གནོད་སྦྱིན་ཙིའུ་དམར་པོའི་རྟགས་བསྟོད་ཆུང་བ་གནམ་ལྕགས་ཐོག་མདའ་ཞེས་བྱ་བ་བཞུགས་སོ།།

ཀ་དག་ངང་ལས་ཁྲོས་པའི་གནོད་སྦྱིན་ཆེ། །ཁ་དོག་མི་བཟད་བསྐལ་བའི་མེ་ལྟར་འབར། །ག་ཤལ་མགོ་ཕྲེང་མི་མགོའི་རྒྱན་གྱི་སྤྲས། །ང་བདག་རྒྱལ་འགོང་དབྱིངས་སུ་སྒྲོལ་ལ་བསྟོད། །ཅ་ཅོའི་གདུང་བ་དྲག་པོས་ཁྱོད་འབོད་ཚེ། །ཆ་ལུགས་གཅིག་ཏུ་མ་ངེས་ཅིར་ཡང་སྟོན། །ཇ་ཆང་ཤ་སོགས་བཤམས་པའི་གནས་མཆོག་འདིར། །ཉ་རྒྱས་བཞིན་དུ་དགྱེས་པའི་མཆོད་པ་འབུལ། །ཏ་ཐཱ་ག་ཏའི་བསྟན་ལ་གནོད་བྱེད་པའི། །ཐ་བ་ལྟ་བུར་མ་རུང་སེམས་འཆང་བ། །ད་ལྟ་ཉིད་དུ་དྲག་པོའི་ཕྲིན་ལས་ཀྱིས། །ན་ཚ་རྐྱེན་ངན་དྲག་པོ་སྦྱོར་ལ་བསྟོད། །པ་སངས་ལྟ་བུ་ལྷག་བསམ་དག་པ་ཡི། །ཕ་མས་བུ་ལ་བརྩེ་བ་ཇི་བཞིན་དུ། །བ་མཆོག་ནོར་གྱི་བང་མཛོད་ལྟ་བུ་ཡིས། །མ་ལུས་གང་འདོད་དངོས་གྲུབ་སྩོལ་ལ་བསྟོད། །ཙ་ར་ཤེལ་སྒོང་ཕྱི་ནང་གསང་བའི་རྟེན། །ཚ་ཊཾ་ཀ་དང་རྒྱལ་མཚན་འཕན་འཕུར་གཡོ། །ཛ་ཧུའི་རྒྱུན་བཞིན་བཏུང་བ་རྒྱ་མཚོར་བསྐྱིལ། །ཝ་ལྟར་ཞུམ་པའི་དགྲ་བོ་སྒྲོལ་ལ་བསྟོད། །ཞྭ་ལྷམ་གོ་ཁྲབ་མདའ་མདུང་མཚོན་ཆའི་རིགས། །ཟ་བྱེད་གཅན་གཟན་ཁྱི་དམར་དཔའ་གཏུམ་རྒོད། ། འ་འུར ་དབྱངས་དང་རོལ་མོའི་མཆོད་པ་འབུལ། །ཡ་མཚན་ལྡན་པའི་ལྷ་མཆོག་ཁྱོད་ལ་བསྟོད། །ར་ཛ་གནོད་སྦྱིན་ཆེན་པོ་ཁྱོད་ཉིད་ནི། །ལ་ལུང་མང་པོ་བརྒལ་ཀྱང་གཡར་དམ་ཚིག །ཤ་སྟག་ཉིན་མཚན་དུས་དྲུག་མི་གཡེལ་བར། །ས་ཕྱོགས་གང་དུ་འགྲོའམ་སྡོད་ཀྱང་རུང་། །ཧྱ་གྷྲཱྀ་ཝའི་བཀའ་སྟོད་མཐུ་ཆེན་པོས། །ཨ་མའི་བུ་ལ་བརྩེ་བ་ཇི་བཞིན་དུ། །རྟག་ཏུ་སྒྲུབ་པོའི་རེ་འདོད་སྐོང་ལ་བསྟོད། །གང་ལ་ཅི་འདོད་དྲན་པ་ཙམ་གྱིས་ཀྱང་། །རྣམ་བཞིའི་ཕྲིན་ལས་དབྱར་གྱི་མཚོ་ཆེན་ལྟར། །འཛད་མེད་དངོས་གྲུབ་ཐོགས་མེད་སྩོལ་མཛད་པ། །གནོད་སྦྱིན་དགྲ་ལྷའི་གཙོ་བོ་ཁྱོད་ལ་བསྟོད། །སྐུ་མདོག་དུས་མཐའི་མེ་ལྟར་འབར་བ་ལ། །ཤིན་ཏུ་རྔམ་པ་གནོད་སྦྱིན་ཁྲོས་པའི་སྐུ། །མི་བཟད་རྡོ་རྗེའི་གད་མོ་ཧ་ཧར་བཞད། །ཐུགས་ནི་སྙིང་རྗེའི་ཉམས་དང་ལྡན་ལ་བསྟོད། །གཡས་པའི་ཞགས་པས་དགྲ་བོའི་རྐེ་ནས་འཆིང་། །གཡོན་པས་མདུང་དམར་ཉམས་པའི་སྙིང་ལ་བསྣུན། །ཅང་ཤེས་བྲ་བོ་རླུང་གཤོག་ཅན་ལ་ཆིབས། །གནོད་སྦྱིན་ཙིའུ་དམར་པོ་ཁྱོད་ལ་བསྟོད། །སྐུ་མདོག་དཀར་སེར་ཞལ་གཅིག་ཕྱག་གཉིས་པ། །བསེ་མདའ་བསེ་གཞུ་དགྲ་བོའི་སྙིང་ལ་བརྡེག །ཆིབས་སུ་སྨུག་པོ་ཤ་གདོང་ཅན་ལ་ཆིབས། །སྐུ་ལྷ་ཞལ་གྱི་ལྷ་བཙན་ཁྱོད་ལ་བསྟོད། །པད་རག་མདོག་ཅན་འོད་ཟེར་ཕྱོགས་བཅུར་འཕྲོ། །ཟངས་ཞགས་འདེབས་ཤིང་ཤང་ལང་དགྲ་ལ་བརྡེག །ཆིབས་སུ་མཚལ་བུ་རྟིང་དཀར་ཅན་ལ་ཆིབས། །གྲོ་ཤོད་བོད་ཀྱི་རྒང་དམག་རྗེ་ལ་བསྟོད། །མདོག་དམར་མི་བཟོད་གཏུམ་དྲག་ཁྲོས་པའི་སྐུ། །ལྕགས་མདུང་བསྣམས་ཤིང་སྦྲུལ་ཞགས་དགྲ་ལ་འཕེན། །གསེར་གྱི་མདོག་ཅན་རླུང་གཤོག་ཅན་ལ་ཆིབས། །ར་ཙ་གོས་སྔོན་ཀླུ་བཙན་ཁྱོད་ལ་བསྟོད། །བྱེ་རུའི་ལྷུན་པོ་ལྟ་བུར་འཁྱུད་པ་བཞིན། །བསེ་མདུང་དམར་པོ་བཙན་གྱི་རྒྱུ་ཞགས་བསྣམས། །རྐྱང་དམར་དབོ་དཀར་མྱུར་མགྱོགས་ཅན་ལ་ཆིབས། །རྡོ་རིང་དམར་པོའི་གྲི་བཙན་ཁྱོད་ལ་བསྟོད། །མར་གད་ལྷུན་པོ་ལྟ་བུར་བརྗིད་པའི་སྐུ། །དར་ནག་རུ་མཚོན་འབྲིང་ཞགས་བླ་ལ་འདེབས། །རག་པ་གཞུང་ནག་གསེར་གྱི་མདོག་ཅན་ཆིབས། །ཀཾ་ཀ་ཐོད་ནག་བདུད་བཙན་ཆེན་པོར་བསྟོད། །ཁྲག་མདོག་བཟོད་པར་དཀའ་བའི་གཟི་བརྗིད་སྐུ། །བསེ་མདུང་བསྣམས་ཞིང་ཟངས་ཀྱི་རལ་གྲི་འཕྱར། །རླུང་གཤོག་རྟ་ཡིས་སྟོང་གསུམ་ཡུད་ཀྱིས་བསྐོར། །རྩལ་ཐོགས་རྒྱུག་གི་གྲི་བཙན་ཁྱོད་ལ་བསྟོད། །སྡེ་བརྒྱད་དྲེགས་པའི་དམག་ཚོགས་བསམ་མི་ཁྱབ། །གནམ་ས་རི་ལུང་བར་སྣང་ཁྱོན་ཀུན་གང་། །མདོག་དང་ཕྱག་མཚན་སྣ་ཚོགས་ཅིར་ཡང་སྟོན། །ཅི་བགྱིས་བཀའ་ཉན་ལས་རྣམས་སྒྲུབ་ལ་བསྟོད། །ཧཱུྃ་ཧྲཱིཿ པདྨ་དབང་གི་བཀའ་ཉན་ཐ་ཚིག་ཅན། །འཇིག་རྟེན་འདི་ན་ཆེ་བཙན་འགྲན་ཟླ་བྲལ། །ཆོས་ཉིད་དབྱིངས་ལས་བཞེངས་པའི་གནོད་སྦྱིན་ཆེ། །འཁོར་བཅས་བདག་ལ་གསན་ཅིང་དགོངས་སུ་གསོལ། །བདག་ཅག་མ་རིག་འཐིབ་པོའི་རྨོངས་གྱུར་པ། །ཉོན་མོངས་དུག་ལྔ་འཆོལ་ཉོག་སྤྱོད་པའི་མཐུས། །རང་བཞིན་ཁ་ན་མ་ཐོའི་ཉེས་པ་ཀུན། །གནོང་འགྱོད་དྲག་པོའི་མཐོལ་ཞིང་བཤགས་པར་བགྱི། །སྣང་སྲིད་ཡེ་ནས་ལྷ་དང་ལྷ་མོ་ལ། །དགྲ་གཉེན་ཕྱོགས་ཆའི་སྡང་ཞེན་ཕྱེ་བ་དང་། །སྒོམ་དང་སྒྲུབ་ལ་གཡེལ་བ་གང་གྱུར་པ། །སྐུ་ཡི་དམ་ཚིག་ཉམས་པ་འཐོལ་ལོ་བཤགས། །སྒྲ་གྲགས་ཐམས་ཅད་སྔགས་ཀྱི་རང་སྒྲ་སྟེ། །ཐ་མལ་སྒྲ་སྐད་བདེན་པར་འཛིན་པའི་བློས། །བཟླས་བརྗོད་མ་དག་འཆལ་གཏམ་ཇི་སྙེད་ཀུན། །གསུང་གི་དམ་ཚིག་ཉམས་པ་མཐོལ་ལོ་བཤགས། །ཆོས་ཀྱི་དབྱིངས་ལ་རེ་དོགས་སྤྲོས་བྲལ་ཡང་། །གཟུང་འཛིན་རྣམ་རྟོག་མཚན་མར་འཛིན་པ་ལ། །གནས་ལུགས་ལྟ་བ་ཇི་བཞིན་མ་རྟོགས་པས། །ཐུགས་ཀྱི་དམ་ཚིག་ཉམས་པ་མཐོལ་ལོ་བཤགས། །གནོད་སྦྱིན་ཆེན་པོའི་ཕྱི་ནང་གསང་བའི་རྟེན། །བླ་རྡོ་དམ་རྫས་སྲོག་འཁོར་དམ་རྫས་དང་། །གཞན་ཡང་འབག་བཙོག་ཉམས་པར་གང་གྱུར་པ། །གནོང་ཞིང་འགྱོད་པའི་སེམས་ཀྱིས་མཐོལ་ཞིང་བཤགས། །རྟ་མཆོག་རྒྱལ་པོ་པདྨ་ཧེ་རུ་ཀ །གདུལ་དཀའ་འདུལ་བའི་གཤེད་དུ་ཁྲོས་པའི་སྐུ། །བདག་ཅག་མ་རིག་འཐིབ་པོའི་རྐྱེན་དབང་གིས། །འཇིག་རྟེན་དྲེགས་པ་རང་རྒྱུད་བཟུང་བ་བཤགས། །རོལ་བ་རྐྱ་བདུད་འཁོར་གྱི་སྡེ་བརྒྱད་ཚོགས། །རང་རང་གཡོག་འཁོར་ལྷ་སྲིན་འབུམ་སྡེ་ནི། །གནོད་སྦྱིན་ཆེན་པོའི་སྤྲུལ་པའི་རོལ་གར་ལས། །ཐ་དད་མ་གྲུབ་སོ་སོར་འཛིན་པ་བཤགས། །མདོར་ན་ཁྱོད་ཀྱི་ཐུགས་དང་འགལ་བའི་ལས། །སྤྱི་དང་ཁྱད་པར་གྱུར་པའི་དམ་ཚིག་ལས། །འགལ་ཞིང་ཉམས་པར་གྱུར་པ་གང་མཆིས་པ། །མཐོལ་ཞིང་བཤགས་སོ་བྱང་ཞིང་དག་པར་མཛོད། །ཅེས་པ་གནོད་སྦྱིན་ཙིའུ་དམར་པོའི་རྟགས་བསྟོད་བཤགས་པ་དང་འབྲེལ་བ་འདི་ལྟ་བུ་ཞིག་མཆོད་རིག་འཛིན་ངག་དབང་ནས་དགོས་ཞེས་ཡང་ཡང་བསྐུལ་བ་ལ་བརྟེན་ནས་རྫོགས་སྤྲུལ་ལྔ་པ་ཐུབ་བསྟན་ཆོས་ཀྱི་རྡོ་རྗེས་བྲིས་པའོ། །