རྟ་མགྲིན་ནག་པོ་ལྕགས་རལ་ཅན་གྱི་གསེར་སྐྱེམས་ཁྲག་འཐུང་དགྱེས་པའི་མཆོད་སྤྲིན་བཞུགས་སོ།།
ཧྲཱིཿ སྐྱེ་མེད་རྣམ་དག་ཆོས་དབྱིངས་ངང་ཉིད་ལས། །འགགས་མེད་སྙིང་རྗེ་ཆེན་པོའི་རང་མདངས་ལས། །ཆོས་ཉིད་ཞི་བའི་ངང་ལས་མ་གཡོས་ཀྱང་། །གདུག་པ་འདུལ་ཕྱིར་ཕྲིན་ལས་དྲག་པོའི་སྐུ། །ཁམས་གསུམ་དབང་སྡུད་སྲིད་གསུམ་ཟིལ་གྱི་གནོན། །བྱད་མ་དགྲ་བགེགས་ཀུན་གྱི་གཤེད་མ་ཆེ། །མཐིང་ནག་གྲུ་གསུམ་འབར་བའི་དཀྱིལ་འཁོར་ན། །བསྐལ་བའི་མེ་དཔུང་རབ་ཏུ་འབར་བའི་ཀློང་། །རྒྱལ་བསེན་གཟའ་ཀླུ་དགྲ་བགེགས་བསྣོལ་བའི་སྟེང་། །སྣ་ཚོགས་པདྨ་ཉི་ཟླའི་གདན་སྟེང་དུ། །དབང་ཆེན་ཁྲོ་བོའི་རྒྱལ་པོ་རྟ་མཆོག་དཔལ། །མཐིང་ནག་རྔམ་པ་ཤིན་ཏུ་ཁྲོས་པའི་སྐུ། །ཕྱག་གཡས་རལ་གྲིས་དྲེགས་པའི་སྲོག་རྩ་གཅོད། །གཡོན་པས་ལྕགས་ཀྱུས་མ་རུང་སྙིང་ནས་འདྲེན། །གནམ་ལྕགས་རལ་བས་སྟོང་ཁམས་མུན་ལྟར་གཏིབ། །ལྕགས་རལ་བསིགས་པའི་གསེབ་ནས་ཁྲོ་ཆུང་གི།སྤྲུལ་པ་འཕྲོ་བས་ལོག་འདྲེན་རྡུལ་དུ་བརླག །སྤྱི་བོར་རྟ་མགོ་ལྗང་ཞུར་རྟ་སྐད་འཚེར། །གར་གྱི་ཉམས་དགུ་རྣམ་པར་རོལ་བའི་སྐུ། །དར་ནག་བེར་དང་དུར་ཁྲོད་ཆས་ཀྱིས་བརྒྱན། །ཞབས་གཉིས་གཡས་བརྐྱངས་གཡོན་བསྐུམ་དོར་སྟབས་བསྒྲད། །ཧཱུྃ་ཕཊ་སྒྲ་ཡིས་ལོག་ལྟ་མ་ལུས་འཇོམས། །བ་སྤུའི་གསེབ་ནས་མེ་ཡི་ཚྭ་ཚྭ་འཕྲོ། །དྲེགས་པའི་ཡོངས་རྗེ་རྟ་མགྲིན་ནག་པོའི་སྐུ། །དཔའ་རྩལ་ཆེ་བས་རི་རབ་ཀླད་ལ་བསྐོར། །རྔམ་པའི་སྒྲ་ཡིས་སྟོང་གསུམ་འདར་ཞིང་སྔངས། །མྱུར་མགྱོགས་ཆེ་བའི་བར་སྣང་གློག་དང་མཚུངས། །དཔལ་ཆེན་ཁྱོད་ཀྱི་སྤྲུལ་པའི་ཕོ་ཉ་ནི། །གླིང་བཞི་འཇིག་རྟེན་མཐའ་དག་གང་བར་བྱེད། །འབྲུ་བཅུད་སྟོང་སྦྱར་རྒྱ་ཇ་ངད་ལྡན་འདི། །འཆི་མེད་ཡེ་ཤེས་བདུད་རྩིར་བྱིན་བརླབས་པ། །རྨད་བྱུང་ངོ་མཚར་རོ་བརྒྱ་ལྡན་པའི་བཅུད། །ཡེ་ཤེས་བདུད་རྩིའི་རྒྱ་མཚོར་བྱིན་བརླབས་པ། །ལྷ་མཆོག་ཁྱེད་ལ་ཕུལ་བའི་བྱིན་བརླབས་ཀྱིས། །ཁྲོ་རྒྱལ་མཆོག་ལ་རྟོག་པ་མི་མངའ་ཡང་། །སྔོན་གྱི་ཐུགས་བསྐྱེད་སྨོན་ལམ་རྗེས་དགོངས་ལ། །གདུལ་བྱ་སོ་སོའི་གང་ལ་གང་འཚམས་ཀྱི། །ཞི་རྒྱས་དབང་དྲག་ཕྲིན་ལས་རྣམ་བཞི་ཡིས། །བུམ་བཟང་དཔག་བསམ་ཤིང་དང་ཡིད་བཞིན་ཚུལ། །ཇི་ལྟར་འདོད་པའི་དོན་རྣམས་མ་ལུས་ཀུན། །ད་ལྟ་ཉིད་དུ་བདག་ལ་སྩལ་ནས་ཀྱང་། །ཚེ་འདིར་བར་ཆད་དགྲ་ལས་རྣམ་རྒྱལ་ཞིང་། །ཁྱད་པར་ཀླུ་གཉན་ས་བདག་གདུག་པ་ཡི། །ནད་གདོན་བགེགས་ཀྱི་འཚེ་བ་མ་ལུས་པ། །སྐྱེ་མེད་ཆོས་དབྱིངས་ནམ་མཁའ་སྟོང་པ་ལ། །རེ་དང་དོགས་པའི་མཚན་མ་མི་མངའ་ཡང་། །འོན་ཀྱང་རྣམ་རྟོག་སྤྲིན་ཚོགས་རང་དག་ནས། །ཟག་མེད་བདེ་བས་ནམ་ཡང་ངོམས་པར་མཛོད། །རྟག་ཏུ་ཁྱེད་ལ་གསོལ་དང་མཆོད་པའི་མཐུས། །བྱང་ཆུབ་ལམ་ལ་བར་ཆད་མི་འབྱུང་ཞིང་། །མྱུར་དུ་སངས་རྒྱས་ས་ལ་འགོད་པར་ཤོག །ཅེས་པ་འདི་ཡང་བསྟན་ལ་ཕན་པའི་ལྷག་བསམ་རྣམ་པར་དག་པས་རྫོགས་སྤྲུལ་ལྔ་པ་ཐུབ་བསྟན་ཆོས་ཀྱི་རྡོ་རྗེས་མགོན་ཁང་དབང་དྲག་རོལ་བ་ནས་ས་ཕོ་རྟ་ལོའི་ཟླ་ཚེས་ལ་བྲིས་པ་དགེ་ལེགས་སུ་གྱུར་ཅིག །