གནོད་སྦྱིན་ཙིའུ་དམར་པོའི་བསང་མཆོད་ཉུང་བསྡུས་བཞུགས་སོ།།

རྃ་ཡྃ་ཁྃ། ཀྱཻ། ཉི་མ་ནུབ་ཕྱོགས་ཕ་ཀི་ན། །བཙན་ཡུལ་ཟངས་ཐང་དམར་པོ་ན། །དྲེགས་པ་ཀུན་གྱི་མངའ་བདག་པོ། །གནོད་སྦྱིན་ཆེན་པོ་ཡང་ལེ་བེར། །ཆེ་བཙན་རོལ་བ་རྐྱ་བདུན་ཚོགས། །མདོག་དམར་ཁྲོ་ཞིང་གཏུམ་པའི་ཆས། །ཕྱག་ན་བ་དན་ཞགས་པ་བསྣམས། །མྱུར་མགྱོགས་རླུང་གི་རྟ་ལ་ཞོན། །སྟོང་གསུམ་སྐད་ཅིག་ཉུལ་བར་བྱེད། །སྡེ་བརྒྱད་དྲེགས་པའི་ཚོགས་དང་བཅས། །པདྨ་དབང་གི་བཀའ་བཞིན་དུ། །མ་ཐོགས་མྱུར་དུ་ཚུར་བྱོན་ལ། །ཕྲིན་ལས་སྒྲུབ་ཕྱིར་བཞུགས་སུ་གསོལ། །ཏིང་འཛིན་སྔགས་དང་ཕྱག་རྒྱ་ཡིས། །དངོས་སུ་བཤམས་དང་ཡིད་ལས་སྤྲུལ། །མཆོད་སྤྲིན་བསམ་ཡས་ལྷུན་གྲུབ་པ། །ཡུམ་ཆེན་ན་བཟའ་དཀར་མོ་ཉིད། །གདོད་ནས་རྣམ་དག་འབྱུང་བའི་མེས། །དངོས་འཛིན་དྲི་མ་ཀུན་སྦྱངས་ནས། །དྭངས་མའི་མཆོད་སྤྲིན་རྒྱ་མཚོ་ཡིས། །སྟོང་གསུམ་ནམ་མཁའི་ཁམས་བཀང་ནས། །གནོད་སྦྱིན་ཆེན་པོ་འཁོར་བཅས་བསང་། །ཁྱད་པར་དམར་ཆེན་རྒྱ་མཚོར་བསྐྱིལ། །དབང་པོ་ལྔ་ཡི་མེ་ཏོག་དང་། །གསུར་ཆེན་སྤོས་ཀྱི་དུད་པའི་སྤྲིན། །ཞུན་ཆེན་མར་མེ་ཉི་ལྟར་འབར། །མཁྲིས་པའི་དྲི་ཆབ་མེ་རེ་རེ། །ཤ་ཁྲག་དམར་གཏོར་རི་ལྟར་སྤུང་། །བཙན་བྱ་དམར་པོ་གློག་ལྟར་འཁྱུགས། །བཙན་གྱི་ཁྱི་དམར་དཔའ་གཏུམ་རྒོད། །ཅང་ཤེས་རྟ་མཆོག་ལ་སོགས་པས། །གནོད་སྦྱིན་ཆེན་པོ་འཁོར་བཅས་བསང་། །ཐུགས་དམ་གཉན་པོ་བསྐང་ནས་ཀྱང་། །ཕོག་ཐུག་འགྲས་འགལ་མཐོལ་ལོ་བཤགས། །དེ་ལྟར་བསང་བའི་ཡོན་ཏན་གྱིས། །སྔ་འགྱུར་རྡོ་རྗེ་ཐེག་པ་ཡི། །བསྟན་དང་བསྟན་འཛིན་དར་རྒྱས་མཛོད། །རྒྱལ་ཁམས་མཐའ་དབུས་ཐམས་ཅད་དུ། །དུས་ཀྱི་རྒུད་པ་ཀུན་ཞི་ཞིང་། །དགེ་བཅུའི་ལེགས་ཚོགས་འཕེལ་བར་མཛོད། །དགྲ་འདྲེ་གདོན་གསུམ་བརླག་པ་དང་། །བཅོལ་བའི་ཕྲིན་ལས་འགྲུབ་པར་མཛོད། །ཅེས་པ་འདིའང་ཆུ་འབྲུག་ཟླ་བ་གསུམ་པའི་ཚེས་བཅུ་གཉིས་ཉིན་ལྷ་ལྡན་སྤྲུལ་པའི་གཙུག་ལག་ཁང་གི་ཉེ་ཆར་ལྷ་ཀླུའི་མཚོ་ཁར་ཆར་འབེབས་སྐབས་རྫོགས་སྤྲུལ་བཞི་བའི་སྐྱེ་སྲིད་ལྔ་པར་སྒྲོ་བཏགས་པ་པདྨ་ཐེག་མཆོག་བསྟན་འཛིན་གྱིས་བྲིས་པ་དགེ་ལེགས་སུ་གྱུར་ཅིག །དགེའོ། །བཀྲ་ཤིས།