བཙན་གྱི་བསང་མཆོད་ཉུང་ངུར་བསྡུས་པ་བཞུགས་སོ།།

རྃ་ཡྃ་ཁྃ་གིས་སྦྱངས། ཨོཾ་ཨཱཿཧཱུྃ་གིས་བདུད་རྩི་སྤེལ། ཧྲཱིཿ ལྗོན་ཤིང་བྲག་རི་པདྨའི་ཚལ། །ཁམས་གསུམ་སྐྱེ་འགྲོའི་ཚེ་སྲོག་བདག །འབར་བ་སྤུན་བདུན་འཁོར་བཅས་རྣམས། །སྐུ་མདོག་དམར་པོ་འོད་དུ་འབར། །ཁྲོ་འཛུམ་འགྱིང་བག་ཨམ་གཙིགས་བསྡམས། །གོ་ཁྲབ་བེར་སོགས་དཔའ་བོའི་ཆས། །ཕྱག་ན་ཞིང་བཅུ་བསྒྲལ་བའི་མཚོན། །མདུང་དམར་དང་ནི་ཙིཏྟ་བསྣམས། །མྱུར་མགྱོགས་རླུང་གི་རྟ་ལ་ཞོན། །སྟོང་གསུམ་སྐད་ཅིག་ཡུད་ཀྱིས་བསྐོར། །སྡེ་བརྒྱད་དྲེགས་པའི་ཚོགས་དང་བཅས། །པདྨ་ཐོད་ཕྲེང་བཀའ་བཞིན་དུ། །མ་གཡེལ་གནས་འདིར་སྤྱན་འདྲེན་གཤེགས། །བཛྲ་ས་མ་ཡཱ་ཛཿ ཁྱོད་ལ་མཆོད་པ་འབུལ་བ་ནི། །ཏིང་འཛིན་སྔགས་དང་ཕྱག་རྒྱ་ཡིས། །དངོས་འབྱོར་ཡིད་སྤྲུལ་མཆོད་པའི་ཚོགས། །མི་ཟད་ནམ་མཁའི་མཛོད་སྤྲུལ་འབུལ། །ཁྱད་པར་བཟང་ཤིང་སྨན་སྤོས་ཕུད། །ཕྱེ་མར་འབྲུ་སྣ་མཐུན་པའི་རྫས། །འབར་བའི་མེར་བསྲེགས་དུད་པའི་སྤྲིན། །ལྷ་ལམ་ཡོངས་ཁྱབ་བདུད་རྩིའི་ཆར། །དབང་པོའི་སྤྱོད་ཡུལ་ཚིམ་གྱུར་ཅིག །རྣལ་འབྱོར་བདག་ཅག་འཁོར་བཅས་ཀྱི། །འགལ་རྐྱེན་ཀུན་ཞི་མཐུན་རྐྱེན་བསྒྲུབ། །གསང་སྔགས་རྡོ་རྗེ་ཐེག་པ་འདི། །རྒྱ་མཚོའི་ཕ་མཐའ་ཚུན་ཆད་དུ། །ཁྱབ་པའི་ཕྲིན་ལས་ཁྱེད་ཀྱིས་མཛོད། །སྣོད་བཅུད་ཕྱུག་གཡང་བཀྲ་ཤིས་སྩོལ། །ཅེས་སྐལ་བྷ་བྷ་རས་བསྐུལ་ངོར་གཟའ་པ་སངས་དང་སྐར་མ་ཆུ་སྨད་འཛོམས་པའི་དུས་ཚེས་དགེ་བར་བྷ་བྷ་བཛྲས་སྨྲས་སོ། །དགེའོ། །བཀྲ་ཤིས།