྱད་པར་དུ་བཀའ་བརྒྱུད་རྣམས་དང་དུས་མཁྱེན་སོགས་ཀརྨ་པ་ན་རིམ་རྣམས་བྱོན་ནས་སྡོམ་པ་བྱིན་བརླབས་མཛད་སྣང་བྱུང་ཞིང་ཉམས་དགའ་ཡལ་ཡལ་དུ་འདུག དེ་རྣམས་ཀྱི་སྐུ་མདོག་ཆ་ལུགས་སོགས་ནི་འདི་འདྲ་ཞེས་ཏིག་ཏིག་གསལ་པོ་ནི་ཕྱིར་ནང་གཉིད་སད་དུས་མ་དྲན་ནོ། །ཡང་སྔར་བདག་རས་ཆུང་པ་ཡིན་སྣང་འདུག་ཅིང་མི་ལ་སོགས་ཀྱང་ཅུང་ཟད་དྲན་པ་དང་། དྭགས་པོ་དང་དྭགས་པོའི་སློབ་མ་བརྒྱུད་འཛིན་འགའ་ཞིག་འདི་དང་འདི་ཡིན་རབ་འགའ་དྲན་པ་དང་། གཞན་འགའ་ལ་བཤད་པ་དང་། སེམས་ཅན་དང་ཁྱི་འགའ་འདུག་པ་སྔར་རས་ཆུང་དུས་འདི་རྣམས་ཀྱི་སྐྱེ་གནས་འདི་ཡིན་སོགས་ཀྱང་དྲན་སྣང་དང་། རང་ཡར་ཁང་སྟེང་འདྲ་བ་གཅིག་ལ་རྫུ་འཕྲུལ་གྱིས་སོང་བས་དེར་བླ་མ་མི་ལ་ཡིན་ནམ་སྙམ་པ་གཅིག་གིས། བུས་ཕ་ངོ་ཤེས་ན་པང་དུ་ཤོག ཞེས་མགུར་མཛད་པ་སོགས་ཉབ་ཉོབ་དེ་འདྲ་འགའ་ཡང་རྨིས་སོ། དངོས་སུ་ཕལ་ཆེར་རྒྱའི་གན་སྤོས་ཞིམ་པོའི་དྲི་འཐུལ་བའམ་དྲི་བཟང་ལ་ཞིམ་པོ་འཐུལ་བ་སོགས་དུས་ཕར་ཆེར་བྱུང་ངོ་། །ཡང་རྨི་ལམ་དུ་རང་གི་སྤྱི་གཙུག་ཏུ་བླ་མ་རྡོ་རྗེ་འཆང་ཡབ་ཡུམ་དུ་གསལ་བཏབ་ནས། ཡབ་ཡུམ་གྱི་སྦྱོར་མཚམས་ནས་བྱང་སེམས་ཀྱི་བདུད་རྩིའི་རྒྱུན་བབས་ནས་རང་གི་རྩ་འཁོར་ལྔ་དང་ལུས་ཐམས་ཅད་ལྟེམ་གྱིས་གང་བའི་དམིགས་པ་བྱས་པས་མངོན་དུ་འགྱུར་བ་བཞིན་བྱུང་ངོ་། །ཡང་རྨི་ལམ་བཟུང་ནས་བསྡད་པས་ཉི་ཟླའི་སྟེང་དུ་ཡང་ནས་ཡང་དུ་འདུག་པ་ཡང་རྨིས་པ་དང་། འཕགས་པ་སྤྱན་རས་གཟིགས་དང་། པཎ་ཆེན་ནཱ་རོ་པ། གྲུབ་ཐོབ་ཁྱུང་པོ་རྣལ་འབྱོར་དང་གཞན་ཡང་གྲུབ་ཐོབ་ཉིས་བརྒྱ་ཙམ་གྲལ་གྱི་རྣམ་པར་བཞུགས་འདུག་པ་གསལ་པོ་གཅིག་བྱུང་ཡང་། སྐུ་མདོག་ཆ་ལུགས་སོགས་ནི་གསལ་པོ་རང་མ་བྱུང་སྟེ་སྒྲིབ་པ་ཆེ་བའི་དོན་ཡིན་པར་འདུག །བདེ་མཆོག་གི་འཁོར་ལྷ་མོ་ཉི་ཤུ་རྩ་ལྔ་ཐམ་པ་རང་གི་ཕན་ཚུན་དུ་ཡོད་སྣང་བྱུང་ནས། དེ་རྣམས་ཀྱི་རྒྱན་ཆ་ལུགས་རྣམས་ལ་བལྟ་ཡག་གཅིག་བྱེད་བསམ་ཡང་བལྟས་པས་གསལ་པོར་མངོན་སུམ་ལྟ་བུར་མཐོང་རྒྱུ་མ་བྱུང་། སྡིག་པ་ཆེ་བའི་དོན་རེད། ༈ ཡང་ནུབ་གཅིག་རྨི་ལམ་དུ་སངས་རྒྱས་གཅིག་བཞུགས་པ་ཡར་བྱོན་སོང་། དེའི་མལ་དུ་སངས་རྒྱས་རྣམ་པར་སྣང་མཛད་བྱོན་བྱུང་ནས་བཞུགས་ཏེ་འཁོར་མང་པོ་ལ་ཆོས་ཀྱང་གསུངས་ཤིང་། ང་ནི་བུད་མེད་ཡོད་སར་འགྲོ་བ་མ་ཡིན་ནོ་གསུངས་བྱུང་བ་རང་གཞན་མང་པོས་ཐོས་སྣང་བྱུང་། དེ་ཡང་ཡར་བྱོན་ཐལ། ཡང་དེའི་མལ་དུ་སངས་རྒྱས་བྱམས་པ་བཞུགས་ནས་འཁོར་རྣམས་ལ་ཆོས་གསུངས་པ་དང་། དེ་ཡར་བྱོན་ནས་སངས་རྒྱས་གཅིག་དེའི་མལ་དུ་བཞུགས་རྒྱུར་ཡོད་སྣང་བྱུང་ཞིང་། ཞིབ་ཞིབ་ནི་ཡེ་མ་དྲན་ནོ། ། ༈ ཡང་བླ་མའམ་སངས་རྒྱས་ཤཱཀ་ཐུབ་ཡིན་ནམ་སྙམ་པའི་སྐུ་ནི་ཡེ་མི་གསལ་ཞིང་། གསུང་གསལ་པོ་གཅིག་གིས་ཡེ་ནས་མངོན་པར་སངས་རྒྱས་ཚུལ་དང་། སེམས་ཅན་མང་པོ་བྱུང་ཆུབ་མཆོག་ཏུ་བཀོད་ནས། བྱང་ཆུབ་སེམས་དཔའ་མང་པོ་སངས་རྒྱས་སུ་ལུང་བསྟན་པ་ལ་སོགས་པའི་ཆོས་ཀྱི་རྣམ་གྲངས་ཆེས་མང་པོ་མཚན་རིང་དུ་རྨི་ལམ་ཐོས་སྣང་བྱུང་བ་སྟེ། ཚིག་ཕལ་ཆེར་དྲན་ཡང་འབྲི་དོན་མེད་པས་མ་དྲིས་སོ། ། ༈ ཡང་ནུབ་གཅིག་རྨི་ལམ་དུ་མེ་ཆ་གཅིག་རང་གིས་ལག་ཏུ་འདུག་པས། མེ་བརྡབ་ཙ་ན་སྤྲ་བ་མང་པོ་འགའ་ལ་མཆེད་ཤོར། དེ་བསད་བསམ་ནས་མཆིལ་མ་མང་པོ་བཏབ་ཅིང་ཐལ་ཅག་བརྡབ་ཀྱང་མེ་ཞི་མ་ནུས། དེ་ནས་དེའི་མོད་དེ་ལ་ཨོ་རྒྱན་བསམ་ཡས་ན་བཞུགས་དུས་ང་རང་གླང་ཆེན་དཔལ་གྱི་སེདྒེ་ཡིན་པར་འདུག་པ་དྲན། དེ་མ་ཐག་ཏུ་རང་མདུན་དུ་དེ་ཡིན་བསམ་པའི་བྱིས་པ་འདྲ་བ་འགའ་འདུག་པ་ལ། ང་ལྷ་སྲིན་བྲན་ཏུ་ཁོལ་བ་ཡིན་པས་འདི་ཚོ་ལ་མེ་ཞི་བའི་ལས་བཅོལ་དགོས་སྙམ་ནས་ཐལ་ཅག་འགའ་རྒྱབ་པས་བྱིས་པ་དེ་རྣམས་ངུས་ནས་མཆིལ་མ་མང་པོ་བྱུང་བས། དེས་མེ་མཆེད་པ་ཞི་ནས་ཡུ་མེད་པར་བྱས་པ་རྨིས། གླང་ཆེན་དཔལ་སེང་མིན་ཡང་དེ་ལ་རྟེན་འབྲེལ་གཅིག་འགྲིགས་པ་བྱུང་སྟེ། དེ་བར་ཆར་ཡེ་མ་བབས་པས་དེ་ནུབ་བམ་ཕྱིར་ནུབ་ནས་ཆར་འབེབས་པའི་འགོ་བཙུགས་ཏེ་ཆར་གྱི་རྒྱུན་ཡུན་རིང་དུ་བསམ་གྱིས་མི་ཁྱབ་པ་བབས་སོ། །ང་རང་གི་ཆར་འབོད་ཀྱི་ལས་དང་དམིགས་པ་ནི་ཅི་ཡང་བྱས་པ་མེད་ཀྱང་བླ་མ་ཚང་གི་ཆར་འབོད་ཅིང་ཡོད་པའི་རྟེན་འབྲེལ་ཨེ་ཡིན་བསམ། ཡིན་ཤས་ཡང་ཆུང་སྟེ་ཁྱོད་ཀྱིས་བློ་བཟོས་ཡིན་ནོ། །འཁྲུལ་པ་ལ་སྣ་ཚོགས་འོང་པ་དེ་གང་གི་རྟེན་འབྲེལ་གང་ལ་འགྲིགས་ཏེ་མཚར་འདོད་བྲིས་སོ། །
༈ ཡང་འཕགས་པ་ཀླུ་སྒྲུབ་དེ་བྱོན་ཅིང་གདའ་བ་མཐོང་ནས་དད་པ་དྲག་པོ་སྐྱེས་པ་ཡང་རྨིས། ༈ ལུས་ཅུང་ཟད་མ་བདེ་བའི་ཉམས་བྱུང་བའི་དུས་གཅིག་རྨི་ལམ་མམ་འཁྲུལ་སྣང་གང་ཡིན་མི་ཕྱེད་པའི་གནམ་ས་ཁ་སྟེང་ལ་ལོག་པ་སོགས་ཐོག་གི་ཆར་བབ་པ་བཅས་ཆོ་འཕྲུལ་ཤིན་ཏུ་འཇིགས་པ་འགའ་ཡང་བྱུང་ངོ་། །དེ་དུས་ནི་འཇིགས་ཞུམ་པ་རེ་བྱུང་ཡང་འདི་རྣམས་ང་ཡི་སེམས་ཡིན་སྙམ་ཏེ་དྲན་པའི་ངང་ལ་བཞག་པ་ཙམ་གྱི་བདེ་ཆེམ་ཆེམ་བྱུང་། ༈ སྤྲེལ་ཟླའི་ཚེས་བཅུའི་ནུབ་ཟླ་བ་ལ་ཁ་དོག་ལྔ་ལྡན་གྱི་འཇའ་ཡི་གུར་ཕུབ་པ་མཐོང་བ་དང་། གཞན་ཡང་དུས་ཕལ་ཆེར་དུ་ཉི་ཟླ་ཤར་བ། རྒྱན་གོས་གཟབ་པ་ལ་སོགས་ཀྱི་བཟང་རྟགས་ཙམ་པ་ནི་མང་དུ་བྱུང་ཡང་མ་བྲིས། རྟགས་ལྔ་ལ་སོགས་ཕལ་ཆེར་དུ་བྱུང་། འགའ་ཞིག་གིས་རྩ་བཟང་བའི་དོན་ཡིན་པ་ཡང་བཞེད་གདའ། སྐྱོ་ཤས་ངེས་འབྱུང་དད་པ་དག་སྣང་སོགས་ཀྱི་ཉམས་སྣང་རྒྱུན་དུ་བྱུང་བ་ཡིན་ནོ། །དེ་ལྟར་ལོ་བསྐོར་གཅིག་པོའི་དགུན་ཟླ་གསུམ་ལ་རླུང་ལ་བརྩོན་པར་བྱས་པས་བསྙེན་པ་ཆེར་མ་ཐོན། དེ་མིན་བསྙེན་པ་ཁོ་ན་ལ་འབད་པས་ལོ་གཅིག་ལ་བྱེ་བ་ས་ཡ་འགྲུབ་བོ། །