སྨན་སྲུང་རྡོ་རྗེ་བདུད་འདུལ་བསང་མཆོད་ནི།

ཧཱུྃ། བཅོམ་ལྡན་བདེ་གཤེགས་སྨན་པའི་རྒྱལ་པོ་ཡི། །སྔོན་ཚེ་གནས་མཆོག་སྨན་གྱི་ནགས་ཚལ་ནས། །གསོ་རིག་སྨན་གྱི་རྒྱུད་རྣམས་བཤད་པའི་ཚེ། །སྨན་གྱི་སྲུང་མར་ཞལ་བཞེས་དམ་ཚིག་ཅན། །མཐུ་སྟོབས་དབང་ཕྱུག་རྡོ་རྗེ་བདུད་འདུལ་ནི། །འཁོར་བཅས་བསང་གི་མགྲོན་ལ་གཤེགས་སུ་གསོལ། །མདུན་གྱི་ནམ་མཁའ་རིན་ཆེན་ཁང་བཟང་དབུས། །སྣ་ཚོགས་རིན་པོ་ཆེ་ཡི་ཁྲི་སྟེང་ན། །པདྨ་ཉི་ཟླ་བརྩེགས་པའི་གདན་གྱི་དབུས། །ཞང་བློན་ཆེན་པོ་རྡོ་རྗེ་བདུད་འདུལ་ནི། །སྐུ་མདོག་མཐིང་ནག་འོད་ཟེར་ཕྱོགས་བཅུར་འཕྲོ། །ཁྲོ་འཛུམ་སྨ་ར་དམར་སེར་མེ་ལྟར་འབར། །ཞལ་གཅིག་ཕྱག་གཉིས་གཡས་པས་ནོར་བུ་འཛིན། །གཡོན་པས་རིན་ཆེན་གཏེར་གྱི་སྒྲོམ་བུ་བསྣམས། །སྐུ་ལ་ཟ་འོག་བེར་ཆེན་དགུ་བརྩེགས་གསོལ། །ཐོད་སྐམ་དབུ་རྒྱན་རལ་བ་ཐོར་ཚུགས་ཅན། །ཞབས་གཉིས་རྒྱལ་པོ་རོལ་བའི་སྟབས་ཀྱིས་བཞུགས། །གནོད་སྦྱིན་དབང་པོ་འཁོར་དང་བཅས་པ་ལ། །དྲི་ཞིམ་བསང་དུད་ལྷ་ལམ་ཡོངས་ཁྱབ་པ། །རྒྱལ་སྲིད་སྣ་བདུན་བཀྲ་ཤིས་རྫས་རྟགས་བརྒྱད། །གཏེར་གྱི་བུམ་བཟང་མ་རྨོས་ལོ་ཏོག་དང་། །འདོད་འཇོའི་བ་མོ་དཔག་བསམ་ལྗོན་པའི་ཤིང་། །སྐྱེད་མོས་ཚལ་དང་རྫིང་བུ་སྣ་ཚོགས་པར། །ཀ་ལ་པིང་ཀ་ཁྲུང་ཁྲུང་མཐིང་རིལ་དང་། །གསེར་གྱི་རྡོ་རྗེའི་གཟུགས་ཅན་རི་སྐེགས་དང་། །ནེ་ཙོ་ཁུ་བྱུག་དྲིལ་བུའི་སྒྲ་ཅན་སོགས། །སྙན་པའི་དབྱངས་ཀྱིས་ཕྱོགས་བཅུར་ཀུན་ཏུ་མཛེས། །མདོར་ན་རྣམ་མང་སྲིད་ཞིའི་འབྱོར་བ་ཡི། །མཐུན་པའི་དམ་རྫས་རྫ་ལྟར་བཀྲམ་ལགས་ན། །གང་བཞེད་འདོད་རྒུར་འཆར་བའི་མཆོད་པའི་སྤྲིན། །སྔགས་དང་ཕྱག་རྒྱའི་བྱིན་གྱིས་བརླབས་པ་འདི། །བསང་ངོ་མཆོད་དོ་ཐུགས་དམ་གཉན་པོ་བསྐང་། །དགྱེས་ཤིང་ཚིམ་ནས་བདག་ལ་སྡོང་གྲོགས་མཛོད། །སྟོང་གསུམ་རབ་འབྱམས་རྒྱ་མཚོའི་ཞིང་ཁམས་ན། །ཚེ་དང་བསོད་ནམས་དཔལ་འབྱོར་སྟོབས་ཤུགས་དང་། །ཁབ་ལེན་རྡོ་ཡིས་ལྕགས་ཕྱེ་བསྡུས་པ་བཞིན། །སྒྲུབ་ལ་དངོས་གྲུབ་ཆར་ལྟར་འབེབས་པར་མཛོད། །ཅེས་པ་འདི་ཡང་རྫོགས་སྤྲུལ་ལྔ་པས་སོ། །