ལྷ་ཆེན་དབང་ཕྱུག་ཆེན་པོའི་གསེར་སྐྱེམས་འདོད་ཡོན་སྤྲིན་ཕུང་ཞེས་བྱ་བ་བཞུགས་སོ།།
སྣང་སྲིད་རྣམ་དག་ནམ་མཁའ་ལྟ་བུ་ལ། །སྣ་ཚོགས་མཚན་མའི་རྟོག་པའི་ཡུལ་ལས་འདས། །མ་སྐྱེས་གདོད་མའི་དབྱིངས་ལས་མ་གཡོས་ཀྱང་། །རང་རྩལ་འགགས་མེད་ལྷུན་གྲུབ་རོལ་མོའི་སྤྲིན། །དྭངས་བའི་མཁའ་ལ་འཇའ་ཟེར་འཁྲིག་པའི་ཀློང་། །ཆུ་སྐྱེས་གེ་སར་བཞད་པའི་དཀྱིལ་འཁོར་དབུས། །ཐབས་ཤེས་ཉི་ཟླ་འབར་བའི་གདན་སྟེང་དུ། །གར་གྱི་དབང་ཕྱུག་དཔལ་ཆེན་བཀའ་སྡོད་ཆེ། །ཁམས་གསུམ་དྲེགས་པ་ཀུན་གྱི་ཆེ་བཙན་པ། །འཇིག་རྟེན་མེས་པོ་ཁམས་གསུམ་ཀུན་གྱི་བདག །དབང་ཕྱུག་ཆེན་པོ་ཤྲཱི་རལ་བ་ཅན། །མདོག་དམར་པདྨ་ར་གའི་ལྷུན་པོ་ལ། །ཉི་མ་འབུམ་ལས་ལྷག་པའི་འོད་ཟེར་ཅན། །ཁམས་གསུམ་དབང་སྡུད་གཞན་ཡིད་འགུགས་པ་པོ། །ཆགས་པའི་ཉམས་ཅན་སྒེག་ཅིང་ཁྲོ་འཛུམ་ཅན། །ཞལ་གཅིག་ཕྱག་གཉིས་ལྕགས་ཀྱུ་ཞགས་པ་བསྣམས། །ཞབས་གཉིས་གཡས་བརྐྱང་གཡོན་བསྐུམ་འདོར་སྟབས་བཞུགས། །དབུ་སྐྲ་གནག་སྣུམ་རལ་བའི་ཅོད་པཎ་ཅན། །ཟུར་ཕུད་དཀར་གསལ་ཟླ་བ་ཚེས་པས་བརྒྱན། །བདེ་བ་རབ་རྒྱས་གཅེར་བུ་ལིང་ག་བསྒྲེངས། །སྣ་ཚོགས་དར་གྱི་སྟོད་གཡོག་ཅོད་པཎ་འཕུར། །རབ་མཛེས་ཨུཏྤལ་དམར་པོའི་དོ་ཤལ་ཅན། །སྣ་ཚོགས་རིན་པོ་ཆེ་ཡི་རྒྱན་གྱིས་བརྒྱན། །དབང་ཕྱུག་ཆེན་པོའི་སྐུ་ཡི་གཡོན་ཟུར་ན། །གསང་བའི་ཡུམ་ཆེན་ཨུ་མ་དྷེ་ཝ་ནི། །དམར་གསལ་མཛེས་འཛུམ་ལང་ཚོ་ཆགས་པའི་ཉམས། །ཕྱག་ན་ལྕགས་ཀྱུ་ཞགས་པ་འཕྲུལ་ཐབས་ཅན། །དར་དང་མེ་ཏོག་དམར་པོའི་རྒྱན་གྱིས་སྤྲས། །གཅེར་བུ་གནག་སྣུམ་དབུ་སྐྲ་ཐུར་དུ་འཕྱང་། །རྟག་ཏུ་ཡབ་ལ་རྗེས་སུ་ཆགས་པའི་ཚུལ། །གསང་བའི་ཌཱཀྐི་ལྷ་མོ་རྣམ་པ་བཞི། །འབུམ་ཕྲག་ཡངས་བའི་འཁོར་ཚོགས་བསམ་མི་ཁྱབ། །སྐད་ཅིག་འདིར་གཤེགས་དགྱེས་པའི་གདན་ལ་བཞུགས། །ཕྱི་ནང་གསང་བ་སྤྱི་དང་མཐུན་པའི་རྫས། །ཁྱད་པར་དྲི་ཞིམ་རྒྱ་ཇ་ངད་ལྡན་པ། །བཅུད་ལྡན་བདུད་རྩིའི་རྦ་རླབས་འཁྲུག་པ་ལས། །ཡེ་ཤེས་ལྔ་ཡི་འོད་ཟེར་རྣམ་པར་འཕྲོ། །འདོད་ཡོན་རྒྱན་གྱི་མཆོད་པའི་སྤྲིན་ཕུང་སྤྲོ། །ཟག་མེད་ཡེ་ཤེས་བདུད་རྩིར་བྱིན་རླབས་པ། །རིན་ཆེན་སྣ་ལྔ་བརྡར་བའི་ཞལ་སྐྱེམས་འདི། །དབང་ཕྱུག་མ་ཧཱ་དྷེ་ཝ་འཁོར་བཅས་མཆོད། །དེ་ལྟར་གསེར་སྐྱེམས་ཕུལ་བའི་བྱིན་རླབས་ཀྱིས། །གར་གྱི་དབང་ཕྱུག་པདྨ་ཧེ་རུ་ཀའི། །བཀའ་ཉན་དྲེགས་པ་ཡོངས་ཀྱི་གཙུག་གི་རྒྱན། །ལྷ་ཆེན་དབང་ཕྱུག་མ་ཧཱ་དྷེ་ཝ་ཡིས། །སྔོན་གྱི་དམ་ཚིག་གཉན་པོ་རྗེས་དགོངས་ལ། །ཚེ་འདིའི་མི་མཐུན་རྒུད་པ་ཀུན་ཞི་ནས། །ལས་བཞིའི་ཕྲིན་ལས་ལྷུན་གྱིས་གྲུབ་པ་དང་། །ཁྱད་པར་ཡིད་ལ་ཅི་འདོད་དངོས་གྲུབ་ཀུན། །ཐོགས་པ་མེད་པར་མྱུར་དུ་འགྲུབ་པར་མཛོད། །ཅེས་པ་འདི་ནི་བསྟན་ལ་ཕན་པའི་ལྷག་བསམ་དག་པས་མེ་སྦྲུལ་ཟླ་ཚེས་ལ་རྫོགས་སྤྲུལ་ལྔ་པས་བྲིས་པ་དགེ་ལེགས་སུ་གྱུར་ཅིག །