སྐུ་ཡི་རྒྱལ་པོའི་བསང་མཆོད་ནི།
ཧཱུྃ། རིན་ཆེན་ཤེལ་གྱི་སྐུ་མཁར་རྩེ་དགུ་ནས། །མཐུ་སྟོབས་དབང་ཕྱུག་དགྲ་ལྷའི་རྒྱལ་པོ་ནི། །རྣམ་པར་སྣང་མཛད་ཡེ་ཤེས་རོལ་བ་ལས། །སྐུ་ཡི་རྒྱལ་པོ་དགྲ་བཅོམ་གཞོན་ནུའི་ཚུལ། །སྐུ་མདོག་དཀར་གསལ་འོད་ཟེར་ཕྱོགས་བཅུར་འཕྲོ། །ཤིན་ཏུ་མཛེས་པ་ཞི་འཛུམ་སྒེག་པའི་ཉམས། །ཞལ་གཅིག་ཕྱག་གཉིས་ལྷུང་བཟེད་མཁར་གསིལ་བསྣམས། །རབ་མཛེས་ལེ་བརྒན་མདོག་ཅན་སྣམ་སྦྱར་ལ། །རིན་ཆེན་གསེར་གྱི་པ་ཊའི་ཀུན་ནས་མཛེས། །བེེཌཱུརྱ་ཡི་མདོག་ཅན་མཐང་གོས་ལ། །གསེར་མདོག་སྐེད་ཆིངས་སག་ལྷམ་ཡུ་རིང་གསོལ། །ཆིབས་སུ་མི་བཟད་གླང་ཆེན་སྨྱོན་པ་ཆིབས། །གཡོན་དུ་ཡུམ་ཆེན་བདུད་མོ་རོ་ལངས་མ། །དར་དཀར་གོས་གསོལ་དམ་ཤིང་བྷནྡྷ་བསྣམས། །གཡས་སུ་བློན་པོ་བྱ་ཁྲི་མིག་གཅིག་པ། །ཕྱག་གཉིས་རྡོ་རྗེ་འཕེན་ཤིང་རྟ་སྔོན་ཆིབས། །མདུན་དུ་སྤྲུལ་པ་དགྲ་བཅོམ་གཞོན་ནུའི་ཚུལ། །སྐུ་ལ་ཆོས་གོས་ངུག་སྨྲིག་མདོག་ཅན་གསོལ། །ཕྱག་གཡས་གསེག་ཤང་གསེར་གྱི་སྤུ་གྲི་བསྣམས། །ཕྱོགས་བཞིར་རྒྱལ་མཚན་བཞི་དང་ཡུམ་མཆོག་བཞི། །བློན་པོ་རྣམ་བཞི་སྤྲུལ་པ་རྣམ་བཞི་སོགས། །ཕྱི་རོལ་ལྷ་སྲིན་སྡེ་བརྒྱད་འཁོར་ཚོགས་ནི། །ཉི་མའི་ཟེར་གྱི་རྡུལ་ལྟར་བསམ་མི་ཁྱབ། །འཁོར་བཅས་བསང་གི་མགྲོན་ལ་སྤྱན་འདྲེན་གཤེགས། །རབ་ཏུ་གུས་པའི་སྒོ་ནས་ཕྱག་འཚལ་ལོ། །ཁྱེད་ལ་དགྱེས་པའི་མཆོད་པ་འབུལ་བ་ནི། །རི་རབ་གླིང་བཞི་གླིང་ཕྲན་གསེར་གྱི་རི། །རོལ་བའི་མཚོ་བདུན་མཐའ་ཡི་རྒྱ་མཚོ་དང་། །ལྕགས་རི་མུ་ཁྱུད་ཉི་ཟླ་གཟའ་སྐར་བཀྲ། །རྒྱལ་སྲིད་སྣ་བདུན་བཀྲ་ཤིས་རྫས་རྟགས་བརྒྱད། །དཔག་བསམ་ཤིང་ཆེན་ཡན་ལག་བརྒྱད་ལྡན་མཚོ། །འདོད་འབྱུང་གཏེར་བུམ་མ་རྨོས་ལོ་ཏོག་དང་། །ནོར་བུ་བསམ་འཕེལ་ནོར་འཛིན་ནེའུ་ལེ་རྣམས། །རིན་ཆེན་སྣ་ཚོགས་ལས་གྲུབ་གཞལ་ཡས་ཁང་། །སྨྱུག་རྒོད་ལོ་རྒྱས་རྒྱལ་མཚན་རྣམ་དགུ་སོགས། །དམ་ཤིང་དགྲ་སྟ་ཤེལ་དཀར་ཕྲེང་བ་དང་། །མཁར་གསིལ་ལྷུང་བཟེད་བེ་ཅོན་ཀཱ་པ་ལ། །ཁྱད་པར་ཕྱེ་མར་འོ་སྐོལ་དར་ཟབ་དང་། །རིན་ཆེན་སྣ་ལྔ་འབྲུ་དང་སྨན་སྣ་སོགས། །ཤུག་པ་འོམ་བུ་མཁན་དཀར་བ་ལུ་དང་། །སྟག་པ་ལ་སོགས་བདུད་རྩི་ཅན་གྱི་ཤིང་། །དྲི་ཞིམ་ཤིང་སྣའི་ཚོགས་དང་ལྷན་ཅིག་ཏུ། །བསྲེགས་པའི་དུད་སྤྲིན་ལྷ་ལམ་ཁྱབ་པ་འདིས། །སྐུ་ཡི་རྒྱལ་ཆེན་འཁོར་བཅས་བསང་ཞིང་མཆོད། །ཐུགས་ཀྱི་རྒྱལ་ཆེན་འཁོར་བཅས་བསང་ཞིང་མཆོད། །ཡོན་ཏན་རྒྱལ་ཆེན་འཁོར་བཅས་བསང་ཞིང་མཆོད། །གསུང་གི་རྒྱལ་ཆེན་འཁོར་བཅས་བསང་ཞིང་མཆོད། །ཕྲིན་ལས་རྒྱལ་ཆེན་འཁོར་བཅས་བསང་ཞིང་མཆོད། །རང་རང་སྤྲུལ་པའི་ཚོགས་རྣམས་བསང་ཞིང་མཆོད། །འཁོར་གྱི་རུ་འདྲེན་སྡེ་བཞི་བསང་ཞིང་མཆོད། །དེ་ལྟར་བསང་ཞིང་མཆོད་པའི་བྱིན་རླབས་ཀྱིས། །རྒྱལ་བསྟན་སྤྱི་དང་ཁྱད་པར་སྔ་འགྱུར་གྱི། །བསྟན་པ་རིན་ཆེན་ཕྱོགས་བཅུར་དར་ཞིང་རྒྱས། །བསྟན་འཛིན་སྐྱེས་བུའི་སྐུ་ཚེ་རབ་བརྟན་ཞིང་། །འཁོར་འབངས་བུ་སློབ་མངའ་ཐང་རྒྱས་པ་དང་། །ཆོས་འཁོར་འདི་ལ་རྟག་ཏུ་སྲུང་སྐྱོབ་མཛོད། །རྒྱལ་ཁམས་ཀུན་ཏུ་བདེ་ཞིང་སྐྱིད་པ་དང་། །བདག་ཅག་མི་ནོར་འཁོར་དང་བཅས་པ་ལ། །གནོད་ཅིང་འཚེ་བར་བྱེད་པའི་དགྲ་བགེགས་རྣམས། །ད་ལྟ་ཉིད་དུ་སྒྲོལ་བའི་ཕྲིན་ལས་མཛོད། །གཞི་བྱེས་ལམ་གསུམ་གང་ན་སྡད་ཀྱང་རུང་། །ཆོས་མཐུན་བསམ་པ་ཡིད་བཞིན་སྒྲུབ་པ་དང་། །བྱང་ཆུབ་ལམ་ལ་བར་དུ་གཅོད་པའི་གེགས། །ཐམས་ཅད་མིང་ཙམ་མེད་པར་ཞི་ནས་ཀྱང་། །མཐུན་རྐྱེན་ལེགས་ཚོགས་གོང་ནས་གོང་འཕེལ་ཤོག །མདོར་ན་བསམ་དོན་ཡིད་བཞིན་འགྲུབ་ནས་ཀྱང་། །རྣམ་བཞིའི་ཕྲིན་ལས་མཐའ་དག་བསྒྲུབ་ཏུ་གསོལ། །ཅེས་པ་འདིའང་རྫོགས་སྤྲུལ་ལྔ་བས་སོ། །