སྡེ་དཔོན་སུམ་ཅུའི་བསང་མཆོད།

ཧཱུྃ། སྔོན་ཚེ་སློབ་དཔོན་ཤནྟིཾ་གརྦྷ་དང་། །པད་འབྱུང་གླང་ཆེན་དཔལ་གྱི་སེང་གེ་ཡི། །སྤྱན་སྔར་ཞལ་བཞེས་རྡོ་རྗེའི་ཐ་ཚིག་ཅན། །དྲེགས་པའི་སྡེ་དཔོན་ཆེན་པོ་སུམ་ཅུ་པོ། །རང་རང་འཁོར་གཡོག་སྤྲུལ་དང་ཡང་སྤྲུལ་བཅས། །འཁོར་བཅས་གློག་ལས་མྱུར་བའི་སྟོབས་ཀྱིས་གཤེགས། །དགྱེས་པའི་མཆོད་སྤྲིན་དམ་པ་འབུལ་བ་ནི། །ཕྱི་ནང་གསང་བ་བླ་མེད་མཆོད་པ་དང་། །ཁྱད་པར་དྲི་ཞིམ་བསང་གི་མཆོད་པའི་སྤྲིན། །དངོས་གྲུབ་ཀུན་འབྱུང་འདོད་དགུའི་གཏེར་དུ་འབུལ། །ཤ་སྣ་སྙིང་སྣ་དར་ནག་རུ་མཚོན་དང་། །བསམ་ཆོད་རལ་གྲི་ཕུབ་དང་འབིགས་བྱེད་མདུང་། །སྟག་རལ་གཟིག་ཤུབ་ཁྲབ་རྨོག་མེ་ལོང་སོགས། །ངོ་མཚར་རྨད་བྱུང་མཆོད་པའི་སྤྲིན་ཕུང་འདིས། །དྲེགས་པའི་སྡེ་དཔོན་སུམ་ཅུ་བསང་ཞིང་མཆོད། །རང་རང་བཙུན་མོ་སྲས་བཅས་བསང་ཞིང་མཆོད། །ལས་བྱེད་ཕོ་ཉའི་དམག་ཚོགས་བསང་ཞིང་མཆོད། །མཐུ་ཆེན་ཚོགས་རྣམས་བསང་ཞིང་མཆོད་པའི་མཐུས། །འཁོར་བཅས་ཐུགས་དམ་གཉན་པོ་བསྐང་གྱུར་ཅིག །ཐུགས་དང་འགལ་བ་ཐམས་ཅད་མཐོལ་ལོ་བཤགས། །བདག་ཅག་རྟག་ཏུ་ཁྱོད་ཀྱི་གྲོགས་མཛོད་ཅིག །བྱང་ཆུབ་སྒྲུབ་ལ་བར་དུ་གཅོད་པའི་བགེགས། །མིང་གི་ལྷག་མ་ཙམ་ཡང་མ་བཞག་ཅིག །ཆོས་འཁོར་འདི་ཡི་འདུས་པའི་ཚོགས་རྣམས་ལ། །ངན་སྨྲས་ཕྲ་མ་མཁན་གྱི་ཚོགས་རྣམས་དང་། །བྱད་ཕུར་རྦོད་གཏོང་གཤོམ་པའི་ཕྲ་མ་མཁན། །ད་ལྟ་ཉིད་དུ་སྒྲོལ་བའི་ཕྲིན་ལས་མཛོད། །རྫོགས་སྤྲུལ་ལྔ་པས་སོ། །