ཨ་ཏིའི་བདུད་འདུལ་དྲག་མོའི་བཀའ་སྲུང་དམ་ཅན་ནོར་སྒྲུབ་ཀྱི་བསང་བཞུགས་སོ།།

ཧཱུྃ་ཧྲཱིཿ དབང་ཆེན་ཐུགས་ལས་སྤྲུལ་པའི་དམ་ཚིག་ཅན། །རིག་འཛིན་བརྒྱུད་པའི་ཕོ་ཉ་མཐུ་རྩལ་ཅན། །རྒྱ་བོད་ཡོངས་ཀྱི་ནོར་བདག་རྫུ་འཕྲུལ་ཅན། །མཐུ་ཆེན་དྲེགས་པའི་གཙོ་བོ་འདིར་བྱོན་ལ། །བདག་ནི་རྒྱལ་དབང་པདྨ་རྒྱལ་པོ་སོགས། །རིག་འཛིན་བརྒྱུད་པའི་བརྒྱུད་འཛིན་རྣལ་འབྱོར་པ། །ཁྱོད་ནི་དམ་ཚིག་ཅན་ལ་སྙིང་ཉེ་བས། །དམ་ཅན་ཞེས་པའི་མཚན་གྱི་ཅོད་པན་འཛིན། །གང་འདིར་བཞེད་དགུར་འཆར་བའི་བསང་མཆོད་ཀྱིས། །དགྱེས་པ་སྤེལ་སླད་མགྲོན་དུ་ཁྱོད་འབོད་ན། །ནུབ་ཕྱོགས་རིན་ཆེན་འབར་བའི་གཞལ་ཡས་ཁང་། །བླ་མཁར་སྨུག་པོ་འཇའ་ཚོན་འོད་ཟེར་ཅན། །དངོས་གྲུབ་འདོད་དགུ་ཆར་དུ་འབེབས་པ་ན། །རིན་ཆེན་གཏེར་གྱི་ཁྲི་ལ་བཞུགས་པ་ཡི། །ནོར་བདག་དགེ་བསྙེན་ཆེན་པོ་སྤྱན་འདྲེན་ནོ། །སྐུ་མདོག་དཀར་དམར་ཞག་གཅིག་ཕྱག་གཉིས་པ། །ས་གསུམ་ཡིད་འཕྲོག་མཛེས་སྡུག་འཛུམ་པའི་ཞལ། །འགུགས་བྱེད་ལྕགས་ཀྱུ་འདོད་འབྱུང་ནོར་བུ་གཡས། །གཏེར་གྱི་ལྡེའུ་མིག་དགོས་འདོད་ནེའུ་ལེ་གཡོན། །བེར་དཀར་མེ་ཏྲི་དམར་པོའི་ན་བཟའ་ལ། །རིན་ཆེན་གསེར་གྱི་སྐུ་རགས་མཛེས་པར་བཅིང་། །དབུ་ལ་སྟག་ཞུ་དར་དམར་འཕུར་ལྕེ་ཅན། །ཞབས་ལ་སག་ཏིའི་ལྷམ་ཆེན་མཛེས་པར་གསོལ། །སྣ་ཚོགས་རིན་ཆེན་རྒྱན་དང་ལྡན་པའི་སྐུར། །ཀོང་བཙུན་དམར་མོ་མཛེས་སྡུག་མཚུངས་མེད་མ། །དར་དཀར་གསེར་ཐིག་གཡུ་ཐོད་མུ་ཏིག་སྤྲས། །གཡས་པས་མེ་ལོང་གཡོན་པས་མདའ་དར་དཀར། །ཡབ་ཡུམ་མཉམ་སྦྱོར་སེང་གེའི་གདན་ལ་རོལ། །འཁོར་དུ་ནོར་བདག་ཛམ་ལྷ་མཆེད་བརྒྱད་དང་། །དགེ་བསྙེན་ཉེར་གཅིག་བརྟན་མ་བཅུ་གཉིས་དང་། །མཆེད་འཁོར་སུམ་བརྒྱ་དྲུག་ཅུས་ཡོངས་བསྐོར་བའི། །སྐྱེས་བུ་ཆེན་པོ་འཁོར་དང་བཅས་པ་ལ། །དད་དང་དམ་ཚིག་གདུང་བའི་སེམས་ཀྱིས་ནི། །དྲི་ཞིམ་བསང་དུད་ལྷ་ལམ་ཡོངས་ཁྱབ་སྤྲིན། །བཀྲ་ཤིས་རྫས་རྟགས་རྒྱལ་སྲིད་རིན་ཆེན་བདུན། །ཡིད་འོང་བདེ་བའི་དཔལ་སྟེར་ལྷ་མོའི་ཚོགས། །ནོར་བུ་བུམ་བཟང་སྐྱེད་ཚལ་དཔག་བསམ་ཤིང་། །གཏེར་དང་རིན་ཆེན་འདོད་འཇོའི་བ་མོ་སོགས། །རྣམ་མང་སྲིད་ཞིའི་འབྱོར་བ་རྨད་བྱུང་དང་། །དམ་ཚིག་དབང་གིས་ཉིད་དང་མཐུན་པའི་རྫས། །གང་བཞེད་ཡིད་བཞིན་འདོད་དགུའི་གཏེར་ཆེན་པོ། །ཏིང་འཛིན་སྔགས་དང་ཕྱག་རྒྱས་སྤྲུལ་ཏེ་འབུལ། །བསང་ངོ་མཆོད་དོ་ཐུགས་དམ་སྐོང་གྱུར་ཅིག །དགྱེས་པའི་ཐུགས་ཀྱིས་བདག་ལ་སྡོང་གྲོགས་མཛོད། །ས་འོག་ས་སྟེང་ས་བླའི་འཇིག་རྟེན་གྱི། །དཔལ་དང་འབྱོར་བ་སྟོབས་དང་ནུས་པའི་ཤུགས། །ཁབ་ལེན་རྡོ་ཡིས་ལྕགས་བཞིན་དབང་བསྡུས་ནས། །སྒྲུབ་པ་པོ་ལ་དངོས་གྲུབ་ཆར་འབེབས་མཛོད། །མཆོག་སྤྲུལ་དམ་པས་བཀའ་བསྐུལ་ལྟར་མི་ཕམ་པས་སོ། །