ཚེ་རིང་མཆེད་ལྔའི་བསང་མཆོད་བདུད་རྩིའི་སྤྲིན་ཕུང་བཞུགས་སོ།།

རྃ་ཡྃ་ཁྃ། བསང་རྫས་འདོད་དགུའི་ལོངས་སྤྱོད་ཀུན་ཏུ་བཟང་པོའི་མཆོད་སྤྲིན་ལྟ་བུར་གྱུར། ཨོཾ་ཨཱཿཧཱུྃ། ཨེ་མ་ངོ་མཚར་རྨད་ཀྱི་ཆོས། །འབྱུང་ལྔ་དག་པའི་དབྱིངས་ཆེན་པོར། །ཕུང་ལྔ་རྣམ་དག་བསང་གི་རྫས། །ངོ་བོ་སྟོང་ཡང་རང་བཞིན་གསལ། །མཚན་ཉིད་ཕུན་ཚོགས་དཔལ་ཡོན་ལྡན། །ཀུན་ཏུ་བཟང་པོའི་མཆོད་པའི་སྤྲིན། །འཁོར་འདས་གནས་ཀུན་ཡོངས་ཁྱབ་གྱུར། །སྥ་ར་ཎ་ཁཾ། ནམ་མཁའ་མཛོད་ཀྱི་སྔགས་རྒྱས་བརླབས། ཀྱཻ། སྣང་སྲིད་འཁོར་འདས་ཆོས་སོ་ཅོག །ཡོད་མེད་རྟག་ཆད་ལས་འདས་དབྱིངས། །གཟུང་འཛིན་སྤྲོས་པ་ཀུན་བྲལ་ཡང་། །དེ་ལྟར་མ་རྟོགས་སེམས་ཅན་ལ། །ལྷ་འདྲེ་གཉིས་སུ་སྣང་བའི་གཟུགས། །མཁའ་ཟླ་ཆུ་སྣོད་ཇི་སྙེད་དུ། །ཤར་བའི་བསང་མགྲོན་མཆོག་དམན་ཀུན། །སྟོན་མོའི་ཁྲོམ་ཚོགས་འདུས་བཞིན་གྱུར། །ཀྱཻ། གསེར་འཛིན་དགའ་མའི་ལྟོར་འཁྲུངས་པའི། །རྩི་ཤིང་དྲི་ཞིམ་བཅུད་ལྡན་རིགས། །ཕྱེ་མར་ཟས་ཕུད་སྐྱེམས་དང་བཅས། །དམ་ཚིག་མེ་དབྱིངས་གོས་དཀར་མོས། །སྦྱངས་པའི་དྭངས་མ་འཁོར་འདས་ཀྱི། །མཆོད་རྫས་དཔག་མེད་དུད་སྤྲིན་འདིས། །མཆོག་གསུམ་རྩ་གསུམ་རྒྱ་མཚོ་བསང་། །མཁའ་འགྲོ་ཆོས་སྐྱོང་དམ་ཅན་བསང་། །གནས་ཡུལ་དུར་ཁྲོད་སྐྱོང་རྣམས་བསང་། །ཁྱད་པར་བྷོ་ཊའི་ཟོ་དོར་བསང་། །ཇོ་མོ་བཀྲ་ཤིས་ཚེ་རིང་བསང་། །ལྷ་མོ་མཐིང་གི་ཞལ་བཟང་བསང་། །ལྷ་མོ་ཅོད་པཎ་མགྲིན་བཟང་བསང་། །ལྷ་མོ་མི་གཡོ་གླང་བཟང་བསང་། །ལྷ་མོ་གཏལ་དཀར་འགྲོ་བཟང་བསང་། །སྤྲུལ་འཁོར་ཕོ་ཉའི་ཚོགས་ཀུན་བསང་། །ཕྱི་ནང་གསང་བའི་མཆོད་ཚོགས་འབུལ། །འགལ་འཁྲུལ་ཉེས་ཚོགས་མཐོལ་ལོ་བཤགས། །གཞི་ལ་སྡོད་ན་ཁ་མགོན་མཛོད། །བྱེས་བགྲོད་ཚེ་ན་ལམ་ལྷ་མཛོད། །ཅི་བསམ་དོན་འགྲུབ་དངོས་གྲུབ་སྩོལ། །དུས་གསུམ་དགེ་བའི་བཀྲ་ཤིས་ཤོག །ཅེས་པ་འདི་ཡང་བླ་མ་བསྟན་སྐྱོང་གིས་བསྐུལ་ངོར་རྡོ་བླས་བྲིས་པ་ཡོངས་སུ་དགེ་བར་གྱུར་ཅིག །