སྤྱི་བསང་བསྡུས་པ་དཔག་བསམ་འདོད་རྒུའི་འབྲས་སྟེར་ཞེས་བྱ་བཞུགས་སོ།།

རྩ་བ་གསུམ་གྱི་ལྷ་ལ་ཕྱག་འཚལ་ལོ། །བསང་མཆོད་ཤིན་ཏུ་བསྡུས་པར་བྱེད་པའི་གང་ཟག་གིས། དཀར་གཏོར་གླིང་བཞི། གཡོན་དུ་དམར་གཏོར། གཡག་ལུག་ར་གསུམ་སོགས་གཟུགས་འགྲོས་སྣ་ཚོགས་ཀྱིས་བརྒྱན་པ། ཕྱེ་མར་དང་འབྲུ་སྣ་སོགས་དང་། སྨན་གཏོར་རཀྟའི་མཆོད་པ་དང་། ཚོགས་ཀྱི་ལོངས་སྤྱོད་རྒྱས་པར་བཀྲམ། རྩི་ཤིང་སྣ་ཚོགས་པའི་དུད་པ་གཏོང་། རོལ་མོ་སྣ་ཚོགས་ཀྱི་སྒྲ་བསྒྲགས། སྙན་པའི་དབྱངས་ཀྱིས་འདི་སྐད་དོ། ། ཧཱུྃ། སྐྱབས་གནས་བསླུ་མེད་དཀོན་མཆོག་རྣམ་གསུམ་ལ། །སྙིང་ནས་དད་ཅིང་གུས་པས་སྐྱབས་སུ་མཆི། །དེང་ནས་མ་གྱུར་འགྲོ་བ་མཐའ་དག་ཀུན། །རྫོགས་པའི་སངས་རྒྱས་ཐོབ་པར་སེམས་བསྐྱེད་དོ། །རང་ཉིད་སྣང་སྲིད་ཟིལ་གནོན་པདྨ་འབྱུང་། །མཚན་དཔེའི་ལྡན་པའི་སྐུ་རུ་ལམ་གྱིས་གསལ། །ཐུགས་ཀར་ཟླ་སྟེང་ཧྲཱིཿཡིག་དཀར་པོ་ལས། །འོད་ཟེར་འཕྲོ་འདུས་དོན་གཉིས་བྱས་པའི་མཐར། །སྣང་སྲིད་ཐམས་ཅད་སྐུ་དང་ཞིང་ཁམས་གྱུར། །སིདྡྷི་ཅི་ནུས་བཟླའོ། །ཨོཾ་བཛྲ་ཨ་མྲྀ་ཏ། ཨོཾ་སྭ་བྷ་ཝ་སོགས། བསང་རྫས་མི་དམིགས་སྟོང་པ་ཆེན་པོའི་ངང་། །ཡངས་ཤིང་རྒྱ་ཆེའི་རིན་ཆེན་སྣོད་ནང་དུ། །མཆོད་རྫས་འཆི་མེད་བདུད་རྩིར་བྱིན་རླབས་པ། །རིན་ཆེན་འབྲུ་སྣ་དར་ཟབ་སྨན་སྤོས་རིགས། །བཟའ་བཏུང་གོས་རྒྱན་ཟད་མི་ཤེས་པའི་གཏེར། །ལྷ་མོའི་བསོད་ནམས་ལས་བྱུང་དཔལ་འབྱོར་རྫས། །རྃ་ལས་བསྐྱེད་པའི་ཡེ་ཤེས་མེའི་ནང་དུ། །བསྲེགས་པའི་དུ་བ་ཕྱོགས་བཅུ་ཀུན་ཏུ་འཕྲོས། །སྟོང་གསུམ་རབ་འབྱམས་གང་བའི་འཇའ་ཟེར་ལས། །དཔག་ཡས་མཆོད་རྫས་ནམ་མཁའ་མཛོད་ལྟ་བུ། །གཞན་ཡང་ཁྲུས་བུམ་སྨན་གཞོང་ཐོགས་པ་ཡི། །གྲངས་མེད་མཆོད་པའི་ལྷ་མོ་ལྟ་ན་སྡུག །མཛེས་ཤིང་འཕྲུལ་ཆགས་དགའ་བའི་གར་བསྒྱུར་མ། །དགའ་བཞིའི་ཡེ་ཤེས་སྟེར་བའི་མཛའ་ན་མོས། །ཁྲུས་དང་སྨན་གྱི་མི་གཙང་གྲིབ་ཀྱི་ཚོགས། །མཐའ་དག་བསལ་ནས་ཀུན་བཟང་མཆོད་སྤྲིན་ལྟར། །མི་ཟད་འདོད་ཡོན་རྒྱན་གྱི་རོལ་མོ་ཡིས། །ནམ་མཁའ་རབ་འབྱམས་གང་བའི་འཁོར་ལོར་གྱུར། །སྤྲོ་ན་སྔགས་དྲུག་ཕྱག་དྲུག བསྡུ་ན་ནམ་མཁའ་མཛོད་སྔགས་ལན་གསུམ། བསང་མགྲོན་བསྐྱེད་པ་ནི། ཧཱུྃ། རང་མདུན་ནམ་མཁར་འཇའ་ཟེར་འཁྲིགས་པའི་ཀློང་། །གླིང་བཞིའི་ཁྱོན་མཉམ་དཔག་བསམ་ལྗོན་པའི་ཤིང་། །རབ་ཏུ་རྒྱས་པའི་དབུས་ཀྱི་ལྟེ་བ་ལ། །སེང་ཁྲི་པདྨ་ཉི་ཟླའི་གདན་སྟེང་དུ། །སྐྱབས་གནས་ཀུན་འདུས་ཨོ་རྒྱན་ཆེན་པོ་ལ། །རྩ་བརྒྱུད་དཔལ་ལྡན་བླ་མའི་ཚོགས་ཀྱིས་བསྐོར། །ཤར་དུ་ཐུབ་དབང་དཀོན་མཆོག་སྲིད་ཞུའི་མགྲོན། །ལྷོ་རུ་འཇམ་དཔལ་ཡོན་ཏན་འགྲོན་གྱིས་བསྐོར། །ནུབ་ཏུ་སྤྱན་གཟིགས་རིགས་དྲུག་མགྲོན་དང་བཅས། །བྱང་དུ་ཕྱག་རྡོར་ལན་ཆགས་མགྲོན་གྱིས་བསྐོར། །ལྗོན་ཤིང་སྐེད་པར་སྲིད་པའི་ལྷ་དགུ་དང་། །སྟོང་གསུམ་གཞི་བདག་ཡུལ་ལྷ་གཉན་པོས་བསྐོར། །རྩ་བར་ས་ཡི་ལྷ་མོ་བརྟན་མ་སོགས། །རྒྱལ་བློན་འབངས་འཁོར་ས་བདག་ཡོངས་ཀྱིས་བསྐོར། །སྐྱབས་ཡུལ་ཀུན་གྱིས་གནས་གསུམ་འབྲུ་གསུམ་ལས། །འོད་འཕྲོས་རང་བཞིན་གནས་ནས་སྲིད་ཞིའི་མགྲོན། །འཁོར་བཅས་མ་ལུས་སྤྱན་དྲངས་གཤེགས་སུ་གསོལ། །སྤྱན་འདྲེན་པ་ནི། ཧཱུྃ། ཆོས་དབྱིངས་ཀ་དག་ཆེན་པོའི་ཀློང་ཡངས་ནས། །ཆོས་སྐུའི་སྟོན་པ་ཀུན་ཏུ་བཟང་པོ་ལ། །ཆོས་ཉིད་དོན་རྟོགས་བླ་མའི་འཁོར་དང་བཅས། །ཆོས་ཀྱི་དབྱིངས་ནས་གནས་འདིར་གཤེགས་སུ་གསོལ། །ལྷུན་གྲུབ་ཡེ་ཤེས་རང་སྣང་ཀློང་ཡངས་ནས། །ལྷུན་གྲུབ་ལོངས་སྐུ་རིགས་ལྔའི་སངས་རྒྱས་ལ། །ལྷུན་གྱིས་གྲུབ་པའི་ཡི་དམ་ཞི་ཁྲོའི་ཚོགས། །ལྷུན་གྲུབ་གནས་མཆོག་དམ་པར་གཤེགས་སུ་གསོལ། །ཀུན་ཁྱབ་ཐུགས་རྗེའི་ཀློང་ཡངས་དམ་པ་ནས། །ཀུན་གྱི་མངའ་བདག་པདྨ་འབྱུང་གནས་ལ། །ཀུན་གཟིགས་མཁའ་འགྲོ་ཆོས་སྐྱོང་ཚོགས་དང་བཅས། །ཀུན་ལ་དགོངས་ཏེ་གནས་འདིར་གཤེགས་སུ་གསོལ། །ཐུགས་རྗེ་རྨད་དུ་བྱུང་བའི་ཀློང་ཡངས་ནས། །ཐུགས་རྗེའི་བདག་ཉིད་དཀོན་མཆོག་རྣམ་གསུམ་ལ། །ཐུགས་རྗེ་ཆེ་ལྡན་འཁོར་འདས་མགྲོན་རིགས་བཅས། །ཐུགས་རྗེས་བརྩེར་དགོངས་གནས་འདིར་གཤེགས་སུ་གསོལ། །གཞན་ཡང་མཆོད་སྦྱིན་འོས་པའི་མགྲོན་གྱི་ཚོགས། །གནས་མཆོག་དམ་པ་གང་དུ་བཞུགས་གྱུར་ཀྱང་། །ཇི་ལྟར་ལྷ་མིའི་ཁྲོམ་ཚོགས་ཇི་བཞིན་དུ། །རྒྱན་དང་ཆ་ལུགས་རྣམ་འགྱུར་སྣ་ཚོགས་པ། །བསང་གི་མཆོད་པ་བཞེས་ཕྱིར་གཤེགས་སུ་གསོལ། །བཞུགས་གསོལ། །ཕྱག་འཚལ། མཆོད་བསྟོད་སོགས་རིམ་བཞིན་དུ། ཧཱུྃ། རབ་འབྱམས་ཞིང་ནས་གཤེགས་པའི་ལྷ་ཚོགས་རྣམས། །དེང་གི་གནས་མཆོག་དམ་པ་ཉམས་རེ་དགའ། །རང་རང་དགྱེས་པའི་གདན་ཁྲི་ཡངས་པ་འདིར། །བསང་མཆོད་བཞེས་ཕྱིར་དགྱེས་པར་བཞུགས་སུ་གསོལ། །དཀོན་མཆོག་གསུམ་དང་རྩ་གསུམ་ཚོགས་རྣམས་ལ། །སྒོ་གསུམ་གུས་པའི་སྒོ་ནས་ཕྱག་འཚལ་ལོ། །ཡོན་ཏན་རྗེས་སུ་དྲན་པས་བསྟོད་པར་བགྱི། །སྣང་སྲིད་ཆོས་སྐྱོང་ལྷ་ཀླུ་གཞི་བདག་ལ། །དམ་ཚིག་དགོངས་ལ་དགའ་ཞིང་གུས་པས་འདུད། །དངོས་འབྱོར་ཡིད་སྤྲུལ་དཔག་མེད་མཆོད་པར་འབུལ། །ཁྱད་པར་བསང་གི་མཆོད་པ་འབུལ་བ་ནི། །སྔོན་ཚེ་བསང་གི་རྒྱུ་བྱུང་གནམ་ནས་བྱུང་། །གནམ་ནས་འབྲུག་ལྡིར་ས་ལས་གློག་འགྱུ་བ། །བར་སྣང་བདུད་རྩིའི་སྦྲང་ཆར་ཟལ་མ་ཟིལ། །མཐའ་ཡི་རྒྱ་མཚོ་འཁྲུགས་པའི་རླངས་པ་སྲིད། །མ་ཕམ་གཡུ་མཚོ་ཕྱུག་མོའི་ཁ་ཞག་སྟེ། །རིན་ཆེན་བཟང་དྲུག་སྨན་གྱི་ནུས་པ་དང་། །ཤིང་སྣ་བསྲེགས་པའི་དུད་པའི་སྤྲིན་ལས་བྱུང་། །དེ་ལྟར་ཕྱི་རབས་རྣལ་འབྱོར་བདག་ཅག་གིས། །བསྟན་པ་དར་ཞིང་སེམས་ཅན་སྐྱིད་པ་དང་། །མི་ནད་ཕྱུགས་ནད་དམག་འཁྲུགས་མུ་གེའི་རིགས། །དུག་དང་གདོན་བགེགས་རྒྱལ་པོའི་ཆད་པ་དང་། །མི་ཁ་བྲ་མཆུ་དབྱེན་ཤག་ངན་སྨྲས་པ། །ལྟས་ངན་ཐོག་སེར་མ་རུང་བྱད་མ་མཁན། །དམ་སྲིས་རྒྱུད་དཀྲུག་ནང་འཁྲུགས་གྱུར་པ་ཀུན། །ཕྱོགས་འདིར་རྒྱུ་བའི་གོ་སྐབས་མེད་པ་དང་། །འཇིག་རྟེན་བདེ་ཞིང་འབྲུ་ནོར་ཕྱུགས་འཕེལ་བ། །མདོར་ན་ཡིད་ལ་ཅི་འདོད་འགྲུབ་པའི་ཕྱིར། །དཀར་གསུམ་མངར་གསུམ་རིན་ཆེན་སྣ་ཚོགས་དང་། །འབྲུ་སྣ་ཕྱེ་མར་དར་ཟབ་སྟག་གཟིགས་རས། །སྟག་པ་ཤུག་པ་མཁན་དཀར་བ་ལུ་དང་། །སྤོས་དཀར་སྤེན་དཀར་ལྷ་ཤིང་ཚེར་ཤིང་རིགས། །བཟང་དྲུག་ཙནྡན་དཀར་དམར་ཨ་ཀ་རུ། །གོས་དཀར་མོ་ཡི་ངོ་བོ་རྣམ་དག་པ། །རྃ་ལས་སྐྱེས་པའི་ཡེ་ཤེས་མེའི་ནང་དུ། །སྣ་ཚོགས་བསྲེགས་པའི་དུད་པའི་སྤྲིན་ཕུང་ལས། །རིན་ཆེན་བདུན་དང་བཀྲ་ཤིས་རྫས་རྟགས་བརྒྱད། །རྡོ་རྗེའི་ལྷ་མོའི་རྣམ་འཕྲུལ་མཐའ་ཡས་པ། །སྲིད་ན་རྣམ་པར་འཆར་བ་མཆོད་པའི་སྤྲིན། །ཕུན་ཚོགས་དཔལ་གྱི་འབྱོར་བ་འཆར་བ་འདིས། །གདོན་མའི་མགོན་པོ་རིགས་ལྔ་གང་ཆེན་མཚོ། །སྟོན་པ་བཅུ་གཉིས་བསྐལ་བཟང་སངས་རྒྱས་སྟོང་། །འོད་དཔག་མེད་དང་སྨན་བླ་མི་འཁྲུགས་པ། །ཚེ་དཔག་མེད་དང་ཀླུ་ཡི་དབང་ཕྱུག་རྒྱལ། །སྒྲོལ་མའི་རྒྱལ་པོ་རྩལ་བརྟན་དོན་གྲུབ་དགོངས། །བྱམས་པའི་རྒྱན་དཔལ་དགེ་གྲགས་དཔལ་དམ་པ། །ཀུན་ལ་དགོངས་པ་རྒྱ་ཆེར་གྲགས་པ་ཅན། །ལྷུན་པོ་ལྟར་འཕགས་རྩལ་གྲགས་དཔལ་དང་ནི། །སེམས་ཅན་ཐམས་ཅད་ལ་དགོངས་གྲགས་པའི་དཔལ། །ཡིད་ཚིམ་མཛད་པ་རྩལ་དང་གྲགས་དཔལ་དང་། །དཔལ་སྙིང་བརྩེགས་པ་རྣམ་པར་བསྒྲགས་པའི་རྒྱལ། །རྡོ་རྗེ་རབ་འབྱམས་རིན་ཆེན་གཙུག་ཏོར་ཅན། །འཁོར་བ་འཇིག་དང་གསེར་ཐུབ་འོད་སྲུང་ཆེ། །མར་མེ་མཛད་སོགས་དུས་གསུམ་སངས་རྒྱས་དང་། །རབ་འབྱམས་ཕྱོགས་བཅུའི་ཞིང་ན་བཞུགས་པ་ཡི། །དུས་གསུམ་བདེ་བར་གཤེགས་པ་ཐམས་ཅད་ལ། །བསང་ངོ་མཆོད་དོ་ཐུགས་དམ་དགྱེས་བསྐང་མཛོད། །རྒྱལ་བ་རྣམས་ཀྱི་ཞལ་ནས་གསུངས་པ་ཡི། །གསུང་རབ་ཡན་ལག་བཅུ་གཉིས་ཐེག་རིམ་དགུ། །ཟབ་མོའི་དགོངས་དོན་རྟོགས་པའི་ཆོས་རྣམས་སོགས། །དམ་ཆོས་དཀོན་མཆོག་ཆོས་ཀྱི་དབྱིངས་དང་མཉམ། །བསང་ངོ་མཆོད་དོ་ཐུགས་དམ་དགྱེས་བསྐང་མཛོད། །ས་སྙིང་བྱམས་པ་སྒྲིབ་སེལ་ནམ་མཁའི་སྙིང་། །སྤྱན་གཟིགས་འཇམ་དཔལ་ཕྱག་རྡོར་ཀུན་ཏུ་བཟང་། །བཟང་སྐྱོང་དྲ་བས་བྱིན་དང་སྨན་ཆེན་པོ། །སྨན་གྱི་རྒྱལ་པོ་སྐར་མ་དྲི་མ་མེད། །སྨན་ནི་ཡང་དག་འཕགས་པ་སྨན་ཆེན་པོ། །སྤོས་ཀྱི་གླང་པོ་ནམ་མཁའ་མཛོད་ལ་སོགས། །རྡོ་རྗེ་སྒེག་མོ་ཕྲེང་བ་གླུུ་གར་དང་། །བདུག་སྤོས་མེ་ཏོག་སྣང་གསལ་དྲི་ཆབ་མ། །ལྷ་མོ་ཀུ་རུ་ཀུ་ལེ་འོད་ཟེར་ཅན། །རྨ་བྱ་ཆེན་མོ་སྨན་གྱི་སྙེ་མ་དང་། །ནོར་རྒྱུན་མ་སོགས་གཟུངས་སྔགས་ལྷ་མོའི་ཚོགས། །ཁྱད་པར་རྒྱལ་བ་ཀུན་ཡུམ་རྗེ་བཙུན་མ། །འཕགས་མ་སྒྲོལ་མ་མརྒད་ཞུན་མའི་མདོག །འཁོར་དུ་ཕྲིན་ལས་ལྷ་མོ་ཉི་ཤུ་གཅིག །ཕྲིན་ལས་རྣམ་བཞི་བསྒྲུབས་པའི་རྗེས་མདུན་གྱི། །ཁ་དོག་སྣ་ཚོགས་དབང་པོའི་གཞུ་ལྟ་བུ། །རབ་འབྱམས་སེམས་དཔའ་སེམས་མའི་ཚོགས་རྣམས་ལ། །བསང་ངོ་མཆོད་དོ་ཐུགས་དམ་དགྱེས་བསྐང་མཛོད། །ཤཱ་རིའི་བུ་དང་མོའུ་འགལ་གྱི་བུ། །འོད་སྲུང་རབ་འབྱོར་འཆར་ཁ་བ་ལང་བདག །ཀུན་ཤེས་ཀཽའུ་ཌཱི་ནྱ་རྟ་ཐུལ་དང་། །མིང་ཅན་ལ་སོགས་ཉན་ཐོས་དགེ་འདུན་རྣམས། །བསང་ངོ་མཆོད་དོ་ཐུགས་དམ་དགྱེས་བསྐང་མཛོད། །འཇིགས་མེད་རྡོ་རྗེ་སྣང་བ་བརྩེགས་པ་དང་། །དཔའ་བོ་འདུལ་བ་ཉོན་མོངས་གདུང་བ་སེལ། །ཤེས་རབ་མགྱོགས་ཆེན་རྫུ་འཕྲུལ་ཆེར་སྟོན་པ། །གདུང་བ་སེལ་བྱེད་སྒྲ་ཆེན་རི་རྒྱལ་ཆེ། །བསེ་རུ་ལྟ་བུ་སེང་གེ་ལྟ་བུར་དང་། །ཡིད་མྱུར་ལ་སོགས་རང་རྒྱལ་འཕགས་པའི་ཚོགས། །བསང་ངོ་མཆོད་དོ་ཐུགས་དམ་དགྱེས་བསྐང་མཛོད། །ཀུན་བཟང་རིགས་ལྔ་རིགས་གསུམ་དྲྭ་མ་ལྔ། །ཨུ་པ་རཱ་ཛ་ཨིཎྡྲ་བྷོ་དྷི་དང་། །དགའ་རབ་ཤྲཱི་སིངྷ་པདྨ་འབྱུང་། །རིག་འཛིན་བརྒྱད་དང་རྗེ་འབངས་ཉེར་ལྔ་དང་། །དགོངས་བརྡ་སྙན་བརྒྱུད་གསར་རྙིང་མཁས་གྲུབ་སོགས། །དོན་དམ་རྫོགས་ཆེན་དོན་གསལ་སྒྱུ་འཕྲུལ་དང་། །ཕྱག་ཆེན་དབུ་མ་ཞི་བྱེད་ལམ་འབྲས་དང་། །གཅོད་ཡུལ་བློ་སྦྱང་སྙིང་ཐིག་བརྒྱུད་པར་བཅས། །དོན་ལྡན་རྩ་བརྒྱུད་བླ་མ་ལ་སོགས་པ། །ཕྱོགས་བཅུ་དུས་བཞི་ཀུན་ཀྱི་བདག་ཉིད་ཅན། །བླ་མ་རིག་འཛིན་བརྒྱུད་པར་བཅས་པ་ལ། །བསང་ངོ་མཆོད་དོ་ཐུགས་དམ་དགྱེས་བསྐང་མཛོད། །རིགས་བརྒྱ་རིགས་ལྔ་རིགས་གསུམ་རིགས་མཆོག་གཅིག །པད་འབྱུང་ཐོད་ཕྲེང་སྡེ་ལྔ་མཚན་མཆོག་བརྒྱད། །རྟ་མགྲིན་ཡབ་ཡུམ་དཔའ་བོ་མཁའ་འགྲོའི་ཚོགས། །སྒྲུབ་པ་བཀའ་བརྒྱད་ཚོགས་ཆེན་འདུས་པ་དང་། །དོན་ཡོད་ཞགས་པ་ངན་སོང་རྣམ་སྦྱོང་བ། །པདྨ་རྩེ་མོ་བདེ་མཆོག་གསང་བ་འདུས། །དཔལ་ཆེན་བཀའ་འདུས་སྒྱུ་འཕྲུལ་དྲྭ་བ་དང་། །རྣམ་སྣང་མཚན་བྱང་ཕྱག་རྡོར་གུ་རུ་དྲག །དགྱེས་པ་རྡོ་རྗེ་དུས་ཀྱི་འཁོར་ལོའི་ལྷ། །དགོངས་པ་ཀུན་འདུས་དཀྱིལ་འཁོར་ལྷ་ཚོགས་དང་། །ཁྱད་པར་རྡོ་རྗེ་གཞོན་ནུ་ཡབ་དང་ཡུམ། །སྲས་མཆོག་རིགས་ལྔ་ཁྲོ་བོ་ཡབ་ཡུམ་བཅུ། །ཟ་གསོད་སྒོ་མ་ཕུར་སྲུང་དབང་ཕྱུག་ཚོགས། །རྒྱུད་སྡེ་དྲུག་དང་རྒྱུད་ལུང་མན་ངག་གི །ཞི་ཆགས་ཁྲོ་བོའི་ཚུལ་འཆང་ཡི་དམ་ཚོགས། །བསང་ངོ་མཆོད་དོ་ཐུགས་དམ་དགྱེས་བསྐང་མཛོད། །རྡོ་རྗེ་ཕག་མོ་རིགས་ལྔའི་ཌཱཀྐི་ནི། །མཚོ་རྒྱལ་ལ་སོགས་ཐུགས་ཀྱི་དགྱེས་སྡེ་ལྔ། །གནས་ཡུལ་ཞིང་གི་བཀོད་པ་སྣ་ཚོགས་སུ། །ཞིང་སྔགས་ལྷན་ཅིག་སྐྱེས་པའི་རྣལ་འབྱོར་མ། །ཡེ་ཤེས་ལས་དང་འཇིག་རྟེན་དམ་ཚིག་ཅན། །ལས་དང་ཤ་ཟ་དུར་ཁྲོད་མཁའ་འགྲོ་མ། །གཞན་ཡང་གནས་ཡུལ་མཁའ་འགྲོ་ཤུགས་འགྲོ་སོགས། །འབུམ་ཕྲག་ཡངས་པའི་མཁའ་འགྲོ་རྒྱ་མཚོའི་ཚོགས། །བསང་ངོ་མཆོད་དོ་ཐུགས་དམ་དགྱེས་བསྐང་མཛོད། །ཁམས་གསུམ་དབང་སྡུད་རྟ་མགྲིན་ནག་པོའི་སྐུ། །ཡུམ་མཆོག་ཨེ་ཀ་ཛ་ཊཱི་རལ་གཅིག་མ། །སྲས་མཆོག་གནོད་སྦྱིན་ཤན་པ་དམར་ནག་དང་། །དབང་ཆེན་རྟ་མགྲིན་ནག་པོའི་བཀའ་འཁོར་ན། །ཤིང་བྱ་ཅན་དང་བདུད་རྗེ་མེ་རུ་རྩེ། །ར་ཧུ་ལ་དང་ཀླུ་བདུད་མགོ་དགུ་སོགས། །སྣང་སྲིད་དྲེགས་པའི་གཙོ་བོ་སྡེ་བརྒྱད་པོ། །དཔལ་མགོན་ལེགས་ལྡན་མ་ནིང་ཚོགས་ཀྱི་བདག །ཕྱག་བཞི་པ་དང་ཞིང་སྐྱོང་སེང་གདོང་ཅན། །ཚེ་མགོན་དཀར་པོ་ཞལ་བཞི་ཕྱག་དྲུག་པ། །བསང་ངོ་མཆོག་དོ་ཐུགས་དམ་དགྱེས་བསྐང་མཛོད། །སྔགས་སྲུང་སྔགས་བདག་གཤོག་རྒོད་སྲོག་སྒྲུབ་མ། ། གཏེར་སྲུང ་ཡང་མ་སྐྱིན་གདོང་མཆེད་གསུམ་དང་། །ཚེ་རིང་མཆེད་ལྔ་གཡུ་སྒྲོན་བརྟན་མ་བཅས། །དབང་ཕྱུག་ཆེན་པོ་གཟའ་བདུད་རཱ་ཧུ་ལ། །དམ་ཅན་རྡོ་རྗེ་ལེགས་པ་མགར་དམར་ནག །ལྷ་བཙན་ནོར་སྒྲུབ་ཤན་དམར་རིག་འཛིན་མ། །བྲག་བཙན་ཕུར་སྲུང་ལྡང་ལྷ་རྩིའུ་དམར། །བེ་ཧར་རྒྱལ་པོ་སྐུ་ལྔ་གསང་ཡུམ་བཅས། །ཁྱད་པར་རྡོ་རྗེ་གྲགས་ལྡན་འཁོར་དང་བཅས། །བསང་ངོ་མཆོད་དོ་ཐུགས་དམ་དགྱེས་བསྐང་མཛོད། །གྲི་བཙན་ནོར་བདག་ཛམ་ལྷ་རིགས་ལྔ་མཆོག །སྔོན་ཚེ་སྲིད་པ་ཡེ་སྨོན་རྒྱལ་པོ་ཡིས། །སོ་ཞོ་ཞལ་མཆིད་བླུད་ནས་སྨོན་ལམ་བཏབ། །རིན་ཆེན་ཤེལ་གྱི་སྒོ་ང་དཀར་པོ་བྱུང་། །སྒོ་ངའི་ཕྱི་ཤུན་ལས་བྱུང་རྟ་ཡི་ལྷ། །རྟ་ལྷའི་རྒྱལ་པོ་ཨརྱ་རེ་མནྟ། །བར་ཤུན་ལས་བྱུང་རྟ་ཡི་བླ་བྲག་དང་། །རྒོད་ཆུ་ལས་བྱུང་རྟ་ཡི་བླ་མཚོ་གྲགས། །མཚོ་ལས་ཤིང་སྡོང་སྐྱེས་པ་བླ་ཤིང་གྲགས། །སྤྲུལ་པའི་བྱ་ཁྲ་མྱུར་མགྱོགས་བཅུ་གསུམ་དང་། །རྟ་ལ་འགོ་ཞིང་སྐྱོབས་པའི་ལྷ་རྣམས་ཀྱིས། །རྔོག་ཆགས་རྟ་འདྲེ་རྡུལ་དུ་བརླག་པ་དང་། །རྟ་ལ་རྟེན་འཚོལ་སྲུང་སྐྱོབ་མ་གཡེལ་བར། །རྟ་ལྷ་ཐམས་ཅད་རྟ་དང་མ་བྲལ་ཅིག །རྟ་ཡི་བསྲུང་སྐྱོབ་མེལ་ཚེ་བྱ་ར་མཛོད། །རྨ་རྒྱལ་སྤོམ་ར་གཉན་ཆེན་ཐང་ལྷ་དང་། །རྡོ་རྗེ་གཡུང་དྲུང་རྒོད་ལྕམ་ཤེལ་རུ་སྨན། །ནོར་བུ་གཡུལ་རྒྱལ་སྙོན་ཁ་དྲེགས་སྡེ་དང་། །དུར་ཁྲོད་ལྷ་མོ་ལས་གཤིན་སྤྱང་ཞོན་མ། །ཟངས་རི་ཀླུ་མོ་ལྷ་སྨན་ཁོལ་པོ་ཁ། །བྱ་རོག་གདོང་ཅན་རྒྱལ་བ་ཐོད་དཀར་དང་། །འབར་མ་བྱ་ཞོན་འབར་མ་ལྕམ་དྲལ་མ། ། གཏེར་སྲུང ་ལྷ་མོ་མ་མོ་ཁྲག་རལ་མ། །རྡོ་རྗེ་བདུད་འདུལ་གནོད་སྦྱིན་བཅུ་གཉིས་དང་། །ན་ག་རཀྵ་ལྷ་སྲིན་སྡེ་བརྒྱད་གཙོ། །བསང་ངོ་མཆོད་དོ་ཐུགས་དམ་དགྱེས་བསྐང་མཛོད། །དགྲ་ལྷ་གེ་སར་ནོར་བུ་དགྲ་འདུལ་རྩལ། །དཔལ་མགོན་བདུན་ཅུ་འགོ་བའི་ལྷ་ལྔ་དང་། །དགྲ་ལྷ་བཅུ་གསུམ་ཝེར་མའི་ཚོགས་དང་བཅས། །བཀའ་ཡི་བློན་པོ་དཔའ་ཐུལ་སུམ་ཅུ་སོགས། །མདོར་ན་ཡེ་ཤེས་ལས་དང་འཇིག་རྟེན་གྱི། །བཀའ་ཡི་འཁོར་དུ་གཏོགས་པའི་ལས་བྱེད་ཚོགས། །བསང་ངོ་མཆོད་དོ་ཐུགས་དམ་དགྱེས་བསྐང་མཛོད། །རྫུ་འཕྲུལ་རྐང་པ་བཞི་ལྡན་རླུང་ཤུགས་ཀྱིས། །གང་འདོད་གནས་སུ་ཐོགས་མེད་ཕྱིན་པའི་རྟ། །དཔའ་རྔམས་སྟོབས་བསྐྱེད་དུང་སེང་གཡུ་རལ་ཅན། །ངར་སྐད་སྟོབས་བསྐྱེད་གཡུ་འབྲུག་སྔོན་མོ་སྟེ། །དཔའ་རྩལ་སྟོབས་བསྐྱེད་རྒྱ་སྟག་མཚལ་རིས་ཅན། །སྟོབས་ཤུགས་བང་བསྐྱེད་ཁྱུང་ཆེན་འབར་བ་བཞི། །བར་སྣང་གཉན་གྱི་རླུང་རྟ་རྣམ་གཉིས་དང་། །ཡེ་སྨོན་རྒྱལ་པོ་གསང་བདག་རྒྱལ་མོ་ལས། །སྲས་ནི་ལྷ་བུ་ལྷ་གསལ་བྱ་བ་སྲིད། །ལྕགས་ཟངས་ཤིང་དང་ཆུ་ཡི་མི་ཕོ་བཞི། །རང་མདོག་མཐུན་པའི་རླུང་རྟ་སྡེ་བཞི་པོ། །རླུང་རྟ་ལྷ་ཡི་སྲས་པོ་སྐྱེས་བུ་བཞི། །ཕྱག་བརྙན་སྤྲེལ་སྤྲུལ་སྟག་དང་ཕག་གི་མགོ །རང་རང་ཡང་སྤྲུལ་སྒོ་སྲུང་ཕོ་ཉར་འགྱེད། །བདག་ཅག་དཔོན་སློབ་ཡོན་མཆོད་འཁོར་བཅས་ཀྱིས། །བསོད་ནམས་དཔལ་གྱི་དར་ཆེན་དགུང་དུ་ཕྱོར། །རླུང་རྟ་བསྐྱེད་ལ་སྙན་གྲགས་ཕྱོགས་བཅུར་ཁྱབ། །མི་མཐུན་རླུང་རྣམས་མཐུན་པར་སྒྲུབ་པ་དང་། །རླུང་རྟའི་ལྷ་རྣམས་རྟག་ཏུ་སྤེལ་བའི་ཕྱིར། །བསང་ངོ་མཆོད་དོ་ཐུགས་དམ་དགྱེས་བསྐང་མཛོད། །གཞན་ཡང་བེར་ནག་གྲི་ཁུག་གུར་མགོན་དང་། །སྟག་ཞོན་སེང་ཞོན་མིའུ་ཐུང་གསོད་བྱེད་སོགས། །དཔལ་ལྡན་ལྷ་མོ་ནག་མོ་རེ་མ་ཏི། །རེ་ཏི་མཆེད་བཞི་དུད་གསོལ་ཙིཏྟི་ཀ །མ་གཅིག་དཔལ་ལྷ་གཟའ་མཆོག་སྤྲུ་གྲི་འབར། །མཐུ་སྟོབས་དབང་ཕྱུག་ཤན་པ་ར་མགོ་དང་། །མ་ར་སྙིང་ཟན་ལངྐ་མགྲིན་བཅུའི་ཚོགས། །གཏེར་གྱི་བདག་པོ་གང་བཙན་ལ་སོགས་པ། །ལེ་འབར་མ་རྡོ་རྗེ་ཆོས་སྒྲོན་མ། །རྡོ་རྗེ་གནས་ཡོན་ལ་སོགས་གཙུག་ལག་བདག །བདུད་བཙན་ཀླུ་གསུམ་མཁའ་འགྲོ་དཔལ་འབར་མ། །དམ་ཅན་སྡེ་བདུན་རང་རང་འཁོར་དང་བཅས། །ལྷ་ཆེན་བརྒྱད་དང་ཀླུ་ཆེན་རྣམ་པ་བརྒྱད། །གཟའ་ཆེན་བརྒྱད་དང་འཇིགས་བྱེད་ཆེན་པོ་དགུ། །དཔལ་མགོན་བདུན་ཅུ་རྒྱལ་ཆེན་ཕྱོགས་སྐྱོང་བཅུ། །རྡོ་རྗེ་ཤམ་པ་རྡོ་རྗེ་གང་བ་བཟང་། །མཁའ་རི་ལ་སོགས་དགེ་བསྙེན་ཉི་ཤུ་གཅིག །མགུར་ལྷ་བཅུ་གསུམ་ལྷ་རབས་མཆེད་དགུ་དང་། །ཞང་བློན་སྡེ་དགུ་ཀུན་དགའ་གཞོན་ནུ་དང་། །ཨ་ཕྱི་ཆོས་སྒྲོན་བརྟན་མ་བཅུ་གཉིས་སོགས། །བསང་ངོ་མཆོད་དོ་ཐུགས་དམ་དགྱེས་བསྐང་མཛོད། །རྒྱ་གར་རྒྱ་ནག་བལ་ཡུལ་ལི་ཡུལ་དང་། །ཁ་ཆེ་ཁྲི་རྟེན་གྲུ་གུ་མཐར་ལེགས་སོགས། །ཧ་ལ་ཞན་དང་དུར་ཁྲོད་ཆེན་པོ་བརྒྱད། །ཁྱད་པར་བོད་ཁམས་ཁ་བ་ཅན་གྱི་ཡུལ། །མངའ་རི་སྐོར་གསུམ་དབུས་གཙང་རུ་བཞི་དང་། །མདོ་ཁམས་སྒང་དྲུག་མོན་ཡུལ་རྡོ་ཀོང་པོའི། ། སྲུང་མ་གཏེར ་བདག་ཡུལ་ལྷ་འཁོར་དང་བཅས། །གཙུག་ལག་ཆོས་འཁོར་དབེན་གནས་ཀུན་གྱི་བདག །བཀའ་དང་དམ་ཚིག་ལ་གནས་ཆོས་སྐྱོང་ཚོགས། །མིང་དང་མཚན་ནས་མ་ཐོན་ཐམས་ཅད་ཀུན། །ཁྱད་པར་པད་འབྱུང་བཱི་མ་ཀློང་ཆེན་སོགས། །རིག་འཛིན་རྩ་བརྒྱུད་བླ་མའི་ཚོགས་རྣམས་ཀྱི། །བཀའ་དང་དམ་ཚིག་ལ་གནས་སྲུང་མའི་ཚོགས། །བདག་ལ་འགོ་ཞིང་སྡོང་གྲོགས་བྱེད་པ་དང་། །མགོན་སྐྱབས་དཔུང་གཉེན་རྟག་ཏུ་མཛད་པ་ཡི། །འགོ་བའི་ལྷ་ལྔ་སྐྱོབས་པའི་ལྷ་ སྲུང་ལ། །བསང་ངོ་མཆོད་དོ་ཐུགས་དམ་དགྱེས་བསྐང་མཛོད། །གནོད་སྦྱིན་རྗེ་དཔོན་ལོངས་སྤྱོད་གཏེར ་གྱི་བདག །ཡིད་བཞིན་ནོར་བུ་རྒྱལ་པོ་རྣམ་ཐོས་སྲས། །ཐུགས་ཀྱི་དགྱེས་སྡེ་དཔལ་བཙུན་བཟང་པོ་དང་། །རྟ་བདག་བརྒྱད་དང་ཕྱུགས་ལྷ་ལྗང་གུ་སོགས། །འཕྲོག་མ་ལ་སོགས་གནོད་སྦྱིན་བྱེ་བ་བཅས། །ནོར་ལྷ་གཏེར་གྱི་བདག་པོ་འཁོར་བཅས་ལ། །བསང་ངོ་མཆོད་དོ་ཐུགས་དམ་དགྱེས་བསྐང་མཛོད། །གཞན་ཡང་འབྱུང་པོ་ས་ཡི་བདག་པོ་ནི། །གསེར་གྱི་ས་གཞི་ལ་གནས་བརྟན་མ་དང་། །ས་བདག་དབང་ཆེན་ས་འཛིན་ལག་ཆེན་པོ། །ལྟོ་འཕྱེ་ཆེན་པོ་ལ་སོགས་ས་བདག་དང་། །རི་རྒྱལ་ལྷུན་པོ་གསེར་རི་རོལ་མཚོ་བདུན། །གླིང་བཞི་གླིང་ཕྲན་ལྕགས་རིའི་འཁོར་ཡུག་ན། །གནས་པའི་ས་བདག་རིགས་སུ་གྱུར་པ་དང་། །གཞན་ཡང་ཐེ་སེ་རྒྱལ་པོ་ཙང་ཀུན་དང་། །གྲུལ་བུམ་ལྷ་ལྔ་གཟིགས་མཇུག་ལ་སོགས་པ། །ལོ་ཟླ་ཞག་དུས་ཚེས་ཀྱི་ས་བདག་དང་། །ས་ལ་དབང་བའི་བདག་པོ་འཁོར་དང་བཅས། །གཞན་ཡང་འབྱུང་བ་ལྔ་ཡི་ས་བདག་ཚོགས། །སྤར་ཁ་སྨེ་བ་ལོ་འཁོར་བཅུ་གཉིས་དང་། །ལོ་ཁྱིམ་དྲུག་ཅུ་དཀར་ཕྱོགས་སྐྱོང་བའི་ཚོགས། །གབ་རྩེ་སུམ་བརྒྱ་དྲུག་ཅུའི་ས་བདག་ཚོགས། །གཞན་ཡང་ས་ཕྱོགས་ཉེ་འཁོར་འདི་ཉིད་ལ། །གནས་པའི་ས་བདག་གནས་བདག་ཡུལ་ལྷ་ལ། །བསང་ངོ་མཆོག་དོ་ཐུགས་དམ་དགྱེས་བསྐང་མཛོད། །གཞན་ཡང་ཀླུ་དང་གཉན་གྱི་རིགས་གྱུར་པ། །ནམ་མཁའ་བར་སྣང་ས་གཞི་ལ་གནས་པ། །རི་བྲག་ལྗོན་ཤིང་གེལ་པ་གཏན་འཁྱིལ་མཚོ། །ཆུ་བོ་ཆུ་ཕྲན་ཆུ་མིག་འབབ་ཆུ་དང་། །ལྡིང་ཀ་ཁྲོན་པ་ལ་གནས་ཀླུ་གཉན་དང་། །ས་བདག་རིགས་སུ་གྱུར་པ་ཐམས་ཅད་ལ། །བསང་ངོ་མཆོད་དོ་ཐུགས་དམ་དགྱེས་བསྐང་མཛོད། །གླིང་གི་མཆོག་གྱུར་ལྷོ་རྒྱལ་འཛམ་གླིང་འདིར། །དུར་ཁྲོད་བརྒྱད་དང་གནས་ཡུལ་ཉེར་བཞིའི་བདག །དབུས་གཙང་རུ་བཞི་མདོ་ཁམས་སྒང་དྲུག་དང་། །རྒྱ་གར་རྒྱ་ནག་ཧོར་དང་འཇང་གི་ཡུལ། །སོག་ཡུལ་གྲུ་གུ་མཐར་ལེགས་ཞང་ཞུང་ཡུལ། །གར་ལྷོག་ལ་སོགས་མཐའ་ཁོབ་ཡུལ་རྣམས་དང་། །ཉོང་པོ་འོལ་ཀ་དྭགས་ཀོང་གཉལ་ལོ་བྱར། །མོན་ཡུལ་རྡོ་དང་ལྷོ་བྲག་གྲུ་ཤུལ་གློ། །ཨ་ལ་རྡོད་དང་རྔུ་ཡི་ཉིན་སྲིབ་དང་། །ཁྱད་པར་མདོ་ཁམས་སྨད་ཀྱི་གཞི་བདག་ནི། །ལྷོ་ཡི་རོང་ལྷ་རྒྱལ་བཙན་ཁ་བ་དཀར། །མོ་ནམ་མཆེད་བརྒྱད་དམག་དཔོན་དགྲ་འདུལ་དང་། །སྐམ་གྱི་ཐོད་སྒྲལ་དམག་ཡོལ་ག་པ་དང་། །རྩི་ཡི་བང་རྒོད་གང་དཀར་མཆེད་བརྒྱད་པོ། །འདུས་རི་མཐོན་པོ་འབྲི་ལུང་ཉིན་སྲིབ་ཡུལ། །གདན་གྱི་དབང་སྙེ་སྨེ་དགུ་གེ་མཛོའི་རི། །སྤོ་འབོར་སྒང་གི་གཞི་བདག་ཐམས་ཅད་དང་། །ཨི་ཚ་རི་དང་ཧ་ཞན་འགའ་བྱང་ངོས། །རྨ་ལུང་དན་ཏིག་རི་བོ་ཀརྟི་ཀ །བསམ་གཏན་གང་བཟང་གནམ་ཚོ་ཕྱུག་མོའི་བདག །ཞང་ཞུང་ལ་བོ་ཆེ་དང་དབྱར་མོ་ཐང་། །བེ་རི་དུག་མཚོ་སྟོང་རི་མཚོ་ནག་དང། །ཚྭ་མཚོ་དཀར་མོ་ཁྲི་ཤོག་རྒྱལ་མོ་མཚོ། །ཙོང་ཀའི་མཚོ་སྔོན་ཙོང་ཀའི་ཉིན་སྲིབ་རིར། །སྤོ་ཏིའི་བྲག་དམར་སྤོ་ཟིའི་ཤེལ་ལུང་ཕྱུགས། །གྲོལ་གྱི་གཡའ་ལུང་ཡལ་གྲོལ་རལ་གསུམ་ཚོགས། །དགུ་རིམ་བཞི་གསུམ་གཞི་བདག་ཐམས་ཅད་དང་། །སྙེ་གོང་སྙེ་དམར་སྙེ་གོང་ཉིན་སྲིབ་སོགས། །བྲག་དམར་བྱ་རྒོད་འོ་དེ་རལ་གསུམ་དང་། །སྨར་ཁམས་སྒང་དང་ཚྭ་རོང་རྒྱལ་མོ་རོང་། །ཡུལ་ལྷ་གཞི་བདག་འཁོར་དང་བཅས་པ་རྣམས། །འབོ་ཡུལ་གངས་དཀར་བཞག་ར་གཡུ་ཁྲོམ་རྒྱལ། །ཁ་བ་ལུང་རི་གཉན་པོ་གཡུ་རྩེ་དང་། །རམ་རམ་མཆེད་གསུམ་ཞི་དར་མཆེད་བརྒྱད་ཚོགས། །གནས་བདག་ལྷ་བཙན་རྡོ་རྗེ་ཐོག་རྒོད་རྩལ། །ཁྱད་པར་ཡུལ་ཕྱོགས་འདི་ལ་གནས་པ་ཡི། །འདོད་རྒུ་བསམ་འཕེལ་ནོར་བུ་འབར་བ་ནི། །རིན་ཆེན་བྲག་རི་ནགས་ཚལ་མེ་ཏོག་བཀྲ། །མཚོ་དང་ཆུ་མིག་བརྒྱན་པའི་རི་བོ་ལ། །གནས་པའི་གཞི་བདག་ཡུལ་གྱི་མི་དཔོན་ཚུལ། །ཕ་རོལ་གཡུལ་ལས་རྒྱལ་བའི་ལྷ་གཅིག་པུ། །དཔྱལ་གྱི་བྲག་ལ་གནས་པའི་སྨན་བཙུན་མ། །མིང་པོ་ལྷ་ཡི་དགེ་བསྙེན་དྲག་རྩལ་ཅན། །ལྕམ་དྲལ་རྣམ་གཉིས་འཁོར་དང་ཡང་འཁོར་བཅས། །ནུབ་ཕྱོགས་མགོན་པོ་ཤྭ་ནའི་ལུང་པ་རུ། །ལྷ་ཡི་དགེ་བསྙེན་ཁྲོ་འཛུམ་གཟི་བརྗིད་འབར། །བཀྲ་ཤིས་ཕུན་སུམ་ཚོགས་པའི་ལུང་པའི་ནང་། །གནས་པའི་གཞི་བདག་ཡུལ་ལྷ་འབྱུང་པོའི་ཚོགས། །ལྷོ་ཕྱོགས་རྟ་ཡི་ལུང་པ་མཛེས་པ་ལ། །གངས་བྲག་རྫ་སྤང་མཚོ་དང་ནགས་ཚལ་དུ། །གནས་པའི་གཞི་བདག་མཚོ་སྨན་འཁོར་དང་བཅས། །འདོད་འབྱུང་བ་དང་དཔག་བསམ་ཤིང་ལྟ་བུའི། །དངོས་གྲུབ་ཀུན་རྩོལ་རིན་ཆེན་གཏམས་པའི་རི། །ངོ་བོ་གདོད་ནས་ཆོས་སྐུ་རང་བཞིན་ལ། །རྣམ་པ་ཡུལ་སྐྱོང་གཙོ་བོ་དྲེགས་པ་ཆེ། །གཞན་ཡང་དཀར་ཕྱོགས་སྐྱོང་བའི་གཞི་བདག་ནི། །བདག་ལ་འགོ་ཞིང་སྡོང་གྲོགས་མཛད་པའི་རིགས། །ཡུལ་ཕྱོགས་ཉེ་བར་གང་དུ་བཞུགས་གྱུར་ཀྱང་། །བསང་ངོ་མཆོད་དོ་ཐུགས་དམ་དགྱེས་བསྐང་མཛོད། །དགོན་གནས་བཙུག་ལག་ཁང་ལ་གནས་པ་དང་། །དཀའ་ཐུབ་གནས་དང་སྒྲུབ་ཁང་ལ་གནས་པ། །གྲོང་དང་གྲོང་ཁྱེར་རྒྱལ་པོའི་དཀོར་མཛོད་ནང་། །སྦྲ་གུར་ཁང་ཁྱིམ་ཕྱུགས་ལྷས་གང་གནས་དང་། །གནས་བདག་དཀོར་བདག་ཡུལ་ལྷ་གཉེན་པོ་ཆེ། །ཐབ་ལྷ་ཡུ་མོ་ཁྱིམ་ལྷ་གེལ་ཐུང་ཚོགས། །སྒྱེད་ལྷ་སྤུན་གསུམ་མེ་ལྷ་དྲང་སྲོང་ཆེ། །ཐབ་ལྷ་གྲུ་བཞི་ནོར་ལྷ་ཕྱུགས་ཀྱི་བདག །མཁར་ལྷ་སྦྲ་ལྷ་སྐྱེས་ལྷ་འཁོར་དང་བཅས། །དགྲ་ལྷ་ཞང་ལྷ་མ་ལྷ་སྲོག་ལྷ་དཀར། །ཕ་ལྷ་ལ་སོགས་འགོ་བའི་ལྷ་ལྔའི་ཚོགས། །བསང་ངོ་མཆོད་དོ་ཐུགས་དམ་དགྱེས་བསྐང་མཛོད། །ནོར་ལྷ་རྒྱ་མཚོའི་ལྷ་ཚོགས་ཐམས་ཅད་ཀྱིས། །བསྲུང་བྱར་གྱུར་པའི་ནོར་ཕྱུགས་ཐམས་ཅད་ལ། །གློ་གོར་ཧོན་གསུམ་ནོར་ནད་ཞི་གྱུར་ནས། །ནོར་ཕྱུགས་ཀུན་གྱིས་ས་སྟེང་གང་གྱུར་ཅིག །གཡང་དཀར་ལུག་ལ་སྐྱོབ་པའི་ལྷ་རྣམས་ཀྱིས། །གཡང་མོ་ལུག་ལ་བསྲུང་སྐྱོབ་མཛད་པ་དང་། །ལུག་ནད་གཏལ་འབྲུམ་ལ་སོགས་ཞི་བ་དང་། །ཕྱུགས་ལུག་གཡང་རྣམས་འཕེལ་བར་མཛད་དུ་གསོལ། །རྟ་ནོར་ལུག་སོགས་དུད་འགྲོའི་རིགས་གྱུར་ཀུན། །སྣ་ཚོགས་ཡུམ་དང་དུར་བདག་ལྕགས་སྒྲོག་མས། །སྔོན་གྱི་དམ་བཅའ་གཉན་པོ་ཉེར་དགོངས་ལ། །རྟ་ནོར་ལུག་སོགས་དུད་འགྲོའི་རིགས་གྱུར་རྣམས། །གཅན་གཟན་གནོད་པ་མཐའ་དག་སེལ་བར་མཛོད། །རིགས་དྲུག་སྙིང་རྗེའི་མགྲོན་དུ་གྱུར་པ་ཡི། །སྐྱེ་མཆེད་མུ་བཞི་གནས་རིས་བཅུ་བདུན་དང་། །འདོད་ལྷ་རིགས་དྲུག་ལྷ་ཡི་རིགས་གྱུར་པ། །ལྷ་མ་ཡིན་གྱི་རྒྱལ་པོ་ཐག་བཟང་རིས། །དབང་ཆེན་གསེར་གྱི་ས་གཞི་ལ་གནས་པ། །སྐར་ཕྲེང་གནས་དང་མགུལ་ཕྲེང་ལྷ་མ་ཡིན། །རི་རབ་ཆུ་མཚམས་ལྷ་གནས་ལྷ་མིན་གྱི། །རྒྱལ་པོ་སྒྲ་གཅན་འཛིན་པ་འཁོར་དང་བཅས། །གླིང་བཞི་མི་ཡི་རྒྱལ་པོ་སྤྱི་བོ་སྐྱེས། །གསོ་སྦྱོང་འཕགས་སོགས་རྒྱལ་རིགས་ཐམས་ཅད་དང་། །གྲགས་པ་ལ་སོགས་རྗེ་རིགས་འཁོར་དང་བཅས། །སྤྱི་མཁན་ལ་སོགས་བྲམ་ཟེ་ཐམས་ཅད་དང་། །སེངྒེ་ལ་སོགས་དམངས་རིགས་འཁོར་དང་བཅས། །མགོན་མེད་ཟས་སྦྱིན་ས་སོགས་ཁྱིམ་བདག་རིགས། །རིགས་བཞི་མི་ཡི་འགྲོ་བ་ཐམས་ཅད་དང་། །ས་འོག་ས་སྟེང་ལ་གནས་ཀླུ་ཡི་རིགས། །ཀླུ་ཡི་རྒྱལ་པོ་དགའ་བོ་འཇོག་པོ་དང་། །མཐའ་ཡས་རིགས་ལྡན་པདྨ་པད་ཆེན་རྒྱལ། །དུང་སྐྱོང་ནོར་རྒྱལ་མ་དྲོས་གཟི་ལྡན་པ། །མི་མགོན་དཀར་པོ་རྒྱལ་རིགས་རྗེ་རིགས་དང་། །དམངས་རིགས་བྲམ་ཟེ་གདོལ་བ་ནག་པོའི་རིགས། །ལྟོ་འཕྱེ་ལ་སོགས་དུད་འགྲོའི་རིགས་གྱུར་པ། །གླེན་ལྐུག་དུད་འགྲོའི་རིགས་སུ་གྱུར་པ་རྣམས། །ཡི་དྭགས་རྒྱལ་མོ་ཁ་ལ་མེ་འབར་དང་། །གཟི་བརྗིད་ཆེན་པོ་གཙོས་བྱས་ཡི་དྭགས་རིགས། །ཕྱི་ནང་སྒོས་ཁུར་སྒྲིབ་ཅན་སྡེ་ཚན་གསུམ། །མེ་ལྕེའི་འཁོར་ལོ་མཁའ་ལ་རྒྱུ་བ་སོགས། །བཀྲེས་སྐོམ་གདུང་བའི་ཡི་དྭགས་འགྲོ་བ་རྣམས། །དམྱལ་ཁམས་ལས་ཀྱི་དབང་ཕྱུག་ཆོས་ཀྱི་རྒྱལ། །ཨ་ཝ་གླང་མགོར་རཀྵ་ཕག་མགོ་ཅན། །འཁོར་དུ་གསོད་བྱེད་ལས་ཀྱི་གཤིན་རྗེ་དང་། །འགྲོ་བའི་སྲོག་ལེན་མེ་ལོང་སྟོན་པའི་ཚོགས། །མཚོན་ཆས་གཏུབ་དང་འབིག་ཅིང་བརྡེག་པ་ཡི། །སྡུག་བསྔལ་སྣ་ཚོགས་སྟོན་པའི་ལས་བྱེད་རྣམས། །ཡང་སོས་ཚ་བ་ལ་སོགས་ཚ་དམྱལ་བརྒྱད། །ཨུཏྤལ་ལྟར་གས་ལ་སོགས་གྲང་དམྱལ་བརྒྱད། །ཉི་ཚེ་ཉི་འཁོར་ལྷག་པ་བཅུ་དྲུག་སོགས། །ཞེ་སྡང་དམྱལ་བའི་འགྲོ་བ་མཐའ་དག་ཚོགས། །བགེགས་རྒྱལ་བི་ན་ཡ་ཀའི་གཙོས་བྱས་པ། །བགེགས་རིགས་སྟོང་ཕྲག་བརྒྱད་ཅུའི་ཚོགས་རྣམས་དང་། །ལྷ་ཀླུ་གནོད་སྦྱིན་ནམ་མཁའ་ལྡིང་གི་གདོན། །མཁའ་འགྲོ་ཤ་ཟ་རོ་ལངས་འབྱུང་པོའི་ཚོགས། །བདག་ཅག་ཁམས་གསུམ་འཁོར་བར་འཁྱམས་པའི་ཚེ། །དགྲ་གཉེན་བར་མ་སྣ་ཚོགས་གྱུར་པ་ན། །གཅེས་པ་སྲོག་དང་བརྟེན་པ་གནས་ཁང་དང་། །གནས་ས་ཞིང་དང་ཞིམ་མངར་ཟས་ཀྱི་རིགས། །གོས་དང་ལོངས་སྤྱོད་གསེར་དངུལ་ལན་ཆགས་པ། །བུ་ལོན་འབྲེལ་འདྲིས་ཕ་མ་བུ་ཚ་དང་། །མཛའ་བཤེས་ཉེ་འབྲེལ་རྐུ་འཕྲོག་རིགས་གྱུར་པ། །དགྲ་སྡང་གསོད་གཅོད་བརྡེག་བཙོག་ན་ཚ་སོགས། །བུ་ལོན་ལན་ཆགས་རིགས་སུ་གྱུར་པ་ལ། །བསང་ངོ་མཆོད་དོ་ཐུགས་དམ་དགྱེས་བསྐང་མཛོད། །ཁྱད་པར་གཤིན་གྱི་གྲལ་ན་བཞུགས་པ་ཡི། །རྒྱལ་བཙུན་པཎྡི་ཏ་དང་ལོ་ཙ་བ། །ཞང་བློན་སྨན་པ་བཟོ་བོ་དམག་དཔོན་དང་། །ཡུལ་དཔོན་སྐྱེ་བོ་རབ་འབྱམས་སྔ་རབས་པ། །ཕོ་བཙུན་གཡས་གྲལ་མོ་བཙུན་གཡོན་གྲལ་དང་། །བྱིས་པ་མཐའ་གྲལ་བཞུགས་པའི་ཚོགས་རྣམས་ནི། །དབུ་སྐར་སྤྱན་མཐིང་ལྗགས་དམར་གཤིན་གྱི་ཚོགས། །བསྐལ་བ་སྔོན་ནས་ཤ་མར་ཆང་གསུམ་སོགས། །བཟའ་བཏུང་ལོངས་སྤྱོད་མིང་ཡང་མ་ཚོར་བ། །བཀྲེས་ཤིང་ཕོངས་པར་གྱུར་པའི་འགྲོ་བ་རྣམས། །སོ་སོར་གང་ལ་ཅི་འདོད་ཕུལ་བ་ཡིས། །ཁྱད་པར་ཤི་མིག་གསོན་ལ་མ་བལྟ་བར། །གཤིན་གྱི་བརྩེ་གདུང་གསོན་ལ་མི་མཛད་པར། །རང་བཞིན་བཞུགས་ལ་དར་ཞིང་རྒྱས་པར་མཛོད། །ན་རྒ་ཤི་རྒ་ཐམས་ཅད་ཆོད་པ་དང་། །བདག་ཅག་མི་ནོར་འཁོར་དང་བཅས་པ་རྣམས། །ཆག་ཆེ་ཉམ་ང་ཐམས་ཅད་བཟློག་པ་དང་། །བཀྲ་ཤིས་བདེ་ལེགས་ཕུན་སུམ་ཚོགས་པར་མཛོད། །རྣམ་རྒྱལ་གཤིན་རྗེ་རྟ་མགྲིན་བདུད་རྩི་འཁྱིལ། །ལྕགས་ཀྱུ་ཞགས་པ་ལྕགས་སྒྲོག་དྲིལ་བུ་མ། །ཕྱི་ནང་སྒོ་སྲུང་ཡབ་ཡུམ་འཁོར་དང་བཅས། །གཞན་ཡང་མཆོད་སྦྱིན་མགྲོན་དུ་གྱུར་པ་རྣམས། །གློ་བུར་ལྷགས་པའི་མགྲོན་རིགས་ཚོགས་རྣམས་དང་། །ཁྱད་པར་ལྷག་མའི་མགྲོན་དུ་གཏོགས་པ་རྣམས། །ཁས་ཉེན་དབང་ཆུང་གཟུགས་ངན་གཟི་བརྗིད་ཆུང་། །ལོང་བས་མ་མཐོང་ཞ་བོ་མ་བསླེབས་པར། །འོན་པས་མ་གོ་ལྐུག་པས་མ་ཚོར་སོགས། །ལྷག་མ་བཤལ་ཆུ་རེ་བ་ཐམས་ཅད་ལ། །སྲིད་རྩེ་ན་རག་དམྱལ་བ་ཡན་ཆད་ཀྱི། །མཆོད་སྤྲིན་ལས་གྱུར་སྣང་སྲིད་མགྲོན་གྱི་ཚོགས། །གང་ལ་ཅི་འདོད་དམིགས་ཏེ་འབུལ་ལགས་ན། །ཐམས་ཅད་དགྱེས་ཤིང་རབ་ཏུ་ཚིམ་པར་གྱུར། །བསང་མཆོད་བཞེས་ལ་རེ་བ་བསྐང་གྱུར་ཅིག །མ་རིག་ལས་བྱུང་སྡུག་བསྔལ་སྣ་ཚོགས་པ། །སྤྱོད་ངན་རྐྱེན་གྱི་རྩ་རླུང་འཁྲུགས་པའི་ཚེ། །ཀུན་རྫོབ་སྒྱུ་མར་གྲིབ་ཀྱི་ཚུལ་དུ་ཤར། །སྣང་བ་བདེན་འཛིན་ཉོན་མོངས་སྤྲིན་ཚོགས་ཀུན། །རང་ཤར་རང་ཡལ་ནམ་མཁའ་དྭངས་བ་ལ། །གྲིབ་དང་གདོན་ཞེས་བྱ་བ་ག་ལ་གྲུབ། །ཤིང་མཆོག་ཙནྡན་དཀར་དམར་ཨ་ཀ་རུ། །མཁན་པ་ཤུག་པ་བ་ལུ་སྟག་པའི་ཤིང་། །སྤེན་དཀར་འོམ་བུ་སྦ་སྨྱུག་ཉ་སྦྲིད་དང་། །ཕོ་ཤིང་མོ་ཤིང་བུ་ཤིང་སྣ་ཚོགས་པ། །འབྲས་བུ་གསུམ་དང་བཟང་དྲུག་སྨན་སྣའི་ཚོགས། །ཏིལ་ནས་གྲོ་དང་སོ་བ་ཡུངས་དཀར་དང་། །བྱིན་བརླབས་དམ་རྫས་གུ་གུལ་དཀར་ནག་སོགས། །འབྲུ་སྣ་དར་ཟབ་རིན་ཆེན་རྩི་བཅུད་ཆང་། །ཝ་ཡི་སྤུ་གསོབ་དབང་པོ་ཚང་བ་དང་། །རྨ་བྱའི་མདོངས་ལ་སོགས་པ་ཡོ་བྱད་ཚོགས། །ཕྱི་ནང་གསང་གསུམ་མནོལ་གྲིབ་བསལ་བའི་རྫས། །མེ་ལ་བསྲེགས་པའི་དུད་པའི་སྤྲིན་ཕུང་གིས། །སྟེང་འོག་བར་གསུམ་ལྷ་ཀླུ་གཉན་པོ་སོགས། །ཕུག་ལྷ་སྒོ་ནོར་ཁྱིམ་ལྷ་ཁྱིམ་བདག་དང་། །ལུས་ངག་ཡིད་གསུམ་དགྲ་ལྷ་སྐྱེས་ཀྱི་ལྷ། །སྲོག་ལྷ་གཡང་ལྷ་གོས་ནོར་ལོངས་སྤྱོད་ལྷ། །རྨུག་ཅིང་འཐིབ་པར་བྱེད་པའི་མནོལ་གྲིབ་རྣམས། །ཐམས་ཅད་བསང་གིས་བྱང་ཞིང་དག་པར་མཛོད། །གཞན་ཡང་བསང་མགྲོན་ལྷ་ཚོགས་ཐམས་ཅད་ལ། །གཡུ་ཤུག་སྔོན་པོའི་བསང་ཀྱི་དུད་པའི་སྤྲིན། །རོ་བརྒྱ་ལྡན་པའི་ཞིམ་མངར་གསུར་མཆོད་དང་། །དཀར་གསུམ་མངར་གསུམ་མཆོད་པ་ཕུལ་བ་ཡིས། །ཕྲག་དོག་རིམ་ནད་ཐམས་ཅད་ཞི་བ་དང་། །མི་མཐུན་རྐྱེན་ངན་བར་ཆད་ཞི་བར་མཛོད། །ཁྱད་པར་ས་བདག་ཀླུ་གཉན་འཁོར་བཅས་ལ། །རྩི་ཤིང་སྣ་ཚོགས་དྲི་ཞིམ་སྤོས་དང་སྨན། །དཀར་གསུམ་མངར་གསུམ་ཞལ་ཟས་རིན་ཆེན་རིགས། །གོས་དང་བལ་མཚོན་སྟག་གཟིག་རས་མོའི་ཚོགས། །འབྲས་ཀྱི་གཡག་ལུག་ར་གསུམ་ཇ་ཆང་དང་། །ཉ་སྦལ་ཀླུ་བཤོས་སྟོད་ཇ་འབྲང་རྒྱས་དཀར། །གཡག་ལུག་རྟ་དང་མཛོ་དྲེལ་བ་ལང་ཁྱི། །མེ་ཏོག་བདུག་སྤོས་མཆོད་པའི་བྱེ་བྲག་གི།དགྱེས་ཤིང་མཉེས་པའི་མཆོད་པ་ཕུལ་བ་ཡིས། །དབང་པོའི་སྤྱོད་ཡུལ་ཐམས་ཅད་ཚིམ་གྱུར་ཅིག །འཇིག་རྟེན་ཁམས་ཀུན་གང་བའི་མཆོད་པ་འདི། །མཐོང་ཚིམ་རེག་དང་མྱོང་བའི་བདེ་བ་ཡིས། །མི་མཐུད་ནད་རིམ་མཐའ་དག་ཞི་བ་དང་། །བདག་དང་རྒྱུ་སྦྱོར་ཡོན་བདག་ཐམས་ཅད་ཀྱི། །ལྷ་ཀླུ་གཉན་གསུམ་ཕྲག་དོག་ཞི་གྱུར་ཅིག །ཁྱེད་རྣམས་ཐུགས་དང་འགལ་བ་མཆིས་གྱུར་ན། །ལྷ་ཀླུ་གཉན་གསུམ་དབང་པོ་དྭངས་གྱུར་ཅིག །ན་བ་ཡོད་ན་ད་ལྟ་སོས་གྱུར་ཅིག །བདག་ཅག་མ་རིག་བག་མེད་དབང་གྱུར་པས། །ཐུགས་དང་འགལ་བའི་ལས་སུ་གྱུར་པ་ཀུན། །མཐོལ་ལོ་བཤགས་སོ་བྱང་ཞིང་དག་གྱུར་ཅིག །བདག་དང་རྒྱུ་སྦྱོར་ཡོན་བདག་འཁོར་བཅས་ལ། །གནོད་ཅིང་འཚེ་བར་བྱེད་པ་ཐམས་ཅད་བཟློག །ས་གཉན་བརྐོས་དང་ཆུ་གཉན་དཀྲུག་པ་དང་། །རྡོ་གཉན་སློག་དང་ཤིང་གཉན་བཅད་པ་སོགས། །ཐབ་གཞོབ་འཁོན་གསུམ་ཤོར་བ་ཅི་མཆིས་པ། །ཁྱེད་རྣམས་བཟང་ངན་རྟོག་པ་མི་མངའ་བར། །སྤྲིན་མེད་ནམ་མཁའ་དྭངས་བའི་རང་བཞིན་ལྟར། །ཡེ་ཤེས་རིག་པའི་ཀློང་དུ་ཞི་གྱུར་ཅིག །ནད་མེད་ཚེ་དང་དཔལ་འབྱོར་རྒྱས་པ་དང་། །ཁམས་གསུམ་དབང་བསྡུས་དགྲ་བགེགས་གདུག་པ་སྒྲོལ། །ལོ་ལེགས་ཕྱུགས་འཕེལ་བསམ་དོན་ཀུན་འགྲུབ་ནས། །བཀྲ་ཤིས་བདེ་ལེགས་འགྲུབ་པར་མཛད་དུ་གསོལ། །དགྲ་ལྷ་བཅུ་གསུམ་དགྲ་ལྷ་ཝེར་མའི་ཚོགས། །སྤྲུལ་པ་ཡང་སྤྲུལ་ནམ་མཁའི་ཁམས་ཀུན་ཁྱབ། །ཀུན་ཀྱང་དཀར་ཕྱོགས་སྐྱོང་བའི་རུ་མཚོན་བསྒྲེངས། །མཐུ་ཆེན་དགྲ་ལྷ་གཉེན་པོ་འཁོར་བཅས་རྣམས། །ཁྱེད་རྣམས་བཞུགས་གནས་མཁར་གྱི་རྩེ་འདི་ཡིན། །ཁྲབ་རྨོག་གོ་ཁྲབ་རྣོ་ངར་མཚོན་ཆའི་རིགས། །མཛེས་པའི་རྟ་མཆོག་རྒྱན་ལྡན་རླུང་གཤོག་ཅན། །ཁྱེད་རྣམས་སྤྱན་གཟིགས་བརྟེན་རྫས་འདི་རྣམས་དང་། །ནམ་ཡང་འབྲལ་མེད་བདག་ཅག་འཁོར་བཅས་ལ། །སྡོང་གྲོགས་ཁ་འཛིན་རྒྱབ་རྟེན་མ་གཡེལ་ཞིག །སྟོང་བའི་ངང་ལས་བྷྲ྄ཱུྃ་ཡིག་ཡོངས་གྱུར་ལས། །རིན་ཆེན་སྣ་ལྔའི་རི་རབ་བང་རིམ་བཞི། །དབུས་སུ་འདོད་ཡོན་ཞལ་ཟས་སྣ་ཚོགས་ནི། །མཁོ་རྒུའི་ལོངས་སྤྱོད་འདོད་རྒུའི་དཔལ་དང་ལྡན། །དཔག་བསམ་ཤིང་ལྟར་འདོད་ཡོན་ཆར་འབེབ་གྱུར། །རི་རབ་དེ་ཡི་ཕྱོགས་བཞི་མཚམས་རྣམས་སུ། །ཡིད་འོང་རིན་ཆེན་སྣ་ལྔ་ལས་གྲུབ་པའི། །ཁྱུང་ནག་གསེར་མིག་བྱ་ནག་འདབ་ཆགས་རིགས། །དོམ་བུ་ཁྱི་ནག་སྟག་གཟིག་གཅན་གཟན་ཚོགས། །རི་དྭགས་གཡུང་དྭགས་ཤེལ་སྒོང་ནག་པོ་དང་། །ཆུ་རྟ་རྒྱན་ལྡན་སྦལ་སྦྲུལ་ཆུ་གནས་ཚོགས། །སྣ་ཚོགས་ན་བཟའ་རིན་ཆེན་སྣ་ལྔའི་ཕྲེང་། །གསེར་གྱི་བྱེ་མ་རྒྱན་ཆ་སྣ་ཚོགས་དང་། །ཤེལ་ཕྲེང་ཁྱི་དམར་རུ་མཚོན་ཤ་ཁྲག་སྙིང་། །ཅང་ཤེས་གཏེར་བུམ་ཙནྡན་དམར་པོའི་ཆབ། །བདུད་རྩི་ཤ་ཁྲག་གསེར་སྐྱེམས་དམར་ཀྱི་གཏོར། །ཕྱི་ནང་གསང་བའི་མཆོད་གཏོར་མཐུན་པའི་རྫས། །བསང་དུད་སྤྱན་གཟིགས་སྣ་ཚོགས་གསུར་གྱིས་མཆོད། །འདོད་ཡོན་རྣམ་ལྔ་མེ་ཏོག་ཕྲེང་བ་དང་། །དཀར་གསུམ་མངར་གསུམ་གསེར་དངུལ་རིན་ཆེན་བུམ། །གསེར་གཡུ་སྦ་སྨྱུག་མཆོད་སྦྱིན་གཏོར་མ་སྨན། །ར་ནག་སྙིང་དང་ནས་ནག་གསེར་དངུལ་ཕྱེ། །ཤ་ཆང་ཡིད་དང་མཐུན་པའི་གཏོར་མ་དང་། །རིན་ཆེན་སྣ་ལྔའི་དར་ཟབ་དོང་རྩེ་དང་། །རང་རང་སོ་སོར་དགྱེས་པའི་གཏོར་མ་ཡིས། །སྐུ་གླུད་དར་ཟབ་ལན་ཆགས་ཆང་བུ་དང་། །བརྔན་པར་འོས་པའི་མགྲོན་རིགས་མཆོག་དམན་ལ། །གང་ལ་ཅི་འདོད་བརྔན་ཞིང་འབུལ་ལགས་ན། །སྔོན་ཚེ་པད་འབྱུང་ཁྲི་སྲོང་ལྡེའུ་བཙན་གྱིས། །དཔལ་གྱི་བསམ་ཡས་གཙུག་ལག་བཞེངས་པའི་ཚེ། །ལྷ་འདྲེ་རྣམས་ཀྱིས་བར་ཆད་བརྩམས་པ་ན། །བརྔན་འདི་བྱས་པས་བར་ཆད་ཞི་བ་ལྟར། །དེ་ཕྱིར་ཕྱི་རབས་རྣལ་འབྱོར་བདག་ཅག་གི།དེ་རིང་རྒྱགས་བརྔན་ཆེན་པོ་བྱས་པའི་མཐུས། །གང་འདོད་ཕྲིན་ལས་རྣམ་བཞི་འགྲུབ་པ་དང་། །སངས་རྒྱས་བསྟན་སྲུང་སྒྲུབ་ལ་བར་ཆད་བཟློག །ལྷ་ཁང་བཞེངས་དང་དགོན་གནས་བྱེད་པ་དང་། །སྙན་གྲགས་སྤེལ་དང་མཁར་ལས་བཀྲ་ཤིས་ལས། །མི་ནད་ཡམས་ནད་མི་ཁ་བྲ་མཆུ་ངན། །རྒྱན་དང་རྩོད་པ་དམག་འཁྲུགས་ཀུན་ཞི་ཞིང་། །ཐག་རིང་མགྲོན་པོ་གྲུ་ཆེན་སྒྲོལ་བ་དང་། །ལམ་འཕྲང་བསྒྲོད་དང་ར་མདའ་རྗེས་གཅོད་སོགས། །ཚོང་སོགས་བྱ་བ་ཐམས་ཅད་སྒྲུབ་པའི་ཚེ། །ཡིད་ལ་ཅི་འདོད་ལྷུན་གྱི་འགྲུབ་པ་དང་། །བཀྲ་ཤིས་བདེ་ལེགས་ཕུན་སུམ་ཚོགས་པར་ཤོག །དེ་ལྟར་བསང་མཆོད་ཕུལ་བའི་བྱིན་རླབས་གྱིས། །བླ་མ་ཡི་དམ་མཁའ་འགྲོ་ཆོས་སྐྱོང་ཚོགས། །ནོར་ལྷ་གཏེར་བདག་ཡུལ་ལྷ་ཀླུ་གཉན་དང་། །གཞི་བདག་བརྟན་མ་གནོད་སྦྱིན་ཚོགས་རྣམས་ཀྱིས། །བདག་ཅག་ཡོན་མཆོད་འཁོར་དང་བཅས་པ་ཡི། །ནད་མེད་ཚེ་དང་ལོངས་སྤྱོད་རྒྱས་པ་དང་། །དབུ་འཕང་དགུང་དུ་བསྟོད་པའི་ཁ་འཛིན་མཛོད། །དགའ་ཞིང་ལྷ་ཆོས་དར་བའི་ཁ་འཛིན་མཛོད། །སྐྱིད་ཀྱི་མུ་མཐའ་རིང་བའི་ཁ་འཛིན་མཛོད། །བཀྲ་ཤིས་ཕུན་སུམ་ཚོགས་པའི་ཁ་འཛིན་མཛོད། །བདག་ཅག་ཡོན་མཆོད་འཁོར་དང་བཅས་པ་རྣམས། །ཉི་མ་ཕྱོགས་བཞི་མཚམས་བརྒྱད་གར་འགྲོ་ཡང་། །བླ་མ་ཡི་དམ་མཁའ་འགྲོས་ལམ་སྣ་དྲོངས། །དཔའ་བོ་དཔའ་མོ་སྲུང་མས་ལམ་སྣ་དྲངས། །འགོ་བའི་ལྷ་ལྔའི་ཚོགས་ཀྱིས་ལམ་སྣ་དྲོངས། །བདག་ཅག་ཡོན་མཆོད་གང་དུ་འགྲོ་གྱུར་ཀྱང་། །རྟག་ཏུ་མཐུ་དཔུང་སྡོང་གྲོགས་མཛད་དུ་གསོལ། །སྐྱབས་ཀྱི་མཆོག་གྱུར་དཀོན་མཆོག་རིན་ཆེན་གསུམ། །རྩ་བརྒྱུད་བླ་མ་ཡི་དམ་ཞི་ཁྲོ་དང་། །དཔའ་བོ་མཁའ་འགྲོ་ཆོས་སྐྱོང་རྒྱ་མཚོའི་ཚོགས། །ཕྱི་ནང་གསང་བ་མཆོག་གི་སྡེ་བརྒྱད་དང་། །སྤྲུལ་པའི་སྡེ་བརྒྱད་སྣང་སྲིད་སྡེ་བརྒྱད་ཚོགས། །བསང་མཆོད་བཞེས་ལ་ཕྲིན་ལས་འགྲུབ་པར་མཛོད། །ཀྱཻ། དེ་རིང་ཕྱྭ་བཀུགས་དེ་རིང་གཡང་དུ་ལེན། །སངས་རྒྱས་བྱང་སེམས་རྩ་གསུམ་ཐུགས་རྗེའི་གཡང་། །སྡེ་བརྒྱད་དྲག་རྩལ་ཆོས་སྐྱོང་མཐུ་སྟོབས་གཡང་། །དགོན་གནས་དར་རྒྱས་བསྟན་པ་རྒྱས་པའི་གཡང་། །དབྱར་གྱི་མཚོ་ལྟར་དགེ་འདུན་རྒྱས་པའི་གཡང་། །མཁས་བཙུན་གྲུབ་ཐོབ་བྱིན་རླབས་ཡོན་ཏན་གཡང་། །ལྷ་ཀླུ་གནོད་སྦྱིན་ཚེ་ནོར་ཕྱུགས་ཀྱི་གཡང་། །རི་རབ་གླིང་བཞི་གླིང་ཕྲན་བཅུད་ཀྱི་གཡང་། །གསེར་རི་རོལ་མཚོ་ཉི་ཟླའི་དཔལ་གྱི་གཡང་། །དཔག་བསམ་ཤིང་ལས་དགོས་འདོད་འབྱུང་བའི་གཡང་། །བཀྲ་ཤིས་རྫས་རྟགས་རྒྱལ་སྲིད་བདུན་གྱི་གཡང་། །ཕ་རོལ་གཡུལ་ལས་རྒྱལ་བའི་དམག་གི་གཡང་། །ཁྲབ་རྨོག་གོ་དང་རྣོ་ངར་མཚོན་གྱི་གཡང་། །སྟོང་གསུམ་སྐད་ཅིག་བསྒྲོད་པ་རྟ་ཡི་གཡང་། །གཡང་དཀར་ལུག་དང་ནོར་ཕྱུགས་རྒྱལ་པའི་གཡང་། །འཕན་པོ་མི་དང་བང་མཛོད་འཕེལ་བའི་གཡང་། །རྨ་གཡང་ཟས་དང་དར་ཟབ་གོས་ཀྱི་གཡང་། །ཕོ་གཡང་མོ་གཡང་རིགས་བརྒྱུད་སྤེལ་བའི་གཡང་། །སྙན་གྲགས་རླུང་རྟ་སྲིད་རྩེར་སྦྲེང་བའི་གཡང་། །གཡང་གི་དངོས་གྲུབ་མ་ལུས་བདག་ལ་སྩོལ། །གཡང་གི་མཚོ་མོ་རྒྱ་མཚོ་ལྟ་བུར་རྒྱས། །གཡང་གི་དཔལ་དང་ཡོན་ཏན་འཕེལ་གྱུར་ཅིག །གཡང་གི་ར་བས་ས་སྟེང་གང་བར་ཤོག །དགྲ་ལྷ་གཉེན་པོ་འཁོར་དང་བཅས་པ་ལ། །མདའ་དར་ཕྱེ་མར་ཟས་ཕུད་དཀར་དམར་སྐྱེམས། །འབྲང་རྒྱས་ཞལ་དཀར་གཡག་ལུག་ར་གསུམ་སོགས། །མཁོ་རྒུའི་དཔལ་འབྱོར་མཐུན་རྫས་བསམ་མི་ཁྱབ། །དངོས་འབྱོར་ཡིད་སྤྲུལ་ཕུལ་བའི་བྱིན་རླབས་ཀྱིས། །དེང་ནས་བྱང་ཆུབ་སྙིང་པོ་མ་ཐོབ་པར། །དམ་པ་མཆོག་དང་མི་འབྲལ་འགྲོགས་ནས་ཀྱང་། །མཆོག་ཐུན་དངོས་གྲུབ་མ་ལུས་སྩལ་དུ་གསོལ། །བཟོད་པར་གསོལ་བ་ནི། ཧཱུྃཿ སྲིད་དང་ཞི་བའི་མགྲོན་རིགས་མཆོག་དམན་ལ། །དག་བྱེད་བསང་གི་མཆོད་པ་ཕུལ་བའི་མཐུས། །བག་མེད་འགལ་འཁྲུལ་གྱུར་པ་ཅི་མཆིས་པ། །གནོང་ཞིང་འགྱོད་པའི་སེམས་ཀྱིས་བཤགས་པར་བགྱི། །ཡི་གེ་བརྒྱ་བའི་ལྷག་ཆད་ཁ་བསྐང་། ཀྱཻ། བསང་དང་ཞི་བའི་མགྲོན་ལ་སྤྱན་དྲངས་པ། །སྲིད་ཞིའི་མགྲོན་རིགས་མ་ལུས་འཁོར་དང་བཅས། །དགྱེས་རྒུའི་དཔལ་ལ་རོལ་ཏེ་རང་གནས་གཤེགས། །སླར་ཡང་གདུལ་བྱར་དགོངས་ལ་འབྱོན་པར་མཛོད། །བཛྲ་མུཿ བསྔོ་བ་ནི། བདག་གཞན་དུས་གསུམ་རྣམ་དཀར་ཅི་མཆིས་དང་། །འདོད་ཡོན་བསང་མཆོད་ཕུལ་བའི་དགེ་ཚོགས་ཀྱིས། །འཇིགས་རུང་ངན་འགྲོའི་གནས་སུ་འཁྱམས་པ་རྣམས། །མཐར་ཐུག་བྱང་ཆུབ་ཐོབ་པའི་རྒྱུ་རུ་བསྔོ། །སྨོན་ལམ་ནི། བསྟན་འཛིན་སྐྱེས་བུའི་སྐུ་ཚེ་བརྟན་པ་དང་། །བསྟན་པ་དར་ཞིང་དགེ་འདུན་སྡེ་རྒྱས་ཤིང་། །འགྲོ་རྣམས་ཕུན་ཚོགས་དཔལ་ལ་སྤྱོད་གྱུར་ནས། །མྱུར་དུ་བླ་མེད་བྱང་ཆུབ་ཐོབ་པར་ཤོག །བཀྲ་ཤིས་ནི། ཧཱུྃ་བྱིན་རླབས་ཀུན་སྩོལ་རྩ་བརྒྱུད་བླ་མ་དང་། །དངོས་གྲུབ་མཆོག་སྩོལ་ཡི་དམ་ཞི་ཁྲོའི་ཚོགས། །མ་དང་མཁའ་འགྲོ་སྲུང་མའི་ཚོགས་རྣམས་ཀྱིས། །བདེ་སྐྱིད་དཔལ་ལ་སྤྱོད་པའི་བཀྲ་ཤིས་ཤོག །དེ་ལྟར་རྒྱུན་གྱི་སྤྱི་བསང་བསྡུས་པ་ནི། །དཔག་བསམ་འདོད་རྒུའི་འབྲས་སྟེར་ཞེས་བྱ་འདི། །ཨ་ཐུབ་སྲས་པོ་ཚེ་དབང་ཕུན་ཚོགས་ནས། །རབ་དཀར་ཟླ་བའི་མདངས་ལྡན་ལྷ་རྫས་བཅས། །འདི་ལྟར་དགོས་ཞེས་བསྐུལ་བ་ལ་བརྟེན་ནས། །ཤིང་མོ་ལོག་ལོའི་ཡར་ཚེས་བཟང་པོ་ལ། །ཐུབ་བསྟན་ཆོས་ཀྱི་རྡོ་རྗེས་བྲིས་ན་ཡང་། །སླར་ཡང་རྟེན་འབྲེལ་ལ་ཉེ་བཟང་པོ་ལ། །བརྟེན་ནས་སྒྱུ་མའི་འཁྲུལ་བྱུང་གང་ཤར་འདི། །ས་ཕོ་རྟ་ལོའི་ཟླ་༨ཚེས་༣༣བཟང་པོ་ལ། །རང་སྤྱིལ་འཆི་མེད་གྲུབ་པའི་དགའ་ཚལ་དུ། །རང་གི་ལྷག་བསམ་རྣམ་པར་དག་པ་ཡིས། །རང་དོན་ཙམ་མིན་མཁའ་ཁྱབ་སེམས་ཅན་ཀུན། །རང་བཞིན་གདོད་མའི་དབྱིངས་སུ་གྲོལ་བའི་ཕྱིར། །རྫོགས་ཆེན་སྐྱེ་སྲིད་ལྔ་པའི་སྒྲོ་བཏགས་པ། །ཐུབ་བསྟན་ཆོས་ཀྱི་རྡོ་རྗེས་བྲིས་པ་དགེ། །།