ས་སྙིང་སྐུ་སྒྲུབ་པའི་ལག་ལེན་ཡིད་བཞིན་འདོད་འཇོ་ཞེས་བྱ་བ་བཞུགས་སོ།།

གྲངས་མེད་སྔོན་ནས་བྱང་ཆུབ་བརྙེས་གྱུར་ཀྱང་། །འགྲོ་བའི་དབུལ་ཕོངས་སྡུག་བསྔལ་སེལ་ཕྱིར་དུ། །སྙིང་རྗེའི་མངའ་བདག་སེམས་དཔའི་ཚུལ་འཛིན་པ། །རྗེ་བཙུན་ས་ཡི་སྙིང་པོར་གུས་པས་འདུད། །དེ་ལ་འདིར་ས་ཡི་སྙིང་པོའི་སྐུ་སྒྲུབ་པའི་ཆོ་ག་ལ། སྟེགས་བུའི་ཁར་སྐུ་རྣམས་བཞག སྨན་རཀ་གཏོར་གསུམ་དང་མཆོད་པ་ཅི་འབྱོར་བཤམས་ལ། སངས་རྒྱས་ཆོས་དང་ཚོགས་ཀྱི་མཆོག་རྣམས་སོགས། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་སོགས། ཚད་མེད་བཞི་སྒོམ། མཆོད་པ་བྱིན་རླབས་ནི། ཐམས་ཅད་སྟོང་ཉིད་ནམ་མཁའི་ངང་། །བྷཱུྃ་ལས་རིན་ཆེན་སྣོད་ནང་དུ། །ཨོཾ་ལས་ཕྱི་ནང་མཆོད་པའི་ཚོགས། །སོ་སོའི་ལྷ་མོའི་རོལ་བ་བཅས། །རབ་འབྱམས་ནམ་མཁའ་གང་བར་གྱུར། །ཨོཾ་བཛྲ་ཨརྒྷཾ་སོགས་པྲ་ཏིཙྪ་ཡེ་སྭཱ་ཧཱ། རྟེན་བསྐྱེད་པ་ནི། ཨོཾ་སྭཱ་བྷ་ཝ་ཤུདྡྷོ་སོགས། སྟོང་པའི་ངང་ལས་སྐུ་རྟེན་རྣམས་རིན་པོ་ཆེ་སྣ་ཚོགས་ལས་གྲུབ་པའི་ཁྲི་སྟེང་དུ་ཀྵིཾ་ཡིག་དཀར་པོ་ཡོངས་སུ་གྱུར་པ་ལས་འོད་ཟེར་འཕྲོ་འདུས་དོན་གཉིས་བྱས་ནས་ཚུར་འདུས་འོད་དུ་ཞུ་བ་ལས་བྱང་ཆུབ་སེམས་དཔའ་སེམས་དཔའ་ཆེན་པོ་ས་ཡི་སྙིང་པོ་སྐུ་མདོག་དཀར་གསལ་སྟོན་ཟླ་ཞུན་མའི་འདོག་ཅན། ཞལ་གཅིག་ཕྱག་གཉིས་པ་ཡེ་ཤེས་ཀྱི་སྤྱན་གཉིས་དང་ལྡན་པ། ཕྱག་གཡས་པས་འབྲས་ཀྱི་སྙེ་མ་ཐུགས་ཀར་འཛིན་ཅིང་། གཡོན་པས་དྲིལ་བུ་དཀུར་བརྟེན་པ། ཞབས་ཕྱེད་སྐྱིལ་གྱིས་བཞུགས་པ། ཞི་བའི་ཚུལ་དགུ་དང་རྒྱན་ཆས་བཅུ་གསུམ་གྱིས་སྤྲས་པ་དེའི་སྤྱི་གཙུག་ཏུ་པདྨ་ཟླ་བའི་གདན་སྟེང་དུ་སངས་རྒྱས་ཡོན་ཏན་རིན་ཆེན་རྒྱ་མཚོ་བཻཌཱུརྱ་དང་གསེར་གྱི་ཁ་དོག་བཟང་པོ་གསེར་དུ་སྣང་བའི་དཔལ་ཞེས་བྱ་བ་སྐུ་མདོག་སེར་པོ་གསེར་གྱི་མདོག་ཅན་ཞལ་གཅིག་ཕྱག་གཉིས་ཞི་ཞིང་འཛུམ་པའི་མཚན་དཔེའི་ལང་ཚོ་རབ་ཏུ་རྒྱས་པ་སྐུ་ལ་ཆོས་གོས་རྣམ་གསུམ་གསོལ་ཞིང་ཕྱག་གཉིས་མཆོག་སྦྱིན་མཉམ་བཞག ཞབས་རྡོ་རྗེ་སྐྱིལ་མོ་ཀྲུང་གིས་བཞུགས་པ། དེ་ལྟར་གསལ་བའི་སྤྱི་བོར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོ། དེ་ལས་འོད་ཟེར་འཕྲོས་པས་རང་བཞིན་ཆོས་ཀྱི་དབྱིངས་ཀྱི་ཞིང་ཁམས་ནས་ཡེ་ཤེས་པ་ཆར་སྤྲིན་གཏིབས་པ་ལྟར་བྱོན་ནས་དམ་ཚིག་པ་ལ་དབྱེར་མེད་དུ་བསྟིམ་པར་གྱུར། སྤྱན་འདྲེན་པ་ནི། ཧཱུྃ། བསྐལ་མང་གོང་ནས་མངོན་པར་བྱང་ཆུབ་ཀྱང་། །སྙིང་རྗེའི་མངའ་བདག་འགྲོ་ལ་བུ་ལྟར་སྐྱོང་། །དབུལ་ཕོངས་རྒྱུན་གཅོད་སེམས་དཔའི་ཚུལ་འཛིན་ནས། །ས་ཡི་སྙིང་པོ་འཁོར་བཅས་གཤེགས་སུ་གསོལ། །བཛྲ་ས་མ་ཡ་ཛཿ བཞུགས་གསོལ་ནི། ཧཱུྃ། དབྱིངས་ནས་སྤྱན་དྲངས་ཡེ་ཤེས་སེམས་དཔའི་ཚོགས། །ཇི་ལྟར་མཁའ་ལས་ཆར་སྤྲིན་གཏིབས་པ་བཞིན། །དམ་ཡེ་དབྱེར་མེད་ངང་དུ་རོ་གཅིག་ནས། །འགྲོ་བའི་དོན་དུ་བརྟན་པར་བཞུགས་སུ་གསོལ། །ས་མ་ཡ་ཏིཥྛི་ལྷན། ཕྱག་འཚལ་ནི། ཧཱུྃ། ཆོས་ཀྱི་དབྱིངས་ནས་གཟུགས་ཀྱི་སྐུར་སྟོན་པ། །གཞན་ཕན་ཕྲིན་ལས་རོལ་བའི་གཏེར་མངའ་ཞིང་། །འདོད་འབྱུང་ཡིད་བཞིན་དངོས་གྲུབ་སྩོལ་མཛད་པ། །དཀྱིལ་འཁོར་ཀུན་བདག་ཁྱེད་ལ་ཕྱག་འཚལ་ལོ། །ཨ་ཏུ་པུ་ཧོཿ པྲ་ཏི་ཙྪ་ཧོཿ མཆོད་པ་ནི། ཧཱུྃ། ཀུན་ཏུ་བཟང་པོའི་མཆོད་པའི་སྤྲིན་ལྟར་བུར། །དངོས་འབྱོར་ཡིད་སྤྲུལ་མཆོད་པའི་བྱེ་བྲག་ནི ། །དཔག་ཡས་ནམ་མཁའི་ཁམས་ཀུན་ཡོངས་བཀང་བས། །དགྱེས་པར་བཞེས་ལ་མཆོག་ཐུན་དངོས་གྲུབ་སྩོལ། །ཨོཾ་བཛྲ་ཨརྒྷཾ་སོགས་ནས་ཤབྟ་མ་ཧ་པཉྩ་ཨ་མྲྀ་ཏ་རཀྟ་བ་ལིཾ་ཏ་ཁ་ཧི་ཁ་ཧི། བསྟོད་པ་ནི། ཧཱུྃ། གང་སྐུ་དཀར་གསལ་སྟོན་ཟླ་གཞོན་ནུའི་མདོག །ཡེ་ཤེས་སྤྱན་གྱིས་དུས་གསུམ་ས་ལེར་གཟིགས། །མཚན་དཔེའི་དཔལ་འབར་ཡོན་ཏན་མཆོག་མངའ་བ། །འགྱུར་མེད་རྡོ་རྗེའི་སྐུ་ལ་ཕྱག་འཚལ་བསྟོད། །འགགས་མེད་གསུང་དབྱངས་ཡན་ལག་དྲུག་ཅུའི་སྒྲ། །ཞི་བ་ཆགས་བྲལ་དམ་ཆོས་བདུད་རྩི་ཡི། །ཉོན་མོངས་ནད་སེལ་ཐར་ལམ་བགྲོད་མཛད་པའི། །འགྱུར་མེད་རྡོ་རྗེའི་གསུང་ལ་ཕྱག་འཚལ་བསྟོད། །ཀུན་ཁྱབ་ནམ་མཁའ་ལྟ་བའི་རང་བཞིན་ལ། །ཡེ་ནས་རྟོག་མེད་ཟབ་གསལ་སྤྲོས་བྲལ་དབྱིངས། །དགོས་འདོད་འབྱུང་གནས་ཡིད་བཞིན་ནོར་བུ་ལྟར། །མཉམ་ཉིད་མི་གཡོ་ཐུགས་ལ་ཕྱག་འཚལ་བསྟོད། །རྒྱལ་བ་ཀུན་གྱི་ཡེ་ཤེས་གཅིག་བསྡུས་པ། །གཞན་ཕན་ཕྲིན་ལས་རྣམ་བཞིའི་རོལ་གར་ཅན། །སྙིང་རྗེའི་མངའ་བདག་དབུལ་བའི་གདུང་སེལ་བ། །སེམས་དཔའ་ས་ཡི་སྙིང་པོར་ཕྱག་འཚལ་བསྟོད། །བཟླས་པ་བྱ་བ་ནི། མདུན་བསྐྱེད་ཐུགས་ཀར་ཟླ་བའི་གདན་སྟེང་དུ། །ཀྵིཾ་ཡིག་དཀར་པོའི་མཐའ་མར་སྔགས་ཀྱིས་བསྐོར། །འོད་འཕྲོས་རྒྱལ་བ་སྲས་དང་བཅས་པ་ཡི། །ཐུགས་རྗེའི་བྱིན་རླབས་ནུས་མཐུ་དཔག་མེད་པ། །འོད་ཀྱི་རྣམ་པར་བསྡུས་ནས་སྐུ་གཟུགས་ལ། །ཐིམ་པས་བྱིན་རླབས་ནུས་མཐུ་ལྡན་པར་གྱུར། །ཨོཾ་ཀྵིཾ་ཧི་ར་ཛ་ཡེ་སྭཱ་ཧཱཿ རབ་ན་འབྲུ་འབུམ། འབྲིང་ན་འབུམ་ཐེར་བཞི། ཐ་ནའང་འབུམ་ཐེར་གཅིག་ལས་མི་ཉུང་བར་བྱ་དགོས། དབྱངས་གསལ་ཡེ་དྷར་ཡིག་བརྒྱ་རྣམས་བརྗོད་ལ། རང་གཞུང་གི་མཆོད་པ་ནི། ཧཱུྃ། ཀུན་ཏུ་བཟང་པོའི་མཆོད་སྤྲིན་ཇི་ལྟ་བུ་སོགས་དང་། རང་གཞུང་གི་བསྟོད་པ། རྒྱལ་བ་ཀུན་གྱི་ཡེ་ཤེས་གཅིག་བསྡུས་སོགས་ཤྭ་ལོ་ཀ་གཅིག་བརྗོད།ཡིག་བརྒྱ།རྟེན་བཞུགས་ནི། ཇི་སྲིད་ས་ཆུ་མེ་དང་ནི། །རླུང་གི་བསྐལ་བས་འཇིག་བར་དུ། །སེམས་ཅན་ཀུན་གྱི་དོན་གྱི་ཕྱིར། །བཅོམ་ལྡན་ཁྱོད་ནི་བཞུགས་པར་མཛོད། །འདི་ནི་རྟེན་དང་ལྷན་ཅིག་ཏུ། །འགྲོ་བའི་དོན་དུ་བཞུགས་ནས་ཀྱང་། །ནད་མེད་ཚེ་དང་དབང་ཕྱུག་རྣམས། །མཆོག་རྣམས་ལེགས་པར་སྩལ་དུ་གསོལ། །ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། ཇི་སྲིད་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་མི་གནས་པའི་མྱ་ངན་ལས་འདས་པའི་ས་ལ་མ་བཞག་གི་བར་དུ་རྒྱལ་བ་རྣམས་མྱ་ངན་ལས་མི་འདའ་བར་བརྟན་པར་བཞུགས་སུ་གསོལ། ཁྱད་པར་དུ་ཡང་སྐུ་གསུང་ཐུགས་ཀྱི་རྟེན་འདི་རྣམས་ཇི་སྲིད་འབྱུང་བ་བཞི་ཡི་གནོད་པས་མ་ཞིག་གི་བར་དུ་བརྟན་པར་བཞུགས་སུ་གསོལ།བརྟན་པར་བཞུགས་ནས་ཀྱང་བདག་དང་མཐའ་ཡས་པའི་སེམས་ཅན་ལ་མཆོག་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། ཨོཾ་སུ་པྲ་ཏིཥྛ་བཛྲ་ཡེ་སྭཱ་ཧཱ། བཀྲ་ཤིས་ནི། ཡེ་དྷརྨ་ཧེ་ཏུ་པྲ་བྷ་སོགས། ཨོཾ། བཀྲ་ཤིས་གང་ཞིག་སེམས་ཅན་ཀུན་གྱི་སྙིང་ལ་གནས། །ཀུན་གྱི་བདག་ཉིད་རིགས་ཀུན་གྱི་ནི་བདག་པོ་མཆོག །མ་ལུས་སེམས་ཅན་བསྐྱེད་མཛད་བདེ་བ་ཆེན་པོ་སྟེ། །དེས་ནི་དེང་ཁྱོད་དབང་བསྐུར་མཆོག་ལ་བཀྲ་ཤིས་ཤོག །ཕུན་སུམ་ཚོགས་པ་མངའ་བ་གསེར་གྱི་རི་བོ་འདྲ། །སོགས་ནས། དེང་ཀུན་འཇིགས་པ་ཆེ་ལས་ཐར་གྱུར་ཅིག །དེང་འདིར་རྣལ་འབྱོར་བ་བདག་ཅག་དཔོན་སློབ་ཡོན་མཆོད་འཁོར་དང་བཅས་པ་ཐམས་ཅད་ཉི་མ་དང་ཟླ་བ་གཟའ་སྒྲ་གཅན་གྱི་གནོད་པ་ལས་གྲོལ་བ་བཞིན་དུ་བདུད་དང་སྤང་བྱ་བར་ཆད་མི་མཐུན་པའི་ཕྱོགས་ཐམས་ཅད་ལས་རྣམ་པར་རྒྱལ་ཏེ་ཤིན་ཏུ་བཀྲ་ཤིས་པར་གྱུར་ཅིག །ཛ་ཡ་ཛ་ཡ་སུ་ཛ་ཡན་ཏུ། འཇིག་རྟེན་བདེ་ཞིང་ལོ་ལེགས་དང་། །འབྲུ་རྣམས་འཕེལ་ཞིང་ཕྱུགས་འཕེལ་བ། །དགེ་ལེགས་ཐམས་ཅད་འབྱུང་བའི་གནས། །ཡིད་ལ་འདོད་པ་ཀུན་འགྲུབ་མཛོད། །ས་བཅུད་ཡུལ་བཅུད་སོགས་ལ་ཕན་པའི་ཕྱིར་དུ།སྐུ་ས་ལ་སྦ་བར་བྱེད་པར་འདོད་ན་དེའི་དྲུང་དུ་ཕྱིན་ཏེ།སྐྱབས་འགྲོ་སེམས་བསྐྱེད།ཚད་མེད་བཞི་བསྒོམ་ལ། གཞི་བདག་སྤྱི་ལ་གཏོར་མ་བསྔོ་བ་ནི། རྃ་ཡྃ་ཁྃ། ཨོཾ་ཨཱཿཧཱུྃ། ཨོཾ་སྭཱ་བྷ་ཝ་སོགས། སྟོང་པའི་ངང་ལས་རིན་པོ་ཆེའི་སྣོད་དུ་དཀར་གསུམ་མངར་གསུམ་ལས་གྲུབ་པའི་གཏོར་མ་འདོད་ཡོན་གྱི་ཕུང་པོ་ཟད་མི་ཤེས་པའི་གཏེར་དུ་གྱུར། ཨོཾ་ཨཱཿ་ཧཱུྃ། གསུམ། ཨོཾ་ཨ་ཀཱ་རོ་སོགས་ལན་གསུམ། ཧཱུྃ། ཡུལ་འདིར་གནས་པའི་དཀར་ཕྱོགས་གཞི་བདག་ཚོགས། །རྣལ་འབྱོར་བདག་གི་འདོད་དོན་སྒྲུབ་པ་ལ། །དཀར་ཕྱོགས་སྐྱོང་བ་མཐུ་ཆེན་ཚོགས་རྣམས་ཀྱིས། །འདོད་ཡོན་ལྔ་ལྡན་མཆོད་གཏོར་འདི་བཞེས་ལ། །བདག་གི་ཕྲིན་ལས་འགྲུབ་པའི་སྡོང་གྲོགས་མཛོད། །བགེགས་ལ་གཏོར་མ་སྦྱིན་པ་ནི།ཧཱུྃ། སྟེང་འོག་ཕྱོགས་མཚམས་ས་བླར་རྒྱུ་བ་ཡི། །བགེགས་རིགས་ལན་ཆགས་ནག་ཕྱོགས་འབྱུང་པོའི་ཚོགས། །ཁྱད་པར་ཡུལ་འདིར་གནས་པའི་ཚོགས་རྣམས་ཀྱིས། །མཁོ་རྒུའི་གླུ་གཏོར་བཟང་པོ་འདི་བཞེས་ཏེ། །གནས་འདིར་མ་འདུག་རང་རང་གནས་སུ་དེངས། །གལ་ཏེ་མི་འགྲོ་འདི་རུ་འདུག་གྱུར་ན། །བགེགས་འདུལ་ཁྲོ་རྒྱལ་འབར་བ་ཐུགས་ཁྲོས་ནས། །ལུས་ངག་རྡུལ་ཕྲན་བཞིན་དུ་བརླག་པར་གྱུར། །ཨོཾ་སུམ་བྷ་ནི་སོགས། མཚམས་གཅོད་ནི། ཧཱུྃ། སྟེང་འོག་ཕྱོགས་མཚམས་སྐྱོང་བའི་ཁྲོ་རྒྱལ་བཅུ། །རང་རང་ཕྱོགས་ཀྱི་བགེགས་ཚོགས་ཀུན་འདུལ་ནས། །མཚོན་ཆ་རྣམ་ལྔའི་གུར་ཁང་གཏམས་པ་ལས། །བསྐལ་བའི་རླུང་ཡང་ཐར་བའི་སྐབས་མེད་ན། །བར་ཆད་འབྱུང་པོའི་ཚོགས་རྣམས་སྨོས་ཅི་དགོས། །ཨོཾ་བཛྲ་རཀྵ་རཀྵ་ཧཱུྃ། མཆོད་པ་བྱིན་བརླབས་ནི། རྣམ་དག་ཆོས་ཀྱི་དབྱིངས་ཀྱི་ངང་ཉིད་ལས། །རྣམ་རོལ་འགགས་མེད་མཆོད་པའི་སྤྲིན་ཕུང་ནི། །རྣམ་པ་ཀུན་བཟང་མཆོད་པའི་སྤྲིན་ལྟ་བུར། །རྣམ་མང་ནམ་མཁའ་མཛོད་ཀྱི་འཁོར་ལོར་གྱུར། །ལྷ་བསྐྱེད་ནི། སྟོང་པའི་ངང་ལས་སྐད་ཅིག་དྲན་རྫོགས་སུ། །རང་མདུན་པདྨ་ཟླ་བའི་གདན་སྟེང་དུ། །སྟོང་གསུམ་མི་མཇེད་ས་ཡི་བདག་པོ་ནི། །ལྷ་མོ་བརྟན་མ་སྐུ་མདོག་གསེར་གྱི་མདོག །ཞལ་གཅིག་ཕྱག་གཉིས་ཐུགས་ཀར་ཐལ་སྦྱར་བར། །རིན་ཆེན་འདོད་འབྱུང་གསེར་གྱི་བུམ་པ་བསྣམས། །སྣ་ཚོགས་དར་དང་རིན་ཆེན་དུ་མས་བརྒྱན། །ཞབས་གཉིས་སེམས་དཔའི་སྐྱིལ་མོ་ཀྲུང་གིས་བཞུགས། །བདག་གིས་འགྲོ་དོན་རླབས་ཆེན་སྒྲུབ་པ་ལ། །ཡུམ་ཆེན་སངས་རྒྱས་སྤྱན་མའི་མཁའ་དབྱིངས་སུ། །དགོས་འདོད་ཀུན་འབྱུང་ཡིད་བཞིན་རིན་པོ་ཆེ། །རྨད་བྱུང་བདེ་གཤེགས་སྐུ་གཟུགས་གཏེར་དུ་སྦས། །མི་འགྱུར་ཕྱག་རྒྱ་ལྔ་ཡིས་རྒྱས་བཏབ་པས། །འཇིགས་རྟེན་ཁམས་ཀྱི་ལོ་ལེགས་ཕྱུགས་འཕེལ་ཞིང་། །འབྲུ་དང་རྟ་ཕྱུགས་ལོངས་སྤྱོད་རྒྱས་པ་དང་། །དམག་འཁྲུགས་མུ་གེ་ནད་གདོན་ཀུན་ཞི་ནས། །དཔལ་འབྱོར་བསོད་ནམས་རིགས་བརྒྱུད་འཕེལ་བ་དང་། །བཤད་སྒྲུབ་དགེ་འདུན་འདུས་པའི་སྡེ་ཚོགས་རྣམས། །ཡར་ངོའི་ཟླ་བ་ལྟར་བུར་ཇི་བཞིན་དུ། །གོང་ནས་གོང་འཕེལ་མི་ནུབ་དར་ཞིང་རྒྱས། །ལྷ་མོ་ཁྱེད་ཀྱིས་སྡོང་གྲོགས་མ་གཡེལ་ཞིག །མཆོད་པ་ནི། ཧཱུྃ། དངོས་སུ་འབྱོར་དང་ཡིད་ཀྱི་རྣམ་སྤྲུལ་སོགས། གཏོར་མ་འབུལ་བ་ནི། ཧཱུྃ། སྔོན་ཚེ་སྟོན་པའི་ཞལ་མཐོང་དམ་ཚིག་ཅན། །བྱང་ཆུབ་སྒྲུབ་ལ་དངོས་གྲུབ་སྩོལ་མཛད་པའི། །མཆོད་གཏོར་བཟང་པོ་རྒྱན་ལྡན་འདི་བཞེས་ལ། །བདག་ལ་སྡོང་གྲོགས་ཕྲིན་ལས་མཛད་དུ་གསོལ། །གཏོར་མ་མཆོད་ལ། བསྟོད་པ་ནི། ཧཱུྃ། སྔོན་ཚེ་སྐྱོབ་པ་སངས་རྒྱས་ཐམས་ཅད་ཀྱི། །སྤྱན་སྔར་ཞལ་བཞེས་དམ་ཚིག་རྗེས་དགོངས་ལ། །ཡིད་ལ་ཅི་འདོད་དངོས་གྲུབ་སྩོལ་མཛད་པའི། །ས་ལ་དབང་མཛད་ལྷ་མོ་ཁྱོད་ལ་བསྟོད། །ཡིག་བརྒྱ། མ་རྙེད་ཡོངས་སུ་སོགས། འདིར་ནི་རྟེན་དང་ལྷན་སོགས། བསྡུ་རིམ་ནི། ས་ཡི་ལྷ་མོ་བརྟན་མ་ཞལ་འཛུམ་པ་དང་བཅས་ནས་སྒྲུབ་པ་པོ་ལ་དངོས་གྲུབ་ཅི་འདོད་པ་ཐམས་ཅད་སྒྲུབ་པར་བསམ་ལ། ས་གཞི་ལ་ཐིམ་ནས་མི་དམིགས་སྤྲོས་བྲལ་གྱི་ངང་ལ་མཉམ་པར་བཞག བསྔོ་བ་སྨོན་ལམ་ནི། བདག་གཞན་དུས་གསུམ་བསགས་པའི་དགེ་རྩ་ཀུན། །རྣམ་མཁྱེན་བྱང་ཆུབ་ཐོབ་པའི་རྒྱུ་རུ་བསྔོ། །དེང་ནས་སྐྱེ་བ་ཚེ་རབས་ཐམས་ཅད་དུ། །མི་འབྲལ་ཚོམ་བུ་གཅིག་ཏུ་འཚོགས་པར་ཤོག །བཀྲ་ཤིས་ནི། བྱིན་རླབས་མཆོག་སྩོལ་རྩ་བརྒྱུད་བླ་མ་དང་། །དངོས་གྲུབ་ཀུན་སྩོལ་ཡི་དམ་ཞི་ཁྲོའི་ལྷ། །ཕྲིན་ལས་མངའ་བདག་མ་མོ་མཁའ་འགྲོའི་ཚོགས། །དཀྱིལ་འཁོར་ལྷ་ཚོགས་རྣམས་ཀྱི་བཀྲ་ཤིས་ཤོག །ཅེས་པ་འདིའང་ལ་དཀར་སྲས་པོ་མཐུ་སྟོབས་ནས་ཡང་ཡང་བསྐུལ་བའི་ངོར་རྫོགས་སྤྲུལ་ལྔ་པ་ཐུབ་བསྟན་ཆོས་ཀྱི་རྡོ་རྗེས་བྲིས་པ་དགེ། །།