ས་ཡི་སྙིང་པོའི་སྒྲུབ་ཐབས་ཆ་ལག་གཡང་འགུགས་བསམ་འཕེལ་ནོར་བུའི་ཆར་འབེབས་ཞེས་བྱ་བ་བཞུགས་སོ།།

གཡང་རྫས་སྤྱི་ཁྱབ་རྣམས་དང་། ཁྱད་པར་གཡང་ཕོར། ཕྱེ་མར། གཡང་མདའ། དཀར་གསུམ། མངར་གསུམ། གཡང་ཆང་སོགས་འདུ་བྱས་ལ། །དང་པོ་སངས་རྒྱས་བྱང་སེམས་བླ་མ་ཡི་དམ་མཁའ་འགྲོ་རྣམས་ཀྱི་གཡང་འགུགས་ནི། ཧཱུྃ་ཧྲཱིཿ རབ་འབྱམས་ཕྱོགས་བཅུའི་ཞིང་ན་བཞུགས་པ་ཡིས། །སངས་རྒྱས་བྱང་སེམས་དཔའ་བོ་མཁའ་འགྲོ་དང་། །བླ་མ་རིག་འཛིན་ཡི་དམ་ཞི་ཁྲོའི་ཚོགས། །ཆོས་སྐྱོང་སྲུང་མའི་བྱིན་རླབས་གཡང་ཕོབ་ཅིག །སྟེང་འོག་ཕྱོགས་བཅུར་བཞུགས་པའི་བདེ་བར་གཤེགས། །སྟོན་པ་བཅུ་གཉིས་སྨན་བླ་མཆེད་བརྒྱད་དང་། །འོད་དཔག་མེད་དང་མི་འཁྲུགས་ཚེ་དཔག་མེད། །རབ་འབྱམས་ཞིང་ན་བཞུགས་པའི་སངས་རྒྱས་རྣམས། །ཕྱྭ་དང་གཡང་གི་དངོས་གྲུབ་སྩལ་དུ་གསོལ། །ཉེ་སྲས་བརྒྱད་དང་སྐར་མ་དྲི་མ་མེད། །སྨན་གྱི་རྒྱལ་པོ་སྨན་ནི་ཡང་དག་འཕགས། །ནམ་མཁའ་མཛོད་དང་སྤོས་ཀྱི་གླང་པོ་སོགས། །རྒྱལ་སྲས་སེམས་དཔའ་སེམས་མའི་ཚོགས་དང་བཅས། །ཕྱྭ་དང་གཡང་གི་དངོས་གྲུབ་སྩལ་དུ་གསོལ། །ཐོག་མའི་མགོན་པོ་ཀུན་ཏུ་བཟང་པོ་དང་། །རིགས་བརྒྱ་རིགས་ལྔ་རིགས་གསུམ་དྲྭ་མ་ལྔ། །དགའ་རབ་ཤྲཱི་སེང་པད་འབྱུང་རིག་འཛིན་བརྒྱད། །དགོངས་བརྡ་སྙན་བརྒྱུད་བླ་མའི་ཚོགས་རྣམས་ཀྱིས། །ཕྱྭ་དང་གཡང་གི་དངོས་གྲུབ་སྩལ་དུ་གསོལ། །སྒྲུབ་པ་བཀའ་བརྒྱད་སྒྱུ་འཕྲུལ་དྲྭ་བ་དང་། །དུས་ཀྱི་འཁོར་ལོ་དགྱེས་རྡོར་བདེ་མཆོག་ལྷ། །སངས་རྒྱས་ཐོད་པ་ཚོགས་ཆེན་འདུས་པ་སོགས། །ཡིད་དམ་ཞི་ཁྲོའི་དཀྱིལ་འཁོར་ཚོགས་རྣམས་ཀྱི། །ཕྱྭ་དང་གཡང་གི་དངོས་གྲུབ་སྩལ་དུ་གསོལ། །རྡོ་རྗེ་ཕག་མོ་རིགས་ལྔ་མཁའ་འགྲོའི་ཚོགས། །ཀུ་རུ་ཀུ་ལེ་ཡེ་ཤེས་མཚོ་རྒྱལ་དང་། །མནྡ་ར་བ་མཁའ་འགྲོ་སེངྒེའི་གདོང་། །ཞིང་སྔགས་ལྷན་ཅིག་སྐྱེས་པའི་མཁའ་འགྲོ་མས། །ཕྱྭ་དང་གཡང་གི་དངོས་གྲུབ་སྩལ་དུ་གསོལ། །གཉིས་པ་བྱང་ཆུབ་སེམས་དཔའ་ས་ཡི་སྙིང་པོ་དང་། བདེ་གཤེགས་སངས་རྒྱས་རིན་ཆེན་ཡོན་ཏན་རྒྱ་མཚོ། ཨོ་རྒྱན་ནོར་ལྷ། རྣམ་སྲས་སེར་ཆེན། པདྨ་རྒྱལ་པོ། ལྷ་མོ་དཔལ་ཆེན་རྣམས་ཀྱི་གཡང་འགུགས་ནི། ཧཱུྃ་ཧྲཱིཿ ཤར་ཕྱོགས་མངོན་པར་དགའ་བའི་ཞིང་ཁམས་ནས། །གྲངས་མེད་སྔོན་ནས་མངོན་པར་བྱང་ཆུབ་ཀྱང་། །སེམས་དཔའི་ཚུལ་འཛིན་འགྲོ་བའི་དོན་མཛད་པ། །བྱང་ཆུབ་སེམས་དཔའ་ས་ཡི་སྙིང་པོ་ཡིས། །ཕྱྭ་གཡང་མཆོག་དང་ཐུན་མོང་དངོས་གྲུབ་སྩོལ། །འོག་མིན་ཆོས་ཀྱི་དབྱིངས་ཀྱི་ཞིང་ཁམས་ནས། །སངས་རྒྱས་རིན་ཆེན་ཡོན་ཏན་རྒྱ་མཚོ་ཡི། །བཻཌཱུརྱ་དང་གསེར་གྱི་ཁ་དོག་བཟང་། །གསེར་དུ་སྣང་བའི་དཔལ་ཞེས་བྱ་བ་ཡིས། །ཕྱྭ་གཡང་མཆོག་དང་ཐུན་མོང་དངོས་གྲུབ་སྩོལ། །ལྷོ་ནུབ་པདྨ་འོད་ཀྱི་གཞལ་ཡས་ནས། །རྒྱས་པའི་ལས་མཛད་རཏྣ་ཐོད་ཕྲེང་རྩལ། །རང་འོད་ཡུམ་ཆེན་རིན་ཆེན་མཁའ་འགྲོ་བཅས། །ཕྱྭ་གཡང་མཆོག་དང་ཐུན་མོང་དངོས་གྲུབ་སྩོལ། །བྱང་ཕྱོགས་ལྕང་ལོ་ཅན་གྱི་ཕོ་བྲང་ནས། །འགྲོ་བའི་དབུལ་ཕོངས་སྡུག་བསྔལ་སེལ་བའི་ལྷ། །ནོར་བདག་རྒྱལ་པོ་རྣམ་མང་ཐོས་སྲས་ཀྱིས། །ཕྱྭ་དང་གཡང་གི་དངོས་གྲུབ་སྩལ་དུ་གསོལ། །དགའ་བ་ཚལ་གྱི་དུར་ཁྲོད་ཆེན་པོ་ནས། །དབང་མཛད་དབང་གི་ལྷ་མཆོག་བཅོམ་ལྡན་འདས། །ཁམས་གསུམ་དབང་སྡུད་པདྨ་རྒྱལ་པོ་ཡིས། །ཕྱྭ་དང་གཡང་གི་དངོས་གྲུབ་སྩལ་དུ་གསོལ། །བྱང་ཕྱོགས་ལྕང་ལོ་ཅན་གྱི་ཕོ་བྲང་ནས། །གཡང་གི་ལྷ་མོ་ཆེན་མོ་དཔལ་ཆེན་མོ། །དབུལ་བའི་རྒྱུན་གཅོད་དངོས་གྲུབ་ཀུན་གྱི་བདག །ཕྱྭ་དང་གཡང་གི་དངོས་གྲུབ་སྩལ་དུ་གསོལ། །གསུམ་པ་ས་ཡི་ལྷ་མོ་བརྟན་མ་དང་། དབང་ཕྱུག་ཆེན་པོ། ཚོང་ལྷ་ཚོགས་བདག་གླང་སྣ། བལ་པོ་ཨ་ཧཾ་འབར་གྱི་ཛམ་ནག་རྣམས་ཀྱི་གཡང་འགུགས་ནི། ཧཱུྃ་ཧྲཱིཿ སྟོང་གསུམ་མི་མཇེད་ས་ལ་དབང་མཛད་ཅིང་། །འཇིག་རྟེན་ཁམས་སུ་བདེ་ལེགས་སྩོལ་མཛད་པའི། །ས་བདག་ཆེན་པོ་ས་ཡི་ལྷ་མོ་ཡིས། །ཕྱྭ་དང་གཡང་གི་དངོས་གྲུབ་སྩལ་དུ་གསོལ། །གངས་དཀར་རྩེ་དང་ཙནྡན་ནགས་གླིང་ནས། །ཁམས་གསུམ་ཀུན་བདག་གཞན་ཡིད་འགུགས་མཛད་ཅིང་། །དབང་ཆེན་བཀའ་སྡོད་དྲེགས་པ་ཀུན་གྱི་གཙོ། །ཕྱྭ་དང་གཡང་གི་དངོས་གྲུབ་སྩལ་དུ་གསོལ། །སུམ་ཅུ་རྩ་གསུམ་ལྷ་ཡི་གནས་མཆོག་ནས། །ཟས་ནོར་ལོངས་སྤྱོད་དཔལ་གཡང་སྩོལ་མཛད་པ། །ཚོགས་བདག་གླང་སྣ་དངོས་གྲུབ་ཀུན་གྱི་བདག །ཕྱྭ་དང་གཡང་གི་དངོས་གྲུབ་སྩལ་དུ་གསོལ། །བྱང་ཕྱོགས་གནོད་སྦྱིན་རྫོང་གི་ཕོ་བྲང་ནས། །སྔོན་ནས་ཐུགས་བསྐྱེད་སེམས་དཔའི་སར་གནས་ཀྱང་། །སྟོན་པའི་ཞལ་མཐོང་གནོད་སྦྱིན་ཛམ་བྷ་ལ། །ཕྱྭ་དང་གཡང་གི་དངོས་གྲུབ་སྩལ་དུ་གསོལ། །བཞི་བ་འཁོར་གྱི་ལྷ་མོ་གྲོགས་མོ་བརྒྱད་ཀྱི་གཡང་འགུགས་ནི། ཧཱུྃ། རི་རབ་ཆེན་པོའི་བྱང་གི་ཕྱོགས་རོལ་ན། །གསེར་རི་ཆེན་པོའི་གཉའ་ཤིང་འཛིན་གྱི་རྩེར། །ཁང་བཟང་གསེར་གྱི་རྒྱལ་མཚན་ཞེས་བྱ་ན། །སྙིགས་མ་ལྔ་བདོའི་བསྐལ་ངན་དུས་ཤར་ཚེ། །སྙིང་རྗེ་བྱང་ཆུབ་སེམས་ཀྱི་ཤུགས་འཆང་བ། །ཟླ་ཤེལ་སྦྱིན་མ་སྦྱིན་བཟང་འཕགས་མ་སྟེ། །རབ་བཟང་རབ་སྦྱིན་ནོར་རྒྱུན་དབྱངས་ཅན་མ། །གྲོགས་ཀྱི་ལྷ་མོ་ཆེན་མོ་བརྒྱད་རྣམས་ཀྱིས། །ཕྱྭ་དང་གཡང་གི་དངོས་གྲུབ་སྩལ་དུ་གསོལ། །ལྔ་བ་སྒོ་བཞི་སྲུང་བའི་ཛམ་ལྷ་རིགས་བཞི་ནི། ཆོས་རྒྱལ་རྡོ་རྗེའི་ཛམ་དཀར། སེར་པོ་སྐོར་གསུམ་ལས་ཛམ་སེར། གྲྭ་བ་མངོན་ཤེས་ཛམ་དམར། ཆགས་མེད་ཛམ་ལྗང་རྣམས་ཀྱི་གཡང་འགུགས་ནི། ཧཱུྃ་ཧྲཱིཿ ཤར་ཕྱོགས་ཞི་བ་ཆེན་པོའི་ཕོ་བྲང་ནས། །ཟས་ནོར་ལོངས་སྤྱོད་ཕྱྭ་གཡང་འགུགས་མཛད་པ། །བྱང་ཆུབ་སེམས་ལྡན་འགྲོ་བའི་རེ་སྐོང་བ། །ཤར་སྒོ་སྲུང་བའི་སྐུ་ཡི་ཛམ་བྷ་ལ། །ཕྱྭ་དང་གཡང་གི་དངོས་གྲུབ་སྩལ་དུ་གསོལ། །ལྷོ་ཕྱོགས་རྒྱས་པའི་ལོངས་སྤྱོད་ཕོ་བྲང་ནས། །ཚེ་བསོད་སྙན་གྲགས་ཕྱྭ་གཡང་ཀུན་གྱི་བདག །བཀྲེས་ཕོངས་དབུལ་བའི་སྡུག་བསྔལ་སེལ་བའི་ལྷ། །ལྷོ་སྒོ་སྲུང་བའི་ཡོན་ཏན་ཛམ་བྷ་ལ། །ཕྱྭ་དང་གཡང་གི་དངོས་གྲུབ་སྩལ་དུ་གསོལ། །ནུབ་ཕྱོགས་དབང་དུ་འདུ་བའི་ཕོ་བྲང་ནས། །མི་ནོར་ཕྱུགས་གསུམ་དབང་དུ་སྡུད་མཛད་པ། །ནུབ་སྒོ་སྲུང་བའི་གསུང་གི་ཛམ་བྷ་ལ། །ཕྱྭ་དང་གཡང་གི་དངོས་གྲུབ་སྩལ་དུ་གསོལ། །མངོན་སྤྱོད་དྲག་པོ་རོལ་བའི་གཞལ་ཡས་ནས། །བསྭེ་རག་སྒབ་འདྲེའི་ཚོགས་རྣམས་བསྐྲད་མཛད་ཅིང་། །བྱང་སྒོ་སྲུང་བའི་ཕྲིན་ལས་ཛམ་བྷ་ལ། །ཕྱྭ་དང་གཡང་གི་དངོས་གྲུབ་སྩལ་དུ་གསོལ། །སྣོད་ཀྱི་འཇིག་རྟེན་གྱི་གཡང་འགུགས་ནི། ཧྲཱིཿ སྟོང་གསུམ་རབ་འབྱམས་རྒྱ་མཚོའི་ཞིང་ཁམས་ན། །ཕྱི་ནང་སྣོད་བཅུད་བཀོད་པའི་བྱེ་བྲག་ནི། །ཡིད་མཁའ་རྣམ་དག་ནམ་མཁའི་དཀྱིལ་འཁོར་ཞེས། །རྣམ་པར་དྭངས་བ་ཞེས་བྱའི་ནམ་མཁའ་ནི། །དཀར་གསལ་སྟོང་གསུམ་འཇིག་རྟེན་ཁམས་དང་མཉམ། །དེ་སྟེང་རླུང་དཀྱིལ་རྡོ་རྗེ་རྒྱ་གྲམ་དབྱིབས། །མདོག་ལྗང་རྔམས་སུ་ས་ཡ་དྲུག་འབུམ་ལ། །རྒྱ་ཁྱོན་གྲངས་མེད་སྲ་མཁྲེགས་རྡོ་རྗེ་འདྲ། །དེ་སྟེང་ཞི་བ་གསལ་དག་རྒྱ་མཚོ་ནི། །དཀར་གསལ་དབྱིབས་ནི་ཟླུམ་པོའི་རང་བཞིན་ལ། །རྔམས་སུ་དཔག་ཚད་འབུམ་ཕྲག་བཅུ་གཅིག་དང་། །ཉི་ཁྲི་དང་བཅས་མཐའ་ནས་རླུང་གིས་བསྐོར། །རྒྱ་ཁྱོན་འབུམ་ཕྲག་བཅུ་གཉིས་སྟོང་ཕྲག་གསུམ། །བརྒྱ་ཕྲག་ཕྱེད་དང་ལྔ་དང་བཅས་པའོ། །དེ་སྟེང་ས་ཡི་དཀྱིལ་འཁོར་གྲུ་བཞི་ལ། །རྔམས་སུ་དཔག་ཚད་སུམ་འབུམ་ཉི་ཁྲི་ལ། །རྒྱར་ནི་འབུམ་ཕྲག་བཅུ་གཉིས་སྟོང་ཕྲག་གསུམ། །བརྒྱ་ཕྲག་ཕྱེད་དང་ལྔ་དང་བཅས་པའོ། །དེ་སྟེང་དབང་ཆེན་གསེར་གྱི་ས་གཞིའི་དབུས། །རི་རྒྱལ་ལྷུན་པོ་རིན་ཆེན་བཞི་ལས་གྲུབ། །ཤར་ཕྱོགས་དངུལ་ལ་ལྷོ་ཕྱོགས་བཻཌཱུརྱ། །ནུབ་ཕྱོགས་པད་རག་བྱང་ཕྱོགས་གསེར་ལས་གྲུབ། །ལྷུན་པོའི་ཆུ་སྟེང་དཔག་ཚད་བརྒྱད་ཁྲི་དང་། །ཆུ་ཡི་ནང་དུ་དཔག་ཚད་བརྒྱད་ཁྲིར་གནས། །ཆུ་སྟེང་བང་རིམ་བཞི་ལས་དང་པོ་ནི། །རླུང་གི་བང་རིམ་གཡུ་ཡི་རྡོ་རྗེ་ཅན། །ཞིང་དུ་དཔག་ཚད་སྟོང་ཕྲག་བཅུ་དྲུག་འཕགས། །ཆུར་ནི་ཅི་ཙམ་ཡོད་པ་སུམ་འགྱུར་རོ། །བང་རིམ་གཉིས་པ་ཆུ་ཡི་བང་རིམ་ནི། །རྣམ་པར་སྤུངས་པ་སྟོང་ཕྲག་བརྒྱད་ཕྱིར་འཕགས། །བང་རིམ་གསུམ་པ་ཤེལ་འོད་འབར་བ་ནི། །དཔག་ཚད་སྟོང་ཕྲག་བཞི་ནི་ཕྱིར་ལ་འཕགས། །བང་རིམ་བཞི་པ་འཁོར་ལོ་རྣམ་བརྩེགས་ཏེ། །དཔག་ཚད་སྟོང་ཕྲག་གཉིས་ནི་ཕྱིར་ལ་འཕགས། །སྲིད་དུ་ཆུ་མཚམས་ནས་བཟུང་རི་རབ་ཕྱེད། །གསེར་གྱི་རི་བདུན་གྲུ་བཞིའི་བསྐོར་བ་ནི། །གཉའ་ཤིང་འཛིན་དང་བཤོལ་མདའ་སེང་ལྡིང་ཅན། །བལྟ་ན་སྡུག་དང་རྟ་རྣ་རྣམ་འདུད་དང་། །རི་བོ་ཆེན་པོ་མུ་ཁྱུད་འཛིན་རི་བཅས། །བར་མཚམས་རྣམས་སུ་རོལ་བའི་མཚོ་བདུན་ནི། །ཀུན་ཀྱང་ཡན་ལག་བརྒྱད་ལྡན་ཆུ་བོ་སྟེ། །དེ་ན་གནས་པའི་ཀླུ་ཆེན་བརྒྱད་པོ་ནི། །དགའ་བོ་ཉེར་དགའ་རྟའི་བཞི་བཏང་བཟུང་དང་། །གཟི་ཅན་ཡུལ་འཁོར་སྲུང་དང་ནག་པོ་ཆེ། །ཨེ་ལའི་འདབས་རྣམས་རོལ་ཞིང་རྩེ་བའི་མཚོར། །དེ་དག་ཕྱི་རོལ་ལྕགས་རི་མུ་ཁྱུད་ནི། །ནང་དུ་ལན་ཚྭའི་ཁྱབ་པའི་རྒྱ་མཚོ་སྟེ། །ཕྱི་སྣོད་འཇིག་རྟེན་རབ་འབྱམས་ཐམས་ཅད་ཀྱི། །དྭངས་བཅུད་ཕྱྭ་དང་གཡང་གི་དངོས་གྲུབ་སྩོལ། །ལྷ་མིན་གྱི་གཡང་འགུགས་ནི། ཧཱུྃ་ཧྲཱིཿ དབང་ཆེན་གསེར་གྱི་ས་གཞི་ལ་གནས་པ། །ལྷ་མ་ཡིན་གྱི་གྲོང་ཁྱེར་གསེར་ལྡན་ཞེས། །སུམ་ཅུ་རྩ་གསུམ་ལྷ་ལ་འགྲན་ནུས་པའི། །ལྷ་མིན་རྒྱལ་པོ་ཆེན་པོ་ཐག་བཟང་རིས། །མདུན་ས་ནོར་བཟང་ཕྱོགས་བཞིར་སྐྱེད་ཚལ་ནི། །ཀུན་དགའ་ར་དང་རབ་ཏུ་དགའ་བ་དང་། །དགའ་བ་དང་ནི་དགའ་བའི་ཀུན་དགའ་ར། །དཔག་བསམ་ཤིང་ནི་ཙི་ཏྲ་པ་ཏྲི་དང་། །ལྷ་མིན་རྡོ་ལེབ་རབ་ཏུ་བཟང་པོ་དང་། །གླང་པོ་ཆེན་པོ་ཏི་སེ་གངས་བརྩེགས་ཞེས། །གཡུལ་གྱི་གླང་ཆེན་བཟོད་པར་དཀའ་བ་དང་། །རྟ་མཆོག་རབ་མྱུར་འདོད་འཇོའི་བ་མོ་སོགས། །འདོད་ཡོན་ལོངས་སྤྱོད་ཕུན་གསུམ་ཚོགས་པ་ནི། །དགེ་བའི་བསོད་ནམས་སྟོབས་ཀྱི་མཐུ་ལས་བྱུང། །གསེར་གྱི་ས་གཞི་ལ་གནས་སྐར་ཕྲེང་དང་། །མགུལ་ཕྲེང་གནས་དང་རི་རབ་ཆུ་མཚམས་སུ། །གནས་པའི་ལྷ་མིན་རྒྱལ་པོ་སྒྲ་གཅན་འཛིན། །རི་རབ་ཁོང་སེང་ལྷ་མིན་རིགས་ལྔ་ནི ། །ཚེ་དཔལ་ལྷ་དང་གསོད་བྱེད་སྲིན་པོ་དང་། །སྟོབས་ཆེན་གནོད་སྦྱིན་རྩུབ་འགྱུར་བདུད་ཀྱི་རིགས། །གདུག་པ་ཀླུ་ཡི་རིགས་སུ་གྱུར་པ་སྟེ། །ལྷ་མིན་འཇིག་རྟེན་རབ་འབྱམས་ཐམས་ཅད་ཀྱི། །ཕྱི་ནང་སྣོད་བཅུད་དཔལ་གཡང་མཐའ་དག་ཀུན། །འོད་ཟེར་རྣམ་པའི་ཚུར་གྱིས་གཡང་ཁུག་ཅིག །རྒྱལ་ཆེན་རིག་བཞིའི་གཡང་འགུགས་ནི། ཧཱུྃ་ཧྲཱིཿ གསེར་རི་ལ་གནས་དཔའ་བོ་མཁའ་འགྲོ་དང་། །འཇིགས་བྱེད་དགུ་དང་དཔལ་མགོན་བདུན་ཅུའི་ཚོགས། །དྲང་སྲོང་རིག་འཛིན་གནོད་སྦྱིན་དབང་པོའི་སྡེ། །རི་རྒྱལ་ལྷུན་པོའི་བང་རིམ་དང་པོ་ན། །ལག་ན་ཡོལ་གོར་ཐོགས་པ་ཞེས་བྱའི་གནས། །གཉིས་པ་མེ་ཏོག་ཕྲེང་བ་ཐོགས་པའི་གནས། །གསུམ་པ་སྦྲང་རྩིས་རྟག་ཏུ་མྱོས་པའི་གནས། །བཞི་པ་རྒྱལ་ཆེན་སྡེ་བཞིའི་ལྷ་གནས་ཏེ། །ཤར་ཕྱོགས་དྲི་ཟའི་རྒྱལ་པོ་ཡུལ་འཁོར་སྲུང། །ཕོ་བྲང་ཡུལ་འཁོར་སྲུང་ཞེས་བྱ་བ་དང་། །ལྷོ་ཕྱོགས་གྲུ་བུམ་རྒྱལ་པོ་འཕགས་སྐྱེས་པོ། །ཕོ་བྲང་ཆེན་པོ་འཕགས་སྐྱེས་ཞེས་བྱ་བ། །ནུབ་ཕྱོགས་ཀླུ་ཡི་རྒྱལ་པོ་སྤྱན་མི་བཟང་། །ཕོ་བྲང་སྣ་ཚོགས་གཟུགས་ཞེས་བྱ་བ་དང་། །བྱང་ཕྱོགས་གནོད་སྦྱིན་རྒྱལ་པོ་རྣམ་ཐོས་སྲས། །ཕོ་བྲང་ལྕང་ལོ་ཅན་ཞེས་བྱ་བ་ཡོད། །རིན་ཆེན་རྣམ་པ་བཞི་ལས་གྲུབ་པ་སྟེ། །ནང་ན་ས་གཞི་ཚོན་སྣ་བརྒྱ་བཀྲ་བ། །མནན་ན་ནེམ་ཞིང་བཏེགས་ན་སྤར་བྱེད་པ། །རིན་ཆེན་གསེར་གྱི་བྱེ་མ་བརྡལ་བ་ལ། །ཙནྡན་ཆུ་ཡི་སིལ་བུས་ཆག་ཆག་བཏབ། །ལྷ་ཡི་མེ་ཏོག་མནྡ་ར་བ་ཡིས། །པུས་ནུབ་ཙམ་དུ་ཁེབ་པའི་ངོ་མཚར་ཅན། །རིན་པོ་ཆེ་ཡིས་བརྩེགས་པའི་རྫིང་བུ་ནི། །སྦྲང་རྩི་རོ་ལྡན་ཆུ་ཡིས་གང་བ་དང་། །རྫིང་གི་འགྲམ་ན་འདོད་ཡོན་ལོངས་སྤྱོད་སོགས། །ཅི་དགར་སྤྱོད་པའི་དཔག་བསམ་ལྗོན་པའི་ཤིང་། །ཆུ་དང་ཐང་ལས་སྐྱེས་པའི་མེ་ཏོག་དང་། །དེ་ན་གནས་པའི་ལྷ་བྱ་གསེར་གྱི་མདོག །རི་སྐེད་དྲིལ་བུའི་སྒྲ་ཅན་ཀངྐ་རི། །དེ་ན་བཞུགས་པའི་རྒྱལ་པོ་ཆེན་པོ་བཞི། །སྲས་དང་བཙུན་མོ་མདུན་ན་འདོན་གྱི་ཚོགས། །ཚེ་དང་བསོད་ནམས་སྟོབས་འབྱོར་མངའ་ཐང་དང་། །དཔལ་དང་གཟི་བརྗིད་སྙན་དང་གྲགས་པ་ཡི། །ཕྱྭ་དང་གཡང་གི་དངོས་གྲུབ་སྩལ་དུ་གསོལ། །གཉའ་ཤིང་འཛིན་གྱི་རྩེ་དང་མཉམ་པའི་ཐད། །གོ་ལོའི་དཀྱིལ་འཁོར་རླུང་གིས་བཏེགས་པའི་སྟེང་། །ཉི་མའི་དཀྱིལ་འཁོར་འོག་གཞི་མེ་ཤེལ་ཏེ། །མཐའ་ཆགས་གསེར་ཡིན་དཔག་ཚད་ལྔ་བཅུ་གཅིག །འཁོར་ཡུག་ཟླུམ་པོར་བརྒྱ་དང་ལྔ་བཅུ་གསུམ། །ཟླ་བའི་དཀྱིལ་འཁོར་འོག་གཞི་ཆུ་ཤེལ་ཏེ། །དཔག་ཚད་ལྔ་བཅུ་མཐར་ཆགས་དངུལ་ལས་གྲུབ། །འཁོར་ཡུག་ཟླུམ་པོ་བརྒྱ་དང་ལྔ་བཅུ་སྟེ། །གཉིས་ཀའི་སྟེང་དུ་ལྷ་ཡི་གྲོང་ཁྱེར་ནི། །ལྷ་ཡི་བུ་ནི་ཉི་མ་ཟླ་བ་ཡི། །ཕོ་བྲང་རིན་ཆེན་ལས་གྲུབ་ཉམས་དགའ་བར། །གསེར་དང་དངུལ་གྱི་ར་བས་ཟླུམ་པོར་བསྐོར། །ལྷ་དང་ལྷ་མོའི་གང་ཞིང་དགའ་མགུར་སྤྱོད། །གཞན་ཡང་གཟའ་དང་རྒྱུ་སྐར་ཚོགས་རྣམས་ནི། །གསེར་དང་ཆུ་ཤེལ་མེ་ཤེལ་མཁར་བ་སོགས། །སྟེང་གི་ཁ་ཆགས་གསེར་གྱི་ར་བས་བསྐོར། །ཕྱྭ་དང་གཡང་གི་དངོས་གྲུབ་སྩལ་དུ་གསོལ། །ལྷ་གནས་སུམ་ཅུ་རྩ་གསུམ་གཡང་འགུགས་ནི། ཧཱུྃ་ཧྲཱིཿ ལྷུན་པོའི་སྟེང་ན་སུམ་ཅུ་རྩ་གསུམ་གྱི། །གྲོང་ཁྱེར་ལྟ་ན་སྡུག་པའི་དབུས་ཕྱོགས་སུ། །ཕོ་བྲང་རྣམ་པར་རྒྱལ་བའི་ཁང་བཟང་སྟེ། །རྩིག་པ་གསེར་དང་གསེར་གྱི་དྲྭ་བས་བསྐོར། །སྒོ་ནི་དགུ་བརྒྱ་དགུ་བཅུ་རྩ་དགུ་ཡོད། །སྒོ་རྒྱན་ནོར་བུ་སྣ་ཚོགས་དག་གིས་བརྒྱན། །སྒོ་རེའི་དྲུང་ན་ལྷ་ཡི་སྐྱེས་བུ་ནི། །སྒོ་སྲུང་གོ་གྱོན་མཚོན་ཐོགས་ལྔ་བརྒྱས་སྲུང་། །རིན་ཆེན་སྣ་ཚོགས་ལས་གྲུབ་གཞལ་ཡས་ཁང་། །རིན་ཆེན་དྲ་བ་ཆུན་འཕྱང་དུ་མས་སྤྲས། །ཕྱི་རོལ་སྐྱེད་ཚལ་རིན་ཆེན་རྫིང་བུ་བཅས། །ཁང་བཟང་དེ་ལ་བ་གམ་བརྒྱད་ཡོད་དེ། །རེ་རེ་ལའང་ཁང་བརྩེགས་བདུན་བདུན་ན། །གནས་ཁང་བདུན་བདུན་དག་གིས་ལེགས་པར་བརྒྱན། །ནོར་བུ་སྙིང་པོ་ཡོངས་འདུས་གནས་པ་དང་། །རྣམ་མཛེས་དགའ་ཚལ་ཕྲེང་བ་གསར་བ་དང་། །གཟི་བརྗིད་མཆོག་དང་མཐོང་བར་སྤྱོད་པ་དང་། །འཁོར་ན་གནས་པ་རིགས་མཐུན་ནོར་བུ་འཆང་། །མདོག་བཟང་ཆེ་བ་ས་ལ་ཤིང་ཟུག་པ། །ནོར་བུ་སྣང་བ་ཆོས་བཟང་མདུན་ས་སོགས། །ཉེ་དབང་སོ་གཉིས་ལྷ་དབང་བརྒྱ་བྱིན་བཅས། །སུམ་ཅུ་རྩ་གསུམ་ཡོད་པས་རྩ་གསུམ་ཞེས། །རི་རབ་རྩེ་མོར་མཚམས་བཞིར་ཁང་བརྩེགས་བཞིར། །གནོད་སྦྱིན་ལག་ན་རྡོ་རྗེ་ལྷ་རིགས་གནས། །གྲོང་ཁྱེར་ལྟ་ན་སྡུག་གི་ཕྱི་རོལ་ན། །རིན་ཆེན་རྭ་བ་བདུན་དང་བར་མཚམས་སུ། །འོབ་བདུན་ཡན་ལག་བདུན་ལྡན་རྒྱ་མཚོ་ལ། །ལྷ་བྱ་ངང་པ་མཐིང་རིལ་སོགས་ཀྱིས་བརྒྱན། །ཕྱོགས་བཞིའི་ཤར་ན་སྣ་ཚོགས་སྐྱེད་མོའི་ཚལ། །འདོད་ཡོན་ལོངས་སྤྱོད་ཡིད་ལ་དྲན་པས་འབྱུང་། །ལྷ་ཡི་བུ་མོའི་ཚོགས་ཀྱི་དགའ་བར་བྱེད། །ལྷོ་རུ་རྩུབ་འགྱུར་ཚལ་གྱི་སྐྱེད་མོའི་ཚལ། །ལྷ་མིན་གཡུལ་འགྱེད་ཚེ་ན་ཞེ་སྡང་འཕེལ། །གོ་ཆ་མཚོན་ཆ་སྣ་ཚོགས་སྲ་བར་འབྱུང་། །ནུབ་ན་འདྲེས་པའི་ཚལ་ཞེས་བྱ་བ་ནི། །རིན་ཆེན་ཤིང་དང་མེ་ཏོག་སྣ་ཚོགས་པ། །ལོངས་སྤྱོད་སྣ་ཚོགས་འདྲེས་མར་འབྱུང་བའོ། །བྱང་དུ་དགའ་བའི་ཚལ་ཞེས་བྱ་བ་ན། །ལྷ་རྣམས་ལེགས་ཉེས་གསལ་བའི་མེ་ལོང་དང་། །བདེ་གཤེགས་སངས་རྒྱས་སྟོང་གི་ལྗོན་ཤིང་བཅས། །ཕྱོགས་བཞིར་རིན་ཆེན་རྫིང་བུ་སྣ་ཚོགས་ཡོད། །གྲོང་ཁྱེར་དེ་ཡི་བྱང་ཤར་མཚམས་སུ་ན། །ཡོངས་འདུས་ས་བརྟོལ་ཞེས་བྱའི་ལྗོན་པའི་ཤིང་། །ལྷ་རྫས་གོས་དང་རིན་ཆེན་དྲྭ་བས་བརྒྱན། །ཤིང་དེའི་འོད་ཀྱིས་དཔག་ཚད་ལྔ་བཅུར་ཁྱབ། །དྲི་ཡིས་དཔག་ཚད་བརྒྱ་ཕྲག་ཁྱད་པར་འགྱུར། །ཤིང་གི་དྲུང་ན་ཨ་མོ་ནིར་ཀ་ལྟར། །སྣ་ཚོགས་ཚོན་གྱིས་བཀྲ་བའི་རྡོ་ལེབ་ནི། །མནན་ན་ནེམ་ཞིང་བཏེགས་ན་འཕར་བྱེད་པ། །མེ་ཏོག་མནྡ་ར་བའི་སྐྱེད་མོའི་ཚལ། །དབང་པོའི་ཁྲི་བཅས་མེ་ཏོག་ཆར་བ་བབས། །དབྱར་དུས་རྩ་གསུམ་ལྷ་རྣམས་ཟླ་བཞིར་གནས། །འདོད་ཡོན་ལྔ་ལ་རྟག་ཏུ་ལོངས་སྤྱོད་པ། །གྲོང་ཁྱེར་ལྷོ་ནུབ་དཔག་ཚད་ཕྱེད་བཞིའི་མཚམས། །ཆོས་བཟང་ལྷ་ཡི་མདུན་ས་ཞེས་བྱ་བ། །དབུས་ན་རིན་ཆེན་ཁང་བརྩེགས་འོད་འབར་བ། །དབང་པོའི་ཁྲི་དང་ཉེ་དབང་ཚོགས་རྣམས་ཀྱི། །བྱ་བ་མཐའ་དག་བསྒྲོ་བའི་གནས་ཡིན་ཏེ། །སུམ་ཅུ་རྩ་གསུམ་སྟེང་གི་ནམ་མཁའ་ལ། །རིམ་བཞིན་འདོད་ལྷ་རིགས་བཞིའི་གནས་རིས་ནི། །དཔག་བསམ་ཡིད་འགྱུར་བརྒྱན་པའི་གནས་དེ་ན། །ལྷ་མིན་འཐབ་རྩོད་དང་བྲལ་འཐའ་བྲལ་དང་། །དཔག་བསམ་མིག་མཛེས་བརྒྱན་པའི་གནས་དེ་ན། །ལོངས་སྤྱོད་ཤུགས་འབྱུང་དགའ་བ་དང་ལྡན་པ། །དཔག་བསམ་མཐོང་མཛེས་བརྒྱན་པའི་གནས་དེ་ན། །དགའ་བདེའི་དཔལ་ལ་སྤྱོད་པའི་འཕྲུལ་དགའ་ཞེས། །དཔག་བསམ་རིན་ཆེན་བརྒྱན་པའི་གནས་དེ་ན། །འདོད་ཡོན་ཀུན་ལྡན་གཞན་འཕྲུལ་དབང་བྱེད་ལྷ། །གཟུགས་ཁམས་གནས་རིས་བཅུ་བདུན་གཡང་འགུགས། དེ་དག་སྟེང་གི་ནམ་མཁར་རིམ་པ་བཞིན། །གཟུགས་ཁམས་གནས་རིས་བཅུ་བདུན་ཞེས་བྱ་བ། །བསམ་གཏན་དང་པོའི་ལྷ་གནས་རྣམ་པ་གསུམ། །རིན་ཆེན་པི་ཏང་ཀ་ཡི་ནམ་མཁའ་ལ། །ཚངས་རིས་ཞེས་བྱའི་ལྷ་ཡི་རིགས་རྣམས་དང་། །རིན་ཆེན་ས་མི་ཀ་ཡི་ནམ་མཁའ་ལ། །ཚངས་པ་ཆེན་པོའི་མདུན་ན་འདོན་གྱི་ལྷ། །རིན་ཆེན་ཀེ་ཏུ་ཛ་ཡི་ནམ་མཁའ་ལ། །འདོད་པའི་སྐྱོན་སྤངས་ཚངས་པ་ཆེན་པོའི་ལྷ། །བསམ་གཏན་གཉིས་པའི་ལྷ་གནས་རྣམ་པ་གསུམ། །རིན་ཆེན་དཔའ་བའི་འོད་ཀྱི་ནམ་མཁའ་ལ། །གོང་མའི་འོད་ཟེར་ལས་ཆུང་འོད་ཆུང་ལྷ། །རིན་ཆེན་ཀེ་ཀེ་རུ་སྤྲས་ནམ་མཁའ་ལ། །འོད་ཟེར་ཚད་མེད་ཡོད་པས་ཚད་མེད་དོ། །རིན་ཆེན་ཤྲཱྀ་ཀུ་སྤྲས་ནམ་མཁའ་ལ། །ཁ་དོག་འོད་གསལ་ཆེ་བས་འོད་གསལ་ལྷ། །བསམ་གཏན་གསུམ་པའི་ལྷ་གནས་རྣམ་པ་གསུམ། །རིན་ཆེན་སི་ཏང་ཀི་ལིང་ནམ་མཁའ་ལ། །དགེ་བ་ཆུང་ངུའི་སྟོབས་ལས་དགེ་ཆུང་ལྷ། །རིན་ཆེན་ཨིནྡྲ་ནི་ལའི་ནམ་མཁའ་ལ། །དགེ་རྩ་འབྲིང་ལས་ཚད་མེད་དགེ་བའི་ལྷ། །རིན་ཆེན་འོད་འབྱིན་ཞེས་བྱའི་ནམ་མཁའ་ལ། །དགེ་བ་ཆེ་ལས་དགེ་རྒྱས་ཞེས་བྱའི་ལྷ། །བསམ་གཏན་བཞི་པའི་ལྷ་གནས་རྣམ་པ་གསུམ། །རིན་ཆེན་སྤྲིན་ཚོགས་སྟུག་པོའི་ནམ་མཁའ་ལ། །སྤྲིན་མེད་ཉིན་སྣང་ལྟ་བུའི་སྤྲིན་མེད་འོད། །རིན་ཆེན་ཀ་ལའི་སྤྲས་པའི་ནམ་མཁའ་ལ། །ཚད་མེད་བསྒོམས་ལས་སྐྱེས་པའི་བསོད་ནམས་སྐྱེས། །རིན་ཆེན་རབ་མཛེས་རྣམ་བརྡལ་ནམ་མཁའ་ལ། །དགེ་བའི་འབྲས་བུ་ཆེ་ལས་འབྲས་བུ་ཆེ། །ཕྱྭ་གཡང་མཆོག་དང་ཐུན་མོང་དངོས་གྲུབ་ཀུན། །འོད་ཟེར་རྣམ་པའི་ཚུལ་གྱིས་གཡང་ཁུག་ཅིག །གཙང་མ་རིས་ཀྱི་ལྷ་རྣམས་ཀྱི་གཡང་འགུགས། ཧཱུྃ་ཧྲཱིཿ གཙང་མ་རིས་ཀྱི་ལྷ་གནས་རྣམ་པ་ལྔ། །རིན་ཆེན་ཤེལ་ཁང་བརྩེགས་པའི་ནམ་མཁའ་ལ། །འདོད་ཡོན་གདུང་བ་ཤས་ཆུང་མི་ཆེ་བ། །རིན་ཆེན་ཟེར་བ་མྱུ་གུའི་ནམ་མཁའ་ལ། །ལུས་སེམས་འདོད་པའི་གདུང་སེལ་མི་གདུང་བ། །རིན་ཆེན་རྣམ་མཛེས་ཞེས་བྱའི་ནམ་མཁའ་ལ། །ལུས་སེམས་ཉེར་ཞིའི་བདེ་ལྡན་གྱ་ནོམ་སྣང་། །རིན་ཆེན་མཐོན་མཐིང་སྤྲས་པའི་ནམ་མཁའ་ལ། །ལྟ་བ་རྣམ་དག་མཐོང་བས་ཤིན་ཏུ་མཐོང་། །རིན་ཆེན་འཆིང་བུ་རྣམ་བཀོད་ནམ་མཁའ་ལ། །གཟུགས་སྣང་གནས་རིས་མེད་པས་འོག་མིན་ཞེས། །གཟུགས་མེད་སྐྱེ་མཆེད་མུ་བཞིའི་གཡང་འགུགས་ནི། ཧཱུྃ་ཧྲཱིཿ དེ་སྟེང་གཟུགས་མེད་སྐྱེ་མཆེད་མུ་བཞི་ནི། །སྤྲིན་ཆེན་རྣམ་པར་གྲོལ་བའི་ནམ་མཁའ་ལ། །ནམ་མཁའ་མཐའ་ཡས་ཞེས་བྱའི་ལྷ་རྣམས་དང་། །རྣམ་རོལ་འཁོར་ལོ་འཕྲོ་བའི་ནམ་མཁའ་ལ། །རྣམ་ཤེས་མཐའ་ཡས་ཞེས་བྱའི་ལྷ་རྣམས་དང་། །རྣམ་རོལ་འཁོར་ལོ་ཅན་གྱི་ནམ་མཁའ་ལ། །ཅི་ཡང་མེད་པ་ཞེས་བྱའི་ལྷ་རྣམས་དང་། །པདྨ་རྣམ་པར་བརྩེགས་པའི་ནམ་མཁའ་ལ། །ཡོད་མིན་མེད་མིན་ཞེས་བྱའི་ལྷ་རྣམས་དང་། །སྐྱེ་མཆེད་མུ་བཞིའི་ལྷ་གནས་ཐམས་ཅད་ནི། །སྟོང་རིག་ཏིང་ངེ་འཛིན་གྱི་ལུས་ཙམ་ལས། །ཀུན་ལ་ཡིད་ལུས་ཙམ་ལས་མེད་པའོ། །གླིང་བཞིའི་གཡང་བགུགས་ལས།དང་པོ་ཤར་ལུས་འཕགས་གླིང་གི་གཡང་འགུགས་ནི། ཧཱུྃ་ཧྲཱིཿ རི་རྒྱལ་ཤར་ཕྱོགས་གླིང་ཆེན་ལུས་འཕགས་གླིང་། །གཡས་གཡོན་གླིང་ཕྲན་ལུས་དང་ལུས་འཕགས་གླིང་། །དབྱིབས་ནི་ཟླ་བ་ཕྱེད་པ་ལྟ་བུ་སྟེ། །ངོས་གསུམ་དཔག་ཚད་ཉིས་སྟོང་རེ་རེ་དང་། །འབུར་ངོས་དཔག་ཚད་སུམ་བརྒྱ་ལྔ་བཅུའོ། །ནམ་མཁའི་ཁ་དོག་དཀར་པོ་དངུལ་གྱི་མདོག །དེ་ན་གནས་པའི་འགྲོ་བ་མཐའ་དག་ཀུན། །སྒོང་སྐྱེས་ཉོན་མོངས་དུག་ལྔ་ཤས་ཆུང་བ། །འཛམ་གླིང་མི་ལས་ལུས་ནི་ཁྱད་པར་འཕགས། །དབུལ་བའི་གདུང་སེལ་སྲོག་གཅོད་སྐྱོན་དང་བྲལ། །འགྲན་མེད་བདེ་སྐྱིད་དཔལ་འབྱོར་ཕུན་སུམ་ཚོགས། །བརྟན་གཡོའི་དྭངས་བཅུད་ཚེ་དཔལ་སྟོབས་འབྱོར་སོགས། །སྲིད་པའི་ཕྱྭ་གཡང་ཐམས་ཅད་འདིར་ཁུག་ཅིག །ལྷོ་འཛམ་བུ་གླིང་གི་གཡང་བགུགས་ནི། ཧཱུྃ་ཧྲཱིཿ ལྷུན་པོའི་ལྷོ་ཕྱོགས་གླིང་ཆེན་འཛམ་བུའི་གླིང་། །གཡས་གཡོན་གླིང་ཕྲན་རྔ་ཡབ་རྔ་ཡབ་གཞན། །དབྱིབས་ནི་སོག་ཁ་ངོས་གསུམ་སྟོང་གཉིས་གཉིས། །ངོས་གཅིག་དཔག་ཚད་ཕྱེད་དང་བཞི་པའོ། །ནམ་མཁའི་ཁ་དོག་བཻཌཱུརྱ་ཡི་མདོག །གངས་རི་དཔལ་དང་ལྡན་པའི་ཉེ་འདབས་དེར། །གསེར་བྲག་བྱ་སྐྱིབས་ཅན་ལ་ལྷ་དབང་གི །གླང་ཆེན་རབ་བརྟན་གླང་གཡོག་ལྔ་བརྒྱ་བཅས། །གངས་རིའི་བྱང་ན་སྤོས་ངད་ལྡན་པ་ཡི། །བར་དུ་མཚོ་ཆེན་མ་གྲོས་པ་ཡི་འགྲམ། །འཛམ་བུ་ཀྲིཀྵའི་སྡོང་བུའི་ཤིང་ཐོག་ནི། །ཆུར་ལྷུང་ཐམས་ཅད་གསེར་གྱི་རང་བཞིན་ཅན། །མངལ་སྐྱེས་ཉོན་མོངས་དུག་ལྔ་ཤས་ཆུང་བ། །ཚེ་ཐུང་ནད་མང་ཕྱུག་བཀྲེས་སྡུག་བསྔལ་མང་། །བརྟན་གཡོའི་དྭངས་བཅུད་བསོད་ནམས་སྙན་གྲགས་དང་། །ཚེ་དཔལ་སྟོབས་འབྱོར་ཕྱྭ་གཡང་འདིར་ཁུག་ཅིག །ནུབ་བ་ལང་སྤྱོད་ཀྱི་གཡང་འགུགས་ནི། ཧཱུྃ་ཧྲཱིཿ ལྷུན་པོའི་ནུབ་ཕྱོགས་གླིང་ཆེན་བ་ལང་སྤྱོད། །གླིང་ཕྲན་གཡོ་ལྡན་དང་ནི་ལམ་མཆོག་འགྲོ། །དབྱིབས་ནི་ཟླུམ་པོ་འཁོར་ཡུག་བདུན་སྟོང་དང་། །ལྔ་བརྒྱ་ཁ་ཞིང་སྟོང་ཕྲག་ཕྱེད་དང་གསུམ། །ནམ་མཁའི་ཁ་དོག་པདྨ་ར་གའི་མདོག །དྲོད་སྐྱེས་ཉོན་མོངས་དུག་ལྔ་ཤས་ཆུང་བ། །བཀྲེས་སྐོམ་སྡུག་བསྔལ་ཀུན་བྲལ་གནད་གཅོད་དཀོན། །ཀུན་ཀྱང་ལོངས་སྤྱོད་འདོད་འབྱུང་བ་མོ་དང། །སྟོབས་ཆེན་གླང་པོ་ཆེ་ལ་ལོངས་སྤྱོད་ཅིང་། །ཚེ་དཔལ་སྟོབས་འབྱོར་དཔལ་འབྱོར་ཕུན་སུམ་ཚོགས། །ཕྱྭ་དང་གཡང་གི་དངོས་གྲུབ་སྩལ་དུ་གསོལ། །བྱང་སྒྲ་མི་སྙན་གྱི་གཡང་འགུགས་ནི། ཧཱུྃ་ཧྲཱིཿ ལྷུན་པོའི་བྱང་ཕྱོགས་གླིང་ཆེན་སྒྲ་མི་སྙན། །དབྱིབས་ནི་གྲུ་བཞི་ངོས་རེ་ཉིས་སྟོང་རེ། །མཐའ་བསྐོར་དཔག་ཚད་སྟོང་ཕྲག་བརྒྱད་པ་ལ། །ནམ་མཁའ་ཁ་དོག་གསེར་གྱི་རང་བཞིན་ཅན། །དཔག་བསམ་ཤིང་ལས་འབྱུང་བའི་སྒྲ་མི་སྙན། །རྫུས་སྐྱེས་བདག་འཛིན་སྡིག་པ་ཀུན་དང་བྲལ། །མི་ཟད་འདོད་ཡོན་དཔལ་འབྱོར་ཕུན་སུམ་ཚོགས། །བདེ་སྐྱིད་རྩ་གསུམ་ལྷ་ལ་འགྲན་ནུས་པ། །བདེ་སྐྱིད་དགའ་བདེའི་དཔལ་གཡང་མཐའ་དག་དང་། །ཚེ་བསོད་དཔལ་འབྱོར་དངོས་གྲུབ་འདིར་ཁུག་ཅིག །སྤྱིའི་གཡང་འགུགས་ནི། ཧཱུྃ་ཧྲཱིཿ སྟོང་གསུམ་རབ་འབྱམས་རྒྱ་མཚོའི་ཞིང་ཁམས་ནས། །གཡང་འདིས་རི་རབ་གླིང་བཞི་གླིང་ཕྲན་སོགས། །སྣོད་ཀྱི་བཀྲག་མདངས་བཅུད་རྣམས་གཡང་ཁུག་ཅིག །སངས་རྒྱས་བྱང་སེམས་རྩ་གསུམ་རྒྱ་མཚོ་ཡི། །ཐུགས་རྗེ་བྱིན་རླབས་དངོས་གྲུབ་གཡང་རྣམས་ཁུག །དགོན་གནས་ཐམས་ཅད་དར་ཞིང་རྒྱས་པ་དང་། །བསྟན་པ་ཕྱོགས་བཅུར་རྒྱས་པའི་གཡང་ཁུག་ཅིག །དགེ་འདུན་འདུས་པའི་སྡེ་ཚོགས་མཐའ་དག་ཀུན། །དབྱར་གྱི་མཚོ་ལྟར་རྒྱས་པའི་གཡང་ཁུག་ཅིག །གཡང་འདིས་སྡེ་བརྒྱད་དྲེགས་པའི་ཚོགས་རྣམས་ཀྱི། །མངོན་སྤྱོད་དྲག་རྩལ་སྟོབས་ལྡན་གཡང་ཁུག་ཅིག །ཕ་རོལ་གཡུལ་ལས་རྒྱལ་བའི་དམག་གི་གཡང་། །ཕྱོགས་ལས་རྣམ་པར་རྒྱལ་བའི་གཡང་ཁུག་ཅིག །གཡང་འདིས་ཚངས་པ་བརྒྱ་བྱིན་ཁྱབ་འཇུག་དང་། །དྲང་སྲོང་རིག་པ་འཛིན་པའི་ཚེ་གཡང་ཁུག །གཡང་འདིས་ཀླུ་རྒྱལ་ནོར་རྒྱས་དུང་སྐྱོང་དང་། །དགའ་བོ་ལ་སོགས་ཀླུ་གཡང་ཐམས་ཅད་ཁུག །གཡང་འདིས་གཉན་ཆེན་ཟུར་ཕུད་ལྔ་བ་སོགས། །བར་སྣང་གཉན་གྱི་གཡང་རྣམས་ཐམས་ཅད་ཁུག །གཡང་འདིས་རྒྱལ་པོ་ཆེན་པོ་སྡེ་བཞི་ཡི། །སྟོབས་དཔལ་ཕུན་སུམ་ཚོགས་པའི་གཡང་ཁུག་ཅིག །གཡང་འདིས་གནས་ཡུལ་བྱིན་ཆེན་ཐམས་ཅད་ཀྱི། །བྱིན་རླབས་དངོས་གྲུབ་ཀུན་གྱི་གཡང་ཁུག་ཅིག །གཡང་འདིས་གླིང་བཞིའི་འགྲོ་བ་མཐའ་དག་གི །ཚེ་དཔལ་སྟོབས་འབྱོར་རྣམས་ཀྱི་གཡང་ཁུག་ཅིག །ཕྱོགས་བཅུར་གནས་པའི་ཕྱོགས་སྐྱོང་ཆེན་པོ་བཅུ། །མཐུ་སྟོབས་དབང་ཕྱུག་རྣམས་ཀྱི་གཡང་ཁུག་ཅིག །རྒྱལ་པོ་ཆེན་པོ་རྣམ་མང་ཐོས་སྲས་ཀྱིས། །རྣམ་མང་ནོར་གྱི་དངོས་གྲུབ་གཡང་ཁུག་ཅིག །རྟ་བདག་རྒྱལ་པོ་ཨཱརྱ་རེ་མནྟས། །རྟ་ཡི་ཕྱུགས་གཡང་མ་ལུས་འདིར་ཁུག་ཅིག །མཐུ་ཆེན་མགོན་པོ་གང་བ་བཟང་པོ་ཡིས། །དཀར་མོ་ལུག་གི་གཡང་རྣམས་ཐམས་ཅད་ཁུག །གཡང་གི་ལྷ་མོ་ཆེན་མོ་ནོར་རྒྱུན་མས། །ཕྱུགས་ནོར་གཡང་གི་དངོས་གྲུབ་འདིར་ཁུག་ཅིག །བྱང་ཕྱོགས་སྐྱོང་བའི་མགོན་པོ་ཛམ་བྷ་ལས། །ཟས་ནོར་ལོངས་སྤྱོད་ཕྱྭ་གཡང་འདིར་ཁུག་ཅིག །ལྷ་མཆོག་ཞིང་ལྷ་ཚངས་པ་ཆེན་པོ་ཡིས། །འབྲུ་ནོར་ལོངས་སྤྱོད་རྒྱས་པའི་ཕྱྭ་གཡང་ཁུག །རྒྱལ་བའི་བསྟན་པ་སྤྱི་དང་བྱེ་བྲག་གི །གསུང་རབ་ཆོས་ཀྱི་ཕྱྭ་གཡང་ཐམས་ཅད་ཁུག །མདའ་མདུང་རལ་གྲི་ཁྲ་རྨོག་ཕུབ་ལ་སོགས། །གོ་ཁྲབ་མཚོན་ཆའི་གཡང་རྣམས་ཐམས་ཅད་ཁུག །གཡང་འདིས་མི་མཐུན་རྐྱེན་ངན་ཐམས་ཅད་དང་། །ཆག་ཆེ་ཉམས་ང་ཐམས་ཅད་ཕྱིར་ལ་བསྒྱུར། །གཡང་འདིས་རྦོད་གཏོང་རྦོད་འདྲེ་མཐའ་དག་དང་། །རིགས་སྔགས་གཏད་ཁྲམ་བཏབ་པ་ཕྱིར་ལ་བསྒྱུར། །གཡང་འདིས་མཐུ་རྐྱེན་ལེགས་ཚོགས་ཐམས་ཅད་ཀུན། །ཟླ་བ་ཡར་གྱི་ངོ་བཞིན་རྒྱས་གྱུར་ཅིག །བསྡུས་བསྡུས་སརྦ་པཱ་ཤཾ་ཀུ་རུ་ཡེ་སྭཱ་ཧཱ། འཕེལ་འཕེལ་སརྦ་པུཥྚིཾཀུ་རུ་ཡེ་སྭཱ་ཧཱ། ལས་རྣམས་འགྲུབ་ཅིང་ཕྱྭ་གཡང་བཀྲ་ཤིས་བདེ་ལེགས་ཐམས་ཅད་ནམ་ཡང་ནུབ་མེད་དུ་བརྟན་པར་གྱུར་ཅིག་སརྦ་མངྒ་ལཾ་སྭ་ཏི་ཏིཥྛ་བཛྲ་ཡེ་སྭཱ་ཧཱ། ཅེས་པ་འདིའང་རྫོགས་སྤྲུལ་ལྔ་བ་ཐུབ་བསྟན་ཆོས་ཀྱི་རྡོ་རྗེས་ས་འབྲུག་ལོ་དམར་ཕྱོགས་མཁའ་འགྲོ་འདུ་བའི་དུས་སུ་བྲིས་པའོ། །