འབར་མ་བྱ་ཞོན་མའི་བསང་མཆོད།
བྷྱོཿ ནག་པོ་ཆེན་པོའི་བཀའ་སྡོད་ཡོངས་ཀྱི་རྗེ། །སྲིད་གསུམ་མཁའ་འགྲོ་ཡོངས་ཀྱི་གཙོ་མོ་ནི། །སྲིན་མོའི་གཟུགས་འཆང་མི་བསྲུན་ཁྲོས་པའི་སྐུ། །ཤ་ཟ་ཁྲག་འཐུང་གཏུམ་མོའི་ཚུལ་འཆང་བ། །འབར་མ་བྱ་ཞོན་འཁོར་བཅས་གཤེགས་སུ་གསོལ། །དགྱེས་པར་བཞུགས་ལ་གུས་པས་ཕྱག་འཚལ་ལོ། །དམར་ཆེན་ཁྲག་ཞག་འཁྲུགས་པའི་ཨརྒྷཾ་དང་། །ཉམས་པ་བསྒྲལ་བའི་དབང་ལྔའི་མེ་ཏོག་བཀྲ། །ཚིལ་ཆེན་གསུར་གྱི་དུད་པ་སྤྲིན་ལྟར་གཏིབ། །ཞུན་ཆེན་མར་མེ་དུས་མཐའི་ཤུགས་བཞིན་སྦར། །ཁྲག་ཆང་མཁྲིས་ཆེན་སྦྱར་བའི་དྲི་ཆབ་དང་། །ཤ་ཁྲག་རུས་པའི་ཞལ་ཟས་རི་ལྟར་སྤུང་། །ཐོད་རྔ་རྐང་གླིང་སྙན་འཇེབས་རོལ་མོའི་སྒྲ། །དཔལ་གྱི་ཆས་གོས་རྨ་བྱའི་རྒྱལ་མཚན་དང་། །རྟ་ནག་བྱ་ནག་གཡག་རོག་ཤེལ་སྒོང་ནག །བམ་གྱི་རྒྱལ་མཚན་ལ་སོགས་མཐུན་པའི་རྫས། །ཁྱད་པར་དྲི་ཞིམ་བསང་གི་མཆོད་པ་འདིས། །འབར་མ་བྱ་ཞོན་འཁོར་བཅས་བསང་ཞིང་མཆོད། །འཁོར་གྱི་མ་མོ་འབུམ་སྡེ་བསང་ཞིང་མཆོད། །རིག་འཛིན་བརྒྱུད་པའི་སྤྱན་སྔར་དམ་བཅས་བཞིན། །དཔལ་ལྡན་བླ་མའི་སྐུ་ཚེ་བརྟན་པ་དང་། །འཁོར་འབངས་བུ་སློབ་ཁྱེད་ཀྱིས་རྟག་ཏུ་སྲུང་། །བསྟན་པའི་ཉི་མ་ཕྱོགས་བཅུར་འབར་བ་དང། །བདག་ལ་སྡང་ཞིང་གདུག་པའི་སེམས་འཆང་བ། །ངན་སྦྱོར་གཤོམ་པའི་ཕྲ་མ་མཁན་གྱི་ཚོགས། །སྙིང་ཕྱུང་སྲོག་ཆོད་ད་ལྟ་ཉིད་དུ་སྒྲོལ། །ཆེ་བཙན་ཆོས་སྲིད་ནོར་གྱི་དངོས་གྲུབ་སྩོལ། །སྙན་གྲགས་བ་དན་སྲིད་པའི་རྩེ་མོར་བསྒྲེངས། །དབང་ཐང་ཆོས་སྲིད་ལེགས་པའི་ཚོགས་རྣམས་ཀུན། །ནམ་ཡང་མི་ནུབ་འཕེལ་ཞིང་རྒྱས་པར་མཛོད། །ཡངས་པའི་རྒྱལ་ཁམས་ཀུན་ཏུ་བདེ་ཞིང་སྐྱིད། །དུས་འཁྲུགས་ནད་རིམས་མཐའ་དག་ཞི་ནས་ཀྱང་། །ལོ་ཕྱུགས་ལེགས་ཤིང་འབྲུ་རྣམས་འཕེལ་བ་དང་། །མདོར་ན་ཡིད་ལ་ཇི་ལྟར་འདོད་པ་བཞིན། །བདག་ཅག་རེ་བའི་འབྲས་བུ་མཆིས་པར་མཛོད། །རྫོགས་སྤྲུལ་ལྔ་པས་སོ། །