བསང་མཆོད་བསྡུས་བ་བྱིན་རླབས་སྤྲིན་ཕུང་ལས། རྡོ་རྗེའི་ཆོས་སྐྱོང་རྣམས་ཀྱི་བསང་བསྡུས་ཕྲིན་ལས་མྱུར་འགྲུབ་ཅེས་བྱ་བ་བཞུགས་སོ།།

ཐོག་མར་རྟ་མགྲིན་ནག་པོའི་བསང་མཆོད་བསྡུས་པ་ནི། ཧྲཱིཿ དབང་ཆེན་ཁྲོ་རྒྱལ་རྟ་མགྲིན་ནག་པོ་ཆེ། །འཁོར་གྱི་དྲེགས་པ་སྡེ་བརྒྱད་དམག་ཚོགས་དང༌། །ཡེ་ཤེས་འཇིག་རྟེན་ཕོ་ཉར་བཅས་པ་ལ། །འདོད་ཡོན་ལྔ་ལྡན་བསང་མཆོད་འདི་ཕུལ་བས། །ཕྲིན་ལས་རྣམ་བཞི་ལྷུན་གྱིས་འགྲུབ་པར་མཛོད། །
ལེགས་ལྡན་བསང་མཆོད་བསྡུས་པ་བཞུགས་སོ།།ཧཱུྃ། དུས་གསུམ་རྒྱལ་བའི་བསྟན་སྲུང་མཐུ་བོ་ཆེ། །ལེགས་ལྡན་ནག་པོ་ཆེན་པོ་ཡབ་དང་ཡུམ། །བཀའ་འཁོར་བྲན་གཡོག་ནག་པོའི་ཚོགས་དང་བཅས། །བསང་ངོ་མཆོད་དོ་བཅོལ་བའི་ཕྲིན་ལས་མཛོད། །ཅེས་མི་ཕམ་པས་སོ། །
མ་ནིང་བསང་བསྡུས། ཀྱཻ། ལྷ་ཆེན་དཔལ་འབར་མ་ནིང་གཙོ་དང་འཁོར། །ཆོས་ཀྱི་དབྱིངས་ནས་འདིར་གཤེགས་དགྱེས་པར་བཞུགས། །བཟང་ཞིང་ཕྱེ་མར་ཕུད་ཀྱིས་བསང་ངོ་མཆོད། །ཀུན་བཟང་པདྨ་འབྱུང་གནས་བཀའ་བསྒོས་བཞིན། །པདྨའི་རིང་ལུགས་སྒྲུབ་པའི་སྡེ་འདི་སྐྱོངས། །བར་ཆད་ཀུན་ཞི་བསམ་དོན་ཀུན་འགྲུབ་མཛོད། །
མགོན་པོ་ཚོགས་བདག་བསང་བསྡུས། ཧཱུྃ། དཔལ་ལྡན་ཡེ་ཤེས་མགོན་པོ་ཚོགས་ཀྱི་བདག །སྐུ་གསུང་ཐུགས་མགོན་ཕྱོགས་བཅུའི་མགོན་པོ་བཅུ། །དཔལ་མགོན་བདུན་ཅུ་འཁོར་དང་བཅས་པ་རྣམས། །བསང་མཆོད་བཞེས་ལ་བཅོལ་བའི་ཕྲིན་ལས་མཛོད། །རྫོགས་སྤྲུལ་ལྔ་པས་སོ། །
བདུད་མགོན་ཞིང་སྐྱོང་བསང་བསྡུས། ཧཱུྃ། བདུད་མགོན་ཞིང་སྐྱོང་སེང་གེའི་གདོང་བ་ཅན། །ཡུལ་ཆེན་བདུད་མོ་དམར་ནག་ཁྲག་རལ་ཅན། །བཀའ་ཉན་ལས་བྱེད་དྲེགས་པའི་ཚོགས་རྣམས་བཅས། །བསང་ངོ་མཆོད་དོ་བཅོལ་བའི་ཕྲིན་ལས་མཛོད། །རྫོགས་སྤྲུལ་ལྔ་པས་སོ། །
གཏེར་སྲུང་ཡང་མ་སྐྱིན་གདོང་མའི་བསང་བསྡུས་ནི། བྷྱོཿ པདྨའི་བཀའ་ཉན་མཁའ་འགྲོ་ཀུན་ཀྱི་གཙོ། །ཟབ་གཏེར་སྐྱོང་བའི་ཚུལ་འཛིན་མཐུ་མོ་ཆེ། །ཡང་མ་སྐྱིན་གདོང་འཁོར་དང་བཅས་པ་ཡིས། །བསང་མཆོད་བཞེས་ལ་བཅོལ་བའི་ཕྲིན་ལས་མཛོད། །རྫོགས་སྤྲུལ་ལྔ་པས་སོ། །
ལྷ་མོ་སྔགས་བདག་མའི་བསང་མཆོད་བསྡུས་པ་ནི། བྷྱོཿ སྟོང་ཉིད་རྣམ་དག་ཤེས་རབ་དབྱིངས་ཀྱི་ཡུམ། །དཔལ་ལྡན་ལྷ་མོ་བཀའ་གཏེར་སྲུང་མ་མཆོག །གུས་པས་བསང་འབུལ་སྔ་འགྱུར་རྡོ་རྗེའི་ཐེག །དར་ཞིང་རྒྱས་པའི་ཕྲིན་ལས་འགྲུབ་པར་མཛོད། །རྫོགས་སྤྲུལ་ལྔ་པས་སོ། །
གཤོག་རྒོད་མའི་བསང་བསྡུས། བྷྱོཿ ཡོངས་ལ་དབང་བསྒྱུར་ཐོགས་མེད་རྫུ་འཕྲུལ་ཅན། །སྲིད་གསུམ་སྲོག་ལ་མངའ་མཛད་མཐུ་མོ་ཆེ། །རྡོ་རྗེ་གཤོག་རྒོད་འཁོར་དང་བཅས་པ་རྣམས། །བསང་ངོ་མཆོད་དོ་བཅོལ་བའི་ཕྲིན་ལས་མཛོད། །རྫོགས་སྤྲུལ་ལྔ་པས་སོ། །
སྲོག་སྒྲུབ་མའི་བསང་བསྡུས། བྷྱོཿ ཨ་ཏིའི་བསྟན་སྲུང་སྲིད་གསུམ་སྲོག་གི་བདག །དུས་བཞིའི་དབང་བསྒྱུར་མཁའ་འགྲོ་ཀུན་གྱི་གཙོ། །ཤན་པ་སྲོག་སྒྲུབ་ནག་མོ་འཁོར་བཅས་ལ། །བསང་ངོ་མཆོད་དོ་བཅོལ་བའི་ཕྲིན་ལས་མཛོད། །རྫོགས་སྤྲུལ་ལྔ་པས་སོ། །
བརྟན་མ་བཅུ་གཉིས་བསང་བསྡུས། བྷྱོཿ པད་འབྱུང་རླང་ཆེན་དཔལ་གྱི་སེང་གེ་ཡིས། །བཀའ་བསྒོས་ཐ་ཚིག་གཉན་པོ་རྗེས་དགོངས་ལ། །བདུད་དང་གནོད་སྦྱིན་སྨན་མོའི་ཚུལ་འཛིན་པ། །འཁོར་བཅས་བསང་མཆོད་བཞེས་ལ་ཕྲིན་ལས་སྒྲུབས། །རྫོགས་སྤྲུལ་ལྔ་པས་སོ། །
རྡོ་རྗེ་གཡུ་སྒྲོན་མའི་བསང་བསྡུས། བྷྱོཿ རིག་འཛིན་པདྨ་ཐོད་ཕྲེང་སྤྱན་སྔ་རུ། །བཀའ་ཉན་བསྟན་པ་སྲུང་བར་ཞལ་བཞེས་པའི། །སྨན་བཙུན་རྡོ་རྗེ་གཡུ་སྒྲོན་འཁོར་བཅས་ལ། །བསང་ངོ་མཆོད་དོ་བཅོལ་བའི་ཕྲིན་ལས་མཛོད། །རྫོགས་སྤྲུལ་ལྔ་པས་སོ། །
ཉི་གྲགས་ལྷ་བཙན་བསང་མཆོད་ནི། ཧཱུྃཿ སྲིད་གསུམ་དབང་མཛད་དྲེགས་པ་ཀུན་གྱི་གཙོ། །པདྨའི་ཟབ་གཏེར་སྐྱོང་བའི་མཐུ་བོ་ཆེ། །ལྷ་བཙན་ཆེན་པོ་འཁོར་དང་བཅས་པ་ཡིས། །བསང་མཆོད་བཞེས་ལ་བཅོལ་བའི་ཕྲིན་ལས་མཛོད། །རྫོགས་སྤྲུལ་ལྔ་པས་སོ། །
གནོད་སྦྱིན་ཤན་པ་དམར་ནག་བསང་བསྡུས། ཧཱུྃཿ རྒྱལ་བའི་བསྟན་པ་གཉན་པོ་བསྲུང་བ་དང་། །སྒྲུབ་ལ་བར་དུ་གཅོད་པའི་གཤེད་མ་ཆེ། །གནོད་སྦྱིན་ཤན་པ་དམར་ནག་འཁོར་བཅས་ལ། །བསང་ངོ་མཆོད་དོ་བཅོལ་བའི་ཕྲིན་ལས་མཛོད། །རྫོགས་སྤྲུལ་ལྔ་པས་སོ། །
རིག་འཛིན་མའི་བསང་བསྡུས། བྷྱོཿ གནས་གསུམ་མཁའ་འགྲོ་ཡོངས་ཀྱི་གཙོ་མོ་ཆེ། །རིག་འཛིན་དཔའ་བོ་ཡོངས་ཀྱི་སྲིང་གཅིག་མ། །ཨ་མ་རིག་འཛིན་ལྷ་མོ་འཁོར་བཅས་ལ། །བསང་ངོ་མཆོད་དོ་བཅོལ་བའི་ཕྲིན་ལས་མཛོད། །རྫོགས་སྤྲུལ་ལྔ་པས་སོ། །
གཏེར་སྲུང་ལྡང་ལྷའི་བསང་བསྡུས། ཧཱུྃ། རྒྱལ་བའི་དབང་པོ་པདྨ་སཾ་བྷ་ཝའི། །ཟབ་གཏེར་བསྟན་པ་སྲུང་བར་ཞལ་བཞེས་པའི། །ལྷ་ཡི་དགེ་བསྙེན་རྡོ་རྗེ་དྲག་པོ་རྩལ། །འཁོར་བཅས་བསང་མཆོད་བཞེས་ལ་ཕྲིན་ལས་སྒྲུབས། །རྫོགས་སྤྲུལ་ལྔ་པས་སོ། །
ཉི་གྲགས་རྒྱལ་པོའི་བསང་བསྡུས། ཧཱུྃ། ཆོས་ཉིད་ཞི་བའི་དབྱིངས་ལས་མ་གཡོས་ཀྱང་། །ལོག་འདྲེན་འདུལ་ཕྱིར་དྲག་པོའི་སྐུར་བཞེངས་པ། །སྐུ་ཡི་རྒྱལ་ཆེན་ཡབ་ཡུམ་འཁོར་བཅས་ལ། །བསང་ངོ་མཆོད་དོ་བཅོལ་བའི་ཕྲིན་ལས་མཛོད། །རྫོགས་སྤྲུལ་ལྔ་པས་སོ། །
རྡོ་རྗེ་གྲགས་ལྡན་བསང་བསྡུས། ཧྲཱིཿ ཁམས་གསུམ་ཀུན་ལས་རྒྱལ་བའི་སྟོབས་ལྡན་སྐུ། །གསུང་བློན་རྡོ་རྗེ་གྲགས་ལྡན་སྤྲུལ་འཁོར་བཅས། །ཡེ་ཤེས་བདུད་རྩིའི་བསང་མཆོད་ཕུལ་བའི་མཐུས། །ཡིད་ལ་བསམ་པ་ལྷུན་གྱིས་འགྲུབ་པར་མཛོད། །རྫོགས་སྤྲུལ་ལྔ་པས་སོ། །
གཏེར་སྲུང་སྙོན་ཁའི་བསང་བསྡུས། ཧཱུྃ། མ་རུང་གདུལ་དཀའ་འདུལ་བའི་གཤེད་པོ་ཆེ། །ཆེ་བའི་ཆེ་མཆོག་ཁྲོ་རྒྱལ་ཡོངས་ཀྱི་གཙོ། །སྙོན་ཁ་ནག་པོ་འཁོར་དང་བཅས་པ་ལ། །བསང་མཆོད་བཞེས་ལ་བཅོལ་བའི་ཕྲིན་ལས་མཛོད། །རྫོགས་སྤྲུལ་ལྔ་པས་སོ། །
དྲེགས་པའི་སྡེ་དཔོན་སུམ་ཅུའི་བསང་བསྡུས། ཧཱུྃཿ ཆོས་དབྱིངས་ངང་ལས་སྙིང་རྗེའི་སྐུར་བཞེངས་པ། །དྲེགས་པའི་ཡང་རྗེ་དྲེགས་པ་ཀུན་གྱི་གཙོ། །སྔགས་བདག་སྡེ་དཔོན་སུམ་ཅུ་འཁོར་བཅས་ལ། །བསང་ངོ་མཆོད་དོ་བཅོལ་བའི་ཕྲིན་ལས་མཛོད། །རྫོགས་སྤྲུལ་ལྔ་པས་སོ། །
དུར་ཁྲོད་ལྷ་མོའི་བསང་བསྡུས། བྷྱོཿ མི་འགྱུར་བདེ་བ་ཆེན་པོའི་ངང་ཉིད་ལས། །དུར་ཁྲོད་གནས་ཉུལ་ཞིང་སྐྱོང་ཀུན་ཀྱི་གཙོ། །དུར་ཁྲོད་ལྷ་མོ་འཁོར་དང་བཅས་པ་ཡིས། །བསང་མཆོད་བཞེས་ལ་བཅོལ་བའི་ཕྲིན་ལས་མཛོད། །རྫོགས་སྤྲུལ་ལྔ་པས་སོ། །
ལས་གཤིན་བསང་བསྡུས། ཨཻ། འཇམ་དཔལ་གཤིན་རྗེའི་བཀའ་སྡོད་དཔའ་བོ་ཆེ། །འཆི་བདག་བདུད་ལས་རྣམ་རྒྱལ་ཧེ་རུ་ཀ །ལས་ཀྱི་གཤིན་རྗེ་འཁོར་དང་བཅས་པ་ལ། །བསང་ངོ་མཆོད་དོ་བཅོལ་བའི་ཕྲིན་ལས་མཛོད། །རྫོགས་སྤྲུལ་ལྔ་པས་སོ། །
མཁའ་འགྲོ་སྤྱང་ཞོན་མཆེད་གསུམ་བསང་བསྡུས། བྷྱོཿ སྐྱེ་མེད་རྣམ་དག་དབྱིངས་ལས་མ་གཡོས་ཀྱང་། །རྫུ་འཕྲུལ་སྟོབས་ཀྱིས་མཁའ་ལ་ཐོགས་མེད་འགྲོ། །མཁའ་འགྲོ་ཆེན་མོ་སྤྱང་ཞོན་མཆེད་གསུམ་གྱིས། །བསང་མཆོད་བཞེས་ལ་ཕྲིན་ལས་འགྲུབ་པར་མཛོད། །རྫོགས་སྤྲུལ་ལྔ་པས་སོ། །
ངས་རི་བཙན་རྒོད་བསང་བསྡུས། ཧཱུྃ། ཟངས་རི་བཙན་རྒོད་འབར་བ་སྤུན་བདུན་པོ། །བཙན་འཁོར་སུམ་བརྒྱ་དྲུག་ཅུ་འཁོར་བཅས་ལ། །ངོ་མཚར་བསང་མཆོད་དམ་པ་ཕུལ་བ་ཡིས། །ཞི་བྱེད་གཅོད་ཡུལ་བསྟན་པ་དར་བར་མཛོད། །རྫོགས་སྤུལ་ལྔ་པས་སོ། །
ཀླུ་མོ་གཟི་འབར་མའི་བསང་བསྡུས། ཕེེཾཿ ཀླུ་རྒྱལ་དུང་སྐྱོང་སྲས་མོ་གཟི་འབར་མ། །ཀླུ་སྨན་འབུམ་གྱི་འཁོར་ཚོགས་བཅས་པ་རྣམས། །དཀར་གསུམ་མངར་གསུམ་བསྲེགས་པའི་དུད་པའི་སྤྲིན། །བཞེས་ལ་ཀླུ་ནོར་དངོས་གྲུབ་སྩལ་དུ་གསོལ། །རྫོགས་སྤྲུལ་ལྔ་པས་སོ། །
སྨན་སྲུང་ལྷ་སྨན་མཆེད་གསུམ་བསང་བསྡུས། ཧཱུྃ། སྨན་པའི་རྒྱལ་པོའི་བསྟན་པ་སྲུང་མཛད་པའི། །ཡེ་ཤེས་ཁྱེའུ་ཆུང་ལྷ་མོ་མཆེད་གསུམ་ལ། །བསང་གི་མཆོད་པ་དམ་པ་ཕུལ་བ་ཡིས། །ནད་མེད་ཚེ་རིང་ལོངས་སྤྱོད་རྒྱས་པར་མཛོད། །རྫོགས་སྤྲུལ་ལྔ་པས་སོ། །
གཏེར་སྲུང་ཁོལ་བོ་ཁའི་བསང་བསྡུས། ཧཱུྃ། གནོད་སྦྱིན་ཡོངས་ཀྱི་རྒྱལ་པོ་མཐུ་བོ་ཆེ། །མཐུ་ཆེན་གཏེར་གྱི་སྲུང་མ་ཁོལ་བོ་ཁ། །འཁོར་གྱི་གནོད་སྦྱིན་བྱེ་བ་འབུམ་དང་བཅས། །བསང་མཆོད་བཞེས་ལ་ཕྲིན་ལས་འགྲུབ་པར་མཛོད། །རྫོགས་སྤྲུལ་ལྔ་པས་སོ། །
གཉན་ཆེན་རྒྱལ་བ་ཐོད་དཀར་བསང་བསྡུས། ཧཱུྃ། རྒྱལ་བ་ཐོད་དཀར་གཉན་རྣམས་ཡོངས་ཀྱི་གཙོ། །མཆེད་ཟླ་བརྒྱད་དང་གཉན་འཁོར་འབུམ་གྱི་ཚོགས། །བསང་གི་མཆོད་པ་དམ་པ་འདི་བཞེས་ལ། །མ་རུང་དགྲ་ལས་རྒྱལ་བའི་ཕྲིན་ལས་མཛོད། །རྫོགས་སྤྲུལ་ལྔ་པས་སོ། །
འབར་མ་བྱ་ཞོན་མའི་བསང་བསྡུས། བྷྱོཿ སྲིད་གསུམ་མཁའ་འགྲོ་ཡོངས་ཀྱི་གཙོ་མོ་ནི། །ནག་མོ་ཆེན་མོ་འབར་མ་བྱ་ཞོན་མ། །བསང་གི་མཆོད་པ་དམ་པ་ཕུལ་བ་ཡིས། །མ་མོའི་དལ་ཡམས་བཟློག་པའི་ཕྲིན་ལས་མཛོད། །རྫོགས་སྤྲུལ་ལྔ་པས་སོ། །
འབར་བ་ལྕམ་དྲལ་གྱི་བསང་བསྡུས། ཧཱུྃ། པདྨ་དྲག་པོའི་བཀའ་ཡི་འཁོར་ཡུག་ན། །འབར་བ་ལྕམ་དྲལ་འཁོར་དང་བཅས་པ་ལ། །དག་བྱེད་ཁྲུས་ཆབ་བསང་གི་མཆོད་པ་ཡིས། །ལས་རྣམས་མྱུར་དུ་འགྲུབ་པའི་ཕྲིན་ལས་མཛོད། །རྫོགས་སྤྲུལ་ལྔ་པས་སོ། །
གཏེར་སྲུང་ལྷ་མོ་ཆེན་མོའི་བསང་བསྡུས། བྷྱོཿ ཟབ་གཏེར་བསྟན་པ་བསྲུང་བར་ཞལ་བཞེས་པའི། །དུས་བཞིར་དབང་བསྒྱུར་དཔལ་ལྡན་ལྷ་མོ་ལ། །དག་བྱེད་བསང་གི་མཆོད་པ་ཕུལ་བ་ཡིས། །མ་མོའི་དལ་ཡམས་དྲག་པོ་དགྲ་ལ་ཐོངས། །རྫོགས་སྤྲུལ་ལྔ་པས་སོ། །
མ་མོ་ཁྲག་རལ་མའི་བསང་བསྡུས། བྷྱོཿ སྲིད་པ་གསུམ་གྱི་སྲོག་གི་བདག་མོ་ནི། །ཤ་ཟ་ཁྲག་འཐུང་ཀུན་གྱི་གཙོ་མོ་སྟེ། །མ་མོ་ཆེན་མོ་ཁྲག་གི་རལ་ཅན་མས། །བསང་མཆོད་བཞེས་ལ་བཅོལ་བའི་འཕྲིན་ལས་མཛོད། །རྫོགས་སྤྲུལ་ལྔ་པས་སོ། །
བཀའ་ཡི་སྲུང་མ་གནོད་སྦྱིན་བཅུ་གཉིས་བསང་བསྡུས། ཧཱུྃ། བཀའ་ཡི་སྲུང་མ་གནོད་སྦྱིན་བཅུ་གཉིས་དང་། །བྲན་གཡོག་བདུན་འབུམ་འཁོར་དང་བཅས་པ་ལ། །བསང་མཆོད་ནམ་མཁའ་མཛོད་ཀྱི་འཁོར་ལོ་འདི། །ཕུལ་བས་མི་མཐུན་ཕྱོགས་རྣམས་ཞི་བར་མཛོད། །རྫོགས་སྤྲུལ་ལྔ་པས་སོ། །
ཁྱབ་བདག་ནཱ་ག་རཀྴའི་བསང་བསྡུས་ནི། ཕེེཾཿ གསང་བདག་བཀའ་ཉན་ཀླུ་སྲིན་ཁྲོས་པའི་སྐུ། །ཤིན་ཏུ་ཁྲོས་པ་ནཱ་ག་རཀྴ་ལ། །དམ་རྫས་བསང་གི་མཆོད་པ་ཕུལ་བ་ཡིས། །ས་བདག་ཀླུ་ཡི་གནོད་པ་ཞི་བར་མཛོད། །ཅེས་པ་འདི་ཡང་རྫོགས་ཆེན་སྐྱེ་སྲིད་ལྔ་པ་ཐུབ་བསྟན་ཆོས་ཀྱི་རྡོ་རྗེས་ཆོས་སྐྱོང་བའི་སྲུང་མ་རྣམས་ཀྱི་བསང་མཆོད་བསྡུས་པ་རྣམས་ཕྱོགས་གཅིག་ཏུ་བསྒྲིགས་པ་དགེ་ལེགས་འཕེལ། །
བསང་ལ་བཟང་ངན་བརྟག་ཐབས་ནི། དུད་པ་འབར་བ་ཐལ་བ་གསུམ། །བརྟག་པ་དང་པོ་དུད་པ་ནི། །དཀར་བོ་མདུང་བཙུག་འདྲ་བ་བཟང་། །བཀྲ་ཤིས་ནད་མེད་གོད་ཁ་ཆད། །དུད་པ་ཁམ་ནག་ཐུར་སོང་ན། །ནད་པ་མི་ཤི་ཕན་པར་དཀའ། །དུ་བ་ཁམ་ནག་འོག་དང་ནུབ། །སོང་ན་གོད་འོང་ནད་པ་འཆི། །སད་སེར་འོང་བས་ངན་པར་བཤད། །དུད་པ་ནག་ན་ནད་པ་འཆི། །སྔོ་ན་ཡམས་ནད་ལོ་མི་ལེགས། །འབར་ལྟས་སྟེང་འབར་ཚངས་རིས་ལྷའི། ལྟས་ཡིན་བཟང་ལ་ལྷ་ངོ་མཐོ། །ཤར་འབར་ལྷའི་ལྟས་བཟང་བར་བཤད། །ལྷོ་འབར་མི་གཡང་འཕེལ་བས་བཟང་། །ནུབ་ནས་དུར་ཁ་ཕྱེ་བས་ངན། །བྱང་ནས་དགྲ་སྒོ་འབྱེད་པས་ངན། །འོག་འབར་འཁོར་གཡོག་ནོར་ལ་ངན། །ཐལ་བ་དཀར་པོ་བཟང་བ་དང་། །དམར་ན་གོད་འོང་གཞོན་མར་ངན། །ནོར་ལྷ་བཏོན་ན་བཟང་བ་ཡིན། །ཉི་ནག་ཆེ་ཆུང་བསང་སོལ་དང་། །མེ་དུད་ཆེན་པོ་བཏང་བས་ན། །ལྷ་ཕྲན་མེ་མཆེད་སྣང་བས་སྦལ། །ཉེས་པ་འབྱུང་ཞེས་བཤད་པར་འདུག །ཚེས་གཅིག་སྟག་གི་ཉི་མ་ལ། །རྨ་ངོ་གྲིབ་ངོ་གཉན་རིགས་འཁྲུགས། །ཚེས་དྲུག་བཅུ་དྲུག་ཉེར་དྲུག་ལ། །རི་འགོ་བསང་བྱས་ཞིང་གི་ལྷ། །མི་དགའ་ལོ་མི་ལེགས་པར་བཤད། །དེ་མིན་བསང་གིས་བཀྲ་ཤིས་ཤིང་། །ཆར་ཆུ་དུས་འབེབས་ལོ་ལེགས་ལ། །མི་ཕྱུགས་ནད་ཞི་གོད་ཁ་ཆད། །ཅི་བསམ་ཐོགས་མེད་འགྲུབ་པའོ། །རྒྱུན་བསང་དགག་བྱའི་དོགས་པ་མེད། །དེ་ལྟར་བསང་མཆོད་བཀླགས་ཆོག་ཕྱོགས་གཅིག་ཏུ་བཀོད་པ་འདི་ཡང་སྔོན་ཆད་བསང་ཡིག་ཕྱོགས་གཅིག་ཏུ་མ་བསྒྲིགས་པའི་དབང་གིས་ཡིག་ཆ་འདྲ་མིན་སྣ་ཚོགས་པ་ཞིག་འབྱུང་འདུག་པས། འཚོགས་སྒྲིག་ལྟ་བུའི་སྐབས་སུ་ཅུང་ཟད་འདོན་སྟབས་མི་བདེ་བ་ཞིག་འདྲ་བས། མཁན་བསོད་ཆོས་སོགས་དོན་གཉེར་ཅན་འགའ་ཞིག་གིས་ཡང་ཡང་བསྐུལ་བ་དང་། རང་གིས་ཀྱང་དེ་ལྟར་བགྱིད་པའི་མོས་འདུན་ཡོད་བཞིན། སྔོན་གྱི་ཡིག་ཆ་ཡོད་པ་རྣམས་གཞིར་བཞག་ལ། ཁ་སྐོང་རིགས་འཇམ་མགོན་མི་ཕམ་རིན་པོ་ཆེས་མཛད་པ་དང་། ཆ་ཤས་རྨོངས་པ་རང་ནས་ཀྱང་གསར་བརྩམས་བྱས་ཏེ་ཁ་བསྐངས་ནས། བསང་མཆོད་རྒྱས་འབྲིང་བསྡུས་གསུམ་བཀླགས་པས་གྲུབ་པ་འདི་བསྟན་འགྲོ་ལ་ལྷག་བསམ་ཅན་དུས་མཐའི་བཙུན་གཟུགས་འཆང་བ་ཐུབ་བསྟན་ཆོས་ཀྱི་རྡོ་རྗེའམ་པདྨ་ཐེག་མཆོག་བསྟན་འཛིན་གྱིས། མཛེས་བྱེད་ཆུ་ཡོས་སྨིན་ཟླའི་དུས་ཚེས་བཟང་པོར་བཀོད་པའི་ཡི་གེ་པ་ནི་དགེ་སློང་དགེ་འདུན་སོགས་ཀྱིས་བྲིས་པའོ། །སརྦ་མངྒ་ལཾ། །