འདོད་ཁམས་ལྷ་མོའི་མངའ་གསོལ་བཞུགས།།
འདོད་པའི་ཁམས་ཀྱི་དབང་ཕྱུག་འཕྲུལ། འབར་མ་ཆེན་མོར་གུས་པས་འདུད། ཨཱ། བརྗོད་བྲལ་ཀ་དག་ཆེན་པོའི་དབྱིངས་ཉིད་ལ། །ཕན་གནོད་ལྷ་འདྲེའི་ཀུན་རྟོག་རྣམ་དག་ཀྱང་། །རོལ་རྩལ་ཐུགས་རྗེའི་རྣམ་འཕྲུལ་བསྟན་སྲུང་ཚུལ། །རཀྵ་སྲིན་མོའི་གདོང་ཅན་དགོངས་སུ་གསོལ། །རྣལ་འབྱོར་དཔའ་བོ་མིང་པོས་འབོད་ལགས་ཀྱིས། །སྲིང་མོ་དམ་ཅན་ལྷ་མོ་ད་ཚུར་བྱོན། །ཇི་ལྟར་སྣང་བའི་འཁྲུལ་སྣང་སད་པའི་ཆོས། །ཆོས་ཉིད་རྩལ་ལས་ཤར་བའི་དངོས་འབྱོར་རྫས། །མཆོད་ཡོན་མེ་ཏོག་བདུག་སྤོས་མར་མེ་དང་། །ཞལ་ཟས་དྲི་ཆབ་སིལ་སྙན་རོལ་མོའི་སྒྲ། །གཟུགས་སྒྲ་དྲི་རོ་རེག་བྱ་འདོད་ཡོན་ཚོགས། །ལྷ་ཆེན་འཕྲུལ་དགའི་ལོངས་སྤྱོད་ཇི་བཞིན་པ། །ཡིད་སྤྲུལ་ཀུན་ཏུ་བཟང་པོའི་མཆོད་སྤྲིན་གྱིས། །ནམ་མཁའི་ཁམས་ཀུན་གང་བས་ཁྱོད་གསོལ་མཆོད། །ལྷ་མིའི་སྟོན་པར་མངའ་གསོལ་བཀྲ་ཤིས་པའི། །རྫས་བརྒྱད་དང་ནི་རྒྱལ་སྲིད་རིན་ཆེན་བདུན། །དཔའ་བོ་ཡབ་ཡུམ་ཟུང་འཇུག་མཉམ་སྦྱོར་བའི། །ཐབས་ཤེས་བདུད་རྩི་བདེ་སྟོང་སྣོད་དུ་བསྐྱིལ། །ཏ་ན་ག་ན་སྦྱོར་སྒྲོལ་རྨད་དུ་བྱུང་། །སྨྲ་བསམ་བརྗོད་འདས་ཡང་དག་ཏིང་འཛིན་གྱིས། །བསྟན་སྲུང་ལྷ་མོ་ཆེན་མོ་མངའ་གསོལ་ལོ། །དགོངས་བརྡ་སྙན་བརྒྱུད་མདོ་སྔགས་ཐེག་པ་ཆེའི། །བསྟན་དང་བསྟན་པ་འཛིན་པའི་སྐྱེས་བུ་ལ། །ཤུན་ཏུ་བརྩེ་ཞིང་ལས་བཞིའི་དངོས་གྲུབ་ཀྱི། །འདོད་འབྱུང་ལྷ་མོ་ཆེན་མོར་མངའ་གསོལ་ལོ། །མི་མཐུན་མཚོན་རྣོན་བྲག་རི་ཤུགས་ཆེ་ཡང་། །ཐུགས་རྗེའི་ནུས་མཐུ་གནམ་ལྕགས་ཐོག་ཆེན་གྱིས། །སྐད་ཅིག་ཉིད་ལ་བྱེ་མར་གཞོམ་མཛད་པ། །བདུད་སྡེའི་གཤེད་མ་ཆེན་མོར་མངའ་གསོལ་ལོ། །དེ་ལྟར་མཆོད་ཅིང་བསྟོད་པའི་བྱིན་རླབས་ཀྱིས། །སྣོད་བཅུད་རྒུད་པ་ཀུན་ཞི་ལེགས་ཚོགས་རྒྱས། །རྒྱལ་བསྟན་མདོ་སྔགས་བསྟན་པ་ཕུན་སུམ་ཚོགས། །རྣམ་ཁྱེན་ལམ་ལ་འགོད་པའི་ཕྲིན་ལས་མཛོད། །ཅེས་ཕྱག་ཚའི་ཆོས་ཁྲིམས་པདྨ་དབང་ལྡན་དང་དབུ་མཛད་བློ་གྲོས་གཉིས་ཀྱི་བསྐུལ་ངོར་རྫོགས་སྤྲུལ་བཞི་པས་སྨྲས་པ་དགེའོ།། །།