སྨན་བཙུན་ཚེ་རིང་མཆེད་ལྔའི་བསང་མཆོད་དཔག་བསམ་ལྗོན་ཤིང་ཞེས་བྱ་བ་བཞུགས།།
བྷྱོཿ བདེ་ཆེན་ཀུན་ཏུ་བཟང་མོའི་མཁའ་ཀློང་ནས། །དབྱིངས་ཀྱི་རྒྱལ་མོ་སྤྲུལ་པའི་ཡུམ་ཆེན་ལྔ། །གནས་དང་ཡུལ་གྱི་མཁའ་འགྲོ་ཀུན་གྱི་གཙོ། །ཕྱི་ལྟར་ཤ་ཟ་མཁའ་འགྲོ་ཆེན་མོ་ལྔ། །ནང་ལྟར་སྨན་བཙུན་ཚེ་རིང་མཆེད་ལྔ་པོ། །གསང་བ་སྐྱེ་མེད་ཆོས་དབྱིངས་ཀུན་བཟང་མོ། །དབྱིངས་ལས་མ་གཡོས་ཚེ་རིང་མཆེད་ལྔ་དགོངས། །རྣལ་འབྱོར་བདག་གིས་ཁྱེད་དང་མཐུན་པའི་རྫས། །ཀུན་བཟང་མཆོད་པའི་སྤྲིན་ལྟར་བཤམས་ལགས་ན། །དད་གུས་གདུང་བའི་དབྱངས་ཀྱིས་འབོད་པའི་ཚེ། །རང་སྣང་འོད་གསལ་སྤྲུལ་པའི་གནས་མཆོག་ནས། །མཐོན་མཐིང་གངས་ཀྱི་རྒྱལ་མོའི་ཕོ་བྲང་ཆེ། །འཇའ་དང་འོད་དུ་འཁྲིགས་པའི་གཞལ་ཡས་ནས། །སྨན་བཙུན་ཆེན་མོ་བཀྲ་ཤིས་ཚེ་རིང་མ། །མཐིང་གི་ཞལ་བཟང་མི་གཡོ་གླང་བཟང་མ། །ཅོད་པན་མགྲིན་བཟང་ཏལ་དཀར་འགྲོ་བཟང་ལྷ། །གཞན་ཡང་མཆེད་ཟླ་བོད་ཡུལ་བསྟན་སྐྱོང་མ། །བཅུ་གཉིས་སྤྲུལ་པ་ཡང་སྤྲུལ་ཉིང་སྤྲུལ་དང་། །གནས་གསུམ་ཌཱཀྐའི་སྨན་ཕྲན་འབུམ་དང་བཅས། །སྔོན་ཚེ་སློབ་དཔོན་པདྨ་འབྱུང་གནས་དང་། །དྲེགས་པའི་བཀའ་བབ་དཔལ་གྱི་སེངྒེ་ཡིས། །བཀའ་བསྒོས་ཐ་ཚིག་གཉན་པོ་དྲན་མཛོད་ལ། །དགྱེས་པའི་ཚུལ་གྱིས་གནས་འདིར་གཤེགས་སུ་གསོལ། །མདུན་མཁར་པདྨ་ཉི་ཟླའི་གདན་ལ་བཞུགས། །སྒོ་གསུམ་གུས་པའི་སྒོ་ནས་ཕྱག་འཚལ་ལོ། །དག་བྱེད་བདུད་རྩི་དྲི་ཞིམ་སྨན་གྱི་ཤིང་། །ཕྱེ་མར་ཟས་ཕུད་རིན་ཆེན་འབྲུ་སྨན་དང་། །ཇ་ཆང་འོ་སྐོལ་སྟག་གཟིགས་རས་མོ་སོགས། །འབར་བའི་མེར་བསྲེགས་ཡེ་ཤེས་དུད་པའི་སྤྲིན། །ལྷ་ལམ་ཡོངས་ཁྱབ་བསང་གི་མཆོད་པ་འདིས། །སྨན་བཙུན་ཆེན་མོ་བཀྲ་ཤིས་ཚེ་རིང་མ། །བསང་ངོ་མཆོད་དོ་མཆོག་ཐུན་དངོས་གྲུབ་སྩོལ། །པྲ་ཡི་ལྷ་མོ་མཐིང་གི་ཞལ་བཟང་མ། །བསང་ངོ་མཆོད་དོ་མངོན་ཤེས་དངོས་གྲུབ་སྩོལ། །གཏེར་གྱི་ལྷ་མོ་ཅོད་པན་མགྲིན་བཟང་མ། །བསང་ངོ་མཆོད་དོ་གཏེར་གྱི་དངོས་གྲུབ་སྩོལ། །ཟས་ཀྱི་ལྷ་མོ་མི་གཡོ་གླང་བཟང་མ། །བསང་ངོ་མཆོད་དོ་ནོར་གྱི་དངོས་གྲུབ་སྩོལ། །ཏལ་དཀར་འགྲོ་བཟང་རྐང་བཞི་ཕྱུགས་ཀྱི་ལྷ། །བསང་ངོ་མཆོད་དོ་ཕྱུགས་ཀྱི་དངོས་གྲུབ་སྩོལ། །གཞན་ཡང་བོད་སྐྱོང་བརྟན་མ་བཅུ་གཉིས་ཚོགས། །གནས་གསུམ་ཌཱཀྐི་སྨན་ཕྲན་འབུམ་དང་བཅས། །བསང་ངོ་མཆོད་དོ་བཅོལ་བའི་ཕྲིན་ལས་མཛོད། །ཁྱད་པར་ཁྱེད་དང་མཐུན་པའི་དམ་རྫས་ནི། །གཡུ་བྱང་མིག་མེད་དངུལ་དཀར་མེ་ལོང་ཤེལ། །མདའ་དར་སྣ་ལྔ་དུང་ཤྭ་རིན་ཆེན་གསེར། །ཤ་རྐྱང་མ་ཧེ་གླང་ཆེན་འདོད་འཇོའི་བ། །རྨ་བྱ་ལྕུང་ཀ་ནེ་ཙོ་ཤང་ཤང་སོགས། །མདོར་ན་དངོས་བཤམས་ཡིད་ཀྱི་རྣམ་རོལ་ལས། །མཆོད་རྫས་རྟེན་རྫས་བསྐང་རྫས་ལ་སོགས་པ། །རབ་འབྱམས་རྒྱ་མཚོའི་ཞིང་ན་ཅི་མཆིས་པ། །བློ་ཡིས་བླངས་ཏེ་གུས་པས་འབུལ་ལགས་ན། །མ་གཅིག་ཚེ་རིང་མཆེད་ལྔ་འཁོར་བཅས་མཆོད། །དེ་ལྟར་བསང་ཞིང་མཆོད་པའི་བྱིན་རླབས་ཀྱིས། །གསང་ཆེན་འོད་གསལ་རྡོ་རྗེ་སྙིང་པོ་ཡི། །བསྟན་པ་མཐའ་དབུས་ཀུན་ཏུ་རྒྱས་པ་དང་། །བསྟན་འཛིན་སྐྱེས་བུའི་སྐུ་ཚེ་རབ་བརྟན་ཞིང་། །མཛད་ཕྲིན་ཡངས་པའི་ཐ་གྲུ་ཀུན་ཏུ་ཁྱབ། །དུས་འཁྲུགས་ཀླ་ཀློའི་འཚེ་བ་བདུད་ཀྱི་རིགས། །རྒྱལ་བསེན་དམ་སྲི་ཤི་འདྲེ་ཕོ་མོའི་ཚོགས། །དོ་བསྡོ་ཕོད་དུ་བཙུགས་པའི་དགྲ་བོ་རྣམས། །ཐལ་བར་རློགས་ལ་མིང་ཙམ་མེད་པར་མཛོད། །མདོར་ན་བདག་གིས་བྱང་ཆུབ་མ་ཐོབ་བར། །ལྷ་མཆོག་ཁྱེད་ཀྱིས་ཕྲིན་ལས་མ་གཡེལ་ཞིག །ཅེས་སྨན་བཙུན་ཚེ་རིང་མཆེད་ལྔའི་བསང་མཆོད་འདིའང་རྫོགས་སྤྲུལ་ལྔ་པའི་མིང་འཛིན་པ་ཐུབ་བསྟན་ཆོས་ཀྱི་རྡོ་རྗེས་བྲིས་པ་དགེ་ལེགས་སུ་གྱུར་ཅིག །