བདུད་མགོན་ཞིང་སྐྱོང་བསང་མཆོད།
ཧཱུྃ། རབ་འཇིགས་དུར་ཁྲོད་ཆེན་པོ་བསིལ་བའི་ཚལ། །མེ་རླུང་དམར་ནག་འཁྲུགས་པའི་ཀློང་དཀྱིལ་ནས། །རྣལ་འབྱོར་ཡོངས་ཀྱི་དགྲ་ལྷར་མངའ་གསོལ་བ། །ཤིན་ཏུ་མི་བསྲུན་དཔལ་གཏུམ་སེངྒེའི་གདོང་། །ཆོས་ཉིད་འགྱུར་མེད་སྐུ་མདོག་མཐིང་འོད་འབར། །སྤྱན་གསུམ་དམར་ཟླུམ་སྡང་མིག་ཕྱོགས་བཅུར་གཟིགས། །དཔྲལ་བའི་ཁྲོ་གཉེར་ཆུ་ཡི་རླབས་བཞིན་འཁྲུགས། །ཞལ་གདངས་ལྗགས་འདྲིལ་ཨག་ཚོམ་མེ་ལྟར་འབར། །སེངྒེའི་ང་རོ་འབྲུག་ལྟར་ཕྱོགས་བཅུར་སྒྲོག །གཡུ་རལ་གསེབ་ནས་མེ་སྟག་སེང་ཆུང་འཕྲོ། །ཐོད་སྐམ་དབུ་བརྒྱན་ཐོད་རློན་དོ་ཤལ་ཅན། །དར་ནག་འཇོལ་བེར་རུས་པའི་རྒྱན་དྲུག་གསོལ། །ཕྱག་གཡས་མིག་སྨན་མདོག་ཅན་བ་དན་ཕྱར། །གཡོན་པས་དམར་ཆེན་གཏོར་མ་དགྲ་ལ་འཕེན། །བདུད་རྟ་ནག་པོ་རླུང་གི་གཤོག་ཅན་ཆིབས། །ཡུམ་ཆེན་བདུད་མོ་དམར་ནག་ཁྲག་རལ་ཅན། །ལས་བྱེད་དུས་མཚན་ཕོ་མོ་རྣམ་གཉིས་བཅས། །སྐད་ཅིག་ཙམ་གྱིས་གནས་འདིར་གཤེགས་སུ་གསོལ། །ཞིང་བཅུ་བསྒྲལ་བའི་རཀྟ་དམར་གྱི་མཚོ། །རྨད་བྱུང་བྷ་ལིང་གཏོར་མ་རི་ལྟར་སྤུངས། །འཆི་མེད་བདུད་རྩི་པཉྩ་ཨ་མྲི་ཏ། །བདུད་གཡག་རོག་པོ་རྟ་ནག་རྟིང་དཀར་དང་། །ཁྱི་ནག་སྙིང་དཀར་ལུག་ནག་སྤྱི་དཀར་ཅན། །མདུང་དར་ནག་པོ་ཐོད་པའི་ཕྲེང་བ་དང་། །དབང་ལྔའི་མེ་ཏོག་ཚིལ་ཆེན་བདུག་པའི་སྤྲིན། །ཞུན་ཆེན་མར་མེ་མཁྲིས་པའི་དྲི་ཆབ་རྒྱུན། །ཤ་སྣ་སྙིང་སྣའི་ཞལ་ཟས་རི་ལྟར་སྤུངས། །རྔ་དང་དུང་དཀར་སྙན་བརྗིད་རོལ་མོའི་སྒྲ། །ཁྱད་པར་དྲི་བཟང་ཤིང་དང་ལྷན་ཅིག་ཏུ། །རིན་ཆེན་སྣ་ལྔ་དར་ཟབ་ཕྱེ་མར་སོགས། །བསྲེགས་པའི་དུད་པ་ཕྱོགས་བཅུར་འཁྲིགས་པ་འདིའི། །བདུད་མགོན་འཁོར་བཅས་བསང་ཤིང་མཆོད་པའི་མཐུས། །བདག་ཅག་འཁོར་བཅས་ཚེ་བསོད་རྒྱས་པ་དང་། །ཕྱི་ནང་མི་མཐུན་ཉེར་འཚེ་ཀུན་ཞི་ནས། །མི་དང་མི་མིན་དབང་དུ་འདུ་བ་དང་། །བྱད་ཕུར་རྦོད་གཏོང་དགྲ་བགེགས་ཚར་གཅོད་ཅིག །རྫོགས་སྤྲུལ་ལྔ་པ་ཐུབ་བསྟན་ཆོས་ཀྱི་རྡོ་རྗེས་བྲིས་པ་དགེ །