འཇམ་མགོན་མི་ཕམ་རིན་པོ་ཆེའི་བླ་སྒྲུབ་བྱིན་རླབས་མཆོག་སྩོལ་བཞུགས་སོ།།

སྐྱབས་སུ་འགྲོ་བ་ནི། ན་མོ། སྐྱབས་ཀྱི་མཆོག་གྱུར་དཀོན་མཆོག་རྣམ་གསུམ་ལ། །བདག་དང་མར་གྱུར་སེམས་ཅན་ཐམས་ཅད་ཀུན། །འདི་ནས་བྱང་ཆུབ་སྙིང་པོ་མ་ཐོབ་པར། །སྒོ་གསུམ་གུས་པའི་སྒོ་ནས་སྐྱབས་སུ་མཆི། །སེམས་བསྐྱེད་ནི། ཧཱུྃ། དུས་འདི་ནས་བཟུང་བྱང་ཆུབ་མ་ཐོབ་པར། །རྗེ་བཙུན་བླ་མ་ཁྱེད་ཉིད་སྒྲུབ་ནས་ནི། །མཁའ་ཁྱབ་ཞིང་གི་སེམས་ཅན་ཐམས་ཅད་ཀུན། །རྫོགས་པའི་སངས་རྒྱས་བསྒྲུབ་པར་སེམས་བསྐྱེད་དོ། །ཡན་ལག་བདུན་པ་ནི། བདེ་གཤེགས་རྒྱལ་བ་སྲས་དང་བཅས་པ་ལ། །སྒོ་གསུམ་གུས་པའི་སྒོ་ནས་ཕྱག་འཚལ་ལོ། །ཕྱི་ནང་གསང་བ་བླ་ན་མེད་པ་ཡི། །རབ་འབྱམས་ནམ་མཁའ་གང་བའི་མཆོད་པ་འབུལ། །ཐོག་མེད་དུས་ནས་ད་ལ་ཐུག་གི་བར། །བཅས་དང་རང་བཞིན་འགལ་བའི་ཉེས་པ་བཤགས། །བདག་གཞན་དུས་གསུམ་དགེ་བ་ཅི་བསགས་པ། །དགའ་བ་ཆེན་པོས་རྗེས་སུ་ཡི་རང་ངོ་། །ཕྱོགས་བཅུར་བཞུགས་པའི་རྒྱལ་སྲས་ཚོགས་རྣམས་ཀྱིས། །འགྲོ་བའི་དོན་དུ་ཆོས་འཁོར་བསྐོར་དུ་གསོལ། །རྒྱལ་བ་མྱ་ངན་འདའ་བར་བཞེད་པ་རྣམས། །མྱ་ངན་མི་འདའ་ཡུན་དུ་བཞུགས་སུ་གསོལ། །དུས་གསུམ་བསགས་པའི་དགེ་ཚོགས་ཅི་བསགས་པ། །ཀུན་ཀྱང་བྱང་ཆུབ་ཐོབ་པའི་རྒྱུ་རུ་བསྔོ། །བགེགས་ལ་བཀའ་བསྒོ་བ་ནི། ཧཱུྃ། རིག་འཛིན་འདུས་པ་བླ་མའི་དཀྱིལ་འཁོར་འདིར། །སྒྲུབ་ལ་བར་དུ་གཅོད་པའི་གདོན་བགེགས་རྣམས། །གཏོར་མ་ལོངས་ལ་གནས་འདིར་མ་འདུག་པར། །རང་རང་སོ་སོའི་གནས་སུ་བདེ་བར་དེངས། །གལ་ཏེ་མི་འགྲོ་འདི་རུ་འདུག་གྱུར་ན། །ཡེ་ཤེས་ཁྲོ་རྒྱལ་འབར་བ་ཐུགས་ཁྲོས་ནས། །ལུས་ངག་རྡུལ་ཕྲན་བཞིན་དུ་བརླག་པར་འགྱུར། །ཨོཾ་སུཾ་བྷ་ནི་སོགས། མཚམས་བཅད་པ་ནི། ཧཱུྃ། དག་པ་རབ་འབྱམས་རྒྱལ་བའི་དཀྱིལ་འཁོར་འདིར། །བགེགས་དང་བར་དུ་གཅོད་པ་མ་གྲུབ་ཀྱང་། །འོན་ཀྱང་གློ་བུར་རྣམ་རྟོག་འཁྲུལ་བའི་གདོན། །སྤྲོས་བྲལ་ཆོས་དབྱིངས་ངང་དུ་མཚམས་བཅད་དོ། །ཨོཾ་བཛྲ་རཀྵ་རཀྵ་ཧཱུྃ། བྱིན་འབེབས་ནི། ཧཱུྃ། སྤྲོས་བྲལ་ཆོས་དབྱིངས་དག་པའི་ཞིང་ཁམས་ནས། །རྩ་བརྒྱུད་བླ་མ་རྒྱལ་བ་སྲས་དང་བཅས། །ཡི་དམ་ཞི་ཁྲོ་མཁའ་འགྲོ་ཆོས་སྐྱོང་རྣམས། །དཀྱིལ་འཁོར་ལྷ་ཚོགས་མ་ལུས་ཐམས་ཅད་ཀྱིས། །རིག་འཛིན་འདུས་པ་བླ་མའི་དཀྱིལ་འཁོར་འདིར། །བྱིན་ཆེན་བྱིན་ཕོབ་དབང་ཆེན་དབང་སྐུར་ཅིག །སྒྲུབ་རྫས་གཉན་པོ་འདི་ལ་མདངས་ཕྱུང་སྟེ། །བླ་མའི་སྐུ་གསུང་ཐུགས་ཀྱི་དངོས་གྲུབ་སྩོལ། །བཛྲ་ཛྙ་ན་ཨ་ཝེ་ཤ་ཡ་ཨཱཿ ལྷ་བསྐྱེད་ནི། ཧཱུྃ། སྣང་སྲིད་དག་པ་རབ་འབྱམས་བཀོད་པའི་དབུས། །རང་སྣང་ཡེ་ཤེས་ལས་གྲུབ་གཞལ་ཡས་དབུས། །འཇའ་ཟེར་འོད་ཕུང་འཁྲིགས་པའི་ཀློང་ཡངས་སུ། །ཕྱོགས་བཅུ་དུས་གསུམ་རྒྱལ་བ་ཐམས་ཅད་ཀྱི། །མཁྱེན་བརྩེ་ནུས་པའི་ཡོན་ཏན་གཅིག་བསྡུས་པ། །འཇམ་དཔལ་དབྱངས་དངོས་མི་ཡི་ཟོལ་འཛིན་པ། །ངོ་བོ་མི་ཕམ་དགྱེས་པའི་རྡོ་རྗེ་ལས། །རྣམ་པ་རྗེ་བཙུན་འཇམ་དཔལ་གཞོན་ནུ་ནི། །སྐུ་མདོག་མཚམས་སྤྲིན་གསར་བའི་ལང་ཚོ་ཅན། །ཞལ་གཅིག་ཕྱག་གཉིས་རྡོ་རྗེ་སྐྱིལ་ཀྲུང་ཅན། །ཕྱག་གཡས་རལ་གྲི་གཡོན་པས་པུ་ཏི་བསྣམས། །ཞལ་འཛུམ་མཚན་དཔེའི་ལང་ཚོ་དཔལ་དུ་འབར། །ཞི་བའི་རྒྱན་ཆས་བཅུ་གསུམ་དག་གིས་སྤྲས། །སྣང་སྟོང་སྒྲིབ་གཡོག་བྲལ་བའི་ངོ་བོར་གསལ། །གནས་གསུམ་ཨོཾ་ཨཱཿཧཱུྃ་གིས་མཚན་པ་ལས། །རང་བཞིན་ཆོས་ཀྱི་དབྱིངས་ནས་སྤྱན་འདྲེན་གཤེགས། །སྤྱན་འདྲེན་ནི། ཧཱུྃ་ཧྲཱིཿ ཕྱོགས་བཅུའི་ཞིང་ཁམས་རབ་འབྱམས་ཐམས་ཅད་དང་། །ཁྱད་པར་རྒྱ་ནག་རི་བོ་རྩེ་ལྔ་ནས། །འགྲོ་བའི་མ་རིག་མུན་པ་བསལ་བའི་ཕྱིར། །བརྩེ་བའི་ཐུགས་རྗེས་གནས་འདིར་གཤེགས་སུ་གསོལ། །བཞུགས་སུ་གསོལ་བ་ནི། ཧཱུྃ། ཡེ་ཤེས་དབྱིངས་ཀྱི་ལྷ་ཚོགས་ཐམས་ཅད་ཀྱང་། །ཇི་ལྟར་མཁའ་ལ་ཆར་སྤྲིན་གཏིབས་པ་བཞིན། །དམ་ཚིག་སེམས་དཔའི་སྐུ་ལ་སིབ་ཀྱིས་ཐིམ། །ཆུ་ལ་ཆུ་བཞག་ལྟ་བུར་དགྱེས་པར་བཞུགས། །ས་མ་ཡ་ཏིཥྛ་ལྷན། ཕྱག་འཚལ་བ་ནི། ཧཱུྃ། གང་གི་མཁྱེན་བརྩེ་ནུས་པའི་རང་བཞིན་གྱིས། །འགྲོ་བའི་སྒྲིབ་གཉིས་ཀུན་བཅོམ་བཅོམ་ལྡན་འདས། །གདོད་ནས་དག་པའི་ས་བཅུ་ལ་གནས་པ། །ཡེ་ཤེས་སྒྲོན་མེ་ཁྱེད་ལ་ཕྱག་འཚལ་ལོ། །མཆོད་པ་ནི། ཧཱུྃ། འཇིག་རྟེན་འདི་དང་འཇིག་རྟེན་གཞན་དག་ཏུ། །དངོས་འབྱོར་ཡིད་སྤྲུལ་མཆོད་པ་ཇི་སྙེད་ཀུན། །ནམ་མཁའ་མཛོད་ཀྱི་འཁོར་ལོ་འབུལ་ལགས་ན། །བཞེས་ནས་མཆོག་དང་ཐུན་མོང་དངོས་གྲུབ་སྩོལ། །ཨོཾ་བཛྲ་ཨརྒྷཾ་སོགས་ནས་ཤབྟ་མྷཱ་པཉྩ་བྷ་ལིང་ཏ་རཀྟ་པཱུ་ཙ་ཧོཿ བསྟོད་པ་ནི། གང་གི་མཁྱེན་རབ་འོད་སྟོང་བརྒྱ་བ་ཡིས། །བདག་བློའི་པད་ཚལ་ཀུན་ནས་རབ་རྒྱས་ཏེ། །བློ་གྲོས་སྤོབས་པའི་སྣང་བ་བསྐྱེད་མཛད་པའི། །འཇམ་དཔལ་དགྱེས་པའི་རྡོ་རྗེར་ཕྱག་འཚལ་བསྟོད། །བཟླས་པ་ནི། འཇམ་པའི་དབྱངས་དངོས་རྗེ་བཙུན་བླ་མ་ལ། །སྙིང་ནས་གདུང་ཤུགས་དྲག་པོའི་གསོལ་བཏབ་པས། །ཐུགས་ལས་འོད་ཟེར་སྣ་ཚོགས་འཕྲོས་པ་ཡིས། །མཁྱེན་བརྩེ་ནུས་པའི་བྱིན་རླབས་མཐའ་དག་ཀུན། །འོད་ཀྱི་རྣམ་པ་གཅིག་ཏུ་རབ་བསྡུས་ནས། །བདག་ལ་ཐིམ་པས་བློ་གྲོས་རྒྱས་པར་གྱུར། །ཨོཾ་བཛྲ་མ་ཧཱ་གུ་རུ་ཨ་ཛི་ཏེ་སཱ་ག་ར་སརྦ་སིདྡྷི་ཧཱུྃཿ དབྱངས་གསལ་རྟེན་སྙིང་ཡིག་བརྒྱ་བརྗོད། ཚོགས་བྱིན་རླབས་ནི། ཚོགས་ཀྱི་དམ་རྫས་བཟའ་བ་རི་ལྟར་སྤུངས། །བཏུང་བ་རྒྱ་མཚོ་ལྟ་བུ་བསྐྱིལ་བ་ལས། །ནམ་མཁའི་སྐར་ལྟར་བཀྲ་བ་བཤམས་པ་འདིར། །འབག་བཙོག་ཉེས་སྐྱོན་ཐམས་ཅད་སྦྱངས་བར་གྱུར། །རཾ་ཡཾ་ཁཾ། ཨོཾ་ཨཱཿཧཱུྃ། ཚོགས་ཞིང་སྤྱན་འདྲེན། འཇལ་དཔལ་དབྱངས་དངོས་སྐྱབས་མཆོག་རྡོ་རྗེ་འཆང་། །འཁོར་དུ་རིག་འཛིན་དཔའ་བོའི་ཚོགས་དང་བཅས། །ཡེ་ཤེས་ཚོགས་ལ་སྤྱན་འདྲེན་གཤེགས་ནས་ཀྱང་། །མཁྱེན་བརྩེ་ནུས་པའི་དངོས་གྲུབ་སྩལ་དུ་གསོལ། །ཚོགས་མཆོད་ནི། ཞལ་ཟས་ཚོགས་ཀྱི་དམ་རྫས་བླ་ན་མེད། །བཅུད་ལྡན་མི་ཟད་དངོས་གྲུབ་ཀུན་ལྡན་འདི། །འཇམ་མགོན་བླ་མ་མཆོག་ལ་ཕུལ་བ་ཡིས། །དབང་དང་བྱིན་རླབས་དངོས་གྲུབ་སྩལ་དུ་གསོལ། །བཤགས་པ་ནི། ཐོག་མ་མེད་ནས་ད་ལྟ་ཡན་ཆད་དུ། །སོ་ཐར་ཕྱི་ཡི་སྡོམ་པ་ཉམས་པ་དང་། །བྱང་སེམས་ནང་གི་བསླབ་བྱ་འགལ་བ་དང་། །གསང་བ་སྔགས་ཀྱི་དམ་ལས་ཅི་འགལ་བ། །ཚོགས་ཀྱི་འཁོར་ལོས་བྱང་ཞིང་དག་པར་མཛོད། །བྲུབ་ཁུང་བསྐྱེད་པ་དང་འགུགས་པ་ནི། འཇམ་དཔལ་ཐུགས་ལས་ཡ་མཱནྟ་ཀའི་སྐུ། །ལས་བྱེད་ཕོ་ཉ་གྲངས་མེད་ཚོགས་དང་བཅས། །འཕྲོས་པས་དགྲ་བགེགས་ལུས་ཀྱི་བྲུབ་ཁུང་དུ། །སྐྱབས་དང་མགོན་བྲལ་ཉམ་ཐག་ཚུལ་དུ་བཀུག །བསྒྲལ་བ་དངོས་ནི། ཧཱུྃ། ལོག་པར་ལྟ་བའི་དགྲ་བགེགས་མཐའ་དག་ཀུན། །རྣོ་ངར་ལྡན་པའི་མཚོན་ཆ་སྣ་ཚོགས་ཀྱིས། །གཟུགས་ཕུང་སྐྱེ་བ་མེད་པའི་དབྱིངས་སུ་བསྒྲལ། །རྣམ་པར་ཤེས་པ་ཆོས་ཀྱི་དབྱིངས་སུ་སྤོར། །སརྦ་ཤ་ཏྲཱུཾ་མཱ་ར་ཡ་རྦད། ཞལ་དུ་བསྟབ་པ་ནི། དགྲ་བགེགས་བསྒྲལ་བ་ལས་བྱུང་དམ་རྫས་དང་། །དུག་གསུམ་མཆོད་པ་བླ་ན་མེད་པ་འདི། །དགྱེས་པའི་ཚུལ་གྱིས་མཆོད་པ་འདི་བཞེས་ལ། །སྐུ་གསུང་ཐུགས་ཀྱི་དངོས་གྲུབ་སྩལ་དུ་གསོལ། །མ་ཧ་མཱཾ་ས་རཀྟ་ཙིཏྟ་བ་སུ་ཁ་ཁ་ཁཱ་ཧཱི། ཚོགས་ལ་རོལ།ལྷག་མ་ནི། ཧཱུྃ། བླ་མ་རིག་འཛིན་འདུས་པའི་དཀྱིལ་འཁོར་འདིར། །བཀའ་འཁོར་སྐྱོང་བའི་ལས་བྱེད་ཕོ་ཉའི་ཚོགས། །དམ་རྫས་ལྷག་མའི་གཏོར་མ་འདི་ལོངས་ལ། །བྱང་ཆུབ་སྒྲུབ་པའི་བར་ཆད་བཟློག་ཏུ་གསོལ། །ཨུཥཙྚ་ལིཾ་ཏ་ཁཱ་ཧི། ཆད་ཐོ་ནི། སྔོན་ཚེ་བར་དང་ཐ་མའི་བསྐལ་བ་ལ། །ཀུན་བཟང་པད་འབྱུང་གྲུབ་བརྙེས་ཚོགས་རྣམས་ཀྱིས། །གསང་སྔགས་གཉན་པོའི་དཀྱིལ་འཁོར་ཞལ་ཕྱེས་ཚེ། །སྣང་སྲིད་དྲེགས་པ་ཕོ་མོའི་ཚོགས་རྣམས་ཀྱིས། །ཇི་ལྟར་ཞལ་བཞེས་དམ་ལས་མ་གཡེལ་བར། །ཤ་ཁྲག་དམར་གྱི་གཏོར་མ་འདི་བཞེས་ལ། །ཕྲིན་ལས་རྣམ་བཞི་ལྷུན་གྱིས་གྲུབ་པར་མཛོད། །བརྟན་མ་ནི། བྷྱོཿ སློབ་དཔོན་ཆེན་མོ་པདྨ་འབྱུང་གནས་ཀྱི། །བཀའ་ཉན་བོད་ཁམས་སྐྱོང་བ་བརྟན་མའི་ཚོགས། །དམ་རྫས་བཤལ་ཆུའི་གཏོར་མ་འདི་བཞེས་ལ། །ཇི་ལྟར་བཅོལ་བའི་ཕྲིན་ལས་གྲུབ་པར་མཛོད། །རྟ་བྲོ་ནི། ཧཱུྃ། འགྲོ་བ་ཡོངས་ཀྱི་རྒྱུད་ལ་རྒོལ་བ་ཡི། །ཡ་མ་བྱ་བའི་དམ་སྲི་སྡིག་ཅན་རྣམས། །གཏོར་གཞོང་རི་རབ་འབར་བའི་འོག་ཏུ་མནན། །བྱང་ཆུབ་མ་ཐོབ་བར་དུ་མི་བཏང་ངོ་། །དབང་བཞི་ལེན་ཅིང་དངོས་གྲུབ་བླངས་པ་ནི། ཧཱུྃ་ཧྲཱིཿ བྱིན་རླབས་དངོས་གྲུབ་ཐམས་ཅད་འབྱུང་བའི་གནས། །རིགས་འདུས་བླ་མའི་སྐུ་ཡི་སྨིན་མཚམས་ནས། །ཨོཾ་ཡིག་དཀར་པོ་འོད་ཟེར་འཕྲོས་པ་ལས། །བདག་ལ་ཐིམ་པས་ལུས་ཀྱི་སྒྲིབ་པ་སྦྱངས། །བུམ་དབང་ཐོབ་ནས་སྐུ་ཡི་བྱིན་རླབས་ཞུགས། །འབྲས་བུ་སྤྲུལ་སྐུའི་གོ་འཕང་ཐོབ་པར་ཤོག །མགྲིན་པར་ཨཱཿལས་འོད་དམར་འཕྲོས་པ་ལས། །བདག་ལ་ཐིམ་པས་ངག་གི་སྒྲིབ་པ་དག །གསང་དབང་ཐོབ་ནས་གསུང་གི་བྱིན་རླབས་ཞུགས། །འབྲས་བུ་ལོངས་སྐུའི་གོ་འཕང་ཐོབ་པར་ཤོག །ཐུགས་ཀའི་ཧཱུྃ་ལས་འོད་ཟེར་སྔོན་པོ་འཕྲོས། །བདག་ལ་ཐིམ་པས་ཡིད་ཀྱི་སྒྲིབ་པ་དག །ཤེར་དབང་ཐོབ་ནས་ཐུགས་ཀྱི་བྱིན་རླབས་ཞུགས། །འབྲས་བུ་ཆོས་སྐུའི་གོ་འཕང་ཐོབ་པར་ཤོག །ལྟེ་བའི་ཧྲཱིཿལས་འོད་ཟེར་ལྗང་གུ་འཕྲོས། །བདག་ཐིམ་ཤེས་སྒྲིབ་དག་ནས་ཚིག་དབང་ཐོབ། །གཉུག་མའི་ཡེ་ཤེས་རྡོ་རྗེ་མངོན་དུ་གྱུར། །འབྲས་བུ་ངོ་བོ་ཉིད་སྐུ་ཐོབ་པར་ཤོག །གཏང་རག་མཆོད་བསྟོད། ཡིག་བརྒྱ། མ་རྙེད་ཡོངས་སུ་སོགས། འདིར་ནི་རྟེན་དང་སོགས། བསྡུ་རིམ་ནི། སྣོད་བཅུད་འོད་ཞུ་རིམ་བཞིན་བླ་མར་ཐིམ། །དེ་ཡང་མི་དམིགས་འཇའ་ཚོན་ལྟ་བུར་ཡལ། །སྤྲོས་བྲལ་ནམ་མཁའ་ལྟ་བུའི་རང་བཞིན་ལ། །སྐྱེ་མེད་ཆོས་ཀྱི་དབྱིངས་ཀྱི་ཀློང་དུ་ཨཱཿ བསྔོ་བ་ནི། རྣམ་དག་རིག་འཛིན་བླ་མའི་དཀྱིལ་འཁོར་དུ། །རྣམ་པ་བསྐྱེད་རྫོགས་བཟླས་བརྗོད་བགྱིས་པ་ཡི། །རྣམ་ཀུན་དགེ་བའི་རྩ་བ་ཇི་སྙེད་ཀུན། །རྣམ་མཁྱེན་གོ་འཕང་ཐོབ་པའི་རྒྱུ་རུ་བསྔོ། །སྨོན་ལམ་ནི། རང་སྣང་རྣམ་དག་འོག་མིན་ཞིང་ཁམས་སུ། །རང་རིག་འཇམ་དཔལ་དཔའ་བོའི་ཞལ་མཐོང་ནས། །རང་གཞན་མཁའ་ཁྱབ་སེམས་ཅན་ཐམས་ཅད་ཀུན། །རང་བཞིན་གདོད་མའི་དབྱིངས་སུ་སངས་རྒྱ་ཤོག །བཀྲིས་ནི། བྱིན་རླབས་མཆོག་སྩོལ་རྩ་བརྒྱུད་བླ་མ་དང་། །དངོས་གྲུབ་འབྱུང་གནས་ཡི་དམ་ཞི་དང་ཁྲོ། །བར་ཆད་ཀུན་སེལ་དཔའ་བོ་མཁའ་འགྲོ་དང་། །ཕྲིན་ལས་མཐར་ཕྱིན་དམ་ཅན་ཆོས་སྐྱོང་ཚོགས། །དཀྱིལ་འཁོར་ལྷ་ཚོགས་རྣམས་ཀྱིས་བཀྲ་ཤིས་ཤོག །ཅེས་པ་འདི་ནི་ལྕང་རའི་བུམ་སྒྲུབ་ཆེན་མོའི་སྐབས། ཉག་རོང་རྒྱབ་ཟི་ཚེ་བརྟན་ནས་བསྐུལ་ངོར་ལྕང་ར་དགོན་ཐུབ་བསྟན་ནོར་བུའི་གླིང་གི་མདུན་ཐང་དུ་བསྟན་ལ་ཕན་པའི་ལྷག་བསམ་དཀར་པོས་རྫོགས་སྤྲུལ་ལྔ་བ་ཐུབ་བསྟན་ཆོས་ཀྱི་རྡོ་རྗེས་བྲིས་པ་དགེའོ། །མངྒ་ལཾ། །