ཉང་གཏེར་མགོན་པོ་ཕྱག་བཞིའི་གསེར་སྐྱེམས་ཁྲོ་རྒྱལ་དགྱེས་པའི་གླུ་དབྱངས་ཞེས་བྱ་བ་བཞུགས་སོ།།
ཧཱུྃ། སྔོན་ཚེ་འདས་དུས་བསྐལ་བའི་དང་པོ་ལ། །མ་རུང་དམ་ཉམས་གདུལ་དཀའ་འདུལ་བའི་ཕྱིར། །ཆོས་ཉིད་ཞི་བས་འདུལ་བར་མི་ནུས་པ། །ཁྲོ་རྒྱལ་འབར་བའི་གར་གྱིས་གདུལ་བར་བྱ། །ཤིན་ཏུ་འབར་བ་ཁྲོ་བོའི་ཚུལ་འཆང་བ། །ཆོས་སྐུ་འགྱུར་མེད་དཔལ་ལྡན་ནག་པོ་ཆེ། །དངོས་གྲུབ་འབྱུང་གནས་དཔལ་མགོན་ཕྱག་བཞི་པ། །མཐིང་ནག་མི་བཟད་གར་དགུའི་ཉམས་དང་ལྡན། །མི་བསྲུན་བཟོད་དཀའི་གཏུམ་ཆེན་ཞལ་གཅིག་པ། །ཕྲིན་ལས་རྣམ་བཞིས་འགྲོ་བ་འདུལ་བའི་ཕྱིར། །ནག་པོ་ཆེན་པོ་ཕྱག་བཞིའི་ཚུལ་བསྟན་པ། །ཞལ་ནས་ཧ་ཧའི་གད་མོ་ཕྱོགས་བཅུར་སྒྲོག །ཉོན་མོངས་བདུད་བཞི་འདུལ་མཛད་དགྲ་སྙིང་དང་། །ལྷ་མིན་གཡུལ་ལས་བཟློག་བྱེད་རལ་གྲི་གཡས། །ཁམས་གསུམ་དབང་དུ་སྡུད་བྱེད་ཐོད་ཁྲག་དང་། །བགེགས་རྣམས་འདུལ་བྱེད་ཁ་ཊཱྃ་གཡོན་ན་བསྣམས། །ཐབས་དང་ཤེས་རབ་དབྱིངས་ལས་བྱུང་བ་ཡི། །ཁྲོས་པའི་ཞབས་གཉིས་ཕྱེད་སྐྱིལ་བཞུགས་པ་ནི། །ཁམས་གསུམ་འཁོར་བའི་སྡུག་བསྔལ་འཇོམས་པར་བྱེད། །མི་མགོ་རློན་པའི་ཕྲེང་བས་སྐུ་ལ་བརྒྱན། །སྦྲུལ་ཆུན་རིགས་ལྔ་སྟག་ཤམ་རྒྱན་གྱིས་སྤྲས། །མཐུ་སྟོབས་ནུས་པས་རི་རབ་ཐལ་བར་བརླག །བསྐལ་བའི་མེ་དཔུང་འབར་བའི་ཀློང་ན་བཞུགས། །སྦྱོར་བའི་ཡུམ་ཆེན་ལྷ་མོ་ཙནྟི་ཀ །ནག་མོ་དུར་ཁྲོད་རུས་པའི་རྒྱན་གྱིས་སྤྲས། །གཅེར་མོ་གྲི་གུག་ཐོད་པ་ཁྲག་བཀང་བསྣམས། །བདེ་བ་ཆེན་པོའི་ཡབ་ཡུམ་མཉམ་པར་སྦྱོར། །ཕྱི་རོལ་འཁོར་ལོ་རྩིབས་བཞི་ལ་གནས་པའི། །སྐུ་ཡི་ལས་མཁན་དཔལ་མགོན་བྱ་རོག་གདོང་། །གསུང་གི་ལས་མཁན་འབར་མ་བྱ་ཞོན་མ། །ཐུགས་ཀྱི་ལས་མཁན་གཟའ་བདུད་ར་ཧུ་ལ། །དྲག་པོའི་ལས་བྱེད་འཇིགས་བྱེད་སེངྒེའི་གདོང་། །དེ་ཡི་ཕྱི་རོལ་འཁོར་ལོ་རྩིབས་བཞི་ལ། །རྒྱལ་པོ་གཤིན་རྗེ་བཙན་དང་གནོད་སྦྱིན་སོགས། །ཕྱི་རོལ་ཁྱམས་དང་དུར་ཁྲོད་ལ་གནས་པའི། །ནག་པོ་སྟོང་དང་ཤ་ཟ་འབུམ་གྱི་ཚོགས། །མ་མོ་བྱེ་བའི་འཁོར་ཚོགས་བསམ་མི་ཁྱབ། །ནཱ་ལནྡྲ་དང་རྒྱ་གར་རྡོ་རྗེའི་གདན། །རབ་འཇིགས་དུར་ཁྲོད་བསིལ་བ་ཚལ་སོགས་ནས། །རྣལ་འབྱོར་གདུང་བ་དྲག་པོས་འབོད་པའི་ཚེ། །སྔོན་གྱི་དམ་ཚིག་གཉན་པོ་རྗེས་དགོངས་ལ། །སྐད་ཅིག་ཙམ་གྱིས་གནས་འདིར་གཤེགས་སུ་གསོལ། །གསང་ཆེན་རོལ་བའི་དུར་ཁྲོད་གཞལ་ཡས་འདིར། །བརྟན་པར་བཞུགས་ལ་དངོས་གྲུབ་སྩལ་དུ་གསོལ། །སྒོ་གསུམ་གུས་པས་ཕྱག་འཚལ་བསྟོད་པར་བགྱིད། །ཀ་དག་དབྱིངས་སུ་གཙང་རྨེ་མི་མངའ་ཡང་། །ཁ་དོག་དྲི་རོ་ཕུན་སུམ་ཚོགས་པའི་དཔལ། །ག་ལེར་འདོད་ཡོན་བཀྲ་བའི་གསེར་སྐྱེམས་འདི། །ང་བདག་གཟུང་འཛིན་བྲལ་ཕྱིར་བཞེས་སུ་གསོལ། །ཅ་ག་སྤྱན་གཟིགས་སྣ་ཚོགས་བསམ་མི་ཁྱབ། །ཆ་ཤས་མ་ཡིན་ནམ་མཁའི་སྐར་ལྟར་བཀྲ། །ཇ་ཆང་གསེར་སྐྱེམས་གཡུ་སྐྱེམས་མཆོད་པ་འདི། །ཉ་རྒྱས་བཞིན་ཏུ་དགྱེས་པར་བཞེས་སུ་གསོལ། །ཏ་ཐཱ་ག་ཏ་མཚོ་སྐྱེས་རྡོ་རྗེ་ཡིས། །ཐ་ཚིག་དམ་ལ་བཞག་པའི་བསྟན་སྲུང་ཆེ། །ད་ལྟ་རིག་འཛིན་རྣལ་འབྱོར་བདག་ཅག་གིས། །ན་མར་ཇི་བཞིན་གསེར་སྐྱེམས་མཆོད་པ་འབུལ། །པ་ཏྲའི་འཁྱུད་ཀློང་ལྟ་བུའི་འཁོར་བ་ན། །ཕ་མཐའ་ཡས་པའི་འགྲོ་བ་འཁྱམས་པ་རྣམས། །བ་མཆོག་གཏེར་བུམ་ལྟ་བུའི་དངོས་གྲུབ་ནི། །མ་ལུས་སྩོལ་ཕྱིར་གསེར་སྐྱེམས་མཆོད་པ་འབུལ། །ཙ་མ་ར་ལྟར་ཁེངས་པའི་དམ་ཉམས་ཚོགས། །ཚ་བའི་མེ་ཡི་དབལ་གྱིས་བསྲེགས་པའི་ཕྱིར། །ཛ་ཧུའི་བུ་མོའི་རྒྱུན་བཞིན་གསེར་སྐྱེམས་ལ། །ཝ་ལེར་འདོད་ཡོན་བརྒྱན་པའི་མཆོད་པ་འབུལ། །ཞྭ་མོ་ལྟ་བུར་གཙུག་གི་རྒྱན་གཅིག་པུ། །ཟ་བྱེད་སྣང་སྲིད་དྲེགས་པ་ཡོངས་ཀྱི་གཙོ། །འ་ཅག་སྒྲུབ་ལ་དངོས་གྲུབ་སྩོལ་པའི་ཕྱིར། །ཡ་མཚན་ལྡན་པའི་གསེར་སྐྱེམས་མཆོད་པ་འབུལ། །རཱ་ཛ་རྒྱལ་འགོང་དམ་སྲིའི་བརླམས་པ་རྣམས། །ལ་ལ་ཙམ་མིན་ཐམས་ཅད་བསྒྲལ་ནས་ནི། །ཤ་དང་ཁྲག་གི་མཆོད་པ་ཕུལ་བ་འདི། །ས་ལམ་ཡོན་ཏན་རྒྱས་ཕྱིར་བཞེས་སུ་གསོལ། །ཧ་ལའི་ཉོན་མོངས་དུག་ལྔས་མནར་བ་རྣམས། །ཨ་ལ་ལ་ཡི་ངོ་མཚར་རྡོ་རྗེའི་གླུ། །དུག་ལྔ་ཡེ་ཤེས་ལྔ་ཡི་སྐུར་གྱུར་ནས། །རྣམ་མཁྱེན་སངས་རྒྱས་གོ་འཕང་ཐོབ་པར་ཤོག །ཅེས་ཉང་གཏེར་མགོན་པོ་ཕྱག་བཞིའི་གསེར་སྐྱེམས་འདི་ཉིད་མགོན་ཁང་དབང་དྲག་རོལ་བ་ནས་ས་ཕོ་རྟ་ལོའི་དམར་ཕྱོགས་མཁའ་འགྲོ་འདུ་བའི་དུས་ཆེན་ལ་རྫོགས་སྤྲུལ་ལྔ་པ་ཐུབ་བསྟན་ཆོས་ཀྱི་རྡོ་རྗེས་བསྟན་ལ་ཕན་པའི་ལྷག་བསམ་དག་པས་བྲིས་བ་དགེའོ། །