ས་སྙིང་ཆོ་གའི་ཆ་ལག་བུམ་གཏེར་བཅའ་ཐབས་དང་བུམ་གཏེར་སྒྲུབ་པའི་ཐབས་དགེ་ལེགས་འབྱུང་གནས་ཞེས་བྱ་བ་བཞུགས་སོ།།

ཨོཾ་སྭ་སྟི། མཁའ་ཁྱབ་འགྲོ་བ་ཀུན་གྱི་གཉེན་གཅིག་པུ། །རྒྱལ་བ་ཀུན་གྱི་སྤྱི་གཟུགས་རྡོ་རྗེ་འཆང་། །ས་གསུམ་སྐྱེ་རྒུའི་རྒུད་པ་སེལ་མཛད་པའི། །མཚོ་སྐྱེས་རྡོ་རྗེས་དགེ་ལེགས་ཤིས་པ་སྩོལ། །དེ་ལ་འདིར་ས་ཡི་སྙིང་པོའི་སྒོ་ནས་བུམ་གཏེར་བཅའ་བ་དང་། སྒྲུབ་པ། སྦ་བའི་ཐབས་གསུམ་ལས། དང་པོ་ནི །སྲིད་ཞིའི་ལེགས་ཚོགས་ཐམས་ཅད་རྒྱས་པར་བྱེད་ཅིང་ཉམས་པ་ཐམས་ཅད་གསོ་བར་བྱེད་པ་ལ། གཟའ་སྐར་འཕྲོད་སྦྱོར་བཟང་པོའི་ཉིན། ཤ་ཆང་སྒོག་གཙོང་སོགས་སྤོངས་ལ། རབ་ན་གསེར་དངུལ་ཟངས་སོགས་རིན་པོ་ཆེའི་བུམ་པའམ། མ་འབྱོར་ན་རྫའམ་ཤིང་གི་བུམ་པ་བྲེ་གང་ཤོང་ཚོད་ལས་མི་ཆུང་པར། རབ་ན་རྟགས་བརྒྱད། སྣ་བདུན། རྡོ་རྗེ་དང་གཡུང་དྲུང་སོགས་བྲི་ཞིང་། མདུན་རྟགས་ནོར་བུ་ཡོད་པ། དེ་ཙམ་མ་ནུས་ན་ནོར་བུའི་མཚན་པ་ཙམ་གྱིས་རུང་། ཁ་གཅོད་ལ་འཁོར་ལོ་སྔོན་པོ་ཨེས་མཚན་པ། མཐིལ་དུ་འདབ་བརྒྱད་སེར་པོ་བྷྲཱུྃ་ཀྱིས་མཚན་པ་བྲི། ནང་དུ་སྲོག་ཤིང་ཤུག་པ་རྩ་རྩེ་ཤར་རྟགས་མ་ནོར་བ། རྒྱ་ཤོག་ལ་མཚལ་དང་སྣག་ཚ་གང་རུང་ར་དཀར་འོ་མ་དྲི་སྨན་གྱིས་སྦྱར་བས། ཏ་ལ་མ་ཐ་གཉན་ལ་ཐ། མི་ཟད་ཡུན་གྱི་གཏེར་མཛོད་ཅིགཿ ཅེས་དང་བྱེ་བྲག་ཏུ་ཀླུ་ཆེན་བརྒྱད། བརྟན་མ་ས་སྙིང་ལ་སོགས་པའི་སྔགས་བྱང་རྣམས་རྒྱས་པར་འབྲི་ཞིང་། ཐམས་ཅད་ལ་གཅེས་པར་གནམ་ས་སྣང་བརྒྱད། ཀླུ་བརྒྱད་སྔགས། དབྱངས་གསལ་ཡེ་དྷར། རྟགས་བརྒྱད་སྣ་བདུན། དམིགས་གསལ་སྤྱི་ལ་འདོད་གསོལ་སོ་སོའི་ཁ་བསྒྱུར་ཤིས་བརྗོད་རྒྱས་བསྡུས་ཅི་རིགས་བྲི་ཞིང་། དྲི་བཟང་ཀླུ་སྨན། བ་དམར་པོ་དང་ར་དཀར་གྱི་འོ་མ་དང་སྦྱར་བ་ཡི་གེ་བྲིས། དབུ་ནས་སྲོག་ཤིང་ཤར་རྟགས་མདུན་དུ་ཡོད་པའི་ངོས་ཕྱོགས་ནས་གཡས་བསྐོར་དུ་དཀྲིས་ཏེ། པྲ་ཚིལ་སོགས་ཀྱིས་བརླན་ཅིང་མི་འཇིག་བར་དྲིལ་ཏེ་དབུས་སུ་འཛུགས། བུམ་རྫས་རྒྱུད་སྡེ་འོག་མའི་བུམ་རྫས་ཉེར་ལྔ། འབྲུ་ནག་གི་རིགས་མ་ཡིན་བར་འབྲུ་སྣ་ཚོགས། དུག་རིགས་མེད་པའི་སྨན་དང་མེ་ཏོག་སྣ་ཚོགས། ཤིང་ཐོག་སྣ་ཚོགས།རིན་པོ་ཆེ་སྣ་ཚོགས་སམ་རིན་ཆེན་ཕྱེ་མ། དར་ཟབ་སྣ་ཚོགས་བལ་མཚོན་སྣ་ལྔ། ཀླུ་སྨན་ཚད་ལྡན་བ་དམར་ཟལ་དང་ར་དཀར་མོའི་འོ་ཞོའི་རིལ་བུ་བརྒྱ་རྩ་རེ། གཞན་ཡང་བླ་དཔོན་གནས་ཆེན་བཙན་ཕྱུག་འཕན་དར་འཛོམས་པའི་རྒྱ་བོད་ཀྱི་མཛོད་ཆེན་རྣམས་ནས་བྱུང་བའི་འབྲུ་སྣ་ཟས་སྣ་དར་སྣ་སོགས་དང་། གནས་ཆེན་བརྒྱ་རྩ་སོགས་དང་མཚོ་ཆེན་བཞི་སོགས་ཀྱི་ས་སྣ་ཆུ་སྣ་ཤིང་སྣ་ལ་སོགས་པ་རྣམས། གླ་རྩི་སྒོག་གཙོང་ཤ་ཆང་སོགས་དང་། ཁྱུང་སྡེར་དང་ཚ་བརྒྱ་ག་སོགས་མ་འདྲེས་པར་བྱས་ལ། འབུ་སྲིན་དང་རུལ་བ་སོགས་ཀྱི་འཇིག་པ་སྲུང་པའི་སླད་དུ།ཚྭ་དཀར་དང་སྤང་སྤོས། ཤུག་ལོ་རྣམས་བསྲེས་ཏེ་སྒྲུབ་པ་པོ་རང་ངམ་ཁྱེའུ་གཙང་མ་མིང་སྨྲ་ལེགས་ཤིང་ཕ་མ་འཛོམས་པ་སོགས་ཀྱི་རྫས་རྣམས། སྔགས་འདི་ཟླ་བཞིན། སྔགས་ནི། ཨོཾ་བྷྲཱུཾ་ཏྲཾ་ཧྲཱིཿཨཿརཏྣ་མ་ཧཱ་པཉྩ་ཨིནྟྲཿཨ་མྲྀ་ཏ་བོ་དྷི་ཙིཏྟ་སརྦ་ན་ཏད་གནྡྷེཿཔཉྩ་གརྦ་བཛྲ་ཀླཀྴ་ཙིཏྟ་ཏ་ཐཱ་ག་ཏ་སརྦ་ཡོ་ནི་མ་ཧཱ་བཛྲ་བྷྲཱུྃ་ནི་ཁཾ་ཧོཿ ཕྱེད་ཁེངས་ཙམ་གྱི་གནས་སུ་གོང་གི་རྫས་བླུགས། ཨོཾ་སྭཱ་བྷ་ཝས་སྦྱངས། སྟོང་པའི་ངང་ལས་འབྱུང་བཞི་རིམ་བརྩེགས་སྟེང་། །ཕྱི་ནི་སྣ་ཚོགས་ལས་གྲུབ་བུམ་པའི་དབྱིབས། །ནང་ནི་རིན་ཆེན་གཞལ་ཡས་མཛེས་པའི་ནང་། །དབུས་སུ་སྣ་ཚོགས་པདྨ་ཟླ་བའི་སྟེང་། །ཀྵིཾ་ཡིག་ཡོངས་གྱུར་ས་སྙིང་སྐུ་མདོག་དཀར། །ཕྱག་གཡས་འབྲས་ཀྱི་སྙེ་མ་ཐུགས་ཀར་འཛིན། །གཡོན་པས་དྲིལ་བུ་དཀུར་བརྟེན་ཕྱེད་སྐྱིལ་བཞུགས། །དེ་ཡི་སྤྱི་གཙུག་པདྨ་ཟླ་བའི་སྟེང་། །སངས་རྒྱས་ཡོན་ཏན་རིན་ཆེན་རྒྱ་མཚོ་དང་། །བཻཌཱུརྱ་དང་གསེར་གྱི་ཁ་དོག་བཟང་། །གསེར་དུ་སྣང་བའི་དཔལ་ཞེས་བཅོམ་ལྡན་འདས། །ཤར་དུ་བླ་མ་ཨོ་རྒྱན་ནོར་ལྷ་སེར། །ལྷོ་ཕྱོགས་རྣམ་སྲས་སེར་ཆེན་སྐུ་མདོག་སེར། །ནུབ་ཏུ་དབང་མཛད་པདྨ་རྒྱལ་པོ་དམར། །བྱང་དུ་ལྷ་མོ་དཔལ་ཆེན་སྐུ་མདོག་ལྗང་། །ཤར་ལྷོ་ས་ཡི་ལྷ་མོ་བརྟན་མ་སེར། །ལྷོ་ནུབ་ལྷ་ཆེན་མ་ཧཱ་དེ་ཝ་དམར། །ནུབ་བྱང་ཚོགས་བདག་གླང་སྣ་སྐུ་མདོག་དམར། །བྱང་ཤར་ཐུགས་ཀྱི་ཛམ་ནག་གཏུམ་ཞིང་ཁྲོ། །དེ་ཡི་ཕྱི་རོལ་པདྨ་འདབ་བརྒྱད་ལ། །འཁོར་གྱི་ལྷ་མོ་གྲོགས་མོ་ཆེན་མོ་བརྒྱད། །ཤར་སྒོར་སྐུ་ཡི་ཛཾ་དཀར་གཡུ་འབྲུག་ཆིབས། །ལྷོ་སྒོར་ཡོན་ཏན་གནོད་སྦྱིན་ཛམ་ལྷ་སེར། །ནུབ་སྒོར་གསུང་གི་ཛམ་ལྷ་སྐུ་མདོག་དམར། །བྱང་སྒོར་ཕྲིན་ལས་ཛམ་ལྷ་སྐུ་མདོག་ལྗང་། །གཞན་ཡང་ནོར་ལྷ་བྱེ་བ་འབུམ་གྱི་ཚོགས། །ཉི་ཟེར་རྡུལ་ལྟར་བསམ་གྱིས་མི་ཁྱབ་པ། །སྒོ་བཞིར་ཤར་དུ་རྒྱ་སྟག་སྐྱ་བོ་དང་། །ལྷོ་རུ་གཡུ་འབྲུག་སྟོང་གསུམ་སྒྲ་ཡིས་བཀང་། །ནུབ་ཏུ་བྱེ་རུའི་མདངས་ལྡན་བྱ་དམར་པོ། །བྱང་དུ་རུས་སྦལ་གསེར་གྱི་མདོག་ཅན་དང་། །གཞན་ཡང་ཕྱི་ནང་བར་མཚམས་ཐམས་ཅད་དུ། །བཀྲ་ཤིས་རྫས་བརྒྱད་རྒྱལ་སྲིད་རིན་ཆེན་བདུན། །བཀྲ་ཤིས་རྟགས་བརྒྱད་ཉེ་བའི་རིན་ཆེན་བདུན། །འདོད་ཡོན་ལྔ་ཡི་ལོངས་སྤྱོད་སྤྲིན་ལྟར་འཁྲིགས། །ལྷ་ཀླུ་མི་ཡི་ཟས་ནོར་བསམ་མི་ཁྱབ། །མི་ཟད་ནམ་མཁའ་མཛོད་ཀྱི་གཏེར་དུ་གྱུར། །ལྷ་ཚོགས་རྣམས་ཀྱི་གནས་གསུམ་འབྲུ་གསུམ་ལས། །འོད་འཕྲོས་རང་བཞིན་གནས་ནས་སྤྱན་དྲངས་གྱུར། །ཐལ་མོ་སྦྱར་ཏེ་སྙན་གསན་དབབ་པ་ནི། ཧཱུྃ། རང་བཞིན་ཆོས་ཀྱི་དབྱིངས་ཀྱི་ཞིང་ཁམས་ནས། །བྱང་ཆུབ་སེམས་དཔའ་ཆེན་པོ་ས་ཡི་སྙིང་། །ཡེ་ཤེས་སྤྱན་དང་ལྡན་པ་དགོངས་སུ་གསོལ། །འགྲོ་བ་སེམས་ཅན་རྣམས་ལ་ཕན་པའི་ཕྱིར། །སེམས་དཔའ་ཆེན་པོ་ཁྱོད་ཀྱི་སྨོན་ལམ་མཐུས། །སྔོན་གྱི་ཐུགས་དམ་ཞལ་བཞེས་རྗེས་དགོངས་ལ། །གཏེར་ཆེན་འདི་ལ་རྟག་ཏུ་བརྟན་པར་བཞུགས། །ཡུལ་འདིར་རྟག་ཏུ་ལོ་ཏོག་ལེགས་པ་དང་། །འབྲུ་དང་ཟས་ནོར་ལོངས་སྤྱོད་འཕེལ་ཤིང་རྒྱས། །ས་བཅུད་རྒྱས་ཤིང་རྒྱལ་ཁམས་རྟག་ཏུ་བདེ། །ཡུལ་འདིའི་ས་བདག་ཀླུ་གཉན་གཞི་བདག་ཀུན། །ནག་ཕྱོགས་མི་མིན་འབྱུང་པོའི་ཚོགས་རྣམས་ཀྱིས། །དཀར་ཕྱོགས་ཚོགས་རྣམས་ཡུལ་ཕུད་ཤུལ་བཟུང་ན། །རྟེན་འཛུགས་རྣམས་ལ་སྔོན་བཞིན་རྟེན་འཆོས་ཏེ། །དབུ་འཕང་གཉེན་པོ་ཕྱོགས་བཅུར་རྒྱས་པ་དང་། །བདག་ཅག་བདེ་སྐྱིད་ལྡན་པའི་དངོས་གྲུབ་སྩོལ། །ཧྲཱིཿ ཁྱོད་ལ་མཆོད་པ་འབུལ་བའི་དམ་རྫས་ནི། །དངོས་སུ་འབྱོར་དང་ཡིད་ཀྱི་རྣམ་སྤྲུལ་པ། །ཀུན་ཏུ་བཟང་པོའི་མཆོད་པའི་སྤྲིན་ལྟར་བུར། །དཔག་མེད་བློ་ཡིས་བླངས་ཏེ་འབུལ་ལགས་ན། །ལོངས་སྤྱོད་གཏེར་གྱི་དངོས་གྲུབ་སྩལ་དུ་གསོལ། །ཁྱད་པར་ཡུལ་འདིའི་ས་བདག་རི་བདག་དང་། །ཆུ་བདག་བྲག་བདག་རྡོ་བདག་ཤིང་གི་བདག །གཞི་བདག་གཉུག་མར་གནས་པ་མཐུ་ཆེན་རྣམས། །མཆོད་སྦྱིན་གཏོར་མ་ཕུལ་བས་ཚིམ་གྱུར་ཅིག །ཨོཾ་ཨཱ་ཀཱ་རོ་སོགས། ཨོཾ་ཀྴིཾ་ཧི་ར་ཛ་ཡ་ས་པ་རི་ཝ་ར་ཨེ་དམ་བ་ལིཾ་ཏ་ཁ་ཁ་ཁཱ་ཧི་ཁཱ་ཧིཿ ལན་གསུམ་བརྗོད། བསྟོད་པ་ནི། ཧྲཱིཿ རྒྱལ་ཀུན་ཐུགས་རྗེའི་བྱིན་རླབས་ལས་འཁྲུངས་ཤིང་། །ལོ་ཏོག་འབྲུ་རྣམས་འཕེལ་ཞིང་རྒྱས་མཛད་ཅིང་། །འཇིགས་པ་ཀུན་ལས་རྟག་ཏུ་སྐྱོབ་མཛད་པ། །སེམས་དཔའ་ས་ཡི་སྙིང་པོར་ཕྱག་འཚལ་བསྟོད། །འགྲོ་བའི་དབུལ་ཕོངས་སྡུག་བསྔལ་སེལ་མཛད་ཅིང་། །ལོངས་སྤྱོད་ནམ་མཁའ་མཛོད་ལ་མངའ་བརྙེས་པ། །འདོད་རྒུའི་དངོས་གྲུབ་ཆར་ལྟར་འབེབས་མཛད་པའི། །ནོར་ལྷ་རྒྱ་མཚོའི་ཚོགས་ལ་ཕྱག་འཚལ་བསྟོད། །བདག་ཅག་མ་རིག་རྨོངས་པར་གྱུར་པ་ལས། །ས་བདག་ཚོགས་རྣམས་འཁྲུགས་དང་འགལ་བ་ཀུན། །བདག་གི་དེང་འདིར་སྙིང་ནས་བཤགས་ལགས་ན། །ཚངས་པ་མཆོག་གི་དངོས་གྲུབ་སྩལ་དུ་གསོལ། །ཡིག་བརྒྱ་བརྗོད། བཟླས་པ་བྱ་བ་ནི། ས་སྙིང་ཐུགས་དཀར་ཟླ་བའི་གདན་གྱི་དབུས། །ཀྴིཾ་ཡིག་དཀར་པོའི་མཐའ་མར་སྔགས་ཀྱིས་བསྐོར། །དེ་ལས་འོད་ཟེར་བདུད་རྩིའི་རང་བཞིན་ཅན། །དཀར་པོ་དཔག་མེད་འཕྲོས་པས་ཡོན་བདག་ལ། །ཕོག་པས་སྡིག་སྒྲིབ་ནད་གདོན་ཀུན་ཞི་ནས། །བདུད་རྩི་ཚངས་བུག་ནས་ཞུགས་ལུས་ཀུན་གང་། །ཀླུ་དང་ས་བདག་ནད་དང་གནོད་པ་ཀུན། །བ་སྤུའི་སྒོ་ནས་འབུ་སྲིན་ཚུལ་དུ་ཐོན། །སླར་ཡང་མདུན་བསྐྱེད་ལྷ་ཡི་ཐུགས་ཀ་ནས། །འོད་ཟེར་སེར་པོ་འཕྲོས་པས་ཡོན་བདག་ཚོགས། །ཚེ་བསོད་རྒྱས་ཤིང་བཀྲག་མདངས་ལྡན་པ་དང་། །ས་བཅུད་དངོས་གྲུབ་ཐམས་ཅད་ཐོབ་པར་བསམ། །ཨོཾ་ཀྴིཾ་ཧི་ར་ཛ་ཡེ་སྭཱ་ཧཱ། ཅི་ནུས་བཟླ། ཨོཾ་ཀྴིཾ་ཧི་རཱ་ཛ་པྲི་ཐི་དེ་ཝི་སརྦ་སིདྡྷི་སྭཱ་ཧཱཿ ལོ་ལེགས་ཕྱིར་ཡིན་ན་འདི་ཅི་ནུས་བཟླ་དགོས་སོ། །ཨོཾ་ཨ་ཀ་ནི་ཎི་ཀ་ནི་ཨ་བྷི་ལ་མཎྟ་ལ་མ་ཡེ་སྭཱ་ཧཱ། འཁྲུགས་བཅོས་ཡིན་ན་འདི་ཅི་མང་བཟླ། ཨོཾ་ལས་སུ་རཀྴ་འདུས། ཨཱཿལས་སུ་རཀྴ་འདུས། ཨཱ་ལ་ཡ་རཀྴ་འདུས། ཧཱུྃ་ཧཱུྃ། དྷ་དྷ་དྷུ་དྷརྨ་ཡ་ཏ་ཀེ་ཙ་ཀི་ཧཱུྃ་ཕཊཿ ས་བདག་ཀླུ་གཉན་གྱི་གདུག་པ་ཞི་བར་གྱུར་ཅིག ཕོག་ཐུག་ཤོར་ན་འདི་ཅི་མང་བཟླའོ། །ཨོཾ་ཀྴིཾ་ཧི་ར་ཛ་པྲི་ཐི་དེ་ཝི་བྷུ་མི་པ་ཏི་སརྦ་རོ་ག་ཤིནྟིཾ་ཀུ་རུ་སྭཱ་ཧཱཿ ནད་པ་སོགས་ཀྱི་དོན་ཡིན་ན་འདི་ཅི་མང་བཟླའོ། །ཐུན་མཚམས་སུ་མཆོད་པ་ཁ་གསོ་ཞིང་། ཨོཾ་ཀྴིཾ་ཧི་ར་ཛ་ས་པ་རི་ཝ་ར་ཨརྒྷཾ་སོགས། ཤབྷ་པྲ་ཏི་ཙྪ་ཡེ་སྭཱ་ཧཱ། ཨོཾ་ཀྴིཾ་ཧི་ར་ཛ་ཡེ་ས་པ་རི་ཝ་ར་ཨེ་དམ་བྷ་ལིང་ཏ་ཁ་ཁ་ཁཱ་ཧི་ཁཱ་ཧིཿ ལན་གསུམ་བརྗོད། ས་བཅུད་ཡུལ་བཅུད་ཕྱིར་ཡིན་ན། བུམ་གཏེར་སྦས་ནས། ན་མོཿ སངས་རྒྱས་ཆོས་དང་དགེ་འདུན་ཚོགས་རྣམས་དང་། །རྟེན་འབྲེལ་བསླུ་བ་མེད་པའི་བདེན་པ་ཡིས། །ས་བདག་ས་ཡི་ལྷ་མོ་མཁའ་དབྱིངས་དང་། །འབྱུང་ལྔའི་རང་བཞིན་ཡུམ་ལྔའི་མཁའ་ཀློང་དུ། །དགོས་འདོད་ཀུན་འབྱུང་རིན་ཆེན་གཏེར་སྦས་པས། །མི་ཤིགས་ཕྱག་རྒྱ་ལྔ་ཡི་རྒྱས་གདབ་བོ། །རྣལ་འབྱོར་བདག་ཅག་འཁོར་དང་བཅས་པ་རྣམས། །ལོངས་སྤྱོད་མི་ཟད་གཏེར་ལ་མངའ་བརྙེས་ཤིང་། །ཕུན་ཚོགས་འབྲས་བུའི་དཔལ་ལ་སྤྱོད་པར་ཤོག །ཅེས་པ་འདི་ཡང་ཕུར་ཚའི་མཁན་སྤྲུལ་ཐུབ་བསྟན་འཕགས་པ་དང་ལ་དཀར་སྲས་པོ་མཐུ་སྟོབས་རྣལ་རྒྱལ་གཉིས་ནས་ཡང་ཡང་བསྐུལ་བའི་ངོར་རྫོགས་སྤྲུལ་ལྔ་བ་ཐུབ་བསྟན་ཆོས་ཀྱི་རྡོ་རྗེས་ཟླ་ཚེས་བཟང་པོར་བྲིས་པ་དགེཡི་གེ་པ་ནི་རྗེ་དབོན་མཆོག་གི་ཡང་སྲིད་དམ་པ་ཐུབ་བསྟན་བཤད་སྒྲུབ་བསྟན་པའི་ཉི་མས་བགྱིས་པ་དགེ་ལེགས་སུ་གྱུར་ཅིག །