ལས་གཤིན་བསང་མཆོད་ནི།
ཨེེཿ ལྷོ་ཕྱོགས་འཇིགས་རུང་མུན་པའི་ཀློང་དཀྱིལ་ན། །ཐོད་པ་ལྕགས་ཀྱི་གྲོང་ཁྱེར་ཆེན་པོ་རུ། །བསྐལ་བ་མེ་རླུང་འཚུབས་མའི་ཀློང་དཀྱིལ་ན། །སྲིན་གྱི་མ་ཧེ་སེར་ནག་ཁྲི་སྟེང་དུ། །ཡཿལས་འཆི་བདག་ལས་ཀྱི་གཤིན་རྗེ་གཤེད། །སྐུ་མདོག་སྨུག་ནག་ཤིན་ཏུ་ཁྲོས་པའི་སྐུ། །བཟོད་པར་དཀའ་བའི་ལང་ཚོ་གཏུམ་ལ་རྔམས། །ཞལ་གཅིག་ཕྱག་གཉིས་སྤྱན་གསུམ་སྡང་མིག་བསྒྲད། །མཆེ་བ་གཙིགས་ཤིང་ཞལ་གདངས་ལྗགས་འདྲིལ་བར། །ང་རོའི་གད་མོས་ས་གསུམ་གཡོ་བར་བྱེད། །སྨིན་མ་ཨོག་ཚོམ་མེ་འབར་ཡ་ལ་ལ། །རལ་བའི་གསེབ་ནས་གཤིན་རྗེའི་ཕོ་ཉར་འགྱེད། །ཕྱག་གཡས་ཐོད་པའི་དབྱུག་པ་མཁའ་ལ་ཕྱར། །གཡོན་པས་ཐོད་པ་དམར་གྱིས་བཀང་བ་འཛིན། །མི་ལྤགས་སྟོད་གཡོག་སྟག་ལྤགས་ཤམ་ཐབས་ཅན། །རུས་པའི་ཕྲེང་བར་ཐོད་རློན་དོ་ཤལ་ཅན། །དཔལ་དང་དུར་ཁྲོད་རོལ་བའི་ཆས་ཀྱིས་སྤྲས། །སྲིན་གྱི་མ་ཧེ་སེར་ནག་ཁྲོས་པའི་སྟེང་། །ཞབས་གཉིས་གཡས་བརྐྱང་གཡོན་བསྐུམ་རོལ་བའི་སྟབས། །གཡོན་དུ་ཡུམ་ཆེན་མ་མོ་དུག་ཧྲུལ་མ། །ནག་མོ་མི་ལྤགས་རློན་པའི་གོས་གྱོན་ཞིང་། །གཡས་པས་འཁོར་ལོ་གཡོན་པས་ཐོད་ཁྲག་འཛིན། །འཁོར་དུ་གཤིན་རྗེ་སྡེ་དཔོན་ཆེན་པོ་བརྒྱད། །རང་རང་ཡུམ་བཅས་ཡབ་རྣམས་ཐོད་དབྱུག་ཞགས། །ཡུམ་རྣམས་སྤུ་གྲི་ཐོག་ནས་གཅེར་བུའི་ཚུལ། །ལོ་ཟླ་ཞག་གཤེད་གཤིན་རྗེའི་དམག་ཚོགས་རྣམས། །ཉི་ཟེར་རྡུལ་ལྟར་བསམ་གྱིས་མི་ཁྱབ་པར། །འཁོར་བཅས་སྐད་ཅིག་གནས་འདིར་གཤེགས་སུ་གསོལ། །དགྱེས་པར་བཞུགས་ལ་གུས་པས་ཕྱག་འཚལ་ལོ། །རྩ་བརྒྱད་སྟོང་སྦྱར་པཉྩ་ཨ་མྲྀ་ཏ། །ཉམས་པ་བསྒྲལ་བའི་རཀྟ་དམར་གྱི་མཚོ། །དཔལ་གྱི་གཏོར་མ་བརྗིད་ལྡན་བཤོས་བུ་དང་། །ཨརྒྷཾ་ལ་སོགས་ཕྱི་ཡི་མཆོད་པའི་སྤྲིན། །དམར་ཆེན་མཆོད་ཡོན་ལ་སོགས་ནང་མཆོད་དང་། །གྷ་ཎ་ཙཀྲ་གསང་བའི་མཆོད་པ་དང་། །ཁྱད་པར་ཡེ་ཤེས་བདུད་རྩི་བསང་གི་སྤྲིན། །འདོད་དགུའི་གཏེར་མཛོད་དངོས་གྲུབ་ཀུན་ལྡན་འདིས། །འཆི་བདག་ལས་ཀྱི་གཤིན་རྗེ་ཡབ་ཡུམ་བསང་། །གཤིན་རྗེའི་སྡེ་དཔོན་མིག་དམར་ཡབ་ཡུམ་བསང་། །སྡེ་དཔོན་ཆེན་པོ་ཕྱ་སང་ཡབ་ཡུམ་བསང་། །སྡེ་དཔོན་ཡ་བ་ཏི་ནི་ཡབ་ཡུམ་བསང་། །སྡེ་དཔོན་ཆེན་པོ་ཏེལ་བ་ཡབ་ཡུམ་བསང་། །སྡེ་དཔོན་ཆེན་པོ་ཆོས་རྒྱལ་ཡབ་ཡུམ་བསང་། །སྡེ་དཔོན་ཆེན་པོ་རལ་བ་ཚར་དགུ་བསང་། །སྡེ་དཔོན་ཆེན་པོ་རྨིག་པ་ཡབ་ཡུམ་བསང་། །སྡེ་དཔོན་ཨ་ཝ་གླ་མགོ་ཡབ་ཡུམ་བསང་། །གཤིན་རྗེ་གཤེད་པོའི་དམག་ཚོགས་ཡབ་ཡུམ་བསང་། །བསང་ངོ་མཆོད་དོ་ཐུགས་དམ་རྗེས་དགོངས་ལ། །འཇམ་དཔལ་བཤེས་གཉེན་སངས་རྒྱས་ཡེ་ཤེས་དང་། །རྒྱལ་བ་གཉིས་པ་པདྨ་ཀ་ར་ཡིས། །སྤྱན་སྔར་ཞལ་བཞེས་ཐ་ཚིག་རྗེས་དགོངས་ལ། །གྲུབ་པའི་དབང་ཕྱུག་པདྨ་རིག་འཛིན་གྱི། །སྐུ་ཕྲེང་གསེར་རིའི་ཕྲེང་བ་རིམ་བྱོན་གྱི། །ཆོས་སྲིད་མི་ནུབ་འཕེལ་ཞིང་རྒྱས་པ་དང་། །བརྒྱུད་འཛིན་བུ་སློབ་འདུས་པའི་ཚོགས་རྣམས་ཀུན། །ཁྱོད་ཀྱིས་སྲུང་སྐྱོབ་སྡོང་གྲོགས་མ་གཡེལ་བར། །དམ་སྲི་བསྟན་དགྲ་བར་ཆད་རྡུལ་དུ་རློག །དབུ་འཕང་གཉན་པོ་དགུང་དུ་བསྟོད་པ་དང་། །སྲིད་གསུམ་བརྟན་གཡོའི་དྭངས་བཅུད་ཀུན་བསྡུས་ནས། །ངོ་མཚར་སྙན་པའི་འབྲུག་སྒྲ་ཁྱོད་ཀྱིས་སྒྲོགས། །ཏིང་འཛིན་ཟབ་མོའི་ཉམས་རྟོགས་འཕེལ་བ་དང་། །ཚེ་དཔལ་བསོད་ནམས་དབང་ཐང་རྒྱས་པ་དང་། །གང་ཞིག་བསྟན་པ་འཛིན་པའི་སྐྱེས་བུ་རྣམས། །ལྷ་མཆོག་ཁྱོད་ཀྱི་མགོན་དང་སྐྱབས་ཡིན་པས། །བསྐལ་ངན་སྙིགས་མ་ལྔ་ཡི་ཡང་མཐའ་འདིར། །བསྟན་འཛིན་སྐྱེས་བུའི་གང་ཟག་ཚོགས་རྣམས་ལ། །ཁྱོད་ཀྱིས་གཡར་དམ་གཉན་པོ་གཡེལ་གྱུར་ན། །བདག་ཅག་རྣམས་ཀྱི་རེ་ལྟོས་སུ་ལ་འཆང་། །ནག་ཕྱོགས་བསམ་སྦྱོར་ངན་པའི་སྡེ་ཚོགས་རྣམས། །ནམ་ཡང་རྒྱུ་བའི་གོ་སྐབས་མེད་པར་མཛོད། །བདག་གི་རེ་འབྲས་ཡིད་ལ་གང་ཡོད་པ། །འབད་མེད་ལྷུན་གྱིས་འགྲུབ་པར་མཛད་དུ་གསོལ། །རྫོགས་སྤྲུལ་ལྔ་བ་ཐུབ་བསྟན་ཆོས་ཀྱི་རྡོ་རྗེས་བྲིས་པ་དགེ །