རྒྱལ་ཆེན་སྐུ་ལྔའི་བསང་མཆོད་དགྲ་ལས་རྣམ་རྒྱལ་ཞེས་བྱ་བ་བཞུགས་སོ།།

ཧཱུྃ། རང་བཞིན་ལྷུན་གྱིས་གྲུབ་པའི་གཞལ་ཡས་ནས། །བཅོམ་ལྡན་རྒྱལ་བ་རིགས་ལྔ་ཡབ་ཡུམ་སྐུ། །དོན་དམ་ཞི་བའི་ངང་ལས་མ་གཡོས་ཀྱང་། །ཡེ་ཤེས་ལྔ་ཡི་རང་གདངས་ཤར་བ་ལས། །ཤིན་ཏུ་གདུལ་དཀའ་དམ་སྲི་འབྱུང་པོའི་ཚོགས། །ལོག་རྟོག་གདུག་པའི་ཚོགས་རྣམས་བསྒྲལ་བའི་ཕྱིར། །དུག་ལྔ་མ་སྤངས་སྐུ་ལྔ་ལྷུན་གྱིས་གྲུབ། །སྤྲུལ་པའི་ཆོས་རྒྱལ་ཆེན་པོ་སྐུ་ལྔར་ཤར། །གསང་བའི་ཡུམ་ཆེན་བདུད་མོ་རྣམ་པ་ལྔ། །དམ་ཚིག་སྲུང་བའི་བཀའ་ཡི་བློན་པོ་ལྔ། །འཁོར་གྱི་ལས་བྱེད་རུ་འདྲེན་སྡེ་བཞིའི་ཚོགས། །ཅི་བགྱིའི་བཀའ་ཉན་ལས་རྣམས་སྒྲུབ་པའི་ཕྱིར། །སྤྲུལ་པ་ཡང་སྤྲུལ་ཉིང་སྤྲུལ་བསམ་མི་ཁྱབ། །ཕོ་ཉ་སྟག་གཟིག་དོམ་དྲེད་འདུར་ཞིང་རྒྱུག །སྤྲ་སྤྲེའུ་བྱི་བ་སྣ་ཚོགས་ཟློས་གར་བསྒྱུར། །ལྕགས་ཀྱི་བྱ་ཁྲ་མང་པོ་སྤྲིན་ལྟར་གཏིབ། །བདུད་བྱ་ལྕུང་ཀའི་ཚོགས་ནི་ཐིབས་སེ་ཐིབ། །གནམ་ལྕགས་ཐོག་གི་སེར་ཆེན་ཤ་ར་ར། །རྔམས་པའི་གད་རྒྱངས་མི་བཟད་ཧ་ཧར་བཞད། །དགྱེས་པའི་གླུ་ལེན་བཤུག་པའི་སྒྲ་དང་བཅས། །རྣལ་འབྱོར་བདག་གིས་བསང་མཆོད་འབུལ་བའི་ཕྱིར། །དད་དང་དམ་ཚིག་དབང་གིས་སྤྱན་འདྲེན་ན། །སྐད་ཅིག་ཡུད་ཙམ་གནས་འདིར་གཤེགས་སུ་གསོལ། །མ་ཆགས་པདྨ་ཐབས་ཤེས་ཉི་ཟླ་དང་། །དགྲ་བགེགས་ལོག་འདྲེན་བསྣོལ་བའི་གདན་ལ་བཞུགས། །མེ་ཐབ་སངས་རྒྱས་སྤྱན་མའི་ཀློང་ཡངས་སུ། །ན་བཟའ་དཀར་མོའི་ངོ་བོ་མེ་འབར་བ། །དམ་ཚིག་སྒྲོལ་མའི་རླུང་གིས་རབ་བསྐྱོད་དེ། །རིན་ཆེན་མཱ་མ་ཀི་ཡི་ཆབ་ཀྱིས་བྲན། །ནམ་མཁའ་དབྱིངས་ཀྱི་དབང་ཕྱུག་ཀུན་ཏུ་ཁྱབ། །དོན་ལ་བསྲེག་བྱ་སྲེག་བྱེད་མི་དམིགས་ཀྱང་། །ཀུན་རྫོབ་སྒྱུ་མ་ལྟ་བུའི་ཚུལ་གྱིས་ནི། །རིན་ཆེན་སྣ་ལྔ་དར་ཟབ་སྣ་ཚོགས་དང་། །ཕྱེ་མར་སྨན་སྤོས་འབྲུ་བཅུད་སྤོས་ཀྱི་རིགས། །དཀར་དམར་ཇ་ཆང་བཏུང་བ་རྒྱ་མཚོར་བསྐྱིལ། །ཤ་ཆེན་སྤོས་དཀར་ཚུལ་ཆེན་སྦྱར་བའི་རྫས། །དྲི་མེད་ཤིང་སྣའི་ཚོགས་དང་ལྷན་ཅིག་ཏུ། །བསྲེགས་པའི་དུད་སྤྲིན་ནམ་མཁའི་མཐའ་དང་མཉམ། །བཀྲ་ཤིས་རྫས་རྟགས་རྒྱལ་སྲིད་རིན་ཆེན་བདུན། །མཆོད་པའི་ལྷ་མོའི་ཟེར་ཕྲེང་ཕྱོགས་བཅུར་འཕྲོ། །འདོད་རྒུའི་སྤྲིན་ཕུང་བསང་གི་མཆོད་པ་འདིས། །འགྱུར་མེད་དབྱིངས་ལས་ཁྲོས་པའི་སྐུར་བཞེངས་པ། །ཆོས་སྐྱོང་རྒྱལ་པོ་སྐུ་ལྔ་བསང་ཞིང་མཆོད། །རྒྱལ་པོ་སྡེ་ལྔའི་ཐུགས་དམ་དགྱེས་བྱེད་མ། །གསང་བའི་ཡུམ་ཆེན་སྡེ་ལྔ་བསང་ཞིང་མཆོད། །ཕྲིན་ལས་རྣམ་བཞིའི་ལས་རྣམས་སྒྲུབ་པའི་ཕྱིར། །བཀའ་ཡི་བློན་པོ་རྣམ་ལྔ་བསང་ཞིང་མཆོད། །དམ་ཉམས་དགྲ་བོ་ཕུང་དུ་གཞུག་པའི་ཕྱིར། །འཁོར་གྱི་རུ་འདྲེན་ཚོགས་རྣམས་བསང་ཞིང་མཆོད། །ཅི་བགྱིས་བཀའ་ཉན་ལས་རྣམས་སྒྲུབ་པའི་ཕྱིར། །ཕོ་ཉ་སྤྲུལ་དང་ཡང་སྤྲུལ་བསང་ཞིང་མཆོད། །ཁྱད་པར་ཁྱེད་དང་མཐུན་པའི་དམ་རྫས་ནི། །དམ་ཤིང་དགྲ་སྟ་རུ་མཚོན་ཤེལ་དཀར་ཕྲེང་། །དར་གྱི་ལྡ་ལྡི་རྒྱལ་མཚན་འཕན་འཕུར་དང་། །གོ་ཁྲབ་སྤྱན་གཟིགས་སྣ་ཚོགས་སྤྲིན་ལྟར་གཏིབ། །དུད་འགྲོ་རྐང་བཞིའི་ཚོགས་ནི་ཀྱི་ལི་ལི། །བྱ་རིགས་འདབ་ཆགས་ཚོགས་ནི་ཐིབས་སེ་ཐེབ། །ཟ་འོག་མཛེས་པའི་གུར་ཕུབ་ཤ་ར་ར། །རཀྟ་ཁྲག་གི་རྒྱ་མཚོ་ཁྱིལ་ལི་ལི། །གསེར་སྐྱེམས་ཕུད་རྒོད་བཏུང་བ་མེ་རེ་རེ། །བཤོས་གཙང་ཞལ་ཟས་གཏོར་ཆེན་སྤུངས་སེ་སྤུང་། །མི་རྐང་མཆོག་གི་གླིང་བུ་དི་རི་རི། །སྒྲ་སྙན་གླུ་གར་ཕེབ་རྡོབ་ཅང་ཏེའུ། །པི་ཝཾ་རྒྱུད་མང་ཆ་ལང་ལ་སོགས་པ། །སྤྱན་གཟིགས་སྣ་ཚོགས་རྫ་ལྟར་སྤུངས་པ་འདིས། །དགྲ་ལྷ་ཆེན་པོ་འཁོར་དང་བཅས་པ་མཆོད། །དེ་ལྟར་བསང་མཆོད་ཕུལ་བའི་བྱིན་རླབས་ཀྱིས། །ཁྱོད་ནི་སྔོན་ཚེ་མ་ལ་ཡ་རྩེ་དང་། །བམ་རི་ཐོད་མཁར་འབར་བའི་གཞལ་ཡས་ནས། །རྟ་མཆོག་རོལ་བ་ལག་ན་རྡོ་རྗེ་ཡིས། །དབང་བསྐུར་དམ་བཏགས་གསང་བའི་གཉན་དུ་བསྐོས། །བར་དུ་སློབ་དཔོན་པདྨ་འབྱུང་གནས་ལ། །རང་རྟགས་སྲོག་གི་སྙིང་པོ་མངོན་དུ་ཕུལ། །བསྟན་པ་སྲུང་ཞིང་བསྟན་འཛིན་སྐྱོང་བ་དང་། །ཅི་བགྱིའི་བཀའ་ཉན་སྒྲུབ་པར་ཁས་བླངས་ཤིང་། །དེ་འོག་སོ་ཟུར་ཉང་དང་གནུབ་ཆེན་སོགས། །རིག་འཛིན་ཆེན་པོ་ཉི་མ་གྲགས་པ་ཡིས། །དམ་ཚིག་བསྒྲགས་ནས་དམ་ལ་བཞག་པའི་ཚེ། །སངས་རྒྱས་བསྟན་པ་སྲུང་བར་ཞལ་བཞེས་པའི། །དགྲ་ལྷ་སྐུ་ལྔ་ཡབ་ཡུམ་མཐུ་ཆེན་རྣམས། །ད་ལྟ་སྙིགས་མ་ལྔ་བདོའི་ཡང་མཐའ་འདིར། །སྔོན་གྱི་ཐུགས་དམ་གཉན་པོ་མ་གཡེལ་བར། །བདག་ཅག་བསང་མཆོད་ཕུལ་བའི་བྱིན་རླབས་ཀྱིས། །དམ་ཆོས་སྒྲུབ་ལ་བར་དུ་གཅོད་པའི་བགེགས། །ནད་དང་གནོད་པ་མ་ལུས་ཞི་བ་དང་། །ཚེ་བསོད་དཔལ་འབྱོར་སྙན་གྲགས་ལོངས་སྤྱོད་རྒྱས། །ཆབ་སྲིད་འཁོར་འབངས་ཡོན་ཏན་ལེགས་པའི་ཚོགས། །གོང་ནས་གོང་དུ་འཕེལ་བའི་ཕྲིན་ལས་མཛོད། །ཁྱད་པར་རྒྱལ་དབང་པདྨ་ཀ་ར་ཡི། །བཤད་དང་སྒྲུབ་པའི་བསྟན་པ་རིན་པོ་ཆེ། །ཡངས་པའི་ཐ་གྲུ་ཀུན་ཏུ་རྒྱས་པར་མཛོད། །རྣལ་འབྱོར་བདག་ལ་འཚེ་བའི་དམ་སྲིའི་དཔུང་། །མི་དང་མི་མིན་རྒྱ་འདྲེ་འབྱུང་པོའི་རིགས། །ཕ་རོལ་བྱད་མ་རྦད་འདྲེ་རྦོད་གཏོང་དང་། །ངན་སྨྲས་དུག་སྦྱོར་བསམ་ངན་དུག་གཡོས་མཁན། །ནག་ཕྱོགས་ཀླ་ཀློའི་སྡེ་རིས་དཔུང་ཚོགས་རྣམས། །དུས་མཐའི་མེ་ཡིས་རྩ་སྦུར་བསྲེགས་པ་བཞིན། །ད་ལྟ་ཉིད་དུ་སྒྲོལ་བའི་ཕྲིན་ལས་མཛོད། །ཅེས་རྒྱལ་ཆེན་སྐུ་ལྔའི་བསང་མཆོད་འདི་ཉིད། རྫོགས་སྤྲུལ་ལྔ་བར་འབོད་པ་ཐུབ་བསྟན་ཆོས་ཀྱི་རྡོ་རྗེས་བྲིས་པ་དགེའོ། །