རིག་འཛིན་འཇིགས་མེད་གླིང་པ་ལ་བརྟེན་པའི་བླ་མའི་རྣལ་འབྱོར་ཟབ་རྒྱ་ཅན་བཞུགས་སོ།།
ཨེ་མ་ཧོ། དད་དང་ངེས་འབྱུང་བྱང་སེམས་ལྡན། །ཤེས་རབ་བརྩོན་འགྲུས་ཆེ་བ་ཡིས། །ཚེ་འདིར་གྲོལ་བ་དོན་གཉེར་རྣམས། །ཟབ་ལམ་བླ་མའི་རྣལ་འབྱོར་བསྒོམ། །བདེ་བའི་སྟན་ལ་ལུས་གནད་བསྲང་། །རླུང་རོ་བསལ་ཞིང་ཐ་མལ་གྱི། །རྣམ་པར་རྟོག་པའི་རྒྱུན་བཅད་ནས། །བླ་མར་མོས་གུས་ཤུགས་དྲག་བསྐྱེད། །ཧོཿརང་སྣང་དག་པའི་མདུན་གྱི་མཁར། །འཇའ་སྤྲིན་འོད་ཀྱི་གུར་ཁྱིམ་དབུས། །ཆུ་སྐྱེས་ཉི་ཟླའི་གདན་གྱི་སྟེང་། །ཁྱབ་བདག་གདོད་མའི་མགོན་པོ་དང་། །དབྱེར་མེད་རིག་འཛིན་འཇིགས་མེད་གླིང་། །སྐུ་མདོག་དཀར་དམར་ཞི་འཛུམ་ཉམས། །མཐོན་མཐིང་དབུ་སྐྲའི་ཐོར་ཚུགས་རྩེར། །ཟབ་མོའི་རྒྱུད་ཀྱི་གླེགས་བམ་འཆང་། །དར་དཀར་དྲི་མེད་གསང་གོས་སྟེང་། །རིང་འགག་སྔོན་པོ་དར་ཤམ་དཀར། །དགུ་ལྡན་རྩ་བརྒྱུད་བླ་མ་རྣམས། །མདུན་གྱི་ནམ་མཁར་ཚོགས་ཞིང་བསྐྱེད། །ཕྱག་འཚལ་མཆོད་པ་ཀུན་གྱིས་མཆོད། །སྒོ་གསུམ་ཉེས་བསགས་མཐོལ་ལོ་བཤགས། །དུས་གསུམ་དོན་མཛད་རྗེས་ཡི་རང་། །འཁོར་བ་དོང་སྤྲུག་ཆོས་འཁོར་བསྐོར། །མྱ་ངན་མི་འདའ་བཞུགས་གསོལ་འདེབས། །དགེ་ཚོགས་ཀུན་ལ་དམ་པ་གསུམ། །བསྔོ་བས་འབྲེལ་ཐོགས་སེམས་ཅན་ཀུན། །རྣམ་མཁྱེན་རྫོགས་བྱང་ཐོབ་པར་ཤོག །བགེགས་བཀྲད་ནི། ཧཱུྃ། འདོད་ཡོན་ཀུན་ཚང་ཏིང་ངེ་འཛིན། །སྔགས་དང་ཕྱག་རྒྱས་བྱིན་བརླབས་པའི། །གཏོར་མ་འདྲེ་བགེགས་རྣམས་ལ་བསྔོ། །བསྙེན་སྒྲུབ་བར་ཆད་མེད་པ་ཡིས། །གནས་འདི་བདེ་ཆེན་ཞིང་དུ་བསྒྱུར། །ཨོྃ་སུམྦྷ་ནི་སོགས། ཧཱུྃ་བཞིའི་སྔགས་བརྗོད་སྤོས་རོལ་དྲག་ཏུ་བྱ། ཧཱུྃ། སྣང་སྲིད་རྣམ་དག་དཀྱིལ་འཁོར་འདིར། །ཡེ་ཤེས་རོལ་པ་ལྷ་ཡི་གང་། །རྡོ་རྗེ་འཁོར་ལོ་མཚོན་ཆ་མེའི། །གུར་ཕུབ་རླུང་ཡང་རྒྱུ་མི་ནུས། །གནོད་བྱེད་བགེགས་ཀྱི་གླགས་མི་རྙེད། །དྷརྨ་དྷརྟུ་བཛྲ་རཀྴ་རཀྴ་ཡེ་སྭ་ཧཱ། མཆོད་པ་བྱིན་བརླབ་ནི། ཨོྃ་ཨཱཿཧཱུྃ། ཀ་དག་བདེ་བ་ཆེན་པོའི་གཞོང་པ་རུ། །དྲན་རིག་ཡིད་བཞིན་ནོར་བུའི་མཆོད་པས་ཁེངས། །ལྷུན་གྲུབ་གསང་བ་ཆེན་པོའི་ལྷ་ཚོགས་རྣམས། །སྐུ་གསུམ་ཀློང་དུ་དགྱེས་པའི་རྫས་སུ་གྱུར། །ཨོྃ་བཛྲ་ཨརྒྷཾ་པདྱཾ་ནུཥྤེ་དྷུ་པྤེ་ཨཱ་ལོ་ཀེ་གྷནྒྷེ་ནེ་ཝིདྱ་ཤབྟ་མ་ཧ་པཉྩ་རཀྟ་བ་ལིཾ་ཏ་མ་ཧ་སུ་ཁ་པཱུཛ་ཧོཿ དངོས་གཞི་ལྷ་བསྐྱེད་པ་ནི། ཧཱུྃ། སྟོང་གསལ་སྲིད་ཞིའི་ཁམས་ཀུན་ཡུལ་ལྔའི་ཀློང་། །རྣམ་ཐར་སྒོ་གསུམ་བདེ་ཆེན་གཞལ་ཡས་དབུས། །རང་སྣང་བདེ་ཆེན་པདྨ་འོད་ཀྱི་ཞིང་། །ཉམས་དགའ་ཡིད་འོང་རྒྱན་བཀོད་ཕུན་སུམ་ཚོགས། །ཡེ་ཤེས་ལྔ་ལྡན་ཕོ་བྲང་རྒྱ་ཆེའི་འབུས། །ཐབས་ཤེས་པདྨ་ཉི་ཟླའི་གདན་གྱི་སྟེང་། །རྩ་བའི་བླ་མ་བདེ་གཤེགས་འདུས་པའི་སྐུ། །མཚན་དང་དཔེ་བྱད་ཆ་ལུགས་པདྨ་འབྱུང་། །སྡོམ་གསུམ་ཡོངས་སུ་རྫོགས་པའི་བརྡ་རྟགས་དང་། །གསང་སྔགས་ཐེག་པ་ཆེན་པོའི་འཁོར་ལོས་བསྒྱུར། །རྒྱལ་པོའི་ཆས་རྣམས་ཡོངས་རྫོགས་ཟབ་བེར་མཐིང་། །འདུང་མ་ཟ་ཧོར་རཱ་ཛའི་ཆས་རྣམས་རྫོགས། །དབུ་ཞྭ་པདྨ་མཐོང་གྲོལ་འདབ་བཞིའི་རྩེར། །ལྟ་བ་ཡས་འབེབ་རྒོད་ཀྱི་ལྡེམ་འཕྲུ་མཛེས། །ཕྱག་གཡས་ཆོས་ཉིད་མི་འགྱུར་བརྡ་རྟགས་ཀྱི། །གསེར་གྱི་རྡོ་རྗེ་རྩེ་ལྔ་ཐུགས་ཀར་འཛིན། །གཡོན་པས་བྷནྡྷ་ཚེ་བུམ་བདུད་རྩིས་བཀང་། །དགེ་སློང་རྡོ་རྗེ་འཛིན་པའི་ཆོས་གོས་གསོལ། །གན་དར་ལྗང་གུའི་སྐུ་ཆིངས་འཁོར་གཅིག་དཀྲིས། །བེར་ཕྱམས་དམར་སྨུག་གསེར་གྱི་ཧ་རིས་བཀྲ། །ཕྱིར་གསོལ་སྣང་སྲིད་ཟིལ་གནོན་རྣལ་འབྱོར་ཆས། །ཞབས་གཉིས་མཉམ་ཉིད་རྡོ་རྗེའི་སྐྱིལ་མོ་ཀྲུང་། །རྫུ་འཕྲུལ་རླུང་གིས་བཏེགས་པས་རེག་ཐོགས་མེད། །ནམ་མཁར་སྤྲིན་དང་འཇའ་འོད་རྒྱུ་སྐར་དབུས། །འོད་ཟེར་བརྒྱ་སྟོང་ཉིད་ཟླའི་གཟི་བརྗིད་འབར། །འཁྲུལ་སྣང་འཁོར་བའི་སྨག་རུམ་མུན་པ་སེལ། །གནས་གསུམ་ཨོྃ་དཀར་ཨཱ་དམར་ཧཱུྃ་མཐིང་བཀྲ། །འོད་ཟེར་སྤོས་རིང་དུད་པ་ཕྱུར་བ་ལྟར། །སྐུ་གསུམ་ཞིང་གི་ལྷ་ཚོགས་ཐུགས་རྒྱུད་བསྐུལ། །སྤྱན་འདྲེན་པ་ནི། ཧཱུྃ། ཡེ་ཤེས་ལྔ་ལྡན་བདེ་ཆེན་དག་པའི་ཞིང་། །དྲི་མེད་ཤེལ་ལ་ཉི་ཟེར་འཁྱུད་པ་བཞིན། །སྐུ་གསུམ་ཕྱོགས་བཅུའི་རྒྱས་བ་སྲས་དང་བཅས། །རང་སྣང་པདྨ་འོད་ཀྱི་ཞིང་དུ་འདུས། །ཙིཏྟ་དམར་པོ་ཟངས་མདོག་དཔལ་གྱི་རི། །རྣམ་ཤེས་ཚོགས་བརྒྱད་སྲིན་པོའི་གྲོང་ཁྱེར་བཀྲ། །དྲན་རིག་མ་ཧཱ་གུ་རུ་སྐུར་བཞེངས་ཤིག །ཨོྃ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་་བཛྲ་ས་མ་ཡ་ཛ་སིདྡྷི་ཕཱ་ལ་ཧཱུྃ། ཨེ་ཨ་ར་ལི་ཧྲིཾ་ཧྲིཾ་ཕེཾ་ཕེཾ་ཛ་ཛཿ བཞུགས་སུ་གསོལ་བ་ནི། ཧཱུྃ། སྒྱུ་འཕྲུལ་ཟག་བྲལ་རྡོ་རྗེ་ལུས་ཀྱི་སྦུབས། །འོད་ཀྱི་རྩ་དང་ཡེ་ཤེས་རླུང་ལྔའི་ཞིང་། །དམ་ཡེ་དབྱེར་མེད་བཞུགས་པའི་དཀྱིལ་འཁོར་ལ། །དག་པ་གསུམ་གྱི་ལུས་འབུལ་ཕྱག་གིས་འདུད། །ཨ་ཏི་པུ་ཧོཿཔྲ་ཏི་ཙྪ་ཧོཿ མཆོད་པ་ནི། ཧཱུྃ། རབ་འབྱམས་སྲིད་ཞིའི་ཁྱོན་རྣམས་ཡོངས་ཁེངས་པའི། །འདོད་ཡོན་ལྔ་ལྡན་ཟག་མེད་བདུད་རྩིའི་སྤྲིན། །ནམ་མཁའ་མཛོད་ཀྱི་སྒོ་འཕར་ཡོངས་ཕྱེ་སྟེ། །འབུལ་གྱིས་བཞེས་ལ་མཆོག་ཐུན་དངོས་གྲུབ་སྩོལ། ཨོྃ་བཛྲ་ཨརྒྷཾ་ནས་པདྱཾ་ནུཥྤེ་དྷུ་པྤེ་ཨཱ་ལོ་ཀེ་གྷནྒྷེ་ནེ་ཝིདྱ་ཤབྟ་མ་ཧཱ་སུ་ཁཱ་པུ་ཙྪ་ཧོཿབསྟོད་པ་ནི། ཧྲཱིཿམ་བཅོས་སྤྲོས་བྲལ་བླ་མ་ཆོས་ཀྱི་སྐུ། །བདེ་ཆེན་ལོངས་སྤྱོད་བླ་མ་ཆོས་ཀྱི་རྗེ། །པད་སྡོང་ལས་འཁྲུངས་བླ་མ་སྤྲུལ་པའི་སྐུ། །སྐུ་གསུམ་རྡོ་རྗེ་འཆང་ལ་ཕྱག་འཚལ་བསྟོད། །འགྲོ་བ་རིགས་དྲུག་སེམས་ཅན་འདྲེན་པའི་ཕྱིར། །མདོ་སྔགས་ཐུབ་པ་དྲུག་དང་གཟུགས་སྐུའི་ཚུལ། །བཟོ་དང་སྐྱེ་བ་མཆོག་གི་སྤྲུལ་པའི་སྐུ། །སྟོབས་བཅུ་མི་འཇིགས་རྣམ་བཞིའི་རྫོགས་སངས་རྒྱས། །བདེ་གཤེགས་དོན་ཀུན་འགྲུབ་དང་པདྨ་འབྱུང་། །རྗེ་བཙུན་སྒྲོལ་མ་ཉེ་བའི་སྲས་ཆེན་བརྒྱུད། །ཡེ་ཤེས་འཇིག་རྟེན་སྣ་ཚོགས་སྤྲུལ་པ་ཡིས། །སྒྱུ་འཕྲུལ་དཀྱིལ་འཁོར་ཡོངས་རྫོགས་ཕྱག་འཚལ་བསྟོད། །འཛབ་དམིགས་ནི། །རང་ཉིད་པད་འབྱུང་གུ་རུ་གསལ་བ་ཡིས། །ཐུགས་ཀྱི་ཙིཏྟ་དྭངས་ཤེལ་ནོར་བུའི་དབྱིབས། །ལྟེ་བར་ཧྲཱིཿདཀར་བཀྲ་བའི་མཐར་བསྐོར་དུ། །མ་རེག་ཙམ་ལས་མཐའ་བསྐོར་སྔགས་འཕྲེང་འཁོར། །འོད་ཟེར་སྤྲོ་བསྡུས་དོན་གཉིས་ལྷུན་གྲུབ་གྱུར། །ཨོཾ་ཨཱཿ་ཧཱུྃ་བཛྲ་གུ་རུ་པདྨ་སིདྡྷི་ཧཱུྃ། །བསྒྲུབ་སྔགས་ནི། ཨོྃ་ཨཱཿཧཱུྃ་བཛྲ་གུ་རུ་པདྨ་ཐོད་འཕྲེང་རྩལ་བཛྲ་ས་མ་ཡ་ཛ་སིདྡྷི་ཕཱ་ལ་ཧཱུྃ། རང་གི་བླ་མའི་བསྙེན་སྔགས་ནི། །ཨོྃ་ཨཱཿཧཱུྃ་བཛྲ་མ་ཧ་གུ་རུ་སིནྡྷ་ཀ་ཎིརྨ་ཀཱ་ཡ་ཝཱཀྐ་ཙིཏྟ་སརྦ་སིདྡྷི་ཕཱ་ལ་ཧཱུྃ། །མཆོད་བསྟོད་སྤྱི་ཁྱབ་ལྟར་བྱ། །གྲངས་དང་རྟགས་ཀྱི་བསྙེན་སྒྲུབ་རྫོགས་པའི་ཚེ། །སྐབས་སུ་དྲག་པོ་ཧཱུྃ་གི་སྣང་གླུ་ལེན། །ཧཱུྃ་གྲངས་མང་བརྗོད། རྗེས་ལ། བསོད་ནམས་ཚོགས་གཉིས་རྫོགས་པའི་བརྡ་རྟགས་ཕྱིར། །གཟུགས་སྒྲ་དྲི་རོ་རེག་བྱ་ལ་སོགས་པའི། །འདོད་ཡོན་ཅི་འབྱོར་བཟའ་བཏུང་མཆོད་པ་བཤམས། །ཧཱུྃ། བདག་ཉིད་རྩ་གསུམ་རྒྱལ་བ་ཡི། །ལྷུན་གྲུབ་བདེ་ཆེན་འོད་ལྔ་འཕྲོས། །རྟོག་འཛིན་ཚོགས་ཀྱི་ཡོ་བྱད་སྦྱངས། །ཡེ་ཤེས་འོད་ལྔ་ལྷུན་གྱིས་གྲུབ། །རྃ་ཡྃ་ཁྃ། ཨོཾ་ཨཱཿཧཱུྃ། ཚོགས་ཕུད་འབུལ་བ་ནི། ཧཱུྃ། ཀུན་བཟང་འོད་ལྔའི་ལྷ་ཚོགས་ལ། །ཀུན་ཏུ་བཟང་པོའི་རྣམ་སྤྲུལ་གྱིས། །ཀུན་བཟང་མཆོད་སྤྲིན་རྒྱ་མཚོའི་ཚོགས། །ཀུན་ཏུ་དགྱེས་པའི་མདངས་ཀྱིས་བཞེས། །མ་ཧཱ་གྷ་ན་ཙཀྲ་པཱུ་ཙ་ཧོཿ དེ་ནས་བསྐང་བ་ནི། ཧོཿབདག་དང་མཐའ་ཡས་སེམས་ཅན་རྣམས། །ཡེ་ནས་སངས་རྒྱས་ཡིན་པ་ལ། །ཡིན་པར་ཤེས་པས་ཐུགས་དམ་བསྐངས། །རྟགས་ཀྱི་དཀྱིལ་འཁོར་ཆེན་པོ་ཡང་། །དོན་གྱི་འོག་མིན་ཉིད་ཡིན་ཕྱིར། །དེ་ན་བཞུགས་པའི་ལྷ་ཚོགས་རྣམས། །ངང་གི་སེམས་སུ་ཤེས་པས་བསྐངས། །སེམས་ཉིད་ཨར་སྣང་ཆོས་ཀྱི་དབྱིངས། །བརྒྱད་ཁྲི་བཞི་སྟོང་ཟབ་དོན་འདུས། །མ་གཡོས་སྐྱེ་མེད་ཆོས་ཀྱི་སྐུ། །རྒྱལ་གསུང་ཀུན་འདུས་ཐུགས་དམ་བསྐངས། །རང་བྱུང་ཡེ་ཤེས་མངོན་བྱུང་སྐུ། །ཆོས་ཉིད་ཟད་པས་ཐུགས་དམ་བསྐངས། །བར་དོ་བཞི་སྦྱོར་རྒྱལ་བའི་སྐུ། །འགྱུ་འཁྲིགས་འོད་ལྔའི་ཐུགས་དམ་བསྐངས། ཧོཿབདག་སོགས་འདུས་བ་རྒྱ་མཚོ་དང་། །གསང་སྔགས་སྒོར་ཞུགས་ཐམས་ཅད་ཀྱི། །ཉམས་ཆགས་ཐམས་ཅད་བསྐང་གྱུར་ཅིག །རྟོག་སྒྲིབ་ཐམས་ཅད་བྱང་གྱུར་ཅིག །ལས་ངན་སྡིག་སྒྲིབ་དག་གྱུར་ཅིག །ཁམས་གསུམ་འཁོར་བ་སྟོང་གྱུར་ཅིག །འབྲས་བུ་སྐུ་གསུམ་ཐོབ་གྱུར་ཅིག །བསྐང་གྱུར་དབང་དང་དངོས་གྲུབ་སྩོལ། །བཤགས་པ་ནི། ཧཱུྃ། སེམས་ཅན་ཐ་མལ་ཉོན་མོངས་པའི། །དུག་ལྔའི་གདོན་གྱིས་་མྱོས་པ་ཡིས། །སྡོམ་གསུམ་དམ་ཚིག་ཉམས་ཆགས་རྣམས། །ཚོགས་ཀྱི་མཆོད་པས་བསྐངས་ཤིང་བཤགས། །ཚོགས་བསྒྲལ་ནི། ཨེཿ མ་རིག་གཉིས་འཛིན་གདོན་བགེགས་རྣམས། །གཉིས་མེད་ཡེ་ཤེས་མཚོན་གྱིས་གཏུབ། །རྣམ་ཤེས་ཆོས་དབྱིངས་ཀློང་དུ་ཕཊ། །གཟུགས་ཕུང་ཚོགས་ཀྱི་འཁོར་ལོར་རོལ། །རུ་ཏྲ་སརྦ་ཧ་ལ་པཉྩ་པཱུ་ཛ་ཁཱ་ཧི། །ལྷག་མ་ནི། ཨ་ཀ་རོ་དང་བཤུག་གླུ་ཕེམ་སྒྲ་དང་བཅས་པར་ལྷག་མ་ཁ་ཆུས་དྲན་ནས་བྱིན་གྱིས་རློབས། །ཧཱུྃ། ཐིག་ལེ་མི་འགྱུར་དཔལ་གྱི་ལྷ། །དབྱིངས་ལས་གཡོ་བ་མེད་མོད་ཀྱང་། །རྩལ་ལས་ཆོ་འཕྲུལ་གར་བསྒྱུར་ཞིང་། །དཔལ་གྱི་བཀའ་ཉན་རིག་རྩལ་རྣམས། །ཀ་དག་དབྱེར་མེད་ལྷག་མ་ལོང་། །ཟག་པ་ཟད་པའི་ཕྲིན་ལས་མཛོད། །མ་རིག་འཁྲུལ་སྣང་ལྷག་མ་བཞེས། །ཉམས་རྟོགས་གོང་འཕེལ་ཕྲིན་ལས་མཛོད། །འདོད་ཡོན་སྲིད་འཛིན་ལྷག་མ་བཞེས། །དམ་ཚིག་བསྲུང་བའི་ཕྲིན་ལས་མཛོད། །ཧྲཱིཿམ་ཧ་རི་ཎི་ས་ར་ཙ་ཧྲི་ཡན་ཤ་ལོ་ཀ་སརྦ་ས་མ་ཡ་ཨེ་དཾ་བྷ་ལིངྟ་ཁ་ཁ་ཁཱ་ཧི་ཁཱ་ཧི། བསྐུལ་བ་ནི། ཧཱུྃ་སྐུ་གསུམ་རྩ་གསུམ་རྒྱལ་བའི་ཚོགས། །མི་མངོན་དབྱིངས་ནས་ཐུགས་དམ་བསྐུལ། །དུས་ངན་སྙིགས་མའི་སེམས་ཅན་རྣམས། །འགོང་པོ་སྤུན་དགུའི་དབང་སོང་ཏེ། །ནད་མཚོན་མུ་གེའི་བསྐལ་པ་བསླེབ། །མི་འདོད་རྐྱེན་ངན་ཐོག་བབ་ཚེ། །གདུང་བའི་ང་རོས་ཁྱེད་འབོད་ན། །ཐུགས་རྗེས་གཟིགས་ཤིག་མཐུ་མ་ཆུང་། །མཛོད་ཅིག་ཕྲིན་ལས་རྣམ་བཞི་མཛོད། །བཟློག་ཅིག་གཉིས་འཛིན་རྣམ་རྟོག་བཟློག །བསྒྱུར་རོ་རྐྱེན་ངན་བར་ཆད་བསྒྱུར། །སྐྱེ་མེད་དབྱིངས་སུ་ཆ་ལ་ལ། །འགགས་མེད་ཀློང་དུ་ཁྲོ་ལོ་ལོ། །བྷྱོ་བྷྱོ་བཟློག་བཟློག་མ་ར་ཡ་རྦད། །ཆད་ཐོ་ནི། ཧཱུྃ། སྔོན་ཚེ་འོག་མིན་ཆོས་ཀྱི་དབྱིངས། །རྒྱ་ཆད་ཕྱོགས་བྲལ་ཞིང་ཁམས་སུ། །རང་བྱུང་སྟོན་པ་ཀུན་བཟང་གིས། ། ། །རིགས་ལྔ་ཞི་ཁྲོ་འཁོར་ཚོགས་ལ། །དགོང་བརྒྱུད་ཆོས་འཁོར་བསྐོར་བའི་ཚེ། །ཡེ་ཤེས་དབྱིངས་ཀྱི་སྲུང་མ་ཡིས། །ཕྲིན་ལས་བྱེད་པ་དམ་མནོས་ལྟར། །ཨོ་རྒྱན་རྗེས་འཇུག་དཔོན་སློབ་དང་། །བསྟན་པ་མཆོད་པའི་སྦྱིན་བདག་རྣམས། །མཐོ་མཐོ་དགོངས་ལ་རེག་པ་དང་། །དམའ་དམའ་བུ་བཞིན་སྐྱོང་བ་ཡིས། །རྒྱལ་བསྟན་ཕྲིན་ལས་རྣམ་བཞི་མཛོད། །བསྟན་མ་ནི། ཧཱུྃ། རྟེན་འབྲེལ་བཅུ་གཉིས་བསྟན་མའི་ཚོགས། །ནག་མོ་དམར་མོ་དཀར་མོ་འབུམ། །མཆོད་གཏོར་འདིར་བཞེས་བསྒྲུབ་པ་པོའི། །འཕྲིན་ལས་ཐོགས་མེད་འགྲུབ་པར་མཛོད། །ཙུཥྟི་ཊ་བྷ་ལིཾ་ཏ་ཁཱ་ཧི། རྟ་བྲོ་ནི། ཧཱུྃ། གསང་ཆེན་ལྷུན་གྲུབ་ཆོས་ཀྱི་དབྱིངས། །རྣམ་རྟོག་ཡིད་ཀྱི་རང་གཟུགས་འདྲེ། །ཡེངས་མེད་ཏིང་འཛིན་རྒྱལ་པོ་ངས། །འགྱུ་བྱེད་ཕྲ་རག་ཐམས་ཅད་ནོན། །ཧཱུྃ་ཧཱུྃ་ནན་ནན་སྟྭཾ་བྷ་ཡ་ནན། །དངོས་གྲུབ་ལེན་པ་ནི། ཧཱུྃ། རྡོ་རྗེའི་ཕུང་ཁམས་སྐྱེ་མཆེད་ལ། །རང་རིག་བྱང་ཆུབ་སེམས་ཀྱི་ལྷ། །དམིགས་མེད་རང་གསལ་འདུས་མ་བྱས། །རྒྱུ་རྐྱེན་ལས་འདས་ཞི་ཁྲོའི་སྐུ། །ཐོག་མཐའ་བར་མེད་སྤྲོས་དང་བྲལ། །སྟོང་གསལ་མཐའ་དབུས་ལས་འདས་པ། །ལྟ་བ་ཆོས་སྐུའི་དབང་ཐོབ་ཤོག །སེམས་ཉིད་གསལ་དག་ཉམས་སུ་མྱོང་། །རང་བཞིན་མི་གཡོ་སྤྲོས་དང་བྲལ། །རྣམ་རྟོག་མི་གཡོ་ཆོས་ཉིད་དང་། །སྒོམ་པ་ལོངས་སྐུའི་དབང་ཐོབ་ཤོག །སྤྱོད་པ་སྣང་བཞི་སྤྲོས་དང་བྲལ། །ཉི་ཟླའི་འོད་བཞིན་གསལ་འགྲིབ་མེད། །འགགས་མེད་སྟོངགཟུགས་འོད་དུ་གསལ། །སྤྱོད་པ་རྣམ་བཞིའི་དབང་ཐོབ་ཤོག །དུག་ལྔ་ཡེ་ཤེས་ཀློང་རྡོལ་བྲལ། །རྟོག་མེད་ངང་ལས་དགོས་འདོད་འབྱུང། །འབྲས་བུ་རིག་རྩལ་ལྷུན་གྱིས་གྲུབ། །དུས་གསུམ་སངས་རྒྱས་ཀུན་གྱི་དབང་། །ལྟ་སྒོམ་སྤྱོད་པའི་ངོ་བོ་རྫོགས། །འཕོ་ཆེན་འཇའ་ལུས་རྡོ་རྗེའི་སྐུ། །སྐད་ཅིག་ཉིད་དུ་འགྲུབ་པར་ཤོག །མ་རྟོགས་ཁམས་གསུམ་སེམས་ཅན་ལ། །རྩོལ་བྲལ་ཐུགས་རྗེ་སྣང་བའི་ཆ། །ཅིར་ཡང་ཐོགས་མེད་ལྷུན་གྲུབ་ནས། །འཁོར་བ་དོང་སྤྲུག་དབང་ཐོབ་ཤོག །དྷརྨ་ཀཱ་ཡ། སཾ་བྷོ་ཀཱ་ཡ། ནིརྨ་ཀཱ་ཡ། སརྦ་སིདྡྷི་ཨ་ལ་ལ་ཧོ། མཆོད་བསྟོད་སྤྱི་ལྟར་བྱ། བསྡུ་རིམ་ནི། ཨ། འོད་གསལ་ཐིག་ལེ་ཡུང་འབྲུ་ཙམ། །དཀར་གསལ་དྭངས་བ་འོད་ལྔས་བསྐོར། །རྒྱུན་དུ་མཉམ་བཞག་རྟག་ཆད་བྲལ། །སྙིང་ལ་གནས་པའི་ཡེ་ཤེས་སེམས། །སྟོང་གསལ་ནམ་མཁའ་འབར་བའི་དོན། །སྒོམ་མེད་བསྐྱོང་དུ་ཅི་ཡང་མེད། །དོན་གྱི་སངས་རྒྱས་སྐུ་རུ་ལྡང་། །བསྔོ་བ་ནི། ཧོ། རྒྱུ་འབྲས་ཐིག་ལེ་གཅིག་གི་ངང་། །སེམས་ཉིད་རང་བཞིན་ནམ་མཁའ་ལྟར། །བཅིང་གྲོལ་བྲི་གང་མེད་པ་ཡི། །ཀ་དག་ཁྱབ་གདལ་ཀློང་དུ་བསྔོ། །བཀྲ་ཤིས་ནི། ཧཱུྃ། རྟེན་འབྲེལ་ཆོས་ཀུན་མ་འགགས་པའི། །བྱས་དང་བྱེད་འགྱུར་ཆོས་སྐུའི་རྩལ། །འཁོར་བ་མིང་དུ་ཟད་པ་ཡིས། །འབྲེལ་ཚད་དོན་ལྡན་བཀྲ་ཤིས་ཤོག །རྣལ་འབྱོར་ནམ་མཁའ་ཆོས་དབྱིངས་ཀྱིས། །དད་མོས་འདུན་པ་མི་ལྡོག་ཙམ། །བཀའ་གཏེར་དག་སྣང་མང་མོད་ཀྱང་། །བླ་སྒྲུབ་ཉུང་ངུར་དྲིལ་བ་འདི། །ཨོ་རྒྱན་ཆེ་མཆོག་དེས་སྨྲས་པ། འཕྲལ་ཕུགས་དགེ་ལེགས་ཀུན་ཁྱབ་ཤོག །སརྦ་མངྒལཾ། །དགེའོ། །