རྡོ་རྗེ་གཡུ་སྒྲོན་མའི་བསང་།
བྷྱོཿ གདོད་ནས་རྣམ་དག་སྤྲོས་བྲལ་ཆོས་སྐུའི་རྩལ། །མ་འགགས་གསལ་མདངས་སྤྲུལ་པའི་སྐུར་ཤར་བ། །ཡེ་ཤེས་ལྔ་ཡི་རང་བཞིན་མཁའ་འགྲོའི་གཙོ། །རྒྱལ་པའི་ཡུམ་མཆོག་རྡོ་རྗེ་གཡུ་སྒྲོན་མ། །འཁོར་བཅས་བསང་གི་མགྲོན་ལ་གཤེགས་སུ་གསོལ། །རང་མདུན་འཇའ་ཟེར་འོད་ཕུང་འཁྲིགས་པའི་ཀློང་། །རིན་ཆེན་ཕོ་བྲང་ཁང་བཟང་བལྟ་ན་སྡུག །དབུས་སུ་རིན་ཆེན་སྣ་ཚོགས་ཁྲི་རྐང་སྟེང་། །སྨན་བཙུན་ཆེན་མོ་རྡོ་རྗེ་གཡུ་སྒྲོན་མ། །དཀར་གསལ་ཟླ་བ་ཞུན་མའི་ལང་ཚོ་ཅན། །དར་དཀར་ན་བཟའ་གསེར་གཡུ་མུ་ཏིག་བརྒྱན། །ཕྱག་གཡས་བདེ་སྦྱིན་ནོར་བུ་ཐུགས་ཀར་བསྣམས། །གཡོན་པས་དངུལ་དཀར་གསལ་བའི་མེ་ལོང་བསྣམས། །དར་གྱི་ལ་ཐོད་རིན་ཆེན་རྒྱན་ཕྲེང་ཅན། །ཞབས་གཉིས་ཕྱེད་སྐྱིལ་འོད་ཟེར་ཕྱོགས་བཅུར་འཕྲོ། །དགྱེས་པར་བཞུགས་ལ་གུས་པས་ཕྱག་འཚལ་ལོ། །ཕྱི་ཡི་མཆོད་པ་འདོད་ཡོན་རྣམ་པ་ལྔ། །ནང་གི་མཆོད་པ་སྨན་རཀ་གཏོར་གསུམ་དང་། །གསང་བའི་མཆོད་པ་གྷ་ཎ་ཙཀྲ་དང་། །རྨ་བྱ་ཤང་ཤང་ལ་སོགས་འདབ་ཆགས་ཚོགས། །ཤ་རྐྱང་འབྲོང་བུ་ལ་སོགས་རི་དྭགས་དང་། །ཤུགས་ལྡན་རྟ་དྲེལ་བོང་བུ་མ་ཧེ་དང་། །མཛོ་འབྲི་བ་ལང་ལ་སོགས་གཡུང་དྭགས་རིགས། །སེང་གེ་སྟག་གཟིག་གཅན་གཟན་རིགས་བྱེད་དང་། །སྲིད་ན་མཆོད་པར་འོས་པའི་ཡོ་བྱད་དང་། །ཁྱད་པར་ཙནྡན་དཀར་དམར་ཨ་ཀ་རུ། །དར་ཟབ་ཕྱེ་མར་རིན་ཆེན་རྣམ་པ་ལྔ། །བསྲེགས་པའི་དུད་སྤྲིན་ཡེ་ཤེས་བདུད་རྩིའི་རྒྱུན། །རྣམ་དག་བསང་གི་མཆོད་པ་དམ་པ་འདིས། །སྨན་བཙུན་རྡོ་རྗེ་གཡུ་སྒྲོན་འཁོར་བཅས་བསང་། །དེ་ལྟར་བསང་གི་མཆོད་པ་ཕུལ་བ་ཡིས། །ད་ལྟ་བསྐལ་ངན་སྙིགས་མའི་དུས་འདི་རུ། །བདག་ཅག་ཆོས་བཞིན་སྒྲུབ་པའི་གང་ཟག་ལ། །མི་དང་མི་མིན་དམ་སྲི་འབྱུང་པོའི་རིགས། །དབྱེན་བཅུག་ཕྲ་མ་མཁན་གྱི་ཚོགས་རྣམས་ཀུན། །ཐལ་བ་རྡུལ་དུ་བརླག་པའི་ཕྲིན་ལས་མཛོད། །རྒྱལ་བའི་བསྟན་པ་སྤྱི་དང་ཁྱད་པར་དུ། །གསང་ཆེན་རྡོ་རྗེ་ཐེག་པའི་བསྟན་པ་ནི། །ཕྱོགས་བཅུ་ཀུན་ཏུ་དར་ཞིང་རྒྱས་གྱུར་པ། །ནད་མེད་ཚེ་རིང་ཁམས་གསུམ་དབང་དུ་སྡུད། །བྱད་ཕུར་རྦོད་གཏོང་བཟློག་པའི་ཕྲིན་ལས་མཛོད། །ཅེས་པ་འདི་ཡང་རྫོགས་སྤྲུལ་ལྔ་པས་སོ། །