དཔལ་ལྡན་ལྷ་མོ་སྔགས་བདག་མའི་རྟགས་བསྟོད་ཡོངས་འདུས་ལྗོན་ཤིང་ཞེས་བྱ་བ་བཞུགས་སོ།།

ཧཱུྃ་བྷྱོ། བྱང་ཤར་རྒྱ་མཚོ་ཆེན་པོའི་ཕ་རོལ་ན། །ཡོངས་འདུས་ཤིང་ཆེན་ལོ་འདབ་རྒྱས་པའི་དྲུང་། །མུ་ལེ་མཐིང་གི་རྒྱ་མཚོའི་ཀློང་ཡངས་ནས། །མཐིང་ཤུན་འོད་བཅས་ཐོད་པའི་སྐུ་མཁར་ནས། །མེ་རླུང་འཚུབ་མ་དམར་ནག་འབར་བའི་ཀློང་། མི་ཁྲག་རྟ་ཁྲག་རྒྱ་མཚོ་ཆེན་པོ་བསྐྱིལ། །མི་རོ་རྟ་རོ་འབུམ་ཁྲི་རྐྱལ་དུ་བཀྲམ། །འཇིགས་ཤིང་སྐྱི་གཡའི་གནས་མཆོག་དམ་པ་ནས། །མ་བདུད་ཀུན་གྱི་རྒྱལ་མོ་སྔགས་བདག་མ། །སྔོན་ཚེ་རྒྱལ་བ་རྣམས་ཀྱི་སྤྱན་སྔ་རུ། །ཇི་ལྟར་ཞལ་བཞེས་ཐུགས་དམ་དྲན་མཛོད་ལ། །རྣལ་འབྱོར་བདག་ཅག་ཐུགས་རྗེས་ཉེར་དགོངས་ཏེ། །སྐད་ཅིག་ཙམ་གྱི་གནས་འདིར་གཤེགས་སུ་གསོལ། །མ་ཅིག་དཔལ་གྱི་རྒྱལ་མོ་སྐུ་བསྐྱོད་ཚེ། །གཡུ་ཡི་ན་བུན་མང་པོ་ཐུ་ལུ་ལུ། །གཡུ་འབྲུག་མང་པོའི་སྒྲ་སྐད་དི་རི་རི། །གློག་ལྕེ་དམར་པོ་མེ་འོད་ཁྱུགས་སེ་ཁྱུག །ཆིབས་སུ་རྒྱ་བོང་དེ་ནི་དམར་གྭ་ཆིབས། །དྲེགས་པ་བདུན་དང་མ་མོ་བྱེ་བ་འབུམ། །ཁོལ་མོ་ཡང་ཁོལ་ཡང་བྲན་ཚོགས་དང་བཅས། །སྐད་ཅིག་ཙམ་གྱིས་གནས་འདིར་གཤེགས་ནས་ཀྱང་། །གསང་ཆེན་རོལ་པའི་དུར་ཁྲོད་ཆེན་པོ་འདིར། །མ་ལུས་འཁོར་བཅས་གནས་འདིར་བཞུགས་སུ་གསོལ། །བླ་མེད་བསྟན་པ་གཉན་པོ་བསྲུང་བའི་ཕྱིར། །དང་བའི་ཡིད་ཀྱི་གུས་པས་ཕྱག་འཚལ་ལོ། །རབ་འབྱམས་ཕྱོགས་བཅུའི་ཞིང་ཁམས་དཔག་མེད་ན། །དངོས་འབྱོར་ཡིད་སྤྲུལ་མཆོད་རྫས་ཇི་སྙེད་ཀུན། །ཀུན་བཟང་མཆོད་པའི་སྤྲིན་ལྟར་བཤམས་ནས་ཀྱང་། །མ་ཅིག་ལྷ་མོ་འཁོར་དང་བཅས་ལ་འབུལ། །མ་ཅིག་སྐུ་མདོག་མཐིང་ནག་བཞུགས་པ་ནི། །དོན་དམ་ཐིག་ལེ་ཉག་གཅིག་མཚོན་པའི་བརྡ། །མ་ཡི་སྤྱན་གསུམ་ཕྱོགས་བཅུར་གཟིགས་པ་ནི། །འཁོར་འདས་ཐམས་ཅད་དབང་དུ་སྡུད་པའི་རྟགས། །མ་ཡི་ཤངས་ནས་འཐོར་རླུང་འཚུབ་པ་ནི། །དྲག་པོ་མངོན་སྤྱོད་ལས་ལ་མྱུར་བའི་རྟགས། །མ་ཡི་རྣོ་དབལ་མཆེ་བ་གཙིགས་པ་ནི། །གནོད་བྱེད་འབྱུང་པོ་མ་ལུས་འདུལ་བའི་རྟགས། །མ་ཡི་ལྗགས་འདྲིལ་གློག་ལྟར་འཁྱུགས་པ་ནི། དགྲ་ལ་ལྟས་ངན་སྣ་ཚོགས་གཏོང་བའི་རྟགས། །མ་ཡི་ཞལ་དུ་བམ་ཆེན་སྒྲིལ་བ་ནི། །ཟ་བྱེད་ཚོགས་རྣམས་དབང་དུ་སྡུད་པའི་རྟགས། །མ་ཡི་དབུ་སྐྲ་གྱེན་ཐུར་གཏིབ་པ་ནི། །སྤྲུལ་པ་མང་པོ་ལས་ལ་འགྱེད་པའི་རྟགས། །མ་ཡིས་ཐོད་སྐམ་དབུ་བརྒྱན་བྱས་པ་ནི། །ཁྲག་འཐུང་རིགས་ལྔ་དབུ་ལ་བཞུགས་པའི་རྟགས། །མ་ཡི་སྤྱི་གཙུག་རྨ་བྱས་བརྒྱན་པ་ནི། །ཕྱོགས་བཅུའི་རྒྱལ་བ་རྣམས་ཀྱིས་དབང་བསྐུར་རྟགས། །མ་ཡི་སྤྱི་བོར་ཟླ་བས་བརྒྱན་པ་ནི། །ཆོས་ཀུན་མ་འདྲེས་ས་ལེར་མཁྱེན་པའི་རྟགས། །མ་ཡི་ལྟེ་བར་ཉི་མ་འཆར་བ་ནི། །ཁམས་གསུམ་སྐྱེ་འགྲོ་ཟིལ་གྱི་གནོན་པའི་རྟགས། །མ་ཡི་སྙན་གཡས་སེངྒེ་འཕྲོ་བ་ནི། །ཕྱོགས་བཅུའི་རྒྱལ་བའི་ཞིང་ཁམས་སྐྱོང་པའི་རྟགས། །མ་ཡི་སྙན་གཡོན་སྦྲུལ་གྱིས་བརྒྱན་པ་ནི། །དགྲ་ལ་ཆོ་འཕྲུལ་སྣ་ཚོགས་འགྱེད་པའི་རྟགས། །མ་ཡིས་མི་རྩིབ་རེ་ལྡེ་གསོལ་བ་ནི། །རྒྱལ་བསེན་ས་བདག་དབང་དུ་སྡུད་པའི་རྟགས། །མ་ཡི་སྐུ་སྟོད་གཡང་གཞི་གསོལ་བ་ནི། །ཤ་ཟའི་ཚོགས་རྣམས་དབང་དུ་སྡུད་པའི་རྟགས། །མ་ཡི་སྐུ་སྨད་སྟག་ཤམ་གསོལ་བ་ནི། །ཆེ་བའི་དཔའ་རྟགས་གཡུལ་ལས་རྒྱལ་བའི་རྟགས། །མ་ཡིས་མགོ་ཕྲེང་དོ་ཤལ་བྱས་པ་ནི། །ཁམས་གསུམ་འཁོར་བ་གནས་ནས་འདྲེན་པའི་རྟགས། །མ་ཡིས་བོང་བུ་དམར་གྭ་ཆིབས་པ་ནི། །འགོང་པོའི་སྡེ་ཚོགས་ཟིལ་གྱིས་གནོན་པའི་རྟགས། །དེ་ལ་མི་ལྤགས་གཡང་གཞིའི་བརྒྱན་པ་ནི། །དུར་ཁྲོད་ཀུན་གྱི་གཙོ་མོ་མཛད་པའི་རྟགས། །སྲིན་པོའི་ཡ་ཐོད་སྔ་རུ་བྱས་པ་ནི། །སྲིན་པོའི་སྡེ་ཚོགས་དབང་དུ་སྡུད་པའི་རྟགས། །སྲིན་པོའི་མ་ཐོད་ཕྱི་རུ་བྱས་པ་ནི། །སྡུག་བསྔལ་ཁྲག་གི་རྒྱ་མཚོ་སྐེམ་པའི་རྟགས། །སྦྲུལ་དང་རྒྱུ་མས་གོང་སྨེད་བྱས་པ་ནི། །ཀླུ་སྲིན་ཚོགས་རྣམས་དབང་དུ་སྡུད་པའི་རྟགས། །སྔ་ཤ་གཡས་ན་ཁྲམ་ཤིང་ཡ་ལ་ལ། །གཤིན་རྗེའི་དམག་ཚོགས་དབང་དུ་སྡུད་པའི་རྟགས། །སྔ་ཤ་གཡོན་དུ་ཚོན་གྲུ་ཀྱི་ལི་ལི། །མ་བདུད་སྨན་མོའི་ཚོགས་ལ་དབང་བསྐུར་རྟགས། །ཕྱི་ཤ་གཡས་སུ་ཤྭ་རྡེའུ་ཁྲ་ལ་ལ། །དམ་ཅན་ཐེའུ་རང་དབང་དུ་སྡུད་པའི་རྟགས། །ཕྱི་ཤ་གཡོན་དུ་ནད་རྐྱལ་ཕྱུ་རུ་རུ། །ནད་གཏོང་མ་མོའི་ཚོགས་ལ་དབང་བསྒྱུར་རྟགས། །རྣ་བར་དར་གྱི་ཅོད་པན་འཕུར་བ་ནི། །རྣལ་འབྱོར་སྙན་པ་ཕྱོགས་བཅུར་རྒྱས་པའི་རྟགས། །རིན་ཆེན་གཡུ་མཐུར་སྔོན་པོས་བརྒྱན་པ་ནི། །སྒྲུབ་ལ་དངོས་གྲུབ་ཅི་འདོད་སྩོལ་བའི་རྟགས། །རིན་ཆེན་གསེར་སྲབ་སེར་པོ་ཁྲོ་ལོ་ལོ། །ཕ་རོལ་བྱད་མ་ཕམ་པར་མཛད་པའི་རྟགས། །མདོ་མཚམས་ཀུན་ཏུ་མིག་གིས་བརྒྱན་པ་ནི། །འགྲོ་བའི་ལེགས་ཉེས་མ་ལུས་ཤན་འབྱེད་རྟགས། །སྙིང་དང་མགོ་བོས་ཐོང་སྡོམ་བྱས་པ་ནི། །ཉམས་པའི་གཟུགས་ཕུང་མྱུར་དུ་བཤིགས་པའི་རྟགས། །གནམ་ལྕགས་འབར་བའི་ཡོབ་ཆེན་བྱས་པ་ནི། །ཐབས་དང་ཤེས་རབ་ཟུང་དུ་འབྲེལ་བའི་རྟགས། །མེ་དཔུང་འབར་བའི་ཀློང་དུ་བཞུགས་པ་ནི། །མ་རིག་བག་ཆགས་གཞོབ་ཏུ་བསྲེགས་པའི་རྟགས། །ཧཱུྃ་བྷྱོ། མ་ཅིག་སྐུ་ལས་ཤཤསྤྲུལ་པ་རྡ་ཀི་མ། །ཆིབས་སུ་ཤུགས་ལྡན་བོང་བུ་ཁ་དཀར་ཆིབས། །ཁྲོ་གཏུམ་ལྡན་པའི་ནག་མོ་འབུམ་གྱིས་བསྐོར། །མ་མོ་བ་ལམ་དྲེལ་སྣ་མ་ལ་བསྟོད། །མ་ཅིག་གསུང་ལས་སྤྲུལ་པའི་རྡ་ཀི་མ། །ཆིབས་སུ་མི་བཟད་སྟག་མོ་རི་བཀྲ་ཆིབས། །དྲག་ཏུ་འཁྲོས་པའི་ནག་མོ་འབུམ་སྡེས་བསྐོར། །མ་མོ་སྟག་སྨན་གཟེར་འདེབས་མ་ལ་བསྟོད། །མ་ཅིག་ཐུགས་ལས་སྤྲུལ་པའི་རྡ་ཀི་མ། །ཆིབས་སུ་མགྱོགས་བྱེད་བྱ་རོག་ནག་མོ་ཆིབས། །ཤིན་ཏུ་ཁྲོས་པའི་ནག་མོ་འབུམ་གྱིས་བསྐོར། །མ་མོ་ཁྲི་སྨན་སི་ལི་མ་ལ་བསྟོད། །མ་ཅིག་ཡོན་ཏན་སྤྲུལ་བའི་རྡ་ཀི་མ། །ཆིབས་སུ་ཤུགས་ལྡན་དྲེལ་ནག་རྐང་གསུམ་ཆིབས། །དབྱིངས་ནས་ཁྲོས་པའི་ནག་མོ་འབུམ་གྱིས་བསྐོར། །མ་མོ་རྡོ་རྗེ་བ་ལམ་མ་ལ་བསྟོད། །མ་ཅིག་ཕྲིན་ལས་སྤྲུལ་པའི་ཆོས་སྐྱོང་ནི། །ཆིབས་སུ་རྔམ་བརྗིད་རྒྱ་སྟག་དར་མ་ཆིབས། །རྒྱལ་པོ་འབུམ་སྡེའི་ཚོགས་ཀྱི་འཁོར་གྱིས་བསྐོར། །ཚངས་པ་དུང་གི་ཐོར་ཚུགས་ཁྱོད་ལ་བསྟོད། །མ་ཅིག་གཉིས་མེད་སྤྲུལ་པའི་དྲེགས་པ་ནི། །ཆིབས་སུ་ཆུ་གླང་ནམ་མཁའི་མདོག་ཅན་ཆིབས། །སྙིང་རྗེ་མེད་པའི་གཤིན་རྗེ་འབུམ་གྱིས་བསྐོར། །ལས་གྱི་གཤིན་རྗེ་བྷེ་ཝ་ས་ཏྭར་བསྟོད། །མ་ཅིག་ཡོངས་སུ་འདུས་པའི་དཀྱིལ་འཁོར་ནས། །ཡོངས་འདུས་བདུད་པོ་བྱེ་བ་དགུ་རིང་ནི། །ཆིབས་སུ་བདུད་རྟ་མིག་སྨན་མདོག་ཅན་ཆིབས། །བདུད་པོ་མི་ཟན་འབུམ་གྱི་འཁོར་གྱིས་བསྐོར། །བདུད་གྱི་རྒྱལ་པོ་བྱེ་བ་དགུ་རིང་བསྟོད། །མ་མོ་མཁའ་འགྲོ་ཀུན་གྱི་དབང་ཕྱུག་མ། །ལྷ་མོ་ཀུན་གྱི་སྒྱུ་འཕྲུལ་ཆེན་མོ་ནི། །དུས་བཞིར་དབང་བསྒྱུར་དཔལ་ལྡན་སྔགས་བདག་མ། །ཆོས་ཀྱི་དབྱིངས་ལས་འབར་བའི་སྐུར་བཞེངས་ཚེ། །ཆ་ལུགས་མ་ངེས་ཅིར་ཡང་སྟོན་མཛད་ཅིང་། །ཆིབས་སུ་ཆུ་སྲིན་གཡུ་འབྲུག་གློག་ལ་ཆིབས། །རེ་འགའ་དོམ་དང་འཕར་བ་གཟིགས་ལ་ཆིབས། །རེ་འགའ་སྤྱང་ཀི་རླུང་ནག་འཚུབ་མ་ཆིབས། །རེ་འགའ་འོད་དང་སེང་གེ་དཀར་མོ་ཆིབས། །རེ་འགའ་རྒྱ་བོང་དམར་གྭ་ཆིབས་སུ་ཆིབས། །ཕྱག་ན་རལ་གྲི་མེ་ལོང་ཁྲམ་ཤིང་བསྣམས། །མདུང་དར་བེ་ཅོན་ཏྲི་ཤུལ་ནད་རྐྱལ་དང་། །རེ་འགའ་ལྕགས་ཀྱུ་ཞགས་པ་ནག་པོ་བསྣམས། །སྣ་ཚོགས་སྤྲུལ་བསྒྱུར་འགྱེད་པའི་དཔལ་ལྡན་མ། །འཁོར་དུ་དྲེགས་ཚོགས་བདུད་པོ་འབུམ་གྱིས་བསྐོར། །ཁོལ་མོ་ཡང་ཁོལ་བྲན་གཡོག་བསམ་མི་ཁྱབ། །ཉི་ཟེར་རྡུལ་ལྟར་བསམ་གྱིས་མི་ཁྱབ་པ། །ས་དང་བར་སྣང་ཀུན་ཀྱང་གང་བར་འགྱུར། །འཐོར་རླུང་འཚུབ་མ་ནག་པོ་ཀྱི་ལི་ལི། །བསྐལ་བའི་མེ་དཔུང་དམར་ནག་ལྷབས་སེ་ལྷབ། །ནད་ཀྱི་རླངས་པ་སྔོ་དམར་ཐིབས་སེ་ཐིབ། །མཚོན་གྱི་གྲུ་གུ་ཆར་ལྟར་སི་ལི་ལི། །དྲག་པོ་ཐུན་གྱི་སེར་བ་ཤ་ར་ར། །གནམ་ལྕགས་ཐོག་གི་བུ་ཡུག་ཚུབས་སེ་ཚུབ། །ཞེ་སྡང་སྦྲུལ་ནག་ཆུན་པོ་ཉི་ལི་ལི། །སྟག་སྤྱང་གཅན་གཟན་ཚོགས་ནི་འདུ་རུ་རུ། །བྱ་རོག་འདབ་ཆགས་ཚོགས་ནི་འཕུར་ལྡིང་གཡོ། །དོམ་དྲེད་ཁྱི་ནག་ཚོགས་ནི་ཀེངས་སེ་ཀེང་། །ལོག་འདྲེན་གནོད་བྱེད་འདུལ་ལ་མཆོག་ཏུ་བསྔགས། །སྔོན་ཚེ་གནོད་སྦྱིན་རྫོང་གི་བྲག་ཕུག་ཏུ། །ཡང་དག་དཔལ་ཆེན་བཅོམ་ལྡན་ཧེ་རུ་ཀས། །དམ་ཚིག་བསྒྲགས་ནས་དམ་ལ་བཏགས་པ་ཡི། །བཅོལ་བའི་ཐ་ཚིག་གཉན་པོ་མི་དྲན་ནམ། །བར་དུ་བྱང་ཤར་ཡོངས་འདུས་ཤིང་དྲུང་དུ། །སློབ་དཔོན་ཆེན་པོ་རྡོ་རྗེ་ཐོད་ཕྲེང་གི །དམ་ལ་བཏགས་པའི་མ་མོ་ཆེན་མོ་རྣམས། །སྔོན་གྱི་གཡར་དམ་གཉན་པོ་རྗེས་དགོངས་ཤིག །ཐ་མ་ཡང་ལེ་ཤོད་ཀྱི་བྲག་ཕུག་ཏུ། །ཕུར་བ་གྲུབ་པའི་དྷ་ན་སཾ་སྐྲི་ཏས། །ལྕེ་ལ་ཨརྒྷཾ་ལག་ཏུ་རྡོ་རྗེ་གཏད། །ཇི་ལྟར་ཞལ་བཞེས་ཁས་བླངས་དྲན་མཛོད་ཅིག །དེང་ནས་བྱང་ཆུབ་སྙིང་པོ་མ་ཐོབ་པར། །མི་མཐུན་བར་ཆད་དགྲ་ལས་རྣམ་རྒྱལ་ཞིང་། །མཐུན་རྐྱེན་ལེགས་ཚོགས་ཡར་ངོའི་ཟླ་བ་བཞིན། །གོང་ནས་གོང་དུ་འཕེལ་བའི་ཕྲིན་ལས་མཛོད། །ཉི་གྲགས་ལྷ་མོ་སྔགས་བདག་མའི་རྟགས་བསྟོད་ཡོངས་འདུས་ལྗོན་ཤིང་ངམ་མ་བརྒྱ་མ་ཞེས་སུ་གྲགས་ན་འདི་ཉིད་རེབ་ཀོང་སྔགས་མིང་གི་གྲལ་དུ་གཏོགས་པ་སྨད་པའི་སྔགས་ཁང་དུ་བདག་དང་ལྷན་ཅིག་ཏུ་སྔགས་མང་སྔགས་པ་སུམ་བརྒྱ་ལྷག་ཙམ་གྱི་སྔགས་བདག་མའི་བསྐང་གསོལ་འདོན་སྐབས་ཉམས་དང་མཚན་ལྟས་ལེགས་པོ་བྱུང་བས་དེའི་རྐྱེན་གྱིས་རྟགས་བསྟོད་འདི་ལྟ་བུ་ཞིག་བརྩམ་དགོས་རྒྱུ་ཡིད་ལ་ཤར་བས་ལྕགས་ཕོ་ཁྱིའི་ལོར་ལྷ་མོ་དགྱེས་པའི་རྨིས་ལྟས་བཟང་པོ་བྱུང་བའི་ཡོས་ཟླའི་དམར་ཕྱོགས་མཁའ་འགྲོ་འདུ་བའི་དུས་ཆེན་ཉིན། ཨོ་རྒྱན་བསམ་བཏན་ཆོས་གླིང་གི་ཕོ་བྲང་ཆེན་པོའི་ཡང་རྩེ་མགོན་ཁང་དབང་དྲག་རོལ་བའི་ཞིང་ཁམས་ཆེན་པོ་ནས་རྫོགས་སྤྲུལ་ལྔ་བ་ཐུབ་བསྟན་ཆོས་ཀྱི་རྡོ་རྗེས་ཤར་མར་བྲིས་པ་ཡི་གེ་པ་ནི་རིག་གྲོལ་ཡོན་ཏན་རྒྱ་མཚོའི་བདག་ཉིད་དཔལ་ཡུལ་བླ་མ་པདྨ་ཤེས་རབ་རྒྱ་མཚོས་བྲིས་པ་འདིས་ཀྱང་ཆོས་ལྡན་གྱི་རྒྱལ་ཁམས་ཐམས་ཅད་བདེ་ལེགས་ཕུན་སུམ་ཚོགས་པའི་རྒྱུར་གྱུར་ཅིག །སརྦ་མངྒ་ལཾ། །