ལས་གཤིན་བསང་མཆོད།
ཨཻ། འཇམ་དཔལ་གཤིན་རྗེའི་བཀའ་སྡོད་དཔའ་བོ་ཆེ། །འཆི་བདག་བདུད་ལས་རྣམ་རྒྱལ་ཧེ་རུ་ཀ །ཚེ་དང་སྲོག་ལ་རྔམས་པའི་རྫུ་འཕྲུལ་ཅན། །དྲེགས་པའི་ཡོངས་རྗེ་ལས་ཀྱི་གཤིན་རྗེ་གཤེད། །སྦྱོར་བའི་ཡུམ་ཆེན་གཏུམ་མོ་དུག་ཧྲུལ་མ། །འཁོར་དུ་གཤིན་རྗེའི་སྡེ་དཔོན་ཆེན་པོ་བརྒྱད། །འཁོར་བཅས་དམ་ཚིག་དབང་གིས་གཤེགས་སུ་གསོལ། །མིག་སྨན་མདོག་ཅན་སྤྲིན་གྱི་ཤུགས་ལྡན་རྟ། །ཟ་བྱེད་དཔའ་བར་རྔམས་པའི་ཁྱི་ནག་དང་། །གནམ་ལྕགས་རྭ་ཅན་བརྗིད་པའི་གཡག་རོག་ཞོལ། །ཤེལ་སྒོང་ནག་པོ་ལྕགས་རྭ་འཁྲིལ་བ་ཅན། །མཚམས་སྤྲིན་མདངས་འཛིན་ར་སྐྱེས་བརྗིད་ལྡན་དང་། །འབོད་པའི་གཡབ་དར་དུར་ཁྲོད་དྲག་པོའི་ཆས། །འཆི་བདག་ལས་ཀྱི་གཤིན་རྗེ་བསང་ཞིང་མཆོད། །གཤིན་རྗེའི་སྡེ་དཔོན་ཚོགས་རྣམས་བསང་ཞིང་མཆོད། །ཕྱི་རོལ་ལྷ་སྲིན་སྡེ་བརྒྱད་བསང་ཞིང་མཆོད། །དེ་ལྟར་བསང་ཞིང་མཆོད་པའི་བྱིན་རླབས་ཀྱིས། །དུས་མིན་འཆི་བའི་འཇིགས་པ་ཞི་བ་དང་། །ཚེ་དཔལ་བསོད་ནམས་ཉམས་རྟོགས་གོང་འཕེལ་ཞིང་། །མི་བསྲུན་གདུག་སེམས་འཆང་བའི་དགྲ་བོ་རྣམས། །ཁྲམ་ལ་བཏབ་ཅིང་ཚེ་སྲོག་མཐར་བསྡུས་ལ། །ལོ་ཟླ་མ་བཞག་མྱུར་དུ་སྒྲོལ་བར་མཛོད། །རྫོགས་སྤྲུལ་ལྔ་པས་སོ། །