བླ་མ་དགོངས་འདུས་བཀའ་སྲུང་རིག་འཛིན་མའི་བསང་མཆོད་ནི།

བྷྱོཿ འགྱུར་མེད་བདེ་བ་ཆེན་པོའི་ངང་ཉིད་ལས། །སྐྱེ་མེད་ཀློང་ནས་སྐྱེ་བའི་ཆོ་འཕྲུལ་དུ། །ཤར་བའི་རྒྱལ་བ་ཀུན་གྱི་ཡུམ་ཆེན་མོ། །གནས་གསུམ་མཁའ་འགྲོ་ཡོངས་ཀྱི་གཙོ་མོའི་ཚུལ། །ཨ་མ་རིག་འཛིན་ལྷ་མོ་རལ་གཅིག་མ། །འཁོར་བཅས་སྐད་ཅིག་གནས་འདིར་གཤེགས་སུ་གསོལ། །རང་མདུན་པདྨ་ཟླ་བའི་གདན་སྟེང་དུ། །དཔལ་ལྡན་ལྷ་མོ་སྟོན་ཀའི་ཟླ་བའི་མདོག །ཞལ་གཅིག་ཞི་མ་ཁྲོ་ཡི་ཉམས་དང་ལྡན། །ཕྱག་གཡས་དཔའ་བོ་མཁའ་འགྲོ་དབང་སྡུད་པའི། །ཐོད་པའི་ཅང་ཏེའུ་སྙན་གྱི་ཐད་ཀར་འཁྲོལ། །གཡོན་པས་སྣང་སྲིད་གསལ་བར་བྱས་པ་ཡི། །འཕྲུལ་གྱི་དངུལ་དཀར་མེ་ལོང་དྭངས་པ་འཛིན། །དབུ་སྐྲ་གནག་སྣུམ་རལ་བའི་ཐོར་ཚུགས་ཅན། །རིན་ཆེན་སོག་ཞུ་སྙན་ཆ་མགུལ་རྒྱན་སྤྲས། །ཟ་འོག་ཁ་དོག་ལྔ་ལྡན་ཤ་གོས་ལ། །རིན་ཆེན་སྣ་ཚོགས་ཕྲ་ཚོམས་ཀུན་ནས་མཛེས། །རིན་ཆེན་གསེར་གྱི་སྐེ་རགས་བཅིང་པ་ལ། །དེ་སྟེང་དར་དཀར་རྩེ་གོས་ཕུ་དུང་ཅན། །ལྷབ་ལྷུབ་གཡོ་བ་ཟ་འོག་མཐའ་འཇག་ཅན། །རིན་ཆེན་དོ་ཤལ་ཕྱག་ཞབས་གདུ་གུ་ཅན། །ཞབས་གཉིས་མཉམ་པའི་སྟབས་ཀྱིས་བཞེངས་པ་ལ། །འཁོར་དུ་མ་མོ་འབུམ་དང་ཤ་ཟ་སྟོང་། །སྣང་སྲིད་དྲེགས་པའི་དམག་ཚོགས་སྤྲིན་ལྟར་གཏིབས། །ཁྱེད་ལ་དགྱེས་པའི་མཆོད་པ་འབུལ་བ་ནི། །ཕྱི་ནང་ཉེར་སྤྱོད་འདོད་ཡོན་སྤྲིན་ལྟར་གཏིབས། །བདེ་ཆེན་དགའ་བཞིའི་ཡེ་ཤེས་མཆོད་པའི་ཚོགས། །ཟུང་འཇུག་མཉམ་པར་སྦྱོར་བའི་མཆོད་པའི་སྤྲིན། །ང་བདག་གཟུང་འཛིན་བསྒྲལ་བའི་མཆོད་པ་དང་། །གྷ་ཎ་ཙཀྲའི་ལོངས་སྤྱོད་སྐར་ལྟར་བཀྲམ། །དྲི་ཞིམ་བསང་གི་མཆོད་པ་ཕུལ་བ་ཡིས། །བདག་ཅག་དཔོན་སློབ་འཁོར་དང་བཅས་པ་རྣམས། །ལོག་པར་བལྟ་བའི་དགྲ་བགེགས་ཐམས་ཅད་དང་། །བྱད་ཕུར་རྦོད་པ་གཏོང་བའི་མཁན་པོ་རྣམས། །རང་གཤེད་རང་ལ་དབབ་པར་མཛད་དུ་གསོལ། །དེང་ནས་བྱང་ཆུབ་སྙིང་པོ་མ་ཐོབ་བར། །ལྷ་མཆོག་ཁྱོད་ཀྱི་སྡོང་གྲོགས་མ་གཡེལ་ཞིག །རྫོགས་སྤྲུལ་ལྔ་པ་ཐུབ་བསྟན་ཆོས་ཀྱི་རྡོ་རྗེས་བྲིས་པ་དགེ །