མ་མོ་སྔགས་ཀྱི་སྲུང་མའི་བསང་མཆོད་དངོས་གྲུབ་འབྱུང་གནས་ཞེས་བྱ་བ་བཞུགས་སོ།།

བྷྱོཿ ཆོས་དབྱིངས་ཀུན་ཏུ་བཟང་མོའི་ཀློང་། །མཁའ་འགྲོའི་ཚོགས་ལ་དབང་བསྒྱུར་མ། །སྣང་སྲིད་མཁའ་འགྲོ་ཡོངས་ཀྱི་གཙོ། །དཔལ་ལྡན་དབྱིངས་ཀྱི་རྒྱལ་མོ་ནི། །སྔགས་ཀྱི་སྲུང་མ་རལ་གཅིག་མ། །འཇིགས་རུང་ཆར་སྤྲིན་ལྟ་བུའི་མདོག །མཐིང་གི་རལ་བ་གྱེན་དུ་བསྒྲེངས། །སྤྱན་གཅིག་སྐྱེ་འགྲོ་ཀུན་ལ་གཟིགས། །ཚེམས་གཅིག་ཉམས་པའི་སྲོག་ལ་རྔམས། །ཕྱག་གཡས་ཞིང་དབྱུག་ཀླད་ལ་བསྐོར། །གཡོན་པས་དགྲ་སྙིང་ཞལ་དུ་གསོལ། །གནས་དང་ཡུལ་གྱི་མཁའ་འགྲོ་མ། །ཞིང་སྔགས་ལྷན་ཅིག་སྐྱེས་པ་ཡི། །མཚོ་རྒྱལ་མཁའ་འགྲོའི་ཚོགས་དང་བཅས། །བླ་མེད་བསྟན་པ་སྲུང་བ་དང་། །གདུག་པའི་དགྲ་བགེགས་བསྒྲལ་བའི་ཕྱིར། །ཕཊ་དང་ཕཻཾ་གྱི་སྒྲ་དང་བཅས། །སྐད་ཅིག་ཙམ་གྱིས་འདིར་གཤེགས་ལ། །དགྱེས་ཤིང་བརྟན་པར་བཞུགས་སུ་གསོལ། །ཆོས་རྣམས་མ་ལུས་བསྐྱེད་པའི་ཡུམ། །བདེ་ཆེན་ཀུན་ཏུ་བཟང་མོ་དང་། །དོན་དམ་སྐྱེ་མེད་ངོ་བོ་རུ། །དབྱེར་མེད་རོ་གཅིག་མཇལ་བས་འདུད། །རང་སེམས་ཡེ་ནས་ལྷ་སྐུ་དང་། །གཅིག་ལས་ཐ་དད་མ་གྲུབ་ཀྱང་། །སྣང་ཆའི་རྟེན་འབྲེལ་སྒྱུ་མའི་ངོར། །སོ་སོར་འཛིན་པ་བཤགས་པར་བགྱི། །ཡེ་ནས་ཡེ་ཤེས་ངོ་བོ་རུ། །མཆོད་བྱ་མཆོད་བྱེད་མ་དམིགས་ཀྱང་། །འཁྲུལ་བཅས་ཀུན་རྫོབ་བདེན་པའི་ངོར། །ཆུ་ཟླ་ལྟ་བུའི་ཚུལ་གྱིས་ནི། །དངོས་སུ་བཤམས་དང་ཡིད་ཀྱིས་སྤྲུལ། །སྤྱི་དང་ཁྱད་པར་མཆོད་པའི་སྤྲིན། །ནམ་མཁའ་མཛོད་ཀྱི་ལོངས་སྤྱོད་འདིས། །སྔགས་ཀྱི་སྲུང་མ་འཁོར་བཅས་མཆོད། །ཁྱད་པར་དྲི་ཞིམ་ཤིང་སྣའི་ཚོགས། །དམ་རྫས་བཟའ་བཅའ་བཏུང་བའི་རིགས། །འབར་བའི་མེ་ལ་བསྲེགས་པ་ཡི། །དུད་སྤྲིན་ལྷ་ལམ་ཡོངས་ཁྱབ་པ། །འོད་ཟེར་སྣ་ཚོགས་ཕྱོགས་བཅུར་འཕྲོ། །བཀྲ་ཤིས་རྫས་རྟགས་རྒྱལ་སྲིད་བདུན། །འདོད་ཡོན་ལྷ་མོའི་ཟེར་ཐག་ཕྲེང་། །མཚར་སྡུག་ཡིད་འོང་མཆོད་པའི་ཚོགས། །སྔགས་ཀྱི་སྲུང་མ་རལ་ཅིག་མ། །ཡེ་ཤེས་ལས་དང་འཇིག་རྟེན་གྱི། །བདུན་འབུམ་མཁའ་འགྲོའི་ཚོགས་བཅས་ལ། །དག་བྱེད་བསང་གི་མཆོད་པ་འབུལ། །དེ་ལྟར་བསང་མཆོད་ཕུལ་བའི་མཐུས། །གསང་སྔགས་བསྟན་པ་གཉན་པོ་འདི། །རྒྱལ་ཁམས་ཀུན་ཏུ་རྒྱས་པ་དང་། །དགོན་གནས་ཆོས་འཁོར་ཆེན་པོ་འདི། །རྟག་ཏུ་སྲུང་ཞིང་སྐྱོང་བར་མཛོད། །བརྒྱུད་འཛིན་དཔོན་སློབ་བདག་ཅག་རྣམས། །ཀ་དག་གདོད་མའི་གཞི་དབྱིངས་ལ། །ཉེར་འཚེའི་དྲི་མས་མ་གོས་ཀྱང་། །ཀུན་རྫོབ་སྒྱུ་མ་འཁྲུལ་བའི་ངོར། །རང་རྩལ་ཆོ་འཕྲུལ་ཤར་བ་ལས། །སྔོན་གྱི་ལས་དང་འཕྲལ་གྱི་རྐྱེན། །མི་མཐུན་གནོད་པ་ཞི་བར་མཛོད། །འགོང་པོ་སྤུན་དགུའི་སྡེ་རིས་དང་། །ཁྱད་པར་རྒྱ་འདྲེ་འབྱུང་པོའི་ཚོགས། །བྱད་ཕུར་རྦོད་གཏོང་རིག་སྔགས་མཁན། །མི་མཐུན་ཕྱོགས་རྣམས་ཀུན་བཅོམ་ཞིང་། །ཕྲིན་ལས་ལྷུན་གྱིས་འགྲུབ་པར་མཛོད། །ཅེས་མ་མོ་སྔགས་ཀྱི་སྲུང་མའི་བསང་མཆོད་དངོས་གྲུབ་འབྱུང་གནས་ཞེས་བྱ་བ་རྫོགས་སྤྲུལ་ལྔ་པར་འབོད་པ་ཐུབ་བསྟན་ཆོས་ཀྱི་རྡོ་རྗེས་སྨྲས་པའོ། །དགེའོ། །