གནས་བདག་ནོར་བུ་གཡུལ་རྒྱལ་གྱི་བསང་མཆོད་ལྷ་ཡི་རྔ་སྒྲ་ཞེས་བྱ་བ་བཞུགས་སོ།།
ཧཱུྃ་ཧྲཱིཿ སྔོན་དུས་གཡུང་དྲུང་བོན་གྱི་ལྷ་གཅིག་པུ། །རྒྱལ་བའི་དབང་པོ་པདྨ་ཀཱ་ར་ཡིས། །ཡུལ་ཕྱོགས་འདི་ཡི་གནས་ཀྱི་སྲུང་མར་བསྐོས། །དཀར་ཕྱོགས་དགེ་བའི་རྒྱལ་མཚན་སྲིད་རྩེར་བསྒྲེངས། །རྡོ་རྗེ་མགོར་བཞག་ལྕེ་ལ་བདུད་རྩི་བྱིན། །དམ་བཅའ་ཐ་ཚིག་རྡོ་རྗེའི་བྲོ་བོར་ཏེ། །རང་རང་སྲོག་གི་སྙིང་པོ་ཕུལ་ནས་ཀྱང་། །ཇི་ལྟར་ཞལ་བཞེས་དམ་བཅའ་དྲན་མཛོད་ལ། །སྒྲུབ་པོ་རྣལ་འབྱོར་བདག་ལ་རྗེས་དགོངས་ཤིག །ཁྱེད་དང་མཐུན་པའི་དམ་རྫས་ཆེན་པོ་ནི། །རཾ་ལས་སྐྱེས་པའི་འབར་བའི་མེ་ནང་དུ། །ཤུག་པ་འོམ་བུ་བ་ལུ་སྤེན་མ་དང་། །ཉ་སྦྲིད་མཁན་པ་སྟག་པ་ལ་སོགས་པ། །བདུད་རྩིའི་ཤིང་ལྔ་རིན་ཆེན་རྣམ་པ་ལྔ། །དར་ཟབ་སྣ་ཚོགས་ཟ་འོག་རིགས་བྱེད་དང་། །ཕྱེ་མར་བསྲེགས་པས་དུད་པའི་སྤྲིན་གྱི་ཚོགས། །རབ་དཀར་ཆུ་འཛིན་དཀར་པོའི་དབྱིབས་ལྟ་བུ། །ཡིད་འོང་ལྷ་ལམ་ཡངས་པའི་ཞིང་ཀུན་ཁྱབ། །རིན་ཆེན་གཏེར་གྱི་བུམ་པ་བཟང་པོ་དང་། །དྲི་ཞིམ་སྨན་གྱིས་གཏམས་པའི་རིན་ཆེན་སྒྲོམ། །རྟ་དང་དྲེའུ་བ་ལང་མ་ཧེ་དང་། །མཛོ་གཡག་འབྲི་དང་འབྲོང་བུ་ཙ་ར་ལུག །ཤ་རྐྱང་ལ་སོགས་རྐང་བཞིའི་ཚོགས་རྣམས་དང་། །སྟག་གཟིག་དོམ་དྲེད་འཕར་སྤྱང་གཅན་གཟན་རིགས། །རྨ་བྱ་ཤང་ཤང་ནེ་ཙོ་རྒོད་དང་བཞད། །མཐིང་རིལ་ངུར་པ་ལ་སོགས་འདབ་ཆགས་ཚོགས། །ཆུ་སྲིན་རྒྱལ་པོ་དུང་སོགས་ཆུ་གནས་རིགས། །རྡོ་རྗེའི་ལྷ་མོ་རྒྱལ་སྲིད་རིན་ཆེན་བདུན། །བཀྲ་ཤིས་རྫས་རྟགས་ཉེ་བའི་རིན་ཆེན་བདུན། །གོ་ཁྲབ་གྲི་དང་རྨོག་རལ་མདའ་གཞུ་མདུང་། །ཞྭ་ལྷམ་གོས་དང་ཕོ་ཐང་མོ་ཐང་སོགས། །མདོར་ན་དངོས་འབྱོར་ཡིད་ཀྱིས་སྤྲུལ་པ་ཡིས། །མི་ཟད་ནམ་མཁའ་འཛོད་ཀྱི་འཁོར་ལོ་འདི། །ཕུལ་བས་བདག་ཅག་རིག་འཛིན་སྒྲུབ་པ་པོས། །མ་ཤེས་བག་མེད་སྤྱོད་པ་རྩིང་བ་ཡིས། །ཁྱད་པར་ས་གཉན་བརྐོས་དང་ཆུ་གཉན་དཀྲུགས། །རྡོ་གཉན་སློག་དང་ཤིང་གཉན་བཅད་པ་སོགས། །གནས་བདག་ཆེན་པོ་ཡབ་ཡུམ་སྲས་འཁོར་དང་། །བློན་པོ་རུ་འདྲེན་འཁོར་ཚོགས་དཔུང་དང་བཅས། །གཞན་ཡང་ཀླུ་གཉན་ས་བདག་ལ་སོགས་པ། །འགྲམ་འཁྲུགས་ཐུགས་དང་འགལ་བའི་ལས་གྱུར་རྣམས། །མི་གསང་མི་སྦེད་སྙིང་ནས་བཤགས་ལགས་ན། །སྒྲིབ་མེད་ཚངས་པ་མཆོག་གི་དངོས་གྲུབ་སྩོལ། །དེ་ལྟར་བསང་མཆོད་ཕུལ་བའི་བྱིན་རླབས་ཀྱིས། །ཡུལ་འདིར་ནད་མུག་མཚོན་འཁྲུགས་ཞི་བ་དང་། །འཇིགས་པ་ཆེན་པོ་བརྒྱད་དང་བཅུ་དྲུག་སོགས། །རྣམ་པ་ཀུན་ཏུ་མིང་ཡང་མེད་པར་མཛོད། །བདག་ཅག་ཚེ་བསོད་དཔལ་འབྱོར་རྒྱས་པ་དང་། །དབང་ཐང་རླུང་རྟ་སྙན་གྲགས་ཕྱོགས་བཅུར་སྒྲོགས། །ཟས་ནོར་ལོངས་སྤྱོད་ཡིད་ལ་གང་འདོད་པ། །མི་ཟད་ནམ་མཁའ་མཛོད་བཞིན་འཕེལ་བ་དང་། །འདུས་པའི་ཚོགས་རྣམས་དབྱར་གྱི་མཚོ་ལྟར་རྒྱས། །བཤད་སྒྲུབ་བསྟན་པ་ཕྱོགས་བཅུར་རྒྱས་པ་དང་། །མི་ནོར་ཟས་གསུམ་དབང་དུ་འདུ་བར་མཛོད། །ཁྱད་པར་བདག་ལ་བསམ་ངན་སྦྱོར་རྩུབ་མཁན། །སྔ་དགྲ་ལག་བརྡར་ཕྱི་དགྲ་ཡིད་ལ་སེམས། །ད་དགྲ་ཕོད་དུ་བཙུག་པའི་དགྲ་བོ་རྣམས། །ལོ་ཟླ་ཞག་དང་ཟ་མར་མ་བཞག་ལ། །མཐུ་སྟོབས་མངོན་སྤྱོད་དྲག་པོས་ཚར་ཆོད་ཅིག །དེང་ནས་བཟུང་སྟེ་བྱང་ཆུབ་མ་ཐོབ་བར། །ལྷ་མཆོག་ཁྱེད་ཀྱིས་སྡོང་གྲོགས་མ་གཡེལ་ཞིག །ཅེས་ནོར་བུ་གཡུལ་རྒྱལ་བསང་མཆོད་འདི་ནི་ལྕགས་མོ་བྱ་ལོར་འདུ་ཁང་གསར་རྙིང་དང་། །དུང་འཁོར་བཞེངས་སྐབས་ཆེད་དུ་དམིགས་ཏེ། ཟླ་༧ཚེས་༧བཟང་པོར་ཐུབ་བསྟན་ཆོས་ཀྱི་རྡོ་རྗེས་བྲིས་པ་དགེ་ལེགས་སུ་གྱུར་ཅིག །སརྦ་མངྒ་ལཾ།