ཉི་གྲགས་ཚེ་སྒྲུབ་བདུད་བཞི་རྣམ་རྒྱལ་གཏེར་སྲུང་ཀླུ་མོ་གཟི་འབར་བསང་མཆོད།
ཕཻཾ། འདོད་རྒུའི་འབྱུང་གནས་དངོས་གྲུབ་ཀུན་གྱི་བདག །འགྲོ་བའི་དབུ་ཕོངས་སྡུག་བསྔལ་སེལ་མཛད་པ། །རྒྱལ་བའི་ཞལ་མཐོང་ཟབ་གཏེར་སྐྱོང་བའི་བདག །ཀླུ་རྒྱལ་དུང་སྐྱོང་སྲས་མོ་གཟི་འབར་མ། །མ་ཐོགས་མྱུར་དུ་གནས་འདིར་གཤེགས་སུ་གསོལ། །ཁྱེད་ལ་མཐུན་པའི་མཆོད་པ་འབུལ་བ་ནི། །ཕྱི་ཡི་མཆོད་པ་རིན་ཆེན་རྣམ་པ་ལྔ། །ནང་གི་མཆོད་པ་དཀར་གསུམ་མངར་གསུམ་དང་། །བསང་མཆོད་བྷ་ལིང་གཏོར་མ་རྒྱན་ལྡན་བཅས། །ཤེལ་ཚིགས་ཁྲི་དཀར་ཀླུ་རྟ་རྒྱན་ལྡན་སོགས། །གཡུ་ཤུག་མཁན་དཀར་བ་ལུ་ལ་སོགས་པའི། །དྲི་ཞིམ་དུད་པའི་སྤྲིན་ཕུང་འཁྲིགས་པ་འདིས། །ཀླུ་མོ་གཟི་འབར་འཁོར་བཅས་བསང་ཞིང་མཆོད། །ལྷ་མོ་ཆེན་མོ་དཔལ་འབར་བསང་ཞིང་མཆོད། །གཉན་མོ་ཆེན་མོ་གངས་དཀར་བསང་ཞིང་མཆོད། །ས་ཡི་ལྷ་མོ་བརྟན་མ་བསང་ཞིང་མཆོད། །ལྷ་མོ་ཆེན་མོ་དུད་སོལ་བསང་ཞིང་མཆོད། །བསྟན་སྲུང་གཟི་བརྗིད་ཆེན་མོ་བསང་ཞིང་མཆོད། །བདུད་མོ་ཆེན་མོ་རེ་ཏི་བསང་ཞིང་མཆོད། །ནག་མོ་ཆེན་མོ་རལ་གཅིག་བསང་ཞིང་མཆོད། །དེ་ལྟར་བསང་མཆོད་དམ་པ་འདི་ཕུལ་བས། །ཐུགས་དམ་བསྐང་ལ་ཉམས་ཆགས་བཤགས་པ་དང་། །ཞི་རྒྱས་དབང་དྲག་ཕྲིན་ལས་རྣམ་བཞི་ཡིས། །ལས་ཀྱི་འབྲས་བུ་མྱུར་དུ་མཆིས་པར་མཛོད། །ཅེས་པ་འདི་ཡང་རྫོགས་སྤྲུལ་ལྔ་པས་སོ། །