རྟ་མགྲིན་དྲེགས་པ་ཟིལ་གནོན་ལས་བཀའ་སྲུང་ཆོས་རྒྱལ་སྐུ་ལྔའི་བསང་མཆོད་མདོར་བསྡུས་བཞུགས་སོ།།

ཕུད་དང་གཏོར་མ་གང་འབྱོར་བཤམས་ནས། ཨོཾ་ཨཱཿཧཱུྃ་གིས་བྱིན་གྱིས་བརླབས། ཧཱུྃ། སྐད་ཅིག་བདག་ཉིད་དཔའ་བོ་རྟ་མགྲིན་དཔལ། །སྐུ་མདོག་དམར་པོ་ཞལ་གཅིག་ཕྱག་བཞི་པ། །གྲི་ཐོད་ལྕགས་ཀྱུ་ཞགས་འཛིན་འདོར་ཐབས་འགྱིང་། །དུར་ཁྲོད་ཆས་རྫོགས་ཡུམ་བཅས་ལམ་གྱིས་གསལ། །གདོད་ནས་རྣམ་དག་ཆོས་སྐུའི་རོལ་བ་ལས། །ཕན་དང་གནོད་བྱེད་བྲལ་ཡང་གཉིས་འཛིན་རོལ། །འཇིག་རྟེན་དྲེགས་པའི་སྐུར་སྟོན་ཆོས་ཀྱི་རྒྱལ། །སྐུ་ལྔ་འཁོར་བཅས་བཛྲ་ས་མ་ཛཿ། །ཕྱི་ནང་མཆོད་སྤྲིན་ཀུན་བཟང་རོལ་བ་ལས། །ཡོངས་ཤར་མ་ཚང་མེད་དང་ཁྱད་པར་དུ། །ཉམས་པའི་དབང་ལྔ་ཤ་ཁྲག་རུས་པ་བཅས། །བསྟན་པ་བསྲུང་ཕྱིར་འབུལ་གྱིས་བཞེས་སུ་གསོལ། །སྣ་ཚོགས་ཤིང་སྣའི་དུད་སྤྲིན་བར་སྣང་གང་། །དྲི་ཞིམ་ཕུད་ཀྱི་དུད་པ་རྒྱ་ཆེན་པོས། །བཤད་སྒྲུབ་བསྟན་པའི་སྲུང་མ་མཐུ་རྩལ་ཅན། །བྲན་གཡོག་སྡེ་དཔོན་བཅས་པ་བསང་ངོ་མཆོད། །རབ་འབྱམས་ཆོས་སྐུའི་ངང་ལས་མཛད་པའི་འཕྲུལ། །ངེས་པ་ལྔ་ལྡན་ལོངས་སྤྱོད་རྫོགས་པའི་སྐུ། །བཅོམ་ལྡན་རྒྱལ་བ་རིགས་ལྔའི་རྣམ་རོལ་ལ། །དབྱེར་མེད་གུས་པ་ཆེན་པོས་བསྟོད་པར་བགྱི། །དེ་ལྟར་མཆོད་བསྟོད་ཕུལ་བའི་མཐུ་སྟོབས་ཀྱིས། །རྒྱལ་བསྟན་སྤྱི་དང་བྱེ་བྲག་སྔ་འགྱུར་ཐེག །མི་ཉམས་གོང་དུ་འཕེལ་ཞིང་དེར་འཛིན་གྱི། །འདུས་པའི་སྡེ་ཚོགས་དབྱར་མཚོ་དང་འགྲན་མཛོད། །བདག་ཅག་དཔོན་སློབ་འཁོར་དང་བཅས་པ་ཡི། །འགལ་རྐྱེན་ཞི་ཞིང་མཐུན་རྐྱེན་འབྱོར་ཚོགས་འཕེལ། །ཉིན་མཚན་དུས་དྲུག་མེལ་ཚེ་མི་གཡེལ་ཞིང་། །བསམ་དོན་ལྷུན་གྱིས་འགྲུབ་པར་མཛད་དུ་གསོལ། །ཞེས་ཕུལ་བས་བསང་མཆོད་སོགས་བྱའོ། །དེ་ལྟ་བུའི་བསང་མཆོད་ཅིག་བླ་མ་ནོར་བུ་རྒྱ་མཚོས་བསྐུལ་བ་ལ་བརྟེན་ནས། པདྨ་ཐེག་མཆོག་བསྟན་པའི་རྒྱལ་མཚན་གྱིས་སྦྱར་བའོ། །དགེའོ། ། ཤུབྷཾ། བཀྲ་ཤིས་ཤོག