རྫོགས་པ་ཆེན་པོའི་ཉམས་ལེན་ཐར་བའི་ལམ་བཟང་ཞེས་བྱ་བ་བཞུགས་སོ།།

རྗེ་དྲིན་ཆེན་བླ་མ་རྡོ་རྗེ་འཆང་། །མགོན་འཇམ་དབྱངས་མཁྱེན་བརྩེ་དབང་པོ་དེ། །བུ་བདག་གི་བདེ་ཆེན་འཁོར་ལོ་རུ། །མི་འབྲལ་རྒྱན་གྱི་ཚུལ་དུ་བཞུགས། །ད་ལྟ་མི་ལུས་རིན་ཆེན་ཐོབ། །ཕྱི་འདི་འདྲ་ཡང་ཡང་རྙེད་པར་དཀའ། །དེ་བས་ཐོག་མ་ཉིད་དུ་ནི། །བློ་ལྡོག་རྣམ་བཞི་ཡང་ཡང་སྒོམས། །དེ་ནས་ཐུན་མིན་སྔོན་འགྲོ་ལ། །རིམ་པ་བཞིན་དུ་བསྒྲུབ་པར་མཛོད། ཁྱད་པར་བླ་མའི་རྣལ་འབྱོར་འདི། །ཉམས་ལེན་ཐམས་ཅད་ཀྱི་རྟེན་གཞི་ཡིན། །ཐོག་མར་དཔལ་ལྡན་བླ་མ་དེ། །བརྟན་བསྟེན་དགོངས་སྤྱོད་བསླབ་པར་མཛོད། །སྤྱིར་ཀུན་གྱི་རྩ་བ་དད་པ་སྟེ། །དད་པའི་རྣམ་གྲངས་འགའ་མཆིས་ཀྱང་། །དང་འདོད་ཡིད་ཆེས་དད་པ་དང་། །གཞན་ཡང་དད་པ་བརྟན་པའི་ཚུལ། །འགྱུར་ལྡོག་མེད་པ་རི་རྒྱལ་ལྟར། །འཕེལ་འགྲིབ་མེད་པ་ཉི་མ་ལྟར། །ཁ་གཏིང་མེད་པ་རྒྱ་མཚོ་ལྟར། །བྱས་ཡུས་མེད་པ་མ་ལྟ་བུ། །མཐའ་དབུས་མེད་པ་ནམ་མཁའ་ལྟར། །སྐྱོ་དུབ་མེད་པ་གྲུ་ཟམ་ལྟར། །དེ་ལ་སོགས་པ་ཚུལ་བཅུ་ཡིས། །དུས་རྟག་ཏུ་དད་པ་འབྲལ་མེད་དགོས། །གལ་ཏེ་དད་པ་མེད་པའི་མི། །གཟུགས་མཛེས་མིག་མེད་འདྲ་བ་སྟེ། །དེས་ན་དད་པ་བརྟན་པ་ནི། །ཤིན་ཏུ་གནད་དོན་ཆེ་བ་ལགས། །འཁོར་བའི་ཆུ་བོ་ཆེན་པོ་ལས། །སྒྲོལ་བར་མཛད་པའི་དེད་དཔོན་ཚུལ། །བཀའ་དྲིན་ཅན་གྱི་བླ་མ་དེ། །གནས་སྤྱི་གཙུག་ཉི་ཟླའི་གདན་སྟེང་དུ། །རིགས་བདག་རྒྱན་གྱི་ཚུལ་དུ་སྒོམས། །བླ་མའི་སྐུ་ཡི་གནས་བཞི་ལས། །ཨོཾ་དཀར་ཨཱཿདམར་ཧཱུྃ་མཐིང་ལས། །དཀར་དམར་མཐིང་གསུམ་གྱི་འོད་ཟེར་ཚོགས། །བཀྲག་མདངས་ལྡན་པར་འཕྲོས་པ་ལས། །བུ་ཁྱོད་ཀྱི་གནས་བཞི་ཐིམ་པ་ཡིས། །སྒྲིབ་བཞི་བག་ཆགས་དག་ནས་སུ། །ལམ་རྣམ་པ་བཞི་པོ་སྒོམ་ལ་དབང་། །འབྲས་བུ་སྐུ་བཞི་ཐོབ་པར་བསམ། །མཐར་ནི་བླ་མའི་ཐུགས་ཉིད་དང་། །རང་གི་སེམས་ཉིད་དབྱེར་མེད་པར། །མཉམ་ཉིད་ངང་དུ་མཉམ་པར་བཞག །བུས་རེ་འགའ་བླ་མ་མགྲིན་པར་སྒོམས། །བཟའ་བཏུང་ཚོགས་ཀྱི་ཚུལ་དུ་མཆོད། །དེ་ལྟར་མཛད་ན་ཐ་མལ་གྱི། །ཟས་ཀྱི་དབང་དུ་མི་འགྲོ་བར། །ཚོགས་གཉིས་ཀྱི་བསོད་ནམས་དཔག་ཏུ་མེད། །ལོངས་སྤྱོད་ནོར་སྒྲུབ་མཆོག་ཏུ་ལགས། །བུ་གང་དུ་འགྲོ་བའི་གནས་དག་ཏུ། །བཀའ་དྲིན་ཅན་གྱི་བླ་མ་དེ། །ཕྲག་པ་གཡས་ཀྱི་ཕྱོགས་སུ་སྒོམས། །བདག་སོགས་སེམས་ཅན་ཐམས་ཅད་ཀྱི། །བསྐོར་བ་བྱེད་ཅིང་སྒྲིབ་དག་བསམ། །ཉལ་བའི་རྣལ་འབྱོར་ལ་བརྩོན་ཚེ། །བླ་མ་སྙིང་གི་དབུས་སུ་སྒོམས། །སེམས་ཉིད་མ་བཅོས་རྟོག་བྲལ་ངང་། །ཆོས་ཉིད་ངང་དུ་ཉལ་བ་ན། །འོད་གསལ་གྱི་འཆར་སྒོ་ཤར་བའི་ཚེ། །རྨི་ལམ་སྤྲུལ་བསྒྱུར་ལ་བརྩོན་པར་མཛོད། །སྤྱིར་འཛམ་གླིང་ལས་ཀྱི་ས་པ་སྟེ། །ཚེ་ལ་ངེས་པ་མེད་པའི་ཕྱིར། །མ་བསྒོམས་འཕོ་བའི་གདམས་པ་ལ། །ཡང་ཡང་བརྩོན་ཞིང་འབད་པར་རིགས། །སྤྱིར་འཕོ་བ་རྣམ་གྲངས་མང་མཆིས་ཏེ། །རབ་ཆོས་སྐུ་ལྟ་བ་རྒྱས་འདེབས་དང་། །འབྲིང་ལོངས་སྐུ་བསྐྱེད་རྫོགས་ཟུང་འཇུག་དང་། །ཐ་མ་སྤྲུལ་སྐུ་ཚད་མེད་ཐུགས་རྗེའི་འཕོ་བ་ཞེས། །ཐ་མལ་འདུ་ཤེས་སུམ་ལྡན་གྱི་འཕོ་བ་སྟེ། །འཕོ་བའི་རྣམ་གྲངས་མང་ལགས་ཀྱང་། །སྐབས་འདིར་འདུ་ཤེས་གསུམ་ལྡན་གྱི་འཕོ་བ་སྟེ། །རྩ་དབུ་མ་ལམ་གྱི་འདུ་ཤེས་དང་། །སེམས་རྣམ་ཤེས་མགྲོན་པོའི་འདུ་ཤེས་ཏེ། །གནས་བདེ་ཆེན་དག་པའི་ཞིང་ཁམས་ལ། །འགྲོ་བ་སྙམ་པའི་འདུ་ཤེས་ཏེ། །དེ་ཡང་རང་ལུས་རྣལ་འབྱོར་མ། །དམར་ལ་ཞི་མ་ཁྲོ་ཡི་ཉམས། །དེ་སྣང་ལ་རང་བཞིན་མེད་པ་སྟེ། །དར་དམར་གྱི་གུར་ཕུབ་ལྟ་བུར་གསལ། །དེ་ཕྱི་ལུས་ཀྱི་སྟོང་ར་ལགས། །དེའི་ལུས་དབུས་དྲང་མོ་རྩ་དབུ་མ། །སྦོམ་ཕྲ་མདའ་སྨྱུག་འབྲིང་པོ་ཙམ། །དེ་ཡང་མཚན་ཉིད་བཞི་དང་ལྡན། །སྔོ་བ་མཐིང་ཤུན་དྭངས་བའི་མདོག །གསལ་བ་ཏིལ་གྱི་མར་མེ་ལྟར། །དྲང་བ་ཆུ་ཤིང་འདྲ་བ་སྟེ། །སྟོང་པ་ཤུབ་བུ་ཁོང་སྟོང་བ། །མཐོ་རིས་ཐར་བའི་ལམ་མཚོན་ཕྱིར། །སྤྱི་བོ་ཚངས་པའི་བུ་ག་རུ། །ཇི་ལྟར་རྒྱ་མཐོང་ཁ་ཕྱེ་ལྟར། །འཕོ་བ་ངན་སོང་སྒོ་འགག་ཕྱིར། །མར་སྣེ་ལྟེ་འོག་ཁ་ཟུམ་པ། །དེ་ནང་རྩ་ཡི་སྟོང་ར་ལགས། །སྙིང་ཁ་སྨྱུག་ཚིགས་འགག་པ་ལྟར། །དེ་སྟེང་པད་ཀར་འདབ་བརྒྱད་སྟེང་། །རྣམ་པར་ཤེས་པའི་ངོ་བོ་དེ། །དཀར་ལ་དམར་བའི་མདངས་ཆགས་པ། །བྱ་མ་སར་གྱི་སྒོང་ང་ལྟ་བུ་ཞིག །སྣུམ་ལ་འདྲིལ་བའི་རྣམ་པར་ཅན། །ནམ་ཐོ་རེངས་ཀྱི་སྐར་ཆེན་ཤར་བ་ལྟར། །འདར་ཞིང་གཡོ་བའི་རྣམ་པར་གསལ། །སྤྱི་བོ་གྲུ་གང་མ་རེག་ཙམ། །རྨ་བྱས་བཏེགས་པའི་ཁྲི་སྟེང་དུ། །ངོ་བོ་རྩ་བའི་བླ་མ་ལ། །རྣམ་པ་སངས་རྒྱས་འོད་དཔག་མེད། །མཆོག་གི་སྤྲུལ་སྐུའི་ཆ་བྱད་ཅན། །མཐའ་སྐོར་བརྒྱུད་པའི་བླ་མ་རྣམས། །སྔགས་འཆང་པཎྜི་ཏ་ཡི་ཆས། །གཞན་ཡང་རྣམ་འབྱོར་སྤྱོད་པའི་ཚུལ། །འོད་དང་འོད་ཟེར་འཕྲོ་བར་གསལ། །ཡིད་ཁྱེད་ཤེས་ཀྱི་མོས་གུས་དྲག་པོ་ཡིས། །གསོལ་འདེབས་སྨོན་ལམ་མཚམས་སྦྱར་ནས། །ཧིཀ་གི་སྒྲ་ཡིས་བསྐུལ་བའི་ཚེ། །ཇི་ལྟར་དཔག་ཆེན་མདའ་འཕང་ལྟར། །རིག་པ་སེམས་ཀྱི་རྟེན་གཞི་དེ། །དྭངས་མའི་ཐིག་ལེ་དཀར་པོ་ཉིད། །འོད་དཔག་མེད་ཀྱི་ཐུགས་ཀར་འཕོ། །བླ་མའི་ཐུགས་དང་རང་གི་སེམས། །དབྱེར་མེད་གཅིག་ཏུ་རོ་གཅིག་བསམ། །མཐར་ནི་སྤྱི་བོའི་འོད་དཔག་མེད། །ཚེ་དཔག་མེད་ཀྱི་སྐུར་གྱུར་ནས། །སྤྱི་བོའི་གནས་ནས་མར་ཐོན་ལ། །སྙིང་གི་དབུས་སུ་བཞུགས་པར་གྱུར། །མ་བསྒོམས་འཕོ་བའི་གདམས་པ་ལ། །གོམས་འདྲིས་བརྟན་ཆ་ཐོབ་པར་མཛོད། །དེ་དག་ལ་རིམ་གྱིས་སྦྱངས་ནས་སུ། །འཁོར་འདས་རུ་ཤན་དབྱེ་བ་སྟེ། །རང་གཅིག་པུ་མི་མེད་དབེན་པའི་སར། །གངས་ཁྲོད་རི་རྩེ་དུར་ཁྲོད་སར། །ཤིན་ཏུ་མཐོ་བའི་གནས་མཆོག་ཏུ། །སེམས་བསྐྱེད་དམ་བཅའ་བརྟན་པོ་ཡིས། །རིགས་དྲུག་ལུས་ཀྱི་སྤྱོད་པ་དང་། །ཡི་དམ་ལྷ་ཡི་བཞུགས་སྟངས་དང་། །རིགས་དྲུག་ངག་གི་སྒྲ་སྐད་དང་། །རིགས་དྲུག་སོ་སོའི་སྡུག་བསྔལ་ཚོགས། །སེམས་ཐོག་ལ་ཡང་ཡང་བླངས་ནས་སུ། །རྗེས་ཤེས་ཀྱི་རང་ངོ་བསྐྱང་བར་བྱ། །རིགས་དྲུག་སྲེག་སྦྱང་གི་རིམ་པ་སོགས། །སྔོན་འགྲོའི་ཆོས་རྣམས་ཐམས་ཅད་ལ། །རྩེ་གཅིག་མ་ཡེངས་བརྩོན་པར་མཛོད། །ལར་ད་ལྟའི་སྣང་བ་འདི་དག་ཀུན། །སྒྱུ་མ་ཙམ་དུ་གོ་ན་ཡང་། །བདེ་བའི་སྣང་བ་ཤར་བ་ན། །དེ་ལ་དགའ་ཞིང་ཞེན་པ་དང་། །སྡུག་བསྔལ་གྱི་སྣང་བ་ཤར་བའི་ཚེ། །དེ་ལ་མི་དགའ་སྡུག་བསྔལ་ན། །དེ་ལྟ་བུ་ཡི་རྣལ་འབྱོར་ཏེ། །སྟོང་ཉིད་རྟོགས་པ་མ་ལགས་སོ། །སྤྱིར་སྟོང་ཉིད་རྟོགས་པའི་རྣལ་འབྱོར་དེ། །རི་བྲག་ཟང་ཐལ་འགྲོ་བ་དང་། །ཆུ་བོའི་གཏིང་ལ་མི་བྱིང་བར། །ཀ་བ་བུམ་པ་ལ་སོགས་པ། །སྣང་ཙམ་ལས་རང་བཞིན་མེད་པ་སྟེ། །མདོར་ན་དངོས་པོ་ཐམས་ཅད་ལ། །བློ་ཐེ་ཚོམ་གྱི་དྲྭ་བ་ཆོད་ནས་སུ། །ངེས་པར་སྟོང་ཉིད་རྟོགས་གྱུར་ན། །ཚེ་ཕྱི་མ་གཤིན་རྗེའི་འཁྲུལ་སྣང་སོགས། །ཚ་གྲང་བཀྲེས་སྐོམ་སྡུག་བསྔལ་དང་། །བཀོལ་སྤྱོད་འཐབ་རྩོད་འཆི་འཕོ་ལྟུང་། །སྐྱེ་རྒ་ན་འཆིའི་སྡུག་བསྔལ་སོགས། །སེམས་ཅན་རང་རང་ལས་སྣང་ཀུན། །འཁྲུལ་བའི་སྣང་བ་ཅི་ཤར་ཡང་། །དེ་དག་སེམས་ཀྱི་ཆོ་འཕྲུལ་སྟེ། །དཔེ་སྒྱུ་མའི་སྐྱེས་བུ་རྟ་གྲུ་དང་། །རྨི་ལམ་མིག་ཡོར་བྲག་ཆ་ལྟར། །སྣང་ཡང་བདེན་པ་མེད་པ་ལགས། །ཀྱེ་ཧོ། ཡང་གསོན་དང་ལྟ་བ་ཞེས་བྱ་བ། །ལར་ད་ལྟ་གཟུགས་སྒྲ་དྲི་རོ་རེག །ཡུལ་ལྔ་བོ་མཐོང་དང་ཐོས་པ་དང་། །རྣམ་པར་མྱོང་དང་ཚོར་བྱེད་པ། །དེ་ནི་སེམས་སམ་རྣམ་རྟོག་ལགས། །དེ་དག་རྣམས་ལ་མ་ལྟོས་པར། །ཅི་ཡང་དྲན་མེད་ཐོམ་མེ་བ། །དེ་ལ་ཀུན་གཞི་ཡིན་པར་བརྗོད། །ཀུན་གཞིར་དྲི་མས་མ་གོས་པར། །གསལ་ཤིང་ས་ལེ་ཧྲིག་གེ་བར། །འདི་ཞེས་བརྗོད་དུ་མ་བཏུབ་པ། །ཐེ་ཚོམ་མེད་པར་རྟོགས་གྱུར་ན། །དེ་ལ་རིག་པ་ཡེ་ཤེས་འདོད། །དེ་ལྟ་བུའི་རིག་པའི་ཡེ་ཤེས་ཏེ། །སྟོང་ཉིད་ནམ་མཁའ་ལྟ་བུ་དེ། །དངོས་པོའི་ཆོས་ལ་ཉམས་ང་མེད། །གསལ་བ་ཉི་ཟླའི་དཀྱིལ་འཁོར་བཞིན། །བྱིང་རྒོད་གཉིས་ལ་ཉམས་ང་མེད། །འགྱུར་མེད་རི་རྒྱལ་ལྟ་བུ་སྟེ། །འཕོ་འགྱུར་གཉིས་ལ་ཉམས་ང་མེད། །ཉམས་མྱོང་ཡེ་ཤེས་རྒྱུན་ཆད་མེད། །རྣམ་རྟོག་ཚོགས་ལ་ཉམས་ང་མེད། །དཔེར་ན་ནམ་མཁའི་སྤྲིན་ཚོགས་དེ། །བྱུང་ཡང་ནམ་མཁའི་ངང་ལས་བྱུང་། །ཐིམ་ཡང་ནམ་མཁའི་ངང་ལ་ཐིམ། །ནམ་མཁའི་དབྱིངས་ལ་འཕོ་འགྱུར་བྲལ། །བར་སྣང་འཇའ་ཚོན་བཀྲ་བ་དེ། །བྱུང་ཡང་བར་སྣང་དག་ལས་བྱུང་། །ཐིམ་ཡང་བར་སྣང་ངང་ལ་ཐིམ། །བར་སྣང་སྟོང་པ་གཡོ་བ་མེད། །རྩི་བཅུད་མེ་ཏོག་སྣ་ཚོགས་ཀུན། །བྱུང་ཡང་ས་གཞི་རང་ལས་བྱུང་། །ཐིམ་ཡང་ས་གཞི་རང་ལ་ཐིམ། །ས་གཞིའི་ཁམས་ལ་འགྱུར་བ་མེད། །ནགས་ཚལ་འབྲས་བུ་སྣ་ཚོགས་པ། །བྱུང་ཡང་རི་བོའི་རྩལ་ལས་བྱུང་། །ཐིམ་ཡང་རི་བོ་རང་ལ་ཐིམ། །རི་རྒྱལ་རང་ལ་འཕོ་འགྱུར་མེད། །ཆུ་ལས་ཆུ་རླབས་བྱུང་བ་དེ། །དེ་དང་པོ་བྱུང་ཡང་ཆུ་ལས་བྱུང་། །ཐིམ་ཡང་ཆུ་བོ་ཉིད་ལ་ཐིམ། །ཆུ་བོ་རང་ལ་འཕོ་འགྱུར་མེད། །ཚོགས་དྲུག་གི་སྣང་བ་འདི་དག་ཀུན། །བྱུང་ཡང་རིག་པའི་རྩལ་ལས་བྱུང་། །གནས་ཀྱང་རིག་པའི་ངང་དུ་གནས། །ཐིམ་ཡང་རིག་པ་རང་ལ་ཐིམ། །རིག་པ་བདེ་གཤེགས་སྙིང་པོ་ལ། །སྤྲོས་པའི་མཚན་མ་ཀུན་དང་བྲལ། །སྤྲོས་དང་བྲལ་བ་ཆོས་ཀྱི་སྐུ། །གསལ་ལ་འཛིན་མེད་ལོངས་སྤྱོད་རྫོགས། །སྣ་ཚོགས་འཆར་གཞི་སྤྲུལ་སྐུ་སྟེ། །རང་བབས་གཤིས་ཀྱི་གནས་ལུགས་དེ། །རྟག་ཏུ་མ་ཡེངས་སྐྱོང་བར་མཛོད། །ལར་དོན་དམ་སྐྱེ་བ་མེད་པ་ལ། །སྐྱོང་དང་བསྐྱང་བྱ་མ་གྲུབ་ཀྱང་། །སྣང་བཅས་ཀུན་རྫོབ་བདེན་པའི་ངོར། །དྲན་པའི་རྒྱང་སོ་ཟིན་པར་མཛོད། །དེ་ལྟ་བུའི་གནས་ལུགས་དོན་དེ་ཉིད། །བུ་རང་གི་ཚོགས་བསགས་བསོད་ནམས་སྟོབས། །རྗེ་བླ་མའི་བྱིན་རླབས་ཁོ་ན་དང་། །ཡིད་ཆེས་མོས་གུས་དྲག་པོ་ཡིས། །གནས་ལུགས་ཇི་བཞིན་རྟོགས་པ་སྟེ། །ཆོས་ཉིད་མངོན་གསུམ་མཐོང་བར་ལགས། །གོམས་འདྲིས་ཡིད་ཆེས་བརྟན་ཐོབ་སྟེ། །ཉམས་མྱོང་སྣ་ཚོགས་ཤར་བ་ན། །དེ་ལ་ཉམས་སྣང་གོང་འཕེལ་གྲགས། །རིག་པ་ལ་བརྟན་ཆ་ཐོབ་པ་དེ། །རིག་པ་ཚད་ལ་ཕེབས་པའོ། །བུ་སྣང་བཞི་མཐར་རུ་ཕྱིན་ཙ་ན། །ཆོས་ཉིད་ཟད་སར་ཞེས་བྱའོ། །ད་ལྟའི་རྟོགས་ལྡན་ཁ་ཅིག་གིས། །འདོན་སྒོམ་ཡ་བྲལ་གྱི་སྲོལ་མཆིས་ཀྱང་། །རྗེ་སུམ་ལྡན་བླ་མ་རིན་པོ་ཆེའི། །ཞལ་གྱི་བུམ་བཟང་དྲི་མེད་ལས། །ཉམས་ལེན་ལ་བརྩོན་པར་བྱས་ན་ཡང་། །འདོན་སྒོམ་སྦྲག་མ་མཛད་ཙ་ན། །དེ་ལ་འགལ་བ་མ་མཆིས་ཤིང་། །གཅིག་གྲོགས་གཅིག་གིས་བྱེད་འགྱུར་གསུངས། །ལར་ལྟ་བ་ཇི་ལྟར་མཐོ་ན་ཡང་། །རྒྱུ་འབྲས་ལ་བླང་དོར་ཞིབ་པར་མཛོད། །བུ་རིག་པ་བདེ་གཤེགས་སྙིང་པོ་འདི། །མཆོག་གསུམ་རྩ་གསུམ་སྐུ་གསུམ་སྟེ། །སྐྱབས་ཡུལ་ཀུན་འདུས་ངོ་བོ་ལགས། །བུ་ཡིད་དཔྱོད་སྔགས་ཀྱི་ཐེག་པ་སྟེ། །སྐྱོབ་བྱེད་རིག་པའི་ཡེ་ཤེས་ཀྱིས། །བསྐྱབ་བྱ་རྣམ་རྟོག་ཀུན་བསྐྱབས་པ། །གནས་ལུགས་རྡོ་རྗེའི་སྐྱབས་འགྲོ་ལགས། །སེམས་བསྐྱེད་ཀྱི་ངོ་བོ་མཐར་ཐུག་པ། །མཉམ་བཞག་གི་ཡེ་ཤེས་འདི་ཉིད་ལགས། །སྒྲིབ་སྦྱོང་གི་གཉེན་པོ་མཆོག་གྱུར་པ། །གཉེན་པོ་ཀུན་ཏུ་སྤྱོད་པའི་སྟོབས། །དོན་གྱི་རྡོ་རྗེ་སེམས་དཔའ་ལགས། །ཚོགས་གཉིས་ལས་དམིགས་མེད་ཡེ་ཤེས་ཚོགས། །མཆོད་པ་ཀུན་གྱི་མཆོག་གྱུར་པ། །དེ་ཁོ་ན་ཉིད་ཀྱི་མཆོད་པ་ལགས། །བུ་བླ་མའི་རྣལ་འབྱོར་མཆོག་གྱུར་པ། །ཟུང་འཇུག་དོན་གྱི་བླ་མ་ཉིད། །རིག་པ་རང་བབས་སྐྱོང་བ་ནི། །བླ་སྒྲུབ་ཀུན་གྱི་ཡང་སྙིང་མཆོག །རྩེ་རྒྱལ་དུ་གྱུར་བ་རྒྱལ་བས་གསུངས། །ལམ་བསྐྱེད་པའི་རིམ་པ་གཙོ་བོ་སྟེ། །ཆོས་ཉིད་དོན་གྱི་ལྷ་ཡིན་ནོ། །ཤེས་རབ་རྫོགས་པའི་རིམ་པ་གཙོ་བོ་སྟེ། །རྩ་རླུང་ཐིག་ལེའི་བྱེད་པ་རབ་བཅིངས་ཏེ། །ངོ་མཚར་བའི་ཐབས་མཆོག་ལ་བརྟེན་ནས། །དོན་གྱི་འོད་གསལ་མཐར་ཐུག་ལགས། །མདོར་དྲིལ་ན་མཉམ་བཞག་ཡེ་ཤེས་ལས། །ཐབས་གཞན་ཚོལ་བར་རྨོངས་པར་ཟད། །འདི་ཁོ་ན་ཉིད་ཀྱིས་སངས་རྒྱས་ཀྱི། །གོ་འཕངས་མཆོག་ཏུ་འཐོབ་པ་ལགས། །ཨ་ཧོ་ཡེ་གསོན་དང་ཀུན་གཞི་ཆོས་སྐུ་ཡི་དབྱེ་བ། །སེམས་དང་རིག་པ་རྣམ་ཤེས་ཡེ་ཤེས་ཀྱི་ཤན་འབྱེད། །ཡིད་ཤེས་དང་ཤེས་རབ་དབྱེ་བ་ཇི་བཞིན་རྟོགས་དགོས། །ཆོས་ཉིད་དོན་གྱི་རིག་པའི་ཡེ་ཤེས་ཀྱི་རྩལ་ལས། །ཀུན་བྱང་འཁོར་འདས་རྟོག་ཚོགས་ཐམས་ཅད་ཀུན་བྱུང་བ། །འོན་ཀྱང་སེམས་དང་ཆོས་སྐུ་རིག་པ་ཡི་དབྱེ་བ། །སྤང་དང་བླང་བྱར་འཛིན་པ་ཅུང་ཟད་ཀྱང་མི་འཚལ། །གཉིས་མེད་མཉམ་པ་ཆེན་པོར་ལ་བཟླ་རུ་མཛོད་ཅིག །ནམ་ཞིག་ཀ་དག་སྟོང་ཉིད་ཆེན་པོ་ཡི་ངང་དུ། །སེམས་དང་སེམས་བྱུང་རྣམ་རྟོག་རང་སར་དུ་གྲོལ་ནས། །སྒྲིབ་གཉིས་བག་ཆགས་དང་བཅས་ལྷག་མེད་དུ་སངས་ཏེ། །དག་པ་གཉིས་ལྡན་འབྲས་བུ་མངོན་སུམ་དུ་རྟོགས་པ། །ཀ་དག་གདོད་མའི་གཞི་དབྱིངས་ཆོས་སྐུ་ཡི་ཀློང་ནས། །ལྷུན་གྲུབ་གཟུགས་སྐུའི་རོལ་མོ་སྣ་ཚོགས་སུ་ཤར་བ། །འཕྲིན་ལས་རྣམ་བཞིའི་འགྲོ་དོན་ཁྱབ་བརྡལ་དུ་མཛོད་ཅིག །ཀྱེ་མ་ཡོན་ཏན་ཀུན་གྱི་གཞི་རྟེན་ཚུལ་ཁྲིམས་རྣམ་དག་ཅིག་མེད་ན། །གང་ཞིག་སེམས་པ་མེད་པའི་ཏིང་འཛིན་གྱི་བསླབ་པ། །སྲིད་རྩ་བདག་འཛིན་གཅོད་པ་ཤེས་རབ་ཀྱི་བསླབ་པ། །དེ་གསུམ་རྟེན་དང་བརྟེན་པའི་ཚུལ་ཅན་དུ་ཤར་བ། །ཚུལ་ཁྲིམས་འདི་ནི་ཡོན་ཏན་ཐམས་ཅད་ཀྱི་གཞི་མ། །དེས་ན་འགྱོད་མེད་ཚུལ་ཁྲིམས་རྣམ་དག་ཅིག་མེད་ན། །ཨ་ཏི་རྫོགས་ཆེན་རློམ་པ་ཡི་གང་ཟག །གང་ཞིག་ནམ་མཁའི་པདྨོ་སྐྱེ་བ་དང་མཚུངས་ཏེ། །ཇི་བཞིན་མངོན་གསུམ་མཐོང་བ་ནི་མ་ལགས། །མདོར་ན་ཕྱི་ལྟར་འདུལ་བ་སོ་ཐར་གྱི་ལུགས་དང་། །ནང་ལྟར་གསང་སྔགས་རྡོ་རྗེ་ཐེག་པ་ལ་བསླབ་ཅིང་། །གསང་བ་ཨ་ཏི་རྫོགས་པ་ཆེན་པོ་དང་མཐུན་པར། །ཉམས་ལེན་རྩེ་གཅིག་མ་ཡེངས་བརྩོན་པ་རུ་མཛོད་ཅིག །ཀྱེ་ཧོ་ཡང་གསོན་དང་སྐལ་ལྡན་རྣམས། །རྗེ་བཀའ་དྲིན་ཅན་གྱི་བླ་མ་ཡི། །ཞལ་རྒྱུན་དྲི་མ་མེད་པ་དེ། །མི་བདག་གི་བློ་ལ་སིམ་པ་དང་། །བློ་ཐེ་ཚོམ་གྱི་དྲྭ་བ་ཆོད་ན་ཡང་། །བདག་འདྲ་རྨོངས་པའི་གང་ཟག་གིས། །གནས་ལུགས་ཇི་བཞིན་མ་རྟོགས་པས། །ཉམས་ལེན་གྱི་དོན་རྣམས་བཤད་པ་འདི། །ཁ་ཏ་སྟོང་སྐད་ལྟ་བུ་ཡི། །ཧ་ཅང་བཞད་གད་ཀྱི་གནས་སུ་གྱུར་ན་ཡང་། །གཞན་སྐལ་བ་ལྡན་པའི་གང་ཟག་ཚོགས། །བདག་དང་བདག་འདྲའི་སེམས་ཅན་རྣམས། །གནས་ལུགས་ཀྱི་རང་ཞལ་མཇལ་ནས་སུ། །གདོན་མའི་དབྱིངས་སུ་གྲོལ་གྱུར་ནས། །མི་བདག་ལ་ཉམས་མྱོང་མེད་ན་ཡང་། །དད་ལྡན་དོན་གཉེར་ཅན་རྣམས་ཀྱིས། །ཡང་ཡང་བསྐུལ་ཞིང་གསོལ་བའི་ངོར། །ཅུང་ཟད་ཞུས་པ་འདི་དག་གིས། །ཚིག་ལ་སྙན་ཆ་མེད་ན་ཡང་། །དོན་ལ་འགལ་བ་མེད་སྙམ་རློམ། །དང་པོའི་ལས་ཅན་གང་ཟག་རྣམས། །ཟབ་མོའི་དོན་ལ་ཁ་བྲིད་ཕྱིར། །ཐེག་པ་ཀུན་གྱི་ཡང་རྒྱལ་མཆོག །ཨ་ཏི་རྫོགས་པ་ཆེན་པོ་འདི། །ཐེག་དམན་ལོག་ལྟ་ཅན་གྱི་རིགས། །ཀུན་གྱི་སྤྱོད་ཡུལ་མ་ཡིན་ཏེ། །སྐལ་བ་ལྡན་པའི་གང་ཟག་ངོར། །བསྟན་པས་དོན་གསལ་གོ་བདེ་བ། །ཅུང་ཟད་བྲིས་པ་འདི་དག་ལ། །གལ་ཏེ་ནོངས་པ་མཆིས་གྱུར་ན། །ལྷ་དང་མཁའ་འགྲོ་སྲུང་མའི་ཚོགས། །ཁྱད་པར་དཔལ་མགོན་མ་ནིང་ནག །སྲོག་སྒྲུབ་གཟའ་བདུད་ར་ཧུ་ལ། །ཤན་པ་དམར་ནག་ཚོགས་ལ་བཤགས། །དགེ་བས་སེམས་ཅན་ཐམས་ཅད་ཀུན། །ཀུན་བཟང་གདོད་མའི་མགོན་པོ་ཡི། །དཀའ་བ་མེད་པའི་གོ་འཕང་མཆོག །ཚེ་འདི་ཉིད་ལ་མངོན་གྱུར་ཤོག །ཅེས་པ་འདིའང་སྐྱབས་མགོན་རྡོ་རྗེ་འཆང་ཞབས་དཀར་བ་དང་རྗེ་དབོན་མཆོག་གི་སྤྲུལ་པའི་སྐུ་རིན་པོ་ཆེ་རྣམ་གཉིས་ཀྱི་བཀའ་གསུང་སྤྱི་བོར་ཕེབས་པ་དང་། མཁན་ཆེན་པདྨ་བཛྲའི་རིགས་དབོན་དམ་པ་ཚུལ་ཁྲིམས་བསྟན་འཛིན་དང་། ཕྱག་མཛོད་དཀོན་མཆོག་རྒྱ་མཚོ། ཆོས་དབྱིངས་རང་གྲོལ། ཐུབ་བསྟན་བློ་གྲོས། ཨ་སྒྲིས་ནོར་བུ་ཚེ་རིང་སོགས་དང་། གཞན་ཡང་དོན་གཉེར་ཅན་འགའ་ཡིས་ཡང་ཡང་བསྐུལ་བའི་ངོར་དང་། མ་ཟད་ལམ་མཆོག་འདི་ལ་མོས་པ་ཡིད་བྱེད་ཀྱི་གང་ཟག་རྣམས་ཀྱི་ངོར་རང་ལ་འདི་ལྟར་རྩོམ་པའི་ཡོན་ཏན་ཕྲ་མོ་ཙམ་ཞིག་མེད་ན་ཡང་ཐུགས་ཀྱི་བཞེད་དོན་བསྐང་བའི་ཕྱིར་དུ་སྙིགས་དུས་ཀྱི་བཙུན་གཟུགས་འཆང་བ་ལམ་འདི་ལ་མོས་པའི་གང་ཟག་རྫོགས་ཆེན་སྐྱེ་སྲིད་ལྔ་པའི་མིང་འཛིན་ཐུབ་བསྟན་ཆོས་ཀྱི་རྡོ་རྗེའམ་ཀུན་བཟང་ནམ་མཁའ་རང་གྲོལ་གྱིས་ཀྲོ་དྷི་ཞེས་པ་ཤིང་ཕོ་འབྲུག་ལོའི་བསྐལ་བཟང་རྣམ་འདྲེན་བཞི་པའི་ཆོ་འཕྲུལ་ཆེན་པོའི་མུ་སྟེགས་བྱེད་སོགས་བདུད་སྡེ་ཕམ་པར་མཛད་ཅིང་། སངས་རྒྱས་གཉིས་པ་པདྨ་ཀཱ་རའི་གདུལ་བྱ་གཞན་སྣང་དུ་གཟིགས་ཏེ་རྒྱལ་སྲིད་ཐབས་ཀྱིས་སྤངས་ནས་བསིལ་བ་ཚལ་གྱི་དུར་ཁྲོད་དུ་བརྟུལ་ཞུགས་ཀྱི་སྤྱོད་པ་མཛད་ཅིང་སློབ་དཔོན་ཤནྟ་རཀྵི་ཏ་གྲགས་པའི་དུས་ཆེན་བཟང་པོར་ཚེས་བཅུའི་ཐུན་མཚམས་ཤིག་ལ་རུ་དམ་ཨོ་རྒྱན་བསམ་གཏན་ཆོས་གླིང་གི་ཕོ་བྲང་ཆེན་པོའི་ཡང་རྩེར་འཆི་མེད་གྲུབ་པའི་དགའ་ཚལ་དུ་ཤར་མར་བྲིས་པ་འདིས་ཀྱང་འགྲོ་བ་སེམས་ཅན་ཐམས་ཅད་གདོད་མའི་མགོན་པོའི་གོ་འཕང་རིན་པོ་ཆེ་ཚེ་འདི་ཉིད་ལ་མྱུར་དུ་རྟོགས་པར་གྱུར་ཅིག སརྦ་མངྒ་ལཾ། དགེའོ། །