ལེགས་ལྡན་བསང་མཆོད་འབྲིང་པོ་བདུད་ལས་རྣམ་རྒྱལ་བཞུགས་སོ།།
ཧཱུྃ། སྔོན་ཚེ་དཔལ་ཆེན་རྡོ་རྗེ་སྲིན་པོ་ཡིས། །བདུད་ཀྱི་སྡེ་དཔོན་རུ་ཏྲ་བསྒྲལ་བའི་ཚེ། །དབང་བསྐུར་དམ་ལ་བཞག་པའི་མཐུ་བོ་ཆེ། །ལེགས་ལྡན་རྡོ་རྗེ་སྲིན་པོ་ཚོགས་ཀྱི་བདག །ཀུན་ཏུ་དགྱེས་བྱེད་ཀྲོ་ཏི་ཤྭ་རི་མ། །བཀའ་ཉན་ལས་བྱེད་དམ་ཅན་རྒྱ་མཚོའི་ཚོགས། །འཁོར་བཅས་ཐུགས་དམ་དབང་གིས་གནས་འདིར་གཤེགས། །རྡོ་རྗེ་བྲག་ཆེན་པད་མ་ཉི་ཟླ་དང་། །རྟོག་མེད་བམ་གྱི་ཁྲི་ལ་བཞུགས་སུ་གསོལ། །འབྲུ་སྣ་བྱེ་མར་རིན་ཆེན་སྣ་ལྔ་དང་། །དར་ཟབ་ཇ་ཆང་ཕུད་རྒོད་བཏུང་བའི་རིགས། །དྲི་ཞིམ་ཤིང་ལྔའི་ཚོགས་དང་ལྷན་ཅིག་ཏུ། །བསྲེགས་པའི་དུད་སྤྲིན་ནམ་མཁའི་ཁྱོན་བཀང་བ། །དཔལ་མགོན་ལེགས་ལྡན་ལྕམ་དྲལ་འཁོར་བཅས་བསང་། །ཁྱོད་ལ་བསང་མཆོད་ཕུལ་བའི་བྱིན་རླབས་ཀྱིས། །སྔོན་ཚེ་ཁྲག་འཐུང་སྤྱན་སྔར་ཁས་བླང་བཞིན། །བསྟན་པ་རིན་ཆེན་ཕྱོགས་བཅུར་རྒྱས་པ་དང་། །བརྒྱུད་འཛིན་བུ་སློབ་ཡར་ངོའི་ཟླ་ལྟར་རྒྱས། །དུས་འཁྲུགས་ཀླ་ཀློའི་འཚེ་བ་བདུད་ཀྱི་རིགས། །ཕྱི་ནང་གསང་བའི་བར་ཆད་ཞི་བ་དང་། །བཅོལ་བའི་ཕྲིན་ལས་ཡིད་བཞིན་འགྲུབ་པར་མཛོད། །ཅེས་པའང་རྫོགས་སྤྲུལ་ལྔ་པ་ཐུབ་བསྟན་ཆོས་ཀྱི་རྡོ་རྗེས་སྨྲས་པའོ། །