བདུད་མགོན་ལེགས་ལྡན་གྱི་བསང་ནི།

ཧཱུྃ། སྔོན་ཚེ་དཔལ་ཆེན་རྡོ་རྗེ་སྲིན་པོ་ཡིས། །བདུད་ཀྱི་སྡེ་ཚོགས་འདུལ་བར་མཛད་པའི་ཚེ། །དབང་བསྐུར་དམ་ལ་གནས་པའི་མཐུ་བོ་ཆེ། །ལེགས་ལྡན་ནག་པོ་ཆེན་པོ་འདིར་གཤེགས་ཤིག །དུས་མཐའི་སྤྲིན་ནག་འཁྲིགས་འདྲ་འཇིགས་རུང་སྐུ། །སྡང་མིག་གློག་སྟོང་གཡོ་བས་རྣམ་པར་བརྗིད། །གངས་རི་ལྟར་དཀར་རྣོ་དབལ་མཆེ་བ་གཙིགས། །འབར་བའི་ལྗགས་འདྲིལ་ཧཱུྃ་ཕཊ་འབྲུག་སྟོང་སྒྲོག །མུན་པ་ལྟར་ནག་ཟ་འོག་བེར་ཆེན་གསོལ། །བདུད་འདུལ་གྲི་གུག་ཐོད་ཁྲག་ཕྱག་ན་བསྣམས། །གར་དགུའི་ཉམས་ཀྱིས་བདུད་བཞིའི་ཁྲག་ལ་རོལ། །ཀྲོ་ཏཱི་ཤྭ་རི་ཡུམ་དང་དགྱེས་རོལ་ཞིང་། །གྲངས་མེད་ལས་མཁན་ཕོ་ཉའི་ཚོགས་དང་བཅས། །དཔལ་ལྡན་ཧེ་རུ་ཀ་ཡི་བཀའ་བཞིན་དུ། །ནམ་མཁར་དྲག་པོའི་སྤྲིན་ཕུང་གཏིབ་པ་ལྟར། །དམ་ཚིག་དབང་གིས་གནས་འདིར་དགྱེས་བྱོན་ལ། །དགྲ་བགེགས་ལོག་འདྲེན་བསྒྱེལ་བའི་གདན་ལ་བཞུགས། །སྒོ་གསུམ་གུས་པ་ཆེན་པོས་ཕྱག་བགྱིའོ། །ཕྱི་ནང་གསང་བའི་མཐུན་རྫས་མཆོད་པ་འབུལ། །ཐུགས་དང་འགལ་བ་ཐམས་ཅད་མཐོལ་ལོ་བཤགས། །ཁྱད་པར་དགྱེས་པ་བསྐྱེད་བྱེད་མཐུན་པའི་རྫས། །དྲི་བཟང་ཤིང་སྣ་ཕྱེ་མར་འོ་སྐོལ་དང་། །དཀར་མངར་ཤ་ཁྲག་དར་སྣ་རིན་ཆེན་དང་། །ག་བུར་ལ་སོགས་སྨན་ལྔ་བསྲེགས་པ་ཡི། །དྲི་ཞིམ་བསང་གི་དུད་པས་བར་སྣང་ཁྱབ། །དུད་པའི་སྤྲིན་གྱི་ཟེར་མ་རེ་རེ་ལས། །འདོད་པའི་ཡོན་ཏན་ལྔ་ཡི་ཆར་འབེབས་ཤིང་། །དགྲ་བགེགས་ཤ་ཁྲག་ནང་ཁྲོལ་རུས་པའི་ཚོགས། །ལྷུན་པོར་སྤུངས་པའི་གཏོར་མ་རྒྱ་ཆེན་དང་། །རྟ་ནག་དར་ནག་གཡག་ནག་ཁྱི་ནག་སོགས། །མཐུན་པའི་དམ་རྫས་མ་ཚང་མེད་པ་ཉིད། །དགྱེས་དགུར་འཆར་བ་ཀུན་བཟང་མཆོད་སྤྲིན་གྱིས། །དཔལ་མགོན་ལེགས་ལྡན་ནག་པོ་བསང་ཞིང་མཆོད། །དགྱེས་ཡུམ་ཁྲོ་མོ་དབང་ཕྱུག་བསང་ཞིང་མཆོད། །ཡབ་མཆོག་དྲང་སྲོང་བདེ་བྱེད་བསང་ཞིང་མཆོད། །ཡུམ་གཅིག་ཨུ་མ་དེ་ཝ་བསང་ཞིང་མཆོད། །བཀའ་ཉན་ཕོ་ཉའི་ཚོགས་རྣམས་བསང་ཞིང་མཆོད། །བསང་ངོ་མཆོད་དོ་ཐུགས་དམ་བསྐང་གྱུར་ཅིག །དེ་ལྟར་བསང་ཞིང་མཆོད་པའི་བྱིན་རླབས་ཀྱིས། །དཔལ་ལྡན་བླ་མའི་སྐུ་ཚེ་བསྲིང་བ་དང་། །བསྟན་འཛིན་བུ་སློབ་མངའ་ཐང་རྒྱས་པ་དང་། །ཕྱི་ནང་གསང་བའི་བར་ཆད་ཀུན་ཞི་ནས། །གསང་སྔགས་བསྟན་པའི་བཤད་སྒྲུབ་རབ་རྒྱས་ཤིང་། །བསྟན་དགྲ་མ་ལུས་ཆམ་ལ་དབབ་པར་མཛོད། །དགོན་གནས་ཆོས་འཁོར་འདུས་པ་རྒྱ་མཚོ་རྣམས། །བུ་བཞིན་སྐྱོང་ལ་དགེ་འདུན་འདུ་བ་སྤེལ། །ཟབ་མོ་ནང་རྒྱུད་སྡེ་གསུམ་བསྟན་པ་ཡིས། །ཡངས་པའི་ས་ཆེན་ཀུན་ཏུ་ཁྱབ་པར་མཛོད། །ཞེས་པའང་རྫོགས་ཆེན་མཆོག་སྤྲུལ་ལྔ་པའི་བཀའ་ལུང་བཞིན། འཇམ་དཔལ་རྡོ་རྗེས་སོ། །