ཟངས་རི་བཙན་རྒོད་བསང་མཆོད།
ཧྲཱིཿ སངས་རྒྱས་བསྟན་པ་སྲུང་བའི་མཐུ་རྩལ་ཅན། །དམ་ལྡན་རྣལ་འབྱོར་ཡོངས་ཀྱི་སྲུང་མ་ཆེ། །དམ་ཉམས་དགྲ་བགེགས་རྣམས་ཀྱི་སྲོག་གཅོད་ཅིང་། །བཙན་རྒོད་འབར་བ་མ་རུང་མཆེད་སྡེ་བདུན། །བཙན་འཁོར་སུམ་བརྒྱ་དྲུག་ཅུའི་ཚོགས་དང་བཅས། །ཀི་དང་བསྭོ་ཡི་སྒྲ་དང་བཅས་པ་ཡི། །འདིར་གཤེགས་བཞུགས་ནས་དངོས་གྲུབ་སྩལ་དུ་གསོལ། །ཀུན་ནས་གུས་པའི་ཡིད་ཀྱིས་ཕྱག་འཚལ་འདུད། །ལེ་བརྒན་མདོག་ཅན་དར་གྱི་གཡབ་མོ་དང་། །བ་དན་དམར་པོ་མདུང་དམར་རྒྱལ་མཚན་དང་། །དཔལ་གྱི་དུར་ཁྲོད་རོལ་བ་དྲག་པོའི་རྒྱན། །སྟག་གཟིག་པགས་པ་གོ་ཁྲབ་མཚོན་ཆའི་རིགས། །གླུ་གར་རོལ་མོ་སྨན་སྣ་གསེར་སྐྱེམས་ཕུད། །མི་རྟ་ཁྱི་གསུམ་ཤ་ཁྲག་རུས་པ་དང་། །དགྲ་བོ་བསྒྲལ་བའི་དམར་ཆེན་རཀྟའི་མཚོ། །གློག་དམར་འཁྱུགས་འདྲའི་ཤུགས་ལྡན་ཅང་ཤེས་རྟ། །བརྗིད་པའི་གཡག་རྒོད་ཞོལ་ཆེན་མཚམས་སྤྲིན་མདོག །ར་སྐྱེས་ཁམས་པ་རླུང་གི་གཤོག་པ་ཅན། །བཙན་གྱི་ཁྱི་དམར་གྲོ་དམར་གཡང་མོ་ལུག །བྱེ་རུའི་མདོག་འདྲ་འདབ་ཆགས་སྤྲིན་ལྟར་གཏིབས། །དྲི་ཞིམ་ཤིང་སྣ་ཕྱེ་མར་ར་ཡི་གསུར། །དཀར་དམར་འོ་སྐོལ་བསྲེགས་པའི་དུད་སྤྲིན་ཚོགས། །འདོད་ཡོན་ལྔ་ལྡན་བསང་གི་མཆོད་པ་འདིས། །ཟངས་རི་བཙན་རྒོད་འབར་བ་སྤུན་བདུན་པོ། །བཙན་འཁོར་སུམ་བརྒྱ་དྲུག་ཅུའི་ཚོགས་དང་བཅས། །བསང་ངོ་མཆོད་དོ་བརྔན་ནོ་དགྱེས་པར་མཛོད། །དུག་ལྔའི་དབང་གྱུར་སྡོམ་གསུམ་དམ་ཚིག་ཀུན། །དམ་ལས་འགལ་དང་ཉམས་ཆགས་གྱུར་པ་ཀུན། །དམིགས་མེད་ཆོས་དབྱིངས་ཀློང་དུ་མཐོལ་ཞིང་བཤགས། །དགྲ་གདོན་བྱད་ཕུར་འཚེ་བ་ཚར་གཅོད་ཅིག །ཚེ་བསོད་ཉམས་རྟོགས་ཡར་ངོའི་ཟླ་ལྟར་འཕེལ། །མི་དང་མི་མིན་སྣང་སྲིད་དབང་དུ་བསྡུས། །ལེགས་ཚོགས་འཕེལ་རྒྱས་བསམ་དོན་འགྲུབ་པར་མཛོད། །ཅེས་པ་འདི་ཡང་རྫོགས་སྤྲུལ་ལྔ་པས་སོ། །