ཟངས་རི་བཙན་རྒོད་བསང་མཆོད།
ཧྲཱིཿ དབང་གི་ལྷ་མཆོག་རྟ་མཆོག་ཧེ་རུ་ཀཿ དབང་ཆེན་བཀའ་སྡོད་མ་རུང་གཤེད་པོ་ཆེ། །དབང་མདོག་བཟོད་པར་དཀའ་བའི་ལང་ཚོ་ཅན། །དབང་ཆེན་བཙན་རྒོད་འབར་བ་མ་རུང་པ། །སྐུ་མདོག་དམར་པོ་བསྐལ་བའི་མེ་ལྟར་འབར། །ཞལ་གཅིག་ཕྱག་གཉིས་ཕྱག་གཡས་མདུང་དར་བསྣམས། །གཡོན་པས་བཙན་ཞགས་ནག་པོ་དགྲ་ལ་འཕེན། །བཙན་རྟ་དམར་པོ་གློག་དམར་འཁྱག་འདྲ་ཆིབས། །འཁོར་དུ་བཙན་རྒོད་སུམ་བརྒྱ་དྲུག་བཅུས་བསྐོར། །འབྲུག་སྟོང་ལྡིར་ཞིང་བསྐལ་བའི་གློག་དམར་འཁྱུག །གནམ་ལྕགས་ཐོག་དང་སེར་ཆེན་ཤ་ར་ར། །མི་སྡུག་རྟགས་དང་ཆོ་འཕྲུལ་སྣ་ཚོགས་སྟོན། །ཇི་སྟར་མཁའ་ལས་གློག་ཕྲེང་འཁྱུག་པ་བཞིན། །བདག་གི་བསང་གི་འགྲོན་ལ་གཤེགས་སུ་གསོལ། །དགྱེས་པར་བཞུགས་ལ་གུས་པས་ཕྱག་འཚལ་ལོ། །མེ་ཐབ་སངས་རྒྱས་སྤྱན་མའི་རང་བཞིན་ལ། །གོས་དཀར་མོ་ཡི་ངོ་བོ་མེ་འབར་ནང་། །རྒྱ་ཤུག་ཙནྡན་དཀར་དམར་ཨ་ཀ་རུ། །ཤུག་པ་བ་ལུ་འོམ་བུ་མཁན་དཀར་དང་། །སྟག་པ་ལ་སོགས་དྲི་ཞིམ་ཤིང་སྣའི་ཚོགས། །བཟང་དྲུག་ག་བུར་སྨན་གྱི་རིག་བྱེད་དང་། །དར་ཟབ་གསེར་གཡུ་རིན་ཆེན་སྣ་ལྔ་སོགས། །ཡེ་ཤེས་གསལ་བྱེད་འབར་བའི་མེ་ནང་བསྲེགས། །སྒྲོལ་མའི་ངོ་བོ་རླུང་གི་རབ་བསྐྱོད་ནས། །མ་མཱ་ཀི་ཡི་ཆབ་ཀྱིས་བྲན་པ་ཡིས། །ནམ་མཁའ་དབྱིངས་ཕྱུག་མ་ཡིས་ཀུན་ནས་ཁྱབ། །དྲི་ཞིམ་བདུག་སྤོས་བསང་གི་མཆོད་པ་འདིས། །ཟངས་རི་བཙན་རྒོད་འབར་བ་སྤུན་བདུན་བསང་། །འཁོར་གྱི་བཙན་རྒོད་སུམ་བརྒྱ་དྲུག་ཅུ་བསང་། །དེ་ལྟར་བསང་མཆོད་ཕུལ་བའི་བྱིན་རླབས་ཀྱིས། །བདག་ཅག་དཔོན་སློབ་འཁོར་དང་བཅས་པ་རྣམས། །དབུ་འཕང་གཉན་པོ་ཆོས་ཀྱི་དབྱིངས་སུ་བསྟོད། །དྲེགས་པ་ཡོངས་ཀྱི་ཆེ་བཙན་བསང་ཞིང་མཆོད། །སྣང་སྲིད་དྲེགས་པ་ཡོངས་ཀྱི་མངའ་བདག་པོ། །བར་སྣང་ཁམས་ལ་དབང་བསྒྱུར་མཐུ་བོ་ཆེ། །བདག་ཅག་གདུང་བའི་ང་རོས་འབོད་པའི་ཚེ། །ཁྱོད་ཀྱི་ཐུགས་རྗེས་རྟག་ཏུ་མ་གཡེལ་ཞིག །ལུས་དང་གྲིབ་བཞིན་མི་འབྲལ་འགྲོགས་ནས་ཀྱང་། །ནད་རིམས་འཁྲུགས་རྩོད་རྒྱལ་པོའི་ཆད་པ་དང། །འབྱུང་བཞིའི་དགྲ་དང་ཐོག་སེར་བྱད་སྟེམས་སོགས། །མི་མཐུན་ཀུན་ཞི་ཚེ་དཔལ་རྒྱས་པ་དང་། །སྲིད་གསུམ་དབང་བསྡུས་དགྲ་བགེགས་ཚར་ཆོད་ཅིག །བསྟན་དང་དེར་འཛིན་སྐྱོང་བའི་གང་ཟག་རྣམས། །སྲུང་སྐྱོབས་སྡོང་གྲོགས་ཕྲིན་ལས་མ་གཡེལ་ཞིག །ཅེས་པའང་རྫོགས་སྤྲུལ་ལྔ་པ་ཐུབ་བསྟན་ཆོས་ཀྱི་རྡོ་རྗེས་བྲིས་པ་དགེ །