ས་སྙིང་སྒྲུབ་ཐབས་ནོར་ལྷ་ཀུན་འདུས་ཀྱི་བསྐང་བ་བསོད་ནམས་གཏེར་མཛོད་ཅེས་བྱ་བ་བཞུགས་སོ།།

ཧྲཱིཿ སྣང་སྲིད་རྣམ་དག་ཡེ་ནས་འོག་མིན་ཞིང་། །དག་པ་རབ་འབྱམས་བཀོད་པ་མཐའ་ཡས་པ། །རང་སྣང་ལས་གྲུབ་རིན་ཆེན་གཞལ་ཡས་ཁང་། །རྒྱ་ཁྱོན་ཚད་མེད་ནམ་མཁའི་མཐའ་དང་མཉམ། །རང་བྱུང་ལྷུན་གྲུབ་རྒྱན་བཀོད་ཕུན་སུམ་ཚོགས། །ལྷ་ཆེན་འཕྲུལ་དགའི་ལོངས་སྤྱོད་ཇི་བཞིན་དུ། །བསྐང་རྫས་ཀ་ཆ་དཀོར་ཆའི་ཡོ་བྱད་ནི། །རྣམ་མང་ནམ་མཁའི་རྒྱན་ལྟར་བཀྲམ་ལགས་ན། །ཡེ་ཤེས་སྤྱན་ལྡན་ནོར་ལྷ་རྒྱ་མཚོའི་ཚོགས། །འགྲོ་བའི་དབུལ་ཕོངས་སྡུག་བསྔལ་བསལ་ཕྱིར་དུ། །སྔོན་གྱི་ཐུགས་དམ་གཉན་པོ་རྗེས་དགོངས་ལ། །ཐུགས་དམ་བསྐང་ལ་གནས་འདིར་གཤེགས་སུ་གསོལ། །ཤར་ཕྱོགས་མངོན་པར་དགའ་བའི་ཞིང་ཁམས་ནས། །གྲངས་མེད་སྔོན་ནས་མངོན་པར་བྱང་ཆུབ་ཀྱང་། །སེམས་དཔའི་ཚུལ་འཛིན་བྱང་སེམས་ས་ཡི་སྙིང་། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །འོག་མིན་ཆོས་ཀྱི་དབྱིངས་ཀྱི་ཞིང་ཁམས་ནས། །སངས་རྒྱས་ཡོན་ཏན་རིན་ཆེན་རྒྱ་མཚོ་ཆེ། །གསེར་དུ་སྣང་བའི་དཔལ་ཞེས་བྱ་བ་ཡི། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །ལྷོ་ནུབ་རྔ་ཡབ་གླིང་གི་གཞལ་ཡས་ནས། །ཨོ་རྒྱན་ནོར་ལྷ་རཏྣ་ཐོད་ཕྲེང་རྩལ། །གསང་བའི་ཡུམ་ཆེན་རིན་ཆེན་མཁའ་འགྲོ་བཅས། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །བྱང་ཕྱོགས་ལྕང་ལོ་ཅན་གྱི་ཕོ་བྲང་ནས། །སྔོན་ནས་བྱང་ཆུབ་བརྙེས་ཀྱང་ནོར་ལྷའི་ཚུལ། །གནོད་སྦྱིན་རྒྱལ་པོ་ཆེན་པོ་རྣམ་ཐོས་སྲས། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །དགའ་བ་ཚལ་གྱི་དུར་ཁྲོད་ཆེན་པོ་ནས། །དབང་གི་ལྷ་མཆོག་དངོས་གྲུབ་ཀུན་གྱི་བདག །ཁམས་གསུམ་དབང་སྡུད་པདྨ་རྒྱལ་པོའི་ཚོགས། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །ལྕང་ལོ་ཅན་གྱི་ཕོ་བྲང་དམ་པ་ནས། །དབུལ་བའི་རྒྱུན་གཅོད་འདོད་རྒུའི་ཆར་འབེབས་པ། །གཡང་གི་ལྷ་མོ་ཆེན་མོ་དཔལ་ཆེན་མོ། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །སྟོང་གསུམ་མི་མཇེད་ས་ལ་དབང་མཛད་ཅིང་། །རྒྱལ་ཁམས་ཀུན་ཏུ་བདེ་ལེགས་སྟེར་མཛད་པའི། །ས་བདག་ཆེན་མོ་ལྷ་མོ་བརྟན་མའི་ཚོགས། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །གངས་དཀར་རྩེ་དང་ཙནྡན་ནགས་གླིང་ནས། །འཇིག་རྟེན་མེས་པོ་ཁམས་གསུམ་ཀུན་གྱི་བདག །དབང་ཕྱུག་ཆེན་པོ་ཨུ་མ་དེ་ཝ་བཅས། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །སྟེང་ཕྱོགས་སུམ་ཅུ་རྩ་གསུམ་ལྷ་ཡུལ་ནས། །དཔལ་འབྱོར་ཟས་ནོར་ལོངས་སྤྱོད་སྤེལ་མཛད་པའི། །ཚོང་ལྷ་མགོན་པོ་ཚོགས་བདག་གླང་སྣའི་ཚོགས། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །བྱང་ཕྱོགས་གནོད་སྦྱིན་རྫོང་གི་ཕོ་བྲང་ནས། །སྟོན་པའི་ཞལ་མཐོང་གཏེར་གྱི་མངའ་བདག་པོ། །ཐུགས་ཀྱི་ཛམ་ནག་ཁྲོ་ཞིང་གཏུམ་པའི་སྐུ། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །རི་རབ་བྱང་ཕྱོགས་གཉའ་ཤིང་འཛིན་གྱི་རྩེར། །ཟླ་ཤེལ་སྦྱིན་མ་སྦྱིན་བཟང་འཕགས་མ་སྟེ། །རབ་བཟང་རབ་སྦྱིན་ནོར་རྒྱུན་དབྱངས་ཅན་མ། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །ཤར་ཕྱོགས་ཞི་བ་ཆེན་པོའི་དཀྱིལ་འཁོར་ནས། །ཟས་ནོར་ལོངས་སྤྱོད་ཀུན་གྱི་མངའ་བདག་པོ། །སྐུ་ཡི་ཛམ་ལྷ་དཀར་པོ་འབྲུག་ལ་ཆིབས། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །ལྷོ་ཕྱོགས་རྒྱས་པ་ཆེན་པོའི་དཀྱིལ་འཁོར་ནས། །ཚེ་བསོད་དངོས་གྲུབ་དཔལ་སྟེར་ཀུན་གྱི་བདག །གཡང་གི་འབྱུང་གནས་ཡོན་ཏན་ཛམ་བྷ་ལ། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །ནུབ་ཕྱོགས་དབང་གི་ཕོ་བྲང་ཆེན་པོ་ནས། །མི་ནོར་ཆོས་གསུམ་ཀུན་གྱི་མངའ་བདག་པོ། །གསུང་གི་དབང་ཕྱུག་མགོན་པོ་ཛམ་ལྷ་དམར། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །བྱང་ཕྱོགས་མངོན་སྤྱོད་དྲག་པོའི་གཞལ་ཡས་ནས། །རྒབ་འདྲེ་འབྱུང་པོའི་ཚོགས་རྣམས་འདུལ་བའི་ལྷ། །ཕྲིན་ལས་མཐར་ཕྱིན་མགོན་པོ་ཛམ་ལྷ་ལྗང་། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །གཞན་ཡང་དཀྱིལ་འཁོར་ཆེན་པོའི་འཁོར་ཡུག་ཏུ། །ནོར་ལྷ་རྒྱ་མཚོ་འཁོར་ཚོགས་བསམ་མི་ཁྱབ། །རང་རང་སྤྲུལ་པ་འཁོར་དང་ཡང་འཁོར་བཅས། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །རྣམ་མང་ནོར་ལྷ་རྒྱ་མཚོའི་ལྷ་ཚོགས་རྣམས། །ཀུན་ཀྱང་ནོར་བུའི་རྒྱན་ཆ་ཁྲ་ལ་ལ། །དར་ཟབ་ན་བཟའ་སྣ་ཚོགས་ལྷུབས་སེ་ལྷུབ། །འོད་ཟེར་སྣ་ཚོགས་ཕྱོགས་བཅུ་ཀུན་ཏུ་འཕྲོ། །འགྲོ་བ་སེམས་ཅན་ཀུན་གྱི་དོན་སླད་དུ། །ཐུགས་དམ་བསྐང་བའི་གནས་འདིར་གཤེགས་སུ་གསོལ། །ཧཱུྃ། ཐུགས་དམ་གཉན་པོ་བསྐང་བའི་དམ་རྫས་ནི། །ཕྱི་མཆོད་འདོད་ཡོན་རྣམ་ལྔ་སྤྲིན་ལྟར་གཏིབས། །ནང་མཆོད་སྨན་རཀ་གཏོར་གསུམ་དྭངས་རེ་སྤྲོ། །གསང་མཆོད་གྷ་ན་ཙཀྲ་རི་ལྟར་སྤུངས། །རི་རབ་ལྷུན་པོ་གསེར་གྱི་རི་བདུན་དང་། །རོལ་བའི་མཚོ་བདུན་ལྕགས་རི་མུ་ཁྱུད་བཅས། །གླིང་ཆེན་བཞི་དང་གླིང་ཕྲན་ཚོགས་དང་བཅས། །ནམ་མཁའི་ནོར་བུ་ཉི་ཟླ་གཟའ་སྐར་ཚོགས། །སྐྱེད་ཚལ་ཁང་བཟང་རིན་ཆེན་གཏེར་གྱི་བུམ། །མ་རྨོས་ལོ་ཏོག་དགོས་འདོད་དཔག་བསམ་ཤིང་། །འདོད་འཇོའི་བ་མོ་ཁྲུས་ཀྱི་རྫིང་བུ་དང་། །བཀྲ་ཤིས་རྟགས་བརྒྱད་རྒྱལ་སྲིད་རིན་ཆེན་བདུན། །རིན་ཆེན་སྣ་བདུན་ཉེ་བའི་རིན་ཆེན་བདུན། །ནོར་འཛིན་ནེའུ་ལེ་བཀྲ་ཤིས་རྫས་མཆོག་བརྒྱད། །ཁྲབ་རྨོག་རལ་གྲི་མདའ་གཞུ་གོ་མཚོན་སོགས། །ཡོལ་བ་བླ་བྲེ་རྒྱལ་མཚན་འཕན་ཕུར་དང་། །ཟ་འོག་གུར་ཕུབ་དར་གྱི་ལྡ་ལྡི་སོགས། །ཕོ་ཆས་མོ་ཆས་དར་ཟབ་གོས་ཀྱི་རིགས། །སལ་སིལ་ཆ་ལང་རོལ་མོ་སྣ་ཚོགས་སྒྲ། །རྔ་དང་རྫ་རྔ་པི་ཝཾ་གླིང་བུའི་སྒྲ། །རི་དྭགས་གཡུང་དྭགས་ཆུ་གནས་འདབ་ཆགས་སོགས། །མདོར་ན་སྲིད་པ་གསུམ་གྱི་ཞིང་ཁམས་ན། །དངོས་འབྱོར་ཡིད་སྤྲུལ་མཆོད་པའི་སྤྲིན་ཕུང་ནི། །ཡིད་འོང་མཆོད་པར་འོས་པའི་རྒྱན་རྣམས་ཀྱིས། །ནོར་ལྷ་རྒྱ་མཚོའི་ལྷ་ཚོགས་ཐུགས་དམ་བསྐང་། །དེ་ལྟར་ཐུགས་དམ་བསྐང་བའི་བྱིན་རླབས་ཀྱིས། །རྣལ་འབྱོར་བདག་ཅག་དཔོན་སློབ་འཁོར་བཅས་ཀྱི། །ཐོགས་མེད་དུས་ནས་ད་ལྟ་ཡན་ཆད་དུ། །མ་རིག་དབང་གྱུར་ཉེས་པའི་སྐྱོན་དབང་གིས། །དཀོན་མཆོག་དཀོར་འཕྲོག་རློམ་སེམས་བགྱིས་པ་དང་། །དཀོར་ལ་འབག་དང་སེར་སྣས་བཅིངས་བ་ཡི། །མཆོད་སྦྱིན་ཆགས་ཤིང་ཛམ་ལྷའི་ཆུ་རྒྱུན་བཅད། །གཏོར་ཚོགས་མཆོད་པ་གཞུང་དང་འགལ་བའི་ཚོགས། །མདོར་ན་མི་མཐུན་ཉེས་པ་ཅི་མཆིས་པ། །གནོང་ཞིང་འགྱོད་པའི་སེམས་ཀྱིས་མཐོལ་ལོ་བཤགས། །ཚངས་པ་མཆོག་གི་དངོས་གྲུབ་སྩལ་དུ་གསོལ། །ཡིག་བརྒྱ་བརྗོད། ཅེས་པ་འདིའང་རྫོགས་སྤྲུལ་ལྔ་པ་ཐུབ་བསྟན་ཆོས་ཀྱི་རྡོ་རྗེས་བྲིས་པ་དགེའོ། །