དྲེགས་པའི་སྡེ་དཔོན་སུམ་ཅུའི་བསང་མཆོད།
ཧཱུྃ་བྷྱོཿ འཇིག་རྟེན་མཆོད་བསྟོད་དཀྱིལ་འཁོར་ལ་གནས་པའི། །འཇིགས་བྱེད་ཧེ་རུ་ཀ་དཔལ་བཀའ་སྡོད་ཆེ། །འཇིགས་རུང་བཟོད་པར་དཀའ་བའི་ལང་ཚོ་ཅན། །འཇིག་རྟེན་དབང་ཕྱུག་མ་ཧཱ་དེ་ཝ་སོགས། །འཁོར་བཅས་བསང་གི་མགྲོན་ལ་གཤེགས་སུ་གསོལ། །མ་ཧཱ་དེ་ཝ་མཐིང་ནག་སེང་གེ་ཆིབས། །ཨུ་མ་དེ་ཝ་མཐིང་ནག་གླང་ཆེན་ཆིབས། །ཡ་མ་ར་ཛ་མདོག་ནག་ཆུ་གླང་ཆིབས། །གཤིན་རྗེ་ཟ་བྱེད་ནག་མོ་ཆུ་གླང་ཆིབས། །སྐོས་རྗེ་བྲང་དཀར་ནག་པོ་རྟ་ནག་ཆིབས། །རེ་ཏི་ནག་མོ་བོང་བུ་དམར་གྭ་ཆིབས། །སྲིན་པོ་ནག་པོ་གཡུ་འབྲུག་སྔོན་མོ་ཆིབས། །སྦལ་མགོ་ཁྲག་མིག་དམར་མོ་རྔ་མོ་ཆིབས། །ཡཀྴ་མེ་དབལ་མཐིང་ནག་སྟག་མོ་ཆིབས། །གནོད་སྦྱིན་མོན་མོ་ནག་མོ་ཕག་རྒོད་ཆིབས། །གཟའ་བདུད་དུད་ཁ་གཡུ་འབྲུག་སྔོན་མོ་ཆིབས། །ཐོག་གི་བུ་ཡུག་དམར་མོ་གཡུ་འབྲུག་ཆིབས། །ཀླུ་བདུད་ནག་པོ་མགོ་དགུ་ཆུ་སྲིན་ཆིབས། །ཡཀྴ་ནག་མོ་རུས་སྦལ་ནག་པོ་ཆིབས། །ཡར་ལྷ་ཤམ་པོ་ལྷ་གཡག་དཀར་པོ་ཆིབས། །གནམ་ཐེལ་དཀར་པོ་ཅང་ཤེས་རྟ་དཀར་ཆིབས། །སྤྱི་བདུད་གུ་རུམ་རྩེ་ནི་རྟ་དཀར་ཆིབས། །སྲིད་པའི་རྒྱལ་མོ་ནག་མོ་གཡུ་འབྲུག་ཆིབས། །ཨེ་ཀ་ཛ་ཏི་ནག་མོ་དྲེལ་རྟ་ཆིབས། །དཔལ་ལྡན་ནག་པོ་མགྱོགས་བྱེད་གསོ་བྱ་ཆིབས། །རྡོ་རྗེ་བདུད་འདུལ་དམར་ནག་དྲེལ་རྟ་ཆིབས། །བྲག་བཙན་སྲོག་ཟན་དམར་པོ་རྟ་དམར་ཆིབས། །བཙན་འགོང་ཡམ་ཤུད་དམར་པོ་རྟ་དམར་ཆིབས། །བི་ན་ཡ་ཀ་ནག་པོ་རྟ་ནག་ཆིབས། །མུ་སྟེགས་ཀ་ལ་ནག་པོ་སེང་གེ་ཆིབས། །དམུ་བདུད་ནག་པོ་བཀྲག་མེད་རྟ་ནག་ཆིབས། །ལྷ་ཆེན་ཚངས་པ་དཀར་པོ་སེང་གེ་ཆིབས། །རྒྱལ་པོ་བེ་ཧར་དཀར་པོ་གླང་ཆེན་ཆིབས། །སྐུ་ལྷ་གསང་བ་དཀར་གསལ་ར་སྐྱེས་ཆིབས། །མ་ཧཱ་ཀ་ལ་མཐིང་ནག་རྟ་ནག་ཆིབས། །རང་རང་འཁོར་དང་སྤྲུལ་པ་ཡང་སྤྲུལ་བཅས། །ཉི་མའི་ཟེར་གྱི་རྡུལ་ལྟར་བསམ་མི་ཁྱབ། །ཁྱེད་རྣམས་མཆོད་པར་འོས་པའི་དམ་རྫས་ནི། །ཏིང་འཛིན་སྔགས་དང་ཕྱག་རྒྱས་བྱིན་བརླབས་པའི། །འདོད་ཡོན་ལྔ་ལྡན་ལོངས་སྤྱོད་བསམ་མི་ཁྱབ། །མི་ཟད་ནམ་མཁའ་མཛོད་ཀྱི་འཁོར་ལོ་ཅན། །ཡེ་ཤེས་བདུད་རྩིའི་བསང་གི་མཆོད་པ་འདིས། །དྲེགས་པའི་སྡེ་དཔོན་ཆེན་པོ་འཁོར་བཅས་བསང་། །དེ་ལྟར་བསང་མཆོད་ཕུལ་བའི་བྱིན་རླབས་ཀྱིས། །དེང་ནས་བྱང་ཆུབ་སྙིང་པོ་མ་ཐོབ་པར། །ལྷ་མཆོག་རྣམས་དང་མི་འབྲལ་འགྲོགས་ནས་ཀྱང་། །སྲུང་སྐྱོབ་བྱིན་རླབས་རྟག་ཏུ་མ་གཡེལ་ཞིག །ཁྱད་པར་རྒྱལ་དབང་པདྨ་ཀ་ར་ཡི། །བཤད་དང་སྒྲུབ་པའི་བསྟན་པ་རིན་པོ་ཆེ། །མི་ནུབ་སྲིད་མཐའི་བར་དུ་འཕེལ་བ་དང་། །བསྟན་འཛིན་སྐྱེས་བུའི་སྐུ་ཚེ་རབ་བརྟན་ཅིང་། །མཛད་ཕྲིན་ཡར་ངོའི་ཟླ་ལྟར་འཕེལ་བར་མཛོད། །མདོར་ན་མཐུན་རྐྱེན་དབང་པོ་ཁྱེད་རྣམས་ཀྱིས། །བདག་ཅག་ལེགས་པ་སྤྲོད་ལ་ཉེས་པ་བསྣོལ། །འདོད་་པའི་འབྲས་བུ་གང་དང་གང་བཅོལ་བ། །བསམ་དོན་ཡིད་བཞིན་འགྲུབ་པའི་ཕྲིན་ལས་མཛོད། །ཅེས་པ་འདི་ཡང་རྫོགས་སྤྲུལ་ལྔ་བ་ཆོས་ཀྱི་རྡོ་རྗེས་བྲིས་པ་དགེ །