བླ་མའི་རྣལ་འབྱོར་བྱིན་རླབས་ཆར་འབེབས་བཞུགས་སོ།།

ན་མོ་གུ་རུ། བདག་ལུས་འཛིན་མེད་མདུན་གྱི་ནམ་མཁའི་དབུས། །མི་འཇིགས་སེང་ཁྲི་པདྨ་ཟླ་བའི་སྟེང་། །སྐྱབས་གནས་ཀུན་འདུས་རྩ་བའི་བླ་མ་ནི། །ཐུབ་བསྟན་ཆོས་ཀྱི་རྡོ་རྗེ་སྤྲུལ་པའི་སྐུ། །ཞལ་གཅིག་ཕྱག་གཉིས་རབ་བྱུང་ཆ་ལུགས་ཅན། །ཞི་འཛུམ་སེམས་ཉིད་ངལ་གསོའི་ཕྱག་རྒྱ་ཅན། །གཡས་སུ་རི་དྭགས་ཀྲི་ཎ་སཱ་རའི་སྟེང་། །གྲུབ་བརྒྱའི་གཙུག་རྒྱན་བཞད་པ་རྡོ་རྗེ་འཆང་། །གཡོན་དུ་གཅན་གཟན་སྟག་གི་པགས་པའི་སྟེང་། །ཧེ་རུ་ཀ་དཔལ་རིག་པའི་རྡོ་རྗེ་རྩལ། །གཉིས་ཀ་རྣལ་འབྱོར་སྤྱོད་པའི་ཆ་ལུགས་ཅན། །དེ་ཡང་སྣང་ལ་རང་བཞིན་མ་གྲུབ་པ། །འཇའ་ཚོན་བཞིན་དུ་མ་འདྲེས་ལྷུན་གྱིས་གྲུབ། །སྐུ་བཞིའི་དབང་ཕྱུག་དཔལ་ལྡན་བླ་མ་ལ། །སྒོ་གསུམ་གུས་པ་ཆེན་པོས་གསོལ་བཏབ་པས། །ཚེ་འདིའི་མི་མཐུན་རྐྱེན་ངན་ཀུན་བྲལ་ནས། །ས་ལམ་ཡོན་ཏན་ཡར་ངོའི་ཟླ་བ་ལྟར། །གོང་ནས་གོང་དུ་འཕེལ་བར་བྱིན་གྱིས་རློབས། །ཨོཾ་ཨཱཿཧཱུྃ་བཛྲ་མ་ཧཱ་གུ་རུ་སརྦ་སིདྡྷི་ཕ་ལ་ཧཱུྃ། གསོལ་འདེབས་ཚུལ་དུ་བཟླས། ཐུན་མཐར། བདག་ཉིད་ཆེན་པོ་དཔལ་ལྡན་བླ་མ་ཡི། །སྐུ་ཡི་གནས་གསུམ་ཨོཾ་དཀར་ཨཱཿདམར་དང་། །ཧཱུྃ་མཐིང་ཧྲཱིཿལྗང་ལ་སོགས་རང་མདངས་ཅན། །བདག་གི་གནས་བཞིར་ཐིམ་པས་སྒྲིབ་བཞི་དག །བུམ་གསང་ཤེས་རབ་ཡེ་ཤེས་བཞི་བའི་དབང་། །རིམ་གྱིས་ཐོབ་ནས་དགའ་བཞིའི་ཡེ་ཤེས་བརྙེས། །སྐུ་བཞིའི་འབྲས་བུ་མྱུར་དུ་ཐོབ་ནས་ཀྱང་། །མཐར་ནི་བླ་མའི་ཐུགས་དང་རང་གི་སེམས། །དབྱེར་མེད་གཅིག་འདྲེས་སྐྱེ་མེད་ཀློང་དུ་ཨཱཿ འདི་ནས་བྱང་ཆུབ་སྙིང་པོ་མ་ཐོབ་བར། །མཐར་ཐུག་པདྨ་འོད་ཀྱི་ཕོ་བྲང་དུ། །རིག་འཛིན་རྒྱ་མཚོའི་ཚོགས་དང་ལྷན་ཅིག་ཏུ། །རྗེ་བཙུན་ཆེན་པོ་པདྨའི་ཞབས་དྲུང་དུ། །སྐད་ཅིག་ཉིད་དུ་སྐྱེ་བར་བྱིན་གྱིས་རློབས། །ཞེས་འདི་ལྟ་བུ་ཞིག་དགོས་ཞེས་རྒྱ་རོང་ནམ་སྤྲུལ་རིན་པོ་ཆེ་ནས་ཡང་ཡང་བཀའ་ཕེབ་པའི་ངོར་མི་ལྡོག་ཙམ་དུ་སྤྲུལ་པའི་གཏེར་ཆེན་འཇམ་དབྱངས་མཁྱེན་བརྩེ་དབང་པོའི་སློབ་འབངས་ཐ་ཤལ་དུ་གཏོགས་པ་རྫོགས་སྤྲུལ་ལྔ་པའི་མིང་འཛིན་གྱི་ཅོད་པན་སྤྱི་བོར་བཏགས་པ་ཐུབ་བསྟན་ཆོས་ཀྱི་རྡོ་རྗེའམ་མིང་གཞན་པདྨ་ཐེག་མཆོག་བསྟན་འཛིན་གྱིས་མགོན་ཁང་དབང་དྲག་རོལ་བའི་ཞིང་ཁམས་ཆེན་པོ་ནས་བྲིས་པ་དགེ་ལེགས་སུ་གྱུར་ཅིག །དགེའོ། །དགེའོ། །དགེའོ། །