དུར་ཁྲོད་ལྷ་མོའི་བསང་མཆོད།
བྷྱོཿ ཆོས་དབྱིངས་ངང་ལས་སྙིང་རྗེ་ཁྲོས་པའི་སྐུ། །དུས་གསུམ་རྒྱལ་བའི་བསྟན་པ་སྲུང་མཛད་ཅིང་། །དུར་ཁྲོད་བརྒྱད་དང་ཉེར་བཞིའི་ཡུལ་སྐྱོང་བའི། །སྲིན་མོའི་གཟུགས་འཆང་དགྲ་བོའི་གཤེད་མ་སྟེ། །དུར་ཁྲོད་གནས་ཉུལ་ཞིང་སྐྱོང་མ་མོ་ཆེ། །སྐུ་མདོག་སྨུག་ནག་རྔམ་ཞིང་ཁྲོས་པའི་སྐུ། །ཞལ་གསུམ་ཕྱག་གཉིས་གཡས་པས་དགྲ་སྙིང་བཟུང་། །གཡོན་པས་སྲིད་གསུམ་གསལ་བའི་མེ་ལོང་འཛིན། །དར་དཀར་སྟོད་གཡོག་སྟག་ལྤགས་ཤམ་ཐབས་ཅན། །མི་ལྤགས་གཡང་གཞི་རློན་པ་ལྡིང་སྟབས་གྱོན། །རལ་བ་ཁམ་ནག་རྣ་བ་དུང་ལུང་འཁྲོལ། །ཐོད་སྐམ་དབུ་རྒྱན་ཐོད་རློན་དོ་ཤལ་ཅན། །རུས་པའི་ཕྲེང་བ་སེ་རལ་ཁ་འཕྱང་ཞིང་། །གཡས་བསྐུམ་གཡོན་བརྐྱང་རོ་ཡི་གདན་ལ་འགྱིང་། །འཁོར་དུ་མ་མོ་དཀར་སེར་དམར་ལྗང་བཞི། །སྙིང་དང་མེ་ལོང་འཛིན་པ་གར་མཛད་ཅིང་། །གནས་གསུམ་མཁའ་འགྲོ་ཡོངས་ཀྱི་ཚོགས་དང་བཅས། །སྤྲུལ་པའི་ཤྭ་ན་ཝ་སྤྱང་དྲེད་དང་བཅས། །དམ་ཚིག་དབང་གིས་གནས་འདིར་བྱོན་ནས་ཀྱང་། །རྟོག་མེད་བམ་གྱི་གདན་ལ་བཞུགས་སུ་གསོལ། །དང་བའི་ཡིད་ཀྱི་སྒོ་ནས་ཕྱག་འཚལ་ལོ། །ཕྱི་ནང་གསང་བའི་མཆོད་པ་བླ་ན་མེད། །ཐུགས་དང་འགལ་བ་ཐམས་ཅད་མཐོལ་ལོ་བཤགས། །ཁྱད་པར་ཁྱེད་དང་མཐུན་པའི་དམ་རྫས་ནི། །བདུད་རྩི་ཤིང་ལྔའི་ཚོགས་རྣམས་ལྷན་ཅིག་ཏུ། །ཕྱེ་མར་འོ་སྐོལ་ཇ་ཆང་བཏུང་བའི་རིགས། །སྨན་དང་རཀྟ་བྷ་ལིང་གཏོར་མའི་ཚོགས། །དཀར་གསུམ་མངར་གསུམ་དར་སྣ་རིན་ཆེན་ལྔ། །ག་བུར་ཙན་དན་དཀར་དམར་ཨ་ཀ་རུ། །བསྲེགས་པའི་དུད་སྤྲིན་མཁའ་དབྱིངས་ཁྱབ་པ་འདིས། །དཔལ་ལྡན་དུར་ཁྲོད་ལྷ་མོ་ཆེན་མོ་བསང་། །འཁོར་གྱི་མ་མོ་ཆེན་མོ་རྣམ་བཞི་བསང་། །གནས་གསུམ་མཁའ་འགྲོ་ཡོངས་ཀྱི་ཚོགས་རྣམས་བསང་། །དུར་ཁྲོད་ཞིང་སྐྱོང་ཕོ་མོ་ལས་བྱེད་བསང་། །སྤྲུལ་པའི་ཤྭ་ན་ཝ་སྐྱེས་དྲེད་སོགས་བསང་། །བསང་ངོ་མཆོད་དོ་ཐུགས་དམ་ཉེར་དགོངས་ལ། །སྔ་འགྱུར་རྡོ་རྗེ་ཐེག་པའི་བསྟན་པ་འདི། །ཕྱོགས་བཅུའི་མཐའ་དབུས་ཀུན་ཏུ་རྒྱས་པ་དང་། །བསྟན་པ་འཛིན་པའི་སྐྱེས་བུའི་ཚོགས་རྣམས་ཀྱང་། །སྐུ་ཚེ་མཛད་ཕྲིན་ཡར་ངོའི་ཟླ་བ་ལྟར། །གོང་ནས་གོང་དུ་འཕེལ་ཤིང་རྒྱས་པར་མཛོད། །བཤད་དང་སྒྲུབ་པའི་བསྟན་པ་རིན་པོ་ཆེ། །མི་ནུབ་སྲིད་མཐའི་བར་དུ་འཕེལ་བ་དང་། །བདག་ལ་སྡང་བའི་བྱད་ཕུར་རྦོད་གཏོང་ནི། །ཐལ་བར་བརླག་པའི་ཕྲིན་ལས་འགྲུབ་པར་མཛོད། །རྟག་ཏུ་སྡང་ཞིང་གདུག་པའི་སེམས་འཆང་བ། །ངན་སྨྲས་དུག་མཚོན་བསམ་སྦྱོར་བྱེད་པ་དང་། །བྱད་ཕུར་རྦད་གཏོང་བཏང་བའི་ཕྲ་མ་མཁན། །ལྷ་མཆོག་ཁྲོ་རྒྱལ་ཁྱོད་ཀྱིས་ཟ་སྐལ་གྱིས། །ཚེ་སྲོག་བླ་རྐུས་མདངས་འཕྲོག་བྱེད་པ་དང་། །ནད་རིམ་ཕུང་ཁྲོལ་སློང་བའི་ཚོགས་རྣམས་ཀུན། །གདུལ་དཀའ་འདུལ་བའི་གཤེད་པོ་ཁྱོད་ཉིད་ཀྱིས། །མིང་ཙམ་མེད་པར་བརླག་པའི་ཕྲིན་ལས་མཛོད། །མདོར་ན་བྱང་ཆུབ་སྒྲུབ་པའི་གང་ཟག་ལ། །བར་དུ་གཅོད་པའི་དགྲ་བགེགས་མཐའ་དག་ཀུན། །སྔོན་གྱི་ཐ་ཚིག་གཉན་པོ་རྗེས་དགོངས་ལ། །སྐད་ཅིག་ཙམ་གྱིས་ཞི་བའི་ཕྲིན་ལས་མཛོད། །རྫོགས་སྤྲུལ་ལྔ་བ་ཐུབ་བསྟན་ཆོས་ཀྱི་རྡོ་རྗེས་བྲིས་པའོ། །