མ་ནིང་བསང་མཆོད་བཞུགས།

ཧཱུྃ། ཀུན་བཟང་ཧེ་རུ་ཀ་དཔལ་བསྟན་སྲུང་ཚུལ། །ཆོས་སྐྱོང་ཡོངས་ཀྱི་རྒྱལ་པོ་མཐུ་བོ་ཆེ། །འཇིགས་མཛད་མ་ནིང་མཆེད་གསུམ་འཁོར་དང་བཅས། །སྐད་ཅིག་ཡུད་ལ་གནས་འདིར་གཤེགས་སུ་གསོལ། །སྲིད་རྩའི་བདག་འཛིན་རུ་ཏྲ་སྡེ་གསུམ་འདུལ། །དུག་གསུམ་རྩད་གཅོད་སྐུ་གསུམ་ལྷུན་གྱིས་གྲུབ། །དུས་གསུམ་སངས་རྒྱས་བསྟན་པ་སྲུང་མཛད་པ། །མ་ནིང་མཆེད་གསུམ་སྐུ་ལ་ཕྱག་འཚལ་ལོ། །ཁྱེད་ལ་དགྱེས་པའི་མཆོད་པ་འབུལ་བ་ནི། །ཕྱི་ནང་གསང་བའི་དམ་རྫས་མ་ལུས་དང་། །ཁྱད་པར་ཡེ་ཤེས་བདུད་རྩི་བསང་གི་སྤྲིན། །འདོད་དགུ་ཀུན་འབྱུང་ཡིད་བཞིན་གཏེར་དུ་འབུལ། །ཤ་སྣ་ཁྲག་སྣ་སྙིང་སྣའི་ཚོགས་རྣམས་དང་། །དར་གདུགས་རྒྱལ་མཚན་བ་དན་རོལ་མོ་སོགས། །སྣ་ཚོགས་མཆོད་པའི་སྤྲིན་ཕུང་མཐའ་ཡས་པ། །གང་བཞེད་འདོད་དགུར་འཆར་བའི་བསང་མཆོད་འདིས། །དཔལ་མགོན་མ་ནིང་ནག་པོ་གསོལ་ཞིང་མཆོད། །ལས་མཁན་སྲོག་བདུད་ནག་པོ་གསོལ་ཞིང་མཆོད། །འཇིགས་མཛད་དཔལ་འབར་ཆེན་པོ་གསོལ་ཞིང་མཆོད། །ཕྱི་རོལ་ཡང་འཁོར་བརྒྱད་པོ་གསོལ་ཞིང་མཆོད། །བཀའ་ཉན་ལས་བྱེད་དྲེགས་པ་གསོལ་ཞིང་མཆོད། །འཁོར་བཅས་མ་ལུས་ཐུགས་དམ་སྐོང་གྱུར་ཅིག །ཐུགས་དང་འགའ་བ་ཐམས་ཅད་མཐོལ་ཞིང་བཤགས། །ཉམས་གྲིབ་མི་གཙང་དྲི་མ་དག་གྱུར་ཅིག །དཔལ་མགོན་འཁོར་བཅས་བསང་ཞིང་མཆོད་པའི་མཐུས། །དགྱེས་པའི་ཐུགས་ཀྱིས་རྟག་ཏུ་མགོན་མཛད་ནས། །ཡང་དག་ལས་ཀྱི་བར་ཆད་བདུད་དང་དགྲ། །ཐམས་ཅད་མིང་གི་ལྷག་མར་ཚར་ཆོད་ཅིག །གསང་སྔགས་བསྟན་པ་ཕྱོགས་བཅུར་རྒྱས་པ་དང་། །བསྟན་འཛིན་སྐྱེས་བུའི་ཚོགས་རྣམས་དབུ་འཕང་བསྟོད། །བཤད་སྒྲུབ་བསྟན་པའི་རྒྱལ་མཚན་གནས་འདིར་ཚུགས། །མི་མཐུན་ཕྱོགས་ལས་རྣམ་པར་རྒྱལ་བར་མཛོད། །བདག་ཅག་དཔོན་སློབ་དགོན་གནས་བཅས་པ་ལ། །སྡང་ཞིང་གདུག་པའི་སེམས་འཆང་མི་བསྲུན་སྡེ། །བྱད་ཕུར་རྦོད་གཏོང་གཤོམ་པའི་བྱད་མ་རྣམས། །གང་ན་ཡོད་ཀྱང་ད་ལྟ་ཉིད་དུ་སོད། །ངན་སྨད་དུག་སྦྱོར་དབྱེན་ཤགས་ལ་སོགས་པའི། །སྦྱོར་ངན་བྱེད་པ་སྡང་བའི་དགྲ་བོ་དང་། །ཟ་ཐང་དཔལ་ལ་འཚེ་བའི་གནོད་བྱེད་རྣམས། །མ་བསྐུལ་པར་ཡང་ཁྱོད་ཀྱིས་སྒྲོལ་བར་མཛོད། །ཚེ་དང་སྲོག་ལ་རྐུ་བའི་འབྱུང་པོ་དང་། །མི་འདོད་ཕུང་ཁྲོལ་སློང་བ་དམ་སྲིའི་ཚོགས། །ནད་སྣ་ཡམས་སྣ་འདྲེན་པའི་གདོན་བགེགས་རྣམས། །ཟུངས་ཤིག་ཆོངས་ཤིག་སོད་ཅིག་མེད་པར་གྱིས། །མདོར་ན་གཞན་ཕན་བྱང་ཆུབ་སེམས་ཀྱི་བློས། །བསྟན་དང་འགྲོ་བའི་དོན་ཆེན་བསྒྲུབ་པ་ལ། །མཐུ་ལྡན་ཁྱོད་ཀྱིས་སྔོན་གྱི་ཞལ་བཞེས་བཞིན། །མཐུ་དཔུང་སྡོང་གྲོགས་གཡེལ་བ་མེད་པར་མཛོད། །ཞེས་པའང་མཆོག་སྤྲུལ་རིན་པོ་ཆེའི་བཀའ་བཞིན་མི་ཕམ་པས་སོ། །