།ས་སྙིང་སྒྲུབ་ཐབས་ནོར་ལྷ་ཀུན་འདུས་བསོད་ནམས་དཔལ་སྟེར་ཞེས་བྱ་བ་བཞུགས་སོ།།

ཨོཾ་སྭ་སྟི། གྲངས་མེད་སྔོན་ནས་མངོན་པར་བྱང་ཆུབ་ཀྱང་། །འགྲོ་བའི་དབུལ་ཕོངས་སྡུག་བསྔལ་གཅོད་མཛད་པའི། །རྒྱལ་སྲས་བྱང་ཆུབ་སེམས་དཔའི་ཚུལ་འཛིན་པར། །སྒོ་གསུམ་གུས་པའི་ཚུལ་གྱིས་འདུད་པར་བགྱི། །དེ་ལ་འདིར་ས་ཡི་སྙིང་པོའི་སྟོང་མཆོད་ཀྱི་ཆོ་ག་མདོར་བསྡུས་བྱ་ཚུལ་ནི། སྔོན་འགྲོ་དངོས་གཞི་གཉིས་ལས། དང་པོ་ལའང་བཤམ་བཀོད་དང་སྔོན་འགྲོ་གཉིས་ལས། དང་པོ་ནི། སྟེགས་གཙང་མའི་དབུས་སུ་མཉྫུའི་ཁར་ས་སྙིང་གི་སྐུ་བྱིན་ལྡན་དང་། གཡས་སུ་བརྒྱད་སྟོང་དང་གསེར་འོད་ཀྱི་གླེགས་བམ། གཡོན་དུ་བཀའ་གདམས་མཆོད་རྟེན། དཀྱིལ་འཁོར་ཀྱི་ནུབ་ཕྱོགས་བང་རིམ་སྟེང་དབུས་སུ་ས་སྙིང་མཆོད་གཏོར་བང་རིམ་ཟླུམ་པོ་བླ་གཏོར་དཀར་པོ་པད་འདབ་བཞི་མཚམས་སུ་ཐེབ་རིལ། དེ་བཞིན་གཤེགས་པ་ཡོན་ཏན་རིན་ཆེན་རྒྱ་མཚོ་ལ་གཏོར་མ་དཀར་ཟླུམ་འདབ་བཞི་མཚམས་སུ་ཐེབ་རིལ་ཅན། བླ་མ་ནོར་ལྷ་རྒྱས་པའི་གཏོར་མ་གྲུབ་བཞི་སེར་པོ་པད་འདབ་བཞི་དང་རྣམ་སྲས་སེར་ཆེན་གཏོར་མ་རིན་ཆེན་འབར་བ་པད་འདབ་བཞི་དང་པད་ཚབ་བཅས། པདྨ་རྒྱལ་པོ་རིན་ཆེན་འབར་བ་པད་འདབ་བཞི། གཡོན་དུ་ལྷ་མོ་དཔལ་ཆེན་མོ་གཡང་བཤོས་ནོར་བུ་འབར་བའི་དབྱིབས་ཅན་འཁོར་རང་འདྲ་བརྒྱད་ས་ཡི་ལྷ་མོ་བརྟན་མ་ལ་དཀར་གཏོར་གླིང་བཞི། ལྷ་ཆེན་དབང་ཕྱུག་ཆེན་པོ་ལ་གཙོ་བོ་འབྲས་ཀྱི་སྙེ་མ་ལྟ་བུ་ཟླུམ་གཏོར་དམར་པོ། འཁོར་རང་འདྲ་ལྔ། ཚོགས་བདག་གླང་སྣ་དབང་གི་གཏོར་མ་ཟླ་གམ་དབྱིབས་ཅན་པད་འདབ་བཞི། ནོར་བདག་ཡིད་བཞིན་ནོར་བུ་ཟླུམ་གཏོར་དམར་པོ་འཁོར་རང་འདྲ་བརྒྱད་མཚམས་སུ་ཐེབ་ཀྱུ་སུམ་བརྩེགས། ཛམ་ནག་ལ་གྲུ་གསུམ་ནག་པོ་པད་འདབ་བཞི། ཛམ་དཀར་ཟླུམ་གཏོར་དཀར་པོ་པད་འདབ་བཞི། ཛམ་སེར་གྲུ་བཞི་སེར་པོ་པད་འདབ་བཞི། ཛམ་དམར་པདྨ་འདབ་བཞིའི་སྟེང་ནོར་བུ་མེ་འབར། ཛམ་ལྗང་གཏོར་མ་ནོར་བུའི་དབྱིབས་ཅན་ལྗང་གུ་པད་འདབ་བཞི། ཕོ་རྒྱུད་གཏོར་མ་དང་ཆད་ཐོ་གཡས། མོ་རྒྱུད་བརྟན་མ་གཡོན། གཡས་གཡོན་དུ་སྨན་རཀ མདུན་དུ་མཆོད་པ་རྣམ་བདུན་བཤམས། མཐའ་སྐོར་དུ་མཆོད་ཁྲི་བང་རིམ་བདུན། མཆོད་ཡོན། ཞབས་བསིལ། མེ་ཏོག བདུག་སྤོས། མར་མེ། དྲི་ཆབ། ཞལ་ཟས་བཅས་རེ་རེ་བཞིན། བརྒྱ་ཕྲག་རེ་རེ་བཤམས། གཞན་རྣམ་བདུན་གྱི་མཆོད་པ་གོང་གི་སྟོང་མཆོད་ལྷག་མ་རྣམ་དཀྱིལ་འཁོར་གྱི་ཉེ་ལོགས་གང་བདེར་བཤམས། སློབ་དཔོན་གྱི་མདུན་དུ་རྡོར་དྲིལ་ཌཱ་མ་རུ་སོགས་མཁོ་བའི་ཡོ་བྱད་རྣམས་འདུ་བྱས་ཏེ། གཉིས་པ་སྔོན་འགྲོ་དངོས་ལ་ས་བཅད་དྲུག་ལས་ཐོག་མར་སྐྱབས་སུ་འགྲོ་བ་ནི། ཧྲཱིཿ རྒྱལ་བ་ཀུན་གྱི་ཡོན་ཏན་གཅིག་བསྡུས་པ། །སེམས་དཔའི་ཚུལ་འཛིན་འགྲོ་ལ་བུ་བཞིན་སྐྱོང། །བྱང་ཆུབ་སེམས་དཔའ་ས་ཡི་སྙིང་པོ་ལ། །སྒོ་གསུམ་གུས་པའི་ཚུལ་གྱིས་སྐྱབས་སུ་མཆི། །གཉིས་པ་སེམས་བསྐྱེད་པ་ནི། ཧོཿ དེང་ནས་བཟུང་སྟེ་བྱང་ཆུབ་མ་ཐོབ་བར། །མཁའ་མཉམ་ཕ་མ་སེམས་ཅན་ཐམས་ཅད་ཀུན། །སྡུག་བསྔལ་འཁོར་བའི་འདམ་དུ་བྱིང་བ་རྣམས། །ཀུན་ཀྱང་སངས་རྒྱས་ས་ལ་འགོད་པར་བགྱི། །གསུམ་པ་ཡན་ལག་བདུན་པ་ནི། ཧཱུྃ། བྱང་ཆུབ་སེམས་དཔའ་ས་སྙིང་ལྷ་ཚོགས་ལ། །གུས་པས་ཕྱག་འཚལ་ཕྱི་ནང་མཆོད་པ་འབུལ། །ཉེས་ལྟུང་ཀུན་བཤགས་རྗེས་སུ་ཡི་རང་ངོ་། །ཆོས་འཁོར་བསྐོར་བར་བསྐུལ་ཞིང་གསོལ་བ་འདེབས། །དགེ་ཚོགས་བྱང་ཆུབ་ཐོབ་པའི་རྒྱུ་རུ་བསྔོ། །ཛཿཧཱུྃ་བྃ་ཧོཿ ཚོགས་ཞིང་རྣམས་རང་ལ་ཐིམ་པར་གྱུར། བཞི་པ་བགེགས་གཏོར་བྱིན་རླབས་ནི། ཧཱུྃ། རྨད་བྱུང་གསང་བའི་དཀྱིལ་འཁོར་ཆེན་པོ་འདིར། །བར་དུ་གཅོད་པའི་གདོན་བགེགས་འབྱུང་པོའི་ཚོགས། །གཏོར་མ་ལོངས་ལ་གནས་འདིར་མ་འདུག་པར། །རང་རང་སོ་སོའི་གནས་སུ་བདེ་བར་དེངས། །གལ་ཏེ་མི་འགྲོ་འདི་རུ་འདུག་གྱུར་ན། །ཁྲོ་རྒྱལ་འབར་བའི་ཚོགས་རྣམས་རབ་ཁྲོས་ནས། །རྡུལ་དུ་བརླག་པར་འགྱུར་བ་གདོན་མི་ཟ། །ཨོཾ་སུམ་བྷ་ནི་སོགས། ལྔ་པ་མཚམས་བཅད་པ་ནི། ཧཱུྃ། སྟེང་འོག་ཕྱོགས་མཚམས་རྡོ་རྗེ་རིན་པོ་ཆེ། །པདྨ་རྒྱ་གྲམ་རལ་གྲི་འཁོར་ལོ་དང་། །མེ་དཔུང་རིགས་ལྔ་སྣ་ཚོགས་མཚོན་ཆ་ཡིས། །གུར་ཁང་འཇའ་ཚོན་འོད་ཕུང་འཁྲིགས་པ་ནི། །བསྐལ་བའི་རླུང་ཡང་ཐར་བའི་དུས་མེད་ན། །མ་རུང་དགྲ་བགེགས་འབྱུང་པོ་སྨོས་ཅི་དགོས། །ཨོཾ་བཛྲ་རཀྵ་རཀྵ་ཧཱུྃ། དྲུག་པ་བྱིན་འབེབས་ནི། ཧཱུྃ། སྔོན་ནས་ཐུགས་བསྐྱེད་སྨོན་ལམ་མཐུ་བཙན་པའི། །བྱང་ཆུབ་སེམས་དཔའ་ས་ཡི་སྙིང་པོ་དང་། །སངས་རྒྱས་རིན་ཆེན་མེ་ཏོག་བཻཌཱུར་སྙིང་། །ཁ་དོག་བཟང་པོ་གསེར་དུ་སྣང་བའི་དཔལ། །བླ་མ་ནོར་ལྷ་དབང་མཛད་པདྨ་རྒྱལ། །རྣམ་ཐོས་སྲས་དང་ལྷ་མོ་དཔལ་ཆེན་མོ། །ས་ཡི་ལྷ་མོ་དབང་ཕྱུག་ཆེན་པོ་དང་། །ཚོགས་བདག་གླང་སྣ་ནོར་བདག་ཛམ་ལྷ་ནག །འཁོར་དུ་དཔལ་གྱི་ལྷ་མོ་གྲོགས་མོ་བརྒྱད། །སྒོ་བཞི་སྐྱོང་བའི་ཛམ་ལྷ་རིགས་བཞི་དང་། །ནོར་ལྷ་བྱེ་བ་འབུམ་གྱི་ཚོགས་དང་བཅས། །འཁོར་བཅས་མཁའ་ལ་ཆར་སྤྲིན་གཏིབས་པ་བཞིན། །ཕོ་བྲང་གཞལ་ཡས་འདི་ལ་བྱིན་ཕོབ་ཅིག །བདག་དང་སྒྲུབ་རྫས་རྣམས་ལ་བཅུད་ཅིག་སྩོལ། །ཡེ་ཤེས་ལྔ་ཡི་དབང་མཆོག་བསྐུར་ནས་ཀྱང་། །མཆོག་དང་ཐུན་མོང་དངོས་གྲུབ་སྩལ་དུ་གསོལ། །ཨོཾ་བཛྲ་ཛྙཱ་ན་ཨ་ཝེ་ཤ་ཡ་ཧཱུྃ། བདུན་པ་མཆོད་པ་བྱིན་རླབས་ནི། རྣམ་དག་ཆོས་ཀྱི་དབྱིངས་ཀྱི་ངང་ཉིད་ལས། །རང་བྱུང་མཆོད་པའི་སྤྲིན་ཕུང་བསམ་ཡས་པར། །རྡོ་རྗེ་ལྷ་མོའི་ལྷ་ཚོགས་གར་སྒྱུར་མ། །ཡེ་ཤེས་བདུད་རྩིའི་རྒྱ་མཚོར་བྱིན་རླབས་ནས། །རབ་འབྱམས་ནམ་མཁའི་ཁམས་ཀུན་གང་བར་མཛོད། །ཨོཾ་བཛྲ་ཨརྒྷཾ་སོགས་ནས་ཤབྟ་ཨཱཿཧཱུཾ། ཨོཾ་ཨཱཿཧཱུཾ་སརྦ་པཉྩ་ཨ་མྲྀ་ཏ་རཀྟ་བྷ་ལིངྟ་སྭཱ་ཧཱ། གཉིས་པ་དངོས་གཞི་ལ་དང་པོ་ལྷ་བསྐྱེད་པ་ནི། ཧཱུྃ། རང་མདུན་འཇའ་ཟེར་འཁྲིགས་པའི་ཀློང་ཡངས་སུ། །རིན་ཆེན་ཁྲི་རྐང་ནོར་བུའི་ཕྲ་ཚོམ་ཅན། །པད་ཟླའི་སྟེང་དུ་ཀྵིཾ་ཡིག་ཡོངས་གྱུར་ལས། །འོད་འཕྲོས་དོན་གཉིས་བྱས་ནས་ཚུར་འདུས་པ། །བྱང་ཆུབ་སེམས་དཔའ་ས་ཡི་སྙིང་པོ་ནི། །སྐུ་མདོག་དཀར་གསལ་སྟོན་ཟླ་ཞུན་མའི་མདོག །ཞལ་གཅིག་ཕྱག་གཉིས་ཡེ་ཤེས་སྤྱན་གཉིས་ལྡན། །ཕྱག་གཡས་འབྲས་ཀྱི་སྙེ་མ་ཐུགས་ཀར་འཛིན། །གཡོན་པས་དྲིལ་བུ་དཀུར་བརྟེན་ཕྱེད་སྐྱིལ་བཞུགས། །ཞི་ཚུལ་དགུ་དང་ཞི་བའི་རྒྱན་གྱི་སྤྲས། །དེ་ཉིད་སྤྱི་གཙུག་པདྨ་ཟླ་བའི་སྟེང་། །སངས་རྒྱས་ཡོན་ཏན་རིན་ཆེན་རྒྱ་མཚོ་ནི། །བཻཌཱུརྱ་དང་གསེར་གྱི་ཁ་དོག་བཟང་། །གསེར་དུ་སྣང་བའི་དཔལ་ཞེས་བཅོམ་ལྡན་འདས། །གསེར་མདོག་ཞལ་གཅིག་ཕྱག་གཉིས་ཞི་འཛུམ་ཅན། །ཆོས་གོས་རྣམ་གསུམ་གསོལ་ཞིང་མཛེས་པར་ཀླུབས། །མཆོག་སྦྱིན་མཉམ་བཞག་རྡོ་རྗེའི་སྐྱིལ་ཀྲུང་བཞུགས། །གཙོ་བོའི་ཕྱི་རོལ་རིན་ཆེན་ཟུར་བརྒྱད་ལ། །ཤར་དུ་བླ་མ་ཨོ་རྒྱན་ནོར་ལྷ་ནི། །རྒྱས་པའི་ལས་མཛད་རཏྣ་ཐོད་ཕྲེང་རྩལ། །གསེར་མདོག་ཞལ་གཅིག་ཕྱག་གཉིས་སྒེག་པའི་ཉམས། །དར་དང་རིན་ཆེན་རུས་པའི་རྒྱན་གྱིས་མཛེས། །ཕྱག་གཡས་མདའ་དར་གཡོན་པས་མཉམ་བཞག་སྟེང་། །ཚེ་ཡི་བུམ་པ་བདུད་རྩིའི་བཅུད་ཀྱིས་གཏམས། །རང་འོད་རིན་ཆེན་མཁའ་འགྲོ་སེར་མོ་ནི། །མདའ་དར་བུམ་པ་འཛིན་ཅིང་ཡབ་ལ་འཁྲིལ། །ཞབས་གཉིས་རྒྱལ་པོ་རོལ་བའི་སྟབས་ཀྱིས་བཞུགས། །ལྷོ་ཕྱོགས་རྣམ་སྲས་སེར་ཆེན་སྒེག་པའི་ཉམས། །སྐུ་མདོག་སེར་པོ་གསེར་གྱི་རི་བོ་འདྲ། །ཞལ་གཅིག་ཕྱག་གཉིས་བེར་ཆེན་དགུ་བརྩེགས་གསོལ། །ཕྱག་གཡས་འདོད་འབྱུང་རིན་ཆེན་རྒྱལ་མཚན་འཛིན། །གཡོན་པས་ནོར་སྐྱུག་གཏེར་གྱི་ནེའུ་ལེ་བསྣམས། །མི་བཟད་གངས་ཀྱི་སེང་གེ་དཀར་མོའི་སྟེང་། །ཞབས་གཉིས་རྒྱལ་པོ་རོལ་བའི་སྟབས་ཀྱིས་བཞུགས། །ནུབ་ཏུ་དབང་མཛད་པདྨ་རྒྱལ་པོ་ནི། །འགྲོ་ལ་སྙིང་རྗེའི་རྗེས་སུ་ཆགས་པའི་རྟགས། །སྐུ་མདོག་པདྨ་རཱ་གའི་ལྷུན་པོ་ལྟར། །ཞལ་གཅིག་ཕྱག་གཉིས་ཞི་མ་ཁྲོ་ཡི་ཉམས། །དབང་མདོག་ཟ་འོག་དམར་པོའི་བེར་ཆེན་གསོལ། །མགུལ་གབ་རིན་ཆེན་སྣ་ཚོགས་རྒྱན་གྱིས་བརྒྱན། །གཡས་པས་སྣང་སྲིད་དབང་སྡུད་ཌཱ་མ་རུ། །གཡོན་པས་སྲིད་གསུམ་གསལ་བའི་མེ་ལོང་བསྣམས། །ཞལ་གཉིས་རྒྱལ་པོ་རོལ་བའི་སྟབས་ཀྱིས་བཞུགས། །བྱང་དུ་ལྷ་མོ་ཆེན་མོ་དཔལ་ཆེན་མོ། །སྐུ་མདོག་ལྗང་གུ་མར་གད་ཞུན་མའི་མདོག །ཞལ་གཅིག་ཕྱག་གཉིས་འོད་ཟེར་ཕྱོགས་བཅུར་འཕྲོ། །ཕྱག་གཡས་རིན་ཆེན་མཚན་པའི་པདྨ་དང་། །གཡོན་པས་སྐྱབས་སྦྱིན་ཕྱག་རྒྱ་བདག་ལ་བསྟན། །དར་དང་རིན་ཆེན་སྣ་ཚོགས་རྒྱན་གྱིས་སྤྲས། །ཤར་ལྷོ་ས་ཡི་ལྷ་མོ་བརྟན་མ་ནི། །གསེར་གྱི་མདོག་ཅན་ཞལ་གཅིག་ཕྱག་གཉིས་པ། །ཐུགས་ཀར་ཐལ་སྦྱར་གསེར་གྱི་བུམ་པ་བསྣམས། །དར་དང་རིན་ཆེན་སྣ་ཚོགས་དུ་མས་བརྒྱན། །ཞབས་གཉིས་སེམས་དཔའི་སྐྱིལ་མོ་ཀྲུང་གི་བཞུགས། །ལྷོ་ནུབ་ལྷ་ཆེན་མ་ཧཱ་དེ་ཝ་ནི། །མདོག་དམར་ཞལ་གཅིག་ཕྱག་གཉིས་སྤྱན་གསུམ་པ། །ཕྱག་གཡས་ལྕགས་ཀྱུ་གཡོན་པས་རླུང་ཞགས་བསྣམས། །བཞེངས་སྟབས་ཤིན་ཏུ་ཆགས་ཤིང་བཞད་པའི་ཉམས། །གཅེར་བུ་ལིངྒ་བསྒྲེངས་ཤིང་བདེ་བ་རྒྱས། །གཡོན་དུ་ལྷ་མོ་ཨུ་མ་དེ་ཝི་ནི། །དམར་གསལ་མཛེས་འཛུམ་ལང་ཚོ་རྒྱས་པའི་ཉམས། །ལྕགས་ཀྱུ་ཞགས་པ་བསྣམས་ཤིང་གཙོ་ལ་འདུད། །གཅེར་མོ་སྐྲ་གྲོལ་རིན་ཆེན་མེ་ཏོག་བརྒྱན། །ནུབ་བྱང་ཚོགས་བདག་གླང་སྣ་སྐུ་མདོག་དམར། །གླང་པོའི་དབུ་ཅན་ཞལ་གཅིག་ཕྱག་གཉིས་པ། །གཡས་པས་ལྕགས་ཀྱུ་གཡོན་པས་ནེའུ་ལེ། །སྐུ་ལ་དར་དང་རིན་ཆེན་རུས་པས་བརྒྱན། །བྱང་ཤར་ཐུགས་ཀྱི་ཛམ་ནག་གཏུམ་ཞིང་ཁྲོ། །སྐུ་མདོག་གནག་ཅིང་སྣུམ་པའི་མདངས་འོད་འཚེར། །ཞལ་གཅིག་ཕྱག་བཞི་མཆེ་གཙིགས་སྤྱན་གསུམ་པ། །ཕྱག་གཡས་རྡོ་རྗེ་འབར་བའི་ཐོ་བ་གསོར། །གཡོན་པས་ཡིད་བཞིན་ནོར་བུའི་རྒྱལ་མཚན་བསྒྲེངས། །གཡས་འོག་ཐོད་པ་རིན་ཆེན་བཀང་བ་བསྣམས། །གཡོན་འོག་གཏེར་གྱི་ནེའུ་ལེ་ནོར་སྐྱུག་བསྣམས། །དབུ་སྐྲ་དམར་སེར་ཐོད་སྐམ་དབུ་རྒྱན་ཅན། །རིགས་བདག་མི་བསྐྱོད་པ་ཡི་དབུ་ལ་བརྒྱན། །སྐུ་ལ་སྟག་ཤམ་སྦྲུལ་ཆུན་རིགས་ལྔས་བརྒྱན། །བདེ་བ་རྒྱས་ཤིང་རྟགས་ཀྱིས་མཚན་མ་བསྒྲེངས། །དེ་ཡི་ཕྱི་རོལ་པདྨ་འདབ་བརྒྱད་ལ། །ཤར་དུ་ཟླ་ཤེལ་ལྷོ་རུ་སྦྱིན་མ་དང་། །ནུབ་ཏུ་སྦྱིན་བཟང་བྱང་དུ་འཕགས་མ་སྟེ། །ཤར་ལྷོ་རབ་བཟང་ལྷོ་ནུབ་རབ་བརྟན་མ། །ནུབ་བྱང་ནོར་རྒྱུན་བྱང་ཤར་དབྱངས་ཅན་མ། །ཕྱག་གཉིས་མཆོག་སྦྱིན་འབྲས་ཀྱི་སྙེ་མ་བསྣམས། །པདྨ་གཏེར་གྱི་བུམ་པའི་གདན་སྟེང་དུ། །ཞབས་གཉིས་བཙུན་མོ་རོལ་བའི་སྟབས་ཀྱིས་བཞུགས། །སྒོ་བཞིར་སྐྱོང་བའི་ཛམ་ལྷ་རིགས་བཞི་ནི། །ཤར་སྒོར་སྐུ་ཡི་ཛམ་དཀར་གཡུ་འབྲུག་ཆིབས། །སྐུ་མདོག་གངས་ཀྱི་རི་ལ་འགྲན་ནུས་པ། །ཞལ་གཅིག་ཕྱག་གཉིས་སྤྱན་གསུམ་ཁྲོ་ཚུལ་ཅན། །གཡས་པས་རྡོ་རྗེ་བེ་ཅོན་གཡོན་ནེའུ་ལེ། །ཁ་ཊཱྃ་མཆན་དུ་བཅུག་ནས་འགྲོ་བ་འདྲེན། །དར་དང་རིན་ཆེན་སྣ་ཚོགས་ཕྲེང་བས་བརྒྱན། །ལྷོ་སྒོར་ཡོན་ཏན་གནོད་སྦྱིན་ཛམ་བྷ་ལ། །གསེར་གྱི་མདོག་ཅན་ཞལ་གཅིག་ཕྱག་གཉིས་པ། །གཡས་པས་བགྲང་ཕྲེང་གཡོན་པས་ནེའུ་ལེ་བསྣམས། །གཏེར་གྱི་བུམ་པའི་ཁྲི་ལ་དགྱེས་པར་རོལ། །ནུབ་སྒོ་གསུང་གི་ཛམ་ལྷ་དམར་པོ་ནི། །མདོག་དམར་ཞལ་གསུམ་ཕྱག་དྲུག་ཆགས་པའི་ཚུལ། །ཞལ་གསུམ་གཡས་དཀར་གཡོན་སྔོ་རྩ་ཞལ་དམར། །ཕྱག་དྲུག་གཡས་ཀྱིས་རིན་ཆེན་ལྕགས་ཀྱུ་དང་། །གཡོན་གྱིས་ཐོད་པ་རིན་ཆེན་བཀང་བ་བསྣམས། །བར་བས་ཞགས་པ་ཐ་གཉིས་ནེའུ་ལེ་བསྣམས། །ཞབས་བཞིས་གནོད་སྦྱིན་ནོར་སྐྱུག་ཕོ་མོ་མནན། །བྱང་སྒོ་སྲུང་བའི་ཕྲིན་ལས་ཛམ་བྷ་ལ། །སྐུ་མདོག་ལྗང་གུ་ཨིནྡྲ་ནི་ལའི་མདོག །ཞལ་གཅིག་ཕྱག་གཉིས་འོད་ཟེར་ཕྱོགས་བཅུར་འཕྲོ། །ཕྱག་གཡས་རྒྱལ་མཚན་གཡོན་པས་ནེའུ་ལེ་བསྣམས། །འགྲོ་ལ་རྗེས་སུ་བརྩེ་བས་བཞེངས་ནས་བཞུགས། །སྣ་ཚོགས་རིན་པོ་ཆེ་ཡིས་རྒྱན་གྱིས་བརྒྱན། །རིགས་བདག་དོན་ཡོད་གྲུབ་པས་དབུ་ལ་བརྒྱན། །ནོར་ལྷ་བྱེ་བ་འབུམ་གྱིས་འཁོར་དང་བཅས། །ཉི་མའི་ཟེར་གྱི་རྡུལ་ལྟར་བསམ་མི་ཁྱབ། །དེ་ལྟར་གསལ་བའི་གནས་གསུམ་འབྲུ་གསུམ་ལས། །འོད་འཕྲོས་རང་བཞིན་གནས་ནས་སྤྱན་དྲངས་གྱུར། །གཉིས་པ་སྤྱན་འདྲེན་པ་ནི། ཧཱུྃ། རང་བཞིན་ཆོས་ཀྱི་དབྱིངས་ཀྱི་ཞིང་ཁམས་དང་། །ཤར་ཕྱོགས་མངོན་པར་དགའ་བའི་ཞིང་ཁམས་ནས། །བྱང་ཆུབ་སེམས་དཔའ་ས་ཡི་སྙིང་པོ་ལ། །ནོར་ལྷ་རྒྱ་མཚོ་འཁོར་དང་བཅས་པ་རྣམས། །འགྲོ་བའི་དབུལ་ཕོངས་སྡུག་བསྔལ་བསལ་བའི་ཕྱིར། །སྔོན་གྱི་ཐུགས་བསྐྱེད་སྨོན་ལམ་རྗེས་དགོངས་ལ། །སྐད་ཅིག་ཙམ་གྱིས་གནས་འདིར་གཤེགས་སུ་གསོལ། །བཛྲ་ས་མ་ཛཿ གསུམ་པ་བཞུགས་གསོལ་ནི། ཧཱུྃ། དབྱིངས་ནས་སྤྱན་དྲངས་ཡེ་ཤེས་སེམས་དཔའི་ཚོགས། །ལྷ་ཚོགས་ཐམས་ཅད་ཆར་སྤྲིན་གཏིབས་པ་བཞིན། །དམ་ཚིག་པ་དང་དབྱེར་མེད་གྱུར་ནས་ཀྱང་། །ཆུ་ལ་ཆུ་བཞག་ཇི་བཞིན་བརྟན་པར་བཞུགས། །ས་མ་ཡ་ཏིཥྛ་ལྷན། བཞི་བ་ཕྱག་འཚལ་ནི། ཧཱུྃ། གྲངས་མེད་སྔོན་ནས་མངོན་པར་བྱང་ཆུབ་ཀྱང་། །འགྲོ་བའི་དབུལ་ཕོངས་སྡུག་བསྔལ་གཅོད་ཕྱིར་དུ། །སེམས་དཔའི་ཚུལ་འཛིན་ས་ཡི་སྙིང་པོ་ལ། །སྒོ་གསུམ་གུས་པའི་སྒོ་ནས་ཕྱག་འཚལ་ལོ། །ཨ་ཏི་པུ་ཧོཿཔྲ་ཏཱིཙྪ་ཧོཿ ལྔ་བ་མཆོད་པ་ནི། ཧཱུྃ། ངོ་མཚར་མཆོད་པའི་སྤྲིན་ཕུང་བསམ་ཡས་པ། །རྨད་བྱུང་ཕྱི་ནང་གསང་བ་བླ་ན་མེད། །དངོས་སུ་འབྱོར་དང་ཡིད་ཀྱི་རྣམ་སྤྲུལ་པ། །ནམ་མཁའི་ཁམས་ཀུན་གང་བར་འབུལ་ལགས་ན། །ཟག་མེད་དགྱེས་པ་ཆེན་པོར་བཞེས་ནས་ཀྱང་། །མཆོག་དང་ཐུན་མོང་དངོས་གྲུབ་སྩལ་དུ་གསོལ། །ཨོཾ་བཛྲ་ཨརྒྷཾ་སོགས་ནས་ཤབྟ་མ་ཧཱ་པཉྩ་ཨ་མྲྀ་ཏ་རཀྟ་བྷ་ལིང་ཏ་མ་ཧཱ་སུ་ཁ་པུ་ཙ་ཁཱ་ཧིཿ དྲུག་པ་བསྟོད་པ་ནི། ཧཱུྃ། ངོ་བོ་གདོད་ནས་ཆོས་སྐུའི་རང་བཞིན་ལས། །འགགས་མེད་སྣང་སྟོང་ཆུ་ཟླའི་རོལ་གར་བཞིན། །གང་ལ་ཅི་འདོད་དངོས་གྲུབ་ཀུན་གྱི་བདག །ས་ཡི་སྙིང་པོའི་ཞབས་ལ་ཕྱག་འཚལ་བསྟོད། །གྲངས་མེད་གོང་ནས་ཚོགས་གཉིས་ཆུ་གཏེར་ལས། །ཕུལ་བྱུང་མཚན་དཔེས་བརྒྱན་པའི་སྐུར་སྟོན་པ། །ལྷ་མོ་དཔལ་ཆེན་མོ་ཡི་བཤེས་གཉེན་ཁྱོད། །སངས་རྒྱས་ཡོན་ཏན་རིན་ཆེན་རྒྱལ་མཚན་བསྟོད། །རྒྱལ་བ་ཀུན་འདུས་ཨོ་རྒྱན་པདྨ་འབྱུང་། །འདོད་རྒུའི་ཆར་འབེབས་དངོས་གྲུབ་ཀུན་གྱི་བདག །རིགས་བརྒྱའི་ཁྱབ་བདག་དཔལ་ལྡན་རྡོ་རྗེ་འཆང་། །རྒྱས་པའི་ལས་མཛད་ཁྱོད་ལ་ཕྱག་འཚལ་བསྟོད། །གང་ཞིག་ཁྱོད་ཉིད་དྲན་པ་ཙམ་གྱིས་ཀྱང་། །སྡུག་བསྔལ་ཀུན་བྲལ་བདེ་སྐྱིད་དཔལ་ལ་སྤྱོད། །མི་ཟད་ནམ་མཁའི་མཛོད་ལ་མངའ་བརྙེས་པ། །རྣམ་མང་ཐོས་སྲས་འཁོར་དང་བཅས་ལ་བསྟོད། །འགྲོ་ལ་སྙིང་རྗེས་ཆགས་པའི་དམར་འོད་འབར། །འགྲོ་བའི་ཡིད་འགུགས་ཁམས་གསུམ་དབང་དུ་བསྡུད། །འགྲོ་ལ་དངོས་གྲུབ་ཅི་འདོད་སྩོལ་མཛད་པ། །འགྲོ་བའི་སྐྱབས་གཅིག་པདྨ་རྒྱལ་པོར་བསྟོད། །ཚེ་འདིར་འབུལ་ཕོངས་སྡུག་བསྔལ་ཀུན་ཞི་ཞིང་། །ཚེ་རབས་ཀུན་ཏུ་ལྷ་མིའི་བདེ་སྐྱིད་ལྡན། །ངན་སོང་ཀུན་བྲལ་འཇིགས་པ་ཀུན་དང་བྲལ། །ལྷ་མོ་དཔལ་ཆེན་མོ་ལ་ཕྱག་འཚལ་བསྟོད། །ས་དང་གངས་བྲག་གཡའ་སྤང་སྐྱེད་མོའི་ཚལ། །མཚོ་རྫིང་ལུ་མ་འབབས་ཆུ་ཀུན་གྱི་བདག །རིན་ཆེན་གཏེར་གྱི་དངོས་གྲུབ་སྩོལ་མཛད་པ། །ས་བདག་ས་ཡི་ལྷ་མོ་ཁྱོད་ལ་བསྟོད། །དབང་གི་བཀའ་སྡོད་འཇིག་རྟེན་དྲེགས་པའི་ཚུལ། །དངོས་གྲུབ་ཀུན་བདག་གཞན་ཡིད་འགུགས་མཛད་པ། །མི་ནོར་ཟས་གསུམ་དངོས་གྲུབ་སྩོལ་བའི་ལྷ། །དབང་ཕྱུག་ཡབ་ཡུམ་ཚོགས་ལ་ཕྱག་འཚལ་བསྟོད། །སྟེང་ཕྱོགས་ལྷ་ཡི་ཁམས་ལ་དབང་སྒྱུར་ཞིང་། །ཟས་ནོར་ལོངས་སྤྱོད་དངོས་གྲུབ་ཀུན་གྱི་བདག །ཚེ་དང་བསོད་ནམས་སྤེལ་བའི་ལྷ་གཅིག་པུ། །ཚོགས་བདག་གླང་སྣ་ཁྱོད་ལ་ཕྱག་འཚལ་བསྟོད། །སྔོན་ཚེ་ས་བརྒྱད་སེམས་དཔའི་ཚུལ་གནས་ཀྱང་། །ད་ལྟ་གནོད་སྦྱིན་ནོར་ལྷའི་ཚུལ་འཆང་བ། །རྣམ་མང་ནོར་གྱི་དངོས་གྲུབ་ཀུན་གྱི་བདག །ཐུགས་ཀྱི་ཛམ་ལྷ་ནག་པོ་ཁྱོད་ལ་བསྟོད། །ནམ་མཁའ་མཛོད་ཀྱི་མངའ་བརྙེས་གཏེར་གྱི་བདག །ལོངས་སྤྱོད་དངོས་གྲུབ་ཆར་དུ་འབེབས་མཛད་པ། །འགྲོ་བའི་རེ་སྐོང་བྱང་ཆུབ་སེམས་དང་ལྡན། །སྐུ་ཡི་ཛམ་ལྷ་དཀར་པོ་ཁྱོད་ལ་བསྟོད། །གང་ཞིག་ཁྱོད་ཉིད་བསྟེན་ཅིང་སྒྲུབ་པའི་ཚེ། །ལོངས་སྤྱོད་ནམ་མཁའི་མཛོད་ལ་མངའ་བརྙེས་པ། །དབུལ་བའི་སྡུག་བསྔལ་འཇོམས་པའི་ལྷ་གཅིག་པུ། །ཡོན་ཏན་ཛམ་བྷ་ལ་ལ་ཕྱག་འཚལ་བསྟོད། །རྒྱལ་ཀུན་གསུང་གི་ཡོན་ཏན་རྫོགས་པའི་ལྷ། །བསྐལ་མང་གོང་ནས་མངོན་པར་བྱང་ཆུབ་ཀྱང་། །དབུལ་ཕོངས་སྡུག་བསྔལ་འཇོམས་པའི་ལྷ་གཅིག་པུ། །གསུང་གི་ཛམ་ལྷ་དམར་པོ་ཁྱོད་ལ་བསྟོད། །གང་ཞིག་དབུལ་བའི་གདུང་བ་སེལ་མཛད་པ། །ཕྲིན་ལས་རིགས་མཆོག་དངོས་གྲུབ་ཀུན་གྱི་བདག །བསོད་ནམས་བྱེ་བ་འབུམ་གྱི་མངའ་བདག་པོ། །ཕྲིན་ལས་ཛམ་ལྷ་ལྗང་གུར་ཕྱག་འཚལ་བསྟོད། །འཇིགས་པ་ཀུན་སྐྱོབ་སྙིང་རྗེའི་མངའ་བདག་པོ། །དབུལ་བའི་གདུང་སེལ་འགྲོ་ལ་བུ་བཞིན་སྐྱོང་། །ས་ཡི་སྙིང་པོ་ནོར་ལྷའི་ཚོགས་བཅས་ལ། །འཁོར་དང་བཅས་ལ་གུས་པས་ཕྱག་འཚལ་བསྟོད། །བདུན་པ་བཟླས་པ་བྱ་བ་ནི། ལྷ་ཚོགས་རྣམས་ཀྱི་རང་རང་གི་ཐུགས་སྲོག་ལ་བཟླ་བྱའི་སྔགས་ཀྱིས་བསྐོར་བ་དེ་ལས་འོད་ཟེར་འཕྲོ་འདུས་དོན་གཉིས་བྱས་ཚུར་འདུས་ཏེ་དངོས་གྲུབ་རྣམ་གཉིས་ཐོབ་པར་གྱུར། ས་སྙིང་སྔགས། ཨོཾ་ཀྵིཾ་ཧི་རཱ་ཛ་ཡེ་སྭཱ་ཧཱ། སངས་རྒྱས་རིན་ཆེན་མེ་ཏོག་ཡོན་ཏན་རྒྱས་པའི་སྙིང་པོ། ཨོཾ་སརྦ་བུདྡྷ་བྷོ་དྷི་ས་ཏྭ་ཧཱུྃ། བླ་མ་ནོར་ལྷ། ཨོཾ་ཨཱཿཧཱུྃ་བཛྲ་གུ་རུ་རཏྣ་ཐོད་ཕྲེང་རྩལ་བཛྲ་ས་མ་ཡ་སིདྡྷི་ཕ་ལ་ཧཱུྃ་ཨཱཿ རྣམ་སྲས་སེར་ཆེན། ཨོཾ་བེེ་ཤྲ་མ་ཎ་ཡེ་སྭཱ་ཧཱ། པདྨ་རྒྱལ་པོ། ཨོཾ་ཨཱཿཧཱུྃ་པདྨ་རཱ་ཛ་སརྦ་སིདྡྷི་ཧཱུྃ། ལྷ་མོ་དཔལ་ཆེན། ཨོཾ་ཀ་མ་ལ་བཱ་སུ་ནི། ཀ་མ་ལེ། མ་ཧཱ་ལ་ཀྵིཾ་རཱ་ཛྱཾ་མེ་བྷ་སུ་ནཱ་ནཱ་ཁ་དྷེ་སརྦ་སིདྡྷི་དེ་ཧི་དེ་ཧི་བ་ར་དེ་སྭཱ་ཧཱ། ས་ཡི་ལྷ་མོ་བརྟན་མའི་སྔགས། ཨོཾ་པྲི་ཐི་དེ་ཝི་ཧཱུྃ། ལྷ་ཆེན་ནི། ཨོཾ་མ་ཧཱ་དྷེ་ཝི་ཛཿ ཨུ་མ་དྷེ་ཝི་ཧྲཱི་ཧ་རི་ནི་ས་པ་ཤཾ་ཀུ་རུ་ཧོཿ ཚོགས་བདག་གླང་སྣ། ཨོཾ་ཤྲཱི་མ་ཧཱ་ཀཱ་ལ་ཧཱུྃཿ ཛམ་ནག ཨོཾ་ཛམ་བྷ་ལ་ཛ་ལེནྟྲ་ཡེ་སྭཱ་ཧཱཿ འཁོར་གྱི་གྲོགས་མོ་བརྒྱད་ཀྱི་སྔགས། ཨོཾ་བཱ་སུ་དྷ་རི་ནྱེེ་སྭཱ་ཧཱ། ཨོཾ་ཙནྟྲ་ཀིནྟྱེ་སྭཱ་ཧཱ། ཨོཾ་དཱ་དཱ་ཡེ་སྭཱ་ཧཱ། ཨོཾ་ཨཱརྱ་ཡེ་སྭ་ཧཱ། ཨོཾ་བྷ་སུ་ཏྲཱ་ཡེ་སྭཱ་ཧཱ། ཨོཾ་གུ་བྷ་ཡེ་སྭཱ་ཧཱ། ཨོཾ་དེ་བྷྱེ་སྭཱ་ཧཱ། ཨོཾ་སྭ་ར་སྭ་སྟྱེེ་སྭཱ་ཧཱ། ཛམ་དཀར།ཨོཾ་པདྨ་ཀྲོ་ཏ་ཨརྻ་ཛམ་བྷ་ལ་ཛ་ལེནྟྲ་ཡེ་སྭཱ་ཧཱ། ཛམ་སེར་ནི། ཨོཾ་ཛམ་བྷ་ལ་ཛ་ལེནྟྲ་ཡེ་སྭཱ་ཧཱ། ཛམ་དམར། ཨོཾ་ཛམ་བྷ་ལ་ཛ་ལེནྟྲ་ཡེ་དྷ་ན་མི་དྷི་ཧྲཱིཿསྭཱ་ཧཱ། ཛམ་ལྗང་། ཨོཾ་ཛམ་བྷ་ལ་ཛ་ལེནྟྲ་ཡེ་སྭ་ཧཱ། ལྷག་ཆད་ཁ་སྐོང་ནི། དབྱངས་གསལ། ཡེ་དྷར། ཡིག་བརྒྱ་བརྗོད་མཐར། རང་གཞུང་མཆོད་བསྟོད། བརྒྱད་པ་དངོས་གྲུབ་བླང་བ་ནི། ཧཱུྃ། འགྲོ་བའི་སྐྱབས་གཅིག་དངོས་གྲུབ་ཀུན་གྱི་བདག །འཇིགས་བརྒྱད་ཞི་དང་ཚེ་བསོད་རྒྱས་པ་དང་། །ཁམས་གསུམ་དབང་སྡུད་དགྲ་བགེགས་ཐམས་ཅད་བསྒྲལ། །མཆོག་དང་ཐུན་མོང་དངོས་གྲུབ་སྩལ་དུ་གསོལ། །ཨོཾ་ཀྵིཾ་ཧི་རཱ་ཛ་ཡེ་སྭཱ་ཧཱ། ཀཱ་ཡ་ཝཀྐ་ཙིཏྟ་སརྦ་སིདྡྷི་ཕ་ལ་ཧཱུྃ། དེ་ནས་རྗེས་ཀྱི་རིམ་པ་ལ་དང་པོ་ཚོགས་བྱིན་རླབས་ནི། ཧཱུྃ། བདག་ཉིད་ལྷར་གསལ་ཐུགས་ལས་ཡི་གེ་གསུམ། །འཕྲོས་པས་རཾ་གྱིས་ཚོགས་ཀྱི་དངོས་འཛིན་བསྲེགས། །ཡྃ་ལས་ཚོགས་ཀྱི་གཉིས་འཛིན་བག་ཆགས་གཏོར། །ཁཾ་ལས་ཚོགས་ཀྱི་འབག་རྩོག་དྲི་མ་བཀྲུས། །རྃ་ཡྃ་ཁྃ། ལན་གསུམ། སླར་ཡང་ཐུགས་ལས་ཨོཾ་ཨཱཿཧཱུྃ་འཕྲོས་པས། །ཨོཾ་གྱིས་རོ་བཅུད་ཕུན་སུམ་ཚོགས་པར་གྱུར། །ཨཱཿཡིས་ཡེ་ཤེས་བདུད་རྩིའི་རྒྱ་མཚོར་བསྒྱུར། །ཧཱུྃ་གིས་ལོངས་སྤྱོད་རྒྱ་ཆེར་སྤེལ་བར་གྱུར། །ཨོཾ་ཨཱཿཧཱུྃ། ལན་གསུམ། གཉིས་པ་ཚོགས་ཞིང་སྤྱན་འདྲེན་ནི། ཧཱུྃ། རང་བཞིན་ཆོས་ཀྱི་དབྱིངས་ཀྱི་ཕོ་བྲང་དང་། །ཤར་ཕྱོགས་མངོན་པར་དགའ་བའི་ཞིང་ཁམས་ནས། །བྱང་ཆུབ་སེམས་དཔའ་ས་ཡི་སྙིང་པོ་དང་། །ནོར་ལྷ་རྒྱ་མཚོའི་འཁོར་དང་བཅས་པ་རྣམས། །ཡེ་ཤེས་ཚོགས་ལ་སྤྱན་འདྲེན་གཤེགས་ནས་ཀྱང་། །མཆོག་དང་ཐུན་མོང་དངོས་གྲུབ་སྩལ་དུ་གསོལ། །བཛྲ་ས་མ་ཡ་ཛཿ གསུམ་པ་ཚོགས་མཆོད་ནི། ཧཱུྃ། བླ་མེད་མཆོག་གི་མཆོད་པ་དམ་པ་འདི། །ངོ་བོ་ཤ་ལྔ་བདུད་རྩིའི་རང་བཞིན་ཅན། །རྣམ་པ་ཚོགས་ཀྱི་ལོངས་སྤྱོད་སྐར་ལྟར་བཀྲམ། །མཆོད་པ་འབུལ་ལོ་བཞེས་ནས་དངོས་གྲུབ་སྩོལ། །ཨོཾ་གྷ་ན་ཙཀྲ་པུ་ཙ་ཁཱ་ཧི། བཞི་པ་བཤགས་པ་ནི། ཧཱུྃ། ཐོག་མེད་དུས་ནས་ད་ལྟ་ཡན་ཆད་དུ། །ཉེས་ལྟུང་མི་དགེའི་ལས་རྣམས་ཅི་བགྱིས་པ། །ཚོགས་ཀྱི་མཆོད་པ་ཕུལ་བའི་མཐུ་ནུས་ཀྱིས། །སྒྲིབ་གཉིས་དག་ནས་ཚངས་པའི་དངོས་གྲུབ་སྩོལ། །ཡིག་བརྒྱ་བརྗོད། ལྔ་བ་བསྒྲལ་པ་ནི། ཧཱུྃ། མ་རིག་བདག་འཛིན་རུ་ཏྲ་ལས་བྱུང་བའི། །གཟུགས་ཕུང་བདག་མེད་རྟོགས་པའི་མཚོན་ཆ་ཡིས། །བསྒྲལ་ནས་རྣམ་ཤེས་སྐྱེ་མེད་ཀློང་དུ་སྤོར། །ལོག་རྟོག་འཁོར་བའི་སྡུག་བསྔལ་གཅོད་པར་ཤོག །སརྦ་ཤ་ཏྲུཾ་མཱ་ར་ཡ་རྦད། དྲུག་པ་ཞལ་བསྟབས་ནི། དགྲ་བགེགས་གདུག་པ་བསྒྲལ་བ་ལས་བྱུང་བའི། །གཏི་མུག་ཤ་དང་འདོད་ཆགས་ཁྲག་གི་མཚོ། །ཞེ་སྡང་རུས་པའི་ཚོགས་ཀྱི་འཁོར་ལོ་འདི། །ཡེ་ཤེས་ཀློང་ཡངས་ཆེན་པོའི་ཞལ་དུ་བསྟབས། །ཁ་རཾ་ཁཱ་ཧི། ཚོགས་དྲངས། བདུན་པ་ལྷག་མ་ནི། ཨོཾ་ཨཱ་ཀཱ་རོ་སོགས། ཧཱུྃ། ལྷག་ལ་དབང་བའི་དྲེགས་པའི་ཚོགས་རྣམས་ཀྱང་། །ལ་ལ་ཞི་དང་ལ་ལ་ཁྲོ་བོའི་ཚུལ། །ལ་ལ་ཆགས་དང་ལ་ལ་སྒེག་པའི་ཚུལ། །ཀུན་ཀྱང་རྣམ་འགྱུར་སྣ་ཚོགས་ཅིར་ཡང་སྟོན། །མཁའ་ལ་འགྲོ་ཞིང་ཧབ་ཤ་བྱེད་ཅིང་རྒྱུག །སྡུག་པ་ལེན་ཞིང་རྔམས་པའི་སྟངས་སྟབས་ཀྱིས། །ལྷག་གཏོར་བཞེས་ལ་བཅོལ་བའི་ཕྲིན་ལས་མཛོད། །བརྒྱད་པ་བཞེངས་བསྐུལ་ནི། ཧཱུྃ། བཞེངས་ཤིག་བཞེངས་ཤིག་ཆོས་ཀྱི་དབྱིངས་ནས་བཞེངས། །ཐུགས་དམ་མ་གཡེལ་དམ་བཅའ་རྗེས་དགོངས་ལ། །བཀྲེས་སྐོམ་དབུལ་བའི་སྡུག་བསྔལ་བསལ་བ་དང་། །མཆོག་ཐུན་དངོས་གྲུབ་མཐའ་དག་སྩལ་དུ་གསོལ། །དགུ་བ་ཆད་ཐོ་ནི། ཧཱུྃ། སྔོན་ཚེ་འདས་དུས་བསྐལ་བའི་དང་པོ་ལ། །ཆོས་སྐུའི་སྟོན་པ་ཀུན་ཏུ་བཟང་པོ་ཡིས། །རང་སྣང་དག་པའི་འཁོར་ཚོགས་མཐའ་དག་ལ། །གསང་སྔགས་གཉན་གྱི་དཀྱིལ་འཁོར་ཞལ་ཕྱེས་ཚེ། །དྲེགས་པ་སྡེ་བརྒྱད་ལྷ་སྲིན་ཐམས་ཅད་ཀྱིས། །ཇི་ལྟར་ཞལ་བཞེས་དམ་ལས་མ་འདའ་བར། །གཏོར་མ་བཞེས་ལ་བཅོལ་བའི་ཕྲིན་ལས་མཛོད། །དེ་འོག་བསྐལ་བ་བར་མའི་དུས་ཀྱི་ཚེ། །རི་བོ་མ་ལ་ཡ་ཡི་རྩེ་མོ་ནས། །གསང་བའི་བདག་པོ་ཕྱག་ན་རྡོ་རྗེ་ཡིས། །དམ་པའི་རིགས་ཅན་དྲྭ་མ་ལྔ་རྣམས་ལ། །གསང་སྔགས་གཉན་གྱི་དཀྱིལ་འཁོར་ཞལ་ཕྱེས་ཚེ། །དྲེགས་པ་སྡེ་བརྒྱད་ལྷ་སྲིན་ཐམས་ཅད་ཀྱིས། །ཇི་ལྟར་ཞལ་བཞེས་དམ་ལས་མ་འདས་པར། །གཏོར་མ་བཞེས་ལ་བཅོལ་བའི་ཕྲིན་ལས་མཛོད། །དེ་འོག་བསྐལ་བ་ཐ་མའི་དུས་ཀྱི་ཚེ། །ལྷོ་ནུབ་རྔ་ཡབ་གླིང་ཕྲན་དཔལ་རིའི་རྩེར། །པདྨ་འོད་ཀྱིས་སྤྲུལ་པའི་གནས་མཆོག་ཏུ། །རིག་འཛིན་སློབ་དཔོན་པདྨ་འབྱུང་གནས་ཀྱིས། །སྐལ་ལྡན་ལས་ཅན་དག་པའི་འཁོར་རྣམས་དང་། །རིག་འཛིན་དཔའ་བོ་མཁའ་འགྲོའི་ཚོགས་རྣམས་ལ། །བླ་མེད་གསང་བའི་དཀྱིལ་འཁོར་ཞལ་ཕྱེས་ཚེ། །དྲེགས་པ་སྡེ་བརྒྱད་ལྷ་སྲིན་ཐམས་ཅད་ཀྱིས། །ཇི་ལྟར་ཞལ་བཞེས་དམ་ལས་མ་འདས་པར། །གཏོར་མ་བཞེས་ལ་བཅོལ་བའི་ཕྲིན་ལས་མཛོད། །བཅུ་པ་བརྟན་སྐྱོང་ནི། བྷྱོཿ བདུད་མོ་བཞི་དང་གནོད་སྦྱིན་སྨན་མོ་བཞི། །རང་རང་འཁོར་དང་བྲན་གཡོག་བསམ་མི་ཁྱབ། །འཁོར་དང་ཡང་གཡོག་སྨན་ཕྲན་འབུམ་དང་བཅས། །ལྷབ་ལྷུབ་གོས་དང་རོལ་མོའི་སྒྲ་དང་བཅས། །ཚུར་གཤེགས་ཚུར་གཤེགས་དམ་སྐོང་ཕྲིན་ལས་སྒྲུབས། །སྔོན་ཚེ་སློབ་དཔོན་པདྨ་འབྱུང་གནས་དང་། །དྲེགས་པའི་བཀའ་བབས་རླང་ཆེན་དཔལ་སེང་གེས། །གསང་མཚན་བཏགས་ནས་ཞིང་ཆེན་སྟན་ལ་བཞག །ལག་ཏུ་རྡོ་རྗེ་གཏད་དེ་དབང་བསྐུར་ནས། །བོད་ཁམས་མཐའ་དབུས་ཐམས་ཅད་སྲུང་བ་དང་། །སངས་རྒྱས་བསྟན་པ་སྲུང་བར་ཞལ་བཞེས་པའི། །ཇི་ལྟར་ཁས་བླངས་དམ་བཅའ་ཅི་བཞིན་དུ། །གཏོར་མ་བཞེས་ལ་བཅོལ་བའི་ཕྲིན་ལས་མཛོད། །བཅུ་གཅིག་པ་རྟ་བྲོ་ནི། ཨེ་ལས་སྲིད་པ་ལས་ཀྱི་བྲུབ་ཁུང་དུ། །ཡོངས་ལ་གནོད་ཅིང་འཚེ་བའི་དམ་སྲིའི་ཚོགས། །གནམ་ལྕགས་འབར་བའི་འཁོར་ལོའི་རྩིབས་ལ་བསྐྱོན། །ཆུ་སྲིན་རྔམས་པའི་གྲེ་བའི་ནང་དུ་བསྐྱིལ། །རྔམས་བརྗིད་རི་རབ་འབར་བའི་འོག་ཏུ་མནན། །སྟེང་དུ་ལྷ་ཚོགས་ཀུན་ཀྱང་རབ་ཁྲོས་ནས། །སྐུ་ཡི་གར་གྱིས་བདུད་སྡེ་ཕྱེ་མར་བརླག །གསུང་གི་ང་རོས་ལོག་འདྲེན་བརྒྱལ་ཞིང་སྔངས། །ཐུགས་ནི་མ་གཡོས་སྙིང་རྗེའི་རང་བཞིན་གྱིས། །ཉོན་མོངས་དུག་ལྔའི་རྣམ་རྟོག་ཞི་བར་མཛོད། །རིན་ཆེན་བྱང་ཆུབ་སེམས་ནི་མ་སྐྱེས་བར། །བསྐལ་བའི་བར་དུ་ནམ་ཡང་མི་བཏང་ངོ་། །ཨོཾ་ཨཱཿཧཱུྃ་སྟྭཾ་བྷ་ཡ་ལཾ་ནན། གཏང་རག་མཆོད་བསྟོད་ནི། བཛྲ་པུཥྤེ་སོགས་ནས་ཤབྟ་པྲ་ཏཱིཙྪ་སྭ་ཧཱ། ཨོཾ་མ་ཧཱ་པཉྩ་སོགས། མ་ཧཱ་རཀྟསོགས།མ་ཧཱ་བྷ་ལིང་ཏ་སོགས་ཀྱིས་མཆོད། བསྟོད་པ་ནི། བཀའ་རྒྱུད་བླ་མ་སོགས། ནོངས་བཤགས་ནི། མ་རྙེད་ཡོངས་སུ་སོགས། བཅུ་གཉིས་པ་རྟེན་བཞུགས། འདིར་ནི་རྟེན་སོགས། བཅུ་གསུམ་པ་བསྡུ་རིམ། སྣོད་བཅུད་འོད་ཞུ་གཞལ་ཡས་ཁང་ལ་ཐིམ། །དེ་ཡང་རིམ་བཞིན་ལྷ་ཚོགས་རྣམས་ལ་ཐིམ། །ལྷ་ཚོགས་རིམ་བཞིན་གཙོ་བོ་ཉིད་ལ་ཐིམ། །གཙོ་བོ་མི་དམིགས་རིམ་བཞིན་དབྱིངས་སུ་ཡལ། །ཨ་ཨ་ཨ། སླར་ཡང་རང་ཉིད་སེམས་དཔའི་སྐུ་རུ་གྱུར། །བཅུ་བཞི་པ་བསྔོ་བ་ནི། དགེ་བ་འདི་ཡིས་མྱུར་དུ་བདག །ས་ཡི་སྙིང་པོ་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དེ་ཡི་ས་ལ་འགོད་པར་ཤོག །བཅོ་ལྔ་པ་སྨོན་ལམ་ནི། མར་གྱུར་མཁའ་མཉམ་སེམས་ཅན་ཐམས་ཅད་ཀུན། །སྡུག་བསྔལ་འཁོར་བའི་མཚོ་ལས་བརྒལ་ཕྱིར་དུ། །རིམ་གཉིས་ཟུང་འཇུག་ལམ་ལ་བརྟེན་ནས་ཀྱང་། །སྐུ་བཞིའི་འབྲས་བུ་མྱུར་དུ་སྨིན་པར་ཤོག །བཅུ་དྲུག་པ་བཀྲ་ཤིས་ནི། ཧཱུྃ། ཡང་དག་ལམ་སྟོན་བདེ་ཆེན་ལམ་ལ་བཀོད། །རྩ་བརྒྱུད་བླ་མ་རྣམས་ཀྱི་བཀྲ་ཤིས་ཤོག །གང་ལ་ཅི་འདོད་དངོས་གྲུབ་སྩོལ་མཛད་པ། །ཡི་དམ་ལྷ་ཚོགས་རྣམས་ཀྱི་བཀྲ་ཤིས་ཤོག །ཕྲིན་ལས་རྣམ་བཞི་སྒྲུབ་པའི་གྲོགས་མཛད་མ། །མ་སྲིང་མཁའ་འགྲོའི་ཚོགས་ཀྱི་བཀྲ་ཤིས་ཤོག །དམ་ཉམས་དགྲ་བགེགས་མ་ལུས་འཇོམས་མཛད་པའི། །དམ་ཅན་ཆོས་སྐྱོང་རྣམས་ཀྱི་བཀྲ་ཤིས་ཤོག །ཅེས་པ་འདི་ཡང་མཁན་ཆེན་དཀོན་མཆོག་འོད་ཟེར་གྱི་ཡང་སྲིད་མཁན་སྤྲུལ་ཐུབ་བསྟན་འཕགས་པ་ནས་ཡང་ཡང་བསྐུར་བའི་ངོར། ས་ཕོ་འབྲུག་ལོའི་ཟླ་བ་དྲུག་པའི་ཚེས་ལ་ལྷ་དར་ཞི་དར་མཆེད་བརྒྱད་ཀྱི་མདུན་ཞོལ་ལ་དཀར་ཕུན་ཚོགས་གླིང་ནས་རྫོགས་སྤྲུལ་ལྔ་པར་འབོད་པ་ཐུབ་བསྟན་ཆོས་ཀྱི་རྡོ་རྗེས་བྲིས་པ་འདིས་ཀྱང་སེམས་ཅན་ཐམས་ཅད་དབུལ་ཕོངས་བཀྲེས་སྐོམ་གྱི་སྡུག་བསྔལ་ལས་གྲོལ་བའི་རྒྱུར་གྱུར་ཅིག སརྦ་མངྒ་ལཾ། །བཀྲ་ཤིས་པར་ཤོག །