གཉན་ཆེན་རྒྱལ་བ་ཐོད་དཀར་བསང་མཆོད།
ཧཱུྃ། སྔོན་ཚེ་པདྨའི་བཀའ་ཉན་མཐུ་བོ་ཆེ། །སྲིད་གསུམ་དྲེགས་པ་ཡོངས་ཀྱི་མངའ་བདག་པོ། །དམ་ཉམས་གདུལ་དཀའ་འདུལ་བའི་གཤེད་པོ་ཆེ། །བར་སྣང་གཉན་གྱི་རྒྱལ་པོའི་སྐུར་བཞེངས་པ། །རྒྱལ་བ་ཐོད་དཀར་སྐུ་མདོག་དཀར་ལ་དམར། །ཞལ་གཅིག་ཕྱག་གཉིས་སྤྱན་གསུམ་ཨམ་གཙིགས་བསྡམས། །གཡས་པས་མདུང་དར་གཡོན་པས་ཞགས་པ་བསྣམས། །སྐུ་ལ་བེར་ཆེན་དབང་གི་མདོག་ཅན་གསོལ། །འཁོར་གསུམ་སྟག་རལ་གཡས་ལ་གཟིག་ཤུབས་གཡོན། །དར་དཀར་ལ་ཐོད་རྒོད་ཀྱི་ལྡེམ་འཕྲུ་ཅན། །ཅང་ཤེས་རྐྱང་ཞུར་རླུང་གི་རྩལ་ལྡན་ཆིབས། །ཇི་ལྟར་མཁའ་ལས་ཆར་སྤྲིན་གཏིབ་པ་བཞིན། །སྐད་ཅིག་འདིར་གཤེགས་བཞུགས་ལ་དངོས་གྲུབ་སྩོལ། །སྟོང་གསུམ་རབ་འབྱམས་གང་བའི་ཞིང་ཁམས་ན། །དངོས་འབྱོར་ཡིད་སྤྲུལ་མཆོད་པའི་སྤྲིན་ཕུང་ནི། །ཀུན་བཟང་མཆོད་པའི་སྤྲིན་ལྟར་འཕྲོ་བ་འདི། །བློ་ཡིས་བླངས་ནས་གུས་པས་འབུལ་གྱིས་བཞེས། །ཁྱེད་ལ་དགྱེས་པར་བྱེད་པའི་མཐུན་རྫས་ནི། །ཨ་ག་རུ་དང་ཙནྡན་དཀར་དམར་དང་། །གཡུ་ཤུག་གསེར་ཤིང་དུང་ཤིང་བ་ལུ་དང་། །མཆོད་ཤིང་ལ་སོགས་དྲི་ཞིམ་ཤིང་སྣ་དང་། །དཀར་གསུམ་མངར་གསུམ་ཤ་སྣ་ཁྲག་སྣའི་ཚོགས། །ཕྱེ་མར་འོ་སྐོལ་རིན་ཆེན་སྣ་ཚོགས་དང་། །བཟང་དྲུག་སྨན་སྣ་བསྲེགས་པའི་དུད་པའི་སྤྲིན། །གཉན་ཆེན་རྒྱལ་བ་ཐོད་དཀར་བསང་ཞིང་མཆོད། །དགྱེས་སྡེ་ཡུམ་ཆེན་ཚོགས་རྣམས་བསང་ཞིང་མཆོད། །ཡབ་ཡུམ་སྲས་དང་བཙུན་མོ་བསང་ཞིང་མཆོད། །འཁོར་བཅས་ལྷ་སྲིན་སྡེ་བརྒྱད་བསང་ཞིང་མཆོད། །བསང་ངོ་མཆོད་དོ་ཐུགས་དམ་དགྱེས་པར་བསྐང་། །དཔལ་ལྡན་བླ་མའི་སྐུ་ཚེ་བརྟན་པ་དང་། །འཁོར་ཚོགས་བུ་སློབ་མངའ་ཐང་དར་རྒྱས་ཤིང་། །ཕྱི་ནང་གསང་བའི་བར་ཆད་ཀུན་ཞི་ནས། །དམ་ཉམས་དགྲ་བོ་མ་ལུས་ཆམ་ལ་ཕོབས། །གང་འདོད་ཕྲིན་ལས་ལྷུན་གྱིས་འགྲུབ་པར་མཛོད། །ཅེས་པའང་རྫོགས་སྤྲུལ་ལྔ་པ་ཐུབ་བསྟན་ཆོས་ཀྱི་རྡོ་རྗེས་བྲིས་པའོ། །