ཉང་གཏེར་མགོན་པོ་ཕྱག་བཞི་པའི་བསང་མཆོད་ནི།
ཧཱུྃ། དཔལ་ཆེན་ཁྲག་འཐུང་ཐུགས་ལས་སྤྲུལ་པའི་རྗེ། །དཔལ་མགོན་ནག་པོ་ཕྱག་བཞི་འཁོར་དང་བཅས། །དད་པ་དམ་ཚིག་དབང་གིས་སྤྱན་འདྲེན་ན། །ད་ལྟ་ཉིད་དུ་གནས་འདིར་གཤེགས་སུ་གསོལ། །དྲི་ཞིམ་བདུད་རྩི་བསང་གི་དུད་སྤྲིན་ལས། །ཕྱི་ནང་གསང་བ་མཐུན་པའི་དམ་རྫས་ཚོགས། །ངོ་བོ་རྣམ་དག་ཡེ་ཤེས་རང་བཞིན་ལ། །རྣམ་པ་སྲིད་ཞིའི་འབྱོར་བ་མ་ཚང་མེད། །ཕྱོགས་དང་དུས་ཀྱི་མུ་མཐར་ཁྱབ་པ་འདིས། །དཔལ་མགོན་ནག་པོ་ཆེན་པོ་བསང་ཞིང་མཆོད། །ཚད་མེད་བཞི་ཡི་ཕྱག་ལྡན་བསང་ཞིང་མཆོད། །རྣལ་འབྱོར་ཡོངས་ཀྱི་ཕོ་ལྷ་བསང་ཞིང་མཆོད། །དམ་ཚིག་ཅན་གྱི་སྲུང་མ་བསང་ཞིང་མཆོད། །དམ་ཉམས་བདུད་ཀྱི་གཤེད་ཆེན་བསང་ཞིང་མཆོད། །རིག་འཛིན་ཡོངས་ཀྱི་ཕོ་ཉ་བསང་ཞིང་མཆོད། །དུས་གསུམ་རྒྱལ་བའི་བསྟན་སྲུང་བསང་ཞིང་མཆོད། །དགྱེས་ཡུམ་བཀའ་ཉན་ལས་བྱེད་བསང་ཞིང་མཆོད། །བསང་ངོ་མཆོད་དོ་དཔལ་མགོན་ཐུགས་དམ་ཅན། །རྒྱལ་བ་རིག་འཛིན་བརྒྱུད་པའི་སྤྱན་སྔ་རུ། །ཞལ་བཞེས་ཐ་ཚིག་གཉན་པོ་དེང་དགོངས་ལ། །དཔལ་ལྡན་བླ་མའི་སྐུ་ཚེ་ཁྱོད་ཀྱིས་སྲིངས། །བསྟན་འཛིན་དཔོན་སློབ་འཁོར་འབངས་ཁྱོད་ཀྱིས་སྲུངས། །བཤད་སྒྲུབ་བསྟན་པའི་མངའ་ཐང་ཁྱོད་ཀྱིས་སྤེལ། །བར་ཆད་བསྟན་དགྲ་དམ་སྲི་ཁྱོད་ཀྱི་སྒྲོལ། །གང་འདོད་ཕྲིན་ལས་རྣམ་བཞི་ཁྱོད་ཀྱིས་སྒྲུབས། །བསྟན་སྲིད་དབུ་འཕང་གཉན་པོ་ཁྱོད་ཀྱིས་བསྟོད། །ཆེ་བཙན་ཆོས་ནོར་འདོད་དགུ་ཁྱོད་ཀྱིས་སྩོལ། །ཀུན་ཁྱབ་དགེ་མཚན་སྙན་གྲགས་ཁྱོད་ཀྱིས་སྒྲོགས། །ལྟ་དགོངས་ཏིང་འཛིན་ས་ལམ་ཉམས་རྟོགས་དང་། །དཔལ་འབྱོར་དབང་ཐང་ཆུས་སྲིད་ལེགས་ཚོགས་རྣམས། །མི་ནུབ་ཡར་ངོའི་ཟླ་བཞིན་འཕེལ་བ་ཡི། །ཕྲིན་ལས་དམ་པ་དཔལ་མགོན་ཁྱོད་ཀྱིས་མཛོད། །ཁྱོད་ནི་ཧེ་རུ་ཀ་དཔལ་ཚོགས་ཀྱི་རྗེ། །སྲིད་གསུམ་དབང་བསྒྱུར་ཕྲིན་ལས་ཐོགས་མེད་ལ། །བསྟན་འཛིན་རྣམས་ཀྱི་མགོན་དང་སྐྱབས་ཡིན་པས། །མ་གཡེལ་མ་གཡེལ་དཔལ་ལྡན་ནག་པོ་ཆེ། །ལྷག་པར་སྙིགས་མ་ལྔ་དང་ལྡན་པ་ཡི། །ཞིང་འདིར་བསྟན་པ་འཛིན་པའི་སྐྱེས་བུ་ལ། །ཁྱོད་ཀྱི་སྡོང་གྲོགས་གཡར་དམ་གཡེལ་གྱུར་ན། །མགོན་མེད་བདག་ཅག་སུ་ལ་རེ་ལྟོས་འཆའ། །དེ་ཕྱིར་མཐུ་ལྡན་ཁྱོད་ཀྱིས་གཡར་དམ་བཞིན། །བསྟན་ལ་འཚེ་བའི་དམ་སྲི་འབྱུང་པོ་དང་། །ཁྱད་པར་ནག་ཕྱོགས་ཀླ་ཀློའི་སྡེ་ཚོགས་རྣམས། །ཕྱོགས་འདིར་རྒྱུ་བའི་གོ་སྐབས་གཏན་དུ་ཁོག །དུས་ཀྱི་མཐར་ཡང་གསང་སྔགས་སྙིང་པོ་ཡི། །བསྟན་པའི་ཉི་མ་རྟག་ཏུ་མི་ནུབ་པའི། །ཕྲིན་ལས་ཆེན་པོའི་མཐུ་སྟོབས་མངོན་ཕྱུང་ནས། །བདག་ཅག་རེ་བའི་འབྲས་བུ་མཆིས་པར་མཛོད། །མཆོག་སྤྲུལ་རིན་པོ་ཆེའི་བཀའ་ལུང་བཞིན་མི་ཕམ་པས་སོ། །