ན་ག་རཀྴའི་བསང་མཆོད་ནི།

ཕཻཾ། རང་བཞིན་ཆོས་ཀྱི་དབྱིངས་ལས་མ་གཡོས་ཀྱང་། །རང་སྣང་མ་འགགས་རོལ་བའི་ལྷ་གཅིག་པུ། །རང་བྱུང་རང་ཤར་ཆུ་ཟླའི་རོལ་གར་ཅན། །རང་བཞིན་དབྱིངས་ནས་བསང་གི་མགྲོན་ལ་གཤེགས། །རང་གི་མདུན་དུ་རི་རབ་ངོས་ཡངས་ལ། །དུག་གི་རྒྱ་མཚོ་འཁྱིལ་བའི་ཀློང་དཀྱིལ་ན། །དཔལ་ལྡན་ཁྲོ་རྒྱལ་ན་ག་རཀྴ་ནི། །སྨུག་ནག་དབུ་དགུ་ཕྱག་ནི་བཅོ་བརྒྱད་དེ། །གཡས་དགུ་གྲི་གུག་གཡོན་དགུ་སྦྲུལ་ཞགས་བསྣམས། །སྐུ་སྨད་སྦྲུལ་མཇུག་རྒྱ་མཚོའི་ནང་དུ་འཁྱིལ། །ཀླུ་གཉན་ས་བདག་ཕོ་མོ་འབུམ་ཁྲིའི་ཚོགས། །བཀའ་ཉན་ལས་བྱེད་གུས་པའི་ཚུལ་གྱིས་འདུད། །དམ་ཚིག་དབང་གི་སྤྱན་འདྲེན་གཤེགས་སུ་གསོལ། །རིན་ཆེན་ལྔ་དང་དར་ཟབ་སྨན་སྣ་ཚོགས། །ཕྱེ་མར་འོ་སྐོལ་དཀར་གསུམ་མངར་གསུམ་དང་། །དྲི་ཞིམ་སྤོས་སྣ་བསྲེག་པའི་དུད་པའི་སྤྲིན། །འདོད་ཡོན་ལྔ་ལྡན་མཆོད་པའི་སྤྲིན་འཕྲོ་དང་། །དུག་གསུམ་དགྲ་བགེགས་བསྒྲལ་བ་ལས་བྱུང་བའི། །ཤ་ཁྲག་རུས་པ་དོན་སྙིང་ནང་རོལ་ཚོགས། །དབང་ལྔའི་མེ་ཏོག་དུག་གི་གཏོར་མ་བཅས། །རཏྣ་བརྡར་བའི་གཡུ་སྐྱེམས་ཕུད་རྒོད་དང། །མཐུན་པའི་དམ་རྫས་མ་ཚང་མེད་པ་ཀུན། །དངོས་སུ་འབྱོར་དང་ཡིད་ཀྱི་རྣམ་འཕྲུལ་པའི། །ནམ་མཁའི་ཁམས་ཀུན་ཡོངས་སུ་འབུལ་ལགས་ན། །ཐུགས་དམ་གཉན་པོ་ཆོས་ཀྱི་དབྱིངས་སུ་བསྐང་། །མདོ་སྔགས་བསྟན་པ་ཕྱོགས་བཅུར་རྒྱས་པ་དང་། །དཔལ་ལྡན་བླ་མའི་སྐུ་ཚེ་རབ་བརྟན་ཅིང་། །བྱང་ཆུབ་སྒྲུབ་ལ་བར་དུ་གཅོད་པ་ཡི། །མི་མཐུན་རྐྱེན་ཞི་ཚེ་བསོད་དཔལ་འབྱོར་རྒྱས། །ཁམས་གསུམ་ཆེ་བཙན་སྐྱེ་འགྲོ་ཕོ་མོ་ཀུན། །དབང་དུ་བསྡུས་ཤིག་མི་ནོར་ཕྱུགས་འཕེལ་བ། །བདག་ལ་བརྡོ་བའི་དགྲ་བགེགས་མཐའ་དག་དང་། །ཁྱད་པར་བྱད་མ་རྦོད་གཏོང་ཕྲ་མ་མཁན། །ཕྲིན་ལས་དྲག་པོས་ལས་ཀྱི་མཐའ་བསྡུས་ལ། །ལོ་ཟླ་ཙམ་ཡང་མ་བཞག་ད་ལྟ་སྒྲོལ། །ཉེར་འཚེའི་རྒུད་པ་མཐའ་དག་ཞི་བ་དང་། །དལ་ཡམས་ཚ་གྲང་འཐབ་པའི་ནད་རྣམས་ཀུན། །དམིགས་མེད་ཆོས་དབྱིངས་ངང་དུ་ཞི་བར་མཛོད། །བདག་ཅག་རེ་བ་ཡིད་བཞིན་བསྐང་བ་དང་། །བསམ་དོན་ཆོས་བཞིན་འགྲུབ་པའི་ཕྲིན་ལས་མཛོད། །རྡོ་རྗེ་ཆོས་སྐྱོང་རྣམས་ཀྱི་བསང་རྒྱས་པ་ཕྱོགས་གཅིག་ཏུ་བསྒྲིགས་ཏེ་བཀོད་པ་འདི་ནི་རྫོགས་སྤྲུལ་ལྔ་པ་ཐུབ་བསྟན་ཆོས་ཀྱི་རྡོ་རྗེས་བྲིས་པ་དགེ་ལེགས་སུ་གྱུར་ཅིག། །།