རྒོད་ཚང་སྤྲུལ་སྐུ་ནས་གྲུབ་ཐོབ་པདྨ་རིག་འཛིན་ལ་ཕུལ་བའི་ཡིག་ལན།།
གྲངས་མེད་བསྐལ་བའི་གོང་རོལ་ནས། ཚོགས་གཉིས་ཀྱི་བྲེ་ཁ་ལེགས་ཁེངས་ཤིང་། །ཐོས་བསམ་དང་སྒོམ་སྒྲུབ་མཐའ་དག་ལ། དབང་འབྱོར་གྱི་འབྲས་བུས་ཕྱུག་པ་ཁྱེད། །ཟབ་རྒྱས་ཀྱི་བཀའ་མཆིད་ཡི་གེའི་ཕྲེང་། །སྨིན་འབྱོར་གྱི་འགག་དོན་ལྟར་གསལ་པའི། །བདག་ཆུང་ནས་སྐྱེ་བའི་མིང་གིས་བསླུས། །དགོན་ཆུང་གི་ལྟོ་ཚོལ་ངང་ལ་ཟད། སློབ་གཉེར་སྒོམ་སྒྲུབ་མ་བྱས་པར། །བླ་ཟོལ་གྱི་སྲོལ་ལ་མི་ཚེ་ཟད། །དཀར་ནག་གི་ཉེས་དམིགས་ཤེས་ཙམ་ནས། དབེན་མཚམས་དྲིལ་ཞིང་འཇིག་རྟེན་གྱི། །རྣམ་གཡེང་ལ་འཛེམ་ཁུལ་ཙམ་ཞིག་ལས། །གཞན་དོན་དང་བསྟན་ལ་ཕན་ངེས་ཀྱི། ནུས་སྟོབས་དང་ཡོན་ཏན་ལྡན་མཁན་མིན། གྲགས་སྐམ་དང་ཅལ་སྒྲོགས་འགའ་ཞིག་ལས། མཁས་གྲུབ་དང་རྣམ་འདྲེན་གྱི་དྲི་ཙམ་མེད། འབྱུང་འདུས་ལ་ནད་མང་གི་འདུ་བས་མནར། བགྲང་ལོ་དང་རྒས་པའི་ལྕིད་ཀྱིས་ནོན། མལ་ནང་དུ་འཆི་ཁའི་བསམ་བློ་ལས། རྣམ་མང་གི་བློ་རྒྱ་མ་མཆིས་ཤིང་། ཚེ་འདི་ལས་གཞན་པའི་སྐྱེ་བ་ཡང་། དུས་ངན་གྱི་བླ་གཟུགས་མི་སྐྱེ་བའི། སྨོན་ལམ་དེ་སྙིང་ནས་འདེབས་བཞིན་ལགས། ཁྱེད་ཟབ་དོན་གྱི་ཉམས་བཞེས་མཐར་ཕྱིན་ནས། གྲུབ་ཐོབ་ཀྱི་གདན་ས་སྙེགས་པ་ལ། འདི་འདྲ་ཡི་སྙན་འབུལ་མ་དགོས་ཀྱང་། ཚད་ཕེབས་དེ་ཟད་སྐྱེལ་མཛད་ནས། རྩོལ་མེད་ཀྱི་གཞན་དོན་མཁའ་ཁྱབ་ཞུ། །